Phuk Lai Sigang: Khri: Siyiex - 1 Beenli
LAI YAM JAH
(Genesis)
Yam Jah
Grawng: Pa Phan: Pa Deuh
Yam jah Siyiex phan: raoma: mai haktiex.
Haktiex ang koe: pakpeung:, mawh bang: praix pa yi, mai pa faik kheem: kah piang tom: dee raux an:, mai Khwan: Siyiex ot vungviang piang rawm: khankix heue.
Khaix an:, Siyiex ah nin:, "Kieh pa riieng lih koe:," Mai pa riieng lih koe: heue.
Siyiex yaox kah mhawm: pa riieng an:, Nawh tom: gwieh pa riieng khaing: pa faik heue.
Nawh kok pa riieng mawh ponngaix mai pa faik mawh ponsawm:. Mai koe: ponbo mai ponngawb, an: mawh singaix tix heue.
Khaix an: Siyiex deeh ah nin:, "Kieh mee: koe: kah daux sigreung rawm: khankix, mai kieh rawm: tang: gwieh tix khaing: rawm: khankix."
Siyiex yuh mee: praix mai gwieh rawm: pa koe: plak greem: mee: praix mai rawm: pa koe: plak piang mee: praix, mai an: lih koe: heue.
Mai Siyiex kok ceukaux mee: plak piang an: mawh raoma: mai koe: ponbo mai ponngawb an: mawh singaix ra: heue.
Mai Siyiex ah nin:, "Kieh rawm: khankix pa koe: greem: raoma:, khrawm: paox tix tix dauh, mai kieh dee kroh tiex lih koe:." mai an: lih mawh heue.
Mai Siyiex kok dee kroh tiex an: mawh haktiex, mai dee hoik khrawm: rawm: pa hoik khrawm: rawm: paox tix, mawh rawm: sigrit sigra:, Nawh yaox mawh pa mhawm: heue.
Mai Siyiex ah nin:, "Kieh tiex kuah rib riem pa koe: simie mai khaox pa koe: plix kuceu kah piang ca: haktiex heue." mai ceu an: khankix lih tix koe: heue.
Mai haktiex kuah rib riem taux lhax pa koe: simie ceu mawx ceu an:, mai khaox kuceu pa koe: plix simie awm: ceu mawx ceu an: heue. Siyiex yaox kah hoik mhawm: ceu ankix.
Mai koe: ponbo mai ponngawb, an: mawh singaix loe: heue.
Mai Siyiex ah nin:, "Kieh pa riieng lih koe: kah daux mee: praix, raoma:, sonsang gwieh ponngaix khaing: ponsawm:, mai kieh kix mawh mhai: kah son praix klawng: mai son singaix sawm:, mai jhong: khix mee: num khankix heue.
"Mai kieh pa riieng pa koe: daux mee: praix an:, jhan: riieng tix kah piang ca: haktiex." Ceu an: khankix lih tix koe: heue.
Mai Siyiex yuh pa riieng ting ra: mu:, pa riieng ting an: kwang: kah ponngaix mai pa riieng iak an:, kwang: kah ponsawm:, mai Nawh Cao: baox yuh simuing: khankix heue.
Siyiex tawx pa riieng an: koe: daux mee: praix raoma:, sonsang jhan: pa riieng kah haktiex,
Sonsang kwang: ponngaix mai ponsawm:, sonsang gwieh pa riieng khaing: pa faik, mai Nawh yaox mawh pa mhawm: heue.
Mai koe: ponbo mai ponngawb, an: mawh singaix pon: heue.
Mai Siyiex ah nin:, "Kieh tosat pa im: ju kuceu lih koe: daux rawm: tom: haoh hun:, mai kieh sim: khankix pu: kah piang haktiex kah daux mee: praix raoma:."
Mawh kheu nan:, Siyiex phan: tosat pa ting pa im: ju daux rawm: sigrit sigra:, mai can ceu tosat pa chix mo chix hu: daux rawm: tau mai sim: pa chix pu: khankix, awm: pakpeung: ceu mawx ceu an:, mai Nawh yaox mawh pa mhawm: heue.
Mai Siyiex nawb bwan: kah piang ceu an: mai ah nin:, "Kieh pex pre haoh hun: daux rawm: sigrit sigra:, mai kieh sim: sai: khankix, pre haoh hun: kah piang haktiex heue."
Mai koe: ponbo mai ponngawb, an: mawh singaix phwan: heue.
Mai Siyiex ah nin:, "Kieh tosat pa im: ju ceu mawx ceu an: lih koe: kah piang haktiex, khawng: brie mai tosat pa chix mo pa koe: kah piang haktiex ceu mawx ceu an:." Mai ceu ankix lih tix koe: heue.
Mai Siyiex phan: totiag totu khawng: brie mai can tosat pa chix mo piang tiex khankix, koe: kah piang haktiex awm: ceu mawx ceu an:, mai Nawh yaox mawh pa mhawm: heue.
Khaix an: Siyiex ah nin:, "Kieh Ex yuh kawn: pwi awm: rieng pakpeung: Cao: Ex, awm: pa hoik khaw: mai grang Ex, mai kieh kix kwang: kah piang kax pa koe: daux rawm: sigrit sigra:, mai kah piang sim: raoma:, mai kah piang khawng: brie khawm uik, mai kwang: kah haktiex, mai khawm pa chix mo pa koe: piang haktiex khankix heue.
Mawh kheu nan:, Siyiex yuh kawn: pwi awm: rieng pakpeung: Tix, pa awm: rieng pakpeung: Siyiex, Nawh Cao: yuh kawn: pwi, pa mawh pwi simex mai pwi bun: heue.
Khaix an:, Siyiex nawb bwan: kah piang kiex mai ah nin: kah kiex, "Kieh pax baox deeh keh mai pre haoh hun: kah piang haktiex. Mai kieh pax kwang: kah piang kax daux rawm: sigrit sigra: mai sim: pa koe: daux raoma: khawm can pa im: ju pa chix mo piang haktiex heue.
Mai Siyiex ah nin:, "Jhak heue, Aux hoik tawx can ceu rib riem pa koe: simie plix piang haktiex in:, kah maix khawm khaox pa koe: plix simie sonsang mawh pa ih pa un: son pex heue.
Mai kah son can tosat pa koe: piang haktiex, son sim: daux raoma:, mai son ceu pa chix mo piang tiex khankix pa koe: ju, Aux hoik tawx rib riem pa klai son priex ih kix." Ceu ankix lih tix koe: heue.
Mai Siyiex yaox kah can pa yuh Tix kuceu, mai ceu an: khankix mawh pa kied mhawm:. Mai koe: ponbo mai ponngawb, an: mawh singaix liah heue.
Mawh kheu nan: raoma: mai haktiex khawm can ceu pa koe: daux an: khankix, hoik hoik hkawm: uik heue.
Kah daux singaix aliah Siyiex hoik hoik kaing jhaw: pa yuh Tix, mai Nawh Cao: laux lee: Tix singaix aliah an:, khaing: kaing jhaw: pa hoik yuh Tix heue.
Mawh kheu nan: Siyiex nawb bwan: kah singaix aliah an: mai kieh singax singeh, mawh kheu Siyiex hoik hoik kaing jhaw: pa phan: pa deuh Tix khawm uik Nawh tom: laux lee: Tix heue.
In: mawh grawng: been pa hoik phan: hoik deuh raoma: mai haktiex, kah daux singaix pa hoik yuh Simiang Siyiex haktiex mai raoma: khankix heue.
Yam ang khaox ox mai rib riem khankix nyang kuah piang haktiex Simiang Siyiex ang nyang kieh rawm: lhiex lih piang haktiex mai kawn: pwi pa sum: tix ih kuceu piang tiex ang nyang bax koe: heue.
Viang mawh nan:, bhawm: rawm: ciex khankix kieh haktiex caux heue.
Khaix an: Simiang Siyiex yuh rieng pakpeung: kawn: pwi khaing: phawng: tiex mai phlu: bhawm: pa im: ju daux meeh nawh mai kawn: pwi lih mawh pa im: ju heue.
Krax Im: Ju daux Sipeem Siyiex
Simiang Siyiex sum: sipeem tix dauh kah plak lih singaix daux Eden, mai Nawh Cao: deuh kawn: pwi pa hoik yuh Tix ot tan: heue.
Mai Simiang Siyiex phan: khaox ox pa nyawm tix jhak mai plix khaox pa mhawm: son pa ih pa un: kuah khaing: tiex, kah daux sigreung sipeem an:, koe: khaox im: ju mai khaox pa tawng pa mhawm: mai pa ang mhawm: heue.
Mai rawm: klawng: tix klawng: lih khaing: daux sipeem Eden, sonsang kieh tiex caux, mai khaing: klawng: an: deeh gwieh tix mawh pon: klawng: kah plak praix sipeem heue.
Ceukaux rawm: klawng: pa jah an: tix klawng: mawh Pishon mai lih hu: plak haktiex Havilax dee koe: khri: heue.
Mai khri: haktiex an:, mawh pa jiet mhawm:, peeh khaox Badelax mai siang: simaox Shahan kawx koe: tan: heue.
Ceukaux rawm: klawng: ra: klawng: tix klawng: mawh Gihon mai lih hu: plak haktiex Kushax heue.
Ceukaux rawm: klawng: loe: klawng: tix klawng: mawh Hidakelax mai lih hu: plak lih singaix haktiex Ashurix (Asiriya:). Rawm: klawng: pon: klawng: tix klawng: mawh Upharat (Yupharethit) heue.
Simiang Siyiex teei kawn: pwi mai deuh kah daux sipeem Eden sonsang priex sang yuh sipeem an: heue.
Mai Simiang Siyiex tawx gumlox kah kawn: pwi mai ah nin:, "Maix pon tix ih kuceu khaing: khaox ku khaox, pa koe: daux sipeem awm: pa koe: rhawm: tix,
viang mawh nan:, maix tag ang pon tix ih khaing: khaox pa tawng pa mhawm: mai pa ang mhawm:, mawh kheu singaix hoik ih maix khaing: khaox an:, maix tag yum: tete heue."
Mai Nawh ah nin:, "Simex tix kaux ang khaw: tix ot nongnong:, Aux tag baox yuh pwi sang teem: coi, awm: pa khaw: mai nawh heue."
Simiang Siyiex phan: tosat kuceu piang haktiex, mai sim: raoma: kuceu khankix khaing: tiex mai viex hoek kah kawn: pwi sonsang yaox nawh mai chix kok ceukaux kix, can ceu pa kok kawn: pwi kah tosat pa im: ju an: khankix lih mawh ceukaux kix heue.
Pwi simex tawx ceukaux khawng: brie mai sim: daux raoma: khawm tosat kuceu khawm uik pa koe: piang tiex, viang mawh nan: kawn: pwi ang nyang yaox kah pwi pa sang teem: coi pa khaw: mai tix heue.
Mawh kheu nan: Simiang Siyiex kieh kawn: pwi laig it, Khaix an: Nawh Cao: teei si-ang: praok nawh tix nyaing, mai deeh nyeep nex kleuk paox tix heue.
Mai Simiang Siyiex yuh pwi bun: tix kaux, khaing: si-ang: praok pa hoik teei Nawh, mai viex hoek kah pwi simex heue.
Mai pwi simex ah nin:, "In: mawh si-ang: khaing: si-ang: aux, mai kok nawh mawh pwi bun:, mawh kheu mawh nawh pa hoik teei lih khaing: pwi simex heue."
Mawh kheu in:, pwi simex tag prah kah miex keeing: tix, mai ot tau mai moeng tix, mai kiex ra: kaux tag mawh nex nham: tix mu: khaing: heue.
Kiex mex moeng khawm ra: ang nyang koe: kraung ceep mai ang nyang koe: krax kaig krax tua heue.
Grawng: Pa Nyaw Pa Glaw: mai Grheu: kah Kawn: Pwi
Siuing: mawh pa nie lhak khaing: can tosat kuceu piang haktiex pa hoik phan: Simiang Siyiex. Mai siuing: ah nin: kah bun:, "Siyiex hoik ah kah pax sonsang ang pax ih khaing: khaox kuceu pa koe: daux sipeem tete lie?"
Mai bun: deeh ah nin: kah siuing:, "Yiex pon tix ih khaing: khaox pa koe: daux sipeem."
Viang mawh nan:, Siyiex hoik ah nin:, "Pax tag ang pon tix ih ang pon teei kah plix khaox pa koe: sigreung sipeem, phan: ang mawh nan:, pax tag yum: heue."
Mai siuing: deeh ah nin: kah pwi bun:, "Pax ang doh yum: tete.
Mawh kheu Siyiex tawng singaix ih pax plix khaox an:, ngai: pax tag blah mai lih tawng pa mhawm: mai pa ang mhawm: awm: Siyiex heue."
Mai yam yaox pwi bun: kah plix khaox an:, mawh pa mhawm: son pa ih pa un:, mai koe: grang pa nyawm tix jhak kah ngai: tix, mai grawng: simie nawh plix khaox an:, tawx krax tawng krax yung kah tix nawh tom: teei plix khaox an:, mai ih kah. Mai nawh tawx kah mex tix mai nawh kawx ih heue.
Khaix an:, ngai: kiex blah khawm ra: mai tawng kah ang kraung ceep tix koe:, mai kiex caing tix ceep kraung kah lhax khaoxruh sonsang kheem: kah cao: tix heue.
Yam bo praix, kiex mhong: lox pa hu: Simiang Siyiex daux sipeem, mai moeng nawh mox tix sinax khaox daux sipeem sivoe ngai: Simiang Siyiex heue.
Mai Simiang Siyiex kok kah pwi simex mai ah nin: kah nawh, "Ot pax dee mawx?"
Mawh kheu nan:, nawh ah nin:, "Aux hoik mhong: lox kok yo Maix Cao: daux sipeem, mai aux koe: krax lhat krax graung, grawhgrawng: nawh aux ang lai koe: kraung ceep mai mox cao: tix jao an: heue."
Mai Nawh Cao: deeh ah nin:, "Mawh mawx pa krai pax ang koe: kraung ceep lie? Hoik ih pax plix khaox pa ang Aux kieh pax ih lie?"
Khaix an: kawn: pwi deeh ah nin:, "Bun: pa tawx Maix Cao: ot mai aux, nawh tawx plix khaox an: kah aux, mai aux hoik ih heue."
Mai Simiang Siyiex ah nin: kah bun:, "Maix hoik yuh ceu inkix jao patix lie?" Mai bun: deeh ah nin:, "Siuing: hoik pie kah aux, mai aux hoik ih heue."
Mai Simiang Siyiex ah nin: kah siuing:, "Mawh kheu hoik yuh maix ceu inkix, maix tag pon pa jhax pa lawg lheu: khaing: khawng: brie, mai tosat haktiex khawm uik heue. Maix tag mo kah vaig tix mai ih phawng: tiex tom: sidauh ju tix.
Mai Aux tag kieh pa koeng koe: sinax maix mai pwi bun:, mai doeh simie ceucat maix mai doeh simie ceucat bun:, nawh tag dig kaing: maix khlaix, mai maix tag mat yuh loek caong nawh heue."
Son bun:, Nawh Cao: ah nin:, "Aux tag sang nie blon: tawx krax kharhawm: kharhi: kah maix kah daux pa keh maix kawn: tix Mai maix tag lo kah mex tix, mai nawh tag sang kwang: kah piang maix heue."
Khaix an:, Nawh Cao: ah nin: kah pwi simex, "Mawh kheu nghiiet maix kah lox moeng tix, mai ih plix khaox pa tawm: Aux maix ang ih, haktiex tag mawh pa jhax pa lawg kheu: maix, maix tag yaox tix ih khaing: nawh kah daux pa kharhawm: kharhi: tix, tom: sidauh sidu ju tix heue.
Kat lawm mai pang: kat khankix tag lih koe: son maix, mai maix tag ih taux lhax khaing: haktiex.
Maix tag lih rawm: lah rawm: lee:, sonsang pon maix tix ih priex preem, mai deeh ing: kah phawng: tiex heue. Grawhgrawng: nawh maix hoik mawh pa yuh Aux khaing: phawng: tiex, mai tag deeh ing: kah phawng: tiex heue."
Mai pwi simex kok ceukaux moeng tix mawh Evax (Evax dee bleeh pa im: ju), kheu mawh nawh miex kawn: pwi pa im: ju heue.
Son Adam mai moeng nawh, Simiang Siyiex yuh kraung ceep kah hak, mai tawx kiex ceep kah heue.
Khaix an:, Simiang Siyiex ah nin:, "Jhak heue, kawn: pwi hoik lih tix tawng pa mhawm: mai pa ang mhawm: awm: Siyiex; yamin: paw lai kieh nawh nyeu taix tix teei tix ih kah plix khaox im: ju an: mai im: ju leeing ju leeing phan: heue."
Mawh kheu nan: Simiang Siyiex grheu: kiex lih khaing: daux sipeem Eden mai kieh kiex thai: tix ih piang tiex, khaing: tiex pa hoik kaoh kiex kah heue.
Nawh Cao: grheu: kiex lih khaing: tan: mai Nawh Cao: deeh deuh Cherubin (kawncau Siyiex) plak lih singaix sipeem Eden mai tawx vaig ngu sah pa lawm kah nawh, sonsang pau krax ku krax, son daux krax pa hu: kah khaox im: ju an: heue.
Grawng: Pah Ka-inax Kah Abelax
Adam hoik ot tau mai moeng tix Evax, mai nawh koe: kaux mai keh Ka-inax (dee bleeh Ka-inax hoik pon). Nawh tom: ah nin:, "Aux hoik pon kawn: pwi tix kaux khaing: Simiang Siyiex heue."
Khaix an: nawh deeh koe: kaux mai deeh keh Abelax pa mawh pux Ka-inax. Yam ting Abelax mawh cao: pa liang yung: mai Ka-inax mawh cao: pa yuh kaing ma: kaung: heue.
Yam hoik hoek bawg yam Ka-inax viex plix nghox plix koi: pa pon nawh khaing: ma: kaung: sonsang tan lu tix kah Simiang Siyiex heue.
Abelax kawx viex kawn: yung: pa liang tix pon khaing: cub khaing: daux cub yung: tix mai bee hoek heue. Simiang Siyiex rieb tix teei kah Abelax mai krax tan krax lu nawh.
Viang mawh nan:, Nawh Cao: ang rieb tix teei kah Ka-inax mai krax tan krax lu nawh, Ka-inax songrhawm: songrhi: mai laux pakngai: heue.
Mawh kheu nan:, Simiang Siyiex ah nin: kah Ka-inax, "Songrhawm: maix jao patix? laux pakngai: maix jao patix?
"Phan: maix yuh pa mhawm:, maix tag pon rieb pa mhawm: ang mawh lie? Phan: maix yuh pa ang mhawm:, phimap hoik pau maix kah diang siviex tan:, mai phimap an: tag hawt alo maix, mai maix tag caw tix pex kah phimap an: heue."
Ka-inax ah nin: kah pux tix Abelax, "Hu: ax kah daux kaung:." Yam hoek kiex daux kaung:, Ka-inax yuh simah kah pux tix Abelax mai pah nawh yum: heue.
Khaix an: Simiang Siyiex ah nin: kah Ka-inax, pux maix Abelax ot dee mawx? mai nawh deeh pawk lox ah nin:, "Aux ang tawng, khex mawh aux pwi pa kia: ngien kah pux tix lie?"
Mai Nawh Cao: ah nin:, "Hoik yuh maix ceu patix? lox kok yo nham: pux maix khaing: daux tiex hoik hoek kah Aux heue."
"Mawh kheu nan:, haktiex pa hoik ang jheeh tix rieb nham: pux maix khaing: taix maix an:, tag jhax lawg kah maix heue.
Yam yuh maix ma: kaung:, maix tag ang lai pon plix tom: nie, maix tag sang mawh pwi pa vungviang kah piang haktiex heue."
Mai Ka-inax, deeh ah nin: kah Simiang Siyiex, "Krax pa kham: geu: aux in:, kied ting lhaong: khaing: pa pon kham: aux heue."
"Jhak heue, kah daux in: singaix Maix Cao: grheu: aux hu: khaing: piang haktiex, son ang aux lai pon tix yaox kah pakngai: Maix, aux tag sang yaox tix vungviang piang haktiex, can pwi pa yaox kah aux, tag sang pah aux heue.
Mai Simiang Siyiex ah nin: kah nawh, " Mawh kheu nan:, can pwi pa pah Ka-inax krax pawk bix, tag deeh koe: piang nawh aliah son." Simiang Siyiex deuh mhai: kah piang Ka-inax sonsang ang pwi pa yaox kah nawh pon pah nawh yum: heue.
Grawng: Kawn: Nyiex Ma: Ka-inax
Khaix an:, Ka-inax lih hu: khaing: sivoe ngai: Simiang Siyiex mai ot kah haktiex Nodax pa koe: plak lih singaix E den heue.
Ka-inax ot tau mai moeng tix mai nawh koe: kaux keh kawn: simex Enawk, mai nawh sum: veng ting tix mu: mai kok mawh veng Enawk, awm: ceukaux kawn: tix heue.
Kawn: simex Enawk mawh Irat, kawn: Irat mawh Mahuyelax, kawn: Mahuyelax mawh Mathushalax, mai kawn: Mathushalax mawh Lamek heue.
Lamek teei tix koe: moeng ra: kaux mai ceukaux mawh Adax mai Zilax heue.
Adax keh kawn: simex Yabalax pa mawh keeing: kah can pwi pa ot nyiiex gox mai pwi pa eei: khawng: brie heue.
Ceukaux pux nawh mawh Yubalax pa mawh keeing: kah can pwi pa tah ting: mai pwi paung: shiao: khankix heue.
Zilax keh kawn: simex Tubalaxka-inax, pa mawh cao: pa gau pwi kah kaing canglhek, plak tawng mai rhiem:, mai nan: Tubalaxka-inax, mawh Nemax heue.
Lamek ah nin: kah moeng tix khankiex, "Adax mai Zilax eue, nghiiet kah lox aux, moeng Lamek eue, nghiiet kah lox krai aux mawh kheu aux hoik pah kawn: nyawm simex awn: ju tix kaux pa tawx nawh krax tuktiak kah aux heue."
Phan: pwi mawx pah kah Ka-inax tag pon pa pawk bix aliah son, mai phan: pwi mawx pah kah Lamek tag pon pa pawk bix atigliah aliah son heue.
Mai Adam ot tau mai moeng tix, mai nawh koe: kaux mai keh kawn: simex tix kaux, mai sum: ceukaux nawh mawh Shetax, mawh kheu Siyiex baox tawx doeh simie kawn: pwi kah aux, tang: Abelax pa hoik pah Ka-inax heue.
Shetax koe: kawn: simex tix kaux, mai sum: ceukaux nawh mawh Enot, yam an: kawn: pwi jah tix kok kah ceukaux Siyiex mai krub kah Nawh heue.
Grawng: Doeh Nyiex Ma: Adam.
In: mawh phuk lai carang grawng: doeh simie nyiiex ma: Adam, kah daux bawg yam phan: Siyiex kah kawn: pwi, Nawh Cao: yuh awm: grang pakpeung: Tix heue.
Nawh Cao: yuh pwi simex mai pwi bun:, mai nawb bwan: kah piang kiex, mai Nawh kok ceukaux nawh mawh Adam doeh simie kawn: pwi kah daux singaix yam hoik phan: Nawh kiex heue.
Yam koe: ju Adam tiyieh tingoe: num, nawh deeh pon kawn: simex tix kaux, pa awm: grang pakpeung: nawh mai kok ceukaux nawh mawh Shetax heue.
Khaix hoik keh Shetax, Adam hoik koe: ju daix yieh num mai nawh yaox kah kawn: simex mai kawn: bun: tix khankix heue.
Mawh kheu nan:, Adam im: ju tom: hoek dim: yieh tingoe: num mai nawh yum: heue.
Shetax im: ju tiyieh phwan: num mai yaox kah kawn: simex tix Enot heue.
Khaix hoik keh Enot, Shetax im: ju tom: hoek daix yieh aliah num mai nawh baox pon kawn: simex kawn: bun: khankix heue.
Yam hoik naog ju Shetax dim: yieh kao: ra: num nawh yum: heue.
Enot im: ju tidim: num mai nawh deeh pon kah kawn: tix Kah-inan heue.
Khaix hoik keh Kah-inan, Enot im: ju tom: hoek daix yieh kao: phwan: num, mai nawh deeh baox pon kawn: simex kawn: bun: khankix heue.
Mawh kheu nan:, Enot yaox tix im: ju tom: hoek dim: yieh phwan: num mai nawh yum: heue.
Yam hoik koe: ju Kah-inan atigliah num nawh deeh pon kawn: tix Mahalelax heue.
Khaix hoik keh Mahalelax, Kah-inan im: ju tom: hoek daix yieh tipon: num, mai nawh baox pon kawn: simex kawn: bun: khankix heue.
Mawh kheu nan:, Kah-inan im: ju tom: hoek dim: yieh kao: num mai nawh yum: heue.
Yam koe: Mahalelax tigliah phwan: num, nawh pon kawn: tix Zarit heue.
Khaix hoik pon nawh Zarit, Mahalelax im: ju tom: hoek daix yieh tingoe: num mai nawh pon kawn: simex kawn: bun: khankix heue.
Mawh kheu nan:, Mahalelax im: ju tom: hoek daix yieh tidim: phwan: num mai nawh yum: heue.
Zarit koe: ju tiyieh tigliah ra: num mai nawh pon kawn: tix Enawk heue.
Khaix hoik pon Enawk, Zarit im: ju tom: hoek daix yieh num mai nawh pon kawn: simex kawn: bun: khankix heue.
Mawh kheu nan:, Zarit im: ju tom: hoek dim: yieh tigliah ra: num mai nawh yum: heue.
Yam koe: ju Enawk tigliah phwan: num mai nawh pon kawn: tix Mathusalax heue.
Khaix hoik pon nawh Mathusalax, Enawk hawt hu: tau mai Siyiex been loe: yieh num mai nawh baox deeh pon kawn: simex kawn: bun: khankix heue.
Mawh kheu nan:, Enawk im: ju tom: hoek loe: yieh tigliah phwan: num heue.
Enawk hu: tau mai Siyiex mai nawh ang lai koe: khaix an:, mawh kheu hoik deeh teei Siyiex kah nawh heue.
Yam koe: ju Mathusalax tiyieh tidaix aliah num nawh pon kawn: tix Lamet heue.
Khaix hoik pon nawh kawn: tix Lamet, Mathusalax im: ju tom: hoek aliah yieh tidaix ra: num, mai baox deeh pon kah kawn: simex kawn: bun: khankix heue.
Mawh kheu nan:, Mathusalax im: ju tom: hoek dim: yieh tigliah dim: num mai nawh yum: heue.
Yam koe: ju Lamet tiyieh tidaix ra: num nawh pon kawn: simex tix kaux heue.
Mai nawh sum: ceukaux nawh mawh Noax, mai ah nin:, "In: tix kaux mawh pa tawx krax nyawmrhawm: nyawmrhi: kah kaing jhaw: pa taug pa mao, pa yuh ex kah taix tix, piang haktiex pa hoik jhax lawg Siyiex kah heue."
Khaix hoik pon nawh kawn: tix Noax, Lamet im: ju tom: hoek phwan: yieh tidim: phwan: num, mai nawh deeh baox pon kawn: simex kawn: bun: khankix heue.
Mawh kheu nan:, Lamet im: ju tom: hoek aliah yieh atigliah aliah num mai nawh yum: heue.
Yam hoik koe: ju Noax phwan: yieh num nawh pon kawn: tix pa mawh Semax, Hamax mai Yaphiet heue.
Grawng: Pa Caox Pa Caig Mai P a Ciyang Kah Kawn: Pwi
Yam jah kawn: pwi lih tix haoh hun: kah piang haktiex, mai kix koe: kawn: bun: tom: nie,
kawn: simex Siyiex khankix yaox mhawm: grang kawn: bun: kawn: pwi, mai kix laug tix teei mawh moeng tix heue.
Mai Simiang Siyiex ah nin:, "Khwan: Aux tag ang lai ot kah daux kawn: pwi leeing ju, kheu mawh nawh nex nham:, mai Aux tag sang kieh baux ju nawh die ngie tiyieh tinga: num heue.
Yam an: pwi Anakat pa ting lhaong: lih koe: kah piang haktiex, Kawn: simex Siyiex khankix, teei tix moeng kawn: bun: kawn: pwi, mai kix pon kawnpraix pa ting riang rao, mai pa ao: min: tom: yam an: son cao: tix heue.
Simiang Siyiex yaox pacaox pacaig yuh kawn: pwi hoik ting lhaong: kah piang haktiex, mai krax keud kix, mawh pa ang mhawm: khaing: heue.
Mai Simiang Siyiex lauxrhawm: kah pa phan: pa yuh Tix kawn: pwi piang haktiex, Nawh Cao: kied kleh sigrien sigre heue.
Mawh kheu nan:, Simiang Siyiex ah nin:, "Mawh kheu kied kleh Aux kah pa hoik phan: hoik yuh tix kawn: pwi, Aux tag sang yuh can pa koe: kah piang haktiex in: lauxleeing: jah kah kawn: pwi tom: hoek kah totiag totu can pa chix mo piang tiex khankix, mai sim: sai: raoma: khankix heue."
Viang mawh nan:, Noax mawh pwi pa pon bwanson: kah sivoe ngai: Simiang Siyiex heue.
Grawng: Yuh Noax Pa Khawrhawm: Siyiex
In: mawh grawng: doeh simiex ceucat Noax, Noax mawh pwi pa rauh pa see, mai pa grum naog, daux doeh simie ceucat nawh, mai nawh mawh pa hu: tau mai Siyiex.
Noax koe: kawn: simex loe: kaux, pa mawh Shemax, Hamax, mai Yaphiet heue.
Haktiex hoik cux sium: sivoe ngai: Siyiex, mai kah piang haktiex in: naog kah ceu pa lang: teung: heue.
Mai Siyiex jhak kah haktiex Nawh Cao: hoik yaox kah lauxleeing: cux sium: haktiex, mai nex nham: kawn: pwi khankix kawx hoik hu: kah daux pa lauxleeing: haktiex heue.
Mai Siyiex ah nin: kah Noax, "Dee sidauh bawg yam kawn: pwi hoik hoek plak sivoe ngai: Aux, mawh kheu hoik naog pa kied lang: teung: piang haktiex jao kix, jhak heue, Aux tag sang yuh kix laux tau mai haktiex heue.
Grawng: Pa Khre: Reu Ting
"Yuh reu ting tix mu: son cao: maix, kah khaox Gawpharax, yuh lawg khankix koe: daux reu, mai kraix peeh khaox gix kah plak daux mai plak praix heue."
"Pa sang caw: maix tix yuh mawh nin:, krax lang: reu kieh koe: loe: yieh sawk, krax vieh kieh koe: tiphwan: sawk, mai krax lhaong: kieh koe: tingoe: sawk heue."
"Mai yuh siviex iak koe: kah reu an:, mai kieh tiiem greem: braux tix sawk, kieh ding: siviex koe: kah praok reu, mai yuh reu an: koe: loe: thaix, pa mawh thaix plak greem:, thaix sigreung mai thaix plak piang heue,
"Jhak heue, Tokaux Aux sang kieh rawm: kheem: kah piang haktiex, sonsang yuh kawn: pwi pa im: ju pa koe: greem: raoma: mai can ceu pa koe: kah piang haktiex khawm uik khawm leeing: yum: heue."
Viang mawh nan:, Aux tag deuh lox sijax mukheu Tix kah maix, tokaux maix, kawn: simex maix, moeng maix, mai mun maix khankix, tag yaox tix laig daux reu heue.
"Maix tag yaox tix viex tosat pa im: ju mhaing: mai shiang: ku mawx ku an: laig kah daux reu sonsang priex maix kix im: ju tau mai maix heue.
"Sim: ceu mawx ceu an:, tosat ceu mawx ceu an:, can pa chix mo piang tiex, ceu mawx ceu an:, pa mawh mhaing: mai shiang: ku mawx ku an: hoek kah maix, mai priex kix im: ju heue."
"Maix tag sang yaox tix khrawm: pa ih pa un: son cao: maix, mai pa ih pa un: son kix khawm uik heue."
Mawh kheu nan:, Noax yuh kuceu awm: gumlox pa hoik tawm: Siyiex kah nawh heue.
Grawng: Pa Kheem: Rawm:
Khaix an: Simiang Siyiex ah nin: kah Noax, "Maix mai nyiiex ma: maix khawm uik laig kah daux reu, mawh kheu Aux hoik yaox pa rauh pa see maix sivoe Tix, daux doeh simie ceucat inkix heue."
"Maix teei tosat mhaing: mai shiang: pa singax aliah ku, mai tosat mhaing: mai shiang: pa ang singax ra: ku,
"Sim: daux raoma: tix ceu aliah ku khawm mhaing: mai shiang:, sonsang priex maix doeh simie kix im: ju kah piang haktiex khawm uik heue."
"Grawhgrawng: nawh, khaix hoik naog aliah ngaix Aux tag sang kieh lhiex lih kah piang haktiex in: tipon: ngaix tipon: sawm:, mai Aux tag kieh can ceu pa im: ju, pa hoik phan: hoik yuh Aux khankix lauxleeing: kah piang haktiex in: heue."
Mai Noax yuh kuceu awm: gumlox tawm: Simiang Siyiex kah nawh heue.
Yam kheem: rawm: kah piang haktiex Noax koe: ju liah yieh num heue.
Mawh kheu nan:, Noax mai kawn: simex nawh, moeng nawh, mai mun nawh, khankix laig daux reu sonsang luat luan khaing: pa kheem: rawm: heue.
Tosat pa singax mai pa ang singax, sim: sai: raoma: mai can ceu pa chix mo chix hu: piang tiex;
ku mawx ku an:; laig daux reu tau mai Noax, mhaing: mai shiang: awm: gumlox tawm: Siyiex kah Noax heue.
Khaix hoik hoek aliah singaix, rawm: khankix, lih kheem: kah piang haktiex heue.
Yam koe: ju Noax liah yieh num, daux khix ra: kao: aliah singaix daux khix an: rawm: keut khaing: dee raux khawm uik hoik bih mai siviex raoma: hoik baoh heue.
Mai lhiex lih kah piang haktiex tipon: ngaix tipon: sawm: heue.
Kah daux singaix an:, Noax mai kawn: simex nawh Shemax, Hamax, mai Yaphiet, mai moeng nawh, mai mun nawh loe: kaux laig daux reu heue.
Kix mai tosat ceu mawx ceu an:, khawng: brie ceu mawx ceu an:, mai tosat pa chix mo chix hu: piang tiex ceu mawx ceu an:, sim: raoma: ceu mawx ceu an: kuceu khankix;
Mai tosat pa im: ju mhaing: mai shiang: ku mawx ku an: laig daux reu tau mai Noax heue.
Mai tosat pa mawh mhaing: mai shiang: kuceu laig kah daux reu awm: gumlox pa tawm: Siyiex, khaix an: Simiang Siyiex nyeep siviex reu kah kix heue.
Rawm: ca: nied tix kheem: kah piang haktiex tipon: ngaix; Rawm: khankix haok hwan: mai yaog reu haok lhaong: khaing: haktiex heue.
Rawm: haok hwan: sipie sipie mai ting riang kah piang haktiex, mai reu sibloe: kah piang rawm: heue.
Rawm: nied tix haok hwan: ting riang mai gawng lua pa koe: greem: raoma: hoik glip khawm uik heue.
Rawm: hoik kheem: lhaong: khaing: gawng lua khankix kao: phwan: sawk heue.
Can pa chix chuh piang tiex, pa mawh sim:, tosat khawng: brie kuceu mai can pa chix mo piang tiex khawm uik mai kawn: pwi hoik yum: heue.
Mai can ceu pa im: ju, pa toek bhawm: kah meeh tix, pa ot piang haktiex kawx yum: khawm uik heue.
Nawh Cao: kieh can pa im: ju piang haktiex, pa mawh kawn: pwi, khawng: brie, tosat pa chix mo chix hu:, mai sim: sai: raoma: khankix lauxleeing: heue. Mawh ngie Noax mai can pa ot tau mai nawh daux reu pa klawd ju heue.
Rawm: haok hwan: ting lhaong: mai kheem: kah piang haktiex tiyieh tiphwan: ngaix heue.
Grawng: Hit Rawm:
Siyiex doh keud kah Noax, mai can pa im: ju pa mawh tosat pa ot mai nawh daux reu. Siyiex kieh bhaung: ting lih phlu: kah piang haktiex, mai rawm: khankix dieh hu: heue.
Rawm: keut khaing: dee raux mai siviex raoma: hoik deeh nyeep tix, mai lhiex khaing: raoma: kawx ang lai lih heue.
Rawm: khankix, grheuh hu: sipie sipie khaing: haktiex. Mai khaix hoik naog tiyieh tiphwan: singaix rawm: hoik dieh heue.
Kah daux khix aliah, kao: aliah singaix, reu an: tum: kah piang choek gawng Ararat heue.
Rawm: grheuh hu: sipie sipie tom: hoek khix kao:; yam haok khix an:, tix singaix, choek gawng khawm uik blhiien: khaing: daux rawm: heue.
Khaix hoik naog tipon: singaix Noax paoh kah siviex iak reu pa hoik yuh tix heue.
Nawh ploi: lak tixmu: lih hu: kah praix, mai lak an: pu: hu: pu: hoek tom: sidauh hoek bawg yam kroh haktiex heue.
Mai nawh deeh baox ploi: sikaux tixmu: lih hu: kah praix, sonsang tawng nawh kah grawng: hit rawm: piang tiex heue.
Viang mawh nan:, sikaux ang nyang yaox dee sang tum: sang laux caong tix, mai nawh deeh ing: kah reu, kheu kawn: kheem: rawm: kah piang haktiex khawm uik, mawh kheu nan: nawh nyeu taix tix deeh teei sikaux laig daux reu heue.
Nawh baox deeh pau aliah singaix, mai nawh baox ploi: sikaux lih hu: khaing: daux reu;
mai sikaux deeh hoek kah nawh plak bo, mai jhak heue, nawh teei tix viex lhax khaox Sanlon pa khraox kah gaoh tix, yam an: Noax hoik tawng hit rawm: kah piang haktiex heue.
Mawh kheu nan:, nawh deeh baox pau tom: hoek aliah singaix, mai nawh deeh baox ploi: sikaux lih hu: plak praix, mai sikaux an:, ang lai deeh hoek tix bawg kawx heue.
Yam hoik hoek Noax liah yieh mai tix num, daux khix tix, tix ngaix, rawm: hoik hit mai haktiex kroh, Noax plak kah braux reu mai jhak kah plak praix, mai nawh yaox kah hoik kroh haktiex heue.
Kah daux khix ra:, tinga: aliah ngaix, piang haktiex hoik deeh kroh khawm uik heue.
Khaix an:, Siyiex ah nin: kah Noax,
" Lih hu: khaing: daux reu, maix khawm moeng maix, kawn: simex maix, mai mun maix kukaux tau mai maix heue."
"Viex tosat can pa im: ju pa mawh sim:, mai khawng: brie mai tosat pa chix mo chix hu: piang tiex pa ot tau mai maix sonsang baox deeh lih pre haoh hun: kix kah piang haktiex heue."
Mawh kheu nan:, Noax lih hu: kah praix tau mai kawn: simex nawh, moeng nawh, mai mun nawh khankix heue.
Can tosat kuceu, pa chix mo chix hu:, mai sim: kuceu, mai tosat pa chix chuh kah piang haktiex khawm uik lih hu: khaing: daux reu heue.
Lox Sijax Mukheu Siyiex Kah Grawng: Pa Phan: Pa Deuh
Khaix an: Noax yuh khu: dee tan son Simiang Siyiex tix mu:, mai nawh viex tosat pa singax mai sim: pa singax kuceu hoek, mai gleeing tix tan krax tan pa gleeing kah piang khu: dee tan kah Siyiex heue.
Siyiex khaw: rhawm: mai rieb kah pa sioe: bhawng: an:, mai Simiang Siyiex ah nin: kah daux rhawm: Tix, "Aux tag ang lai baox jhax lawg kah haktiex kheu jao kawn: pwi khaix in:, tix bawg kawx, mawh kheu kawn: pwi koe: rhawmrhi: pa caox pa caig jah tom: yam iak tix, Aux tag ang lai baox yuh can pa im: ju khankix lauxleeing: awm: pa hoik yuh Aux bawg in: heue."
"Glang: yam kawn: koe: haktiex in:, baux yam ruat simie, yam vawg nghox, mai bawg yam kwat, yam koek praix, yam raux, yam rung, yam pon singaix mai yam ponsawm:, Aux tag ang lai kieh jud jai heue."
Mai Siyiex nawb bwan: kah Noax, mai kawn: nawh khankix mai ah nin:, "Kieh pex baox deeh keh haoh hun: mai naog kah haktiex in: heue.
"Tosat kuceu pa koe: piang haktiex, pa mawh sim: raoma: mai can pa chix chuh piang tiex, mai can kuceu pa koe: daux rawm: sigrit sigra: khankix tag koe: krax lhat krax graung sivoe maix heue. Ceu inkix khawm uik, Aux hoik appong: kah daux tawm: taix maix heue."
"Can ceu pa chix chuh pa im: ju kuceu, tag sang mawh pa ih pa un: son maix; Aux hoik tawx inkix khawm uik kah maix awm: tawx taux lhax klai khankix heue."
"Viang mawh nan:, maix ang pon tix ih nex tau mai nham:, kheu mawh nham: ju heue."
"Aux tag ciyang kah pwi pa pah kah ju pex, mai tag ciyang kah tosat pa laux yuh kah ju pex, mai kah puxaik pex pa pah kah ju puxaik tix heue.
"Pwi mawx ang ah, phan: nawh kieh nham: kawn: pwi jauh, nham: nawh kawx, tag yaox tix jauh kah taix kawn: pwi heue. Mawh kheu Siyiex hoik yuh kawn: pwi awm: rieng pakpeung: Tix heue.
"Kieh pex deeh pon kawnpraix tom: nie, mai kieh pre haoh hun: kah piang haktiex heue."
"Khaix an: Siyiex sikah mai Noax mai kawnpraix nawh khankix mai ah nin:;
"Jhak heue, Aux tag yuh sijax mukheu kah pex, mai son doeh simie ceucat pex khankix."
"Mai can tosat pa im: ju khankix tau mai pex pa mawh sim:, khawng: brie, mai tosat kuceu piang tiex pa hoik lih tau mai pex khaing: daux reu khawm uik heue."
"Aux hoik yuh sijax mukheu tau mai pex, sonsang ang lai yuh tosat pa im: ju khankix lauxleeing: kah pa kheem: rawm:, mai ang lai baox kieh rawm: kheem: kah piang haktiex heue."
Mai Siyiex ah nin:, "In: mawh mhai: sakse sijax mukheu pa yuh Aux sinax pex mai Aux, mai tosat pa im: ju, pa ot tau mai pex, khawm doeh simie ceucat pex leeing ju heue."
"Aux tag deuh siyawng mukheu kah daux paiawm:, sonsang mawh mhai: sakse sijax mukheu sinax Aux mai haktiex heue."
"Yam kieh Aux paiawm: ceep kah piang haktiex, tag sidawng: yaox siyawng mukheu an: kah daux paiawm: heue."
"Mai Aux tag doh keud kah sijax mukheu pa hoik yuh Tix sinax maix mai Aux, mai tosat pa im: ju kuceu khawm uik; tag ang lai baox deeh kieh rawm: kheem: lauxleeing: heue."
"Yam jhak Aux kah siyawng mukheu pa koe: daux paiawm:, Aux tag doh keud kah sijax mukheu pa yuh Tix leeing ju, tau mai can tosat pa im: ju pa koe: kah piang haktiex in: heue."
Mai Siyiex baox ah nin: kah Noax, "In: mawh mhai: sakse sijax mukheu pa hoik yuh Aux tix deuh sinax Aux mai can tosat pa im: ju pa ot piang haktiex khawm uik heue."
Noax Mai Kawn: Simex Nawh Khankix
Kawn: simex Noax khankix pa lih khaing: daux reu, mawh Shemax, Hamax mai Yaphiet. Hamax mawh keeing: Khanan heue.
Inkix loe: kaux mawh kawn: simex Noax, pa lih tah hu: kah piang haktiex heue.
Mai Noax jah tix yuh kaing ma: mai yuh sipeem plix siiet heue.
Khaix an: nawh nyaux rawm: plix siiet tom: yoek tix, mai it kakaong: daux nyiiex gox tix heue.
Hamax keeing: Khanan yaox kah it kakaong: keeing: tix, nawh lih krai puxaik tix ra: kaux mhong: heue.
Viang mawh nan:, Shemax mai Yaphiet teei kraung ceep tix pheen: mai kiex deuh piang klip tix, mai hu: deeh khaix, lhop kah keeing: kiex; mawh kheu jhak kiex plak praix yam lhop kiex nawh, kiex tom: ang chix yaox kah ot kakaong: keeing: tix heue.
Yam siduad Noax khaing: yoek tix kah rawm: plix siiet, nawh tawng pa yuh kawn: simex tix khankix heue.
Nawh jhax lawg Khanan ah nin:, "Kieh nawh mawh siliex kah siliex puxaik tix khankix heue."
Mai nawh ah nin:, "Kieh Simiang Siyiex nawb bwan: kah Shemax mai kieh Khanan mawh siliex nawh heue."
"Kieh Siyiex joh jhan: Yaphiet ting lhaong: mai kieh nawh ot daux nyiiex gox Shemax, mai kieh Kkanan mawh siliex nawh heue."
Noax baox im: ju loe: yieh tiphwan: num, khaix kheem: rawm: kah haktiex in: heue.
Noax im: ju tom: hoek dim: yieh tiphwan: num, mai nawh yum: heue.
Doeh Ru Ceucat Pa Kaoh Khaing: Noax.
In: mawh grawng: doeh ru simie ceucat kawn: simex Noax, pa mawh Shemax, Hamax mai Yaphiet khankix, Khaix kheem: rawm:, kix keh kawnpraix tom: nie heue.
Kawn: simex Yaphiet mawh Gawmax Magawgax, Madie, Yavan, Tubalax, Meshiet, mai Tirat khankix heue.
Kawn: simex Gawmax mawh Ashakeniet, Riphat mai Tawgamax heue.
Mai kawn: simex Yavan mawh Elishax, Tasux, Kiten, mai Dawnamix heue.
Jah kah haktiex praok rawm: baoh an:, kix gwieh tix ot haktiex tang: dauh ku plak, awm: pa koe: lox sikah doeh nyiiex ma: kix ceu mawx ceu an: mai lih mawh ceu pwi tan: heue.
Kawn: simex Hamax mawh Kushax, Mizareng, Putax, mai khanan heue.
Kawn: simex Kushax mawh Shebax, Havilax, Sabatax, Ramax, mai Shatekha, mai kawn: simex Ramax mawh Shibax mai Dedam heue.
Kushax pon kawn: simex tix Neyawdax mai nawh jah tix mawh pwi pa ting riang tix kaux piang haktiex heue.
Nawh mawh pwi jaw, pa ting riang sivoe ngai: Simiang Siyiex. Mawh kheu nan:, kix ah nawh mawh, "pwi jaw pa ting riang pa awm: Neyawdax sivoe ngai: Simiang Siyiex heue.
Yam jah meung nawh mawh Babulon, Eren, Ekhet mai Kalane, pa koe: daux haktiex Shinax heue.
Jah khaing: haktiex an:, nawh hu: kah meung Asurix mai sum: veng Nineve, veng Yahobok mai veng Kalax heue.
Sinax veng Kalax mai veng Nineve nawh baox sum: veng ting Resin heue.
Kawn: Mizareng mawh Luim, Anamim, Lehabim, Naptuhim,
Patarusim mai Khasaluhim heue, Khasaluhim lih tix mawh ceu pwi Philitix, mai ceu pwi Kapturim heue.
Khanan pon kawn: Ai tix Sidon mai khaix an: Hetax,
Yebutix, Amorix, mai Giragashix,
Hiwix, Akix mai Sinix,
Avadix, Zemarix mai Hamatix heue, khaix an: ceu pwi Khanan khankix lih hu: prungprang:tix ot kudauh heue.
Mai mee: haktiex pwi ceu Khanan jah kah Sidom tom: hoek Gerax mai Gezax, khaix an: hoek kah Sawdom, Gawmawrax, Adamax mai Zebai tom: sidauh Lashax heue.
Inkix mawh kawn: simex Hamax pa tang: mawh ceucat mawx ceucat an:, pa tang: lox sikah mai tang: dee ot dee koe: daux haktiex cao: kix heue.
Shemax baox deeh koe: kawn: simex khankix, pa mawh keeing: kah pwi Hebax pa mawh puxke: Yaphiet heue.
Kawn: simex Shemax khankix mawh Elam, Ashu, Aphazat, Lutax mai Alam heue.
Kawn: simex Aram mawh Uzax, Hulax, Getax mai Mashax heue.
Aphazat baox pon kawn: tix Shalax, mai Shalax baox pon kawn: tix Hebax heue.
Hebax koe: kawn: simex ra: kaux, an: tix kaux mawh Phalek, mawh kheu haktiex khankix gweh tix kah daux singaix baux ju nawh, mai ceukaux pux mawh Yoktan heue.
Yoktan baox pon kawn: tix Alamodak, Shelap, Hazamaviet, Yerax,
Hadawram, Uzalax, Digalax,
Awbalax, Abimelax, Shebax,
Awphirax, Havilax, mai Yawbat, inkix khawm uik mawh kawn: simex Yoktan heue.
Dee ot dee koe: kix, jah kah Meshax tom: hoek kah gawng plak lih singaix Sephax heue.
Inkix mawh kawn: simex Shemax pa tang: ot mai ceucat tix, pa tang: lox sikah daux haktiex ot cao: tix heue.
Inkix mawh carang doeh nyiiex ma: kawn: simex Noax mai ceucat kix, mai haktiex lih hu: kix tix ot kudauh kudee khaix hoik kheem: rawm: kah piang haktiex heue.
Nyiiex Lhaong: Babelax
Yam an: kawn: pwi haktiex khawm uik, mawh pwi tix ceu, mai lox sikah tix ceu khaing: heue.
Bawg yam an:, kix kaoh khaing: plak lih singaix mai kix yaox kah haktiex dee lung: Shina mai kix ot tan: heue.
Mai kix ah nin: kah paox tix, "hoek heue, kieh ex yuh tiex mak ut mai gleeing tom: kaux, kix yuh tiex mak ut mawh tang: simaox mai kix shao graix tang: tiex pilad heue.
Mai kix ah nin:, "hoek heue, kieh ex sum: veng ting tix mu:, mai nyiiex lhaong: son cao: ex, tom: cux raoma:, sonsang ang ex lai prungprang:kah haktiex tang: dauh, mai sonsang ao: min: ceukaux ex kah piang haktiex in: heue."
Mai Siyiex lih jhak kah veng mai nyiiex lhaong: pa sum: kawn: pwi heue.
Mai Simiang Siyiex ah nin:, "kawn: pwi khankix hoik mawh pwi tix ceu, mai lox sikah kix kawx hoik mawh tix ceu khaing:, yamin: can pa yuh kix, mai can pa keud kix phan: ang lai koe: ceu tieb kah, kix tag ca: yuh awm: an: heue."
"Hoek heue, kieh Ex lih hu: mai tiebtie kix, mai kieh lox sikah kix tang: khaing: paox tix heue."
Mawh kheu nan:, Simiang Siyiex kieh kix prungprang:kah piang haktiex kudauh kudee, mai ang lai kieh kix sum: veng ting heue.
Mawh kheu hoik kieh Simiang Siyiex lox sikah kix tang: khaing: paox tix, mai kieh kix prungprang: kah piang haktiex kudauh kudee, kix tom: kok veng an: mawh Babelax heue.
Doeh SiMie Ceucat Shemax
In: mawh doeh simie ceucat Shemax khaix hoik kheem: rawm: haktiex ra: num, Shemax koe: ju tiyieh num mai nawh pon kawn: simex tix Aphazat heue.
Khaix hoik pon nawh Aphazat, Shemax im: ju phwan: yieh num mai baox pon kawn: simex kawn: bun: khankix heue.
Yam koe: ju Aphazat tingoe: phwan: num nawh pon kawn: simex tix Shalax heue.
Khaix hoik pon nawh Shalax, Aphazat im: ju pon: yieh loe: num mai baox pon kawn: simex kawn: bun: khankix heue.
Shalax koe: ju tingoe: num mai pon kawn: tix Hebax heue.
Khaix hoik pon nawh Hebax, Shalax im: ju pon: yieh loe: num mai baox pon kawn: simex kawn: bun: khankix heue.
Hebax koe: ju tingoe: pon: num mai nawh pon kawn: tix Phalek heue.
Khaix hoik pon nawh Phalek, Hebax im: ju pon: yieh tingoe: num mai nawh baox pon kawn: simex kawn: bun: khankix heue.
Phalek koe: ju tingoe: num mai nawh pon kawn: tix Ragaw heue.
Khaix hoik pon nawh Ragaw, Phalek im: ju ra: yieh dim: num mai nawh baox pon kawn: simex kawn: bun: khankix heue.
Yam koe: ju Ragaw tingoe: ra: num mai nawh pon kawn: tix Seraok heue.
Khaix hoik pon nawh Seraok, Ragaw im: ju tom: hoek ra: yieh aliah num mai nawh deeh baox pon kawn: simex kawn: bun: khankix heue.
Seraok koe: tingoe: num mai nawh pon kawn: tix Nakhaw: heue.
Khaix hoik pon nawh Nakhaw:, Seraok im: ju ra: yieh num mai nawh baox pon kawn: simex kawn: bun: khankix heue.
Nakhaw: ot tinga: dim: num mai nawh pon kawn: tix Terax heue.
Khaix hoik pon nawh Terax, Nakhaw: im: ju tom: hoek tiyieh kao: dim: num mai nawh baox deeh pon kawn: simex kawn: bun: khankix heue.
Terax ot atigliah num mai nawh pon kawn: tix pa mawh Abram, Nakhaw: mai Haran khankix heue.
Doeh Simie Ceucat Terax
In: mawh doeh simie ceucat Terax, Terax pon kawn: tix pa mawh Abram, Nakhaw:, mai Haran, Haran deeh pon kawn: tix Lotax heue.
Haran yum: sivoe keeing: tix Terax daux haktiex ceu pwi Kaladie: veng Urax heue.
Khaix an:, Abram mai Nakhaw: teei tix koe: moeng, ceukaux moeng Abram mawh Sarie, mai ceukaux moeng Nakhaw: mawh Milakha kawn: bun: Haran, pa mawh keeing: kah Milakha mai Isakha heue.
Viang mawh nan:, Sarie mawh bun: pa neh, pa ang chix koe: kawn: heue.
Mai Terax viex kawn: simex tix Abram mai kawn: saux nawh Lotax, pa mawh kawn: Haran, mai mun nawh Sarie, pa mawh moeng kawn: simex nawh Abram khankix, mai kix lih hu: khaing: haktiex ceu pwi Kaladie: veng Urax, sonsang hu: kah meung khanan mai kix hoek kah Haran mai ot tan: heue.
Terax im: ju tom: hoek ra: yieh phwan: num mai Terax yum: kah daux veng Haran heue.
Gumlox Sijax Mukheu Son Abram
Simiang Siyiex ah nin: kah Abram, "Lih hu: khaing: haktiex an:, mai khaing: paox ceu paox cat maix khaing: daux nyiiex ma: keeing: maix mai hu: kah meung pa tag sang jhi: Aux maix yaox heue."
"Aux tag yuh maix mawh ceucat pa ting pa lhaong:. Aux tag nawb bwan: kah piang maix mai kieh min: ceukaux maix ting lhaong:, mai maix tag mawh pa tawx bwan: kah pwi heue."
"Aux tag nawb bwan: kah pwi pa nawb bwan: kah piang maix, mai Aux tag jhax lawg kah pwi pa jhax lawg kah maix, ceu pwi piang haktiex khawm uik tag pon bwanson: kah daux maix heue."
Mawh kheu nan:, awm: hoik tawm: Siyiex lox kah nawh, Abram lih hu:, mai Lotax kawx hu: tau mai nawh, yam lih Abram khaing: haktiex Haran, ju nawh hoik koe: atigliah phwan: num heue.
Khaix an: Abram teei moeng tix Sarie, mai Lotax kawn: pux nawh, khrawm: kraungkhrai: sinngao khawm pwi pa pon nawh khaing: meung Haran, kix lih hu: kah haktiex Khanan, mai kix hoek kah haktiex Khanan heue.
Abram laig kah haktiex an: mai hoek kah Shekhem, dee koe: khaox piak van: mai haktiex an: mawh ceu pwi Khanan pa dawg ot kah heue.
Khaix an: Simiang Siyiex lih bleeh kah Abram mai ah nin:, "Aux tag sang tawx haktiex in: son doeh simie ceucat maix heue." Mai nawh yuh khu: dee tan tix mu:, kah son Simiang Siyiex, pa hoik lih bleeh kah nawh tan: heue.
Mai nawh gah tix khaing: tan:, mai hu: kah gawng pa koe: plak lih singaix kah veng Betelax, mai nawh sum: nyiiex gox man:, plak klip singaix veng Betelax mai plak lih singaix veng A-ix heue. Nawh deeh sum: khu: dee tan son Simiang Siyiex tix mu: mai nawh yaogyaw ceukaux Simiang Siyiex tan: heue.
Mawh kheu nan: Abram deeh hu: khaing: tan: mai hoek kah plak caong ma: seh heue.
Abram Hu: Daux Meung Ejiptux
Yam an: sibhawm: praix lih koe: daux haktiex Khanan mai Abram lih hu: plak meung Ejiptux, sonsang laux lee: tix tivud ticu glang: sinax koe: sibhawm: praix daux haktiex an: heue.
Yam dex laig kix kah meung Ejiptux, nawh ah nin: kah moeng tix Sarie, "Aux hoik tawng mawh maix bun: mhawm: grang heue.
Mai yam yaox pwi Ejiptux khankix kah maix, kix tag ah nin:, "in: mawh moeng nawh mai kix tag pah aux, mai kieh maix im: ju heue."
"Yuh bwanson: krai mawh maix nan: aux, sonsang mawh pa mhawm: son aux, kheu bwanson: maix aux tag sang yaox tix im: ju heue."
Yam hoek Abram daux meung Ejiptux, pwi Ejiptux khankix yaox kah kied mhawm: grang bun: an: heue.
Cao: kaing: cao: kap greem: khunhawkham Pharaw yaox kah nawh mai yaogyaw nawh sivoe khunhawkham Pharaw mai kix viex nawh laig kah nyiiex haw: khunhawkham Pharaw heue.
Mawh kheu jao bun: an: khunhawkham Pharaw tom: priex Abram mhawmmhawm:, nawh pon tix koe: kawn: yung:, moi, la mhaing:, la shiang:, mai siliex simex bun:, mai kala-uk tom: nie heue.
Viang mawh nan: Simiang Siyiex kieh khunhawkham Pharaw pon jhawm: saux ting khawm nyiiex khawm ma:, kheu teei nawh tix priex Sarie moeng Abram heue.
Khunhawkham Pharaw kok kah Abram mai ah nin:, "Grawng: pa yuh maix kah aux in: mawh pa yuh kah mawx? yuh patix maix lai ang krai mawh nawh moeng tix kah aux lie?"
"Yuh kah mawx maix lai krai, mawh nawh nan: tix? aux tom: teei nawh mawh moeng tix jao grawng: in: heue. Yamin: deeh teei moeng maix hu: heue."
Mai khunhawkham Pharaw tawx lox kah pwi tix khankix mai viex Abram khawm moeng nawh mai can pa koe: nawh khawm uik lih khaing: tan: heue.
Sinngao Khanan Son Abram
Khaix an: Abram lih hu: khaing: meung Ejiptux, khawm moeng nawh mai can pa koe: nawh khankix tau mai Lotax, plak caong ma: seh meung Khanan heue.
Abram kied magmi koe: khawng: brie, mai mau khri: tom: nie heue.
Mai nawh hu: krax tom: hoek Betelax, dee sum: tix nyiiex gox man: yam jah, sinax veng Betelax mai veng A-ix heue.
Dee an: mawh dee hoik sum: nawh khu: dee tan kah Siyiex tom: yam jah nhaox. Abram kok ceukaux Simiang Siyiex mai yaogyaw Nawh tan: heue.
Lotax pa hu: tau mai Abram, mai nawh kawx yaox tix koe: kawn: yung: khawng: brie mai nyiiex gox man: tom: nie heue.
Mawh kheu haktiex baoh an:, hoik sikhawp sonsang ot kiex tau, jao hoik haoh hun: kraungkhrai: khawng: brie cie kiex khawm ra:, kiex tom: ang lai chix ot tau kah heue.
Mai krax simah simaing: lih koe: sinax cao: liang khawng: brie Abram, mai cao: liang khawng: brie Lotax. Pwi ceu Khanan mai pwi ceu Pherazix khankix ot daux meung an: heue.
Mawh kheu nan:, Abram tom: ah nin: kah Lotax, "paw kieh krax simah simaing: koe: sinax cao: liang khawng: brie aux mai maix, kheu mawh ex puxaik heue."
"Haktiex hoik koe: sivoe ngai: maix ang mawh lie? tang: gwieh tix hu: ot khaing: aux. Phan: maix hu: plak gwiex, aux tag hu: plak dawm:. Phan: ang mawh nan:, phan: maix hu: ot plak dawm:, aux tag sang hu: plak gwiex heue."
Lotax yaog tix jhak mai yaox kah dee lung: haktiex Yawdan dee koe: rawm: tom: nie. Yam an: Simiang Siyiex ang nyang yuh veng Sawdom mai veng Gawmorax lauxleeing:, haktiex an: khankix hoik awm: sipeem Simiang Siyiex, mai jiet mhawm: awm: haktiex meung Ejiptux baoh krax hu: kah haktiex Zorax heue.
Khaix an: Lotax laug tix teei dee lung: haktiex Yawdan son cao: tix, mai Lotax lih hu: plak lih singaix. Kiex tom: gwieh paox tix khaing: tan: heue.
Abram ot haktiex Khanan mai Lotax hu: ot daux veng khankix pa koe: daux lung: Yawdan mai sum: nyiiex gox dex baoh veng Sawdom heue.
Pwi pa ot daux veng Sawdom khankix mawh pwi pacaox pacaig mai pwi pa ting phimap sivoe ngai: Siyiex heue.
Khaix gwieh Lotax tix khaing: nawh, Simiang Siyiex ah nin: kah Abram, jah kah dee ot maix, mai maong tix jhak kah plak lih, plak klip, plak laong:, mai plak seh heue.
"Haktiex pa yaox maix khawm uik Aux tag sang tawx kah maix mai doeh simie ceucat maix leeing ju leeing phan: heue.
"Mai Aux tag kieh simie ceucat maix haoh hun: awm: phawng: tiex; phan: pwi tix kauxkaux pon simin kah phawng: tiex, simie ceucat maix kawx tag pon tix simin kah heue."
