1. Si Vāi Mai Dam

Si vāi yāox mōh dix ba dīng rīang ndaex si nax bāox, gēd dix mōh si mīang, mab dix mūan bāox dix gū si ndāeh. Ja dīen dix sang nqax būi gah ja nab nqax, ja dīen dix sang gīad būi gah ja nab gīad. Njāo nin gīe nieh, gū jē gū jōng hoig gin ndaing hlad ndaing ndaing gōuing gah noh.

Goui dīx ngāix, si vāi hu houig hod braog rom glong dīx ndaeh, noh yāox dam dīx mu, noh ah nin gah dam an: “Īh, dam, maix gouh yāox houig ex hod glong, gouh gouh houig nang gah, geem ang maix hklad rom glong si man dix dou laih?” Dam bog loux noh ah nin: “Rom glong yūh nin ngīe, ang ex ndouh hlad gah, geem ang maix dōng ex mōh si mīang jē ba oud ndaex rom laih?” Si vāi hngiad dix hmoung loux dam, ang ndouh jō ndaex hrom noh bīe jeeix gox, noh hoig gin meed hrom gah, noh mgrōm ah nin gah dam: “Māeng ba nbrai yūh nin, gouh dīng loux kom goui gaex jao dix nding ngīe,” Dam ang nbrax gīeh nsi vāi hoig ah loux jīe dix, mgrōm nbāox nin mai: “Bīe maix gox, ang maix ndouh bēix ex gah hu ndaex rom, gīeh maix hmaing ang mōh, sang gīeh maix ax yūh si laih dīang rom glong in laih?” Si vāi hmoung loux dam, mgrōm ah jīx nan mai. “Kom mōh nan,” dam nbāox lōi dix nin, “Ja houig maix ndaex rom glong in kaix, maix sae rīang vuad si ndax dix si vēui dix, in mōh sang gīeh ex dix dōng sēe sang houig maix gah kaix.” “Jīx,” si vāi ah nin.

Giex yāog dix dīang rom glong pao, dam nbrīex lōui dix gib dōuih si ndax si vāi, si vāi gon ang ndouh dōng dīd dix, ja dīang ngīe rom jīe dix. Houig ndaex mgrēng rom pao, noh nyon vuad si ndax dix blag vēui, ndum mox ndum an, dam mgrōm dū dāx bloi si ndax si vāi, hu jōud ah bōg nan bīang diex doi glong blag dieh, mgrōm ah nin mai: “Mgāig in, ex houig vēui, dee mōh ex ba bēix.” Si vāi hmoung loux dam, bloi ngai dix blag vēui, dam rūg hoig ngōm dix laex dix doi glong dien, si vāi ang lai goui loux lāo.......

2. Yūh Gah Mox Si Vāi Lai Ang Ih Grag

Ang si vāi ih nēix grag, ang mōh njāo hlad si vāi gah grag gah njāo lang rung grag ngīe, gon mōh njāo hoig deem hoig mgō grag noh dīx nbōg ndīx. Gāing mōh ūh nin ndīx:

Goui dīx ngāix, si vāi duah hnyee, houig blag nbōu, noh sae dix gōg hnyee, lōng grax ing. Houig gah mgah grax dīx ndaeh, noh hmoung dāeg dix, noh dom hu nyaeh dix ngōm braog grax mai dēei dix mūan loi si māox. Ah būi mūan ngū hax mūan gax dou. Noh nyōm doing doing loi si māox dāe, nab yaoh gah rub ngū gah hnyee gōg dix, hoig sang hax yūh gaex noh.Noh yāog bū bāb diix gaoh dou, dou nyeig ngū nīad dix dīng nyeig, gāng gōi yāox noh, yōu dix ah “Dou līh njēe, dou līh njēe” nan gah noh. Si vāi hmoung loux gāng gōi, bū bāb dix dou līh njēe. Mōh noh dou nyeig, ngū ja nīe nīad boud dix dīng nyeig, ang jīx yeed; bēix rang ba oud gah bīang mgōng ndēe hlaong dīx mu yāox rub ngū gah gaex si vāi, yōu dix ah “Dou haog nblāong, dou haog nblāong” Nin gah noh. Si vāi hmoung loux bēix rang, nbāox ndēeih mgaix dix dou haog nblāong grax bīang mgōng. Si vāi nīe dou, ngū nīad dix dīng, houig gah dōuih nblāong, ngū nīad dix jī lōu ngīe gah gaex si vāi.

Houig pao, grag ba lū līeh dix ndaex hnong jāong mgōng sein dīx mu goug bian gah yūh nin, noh dom bloi loux yōu ah “Dou līh din, dou līh din” nin gah si vāi. Si vāi hmoung loux yōu grag, dom nbāox ndēeih mgaix dix dou līh gah grag sein. Houig noh braog hnong oud grag ndaex, ngū gon jī lōu ngīe gah gaex jao noh, grag dom yāog dix gaoh jūng, vuad vuad rom si ndax dix gah si vāi dien, ngū dom dāeg oud nyeig iag nyeig, dom gōi yeed mai kaix. Kom mōh nan, haeg si vāi hoig ndēix sang uig brōui, kaix hoig hvao ngū ndīx dom dīeh doud dix mōh bag beng si vāi dom in si ngāix. Yām an ndīx, kee qaox nīe dīng ngū gah si vāi mai jō npaeng dix dīng gah, ngū gon bōun houig dix vōuyig grag dom ndaex hnong, gon bōun gīeh mgreem ngōg grag brōui, houig dom ngāix, mgreem ngōg grag geem bāing gū mu, in gix kaix brōui yām an ndīx heui. Njāo hoig mgō grag si vāi yām an ndīx, houig dom in si ngāix, si vāi dom ang ih nēix grag gah houig dom ngāix.

3. In Rāeh Mōh Kri Ah Geeing Heui

Kom hoig mōh Ai giex Nyī si nō dīng, gon ang ndouh nyang jīx yūh gāing nqo dix ih, gah ang ndouh jīx yūh dīd dix, ja mōh som id som oud nan ngīe gū ngāix gū som. Mīex giex hoig ndōg mgrai ngai dom yām iag giex, giex ja ndū ngīe dix gah geeing dix kom oig gūad soung geeing dix.

Goui dīx ngāix, geeing giex hoig gin nīe saex, dōng hoig sang yūm dix, geem goug Ai giex Nyī houig hod tin id dix mai ah nin gah giex: “Ai bax Nyī, ex ang dāe dix lai hreeng glōd mai bax, ex gah yāox dix brah dīd dix mai bax. Kom mōh nan, ex gon si nbaeng kri gah mgōng diuh,” loux grāi noh ang nbrax si ndāeh, mgrōm veig ndūd hrom mai. Kaix hoig si nbaeng giex geeing dix, Ai giex Nyī yāog dix dēei ko gaex māg, hu gah mgōng njī geeing dix vēui sang ndūd hrom dix.