"Kaoh heue, lih hu: kah daux haktiex an:, kah plak lang: mai kah plak vieh, mawh kheu Aux hoik tawx kah maix heue."
Khaix an: Abram gah nyiiex gox man: tix khaing: tan:, mai hu: ot kah haktiex veng Hebron, dee koe: khaox piak van: khankix, mai nawh deeh sum: khu: dee tan tix mu: son Simiang Siyiex tan: heue.
Grawng: Taoh Abram Kah Lotax
Kah daux baux singaix an:, khunhawkham meung Shina pa mawh Amraphelax, khunhawkham meung Elalax pa mawh Arot, khunhawkham meung Elam pa mawh Khedawralawmax, mai khunhawkham meung Gaw-in: pa mawh Tidalax,
Mai kix yuh naing kah khunhawkham meung Sawdom pa mawh Berax, khunhawkham meung Gawmorax pa mawh Berashax, khunhawkham meung Adamaw pa mawh Shinap, khunhawkham meung Zabaing pa mawh Shemabax, mai khunhawkham meung Belax (meung Belax an: mawh haktiex Zawrax) heue.
Kix khawm uik khrawm: paox tix daux lung: haktiex Sidim, (Sidim mawh nhawng: kih.)
Kix yuh siliex khunhawkham Khedawralawmax kao: ra: num mai yam hoek kao: loe: num kix tieh feen kah nawh heue.
Yam hoek kao: pon: num khunhawkham Khedawralawmax mai khunhawkham pa ot plak nawh khankix hoek tix puing: veng Ashatarok kanan pa mawh ceu pwi Riepen, ceu pwi Zuzen, pa ot daux veng Hamax, mai ceu pwi Emen pa ot daux veng Kiriyatin;
Mai ceu pwi Hawrix pa ot piang gawng Sina tom: hoek dee singai haktiex Elaparan pa mawh daux tiag daux tu heue.
Khaix an: kix deeh veeh tix hu: plak khaix mai hoek kah veng Enmishapat (pa kok mawh Kadeshax) mai puing: kah can haktiex pa koe: daux meung Amaliet khawm veng Hazazutanma dee ot pwi ceu Amawrix khankix heue.
Mai khunhawkham Sawdom, khunhawkham Gawmawrax, khunhawkham Adamax, khunhawkham Zabaing, mai khunhawkham meung Belax (pa kok mawh Zawrax,) khankix lih hu: mai puing: naing tau kah daux lung: ting Sidim;
Khunhawkham meung Elam Khedawralawmax, khunhawkham meung Gaw-in: Tidalax, khunhawkham Amraphelax haktiex Shina, mai khunhawkham Arok haktiex Elatax khankix, khunhawkham pon: kaux tix plak mai khunhawkham phwan: kaux tix plak puing: kah paox tix heue.
Daux ngawd Sidim, koe: peeh gai rawm: kah tom: nie, khunhawkham Sawdom mai khunhawkham Gawmawrax to: mai cod daux tiex tan: tiblah, can pwi pa kawn deuk khankix to: kah piang gawng khawm uik heue.
Khaix an: kix teei can kraung pa mhawm: mai pa ih pa un: khawm uik khaing: veng Sawdom mai Gawmawrax mai lih hu: khaing: tan: heue.
Kix teei Lotax pa mawh kawn: pux Abram pa ot veng Sawdom khawm kraungkhrai: nawh mai lih hu: heue.
Pwi tix kaux pa glawd khaing: naing hoek kah Abram ceu pwi Hebrie, mai krai nawh mhong: grawng: an:, yam an: Abram ot tiag khaox piak van: Mamre pa sum: ceu pwi Amawrix, Eshakawlax mai Anerax mawh pa yuh paox pie mai Abram heue.
Yam hoik mhong: Abram kah giex kix kawn: pux tix hu:, nawh teei pwi naing pa hoik gau tix loe: yieh kao: daix kaux mai pwi pa hoik keh daux nyiiex nawh, mai kieh kix lih hawt puing: kah kix tom: hoek veng Dan heue.
Nawh gwieh cub kru naing tix ra: cub daux plak ponsawm:, mai hawt puing: kix tom: hoek veng Hawbax, pa koe: plak laong: veng Damase heue.
Mawh kheu nan: nawh deeh viex kraungkhrai: pa mhawm: khankix mai kawn: pux nawh Lotax, khawm kraung nawh mai cub bun: mai pwi nawh khawm uik ing: heue.
khaix hoik kaoh Abram khaing: pex tix kah khunhawkham Khedawralawmax mai cub khunhawkham pa ot tau mai nawh khankix, khunhawkham veng Sawdom lih rieb Abram kah daux ngawd Shawe (pa mawh ngawd khunhawkham) tan: heue.
Abram Mai Simiang Malakhizediek
Mai khunhawkham Saliem Malakhizediek, pa mawh cao: giex kaing: li pa ting cie Siyiex, viex khaomun mai rawm: plix siiet hoek kah nawh.
Mai nawh nawb bwan: kah piang Abram mai ah nin:, "Siyiex pa ting pa lhaong: cao: pa phan: haktiex mai raoma:, nawb bwan: kah Abram liak;
"Mai kieh bwanson: koe: kah Siyiex dee lhaong:, pa hoik ap pwi koeng maix khankix, daux tawm: taix maix." Abram deeh tawx kraungkhrai: in: pa pon nawh kah khunhawkham an:, kao: son tix son heue.
Mai khunhawkham Sawdom ah nin: kah Abram, "deeh tawx pwi inkix kah aux, mai teei tix cie kraungkhrai: in: son cao: maix heue."
Viang mawh nan:, Abram deeh ah nin: kah khunhawkham Sawdom, "Aux hoik yaog taix tix kah Simiang Siyiex, pa ting pa lhaong: cao: pa phan: haktiex mai raoma:,
"Mai aux tag ang doh teei keei: tix nyaing mai maox kiep tix gieb tix gawng: kawx. Aux tag ang teei kraung cie maix tix ceu kawx, mai aux ang doh kieh maix ah nin: kah tix,aux hoik kieh Abram mag mi heue
Viang mawh nan: Aux tag teei priex preem pa hoik ih pwi aux khankix, mai pa khaw: pwi pa hawt khaix aux tix pon, pa mawh Aneyax, Eshakawlax mai Mamre khankix, kieh kix tang: teei son pa caw kix tix pon heue."
GumLox Mukheu Pa Tawx Siyiex Kah Abram
Khaix hoik ceu inkix khawm uik, gumlox Simiang Siyiex lih hoek kah Abram kah daux riieng susai: mai ah nin:, "Abram eue, paw lhat paw graung. Aux mawh pa tiebtie son maix heue. Bwanson: hoik ting hoik lhaong: son maix heue."
Viang mawh nan:, Abram deeh ah nin:, "Simiang Siyiex eue, Maix tag sang tawx ceu patix kah aux lie? aux hoik yaox ang kawn: tix lai chix koe:, sinngao nyiiex ma: aux khankix, tag yaox tix hu: kah Eliza pwi veng Damase ang mawh lie?"
Mai Abram deeh ah nin:, "jhak heue, maix ang nyang tawx doeh simie ceucat son aux pie tix kaux kawx. Mawh kheu kawn: pa keh daux nyiiex ma: aux tix kaux caw tix mawh pwi pa plud sinngao aux heue."
Mai jhak heue, gumlox Simiang Siyiex deeh hoek kah nawh mai ah nin:, "Pwi in: tag pon tix mawh pa plud sinngao maix heue. Viang mawh nan:, pwi pa kaoh khaing: daux tokaux cao: maix, tag sang mawh pwi pa plud sinngao maix heue."
Mai Nawh Cao: kok Abram lih hu: plak plai:x mai ah nin:, "Maong mai jhak daux raoma:, mai simin tix yaox kah simuing: khankix heue." Mai Nawh Cao: baox ah nin: kah nawh,"Doeh simie ceucat maix tag sang awm: ankix heue."
Mai Abram koe: krax yumrhawm: kah Simiang Siyiex, mai Nawh Cao: deuh krax yumrhawm: nawh mawh pa rauh pa see heue.
Mai Nawh Cao: deeh ah nin: kah nawh, "Aux mawh Simiang Siyiex pa viex maix lih khaing: veng Urax dee ot pwi ceu Kaladie:, sonsang tawx Aux haktiex in: kah maix heue, haktiex in: tag mawh sinngao son maix heue."
Mai nawh ah nin:, "Simiang Siyiex eue, aux tag sang tawng kah pon tix sinngao an: yuh kah mawx?"
Mawh kheu nan:, Nawh Cao: deeh ah nin: kah nawh, "Viex kawn: moi shiang: pa koe: loe: num tix mu:, kawn: pex shiang: pa koe: loe: num tix mu:, kawn: yung: mhaing: pa koe: loe: num tix mu: mai sikaux tix mu: mai keukie pa awn: ju tix mu:, hoek kah Aux heue."
Mai nawh tom: viex ceu in: khawm uik hoek kah Nawh Cao: mai lug greung ra: plak, mai nawh deuh kix tang: tiah khaing: paox tix plak mawx plak an: heue. Viang mawh nan:, nawh ang lug nex sim: khankix koe: ra: plak heue.
Yam hoek klang: preng khankix lih tum: piang tosat pa yum: ankix, Abram grheu: kix hu: dee singai heue.
Mai yam hoik klip singaix, Abram hoik kied lhiak it, mai jhak heue, krax lhat krax graung mai pa faik lih koe: kah piang nawh heue.
Khaix an:, Nawh Cao: ah nin: kah Abram een: maix tawng, simie ceucat maix khawm uik tag mawh nyo sinie kah daux haktiex pwi tang: ceu mai yuh kaing siliex, mai kharhawm: khahri:, been pon: yieh num kah pwi haktiex an: heue.
"Mai aux tag sang prawng ca: kah pwi pa hoik cau kah kix khawm uik. Khaix hoik an: sax, kix tag yaox tix lih hu: tau mai kraungkhrai: tix tom: nie heue."
"Yamin: phan: mawh son maix, maix tag yaox tix hu: kah keeing: maix khankix kah daux pa yiien: yawg heue, maix tag yaox krax sipaung: mhawm: yam hoik kuad ju maix heue."
"Khaix hoik luan baux ju ceucat maix pon: ju, kix tag sang deeh yaox tix hoek tin:. Mawh kheu phimap pa yuh pwi ceu Amawrix khankix ang nyang bax grum naog kah heue."
Yam hoek bawg yam klip singaix, mai yam faik praix jhak heue, taox ngu lih khaing: glah ngu, mai kawk ngu pa riieng tix mu:, lailing sinax khik nex pa hoik lug nawh tix deuh khankix heue.
Kah daux singaix an:, Simiang Siyiex yuh sijax mukheu tau mai Abram, ah nin:, "Son doeh simie ceucat maix, Aux hoik tawx haktiex in:, jah kah mee: rawm: klawng: meung Ejiptux tom: hoek kah rawm: klawng: ting Uparat;
mai ceu pwi Kenix, ceu pwi Kenizix, ceu pwi Kadamawnix;
ceu pwi Hittix, ceu pwi pherazix, ceu pwi Rephen,
ceu pwi Amawrix, ceu pwi khanan; ceu pwi Giragazit, mai ceu pwi Yebutix khankix khawm uik, Aux hoik ap nawh kah simie ceucat maix heue."
Grawng: Hagarax Mai Ishamelax
Yamin: moeng Abram Sarie ang nyang koe: kawn: tix kaux kawx son nawh, mai nawh koe: kawncau bun: pwi ceu Ejiptux tix kaux pa kok ceukaux nawh mawh Hagarax;
mai Sarie ah nin: kah Abram, "jhak yamin:, Simiang Siyiex ang nyang bax tawx aux koe: kawn:, maix hu: kah kawncau bun: aux, mai aux tag pon kawn: tix khaing: nawh heue." Abram nghiiet kah lox moeng tix Sarie heue.
Khaix an: moeng Abram Sarie teei bun: siliex Hagarax bun: Ejiptux mai nawh tawx kah Abram sonsang mawh moeng nawh heue. Yam an: Abram hoik ot daux haktiex Khanan kao: num heue.
Mawh kheu nan:, nawh hu: kah Hagarax mai Hagarax koe: kaux heue. Yam yaox nawh hoik koe: kaux tix ang lai koe: krax nab yam kah sivoe ngai: Sarie heue.
Sarie tom: ah nin: kah Abram, "Krax pa lud aux kieh koe: piang maix heue. Aux hoik tawx kawncau bun: tix kah daux tawm: taix maix, mai nawh ang lai koe: krax nab krax yam kah sivoe ngai: aux, jao hoik koe: kaux tix heue. Kieh Simiang Siyiex prawng ca: kah sinax aux mai maix heue."
Mawh kheu nan:, Abram ah nin: kah Sarie, "Bun: siliex in: koe: daux tawm: taix maix. Maix simie tix yuh kah mawx kawx, koe: kah rhawmrhi: maix heue." Yam yuh Sarie krax kharhawm: kah nawh, Hagarax to: tix hu: khaing: nawh heue.
Kawncau Simiang Siyiex yaox kah Hagarax hawt rawm: maw: daux tiag daux tu, plak krax hu: veng Shurax heue.
Mai Nawh ah nin:, "Bun: siliex Sarie, Hagarax eue, kaoh maix khaing: dee mawx? maix sang deeh hu: plak mawx?" mai nawh pawk lox ah nin:, "Aux hoik to: khaing: cao: tix Sarie heue."
Mai kawncau Simiang Siyiex ah nin: kah nawh, "Deeh ing: kah cao: maix, mai ap tix kah daux tawm: taix nawh heue."
Kawncau Simiang Siyiex baox deeh ah nin: kah nawh, "Aux tag kieh doeh simie caucat maix lih koe: haoh hun: tom: ang pwi khankix pon uik simin kah heue.
Mai kawncau Simiang Siyiex ah nin: kah nawh, "Jhak heue, maix hoik koe: kaux, maix tag sang keh kawn: simex tix kaux. Maix tag kok ceukaux nawh mawh 1Ishamelax; kheu hoik mhong: Simiang Siyiex kah krax kharhawm: kharhi: maix heue."
"Nawh tag mawh pwi pa pheem: jhawm:, nawh tag yuh krax simah kah pwi kukaux, mai pwi kukaux tag deeh yuh simah kah nawh heue. Mai nawh tag yaox tix ot tau mai puxaik kawn: keeing: tix khankix heue."
Khaix an:, nawh kok yo kah ceukaux Simiang Siyiex pa hoik sikah kah nawh, Maix mawh Siyiex Cao: pa yaox kah aux; mai nawh ah nin:, "Aux hoik yaox Nawh Cao: tin:, kah kaw pa hoik kia: ngien kah aux heue."
Mawh kheu nan:, nawh kok rawm: maw: an: mawh Beralahieraw; (dee bleeh mawh rawm: maw: Siyiex im: ju pa yaox kah aux) rawm: maw: an:, koe: sinax veng Kadeshax mai veng Beret heue.
Mawh kheu nan:, Hagarax keh kawn: simex tix kaux son Abram, mai Abram kok ceukaux nawh mawh Ishamelax, pa keh khaing Hagarax heue.
Abram koe: ju tidaix liah num yam keh Hagarax kah Ishamelax pa mawh kawn: Abram heue.
Mhai: Sakse Gumlox Sijax Mukheu
Yam hoik koe: ju Abram tidim: dim: num Simiang Siyiex lih bleeh kah Abram mai ah nin:, "Aux mawh Siyiex pa ting siawpsibrawm;" Hu: plak sivoe ngai: Aux, daux pa grum naog awawx.
"Aux tag yuh sijax mukheu sinax Aux mai maix heue. Aux tag kieh maix deeh baox haoh hun: tom: nie hu: sivoe ngai: heue."
Khaix an:, Abram gup pakngai: tix, mai Siyiex sikah tau mai nawh ah nin:;
"Jhak heue, lox sijax mukheu Aux koe: tau mai maix. Maix tag mawh keeing: ceu pwi khawm uik heue.
"Ceukaux maix tag ang lai kok mawh Abram khaix in:, mawh kheu nan: ceukaux maix tag kok mawh Abraham, mawh kheu hoik yuh Aux maix mawh keeing: tix kaux, kah can ceu pwi khawm uik heue.
"Aux tag kieh maix pre haoh hun:, mai Aux tag yuh maix mawh ceu pwi tom: nie mai simiang khankix tag lih koe: khaing: maix heue.
"Mai Aux tag kieh lox sijax mukheu tix kaux daux maix, khawm doeh simie ceucat maix khankix, tix ju hoik tix ju khaix maix heue. Aux tag mawh Siyiex kah maix khawm doeh simie ceucat pa koe: khaix maix heue.
"Lheu: khaing: an:, Aux tag tawx haktiex in:, pa mawh maix nyo sinie mai khawm doeh simie ceucat maix, khaix maix sax heue. Baoh haktiex Khanan in:, khawm uik tag mawh cie maix leeing ju leeing phan:, mai Aux tag mawh Siyiex kah kix heue."
Mai Siyiex ah nin: kah Abraham, "Maix tag priex sijax mukheu Aux tau mai ceucat maix khawm uik, khaix maix tix ju hoik tix ju heue."
In: mawh lox sijax mukheu Aux, pa caw maix tix priex, sinax Aux mai maix tom: hoek kah ceucat maix, khaix maix sax heue. Can pa mawh kawn: simex kukaux, maix tag kieh kix pat hak khawm uik heue.
"Maix tag pat kah hak kix, mai in: tag sang mawh mhai: sakse sijax mukheu sinax Aux mai maix heue."
"Can kawn: simex pa hoik naog daix ngaix, pa koe: daux ceucat maix, can pwi nyo sinie pa hoik liag maix kah mau khawm uik, pa ang mawh doeh simie ceucat maix khawm uik tag yaox tix pat hak kukaux."
Can pwi pa keh daux nyiiex ma: maix, pwi pa viex maix hoek, pa hoik liag maix kah mau khankix kawx, kieh kix pat hak khawm uik heue, gumlox sijax mukheu Aux, tag ot daux nex nham: maix, mai mawh gumlox sijax mukheu leeing ju leeing phan: heue.
"Kawn: simex pa pat hak, mai pwi pa ang pat hak tix khankix, tag sang kieh nawh tang: tiah tix khaing: pwi ceu nawh; mawh kheu lheu: nawh gumlox sijax mukheu Aux heue."
Khaix an:, Siyiex ah nin: kah Abraham, "Son moeng maix Sarie, maix tag ang lai yaox tix kok ceukaux nawh mawh Sarie, viang mawh nan:, "tag deeh kok ceukaux nawh mawh Sara heue."
"Mai Aux tag sang nawb bwan: kah piang nawh, mai nawh tag tawx maix pon kawn: simex tix kaux khaing: nawh heue, khaix an:, Aux tag nawb bwan: kah nawh, mai nawh tag mawh miex tix kaux kah can ceu pwi khawm uik, mai simiang kawn: pwi khankix, tag kaoh khaing: nawh heue."
Khaix an: Abraham gup ngai: baoh tix mai nyiah daux rhawm: tix, mai ah nin:, "Kawn: tix kaux sang pon keh khaing: pwi pa hoik koe: ju tiyieh num lie? mai Sara tag chix koe: kawn: tix kaux yam koe: ju nawh tidim: num yuh kah mawx?"
Abraham tom: ah nin: kah Siyiex, "Kieh Ishamelax im: ju sivoe ngai: Maix Cao: heue."
Siyiex ah nin:, "Ang mawh nan: moeng maix Sara tag sang keh kawn: simex tix kaux, mai kok ceukaux nawh mawh Icak heue, Aux tag sang priex lox sijax mukheu Tix kah nawh, pa mawh lox sijax mukheu leeing ju leeing phan: tau mai doeh simie ceucat nawh mai khaix nawh heue."
Phan: mawh son Ishamelax, Aux hoik mhong: lox kok yo maix. Jhak heue Aux hoik nawb bwan: kah nawh, mai kieh nawh lih tix pre haoh hun:, mai kieh nawh baox hun: tom: nie heue. Nawh tag mawh keeing: simiang kao: kaux ra:, mai Aux tag yuh nawh mawh ceu pa ting pa lhaong: heue.
"Viang mawh kawx nan:, Aux tag sang priex lox sijax mukheu Tix mai Icak, pa mawh kawn: maix khaing: Sara daux num pa sang hoek in: sax heue."
Hkaix hoik sikah Nawh Cao: mai nawh, Siyiex deeh yaog tix haok khaing: Abraham tan: heue.
Mawh kheu nan:, Abraham teei kawn: simex tix Ishamelax, can pwi pa keh daux nyiiex nawh, mai can pwi pa hoik liag nawh, kah mau pa mawh simex kah daux nyiiex Abraham khawm uik, mai kix pat hak daux singaix an: tix ngaix ngie, awm: gumlox pa hoik tawm: Siyiex kah nawh heue.
Abraham koe: ju tidim: dim: nun yam pat nawh hak tix heue.
Mai Ishamelax koe: ju kao: loe: num yam pat nawh hak tix heue.
Kah daux tix ngaix Abraham mai kawn: nawh Ishamelax pat hak tix tau heue.
Mai can kawn: simex pa koe: daux nyiiex ma: nawh, khawm nyo sinie pa hoik liag nawh kah mau khankix kawx, hoik pat hak tix tau mai nawh heue.
Sijax Mukheu Pa Sang Keh Kawn: Simex
Khaix an: Simiang Siyiex lih bleeh kah nawh hawt daux tiag khaox piakvan:, yam ngawm nawh kah diang siviex nyiiex gox man:, bawg yam hax koek kah daux singaix an: heue.
Mawh kheu nan: nawh yaog ngai: tix mai yaox pwi loe: kaux pa cung hawt nawh tan: heue. Yam yaox nawh kix, nawh to: hu: khaing: diang siviex nyiiex gox man:, mai hu: rieb kah kix, mai krub kix kah piang tiex tan: heue.
Mai nawh ah nin:, "Simiang Siyiex aux eue, phan: aux mawh pa pon bwanson: kah sivoe ngai: Maix Cao: paw nyang luan khaing: siliex Maix Cao: liak."
Kieh aux viex rawm: ceeix mai khoek caong pex, mai laux lee: pex greem: khaox ha:.
"Aux tag sang viex khaomun hoek mai ih sonsang deeh koe: riang rao pex khawm rhawm: khawm rhi: heue. Khaix an:, pex sang deeh ing: khaing: siliex tix chix heue." Mai kix ah nin:, "yuh awm: pa ah maix heue."
Mawh kheu nan:, Abraham niied tix laig daux nyiiex gox man: kah Sara mai ah nin:, "Niied maix teei gaox nghox ca loe: klong: mai klu klao tau mhawmmhawm:, mai yuh khaomun kah heue."
Mai Abraham to: hu: kah cub khawng: brie eei: tix, mai teei kawn: moi iak tixmu: mai tawx kah kawncau tix sonsang niied kix tix khre: priex preem son kix heue.
Nawh teei bee mai rawm:teeih tau mai nex kawn: moi pa hoik khre: nawh hoek kah sivoe kix heue. Mai nawh cung greem: khaox dex kix yam ih kix heue.
Khaix an: kix ah nin: kah nawh, "Moeng maix Sara ot dee mawx?" mai nawh deeh ah nin:, "Ot daux nyiiex gox man: heue."
Mai Nawh Cao: ah nin:, "Aux tag deeh hoek kah maix tete, yam hoek singaix keh nawh heue. Jhak heue, moeng maix Sara tag sang koe: kawn: simex tix kaux heue." Sara ngiet lox kix kah diang siviex nyiiex gox man:, plak khaix kix heue.
Yamin: Abraham mai Sara hoik kuad sipie mai Sara hoik hit mee: been bun: daux yam an: heue.
Mawh kheu nan: Sara briex nyiah kah daux rhawm: tix mai ah nin:, "Khaix hoik riex ju aux, aux tag sang pon krax pa nyawmrhawm: yuh kah mawx? Abraham kawx hoik kuad heue."
Mai Simiang Siyiex ah nin: kah Abraham, "Sara nyiah jao patix? mai nawh ah nin:, "Aux rug sang pon kawn: tix tix kaux tete yam hoik kuad aux lie?
"Pa ang Simiang Siyiex pon yuh ceu pa nu khankix koe: tix ceuceu lie? yam hoik hoek bawg yam keh nawh, Aux tag deeh hoek kah maix tete heue. Mai Sara tag koe: kawn: simex tix kaux heue."
Viang mawh nan:, Sara thiang: nawh jao hoik lhat tix mai ah nin:, "Aux ang nyiah heue." Mai Nawh Cao: ah nin:, "Ang mawh, maix hoik nyiah tete heue."
Grawng: Pa Khyox Khaw: Abraham Son Veng Sawdom
Khaix an: pwi khankix, yaog tix kaoh khaing: tan: mai jhak kah plak Sawdom heue, Abraham lih hu: tau mai kix, mai nawh hu: tawx kix tom: hoek daux krax heue.
Mai Simiang Siyiex ah nin:, "Aux tag sang mox kaing pa yuh Tix kah Abraham yuh kah mawx?"
"Abraham tag mawh pwi pa ting siawpsibrawm tete daux ceucat nawh mai kawn: pwi piang haktiex in: khawm uik, tag pon bwanson: kah daux nawh heue."
"Mawh kheu hoik tawng Aux nawh, mai nawh tag sidiex gau kah kawnpraix tix mai can pwi pa koe: daux nyiiex ma: nawh, khaix in: sax heue, kix tag hawt grawng: lawng khaix Simiang Siyiex mai yuh pa rauh pa see mai pa khaw: pa caw heue. Awm: gumlox Nawh Cao: Nawh tag sang viex ceu inkix hoek kah Abraham heue."
Mai Simiang Siyiex ah nin:, "Mawh kheu lox kok lox yo Sawdom Gawmawrax mai phimap krax phit krax lud kix hoik kied ting lhaong: heue.
Aux tag lih hu: mai jhak kah pa hoik yuh kix khawm uik, mawh kheu lox kok yo kix hoik hoek kah Aux, mawh ang mawh sonsang tawng Aux kah heue."
Khaix an: pwi an: kiex gah tix khaing: tan:, mai hu: plak Sawdom! Viang mawh nan:, Abraham kawn: ca: cung sivoe Simiang Siyiex tan: heue.
Abraham tom: hoek dex Nawh Cao: mai ah nin:, "Maix tag yuh pwi pa rauh pa see laux tau mai pwi caox pwi caig khankix lie?
Phan: pwi pa rauh pa see koe: daux veng an:, tiphwan: kaux khex sang yuh Maix dee an: laux, Maix ang lhawk kah pwi pa rauh pa see khankix tiphwan: kaux pa ot tan lie?
"Kieh krax pa pah pwi pa rauh pa see tau mai pwi caox pwi caig lih hu: singai khaing: Maix Cao:, Mai kieh pwi pa rauh pa see kham: geu: tau mai pwi pa caox khankix, hu: singai khaing: Maix Cao: liak, krax prawng ca: Simiang Siyeix kah haktiex mawh krax pa rauh pa see ang mawh lie?"
Mai Simiang Siyiex ah nin:, "Phan: Aux yaox pwi pa rauh pa see daux veng Sawdom tiphwan: kaux Aux tag deeh lhawk kah dee an: jao kix heue."
Abraham deeh pawk lox mai ah nin:, "Mawh tete yamin:, viang aux mawh phawng: tiex mai nyaox kawx, aux tag sang viex lox khyox khaw: in: hoek kah Maix Simiang Siyiex heue."
Phan: pwi rah pwi see an: tiphwan: kaux, yawm khaing: phwan: kaux, Maix tag yuh veng an: laux kheu ang kix naog tiphwan: kaux lie?" Mai Nawh Cao: ah nin:, "Phan: Aux yaox koe: kix tipon: phwan: kaux, Aux tag ang yuh kix lauxleeing: heue."
Khaix in: nawh baox deeh ah nin: kah Nawh Cao:, "Phan: kix koe: tipon: kaux Maix sang yuh kah mawx?" Mai Nawh Cao: ah nin:, "Aux tag ang yuh laux, jao tipon: kaux an: heue."
Mai nawh ah nin:, "Paw kieh Simiang Siyiex songrhawm: liak," Mai aux tag sang ah nin:, "Phan: ex kawn: yaox pwi mhawm: tingoe: kaux tan:, Maix sang yuh kah mawx?" Nawh Cao: deeh ah nin:, "Aux tag ang yuh laux, phan: Aux kawn: yaox tingoe: kaux tan: heue."
Khaix an: nawh ah nin:, "Mawh tete heue. Aux hoik viex ceu inkix kah piang tokaux cao: tix mai krai kah Maix Simiang Siyiex heue. Phan: ex kawn: yaox kix tinga: kaux tan: Maix tag sang yuh kah mawx?" Mai Nawh Cao: ah nin:, "Aux tag ang yuh kix lauxleeing: jao pwi an: khankix tinga: kaux heue."
Mai nawh ah nin:, "Paw nyang kieh Simiang Siyiex songrhawm: kah ha:, kieh aux ghoik tix krai tix bawg khaing: heue, phan: ex kawn: yaox kix kao: kaux tan:, Maix tag sang yuh kah mawx?" Nawh Cao: ah nin:, "Aux tag ang yuh kix lauxleeing: jao pwi an: khankix kao: kaux heue."
Khaix hoik sikah Nawh Cao: tau mai Abraham, dom: mawx dom: an: Nawh Cao: hu: dee hu: Tix, mai Abraham ing: kah dee ot tix heue.
Grawng: Pa Caox Pa Caig Sawdom
Yamin: kawncau Siyiex ra: kaux hoek kah veng Sawdom plakbo mai Lotax ngawm kah diang siviex nyiiex nawh daux veng Sawdom tan: heue, yam yaox Lotax kah kiex, nawh kaoh hu: mai rieb kiex heue. Mai nawh tawx krax nab yam mai gup pakngai: tix kah piang tiex.
Mai nawh ah nin:, "Yamin: Simiang aux eue, laig daux nyiiex aux pa mawh siliex maix, mai ot tin: leeing: sawm: ha:. Khoek caong pax mai deeh kaoh caocao plak ponngawb mai deeh hu: krax hu: pax heue." Mai kiex ah nin:, "Yiex ang laig, viang mawh nan:, yiex tag ot kah praix daux krax leeing: sawm: heue."
Viang mawh nan:, nawh deeh nyaw kiex sigren sigre; Mai kiex deeh veeh tix plak nawh mai laig daux nyiiex nawh; khaix an:, nawh yuh krax khan: kheu: kah kiex, mai yuh khaomun pa ang viex susaix, son kiex mai kiex ih kah heue.
Sivoe ang kix nyang it, kawn: simex pa ting pa iak daux veng Sawdom, mai can pwi pa kaoh khaing: ku plak hoek tix rob kah nyiiex;
Mai kix kok yo kah Lotax mai ah nin:, "Pwi pa laig daux nyiiex maix bo in: ot dee mawx? teei kix lih plak praix kah yix, nyawk kah sang yuh yix mai kix heue."
Lotax lih khaing: diang siviex, mai hu: kah pwi ankix, mai nyeep siviex plak khaix tix,
mai nawh ah nin:, "Puxaik khankix eue, paw doh yuh pa caox pa caig inkix liak."
"Jhak heue, aux koe: kawn: bun: ra: kaux pa ang sax dex dawd mai simex; Kieh aux viex kiex lih kah pex mai yuh pa koe: rhawm: pex tix yuh; Paw doh yuh tix ceu kawx kah pwi in: kiex liak, mawh kheu kiex mawh pwi pa hoek peung greem: veei nyiiex aux heue."
Mai kix ah nin:, "Deeh plak khaix maix!" Mai Kix baox ah nin:, "Sang yuh maix tix mawh pwi prawng ca: kah pwi pa hoek tix peung daux nyiiex maix lie; yamin:, yix tag sang nie yuh pa ang mhawm: kah maix lheu: khaing: pwi an: kiex." Mawh kheu nan:, kix tom: nyheen: tix tik Lotax, mai kix greed hoek kah dex, sonsang yuh siviex laux heue.
Viang mawh nan:, kawncau Siyiex khan: kiex nyeu taix tix mai bluh Lotax laig daux nyiiex tau mai tix, mai kiex nyeep siviex heue.
Mai kiex yuh can pwi pa ot hawt diang siviex dug ngai: khawm pwi ting pwi iak khawm uik, sonsang taug mao kix kah sawg tix siviex heue.
Grawng: Pa Lauxleeing: Sawdom Mai Gawmorax
Khaix an: kawncau Siyiex ah nin: kah Lotax, "kawn: koe: pwi pa dex pa dawd mai maix tix kauxkaux tin: lie? kheue maix kawn: simex maix kawn: bun: maix, can cie maix pa koe: daux veng khawm uik teei lih khaing: tin:;
"Yiex tag yuh dee inkix lauxleeing: heue. Mawh kheu lox riag yo pwi inkix, hoik nie ting lhaong: plak sivoe ngai: Simiang Siyiex, mai Simiang Siyiex hoik ploi: yiex yuh kix lauxleeing: heue."
Mawh kheu nan:, Lotax lih hu: mai tawx gumlox kah kheue tix, pa mawh mex kawn: bun: nawh khankix mai ah nin:, "kaoh, lih hu: khaing: dee in:; Mawh kheu Simiang Siyiex tag sang yuh veng in: laux phao heue, Viang mawh nan:, kheue nawh khankiex keud nawh mawh lox naknon: tix heue.
Lotax Mai Kawn: Nyiiex Nawh Lih Khaing: Veng
Yam hoik jah praix tix riieng plak ponngawb, kawncau Siyiex khankiex niied tix kieh Lotax yuh tom: phai: mai ah nin:, "Kaoh heue, teei moeng maix khawm kawn: bun: maix ra: kaux pa ot tin: heue. Phan: ang mawh nan:, maix tag yaox tix kham: geu: krax lauxleeing: tau mai pwi phimap phigrham: veng in: heue."
Yam yaox kiex rheeng: nawh; kawncau Siyiex khankiex bluh nawh, mai moeng nawh, mai taix kawn: bun: nawh ra: kaux, mawh kheu Simiang Siyiex kied caoxrhawm: kah kix, Mai kiex viex kix lih khaing: tan:, mai deuh kix ot kah praix veng heue.
Mawh kheu nan:, khaix hoik viex kix hoek kah praix, mai ah nin:, "To: tom: klawd ju maix heue. Paw doh gi plak khaix, mai paw ot daux lung: tix dauh kawx. To: tom: klawd tix kah piang gawng khankix heue. Phan: ang mawh nan:, maix tag yaox krax laux krax leeing: heue."
Khaix an: Lotax deeh ah nin: kah kiex, "Simiang eue, paw ah yuh nan: liak."
"Jhak heue, siliex maix hoik pon bwanson: sivoe pax, mawh kheu hoik taoh pax ju aux, bwanson: krax caoxrhawm: pax piang aux, hoik kied ting lhaong:; viang mawh nan:, aux ang pon to: tix klawd kah piang gawng khankix, aux lhat kah ceu pa caox khankix krup kah tix mai yum: kah heue.
"Yamin: jhak heue, veng in: hoik dex sonsang pon to: aux kah heue. Veng an: mawh veng pa iak tix mu: mai kieh aux to: tix klawd tan:, (veng an: ang mawh pa iak tix mu: lie?) Mai rhawmrhi: aux tag im: ju kah heue."
Mai nawh ah nin: kah nawh, "Jhak heue, aux hoik khaw: rhawm: grawng: pa ah maix inkix heue. Mawh kheu jao lox pa hoik ah pax Aux tag ang lai yuh veng iak an: laux heue,"
"Niied phai:, mai to: maix klawd tan:, phan: maix ang nyang hoek tan:, Aux ang nyang pon yuh tix ceu kawx." Mawh kheu nan:, ceukaux veng an: tom: kok mawh veng Zawrax kah heue.
Singaix hoik lih kah piang haktiex, yam hoik laig Lotax daux veng Zawrax heue.
Khaix an:, Simiang Siyiex kieh ngu mai mhat lih khaing: daux meung raoma:, mai lhiex kah piang veng Sawdom mai Gawmawrax heue.
Mawh kheu nan:, Nawh Cao: yuh veng ankix lauxleeing: khawm daux lung:, mai can pwi pa ot daux veng khankix, tau mai can ceu pa kuah piang tiex khawm uik heue.
Viang mawh nan:, moeng Lotax deeh gi tix jhak plak khaix mai nawh lih tix mawh rong: kih heue.
Mai Abraham lih hu: caocao plak ponngawb, kah dee hoik cung nawh kah sivoe ngai: Simiang Siyiex tan: heue.
Khaix an:, nawh jhak kah plak Sawdom mai Gawmawrax mai hawt daux lung: khankix, mai nawh hoik yaox kah heue. Mai jhak heue, taox ngu khankix kah piang tiex yaog tix haok dee lhaong: awm: taox ngu pa kaoh khaing: glah ngu heue.
Yam hoik yuh Siyiex veng pa koe: daux lung: khankix laux, Siyiex deeh doh keud kah Abraham mai Nawh taoh Lotax khaing: daux sigreung veng ot nawh, yam yuh Nawh Cao: veng khankix lauxleeing: heue.
Doeh Simie Ceucat Lotax
Khaix an:, Lotax lih hu: khaing: veng Zawrax mai ot kah piang gawng tau mai kawn: bun: nawh ra: kaux tan: heue. Mawh kheu hoik lhat ot nawh daux veng Zawrax heue. Mai cao: nawh khawm kawn: bun: nawh ra: kaux ot kah daux rang: tix mu: heue.
Yamin kawn: bun: ting nawh ah nin: kah pux nawh, "Keeing: ex hoik kuad mai simex ang lai koe: kah piang haktiex tix kaux kawx, sonsang hoek kix kah ax, awm: been pa koe: kah piang haktiex heue.
"Hoek, ax tawx keeing: nyaux rawm: plix siiet mai it tau mai nawh, sonsang pon ax kah plix doeh simie ceucat keeing: tix heue."
Mawh kheu nan:, kiex tawx keeing: tix nyaux rawm: plix siiet daux bo an: heue. Kawn: bun: ting nawh, laig it tau mai keeing: tix, Nawh ang tawng kah yam laig it nawh, mai yam deeh kaoh nawh heue.
Kah daux singaix khaix, kawn: bun: ting nawh ah nin: kah pux tix, "Aux hoik it tau mai keeing: tix daux bo luan an: tete heue. Kieh ax deeh tawx nawh nyaux rawm: plix siiet daux bo in:; khaix an:, maix tom: deeh laig it mai nawh sonsang pon ax plix doeh simie ceucat keeing: tix heue."
Khaix an:, kiex tom: yuh rawm: plix siiet, mai baox tawx keeing: tix nyaux daux bo an:, mai kawn: bon iak nawh yaog tix kaoh hu: mai laig it tau mai keeing: tix, nawh ang tawng kah yam laig it nawh, mai yam deeh kaoh nawh heue.
Mawh kheu nan:, kawn: Lotax khawm ra: kaux koe: kaux mai keeing: tix heue.
Kawn: bun: ting nawh keh kawn: simex tix kaux, mai kok ceukaux nawh mawh Mawbax, mai nawh mawh keeing: ceu pwi Mawbax tom: in: singaix heue.
Mai kawn: bun: iak nawh keh kawn: simex tix kaux, mai kok ceukaux nawh mawh Benamix; nawh mawh keeing: ceu pwi Amon tom: in: singaix heue.
Abraham Mai Abimalet
Abraham lih hu: kah plak seh, mai ot sinax veng Kadeshax mai Shurax mai peung kah veng Gerax tan: heue.
Abraham ah in: kah moeng tix Sara, "Nawh mawh nan::aux heue." Mawh kheu nan:, simiang Gerax pa mawh Abimalet ploi: pwi tix hu: teei kah Sara heue.
Viang mawh nan:, Siyiex hoek kah Abimalet daux camaox ponsawm: mai ah nin: kah nawh, "Maix mawh pwi pa yum: tix kaux tete heue. Grawhgrawng: nawh, bun: pa hoik teei maix an:; mawh moeng pwi tix kaux heue."
Simiang Abimalet ang nyang pon tix hoek dex nawh; mai nawh ah nin:, "Simiang Siyiex eue, Maix tag sang pah kah ceu pwi pa rauh pa see lie?
"Nawh hoik ah,mawh nawh nan: tix kah aux, pie cao: nawh kawx krai,Nawh mawh puxke: aux heue Kah daux krax pa rauh pa see mai taix pa singax singeh aux in:, aux hoik phit yuh ceu in: heue."
Mai Siyiex ah kah nawh daux camaox, "Mawh heue, Aux tawng hoik yuh maix ceu in: kah daux krax pa rauh pa see rhawmrhi: maix; mawh kheu nan:, sonsang ang maix koe: krax phit krax lud kah Aux, Aux hoik tiebtie maix; son ang maix pon tix teei kah nawh heue."
"Mawh kheu nan:, deeh tawx moeng nawh kah nawh; kheu mawh nawh cao: jhai: tix kaux, mai nawh tag rawg bwan: son maix, mai kieh maix im: ju kah heue. Viang mawh nan: phan: maix ang deeh tawx nawh, maix tag yaox tix yum: tete, khawm can ceu pwi pa dex pa dawt mai maix khawm uik heue."
Simiang Abimalet yaog tix kaoh tom: cao plak ponngawb, mai kok kah kawncau mausoi: nawh khawm uik, mai krai kix mhong: grawng: inkix; mai pwi khawm uik, kied lhat graung kah heue.
Simiang Abimalet kok Abraham mai ah nin: kah nawh, "Yuh kah mawx maix yuh ceu inkix kah piang yix? mawh koe: krax phit aux kah maix yuh kah mawx? maix tom: sang viex phimap phigrham: pa ting pa lhaong: koe: kah piang aux mai meung haktiex aux lie? maix hoik yuh kaing ceu pa ang maix keung: tix yuh heue."
Khaix an:, simiang Abimalet ah nin: kah Abraham, "Mawh kheu yaox maix ceu pa yuh kah mawx maix tom: yuh nin: lie?"
Mai Abraham ah nin:, "Grawhgrawng: nawh aux hoik keud krax lhat krax graung pwi kah Siyiex ang doh koe: dee in: tete, mai kix tag pah aux yum: son grawng: moeng aux heue."
"Viang mawh nan:, nawh mawh pux nan: aux tete heue. Nawh mawh kawn: bun: keeing: aux, mai ang mawh kawn: bun: miex aux; mai nawh deeh mawh moeng aux heue."
"Yam hoik hoek bawg yam kieh Siyiex aux vungviang khaing: nyiiex ma: keeing: tix, mai aux ah nin: kah nawh, In: hoik mawh krax pa caoxrhawm:, pa caw maix tix yuh son aux kudauh kudee; yam hu: dee mawx ang ah, krai, "Nawh mawh puxke: aux." Aux hoik tawm: tix priex kah moeng tix yuh nan: heue.""
Khaix an: simiang Abimalet teei yung: mai moi, tau mai kawncau simex, bun: mai tawx kah Abraham; nawh deeh tawx moeng nawh Sara kah nawh heue.
Mai Abimalet ah nin:, "Jhak heue, haktiex aux hoik koe: sivoe ngai: maix; sang moh maix tix ot dee mawx, kieh mawh awm: rhawmrhi: cao: maix heue."
Khaix an:, nawh tom: ah nin: kah Sara, "Jhak heue, aux hoik tawx maukawn kah puxke: maix tix rheng: sonsang liag tix tawx man: tawb pakngai: mai khawm son paoxgrawm paoxgrux maix khankix heue." Nawh tom: hoik yaox krax sidiex gau grawng: kuceu heue.
Mawh kheu nan:, Abraham rawg bwan: kah Siyiex, mai Siyiex pai: jhawm: saux simiang Abimalet mai moeng nawh, khawm bun: pa cau nawh khawm uik heue. Khaix an: kix deeh keh kawn:;
mawh kheu Simiang Siyiex hoik nyeep vaig pa chix nghe:, daux nyiiex Abimalet jao grawng: moeng Abraham Sara yam an: heue.
Grawng: Keh Icak
Simiang Siyiex hoek Tix kia: ngien kah Sara awm: gumlox pa hoik ah Nawh, mai Nawh Cao: yuh son Sara awm: gumlox pa hoik tawm: Nawh heue.
Sara koe: kaux mai keh kawn: simex tix kaux son Abraham, yam hoik kuad nawh, daux singaix hoik ah Nawh Cao: tix deuh kah nawh heue.
Mai Abraham kok ceukaux kawn: simex tix, pa keh son nawh khaing: Sara mawh Icak heue.
Khaix an: Abraham pat hak kawn: simex tix Icak, yam laig nawh daix ngaix, awm: gumlox pa tawm: Siyiex kah nawh heue.
Abraham hoik koe: ju tiyieh num yam keh kawn: simex nawh Icak son nawh heue.
Mai Sara ah nin:, "Siyiex hoik tawx ceu pa nyiah kah aux; mai can pwi pa mhong: kukaux tag yaox tix nyiah tau mai aux heue."
Mai Sara ah nin:, "mawh pwi mawx pa ah kah Abraham, Sara tag yaox tix tawx kawn: tix peuex; viang mawh nan:, aux hoik keh kawn: simex son nawh tix kaux, yam hoik kuad nawh heue."
Pa Lih Hu: Hagarax Mai Ishamelax
Mai kawn: nyawm Icak an: haok hwan: ting lhaong:, mai hoik prah teeh miex tix, yam hoik prah Icak kah teeh miex tix; Abraham yuh pwie ting tix mu:, kah daux singaix an: heue.
Daux tix ngaix Sara yaox kah kawn: Hagarax, pwi ceu Ejiptux, pa keh son Abraham klieh tau mai kawn: simex nawh Icak heue.
Nawh ah nin: kah Abraham, "Grheu: bun: siliex in:, mai kawn: simex nawh; kawn: simex nawh tag ang chix pon sinngao tau mai kawn: simex aux Icak heue."
Grawng: in:, kied mawh pa sungsang rhawm: kah son Abraham jao mawh kawn: simex nawh heue.
Viang mawh nan:, Siyiex ah nin: kah Abraham, "Paw maix doh lauxrhawm: kheu jao kawn: simex in: mai jao siliex bun: in:, nghiiet kah lox pa krai Sara kah maix, grawhgrawng: nawh doeh simie ceucat maix tag koe: kah daux Icak heue."
"Kheu mawh nawh doeh simie ceucat maix, Aux tag yuh kawn: simex siliex bun: maix an:, lih tix mawh ceu pwi tix cub heue."
Mawh kheu nan:, Abraham kaoh caocao ponngawb teei khaomun mai singiien rawm: mai feuk kah piang klip Hagarax heue. Mai nawh ap kawn: nyawm an: kah nawh, mai ploi: kiex hu: dee singai, khaix an: nawh lih hu: mai vungviang baoh daux tiag Berashabax heue.
Yam hoik uik rawm: khaing: daux singiien hak, nawh deuh kawn: nyawm greem: yeem heue.
Khaix an: nawh hu: ngawm dee singai tixdauh, dee pon puing: te hoek tix taix, mai ah nin: kah tokaux tix, "Paw kieh aux yaox kah yum: kawn: in: liak." Mawh kheu nan: nawh ngawm plak sivoe nawh mai riag yo khawm yiiem tix heue.
Mai Siyiex mhong: kah lox kawn: nyawm an:, khaix an: kawncau Siyiex kok kah Hagarax khaing: daux raoma: mai ah nin: kah nawh, "Hagarax eue, koe: krax pa lauxrhawm: maix yuh kah mawx? paw vi khirhawm: grawhgrawng: nawh, Siyiex hoik mhong: lox kawn: nyawm an: kah dee ot nawh heue."
"Kaoh heue, yaog kah kawn: nyawm mai teem nawh kah taix maix; Aux tag yuh nawh mawh ceu pwi pa ting tix cub heue."
Siyiex paoh ngai: nawh, mai nawh yaox kah rawm: maw: tix mu:, khaix an: nawh hu: mai kin rawm: naog daux singiien hak an:, mai nawh tawx kawn: nyawm nyaux heue.
Mawh kheu nan:, Siyiex ot tau mai kawn: nyawm mai nawh hwan: sipie sipie; mai nawh ot daux tiag daux tu, Nawh lih tix mawh pwi puing: ak tix kaux heue.
Nawh ot daux tiag Paran, mai miex nawh teei nawh moeng bun: khaing: meung Ejiptux heue.
Gumlox Sijax Mukheu Tau Mai Abimalet
Khaix hoik luan bawg yam an:, simiang Abimilet mai cao: kaing: kru naing nawh Phikawlax sikah tau mai Abraham ah nin:, "Siyiex ot tau mai maix, kah daux can ceu pa yuh maix khawm uik heue."
"Mawh kheu nan:, yamin: tawx krax tiextu maix kah aux plak sivoe ngai: Siyiex son ang maix lai yuh krax pa lud kah aux mai kah kawnpraix aux, mai krax magmi aux khankix, awm: hoik yuh aux krax pa caoxrhawm: kah maix, maix tag caw tix yuh son aux mai son haktiex pa hoik yaox maix tix peung kah heue."
Mai Abraham ah nin:, "Aux tag tiextu kah heue."
Yam yaox Abraham tud rhim: siliex Abimalet kah rawm: maw: tix mu:, Abraham ne raw kah simiang Abimalet heue.
Mai simiang Abimalet ah nin:, "Aux ang nyang tawng kah pwi pa yuh ceu in:, maix kawx ang sax krai kah aux, aux ang nyang bax mhong: tom: in: singaix heue."
Mawh kheu nan: Abraham teei yung: mai moi khankix, tawx kah simiang Abimalet, mai kiex khawm ra: yuh sijax mu kheu tau heue.
Abraham gwieh tix deuh kawn: yung: shiang: pa awn: aliah mu: khaing: cub yung: nawh tan: heue.
Khaix an: simiang Abimalet chawk Abramham, "dee bleeh grawng: gwieh maix kawn: yung: shiang: pa awn: aliah mu: khaing: cub yung: nawh khankix koe: yuh kah mawx?"
Mai nawh ah nin:, "Rieb maix teei kawn: yung: shiang: pa awn: in: aliah mu: khaing: daux tawm: taix aux, "Ceu inkix tag mawh mhai: sakse hoik kaong: aux rawm: maw: in: heue."
Mawh kheu nan: nawh kok dee an: mawh Berashebax, grawhgrawng: nawh, kiex ra: kaux hoik tiextu kah paox tix heue.
Kix yuh sijax mukheu kah Berashebax, khaix an: simiang Abimalet mai cao: kaing: kru naing nawh Phikawlax yaog tix mai ing: kah haktiex Philitix heue.
Mai Abraham sum: khaox plix mak kiang: tix num: daux Berashebax, mai yaogyaw kah Simiang Siyiex, pa mawh Siyiex leeing ju leeing phan: heue.
Mai Abraham peung pan: kah daux haktiex Philitix tom: rheung: heue.
Grawng: Kaux Sijax Krax Yumrhawm: Abraham
Khaix hoik luan ceu inkix, Siyiex cheukcheu: tix yaox kah Abraham, mai ah nin: kah nawh, "Abraham eue," mai nawh pawk lox, "Aux ot tin: heue."
Nawh Cao: ah nin:, "Teei kawn: simex maix Icak, pa kied moh maix, pa koe: tix kaux khaing:, mai hu: kah haktiex Mawrix, yuh krax tan pa gleeing kah ngu kah son Aux kah piang gawng pa sang jhi: Aux maix yaox heue."
Mawh kheu nan: Abraham kaoh caocao plak ponngawb mai sau: an: la khankix mai kok kawncau nawh ra: kaux tau mai kawn: simex nawh Icak; mai nawh lug khix son pa sang gleeing nawh mai kaoh hu: kah dee hoik ah Siyiex kah nawh heue.
Khaix hoek loe: ngaix Abraham yaog ngai: tix mai yaox kah dee an:, dee singai heue.
Abraham ah nin: kah kawncau nawh khankix, "Ot tin: tau mai la awawx; kawn: nyawm mai aux tag sang hu: toi: plak an:, mai krub kah Siyiex mai tag deeh hoek kah pax heue."
Mawh kheu nan:, Abraham teei khix pa sang gleeing tix tan mai kieh kawn: simex tix Icak klawm: hu:; nawh teei ngu mai vaig tix kre:, mai kiex lih hu: tau heue.
Mai Icak ah nin: kah keeing: tix Abraham, "Keeing: eue," mai nawh deeh pawk lox Icak, "Kawn: simex eue, aux ot tin: heue." Nawh tom: deeh ah nin:, "Jhak heue, ngu mai khix hoik koe:, viang mawh nan:, kawn: yung: pa sang gleeing ex tix tan lu, koe: dee mawx?"
Mai Abraham deeh ah nin:, "Kawn: eue, Siyiex tag tawx kawn: yung: an:, son pa sang gleeing ex tix tan son Nawh Cao: heue." Kiex ra: kaux lih hu: tau heue.
Yam hoek kix kah dee ah Siyiex kah nawh tan:, Abraham sum: khu: dee tan tix mu: tan:, mai deuh khix kah piang heue, nawh phyawk kawn: tix Icak mai deuh nawh kah piang khix kah khu: dee tan heue.
Khaix an: Abraham nyeu taix tix mai teei vaig sonsang pah kah kawn: tix heue.
Viang mawh kawx nan:, kawncau Simiang Siyiex kok nawh khaing: daux raoma: mai ah nin:, "Abraham Abraham" mai nawh deeh pawk lox, "Aux ot tin: heue."
Mai nawh cao: ah nin:, "Maix paw teeh kah kawn: maix mai paw yuh tix ceu kawx kah nawh; grawhgrawng: nawh, yamin: Aux hoik tawng lhat maix kah Siyiex mai Aux hoik yaox ang maix thiang: pa mhaing: Aux kawn: simex tix kaux maix an:, son Aux heue."
Mai Abraham yaog ngai: tix mai jhak, nawh yaox kah kawn: yung: mhaing: tix mu: plak khaix nawh, pa vungfiien: rung: tix kah yeem heue. Mawh kheu nan:, Abraham hu: teei kawn: yung: iak an:, mai gleeing piang khu:, tang: kawn: tix heue.
Mai Abraham kok ceukaux dee an: mawh, "Yahowa yire (dee bleeh mawh Simiang Siyiex tag sang tawx") tom: in: singaix pwi ah mawh "gawng pa hoik cox khre: Simiang Siyiex" kah heue.
Mai kawncau Simiang Siyiex deeh kok kah Abraham ra: bawg ti bawg.
Nawh ah nin:, "Aux hoik tiextu kah Tokaux Cao: Tix, mawh kheu maix hoik yuh ceu inkix mai ang thiang: kah kawn: tix kaux maix an: kah Aux heue."
"Aux nawb bwan: kah maix, mai Aux tag kieh doeh simie ceucat maix nie baox haoh hun: awm: simuing: daux raoma: mai awm: mhaik pa koe: praok rawm: sigrit sigra: heue. Doeh simie ceucat maix khankix kawx, Aux tag kieh kix kwang: kah diang siviex pwi koeng maix khawm uik heue.
"Can ceu pwi khawm uik kah piang haktiex in:, tag pon bwanson: kheu hoik cu nghiiet maix kah gumlox Aux heue."
Mawh kheu nan:, Abraham deeh ing: kah kawncau nawh khankiex. Kix yaog tix hu: tau kah Berashebax, mai Abraham ot tan: heue.
Grawng: Nyiiex Ma: Nakhaw:
Khaix hoik luan ceu inkix khawm uik, Abraham mhong: grawng: krai pwi ah nin:, "Moeng pux nawh Nakhaw: pa kaux Milakha hoik keh kawn: simex khankix kah son nawh heue."
"Kawn: Ai: mawh Uzax kawn: nyi mawh Buzax, kawn: sam: mawh Kemoelax pa mawh keeing: Aram,
kawn: Sai: mawh Khetiet, kawn: Ngox mawh Hazaw, kawn: Log mawh Piladauha, kawn: Ciet mawh Yidalax mai kawn: Piet mawh Betoelax khankix,
Mai Betoelax mawh keeing: Rebekax heue. Inkix mawh kawn: simex daix kaux pa keh khaing: Milakha son Nakhaw: pux Abraham khawm uik heue.
Moeng iak Nakhaw:, pa mawh Ruma kawx, deeh baox keh Tebax, Gahan, Tahashax mai Makha khankix heue.
Grawng: Yum: Sara Mai Dee Sipaung: Nawh
Sara im: ju tiyieh tinga: aliah num, in: mawh baux num im: ju Sara heue.
Mai Sara yum: daux veng Kirathabax pa mawh veng Hebron, kah meung Khanan, Abraham hoek tix yiiem doe: son Sara heue.
Mai Abraham cung sivoe lawng: moeng tix mai ah nin: kah ceu pwi Hetax khankix,
"Aux mawh pwi tang: meung mai mawh nyo sinie tix kaux sinax pex. Tawx aux sipaung: tokaux yum: moeng tix kah simeeig tix dauh kah sinax pex, sonsang glip nawh khaing: sivoe ngai: aux heue."
Mai ceu pwi Hetax khankix deeh pawk lox Abraham mai ah nin:;
"Cao: simiang eue, Nghiiet kah lox yix liak; maix hoik mawh pwi pa ting min: Siyiex sinax yix, laug maix teei simeeig cie yix mai sipaung: moeng maix kah, yix ang doh koe: krax thiang: tix kaux kawx, sonsang sipaung: maix pwi yum: kah heue."
Khaix an: Abraham yaog tix kaoh, mai tawx krax nab krax yam, kah can pwi pa ot daux meung an:, pa mawh ceu pwi Hetax khankix heue.
Mai nawh ah nin: kah kix, "Phan: pex koe: rhawm: tix kieh aux sipaung: pwi yum: in: glip sivoe ngai: aux, nghiiet heue, kieh pex hu: khyox khaw: kah Epharon kawn: simex Zawrax son aux liak."
"Sonsang tawx Epharon daux rang: Makhaphelax pa mawh cie nawh pa koe: daog kaung: nawh heue. Ngawh miex ding kawx, kieh nawh coh kah aux, sonsang mawh simeeig cie aux sinax pex heue."
Epharon pa mawh ceu pwi Hittix, ngawm tau mai ceu pwi Hetax, pawk lox Abraham sivoe ngai: ceu pwi Hetax pa laig kah daux siviex an: khawm uik mai ah nin:;
"Ang mawh nan:, cao: simiang aux eue, nghiiet kah lox aux, aux tag tawx daux rang: pa koe: daux kaung: an: kah maix; mai aux tawx kah maix sivoe ngai: pwi ceu aux khankix heue. Sipaung: tokaux yum: moeng maix kah heue.
Khaix an: Abraham tawx krax nab krax yam kah ceu pwi haktiex an: khankix heue.
Mai nawh ah nin: kah Epharon, sonsang mhong: pwi haktiex an: kah, "Phan: maix sang tawx an:, nghiiet kah lox aux; aux tag sang tawx mau son kaung: an:, mai teei hu:, aux tag sipaung: moeng tix tan: heue."
Mai Epharon deeh pawk lox Abraham ah nin:;
"Cao: simiang eue, nghiiet kah lox aux liak, haktiex an:, ngawh caw mau pon: yieh Shekhe heue. Sinax maix mai aux, ang koe: grawng: tix ceu kawx, mawh kheu nan:, sipaung: moeng maix kah heue."
Abraham khawrhawm: kah lox Epharon mai nawh ciang tix tawx mau kah Epharon, awm: hoik tat Epharon jum, pon: yieh Shekhe plah, awm: pa shiao pwi yuh lai geu kah sivoe ngai: pwi Hetax khankix heue.
Mawh kheu nan:, kaung: Epharon pa koe: kah Makhaphelax, veng Morean, khawm daux rang:, mai khaox ox pa koe: daux kaung: khawm uik, hoik mawh cie nawh heue.
Nawh hoik ap haktiex an: kah Abraham sivoe ngai: ceu pwi Hetax, mai can pwi pa laig kah daux siviex veng khankix heue.
Khaix hoik ceu inkix, Abraham sipaung: moeng tix Sara kah daux rang: Makhaphelax, sivoe veng Mamre, pa mawh veng Hebron, daux haktiex khanan tan: heue.
Mawh kheu nan:, kaung: an: mai daux rang: an:, sonsang mawh haktiex simeeig son cie Abraham, mai ceu pwi Hetax khankix hoik ap kah nawh heue.
Grawng: Koe: Moeng Icak
Abraham hoik kuad mai riex ju hu: sipie sipie, Simiang Siyiex nawb bwan: kah piang Abraham kuceu heue.
Mawh kheu nan: Abraham kok kah kawncau pa riex ju daux nyiiex, pa kwang: kah can pa koe: nawh khawm uik mai ah nin:, "Deuh taix maix greem: ba: aux heue.
"Mai aux tag kieh maix tiextu kah sivoe ngai: Siyiex, pa mawh Cao: raoma: mai haktiex, maix ang pon teei kawn: bun: ceu pwi Khanan kah dee ot ex tin:, sonsang mawh moeng kawn: simex aux heue."
"Viang mawh nan:, maix hu: kah haktiex aux, dee ot ceucat aux, mai teei moeng tix kaux, son kawn: simex aux Icak heue."
"Kawncau nawh deeh ah nin: kah nawh, "Phan: bun: ang koe: rhawm: tix hawt khaix aux hoek daux meung in:, mawh sang kieh maix aux deeh viex kawn: simex tix hu: khaing: dee kaoh tix lie?"
Abraham deeh ah nin: kah nawh, "Yuh satix tix, paw doh viex kawn: simex aux hu: tan: heue."
Simiang Siyiex khaing: meung raoma:, pa hoik teei aux lih khaing: nyiiex ma: keeing: aux, mai khaing: haktiex dee ot ceucat aux, mai pa tawx lox sijax mukheu kah aux ah nin:, "Son doeh simie ceucat maix, Aux hoik tawx haktiex in: kah son doeh simie ceucat maix, Nawh tag ploi: kawncau Siyiex hu: sivoe maix, maix tag yaox tix viex moeng tix kaux, son kawn: simex aux khaing: tan: heue."
"Phan: bun: ang koe: rhawm: tix hawt khaix maix, maix hoik pon luan khaing: lox pa tiextu aux, paw viex ngie kawn: simex aux hu: kah dee an: heue."
Mawh kheu nan:, kawncau nawh deuh taix tix greem: ba: Abraham, mai tiextu kah grawng: ceu inkix heue.
Mawh kheu koe: kraung kuceu daux tawm: taix kawncau Abraham, nawh teei Kala-uk kao: mu: mai lih hu:, mai nawh kaoh hu: kah meung Mesopotimia: mai hoek kah veng Nakhaw: heue.
Mai nawh kieh Kala-uk khankix grux ngawng tix plak praix veng dex rawm: maw: tan:, plakbo pa mawh bawg yam hoek kin bun: khankix rawm: heue.
Mai nawh rawg bwan: ah nin:, "Simiang Siyiex Cao: aux Abraham eue, kieh krax pa keud aux grum naog daux in: singaix; mai jhi: krax pa caoxrhawm: Maix kah cao: simiang aux Abraham liak.
"Jhak heue, aux cung dex rawm: maw:, mai cub kawn: bunkrih pwi veng an: khankix hoek tix kin rawm: heue.
"Kieh kawn: bun: pa ah aux nin: kah, tah singiien maix mai tawx aux nyaux kah; phan: nawh ah nin:, nyaux heue, mai aux tag baox tawx Kala-uk maix khankix nyaux kah, bun: an: tag mawh pa hoik tawx Maix Cao: kah kawncau Tix Icak. Kah ceu inkix, aux tag tawng Maix Cao: jhi: krax caoxrhawm: Tix kah cao: simiang aux Abraham heue.
Yam ang nawh nyang tien hoik rawg bwan:, jhak heue, Rebekkax kawn: bun: Betoelax klawm: singiien rawm: piang klip tix mai hoek kin rawm:, Betoelax mawh kawn: simex Melakha moeng Nakhaw:, pux Abraham heue.
Kawn: bun: an:, kied sidaing: mhawm: grang, mai nawh mawh kawn: bunkrih pa ang sax pied sax pha: simex tix bawg kawx; nawh lih hu: kah rawm: maw:, mai kin rawm: daux singiien tix naog mai deeh viex hoek heue.
Kawncau an: nied tix to: hu: kah kawn: bun: an: mai ah nin:, "Tawx aux nyaux rawm: khaing: singiien rawm: maix ceeix heue."
Mai nawh ah nin:, "Simiang eue, nyaux heue." Khaix an: nawh nied tix tah singiien rawm: khaing: klip tix, mai tawx nawh nyaux heue.
Khaix hoik tawx nawh kawncau an: nyaux rawm: nawh ah nin:, "Aux tag kin tix tawx rawm: kah Kala-uk maix khankix, tom: hoik sak nyaux kix heue."
Khaix an:, nawh nied tix hu: sau: rawm: kah daux dawng: mai deeh to: tix kin rawm:, sonsang yaox Kala-uk khankix tix nyaux khawm uik heue.
Mai kaw an:, daox deng: kah pa yuh kawn: bun: an:, mai yawg tix, nawh keud tix yaox, mawh ang mawh, pa yuh Simiang Siyiex grawng: krax hoek nawh heue.
Khaix hoik nyaux Kala-uk khankix rawm:, nawh teei krim khri: meeh tix mu:, pa koe: tix plak Shekhe, mai ble khri: ra: mu:, pa koe: kao: Shekhe mai tawx kah nawh,
mai ah nin:, "Mawh maix kawn: bun: mawx, krai aux mhong: liak, koe: lawg dee sang paung yix daux nyiiex keeing: maix lie?"
Mai nawh deeh ah nin: kah nawh, "Aux mawh kawn: bun: Betoelax kawn: simex Milakha, pa keh khaing: Nakhaw: heue.
Nawh baox ah nin: kah nawh, "Nyiiex yix hoik koe: brex nghox mai pa ih pa un: tom: kub, mai lawg sang paung pex kawx koe: heue."
Khaix an: kawncau an: gup kaing: tix mai yaogyaw kah Simiang Siyiex heue.
Mai nawh ah nin:, "Kieh bwanson: koe: kah Simiang Siyiex Abraham, Nawh Cao: ang sax mox krax pa caoxrhawm: tix, mai krax pa rauh pa see tix kah simiang aux heue. Siyiex hoik thong: aux hu: kah nyiiex pux simiang aux heue."
Khaix an: kawn: bun: an:, to: tix ing: krai grawng: inkix kah miex tix daux nyiiex heue.
Yam an: puxke: Rebekkax, pa mawh Laban to: hu: kah kaw simex an: kah rawm: maw: heue.
Yam yaox nawh krim khri: mau mai ble khri: khankix kah taix nan: nawh, mai yam hoik mhong: nawh lox Rebekkax ah nin:, "Simex an: sikah kah aux heue," Laban tom: hu: kah kaw an:, pa cung tau mai kala-uk hawt dex rawm: maw: heue.
Mai nawh ah nin:, "Hoek heue, Maix mawh pwi pa hoik pon bwanson: khaing: Simiang Siyiex; maix lai cung plak praix yuh kah mawx? mawh kheu aux hoik khre: rien nyiiex son maix, khawm dee sang ot Kala-uk khankix heue."
Khaix an:, kaw simex an: laig daux nyiiex, Laban tah an: kala-uk mai tawx kala-uk sawm: brex, mai pa ih pa un: tang: ceu, nawh teei tix tawx rawm: sonsang khoek kix caong tix heue.
Khaix an: kix khan: priex preem sivoe nawh, sonsang ih kix; viang mawh nan:, nawh ah nin:, "Aux ang nyang sawm:, sivoe ang tix nyang hoik krai grawng: kaing pa hoek tix heue." Mai nawh ah nin:, "Krai grawng: hoek maix heue."
Mawh kheu nan:, nawh tom: ah nin:, "Aux mawh kawncau Abraham heue."
"Simiang Siyiex hoik kied nawb bwan: kah piang cao: simiang aux tom: nie, mai nawh hoik mawh pwi pa ting min:; Siyiex hoik tawx yung: mai khawng: brie, mau khri: kah nawh, khawm kawncau simex kawncau bun: khankix, mai kala-uk mai la khankix haoh hun: kah nawh heue."
"Mai Sara moeng cao: simiang aux, keh kawn: simex tix kaux son simiang aux, yam riex ju tix; mai nawh hoik tawx can ceu pa koe: tix khawm uik kah nawh heue.
"Cao: simiang aux kieh aux tiextu mai ah nin:, "Maix ang pon teei kawn: simex aux moeng kah bun: pwi haktiex Khanan pa hoik ot aux kah heue.
Mai maix hu: kah nyiiex ma: keeing: aux, kah simie ceucat aux, mai teei tix viex moeng tix kaux, son kawn: simex aux heue
Mawh kheu nan:, aux ah nin: kah cao: simiang tix; aux lhat bun: ang cu tix hawt khaix tix heue."
"Viang mawh nan:, nawh ah nin: kah aux,Simiang Siyiex pa hoik hawt aux grawng: lawng khaix Nawh, Nawh Cao: tag ploi: kawncau Siyiex ot mai maix, tom: hoik pon yuh maix kaing yuh tix, maix tag yaox tix viex moeng tix kaux, son kawn: simex aux, khaing: daux doeh simie ceucat aux, mai khaing: daux nyiiex ma: keeing: aux heue.
Maix tag luat luan khaing: krax pa tiextu, yam hoek maix kah doeh simie ceucat aux; phan: kix ang tawx kawn: bun: an: kah maix, maix tag luan khaing: lox pa tiextu aux heue
"Aux tom: hoek kah rawm: maw: mai ah nin:, Simiang Siyiex Cao: Abraham eue, maix cox daux krax, pa hu: aux grum mhawm: liak
Jhak heue, aux cung hawt rawm: maw: tan:, mai aux yaox hoek bunkrih tix kin rawm:, mai aux ah nin: kah nawh, "Tawx aux nyaux rawm: khaing: singiien rawm: maix ceeix heue."
Mai phan: nawh deeh ah nin: kah aux, "Nyaux heue, mai aux tag kin rawm: mai tawx kala-uk maix khankix nyaux kah." Kieh nawh mawh kawn: bun: pa hoik ciak Siyiex tix tawx son kawn: simex cao: simiang aux heue."
"Sivoe ang aux nyang tien hoik sikah grawng: in:, Rebekkax hoek khawm singiien rawm:, piang klip tix mai lih hu: plak rawm: maw: sonsang kin rawm: heue. Aux tom: ah nin: kah nawh,tawx aux nyaux rawm: heue
Mai nawh tah singiien rawm: tix phaiphai:, khaing: klip tix mai ah nin:,nyaux kah heue, aux tag baox kin rawm:, mai tawx kala-uk maix khankix nyaux kah Mawh kheu nan:, aux tom: nyaux rawm:, mai nawh baox kin rawm:, mai tawx kala-uk aux khankix nyaux heue.
Khaix an: aux chawk kah nawh,mawh maix kawn: bun: mawx lie?: mai nawh ah nin:,aux mawh kawn: bun: Betoelax kawn: simex Nakhaw:, Nakhaw: mawh pa keh khaing: Milakha Mawh kheu nan:, aux sau: krim khri: meeh kah nawh, mai ble khankix kah taix nawh heue.
Aux gup ngai: tix mai krub kah Simiang Siyiex mai tawx krax yaogyaw kah Simiang Siyiex Abraham, pa hoik jhi: aux yaox daux krax pa rauh pa see, sonsang teei aux kawn: puxaik Abraham son kawn: simex nawh heue.
Yamin:, phan: maix koe: krax pa caoxrhawm:, mai pa sang yuh bwanson: kah cao: simiang aux, pon yuh ang pon yuh krai yamin:; aux tag sang hu: plak dawm: phan: ang mawh nan:, plak gwiex heue."
Khaix an: Laban mai Betoelax pawk lox mai ah nin:, "Kaing in: mawh pa kaoh khaing: Simiang Siyiex, yix ang chix krai kah maix mhawm: ang mhawm: heue."
Jhak heue Rebekkax hoik koe: sivoe ngai: maix, teei nawh hu:, mai kieh nawh mawh moeng kawn: simex cao: simiang maix, awm: lox pa hoik ah Simiang Siyiex heue."
Yam hoik mhong: kawncau Abraham lox krai kix, nawh tom: grux ngawng tix kah piang tiex mai krub kah Simiang Siyiex heue.
Mai kawncau an:, teei kraung mau kraung khri: khawm kraung ceep khankix mai tawx kah Rebekkax; mai nawh tawx khawngphak pa ngawh pa mhawm: kah prie: nawh mai miex nawh heue.
Nawh mai pwi nawh khankix, ih tau nyaux tau mai paung tan: daux sawm: an:, yam kaoh kix pon ngawb caocao mai nawh ah nin:, "Kieh aux deeh ing: kah cao: simiang tix liak."
Prie: nawh mai miex nawh ah nin:, "Kieh kawn: bun: in: ot mai yix kao: ngaix ha:, khaix an: nawh pon tix hu: heue."
Mai nawh ah nin: kah kix, "Paw nyang tiebtie kah aux liak, awm: hoik yuh Simiang Siyiex krax hu: aux grum mhawm:; kieh aux deeh ing: kah cao: simiang tix heue."
Mai kix baox ah nin:, "Yix sang kok chawk tix yaox kah rhawm: nawh heue."
Mai kix kok Rebekkax mai ah nin: kah nawh, "Sang hu: maix mai pwi in: lie?" mai nawh deeh ah nin:, "Aux sang hu: heue."
Mawh kheu nan: kix ploi: Rebekkax tau mai cao: pa priex nawh, hu: tau mai kawncau Abraham mai pwi nawh heue.
Mai kix nawb bwan: kah Rebekkax mai ah nin: kah nawh, "Kieh nan: ex mawh miex kah pwi kaing: rheng: mai kaing: mheen:; mai kieh simie ceucat maix pon kwang: kah siviex veng pwi pa koeng kah kix heue."
Khaix an: Rebekkax mai kawn: bun: pa priex nawh khankix, yaog tix kaoh mai brug kala-uk mai hawt khaix kawncau an:; yam an: kawncau Abraham viex Rebekkax hu: khaing: kix heue.
Yam an: Icak kaoh khaing: Beralahieraw mai hu: ot kah baoh Negep (caong ma: seh) heue.
Icak lih hu: plak praix daux kaung: plak bo, mai maong tix jhak nawh yaox kah cub kala-uk pa hoek khankix heue.
Mai Rebekkax maong tix jhak mai yaox kah Icak, nawh lih khaing: kala-uk brug tix heue.
Mai nawh ah nin: kah kawncau an:, "Mawh pwi mawx pa lailing daux kaung: sonsang rieb kah ex lie?" Cao: cau an: deeh ah nin:,"Nawh mawh simiang aux heue." Mawh kheu nan:, nawh tom: teei man: tawb tix pheen: mai tawb ngai: tix kah heue.
Mai cao: cau an:, krai grawng: kuceu pa hoik yuh tix kah Icak heue.
Khaix an: Icak rieb nawh laig daux nyiiex gox man: miex tix Sara, mai teei Rebekkax mawh moeng tix; kheu hoik mawh pa moh nawh kah heue. Mawh kheu nan:, Icak deeh koe: krax nyawmrhawm: nyawmrhi: khaix yum: miex tix heue.
Abraham Mai Keturax
Abraham baox teei tix koe: moeng tix kaux, mai ceukaux nawh mawh Keturax heue.
Keturax baox keh Zimaran, Yokshan, Madan, Midiam Ishabet mai shua heue.
Yokshan koe: kawn: simex Shebax mai Bedan. Kawn: simex Bedan mawh Ashurim, Letushim, mai Lumin khankix heue.
Kawn: simex Midiam mawh Ephax, Epharax, Hanok, Abidax mai Eladax, pwi inkix khawm uik, mawh kawnpraix Keturax heue.
Abraham tawx can pa koe: tix khawm uik kah Icak heue.
Viang mawh nan:, Abraham tawx khawngphak, kah kawn: simex, pa pon nawh khaing: moeng iak tix, yam kawn: im: ju nawh, nawh ploi: kix hu: ot haktiex plak lih singaix dee singai khaing: Icak heue.
Grawng: Yum: Abraham Mai Dee Sipaung:
In: mawh baux singaix nun im: ju Abraham, nawh im: ju tom: hoek tiyieh atigliah phwan: num heue.
Abraham hoik kied kuad mai riex ju, nawh yum: mhawmmhawm: mai hu: tau kah dauh dee hu: simie ceucat tix khankix heue.
Kawn: nawh Icak mai Ishamelax sipaung: nawh kah daux rang:, Makhaphelax kah veng Mamre, daux kaung: Epharon kawn: Zawrax ceu pwi Hittix heue.
Kix sipaung: Abraham hawt moeng nawh Sara tan:, dee pa hoik liag Abraham khaing: ceu pwi Hittix heue.
Khaix hoik yum: Abraham, Siyiex deeh nawb bwan: kah kawn: nawh Icak. Mai Icak ot dex kah Beralahieraw tan: heue.
Grawng: Nyiiex Ma: Icak Mai Ishamelax
Inkix mawh grawhgrawng: doeh simie ceucat Ishamelax kawn: Abraham, pa pon nawh khaing: Hagarax pwi ceu Ejiptux. Hagarax mawh kawncau Sara mai keh kawn: son Abraham heue.
Inkix mawh ceukaux kawn: simex Ishamelax tau mai simie ceucat kix, kawn: simex ting Ishamelax mawh, Nabayok; khaix an: Kedax, Adabelax, Mibatan,
Mishamax, Duma, Mashax,
Hadax, Temax, Yeturax, Naphishax mai Kedamax khankix heue.
Pwi inkix mawh kawn: Ishamelax, khawm ceukaux kix mai meung dee ot kix, mai lih mawh simiang kao: ra: kaux daux simie ceucat pwi tix heue.
Yam hoik koe: ju Ishamelax tiyieh tingoe: aliah num nawh yum:, mai hu: tau kah dauh dee hu: simie ceucat tix khankix heue.
Cub ceu kawnpraix nawh khankix ot sivoe ngai: puxaik kawn: keeing: nawh kah veng Havilax tom: hoek meung Ashurix, pa koe: plak lih singaix meung Ejiptux daux krax hu: kah meung Asiriyax heue.
In: mawh grawng: doeh simie ceucat Icak, kawn: simex Abraham, Abraham pon kawn: simex tix Icak heue.
Yam teei nawh moeng tix Rebekkax, Icak hoik naog ju tipon: num, Rebekkax mawh kawn: bun: Batoelax doeh simie ceucat Shurix, pa ot kah Padan, Aram, mai mawh pux Laban pa ot meung shurix heue.
Yamin: Icak khyox khaw: lox kah Simiang Siyiex, mawh kheu moeng nawh mawh bun: neh, Simiang Siyiex nghiiet lox khyox khaw: nawh, mai moeng nawh Rebekkax koe: kaux heue.
Mai kawn: ngie: pa koe: daux vaig nawh, lulax thung: theen: paox tix, mai nawh ah nin:, "Grawng: pa lih tix mawh kah aux mawh yuh kah mawx?" Mawh kheu nan: nawh lih hu: sonsang chawkcheng: tix kah Siyiex heue.
Simiang Siyiex ah nin: kah nawh, "Ceu pwi ra: cub koe: daux vaig maix, ceu pwi ra: cub tag sang gwieh tix khaing: tokaux maix, Ceu pwi tix cub tag sang ting riang rao khaing: an: tix cub, mai kawn: pa ting tag yaox tix yuh kawncau pa iak an: heue."
Yam hoik naog bawg yam, nawh keh kawn: brawm: heue.
Kawn: pa keh sivoe raoh nex nham:, mawh kheu nie hauk awm: kraung ceep piang nawh, kix tom: kok ceukaux nawh mawh Esaw: heue.
Khaix an: pux nawh deeh keh, mai giex kah loek caong Esaw:, mawh kheu nan:, kix kok ceukaux nawh mawh Yakop, yam keh kawn: an: kiex, Icak hoik koe: tigliah num heue.
Mawh kheu nan:, kawn: nyawm an: kiex haok hwan: ting sipie sipie, Esaw: lih mawh pwi leue tiag mai pwi pa yuh tix ih kaing ma:, Viang mawh nan:, Yakop mawh pwi pa awn: rhawm: tikaux, pa ot daux nyiiex gox man: heue.
Icak moh kah Esaw:, kheu yaox nawh tix ih nex totiag pa tawx nawh, viang mawh nan:, Rebekkax moh kah Yakop heue.
Esaw: Coh Ara Kawn: Ai: Tix
Tix singaix, Yakop yuh priex mai ngaik rawm: ceem, Esaw: kaoh khaing: daux tiag khawm taug mao tix heue.
Mai Esaw: ah nin: kah Yakop, "Mawh kheu sidaing: taug mao aux, tawx aux ih rawm: ceem raoh pa ngaik maix liak," Mawh kheu nan:, ceukaux nawh lih tix mawh Edom heue.
Yakop ah nin:, "Coh maix tawx ara kawn: Ai: maix kah aux in: singaix heue."
Mai Esaw: ah nin:, "Jhak heue, aux dex sang yum: mai aux tag sang pon rao ceu patix kah ara kawn: Ai: aux an: lie?"
Khaix an: Yakop deeh ah nin:, "Tiextu maix kah aux daux in: singaix," Mawh kheu nan:, mai nawh coh tix tawx ara pa caw kawn: Ai: tix pon kah Yakop heue.
Yakop tawx Esaw: ih khaomun mai rawm: ceem raoh, khaix hoik ih nyaux nawh, mai nawh lih hu:, Esaw: ang nab ang yam kah ara kawn: Ai: tix heue.
Icak Mai Simiang Abimaliet
Khaix hoik koe: krax sibhawm: praix baux ju Abraham tix bawg, khaix an: krax sibhawm: praix baox koe: daux meung an:, Icak hu: kah Khunhawkham Philitix pa mawh Abimaliet daux veng Gerax heue.
Yam an: Simiang Siyiex deeh lih bleeh kah nawh mai ah nin:, "Paw lih hu: plak meung Ejiptux, maix ot kah haktiex pa sang krai Aux kah maix heue.
Paung kah daux haktiex in:, Aux tag ot tau mai maix, mai nawb bwan: kah maix, grawhgrawng: nawh, Aux tag tawx haktiex in: kah maix mai kah doeh simie ceucat maix, Aux tag sang kieh gumlox sijax mukheu pa hoik tiextu Aux kah keeing: maix Abraham grum naog heue.
Mai Aux tag kieh doeh simie ceucat maix, haoh hun: awm: simuing: kah daux raoma:. Aux tag sang tawx doeh simie ceucat maix, cie haktiex in: khawm uik, kheu jao doeh simie ceucat maix, can ceu pwi kah piang haktiex in:, tag sang pon bwanson: kah heue.
Mawh kheu Abraham hoik cu nghiiet kah lox Aux, mai priex lox tawm: jhawm: krai Aux, lox lai beenli Aux mai lox tat jhawm: prawng Aux heue.
Mawh kheu nan:, Icak ot kah daux veng Gerax heue.
Mai pwi pa ot baoh haktiex an: chawk kah grawng: moeng nawh, Mai nawh ah nin:, "Nawh mawh nan: aux heue." Mawh kheu lhat nawh, mai ang pon krai mawh moeng tix, kheu mhawm: grang Rebekkax, nawh lhat pwi baoh an: pah tix heue.
Khaix hoik rheung: ot kix tan:, khunhawkham Abimaliet meung Philitix, jhak plak praix khaing: daux siviex iak, mai nawh yaox Icak klieh tau mai moeng tix Rebekkax heue.
Khunhawkham Abimaliet kok kah Icak mai ah nin:, "Bun: an: hoik sidawng: mawh moeng maix; yuh kah mawh maix lai ah mawh nan: tix?" Mai Icak deeh ah nin: kah nawh, "Phan: aux ang ah yuh nin: aux lhat tix yum: kheu jao nawh heue."
Khunhawkham Abimaliet deeh ah nin:, "Maix lai yuh ceu in: kah yix yuh kah mawx? Phan: pwi tix kauxkaux, ot tau mai moeng maix, maix tag sang plee krax phit krax lud kah piang yix lie?
Mawh kheu nan:, khunhawkham Abimaliet tawx lox hu: kah pwi ceu tix kawm: uik, mai ah nin:, "Pwi mawx ang ah phan: tieh kah pwi in: mai moeng nawh tag yaox tix yum: heue."
Mai Icak ruat simie kah haktiex an:, mai nawh yaox tix vawg plix nghox daux num an: tiyieh son, Simiang Siyiex nawb bwan: kah nawh heue.
Nawh jah tix haok hwan: ting lhaong:, mai nied tix mag mi kah kraungkhrai: kuceu heue.
Mai nawh koe: yung:, khawng: brie, mai kawncau mausoi: tom: nie, mawh kheu nan: ceu pwi Philitix khankix bohrhawm: kah nawh heue.
Mai pwi Philitix deeh cee: rawm: maw: khankix pa hoik kaong: kawncau keeing: nawh daux singaix ju Abraham, mai deeh cee: deeh kheem: tiex naog kah heue.
Khunhawkham Abimaliet ah nin: kah Icak, "Lih hu: dee singai khaing: yix liak, mawh kheu maix hoik nie ting siawpsibrawm khaing: yix heue."
Mawh kheu nan: Icak lih hu: khaing: tan:, mai nawh sum: nyiiex gox man: kah daux lung: baoh veng Gerax mai ot tan: heue.
Yam an: Icak baox kaong: rawm: maw: pa hoik kaong: siliex keeing: nawh Abraham, pa hoik cee: pwi Philitix khaix yum: keeing: nawh, mai nawh deeh kok ceukaux rawm: maw: an: khankix awm: pa hoik kok keeing: nawh heue.
Kawncau Icak khankix kawx, baox deeh kaong: rawm: maw: daux lung: mai kix yaox kah dee lih rawm: keut tan: heue.
Cao: liang khawng: brie veng Gerax, mai cao: liang khawng: brie Icak khankix, simah simaing: kah paox tix mai ah nin:, "Rawm: maw: inkix mawh cie yix." Mawh kheu simah kix mai cub nawh tan:, nawh tom: kok ceukaux rawm: maw: an: mawh Etiet heue.
Khaix an: kix baox kaong: rawm: maw: pa khraox, kix baox simah kah grawng: rawm: maw: an:, mawh kheu nan: nawh kok ceukaux mawh Sitanax heue.
Mai nawh deeh gah tix khaing: tan: mai baox kaong: rawm: maw: tang: dauh, kix ang lai yaox tix simah kah grawng: an:, mawh kheu nan: nawh tom: kok ceukaux mawh Yehobok, ah nin:, "Yamin: Simiang Siyiex hoik tawx dee ot son ex, mai ex tag haok hwan: kah daux haktiex in: heue."
Khaix an: nawh lih hu: khaing: tan: mai hu: ot kah Berashebax heue.
Simiang Siyiex lih bleeh kah nawh daux bo an: mai ah nin:, "Aux mawh Siyiex keeing: maix Abraham, paw koe: krax lhat krax graung, grawhgrawng: nawh, Aux ot tau mai maix mai nawb bwan: kah maix mai kieh simie ceucat maix pre haoh hun:, kheu jao kawncau Aux Abraham heue."
Mawh kheu nan:, nawh sum: khu: dee tan tix mu: kah dee an:, mai kok kah ceukaux Simiang Siyiex, mai nawh sum: nyiiex gox man: tan:, Kawncau Icak khankix deeh kaong: rawm: maw: heue.
Khaix an: khunhawkham Abimaliet kaoh khaing: veng Gerax mai nawh viex paoxgrawm tix Ahuziet mai cao: kaing: naing tix Phikolax hoek kah Icak heue.
Icak ah nin: kah kix, "Mawh kheu patix maix deeh hoek kah aux, maix hoik koeng kah aux, mai grheu: aux hu: dee singai khaing: tix ang mawx lie?"
Kix deeh ah nin:, "Yix hoik tawng ot Simiang Siyiex tau mai maix, mawh kheu nan: kieh ex yuh krax pa kaux sijax sinax maix mai ex, mai Kieh ex yuh sijax mukheu tau mai maix heue."
"Sonsang ang maix lai tuktiak kah yix, awm: ang yix teeh kah maix mai ang yuh tidtix kah maix, mai ploi: maix hu: kah daux pa nhim:. Mawh kheu mawh maix pa pon bwanson: khaing: Siyiex heue."
Mawh kheu nan:, Icak yuh krax khan: kheu: kix kah priex mai kix ih tau nyaux tau tan: heue.
Kix kaoh plak ponngawb caocao, mai ah lox pa kaux sijax kah paox tix, Icak deeh ploi: kix ing:, mai kix ing: khaing: nawh kah daux krax pa nhim: heue.
kah daux singaix an:, kawncau Icak hoek, mai krai nawh mhong: grawng: hoik kaong: kix rawm: maw:, mai ah nin: kah nawh, "Ex hoik yaox rawm: heue."
Nawh kok ceukaux rawm: maw: an: mawh Shebax, mawh kheu nan:, ceukaux veng an: tom: mawh Berashebax tom: in: singaix heue.
Yam koe: ju Esaw: tipon: num nawh teei tix moeng Berix, pa kaux Yudi, pwi ceu Hittix mai kawn: bun: Elon pa mawh Bashemiet ceu pwi Hittix heue.
Mai kiex hoik kieh Icak mai Rebekkax lauxrhawm: kah heue.
Icak Nawb Bwan: Kah Yakop
Khaix an: Icak hoik riex ju, mai ngai: nawh hoik vuvi ang lai chix yaox kah, nawh kok kah kawn: Ai: tix Esaw: mai ah nin: kah nawh, "Kawn: simex eue," Mai nawh pawk lox ah nin:, "Aux ot tin: heue."
Mai nawh ah nin:, "Jhak heue, aux hoik kuad mai aux ang lai tawng singaix pa sang yum: tix heue."
"Yamin:, teei kraung naing maix, pa mawh ak mai te, lih hu: daux tiag mai yuh tom: pon sawg tix viex nex totiag son aux heue."
"Khre: taux nex pa jiet nyawm, pa moh aux tix ih, mai viex hoek kah aux, aux tag sang ih mai khwan: aux tag nawb bwan: kah piang maix sivoe sang yum: tix heue."
Rebekkax jawm tix nghiiet kah lox krai Icak kah kawn: simex nawh Esaw:. Yam lih hu: Esaw: kah daux tiag sonsang viex nex totiag hoek,
Rebekkax krai ah nin: kah kawn: simex tix Yakop, "Aux hoik mhong: lox krai keeing: maix, kah puxke: maix Esaw: ah yuh nin:;
viex nex totiag mai khre: priex nyawm son aux, aux tag ih mai nawb bwan: kah piang maix, plak sivoe ngai: Simiang Siyiex sivoe yum: tix heue
Mawh kheu nan: yamin:, kawn: simex aux eue, nghiiet kah lox aux, awm: pa nhie: aux maix yuh heue.
Yamin: hu: kah daux phung: pex, mai viex kawn: pex ra: mu: hoek kah aux, aux tag khre: priex nyawm son keeing: maix, awm: pa moh nawh tix ih;
mai viex keeing: maix ih an:, sonsang nawb nawh bwan: kah piang maix sivoe sang yum: tix heue."
Yakop deeh ah nin: kah miex tix Rebekkax, "Jhak heue, puxke: aux Esaw: mawh pa koe: hauk, mai aux mawh pwi plang: nex ang mawh lie?
Keeing: aux tee: rien tix pu: pi: aux, mai nawh tag keud aux awm: pwi pie pwi lhen:, aux lhat tix pon krax pa jhax pa lawg, mai ang pon bwanson: heue."
Mai miex nawh deeh ah nin: kah nawh, "Kieh krax pa jhax pa lawg kah maix an: hoek kah piang aux, kawn: simex aux eue, nghiiet kah lox krai aux khaing:, hu: teei pa ah aux heue."
Nawh lih hu: mai teei tix tawx ceu an: kah miex tix; mai miex nawh khre: priex pa nyawm pa miag keeing: kix kah heue.
Khaix an: Rebekkax teei kraung ceep pa mhawm: kawn: ai: tix Esaw: pa koe: daux nyiiex mai nawh, mai nawh kieh kawn: simex iak tix Yakop ceep kah;
nawh lhop hak pex kah piang taix nawh, mai dee plang: ngawg nawh;
mai nawh tawx priex pa nyawm mai khaomun pa hoik cox khre: tix, kah daux taix kawn: simex nawh Yakop heue.
Mawh kheu nan:, Yakop hu: kah keeing: tix mai ah nin:, "Keeing: eue," mai nawh pawk ah nin:, "Aux ot tin:; kawn: simex eue, mawh maix mawx?"
Yakop ah nin: kah keeing: tix, "aux mawh kawn: ai: maix Esaw: heue. Aux hoik khre:, awm: pa hoik krai maix; Kaoh mai ih nex totiag pa viex aux, mai kieh khwan: maix nawb bwan: kah piang aux heue."
Viang mawh nan:, Icak ah nin: kah kawn: simex tix, "Kawn: eue, maix phex phai: yaox inkix yuh kah mawx?" mai nawh pawk ah nin:, "Mawh kheu Simiang Siyiex maix keeing:, pa hoik viex hoek kah aux heue."
Khaix an: Icak ah nin: kah yakop, "Hoek dex tin:, aux sang pu: pi: tix yaox mawh ang mawh kawn: ai: aux Esaw: heue."
Mawh kheu nan:, yakop hu: dex keeing: tix Icak, mai nawh sibeet tix yaox nawh mai ah nin:, "Lox maix tom: mawh lox Yakop, mai taix maix tom: mawh taix Esaw: heue."
Mai nawh ang lai tawng kah nawh, kheu taix nawh jiet awm: hauk taix puxke: nawh Esaw:, mawh kheu nan:, nawh nawb bwan: kah piang nawh heue.
Khaix an: nawh deeh ah nin:, "Rug mawh maix kawn: ai: aux Esaw: lie?" mai nawh pawk ah nin:, "Mawh aux heue."
Mai nawh deeh ah nin:, "Viex in: hoek kah aux, aux tag sang ih nex totiag cie kawn: simex aux, mai khwan: aux tag nawb bwan: kah maix heue." Mawh kheu nan: nawh viex an: hoek kah nawh, mai nawh ih kah an:, mai kah rawm: plix siiet kawx nyaux kah heue.
Khaix an: keeing: nawh Icak ah nin: kah nawh, "Kawn: eue, hoek dex aux yamin:, mai ngheet kah aux heue."
Mai Yakop hoek dex, mai ngheet kah nawh; nawh mhong: jhawm: sioe: kraung ceep nawh, mai nawb bwan: ah nin:, "Jhawm: sioe: kraung ceep kawn: simex aux awm: sioe: pa kaoh khaing: daux kaung: pa hoik nawb Siyiex bwan: kah heue."
Mawh kheu nan:, kieh Siyiex tawx rawm: ciex raoma:, mai bee haktiex, mai nghox koi: mai rawm: plix siiet tom: nie kah maix heue.
Kieh pwi khankix yuh kaing son maix, mai kieh ceu pwi khawm uik grux ngawng kah maix heue. "Kieh maix mawh cao: kaing: kah piang puxaik kawn: keeing: tix mai kieh kawn: simex miex maix khankix, grux ngawng kah maix heue. Can pwi pa jhax lawg kah maix, kieh nawh yaox krax pa jhax lawg, mai can pwi pa nawb bwan: kah maix, kieh pon bwanson: heue."
Grawng: Grai: Krax Keud Pot Jun Pot Esaw:
Khaix hoik nawb Icak bwan: kah Yakop dom: mawx dom: an:, mai yam tag khraox lih hu: Yakop khaing: keeing: tix Icak, puxke: nawh Esaw: hoek khaing: leue tix tiag heue.
Nawh khre: priex pa nyawm mai viex hoek kah keeing: tix mai ah nin:, "Kaoh mai ih kah nex totiag pa pon kawn: simex maix, sonsang nawb khwan: maix bwan: kah piang aux heue.
Mai keeing: nawh Icak ah nin: kah nawh, "Mawh maix mawx?" mai nawh ah nin:, "Aux mawh kawn: Ai: maix Esaw: heue."
Khaix an: Icak yaoh siyaung: kah tete, mai nawh ah nin:, "Mawh mawx lie? kaw pa hu: leue totiag mai viex nex hoek kah aux koe: dee mawx? aux hoik ih cie nawh khawm uik, sivoe ang maix nyang hoek, aux hoik nawb bwan: kah piang nawh mai nawh tag pon bwanson: tete heue."
Yam hoik mhong: Esaw: lox keeing: tix, nawh riag yo mai yiiem sigrien sigre, mai nawh ah nin: kah keeing: tix, "Keeing: eue, nawb bwan: kah aux liak, kah piang aux kawx nawb bwan: liak."
Viang mawh nan: nawh ah nin:, "Pux maix hoek pie lhen: mai hoik teei bwanson: pa nawb aux hu: heue."
Mai Esaw: ah nin:, "Ang nawh hoik mawh pa kok ceukaux mawh Yakop lie? mawh kheu nawh hoik pie lhen: kah aux ra: bawg, yam jah nawh hoik teei tix cie ara kawn: Ai:, mai jhak heue, yamin: nawh baox teei bwanson: cie aux." Mai nawh baox ah nin:, "Maix ang lai deuh bwanson: tix ceu ceu son aux lie?"
Icak deeh pawk lox ah nin: kah Esaw:, "Aux hoik kieh nawh mawh cao: simiang maix, aux hoik kieh puxaik nawh khankix mawh kawncau nawh, aux hoik kieh nawh grum naog kah nghox koi: mai rawm: plix siiet, kawn: eue, aux kawn: sang chix yuh ceu patix son maix lie?"
Mai Esaw: ah nin: kah keeing: tix, "Keeing: eue, ang bwanson: lai koe: kah maix tix ceu kawx lie? nawb bwan: kah aux liak, baox nawb bwan: kah aux." Esaw: riag yo lox tix mai yiiem heue.
Khaix an: keeing: nawh Icak pawk lox kah nawh ah nin:, "Jhak heue, dee ot dee koe: maix tag sang mawh dee koe: bee haktiex mai dee koe: rawm: ciex khaing: raoma: heue.
Maix tag eei: ju tix kah vaig mai tag yuh kaing son pux tix, yam hoik pon tieh feen maix kah nawh, maix tag pon luan khaing: pa kwang: nawh heue."
Yakop Luad Luan Khaing: Esaw:
Mai Esaw: koeng kah Yakop jao hoik nawb keeing: kix bwan: kah nawh, Esaw: ah nin: daux rhawm: tix, "Singaix pa lauxrhawm: aux, jao keeing: tix hoik dex, Khaix an: aux tag sang pah kah pux tix Yakop heue."
Mawh kheu nan: Rebekkax hoik mhong: kah lox sikah kawn: Ai: tix, mai nawh kok kah kawn: simex iak tix Yakop mai ah nin: kah nawh, "Puxke: maix Esaw: sang yuh krax fahrhawm: tix sonsang pah maix heue."
"Yamin: kawn: simex aux eue, nghiiet kah lox krai aux ha:, kaoh mai to: hu: kah prie: aux Laban pa ot kah daux veng Haran sonsang glawd maix,"
"Ot tau mai nawh ti vud ti cu, glang: ang krax songrhawm: puxke: maix nyang grai: heue.
Tom: sidauh grai: krax songrhawm: nawh mai yam hoik piawm: nawh pa yuh maix kah nawh, khaix an:, aux tag deeh tawm: maix hoek khaing: tan:. Aux tag sang kieh pax khawm ra: grai: khaing: ngai: tix kah daux tix ngaix ngie yuh kah mawx?"
Mai Rebekkax ah nin: kah Icak, "Aux hoik kied lauxrhawm: jao kawn: bun: Hetax khankix. Phan: Yakop baox teei tix moeng bun: Hetax, daux haktiex in: tix kauxkaux, krax im: ju aux chix koe: bwanson: yuh kah mawx?"
Khaix an: Icak kok kah Yakop mai nawb bwan: piang nawh ah nin:, "Maix tag ang pon teei tix moeng kah bun: ceu pwi Khanan heue.
"Kaoh, hu: kah Padanaram nyiiex Betoelax pa mawh keeing: kah miex maix, teei maix moeng kawn: bun: Laban prie: miex maix tix kauxkaux heue.
Kieh Siyeix pa ting siawpsibrawm nawb bwan: kah maix, mai kieh maix haok hwan:, mai pre haoh hun:, mai Kieh maix mawh ceu pwi ting daux ceu pwi khawm uik.
"Mai kieh Nawh Cao: tawx bwanson: Abraham kah maix, mai kah simie ceucat maix, sonsang yaox maix tix pon sinngao kah haktiex dee hoik mawh maix nyo sinie pa hoik tawx Siyiex kah Abraham heue."
Mawh kheu nan:, Icak ploi: Yakop hu: dee singai, mai nawh hu: kah Padanaram kah Laban kawn: simex Betoelax ceu pwi Ashurix. Laban mawh prie: Rebekkax miex Yakop mai Esaw: heue.
Esaw: Teei Tix Moeng Mahalax
Esaw: hoik yaox Icak nawb bwan: kah Yakop mai ploi: nawh hu: kah Padanaram, sonsang teei nawh tix koe: moeng tan:, mai yam nawb Icak bwan: kah Yakop mai tawm: lox kah nawh sonsang ang nawh teei tix moeng kah bun: Khanan khankix heue.
Yakop hoik cu nghiiet kah lox miex keeing: tix mai lih hu: kah haktiex Padanaram heue.
Esaw: tawng kah ang keeing: kix Icak khaw: rhawm: kah bun: Khanan khankix heue.
Mawh kheu nan:, Esaw: lih hu: kah Ishamelax mai teei tix moeng kah Mahalax pux Nabayok kawn: bun: Ishamelax, Ishamelax mawh kawn: simex Abraham heue.
Grawng: Camaox Yakop Kah Betelax
Yakop lih hu: khaing: Bereshabax mai hu: plak meung Haran heue.
Mai nawh hoek ti dauh, mai nawh ot tan: leeing: sawm:, mawh kheu hoik klip singaix heue. Nawh teei simaox tix mu: khaing: tan:, sonsang gaong yam it tix heue.
Mai nawh camaox, jhak heue, bawng: tix mu: jung tix, tom: cux toh tix kah raoma:; kawncau Siyiex khankix lih lih haok haok kah piang bawng: an: heue.
Mai jhak heue, Simiang Siyiex cung kah piang toh bawng: dee lhaong: mai ah nin:, "Aux mawh Simiang Siyiex keeing: maix Abraham mai Siyiex Icak; haktiex pa it maix in:, Aux tag tawx kah maix, khawm doeh simie ceucat maix heue.
"Doeh simie ceucat maix tag nie awm: phawng: tiex, mai to tah hu: khawm pon: caong daog raoma:, jah kah plak lih singaix, plak klip singaix, plak caong ma: seh, tom: hoek kah plak caong ma: laong:; tokaux maix khawm doeh simie ceucat maix khankix, tag lih mawh nyiiex ma: pa pon bwanson: kah piang haktiex in: heue.
"Jhak heue, Aux ot tau mai priex kah maix kah can dee hu: maix kudauh kudee, mai deeh viex maix hoek kah haktiex in:; mawh kheu Aux tag ang tik vud kah maix, tom: sidauh hoik yuh Aux, can ceu pa hoik krai Aux kah maix heue."
Khaix an:, Yakop siduad khaing: it tix mai ah nin:, " Simiang Siyiex ot kah dee in: tete; mai aux ang tawng kah heue."
Nawh lhat graung mai ah nin:, "Dee in: mawh dee koe: krax lhat krax graung kah mieh ding, kah dee in: ang awm: tang: dauh, mawh nyiiex bwan: Siyiex, mai siviex raoma: heue."
Mai Yakop kaoh caocao yam ponngawb, mai teei simaox gaong nawh kaing: tix mai sum: mawh rong:, mai groi bee kah toh rong: an: heue.
Nawh kok ceukaux dee an: mawh Betelax, viang mawh nan:, ceukaux veng an: hoik dawg mawh Luza heue.
Yam an: Yakop yuh sijax mukheu mai ah nin:, "Phan: Siyiex ot tau mai aux, Nawh tag priex aux kah can dee hu: aux kudauh, mai tawx pa ih pa un: sonsang ih aux, mai kraung ceep pa sang ceep aux kah,
"Mawh kheu nan: aux tag deeh hoek kah nyiiex keeing: aux kah daux pa nhim: mhawmmhawm:, Simiang Siyiex mawh Siyiex aux.
"Mai simaox sum: aux pa mawh rong: in:, tag mawh nyiiex bwan: Siyiex, can ceu pa tawx Maix kah aux khawm uik aux tag deeh tan kao: son tix son kah Maix heue.
Yakop Yaox Kah Rakhelax
Yam an: Yakop hu: krax, mai hoek kah haktiex dee ot ceu pwi plak lih singaix heue.
Nawh jhak mai yaox kah rawm: maw: tix mu: daux tiag tan:, koe: phung: yung: loe: cub pa it praok rawm: maw: heue. Mai cub cao: liang yung: khankix, kin tix tawx yung: nyaux rawm:, mai piang moing rawm: maw: an:, koe: simaox ting kah tix mu: heue.
Cao: liang yung: khankix khrawm: yung: cie kix tan:, mai gah simaox ting an: khaing: moing rawm: maw:, khaix hoik kin kix tix tawx yung: khankix nyaux rawm:, kix deeh tawb moing rawm: maw: an: kah simaox heue.
Yakop chawk ah nin: kah kix, "Puxaik khankix eue, kaoh pex khaing: dee mawx?" kix deeh ah nin:, "Yix kaoh khaing: veng Haran heue."
Nawh baox chawk ah nin: kah kix, "Tawng pex kah Laban kawnsaux simex Nakhaw: lie?" kix ah nin:, "Yix tawng kah nawh heue."
Nawh baox chawk kah kix ah nin:, "Nyawm ot nawh lie?" mai kix deeh ah nin:, "nawh nyawm ot, jhak heue, kawn: bun: nawh Rakhelax hoek tau mai phung: yung: nawh heue."
Nawh ah nin:, "Yamin: kawn: mawh yam jung singaix, ang nyang mawh bawg yam khrawm: pwi kah khawng: brie tix, tawx yung: nyaux rawm: mai deeh hu: liang kix ha:."
Viang mawh nan: kix ah nin:, "Yix ang nyang pon tawx phung: yung: nyaux rawm: sivoe ang tix nyang gah simao khaing: moing rawm: maw: heue."
Yam kawn: sikah nawh tau mai kix, Rakhelax hoek tau mai phung: yung: keeing: nawh; kheu mawh nawh cao: liang yung: heue.
Yam yaox Yakop kah Rakhelax kawn: bun: Laban, prie: miex nawh, Yakop gah simaox khaing: rawm: maw: an:, mai nawh kin tix tawx phung: yung: Laban, prie: miex nawh nyaux rawm: heue.
Khaix an:, Yakop ngheet kah Rakhelax nawh yo lox tix mai yiiem heue.
Yakop krai kah mawh tix paox nyiiex paox ma: keeing: nawh, mai mawh tix kawn: simex Rebekkax, kah Rakhelax, mawh kheu nan:, nawh deeh to: tix ing: mai krai kah keeing: tix heue.
Yam mhong: Laban hoek kawn: nan: tix Yakop, nawh to: tix hu: rieb kah, nawh kawm mai ngheet, kok nawh ing: kah nyiiex tix heue. Yakop krai grawng: tix khawm uik kah Laban heue.
Mai Laban ah nin: kah nawh, "Maix mawh si-ang: aux mai nex nham: aux," mai nawh ot tau mai Laban tix khix heue.
Yakop Teei Tix Moeng Leax Mai Rakhelax
Khaix an: Laban ah nin: kah Yakop, "Mawh kheu mawh maix kawn: pha: aux, maix ang chix pon tix yuh kaing giex going. Krai ngawh riang pa simie maix tix pon kah aux miex ding?"
Laban koe: kawn: bun: ra: kaux; Ceukaux kawn: Yex mawh Leax mai ceukaux kawn: I: mawh Rakhelax heue.
Leax awn: kawn: ngai:, viang mawh nan:, Rakhelax kied mhawm: grang mai nyawm tix jhak heue.
Yakop moh kah Rakhelax, mai nawh ah nin:, "Aux tag yuh kaing son maix aliah num sonsang yaox aux tix cie kawn: bon iak maix Rakhelax heue."
Mai Laban ah nin:, "Nie mhawm: sonsang tawx aux kah maix, khaing: tawx aux kah pwi tang: kaux, ot tau mai aux heue."
Mawh kheu nan:, Yakop yuh kaing aliah num, sonsang pon kah Rakhelax. Kheu kied moh nawh Rakhelax, nawh keud singaix sawm: an: awm: ngie ti vud khaing: heue.
Khaix an: Yakop ah nin: kah Laban, "Mawh kheu hoik naog singaix, tawx moeng aux, kah aux, sonsang ot tau aux mai nawh heue."
Laban kraix khrawm: pwi baoh an:, mai yuh krax khan: kheu: heue.
Yam hoek plak bo, Laban viex kawn: bun: tix Leax hoek kah Yakop, mai laig ot tau mai nawh heue.
(Laban ap kawncau bun: tix Zilepax kah Leax Sonsang kia: ngien kah nawh heue.)
Yam hoek plak ponngawb, jhak heue, bun: an: mawh Leax, mai Yakop ah nin: kah Laban, "Yuh kah mawx maix lai yuh nin: kah aux? aux hoik yuh kaing son maix, jao Rakhelax ang mawh lie? mawh kheu jao patix, maix pie lhen: kah aux lie?"
Mai Laban ah nin:, "Daux haktiex yix tin:, yix ang sax koe: been tawx pux koe: mex sivoe puxke: tix heue."
Pau tom: naog aliah singaix ha:, khaix hoik baox yuh maix kaing son aux, aliah num, yix tag deeh tawx an: tix kaux kah maix heue."
Yakop rieb awm: pa ah kix, yam naog aliah singaix, Laban baox tawx kawn: bun: tix Rakhelax sonsang mawh moeng nawh heue.
(Mai Laban ap kawncau bun: tix Bilaha kah Rakhelax, sonsang kia: ngien kah nawh heue.)
Yakop ot tau mai Rakhelax, mai nawh moh Rakhelax lheu: khaing: Leax, mai nawh baox yuh kaing son Laban aliah num heue.
Grawng: Kawnpraix Yakop
Yam yaox Simiang Siyiex koeng nawh kah Leax, Nawh Cao: kieh nawh koe: kawn:, mai kieh Rakhelax neh heue.
Mai Leax koe: kaux mai keh kawn: simex tix kaux, mai kok ceukaux nawh mawh Rubin, mai Leax ah nin:, "Simiang Siyiex hoik yaox kah krax kha: aux rhawm: tix tete, mawh kheu nan: mex aux tag moh kah aux phao: heue."
Nawh baox koe: kaux, mai keh kawn: simex, mai ah nin:, "Mawh kheu mhong: Simiang Siyiex krax pa koeng nawh kah aux, Nawh Cao: baox tawx kawn: simex in: kah aux," mai kok ceukaux nawh mawh Simion heue.
Nawh baox koe: kaux mai keh kawn: simex tix kaux, mai ah nin:, "Mawh kheu hoik keh aux kawn: simex loe: kaux son nawh, yamin:, mex aux tag nie lheu: moh kah aux phao:," kiex tom: kok ceukaux nawh mawh Lewix heue.
Nawh baox koe: kaux mai keh kawn: simex tix kaux, mai ah nin:, "Yamin: aux tag sang yaogyaw kah Simiang Siyiex," mawh kheu nan:, kiex tom: kok ceukaux nawh mawh Yudax; Khaix an: kiex ang lai koe: kawn: heue.
Yam yaox Rakhelax kah ang tix koe: kawnpraix son Yakop tix kaux kawx, Rakhelax bohrhawm: kah puxke: tix, mai nawh ah nin: kah Yakop, "Tawx aux koe: kawnpraix, phan: ang mawh nan:, deuk ngie yum: aux khaing: heue."
Yakop songrhawm: kah Rakhelax mai nawh ah nin:, "Khex mawh aux tang: tokaux Siyiex, pa tawx maix ang chix koe: kawn: lie?"
khaix an: nawh ah nin:, "Maix laig ot mai kawncau aux, Bilaha mai nawh tag koe: kawn: kah piang ngawng aux, mai aux tag yaox tix cie kawnpraix khaing: nawh heue."
Khaix an: nawh tawx Yakop moeng kah kawncau tix Bilaha mai kieh nawh laig ot mai nawh heue.
Mai Bilaha koe: kaux mai keh kawn: simex tix kaux son Yakop heue.
Khaix an: Rakhelax ah nin:, "Siyiex hoik prawng ca: kah plak aux, mai hoik mhong: kah lox aux, mai tawx kawn: simex tix kaux kah aux," mawh kheu nan:, kiex tom: kok ceukaux nawh mawh Dan heue.
Kawncau Rakhelax Bilaha baox koe: kaux, mai keh kawn: simex ra: kaux tix kaux son Yakop heue.
Khaix an: Rakhelax ah nin:, "Aux hoik silah tix blok paox tix mai puxke: aux, mai aux hoik pex kah," mawh kheu nan:, kiex tom: kok ceukaux nawh mawh Napthalix heue.
Yam yaox Leax ang tix lai koe: kawn:, nawh tawx Yakop baox moeng kawncau tix Zilapax heue.
Kawncau Leax pa mawh Zilapax keh kawn: simex tix kaux son Yakop heue.
Leax ah nin:, "Aux hoik mhawm: son," mawh kheu nan:, kiex kok ceukaux nawh mawh Gat heue.
Kawncau Leax, Zilapax baox keh kawn: simex ra: kaux tix kaux, son Yakop heue.
Leax ah nin:, "Aux kied gauxrhawm:! mawh kheu kawn: bun: khankix, tag kok aux mawh pa koe: bwanson:," mawh kheu nan:, kiex tom: kok ceukaux nawh mawh Asha heue.
Yam hoek bawg yam vawg nghoxca Rubin hu: kah daux kaung: nawh yaox 1plix makkheu: niex, mai viex ing: kah miex tix Leax heue. Khaix an: Rakhelax tom: ah nin: kah Leax, tawx plix makkheu: niex pa viex kawn: maix tiblah kah aux liak.
Viang mawh nan:, kiex deeh ah nin: kah nawh, "Pa teei maix mex aux hu: keud maix mawh grawng: pa kawn iak lie? mawh sang baox teei maix plix makkheu: niex, khaing: kawn: simex aux lie?" Rakhelax tom: ah nin:, "Phan: maix tawx aux ih plix in:, aux tag tawx mex tix it tau mai maix daux bo in: heue."
Yam hoek Yakop khaing: daux kaung: plak bo, Leax lih hu: plak praix mai rieb nawh, ah nin:, "Maix caw tix laig ot mai aux, mawh kheu aux hoik vai maix kah plix makkheu: niex, pa viex kawn: simex aux." Daux bo an:, nawh it mai kiex heue.
Siyiex nghiiet kah lox Leax, mai nawh baox koe: kaux, mai keh kawn: simex phwan: kaux tix kaux son Yakop heue.
Leax ah nin:, "Mawh kheu hoik tawx aux, kawncau bun: tix kah mex tix, Siyiex hoik tawx ngawh vai aux," mai kiex tom: kok ceukaux mawh Isakha heue.
Khaix an: Leax baox koe: kaux mai keh kawn: simex liah kaux tix kaux, son Yakop heue.
Mai Leax ah nin:, "Siyiex hoik tawx khawngphak pa mhawm: kah aux, yamin: mex aux, tag ot tau mai aux jheeing: jheeing:, kheu hoik keh aux kawn: simex liah kaux son nawh," mawh kheu nan:, kiex tom: kok ceukaux mawh Zebulun heue.
Khaix an:, nawh baox keh kawn: bun: tix kaux, mai kok ceukaux mawh Dina heue.
Siyiex deeh doh keud kah Rakhelax mai Siyiex nghiiet kah lox nawh, mai baox tawx nawh koe: kawn: heue.
Nawh koe: kaux mai keh kawn: simex tix kaux. Mai nawh ah nin:, "Siyiex hoik teei krax pa sa pa lao aux hu:;"
Mawh kheu nan:, kiex tom: kok ceukaux nawh mawh Yosiep, mai ah nin:, "Kieh Siyiex baox tawx kawn: simex tang: kaux kah aux heue."
Krax Pa Sidu Rhawm: Yakop Mai Laban
Khaix hoik keh Rakhelax kah Yosiep, Yakop ah nin: kah Laban, "Ploi: aux hu:, sonsang deeh aux kah haktiex dee ot tix heue."
"Tawx moeng aux mai kawn: aux khankix pa hoik yuh aux tix tawx kaing kah maix son kix, mai kieh aux lih hu:, mawh kheu hoik tawng maix kah kaing pa yuh aux son maix heue."
Laban ah nin: kah nawh, "Kieh mawh awm: pa koe: rhawm: maix, aux hoik tawng Simiang Siyiex nawb bwan: kah piang aux jao maix."
Khaix an: nawh ah nin:, "Sawn: ngawh riang kaing maix kah aux, mai aux tag sang tawx heue."
Mai Yakop ah nin: kah nawh, "Maix hoik tawng yuh aux kaing son tix miex ding, mai hoik tawng khawng: brie tix koe: kah aux miex ding."
"Sivoe ang aux nyang hoek, kraungkhrai: maix koe: ngie ceeix khaing:, yamin: hoik haok hwan: tom: nie; Simiang Siyiex hoik nawb bwan: kah maix glang: yam hoek aux heue. Mawh kheu nan: aux tag yaox tix sang nyiiex ma: tix yam mawx lie?"
Nawh ah nin:, "Aux sang tawx ceu patix kah maix?" mai Yakop deeh ah nin:, "Paw lai tawx tix ceu kawx kah aux, phan: maix simie tix yuh bwanson: kah aux, kieh aux baox deeh liang mai priex kah cub yung: maix khankix heue."
Daux in: singaix aux sang hu: ciied tix yaox kah phung: yung:, phung: pex cie maix khawm uik, aux sang gwieh tix deuh kawn: yung: pa preeh cun:, mai pa lung khankix khaing: paox tix, mai aux deeh sang gwieh tix deuh kawn: pex pa preeh pa lung hauk khankix, In: khawm uik tag mawh ngawh riang kaing yuh aux heue."
"Mawh kheu nan: maix tag yaox krax rah krax see aux, yam krai aux ngawh riang tix sivoe ngai: maix. Can pex pa ang preeh, mai yung: pa ang lung khankix, phan: koe: mai aux, maix tag ah mawh pa briex aux cie maix heue."
Mai Laban ah nin:, "Kieh mawh awm: lox pa ah maix heue."
Mawh kheu nan:, kah daux singaix an: Laban tang: gwieh pex mhaing: preeh mai pa lung, khawm pex shiang: preeh cun:, mai pa lung, mai baox laug pex paing mai kawn: yung: pa lung khankix, mai nawh ap kah kawn: simex tix heue.
Mai nawh khan: sinax dee ot tix mai Yakop singai khaing: paox tix loe: singaix krax, mai Yakop deeh liang kah cub yung: mai cub pex Laban pa kawn deuk khankix heue.
Yakop teei gawng: khaox klai Lipanax, Luzax, mai Aramon, mai kheet tix tik lhox nawh, sonsang sidawng: pa klai pa paing tix yaox mhawmmhawm: heue.
Mai nawh jung tix deuh gawng: khaox pa hoik kheet tix lhox khankix sivoe yung: mai pex kah dee nyaux rawm: mai hawt dawng: rawm: nyaux kix, Inkix mawh sonsang koe: kaux kix yam hoek tix nyaux rawm: heue.
Mawh kheu nan:, cub yung: mai pex khankix, koe: kaux mai keh pa preeh mai pa lung hauk khawm uik heue.
Mai Yakop tang: gwieh yung: mai pex pa preeh, pa preeh cun:, mai pa lung cie nawh khankix. Veeh ngai: tix kah plak cub yung: mai cub pex Laban, mai nawh tang: deuh cub yung: mai pex cie tix nongnong: khaing: cie Laban heue.
Mawh kheu nan: yam sikeeing: khawng: brie pa ting riang khankix kah paox tix, sonsang koe: kaux kah yaox tix khaox an:, Yakop tom: jung gawng: khaox an: sivoe ngai: dee chix yaox kix kah dee nyaux rawm: heue. Mawh sonsang koe: kaux kix mai gawng: khaox an: heue.
Viang mawh nan: nawh ang deuh gawng: khaox an:, kah sivoe ngai: cub yung: mai pex pa awn: riang, mawh kheu nan:, pa awn: riang mawh cie Laban mai pa ting riang mawh cie Yakop heue.
Mawh kheu nan:, Yakop baox nie mag mi hu: sipie sipie, mai nawh koe: khawng: brie tom: nie pa mawh yung:, pex, kawncau simex kawncau bun:, Kala-uk mai la haoh hun: heue.
Yakop To: Khaing: Laban
Yakop mhong: sikah kawn: simex Laban khankix, pa ah kix nin:, "Yakop hoik teei kraungkhrai: cie keeing: ex hu: khawm uik, nawh hoik yaox tix mag mi kheu sin: keeing: ex."
Yakop yaox kah pakngai: Laban ang lai awm: sivoe an:, hoik tang: tix yaox heue.
Khaix an:, Simiang Siyiex ah nin: kah Yakop, "Deeh ing: kah haktiex keeing: maix khankix, mai kah doeh simie ceucat maix, Aux tag ot tau mai maix heue."
Mawh kheu nan:, Yakop ploi: pwi kok Rakhelax mai Leax kah daux tiag dee koe: cub phung: yung: nawh heue.
Mai nawh ah nin: kah kix, "Aux hoik yaox kah ngai: baoh keeing: pex, nawh ang lai koe: rhawm: kah aux, awm: glang: kah: an:. Viang mawh nan:, Siyiex keeing: aux, hoik ot tau mai aux heue.
"Pex tawng kah hoik yuh aux kaing son keeing: pex, khawm riang rao tix khawm uik heue.
"Mai keeing: pex hoik pie lhen: kah aux, mai hoik loh ngawh riang rao pa keung: aux tix pon kao: bawg, viang mawh kawx nan:, Siyiex ang tawx akhwang: sonsang yuh nawh aux laux heue."
"Yam ah keeing: maix kieh khawng: brie pa preeh mawh ngawh riang maix, khaix an:, cub yung: khankix lih keh yung: pa preeh, yam ah keeing: maix, kieh khawng: brie pa preeh cun: mawh ngawh riang maix, khaix an: yung: khankix lih keh kawn: yung: pa preeh cun: heue.
Mawh kheu nan:, Siyiex hoik teei khawng: brie keeing: pex, mai tawx kah aux heue.
Yam sikeeing: khawng: brie khankix, aux maong tix jhak, mai yaox kah mawh mhaing: preeh, pa preeh cun: mai pa lung khankix pa hawt khaix khawng: brie shiang: khankix kah daux camaox aux heue."
Khaix an: kawncau Siyiex ah nin: kah aux, daux camaox,Yakop eue, mai aux deeh pawk ah nin:,aux ot tin: heue
Mai nawh ah nin:, "Yaog ngai: tix mai jhak, khawng: brie mhaing: pa hawt khawng: brie shiang: khankix, mawh khawng: brie mhaing: preeh, pa preeh cun: mai pa lung khawm uik, mawh kheu aux hoik yaox kah ceu pa yuh Laban kah maix heue.
Aux mawh Siyiex Betelax, dee hoik groi maix bee kah rong: simaox an:, mai dee hoik yuh maix sijax mukheu kah Aux heue. Yamin:, kaoh hu: khaing: haktiex in:, mai deeh ing: kah haktiex doeh simie ceucat maix heue.
Khaix an:, Rakhelax mai Leax pawk lox nawh ah nin:, "Kawn: koe: nyum: pa sang pon ex tix ceu ceu, phan: ang mawh nan:, sinngao tix ceu ceu khaing: daux nyiiex keeing: ex lie?:"
Nawh hoik keud ex mawh pwi tang: ceu tang: meung ang mawh lie? mawh kheu nawh hoik coh ex mai hoik shiao mau ex khawm uik heue.
"Sinngao pa hoik teei Siyiex khaing: keeing: ex, hoik mawh cie ex mai son kawnpraix ex, yamin:, kieh Siyiex maix yuh kah mawx, maix yuh awm: an: heue."
Khaix an:, Yakop kaoh mai yaog tix sau: kawn: moeng tix khankix brug kala-uk heue.
Mai nawh viex khawng: brie mai kraungkhrai: pa pon tix khaing: Padanaram khawm uik mai hu: kah keeing: tix daux haktiex Khanan heue.
Yam hu: rhip Laban hauk yung: tix dauh, Rakhelax briex tix teei rieng krub cie keeing: tix khaing: daux nyiiex heue.
Yakop briex tix lih hu:, yam ang Laban ceu pwi Ashurix tawng, mawh kheu ang nawh rhawm: krai grawng: sang to: tix kah nawh heue.
Nawh to: tau mai kraung pa koe: tix khawm uik, nawh kaoh mai tiang kah rawm: klawng: mai hu: see kah plak gawng Gilat heue.
Laban Hoek Kah Yakop
Khaix hoik to: Yakop loe: singaix, kix taug krai Laban mhong: heue.
Nawh kok kah puxaik tix mai hawt khaix nawh, aliah singaix krax, mai krup kix kah gawng Gilat heue.
Viang mawh nan:, Siyiex hoek kah Laban pwi Ashurix kah daux camaox ponsawm: mai ah nin:, "Rien rhawm: tix, paw lai krai Yakop mhawm: ang mhawm: tix ceu kawx awawx."
Mai Laban krup kah Yakop. Yamin: Yakop sum: kah nyiiex gox man: kah piang gawng tan:, Laban mai puxaik nawh khankix kawx, sum: nyiiex gox tix kah piang gawng Gilat heue.
Mai Laban ah nin: kah Yakop, "Mawh yuh maix kah mawx? maix lai pie aux, mai veix kawn: bun: aux khankix hu: awm: pwi pa rhim: tix teei kah vaig yuh kah mawx?"