Houig giex jāong mgōng an, giex lai lai qog bāox dix gah sēe ndēe hnie geeing giex dix si nbaeng kri gah, giex ang dōng bīe dīx gaex gox. Nin gīe nieh, giex dom njāeh dix bāog jāong mgōng haog gah bīang mgōng. Giex hoig bāog noh mīex ngāix mox nieh, mīex ndīng mox nieh, ang ndūd yāox kri ah geeing dix. Giex yāog dix bloi ngai dix gah mgōng gū dāeh, dou ma sae būi hoig glāi si im ngīe, giex hoig gin mgouing hrom hri ngīe gah. Houig ngāix kaix, giex geem ja vīex si mīe hngoux goui ndaex nyīex dix hruad kaix ndēe hoig bāog dix mai ja nbāox boud mgōng an. Dīx ngāix lūan kaing dīx ngāix, dou ma oud nyeig hvuan nyeig, dīng nyeig, kaix bāog Ai giex Nyī oud nyeig gah vīeh nyeig nang, houig gox gah dom bāog giex noh houigf ndēe ang dix lai jīx yāox jāong mgōng meei sēe ndēe hruad giex si mīe hngoux. Houig ngāix dīd, yāog giex dix mgī blag yaong, goug bian ngīe nqom si mgraing si ngāong ngīex ndaex ma būi gah gaex dou ma, giex geem ang lai goui hrom dix sōg kri ah geeing dix, yāog dix ndēeih glom ko dix ing. Houig giex mgrēng mgōng, yāog dix bloi ngai dix kaix ndēe bāog dix jāong mgōng sein, yāox hoig mōh hngoux ba si dōm si mgraing ngīe sein, giex lai mgoung ngīe ngai dix gah bāox dix mai ah dix nin: “In mōh kri ah geeing heui!”

4. Ai Rāi Gon Ndoui

Ndīx ndīx, goui gon ndoui dīx gaex gaex Ai Rāi. Ai Rāi ang goui nyīex ang goui yaong, ja vū vīed vū vā ngīe dix gū si ndāeh, hu ndaex dīag ndaex dū log dou dīag nan.

Goui dīx ngāix, noh noi dix id ndaex dīag, māing gīad noh kom id noh, hnam uig jīa ngīe. Noh geem hrad hlax kaox oud braog dix dix od hnam dix gah, daix mox daix an, hnam noh hyid heui, kaix ndēe gīad māing an gah ang lai goui leeix gox. Noh hoig ndaox ngīe gah, noh geem nbrēix dix briex hlax kaox an, vīex noh hod dix gū ndīang ndīg. Noh hu houig ndaex rāog kaox dīx ndaeh, yāox sim yūm dīx mu, sud dix bīed gah hlax kaox an, sim an nab jīx ndēeih nbrax, sim an hoig ndaing hnyab yūh hrom Ai Rāi, hnie dix sang mgō noh. Ai Rāi hu lai līng gah ndaex rāog kaox rāog oux, hoig bōun ndēeih gīeh dou dīag hoig yūm ndēeih glōd mīex nyāo, dou dīag kein gah hoig mgō noh mīex nyāo nang.

An dīx ngāix, Ai Rāi hu houig gah yaong dīx ndaeh, noh bōun bai ndēe mad ndēe saex būi gah hlax dix na ra loui gaex. Būi hoig ndaing si mgāex si mgong mai noh gah, hoig ndaing muih noh gah nyāo.

An dīx ngāix, noh nbāox houig gah yaong dīx mu, rōg dix id nyīex yīex gūad ndūg dīx gaex. Houig bōun som, noh ndaox gah hmoung dix loux yīam yīex gūad an, noh don hu qog, yīex gūad grāi gah mōh ia mīex eei dix ba yūm. Ai rāi nyō yīex gūad, ang jū noh yīam, ah nin: “Yīex, bō lai keing yīam, ex log ndēeih gīeh ia mīex maix nbrax.” Hoig ah noh nan, noh yāog dix dēei hlax vīex dix, bīed ia an gah, mīex ia an yāog dix ndēeih puih dou bīang diex dien, yīex gūad yāox ndēeih nbrax ia dix, hoig ndēeih mgāex hrom gah, yūh nin gīe nieh, noh dom dēei dix briex Ai Rāi, kaix an, Ai Rāi nbāox bai ngai yīex gūad nbrax nang gah hlax vīex dix.

Goui dīx ngāix, Ai Rāi hmoung loux yīam nyīex jao mī dīx nyīex. Noh hu mgāig, yāox gah mōh gon nbun nyīex jao mī ba yūm dīx gaex, noh nbrēi dix mgāig ngai nbun yūm an, jō mōh nbun hoig dox noh nyāex rom yām vū vīed vū vā noh dix dīx nbōg nāox, jō dix gaex i. Noh dom ah nin gah nyīex jao mī an: “Bō beix lai yīam, ex log bai noh ndēeih nbrax.” Yām njāeh, jūb nyīex jao mī, jei mōh dīeh noh dix, ang ndouh hngiad loux noh bīe jeeix. Noh ja yūh lūng nyō gix, ang jū gix yīam. Gix hoig dēeg hrom, yaōx nyō Ai Rāi dix yūh nin, deem bog loux noh ah nin: “Ja mōh bōun bai maix noh ndēeih nbrax, sang hmaing maix dix jīe dix dix yix log rāeh dox!”

Ai Rāi yāog dix dēei hlax vīex dix, bīed noh gah I. I rūg yāog dix ndēeih haing. Yāog noh dix nblaih ngai dix, yāox gah mōh Ai rāi ba bai dix ndēeih nbrax, dom hmaing dix sang mēix Ai Rāi. Nyīex jao mī yāox hoig ndēeih nbrax I, hoig gin mgāex hrom gah. Kom mōh nan, gix ang jū dix gīeh I mēix Ai Rāi, kee njāo houd noh, yog noh, ang noh dīe goui dīd dix. Ai Rāi ndaing saex hrom gah nyāo nang, njāo ndaing laig hrom noh gah I, gin mīex dix yāox dix sāng nyīex mai I. Noh yāox yūh nyīex jao mī nan, noh dom dou dix hu ndaex dīag, hu grāi bāox mgrōm dix hmoung gāing jō dix mai hag gix mgō dix gēd gah sang dix dix yūh. Dou dīag gū jēe jān ba hoig mgō noh an gix, hmoung loux grāi noh, hoig gin meed hrom gah, gix deem hmaing dix sang deem Ai Rāi nbog in gū gaex. Lag mai gaong nyon doud ngū ing mgrēeing nyīe jao mī gah, si vāi giex grih yāog ing ndū ndig ndaex nyīex jao mī, sang yāog dix sang gīad gix yūm. Nyīex jao mī hoig gin hlad mgrēng gah, geem dāeg jū dix dox I mēix Ai Rāi.

Ai Rāi giex I hoig mōh mēix mōuing pao, hoig dang goui nyīex goui yaong. Nyīex giex uig si mgouig si mgong ngīe, sim saig lai gīang, grih si vāi kom dou dīag gū jēe gū jōng uig houig dix gīex nyīex yaong giex si nūm si nbūa ngīe si nqeeng si nqai. Yūh nion gīe nieh, yeix bāox gei I hoig ndaing si mgouing gah nyāo, dom sang yūh lūng dīeh i, yūh dom bōun dēei dix dix jīe hlax kaox jīe Ai Rāi an. I ang lai bōun gān nyō gha dīeh yeix dix, dom dox yeix jīe hlax kaox jīe Ai Rāi. Yeix hoig yāox dix jīwe hlax kaox jīe Ai Rāi pao, hoig gin mgāex hrom gah, ang lai jīx lāig id lāig dūm gox gah, ang lai jei gox dix yūh gāing nqo hu ma goi gox gix gah. Noh ja yūh lūng rīan hlax kaox an, mai ja dēei boud dix mgāig lox lox . Goui dīx ngāix, noh nbrīex vīex dixmgāig hlax kaox an mgreem rīang kix, dāex houi noh noh līh, yaoh gah lōui kix daix dix dēei dou haog ndaex rom ma lāong, hu nyeig hlaong nyeig, hu nyeig lūan nyeig.......

Yeix ang lai dōng gah yūh dix, dom hu grāi mai Ai Rāi. Ai Rāi dom dōm nbong dīx haog gah ndaex kix, bloi gon soux mōh jao haog dēei dix mu. Mglang haog soux gah ndaex kix lāong, njāong nbong hram gah hlong mgrēeing noh, nbong boud mai. Gon soux an ang lai dōng gah sang līh dix, dom jēen oud ndaex rom ma mai kix lāong. Soux oud mai kix ndaex rom ma, nag dīe goui ba ih ba un, noh dom ih gon kix dīx kix dīx mu. In si ngāix, log eix yāox uig kix gū kix, mai yīe yāox eix uig kix, ah eix ih soux kix, an mōh soux ba ih gon kix heui......

5. Ai Giex Nyī

Ai giex Nyī dāeg sang yāog dix mōh si nō, mīex giex ang lai goui, giex oud ngīe mai geeing dix ngīe. Houig nūm dīd, jō si npom dīng, geeing giex gah ang lai bōun yūh gāing gah hoig gūad dix, jēe ba ih ba un ang lai goui ndaex nyīex bīe jeei gox. Yūh nin gīe nieh, Ai giex Nyī dom krom dix hmaing dix sang hu jōuih geeing dix.

Houig ngāix kaix, giex rūg sae dix si mgrong geeing dix gah kaox si mgrong, sang hu jōuih noh gah laih. Hoiug mgrēng grax, geeing giex ah nin gah giex: “Ai bax nyī, sang jōg lōng ex dix, viex bax dah ex līh dīx vūd ha.” Ai giex Nyī dah geeing diox bīang diex, gīeh noh hu jōg lōng dix braog grax. Oud dīx vūd, geeing giex nbāox yōu giex ah nin: “Ai bax Nyī, vīex bax hu din dīx vūd ha.” Ai giex Nyī hu gah geeing dix, geeing giex yāox hmeem sim dīx mu, gon sim goui gah ndaex ro loui mu, gon ngāi ngīe. Geeing giex nji giex yāox hmeem sim an mai sae dix mgian dix bīang, gon siman gix njiad ang ang mōing dix vēui mgian geeing giex, geeing giex ah nin gah giex mai: “Bax ja mgāig dix yāox gon sim in gix, yām iag yām o bax ndīx, bax yūh nin log gon sim kein nang, ang ang mōing dix vēui mgian ex nin nang, mōh ex ba ka hrom dix peix bax som gū ngāi gū som log peix mīex sim in gix gon sim in gix ih gūh nan, bax dīng daix lang jāong ngāix mgah sang jōuih ex yūh gah mox, ang bax dōng ba yūh ex gah dix yām iag yām o dix ndīx......” Ai giex Nyī mgāig ndaex hmeem sim an, yāox gah ang ang gon sim mgāoh dix si vēui mgian geeing dix, dāeg ndēeih ndouh hrom gēd, giex dom ndēeih krei dix būx geeing dix ing gah nyīex.

Gix ndēeih houig gah nyīex pao, giex ah nin gah geeing dix: “Geeing, yām iag yām o yiex ndīx, mōh maix ba hoig yūh gāing yūh nqo, hoig ka hoig doung dix dang yiex, ngāix, yiex hoig dīng daix lang jāong, hoig ko dix dang jīx yūh gāing, pao sax, yiex ang ndouh lai gīeh maix ka dix dix yūh gāing, ang ndouh lai hu kaing nyīex kaing yaong, ang ndouh lai gīeh maix līh gah diex gah dūb, maix ja mōh jao yūh eix ih brīex brēem ngīe keing.” Kaix an, Ai giex Nyī nbrēi dix briex geeing dix dom hmom, rīan noh om rīan būi dom ia nan, ang ndouh sax ah loux jāox gah geeing dix bīe dīx mgūm gox, gah ang ndouh gīeh geeing dix yūh gāing nū gāing gīan bīe dīx daix, ang ndouh gīeh geeing dix ih brīex ang nyōm bīe dīx mgūm, yāox brīex nyōm dīx mgūm gah ang bōun ih mgreeb ngai geeing dix, gon ran gēd geeing dix gah vēui. Ja gīeh noh mād dix mōh jao oud dix yūh brīex ngīe, bēing rom sang sīao noh, kix sang daeng noh gha hoig gīeh grēih ndaex nyīex mai noh.

Goui dīx ngāix, hliex dīng līh, Ai giex Nyī ang nyang houig keing ma, geeing giex hoig gin ki hrom gah, ja baoh boud si vīex dix njīang gah houig giex. Mīex nbōg mox nieh, mōh noh mgāig lai mox ja ang boud yāox houig giex.Nbōg dīd, noh nbāox baoh dix njīang gah houig giex, ndum mox ndum ndum an, kiab jō līh, rīang yūh brāix glong, yaoh gah mgrai dix mai, mōh si yōng ba lōd noh hu. Ai giex Nyī houig leing ma pao, mgāig ndaex nyīex, ang yāox geeing dix, njīang ndaex nyīex gū dāh gah ang yāox, qog nyīex seih, nyīex seih hmaing dix ang yāox, hmaing nyīex laong, nyīex laong hnie dix ang dōng. Giex ang lai dōng ndēe sang hu dix sōg geeing dix, hoig dēeg hrom, ja mōh ngīe yīam geeing dix. hoig ndīe hrom giex, giex dom hu sōg dix qog njai gah. Njai ah nin gah giex: “E, gon bax, geeing bax leix hoig hu keing eix. Kom mōh nan, bax dēei gam si man hu ndaex rom glong, nīen gam ndaex ndūng mox kaix bax dom vīex ndaix、 sibēed、 mgong hriam sōg geeing dix ndēe an.” Giex rūg hngiad loux njai, krei dix vīex grāeng ah njai hu mai si man dix gam ndaex rom, glom grāeng an gix hod kaix gam braog glong.