Yuh kah mawx maix lai pie aux, mai mox tix hu: khaing: aux ngiiepngiiep, mai ang krai aux mhong: yuh kah mawx? mawh kheu aux tag ploi: maix hu: kah daux pa gauxrhawm:, mai ah lai rhax tau mai tauh chieang: khawm ting: khankix heue.
"Yuh kah mawx maix lai ang tawx akhwang: ngheet aux kah kawn: saux mai kawn: bun: tix lie? maix lai yuh awm: pa daox pa aw:.
"Aux koe: sibrawm tix yuh maix laux; viang mawh nan:, Simiang Siyiex keeing: maix krai kah aux daux camaox ponsawm: kawx, ah nin:, "Rien rhawm: tix, paw lai krai Yakop mhawm: ang mhawm: tix ceu kawx awawx:.
Mai yamin:, mawh kheu kied byaong maix kah nyiiex ma: miex keeing: tix, maix tom: to: tix ing:, yuh kah mawx maix lai briex rieng siyiex aux hu:?"
Yakop deeh pawk lox Laban mai ah nin: kah, "Mawh kheu lhat aux maix tud rhim: mai deeh teei kawn: bun: tix khaing: aux, aux tom: to: heue."
Yaox maix rieng siyiex tix kah pwi mawx ang ah, paw lai deuh im: ju heue. Hu: ci kraung cie maix kah sivoe ngai: puxaik ex khankix mai teei hu: heue." Mawh kheu Yakop ang tawng kah briex Rakhelax an: heue.
Laban laig kah daux nyiiex gox man: Yakop, nyiiex gox man: Leax mai nyiiex gox man: kawncau bun: kiex ra: kaux, viang mawh nan:, nawh ang yaox heue. Khaix an: nawh lih khaing: nyiiex gox man: Leax mai laig daux nyiiex gox man: Rakhelax heue.
Rakhelax teei rieng krub an:, mai sau: kah daux an: brug kala-uk, mai ngawm kah piang heue. Laban hoik tah sawg kah daux nyiiex gox man:, mai ang yaox heue.
Mai Rakhelax ah nin: kah keeing: tix, "Mawh kheu jao hoek mee: bun: kah aux, paw nyang songrhawm: kah ang aux pon kaoh sivoe ngai: maix liak." Mai nawh sawg khrieh, viang mawh nan:, nawh ang yaox kah rieng krub daux nyiiex heue.
Yakop songrhawm: mai ah nin: kah Laban, ah nin: kah nawh, "Mawh phit aux kah ceu tix? mawh koe: phimap aux yuh kah mawh, maix phex tix hawt aux yuh nin: lie?
"Maix hoik khrieh kraung aux khawm uik kawx, mawh hoik yaox maix kraung nyiiex ma: tix, tix ceu ceu lie? deuh sivoe ngai: puxaik aux mai puxaik maix, mai kieh kix prawng ca: sinax ax heue.
"Aux hoik ot tau mai maix tinga: nun, kawn: yung: shiang: mai kawn: pex shiang: maix khankix ang sax laux kawn: tix bawg kawx, aux ang sax ih kah nex kawn: yung: mhaing: khaing: cub yung: maix heue.
"Can pa kiied totiag hai: khankix, aux ang sax viex hoek kah maix; aux kawn: kham: tix som kah, pa briex pwi daux tawm: taix aux, ponngaix, ponsawm: ang ah, maix nhie: aux plud jheengjheeng: heue."
Yam ponngaix, aux hoik grok tix kah koek, mai yam ponsawm:, aux hoik caux kah rawm: ciex, mai ang laig it laig tum kah heue."
"Aux hoik ot daux nyiiex maix tinga: num, mai hoik yuh kaing son maix kao: pon: num, sonsang pon tix kah kawn: bun: maix khankix, aux hoik baox yuh kaing son maix liah num, sonsang pon tix kah khawng: brie maix, maix hoik loh kah ngawh riang aux kao: bawg heue.
Phan: Siyiex keeing: aux, Siyiex Abraham mai Siyiex pa lhat graung Icak kah, ang ot tau mai aux, maix tee: ploi: aux ing: mai taix yi tix tete. Siyiex hoik yaox kah krax kham: geu: aux, mai kaing pa hoik yuh aux kah taix tix, Nawh tom: kieh thiang: kah maix daux ponsawm: kawx heue.
Gumlox Sijax Mukheu Laban Tau Mai Yakop
Laban deeh pawk lox kah Yakop ah nin:, "Kawn: bun: ankix kawx mawh kawn: bun: aux, mai kawnpraix ankix kawx mawh kawnpraix aux, cub kawn: yung: khankix kawx, mawh kawn: yung: aux, can pa yaox maix khawm uik kawx mawh cie aux heue. Mawh kheu nan:, daux in: singaix aux sang chix yuh kah mawx kah kawn: bun: aux khankix, phan: ang mawh nan:, kah kawnpraix pa hoik keh khaing: kix lie?
"Hoek yamin:, kieh ex yuh sijax mukheu kah maix mai aux, mai kieh mawh mhai: sakse sinax maix mai aux heue."
Yakop teei simaox tix mu: mai sum: mawh rong: heue.
Yakop ah nin: kah puxaik tix khankix, "Kieh ex sut simaox," mai kix sut simaox, mai pum: tix deuh. Mai kix ih priex kah praok pum: simaox an: heue.
Laban kok ceukaux simaox an: mawh, "Yegadax Sahadutax. (Dee bleeh mawh pum: sakse heue.) Viang mawh nan:, Yakop kok mawh Gilat heue.
Mai Laban ah nin:, "Pum: simaox in: mawh sakse sinax maix mai aux daux in: singaix." Mawh kheu nan:, tom: kok ceukaux mawh Gilat heue.
Mai baox kok mawh Mizapa, mawh kheu nawh ah nin:, "Kieh Siyiex kia: ngien sinax maix mai aux, yam tang: ot ex singai khaing: paox tix heue.
"Phan: maix yuh krax kharhawm: kah kawn: bun: aux khankix, phan: ang mawh nan:, phan: maix teei tix moeng bun: tang: kaux, kah piang kawn: bun: aux khankix, viang kawn: pwi ang koe: sakse sinax ex kawx, doh keud kah Siyiex mawh sakse sinax maix mai aux heue."
Laban ah nin: kah Yakop, "Jhak kah pum: simaox mai rong: simaox in:, pa hoik deuh aux sinax maix mai aux heue.
"Kieh pum: simaox mai rong: simaox in: mawh mhai: sakse, aux tag ang pon luan khaing: mee: pum: simaox in: sonsang tuktiak tix kah maix, maix kawx tag ang pon tix luan khaing: mee: pum: simaox in: mai rong: simaox in: sonsang tuktiak tix kah aux heue."
Kieh Siyiex Abraham, Siyiex Nakhaw: mai Siyiex keeing: kix, prawng ca: sinax ex." Mai Yakop tiextu kah Siyiex pa lhat graung keeing: nawh Icak heue.
Mai Yakop yuh krax tan krax lu kah piang gawng, mai kok puxaik tix khankix ih priex preem; mai ot kah piang gawng leeing: sawm: heue.
Laban kaoh ponngawb caocao, mai ngheet kah kawn: saux mai kawn: bun: tix khankix, mai nawb bwan: kah piang kix, Khaix an: Laban lih hu: khaing: tan:, mai ing: kah nyiiex tix heue.
Esaw: Hoek Tix Rieb Yakop
Yakop baox hu: krax hu: tix, mai kawncau Siyiex hoek rieb nawh heue.
Yam yaox Yakop kah kix, nawh ah nin:, "In: mawh cub kru naing Siyiex heue." Mai nawh kok ceukaux dee an:, mawh Mahanim heue.
Yakop ploi: pwi cau tix khankix hu: sivoe, kah puxke: tix Esaw: kah haktiex sirax meung Idom;
Mai nawh tawm: lox kah kix ah nin:, "Krai inkix kah Simiang aux Esaw:, mai aux pa mawh kawncau maix Yakop, pa ot mai Laban kawn: koe: tom: in: singaix heue.
Aux hoik koe: moi, la, yung:, pex, mai kawncau simex, kawncau bun: khankix; aux hoik ploi: kix hu: krai cao: Simiang aux mhong: grawng: in:, sonsang mawh pa khaw: pa caw: kah rhawm: maix heue"
Mai kawncau khankix, deeh hoek kah Yakop ah nin:, "Yix hoik bleeh kah puxke: maix Esaw:, nawh hoik ah tix sang viex pwi pon: yieh hoek rieb kah maix heue."
Yam an: Yakop kied lhat graung mai khirhawm: khirhi:, nawh gwieh pwi pa ot mai nawh, yung:, pex, moi, mai kala-uk khankix mawh ra: cub.
Mai nawh ah nin:, "Phan: Esaw: hoek tix puing: kah cub ex tix cub, khaix an: cub pa kawn deuk tag pon tix luad luan heue."
Khaix an: Yakop rawg bwan: ah nin:, "O Siyiex keeing: aux Abraham mai Siyiex keeing: aux Icak, Simiang Siyiex pa hoik ah nin: kah aux, deeh ing: kah haktiex cao: maix, kah doeh simie ceucat maix, Aux tag yuh bwanson: kah maix heue."
Aux ang doh keung: tix pon krax caoxrhawm: caoxrhi: mai pa kaux sijax pa jhi: Maix Cao: kah kawncau Tix ceeix kawx, yam an: dix, aux tiang rawm: klawng: Yawdan mai khaoxgix tix, mai yamin: aux hoik lih tix koe: paox pie ra: cub heue.
Aux rawg bwan: kah Maix, kieh aux luad luan khaing: daux tawm: taix puxke: tix Esaw: liak; mawh kheu lhat aux nawh hoek puing: yix, tau mai miex kawn: nyawm khankix heue.
Maix Cao: hoik ah nin:, "Aux tag yuh bwanson: kah maix tete,mai kieh doeh simie ceucat maix haoh hun: awm: mhaik daog rawm: sigrit sigra:, tom: ang pwi lai uik simin kah heue"
Mawh kheu nan:, nawh paung tan: daux sawm: an:, mai nawh teei pa koe: daux taix tix tiblah, sonsang tawx khawngphak kah puxke: tix Esaw: heue.
Nawh teei pex shiang: ra: yieh mu:, mai pex mhaing: tinga: mu: khawm yung: shiang: ra: yieh mu:, mai yung: mhaing: tinga: mu:,
Kala-uk pa biiet rawm:teeih khawm kawn: pa peuex tingoe: mu:, moi shiang: tipon: mu:, mai moi mhaing: kao: mu:, la shiang: tinga: mu: mai kawn: la iak kao: mu: khankix heue.
Mai nawh tawx ceu ankix kah daux tawm: taix kawncau nawh, mai kieh kix hu: cub mawx cub an:, mai ah nin: kah kawncau tix khankix, "Kieh pex hu: sivoe aux, mai kieh diang hu: pex singai sinax cub mawx cub an: heue."
Mai nawh tawx lox kah cub pa hu: sivoe tix cub mai ah nin:, "Yam yaox pex kah puxke: aux Esaw: mai yam chawk pex yuh nin:, "Mawh pex cub pwi mawx, mai sang hu: pex plak mawx lie? Khawngphak koe: sivoe pex in: mawh cie pwi mawx lie?
Khaix an: pex deeh ah, "Inkix mawh cie kawncau maix Yakop; mai mawh khawngphak pa tawx ex kah maix cao: simiang ex Esaw:, tokaux Yakop ot plak khaix yix heue."
Nawh baox tawm: lox kah cub ra: mai cub loe:, can pa hawh khawng: brie hu: khankix mai ah nin:, "Yam yaox pex kah Esaw: tag krai awm: pa tawm: aux in:,
mai baox ah nin:, "Kawncau maix Yakop ot plak khaix yix heue." Mawh kheu keud nawh nin:," aux tag kieh rhawmrhi: nawh deeh nghie: kah khawngphak pa hu: sivoe aux, "Mai an: aux tag yaox ngai: baoh nawh, mai nawh tag rieb kah aux heue."
Mawh kheu nan:, cub pa viex khawngphak nawh khankix hu: sivoe nawh; mai tokaux nawh it dee paung kix tan: sawm: an: heue.
Grawng: Blok Yakop Paox Tix Mai Siyiex
Kah daux sawm: an:, Yakop kaoh teei moeng tix ra: kaux, mai kawncau bun: nawh khankiex, mai kawn: simex nawh kao: tix kaux mai tiang dee thaw: rawm: klawng: Yabok heue.
Nawh kieh kix tiang hu: plak toi: rawm: klawng: tau mai kraungkhrai: pa koe: nawh khawm uik heue.
Yakop ot tan: nongnong:; mai pwi tix kaux blok paox tix mai nawh tom: dex bah riieng praix heue.
Yam hoik yaox kaw an: ang tix lai pex kah nawh, nawh tub kah siviang nawh, mai siviang Yakop khluk khlaik tau mai yam blok kiex paox tix heue.
Mai nawh ah nin:, kieh aux hu:, mawh kheu praix dex sang riang heue." Viang mawh nan: nawh ah nin:, "Phan: maix ang nyang nawb bwan: kah aux, aux tag ang ploi: maix hu: heue."
Mai Nawh ah nin: kah nawh, "Kaux maix patix?" Mai nawh ah nin:, "Aux mawh Yakop heue."
Khaix "Ceukaux maix tag ang lai kok mawh Yakop, viang mawh nan: tag deeh kok mawh Isarilax, mawh kheu hoik pon blok maix paox tix kah Siyiex, mai kawn: pwi, maix hoik pex heue."
Khaix an: Yakop chawk nawh mai ah nin:, "Aux rawg maix krai ceukaux tix kah aux liak." Mai Nawh ah nin:, "Maix chawk ceukaux Aux jao patix lie?" mai Nawh nawb bwan: kah nawh tan: heue.
Mawh kheu nan: Yakop tom: kok ceukaux dee an: mawh Penilax, "Mawh kheu aux hoik yaox kah pakngai: taw pakngai: Siyiex tan:, mai ju aux kawn: pon glawd luan heue."
Khaix hoik luan Yakop khaing: dee Penilax dom: mawx dom: an:, singaix hoik lih kah piang nawh, nawh hu: mai chawh tix heue.
Mawh kheu nan:, kawnpraix ceu pwi Isarilax khankix ang lai ih kah nex siniag ba:, pa koe: hawt siviang tom: in: singaix, mawh kheu hoik tub kah siviang Yakop dee koe: siniag nawh heue.
Grawng: Yaox Yakop Mai Esaw: Paox Tix
Yakop yaog ngai: tix mai jhak, yaox kah hoek Esaw: tau mai pwi pon: yieh kaux, mawh kheu nan:, nawh gwieh tix tawx kawn: nyawm khankix kah Leax mai Rakhelax khawm kawncau bun: kiex ra: kaux heue.
Mai nawh deuh kawncau bun: ra: kaux, mai kawn: nawh khankix hu: sivoe tix, khaix kix mawh Leax mai kawn: nawh, pa hu: sigreung nawh deuh Rakhelax mai kawn: nawh Yosiep ghoik khaix paox tix heue.
Khaix an: nawh jah tix hu: sivoe kix mai nawh gup kah piang tiex, aliah bawg, tom: hoek nawh kah puxke: tix heue.
Yam an:, Esaw: to: tix hu: rieb nawh, mai kawm kah ngawg nawh mai ngheet paox tix mai yiiem heue.
Esaw: yaog ngai: tix mai yaox kah bun: tau mai kawn: nyawm khankix, mai ah nin:, "Pwi pa ot mai maix khankix mawh pwi mawx lie?" Yakop ah nin:, "Kawn: nyawm an: khankix mawh bwanson: pa hoik tawx Siyiex kah kawncau maix heue."
Khaix an: kawncau bun: khankiex, viex kawn: tix hoek mai krub kah nawh;
Leax kawx, viex kawn: tix khankix hoek mai krub kah Esaw:; khaix an: Yakop mai Rakhelax hoek dex mai kix krub kah nawh heue.
Esaw: ah nin:, "Cub khawng: brie pa yaox aux khankix, mawh pa yuh kah mawx?" mai Yakop ah nin:, "Inkix mawh pa sang kieh aux mawh pa khaw: pa caw rhawmrhi: kah sivoe maix simiang heue."
Viang mawh nan:, Esaw: ah nin:, "Pux aux eue, ceu in: aux kawx hoik kub hoik naog kah, deeh priex pa koe: maix khankix son cao: maix heue."
Yakop ah nin:, "Ang mawh nan:, phan: awm: hoik mawh pa khaw: pa caw kah rhawmrhi: maix, rieb maix teei khawngphak in: khaing: daux taix aux liak; kied laoh lie kah hoik yaox aux kah pakngai: maix, awm: hoik yaox aux kah pakngai: Siyiex, mawh kheu hoik rieb maix aux kah daux pa gauxrhawm: tix.
"Yuh bwanson:, rieb maix teei bwanson: pa viex aux hoek kah maix liak, grawhgrawng: nawh, Siyiex hoik tawx bwanson: kah aux, tom: hoik kub hoik naog." Nawh niied tix khyox khaw:, mai nawh rieb tix teei heue.
Mai Esaw: ah nin:, "Kieh ex deeh hu: krax hu: tix, aux tag hu: sivoe maix heue."
Viang mawh kawx nan:, Yakop deeh ah nin: kah nawh, "Simiang aux eue, awm: hoik tawng maix, kawn: nyawm khankix kawx kawn: awn: riang, mai yung:, pex, moi khankix kawx, kawn: koe: kawn: pa peuex tau mai aux, phan: sidhiiet kix hu: tix ngaix ngie, kix tee: yum: kah heue."
"Mawh kheu nan: kieh simiang aux hu: sivoe ngai: kawncau maix, aux tag koi thong: khawng: brie pa koe: tau mai aux, mai kawn: nyawm khankix, sonsang pon hoek tom: dee ot maix simiang daux meung Sirax heue."
Mai Esaw: ah nin:, "Yamin: kieh aux prah pwi tix tiblah tau mai maix." Viang mawh nan: nawh deeh ah nin:, "Mawh koe: grawng: yuh kah mawx lie? kieh aux pon pa khaw: pa caw rhawmrhi: maix simiang heue."
Mawh kheu nan:, Esaw: deeh ing: kah meung Sirax daux singaix an: heue.
Yakop lih hu: plak Sukok mai sum: nyiiex cao: tix tix lhang:, mai kawg son khawng: brie nawh khankix tan:, mawh kheu nan:, ceukaux dee an: tom: kok mawh Sukok heue.
Yakop Hoek Kah Meung Khanan
Mai Yakop hoek kah veng Shekhem pa koe: kah daux haktiex Khanan, mai krax boek tix khaing: kuceu, yam hoik kaoh nawh khaing: haktiex Padanaram; mai nawh sum: nyiiex gox ot tix, kah sivoe veng an: heue.
Mai nawh liag gwang haktiex, dee hoik sum: nawh nyiiex gox man: tix, khaing: kawn: Hamo pa mawh keeing: Shikhem tiyieh plah mau heue.
Kah dee an:, nawh sum: khu: dee tan tix mu:, mai kok mawh Elelaw Isarilax heue.
Grawhgrawng: Dina
Dina kawn: bun: Leax pa hoik keh nawh son Yakop, lih hu: fi: kah kawn: bun: haktiex baoh an: heue.
Yam yaox kawn: simex Hamo, ceu pwi Hiwix, pa mawh Shekhem pa kwang: haktiex an:, nawh giex tix phit vao mai Dina, laux yuh min: plak ngai: nawh heue.
Rhawmrhi: nawh kied koe: kah Dina kawn: bun: Yakop, mai nawh moh kah bun: an:, mai nyaw glaw: tix sikah kah bun: an:, kah lox pa mhawm: heue.
Mawh kheu nan: Shekhem krai kah keeing: tix Hamo mai ah nin:, "Teei aux cie kah kawn: bun: in:, sonsang mawh moeng aux heue."
Yakop hoik mhong: kah laux yuh nawh min: plak ngai: kawn: bun: tix Dina, yam an: kawn: simex nawh khankix, ot mai khawng: brie kix daux tiag, mawh kheu nan:, Yakop ot yawg tix mai krox tom: hoek kix heue.
Mai keeing: Shekhem, Hamo lih hu: kah Yakop sonsang sikah tau mai nawh heue.
Yam deeh hoek kawn: simex Yakop, khaing: daux tiag kix mhong: grawng: an:, kix kied lauxrhawm: mai kied songrhawm: kah, mawh kheu hoik yuh pwi an: ceu pa hai: pa meug kah pwi Isarilax, mai phit vao mai kawn: bun: Yakop, pa ang khaw: tix yuh heue.
Viang mawh nan:, Hamo sikah tau mai kix ah nin:, "Kawn: simex aux Shekhem, hoik kied moh kah kawn: bun: maix. Yuh bwanson:, kieh nawh teei tix moeng kah liak."
"Kieh ex yuh paox nyiiex tau mai pex; mai tawx kawn: bun: maix kah yix, mai deeh teei pex cie kawn: bun: yix khankix heue.
"Mai pex tag ot tau mai yix, mai haktiex in: tag koe: sivoe pex, ot daux haktiex in:, mai yuh lai yuh geu; mai teei tix cie kraungkhrai: pa koe: daux haktiex in: khawm uik heue.
Shekhem ah nin: kah keeing: bun: mai puxaik nawwh, "Kieh aux pon bwan: sivoe ngai: pex, can ceu pa rawg pex, aux tag tawx heue."
"Kraung krub mai khawngphak pa rawg pex, viang nie kawx, aux tag sang tawx awm: pa rawg pex kah aux, tawx ngie kawn: bun: an: kah aux, sonsang mawh moeng aux heue."
Kawn: simex Yakop khankix deeh pawk lox kah Shekhem mai keeing: nawh Hamo, kah daux pa lak lhen: tix, mawh kheu hoik yuh nawh krax kaig krax tua kah pux kix Dina heue.
Mai kix ah nin:, "Yix ang pon tawx nan: yix cie pwi pa ang nyang pat hak, mawh kheu phan: yix yuh nan: tag lih tix mawh krax pa kaig tua kah yix heue.
"Phan: mawh son grawng: in: ex khaw: rhawm: kieh pex ex yuh nin:, phan: pex yuh awm: been yix, mai phan: simex pex kukaux pat hak tix,
"Khaix an: yix tag tawx kawn: bun: tix khankix kah pex, mai yix tag teei kawn: bun: pex, yix tag ot tau mai pex, mai ex tag mawh pwi tix ceu khaing: heue.
"Phan: pex ang cu tix nghiiet kah lox yix, mai ang cu tix pat hak tix, khaix an: yix tag deeh teei kawn: bun: tix hu: heue."
Gumlox an: khawm uik Hamo mai kawn: simex nawh Shekhem khaw: rhawm: kah heue.
Kawn: simex an: mawh kheu kied moh nawh kah kawn: bun: Yakop, nawh rieb kah lox pa krai kix, nawh mawh pwi pa koe: min: plakngai: khaing: can pwi daux nyiiex keeing: tix khawm uik heue.
Hamo mai kawn: simex nawh Shekhem deeh hoek kah diang siviex veng kix, mai krai kah pwi pa ot daux veng ah nin:;
"Pwi inkix hoik yuh pa nhim: tau mai ex, kieh kix ot haktiex in: mai yuh lai yuh geu, mawh kheu haktiex hoik sidaing: vieh, mai kub son kix, kieh ex teei tix moeng kawn: bun: kix, mai kieh ex tawx kix teei tix moeng kawn: bun: ex khankix heue."
"Viang mawh nan: phan: ex rieb tix teei been pa pat hak awm: kix, mai kawn: simex daux sinax ex kukaux tag pat hak tix, kix tag khaw: rhawm: tix ot tau mai ex, mai tag mawh ceu pwi tix mu: heue."
"Khawng: brie kix, kraungkhrai: cie kix, mai yung: mai moi cie kix kumu:, tag mawh cie ex khawm uik sax ang mawh lie? hawt rhawm: kix, mai kieh kix ot tau mai ex heue."
Can pwi pa lih hu: kah siviex veng kix kukaux, hoik cu nghiiet kah lox Hamo mai kawn: simex nawh Shekhem, mai can kawn: simex, pa lih tix hu: kah diang siviex veng, pat hak tix kukaux heue.
Khaix hoik luan loe: ngaix, yam kawn: saux nex khaix pat kix hak tix, kawn: simex Yakop Simion mai Lewix ra: kaux, pa mawh prie: Dina, teei vaig tix kaux tix kre: mai laig daux veng an:, mai pah kawn: simex pa ot tan: khawm uik heue.
Mai kiex pah Hamo mai kawn: nawh Shekhem kah vaig, mai deeh teei Dina ing: khaing: nyiiex Shekhem heue.
Kawn: simex Yakop khankix, deeh hu: kah dee pah kix pwi tan:, mai yuh veng lauxleeing: jao hoik laux yuh kix min: plakngai: nan: kix heue.
Kix rhim: tix teei phung: yung: kix, moi, mai la kix khawm can pa koe: daux veng mai can pa koe: daux kaung: daux ma: kix;
mai kraungkhrai: kix khawm uik, mai giex tix viex moeng kawn: kix mawh pa giex pa laung, mai rhim: tix teei can pa koe: daux nyiiex kix mai yuh lauxleeing: heue.
Khaix an: Yakop ah nin: kah Simion mai Lewix, "Pex hoik yuh krax kharhawm: aux, mai kieh pwi haktiex in:, ceu pwi Khanan mai ceu pwi Pherazix khankix seeing: brai: kah aux, mawh kheu tux ex sinax kix, kix tag khrawm: paox tix, mai hoek puing: kah aux, aux tag yaox tix lauxleeing: tau mai kawn: nyiiex kawn: ma: tix heue."
Mai kix deeh ah nin:, "Krax pa yuh kix kah nan: ex awm: bun: coh kaux khex khaw: caw daux krax lie?"
Yakop Deeh Ing: Kah Betelax
Siyiex ah nin: kah Yakop, "Kaoh, hu: kah Betelax mai ot tan:; yuh khu: dee tan tix mu: son Siyiex pa hoik lih bleeh kah maix, yam to: maix khaing: puxke: tix Esaw: heue."
Mai Yakop ah nin: kah pwi kawn: nyiiex kawn: ma: tix, mai can pwi pa ot mai nawh khawm uik, "Tik kah siyiex pwi tang: kaux tang: hak khankix khaing: daux sinax pex, kieh tokaux pex singax singeh, mai loh kraung ceep tix.
"Ex kaoh mai hu: kah Betelax, aux tag sang yuh khu: dee tan tix mu: tan:, son Siyiex pa hoik pawk lox aux, yam lauxrhawm: aux mai Cao: pa ot tau kah daux krax hu: aux kudauh kudee heue."
Mawh kheu nan:, kix tawx siyiex pwi tang: kaux tang: hak pa koe: mai kix kah Yakop khawm uik, kix baox tawx krim pa koe: kah yhaok tix khawm uik kah nawh, mai Yakop sipaung: an: khankix greem: khaox piak van: pa koe: dex veng Sekhem heue.
Yam lih hu: kix khaing: tan:, pwi pa ot baoh veng an:, lhat graung kah Siyiex, kix tom: ring hawt khaix kawn: simex Yakop heue.
Mai Yakop hoek kah veng Luzax, (pa mawh Betelax) pa koe: daux haktiex Khanan tau mai pwi pa ot mai nawh khawm uik heue.
Mai nawh sum: khu: dee tan tix mu: tan:, mai kok dee an: mawh Ela Betelax, (dee bleeh Ela Betelax mawh nyiiex bwan: Siyiex heue.) Mawh kheu lih bleeh Siyiex kah nawh tan:, yam to: nawh khaing: puxke: tix heue.
Kawncau bun: Rebekkax pa mawh Deborax yum: tan:, mai kix sipaung: nawh kah Betelax greem: khaox piak van:; kix tom: kok ceukaux khaox an: mawh Alonbakut heue. (Dee bleeh Alon Bakut mawh khaox piak van: pa yiiem heue.)
Yam deeh hoek Yakop khaing: Padanaram, Siyiex lih bleeh kah nawh mai nawb bwan: kah nawh heue.
Mai Siyiex ah nin: kah nawh, "Yamin: ceukaux maix mawh Yakop, khaix in: ceukaux maix tag ang lai kok mawh Yakop, mai tag kok maix mawh Isarilax." Mawh kheu nan:, Nawh Cao: kok ceukaux Yakop mawh Isarilax heue.
Siyiex baox ah nin: kah nawh, "Aux mawh Siyiex pa ting siawpsibrawm; kieh maix haok hwan: haoh hun:, ceu pwi tix ceu mai cub pwi kuceu, tag lih koe: khaing: maix, mai khuhawkham khankix, tag lih khaing: doeh simie ceucat maix heue."
Haktiex pa hoik tawx Aux, kah Abraham mai Icak khankix, Aux sang tawx kah maix, khawm doeh simie ceucat maix khawm uik heue."
Khaix an: Siyiex haok dee lhaong: khaing: Yakop, dee hoik sikah Nawh Cao: tau mai nawh heue.
Mai Yakop sum: rong: simaox tix mu:, kah dee hoik sikah Nawh Cao: tau mai nawh, nawh groi krax tan ceu pa nyaux kah piang simaox an:, mai groi bee kah piang heue.
Mai Yakop kok ceukaux dee hoik sikah Siyiex mai nawh tan:, mawh Betelax heue.
Grawng: Yum: Rakhelax
Khaix an: kix lih hu: khaing: Betelax, yam dex sang hoek kix kah veng Epharat, bawg yam sang keh Rakhelax kawn: hoik hoek, mai nawh yaox tix kham: geu: krax saux sigrien sigre heue.
Yam kham: geu: nawh saux sang keh tix, bun: pa priex keh nawh ah nin:, "Paw lhat paw graung, maix tag baox pon kawn: simex tix kaux heue."
Yam dex lih khwan: nawh, (yam sang yum:) nawh kok ceukaux kawn: simex tix mawh Bennawnix, (Dee bleeh Bennawnix mawh kawn: simex pa koe: yam lauxrhawm: aux heue.) Viang mawh nan:, keeing: nawh tom: kok nawh mawh Binyamin heue. (Dee bleeh Binyamin mawh kawn: simex taix khawn: dawm: aux heue.)
Rakhelax yum:, mai kix sipaung: nawh, hawt krax hu: kix kah veng Epharat (pa kok mawh veng Bieliehiem,)
mai Yakop sum: rong: simaox tix mu: kah piang simeeig kiex. Rong: simaox an:, kawn: koe: kah simeeig Rakhelax tom: in: singaix heue.
Isarilax lih hu: mai sum: nyiiex gox man:, plak toi: nyiiex pau Edax heue.
Yam ot Isarilax kah haktiex an:, Rubin hu: it tau mai moeng iak keeing: tix Bilahax. Isarilax mhong: kah grawng: an: heue.
Kawn: Simex Yakop Kao: Ra: Kaux
Yakop koe: kawn: simex kao: ra: kaux, kawn: simex Leax khankix Rubin mawh kawn: Ai:, Simion, Lewix, Yudax, Isakha mai Zebulun heue.
Kawn: simex Rakhelax khankix, mawh Yosiep mai Binyamin heue.
Kawn: simex Bilahax pa mawh kawncau bun: Rakhelax mawh Dan mai Napthalix heue.
Mai kawn: simex Zilapa pa mawh kawncau bun: Leax, mawh Gat mai Asha heue. Inkix mawh kawn: simex Yakop pa keh son nawh daux haktiex Padanaram heue.
Grawng: Pa Yum: Icak
Mai Yakop hoek kah keeing: nawh Icak, kah baoh Mamre, phan: ang mawh nan: Kirayabax, (an: mawh veng Hebron) dee paung Abraham mai Icak heue.
Yam an: Icak koe: ju tiyieh tidaix num heue.
Mai Icak hoik kied riex ju mai kuad hu: sipie sipie hoik sidauh ju mai yum:, hu: kah dauh dee khrawm: simie ceucat nawh tix, mai kawn: simex nawh Esaw: mai Yakop sipaung: nawh heue.
Grawng: Nyiiex Ma: Esaw:
In: mawh grawng: doeh simie ceucat Esaw: pa mawh ceu pwi Edom heue.
Esaw: teei tix moeng kawn: bun: Khanan pa mawh Adax kawn: bun: Elon ceu pwi Hittix, mai Aholibama, kawn: bun: Anax pa mawh kawn: simex Zibeon ceu pwi Hewix;
Mai Bashamat nan: Nabayok pa mawh kawn: bun: Isahmelax heue.
Adax keh kawn: simex Eliphat son Esaw:, mai Bashamat keh kawn: simex Yoelax heue.
Aholibama keh kawn: simex Yushax, Yalam, mai Kawrax heue.
Khaix an: Esaw: viex moeng tix khankix, mai kawn: simex kawn: bun: tix, mai can pwi pa ot daux nyiiex nawh khawm uik, tau mai khawng: brie, kraungkhrai: nawh khawm uik pa hoik pon daux haktiex Khanan khankix, mai hu: kah haktiex dee singai tix dauh, khaing: pux nawh Yakop heue.
Mawh kheu kied nie kraungkhrai: kiex, kiex ang lai chix ot tau, mai haktiex ot kiex hoik sikhawp kheu hoik kied nie khawng: brie eei: kiex heue.
Mawh kheu Esaw: ot kah piang gawng Sirax; Esaw: lih tix mawh ceu pwi Edom heue.
In: mawh doeh simie ceucat Esaw: pa mawh keeing: kah ceu pwi Edom pa ot kah piang gawng Sirax heue.
In: mawh ceukaux kawn: simex Esaw:; moeng nawh Adax keh kawn: simex Eliphat, moeng nawh Bashamat keh kawn: simex Yoelax heue.
Kawn: simex Elihpat khankix mawh Teman, Awma, Zepho, Gatan mai Kenat heue.
Moeng iak kawn: simex Esaw: pa mawh Elihpat, pa kaux Timanax keh kawn: simex tix Amaliet son Eliphat, inkix mawh doeh simie ceucat Adax moeng Esaw: heue.
Kawn: simex Yoelax khankix mawh Nahat, Shama, mai Miza. Inkix mawh doeh simie ceucat Bashamat moeng Esaw: heue.
Aholibama moeng Esaw:, mawh kawn: bun: Anax, mai Anax mawh kawn: simex Zibeon, Aholibama keh kawn: simex pa mawh Yushax, Yalam mai Kawrax son Esaw: heue.
Cao: Kaing: Meung Edom
Inkix mawh cao: kaing: kah kawn: simex Esaw: khankix heue. Kawn: simex Eliphat pa mawh kawn: ai: Esaw: khankix mawh, cao: kaing: Teman, cao: kaing: Awma, cao: kaing: Zepho, cao: kaing: Kenat,
cao: kaing: Kawrax, cao: kaing: Gatan, mai cao: kaing: Amalet heue. Inkix mawh cao: kaing: kawn: simex Eliphat khankix heue. Kix mawh doe simie ceucat kawn: simex Adax heue.
Kawn: simex Yoelax, pa mawh kawn: simex Esaw: khankix mawh, cao: kaing: Nahat, cao: kaing: Zerax, cao: kaing: Shama, mai cao: kaing: Miza heue. inkix mawh cao: kaing: khankix, pa mawh kawn: simex Yoelax daux haktiex meung Edom heue. Mai kix mawh doeh simie ceucat kawn: simex Beshemat moeng Esaw: heue.
Kawn: simex Aholibama moeng Esaw: khankix mawh, cao: kaing: Yushax, cao: kaing: Yalam, mai cao: kaing: Kawrax heue. Inkix mawh doeh simie ceucat cao: kaing: pa lih khaing: Aholibama moeng Esaw:, kawn: bun: Anax heue.
Inkix mawh kawn: simex Esaw:, pa mawh pwi meung Edom mai pa mawh cao: kaing: kix tan: heue.
Grawng Kawn: Simex Sirax Khankix
Kawn: simex Sirax, pa mawh ceu pwi Hawrix pa ot daux haktiex an:, mawh Lawtan, Shawbax, Zibeon mai Anax,
Dishon, Ezax, mai Dishan. Inkix mawh cao: kaing: ceu pwi Hawrix pa mawh kawn: simex Sirax, kah daux haktiex Edom heue.
Mai kawn: simex Lawtan khankix mawh Hawrix mai Henan, nan: Lawtan mawh Timinax heue.
Kawn: simex Shawbalax khankix mawh Alavan, Manahat, Ebalax, Shephaw mai Awnam heue.
Kawn: simex Zibeon mawh Ayax mai Anax; Anax mawh pwi pa yaox kah dee lih rawm: lhaox, kah daux tiag yam liang nawh la keeing: tix Zibeon heue.
Kawn: Anax mawh Dishon mai Aholibama pa mawh kawn: bun: nawh heue.
Kawn: simex Dishon khankix mawh, Hemdan, Eshaban, Itaran mai Kheran heue.
Kawn: simex Ezax khankix mawh, Bilahan, Zavan mai Akan heue.
Kawn: simex Dishan mawh, Uzax mai Aram heue.
Inkix mawh cao: kaing: ceu pwi Hawrix. Kix tom: mawh cao: kaing: Lawtan, cao: kaing: Shawba, cao: kaing: Zibeon, cao: kaing: Anax,
cao: kaing: Dishon, cao: kaing: Eza, mai cao: kaing: Dishan, inkix khawm uik, mawh cao: kaing: ceu pwi Hawrix, pa yuh cao: kaing: kah haktiex Sirax heue.
Khunhawkham Haktiex Edom
Inkix mawh khunhawkham pa kwang: kah haktiex Edom, sivoe ang khunhawkham tix kaux kawx nyang bax kwang: kah piang pwi Isarilax heue.
Belax kawn: simex Pawrax kwang: kah haktiex Edom, mai ceukaux veng ting nawh mawh Dinhabax heue.
Khaix yum: Bakax, kawn: simex Zerax pa mawh Yawbap ceu pwi haktiex Bawzarax deeh plud tix kwang: khaix nawh heue.
Khaix yum: Yawbap, Husham ceu pwi haktiex Temanix deeh plud tix kwang: khaix nawh heue.
Khaix yum: Husham, kawn: simex Bedat pa mawh Hadax, pa puing: kah ceu pwi Midian khankix, kah daux tong Mawbax, deeh plud tix kwang: khaix nawh, ceukaux veng ting nawh, mawh Avit heue.
Khaix yum: Hadat, Samalax ceu pwi haktiex Masariet deeh plud tix kwang: khaix nawh heue.
Khaix yum: Samalax, Shawlax ceu pwi haktiex Rehobot pa ot hawt rawm: klawng: deeh plud tix kwang: khaix nawh heue.
Khaix yum: Shawlax, Balahanan kawn: simex Akhabaw deeh plud tix kwang: khaix nawh heue.
Khaix yum: Balahanan, kawn: simex Abaw, Hadax deeh plud tix kwang: khaix nawh, mai ceukaux veng ting nawh mawh Paw:, ceukaux moeng nawh mawh Mahetabalax, kawn: bun: Matariet, mai Matariet mawh kawn: bun: Mezahat heue.
Grawng: Cao: Kaing: Esaw: Khankix
In: mawh grawng: ceukaux cao: kaing: doeh nyiiex ma: Esaw: khankix, mai dee ot dee koe: kix mai min: ceukaux kix pa mawh, cao: kaing: Timanax, cao: kaing: Alavax, cao: kaing: Yetiet,
cao: kaing: Aholibama, cao: kaing: Elax, cao: kaing: Pinon,
cao: kaing: Kenat, cao: kaing: Teman, cao: kaing: Mibaza,
cao: kaing: Magadelax, cao: kaing: Iram khankix, inkix khawm uik mawh cao: kaing: haktiex Edom, kah dee ot dee koe: kix, kah haktiex pa hoik pon kix tix cie heue. (Esaw: mawh keeing: kah ceu pwi Edom heue.)
Grawng: CaMaox Yosiep
Yamin Yakop hoik ot kah haktiex pa hoik mawh keeing: nawh nyo sinie, daux haktiex Khanan heue.
In: mawh grawng: doeh simie ceucat Yakop khankix. Yosiep koe: ju kao: aliah num, mai nawh mawh cao: liang yung: mai pex, tau mai puxke: tix khankix; nawh ot tau mai kawn: simex Bilaha, mai kawn: simex Zipalax, Bilaha mai Zipalax mawh moeng keeing: nawh, Yosiep yie krai grawng: phimap pa yuh kix kah keeing: tix heue.
Yamin Isarilax kied moh kah Yosiep khaing: kawn: nawh khankix, kheu mawh nawh kawn: simex pa pon nawh yam kuad riex ju tix, mai caing nawh ceep kraung sibex pa mhawm: grang pa shiang: kah rawm: rawn kuceu heue.
Viang mawh nan:, yam yaox puxke: nawh khankix, kah kied moh keeing: kix kah Yosiep khaing: kix, mai koeng kah nawh, mai kix ang lai rhawm: sikah kah nawh heue.
Yosiep camaox mai nawh krai puxke: tix khankix mhong: mai kix nie baox koeng kah nawh heue.
Mawh kheu nan:, nawh ah nin: kah kix, "Yuh bwanson: nghiiet kah grawng: pa hoik camaox aux liak."
"Jhak heue, yam mad ex lhiem: nghox kah daux kaung:, lhiem: nghox cie aux, yaog tix cung see see; lhiem: nghox cie pex khankix, kaoh cung hawt vungviang an:, mai krub kah lhiem: nghox cie aux heue."
Puxke: nawh khankix ah nin: kah nawh, "Tag sang kwang: maix kah piang yix lie? phan: ang mawh nan:, tag sang mawh maix simiang yix lie?" mawh kheu nan:, kix nie baox koeng kah nawh, kah grawng: camaox pa krai nawh heue.
Khaix an: nawh baox deeh camaox tix ceu, mai nawh krai kah puxke: tix khankix; nawh ah nin:, "Jhak heue, aux hoik baox deeh camaox grawng: tang: ceu, singaix, khix, mai simuing: kao: tix mu: krub kah aux heue."
Yam krai nawh ceu an: kah keeing: tix mai puxke: nawh khankix, keeing: kix ne raw nawh mai ah nin:, "Grawng: pa hoik camaox in:, mawh grawng: camaox ceu patix lie? Aux mai miex maix khawm puxke: maix khankix, tag sang yaox tix hoek gup tix kah piang tiex plak sivoe ngai: maix lie?
Mai puxke: nawh khankix bohrhawm: kah nawh, viang mawh nan: keeing: nawh een: tix tawng grawng: in: daux rhawm: tix heue.
Grawng: Coh PuxKe: Nawh Khankix Kah Yosiep
Khaix an: puxke: nawh khankix, hu: liang yung: mai pex cie keeing: kix kah veng Shikhem heue.
Isarilax ah nin: kah Yosiep, "Puxke: maix khankix hu: liang yung: mai pex plak veng Shekhem ang mawh lie? Hoek heue, aux tag sang ploi: maix hu: kah kix." mai nawh deeh ah nin:, "Aux ot tin: heue."
Mai nawh ah nin: kah nawh, "Hu: jhak kah yamin:, mawh nyawm ot nyawm koe: puxke: maix khankix lie? deeh viex lox hoek kah aux." Mawh kheu nan: nawh ploi: nawh khaing: kah daux lung: Hebron mai nawh hoek kah veng Shekhem heue.
Mai pwi tix kaux yaox kah lailing nawh kah daux tiag, mai pwi an: chawk kah nawh ah nin:, "Sawg maix patix lie?"
"Aux sawg kah puxke: tix khankix," yuh bwanson: krai aux mhong: dee liang kix yung: liak?"
Mai pwi an: ah nin:, "Kix hoik lih hu: khaing: tin:, mawh kheu hoik mhong: aux ah kix nin:,Hu: ex plak veng Doktan" Mawh kheu nan: Yosiep deeh hawt khaix puxke: tix khankix, mai yaox kix daux veng Doktan heue.
Yam yaox kix hoek nawh dee singai, mai sivoe ang nawh nyang bax hoek dex kix, kix kum: paox tix sonsang pah nawh heue.
Kix ah nin: kah paox tix, tix kaux hoik tix kaux, "Jhak heue, cao: camaox hoik hoek phao:!
"Hoek heue, kieh ex pah nawh yamin: mai tik nawh kah daux o: ti dauh dauh, ex tag sang ah nin:,"Totiag tix ceuceu hoik kiied nawh, ex pau tix jhak grawng: camaox nawh sang lih tix mawh yuh kah mawx."
Yam mhong: Rubin kah lox an:, mai nawh taoh Yosiep khaing: daux tawm: taix kix mai ah nin:, "Ex paw doh pah kah nawh heue."
Mai Rubin ah nin: kah kix, "Paw kieh nham: jauh, ploi: nawh kah daux o: pa koe: daux tiag, paw doh kieh taix pex krox kah nawh." Rubin keud tix sang taoh nawh khaing: daux tawm: taix kix mai deeh viex nawh ing: kah keeing: tix heue.
Mawh kheu nan: yam hoek Yosiep kah puxke: tix khankix, mai kix peeik tix tik sibex pa mhawm: grang pa shiiang: kah rawm: rawn kuceu pa ceep nawh piang tix heue.
Mai kix teei tix ploi: nawh daux o:. Daux o: an: ang koe: tidtix mai rawm: kawx ang koe: kah heue.
Yam ngawm kix tix sawm:, kix yaog tix jhak mai yaox kah ceu pwi Ishamelax tix cub pa kaoh khaing: haktiex Gilat tau mai kala-uk, kix tang: ceu pa sioe: bhawng: peeh khaox Balasan, peeh khaox Muran khankix kah piang Kala-uk kix, mai viex hu: kah meung Ejiptux heue.
Khaix an: Yudax ah nin: kah puxaik tix khankix, phan: ex pah pux tix mai mox nham: nawh, sang koe: bwanson: yuh kah mawx?
"Hoek heue, teei ex coh nawh kah ceu pwi Ishamelax khankix, mai paw kieh taix ex hoek kah piang nawh, kheu mawh nawh pux ex mai nex nham: ex." mai puxaik nawh khankix nghiiet kah lox nawh kukaux heue.
Khaix an: ceu pwi Midian pa yuh lai geu khankix, pha: kah dee ot kix tan:, mawh kheu nan: puxke: nawh khankix bluh Yosiep lih khaing: daux o:, mai coh nawh kah ceu pwi Ishamelax kah mau tinga: Shekhe, mai kix viex Yosiep hu: kah meung Ejiptux heue.
Yam deeh hoek Rubin kah daux o:, mai ang lai yaox Yosiep kah daux o:, nawh riah tix tik kraung ceep tix jao heue.
Mai nawh deeh ing: kah puxaik tix mai ah nin:, "Kawn: nyawm ang lai ot tan:, mai aux sang yuh kah mawx?"
Khaix an:, kix teei sibex Yosiep, mai kix pah kah kawn: pex tixmu:, mai cub sibex an: daux nham:,
Mai kix tawx sibex pa shiang: kah rawm: rawn kuceu, mai viex hoek kah keeing: kix mai ah nin:, "Yix hoik yaox kah sibex in:, jhak tix yaox mawh ang mawh sibex kawn: maix lie?"
Mai nawh pon ci: kah sibex an: mai ah nin:, "In: mawh sibex kawn: aux, totiag pa hai: hoik kiied tix ih kah nawh, mai Yosiep hoik phawng: nex phawng: nham: heue."
Khaix an: Yakop riah kraung ceep tix, mai fua: nyoi tix kah chee: rhix, mai lauxrhawm: son kawn: simex tix tom: rheung: singaix sawm: heue.
Kawnpraix nawh khankix, hoek tix khu: rhawm: nawh; nawh thiang: kah lox khu: rhawm: kix mai ah nin:, "Aux tag sang lih hu: daux simeeig tau mai kawn: simex tix, kah daux pa voirhawm: voirhi: tix," mawh kheu nan: keeing: nawh yiiem grai son Yosiep heue.
Pwi Midian khankix, deeh coh Yosiep kah daux meung Ejiptux kah Pawtiphax, pa mawh cao: kaing: greem: khunhawkham Pharaw, Pawtiphax mawh cao: kaing: naing, pa pau ju simiang Pharaw heue.
Grawng: Yudax Mai TaMa
Yam an:, Yudax gwieh tix hu: khaing: puxaik nawh khankix, hu: ot mai ceu pwi Adulan tix kaux pa kaux Hirax heue.
Yudax yaox kawn: bun: ceu pwi Khanan pa kaux Shua, mai nawh teei tix moeng heue.
Mai nawh koe: kaux mai keh kawn: simex tix kaux, nawh kok ceukaux nawh mawh Erax heue.
Nawh baox koe: kaux mai keh kawn: simex tix kaux, mai nawh kok ceukaux nawh mawh Awnan heue.
Mai nawh baox koe: kaux mai keh kawn: simex tix kaux, mai nawh kok ceukaux nawh mawh Shelax. Nawh ot daux veng Khezip yam keh tix Shelax heue.
Khaix an: Yudax teei kawn: Ai: tix Erax koe: moeng tix kaux, mai ceukaux nawh mawh Tama heue.
Viang mawh nan:, kawn: Ai: Yudax pa mawh Erax yuh pa caox pa caig kah sivoe ngai: Simiang Siyiex, mai Simiang Siyiex pah nawh yum: heue.
Mai Yudax ah nin: kah Awnan, "Hu: kah moeng puxke: maix, mai teei tix moeng nawh, sonsang deeh plud doeh puxke: maix heue."
Viang mawh nan:, Awnan tawng kah kawn: an:, ang lai yaox tix, kok mawh kawn: tix, yam hu: it nawh mai moeng puxke: tix, nawh kieh rawmngang tix lih piang tiex, mawh kheu ang rhawm: kieh kawn: tix plud kah doeh puxke: tix heue.
Can pa yuh nawh, ang lai khaw: rhawm: Siyiex, mawh kheu nan:, Nawh cao: baox pah nawh yum: heue.
Khaix an: Yudax ah nin: kah mun tix Tama, "Ing: ot awm: miexmai: kah nyiiex keeing: maix, glang: ang kawn: simex aux Shelax nyang ting," mawh kheu lhat Yudax Shelax yum: awm: puxke: tix khankix, mawh kheu nan: Tama lih hu: mai deeh ot kah nyiiex keeing: tix heue.
Khaix hoik rheung: bawg yam, kawn: bun: Shua pa mawh moeng Yudax yum:, Yam hoik deeh nyawmrhawm: nawh, Yudax hu: kah pwi pa rhip hauk yung: tix, daux veng Timanax tau mai paoxgrawm paoxgrux tix Hirax, ceu pwi Adulan heue.
Mai pwi krai kah Tama ah nin:, "Jhak heue, paox maix hoik hu: sonsang rhip hauk yung: kah veng Timanax heue."
Nawh peeik kraung ceep miexmai: mai kheem: tix kah man: tawb ngai:, mai lhop kah tokaux tix, mai nawh ngawm plak krax laig kah veng Timanax; kheu hoik yaox nawh ting Shelax, mai nawh ang nyang bax yaox tix mawh moeng Shelax heue.
Yam yaox Yudax kah nawh, Yudax keud nawh mawh bun: coh kaux, kheu kheem: nawh pakngai: tix heue.
Khaix an: nawh hu: kah nawh praok krax tan: mai ah nin:, "Kieh aux hoek kah maix," mawh kheu ang Yudax tawng mawh nawh mun tix heue. Mai bun: an: ah nin:, "Phan: maix sang hoek kah aux, sang tawx maix, patix kah aux lie?"
Mai Yudax ah nin:, "Aux tag tawx kawn: pex kah maix tix mu: khaing: khawng: brie aux heue." Nawh baox ah nin:, "Sivoe ang maix nyang bax tawx ceu an:, pon tawx maix aux priex kraung sakse tix ceuceu lie?"
Nawh ah nin:, "Sang kieh maix aux tawx kraung sakse ceu pa yuh kah mawx kah tix lie?" Nawh deeh pawk lox ah nin:, "Tang maix deuh cum: tix, maox rawd nyoi tix, mai khaoxgix tix, khankix pa koe: daux tawm: taix maix heue." Mawh kheu nan: nawh tawx ceu ankix kah nawh, mai hu: it tau mai nawh, bun: an: koe: kaux heue.
Khaix an: bun: an: kaoh hu:, mai peeik man: tawb ngai: tix mai deeh ceep kah kraung ceep miexmai: heue.
Sonsang deeh teei Yudax kraung pa hoik tang tix kah bun: an:, nawh ploi: paoxgrawm tix, ceu pwi Adulan hu: tawx kawn: pex kah nawh, viang mawh nan:, nawh ang yaox kah bun: an: heue.
Mai nawh chawk kah pwi pa ot baoh an: mai ah nin:, "Bun: pa coh kaux an:, pa yie ot praok krax tin:, ot dee mawx?" Mai kix deeh ah nin:, "Bun: pa coh kaux ang koe: tin: tix kaux kawx heue."
Mai nawh deeh ing: kah Yudax mai ah nin:, "Ang aux yaox nawh, pwi pa koe: baoh an: kawx, krai kah ang bun: coh kaux koe: tan: heue."
Mai Yudax ah nin:, aux hoik tawx kawn: pex in:, mai maix ang tie yaox kah nawh, kieh nawh teei tix cie kraungkhrai: an: khankix mawh kheu lhat ex tix kaig tua kah jao an: heue.
Khaix hoik luan loe: khix, kix krai Yudax mhong: mai ah nin:, "Mun maix Tama, hoik yuh bun: coh kaux; lheu: khaing: an: nawh hoik koe: kaux kheu sipiag yuh tix bun: coh kaux." Mai Yudax ah nin:, viex nawh lih kah praix, mai gleeing nawh heue."
Yam viex kix Tama lih kah praix, nawh tawm: lox mai sipaox kraung kah paox tix, ah nin:, "Kraung in: mawh cie pwi mawx? aux hoik koe: kaux mai nawh heue." mai nawh baox ah nin:, "Yuh bwanson: jhi: aux yaox, cao: kraung inkix, pa mawh cum:, mai maox rawd nyoi mai khaox grix heue."
Khaix an: Yudax tawng kraung an: mawh cie tix mai ah nin:, "Nawh hoik nie rah see khaing: aux, kheu ang aux tawx kawn: simex tix Shelax kah nawh." Mai Yudax ang lai dex mai nawh khaix an: heue.
Khaix an: yam hoek bawg yam sang keh Tama, jhak heue, kawn: brawm: koe: daux vaig nawh heue.
Yam keh nawh, an: tix kaux plih taix tix lih kah praix, mai bun: cao: pa priex keh nawh teei keei: raoh tix nyaing mai phyawk kah taix nawh, mai ah nin:, "In: mawh pa sang keh sivoe heue."
Viang mawh nan:, kawn: an: deeh leed taix tix laig, mai puxke: nawh deeh tieh tix lih sivoe, mai bun: cao: pa priex keh an: ah nin:, "Yuh kah mawx maix lai sigrhang: tix lih? Kieh see: in:, hoek kah piang maix!" Mawh kheu nan: kix kok ceukaux nawh mawh Pharet (Dee bleeh Pharet mawh pwi pa preeng: tix lih heue).
Khaix an:, pux nawh pa phyawk keei: raoh kah taix lih keh, mai kix kok ceukaux nawh mawh Zerax heue.
Grawng: Mawh Yosiep Siliex Daux Meung Ejiptux
Pwi Ishamelax viex Yosiep hu: kah meung Ejiptux, mai coh nawh kah Pawtiphax pa mawh cao: kaing: naing tix kaux, greem: Khunhawkham Pharaw cao: pau ju nawh heue.
Simiang Siyiex ot tau mai Yosiep, mai kaing jhaw: pa yuh nawh haok hwan: ting lhaong:, mai nawh yaox tix ot daux nyiiex cao: simiang tix, ceu pwi Ejiptux heue.
Cao: simiang nawh hoik yaox kah ot Simiang Siyiex tau mai nawh, Simiang Siyiex kieh can pa yuh nawh khankix haok hwan: ting lhaong:, daux tawm: taix nawh heue.
Mawh kheu nan:, Yosiep mawh pa khaw: pa caw rhawm: sivoe cao: simiang tix, mai kaing yuh nawh son cao: simiang tix kawx, mawh pa khaw: pa caw uik, mai kieh Yosiep mawh pa kia: pa ngien kah nyiiex ma: tix, mai nawh ap can ceu pa koe: tix khawm uik kah daux tawm: taix Yosiep heue.
Jah bawg yam kieh nawh Yosiep mawh cao: kwang: piang nyiiex ma: mai kraungkhrai: tix khankix, Simiang Siyiex nawb bwan: kah piang nyiiex pwi Ejiptux an:, kheu jao Yosiep; bwanson: Simiang Siyiex lih koe: piang kraung daux nyiiex daux ma: nawh, mai can pa koe: daux kaung: nawh heue.
Mai nawh ap can ceu pa koe: tix khawm uik daux tawm: taix Yosiep, lheu: Khaing: khaomun, pa sang ih nawh, nawh ang lai yuh tix tawng kah kraungkhrai: pa koe: tix khankix ceeix kawx. Yosiep kied mhawm: grang mai pakpeung: kaux hak nawh kawx jiet nyawm tix yaox heue.
Mawh kheu nan: moeng cao: simiang nawh, ghoing: rhawm: kah Yosiep mai ah nin:, "It tau mai aux heue."
Viang mawh nan: Yosiep thiang: mai ah nin: kah moeng cao: simiang tix, "Jhak heue, cao: simiang aux ang yuh tix tawng kah can pa koe: daux nyiiex tau mai aux, mai nawh hoik ap kuceu daux tawm: taix aux heue."
"Pwi lheu: ting khaing: aux daux nyiiex in: ang koe: tix kaux kawx; lheu: khaing: maix pa ang nawh ap kah aux ang koe: tix ceu kawx, mawh kheu mawh maix moeng cao: simiang aux, aux lai sang pon yuh pa caox pa caig ting ceu in: mai phit lud kah Siyiex yuh kah mawh?"
Nawh nyaw glaw: kah Yosiep tix ngaix hoik tix ngaix, Yosiep ang cu nghiiet kah lox kiex, mai ang it ang ot tau mai kiex heue.
Daux tix ngaix Yosiep laig kah daux nyiiex, sonsang yuh kaing jhaw: tix yam ang pwi ot kah daux nyiiex tix kaux kawx,
nawh giex Yosiep mai bluh kah sibex ceep nawh mai ah nin:, "It tau mai aux heue." Viang mawh nan: Yosiep prah sibex tix daux taix nawh, mai to: tix lih kah praix heue.
Yam yaox nawh prah Yosiep sibex tix kah daux taix nawh, mai lih to: kah praix,
Nawh kok yo kah pwi pa ot kah daux nyiiex mai krai kah grawng: in:, mai nawh ah nin: kah kix, "Jhak heue, cao: simiang aux viex pwi Hebrie in: hoek yuh pa ang khaw: ang jiet kah ex, nawh hoek sonsang laig it tix mai aux, aux tom: riag sau: riang riag yo jao an: heue."
"Mai yam hoik mhong: nawh sau: aux riang tix riag yo, nawh prah sibex tix kah aux mai to: tix hu: kah praix heue."
Mawh kheu nan: nawh priex sibex Yosiep kah tix, tom: deeh hoek cao: simiang tix daux nyiiex heue.
Khaix an: nawh krai lox awm: pa hoik krai tix ah nin:, "Kawncau Hebrie pa viex maix hoek kah ex laig dee ot aux sonsang yuh pa ang khaw: ang jiet kah aux;
mawh kheu nan: aux riag yo lox tix, mai nawh prah sibex tix mai aux, mai to: kah plak praix heue."
Yam hoik mhong: cao: simiang kah lox krai moeng tix pa ah nin:, "Kawncau maix hoik yuh nin: kah aux," mai nawh kied songrhawm: heue.
mai cao: simiang Yosiep teei mai sau: nawh laig daux thawng:, dee priex kix pwi pa laig thawng: khunhawkham, mai Yosiep ot daux thawng: tan: heue.
Viang mawh kawx nan:, Simiang Siyiex ot tau mai Yosiep mai jhi: nawh yaox krax moh pa caoxrhawm: Tix, Nawh Cao: kieh nawh mawh pa khaw: rhawm: kah sivoe ngai: cao: kaing: thawng: heue.
Can pwi pa ot daux thawng: mai kaing khawm uik cao: kaing: thawng: hoik ap daux tawm: taix Yosiep heue.
Cao: kaing: thawng: ang lai simi tix jhak kah can ceu pa koe: greem: tawm: taix Yosiep tix ceu kawx, mawh kheu Simiang Siyiex ot tau mai nawh, can ceu pa yuh nawh kuceu, Simiang Siyiex kieh haok hwan: heue.
Grawng: Camaox Pwi Pa Ot Daux Thawng:
Khaix an: cao: kaing: tawx kawk nyaux khunhawkham mai cao: kaing: tawx priex ih khunhawkham, phit lud kah khunhawkham tix meung Ejiptux heue.
Mai khunhawkham Pharaw songrhawm: kah cao: kaing: ra: kaux, pa mawh cao: kaing: tawx kawk nyaux mai cao: kaing: tawx priex ih nawh,
mai nawh sau: kiex daux thawng:, kah daux nyiiex cao: kaing: pa pau thawng: an: tau mai dee laung kix Yosiep tan: heue.
Cao: giex kaing: lien: pa pau khunhawkham, ap kiex kah Yosiep, mai kieh priex kiex, mai kiex yaox tix ot tan: tom: kub rheung: heue.
Khaix an: cao: kaing: tawx kawk nyaux mai cao: kaing: tawx priex ih khunhawkham meung Ejiptux, pa hoik laung kix daux thawng: khawm ra: kiex, kiex tang: camaox pa koe: dee bleeh son kaux mawx kaux an: daux tix sawm: tau heue.
Mai Yosiep hoek kah kix plak ponngawb mai jhak kah kix, mai yaox voi rhawm: kiex khawm ra: heue.
Mawh kheu nan:, nawh chawk cao: kaing: an: kiex, pa ot greem: Pharaw pa hoik laung kix tau mai nawh daux nyiiex cao: simiang kix mai ah nin:, "Daux singaix pax lai lauxrhawm: jao patix?"
Mai kiex ah nin: kah nawh, "Yiex camaox tix kaux tix ceu mai pwi pa sang krai yiex mhong: dee bleeh ang koe: tix kaux kawx." Mai Yosiep ah nin: kah kiex, "Grawng: pa krai dee bleeh camaox mawh pa dex pa dawd mai Siyiex ang mawh lie? pax krai aux mhong:."
Khaix an: cao: kaing: tawx kawk nyaux, krai camaox tix kah Yosiep mai ah nin: kah nawh, "Kah daux camaox aux koe:, nhu: plix siiet tix nhu: sivoe aux,
"Mai nhu: plix siiet an:, koe: kak loe: kak, kah piang kak an:, koe: kho: pa sang dex pruh kah, mai lih pruh, kak plix nawh hoik si gleem: plix, mai jiet mhawm: teem heue.
Kawk nyaux Pharaw koe: daux taix aux, mai aux teei plix siiet an:, biiet daux kawk nyaux Pharaw, mai ap kawk an: daux taix Pharaw heue."