Gam si man giex njiad rūg gah ndaex ndūng dīx ndaeh, giex dom dēei si bēed ndaix vīex dix an gix, doing rang oud braog ndūng an gah. Dāeg doing giex noh dīx vūd, gon gax dīx mu yāox dix houi dix līh keing ndaex ndūng, haog ah nin gah giex: “Vīex bax bō lai doing rang nbaoh in din, lag hled bax dax yix, laex noh dix......” Ang noh nbrax hoig lāo loux, Ai giex Nyī nyon mgiex dix doung dix ih noh. Houig kaix an, giex nbāox doing rang an gix, dīx vūd kaix, nbāox mōh gon si uing ba nbāox houi dix līh keing ndaex ndūng, nbāox haog ah nin gah giex: “Vīex bax bō lai si loh dan liag, ang dax yix nyōm noi dix gah,” Dāeg sang ndēeih mgaix noh dix lāig ndaex ndūng, Ai giex Nyī nbāox mgiex dix piag noh, nbāox doung dix ih noh. Hoig ih giex noh, nbāox doing rang ah nbag nbag nan braog ndūng an. Oud dīx vūd, mōh gon si yōng ba houi dix līh jīe dix pao, noh haog ah nin gah giex: “Mōh yix bloi būi haog mīex gaex dom lai laix mīex gaex, mōh yūh gah mox?” Giex mgiex dix piog gon si yōng an mai kaox hod glong, mai qog geeing dix gah noh ah nin: “Oud geeing yiex ndēe mox? Maox ang grāi yiex hmoung ndēe oud geeing dix, yiex bāeh geeing maix yāox maix heui......” Gon si yōng an ah nin: “Yix dāeg bāeh mōi dīx mu gox, yix gon een gaing bīang mgraih, nbāox lai jō geeing bax laih, vīex bax hu mgāig yāox.” Gon si yōng an vīex giex lāig ndaex ndūng sein, hu mgāig gaing mōi ah noh bīang mgraih. Ai giex nyī yāog dix mgāig, rūg jō gaing geeing giex. Ang lai dōng gah sang yūh dix, geeing giex hoig mōh būi yūm, ang dīe lai jīx sou gaoh vaoh jūng, giex dom hmaing si yōng dox rēeih geeing dix, hmaing si yōng sei dix ih. giex hod gon si yōng lāig ndaex nyīex si yōng, dax si yōng qog ba sang jīe giex, giex dom dix jīe mgon dīx māg. Dax si yōng yāog dix lōd vāig lang līh dīx māg, dox noh gah giex, dom giex gah loux ah nin mai: “Dox jō bax si nbaeg, dox dīang bax si nbaeg grax ing dix kaix, bax bō ndouh douig vāig in kaing ndaex mgīang.”

Giex yāog dix hu kaing nyīex si yōng pao, hoig hu giex mīex nklang mox nieh, jō boud dix sang dīang si nbaeg pao dīx mu. Dāeg houig gah bīang si nbaeg an, giex njiad līh gah loux dom dax si yōng dix gah, giex gēd dix yāox, uig ndaing ndaox ndeing gah, giex dom hmaing dix douig yāox dix mgāig. Dāeg douig giex dix sang mgāig vāig an, yaoh gah hmoung ngīex dix loux ah “kling” nan dīx mgūm, vāig an qug qid, sin baeg njiad ndūd si nax giex, dand vuad giex hu dīx gaex dīx blag, ai jō dix vuad dix ing blag nyīex, nyī vuad dix blag brāix. Kaix an, giex dang hu dīx gaex dīx mgōng. Ai ba ing blag nyīex, ja ing yūh gāing ma om ndīx, ang jīx mī jīx lāoh. Nyī ba hu blag brāix, ja hu yūh dix ih lāi mgēe, nbōg yām hreeng hreeng, hoig yāox grax nyōm oud si u goui, hoig yāox dix ih brīex nyōm rom hloung.

Hoig goui mīex nūm mox nieh, nyī ndēeih ing gah nyīex. Noh hoiug braog yaong, yāox rāo kaox dīx mu yod log sūb dīx mu. Noh nbrēi dix mgāig log sūb yod yīex rāo kaox an, jō dix mōh log sūb jīe ai gix, nyī dom hu hrun, lāog yīex rāo kaox an yūm gah, vīex log sūb ing gah ai gah nyīex. Houig noh gah nyīex, ai mgrōm qog nog: “Nyī, geem ang miax ou dix ndaex ma sein nux laih?” Nyī ah nin: “Ang ex nbrax yāox mōd dix, yāox ngīe ex yīex rāo kaox dīx gaex, yāox ex log sūb maix gah noh, ex dom si mgrang kaing noh, noh ang jū dix dox, ex dom dog yūm, dom dāeg bōun dēei log sūb maix kaing noh nux.” Ai hmoung loux nyī, hoig gin saex hrom gah, nyon dix blā loux yīam. Nyī uig gin naox gah, noh dom qog jēe yīam. Ai ah nin gah noh: “Ang maix dōng noh mōh ou dix heui!” Nyī nyō ai, ah nin gah ai: “Ai, bō sīao ki, ex log nbāox sōg maix goui mōuing kraox.”

Nyī nbāox houig nbōg kaix, rūg vīex nbun houig gah nyīex ra gaex, an dīx gaex mōh mōung noh, an d1ix gaex mōh ou noh, mōuing ai......

6. Gon Ndoui Nbrīex

Goui mīex māi dīx gaex, oud mai gon dix dīx gaex ngīe, gon noh hon iag gon o, ang nyang dōng brāix glong. Goui dīx ngāix, gon noh sud nyēix blag brāix dīx daix, vīex noh houig gah nyīex. Noh dox noh gah mīex dix ahnnin: “Mīex, in nyēoix sud ex nbing yaong.” Mīex noh rīeb nyēix an, yō gon dix ah nin: “Gon lāoh ex, yāox nyēix njiad dōng dix vīex ex sīao gah nyīex.” Houig kaix an dīx nūm, gon noh nbāox ia blag braīx dīx mu, noh hnyub dix vīex ing gah nyīex, nbāox ah nin gah mīex dix: “Mīex, in ia yāox ex blag brāix.” Mīex noh nbāox rīeb dix braig ia an ndaex ndang, nbāox yō gon dix ah nin: “Gon lāoh ex, yaōx ia blag brāix, njiad dōng dix vīex eix eei.” Nbāox mōh kaix an dīx nūm, gon noh hu ndaex dīag, yāox blix ding dao ndaex ma būi uig ji luh ji luh ngīe, noh bieh noh ing dīx mu, vīex noh houig gah mīex dix ndaex nyīex, nbāox ah nin: “Mīex, in blix ding dao yāox ex blag brāix.” Mīex noh rīeb blix ding dao an dix briex, nbāox yō gon dix ah nin: “Gon lāoh ex, yāox blix blag brāix, njiad ang ndouh moux dix piex kaing ex, gon ran dix gēd ex mīex dix gah vēui.” Nbāox mōh kaix an mīex nūm mox nieh, goui dīx nūm, gon nyōm an nbāox hu ndaex dīag, yāox mōi līang būi gah ndaex dīag, noh dom hu ho ing dīx mu. Houig gah ndaex nyīex, nbāox grāi mīex dix hmoung ah nin: “Mīex, in mōi yāox ex ndaex dīag.” Mīex noh yāox mōi an, uig si mgāex hrom ngīe mai, nbāox yō gon dix ah nin: “Gon lāoh gon līe ex, yāox mōi blag brāix, gah njiad dōng dix vīex eix jīe.”

Houig kaix an, gon ndoui an hoig mōh si nō dīng dīx gaex. Goui dīx nbōg, noh yūh si mah mai būi blag brāi, bāeh būi yūm. Hod nbēen, bāeh būi yūm ko dix sang dox gaing būi. Būi hun sang ko dix sang ndēeih bāeh noh yūm nang. Būi hoig hnod noh, sang vīex dix dad gaing noh pao, noh geem ah nin: “Ga sang dad beix gaing ex, gon sang bēx ex dīx mgūm.” Būi dom goug mīex noh houig. Gon ndoui an yāog dix sae dix bex deeih mīex dix, noh nyon dix kiag deeih mīex dix ndūd, ah nin mai: “Yām iag yām o ex ndīx, mōh mīex ex ba ang dōng dix si ndiex ex, mōh nōh yāox yūh ex gāing lūd, noh nīad yō ex gah, houig dom yūh ex gāing lūd dīng ngāix, lūd ang mōh lūd ex noung dix, hoig ndōg lūd dom mīex ex, sang yūm yiex ko dix yūm dāex ngāix......” Hoig ah noh nan, hu dox būi dad gaing mai kaix......

7. Ai Gin Nqom

Nbēen ndīx, goui bāox aig ra gaex oud nyīex dix kaix mīex geeing dix noung, nyīex giex houd gin si npom, ndaex nyīex goui ngīe mōi dīx mu mai ia dīx mīex, ang lai goui dīd dix kaix. Kom mōh nan, ai ba mōh bāox gei an gon hmaing giex nyī dang līh nyīex, noh dix jīe mōi, dox nyī jīe mīex ia an.

Nyī dang sum dix oud nyīex, von ndang ia oud blag brāix nyīex, lāeng mīex ia an gah ndaex, goui dīx nbōu, nyī hmoung loux rīag mīex ia, noh līh mgāig, mōh sūa dīx mu ba sang houig dix sōg dix dēei ia, noh mgiex sua an dix sang dog, ah nin gah sua: “Maix ih mīex ia ex , maix jei ex sang jīx glod yūh gah mox, luig kaing mīex ia in, ex ang lai goui dīd dix, maix peix ang goui hrom hri nin, sin ex roung mōh ngīe mīe ia in noung noung......” Hoig ah noh nan, noh nyon blā louv yīam mai. Sua yāox gah yīam nyī, dāeg dōng gah hoig ndaing lūd ba yūh dix, noh geem vīex nyī hu si laih loux ngeei mai būio ndaex laih, gīeh noh bēix, noh yāox dix jīe lō dīx mu. Nyī rūg hu yūh si laih, rūg bōun dix jīe lō dīx mu. Noh yāog dix dug lō houig gah yaong, ai dūdāx rīeb dix qog noh gah bōun noh lō an yūh gah mox. Nyī grāi gah mōh sua ba mgāe dix yūh. Ai hu hmaing sua mgāe dix, sua ang jū dix mgāe noh. Ai meed hrom gah, noh dom dog sua an yūm, dig noh num kaox braog yaong dīx mgō. Nyī hmoung dog ai sua an yūm, hoig gin saex hrom gah, noh geem ja hu sud dix si nbaeng sua an num kaox dīx bang.

Nyī mgō būi dang grāeng gah lō dix, ja bōun nang māe gah dīx jeeix jeeix, hreeng hreeng, ja yāox nang grax nyōm oud. Goui dīx ngāix, noh līag gon līg dix ndaog dīx mu, gīd dix yūh ndong som gah kaox si nbaeng dix sua an num. Kom gīd noh kaox an, hlax kaox jīa bīang diex mai noh, dīeh dix mōh māe, noh sud dix vīex māe an gix mai glom dix ndong līg yūh dix ing gah nyīex.Houig gah nyīex, ai yāox vīex noh ndong līg mai māe houig gah nyīex, nbāox qog noh gah. Nyī grāi gah yūh dix. Ai hoig nbrīex si mgāex ngīe gah, bū bāb ing dēei moui gah nyīex, hu sōg dix gīd kaox dix yūh dix sang yūh ndong līg gah nang. Houig noh ndaex dīag kaox, dāeg yāog noh dix sae moui gah kaox, nab yaoh heui gah mōh si uing ba jīa jīa kaing kaox, gru gria gruia dix sang haog gah noh, noh hoig bru kuan gah, bīe kaox gox nag nbrax dīen gīd, dū dāx dou dix ing gah nyīex daix mox daix an.

Kaix an, noh yāox som līg jīe nyī gah ngaex ndong yūh nyī, uig gluing uig blang ngīe, noh hoig gin mgouing ngīe gah, noh nbāox hu hmaing dix vāi ndong yūh nyī dix dox līg dix som gah. Dāeg nyon līg jīe noh dix som ndaex ndong an, yaoh ngī gah ji luh li luh dix yūm bag lūg. ai hoig gin meed hrom gah, yāog dix nyon lūg gah ndong an, mgrēeing noh ndaex ngū.

Kaix an ra loui ngāix, nyī yāox gah ang ai krei dix ndēeih dox ndaong jīe dix, noh dom hu sōg dix dēei gah nyīex ai, houig ndaex nyīex ai, yāox kaix brōui ndong dix ndaex lah ngū gix, noh dom dāeg dōng ai hoig mgrēeing ndong dix. Noh yīam gah, dēei dix vīex dōuih si ndax ing, yūh mōuing dix jīe si mgah gah. Mōuing noh sad haeg dix si mgah an, sad nyeig, haeg noh nīad dix lūng gah nyeig, nīad dix hmom gah nyeig. Ai nbāox yāox yūh nin gīe nieh, nbāox hu hmiang dix vāi mōuing dix sad haeg dix gah si mgah an, mōh mōuing noh sad haeg dix gah si mgah an, haeg mōuing noh nīad dix mglāoh gah. Ai nbāox nyon mgrēeing gah si mgah an. Ai ang lai dōng gah sang yūh dix, noh dom hu qog bāox rū bāox rīem dix gah ah nin: “Yūh gah mox jēe dix dix oud ndaex daix nyī njiad jīx mōh kri mōh gōn, mōh ba lāoh ba līe, mōh houig ndaex daix ex njiad jīx mōh ba vīex grax lāex grax leeing?” Bāox rū noh ah nin gah noh: “Mōh njāo qaox nīe gin nqom maix......”

8. Nbēen Toi

Toi houig ndēe mox, dīeh būi ndēe an, mōh būi hoig rīan gox dix gah noh, noh ja gon jīx bōun dīeh boud būi. Nbōg dīx nblah dīeh noh mōh dīeh ih, nbōg dīx nblah kaix, dīeh noh mōh grax gāing ang hmom.

Goui dīx nbōg, njāo qaox nīe dīeh dix mūan būi, būi yaong mgiex dix hnod noh, sang piog dix si man [si mang ?] noh mai kaox im. Dāeg sang si man gix noh ndaex rom sein, noh nyon ngīah ah “Haha” nan mai gix, noh ah nin gah gix: “Beix piex dix rūg o dix nin, beix si man ex mai kaox im, ang ex dee ndēeih im gah nang sax laih, beix ko dix si man ex mai kaox hoig grouh, gīeh ex grouh dix yūm gah nang sax......” Būi hun hngiad dix hmoung loux in, rūg hoig jō heui, gix dom ndēeih gah noh kaing kaox an, ndēeih hnod noh mai kaox grouh, si man noh ndaex rom kaix. Yūh nin gīe nieh, noh nbrīex si bloui bīang rom, dang bōun ndēeih gah dix gah jō rom sein.