Mai Yosiep ah nin: kah nawh, "Dee bleeh kak loe: kak an: mawh loe: singaix,
"Khaix in: loe: singaix, Pharaw deeh yaog kaing maix mai deeh tawx dee ot maix, maix tag deeh yaox tix tawx kawk nyaux Pharaw kah daux taix nawh, awm: pa hoik yaox maix tix yuh glang: kah: in:, yam mawh maix cao: tawx kawk nyaux nawh heue.
"Doh keud kah aux, yam yaox maix krax gauxrhawm:, mai jhi: krax caoxrhawm: maix kah aux, krai grawng: aux kah Pharaw, sonsang yaox aux tix lih khaing: nyiiex thawng: in: heue.
"Mawh kheu mawh aux pwi pa briex kix khaing: ceu pwi Hebrie tete, aux ang tie koe: dee phit, daux haktiex in:, mai kix sau: aux daux thawng: heue."
Yam yaox cao: kaing: tawx priex ih khunhawkham mhawm: lox dee bleeh camaox an:, nawh ah nin: kah Yosiep, "Aux kawx camaox tix cah khrawng: khaomun loe: mu: kah piang kaing: tix,
kah daux khrawng: pa koe: kah piang paox tix, koe: priex ih kuceu son pharaw, sim: khankix hoek mai tut tix ih, pa koe: daux khrawng: cah aux piang kaing: tix heue."
Mai Yosiep ah nin:, "Dee bleeh camaox in: mawh nin:, khrawng: loe: mu: mawh loe: singaix;
"Khaix in: loe: singaix, Pharaw tag tat kaing: maix, mai takteue: maix kah piang khaox, sim: khankix tag tut tix ih nex maix khaing: maix heue."
Khaix luan daux loe: singaix, mawh singaix keh Pharaw, nawh yuh pwie singaix keh tix, mai kok kawncau tix kukaux, mai nawh deeh teei cao: kaing: tawx kawk nyaux, mai cao: kaing: tawx priex ih lih khaing: daux thawng: heue.
Nawh deeh taoh ju cao: kaing: tawx kawk nyaux nawh, mai deeh kieh nawh yuh cao: kaing: tawx kawk nyaux, nawh deeh yaox tix mawh cao: tawx kawk nyaux daux taix Pharaw;
mai nawh tag teue: cao: kaing: tawx priex ih, awm: pa khaw: mai lox krai Yosiep kah kiex heue.
Viang mawh nan:, cao: kaing: tawx kawk nyaux ang lai doh keud kah Yosiep, mai hoik piawm: kah nawh heue.
Grawng: Camaox Pharaw
Khaix hoik luan ra: num, Pharaw camaox tix ceu, mai nawh cung hawt klawng: Nilax heue.
Mai moi miex pa mhawm: plang: pa kluing: aliah mu: lih khaing: daux rawm: klawng: Nilax, mai kix sawm: rib pa kuah hawt klawng: tan: heue.
Jhak heue, moi miex pa ang mhawm: grang pa krawx rhao: aliah mu:, baox lih khaing: rawm: klawng: Nilax, mai cung hawt praok moi miex lih sivoe aliah mu: kah praok rawm: klawng: Nilax heue.
Moi miex pa ang mhawm: grang pa krawx pa rhao: aliah mu: khankix, bleet kah moi miex pa mhawm: plang: pa kluing: an: aliah mu:. Mai Pharaw kawx siduad khaing: it tix heue.
Nawh baox lhiak it, mai baox camaox ra: bawg ti bawg, sigleem: nghox pa ting mu: jiet mhawm: sok aliah sigleem: lih khaing: num: nghox tix pang: heue.
Mai jhak heue, sigleem: nghox pa ghrip aliah mu:, pa laux jao bhaung: lih khaing: plak lih singaix, deeh kuah sijaox khaix kix heue.
Mai sigleem: nghox pa ghrip aliah mu: an:, bleet sigleem: nghox pa ting mu: pa jiet mhawm: sok an:, mai Pharaw siduad, nawh tawng mawh camaox tix heue.
Yam hoek ponngawb, nawh kied koe: krax khirhawm: khirhi:, nawh ploi: pwi kok kah cao: sibawk mai pwi koe: pingnya khankix pa ot kah daux meung Ejiptux, Pharaw krai kix mhong: grawng: camaox tix, viang mawh nan: ang koe: pwi pa pon krai dee bleeh caomaox Pharaw tix kaux kawx heue.
Khaix an: cao: kaing: tawx kawk nyaux ah nin: kah Pharaw, "Aux doh keud kah pa lud tix singaix heue.
"Yam songrhawm: Pharaw kah kawncau tix khankix, maix sau: aux daux thawng: tau mai cao: kaing: tawx priex ih, kah daux nyiiex cao: kaing: naing pau ju khunhawkham,
"Yiex ra: kaux tang: camaox daux tix sawm:, mai yiex khawm ra: camaox grawng: pa koe: dee bleeh cie mawx cie an: heue.
"Pwi Hebrie pa awn: ju tix kaux, pa mawh kawncau kah cao: kaing: pau ju khunhawkham ot tau mai yiex tan:, yam krai yiex camaox tix kah nawh, mai nawh toe: dee bleeh camaox yiex kaux mawx kaux an:, awm: pa hoik camaox yiex heue.
"Awm: pa hoik toe: nawh dee bleeh son yiex hoik lih tix mawh awm: an:, maix deeh tawx beeh glawm: cao: kaing: tawx kawk nyaux kah aux, mai kah kaw an: maix takteue: kah nawh kieh nawh yum: heue.
Khaix an: Pharaw ploi: pwi hu: kok kah Yosiep, mai kix nied tix teei nawh lih khaing: daux thawng:, nawh khlao: hauk jheeh tix mai loh kraung ceep tix hoek kah Pharaw heue.
Mai Pharaw ah nin: kah Yosiep, "Aux hoik camaox tix ceu, mai pwi pa pon toe: dee bleeh ang koe: tix kaux kawx, mai aux hoik mhong: krai kix grawng: chix toe: maix dee bleeh camaox heue."
Yosiep pawk lox Pharaw mai ah nin:, "Ang mawh aux pa tang: pon krai, Siyiex tag pawk kah dee bleeh camaox maix heue."
Khaix an: Pharaw ah nin: kah Yosiep, "Jhak heue, kah daux pa camaox aux, aux cung kah praok rawm: klawng: Nilax heue."
"Moi miex pa mhawm: plang: pa kluing: aliah mu: lih dom: mawx dom: an:, khaing: daux rawm: klawng: Nilax, mai kix sawm: rib tan: heue."
"Mai moi miex pa ang mhawm: grang pa krawx pa rhao: tang: mu: aliah mu: lih hoek khaix kix, aux ang sax yaox pa awm: an: daux haktiex Ejiptux tix bawg kawx heue.
Mai moi miex pa ang mhawm: grang pa krawx pa rhao: an: ih kah moi miex pa kluing: pa lih sivoe aliah mu:,
khaix ih kix kah moi miex an:, pwi tix kaux kawx, ang tawng kah hoik ih kix kah moi an:, mawh kheu kawn: ca: krawx rhao: moi ankix awm: phao voe heue. Khaix an: aux siduad kah heue.
"Aux baox deeh yaox kah daux camaox tix yuh nin:, "Sigleem: nghox aliah mu: pa jiet mhawm: sok aliah sigleem:, lih khaing: num: nghox tipang:,
mai sigleem: nghox pakroh pavhit aliah sigleem: pa laux kah bhaung: pa hoek plak lih singaix, kuah sijaox khaix kix heue.
Mai sigleem: nghox pakroh pa fit an:, bleet kah sigleem: nghox pa mhawm: an: aliah sigleem: an: heue. Mai aux krai ceu in: kah cao: sibawk khankix, viang mawh nan:, ang koe: pwi toe: aux mhong: dee bleeh tix kaux kawx heue."
Khaix an: Yosiep ah nin: kah Pharaw, "Grawng: camaox Pharaw mawh ngie tix ceu khaing:, Siyiex hoik jhi: Pharaw yaox kah grawng: pa sang yuh Nawh Cao: heue."
Moi miex aliah mu:, mawh aliah num, mai sigleem: nghox pa mhawm: kawx, mawh aliah num, mai camaox in: mawh tix ceu khaing: heue."
Moi miex pa krawx pa rhao:, pa ang mhawm: grang pa lih hoek khaix kix, mawh aliah num, sigleem: nghox pa ang koe: tidtix aliah sigleem:, pa hoik laux kah bhaung: pa kaoh khaing: plak lih singaix an:, mawh sibhawm: praix aliah num heue."
"Grawng: ceu pa krai aux kah Pharaw in:, mawh pa jhi: Siyiex Pharaw yaox pa sang yuh Nawh Cao: heue.
"Tag koe: pa ih pa un: tom: haoh tom: lheu: daux haktiex Ejiptux aliah num,
khaix hoik an: aliah num, sibhawm: praix tag baox hoek aliah num, tom: hoik piawm: kix kah pa haoh pa lheu: tix kah daux haktiex Ejiptux, mai sibhawm: praix tag kieh haktiex khawm uik lauxleeing: heue.
"Mawh kheu pa lang: teung: sibhawm: praix an:, pwi khankix hoik piawm: kah pa haoh pa lheu: kix kah glang: kah: an: heue.
Grawng: deeh baox Pharaw tix camaox ra: bawg in:, mawh pa hoik tat Siyiex tix deuh, mai Siyiex tag sang khran: kieh ceu in: lih tix mawh heue.
"Mawh kheu nan: yamin:, kieh Pharaw laug pwi pa naog mai krax tawng mai pwi pa koe: pingnya, mai kieh nawh kwang: kah piang haktiex Ejiptux heue.
Kieh Pharaw yuh ceu in: mai kieh deuh cao: kaing: khankix, pa sang kwang: kah piang haktiex khawm uik, mai kieh kix khrawm: gaox, nghox phwan: son tix son, pa lih khaing: meung Ejiptux, yam kawn: nie nghox daux aliah num heue."
Mai kieh kix khrawm: pa ih pa un: kah daux num pa mhawm: pa hoek an:, mai rhawm: tix deuh nghox koi: khankix greem: siawpsibrawm Pharaw, mai kieh kix rhawm: pa ih pa un: kah daux veng khankix heue.
Pa ih pa un: pa rien tix deuh in:, mawh son bawg yam sibhawm: praix aliah num, pa sang lih tix hoek daux haktiex Ejiptux, sonsang ang pwi haktiex yaox krax lauxleeing: glang: yam sibhawm: praix heue
Grawng: Pa Pon Yosiep Siawpsibrawm
Pharaw mai kawncau nawh khankix khaw: rhawm: kah lox pa krai Yosiep heue.
Mai Pharaw ah nin: kah kawnceu tix khankix, "Mawh sang pon yaox ex kah pwi pa ot khwan: Siyiex kah daux nawh awm: pwi in: dee mawx lie?"
mawh kheu nan: Pharaw ah nin: kah Yosiep, "Mawh kheu Siyiex hoik jhi: maix yaox grawng: in: khawm uik, pwi pa koe: rhawm: keud pa mhawm: mai pwi koe: pingnya awm: maix ang lai koe: tix kaux kawx,
"Maix tag kwang: kah piang nyiiex haw: aux, mai pwi haktiex aux khawm uik, tag yuh awm: gumlox pa tawm: maix khankix; mawh ngie ting aux khaing: maix, kah piang dang: ngeung tix heue."
Mai Pharaw ah nin: kah Yosiep, "Jhak heue, aux hoik yaog maix kwang: kah piang haktiex Ejiptux khawm uik heue."
Khaix an: Pharaw peeik jeep gien: khaing: taix tix mai ceep kah taix Yosiep, mai ceep sibex man: pa mhawm: kah piang nawh, mai maox khri: kah ngawg nawh heue.
Mai kieh nawh brug ling: lawx brung ra: mu: ti mu: cie tix; Pwi khankix kok yo lox sinum sivoe nawh, "Grux ngawng kah nawh!" mawh kheu nan:, Pharaw yaog nawh kwang: kah piang haktiex Ejiptux khawm uik heue.
Pharaw ah nin: kah Yosiep, "Aux mawh khunhawkham Pharaw, lheu: khaing: pa khaw: rhawm: maix, 1pwi tix kaux kawx ang pon yaog taix caong tix kah daux haktiex Ejiptux heue."
Mai Pharaw kok ceukaux Yosiep mawh Zaphanatapanax, mai nawh tawx Yosiep moeng Asanax kawn: bun: cao: giex kaing: li Pawtipherax pwi veng Awnax heue. Yosiep lih hu: kah daux pa kwang: tix haktiex Ejiptux kudauh kudee heue.
Yosiep hoik koe: ju tix ngoe: num, yam yaox nawh tix cung sivoe Pharaw khunhawkham Ejiptux. Mai Yosiep lih hu: khaing: sivoe plak ngai: nawh, kah daux haktiex Ejiptux kudauh heue.
Bawg yam koe: ceu pa haoh pa lheu: aliah num, haktiex lih tix koe: plix tom: haoh hun: heue.
Nawh khrawm: pa ih pa un: khaing: haktiex Ejiptux, daux aliah num, mai priex tix deuh daux veng; pa ih pa un: lih khaing: daux kaung: pa koe: rawb rim veng, tang: kieh khrawm:, veng mawx veng an: heue.
Yosiep khrawm: nghox koi:, haoh hun: awm: mhaik praok rawm: sigrit sigra:, tom: ang nawh lai uik simin kheu hoik haoh hun: heue.
Sivoe ang num sibhawm: praix nyang hoek, Yosiep pon kawn: simex ra: kaux khaing: Asanax pa mawh kawn: bun: cao: giex kaing: li Pawtipherax veng Awnax heue.
Yosiep kok ceukaux kawn: simex tix mawh Manashe, mawh kheu Siyiex hoik kieh aux piawm: krax taug krax mao mai kawn: nyiiex kawn: ma: nyiiex keeing: tix heue.
Mai nawh kok ceukaux kawn: simex ra: kaux tix kaux mawh Epharen, mawh kheu Siyiex hoik kieh aux haoh hun: kah daux haktiex pa kha: aux rhawm: tix heue.
Mai num pa haoh pa lheu: pa ih pa un: aliah num daux haktiex Ejiptux hoik sidauh;
Mai num sibhawm praix aliah num hoik jah tix hoek, awm: pa hoik krai Yosiep. Mai sibhawm: praix lih koe: kah daux haktiex kudauh; viang mawh nan:, daux haktiex Ejiptux koe: pa ih pa un: heue.
Yam sibhawm: praix daux haktiex Ejiptux, pwi khankix riag yo kah Pharaw, son pa ih pa un:; mai Pharaw ah nin: kah pwi Ejiptux khankix, "Hu: kah Yosiep awm: pa krai nawh kah pex heue."
Sibhawm: praix lih koe: kah piang haktiex khawm uik, Yosiep paoh nyiiex krao: khankix, mai coh cai: nghox kah pwi Ejiptux, mai sibhawm: praix, nied tix nie kin: daux haktiex Ejiptux heue.
Kheu kied kin: sibhawm: praix kah meung tang: dauh khankix, pwi haktiex khankix hoek tix siai: liag nghox kah Yosiep kah haktiex Ejiptux heue.
Puxaik Yosiep Khankix Hu: Kah Meung Ejiptux
Yam mhong: Yakop koe: nghox daux Ejiptux, Yakop ah nin: kah can kawn: simex tix, "Yuh kah mawx pex lai jhak kah paox tix, tix kaux lai tix kaux?"
Mawh kheu nan:, "Aux hoik mhong: koe: nghox daux meung Ejiptux tete heue. Hu: kah dee an:, mai siai: liag tix viex son ex tan:, sonsang im: ju ex mai ang yaox tix yum: kah heue."
Puxke: Yosiep kao: kaux hu: meung Ejiptux sonsang siai: liag nghox heue.
Yakop ang kieh Binyamin pux Yosiep hu: mai puxke: nawh khankix, kheu lhat nawh ceu pa kharhawm: hoek kah piang nawh heue.
Kawn: simex Isarilax khankix, hu: siai: liag nghox tau mai pwi hoek siai: liag nghox, mawh kheu sibhawm: praix hoik lih kah daux haktiex Khanan heue.
Yosiep mawh cao: kwang: kah haktiex; mai nawh mawh cao: coh nghox kah pwi haktiex. Puxke: Yosiep khankix hoek, mai gup ngai: tix piang tiex sivoe ngai: nawh heue.
Yosiep yaox kah puxaik tix khankix, mai tawng kah kix, viang mawh nan: nawh yuh tix ang tawng, mai briah kah kix ah nin:, "Kaoh pex khaing: dee mawx?" mai kix ah nin:, "Yix kaoh khaing: haktiex Khanan, sonsang siai: liag pa ih pa un:."\v 8 Viang Yosiep tawng kah puxke: nawh khankix kawx, kix ang lai tawng kah nawh heue.
Yosiep doh keud kah camaox tix, pa hoik camaox nawh grawng: kix, mai ah nin: kah kix, "Pex mawh pwi hoek tix jiang kah ceu pa iak riang yix, daux haktiex in: heue."
Kix ah nin: kah nawh, "Simiang eue, ang doh mawh nan:, yix mawh kawncau maix pa hoek siai: liag pa ih pa un: khaing:."
"Yix mawh kawn: keeing: tix kaux khaing:, yix mawh pwi rah see, kawncau maix inkix, ang lai mawh pwi jiang."
Nawh ah nin: kah kix, "Ang mawh, pex hoek tix jhak ceu pa iak riang daux haktiex in:."
Mai kix ah nin:, "Kawncau maix, koe: puxaik kao: ra: kaux, mai mawh kawn: keeing: tix kaux khaing: daux haktiex Khanan; pux ghoik ot mai keeing: yix tom: yamin:, mai an: tix kaux ang lai koe: heue."
Yosiep baox ah nin: kah kix, "Hoik mawh awm: pa ah aux kah pex, pex mawh pwi jiang.
"Tag yaox tix cheukcheu: kah pex, phan: pex ang viex pux ghoik tix hoek, awm: im: ju Pharaw, pex tag ang lai yaox tix lih khaing: tin: heue."
"Ploi: pwi tix kaux daux pex ing:, mai kieh viex pux pex hoek, pex pa kawn deuk, tag sau: daux thawng:, awm: im: ju Pharaw, lox krai pex, mawh ang mawh, tag cheuk tix yaox kah, pex rug mawh pwi jiang heue."
Mai nawh sau: kix daux thawng: loe: singaix heue.
Khaix hoik naog loe: singaix, Yosiep ah nin: kah kix, "Yuh awm: in: sonsang im: ju pex, kheu mawh aux pwi lhat graung kah Siyiex;
"Phan: pex mawh pwi rah see, kieh puxaik daux pex tix kauxkaux ot daux thawng:, kieh pwi deuk khankix viex nghox ing: kah nyiiex pex, dee sibhawm: praix,
Mai viex pux ghoik pex hoek kah aux, sonsang tawng ex rug mawh lox pex pa mawh pa meh, mai pex tag ang yaox tix yum:, mai kix yuh awm: an: heue.
Khaix an: kix ah nin: kah paox tix, "Ex hoik phit kah pux tix tete, grawhgrawng: nawh, ex hoik yaox krax kha: nawh rhawm: tix, mai yam khyox khaw: nawh kah ex, ex ang nghiiet; mawh kheu nan:, krax pa kharhawm: in: hoik hoek kah piang ex phao: heue."
Rubin deeh ah nin: kah kix, "Aux hoik krai kah pex paw yuh phimap pa phit kah kawn: nyawm in:, ang mawh lie? mai pex ang nghiiet kah aux, mawh kheu nan:, krax ciyang son nham: nawh hoik hoek piang ex phao: heue.
Kix ang tawng, Yosiep hoik tawng kah pa krai tix, mawh kheu sikah Yosiep mai kix, kah pwi pa toe: lox heue.
Nawh veeh hu: khaing: kix tivud mai yiiem, mai nawh deeh hoek sikah mai kix, mai nawh teei Simion khaing: kix, mai phyawk nawh sivoe ngai: kix heue.
Grawng: Deeh Ing: Puxaik Yosiep Meung Khanan
Mai Yosiep tawx lox mai kieh kix sau: nghox naog daux chee:, mai deeh sau: mau cie mawx cie an:, daux chee: kix, mai kieh tawx pa ih pa un: kix son daux krax, mai kix yuh awm: an: heue.
Khaix an: kix tang: nghox kah piang la, mai lih hu: heue.
Mai kah daux kix tix kaux, paoh chee: cie tix, sonsang tawx la sawm:, dee bang: kix, nawh deeh yaox mau cao: tix, kah daux moing chee:;
mai nawh ah nin: kah puxaik tix khankix, jhak pex yaox mau aux hoik deeh sau: tix daux moing chee: aux!" Mai kix siyaoh lhat graung kah, kix ah nin: kah paox tix, tix kaux lai tix kaux, "Pa yuh Siyiex kah piang ex in:, mawh pa yuh kah mawx lie?"
yam bleeh kix kah keeing: tix Yakop, daux haktiex Khanan, kix krai nawh mhong: grawng: pa hoik lih mawh kah kix ah nin:,
"Pwi pa mawh simiang daux haktiex an:, briah kah yix, mai ah yix mawh pwi hoek jiang kah haktiex.
"Mai yix ah nin: kah nawh,Yix mawh pwi rah see, yix ang lai mawh pwi jiang;
"Yix mawh puxaik kao: ra: kaux, pa mawh keeing: tix kaux khaing:, an: tix kaux ang lai koe:, mai pux ghoik yix ot mai keeing: yix, tom: yamin: daux haktiex Khanan heue
Kaw an: pa mawh simiang kah haktiex an:, ah nin: kah yix, "Sonsang tawng aux mawh pex pwi rah see, prah pwi tix kaux, daux puxaik pex kah aux, mai teei pa ih pa un: son nyiiex ma: pex pa yaox kah sibhawm: praix mai lih hu: heue.
"Viex pux ghoik pex hoek kah aux, sonsang tawng aux ang pex mawh pwi jiang mai tawng pex mawh pwi rah see, aux tag deeh ap kah puxaik pex, mai pex tag yaox tix yuh lai geu daux haktiex in: heue"
Yam thawk kix chee: tix, kix daox deng: kah deeh yaox kah gie mau cie mawx cie an: daux chee: tix; yam yaox kix mai keeing: kix gie mau an:, kix yaoh kah heue.
Mai keeing: kix Yakop ah nin: kah kix, "Pex hoik rhim: tix teei kawn: aux khankix khaing: aux; Yosiep kawx ang lai koe:, mai Simion kawx ang lai koe:, yamin: pex kawn: sang deeh viex Binyamin; ceu in: hoik mawh pa tug kah aux heue."
Khaix an: Rubin deeh krai ah nin: kah keeing: tix, phan: aux ang lai deeh viex Binyamin hoek kah maix; pah kah kawn: simex aux khawm ra: kaux, ap nawh daux taix aux, mai aux tag deeh viex nawh hoek kah maix heue.
Yakop ah nin:, "Ang aux doh tawx kawn: simex tix hu: tau mai pex, kheu: hoik yum: puxke: nawh, mai kawn: deuk nawh nongnong:. Phan: pa caox lih tix mawh kah nawh, daux krax hu: pex, pex tag viex hauk kaing: paing aux laig daux simeeig tau mai krax lauxrhawm: heue."
Grawng: Deeh Ing: Kix Kah Ejiptux Tau Mai Binyamin
Sibhawm: praix, kied nie kin: daux haktiex Khanan heue.
Mai khaix hoik uik ih kix nghox pa viex tix khaing: Ejiptux, keeing: kix ah nin: kah kix, "Deeh hu: siai: mai liag priex son ex ceeix heue."
Yam an: Yudax ah nin: kah nawh, "Pwi an: hoik tawx satix mai hoik ah lox kin: kah yix yuh nin:, phan: pex ang viex pux tix hoek, pex tag ang pon tix yaox kah ngai: aux heue."
Phan: maix ploi: pux yix hu: mai yix, yix tag hu: siai: mai liag pa ih pa un:;
"Viang mawh nan: phan: maix ang ploi: nawh hu:, yix tag ang lai hu:, mawh kheu hoik ah pwi an: kah yix yuh nin:,Phan: pex ang viex pux tix hoek, pex tag ang pon tix yaox ngai: aux heue"
Mai Isarilax ah nin:, "Mawh kheu tix pex lai krai pwi an: mhong: kah kawn: koe: pux tix, mai yuh krax kharhawm: kah aux yuh kah mawx?"
Kix ah nin:, "Pwi an:, chawk grawng: yix mai grawng: doeh simie ceucat yix kriiem kre, nawh ah nin:,Kawn: im: ju keeing: pex lie? koe: pux tang: kaux pex lie?" Mai yix deeh krai nawh mhong: awm: pa chawk nawh, mawx sang tawng ah nawh, "Viex pux pex hoek yuh kah mawx?"
Mai Yudax ah nin: kah keeing: tix Isarilax, "Ploi: kawn: nyawm tau mai yix, mai yix sang yaog tix hu:, sonsang im: ju ex mai ang yum:, ex kukaux khawm maix mai kawn: nyawm iak khankix heue.
"Aux lawk mawh cao: kham: nawh, maix tag deeh mhaing: nawh khaing: daux taix aux, phan: aux ang pon viex nawh hoek mai deuh sivoe ngai: maix, kieh aux klawm: phimap an: leeing ju heue."
"Phan: yix ang rheung: yuh nin: yamin:, yix tee: hoik hoek ra: bawg heue."
Keeing: kix Isarilax ah nin: kah kix, "Phan: mawh nan:, yuh nin:, teei pex viex plix khaox pa mhawm: khaing: daux haktiex in: daux bau: pex, mai tawx khawngphak kah pwi an:, viex sidauh peeh khaox ceeix, rawm: hia: ceeix, nyawng bhawng:, mai sidauh muran, plix khaox pa awm: sok kram jung mai plix khaox pa awm: sok ceem tiex heue.
Teei pex viex mau ra: son daux taix tix, mai mau pa yaox pex kah daux moing chee: kawx deeh viex hu:; bawg blah ha: mawh kix pa pi nieh.
"Viex pux pex mai deeh kaoh hu: kah pwi an:, phan: aux yaox tix som kawn: tix aux tag lai kham: kah heue.
Kieh Siyiex pa ting siawpsibrawm tawx krax caoxrhawm: kah pex sivoe pwi an:, sonsang deeh ploi: nawh puxke: pex mai Binyamin heue."
Mawh kheu nan: kix teei khawngphak mai mau ra: son daux taix tix, khawm Binyamin lih hu: kah meung Ejiptux, mai cung sivoe Yosiep heue.
Yam yaox Yosiep kah Binyamin tau mai kix, nawh ah nin: kah pwi cau tix daux nyiiex, "Viex pwi inkix laig kah daux nyiiex, mai pah khawng: brie yuh priex preem, mawh kheu pwi inkix, sang ih priex ngaix tau mai aux heue."
Pwi ankix yuh awm: pa krai Yosiep, mai viex kix hu: nyiiex Yosiep heue.
Kix kied koe: krax lhat graung, mawh kheu kok nawh kix hoek kah nyiiex Yosiep, mai ah nin:, "In: tee: mawh grawng: mau, pa deeh viex ex ing: daux chee: tix bawg voe nhaox, kix tom: kok ex hoek tin:, sonsang sawg krax phit ex, mai plee kah piang ex, mai sang khrawt la viex ex mai kieh ex mawh siliex tix heue."
Yam ankix greed tix dex pwi cau nyiiex Yosiep, kix sikah tau mai nawh hawt diang siviex,
mai kix ah nin:, "Cao: simiang eue, bawg sivoe nhaox yix hoek tix siai: liag priex tete;
yam hoek yix kah dee bang: tix, yix paoh chee: tix, mai yaox kah mau, cie pwi mawx cie pwi an:, daux moing chee:, mau yix khankix kawn: grum uik; mawh kheu nan:, yix tom: deeh viex mau in: hoek heue.
"Mai yix baox viex mau tang: dauh, daux taix tix, sonsang siai: liag pa ih pa un:. Yix ang lai tawng kah pwi pa sau: mau yix, daux chee: yix heue."
pwi cau an: deeh ah nin:, "Kieh pa nhim: koe: mai pex, paw lhat paw graung, Siyiex pex mai Siyiex keeing: pex, sau: mau daux chee: pex; aux hoik pon mau pex." Khaix an: nawh ap Simion kah kix heue.
Khaix an:, kawncau an:, viex kix laig daux nyiiex Yosiep, mai tawx rawm: kieh kix khoek caong tix, mai nawh tawx la kix sawm:,
kix viex khawngphak hoek son Yosiep yam ponngaix, mawh kheu mhong: kix sang ih tix priex ngaix tau mai nawh heue.
Yam hoek Yosiep kah nyiiex, kix ap khawngphak pa viex kix daux taix tix kah Yosiep mai gup tix piang tiex sivoe nawh heue.
Yosiep singeuh taix kix mai ah nin:, nyawm ot pex lie? mai "Keeing: pex tax kuad pa ah pex kawx nyawm ot lie? kawn: im: ju nawh lie?"
Kix ah nin:, "Yix pa mawh kawncau maix, keeing: yix nyawm ot, nawh kawn: im: ju;" Kix gup ngai: tix mai krub kah nawh heue.
Nawh yaog tix jhak mai yaox pux tix Binyamin pa mawh kawn: simex miex nawh, mai ah nin:, "In: mawh pux ghoik pa hoik krai pex kah aux lie?" Nawh ah nin:, "Kawn: simex aux eue, kieh Siyiex nawb bwan: kah piang maix."
Nawh kied koe: krax caoxrhawm: yam yaox kah pux tix, mawh kheu nan:, Yosiep yaog tix kaoh sijaox, mai sawg dee sang yiiem tix, nawh laig daux lawg it tix mai yiiem heue.
Khaix an: nawh khoek ngai: tix mai lih kah praix, gun rhawm: tix mai ah nin:, "Khan: priex heue."
Kix khan: dauh dee son Yosiep tix dauh, son puxaik nawh tix dauh, mai son pwi Ejiptux pa sawm: tau mai nawh tix dauh, mawh kheu pwi Ejiptux ang sax ih priex tau mai pwi Hebrie, kheu mawh pa seeing: pwi Ejiptux kah heue.
Mai kix ngawm sivoe ngai: nawh, jah kah kawn: Ai: tom: hoek kah kawn: ghoik, pa ting pa iak awm: hoik koe: been kix, kix ra: lai jhak pakngai: paox tix, kah daux pa daox pa am: heue.
Khaix an: Yosiep teei pa khan: kheu: kix sivoe nawh, mai tawx nawh kah kix, viang mawh nan:, pa khan: kheu: nawh son Binyamin hoik nie khaing: kix phwan: son, mai kix ih nyau tau mai nawh kah daux pa gauxrhawm: heue.
Grawng: Kawk Nyaux Yosiep
Nawh tawx lox kah pwi tix daux nyiiex mai ah nin:, "Sau: pa ih pa un: kah chee: pwi inkix, tom: pon viex kix ing:, mai deeh sau: mau cie pwi mawx cie pwi an:, daux moing chee: kix heue.
"Sau: kawk mau pa nyaux aux, daux moing chee: kawn: ghoik an:, mai mau ngaw nghox nawh awawx." Mai kawncau nawh yuh awm: lox pa krai Yosiep heue.
Yam bah riieng praix plak ponngawb, kawncau nawh ploi: kix ing: tau mai la kix heue.
Yam ang kix nyang luan singai veng, Yosiep ah nin: kah kawncau tix, "Kaoh heue, nied hawt kah pwi ankix, mai yam krup maix kix, maix ah nin: kah kix,Pex lai deeh tawx pa caox kah pa mhawm: yuh kah mawx lie? Yuh kah mawx pex lai briex kawk nyaux aux?
"In: mawh kawk nyaux cao: simiang aux, pa priex nawh sonsang koe: pingnya tix ang mawh lie? pa yuh pex ang lai mawh pa mhawm: heue"
Yam krup kawncau an: kah kix, nawh krai kix mhong: awm: lox in: heue.
Kix ah nin: kah nawh, "Yuh kah mawh cao: simiang aux lai ah lox yuh nin:? Kieh ceu in: singai khaing: yix pa mawh kawncau maix khankix, yix ang doh yuh ceu in:.
Jhak heue, yix deeh viex, mau pa yaox yix daux moing chee: tix, khaing: haktiex Khanan kah maix; yix kawn: sang deeh briex mau nyiiex cao: simiang maix yuh kah mawx?"
"Yaox maix an: kah mawx ang ah, kieh nawh yum:, mai yix kawx tag mawh siliex cao: simiang maix heue."
Nawh ah nin:, "Kieh mawh awm: lox pa ah pex; phan: aux yaox kah pwi mawx, kieh mawh siliex aux, pex pa deuk tag ang koe: phimap kah heue."
Khaix an: kix nied tah chee: tix piang tiex, mai tang: paoh kah chee: tix kukaux heue.
Mai nawh khrieh kraung kix, jah kah pwi pa ting tom: hoek kah pa iak, mai yaox kawk nyaux daux chee: Binyamin heue.
Khaix an: kix riah kraung ceep tix, mai deeh sau: lhang: la tix kukaux, mai deeh ing: daux veng heue.
Yam hoek Yudax mai puxaik nawh khankix kah nyiiex Yosiep, nawh kawn: ot tan:, mai kix gup tix piang tiex sivoe nawh heue.
Yosiep ah nin: kah kix, "Yuh kah mawx pex lai yuh nin:? Ang pex tawng mawh aux simex pa koe: pingnya tix kaux lie?"
Yudax ah nin:, "Ex sang khaw: tix ah yuh kah mawx kah cao: simiang aux lie? Ex sang krai yuh kah mawx? Phan: ang mawh nan:, ex tag sang luat luan khaing: yuh kah mawx? Siyiex hoik yaox krax phit kawncau maix khankix; jhak heue, yix kham: tix mawh siliex cao: simiang aux, pwi pa hoik yaox pex kawk nyaux mai nawh heue."
Yosiep ah nin:, "Sonsang yuh aux an:, kieh ceu in: singai khaing: aux,mawh ngie pwi pa hoik yaox ex kawk daux taix nawh, tag mawh siliex aux, phan: mawh pex, deeh ing: kah keeing: pex, daux pa nhim: heue."
Yudax Khyox Khaw: Son Binyamin
Khaix an: Yudax hoek dex nawh mai ah nin:, "Cao: simiang aux eue, kieh kawncau maix krai cao: simiang, mhong: lox tix gum liak, paw nyang kieh krax songrhawm: maix lih kah piang kawncau maix ha:, mawh kheu hoik awm: maix Pharaw heue."
"Cao: simiang aux hoik chawk kah kawncau tix khankix mai ah nin:, "Koe: keeing: pex lie? Phan: ang mawh nan:, koe: pux pex lie?"
Mai yix deeh ah nin:,Yix koe: keeing: pa hoik kuad, mai pux ghoik pa iak tix kaux, pa pon nawh yam riex ju tix, puxke: nawh hoik yum:, pa keh khaig: miex nawh, mawh ngai: nawh pa deuk khaing:, keeing: nawh kied moh kah nawh heue.
Khaix an: maix deeh ah nin: kah yix kawncau tix, "Viex nawh hoek kah aux, sonsang yaox aux kah ngai: tix heue
Yam an: yix ah nin: kah cao: simiang tix, "Kawn: nyawm an: ang doh pon gwieh khaing: keeing: nawh, phan: nawh gwieh hu: khaing: keeing: tix, keeing: nawh tag yum: heue."
Khaix an: maix ah nin: kah kawncau tix,Phan: pex ang viex pux ghoik tix hoek tau mai pex, pex tag ang lai pon tix yaox kah pakngai: aux heue
"Yam deeh ing: yix kah keeing: tix, pa mawh kawncau maix, yix krai nawh mhong: gumlox maix cao: simiang heue."
"Mai yam ah keeing: yix nin:, Deeh hu: siai: liag pa ih pa un: son ex ceeix heue
Yix deeh ah nin:, "Yix ang pon hu:; phan: pux ghoik ang hu: tau mai yix, phan: pux ghoik hu: tau, yix tom: pon hu:, mawh kheu phan: yix ang viex pux ghoik tix hu:, yix tag ang lai pon tix yaox pakngai: pwi an: heue
Khaix an: keeing: yix pa mawh kawncau maix ah nin: kah yix,pex hoik tawng keh moeng aux kawn: simex son aux ra: kaux;
"Tix kaux hoik hu: khaing: aux, mai aux hoik krai pex mhong; tee: hoik phawng: nex nawh tete, jah tom: yam an: aux ang lai yaox nawh.
"Phan: pex baox viex in: tix kaux khaing: aux mai kieh pa caox hoek kah piang nawh, pex tag viex hauk kaing: paing aux laig daux simeeig tau mai krax lauxrhawm: heue."
"Mawh kheu nan:, yam deeh hoek aux kah keeing: tix pa mawh kawncau maix, phan: kawn: nyawm in: ang hoek tau mai yix, mawh kheu rhawmrhi: nawh kied koe: kah daux ju kawn: nyawm an: heue.
"Yam yaox nawh ang kawn: nyawm an: koe: tau mai yix, nawh tee: yum:, mai yix kawncau maix tag yaox tix viex, hauk kaing: paing keeing: yix pa mawh kawncau maix hu: kah daux simeeig tau mai krax lauxrhawm: nawh heue.
Mawh kheu aux kawncau maix mawh cao: pa kham: son kawn: nyawm in:, kah keeing: aux, ah nin:,Phan: aux ang viex nawh hoek kah maix, aux tag yaox tix klawm: phimap sivoe keeing: tix leeing ju heue
"Mawh kheu nan: kieh aux kawncau maix ot tang: kawn: nyawm an:, mai yuh siliex maix cao: simiang, mai kieh kawn: nyawm an: deeh ing: tau mai puxke: nawh khankix liak?"
Phan: kawn: nyawm an:, ang hoek mai aux, aux sang chix ing: kah keeing: tix yuh kah mawx? Aux lhat tix yaox hoek ceu pa caox kah piang keeing: tix heue."
Yosiep Deeh Jhi: Tix Kah Puxaik Nawh
Khaix an: Yosiep ang lai pon gun pon gut rhawm: tix, sivoe pwi pa cung hawt nawh khankix, mai nawh kok yo kah kix, "Kieh kix kukaux lih hu: khaing: tix heue." Mawh kheu nan: pwi tang: kaux ang lai ot mai nawh tix kaux kawx, yam jhi: Yosiep puxaik tix tawng kah tokaux tix heue.
Mai nawh yiiem riag, tom: hoik mhong: pwi Ejiptux, khawm can pwi pa ot nyiiex haw: Pharaw heue.
Yosiep ah nin: kah puxaik tix khankix, "Aux mawh Yosiep; kawn: im: ju keeing: aux lie?" Viang mawh nan:, puxaik nawh khankix ang pon pawk lox nawh, mawh kheu kix hoik daox aw: sivoe ngai: nawh heue.
Mai Yosiep ah nin: kah puxaik tix khankix, "Hoek dex aux," mai kix kawx hoek dex nawh. Mai nawh ah nin:, "Aux mawh pux pex Yosiep, pa hoik coh pex daux meung Ejiptux heue.
"Yamin: paw pex lauxrhawm:, mai paw songrhawm: kah cao: tix, kheu hoik coh pex aux tin:, kheu hoik mawh Siyiex pa ploi: aux hu: sivoe pex, sonsang taoh kah ju pwi heue.
"Mawh kheu sibhawm: praix, tag hoik ra: num, khaix in: kawn: deuk phwan: num pa ang pwi nyang pon thai: kaung: mai vawg nghox heue.
"Mai Siyiex hoik ploi: aux hu: sivoe pex, sonsang deuk pex, piang haktiex mai sonsang taoh aux ju pex khawm uik, kah daux pa pluat ploi:, pa ting pa lhaong: heue.
"Mawh kheu nan: ang lai mawh pex pa ploi: aux hoek tin:, viang mawh nan:, mawh Siyiex; mai Nawh Cao: kieh aux mawh keeing: kah Pharaw, mai mawh cao: kah daux nyiiex haw:, mai kwang: kah piang haktiex Ejiptux khawm uik heue.
"Nied kaoh mai hu: kah keeing: aux, mai krai nawh mhong: grawng: pa krai kawn: simex nawh Yosiep,Yamin: Siyiex hoik kieh aux mawh simiang daux haktiex Ejiptux khawm uik; hoek kah aux mai paw lai tuh rhawm: kah tidtix."
"Pex tag yaox tix ot kah haktiex Goshen, dex tau mai aux, viex kawnpraix pex, kawn: saux kawn: sex pex, mai yung:, khawng: brie, mai can pa koe: pex khawm uik heue.
"Aux tag kia: ngien mai eei: kah pex, phan: ang mawh nan: pex mai kawnpraix pex, mai can pa koe: pex khawm uik, tag hoek krax kharhawm: kah sibhawm: praix, mawh kheu sibhawm: praix kawn: koe: phwan: num heue
"Jhak heue, ngai: pex, mai ngai: pux aux Binyamin, hoik yaox kah mawh lox sikah aux, khaing: jheeh tix kah pex heue.
Pex krai keeing: aux mhong: grawng: koe: min: aux mai krax ot krax koe: aux daux meung Ejiptux, awm: pa hoik yaox pex. Nied pex viex keeing: aux hoek tin: heue."
Khaix an: nawh kawm ngawg pux tix Binyamin mai yiiem, mai Binyamin kawx kawm ngawg nawh mai yiiem heue.
Nawh ngheet kah puxke: tix kukaux mai yiiem piang kix, khaix an: puxke: nawh khankix sikah mai nawh heue.
Yam mhong: pwi pa ot daux nyiiex haw: Pharaw khankix grawng: "Hoek puxke: Yosiep," Pharaw mai kawncau nawh khankix gauxrhawm: kah heue.
Mai Pharaw ah nin: kah Yosiep, "Krai kah puxke: maix khankix mai yuh nin:,Tang: kraung pex piang la mai deeh ing: kah haktiex Khanan.
Viex keeing: pex mai pwi daux nyiiex ma: nawh hoek kah aux, aux tag tawx haktiex pa jiet mhawm: Ejiptux kah pex mai pex tag sang yaox tix ih kah dee koe: phon: haktiex heue.
Aux tawx sibrawm kieh maix yuh in:, Teei ling: lawx khaing meung Ejiptux khankix son kawn: nyawm mai moeng pex; mai deeh viex keeing: pex hoek heue.
Paw lai lhawk kah sinngao pex, mawh kheu can ceu pa nie mhawm: daux haktiex Ejiptux hoik mawh son pex heue"
Kawn: simex Esarilax khankix, yuh awm: an:, Yosiep tawx ling lawx kah kix, awm: lox pa hoik tawm: Pharaw, mai tawx priex pa ih kix son daux krax heue.
Nawh baox tawx kraung ceep pa sang loh kix tix kah kukaux; viang mawh nan:, nawh tawx mau kah Binyamin loe: yieh shekhe mai kraung pa sang loh nawh tix kah phwan: jung heue.
Mai nawh sipaox ceu inkix kah keeing: tix, la kao: mu: pa tang: kraung pa mhawm: khaing: Ejiptux, mai la shiang: kao: mu:, pa tang: nghox koi:, khaomun, mai pa ih pa un:, pa sang ih keeing: nawh kah daux krax heue.
Khaix an:, nawh ploi: puxke: tix khankix ing:, mai tawm: lox kah kix, son ang kix simah paox tix hawt krax heue."
Mai kix lih hu: khaing: Ejiptux mai hoek kah haktiex Khanan kah keeing: tix Yakop heue.
Mai kix ah nin: kah nawh, "Yosiep kawn: im: ju, mai nawh mawh cao: kwang: kah piang haktiex Ejiptux khawm uik." Yakop daox deng: mai ang yumrhawm: kah kix heue.
Kix krai can ceu pa ah Yosiep kah nawh, mai yam yaox nawh kah ling: lawx pa ploi: Yosiep sonsang rieb tix kieh nawh brug ing:, rhawmrhi: keeing: kix Yakop deeh koe: riang rao heue.
Khaix an: Isarilax ah nin:, "Aux hoik fahrhawm: kah, kheu kawn: simex aux Yosiep kawn: im: ju, aux sang hu: yaox nawh, sivoe yum: tix heue."
Grawng: Hu: Yakop Kah Ejiptux
Isarilax viex kraung pa koe: tix khawm uik mai lih hu: krax, yam hoek nawh kah Berashibax, nawh yuh krax pa tan pa lu mai krub kah Siyiex keeing: nawh Icak heue.
Siyiex sikah tau mai Isarilax, kah daux riieng susai: ponsawm:, mai ah nin:, "Yakop, Yakop!" Mai nawh ah nin:, "Aux ot tin:."
Mai Nawh Cao: ah nin:, Aux mawh Siyiex, Siyiex keeing: maix; paw lhat paw graung, sonsang hu: maix meung Ejiptux, Aux tag kieh maix mawh ceu pwi pa ting pa lhaong: daux haktiex an: heue."
Aux tag hu: tau mai maix kah meung Ejiptux, mai aux tag sang baox deeh viex maix ing:, Yosiep tag yaox tix sibeet ngai: maix heue."
Yakop lih hu: khaing: Berashibax, mai kawn: simex nawh khankix, viex keeing: tix Yakop, khawm kawn: nyawm mai moeng kix daux ling: lawx pa hoik sipaox Pharaw sonsang viex kix hoek heue.
Kix teei khawng: brie eei: tix mai kraungkhrai: pa hoik pon tix daux haktiex meung Khanan, mai hu: kah meung Ejiptux tau mai Yakop khawm doeh simie ceucat pa koe: mai kix uik heue.
Nawh viex kawn: simex tix, mai kawn: saux kawn: sex nawh, mai doeh simie ceucat nawh khawm uik hu: tau mai tix kah meung Ejiptux heue.
Inkix mawh caukaux daux simie Isarilax, pa hoek kah haktiex Ejiptux, Yakop mai kawn: simex nawh khankix Rubin mawh kawn: Ai: heue.
Kawn: simex Rubin khankix mawh Hanok, Palux, Hezaron mai Kamix heue.
Kawn: simex Simion khankix mawh Yemoelax, Ya-min, Awhat, Yakhim, Zawha, mai Shawlax pa mawh kawn: simex khaing: bun: Khanan heue.
Kawn: simex Lewix mawh Geshon, Kawhat mai Merarix heue.
Kawn: simex Yudax khankix mawh Erax, Awnan, Shelax, Pharet mai zerax. (Viang mawh nan: Erax mai Awnan hoik yum: daux haktiex Khanan), mai kawn: simex Pharet khankix mawh Herazon mai Hamulax heue.
Kawn: simex Ishakha khankix mawh Tawlax, Puvax, Yawbax mai Shiraron heue.
Kawn: simex Zebulon khankix mawh Siriet, Elon mai Yalelax heue.
Inkix khawm uik mawh kawn: simex Leax pa keh nawh khaing: Yakop daux haktiex Padam Aram tau mai kawn: bun: Dina,Can pwi khawm uik tau mai kawn: simex kawn: bun: nawh khankix koe: tingoe: loe: kaux heue.
Kawn: simex Gat khankix mawh Ziphion, Hagix, Shonix, Ezabon, Elix, Arawdix mai Arelix heue.
kawn: simex Asha khankix mawh Yimanax, Ishuah, Ishix, Beriyax mai nan: kix Sherax. Mai kawn: simex Beriyax khankix mawh Hebax mai Malakhe heue.
Inkix mawh kawn: simex Zilapax, pa mawh kawncau bun: pa tawx Laban kah kawn: bun: tix Leax, pa keh nawh son Yakop kao: liah kaux heue.
Kawn: simex Rakhelax moeng Yakop, mawh
Yosiep mai Binyamin heue.
Yam ot Yosiep kah haktiex Ejiptux, nawh pon kawn: tix Manashe mai Epharim, kawn: simex in: kiex, mawh pa pon nawh khaing: kawn: bun: cao: giex kaing: li Pawtix Pherax, pwi veng Awnax pa kaux Ashanat heue.
Kawn: simex Binyamin khankix mawh Belax, Bekhax, Ashabelax, Garax, Neman, Ehix, Rawshax, Muppim, Huppim mai Aradax heue.
Inkix mawh kawn: simex Rakhelax, pa keh nawh son Yakop, kao: pon: kaux heue.
Kawn: simex Dan mawh Hushen;
Kawn: simex Napthalix khankix mawh, Yazelax, Gunix, Yezax mai Shilen heue.
Inkix mawh kawn: simex Bilaha pa mawh kawncau bun: pa tawx Laban kah kawn: bun: tix Rakhelax pa keh nawh son Yakop aliah kaux heue.
Can pwi pa hu: mai Yakop kah meung Ejiptux pa kaoh khaing: nawh, ang nyang sawn: kah mun nawh, koe: tigliah liah kaux heue.
Mai kawn: simex Yosiep, pa keh kah daux Meung Ejiptux koe: ra: kaux; Can pwi pa kaoh khaing: daux nyiiex ma: Yakop, pa hu: kah meung Ejiptux khawm uik koe: atigliah kaux heue.
Yakop Ot Daux Haktiex Goshen
Nawh ploi: Yudax hu: sivoe tix kah Yosiep, sonsang jhi: kix yaox daux krax Goshen, mai kix hoek kah haktiex Goshen heue.
Yosiep khre: ling: lawx nawh mai hu: kah Goshen sonsang rieb kah keeing: tix Isarilax, yam hoik hoek sivoe keeing: tix, nawh kawm ngawg keeing: tix, mai yiiem rheung: nyao heue.
Mai Isarilax ah nin: kah Yosiep, "Yamin: kieh aux yum:, aux hoik yaox kah ngai: baoh maix, mawh kheu kawn: im: ju maix heue."
Yosiep ah nin: kah puxke: tix khankix, mai can pwi daux nyiiex ma: keeing: nawh khanix, "Aux sang hu: kah Pharaw mai krai kah nawh,Puxke: aux khankix mai can pwi pa ot daux nyiiex keeing: aux pa kaoh khaing: daux haktiex Khanan hoik hoek kah aux heue.
Mai pwi inkix mawh cao: liang yung:, mai kix yuh kaing pa eei: khawng: brie, kix hoik viex yung:, pex, mai khawng: brie tix, mai can pa koe: tix heue
"Yam kok Pharaw tix chawk kah pex mai ah nin:, Yuh pex kaing: jhaw: patix?:
"Pex tag ah nin:, Kaing jhaw: pa yuh kawncau maix khankix dawg mawh cao: liang khawng: brie, jah yam iak tix tom: hoek in: singaix, khawm yix mai keeing: yix, phan: pex krai yuh nan: pex tag yaox tix ot Goshen; mawh kheu cao: liang yung: kukaux mawh pa seeing: pa brai: kah son pwi Ejiptux heue.
Khaix an: Yosiep ing: krai kah Pharaw ah nin:, "Keeing: aux mai puxke: aux khankix, khawm yung:, pex, mai khawng: brie, mai kraungkhrai: kix khawm uik, hoik hoek khaing meung Khanan; mai kix ot kah daux haktiex Goshen heue."
Mai nawh teei pwi phwan: kaux khaing: sinax puxke: nawh khankix, mai viex kix hoek kah Pharaw heue.
Pharaw ah nin: kah puxke: nawh khankix, "Yuh pex kaing jhaw: patix?" mai kix ah nin: kah Pharaw," kawncau maix khankix, mawh cao: liang yung:, awm: tax yiex miex keeing: tix heue."
kix ah nin: kah Pharaw, "Yix hoik hoek sonsang paung tix daux haktiex in:, mawh kheu: kied kin: sibhawm: praix kah daux meung Khanan, ang lai koe: dee ih dee liang son khawng: brie yix, mawh kheu nan: yuh bwanson:, kieh kawncau maix khankix ot kah daux haktiex Goshen liak."
Khaix an: Pharaw ah nin: kah Yosiep, "Keeing: maix mai puxke: maix khankix hoik hoek kah maix.
Haktiex Ejiptux koe: sivoe maix, kieh keeing: maix mai puxke: maix khankix, ot dee mhawm: kah daux haktiex Goshen; mai phan: maix tawng pwi pa cheung: kah daux kix tix kauxkaux, yaog kix mawh cao: giex kaing: liang khawng: brie aux heue."
Yosiep viex keeing: tix Yakop hoek sivoe Pharaw, mai Yakop nawb bwan: kah piang Pharaw heue.
Pharaw ah nin: kah Yakop, "Hoik koe: ju maix miex ding?"
Mai Yakop ah nin: kah Pharaw, "Num singaix mawh aux nyo sinie hoik koe: tiyieh tingoe: num, num pa yaox aux krax mhawm: mawh ceeix khaing:, mai num pa yaox aux krax pa caox hoik kied nie, ang nyang krup kah baux ju keeing: aux khankix, yam mawh kix nyo sinie heue."
Mai Yakop nawb bwan: kah Pharaw, mai lih hu: khaing: sivoe Pharaw heue.
Mai Yosiep tawx keeing: nawh mai puxke: tix khankix, ot dee mhawm: haktiex meung Ejiptux, pa mawh haktiex dex kah veng Ramase, mai tawx kix cie haktiex an:, awm: lox pa hoik tawm: Pharaw heue.
Yosiep tawx pa ih pa un: kah keeing: nawh, puxke: nawh mai can pwi pa ot daux nyiiex ma: keeing: nawh, awm: diag koe: kix daux nyiiex ma: tix heue.
Kaing Yuh Yosiep Tau Mai Krax Hot Sibhawm: Praix
Pa ih pa un: ang lai koe: daux haktiex kudauh kudee, sipiag kied kin: sibhawm: praix, mawh kheu nan:, haktiex Ejiptux mai haktiex Khanan khankix hoik dieh riang jao sibhawm: praix heue.
Mai Yosiep khrawm: mau pa pon coh tix nghox khaing: daux haktiex Ejiptux, mai haktiex Khanan khawm uik, mai Yosiep viex mau an: hoek kah nyiiex haw: Pharaw heue.
Yam hoik uik cai: pwi haktiex Ejiptux mai pwi haktiex Khanan mau can pa koe: tix khawm uik, pwi Ejiptux hoek kah Yosiep mai ah nin:, "Tawx pa ih pa un: kah yix liak, yuh kah mawx yix lai sang yum: kah plak sivoe ngai: maix? mawh kheu hoik uik cai: yix mau tix heue."
Yosiep ah nin:, phan: mau pex hoik uik, "Viex tix tawx khawng: brie pex kah aux, mai aux tag sang tawx pa ih pa un: son pex heue."
Mawh kheu nan: kix viex khawng: brie tix hoek kah Yosiep, mai Yosiep deeh loh kix ih nghox kah brung, yung:, mai pex, mai la khankix; nawh loh kix ih priex preem kah khawng: brie cie kix daux num an: heue.
Khaix hoik sidauh num an:, kix deeh hoek kah nawh num khaix mai ah nin: kah nawh, "Yix ang lai mox tidtix grawng: uik mau tix sivoe maix cao: simiang, khawng: brie yix khankix kawx, hoik mawh cie maix, yix ang lai koe: tix ceu kawx, plak sivoe ngai: maix, lheu: khaing: tokaux yix mai haktiex yix heue.
"Yuh kah mawx yix lai sang yaox tix yum: kah sivoe ngai: maix, khawm yix mai haktiex tix yuh kah mawx? liag kah yix mai haktiex cie yix, kah son pa ih pa un:, yix mai haktiex yix tag yuh siliex Pharaw, mai ang yum:, mai son ang haktiex lai riem, tawx simie nghox kah yix heue."
Yosiep liag haktiex Ejiptux khawm uik son Pharaw; mawh kheu pwi Ejiptux khankix hoik coh kaung: tix, jao kied sibhawm: praix kah kix. Haktiex khawm uik hoik mawh cie Pharaw heue.
Mai nawh gah pwi haktiex hoek ot kah daux veng, jah khaing: taoh mee: haktiex Ejiptux, tom: hoek kah caw mee: haktiex heue.
Mawh ngie haktiex cao: giex kaing: li khankix pa ang nawh lai liag, mawh kheu Pharaw hoik tawx pa ih pa un: kah cao: giex kaing: li khankix, mai kix hoik pon pa ih pa un: khaing: Pharaw, kix tom: ang lai yaox tix coh haktiex tix khankix heue.
Khaix an: Yosiep ah nin: kah pwi khankix, "Aux hoik liag pex, mai haktiex pex daux in: singaix son Pharaw, Jhak heue, teei simie son pex mai rhuat kah haktiex heue."
"Yam hoik vawg pex nghox sax, pex tag yaox tix tawx kah Pharaw phwan: son tix son, pon: son tag mawh cie pex mai son simie kaung:, mai son priex ih pex daux nyiiex daux ma:, mai priex ih son kawnpraix pex khankix heue."
Mai kix ah nin:, "Maix hoik taoh kah ju yix; kieh yix mawh pa pon bwanson: kah sivoe maix cao: simiang ex liak, mai yix tag mawh kawncau Pharaw heue."
Mai Yosiep yuh been pa dex pa dawd mai meung Ejiptux, pa kaux cong: tom: in: singaix, lheu: khaing: haktiex cie cao: giex kaing: li nongnong:, pa ang mawh cie Pharaw, Pharaw tag yaox tix pon phwan: son tix son heue.
Lox Sijax Mukheu Yosiep Kah Yakop
Pwi Isarilax ot kah daux haktiex Ejiptux, baoh Goshen, mai kix nie baox koe: kraungkhrai:, mai nied tix baox haoh hun: sipie heue.
Yakop ot kah daux haktiex Ejiptux kao: aliah num; mai nawh koe: ju tiyieh tipon: aliah num heue.
Yam hoek bawg yam dex sang yum: Isarilax, nawh kok kah kawn: simex tix Yosiep mai ah nin: kah nawh, "Yamin: phan: aux hoik mawh pa pon bwanson: kah sivoe ngai: maix, deuh taix maix greem: siviang ba: aux, mai koe: krax caoxrhawm:, pa kaux sijax rah see kah aux, maix paw lai sipaung: aux daux meung Ejiptux liak,
"Kieh aux it tau mai keeing: aux, tax aux khankix; maix deeh viex aux lih khaing: meung Ejiptux, mai sipaung: aux dee koe: simeeig kix heue." Yosiep ah nin:, "Aux tag yuh awm: lox pa krai maix heue."
Isarilax ah nin:, "Tiextu maix kah aux," mai nawh kawx tiextu khaix an:, Isarilax gup tokaux tix kah piang kaing: gaong ku: it tix heue.
Yakop Nawb Bwan: Kah Kawn: Simiex Tix Yosiep
Yamin khaix hoik luan bawg yam ceu inkix, kix krai Yosiep mhong: grawng: keeing: nawh mai ah nin:, "Keeing: maix kied saux tete heue." Mai nawh viex kawn: simex tix ra: kaux, Manashe mai Epharen hu: heue.
Mai pwi krai Yakop mhong:, kah hoek kawn: simex nawh, "Jhak heue, kawn: simex maix Yosiep hoek kah maix phao:," Isarilax teei riang tix, mai kaoh ngawm piang ku: it tix heue.
Yakop ah nin: kah Yosiep, "Siyiex pa ting siawpsibrawm hoik lih bleeh kah aux, kah veng Luza daux haktiex Khanan mai nawb bwan: kah aux,
"Mai ah nin: kah aux,Jhak heue, Aux tag sang kieh maix pre haoh hun:, mai kieh ceucat maix lih mawh ceu pwi tom: nie, mai Aux tag tawx haktiex in: kah doeh simie ceucat maix, mai mawh cie kix leeing ju leeing phan: khaix maix heue
"Yamin: kawn: simex maix ra: kaux, Epharem mai Manashe, pa pon maix, daux haktiex Ejiptux, sivoe hoek aux kah maix daux Ejiptux tin:, caw tix mawh kawn: simex aux; awm: Rubin mai Simion heue."
Kawnpraix pa baox pon maix khaix in:, tag mawh kawnpraix maix; maix tag kok kix, kah greem: ceukaux puxke: kix, son sinngao kix heue.
"Yam hoek aux khaing: Padanaram, Rakhelax yum: hawt krax meung Khanan, dex hoek kah Epharat; mai aux sipaung: kiex tan: dex krax hu: kah veng Epharat" (Epharat pa mawh Bieliehiem in: singaix heue.)"
Yam yaox Isarilax kah kawn: simex Yosiep khankiex, nawh chawk ah nin:, "In: kiex mawh pwi mawx lie?"
Yosiep ah nin: kah keeing: tix, "Kiex mawh kawn: simex aux, pa tawx Siyiex kah aux kah dee in:." Mai nawh ah nin:, "Viex kiex hoek kah aux, aux tag sang nawb bwan: kah kiex heue."
Yamin: ngai: Isarilax ang lai chix yaox kheu hoik riex ju nawh, Yosiep viex kiex hoek dex nawh, mai nawh kawm tix ngheet kiex heue.
Isarilax ah nin: kah Yosiep, "Aux keud tix ang lai yaox kah pakngai: maix; yamin:, Siyiex hoik jhi: aux yaox khawm kawnpraix maix heue."
Khaix an: Yosiep teei kiex lih khaing: ngawng nawh, mai nawh gup pakngai: tix piang tiex heue.
Mai Yosiep teei kiex khawm ra: kaux, mai teei taix khawn: dawm: tix, giex kah Epharem mai deuh khawn: gwiex Isarilax, mai nawh teei taix khawn: gwiex giex kah Manashe mai deuh dex plak khawn: dawm: Isarilax heue.
Mai Isarilax neh taix khawn: dawm: tix, mai deuh kah piang kaing: Epharem pa mawh pux, mai taix khawn: gwiex tix piang kaing: Manashe, viang nawh tawng Manashe mawh kawn: Ai: kawx heue.
Mai nawh nawb bwan: kah Yosiep, mai ah nin:; "Siyiex pa dawg koe: pa krub keeing: aux Abraham mai Icak; Siyiex pa tawx pa ih pa un: kah aux leeing ju, tom: hoek in: singaix;
kawncau Siyiex pa taoh aux khaing: pa caox pa caig, nawb bwan: kah kawn: nyawm in: kiex, mai kieh ceukaux aux, ceukaux keeing: aux, Abraham mai Icak koe: kah piang kiex, mai kieh kiex ting lhaong:, haok hwan: tom: nie kah piang haktiex in: heue."
Yamin: yam yaox Yosiep deuh keeing: tix taix khawn: dawm: nawh kah piang kaing: Epharem, nawh ang nyawmrhawm: kah, mai nawh sang teei taix keeing: tix khaing: kaing: Epharem mai gah tix deuh kah piang kaing: Manashe heue.
Mai Yosiep ah nin: kah keeing: tix, "Keeing: aux eue, ang caw:, mawh kheu mawh in: kawn: Ai:, deuh taix khawn: dawm: maix piang kaing: nawh liak."
mai keeing: nawh thiang: ah nin:, "Kawn: simex aux eue, aux tawng, aux tawng, nawh tag lih tix mawh ceu pwi pa ting tix cub, viang mawh nan:, pux nawh, tag nie lheu: ting khaing: nawh, mai doeh simie ceucat nawh khankix tag lih tix mawh ceu pwi ku cub heue."