Gon goui dīx nbōg, goui gon ndoui dīx gaex, sin nyīex noh mōh ngīe gon nbrūng dīx mu ngīe. Jao mī dīx gaex ndaing mgouing gah gon nbrūng an, gin ndaing mīe dix jīe, gēd njēe gēd nblāong, ang dōng gah sang dēei dix dix jīe yūh gah mōx, noh dom ah nin gah gon ndoui an: “Gon nbrūng in jō dix mōh gon nbrūng jīe ex, mōh ex ba jāox hrom gha geeing maix, ex dom dox noh vāi dix sīao, in ngāix, ex sang ndēeih dēeih houig.” Gon ndoui an ang jū loux noh, hnie gon nbrūng mōh ang ndouh mōh jīe dax jao mī, ang ndouh jū dix dox. Dax jao mī yaōx ang noh jū dix dox nbrūng an gah dix, grāi noh mai noh ah nin: “Gon nbrūng rāeh mōh gon nbrūng jīe ex, rāeh mōh gon nbrūng gēih mīex mōi yix nāox.” Gon ndoui an ang lai bōun gān gah yūh dax jao mī gah dix, gah ang lai dōng gah sang yūh dix, noh dom hu goug būi gūad yaong mgō dix brōng.

Ngāix kaix, gūad yaong hoig houig nyīex dax jao mī uig, hoig si nbūa ngīe loux būi gah sang ah dix ndaex si nax dax jao mī giex gon ndoui an, gon ndeg Dax Toi ba ang nyanghouig jīe dix. Mōh būi ta noh, ang houig, mōh būi ta noh, ang houig. Hoig ta būi noh lig nhgāix dīx mu, yāog si ngāix dix sang sid mgōng, Dax Toi dāeg yāog dix tia dou houig, raom laeh uig njiad ngīe. Yāog noh houig, būi hoig nyon loux lōg loux nqax gah noh gū gaex. Noh dom ah nin: “Ayā, dab nyōm mgāig ex gah brōui hmaig braog glong, bī om ing ex gah dang.” Ang noh nbrax hoig grāi uig, dax jao mī dū dāx bog loux noh ah nin: “Māeng Toi hlao Toi hlein in, hmaig ndēe mox mgah jīx brōui?” “Kix ang hmaig sax jīx brōui, mōh mōi ndēe mox mgah jīx gēih nbrūng nang boud?” Nih ndēeih bog loux dax joa mī ah nin, dax joa mī hmoung loux Dax Toi, ang lai dōng gah sang ah dix, ngēem ngīe ngai dix ndaex diex. Gāing sang brōng būi ling ngāix, hoig si ndāeh ngīe mai loux dīx mgūm Toi......

9. Yūh Gah Mox Rung Mōi Lai Ang Lang

Yām njāeh ndīx, rung mōi lang ngīe log rung grag nan nang, yūh nin gīe nieh, lāog lāo ang gin nyōm dix yāox, noh gon jīx dix dab gū jēe gah rung dix, jīx dix rīan jao dix gah rung dix. Dou dīag gū jēe hoig gin hlad gah mōi nyāo, nīe mōh si vāi , nīe gin ndaing hlad gah mōi, jō mōi gah ndaex grax ndaex laex, hoig nda dix vieh grax gah mōi. Houig kaix an, an dīx ngāix, si vāi si nbūb mōi gah ndaex dīag, noh ah nin gha mōi: “Mōi bāox gei, mōi bāox gei, mgāig ex dix yāox rūng maix, om ba sīam ang hiex ko dix yāox nan, maix hu ndaex dīag ndaex dū, uig si vīx ngīe gah njēe nblāong, gīeh om hrom gēd ex nan, maix ko dix jēe dad ngoing keing.” Mōi hngiad dix hmoung loux si vāi, njiad hoig ko ndaex hrom noh. Ngāix kaix, mōi rūg dad rung dix ngoing ngīe. Houig dom ngāix, rung mōi dom ang lai jīx lang gah. Kaix an kaix ndīx, si vāi yāox hoig bōun dīeh dix mōi, hoig gin mgāex hrom gah bōun dīeh dix mōi, noh dom gēd hrom dix sang nbāox hu dīeh grag. Goui dīx ngāix, noh si nbūb grag ndaex rāog kaox, ha nin gah grag: “Grag bāox gei, grag bāox gei, ex mgāig dix yāox rung maix, hoig mōh nbēh mgrāng dix yāox, maix hu ndaex dīag ndaex dū gon si vīx ngīe nang. Om hrom gēd ex nan, maix ko dix jēen dad ngoing kaing.” Grag hmoung loux in, hoig gin meed hrom gah, ngīah ngīe grax ndaex mēeih dix mai ah dix nin: “Mīex kloui gox loux dīd, ba vīex ex ko mgrāng rāeh mō1h rung ex heui, mai nang kaix, mox sang dīng jī hnyae gah ex, mox sang mab ex, ex roung sang dab gah rung dix.” Si vāi hmoung loux grag, hoig mgrēng gaex gah, dū dāx dix dou dix moux dix dom ndēe si ngāi, ang lai bōun ndēix grag kaix dīx nbōg gox.

Houig dom ngāix, si vāi dom gin hlad gha grag, ang ndouh hlad gah mōi bīe jeeix gox.

Kaix hoig bōun dīeh si vāi mōi ndīx, noh ndaing mab dix mūan mōi, jō mōi ndēe mox giad dix ih mōi ndēe an, mōi ang lai bōun gān gah yūh si vāi gah dix, goui dīx ngāix, mōi ja nbrīex nyō si vāi, ang jū si vāi qao nīe gin ba yūh gah dix. Si vāi qog mōi ah nin: “Nan, maix gēd dix sang yūh gah mox box?” Mōi ah nin: “Maix ja gūan dix ih gon ex dīx nūm gao mu.” Si vāi hmoung loux in, gēd ix yāox ndaex hrom dix, ndaing nag hiex ko, kom mōh nan, noh ja noung noian dix jū loux mōi kom. Noh ah jīx nan. Noh gon nbrēi dix ah “Dīx nūm gao mu, dīx nūm gao mu......” Kom ing dix ling jōg grax, njāo hlad noh dīx bī om. Mōi ing jīe dix kaix si vāi, ja yīam boud, ja yīam boud, rom ngai jīa ah “big big” nan. Gēed ba oud braog grax jō dix yāox gah yīam mōi, noh jāox hrom gah mōi, dom hu qog jēe yīam noh. Mōi dom grāi jēe yīan dix gēed. Gēed hmoung loux grāi mōi, hoig gin meed hrom gah, noh dom hmiang sang mgō mōi ah ndaex si nax giex si vāi. Noh yāog dix bu dix hu moux dix braog grax si vēui si vāi. Si vāi gouh gon nyōm si mgāex ngīe kom ah dix “Dīx nūm gao mu, dīx nūm gao mu......” nan kom ing dix ndaex grax. Yāog noh dix houig gah nbāoh sēe ndēe moux gēed dix, gēed nyon bu dix līh kaing ndaex bang rīb si vrēui ngai noh ah “brūh” nan, si vāi yaoh gah kom nqax dix ah “gēed mouh gēed mūa an” nan, daix mox daix an, hoig dū dāx bī om loux dix ling joqg grax. Gēed nbrēi dix ngīah ah “ha ha” nan kom bu dix dix dou ndaex rāo ma. Kaix an, mōh si vāi gēd loux ah dix nux, noh ang lai jīx ndouh hrom gah, noh dom yōu dix ndēeih qog gēed gah. Gēed grāi noh hmoung ah nin: “Ah maix gao nūm dīx mu, gao nūm dīx mu nan nux!” Si vāi hmoung noh, gouh ah nin: “Ō, rūg mōh hlaox!” Kaix an, noh nbāoxkrei dix ah: “Gao nūm dīx mu, gao nūm dīx mu......” nan kom ndēei lōng dix grax ing.

Yūh nin, houig dom ngāix, loux grāi gūad, ndēe gon goui si vāi ngāix, hming būi noh gon ih mōi dīx nūm gao mu.

Kaix an ndīx, njāo hoig gin mōh gēed ba ndaing bōun mgō mōi nyāo, mōi ang lai dōng gah sang bog dix nbīx gah gēed yūh gah mox. Noh dom ah nin gah gēed: “Gēed eui, lāoh līe hoig bōun yāog maix hrom ex nyāo, ex sang ndēeih mgō maix yūh gah mox liex?” Gēed ah nin: “Ang jāox, mōi bāox gei, ang maix sīao mgō ex yūh gah mox. Kom mōh nan, ang ex dīe goui nyīiex goui yaong, ang goui ndēe id ndēe dūm, maix ja gīeg ex id dūm kaix ndae klog jāong dix ndaex dīag ndaex dū ngīe kaing!” Houig dom ngāix, gēed ang sax goui hmeem goui ndaex, ja rōg ngīe dix id dūm kaix ndaex klog jāong mōi gah ndaex dīag, loux ah būi, dox jō gēed dix oud ndaex klog sēe ndēe mox, mōi gah ndouh sax loui dix ndēei ndīg, rāeh mōh njāo gāing in ndīx heui.

10. Yūh Gah Mox Hrang Grax Bīang Mōi Lai Ang Lai Goui,Mai Yūh Gah Mox Kaox Ruih Lai Ang Goui Ba Rāeh

Geem dōng maix noh yūh gah mox hrang grax bīang mōi lai ang lai goui? Yūh gah mox kaox ruih lai ang sax goui ba rāeh laih? Nbēen in mōh yūh nin:

Ndīx ndīx, goui dīx ngāix si vāi hu houig hod ma dīx ndaeh, noh mgāig dix yāox ndaex ma, noh hoig yaoh hoig ndaox ndeing gah ba yāox dix. Būi dīx gaex nab tai ma gah mōi dang dīng ngīe dīx mu. Njāo gin ndaox noh gah, noh geem līh ndaex ma gah giex, ah nin gah mōi: “Mōi, mōi, nqom mōh maix ba dīng dīng ba hlaong yūh nin, miax si ndieh gīeh būi tai gah dix, dīng hlaong maix jong lai nai ngīe.” Mōi hmoung loux si vāi, bīe mgāig gah ang ndouh mgāig gox noh, bog loux noh ah nin: “Eui, si vāi eui, glāi eix dix dīng rīang gox, ang eix dīe keed hlag gon būi.” Si vāi hmoung loux grāi mōi, dom ah nin: “Ang dāe dix mōh loux dīd, gon būi ba hlag, qe hmaing gix qe yāox dix tai yāox gah ex yāox boud, buī mox sang mgēi dix sae iag gah ex, ex dee rīan dix gīad noh dom yūm.” “Jīx!” Mōi ah nin mai hnie dix jao dix gah iag kiang dix, doug gah si vāi. Jāo mōi rūg gah iag kaing mōi, hu piog mōi gah kaox ruih braog ma, gīeh noh laex dix mai som dix rīb ndaex vēei kaox ruih. Houig kaix an, noh dom yāog dix hu piog si vāi, sae iag doug tai gah. Si vāi hoig piog dix pao, oud ndaex hroi tai, mgāig gaex jao dix kom ra blag, hoig mōh maox rīang tai ba sīed ngīe gah, mgī blag kaix dix, lōm plang hoig bāing ngīe mai jāong. Sang dou ang lai jīx, sang gīad būi jao tai gah dix, gah nīe ang lai bōun. Noh dom sae rīang dix si nblūh kaox tai. Kom mōh nan, kom ao mōh noh būi dīng rīang rāo si nax dou diag gū jēe gū jōng, mōh noh sae gox rīang dix yūh gah mox, kaox tai ang ndouh bōun quh qih bīe jeeix gox. Mōi ba laex dix gah num kaox ruih njiad jō dix yāox yūh si vāi nan, hoig saex vāig saex dū gah ngīah dix, njāo hoig qaox nīe ngīah noh, nab yaog gah mgōuih dix rīeh, bang bēed kaing mgūh, bēem hrang dix si māox, hrang grax bīang noh dom uig krum gah njāo. Mai njāo piog jao noh noh gah kaox ruih, yām bang līa kaing mgūh, gon bōun nblūh kaox ruih an gog. Houig dom ngāix, hrang grax bīang mōi dom ang lai goui, kaox ruih dom ang lai goui ba rāeh gah bīe dīx mgong.

==========================================

1. Nbrēeing Giex Ndiab

Nbrēeing giex ndiab mōh bāox mgrōm bīd, goui dīx ngāix giex hag bāox dix hu kix. Houig ndaex dīag kix ang nbrax goui mīex mgrang dix, giex hoig yūh kix gaex mgōg. Giex yāog dix soum mgōg dix, krei dix ndēeih ing. Ndiab mōh ba pai daix pai jāong, yāong dix gōg kix jīe dix, puih puih ngīe dix lūan vēui nbrēeing, dīx kiab ngai ngīe hoig lūan mīex nyāo, nboui npong gox ang lai yāox.

Kom mōh nan, nbrēeing ang ndouh ki bīe jeeix gox, gōi ing toh toh. noh houig gah mgah grax dīx ndaeh, yāox joux ndiab mgōg kix jīe dix kom laex dix dix, noh gah ang dah mgōg dix dix laex dix, ja yōu dix ah nin gah ndiab: “Gōi joux mgōg jīe maix, nda mgāo ex dix ing vēui.” Oud dīx jū, ndiab nbāox puih puih dix lūan si vēui nbrēeing, nbrēeing gah ang ndouh ki gah, ja gōi mgrāo dix ing ndīag ing dix. Dīx vūd kaix, mgōg kix jīe ndiab nbāox njīeh, noh nbāox dah dix joux, nbrēeing nbāox ndēeih njia noh gah joux noh mgōg kix dix. Yūh nin gīe nieh, mgōg kix jīe ndiab niīeh ndaex grax ra loui nbōg, noh uig gāeg dix joux nang ra loui nbōg, houig dom si ndāeh brāix, nbrēeing houig ndaex nyīex dom gon hlaong si ngāix, houig ndiab jīe dix ndaex nyīex brāix hoig hvaig.