Mai nawh nawb bwan: kah kix daux singaix an:, mai ah nin:, "Mawh kheu maix pwi Isarilax tag pon bwanson:, kieh Siyiex kieh maix awm: Epharem mai Manashe" Mawh kheu nan:, nawh yaox Epharem ting sivoe Manashe heue.
"Khaix an: Isarilax ah nin: kah Yosiep, "Jhak heue, hoik hoek bawg yam dex sang yum: aux, viang mawh nan: Siyiex tag ot tau mai pex, maai: tag deeh viex pex hoek kah haktiex keeing: pex tix bawg heue.
Lheu: khaing: an:, aux tag tawx haktiex Shekhem kah maix pa pon teei kah lawm vaig, mai ak, khaing: daux tawm: taix Amawrix, lheu: khaing: pa tawx aux kah puxke: maix heue."
GumLox Ghoik Yakop Tix Tawm: Kah Kawn: Simex Nawh
Mai Yakop kok kah kawn: simex tix khankix mai ah nin:, "Khrawm: paox tix tau, aux sang krai pex mhong: pa sang lih hoek tix mawh kah piang pex sivoe ngai: heue.
"Kawnpraix Yakop khankix eue, khrawm: paox tix, mai nghiiet kah lox keeing: pex Isarilax heue."
"Rubin eue, maix mawh kawn: Ai: aux, mai mawh riang aux, plix liang aux tix pon yam ting riang tix, mai mawh min: plakngai: pa lheu: mhawm:, mai mawh siawpsibrawm pa lheu: mhawm:.
"Awm: rawm: pa ang chix ot ti dauh, mai phrit tix lih, maix tag ang yaox tix mawh pwi pa kaux cong:, mawh kheu haok maix kah dee it keeing: tix, maix hoik kieh ku: it keeing: tix seeing: heue.
Simeon mai Lewix kiex mawh puxaik, vaig lawm kix mawh kraung naing pa yuh pa caox pa caig heue.
"Ju aux eue, paw laig daux bang: kum: kix, khwan: aux eue, paw yuh paox pie tau mai kix, jao songrhawm: kix, kix hoik pah kah pwi, kix hawt alo tokaux cao: tix, mai mug kah si nieag moi ngha: dud heue.
"Kieh kiex pon krax jhax krax lawg kheu kin: jhawm: pa yuh tix, mai krax songrhawm: pa kied lang: teung:; aux tag gwieh kiex khaing: pwi Yakop mai kieh kiex prungprang:khaing: pwi Isarilax heue.
"Yudax eue, puxaik maix khankix tag yaogyaw maix, taix maix tag jhawp kah ngawg pwi pa koeng kah maix khankix, puxaik maix khankix kawx, tag hoek tix krub kah maix heue."
Yudax mawh kawn: sivai sangsi: mhaing:; kawn: simex aux eue, maix kaoh khaing: dee sawg tix ih kug mai gup tix awm: sivai sangsi: miex, mawh pwi mawx pa sang pon hu: so: kah maix lie?
pliah tag ang lai tang: tiah khaing Yudax, khaoxgix pa kwang: ang gah tix khaing: sinax caong nawh, tom: sidauh sidu sang hoek Shilaw, mai kawn: pwi khawm uik tag cu nghiiet kah nawh heue.
Nawh phyawk la tix kah nhu: plix siiet, mai phyawk kawn: la iak tix kah nhu: plix siiet pa mhawm:, nawh sidaux kraung tix kah rawm: plix siiet, sidaux sibex tix kah rawm: plix siiet pa raoh awm: nham:;
Ngai: nawh hoik raoh kheu rhawm: plix siiet; mai rhang: nawh hoik paing kheu rhawm: teeh heue.
Zebulun tag ot praok rhawm: sigrit sigra:; mai mawh dee bang: reu sangphaw: khankix, mai mee: haktiex nawh hoek tom: veng Sidom heue.
"Isakha mawh pa ting riang awm: la, mai nawh it tum sinax kawg yung:;
"Nawh yaox dee laux lee: pa mhawm:; mai haktiex dee nyawm tix ot, nawh tag klawm: beeh glawm: kraung cien piang klip tix, mai mawh siliex pa tawx gha: heue.
Dan tag prawng kah ceu pwi tix, awm: doeh simie ceucat pwi Isarilax tix ceu heue.
Dan tag mawh siuing: pa koe: jai: pa ot piang krax; siuing: pa ot hawt daux krax, sonsang tut kah loek caong brung brug pwi, tix sang kieh cao: brug rau plak khaix heue.
"Simiang Siyiex eue, aux hoik krox jun kah bwanson: krax taoh Maix Cao: heue.
Gat tag mawh pa hawt cub pwi con tix puing: kah nawh; viang mawh nan:, nawh tag deeh pon hawt phoek loek caong kix heue.
Asha, Haktiex nawh tag mawh pa haoh priex preem pa mhawm: khaing:; mawh pa kied nyawm tete, mai nawh tag pon yuh priex ih khunhawkham lih tom: nie heue.
Napthalix, mawh cak miex pa blha: tix pa ang koe: dee tuh, pa keh kawn: pa mhawm: heue.
Yosiep mawh kak khaox pa nie plix plix, kak khaox pa nie plix plix hawt rawm: keut; mai kak khankix jao: luan kah guh veng heue.
Pwi naing ak, yuh krax kin: mai hawt puing: kah nawh, kix puing: mai koeng kah nawh.
Viang mawh nan: ak nawh kawn: koe: riang, mai plawng: taix nawh cong: sijung:, riang rao tawm: taix pa ting siawpsibrawm Siyiex pa koe: daux Yakop, (pa mawh cao: liang yung:, rang: ting ceu pwi Isarilax heue.)
Pa mawh Siyiex keeing: maix, tag teem: coi maix, Cao: pa ting siawpsibrawm tag nawb bwan: kah maix tau mai bwanson: pa kaoh khaing: daux raoma: long:, bwanson: pa raux pa mox pa koe: plak greem:; bwanson: pa pon khaing: teeh: mai pa kaoh khaing: daux vaig heue.
Bwanson: pa nawb keeing: maix khankix; nie lheu: mhawm: khaing: bwanson: pa kaoh khaing: gawng leeing ju, mai lheu: mhawm: khaing: bwanson: grum naog khaing: ton: leeing ju leeing phan: heue. Son inkix tag ot piang Yosiep mai kah piang mhok khri: pa koe: piang dong: re: nawh heue. Mai hoek kah piang puxaik pa tang: gwieh hu: khaing: nawh heue.
Binyamin tag mawh sox praix, pa leue tix kiied totiag, nawh ih kah nex totiag pon tix ponngawb caocao, mai deeh gwieh nex totiag pa pon sigrhang: tix son ponbo heue.
In: mawh doeh ceucat Isarilax kao: ra: ceu, mai mawh gumlox sikah keeing: kix, kah kix, mai lox nawb bwan: kah kix, mai nawb bwan: kah kix kukaux, awm: bwanson: pa khaw: kix tix pon heue.
Grawng: Yum: Yakop Mai Sipaung:
Khaix an: nawh tawm: lox kah kix mai ah nin:, "Aux sang deeh hu: neuex tix tau mai ceu pwi aux; sipaung: aux tau mai keeing: aux khankix kah daux rang: pa koe: daux kaung: Epharon ceu pwi Hittix,
"Daux rang: pa koe: daux kaung: Makhaphelax kah plak lih singaix haktiex Khanan, kaung: an: Abraham hoik liag kah Epharon ceu pwi Hittix sonsang mawh haktiex simeeig cie nawh heue."
"Kix hoik sipaung: Abraham mai moeng nawh Sara tan:, mai kix baox sipaung: Icak mai moeng nawh Rakhelax tan:, mai Leax kawx aux hoik sipaung: tan: heue.
"Kaung: mai daux rang: an:, mawh pa hoik liag nawh khaing: ceu pwi Hittix heue."
Khaix hoik tawm: Yakop lox kah kawn: simex tix khankix, nawh yaog caong tix deuh kah piang ku: it tix, nawh dud rhawm: mai hu: kah dee khrawm: simie ceucat tix heue.
Khaix an: Yosiep gup ngai: tix kah piang ngai: keeing: nawh, yiiem mai ngheet kah nawh heue.
Yosiep tawx lox kah kawncau tix khankix, pa mawh cao: chix sidauh mai kieh kix khre: keeing: nawh kah sidauh bhawng: heue. Mawh kheu nan: cao: chix sidauh khankix, cox khre: Isarilax kah sidauh bhawng: heue.
Kix sau: sidauh bhawng: kah nawh mai deuh lawng: nawh tipon: singaix awm: hoik koe: been pa deuh kix pwi yum:. Khaix hoik luan tipon: singaix pwi Ejiptux khankix yiiem doe: son Yakop atigliah singaix heue.
Khaix hoik luan singaix yiiem doe: kix, Yosiep kok pwi yuh kaing nyiiex haw: Pharaw mai ah nin:, "Phan: aux khaw: tix pon bwanson: sivoe ngai: pex, hu: krai kah Pharaw mai ah nin:,
Keeing: aux hoik kieh aux tiextu ah nin:, "Aux hoik dex sang yum:, pex hu: sipaung: aux kah daux simeeig pa hoik kaong: aux son tix, daux haktiex Khanan heue Mawh kheu nan:, yamin:, kieh aux hu: yuh mai sipaung: kah keeing: tix mai aux tag deeh hoek heue."
Mai Pharaw ah nin:, "Hu: mai sipaung: kah keeing: maix awm: hoik kieh nawh maix tiextu kah tix heue."
Mawh kheu nan: Yosiep lih hu: sonsang sipaung: nawh keeing: tix; kawncau Pharaw mai khawm cao: kaing: daux nyiiex haw: mai cao: kaing: kah daux haktiex Ejiptux khankix hu: tau mai Yosiep heue.
Pwi nyiiex ma: Yosiep, pwi nyiiex puxke: nawh, mai pwi nyiiex nawh keeing: nawh khankix lih hu: tan:, mawh ngie kawn: nyawm iak cub yung:, mai pex mai khawng: brie khankix, pa prah kix daux haktiex Goshen heue.
Cub ling: lawx mai cub lien: brung pa kied haoh hun: lih hu: tau mai nawh heue.
Khaix an: kix hoek kah glah pah nghox Atat, pa koe: toi: rawm: klawng: Yawdan, kix khrup rhawm: sigrien sigre mai yiiem, Kix khirhawm: yiiem doe: son keeing: tix tan: aliah singaix heue.
Yam yaox can pwi pa ot daux haktiex Khanan khankix, kah krax pa yiiem doe: kix kah daux glah pah nghox Atat, kix ah nin:, "In: mawh krax pa kied yiiem doe: ceu pwi Ejiptux." Mawh kheu nan: dee ankix kok mawh Abelax Mizaren, pa koe: toi: rawm: klawng: Yawdan heue.
Mawh kheu nan: kawn: simex nawh khankix yuh awm: pa hoik tawm: nawh kah kix heue.
Kawn: simex nawh khankix viex nawh hu: kah haktiex Khanan, mai sipaung: nawh, daux rang: pa koe: daux kaung: Makhapelax, plak lih singaix veng Mamre, pa hoik liag Abraham kah Epharon, ceu pwi Hittix, son gwang simeeig tix heue.
Khaix hoik sipaung: nawh keeing: tix, Yosiep deeh ing: kah meung Ejiptux tau mai puxke: nawh khawm pwi pa hu: sipaung: keeing: nawh khankix heue.
Lox Krai Yosiep Kah Puxke: Tix
Yam yaox puxke: Yosiep khankix kah hoik yum: keeing: tix, kix ah nin:, "Ex lhat Yosiep koeng kah ex, mai deeh pawk bix kah ex, son kaing pa caox pa caig, pa yuh ex kah nawh heue."
Kix ploi: pwi cau hu: kah Yosiep mai ah nin:, "Sivoe sang yum: keeing: maix, nawh hoik tawm: lox kah yix ah nin:,
Hu: krai kah Yosiep mai ah nin:, aux rawg maix pluat ploi: kah krax phit pa yuh puxke: maix khankix mai phimap kix, mawh kheu hoik yuh kix pa caox pa caig kah maix heue Yamin: rawg maix pluat ploi: pa phit kawncau maix khankix, kah daux min: plak ngai: Siyiex keeing: maix heue." Yam mhong: Yosiep kah lox krai kix nawh yiiem kah heue.
Puxke: nawh khankix, hoek gup tix kah sivoe nawh mai ah nin:, "Jhak heue, yix mawh kawncau maix heue."
Yosiep deeh ah nin: kah kix, "Paw khirhawm: kah, khex keud pex aux mawh Siyiex lie?
"Viang pex keud mawh yuh tix pa caox kah aux kawx, viang mawh nan:, Siyiex hoik kieh mawh ceu pa mhawm:, sonsang taoh ju pwi tom: nie awm: pa hoik yaox pex daux in: singaix heue.
"Mawh kheu nan: paw koe: krax khirhawm:, aux tag eei: liang pex mai kawnpraix pex kukaux heue." Nawh krai lox nyawmrhawm: kah kix mai lox pa caoxrhawm: caoxrhi: kah kix heue.
Grawng: Yum: Yosiep
Yosiep mai pwi nyiiex ma: keeing: nawh khankix, ot daux Ejiptux, mai Yosiep im: ju tom: hoek tiyieh kao: num heue.
Yosiep hoik yaox kah kawn: sex nawh khankix, pa mawh kawn: saux Epharem; kawnpraix Makhirax pa mawh kawn: simex Manashe kawx mawh pa keh piang ngawng Yosiep heue.
Mai Yosiep ah nin: kah pux aik nawh khankix, "Aux dex sang yum:, viang mawh kawx nan:, Siyiex tag hoek tix kia: ngien kah pex, mai deeh viex pex lih khaing: haktiex in: mai tawx pex hu: kah haktiex pa hoik tiextu Nawh Cao: kah Abraham, Icak mai Yakop heue."
Khaix an: Yosiep kieh kawnpraix Isarilax khankix, tiextu tix ah nin:, "Siyiex tag hoek tix kia: ngien kah pex, mai pex tag viex si-ang: aux hu: khaing: tin: heue."
Yosiep yum: yam hoek ju nawh tiyieh kao: num, mai kix khre: sau: sidauh bhawng: kah nawh mai sau: kah daux lawng: meung Ejiptux heue.
LAI LIH HU:
(Exodus)
Lih Hu:
Grawng: Krax Kham: Geu Ceu Pwi Isarilax Daux Meung Ejiptux
In: mawh ceukaux kawnpraix Isarilax, pa hoek kah meung Ejiptux, tau mai Yakop khawm: pwi daux nyiiex ma: nawh,
pa mawh Rubin, Simion, Lewix, mai Yudax;
Isakha, Zebulun, mai Binyamin;
Dan, Napthalix, Gat mai Asha;
doeh simie ceucat Yakop, koe: atigliah kaux; yam an: Yosiep hoik ot sivoe kix kah daux meung Ejiptux.
Khaix an:, Yosiep mai Puxke: nawh mai doeh nyiiex ma: nawh khankix yum:.
Doeh simie ceucat pwi Isarilax baox nie haoh hun: mai nied tix nie sipie sipie, mai kix haok hwan: ting riang, mai kix naog kah daux haktiex an:.
Yam an: koe: khunhawkham pa khraox tix kaux daux meung Ejiptux, pa ang tawng kah Yosiep.
Mai nawh ah nin: kah pwi tix, "Jhak heue, pwi Isarilax hoik kied nie, mai hoik kied ting riang khaing: ex."
Hoek, kieh ex yuh cuyi: tuktiaktukte: kah kix, phan: ang mawh nan:, ha kix nie haoh hun:, mai yam koe: naing, kix tag hu: sitoe: tix mai pwi koeng, mai deeh puing: kah ex, khaix an:, kix tag lih hu: khaing: haktiex."
Mawh kheu nan:, kix yaog cao: kaing: pa kwang: piang kix. Mai tawx beeh glawm: pa cien kieh yuh kaing pa kin: daux pa khin: mai kix yaox tix sum: veng dee sang deuh kraung sinngao Pharaw, pa mawh veng Piton mai veng Ramase.
Viang mawh nan:, kix nie yeen ya piang kix, mai pwi Isarilax baox nie haoh hun: mai nie pre sipie. Pwi Ejiptux nie yaoh yee: jao pwi Isarilax.
Mawh kheu nan:, pwi Ejiptux nie cau kix daux pa lang: taung: kin:,
Mai kieh kix yaox pa kin: pa song: daux pa cau kix yuh kaing, pa mawh kaing tiex mak-ut mai kaing ma: kaing kaung: kuceu, kah daux pa cau pa khinkix yuh kaing.
Khaix an:, simiang Ejiptux ah nin:, kah bun: pwi Hebrie, cao: priex keh kah daux kix pa kaux Shipharax mai Pu-a.
Yam yuh pax kaing priex keh kah bun: Hebrie, jhak yam keh kix, phan: mawh kawn: simex pax tag pah nawh; viang mawh nan:, phan: mawh kawn: bun: deuh nawh im: ju."
Cao: priex keh an: kiex lhat graung kah Siyiex, mai kiex ang yuh awm: lox pa tawm: khunhawkham Ejiptux, kiex deuh kawn: nyawm simex khankix im: ju.
Khunhawkham Ejiptux kok kah bun: priex keh mai ah nin: kah kiex. "Yuh kah mawh pax lai yuh nin:, mai deuh kawn: simex khankix im: ju lie?"
Bun: priex keh khankiex ah nin: kah Pharaw, "Mawh kheu bun: Hebrie ang awm: bun: Ejiptux; kix koe: riang rao mai yie keh sivoe ang bun: priex keh nyang hoek kah kix."
Siyiex yuh pa mhawm: kah bun: priex keh an: kiex; mai pwi nie haoh hun: pre mai ting riang.
Mawh kheu bun: cao: priex keh lhat graung kah Siyiex, Nawh Cao: kieh kiex koe: kawnpraix.
Mai Pharaw tawx lox kah pwi nawh khawm: uik, "Can kawn: nyawm simex pa keh khaing: pwi Hebrie kukaux pex tag tik kah daux rawm: klawng: Nilax, pex deuh ngie kawn: nyawm bun: kukaux im: ju heue."
Grawng: Keh Mose
Mai pwi tix kaux khaing: nyiiex ma: Lewix, teei tix moeng kah kawn: bun: Lewix.
Bun: an: koe: kaux mai keh kawn: simex tix kaux, yam yaox nawh mhawm: grang kawn: simex an:, nawh mox kah nawh loe: khix.
Yam yaox nawh ang tix lai pon mox nawh teei kreeb pa taing: kah priem son nawh, mai kraix graix mai peeh khaox Ashaphat kah, mai sau: kawn: nyawm daux an:, hu: deuh sinax pang: priem pa koe: praok rawm: klawng:.
Mai puxke: bun: nawh pau tix jhak dee singai, sonsang tawng pa sang lih mawh kah kawn: nyawm an:,
kawn: bun: Pharaw lih hoek tix heem: rawm: daux rawm: klawng:, kawncau bun: nawh khankix, lailing hawt praok klawng:; mai yaox kah kreeb tix mu: sinax pang: priem. Mai ploi: kawncau bun: tix hu: teei mai kieh viex hoek kah tix.
Yam paoh nawh kah kreeb an:, nawh yaox kah kawn: nyawm iak; mai kawn: nyawm iak an: yiiem. Mawh kheu nan:, nawh caoxrhawm: kah kawn: nyawm an:, mai ah nin:, "In: mawh kawn: nyawm pwi Hebrie tix kauxkaux."
Khaix an: puxke: bun: nawh ah nin: kah kawn: bun: Pharaw, "Sang kieh maix aux hu: kok kah bun: Hebrie tix kauxkaux sonsang tawx kawn: nyawm in: peuex son maix lie?"
Mai kawn: bun: Pharaw ah nin: kah nawh, "Hu: heue." Mawh kheu nan:, bun: an: hu: mai kok kah miex kawn: nyawm.
Mai kawn: bun: Pharaw ah nin: kah nawh, "Teei kawn: nyawm in: hu:, mai priex son aux, aux tag tawx riang priex maix kah." Mawh kheu nan: bun: an: teei kawn: nyawm mai priex kah nawh.
Mai kawn: nyawm haok hwan:, mai viex nawh hoek kah kawn: bun: Pharaw, mai nawh lih mawh kawn: simex kawn: bun: Pharaw; nawh kok ceukaux nawh mawh Mose, nawh ah nin:, "Mawh kheu teei aux nawh khaing: daux rawm: heue."
Mose To: Kah Haktiex Midian
Kah daux tix ngaix, yam hoik ting Mose, nawh hu: kah puxaik tix, mai jhak kah kaing cien pa yuh kix; mai nawh yaox pwi Ejiptux tawk kah pwi Hebrie tix kaux, pa mawh puxaik nawh.
Nawh jhak plak in: plak an:, yam ang nawh yaox pwi tix kaux kawx, nawh pah pwi Ejiptux mai sipaung: nawh daux maik.
Yam deeh hu: nawh khaix an: tingaix, jhak heue, pwi Hebrie ra: kaux simah mai tawk paox tix; nawh ah nin: kah pwi pa phit an:, "Yuh kah mawh maix lai tawk kah paox puxaik tix lie?"
Nawh pawk ah nin:, "Mawx pa kieh maix yuh cao: kaing: mai prawng see: kah piang yix? mawh keud maix tix sang pah aux awm: hoik pah tix kah pwi Ejiptux lie?" Mawh kheu nan:, Mose hoik lhat mai keud, "Kix hoik tawng ceu inkix tete."
Yam mhong: Pharaw kah grawng: in:, nawh sawg tix pah Mose, mawh kheu nan:, Mose to: khaing: Pharaw mai hu: ot kah daux haktiex Midian; mai ngawm dex rawm: maw:.
Yam an: kawn: bun: cao: giex kaing: li Midian aliax kaux; kix hoek tix kin rawm:, mai sau: rawm: naog daux dawng: sonsang tawx yung: mai pex keeing: kix nyaux.
Cao: liang yung: hoek mai grheu: kix hu: dee singai; viang mawh nan:, Mose kaoh cung mai teem: kah kix, mai tawx yung: mai pex khankix nyaux rawm:.
Yam deeh kix kah keeing: tix Roelax, nawh ah nin:, "Yuh kah mawx pex lai cao hoek in: singaix."
Kix pawk ah nin:, "Pwi Ejiptux tix kaux, hoik taoh yix khaing: daux taix cao: liang yung: khankix, mai kin rawm: son yix, mai tawx yung: mai pex nyaux."
Nawh ah nin: kah kawn: bun: tix, "Ot nawh dee mawx? Yuh kah mawx pex lai prah nawh? Kok nawh hoek sawm:."
Mose kied nyawmrhawm: kah ot tix mai Roelax; mai nawh tawx Mose moeng kawn: bun: tix Zipawrax.
Mai nawh keh kawn: simex tix kaux, mai kix kok ceukaux nawh mawh Geshom; mawh kheu ah nawh nin:, "Aux hoik mawh nyo sinie, daux haktiex pwi tang: praix."
Yam hoik rheung: bawg yam, khunhawkham meung Ejiptux yum:." ceu pwi Isarilax khankix ngia mai riag yo kheu yuh siliex, lox riag yox kix hoik hoek kah sivoe Siyiex.
Siyiex mhong: kah lox ngia kix mai Siyiex deeh doh keud kah gumlox sijax mukheu pa yuh Nawh Cao: tau mai Abraham, mai Icak mai Yakop.
Mai Siyiex jhak kah piang kawnpraix Isarilax khankix mai tawng kah grawng: kaing pa yaox kix tix yuh heue.
Siyiex kok Mose Kah Dee gleeing Yeem Khaox
Yam liang Mose yung: mai pex paox nawh Yesaraw, pa mawh cao: giex kaing: li Midian; nawh viex yung mai pex khankix hu: plak khaix daux tiag mai hoek kah baoh Hawrap pa mawh gawng Siyiex.
Mai kawncau Simiang Siyiex lih bleeh kah nawh kah daux rao ngu sigreung yeem khaox; mai nawh jhak kah an:, jhak heue, yeem khaox an: hoik gleeing kah ngu, viang mawh nan:, yeem khaox an: ang proe.
Mai Mose ah nin:, "Aux sang hu: jhak kah riieng susai: pa daox pa am: in:, yeem an: ang chix proe jao patix lie?"
Yam yaox Simiang Siyiex kah veeh nawh tix hu: jhak, Siyiex kok kah nawh khaing: daux sigreung yeem ah nin:, "Mose! Mose!" mai nawh deeh pawk ah nin:, "Aux ot tin:."
Khaix an: Nawh Cao: ah nin:, "Paw hoek dex; Peeik kiep khaing: caong maix, mawh kheu dee cung maix mawh tiex dee pa singax."
Nawh Cao: baox ah nin:, "Aux mawh Siyiex keeing: maix, Abraham, Icak, mai Yakop."Mose mox pakngai: tix, kheu lhat graung nawh mai ang pon jhak kah Siyiex.
Mai Simiang Siyiex ah nin:, "Aux hoik yaox kah yeen ya kix ceu pwi Aux, pa ot daux meung Ejiptux, Aux mhong: lox riag yo kix kah cau cao: kaing: kah kix; mawh kheu Aux hoik tawng krax kharhawm: kharhi: kix,
Mai Aux hoek sonsang taoh kix khaing: daux tawm: taix pwi Ejiptux, mai sonsang deeh teei Aux kix lih khaing: daux haktiex an:, mai tawx kix hu: kah haktiex pa mhawm: pa vieh, dee lih rawm:teeih mai rawm: hia:, dee ot ceu pwi Khananix, ceu pwi Hitix, ceu pwi Amawrix, ceu pwi Pharazix, ceu pwi Hiwix mai ceu pwi Yebusix khankix.
"Yamin:, jhak heue, krax yiiem kawnpraix Isarilax khankix hoik hoek kah Aux, mai Aux hoik yaox kah pa yeen ya ceu pwi Ejiptux kah kix.
"Hoek yamin:, Aux sang ploi: maix hu: kah khuhawkham Pharaw mai kieh maix teei pwi Aux, kawnpraix Isarilax lih khaing: Ejiptux."
Viang mawh nan:, Mose deeh ah nin: kah Siyiex, "Mawh aux pwi yuh kah mawx, lai sang pon hu: kah khunhawkham Pharaw, mai teei kawnpraix Isarilax khankix lih khaing: meung Ejiptux."
Nawh Cao: ah nin:, "Aux tag ot tau mai maix; mai in: tag mawh mhai: sakse son maix, kheu Aux ploi: maix hu: Yam hoik viex maix ceu pwi lih khaing: meung Ejiptux, maix tag krub kah Siyiex kah piang gawng in:."
Mose ah nin: kah Siyiex, "Yam hoek aux kah kawnpraix Isarilax khankix, aux sang ah nin: kah kix,Siyiex keeing: pex hoik ploi: aux hoek kah pex;: phan: kix deeh chawk aux,mawh kaux nawh patix?: aux sang krai yuh kah mawx kah kix?"
Siyiex ah nin: kah Mose, "AUX MAWH AWM: PA MAWH AUX." Mai Nawh ah nin:, krai yuh nin: kah ceu pwi Isarilax, KAW PA MAWH AUX, hoik ploi: aux hoek kah pex"
Siyiex deeh ah nin: kah Mose, mai ah nin: kah pwi Isarilax,Simiang Siyiex keeing: pex, Siyiex Abraham, Icak, mai Yakop, hoik ploi: aux hoek kah pex In: mawh ceukaux aux leeing ju leeing phan:, in: mawh ceukaux pa caw doeh ceucat pex tix doh keud kah tix ju hoik tix ju.
"Hu: mai kraix khrawm: cub kuad song: pwi Isarilax khankix, "Simiang Siyiex keeing: pex, Siyiex Abraham, Icak, mai Yakop hoik bleeh kah aux, ah nin:, "Aux hoik yaox can ceu pa yuh pwi meung Ejiptux khankix kah pex;"
"Mai Aux hoik yuh sijax mukheu sonsang teei pex lih khaing: krax pa kharhawm: khaing: Ejiptux, mai kieh pex hu: kah haktiex ceu pwi Khananix, ceu pwi Hitix, ceu pwi Amawrix, ceu pwi Pharazix, ceu pwi Hiwix mai ceu pwi Yebusix, dee lih rawm:teeih mai rawm: hia:."
Kix tag nghiiet lox maix, maix mai kuad song: Isarilax tag hu: kah khunhawkham Ejiptux mai ah nin: kah nawh;Simiang Siyiex ceu pwi Hebrie, hoik sipub kah yix, mai yamin: yuh bwanson:, kieh yix hu: krax daux tiag loe: singaix krax, sonsang rawg yix bwan: mai krub kah Simiang Siyiex.
Aux tawng kah ang khunhawkham Ejiptux ploi: maix lih hu: yie yie, viang yaox kawx taix pa ting siawpsibrawm Aux.
"Aux tag nyeu tiex Tix mai ciyang kah pwi Ejiptux tau mai pa daox pa am: pa yuh Aux; khaix an: nawh tag ploi: maix lih hu:,
Aux tag kieh pwi in: koe: min: plakngai sivoe ceu pwi Ejiptux; yam lih hu: pex, pex tag ang yaox tix lih hu: mai taix yi tix,
bun: kukaux tag deeh mhaing: kraung mau, kraung khri:, mai kraung ceep khaing: paoxplawg paoxnyhawm: kah bun: pa ot kah nyiiex nawh khankix, mai tag ceep kraungkhrai: an: khankix kah kawn: simex kawn: bun: tix, mai tag rhim: hu: khaing: pwi Ejiptux heue.
Mhai: Pa Daox Pa Am: Son Pharaw
Mose deeh ah nin:, "Phan: kix ang yumrhawm: kah aux phan: ang mawh nan: ang nghiiet kah lox aux, mawh kheu kix tag ah nin:, Simiang Siyiex ang tie bleeh kah maix."
Simiang Siyiex ah nin: kah nawh, "Mawh tix pa koe: daux taix maix lie?" Nawh ah nin:, "Koe: Khaoxgix tix gawng:."
Nawh Cao: ah nin:, "Sivuat an: piang tiex," yam sivuat nawh an: piang tiex, mai khaoxgix an: lih tix mawh siuing:; mai Mose to: khaing: an:.
Khaix an: Simiang Siyiex ah nin: kah Mose, "Nyeu taix maix, mai giex kah sidax nawh." (Mose nyeu taix tix mai giex an:, an: deeh lih tix mawh khaoxgix daux taix nawh,)
"Kix tag yumrhawm: kah Simiang Siyiex pa mawh Siyiex keeing: kix, Siyiex Abraham, Icak, mai Yakop, pa hoik lih bleeh kah maix."
Simiang Siyiex baox ah nin: kah nawh, "Sau: taix maix kah naok maix." Mai nawh sau: taix tix kah naok tix, mai yam deeh teei nawh taix tix lih, taix nawh lih mawh jhawm: saux sipawb paing awm: rawmrha:.
Nawh Cao: ah nin:, "Baox sau: taix maix kah naok maix." Mawh kheu nan:, nawh baox sau: taix tix kah naok tix, mai yam deeh teei nawh taix tix lih, jhak heue, taix nawh deeh mh awm: awm: neh nawh.
"Phan: kix ang nyang yumrhawm: kah maix," "Phan: ang mawh nan:, ang yum:rhawm kah mhai: sakse pa yuh maix bawb tix, kix tag yumrhawm: kah mhai: sakse pa yuh maix bawg khaix."
Phan: kix ang yumrhawm: kah mhai: sakse in: ra: ceu, mai ang cu tix nghiiet kah lox maix, maix tag kin rawm: khaing: daux rawm: klawng: Nilax mai klup kah piang tiex kroh; rawm: pa kin maix khaing: rawm: klawng: Nilax tag lih tix mawh nham: kah piang tiex kroh."
Mai Mose ah nin: kah Simiang Siyiex, "Simiang Siyiex aux eue, aux dawg mawh pwi pa ang chix sikah, tom: yam jah Maix Cao: tix sikah tau mai kawncau maix kawx, aux mawh pwi pa cien jheeh mai kle:."
Khaix an:, Simiang Siyiex deeh ah nin: kah nawh, "Mawh pwi mawx pa phan: kah jheeh pwi lie? Phan: ang mawh nan:, mawh pwi mawx pa phan: pwi deux, lheet, chix yaox, mai dug ngai: lie? Ang hoik mawh Aux Simiang Siyiex lie?
"Mawh kheu nan:, hu: heue, Aux tag ot tau mai jheeh maix mai gau maix kah pa sang krai maix."
Viang mawh kawx nan:, nawh ah nin:, "Simiang Siyiex aux eue, kieh pwi tang: kaux hu: liak."
Mawh kheu nan:, Simiang Siyiex song: rhawm: kah Mose mai ah nin:, "Puxke: maix Arun pwi Lewix koe: ang mawh lie? Aux tawng kah chix sikah nawh mhawmmhawm:; jhak heue, nawh hoik hoek tix rieb maix yamin:, yam yaox nawh maix nawh tag gauxrhawm: kah daux rhawm: tix."
Maix tag yaox tix sikah kah nawh mai sau: gumlox kah daux jheeh nawh, Aux tag koe: tau mai jheeh maix khawm: jheeh nawh, Aux tag gau pex kah pa sang yuh pex.
Nawh tag sikah tang: maix kah pwi khankix; mai nawh tag mawh jheeh tang: maix, mai maix tag mawh tang: Siyiex kah son nawh.
"Maix tag giex khaoxgix in: daux tawm: taix tix, sonsang yuh maix mhai: sakse heue,"
Mose Hu: Kah Meung Ejiptux
Mose deeh ing: kah paox tix Yesaraw mai ah nin: kah nawh, "Yuh bwanson: kieh aux deeh ing: kah puxaik tix pa ot daux Ejiptux, mai jhak kah kawn: im: ju kix lie?." Mai Yesaraw ah nin: kah Mose, "Hu: kah daux pa nhim:."
Mai Simiang Siyiex ah nin: kah Mose daux meung Midian, "Deeh ing: kah meung Ejiptux, mawh kheu pwi pa sawg kah ju maix khankix hoik yum:."
Mose teei moeng tix mai kawnpraix tix, mai kieh kix brug la, mai kix deeh ing: kah haktiex Ejiptux, mai Mose teei tix viex khaoxgix Siyiex daux tawm: taix tix.
Mai Simiang Siyiex ah nin: kah Mose, "Yam deeh ing: maix kah meung Ejiptux, maix tag jhi: siawpsibrawm pa daox pa am: pa ap Aux daux tawm: tai maix sivoe simiang Pharaw, viang mawh nan:, Aux tag kieh rhawmrhi: nawh kiien:, sonsang ang nawh kieh kix hu:."
Mai maix tag ah nin: kah simiang Pharaw, "Simiang Siyiex ah nin:, Isarilax mawh kawn: simex Aux mai kawn: ai: Aux,
"Mai Aux ah nin: kah maix, "Ploi: kawn: simex Aux sonsang hu: krub kah Aux," phan: maix thiang: ang tawx nawh hu:, aux tag pah kah kawn: ai: maix."
Mai yam hu: kix krax, Simiang Siyiex sawg kah Mose sonsang pah kah nawh.
Khaix an: Zibawrax teei simaox pa lawm mai pat hak kawn: simex tix, mai an: teeh kah caong Mose, mai ah nin:, "Maix mawh mex aux pa dex dawd mai nham: aux."
Nawh Cao: ploi: Mose hu:, khaix an: moeng nawh ah nin:, mawh kheu grawng: pa pat hak, "Maix mawh mex pa dex dawt mai nham: kah aux."
Mai Simiang Siyiex ah nin: kah Arun, "Hu: kah daux tiag, sonsang sipub kah Mose." Nawh hu: sipub Mose kah piang gawng Siyiex mai ngheet kah nawh.
Mai Mose krai Arun mhong: gumlox Simiang Siyiex, pa hoik ploi: kah nawh, mai mhai: pa daox pa am: pa tawm: Nawh Cao: khawm: uik.
Mose mai Arun hu: kraix khrawm: kuad song: pwi Isarilax,
Mai Arun krai gumlox pa hoik ah Simiang Siyiex kah Mose khawm: uik, mai hoik yuh mhai: pa daox pa am: kah sivoe pwi khankix.
Yam hoik mhong: pwi khankix kah hoek fi: Simiang Siyiex kah pwi Isarilax mai yaox Nawh Cao: hoik kia: ngien kah krax kha: kix rhawm: tix, kix yumrhawm: num: kaing: tix mai krub kah Nawh Cao: heue.
Mose Mai Arun Hu: Kah Pharaw Bawg Tix
Mose mai Arun hu: ah nin: kah Pharaw, "Simiang Siyiex pwi Isarilax ah nin:, kieh pwi Aux Isarilax hu: sonsang yuh kix pwie kah Aux, daux tiag"
Pharaw ah nin:, "Mawh Siyiex pa yuh kah mawx! pa sang nghiiet aux lox, mai sonsang ploi: pwi Isarilax lie? Aux ang tawng kah Simiang Siyiex mai aux tag ang pon ploi: kix hu:."
Kix ah nin:, "Siyiex ceu pwi Hebrie hoik sipub kah yix; kieh yix hu: krax daux tiag loe: ngaix mai rawg bwan: tan lu kah Simiang Siyiex tix, phan: ang mawh nan:, Nawh Cao: tag kieh jhawm: saux preng mai lawm vaig hoek kah piang yix."
Khunhawkham Ejiptux ah nin: kah kix, "Mose mai Arun eue, yuh kah mawx pex lai sang teei pwi inkix khaing: kaing pa yuh kix? Deeh hu: yuh kaing jhaw: pa yuh pex.
Mai Pharaw ah nin:, "Jhak heue, yamin: pwi haktiex khankix tom: nie pex lai sang kieh kix laux tix khaing: kaing jhaw: pa yuh tix.
Daux tix ngaix an: Pharaw tawx lox tix hu: kah cao: thung: cao: bung: kaing jhaw: khankix ah nin:,
"Pex tag ang lai yaox tix tawx brex nghox sonsang yuh kix tiex mak-ut awm: sivoe, kieh kix tang: hu: sawg brex nghox son cao: tix.
"Kieh kix yuh tiex mak-ut awm: diag yuh kix sivoe, paw doh kieh yawm ceeix kawx, mawh kheu nieh kix, kix tom: riag yo ah nin:,kieh yix hu: krub kah Siyiex tix,
Baox tawx kaing tom: nie kah piang kix sonsang nie taug mao kix mai paw kieh kix nghiiet kah lox pa ang mawh."
Cao: thong: cao: bung: kaing jhaw: khankix hu: mai ah nin: kah pwi khawm: uik, Pharaw ah nin:,aux ang lai tawx brex nghox kah pex.
"Hu: sawg brex nghox kah dee yaox pex son cao: tix, viang mawh nan: kaing jhaw: pex tag ang pon tix yawm ceeix kawx"
Pwi khankix hu: ku sidauh kah daux haktiex Ejiptux, sonsang khrawm: nyhee: tang: brex nghox.
Cao: thung: cao: bung: kaing jhaw: khankix ah nin:, "Nied yuh kaing jhaw: yuh pex grum naog ku singaix yam koe: brex nghox."
Cao: thung: cao: bung: kaing jhaw: pwi Isarilax khankix pa hoik yaog Pharaw kix mawh cao: kaing:, kix khin: mai tawk kah kix mai chawk kix ah nin:, "Yuh kah mawx pex ang lai pon yuh tiex mak-ut grum naog awm: diag pa yuh glang: kah: in: kawx mai singaix."
Yam an: cao: thung: cao: bung: kaing jhaw: pwi Isarilax khankix hoek mai riag yo kah Pharaw ah nin:, "Maix lai tawx kaing jhaw: pa yuh nin: kah kawncau maix yuh kah mawx?"
Kix ang lai tawx brex nghox kah kawncau maix, kix ah nin: kah yix,yuh tiex mak-ut, jhak heue, kix tawk kah kawncau maix khankix, yamin: phimap koe: kah piang pwi maix.
Mai nawh ah nin:, "Pex kied sidaing: nieh; mawh kheu nan:, pex tom: ah nin:,kieh yix hu: krub kah Simiang Siyiex
"Hu: yuh kaing yamin:; Brex nghox tag ang tawx kah pex, viang mawh nan:, pex tag yaox tix tawx tiex mak-ut awm: diag prim:."
Mai cao: kaing: pwi Isarilax khankix yaox kah hoek krax pa kharhawm: kah piang tix kheu pa ah nin:, "Pex tag ang yaox tix kieh tiex mak-ut yuh tix yawm khaing: diag prim:."
Yam hoik lih kix khaing: Pharaw, kix sipub Mose mai Arun pa cung tix rieb kix;
Mai kix ah nin: kah kiex, "Kieh Simiang Siyiex jhak mai prawng ca: kah piang pax,mawh kheu hoik kieh yix seeing: brai: kah sivoe ngai: Pharaw, mai sivoe ngai: kawncau nawh khankix, sonsang lawd kix vaig tix mai pah kah yix heue."
Pa Pon Isarilax Krax Luat Luan
Mose deeh hoek kah Simiang Siyiex mai ah nin:, "Simiang Siyiex eue, yuh kah mawh Maix Cao: lai yuh krax pa kharhawm: kharhi: kah piang ceu pwi in: yuh kah mawx? Maix Cao: lai ploi: aux hu: yuh kah mawx?
Tom: singaix jah aux tix hoek krai lox kah Pharaw kah daux ceukaux Maix Cao:, Pharaw tawx krax kharhawm: kah pwi inkix, Maix Cao: ang taoh kah pwi cie Maix heue."
Simiang Siyiex ah nin: kah Mose, "Yamin: maix tag yaox kah pa yuh Aux kah Pharaw; mawh kheu taix pa ting siawpsibrawm Aux nawh tag ploi: kix hu: tau mai taix pa koe: siawpsibrawm Aux, nawh tag grheu: kix lih khaing: haktiex."
Mai Siyiex ah nin: kah Mose, "Aux mawh Simiang Siyiex."
Aux lih bleeh kah Abraham, kah Icak mai kah Yakop, awm: mawh Aux Siyiex pa ting riang ting rao, viang Aux jhi: kix kah ceukaux Simiang Siyiex kawx, kix ang tawng kah aux.
"Aux hoik yuh sijax mukheu tau mai kix, sonsang tawx Aux haktiex Khanan kah kix, pa mawh haktiex dee lailing kix tix mawh nyo sinie.
Aux mhong: kah lox ngia pwi Isarilax khankix, pa kieh pwi Ejiptux kix yuh kaing pa kin: mai deeh doh keud kah gumlox sijax mukheu Tix.
"Mawh kheu nan:, ah nin: kah pwi Isarilax,Aux mawh Simiang Siyiex; Aux tag viex pex lih khaing: greem: beeh glawm: pa kin: khaing: pwi Ejiptux, mai Aux tag taoh pex khaing: kaing siliex pa yuh pex, mai nyeu plawng: taix Tix taoh pex khaing: krax pa ciyang pa ting pa lhaong:,
"Aux tag teei pex mawh pwi Tix, mai Aux tag mawh Siyiex pex; pex tag tawng Aux mawh Simiang Siyiex pa viex pex lih khaing: greem: beeh glawm: pa kin: yuh pwi Ejiptux.
"Mai Aux tag viex pex hu: kah daux haktiex, pa hoik tiextu Aux tix tawx kah Abraham, Icak mai Yokop, Aux tag tawx haktiex an: mawh sinngao pex. Aux mawh Simiang Siyiex"
Mose ah nin: kah pwi Isarilax; viang mawh nan:, kix ang nghiiet kah lox Mose, mawh kheu hoik kied taug mao rhawmrhi: kix kah yaox tix krax kharhawm:.
Simiang Siyiex ah nin: kah Mose,
"Hu: laig mai krai kah Pharaw, khunhawkham Ejiptux, sonsang ploi: pwi Isarilax khankix lih hu: khaing: haktiex nawh.
Mose ah nin: kah Simiang Siyiex, "Jhak heue, pwi Isarilax ang nghiiet kah lox aux; Pharaw nie sang nghiiet kah lox pa lih khaing: jheeh aux, pa ang nyang pat hak tix yuh kah mawx?
Simiang Siyiex tawm: lox kah Mose mai Arun, son pwi Isarilax mai kah Pharaw meung Ejiptux, sonsang teei kix pwi Isarilax khankix lih khaing: daux haktiex Ejiptux heue.
Grawng: Nyiiex Ma: Mose Mai Arun
Inkix mawh cao: kaing: daux nyiiex ma: keeing: kix:, kawn: ai: Isarilax mawh Rubin, kawn: simex Rubin khankix mawh Hanok, Phalux, Hezaron mai Khamix. Inkix mawh pwi nyiiex ma: Rubin.
Mai kawn: simex Simion khankix mawh Yemoelax, Yamin, Awhat, Yakhin, Zawha mai Shawlax, kawn: simex pa pon khaing: bun: Khanan, inkix mawh pwi nyiiex ma: Simion.
Inkix mawh ceukaux kawn: simex Lewix, awm: pa koe: doeh simie ceucat kix, pa mawh Geshon, Kawhat mai Merarix. Ju Lewix koe: tiyieh tingoe: aliah num.
Kawn: simex Geshon khankix mawh Libanix, mai Shimix, awm: pa koe: doeh ceucat nyiiex ma: kix.
Mai kawn: simex Kawhat khankix mawh Amaran, Izaha, Hebaron mai Awzalax, mai ju Kawhat koe: tiyieh tingoe: loe: num.
Kawn: simex Merarix khankix mawh Mahalix, mai Mushix, inkix mawh pwi daux nyiiex ma: Lewix, awm: pa koe: doeh simie ceucat kix.
Amaram teei tix moeng Yawkhebat, pa mawh nan: keeing: tix mai nawh keh Arun mai Mose, ju Amaram koe: tiyieh tingoe: aliah num.
Kawn: simex Izaha khankix mawh Kawrax, Nephiet, mai Zikharix.
Mai kawn: simex Awzalax mawh Mishelax, Elazapha mai Titirix.
Arun teei tix moeng Elishebax, kawn: bun: Aminadat nan: Nashon; nawh keh Nadat, Abihux, Elaza, mai Itama.
Kawn: simex Kawrax khankix mawh Asirax, Elakanax, mai Abiasap, inkix mawh doeh nyiiex ma: Kawrax.
Kawn: simex Arun, Elaza teei tix moeng kawn: bun: Putelax, mai keh Phinahat, inkix mawh cao: kaing: keeing: ceu pwi Lewix khankix, awm: pa koe: doeh nyiiex ma: kix.
Inkiex mawh Arun mai Mose. "Pa hoik krai Simiang Siyiex, viex ceu pwi Isarilax lih khaing: haktiex Ejiptux awm: cao: kaing: naing lien:."
Inkiex mawh pwi pa laig hu: sikah kah pharaw khunhawkham Ejiptux, sonsang viex pwi Isarilax khankix lih hu: khaing: meung Ejiptux pa mawh Mose mai Arun heue.
Arun Mawh Pwi Pa Sikah Tang: Mose
Kah daux singaix yam sikah Simiang Siyiex kah Mose kah daux haktiex Ejiptux;
Simiang Siyiex ah nin: kah kah Mose, "Aux mawh Simiang Siyiex; krai kah Pharaw khunhawkham Ejiptux, can pa krai Aux kah maix."
Mose ah nin: kah Simiang Siyiex, "Jhak heue, aux mawh pwi pa cien jheeh, mai pa kle:; Pharaw tag sang nghiiet lox aux yuh kah mawx?"
Simiang Siyiex ah nin: kah Mose, "Jhak heue, Aux tag kieh maix awm: Siyiex kah Pharaw; mai puxke: maix Arun tag mawh cao: jhai: maix.
Maix tag krai gumlox pa hoik tawm: Aux kah maix khawm: uik; mai puxke: maix Arun tag krai kah Pharaw sonsang ploi: nawh pwi Isarilax khankix lih khaing: haktiex nawh.
Aux tag kieh Pharaw kiien: rhawm:, mai kieh mhai: sakse pa daox pa am: Aux khankix, nie baox haoh hun: kah daux haktiex Ejiptux,
Pharaw tag ang nghiiet kah lox maix; Aux tag deuh taix Tix kah piang Ejiptux mai viex kru naing Tix mai pwi ceu Tix kawnpraix Isarilax khankix, lih khaing: Ejiptux tau mai pa ciyang pa ting pa lhaong:.
"Mai pwi Ejiptux khankix tag tawng mawh Aux Simiang Siyiex, yam nyeu Aux taix tix kah piang Ejiptux mai viex pwi Isarilax lih khaing: sinax kix.
Mose mai Arun hoik yuh awm: pa tawm: Simiang Siyiex kah kiex.
Mose koe: ju tix daix num, mai Arun koe: ju tix daix loe: num, yam sikah kiex kah Pharaw.
Khaoxgix Pa Daox Pa Am: Mose
Mai Simiang Siyiex ah nin: kah Mose mai Arun;
"Yam ah Pharaw yuh nin: kah pax, "Jhi: aux yaox mhai: pa daox pa am: yuh pax," khaix an:, maix tag ah nin: kah Arun; "Teei khaoxgix maix mai sivuat sivoe ngai: Pharaw, mai an: tag lih mawh siuing:"
Mose mai Arun laig hu: kah Pharaw, mai yuh awm: pa hoik tawm: Simiang Siyiex, mai Arun sivuat khaoxgix tix sivoe Pharaw mai kawncau nawh khankix, mai an: lih mawh siuing:.
Khaix an:, Pharaw kok kah pwi koe: pingnya cuyi: mai cao: chix simeed, mai kix pa chix sat kah daux meung Ejiptux kawx hawt yuh awm: pa hoik yuh kiex.
Mawh kheu kix kukaux sivuat khaoxgix tix, mai an: khankix lih mawh siuing:. Viang mawh nan:, khaoxgix Arun bleet kah khaoxgix cie kix.
Pharaw ca: kawn: koe: rhawm: kien: mai nawh ang nghiiet kah lox kix, awm: pa hoik krai Simiang Siyiex heue.
Rawm: Lih Tix Mawh Nham:
Simiang Siyiex ah nin: kah Mose, "Pharaw kied kiien: rhawm: mai nawh thiang: ang kieh pwi khankix hu:.
"Hu: kah Pharaw plak ponngawb, yam lih hu: nawh kah daux rawm:, mai maix krox nawh kah praok rawm: klawng:, mai giex khaoxgix pa hoik lih tix mawh siuing: kah daux taix maix.
Maix tag ah nin: kah nawh, Simiang Siyiex ceu pwi Hebrie, ploi: aux hoek kah maix, mai kieh aux ah nin:, "Kieh pwi Aux hu:, sonsang krub kix kah Aux daux tiag; jhak heue; tom: yamin: maix ang nyang cu tix nghiiet."
Simiang Siyiex ah nin:, "Mawh kheu maix tag tawng Aux mawh Simiang Siyiex, jhak heue, aux lah rawm: klawng: Nilax kah khaoxgix pa koe: daux taix tix, mai rawm: an: tag lih mawh nham:.
Kax pa koe: daux rawm: klawng: Nilax khankix tag yum:, mai rawm: klawng: Nilax tag lih sioe: cux, mai pwi Ejiptux khankix, tag seeing: nyaux kah rawm: klawng: an:.""
Simiang Siyiex ah nin: kah Mose, "Krai kah Arun,teei khaoxgix maix mai nyeu taix tix kah piang rawm: Ejiptux mai kah piang klawng: iak, kah piang klawng: ting, kah piang rawm: nhawng: mai kah piang rawm: dung rawm: maw:, kudauh kudee daux haktiex Ejiptux mai kah daux tawg khaox, aw: simaox"
Mose mai Arun yuh awm: lox tawm: Simiang Siyiex, nawh yaog khaoxgix tix, mai lah kah rawm: Nilax kah plak sivoe ngai: Pharaw; mai sivoe ngai: kawncau nawh khankix, Mai rawm: khawm: uik pa koe: daux rawm: klawng: Nilax lih tix mawh nham: uik heue.
Kax pa koe: daux rawm: klawng: Nilax yum: rawm: klawng: Nilax lih sioe: cux, mawh kheu nan:, pwi Ejiptux khankix ang lai pon nyaux rawm: khaing: daux rawm: klawng: Nilax; mawh kheu hoik lih naog nham: kah daux haktiex Ejiptux kudauh kudee.
Mai cao: chix simeed daux haktiex Ejiptux khankix kawx, yuh awm: cuyi: pa chix kix; mai rhawmrhi: Pharaw nied tix kiien:, mai ang nghiiet kah lox kix; awm: pa hoik krai Simiang Siyiex.
Pharaw veeh tix ing: kah nyiiex tix, mai nawh ang deuh koe: ceu koe: mu: kah daux rhawm: tix.
Mawh kheu nan:, pwi Ejiptux khankix, kaong: rawm: maw: hawt rawm: klawng: Nilax. Sonsang nyaux kix kah, mawh kheu ang kix lai pon nyaux kah rawm: khaing: rawm: klawng: Nilax.
Yam hoik luan aliah singaix khaix lah Simiang Siyiex kah piang rawm: klawng: Nilax heue.
Pa Kharhawm: Bawg Ra: Kah Khet
Simiang Siyiex ah nin: kah Mose, "Laig hu: kah Pharaw mai ah nin: kah nawh,Simiang Siyiex ah nin:, kieh pwi Aux lih hu:, sonsang krub kix kah Aux.
Phan: maix thiang: tix ang kieh kix lih hu:, jhak heue, Aux tag tawx krax kharhawm: kah haktiex maix kah khet;
rawm: klawng: Nilax hoik naog kah khet khankix pa tag hoek kah piang maix kah daux lawg mai kah piang ku: it pex, kah daux nyiiex kawncau maix khankix, mai pwi maix khankix, daux nyiiex priex mai kah daux klong: yuh pex khaomun khankix;
"Khet khankix tag haok kah piang maix mai kah piang pwi maix, mai kah piang kawncau maix khankix.""
Mai Simiang Siyiex ah nin: kah Mose, "Ah nin: kah Arun, nyeu taix tix tau mai khaoxgix tix kah piang rawm: khankix, piang rawm: klawng: iak, piang rawm: klawng: ting mai piang rawm: dung khankix mai kieh khet hoek naog kah piang haktiex Ejiptux"
Arun nyeu taix tix kah piang rawm: khankix daux meung Ejiptux; mai khet khankix lih kheem: kah haktiex Ejiptux.
Mai cao: chix simeed khankix kawx yuh awm: pa chix tix mai viex khet khankix hoek kah piang haktiex Ejiptux.
Pharaw kok kah Mose mai Arun ah nin:, "Khyox khaw: kah Simiang Siyiex, sonsang deeh teei Nawh Cao: khet khankix hu: singai khaing: aux mai khaing: pwi aux; mai aux tag kieh pwi in: khankix hu: krub kah Simiang Siyiex."
Mai Mose ah nin: kah Pharaw, "Tat bawg yam pa sang khyox khaw aux son maix, son kawncau maix mai son pwi maix, sonsang deeh yuh aux khet khankix lauxleeing: khaing: maix, mai khaing: nyiiex ma: pex khawm: uik, mai deeh kieh kix ot kah daux rawm: klawng: Nilax khaing:."
Mai Pharaw ah nin:, "Pasax." Mai Mose ah nin:, "Kieh awm: pa ah maix, maix tag tawng kah pwi tix kaux ang doh awm: Simiang Siyiex yix.
"Khet khankix tag lih hu: khaing: maix khaing: daux nyiiex ma: maix, khaing: kawncau maix khankix, mai khaing: pwi maix; kix tag ot daux rawm: klawng: Nilax khaing:."
Mose mai Arun lih hu: khaing: Pharaw; mai Mose kok yo kah Simiang Siyiex, son grawng: khet khankix, pa hoik kieh Nawh Cao: tuktiaktukte: kah Pharaw.
Simiang Siyiex yuh awm: pa khyox khaw: Mose; khet khankix yum:, daux nyiiex daux yaong: khankix, mai daux kaung: khankix.
Kix khrawm: mai pum: tix deuh, mai haktiex hoik sioe: cux.
Yam yaox Pharaw kah hoik yiien: ceu an: khankix, nawh deeh kiien: rhawm: mai ang nghiiet lox kix, awm: pa hoik krai Simiang Siyiex heue.
Pa Kharhawm: Bawg Loe: Kah Maing
Simiang Siyiex ah nin: kah Mose, "Ah nin: kah Arun, nyeu khaoxgix maix mai lah kah phawng: tiex piang tiex, mai an: tag lih tix mawh maing, kah daux haktiex Ejiptux khawm: uik"
Mai kiex yuh awm: an:, Arun nyeu taix tix tau mai khaoxgix tix, mai lah kah phawng: tiex, mai an: lih tix mawh maing kah piang pwi, mai piang toast kham: uik, mai phawng: tiex lih mawh maing kah daux haktiex Ejiptux khawm: uik.
Cao: simeed khankix coca: tix yuh an: awm: pa chix tix, viang mawh nan:, kix ang pon yuh, mawh kheu nan:, Maing hoik lih koe: piang pwi mai tosat.
Mai cao: simeed khankix ah nin: kah Pharaw "In: mawh gien: taix siawpsibrawm Siyiex." Viang mawh nan: Pharaw ca: kawn: kiien: rhawm:, nawh ang nghiiet kah lox kix awm: pa krai Simiang Siyiex.
Pa Kharhawm: Bawg Pon: Kah Prawp
Simiang Siyiex ah nin: kah Mose, "Kaoh caocao ponngawb, mai hu: pau Pharaw yam hoek hu: nawh kah rawm: klawng:, mai ah nin: kah nawh,Simiang Siyiex ah nin:, "Kieh pwi Aux lih hu:, sonsang krub kix kah Aux.
Phan: maix ang kieh pwi Aux khankix lih hu:, Aux tag ploi: phung: prawp khankix hoek kah piang maix, mai kah piang kawncau maix, mai kah piang pwi maix, mai kah nyiiex ma: maix khawm: uik, mai nyiiex ma: pwi Ejiptux tag naog kah phung: prawp mai kah piang tiex dee cung kix."
"Kah daux singaix an:, Aux tag gwieh tix deuh haktiex Goshen kah dee ot pwi Aux, mai phung: prawp tag ang koe: tan:, sonsang tawng maix kah mawh Aux Simiang Siyiex daux sigreung haktiex.
"Aux tag yuh mhai: pa daox pa am: sinax pwi Aux mai pwi maix, mhai: pa daox pa am: in: tag lih mawh pasax.""
Simiang Siyiex yuh ceu in:; mai phung: prawp khankix hoek kah daux nyiiex Pharaw mai kah daux nyiiex kawncau nawh khankix, mai kah daux haktiex Ejiptux khawm: uik hoik lauxleeing: kah jao phung: prawp.
Pharaw kok kah Mose mai Arun ah nin:, "Hu: heue, krub kah Simiang Siyiex pex kah daux haktiex in:.
Mai Mose ah nin:, ang khaw: tix yuh nan:, mawh kheu ceu pa tan pa lu kah Simiang Siyiex mawh ceu pa seeing: pa brai: pwi Ejiptux khankix kah, phan: yix tan lu ceu pa seeing: pa brai: pwi Ejiptux khankix kah sivoe ngai: kix, kix tag dheem: yix kah simaox ang mawh lie?"
"Yix caw tix hu: loe: singaix krax kah daux tiag mai tan lu kah Simiang Siyiex yix, awm: pa hoik tawm: Nawh Cao: kah yix."
Mai Pharaw ah nin:, "Aux tag kieh pex hu: krub Simiang Siyiex pa mawh Siyiex pex, kah daux tiag; mawh ngie ang pex yaox tix hu: dee singai khaing:. Khyox khaw: son aux liak."
Khaix an: Mose ah nin:, "Aux lih hu: khaing: maix mai aux tag rawg bwan: kah Simiang Siyiex, sonsang lih hu: phung: prawp an: khankix pasax khaing: maix, khaing: kawncau maix, mai khaing: pwi maix khankix, viang mawh nan:, paw lai kieh maix baox pie lhen:, son ang maix ploi: pwi khankix hu: krub kah Simiang Siyiex."
Mose lih hu: khaing: Pharaw mai rawg bwan: kah Simiang Siyiex.
Simiang Siyiex yuh awm: lox pa rawg Mose, mai grheu: phung: prawp khankix khaing: Pharaw, khaing: kawncau nawh, mai khaing: pwi nawh khankix, tom: ang lai deuk tix mu: kawx.
Pharaw baox nie kiien: rhawm: yamin:, mai nie ang ploi: pwi khankix hu: heue.
Pa Kharhawm: Bawg Phwan: Kah Jhawm: Saux Preng Khawng: Brie
Khaix an: Simiang Siyiex ah nin: kah Mose, "Laig hu: ah nin: kah Pharaw, Simiang Siyiex, pwi Hebrie ah nin:, "Kieh pwi Aux lih hu:, sonsang krub kix kah Aux.
"Phan: maix kawn: thiang: kawn: ah tix ang kieh kix lih hu:,
jhak heue, Taix Simiang Siyiex tag hoek tau mai jhawm: saux preng, kah piang khawng: brie pex daux kaung:, brung, la, kala-uk, moi, mai yung: khankix.
Simiang Siyiex tag yuh ceu pa tang: pa siyox sinax khawng: brie pwi Isarilax mai khawng: brie pwi Ejiptux khankix, mawh kheu nan:, khawng: brie pwi Isarilax tag ang yum: tix mu: kawx.""
Simiang Siyiex krai tix deuh bawg yam ah nin:, "Pasax Simiang Siyiex tag sang yuh ceu in: khankix kah daux haktiex in:."
Kah daux pasax Simiang Siyiex yuh ceu in: khankix mai kieh khawng: brie pwi Ejiptux yum: khawm: uik, viang mawh nan:, khawng: brie pwi Isarilax khankix ang yum: tix mu: kawx.
Pharaw ploi: pwi hu: jhak mai tawng kah ang khawng: brie pwi Isarilax khankix yum: tix mu: kawx, viang mawh nan:, rhawmrhi: Pharaw ca: kawn: kiien: mai ang cu tix ploi: pwi khankix hu: heue.
Pa Kharhawm: Bawg liah Kah Saux Muad
Simiang Siyiex ah nin: kah Mose mai Arun, "Teei nyaox tix dawm khaing: glah ngu, mai kieh Mose rhuat plak raoma: kah sivoe ngai: Pharaw.
"Mai phawng: nyaox an: tah kah daux haktiex Ejiptux khawm: uik, mai an: lih mawh jhawm: saux muad kah piang pwi mai khawng: brie kah daux meung Ejiptux kudauh kudee."
kix teei nyaox khaing: glah ngu mai cung kah sivoe Pharaw, mai Mose rhuat nyaox an: plak raoma:, mai lih mawh jhawm: saux muad kah piang pwi mai khawng: brie khankix.
Mai cao: chix simeed ang lai pon cung sivoe Mose jao jhawm: saux muad, mawh kheu jhawm: saux muat koe: kah piang cao: chix simeed, mai kah piang pwi Ejiptux khawm: uik.
Simiang Siyiex kieh rhawm: Pharaw kiien:, mai nawh ang nghiiet kah lox kix; awm: hoik krai Simiang Siyiex kah Mose.
Pa Kharhawm: Bawg Aliah Kah Pre:
Khaix an: Simiang Siyiex ah nin: kah Mose, "Kaoh ponngawb caocao, mai cung kah sivoe Pharaw, mai ah nin: kah nawh, "Simiang Siyiex pwi Hebrie ah nin:, "Kieh pwi Aux lih hu:, sonsang tan lu krub kix kah Aux.
"Mawh kheu yamin: Aux tag ploi: ceu pa kharhawm: khawm: uik, kah daux rhawmrhi: maix, kah piang kawncau maix, mai kah piang pwi maix, sonsang tawng maix ang pwi pa awm: Aux koe: tix kaux kawx kah daux haktiex in: khawm: uik.
"Mawh kheu yamin: Aux nyeu taix Tix mai yuh krax kharhawm: kah maix mai pwi maix khankix, kah jhawm: saux preng, mai tat maix grai: grup khaing: haktiex;
"Viang mawh nan:, grawng: pa kieh Aux maix im: ju mawh sonsang jhi: Aux maix yaox siawpsibrawm Tix daux maix, mai sonsang ao: min: Aux kah daux haktiex in: khawm: uik.
Tokaux maix kawn: kiien: rhawm: mai nu nai: kah pwi Aux, mai ang ploi: kix hu:.
Jhak heue, pasax bawg yamin:, Aux tag kieh pre: ting lih kah daux meung Ejiptux, pa ang sax koe: tom: yam jah haktiex Ejiptux tix kaw: tix tom: hoek in: singaix.
"Maw: kheu nan:, ploi: pwi maix hu: khrawm: khawng: brie pa koe: daux kaung: khankix, sonsang luat luan. Mawh kheu pre: tag sang lih kah piang pwi kukaux, mai khawng: brie pa ot daux kaung: pa ang nyang khrawm: hoek kah nyiiex khawm: uik, kix tag yum:."
Can pwi pa lhat kah gumlox Simiang Siyiex, kah sinax kawncau Pharaw, kieh siliex tix mai khawng: brie nied to: tix ing: kah nyiiex.
Viang mawh nan:, pwi pa ang deuh gumlox Simiang Siyiex koe: ceu, prah siliex mai khawng: brie tix daux kaung:.
Simiang Siyiex ah nin: kah Mose, "Nyeu taix maix kah plak raoma:, sonsang lih pre kah daux haktiex Ejiptux khawm: uik, kah piang pwi, kah piang khawng: brie mai kah piang khaox ox rib riem pa koe: daux kaung:, kudauh kudee kah daux haktiex Ejiptux."
Mai Mose nyeu khaoxgix tix kah plak raoma:, mai Simiang Siyiex ploi: lox sinum praix, pre: mai ngu lih kah piang haktiex. Mai Simiang Siyiex kieh lhiex mai pre: lih kah piang haktiex Ejiptux;
pre: pa khao: mai ngu pa kied kin: ting lih, pa ang sax koe: daux haktiex Ejiptux tix bawk kawx, jah tom: yam mawh nawh meung haktiex tix mu:.
Mai pre: khankix dheem: kah can pa koe: kah daux haktiex Ejiptux, can pa koe: daux kaung:, pwi, khawng: brie, rib riem, mai kieh khaox ox khankix goh.
Mawh ngie daux haktiex Goshin, dee ot dee koe: pwi Isarilax khankix, pa ang lhiex pre: lih kah.
Pharaw ploi: pwi hu:, kok kah Mose mai Arun, mai ah nin: kah kiex, "Yamin: aux hoik phit lud; Simiang Siyiex mawh pa rauh pa see, pwi aux khankix mai aux hoik mawh pa phit pa lud."
Rawg bwan: kah Simiang Siyiex; kieh naox heue, son ang sinum praix mai pre: khankix baox lih; aux tag kieh pex hu:, pex tag ang lai yaox tix ot kah meung in:."
Mai Mose ah nin: kah nawh, "Khaix hoik lih aux khaing: daux veng, aux tag yaog taix tix kah Simiang Siyiex, mai lox sinum praix tag yiien: yawg. Pre: khankix kawx, tag ang lai baox koe:, sonsang tawng maix haktiex in: mawh cie Simiang Siyiex."
"Viang mawh nan:, son maix mai kawncau maix khankix, aux tawng ang pex nyang lhat graung kah Simiang Siyiex tom yamin:."
Yamin: khaox gan:, mai nghox ca khankix hoik lauxleeing:. Grawhgrawng: nawh, nghox ca hoik kaux, mai khaox gan: khankix kawx, hoik pruh tai.
Viang mawh nan:, nghox ca mai pang: nghox khankix, ang nyang bax lauxleeing:, kheu mawh kix plix nghox pa lha: khaing: paox tix.
Mawh kheu nan: Mose lih hu: khaing: simiang Pharaw daux veng mai yaog taix tix lih kah Simiang Siyiex. Khaix an: lox sinum praix pre: khankix yiien:. mai lhiex ang lai lih kah piang tiex.
Mai yam hoik yaox simiang Pharaw kah hoik yiien: lhiex pre: mai lox sinum praix khankix, nawh deeh baox phit lud mai rhawmrhi: nawh deeh kiien: tau mai kawncau nawh khankix.
Mawh kheu nan:, rhawmrhi: simiang Pharaw hoik kiien:, mai nawh ang kieh kawnpraix Isarilax khankix lih hu:, awm: gumlox pa hoik krai Simiang Siyiex kah Mose heue.
Krax Kharhawm: Bawg Daix Sido Khankix
Yamin: Simiang Siyiex ah nin: kah Mose, "Hu: kah simiang Pharaw, mawh kheu hoik kieh Aux rhawmrhi: nawh, mai rhawmrhi: kawncau nawh khankix kiien: sonsang jhi: Aux mhai: pa daox pa am: sivoe nawh."
"Maix krai kawn: simex, kawn: saux tix khankix mhong: grawng: siawpsibrawm pa ting pa lhaong:, pa hoik yuh Aux, daux meung Ejiptux, mai mhai: pa daox pa am: pa hoik yuh Aux kah daux sinax kix, sonsang tawng kix mawh Aux Simiang Siyiex."
Mawh kheu nan:, Mose mai Arun hoek kah simiang Pharaw mai ah nin:, "Mawh kheu Simiang Siyiex ceu pwi Hebrie khankix ah nin:, maix ang cu tix deuh rhawm: awn: rhawm: tiiem sivoe ngai: Aux, sang rheung: miex ding? Kieh pwi Aux lih hu:, sonsang krub kix kah Aux."
"Phan: maix kawn: thiang: kah sang kieh tix pwi Aux hu:, jhak heue, pasax Aux tag kieh sido khankix, hoek kah dauh dee kwang: maix heue."
"Mai kix tag kheem: kah piang tiex, son ang pwi tix kaux kawx, lai chix yaox kah tiex, mai kix kawn: sang ih can pa kawn deuk khaix pre:. mai kix tag ih kah lhax khaox lhax ox pa koe: daux kaung: pex khawm: uik."
"Kix tag naog kah daux nyiiex haw: maix kah daux nyiiex ma: kawncau maix khankix, mai kah daux nyiiex ma: pwi Ejiptux khawm: uik, pa ang pex sax yaox tix bawg kawx daux ju tax pex tom: yam jah kix tix ot kah piang ca: haktiex in:, tom: in: singaix." Mai nawh deeh veeh tix lih khaing: simiang Pharaw.
Khaix an:, kawncau Pharaw khankix ah nin: kah nawh, "Pwi in: tag sang tawx krax tuktiaktukte: kah ex rheung: miex ding? kieh kix hu:, sonsang tan lu krub kix kah Simiang Siyiex tix. Ang maix nyang tawng kah lauxleeing: meung Ejiptux lie?"
Mawh kheu nan:, Mose mai Arun deeh hoek kah simiang Pharaw, mai nawh ah nin: kah kix, "Hu: mai yuh kaing krub kah Simiang Siyiex pex. Viang mawh nan:, pwi pa sang hu: khankix mawh pwi mawx?"
Mai Mose deeh ah nin:, "Yix tag hu: tau mai pwi ting pwi iak tau mai kawn: simex kawn: bun: yix, tau mai yung:, pex yix, mai khawng: brie yix khawm: uik, yix tag lih hu:. Grawhgrawng: nawh yix sang yuh pwie kah Simiang Siyiex."
Khaix an: simiang Pharaw ah nin: kah kix, "Kieh Simiang Siyiex ot tau mai pex mhawmmhawm: yam kieh aux maix khawm: kawn: nyawm iak khankix lih hu:. yuh satix pex, pa coax pa caig koe: sivoe pex."
"Ang chix mawh nan:; viex pex pa mawh simex khankix mai hu: yuh kaing krub kah Simiang Siyiex, awm: pa hoik koe: rhawmrhi: pex tix yuh." Mai nawh grheu: kix hu: khaing: sivoe ngai: tix.
Khaix an: Simiang Siyiex ah nin: kah Mose, "Nyeu taix maix kah piang haktiex Ejiptux, kah sido khankix, sonsang lih kah piang haktiex Ejiptux, mai ih rib riem pa koe: piang tiex, pa kawn deuk khaix pre: khawm: uik.
Mawh kheu nan:, Mose nyeu khaox gix tix kah piang haktiex Ejiptux, mai Simiang Siyiex kieh bhaung: ting hoek khaing: plak lih singaix, mai phlu: kah piang haktiex khawm: uik daux singaix an:, mai daux sawm: an:. Yam hoek plak ponngawb, bhaung: ting plak lih singaix an: viex sido khankix hoek.
Mai sido khankix hoek kah piang haktiex Ejiptux khawm: uik, mai tum: kah piang haktiex mee: pa kwang: kix Ejiptux. sido khankix kied mawh pa lang: teung. sido awm: ankix ang sax lih, bawg yam pa hoik luan, mai tag ang lai koe: khaix sax.
Mawh kheu sido khankix, hoik kheem: kah piang tiex khawm: uik, haktiex hoik faik, mai kix ih rib riem kuceu pa koe: piang tiex mai plix khaox plix ox pa koe: piang khaox, pa hoik deuk khaix pre:. Mawh kheu nan: can ceu pa klai khankix ang lai koe: tix dauh kawx piang khaox ox daux kaung: mai kah haktiex Ejiptux khawm: uik.
Mawh kheu nan:, simiang Pharaw nied tix kok kah Mose mai Arun ah nin:, "Aux hoik phit lud kah Simiang Siyiex pex, mai pex.
"Mawh kheu nan:, yamin: yuh bwanson: pluat ploi: phimap phigrham: aux pie bawg in: ha! mai khyo khaw: kah Simiang Siyiex pex, sonsang deeh teei Nawh Cao:, krax pa yum: bawg in: hu: khaing: aux."
Mawh kheu nan:, Mose lih khaing: simiang Pharaw mai khyox khaw: kah Simiang Siyiex.
Simiang Siyiex deeh veeh bhaung: pa ting riang khaing: plak klip singaix, sonsang deeh teei sido khankix hu: dee singai, mai phlu: kix hu: kah daux rawm: sigrit sigra: Edom (Rawm: sigrit sigra: raoh). sido tix mu: kawx ang lai deuk kah daux mee: haktiex pa kwang: kix meung Ejiptux.
Viang mawh nan:, Simiang Siyiex deeh kieh rhawmrhi: simiang Pharaw deeh baox kiien:, mai nawh ang kieh kawnpraix pwi Isarilax khankix hu: heue.
Krax Kharhawm: Bawg Dim: Pa faik
Mai Simiang Siyiex ah nin: kah Mose, "Nyeu taix maix kah plak raoma:, sonsang faik praix kah piang haktiex Ejiptux, pa mawh pa faik kawn: chix yaox kix tix pupi: tix hu:.
Mawh kheu nan:, Mose nyeu taix tix plak raoma:, mai pa faik lih koe: kah piang haktiex Ejiptux khawm: uik daux loe: singaix.
Kix ang chix yaox paox tix, tix kaux lai tix kaux, mai kix ang lai pon kaoh khaing: dee ot dee koe: tix, tix kaux kawx been loe: singaix. Viang mawh nan:, kawnpraix Isarilax khankix pon pa riieng kah daux nyiiex ot kix khawm: uik.
Khaix an:, simiang Pharaw kok kah Mose mai ah nin:, "Hu: mai yuh kaing krub kah Simiang Siyiex. Prah yung: mai pex, mai khawng: brie pex plak khaix ngie awawx. bun: mai kawn: nyawm khankix kawx, kieh hu: tau mai pex."
Viang mawh nan:, Mose deeh ah nin:, "Maix tag tawx khawng: brie pa sang tan lu yix mai kraung tan pa sang gleeing yix sonsang tan lu yix kah Simiang Siyiex Cao: yix."
"Khawng: brie cie yix kawx, tag yaox tix hu: tau mai yix, pie gip caong tix mu: kawx, tag ang yaox tix prah khaing: yix, mawh kheu nan:, yix tag viex ankix tiblah, sonsang krub yix kah Simiang Siyiex Cao: yix, yix ang nyang tawng, kah pa sang krub tix kah Simiang Siyiex tom: yam hoek yix tan:."
Viang mawh nan:, Simiang Siyiex deeh kieh rhawmrhi: simiang Pharaw kiien: mai nawh ang cu tix ploi: kix hu:.
Khaix an:, simiang Pharaw ah nin: kah Mose, "Hu: dee singai khaing: aux. yuh satix maix, mai paw lai hoek yaox kah pakngai: aux tix bawg kawx. Grawhgrawng: nawh, singaix yaox maix kah pakngai: aux, maix tag yum: kah."
Mai Mose deeh ah nin:, "Maix hoik sikah lox pa mhawm:. Aux tag ang lai baox yaox kah pakngai: maix pie tix bawg kawx heue."
Grawng: Krax Yum: Kawn: Ai: Kix
Simiang Siyiex ah nin: kah Mose, "Aux tag deeh viex krax kharhawm: kharhi: baox koe: tix ceu, kah piang simiang Pharaw mai meung Ejiptux. Khaix an: nawh tag kieh pex lih hu: khaing: tin:. Yam kieh nawh pex lih hu:, nawh tag grheu: pex lih tidom: neh khawm: uik.
"Krai kah pwi khankix, sonsang mhong: kix, mai kieh simex kukaux mai bun: kukaux mhaing: tix cie kraung mau, kraung khri: khankix khaing: paoxplawg paoxnyhawm: tix."
Mai Simiang Siyiex kieh pwi in: khankix pon bwanson: kah sivoe ngai: pwi Ejiptux khankix, lheu: khaing: an: Mose mawh pwi pa ting min: pakngai: kah daux haktiex Ejiptux, mai sivoe ngai: kawncau simiang Pharaw mai sivoe ngai: pwi khawm: uik.
Khaix an: Mose ah nin:, "Mawh kheu Simiang Siyiex hoik ah nin:, "Yam greung sawm: Aux tag lih hu:, kah daux sinax pex meung Ejiptux."
"Mai can pa mawh kawn: ai:, pa koe: daux haktiex Ejiptux tag yum:, jah kah kawn: ai: simiang Pharaw, pa ngawm piang dangngeung mai pa mawh kawn: ai: kawncau bun: nawh khankix pa ot plak khaix, mai kawn: liang tix keh khaing: khawng: brie khawm: uik."
"Khaix an:, krax yiiem riag pa ting pa lhaong: tag koe: kah daux haktiex Ejiptux kudauh kudee, pa ang sax koe: glang: kah: in: dix, mai pa ang lai deeh koe: sax."
"Viang mawh nan:, Aux tag ang kieh sox tix mu: kawx pon tix raoh kah kawnpraix Isarilax tix kaux kawx, khawm: pwi khawm: khawng: brie, sonsang tawng pex kah pa tang: pa siyox pa yuh Simiang Siyiex sinax pwi Ejiptux mai pwi Isarilax khankix."
"Mai kawncau maix khankix, tag hoek kah aux, mai gup tix krub kah aux, mai kix tag ah nin:, "Lih hu: tau mai pwi pa hawt khaix maix. "Khaix an: Aux tag lih hu:." Mai nawh lih hu: khaing: simiang Pharaw, kah daux pa kied songrhawm: songrhi:.
Simiang Siyiex ah nin: kah Mose, "simiang Pharaw tag ang cu nghiiet kah maix, sonsang baox nie mhai: pa daox pa am: Aux, kah daux haktiex Ejiptux."
Mawh kheu nan:, Mose mai Arun yuh mhai: pa daox pa am: in: khawm: uik kah sivoe ngai: simiang Pharaw, mai Simiang Siyiex deeh kieh rhawmrhi: simiang Pharaw kiien:, mai nawh ang cu kawnpraix Isarilax khankix lih hu: khaing: daux haktiex nawh.
Grawng: Pwie Pasakha
Simiang Siyiex sikah kah Mose mai Arun, kah daux haktiex Ejiptux ah nin:;
"Khix in: tag mawh khix num jah, mai mawh khix tix kah pex."
"Pax krai kah pwi Isarilax ah nin:, kah daux khix in: kao: ngaix, pwi kukaux tag teei kawn: yung: iak son tix, awm: pa hoik koe: kah daux nyiiex keeing: nawh, son nyiiex ma: tix lhang: kawn: yung: iak tix mu."
"Mai phan: nyiiex ma: mawx mawh pwi tux ang uik ih nex kawn: yung: iak an:, kieh nawh greem tix ih tau mai paoxplawg paoxnyhawm: tix, mai simin ding koe: pwi miex kaux, tawx son pa ih kix tom: kub mai nawh tag teei kawn: yung: tix mu:."
"Kawn: yung: an: tag mawh pa ang koe: dee mat dee pliag, mai kieh mawh kawn: yung: mhaing: pa ang nyang naog tix num. Mai tag teei khaing: yung: khankix, phan: ang mawh nan: khaing: pex khnkix.
"Maix tag priex kawn: yung: an: tom: hoek kao: pon: ngaix kah daux khix in:. pwi haoh pwi hun: Isarilax khankix tag pah kawn: yung: an: plak bo."
"Mai kix tag teei nham: tiblah, mai kraix kah pang: khaox siviex khawm: ra: mu:, mai kah piang nuk siviex khankix, kah nyiiex dee ih kix."
"Khaix an:, kix tag ih nex daux sawm: an:, kix tag ih nex tong: kah ngu tau mai khao mun, pa ang sau: susaix mai taux mai tauxlhax pa song:."
"Paw doh ih nex im:, mai nex ngaik. Viang mawh nan:, kaing:, caong, tawm:, mai sok rhawm:, pex tag pon tix ih khaix hoik tong: pex kah ngu."
"Maix tag ang pon tix deuh nex an:, tom: hoek plak ponngawb, mai pa kawn deuk ankix, tom: hoek ponngawb, maix tag gleeing ankix kah ngu."
"Mai pex tag ih nawh yuh nin:. Nhawt maox rawd nyoi pex, ceep kiep pex, mai giex khaoxgix pex. Mawh kheu nan:, pex tag ih nawh phai phai:, in: mawh pwie Pasakha Simiang Siyiex."
"Mawh kheu daux sawm: an:, Aux tag lih hu: kah daux meung Ejiptux kudauh kudee, mai pah kah pa mawh kawn: ai: khankix, daux haktiex Ejiptux, pwi khawm: khawng: brie Ejiptux khankix Aux tag ciyang kah kix. Aux mawh Simiang Siyiex."
"Yamin: nham: tag mawh mhai: sakse son pex, kah daux nyiiex pa ot pex. Mai yam yaox Aux kah nham:, Aux tag via khaing: pex, mai krax kharhawm: tag ang lai koe: kah piang pex, mai son ang pex sang lauxleeing: yam hoek Aux tix pah kah kawn: liang haktiex Ejiptux."
"Mawh kheu nan:, singaix in: tag mawh krax pa doh keud son pex, mai pex tag priex nawh mawh pwie tix mu:, son Simiang Siyiex kah daux doeh simie ceucat pex, pex tag priex nawh mawh pwie tix mu:, mai kieh mawh beenli pa caw pex tix yuh leeing ju leeing phan:."
"Pex tag ih khaomun pa ang sau: susaix aliah ngaix, daux sigaix jah, pex tag teei tix tik susaix khaing: daux nyiiex tix. Grawhgrawng: nawh pwi mawx ang ah, pa ih khaomun pa sau: susaix daux singaix jah, tom: hoek daux aliah singaix, Aux tag teei tix tik pwi an: khaing: ceu pwi Isarilax."
"Daux singaix jah, tag koe: krax kraix khrawm: pa singax singeh, mai kah daux singaix aliah kawx, pex tag koe: krax kraix khrawm: pa singax singeh, Kaing jhaw: ceu pa yuh kah mawx kawx, tag ang pon tix yuh daux singaix an: khankix. Lheu: khaing: khre: pwi kukaux ceu pa ih pa un: tix."
"Mawh kheu nan:, pex tag yuh pwie ih khaomun pa ang sau: susaix mai kah daux singaix an:, Aux tag teei kru naing pex lih khaing: haktiex Ejiptux, pex tag priex singaix in:, daux baux ju doeh simie ceucat pex, mawh beenli pa caw pex tix yuh leeing ju."
"Kah daux khix jah, kao: pon: ngaix plak bo, pex tag ih khaomun pa ang sau: susaix tom: hoek tinga: tix ngaix, daux khix an: plak bo."
"Glang: aliah ngaix an:, paw kieh susaix koe: daux nyiiex pex awawx. Can pwi pa ih kah khaomun pa sau: susaix, viang nawh mawh nyo sinie, mai pwi pa keh kung daux haktiex an: kawx Aux tag teei tix tik nawh khaing: cub pwi hun: Isarilax."
"Pex tag ang yaox tix ih kah ceu pa sau: susaix tix ceu kawx, kah dee ot dee koe: pex, pex tag ih kah khaomun pa ang sau: susaix.
Khaix an:, Mose kok kah kuad simiang Isarilax khankix, mai ah nin:, "Teei kawn: yung: iak son nyiiex ma: pex, mai pah kah kawn: yung: pwie Pasakha an:."
"Pex tag teei rao taux im: krim tix jhoi: mai ce daux nham: pa koe: daux tawg, mai awt kah nuk siviex mai pang: khaox siviex ra: plak kah nham: pa koe: daux tawg an:. paw kieh pwi tix kaux kawx lih hu: kah praix nyiiex tom: hoek ponngawb pasax."
"Grawhgrawng: nawh, Simiang Siyiex tag lih hu: sonsang pah kah pwi Ejiptux khankix, mai yam yaox Nawh Cao: nham: pa koe: piang nuk mai piang pang: khaox siviex khawm: ra: plak, Simiang Siyiex tag luan khaing: siviex an:, mai ang tawx akhwang: kah pa yuh pex lauxleeing: laig daux nyiiex ma: pex sonsang pah kah pex."
"Mai pex tag priex tix yuh ceu in:, mawh beenli pa caw pex tix yuh son pex, mai son kawn: simex pex leeing ju."
Yam hoek pex kah daux haktiex pa tawx Simiang Siyiex kah pex, awm: hoik tawx Nawh Cao: gumlox sijax mukheu Tix, mai pex tag priex tix yuh been kaing in:."
"Mai phan: kawnpraix pex chawk yuh nin:, grawhgrawng: been kaing in:, koe: dee bleeh yuh kah mawx?"
"Pex tag deeh ah nin:," In: mawh pwie Pasakha, pa appong: tan lu ex kah Simiang Siyiex, pa hoik lih hu: mai luan khaing: nyiiex ma: kawnpraix pwi Isarilax daux meung Ejiptux, yam pah Nawh Cao: kah pwi Ejiptux khankix, mai kieh nyiiex ma: ex khankix luat luan yam an:." Mawh kheu nan:, pwi khankix gup kaing: tix, mai krub kah Simiang Siyiex.
Khaix an:, kawnpraix Isarilax lih hu:, mai yuh awm: gumlox pa hoik tawx Simiang Siyiex kah Mose mai Arun heue.
Krax Kharhawm: Bawg Kao: Kah Yum: Kawn: Ai:
Mai yam hoek greung sawm:, Simiang Siyiex pah kah kawn: ai: khankix, pa koe: daux haktiex Ejiptux, jah kah kawn: ai: simiang Pharaw pa ngawm piang dang: ngeung nawh, tom: hoek kah can kawn: ai: pwi pa laung kix daux thawng: tiex mai kawn: liang khawng: brie khawm: uik.
Mawh kheu nan:, simiang Pharaw mai kawncau nawh khankix, mai pwi Ejiptux khankix hoik kaoh daux greung sawm:, krax riag yo tix yiiem sigrien sigre koe: daux meung Ejiptux. Grawhgrawng: nawh, nyiiex ma: pwi ku nyiiex pa ang koe: pwi pa yum: tix kaux kawx ang lai koe: heue.
Grawng: Pa Lih Hu: Pwi Isarilax
Khaix an: simiang Pharaw kok Mose mai Arun daux ponsawm: ah nin:, "Kaoh lih hu: khaing: sinax pwi aux khankix, maix khawm: kawnpraix Isarilax khankix. Mai hu: yuh kaing krub kah Simiang Siyiex awm: pa hoik ah pex."
"Teei yung: mai pex cie pex khawm: khawng: brie khankix, awm: pa hoik ah pex mai lih hu:. Mai nawb bwan: kah piang aux awawx."
Mai pwi Ejiptux nied sigleeig kah ceu pwi Isarilax khankix sonsang ploi kix hu: khaing: haktiex phai phai:. Mawh kheu ah kix nin:, "Ex tag yum: khawm: uik."
Pwi ankix teei mien: khaomun im:, pa ang sau: susaix, mai kie tix viex tawg klu klao khaomun kah man: mai kix klawm: piang klip tix.
Kawnpraix Isarilax khankix yuh awm: gumlox Mose mai kix mhaing: kraung mau, kraung khri: tix, mai kraung ceep tix kah pwi Ejiptux khankix.
Mai Simiang Siyiex tawx pwi ankix, mawh pa pon bwanson: kah sivoe ngai: pwi Ejiptux khankix sonsang khre: rien kix tix tawx ceu pa mhaing: kix. Mawh kheu nan:, kix rhim: tix teei kraungkhrai: pwi Ejiptux khankix.
Khaix an: ceu pwi Isarilax khankix lih khaing: Ramase mai hu: kah Sukok. Pwi pa lih hu: kah caong tix simex nongnong: koe: liah sien: kaux ang nyang sawn: kawn: nyawm iak mai bun: khankix.
Pwi haoh hun: pa mawh pwi luk laig daux kix khawm: uik kawx, lih hu: tau mai kix, khawm: yung: pex, mai khawng: brie kix tom: nie.
Mai kix viex phawng: khaomun im: pa ang viex susaix khankix, khaing: daux meung Ejiptux. Grawhgrawng: nawh, kix hoik grheu: kix lih hu: khaing: meung Ejiptux, mai kix ang lai pon pau, sonsang sau: kix susaix daux khaomun, mai cox khre: sin: son cao: kix.
Ceu pwi Isarilax khankix hoik ot daux meung Ejiptux koe: pon: yieh tix ngoe: num.
Mai yam hoik hoek dee sidauh pon: yieh tix ngoe: num kah daux singaix an:, can pwi kru naing Simiang Siyiex khawm: uik lih hu: khaing: meung Ejiptux.
Sawm: an: mawh sawm: priex kix tix doh keud kah Simiang Siyiex, teei kix lih khaing: meung Ejiptux. In: mawh sawm: Simiang Siyiex, son ceu pwi Isarilax khawm: uik, sonsang koe: kix krax priex kah ku ju leeing ju heue.
Grawng: Been Pwie Pasakha
Simiang Siyiex ah nin: kah Mose mai Arun, "In: mawh beenli son pwie Pasakha. Pwi tang: ceu tang: cat tix kaux kawx, tag ang pon tix ih kah."
"Viang mawh nan:, can siliex pa hoik liag kah mau kukaux phan: hoik pat hak tix yam an:, nawh tag pon tix ih kah."
"Nyo sinie mai pwi cang: pwi caing tix kaux kawx tag ang pon tix ih."
"Tag pon tix ih kah daux nyiiex tix lhang:, pex tag ang pon tix viex nex lih plak praix nyiiex, mai pex tag ang pon tix kieh si-ang: khankix pot."
"Cub pwi hun: Isarilax khawm: uik tag priex beenli pwie an:."
"Mai yam hoek nyo sinie tix kauxkaux, tix peung mai pex phan: nawh simie tix priex rien beenli pwie Pasakha Simiang Siyiex, kieh simex khawm: uik pat hak tix. Khaix an:, kieh kix hoek dex, mai laig daux pwie. Mai kix tag lih tix awm: pwi pa keh kung daux haktiex an:. Mai can pwi pa ang nyang pat hak, tag ang yaox tix ih.
"Beenli pa caw tix hawt yuh, tag koe: tix ceu khaing: son pwi pa keh kung daux haktiex, mai son nyo sinie pa hoek tix peung sinax pex.
Mawh kheu nan:, ceu pwi Isarilax khankix hawt tix yuh, awm: gumlox tawm: Simiang Siyiex kah Mose mai Arun.
Kah daux singaix an: tix dom: neh, Simiang Siyiex viex kru naing Isarilax khankix lih khaing: daux haktiex Ejiptux cub mawx cub an: heue.
Grawng: Appong: Pa Mawh Kawn: Ai:
Simiang Siyiex ah nin: kah Mose,"
"Appong: kawn: ai: plix num khankix kah Aux, kah daux ceu pwi Isarilax, can pa mawh kawn: ai: plix num: khawm: pwi mai khawng: brie mawh cie Aux heue."
Grawng: Pwie Khaomun Pa Ang sau: Susaix (Pwie Azuma)
Mose ah nin: kah pwi khankix, "Doh keud kah singaix in:, pa mawh singaix lih hu: pex khaing: meung Ejiptux, khaing: daux nyiiex yuh pex kaing siliex. Grawhgrawng: nawh taix ting riang Simiang Siyiex, hoik viex pex lih khaing: daux haktiex an:. Pex tag ang pon tix ih kah khaomun pa sau: susaix."
"Kah daux singaix lih hu: pex an: mawh daux khix Abibax.
Yam viex Simiang Siyiex pex hoek kah daux haktiex ceu pwi Khanan mai ceu pwi Hitix, ceu pwi Amawrix, ceu pwi Hiwix, ceu pwi Yebusix, pa hoik tiextu Nawh Cao: kah keeing: pex khankix, sonsang tawx kah pex. Haktiex an: mawh haktiex dee lih rawm:teeih, mai rawm: hia:, mai pex tag yaox tix priex been kaing in: daux khix in:."
"Daux aliah singaix, pex tag ih kah khaomun pa ang koe: susaix mai yam hoek daux singaix aliah pex tag yuh pwie son Simiang Siyiex."
"Khaomun pa ang koe: susaix tag pon tix ih daux aliah singaix. Mai khaomun pa sau: susaix, tag ang pon koe: sinax pex, mai susaix khankix kawx tag ang pon kieh koe: dauh dee ot pex khawm: uik."
"Kah daux singaix an:, maix tag krai kah kawnpraix maix ah nin:," Kheu inkix hoik mawh pa yuh Simiang Siyiex son aux, yam lih hoek aux khaing: meung Ejiptux."
"In: tag mawh mhai: sakse kah daux tawm: taix maix, mai son krax doh keud kah kaing: re: maix, kieh gumlox beenli Simiang Siyiex koe: daux jheeh pex. Mawh kheu taix pa ting riang Simiang Siyiex hoik viex pex lih khaing: meung Ejiptux."
"Mawh kheu nan:, pex tag priex kah gumlox beenli in:, daux bawg yam ankix ku num heue."
Gumlox Beenli Pa Mawh Kawn: Ai: Plix Num: Khankix
Yam viex Simiang Siyiex maix laig daux haktiex ceu pwi Khanan, awm: gumlox pa hoik tiextu Nawh Cao: kah maix, mai keeing: maix mai tawx haktiex inkix kah maix.
Maix tag deuh kawn: ai: plix num:, mai can kawn: khawng: brie pa liang tix keh mawh son Simiang Siyiex. Can pa mawh mhaing: khankix tag mawh cie Simiang Siyiex."
"Can kawn: la iak pa liang tix keh sivoe ku mu:, maix tag deeh taoh nawh kah kawn: yung: iak tix mu:. Phan: ang rhawm: taoh, pex tag raig ngawg kawn: la an:, maix tag deeh taoh kah kawn: ai: pa liang tix keh khawm: uik.
"Yam mhaing: kawn: simex maix grawng: inkix daux bawg yam pa sang hoek sax, mai nawh tag ah nin:, "In: mawh patix lie?" Maix tag deeh ah nin: kah nawh, Mawh kheu taix pa ting riang Simiang Siyiex, hoik viex ex lih khaing: meung Ejiptux, khaing: daux nyiiex pa yuh ex siliex."
Yam an: simiang Pharaw ang kieh ex lih hu:, Simiang Siyiex pah kah kawn: ai: pa koe: daux haktiex Ejiptux, khawm: kawn: ai: pwi mai kawn: liang khawng: brie khankix. Mawh kheu nan:, aux tag appong: tan lu can kawn: pa liang tix keh khaing: khawng: brie khawm: uik kah Simiang Siyiex. Viang mawh nan: kawn: simex aux khankix, pa mawh kawn: ai: khawm: uik, aux tag deeh taoh.
"Inkix tag mawh mhai: sakse kah daux tawm: taix maix, mai mawh mhai: kah kaing: re: maix. Grawhgrawng: nawh Simiang Siyiex hoik viex ex lih khaing: daux meung Ejiptux, kah taix pa ting riang Nawh heue."
Grawng: Krax Hu: Daux Tiag Daux Tu
Yam kieh simiang Pharaw pwi khankix lih hu:, Simiang Siyiex ang thung: kix hu: kah daux krax plak haktiex Philitix viang dex kawx, mawh kheu ah Siyiex nin:, "Pwi inkix tag deeh tieh rhawm: tix, yam yaox kix kah naing, mai deeh veeh tix ing: kah haktiex Ejiptux."
Mawh kheu nan:, Siyiex thung: pwi inkix hu: krax daux tiag daux tu, baoh vungviang rawm: sigrit sigra: Edom (Rawm: sigrit sigra: raoh). Mai ceu pwi Isarilax khankix lih hu: cub mawx cub an:, khaing: haktiex Ejiptux mai khawm: kraung naing pa koe: kix.
Mose teei si-ang: Yosiep hu: tau mai tix. Mawh kheu hoik deuh nawh gumlox pa tiextu kah ceu pwi Isarilax khankix ah nin:, "Siyiex tag hoek tix kia: ngien kah pex tete mai pex tag deeh viex si-ang: aux hu: khaing: tin:, tau mai pex."
Mawh kheu nan:, kix hu: khaing: Sukok mai bang: kah daux veng Esan, pa koe: hawt daog daux tiag tan:."
Simiang Siyiex hu: sivoe kix, yam pon singaix Nawh Cao: thung: kix hu: daux krax kah rong: paiawm:, mai yam hoek ponsawm:, Nawh Cao: thung: kix hu: daux krax kah rong: ngu, sonsang jhan: pa riieng kah kix. Mawh kheu nan: kix yaox tix hu: awm: paox tix plak pon singaix mai plak ponsawm:.
Nawh Cao: ang teei rong: paiawm: an: plak pon singaix, mai rong: ngu an: plak ponsawm: khaing: sivoe pwi khankix heue.
Grawng: Tiang Rawm: Sigrit Sigra: Raoh
Simiang Siyiex ah nin: kah Mose;
"Krai kah ceu pwi Isarilax khankix, mai Kieh kix bang: sivoe veng Pihahirot, sinax veng Mizadaw mai rawm: sigrit sigra: pa see veng Balazephong:. kix tag bang: sivoe an:, hawt praok rawm: sigrit sigra:."
"Simiang Pharaw tag ah nin: kah grawng: ceu pwi Isarilax khankix, Kix hoik hoek dee si khawp haktiex, mai hoik vu vie tix tan:, daux tiag daux tu hoik nyeep kix."
"Aux tag kieh rhawm: simiang Pharaw kiien:, mai nawh tag hawt khaix pex, mai Aux tag pon min: pakngai: kah piang simiang Pharaw, mai kah piang kru naing nawh khawm: uik, sonsang tawng pwi Ejiptux khankix kah mawh Aux Simiang Siyiex, mai kix yuh awm: an:.
Koe: pwi krai simiang Ejiptux mhong: grawng: hoik to: tua pwi khankix, rhawm: simiang Pharaw, mai kawnceu nawh khawm: uik deeh tieh tix to: kah pwi ankix, mai ah nin:, "Ex hoik yuh ceu inkix, mai ex hoik kieh pwi Isarilax khankix, lih hu: khaing: pa yuh tix khaing: siliex son ex yuh kah mawx?"
Simiang Pharaw khre: ling: lawx naing tix, mai teei pwi tix khankix hu: tau mai tix.
Nawh teei ling: lawx naing, pa lauk tix liah yieh lhang: mai can ling: lawx naing meung Ejiptux khankix tau mai cao: kaing: naing pa brug kah piang ling: lawx ku lhang:.
Simiang Siyiex kieh rhawm: simiang Pharaw meung Ejiptux kiien:, nawh tom: hawt khaix ceu pwi Isarilax khankix, mawh kheu ceu pwi Isarilax khankix lih hu: tau mai krax pa vao rhawm: tix.
Pwi Ejiptux khankix hawt khaix kix tau mai ling: lawx naing simiang Pharaw, mai pwi naing brung, mai kru naing nawh khawm: uik krub kix kah dee bang: kix hawt rawm: sigrit sigra:, kah veng Pihahirot pa see veng Palazephong:.
Yam dex hoek simiang Pharaw, ceu pwi Isarilax khankix yaog ngai: tix jhak mai yaox pwi Ejiptux khankix hawt khaix kix. Mawh kheu nan:, kix kied koe: krax lhat krax graung mai ceu pwi Isarilax khankix riag yo kah Simiang Siyiex.
Kix ah nin: kah Mose, "Mawh ang simeeig lai koe: daux meung Ejiptux, maix hoik teei yix hu: dee singai, sonsang yum: yix daux tiag daux tu ang mawh lie?" Maix hoik yuh ceu inkix kah yix, mai viex yix lih khaing: meung Ejiptux yuh kah mawx lie?"
In: mawh lox pa dawg krai yix kah maix daux meung Ejiptux ang mawh lie? paw suksag yix, grham: yix yuh kaing pwi Ejiptux. Mawh kheu pa yuh yix kaing pwi Ejiptux nie lheu: mhawm: khaing: yum: yix daux tiag daux tu.
Mose ah nin: kah pwi khankix, "Paw lhat paw graung, cung kah daux krax pa nhim: rhawm:, mai pau tix jhak kah krax taoh pa yuh Simiang Siyiex son pex daux in: singaix. Grawhgrawng: nawh pwi Ejiptux pa yaox pex daux in: singaix, pex tag ang lai baox yaox kix tix bawg kawx leeing ju."
"Simiang Siyiex tag puing: naing son pex, pex paw nye: ot yiien: mhawmmhawm:."
Simiang Siyiex ah nin: kah Mose; "Maix riag yo kah Aux yuh kah mawx? Krai kah ceu pwi Isarilax khankix hu: plak sivoe ngai:."
"Maix yaog kah khaoxgix maix mai nyeu taix maix kah piang rawm: sigrit sigra:, mai gwieh rawm: ra: plak, ceu pwi Isarilax khankix tag yaox tix hu: piang dee kroh tiex daux sigreung rawm: sigrit sigra:."
"Aux tag kieh rhawm: pwi Ejiptux khankix kiien: mai kix tag hawt khaix pex, Aux tag pon min: plakngai: kah piang simiang Pharaw, mai kah piang kru naing nawh khawm: uik, khawm: ling: lawx naing nawh, pwi naing brung nawh."
"Khaix an: pwi Ejiptux khankix tag tawng mawh Aux Simiang Siyiex, yam hoik pon Aux min: plakngai: kah piang simiang Pharaw mai piang ling: lawx naing nawh, mai piang pwi naing brung nawh khawm: uik."
Mai kawncau Siyiex pa hu: sivoe dee bang: pwi Isarilax deeh gah tix hoek kah plak khaix kix, mai rong: paiawm: pa hu: sivoe kix, deeh cung kah plak khaix kix.
Hoik hoek daux sinax dee bang: pwi Ejiptux khankix, mai dee bang: pwi Isarilax, rong: paiawm: an: tawx pa faik kah plak pwi Ejiptux, mai tawx pa riieng kah pwi Isarilax, son ang khawm: ra: plak lai pon hoek dex paox tix leeing: sawm:.
Mose nyeu khaoxgix tix lih kah piang rawm: sigrit sigra:, mai Simiang Siyiex kieh rawm: sigrit sigra: deeh plak khaix kah bhaung: ting pa kaoh khaing: plak lih singaix leeing: sawm:, mai rawm: sigrit sigra: lih mawh tiex kroh, mai rawm: khankix gwieh tix hu: khaing: paox tix ra: plak.
Ceu pwi Isarilax khankix, lih hu: kah daux sigreung rawm: sigrit sigra:, kah piang tiex kroh, mai rawm: awm: guh ding: son kix plak dawm: mai plak gwiex kix.
Pwi Ejiptux khankix hawt pheet kix daux sigreung rawm: sigrit sigra: tau mai brung simiang Pharaw ling: lawx naing nawh mai pwi naing brung nawh khawm: uik.
Yam hoek plak ponngawb, Simiang Siyiex jhak tix yaox kah piang kru naing pwi Ejiptux khankix, kah rong: ngu paiawm:, mai Nawh Cao: tawx krax suksak kah pwi naing Ejiptux khankix.
Mai Nawh Cao: teei tix tik jaong ling: lawx naing kix, sonsang nu kix tix hawh, pwi Ejiptux khankix ah nin:, "Kieh ex lih hu: khaing: plak ngai: ceu pwi Isarilax khankix! mawh kheu Simiang Siyiex hoik puing: ex son kix,
Simiang Siyiex ah nin: kah Mose, "Nyeu khaoxgix maix piang rawm: sigrit sigra:, sonsang deeh kleuk rawm: tix kah piang pwi Ejiptux, kah piang ling: lawx naing mai kah piang pwi naing brung khawm: uik."
Mose nyeu khaoxgix tix kah piang rawm: sigrit sigra:, mai yam hoek plak ponngawb, rawm: sigrit sigra: khankix deeh kleuk paox tix mai naog awm: diag prim:. Yam sang to: pwi Ejiptux khaing: daux rawm:, Simiang Siyiex kheem: pwi Ejiptux daux sigreung rawm: sigrit sigra:.
Rawm: deeh hoek mai kheem: kah ling: lawx naing pwi naing brung mai khru naing simiang Pharaw khawm: uik, pa laig hawt khaix pwi Isarilax kah daux rawm: sigrit sigra:, kix ang lai deuk pie tix kaux kawx.
Pwi Isarilax khankix, yaox tix hu: kah piang tiex kroh, daux sigreung rawm: sigrit sigra:, mai rawm: hoik mawh guh ding: kah plak dawm: mai plak gwiex kix.
Kah daux singaix an: Simiang Siyiex hoik taoh kah pwi Isarilax khankix, khaing: daux tawm: taix pwi Ejiptux, mai pwi Isarilax hoik yaox kah to: kaux yum: pwi Ejiptux hawt praok rawm: sigrit sigra:.
Pwi Isarilax khankix hoik yaox kah kaing ceu pa ting, pa hoik yuh Simiang Siyiex kah pwi Ejiptux, pwi khankix tom: lhat graung kah Simiang Siyiex, mai yumrhawm: kah Simiang Siyiex mai kawncau Nawh Mose heue.
Lai Rhax Mose
Yam an: Mose mai pwi Isarilax khankix ah lai rhax son Simiang Siyiex yuh nin:, "Aux tag ah lox rhax kah Simiang Siyiex, mawh kheu hoik pex Nawh Cao: kah daux pa ting min: plakngai:! brung khankix mai cao: pa brug, Nawh Cao: hoik tik daux rawm: sigrit sigra:!
Simiang Siyiex mawh riang rao aux, mai lai rhax aux, Nawh hoik mawh krax taoh son aux; Nawh mawh Siyiex aux, mai aux tag yaogyaw kah Nawh! Siyiex keeing: aux, mai aux tag yaog Nawh ting.
Simiang Siyiex mawh pwi naing, Simiang Siyiex mawh ceukaux Nawh.
Ling: lawx naing Pharaw, mai kru naing nawh, Nawh Cao: hoik tik daux rawm: sigrit sigra; cao: kaing: naing pa hoik laug nawh kawx, hoik siman: daux rawm: sigrit sigra: paraoh.
Rawm: raux hoik kheem: kah kix; kix hoik com awm: lon: simaox greem: rawm:.
"Simiang Siyiex eue, taix khawn: dawm: Maix hoik mawh pa koe: min: pakngai: kah daux siawpsibrawm; Simiang Siyiex eue, taix khawn: dawm: Maix hoik dheem: pwi pa koeng tom: phawng:.
Maix Cao: hoik mawh pa kied ting sibrawm, Maix Cao: hoik pex kah pwi an: kix pa tieh feen kah Maix, Maix hoik ploi: krax song: rhawm: Tix hu: awm: ngu mai gleeing kix lauxleeing: awm: nyhee.
bhawm: pa lih khaing: daux meeh Maix, rawm: khankix khrawm: paox tix tau, rawm: khankix jung rah see awm: ton: gawng mai dee raux rawm: hoik kiien: kah daux rawm: sigrit sigra:.
Pwi koeng ah nin:,Aux tag hawt pheet kix, Aux tag krub kah kix, Aux tag gwieh kraung pa tud rhim:, krax koe: rhawm: Aux, tag vah kah piang kix. Aux tag teei lawm vaig tix lih, taix Aux tag yuh kix lauxleeing:."
Maix Cao: kieh bhaung: ting phlu:, Rawm: sigrit sigra: hoik kheem: kah kix, kix com greem: rawm: awm: sivun, kah daux rawm: pa ting riang.
Simiang Siyiex eue, kah daux Siyiex tang ceu mawh mawx pa awm: Maix lie? mawh mawx pa kied singax singe pa kied ting min: plakngai:, mai koe: krax lhat krax graung daux pa yaog yaw kah, yuh pa daox pa am: khankix uik.
Maix nyeu taix khawn: dawm: tix lih, haktiex hoik bleet kah kix.
Daux krax caoxrhawm: Maix, thung: pwi pa hoik taoh Maix khankix, hu: kah riang rao Maix, kah dee ot pa singax singeh Maix."
"Pwi tag mhong: mai lhat graung kah, krax lauxrhawm: tag hoek kah piang dee ot pwi Philitix.
Yam an: cao: kaing: pwi Edom khankix hoik yaoh yee:, pwi Mawbax pa ting riang ting rao, krax lhat krax graung hoik giex kix, pwi pa ot Khanan khawm: uik, hoik siyaung: sikua hu:.
Krax lhat mai krax yaoh hoek piang kix, kheu plawng: taix pa ting siawpsibrawm Maix, kix hoik kaog awm: simaox, tom: yam hoik luan pwi khankix, Simiang Siyiex eue. Tom: yam hoik luan pwi khankix, Mawh pwi pa hoik taoh Maix hu:.
Maix tag viex kix laig mai sum: kix ot kah daux gawng sinngao Maix an:, kah dee an:, Simiang Siyiex eue, mawh dee pa hoik yuh maix son dee ot dee koe: Maix Cao:, Simiang Siyiex eue, Mawh dee singax singeh pa hoik phan: hoik yuh Maix kah taix Tix.
"Simiang Siyiex tag kwang:; leeing ju leeing phan:,
Mawh kheu brung simiang Pharaw mai ling: lawx naing nawh, mai pwi naing brung nawh, laig kah daux rawm: sigrit sigra:, mai Simiang Siyiex deeh kieh rawm: sigrit sigra: kheem: kah piang kix. Viang mawh nan:, ceu pwi Isarilax khankix, hu: kah piang tiex kroh, daux sigreung rawm: sigrit sigra: heue.
Lai Rhax Pa Ah Meriam
Puxke: bun: Arun pa mawh Meriam, bun: cao: jhai: giex kraung daux taix tix, mai can bun: khawm: uik lih hu: hawt khaix nawh, tau mai kraung mai graox.
Meriam deeh pawk lox ah nin:, "Rhax lai kah Simiang Siyiex, mawh kheu hoik pex Nawh cao: kah daux krax pa koe: min: plakngai:, brung mai cao: pa brug khankix, Nawh Cao: hoik tik daux rawm: sigrit sigra:!"
Grawng: Yuh Rawm: Pa Song: Deeih Mawh Rawm: Pa Tie:
Mose viex pwi Isarilax hu: khaing: rawm: sigrit sigra: raoh. Khaix an:, kix lih hu: kah daux tiag Shurax loe: ngaix kah daux tiag an:, mai ang yaox kah rawm: ceeix kawx.
Yam hoek kix kah Mara, kix ang pon nyaux kah rawm: pa koe: daux Mara khankix, mawh kheu song:, mawh kheu nan:, ceukaux dee an:, tag kok mawh Mara tom: in: singaix.
Pwi khankix deeh baox ngau tan:, mai ah nin: kah Mose, "Ex sang nyaux patix lie?"
Mawh kheu nan:, nawh kok yo kah Simiang Siyiex, mai Simiang Siyiex jhi: nawh yaox khaox tix gaw. Yam tik nawh khaox an: kah daux rawm:, rawm: deeh tie: kah, Nawh Cao: yuh gumlox beenli son kix tan:, mai Nawh Cao: cheuk tix yaox kix tan:.
Mai Nawh ah nin: "Phan: pex cu nghiiet kah lox Simiang Siyiex pex, mai yuh pa rauh pa see sivoe ngai: Nawh Cao:, mai daong yhaok tix kah gumlox pingnyap Nawh khankix, mai hawt gumlox beenli Nawh, Aux tag ang lai deuh jhawm: saux kah piang pex tix ceu kawx, awm: pa hoik viex Aux hoek kah piang pwi Ejiptux. Mawh kheu Aux mawh Simiang Siyiex Cao: pai: jhawm: saux pex.
Kix hoek kah Elem dee koe: rawm: maw: kao: ra: mu: mai khaox jhie: yaong: atigliah gaw, mai kix peung tan: hawt rawm: heue.
Khaomun Mannax Mai Keed
Cub pwi hun: pwi Isarilax khankix lih hu: khaing: baoh Elem, mai hoek kah daux tiag Sin, pa koe: sinax Elem mai gawng Sina, kah daux khix ra kao phwan: ngaix khaix hoik lih kix khaing: haktiex Ejiptux.
Cup pwi hun: pwi Isarilax khankix, ngau kah Mose mai Arun kheu krax kharhawm: tix daux tiag,
pwi Isarilax khankix ah nin: kah kiex, "Phan: ex yum: kah daux taix Simiang Siyiex, daux haktiex Ejiptux, yam ngawm ex mai aw: nex mai sak vaig tix kah priex lheu: mhawm:; mai maix hoik viex yix hoek kah daux tiag, sonsang kieh maix cub pwi hun: yum: kah pa cairhawm: tix."
Simiang Siyiex ah nin: kah Mose, "Aux tag kieh lhiex khaomun lih khaing: raoma: son pex; mai pwi khankix tag lih khrawm: kub son tix ngaix ku singaix, Aux tag cheuk tix yaox kix, sonsang tawng Aux kah hawt kix ang hawt kah gumlox Aux."
"Yam hoek singaix liah, kix tag khre: rien pa khrawm tix lheu: khaing: ku singaix ra: son."
Mawh kheu nan:, Mose mai Arun ah nin: kah kawnpraix Isarilax khankix, "Daux bo in:, pex tag tawng kah mawh Simiang Siyiex pa viex pex lih khaing: haktiex Ejiptux,"
"Mai plak ponngawb, pex tag yaox min: plakngai: Simiang Siyiex, mawh kheu hoik mhong: Nawh Cao: lox ngau pex, mawh kheu mawh ex pwi yuh kah mawx pex lai deuh phimap kah yiex lie?"
Mose deeh ah nin:, "Yam tawx Siyiex pex ih nex tom: kub plakbo, mai khaomun plak ponngawb gumlox in: tag grum naog, mawh kheu Simiang Siyiex hoik mhong: lox pa ngau tieh feen pex kah Nawh Cao:, "Mawh ex pwi yuh kah mawx? lox pa ngau tieh feen pex ang mawh ngau tieh feen kah yiex, mawh pa ngau tieh feen kah Simiang Siyiex.
Mose ah nin: kah Arun, "Krai kah cub pwi Isarilax khankix ah nin:,hoek dex Simiang Siyiex. Mawh kheu hoik mhong: Nawh Cao: lox pa ngau pex, "
yam sikah Arun kah cub pwi hun: Isarilax khankix, kix simi tix jhak kah daux tiag. Kix yaox min: plakngai: Simiang Siyiex jhan: lih khaing: daux paiawm:."
Simiang Siyiex ah nin: kah Mose,
"Aux hoik mhong: lox pa ngau pwi Isarilax khankix,krai kix mhong:,plak ponbo pex tag yaox tix ih nex, mai tag yaox tix ih khaomun plak ponngawb; mai pex tag tawng kah mawh Aux Simiang Siyiex pex "
Plak ponbo keed khankix lih hoek Mai naog hawt dee bang: kix, plak ponngawb rawm: ciex lih vungviang dee bang: kix,
khaix hoik deeh haok rawm: ciex, ceu pa awm: mu: rawmrha: khlawp pa lawmle: iak koe: kah piang tiex kah daux tiag tan:.
Yam yaox kawnpraix Isarilax kah an:, kix ah nin: kah paox tix, tix kaux lai tix kaux, "In: mawh patix lie?" mawh kheu ang kix tawng kah mawh an: patix. Mai Mose ah nin: kah kix, "In: mawh khaomun pa hoik tawx Simiang Siyiex, sonsang ih pex kah."
"Simiang Siyiex tawm: lox ah nin:kieh pwi kukaux khrawm: son pa kub ih tix; tix kaux tix Awmie, awm: diag koe: kaux pwi pa ot daux nyiiex gox khankix"
Pwi Isarilax khankix, yuh awm: pa ah nawh, pwi pa nie, khrawm: hawt nie, mai pwi pa tux, khrawm: hawt tux.
Yam tong: kix tix yaox kah khrawng: Awmie, pwi pa khrawm: tom: nie ang lai lheu:, mai pwi pa khrawm: iak ang lai cud; pwi kukaux hoik khrawm: awm: pa kub ih kaux mawx kaux an:.
Mose ah nin:, "Paw kieh pwi tix kaux kawx, deuh tom: hoek ponngawb."
kix ang nghiiet kah lox Mose. Kix tiblah kawn: deuh tom: hoek plak ponngawb, mai lih mawh graik mai sioe: cux. Mose songrhawm: kah kix.
Kix khrawm: an: ku ngawb, son pwi kukaux, son pa kub ih kaux mawx kaux an:; yam hoik hax koek an: lih rawm:.
Yam hoek singaix liah, kix khrawm: khaomun ra: son, tix kaux pwi ra: Awmie; cao: kwang: cub pwi hun: Isarilax hoek tix krai kah Mose,
nawh ah nin: kah kix, "In: mawh pa hoik tawm: Simiang Siyiex.Pasax mawh singaix twah mai mawh singaix laux lee:, mai singaix pa singax singeh, kah Simiang Siyiex; nghaong: tix deuh awm: pa sang nghaong: pex mai braong: tix deuh awm: pa sang braong: pex son singaix twah, deuh pa kawn deuk kah son pex tom: hoek ponngawb "
Kix deuh an: tom: hoek plak ponngawb, awm: lox ah Mose; mai an: ang lai sioe: mai ang koe: graik,
Mose ah nin:, "Ih in: daux singaix, mawh kheu in: singaix mawh singaix twah cie Simiang Siyiex; in: singaix maix tag ang yaox ceu in: daux kaung:,
"Pex tag khrawm: nawh daux liah singaix; viang mawh nan:, kah daux singaix aliah, mawh singaix twah, tag ang lai koe: mai ang lai yaox."
Pwi tiblah lih hu: kah daux singaix aliah, sonsang khrawm: tix kah, kix ang yaox tix ceu kawx.
Simiang Siyiex ah nin: kah Mose, "Pex kawn: sang thiang: kah lox tawm: pingnyap Aux, mai lox tat jhawm: prawng Aux miex grheung: lie?
Jhak heue Simiang Siyiex tawx singaix twah kah pex, yam hoek liah singaix Nawh Cao: tawx khaomun son ra: ngaix, kieh pwi kukaux ot dee ot tix, paw kieh pwi lih hu: khaing: dee ot tix tix kaux kawx, kah daux singaix aliah.
Mawh kheu nan:, pwi khankix laux lee: tix daux singaix aliah.
Nyiiex ma: pwi Isarilax khankix, kok ceukaux khaomun an: mawh Mannax; an: paing awm: simie taux ki, awm: jhawm: khaomun klu klao tix mai rawm: hia:.
Mose ah nin:, "In: mawh lox tawm: Simiang Siyiex, teei tix deuh Mannax tix Awmie, sonsang deuh pex son ceucat tix yaox tix ju hoik tix ju, mai kix tag yaox khaomun pa eei: Aux pex kah daux tiag, yam viex Aux pex lih khaing: haktiex Ejiptux"
Mose ah nin: kah Arun, "Teei ang tix mu:, mai sau: khaomun Mannax an: tix Awmie daux an:, mai deuh sivoe Simiang Siyiex, sonsang priex pex an: daux ceucat tix tix ju hoik tix ju."
Awm: gumlox pa hoik tawx Simiang Siyiex kah Mose, Arun deuh an: sivoe khwi: kham: mhai: sakse mai priex kah.
Mai pwi Isarilax khankix, hoik ih Mannax tipon: num, tom: hoek kix kah haktiex dee ot tix, mai kix ih Mannax tom: hoek tix kah mee: haktiex Khanan.
(Tix Awmie koe: kao: son tix son Epha heue).
Rawm: Lih Khaing: Daux Rang:
Cub pwi hun: kawnpraix Isarilax, lih khaing: daux tiag baoh haktiex Sin, awm: gumlox pa hoik tawm: Simiang Siyiex, kix hu: bang: kah daux Rephidim, dee an: rawm: ang koe: sonsang nyaux pwi kah.
Mai pwi khankix si mah kah Mose ah nin:, "Tawx yix nyaux rawm:," mai Mose ah nin: kah kix, "Pex lai si mah mai aux yuh kah mawx? Pex lai cheukcheu: kah Simiang Siyiex yuh kah mawx?"
Mai pwi khankix kied simie tix nyaux nie rawm:, mai ngau simah kah Mose ah nin:, "Maix lai viex yix lih khaing: Ejiptux, sonsang pah tix yix, mai kawnpraix yix, mai khawng: brie yix tau kah daux pa simie tix nyaux nie rawm: yuh kah mawx?"
Mose riag yo kah Simiang Siyiex, "Aux sang yuh kah mawx kah pwi inkix? Kix dex sang dheem: aux kah simaox."
Simiang Siyiex ah nin: kah Mose, "Lih hu: sivoe pwi khankix, mai kok kuad song: pwi Isarilax; mai viex khaoxgix pa koe: daux taix maix pa hoik lah maix rawm: klawng: Nilax kah mai lih hu:.
Aux tag cung plak sivoe maix tan:, kah piang rang: baoh Hawrap; maix tag lah kah rang: an:, mai rawm: tag lih khaing: daux an:, sonsang nyaux pwi kah." Mose yuh awm: an: kah sivoe ngai: kuad song: pwi Isarilax khankix.
Nawh kok ceukaux dee an: mawh Masa mai Meribax, mawh kheu pwi Isarilax khankix simah mai cheukcheu: kah Simiang Siyiex ah nin:, "Ot Simiang Siyiex sinax yix lie? Phan: ang mawh nan: ang ot lie?"
Pa Pex Kah Pwi Amaliet
pwi Amaliet hoek mai puing: kah pwi Isarilax kah baoh Rephidim.
Mose ah nin: kah Yawsux, "Laug pwi khankix kah son ex, mai hu: puing: kah pwi Amaliet; pasax aux tag cung kah piang choek gawng tau mai khaoxgix Siyiex kah daux taix tix."
Yawsux yuh awm: pa ah Mose, mai puing: kah pwi Amaliet; Mose, Arun, mai Hurax haok kah piang choek gawng.
Yam yaog Mose taix tix, pwi Isarilax pex kah, mai yam nyah nawh taix tix, pwi Amaliet pex kah.
Mawh kheu hoik meue taix Mose, kix tom: teei simaox tix mu:, mai deuh kah greem: nawh, mai nawh ngawm kah piang an:. Arun mai Hurax joh taix nawh tix plak tix kaux tom: klip singaix.
Yawsux pah kah khunhawkham Amaliet, mai pwi nawh khankix yum: kah lawm vaig.
Simiang Siyiex ah nin: kah Mose, "Tiiem: tix deuh in: kah daux phuk lai, sonsang mawh pa doh keud kah, mai phat Yawsux mhong:, Aux tag preet tix tik ceukaux pwi Amaliet khaing: greem: raoma:."
Mose sum: khu: dee tan, mai kok ceukaux mawh Yahowanitsi, (Simiang Siyiex mawh cao: pa pex).
Taix Simiang Siyiex Cao: pa pex ah nin:, Simiang Siyiex tag yuh naing kah pwi Amaliet tix ju hoik tix ju heue."
Rhawm: Keud Dong: Sawn: Pa Tawx Yesaraw
Yesaraw cao: giex kaing: li Midian, pa mawh paox Mose, hoik mhong: kah can pa yuh Siyiex kah Mose, mai son pwi nawh Isarilax, grawng: pa viex Simiang Siyiex pwi Isarilax lih khaing: Ejiptux.
Khaix an:, Paox Mose pa mawh Yesaraw viex moeng Mose, Zibawrax pa hoik ploi: nawh ing:,
tau mai kawn: simex nawh ra: kaux, ceukaux tix kaux mawh Gerashom, (mawh kheu nawh ah nin:, "Aux hoik sax mawh nyo sinie daux haktiex tang: dauh)."
Mai ceukaux an: tix kaux mawh Eliaza. (Mawh kheu nawh ah nin:, "Siyiex keeing: aux, mawh pa teem: aux, mai kieh aux luat luan khaing: lawm vaig Pharaw").
Paox Mose pa mawh Yesaraw viex moeng Mose mai kawn: simex nawh, ra kaux hoek tau kah Mose daux tiag, dee bang: nawh kah gawng Siyiex.
Yam an:, pwi tix kaux hoek ah nin: kah Mose, "Paox maix Yesaraw hoek tau mai moeng maix, khawm: kawn: simex maix ra: kaux,"
Mose lih plak praix mai rieb kah paox tix, mai nawh ngeuh kaing: tix, mai ngheet kah nawh, mai kiex chawk grawng: krax nyawm ot paox tix, tix kaux hoik tix kaux, mai laig daux nyiiex gox man:.