Nbēen in mōh si ndiex eix gah nbēen yūh nin, dox yūh eix gāing dix ang ah, ja vīex hrom gōi dix, hrom lang dix, bō lai hax hrom. Log būi ah rīex laih ag groux buing glang, lang hrom gēd bōun brōng see, roung mōh nin heui.

2. Soux Jo Kaix Līg

Yām njāeh ndīx, soux giex līg si dū mōh bāox mgrōm bāox mēed gon būi, gon būi nāb yung giex om bāox. Ih brīex ih dāe, yūh gāing yūh dāe, id gah id mai jao dix blag ndaex nyīex.

Goui dīx nbōg, jao giex dox giex hu bāog ma dāe dīx mgūang. Yāog giex dix houig ndaex ma, līg ang lai goui loux si mgah dīd dix, dēei ko hu bāog ma jīe dix. Soux mōh ba nīeh, noh yāox hax gouig, krei dix nyon id ndaex vēei braog ma. Yāog noh dix haing kaing id dix, si ngāix hoig ngīeh, līg uig sang bāog ma dīx mgūang an. Soux yāox yūh nin, sang ing, noh hlad jao dix ah gah dix, ang dox dix som, ang lai dōng gah sang yūh dix, noh dom nyon hu lū līeh dix ndaex ma kaix ba hoig bāog līg, gīeh dix uig nyāox uig gom ngīe gah diex ndaex ma. Hoig yūh noh nan pao, yāog dix puih dix dou dix ing gah nyīex si vēui līg. Houig noh gah nyīex, jao noh yāox hoig gin gom gin qid ngīe laeh lee noh, qog noh gah līg, noh grāi noh mai jao dix ah nin: “Līg nag ndouh yūh dīd dix ling ngāix, dab hu id ngīe gah braog ma, ma mōh ex ba bāog noung dix uig.” Līg yāog dix houig kaing ma pao, njāo mōh noh ba hnim daix jāong, hnim nqeeih nqoui, houig gah nyīex si nagx si ngaox ngīe, ang goui loux dīd dix. Jao noh jei noh rūg om loux ah soux nan, meed hrom dom nkree līg dou kaing nyīex, ang lai gīeh noh lāig id lāig som ndaex nyīex. Kaix an ndīx, soux dom gon id gon som ndaex nyīex mai jao dix, ih būi dix noh ih nang dix. Līg ja ih ngīe brīex roig brīex nai yūh būi mai daex dīag ngīe houig dom in si ngāix.

3. Nbēen Toi Ra Mu

Dīx: Toi Dīeh Yīex Gūad

Goui dīx ngāix, Toi hu laih, jō yīex gūad ndaex grax dīx gaex bēeih mūah dix sang hu jōui ndaex laih. Noh yāox mūah bēeih yīex gūad an, gin mgouing gah, gin mīe dix ih. Noh dom hu hmaing dix deem yīex gūad glom. Noh yāog dix glom mūah an, lūan vēui yīex gūad. Hoig lūan noh hreeng nyāo, ang yīex gūad lai jīx yāox noh, noh nbrīex vīex mūah vēih braog grax, nbrīex dix dēei dix ih mūah oud ndaex mgrēng si mgīag. Hoig sag noh gah ih dix noh, ndēeih glom ba ang dix nbrax uig ih lēui yīex gūad.

Grub noh yīex gūad pao, noh ah nin gah yīex gūad: “Yīex, yīex, saex vāig lōng ex, vēih ex jōg lōng dix braog grax gah nux, nbāox sang jōg lōng ex dix pao dīd, maix ran bēeih mūah in hu vēui ex nyang, ex log peed dix nbāox ndēeih mgō maix gah kaix.” Hoig ah noh nan, yāog dix sae rē mūah an bīang yāe yīex gūad, dou dix vēih braog grax, plad dix dou dix hu mai kaix.

Yīex gūad yāog dix bēeih mūah an hu, ndaox gah sīam qaong, jei noh mōh qaong gah hoig hreeng ang dix lai bēeih, ang od ndēh hrom dix gah. yāog noh dix houig ndaex laih, krei noh dix sang dang mūah dix jōuih, mgāig dix yāox ndaex si mgah mūah, hoig yī yī ngīe, ndeg ngīe ba goui dou ra loui mu kaing, noh gāeg dōng Toi hoig dīeh dix, sang hu sōg Toi mox ang lai dōng.......

Ra: Toi Jōuih Gaing Grag

Toi mōh ba līh kaing yaong, goui gāing ndēe mox noh njiad dōng dix houig gah. Goui ngāix dīd, nyīex dīd dīx nyīex bāeh grag, noh hmaing dix līag gaing grag gix. Ngāix kaix noh vīex dix piag gaing grag an ndaec hnong braog grax laih, yūh dix mgiex maox gaing grag an hod hnong. Oud dīx jū, jūb yaong dīd dīx jūb sang hu sōg dix louh grag gah lō dix, njāo sang tai gix gah grag. Houig gix hod hnong an, gix yāox gaing grag piag Toi ndaex hnong, mgāig dix yāox, hoig mōh mgrā grag sieh dīng dīx mu, gix ndaing lāig hrom gah. Yāog dix hu qog dix louh gah Toi. Dax Toi yāox gah yūh gix nin, hoig nbrīex gin mgāex hrom gah. kom mōh nan, noh ang ndouh gīeh gix dōng gah gin mgāex hrom dix, ja yūh dix yō ngīe grag dix mai yūh dix ang ndouh jū dix louh gah gix. Jūb an gix hoig gin mgouing gah bag beng grag an nang, gix ja yūh boud lūng nyō dix louh grag an gah Toi, hoig hnie gox dix sang nbāox tie Toi gah māe. Toi hmoung laox ah gix nan, nah ja yūh dix nung nian dix jū dix louh mai gix.

Hoig ndūd ah gix njūm pao, Toi nbāox lōi dix dom gix gah loux ah nin: “Grag in, njāo hoig dāeg gah tai dix ling ngāix, ang dāe dix nyang jū dix līh kaing ndaex hnong, beix groux hang houig dom sang mgreeb si ngāix, gah sang go brāix dix hlong kaix, noh dom dāeg sang jū dix līh.” Hoig ah nin mgrōm dēei dix vīex māe nbāox tie gix dix gah, sae dix bīang lō, dou mai kaix.

Hoig dou Dax Toi, mōh būi an gix ta grag līh ang līh, mōh gix ta līh ang līh. Si ngāix uig sang mgreeb pao, grag an ja gon ang krei boud dix, ndīe hrom, gix jēen ih nblūh gah kaing. Yāog gix dix nblūh, ndaox ngīe gah mōh gaing mgīex, dāeg dōng Dax Toi hoig yūh nyāox dīeh mgian gah dix, sang sōg noh ndēe mox ang lai dōng......