Mai Mose krai paox tix Yesaraw mhong: grawng: pa hoik yuh Simiang Siyiex, kah Pharaw mai kah pwi Ejiptux khankix, mai ceu pa yaox pwi Isarilax pa nu pa ciien daux krax daux laux, mai grawng: pa hoik kieh Simiang Siyiex kix luat luan.
Yesaraw gauxrhawm: gauxrhi:, son krax pa mhawm: pa yuh Simiang Siyiex khawm: uik kah pwi Isarilax khankix, pa hoik taoh Nawh Cao: kix khaing: daux tawm: taix pwi Ejiptux.
Yesaraw ah nin:, "Kieh Simiang Siyiex koe: bwanson, pa taoh maix luan khaing: daux taix pwi Ejiptux, mai khaing: taix Pharaw, mai pa taoh pwi khankix luan khaing: taix pwi Ejiptux."
"Aux hoik tawng Simiang Siyiex mawh pa ting khaing: siyiex tang: kaux tang: hak, mai pex kah pwi pa ting rhawm: ca nyhau: kah piang pwi Isarilax khankix."
Paox Mose Yesaraw yuh krax tan pa gleeing mai tan kah Siyiex, Arun mai kuad song: pwi Isarilax khankix, hoek sonsang ih priex preem tau mai paox Mose sivoe Siyiex.
Daux singaix pasax, Mose ngawm sonsang prawng ca: kah pwi khankix, mai pwi khankix cung sivoe Mose, jah ponngawb tom: hoek ponbo.
Yam yaox paox Mose kah ceu pa yuh nawh kah pwi khawm: uik, nawh ah nin:, pa yuh maix kah pwi in: khankix mawh ceu pa yuh kah mawx? maix lai ngawm tix prawng ca: nongnong:, mai kieh pwi cung plak sivoe tix, jah ponngawb tom: hoek ponbo yuh kah mawx?
Mose ah nin: kah paox tix, "Mawh kheu pwi khankix hoek kah aux, sonsang chawkcheng: kix kah Siyiex;
yam si mah kix paox tix, kix hoek kah aux, mai aux tag prawng see: sinax pwi tix kaux mai paoxplawg paoxnyhawm: kix, mai aux kieh kix tawng kah beenli Siyiex mai lox tat jhawm: prawng Nawh Cao: khankix."
Paox Mose deeh ah nin: kah nawh, "Ceu pa yuh maix in:, ang mawh pa mhawm:."
"Maix khawm: pwi pa ot tau mai maix, tag awn: riang rao, mawh kheu beeh glawm: in: mawh pa ciien son maix, maix ang doh pon yuh nongnong:.
"Nghiiet kah lox aux yamin: aux tag tawx rhawm: keud dong: sawn: kah maix, mai Siyiex tag ot tau mai maix! maix tag mawh pa yuh kaing khankix sivoe Siyiex, mai viex grawng: khankix hoek kah Siyiex;"
"Maix tag gau kix kah lox lai beenli, mai lox tat jhawm: prawng Siyiex, mai kieh kix tawng krax pa sang lawng kix mai kaing pa khaw: kix tix yuh."
"Lheu: khaing: an: laug pwi pa sang pon yuh kaing, khaing: pwi in: khawm: uik, pwi pa lhat graung kah Siyiex, pwi pa kaux sijax, mai pwi pa koeng kah sinngao pa ang rah see; mai yaog cao: pa kwang: kah piang kix, pa kwang: kah piang cub tix rheng:, kah piang cub tiyieh, kah piang cub tiphwan:, mai kah piang cub kao: kaux.
"Kieh kix tang: prawng ca: kah pwi ku bawg ku yam. See: pa ting ceu khankix kix tag viex hoek kah maix, phan: mawh see: pa iak pa lied kuceu, kieh kix tang: prawng cao: tix, mawh kheu nan:, kix rom tix klawm: beeh glawm: mai maix mai an: tag mawh pa chaong: son maix.
"Phan: maix yuh ceu in:, awm: lox pa tawm: Siyiex kah maix, maix tag pex, mai kaing tag kaux cong:, mai pwi khawm: uik tag hu: kah dee ot tix kah daux pa nhim."
Mose nghiiet kah lox paox tix mai yuh awm: pa ah nawh,
Mose laug pwi pa pon yuh cao: kaing: kah daux pwi Isarilax, mai kieh kix yuh cao: kaing: kah piang pwi khankix, pa kwang: kah piang cub tix rheng:, kah piang cub tiyieh, kah piang cub tiphwan:, mai kah piang cub kao: kaux.
Mai kix prawng kah pwi ku bawg ku yam, mai kix viex grawng: see: pa nu hoek kah Mose; see: pa iak pa lied kuceu kix tang: prawng ca: cao: tix.
Mose kieh paox tix deeh ing:, mai nawh deeh hu: kah haktiex cao: tix heue.
Pwi Isarilax Kah Piang Gawng Sina
Khaix hoik lih hu: pwi Isarilax khankix khaing: haktiex Ejiptux, kah daux khix loe: tix ngaix, kix hoek kah daux tiag Sina.
Khaix hoik lih kix khaing: Rephidim mai hoek kah tiag Sina, kix bang: kah daux tiag tan:, pwi Isarilax khankix bang: hawt sivoe gawng an:,
Mose haok kah Siyiex, mai Simiang Siyiex kok nawh khaing: piang gawng ah nin:, "Maix tag yaox tix krai kah nyiiex ma: Yakop, mai kah pwi Isarilax"
"Pex hoik sax yaox pa hoik yuh Aux kah pwi Ejiptux mai tokaux Aux hoik viex pex lih khaing: Ejiptux awm: viex klang: kawn: tix kah piang pruik tix."
"Phan: pex cu nghiiet kah gumlox Aux mai priex gumlox sijax mukheu Aux, pex tag mawh sinngao cie Aux sinax pwi khawm: uik, mawh kheu can pa koe: kah piang haktiex khawm: uik mawh cie Aux."
"Mai pex tag mawh khunhawkham cao: giex kaing: li khankix, mai mawh ceu pwi pa singax singeh kah Aux, inkix mawh gumlox pa sang krai maix kah kawnpraix Isarilax khankix,"
Mose deeh hoek mai kok kuad song: cao: kaing: pwi khankix, mai krai gumlox pa hoik tawx Simiang Siyiex kah nawh kah plak sivoe ngai: kix.
Pwi khawm: uik deeh pawk lox tix dum: tau mai ah nin:, "Ex tag sang yuh awm: lox pa hoik krai Simiang Siyiex khawm: uik." Mose viex gumlox krai pwi khankix hu: kah Simiang Siyiex.
Simiang Siyiex ah nin: kah Mose, "Jhak heue, Aux tag hoek kah maix, kah dee kied pu ceep paiawm:, sonsang mhong: pwi yam sikah Aux kah maix, mai yumrhawm: kah maix leeing ju." Mawh kheu nan:, Mose deeh krai gumlox pa ah kawn: pwi kah Simiang Siyiex.
Khaix an: Simiang Siyiex ah nin: kah Mose, "Hu: kah pwi khankix mai kieh kix singax singeh daux singaix, mai pasax, mai kieh kix sidaux kraung tix,"
"Yam hoek daux loe: singaix kieh kix khre: rien tix, mawh kheu yam hoek daux loe: singaix, Simiang Siyiex tag lih hoek kah piang gawng Sina, kah sivoe ngai: kawn: pwi khawm: uik."
Maix tag yuh mee: hawt vungviang gawng mai ah nin:,yuh sa tix pex paw luan khaing: mee: mai paw haok kah piang gawng mai teeh kah caong gawng, pwi mawx ang ah pa teeh kah gawng tag kieh nawh yum: tete."
"Pie taix kawx tag ang pon tix teeh kah nawh, tag caw tix dheem: nawh kah simaox. Phan: ang mawh nan: puing: nawh yum: kah te; pwi ang ah, Khawng: brie ang ah, tag ang yaox tix im: Yam mhong: luah lox teettawng tom: rheung:, kix tag yaox tix hoek dex gawng."
Mose lih hoek khaing: piang gawng kah pwi khankix, kieh pwi singax, mai kieh kix sidaux kraung tix,
Mai nawh ah nin: kah pwi khankix, "Yam hoek daux loe: singaix kieh kix khre: rien tix paw kieh kix dex mai bun:."
Yam hoek daux loe: singaix plak ponngawb, lox tuh sah, mai puk plak praix lih, mai paiawm: pa kied pu ceep kah piang gawng, mai Lox pa kied ting sinum teettawng lih, mawh kheu nan:, pwi pa ot kah daux nyiiex bang: kied lhat graung kah tete.
Mose viex pwi khankix lih khaing: daux nyiiex bang:, sonsang yaox kah Siyiex; mai kix cung hawt caong gawng.
Gawng Sina hoik naog kah taox ngu, mawh kheu Simiang Siyiex lih hoek kah piang gawng kah daux sinax ngu, taox ngu an: awm: taox ngu pa kaoh khaing: daux glah ngu, mai gawng an: hoik yung yang: khawm: uik.
Yam sinum luah lox teettawng tom: rheung:, mai nie baox nied tix ting sipie sipie, Mose sikah mai Siyiex, mai Nawh Cao: pawk kah lox nawh kah daux sinum praix.
Simiang Siyiex lih hoek kah piang choek gawng Sina. Mai Simiang Siyiex kok Mose kah piang choek gawng mai Mose kawx haok.
Simiang Siyiex ah nin: kah Mose, "Lih hu:, mai tawx satix kah pwi khankix, Aux lhat kix breeng: tix laig, sonsang jhak kah Simiang Siyiex mai pwi khankix tag lauxleeing: tom: nie."
"Mai cao: giex kaing: li pa hoek dex Simiang Siyiex khankix kawx, kieh kix yuh tokaux tix singax, phan: ang mawh nan:, Simiang Siyiex tag kieh kix lauxleeing:."
Mose deeh ah nin: kah Simiang Siyiex, "Pwi khankix ang lai pon haok kah piang gawng Sina, kheu Maix Cao: hoik tawx satix ah nin: kah yix, yuh mee: vie hawt vungviang gawng, mai kieh gawng singax,"
Simiang Siyiex deeh ah nin: kah Mose, "Lih hu:, mai deeh viex Arun haok tau mai maix, viang mawh nan:, paw kieh cao: giex kaing: li mai pwi khankix, breeng: tix haok kah Simiang Siyiex, mawh kheu Aux lhat kix hoek krax lauxleeing:."
Mai Mose lih hu: kah pwi khankix mai krai kah kix heue.
Lox Tawm: Pingnyap Kao: Gum
Simiang Siyiex sikah gumlox inkix khawm: uik ah nin:,
"Aux mawh Simiang Siyiex maix, pa viex maix lih khaing: haktiex Ejiptux, mai khaing: daux dee mawh maix siliex."
"Lheu: khaing: Aux maix tag ang pon tix krub kah Siyiex tang: kaux tang: hak.
"Maix tag ang pon tix yuh rieng rao tix ceu kawx son tokaux tix, pa awm: rieng pakpeung: pa koe: daux raoma: mai pa koe: piang haktiex, phan: ang mawh nan:, can ceu pa koe: daux rawm: greem haktiex khankix kawx, ang pon tix yuh;
"Maix tag ang pon tix krub mai yuh kaing son kix; mawh kheu Aux mawh Simiang Siyiex maix, mawh Siyiex pa bak pa viang, mai pa deeh viied phimap keeing: pex khankix, kah piang kawnpraix nawh tom: hoek loe: ju, mai pon ju, kah doeh ceucat maix mai can pwi pa koeng kah Aux."
Viang mawh nan:, Aux tag jhi: krax caoxrhawm: Tix kah pwi pa moh kah Aux, mai can pwi pa priex tix hawt gumlox pingnyap Aux khankix tom: hoek kaing: rheng: ju pwi.
"Maix tag ang pon tix kok ceukaux Simiang Siyiex maix giex going. Mawh kheu pwi pa kok kah ceukaux Siyiex giex going Siyiex tag ang deuh nawh mawh pa ang koe: phimap.
"Doh keud kah singaix twah mai een: singax singeh."
Maix tag coca: tix yuh kaing yuh tix khawm: uik daux liah singaix.
Viang mawh nan:, daux singaix aliah, mawh singaix twah Simiang Siyiex maix, maix tag ang pon yuh kaing tix ceu kawx daux singaix an:, maix, kawn: sime kawn: bun: maix, kawncau simex kawncau bun: maix, khawm: khawng: brie maix, khawm: nyo sinie pa ot daux siviex maix khawm: uik,
mawh kheu Simiang Siyiex hoik phan: raoma: mai haktiex, rawm: sigrit sigra:, mai can pa koe: daux nawh khawm: uik, liah singaix mai laux lee: tix kah daux aliah singaix, mawh kheu Simiang Siyiex nawb bwan: kah singaix twah, mai kieh mawh singaix pa singax singeh.
"Yungyi: kah miex keeing: tix, sonsang mhawm: kah maix mai sonsang lang: ju maix kah piang haktiex pa tawx Simiang Siyiex kah maix."
"Maix tag ang pon tix pah pwi yum:."
"Maix tag ang pon tix phit vao mai moeng kawn: pwi."
"Maix tag ang pon tix briex lak."
"Maix tag ang pon tix kham: mhai: sakse pa ang mawh ang meh kah paoxplawg paoxnyhawm: tix."
"Maix tag ang pon tix ghoing: kah nyiiex ma: paoxplawg paoxnyhawm: tix; maix tag ang pon tix ghoing: kah moeng paoxplawg paoxnyhawm: tix, kawncau simex kawncau bun: nawh, moi nawh, la nawh, mai can ceu pa mawh cie paoxplawg paoxnyhawm: maix tix ceu kawx."
Grawng: Lhat Graung Pwi Khankix Kah Siyiex
Yam mhong: pwi khankix sinum praix mai pluk plak praix mai lox teettawng, mai taox ngu khaing: daux gawng, pwi khankix lhat graung siyaung:, mai cung dee singai,
mai kix ah nin: kah Mose, "Maix sikah kah yix, yix tag sang nghiiet lox maix, viang mawh nan: paw kieh Siyiex sikah tau mai yix liak; phan: ang mawh nan:, yix tag yum: kah."
"Mose ah nin: kah pwi khankix, "Paw lhat paw graung; mawh kheu Siyiex hoek tix cheukcheu: kah pex sonsang lhat graung pex kah Nawh Cao:, mai sonsang ang pex yuh phimap."
Mai pwi khankix cung dee singai, viang mawh nan: Mose greed tix dex kah dee pu ceep paiawm: kah dee ot Siyiex.
Lox Tat Jhawm: Prawng Son Khu: Dee Tan
Simiang Siyiex ah nin: kah Mose, "Maix tag ah nin: kah pwi Isarilax khankix.Pex hoik yaox sikah Aux tau mai tix khaing: daux raoma:.
Maix tag ang pon tix yuh rieng siyiex mau mai rieng siyiex khri: son tokaux tix lheu: khaing: Aux.
Maix tag yuh khu: dee tan kah tiex son Aux mai maix tag tan lu krax tan pa gleeing, mai krax tan pa nhim:, pa mawh yung: mai moi tix kah piang an:; kah dauh dee deuh Aux min: ceukaux Tix kudauh, Aux tag hoek kah maix, mai Aux tag nawb bwan: kah maix.
Mai phan: maix yuh khu: dee tan simaox son Aux, maix tag ang pon tix yuh kah simaox pa hoik bre tix mhawmmhawm:, phan: maix yuh kah kraung taix pa shiao tix kah simaox an:, maix hoik kieh nawh seeing: brai:.
Maix tag ang pon tix haok kah khu: dee tan kah bawng:, sonsang ang krax kakaong: maix sidawng: piang an: heue
Lox Tat Jhawm: Prawng Pa Deh Mai Kawncau
"In: khankix mawh grawng: krax prawng krax ca: pa sang deuh maix sivoe ngai: kix.
Phan: maix liag kah siliex ceu pwi Hebrie tix kaux, nawh tag yaox tix yuh kaing son maix liah num, yam hoek kah daux aliah num, nawh tag pon tix luat luan, mai ang yaox tix tawx tidtix.
Phan: nawh hoek tix kaux nongnong:, nawh tag dee lih hu: tix kaux nongnong:, phan: nawh hoek mai moeng tix, nawh tag yaox tix lih hu: mai moeng tix.
Phan: cao: simiang nawh teei nawh koe: moeng, mai moeng nawh keh kawn: simex kawn: bun:, moeng nawh mai kawnpraix nawh khankix tag mawh cie cao: simiang mai nawh tag yaox tix lih hu: nongnong:.
Phan: siliex ah lox sidawng: yuh nin:,aux moh kah simiang tix, mai moeng kawnpraix tix; aux ang rhawm: simie tix lih hu: kah daux pa luat luan.
Khaix an: cao: simiang nawh tag viex nawh hu: kah Siyiex, mai nawh tag viex nawh hoek kah diang siviex, phan: ang mawh nan:, kah rong: sidub; mai cao: simiang nawh tag cieh yhaok nawh kah kat lawm mai nawh tag mawh pwi pa yuh kaing nawh leeing ju.
Phan: pwi tix kauxkaux coh kawn: bun: tix, sonsang mawh siliex, nawh tag ang yaox tix lih hu: awm: siliex simex khankix,"
"Phan: bun: an: ang yuh pa khaw: rhawm: kah cao: simiang tix, pa hoik teei nawh tix moeng, khaix an: nawh tag kieh bun: an: pon krax taoh; nawh ang koe: akhwang tix coh bun: an:, kah pwi haktiex tang: praix, mawh kheu hoik pie lhen: nawh kah bun: an:.
"Phan: nawh hoik liag bun: an: mawh moeng kawn: simex tix, nawh tag priex nawh awm: kawn: bun: tix."
"Phan: nawh baox teei tix koe: moeng tang: kaux, nawh tag ang kieh priex preem, kraung ceep nawh, mai akhwang pa caw nawh tix pon awm: glang: kah: an:, ang caw: tix yawm pie ceeix kawx."
"Mai phan: ang pon yuh ceu in: loe: ceu son nawh, bun: an: tag lih hu: giex mai ang lai pon mau ngawh tokaux tix."
Lox Tat Jhawm: Prawng Son Pwi Pa Simah Simaing
"Pwi mawx pa tawk kah pwi tix kaux kieh yum:, mai tag deeh kieh nawh yum: tete."
"Viang mawh nan:, phan: nawh ang keud tix pah kah nawh, mai phan: Siyiex kieh nawh yum: daux taix nawh, Aux tag sang khre: rien dauh dee sonsang to: nawh tix klawd.
"Phan: pwi tix kauxkaux, keud pa ang khaw: kah paoxplawg paoxnyhawm: tix mai pah kah nawh, viang to: tix mox kah khu: dee tan Aux kawx, tag bluh nawh lih khaing: khu: dee tan, mai pah kah nawh."
"Pwi pa pah kah miex keeing: tix tag kieh nawh yum: tete."
"Pwi pa briex kah pwi mai coh nawh phan: yaox kah daux tawm: taix nawh, tag kieh nawh yum: tete."
"Pwi pa jhax lawg kah miex keeing: tix tag kieh nawh yum: tete."
"Phan: pwi simah mai paox tix mai dheem: kah simaox, phan: ang mawh nan:, tap nawh kah taix tix, phan: nawh ang yum: mai ot kah dee it tix."
"Phan: nawh deeh pon kaoh; hu: lailing plak praix mai gix tix khaox, khaix an: pwi pa hoik tawk kah nawh, tag pon krax pluat ploi; viang mawh nan:, nawh tag yaox tix plud son kaing jhaw: pa hoik gla nawh, mai kia: ngiien kah nawh tom: deeh nyawm ot nawh."
"Phan: pwi tix kaux tawk kah siliex simex siliex bun: tix kah khaox mai yum: daux taix nawh, nawh tag pon krax pa ciyang."
"Phan: siliex an: kawn: im: ju tix ngaix, ra: ngaix, cao: nawh tag ang lai pon krax ciyang; mawh kheu siliex an: mawh pa hoik liak nawh kah mau tix."
"Phan: pwi simah kah paox tix mai hu: krox kah bun: pa koe: kaux tix kaux, mai laux kawn:, viang nawh ang koe: khaix mat kawx, nawh tag pon krax ciyang tete khaing: mex bun: an:; mai nawh tag plud awm: pa hoik tat cao: prawng see:."
"Mai phan: bun: an: koe: khaix mat tix ceuceu, nawh tag tawx ju son ju;
"Ngai: son ngai:, rhang: son rhang:, taix son taix, caong son caong,
"Pa hax ngu son pa hax ngu, pa pliag son pa pliag, pa mat son pa mat."
"Phan: pwi tix kaux tawk kah ngai: siliex simex mai siliex bun: tix kieh laux, nawh tag ploi: nawh lih hu: kheu hoik laux ngai:."
"Phan: nawh tawk kah siliex simex siliex bun: tix khankix, tom: goh rhang:, nawh tag ploi: nawh lih hu: kheu hoik goh rhang: heue."
Lox Tat Jhawm: Prawng Pa Dex Mai Tosat
"Phan: moi teed kah simex bun: tix kauxkaux tom: yum:, tag dheem: moi an: kah simaox, mai ang pon tix ih kah nex. Viang mawh nan:, cao: moi: tag pon krax pluat ploi:."
"Phan: moi an: dawg teed pwi kah daux bawg yam pa luan mai pwi hoik krai grawng: in: kah cao: moi, phan: nawh ang priex ang rien, mai moi an: baox deeh teed kah simex bun: tix kauxkaux yum:, tag dheem: moi an: yum: kah simaox mai cao: moi kawx tag pah nawh yum:."
"Phan: kix kieh plud kah mau, nawh tag yaox tix deeh taoh ju tix, kah ngawh nawh, awm: pa hoik tat kix kah piang nawh."
"Phan: teed kah kawn: simex kawn: bun: pwi, nawh tag yaox tix sau: awm: been pa hoik tat."
"Phan: moi teed kah siliex simex siliex bun: tix kauxkaux, cao: moi tag yaox tix tawx mau tingoe: shekhe kah cao: siliex an:, mai tag dheem: moi an: yum: kah simaox."
"Phan: pwi tix kauxkaux paoh tix deuh daux o:, phan: ang mawh nan:, kaung: daux tiex, mai ang tawb ang kheem:, phan: brung mai moi pwi cod kah daux o: an:,
"Cao: daux tiex an:, tag deeh cox nawh mhawm:; nawh tag plud mau kah cao: khawng: brie an:, mai khawng: brie pa yum: tag mawh cie nawh."
"Phan: moi pwi tix mu: hu: teed kah moi pwi tang: kaux tom: yum:, kiex tag coh moi pa kawn im: an:, mai gwieh mau, moi pa hoik yum: an: kawx, kiex tag gwieh greung."
"Phan: cao: moi hoik tawng moi an: hoik sax teed pwi bawg yam pa hoik luan, mai phan: cao: moi an: ang priex ang rien, nawh tag yaox tix plud, moi son moi, khawng: brie pa hoik yum: an: tag mawh cie nawh heue."
Lox Tat Jhawm: Prawng Son Kraungkhrai:
"Phan: pwi tix kaux briex moi mai yung:, pah ang ah, coh ang ah, nawh tag deeh yaox tix plud moi phwan: mu: son moi tix mu:, mai yung: pon: mu: son yung: tix mu:."
"Phan: yaox yam preeng: pwi briex tix laig daux nyiiex, mai phan: kix tawk nawh yum:, phimap tag ang koe: son nham: pa hoik jauh yuh nawh heue,"
"Phan: singaix hoik lih, nawh tag koe: phimap son pa jauh nham: heue. Mawh kheu nawh tag deeh yaox tix plud tom: grum naog, phan: nawh ang koe: tix ceu kawx, nawh tag coh tokaux tix kheu jao briex nawh,"
"Phan: kawn: yaox moi ang ah yung: ang ah pa kawn im: kah daux taix cao: briex, nawh tag deeh yaox tix plud ra: son."
"Phan: pwi tix kaux kieh khawng: brie tix hu: ih kah kaung: pwi, phan: ang mawh nan:, sipeem plix siiet, mai blha: khawng: brie tix ih kah kaung: pwi, nawh tag yaox tix teei can ceu pa nie mhawm: khaing: daux kaung: cao: nawh, mai ceu pa nie mhawm: pa kaoh khaing: daux sipeem plix siiet nawh plud kah."
"Phan: keeig ngu hax yeem pang: kat khankix, mai deeh hu: proe kah lhiem: nghox, pum: nghox pwi, mai kieh kaung: pwi laux khawm: uik, cao: pa jah keeig ngu an: tag deeh yaox tix plud tete."
"Phan: pwi tix kaux, kieh paoxplawg paoxnyhawm: tix priex mau ang ah, kraungkhrai: ang ah, phan: pwi briex pon briex, khaing: daux nyiiex nawh, phan: pon giex cao: briex, nawh tag deeh plud nawh ra: son."
"Phan: kix ang yaox cao: briex, kix tag viex cao: nyiiex hoek kah plak sivoe ngai: Siyiex mai ciied tix yaox grawng: hoik teei ang teei kah kraungkhrai: paoxplawg paoxnyhawm: tix."
"Grawng: ceu pa phit lud mai kraungkhrai: pwi, pa dex dawd mai moi, la, yung: ang ah, kraung ceep mai tang: ceu pa ah, in: mawh kraung cie aux, phan: tang: kaux ah nan:, kiex ra: kaux tag yaox tix hoek ciied sivoe ngai: Simiang Siyiex; kah pwi pa som tag deeh kieh nawh plud kah paoxplawg paoxnyhawm: tix ra: son."
"Phan: pwi tix kaux kieh paoxplawg paoxnyhawm: tix priex la, moi, yung:, mai khawng: brie tang: ceu tix mu: ang ah, phan: hoik yum:, phan: mat lheet, mai ang yaox yam grheu: pwi nawh hu: dee singai,
khaix an:, cao: pa priex kraung an: tiextu kah sivoe ngai: paoxplawg paoxnyhawm: tix mai sivoe ngai: Siyiex, grawng: ang tix sax teei kraung paoxplawg paoxnyhawm: tix, mai cao: kraung tag caw tix rieb kah lox an:, mai ang lai kieh nawh plud."
Viang mawh nan:, khawng: brie an:, phan: pwi briex khaing: nawh tete, nawh tag deeh yaox tix plud kah kraung an:.
Phan: mawh totiag pa kiied kah, nawh tag yaox tix jhi: to: yum: mawh mhai: sakse; nawh ang lai yaox tix plud kah.
"Phan: pwi tix kaux vai tix ceuceu khaing: paoxplawg paoxnyhawm: tix, phan: an: lih tix mat ang ah, yum: ang ah, yam ang cao: ot, cao: vai tag yaox tix plud awm: pa khaw: mai jum an:."
"Viang mawh nan:, phan: cao: nawh ot, cao: vai tag ang yaox tix plud; phan: mawh pa vai kah ngawh, cao: khawng: brie tag pon ngie ngawh vai khaing: heue.
Lox Tat Jhawm: Prawng Son Kapaox
"Phan: pwi tix kaux nyaw glaw: kah bunkrih pa ang koe: paox klieh, it tau mai nawh, nawh tag tawx phak kah bun: an: mai kieh mawh moeng tix."
Phan: keeing: bun: an: thiang: tix ang tawx kah simex an:, nawh tag yaox tix plud mau, awm: ngawh phak son bunkrih an:.
"Maix tag ang pon kieh bun: pa koe: preu im: ju."
"Pwi pa phit vao mai khawng: brie, tag kieh nawh yum: tete."
"Pwi pa hu: yuh krax tan krax lu, kah siyiex tang: kaux tang: hak lheu: khaing: Simiang Siyiex tix kaux khaing:, nawh tag pon krax laux krax leeing:."
"Maix tag ang pon tix yuh krax khin: kah nyo sinie, mai tuktiaktukte: kah nawh, mawh kheu pex hoik sax mawh nyo sinie kah daux haktiex Ejiptux."
"Maix tag ang pon tix map grham: kah miexmai: kawn: doe:."
"Phan: maix map grham: kix kah ceu patix ang ah, lox riag yo kix kah Aux khawm: uik, Aux tag mhong: kah;"
krax pa kied songrhawm: Aux tag lih, mai Aux tag pah pex kah vaig, moeng pex khankix tag mawh miexmai:, mai kawnpraix pex khankix tag lih tix mawh kawn: doe:."
"Phan: maix tawx pwi Aux, pa hot pa sibhawm: daux sinax pex tix kaux, yaog mau, maix tag ang pon tix yuh awm: cao: pa ploi: mau kah nawh. Maix tag ang pon tix mhaing: rao kah nawh."
"Phan: paoxplawg paoxnyhawm: maix tang prux it tix kah maix, maix tag deeh tawx an: kah nawh, kah: ang singaix nyang klip."
Mawh kheu nawh koe: prux pa lhop tix pheen: ngie kah son tokaux tix, nawh tag sang lhop patix yam it tix lie? yam riag yo nawh kah Aux, Aux tag mhong:, kheu Aux koe: krax pa caoxrhawm:.
"Maix tag ang pon tix ah lox pa ang cee ang cak kah Siyiex, mai ang pon tix jhax lawg cao: kaing: cao: kap piang pwi ceu pex tix kaux kawx."
"Maix tag ang pon tix tuk bawg yam sonsang tan lu tix plix khaox plix ox pa liang tix pon mai rawm: plix siiet. "Maix tag yaox tix tawx kawn: ai: tix kah Aux."
"Awm: an: maix tag yuh kah moi, mai yung: maix khankix. Maix tag kieh kawn: moi kawn: yung: ot mai miex nawh aliah ngaix; kah daux daix ngaix, maix tag yaox tix ap kah Aux."
"Mai maix tag mawh pwi pa singax kah son Aux; maix tag ang pon tix ih nex pa hoik kiied totiag daux kaung:, maix tag taing sox ih heue."
Been Pa Rah Pa See Son Pwi Khawm: Uik
"Maix ang pon tix krai lox satang pa phit pa lud, maix ang pon rom taix tix kham: mhai: sakse pa ang mawh ang meh tau mai pwi pa ang rah ang see."
"Maix tag ang pon tix hawt khaix pwi hun: mai yuh pa caox pa caig, maix tag ang pon kham: mhai: sakse pa ang rah ang see pwi ting pwi hun:, sonsang via tix khaing: pa rauh pa see;
yam prawng maix see: paw jhak pakngai: pwi hot sibhawm:.
"Phan: maix yaox kah moi, la pwi koeng kah maix hoik lud krax, maix tag deeh tuk hoek tawx kah nawh."
Phan: maix yaox kah la cie pwi pa koeng maix kah, goh greem: lhang: kraung ciien tix, maix tag ang pon tix via sonsang teem: kah, maix tag caw tix teem: kah tete.
"Maix tag ang pon tix prawng ca: kah pwi hot sibhawm: kah daux krax pa ang see.
"Kieh tokaux maix singai khaing: pa ang mawh ang meh, paw pah kah pwi pa ang koe: phimap mai pwi pa rauh pa see, mawh kheu Aux tag ang pluat ploi: kah pwi pa ang rah ang see.
Mai maix tag ang pon tix teei mau chun: praok, mawh kheu mau chun: prauk tag kieh ngai: pwi pa koe: cuyi: dug, mai kieh gumlox pwi rah pwi see khankix lud krax.
"Pex tag ang pon tix yuh pa khin: kah nyo sinie, kheu hoik mawh pex nyo sinie kah daux haktiex Ejiptux, pex tawng rhawmrhi: nyo sinie heue."
Lox Tat Jhawm: Prawng Son Singaix Twah
"Maix ruat simie liah num kah daux ma: kaung: maix mai khrawm: kah plix;
Kah daux num aliah, maix ang lai yaox tix yuh mai prah laux tix, mawh kheu nan:, pwi pa hot sibhawm: paox ceu pwi maix khankix tag yaox tix sum: tix ih kah; can pa deuk an:, to: tiag tag yaox tix ih kah. Maix tag yaox tix yuh sipeem plix siiet maix, mai sipeem khaox sanlun maix awm: an:.
"Kah daux liah singaix maix tag yuh kaing jhaw: tix, mai kah daux singaix aliah maix tag laux lee: tix; moi mai la maix khankix kawx tag yaox tix laux lee: tix, siliex simex siliex bun: maix, mai nyo sinie maix, tag dee pon riang rao khraox kah.
Yuh satix kah can ceu pa hoik krai Aux kah maix; paw krai min: ceukaux siyiex tang: kaux tang: hak, mai paw kieh pwi mhong: grawng: in: khankix khaing: jheeh maix heue.
Yuh Pwie Ting Loe: Ceu Ku Num
"Kah daux tix num maix tag yuh pwie kah son Aux loe: bawg."
"Maix tag yuh pwie khaomun pa ang sau: susaix (Pwie Azumax); (maix tag ih khaomun pa ang sau: susaix aliah singaix, awm: gumlox pa hoik tawm: Aux kah maix, bawg yam hoik tat Aux tix deuh daux khix Abibalax, mawh kheu daux khix an:, maix hoik lih hu: khaing: meung Ejiptux. Pwi tix kaux kawx ang pon tix hoek plak sivoe ngai: Aux mai taix yi tix.)"
"Maix tag yuh pwie gaing: nghox, pa mawh pwie pa pon maix plix khaox plix ox pa liang khaing: riang rao tix pa hoik sum: maix daux ma: daux kaung:, mai pwie khrawm: maix plix khaox plix ox kah riang rao maix khaing: daux ma: kaung: bawg yam sidauh num.
"Kah daux tix num pex can pa mawh nyawm simex khawm: uik, tag yaox tix bleeh kah sivoe Simiang Siyiex loe: bawg."
"Maix tag ang pon tix tan lu nham: pa hoik appong: tix kah Aux, tau mai khaomun pa koe: susaix, mai ang pon tix priex bee pa hoik appong: tix kah Aux, deuh tom: hoek plak ponngawb."
"Plix khaox plix ox pa liang maix tix pon khaing: haktiex khankix tag viex laig kah daux nyiiex bwan: Simiang Siyiex maix. "Maix tag ang pon tix ngaik kawn: pex daux rawm:teeih miex nawh heue.
Kawncau Siyiex Mai Gumlox Sijax Mukheu
"Jhak heue, Aux ploi: kawncau Siyiex kah sivoe maix, sonsang kia: ngiien kah maix daux krax daux laux mai sonsang viex maix hu: kah dee hoik khre: rien Aux."
Yuh satix mai cu nghiiet kah lox nawh, paw thiang: kah nawh, mawh kheu nawh tag ang pluat ploi: phimap phigrham: pex; mawh kheu min: ceukaux Aux hoik koe: kah daux nawh.
"Phan: maix cu nghiiet kah lox nawh, mai hawt tix yuh awm: pa krai Aux khawm: uik, Aux tag koeng kah pwi pa koeng kah maix khankix, mai Aux tiebtie kah pwi pa tiebtie kah maix."
"Mawh kheu kawncau Siyiex Aux tag hu: sivoe maix, mai viex maix laig kah dee ot ceu pwi Amawrix, ceu pwi Hitix, ceu pwi Pharazix, ceu pwi Khananix, ceu pwi Hiwix, mai ceu pwi Yebusix khankix, Aux tag yuh kix lauxleeing:,
"Maix tag ang pon tix ngeuh kaing: tix kah siyiex kix mai hawt beenli kix, mai yuh kaing awm: pa yuh kix, maix tag klup tix tik an: khawm: uik, mai raig tix tik rieng rao krub kix lauxleeing:.
Maix tag yuh kaing Simiang Siyiex tix, mai Nawh Cao: tag nawb bwan: kah khaomun mai rawm: maix; mai tag teei tix tik jhawm: saux khaing: sinax pex.
"Aux tag ang kieh pa laux kawn: mai pa neh koe: kah daux haktiex pex, Aux tag kieh baux ju pex grum naog."
"Aux tag ploi: rhawm: pa chix lhat chix graung kah Aux koe: sivoe pex, Aux tag kieh krax suksag rhawm: koe: sinax ceu pwi pa sang yuh pex laux pa sipub pex kah, Aux tag deeh kieh pwi koeng deeh veeh tix to: khaing: pex.
Aux tag ploi: awng: lung hu: sivoe pex, sonsang grheu: pwi Hiwix mai pwi Hitix, mai pwi Khananix khaing: sivoe pex.
Aux tag ang grheu: pwi an: khankix lih khaing: sivoe maix daux tix num, phan: yuh nan: haktiex tag lih tix yi, mai totiag khankix tag pre haoh hun: sonsang kieh maix laux.
"Aux tag grheu: kix khaing: sivoe maix, tix bawg ceeix ceeix tom: sidauh pre haoh hun: maix, mai pon tix cie haktiex an: mawh sinngao tix.
"Mai Aux tag tat mee: haktiex maix jah kah rawm: sigrit sigra: raoh tom: hoek kah rawm: sigrit sigra: Philitix, mai jah khaing: daux tiag tom: hoek kah rawm: klawng: Upharethix, mawh kheu Aux tag ap pwi pa ot haktiex an: daux tawm: taix maix, maix tag grheu: kix lih sivoe maix.
"Maix tag ang pon tix yuh sijax mukheu tau mai kix mai siyiex kix.
"Kix tag ang yaox tix ot daux haktiex pex, phan: yuh nan: kix tag kieh pex phit lud kah Aux; mawh kheu phan: pex yuh kaing siyiex kix, an: tag mawh kie kah pex heue."
Krax Kaux Sijax Pwi Isarilax Mai Gumlox Sijax Mukheu
Mai Nawh Cao: ah nin:, kah Mose, "Hoek mai haok kah Simiang Siyiex, maix mai Arun, Nadat, mai Abihux, khawm: kuad song: pwi Isarilax atigliah kaux, mai kieh krub kah dee singai.
Mawh ngie Mose pa pon hoek dex Simiang Siyiex; pwi tang: kaux tag ang pon tix dex, mai pwi khankix kawx, tag ang pon tix haok tau mai nawh."
Mawh kheu nan:, Mose deeh deeh, mai krai gumlox Simiang Siyiex, mai lox lai beenli kah pwi khawm: uik, mai pwi khawm: uik deeh pawk lox tix gum tau ah nin:, "Ex tag sang yuh awm: gumlox pa hoik krai Simiang Siyiex khawm: uik."
Mose tiiem: tix deuh gumlox Simiang Siyiex khawm: uik, Nawh kaoh caocao plak ponngawb mai sum: khu: dee tan hawt caong gawng, mai rong: simaox kao: ra: mu: awm: koe: ceucat pwi Isarilax kao: ra: ceu.
Nawh ploi: kawn: nyawm sinaw pwi Isarilax khankix, pa tan lu krax tan pa gleeing, mai krax tan pa nhim: kah moi mhaing: ting kah Simiang Siyiex.
Mai Mose teei nham: tix plak mai sau: kah daux pan khoek, nham: an: tix plak nawh phruah kah piang khu: dee tan.
Nawh teei phuk lai sijax mukheu, mai phat an: sonsang mhong: pwi kah khawm: uik; mai kix ah nin:, "Ex tag sang yuh mai cu nghiiet awm: pa hoik krai Simiang Siyiex khawm: uik."
Mose teei nham: mai phruah kah piang pwi khankix, mai ah nin:, jhak heue, "Nham: sijax mukheu in:, hoik mawh pa yuh Simiang Siyiex mhai: sakse tau mai pex awm: gumlox nawh khawm: uik."
Kah Piang Gawng Tau Mai Siyiex
Mose haok kah piang gawng tau mai Arun, Nadat mai Abihux khawm: kuad song: pwi Isarilax atigliah kaux,
Mai kix yaox kah Siyiex pwi Isarilax, mai kah greem: caong Nawh Cao:, koe: siang: simaox pa klai singi raoma:.
Khaix hoik yaox cao: kaing cao: kap pwi Isarilax khankix kah Siyiex, Nawh Cao: ang tawx taix Tix kah kix; mawh kheu nan:, kix ih mai nyaux tau tan:.
Simiang Siyiex ah nin: kah Mose, "Haok kah Aux piang gawng mai pau tan:; Aux tag tawx khlawp simaox pa hoik tiiem: Aux tix deuh gumlox beenli mai gumlox pingnyap khankix, kah sonsang gau maix kah kix."
Mawh kheu nan:, Mose kaoh tau mai cao: pa teem: coi tix Yawsux, haok kah piang gawng Siyiex.
Mai nawh ah nin: kah kuad song: khankix, "Pau yix tin:, tom: deeh hoek yix kah pex; Arun mai Hurax tag ot tau mai pex; phan: pwi tix kauxkaux yaox krax pa nu tix ceuceu, kieh nawh hu: kah kiex."
Khaix an:, Mose haok kah piang gawng, mai paiawm: ceep kah piang gawng.
Min: plakngai: Simiang Siyiex laux lee: tix kah piang gawng Sina, mai paiawm: ceep kah piang gawng liah singaix; yam hoek daux aliah singaix Nawh Cao: kok Mose khaing: daux sigreung paiawm:.
Min: plakngai: Simiang Siyiex jhan: riieng kah piang choek gawng awm: gleeing ngu, kawnpraix Isarilax khankix pon tix yaox kah.
Mose laig daux sigreung paiawm:, mai haok kah piang gawng. Mai Mose ot kah piang gawng tipon: singaix tipon: sawm: heue.
Pa Tan Pa Lu Son Pa Singax Singeh
Simiang Siyiex krai ah nin: kah Mose,
"Krai kah pwi Isarilax khankix, sonsang viex kix krax pa tan pa lu tix kah Aux; maix tag rieb tix teei khaing: pwi pa gauxrhawm: tix tan kah Aux kukaux.
Krax tan krax lu pa caw maix tix teei rieb khaing: kix, tag mawh khri:, mau, mai tawng;
Mai kraung klai raoma:, mai kraung pa lung pliex, mai kraung pa raoh rawt khawm: kraung man: pa taing: tix kah keei: ceu pa mhawm:, mai kraung hauk pex khankix,
hauk kawn: yung: pa hoik siang tix raoh, hak phix mai khaox Akashax.
Bee pa sang tok, bee pa sang groi, mai ceu pa sioe: bhawng: son nyawng bhawng: pa sang gleeing.
Siang: simaox bawd raoh, siang: simaox pa sang tok kah naok sibex da: dawd taix ceep cao: giex kaing: li khankix.
Mai kieh kix yuh dee singax singeh son Aux, mai Aux tag ot sinax kix.
Maix tag yuh awm: pa hoik jhi: Aux kah maix khankix, pa mawh pakpeung: nyiiex gox bwan: man: mai pakpeung: kraungkhrai: khawm: uik.
Khui: Bwan: Sijax Mukheu
"Kix tag yuh khwi: bwan: tix mu: kah khaox Akashax; krax lang: ra: sawk mai tix diex, krax vieh tix sawk mai tix diex, krax lhaong: tix sawk mai tix diex.
"Maix tag om: kah khri: nawnaw plak daux mai plak praix, mai kawb rhang: khri: kah praok vungviang khawm: uik.
Maix tag yuh jeep khri: pon: mu:, mai kab kah daog khwi: bwan: an: pon: plak. Kieh jeep khri: koe: tix plak ra: mu:, mai kieh jeep khri: an: ra: mu: koe: kah an: tix plak ra: mu:.
Maix tag yuh khaox glawm: kah khaox Akashax, mai om: an: kah khri:.
Maix tag sau: khaox glawm: kah daux maox jeep khri: an:, pa hoik kab tix kah daog khwi: bwanson: sang klawm: kix an: kah.
Tag kieh khaox glawm: laig kah daux jeep khri: khwi: bwan: mai ang pon tix teei lih khaing: daux an:.
Mai maix tag sau: mhai: sakse pa sang tawx Aux kah maix daux khwi: bwan: an:.
Maix tag deeh yuh dawb khwi: bwan: pa caoxrhawm: an: kah khri: nawnaw, krax lang: kieh koe: ra: sawk mai tix diex, krax vieh tix sawk mai tix diex.
Mai maix tag yuh rieng Cherubin ra: mu: kah khri:, mai kab kah piang toh dawb khwi: bwan: pa caoxrhawm: plak in: plak an:.
Deuh rieng Cherubin kah daog plak in: tix mu:, mai kah daog plak an: tix mu:, maix tag kieh rieng Cherubin pa koe: daog khwi: bwan: rop tix mawh tix mu: tau kah dawb khwi: dang: ngeung pa caoxrhawm: an:.
Mai rieng Cherubin tag di pruik tix kah piang khwi: bwan:, mai tawb dawb khwi: bwan: kah pruik tix, mai rhax lai veeh pakngai: kah plak paox tix, pakngai: Cherubin khankix jhak kah daog khwi: bwan: dang: ngeung pa caox rhawm an:.
Maix tag tawb dawb khwi: bwan: pa caoxrhawm: an: kah piang khwi: bwan:, maix tag sau ceu pa kham mai sakse pa sang tawx Aux kah maix kah daux khwi: bwan:.
Aux tag sipub maix tan:, mai sikah tau mai maix khaing: kah piang khwi: bwan: pa caoxrhawm: kah daux sinax rieng Cherubin ra: mu: kah piang khwi: pa kham: mhai: sakse, Aux tag tawm: gumlox kah maix son pwi Isarilax khankix heue.
Grawng: Pheen Deuh Khaomun
"Maix deeh yuh pheen: tix mu: kah khaox Akashax; kieh lang: ra: sawk, vieh tix sawk, mai krax lhaong: tix sawk mai tix diex.
Mai maix tag om: kah khri: nawnaw, mai kawb khri: kah hawt vungviang an:.
Maix tag yuh lat koe: tix tawm: taix, mai kawb hawt vungviang an: kah khri:.
Mai maix tag yuh daux jeep khri: pon: mu:, mai sau: kah caong pheen: khawm: pon: daog.
Kieh jeep khri: an: dex mai lat pheen:, sonsang giex khaox glawm: pa klawm: kah pheen:.
Mai maix tag yuh khaox glawm: kah khaox Akashax, mai om: kah khri:, sonsang pon klawm: kah pheen:.
Maix tag yuh pan, lawk tuh, klong: mai kawk nyaux pa sang lhauk pa dex pa dawd mai kraung pa shiao piang pheen:, maix tag yaox tix yuh ceu ankix kah khri: nawnaw.
Mai maix tag deuh khaomun pa tan pa lu tix, kah piang pheen: an: sivoe Aux jheengjheeng:.
Pang: Jawk Ten: Khri:
"Maix tag yuh jawk ten: khri: tix mu:, kah khri: nawnaw, jaong num:, pang: nawh khankix tag bre tix tawk kah daix, kawk nawh, plix nawh mai tai nawh khankix kieh lih mawh tix mu: tau mai an:.
Kieh kak lih koe: khaing: pang: jawk ten: khri: tix plak loe: mu:.
Kak loe: kak pa lih khaing: pang: jawk ten: khri:, kah piang ku mu: koe: tux tai kraox nhawng: kah, mai caw tix koe: kawk loe: mu: pa awm: grang plix Batan,
Kah piang pang: jawk ten: khri: kieh koe: pa awm: tux tai kraox rawm: tau mai kawk pon mu: pa awm: grang plix Batan.
Mai kak khankix pa lih khaing: pang: jawk ten: khri: liah kak, kah greem: kak khawm: ra: plak caw tix koe: tux tai kah tix plak tix mu:.
Tux tai mai kak khankix tag kleuk tix mawh tix mu: tau, pang: jawk ten: khri: an: khawm: kreng tag mawh pa yuh kah khri: nawnaw.
Maix tag yuh kawk ngu aliah mu:; mai tok kah kawk ngu an:, sonsang jhan: pa riieng kah sivoe pheen:.
Sigiiep ngu mai kawk sau: sigiiep ngu kawx, tag mawh pa yuh kah khri: nawnaw.
Can khraung pa shiao kah pang: jawk ten: khri: khankix, tag caw tix yuh kah khri: nawnaw.
Yuh satix, sonsang yuh maix kuceu awm: pa khaw: mai pakpeung: pa hoik jhi: Aux kah maix kah piang gawng heue."
Grawng: Nyiiex Gox Bwan: Man:
"Lheu: khaing: an: maix tag yuh nyiiex gox bwan: man:, kah man: tie kao: pheen: pa hoik taing: kah keei: ceu pa mhawm: pa klai raoma: mai pa lung pliex mai pa raoh rawt khawm: uik, maix yuh tix sau: rieng Cherubin pa mhawm: khaix taix kah piang an:.
Man: tie tix pheen: kieh lang: tinga: daix sawk, plak vieh pon: sawk. Mai man: tie an: ku pheen: kieh sidu paox tix.
Man: tie an: phwan: pheen: caing kleuk paox tix mawh tix pheen:; mai pa deuk an: phwan: pheen: kawx caing kleuk paox tix mawh tix pheen:.
Maix tag yuh daux jhup maox koe: kah praok man: tie kah man: pa klai raoma: see dee sitoe: kix tix caing ku pheen:, awm: an: maix tag deeh yuh nawh kah daog plak praix man: tie an: tix mu:, sonsang sitoe: man: ra: pheen: tix mawh tix mu:.
Maix tag yuh daux jhup maox koe: tiphwan: mu:, kah man: tie an: tix mu:, mai deeh yuh daux jhup maox koe: tiphwan: mu: kah daog man: tie an: ra: mu: tix mu:; sonsang sitoe: daux jhup man: an: kix tix kab tix tau.
Mai maix tag yuh gok khri: tiphwan: mu:, mai veuk man: tie an: kix tau kah gok khri: kieh kleuk paox tix, sonsang mawh nyiiex gox bwan: man: tix lhang:.
"Maix tag yuh man: tawb kao: tix pheen: kah hauk pex; sonsang lhop kah piang nyiiex gox bwan: man:.
Man: tie tix pheen: kieh lang: tingoe: sawk, mai plak vieh pon: sawk; man: tie ankix kao: tix pheen: kieh sidu paox tix.
Maix tag kleuk man: tie an: phwan: pheen: tau, mai man: tie an: liah pheen: tau, maix tag niiep tix deuh man: tie liah pheen: an: kah sivoe nyiiex gox bwan: man:.
Kah daog man: tie an: tix pheen: maix tag yuh daux jhup man: koe: tix phwan: daux, mai kah daog man: tie an: ra: pheen: tix pheen: yuh daux jhup man: koe: tix phwan: daux.
"Maix tag yuh gok tawng: lheung: tix phwan: mu:, mai veuk ankix kah daux jhup man: khankix, mai kleuk an: kah piang kieh mawh nyiiex gox bwan: man: tix lhang:.
Toh man: pa kawn deuk kah piang nyiiex gox bwan: man: an: tix plak, kieh teuk teue: tix lih kah plak khaix nyiiex gox bwan: man:.
Mai man: tawb nyiiex gox bwan: pa lheu: khaing: plak piang ra: sawk, sonsang tawb nyiiex gox bwan: man: kieh teuk teue: tix kah praok nyiiex gox bwan: man: tix plak tix sawk.
Maix tag yuh pa tawb nyiiex gox bwan: man: kah hak yung: pa hoik siang: raoh, mai hak phix khankix kah piang hauk yung:.
"Maix tag yuh ding: jung nyiiex gox bwan: man: kah khaox phia: Akashax.
Kieh krax lang: phia: koe: kao: sawk, krax vieh tix sawk mai tix diex.
Phia: ku plah, tag koe: caong ra: mu: deeh sau: kleuk paox tix; mawh kheu nan:, maix tag yuh nyiiex gox bwan: man: an: kah phia: khawm: uik.
Maix tag yuh phia: ding: son nyiiex gox bwan: man: plak seh koe: tinga: plah;
maix tag yuh jhup jaong mau pa sang jhup kah jaong phia: tipon: mu:, phia: ku plak kieh koe: daux jhup ra: dauh;
awm: an: maix tag yuh phia: ding: nyiiex gox bwan: man:, plak laong: koe: tinga: plah,
maix tag yuh jhup jaong mau tipon: mu:, sonsang jhup jaong phia: tiplah ra: mu:.
Maix tag yuh phia: ding: nyiiex gox bwan: man: son plak klip singaix koe: liah plah.
Maix tag yuh phia: ding: ra: plah son daog nyiiex gox bwan: man: an:, kah plak khaix ra: dauh;
Kix sau: jhup kah plak caong, mai kah plak piang kieh sidu paox tix; mawh kheu nan:, an: tag mawh son daog khawm: ra: plak;
phia: daix plah, jhup jaong mau koe: kao: liah mu; phia: tix plah koe: daux jhup jaong ra: dauh.
"Mai maix tag yuh lat pa lang: kah khaox Akashax, sonsang sau: kah jhup phia: pa koe: praok nyiiex gox bwan: man: an: tix plak phwan: gawng:.
Maix tag yuh lat pa lang: sonsang sau: kah jhup phia:, plak khaix nyiiex gox bwan: man: phwan: gawng:.
Lat pa koe: sigreung, tag kieh laig daux jhup phia:, jah kah toh plak in: tom: hoek kah toh plak an:.
Maix tag om: phia: ankix kah khri:, mai yuh daux jhup maox kah khri:, sonsang giex lat kaux; mai om: lat kah khri:.
Mai maix tag yaox tix sum: nyiiex gox bwan: man:, awm: rieng pakpeung: pa hoik jhi: kah maix kah piang gawng.
"Maix tag yuh man: pa tie kah keei: klai raoma:, keei: lung pliex, mai keei: pa raoh rawt pa hoik taing: kah keei: ceu pa mhawm:; mai yuh tix sau: rieng Cherubin pa mhawm: khaix taix kah piang an:;
Maix tag feuk man: tie an: kah rong: khaox Akashax pon: gawng: pa hoik om: kah khri:, kah rong: khaox an: tag koe: gok khri: mai jhup jaong mau pon: mu:.
Mai maix tag feuk man: tie an: kah rong: khaox gok khri:, khaix an: maix tag viex khwi: pa kham: sakse laig tan: kah plak khaix man: tie an:; man: tie an: tag mawh pa khan: sinax, dee singax singeh, mai kah dee kied blon: singax singeh.
Maix tag sau: dawb khwi: krax pa caoxrhawm: caoxrhi: an: kah piang khwi: bwan: pa kham: mhai: sakse kah daux dee pa kied blon: singax singeh.
Maix tag deuh pheen: kah plak praix man: tieb an:, kah praok plak laong:. Mai deuh pang: jawk ten: khri: tix plak kah praok nyiiex gox bwan: man: kah plak seh, mai kieh see paox tix.
"Maix tag yuh man: tie diang siviex laig daux nyiiex gox bwan: man: tix pheen: kah keei: pa klai raoma:, mai keei: pa lung pliex, mai keei: pa raoh rawt pa taing: kah keei: ceu pa mhawm: khaing: cao: pa taing: man:.
Mai maix tag yuh rong: khaox Akashax phwan: rong:, son man: tie diang siviex an:, mai om: khaox an: kah khri: mai gok khri: kah piang. Maix tag baox deeh yuh daux jhup jaong phwan: daux kah tawng son an: kix heue.
Grawng: Khu: Pa Gleeing Krax Tan
"Maix tag yuh khu: dee tan kah khaox Akashax, kieh krax lang: koe: phwan: sawk, mai krax vieh koe: phwan: sawk. Kieh khu: dee tan an: sidu khawm: pon: daog mai kieh krax lhaong: koe: loe: sawk.
Maix tag yuh rung: nawh koe: kah piang daog pon: daog, mai rung: ankix, tag kieh mawh khaox Akashax tix ceu ngie. Mai maix tag om: nawh kah tawng khawm: uik.
Maix tag yuh aw: tawng: son pa sang sau: kix nyaox, mai si peed vieh plah mai klong: mai khaox sigawng: nex, mai kraung pa shiao mai aw: ngu khawm: uik, maix tag yuh kraung pa shiao maix inkix kah tawng.
Maix tag yuh grheeng: tix mu: kah tawng, mai yuh daux jhup maox pon: daux, kah daog grheeng: an: pon: plak.
Maix tag deuh grheeng: an: kah grheem: toh khu: dee tan, kieh grheeng: pa yuh maix khankix jah khaing: plak greem: tom: hoek sigreung khu: dee tan.
Mai maix tag yuh khaox glawm: kah khaox Akashax mai om: kah tawng.
Sau: khaox glawm: kah daux maox jhup mai kieh khaox glawm: koe: praok khu: dee tan khawm: ra: plak, sonsang pon klawm: kix nawh.
Maix tag yuh khu: dee tan kah phia:, koe: daux doh plak piang mai plak greem:, mawh kheu nan:, kix tag yuh awm: pa hoik jhi: Aux kah maix piang gawng.
Grawng: Man: Vungviang Biang Nyiiex Gox Bwan:
"Maix tag baox yuh vungviang biang nyiiex gox bwan: man:, son daog plak seh kah vungviang biang nyiiex gox bwan: man: an:, tag fak kah man: pa taing: kah keei: ceu pa mhawm:, krax lang: man: an: koe: tiyieh sawk.
Mai rong: khaox pa sang jung kah man: an:, tag kieh koe: tinga: gawng, mai daux jhup jaong nawh tinga: mu: mai ankix tag mawh tawng khawm: uik. Can gok pa koe: kah rong: ankix, mai gawng: lat nawh khawm: uik, tag kieh mawh pa yuh kah mau.
Awm: an: son krax lang: plak laong:, maix tag fak man: tie tiyieh sawk mai rong: khaox tinga: gawng:, mai daux jhup jaong tawng tinga: mu:, mai kah gok kah rong: khaox khankix, khawm: gawng: lat mau.
Mai krax plak vieh vungviang biang, plak klip singaix, tag kieh fak kah man: tie pa koe: tiphwan: sawk, mai rong: jung nawh kao: rong:, mai daux jhup jaong ankix kao: mu:.
Krax vieh vungviang biang plak lih singaix kawx, tag kieh nawh koe: tiphwan: sawk.
Man: tie khankix, kah siviex lawng tix plak, tag kieh nawh koe: kao: phwan: sawk kah plak in: mai rong: nawh loe; rong;, mai daux jhup jaong loe: mu:.
Mai kah plak an: tix plak kieh man: tie koe: kah kao: phwan: sawk mai rong: nawh loe: rong:, mai daux jhup jaong loe: mu:.
Son diang siviex lawng vungviang biang nyiiex bwan:, tag kieh man: tie koe: kah, plak lang: tinga: sawk, mai kieh mawh man: pa klai raoma:, man: pa lung pliex mai man: pa raoh rawt, pa hoik taing: tix kah keei: ceu pa mhawm: khaing: cao: pa taing: man:. Ankix tag koe: rong: pon: rong:, mai daux jhup jaong pon: mu:."
Can rong: khaox pa koe: vungviang biang, tag kieh nawh koe: gawng: lat pa yuh kah mau khawm: uik. Gok khankix kawx, tag mawh pa yuh kah mau, mai daux jhup jaong ankix, tag kieh nawh mawh pa yuh kah tawng.
Krax lang: man: tie vungviang biang, tag kieh nawh koe: tiyieh sawk, krax vieh tag kieh nawh koe: tiphwan: sawk khawm: uik mai krax lhaong: nawh tag kieh koe: phwan: sawk pa hoik taing: tix kah keei: ceu pa mhawm:. Mai yuh daux jhup jaong nawh khankix kah tawng.
Can kraung pa shiao son nyiiex gox bwan: man: khawm: uik, mai lhak khawm: uik, mai lhak pa shiao son vungviang biang, tag kieh nawh mawh pa yuh kah tawng.
Grawng: Priex Kah Jawk Ten: Khri:
"Maix tag tawx gumlox tix kah pwi Isarilax khankix, sonsang viex kix bee pa singax pa krid tix khaing: plix khaox Sanlun, son pa riieng, mai sonsang kieh jawk ten: khri: riang ang jud ang jai.
Kieh bang: kum: kah daux nyiiex gox bwan: man: an:, koe: kah praix man: tie kah sivoe ngai: khwi: pa kham: mhai: sakse, Arun mai kawn: simex nawh khankix, tag cox rien kawk ngu tan:, jah plak bo tom: hoek plak ponngawb, sivoe Simiang Siyiex. An: tag mawh beenli kah doeh simie ceucat pwi Isarilax khankix leeing ju heue.
Kraung Ceep Son Cao: Giex Kaing: Li
"Maix tag teei puxke: tix Arun, khawm: kawn: simex nawh khankix, khaing: daux pwi Isarilax, sonsang mawh kix pwi pa yuh kaing cao: giex kaing: li son Aux. Arun mai kawn: simex nawh Nadat, Abihux, Eliza, Itama tag mawh cao: giex kaing: li greem: maix.
Mai maix tag yuh kraung ceep pa singax singeh son puxke: maix Arun, sonsang mawh pa koe: min: plak ngai: mai krax pa mhawm: grang.
Maix tag krai lox kah pwi pa koe: pingnya cuyi: khankix pa hoik kieh Aux naog kah rhawmrhi: pingnya, pa chix tawng chix yung, mai kix tag yuh kraung ceep Arun sonsang kieh nawh mawh pa singax singeh son nawh. Nawh tag mawh pwi pa yuh kaing jhaw: cao: giex kaing: li son Aux.
Mai inkix tag mawh kraung ceep pa sang yuh kix, pa mawh man: tie naok tix plah, sibex da: plak daux tix pheen: sibex lang: plak praix tix pheen: sibex dawd taix pa mhawm: taing: tix pheen:, man: lawk kaing: tix pheen:, mai man: rawd nyoi tix mu:. Mawh kheu nan:, kix tag yuh kraung ceep pa singax singeh son puxke: maix Arun mai kawn: simex nawh khankix, sonsang yuh kix kaing jhaw: cao: giex kaing: li son Aux.
Kix tag teei khri: mai keei: pa klai raoh mai pa lung pliex, mai pa raoh rawt mai man: ceu pa mhawm:;
Mai kix yuh sibex da: dawd taix kah keei: khri:, khawm: man: pa klai raoma:, man: pa lung pliex, man: pa raoh rawt mai man: pa mhawm: taing: pa nie blon: mhawm: khaing: paox tix.
Sibex da: dawd taix an: tag koe: maox rawd piang klip ra: nyaing, mai kieh toh an: khawm: ra: plak kleuk paox tix sonsang toe: tau.
Mai man: tie naok pa koe: piang sibex da: dawd taix an:, tag mawh pa taing: kah keei: khri:, mai keei: pa klai raoma: mai pa lung pliex mai pa raoh rawt mai man: ceu pa mhawm:.
Maix tag teei simaox siang: bawd raoh ra: mu:, mai saik tix deuh ceukaux kawn: simex Isarilax khankix kah piang an:.
Kieh ceukaux kix liah kaux koe: kah piang simaox tix khlawp, mai ceukaux pa kawn deuk an: liah kaux koe: kah piang simaox an: tix khlawp awm: jhong: keh kix.
Kieh cang mhaw: saik tix deuh ceukaux kawn: simex Isarilax kah piang khlawp simaox khawm: ra: khlawp, maix tag priex an: daux jawk aw: khri:.
Mai maix tag kawb simaox an: ra: khlawp kah piang klip sibex da: dawd taix khawm: ra: plak, mai priex awm: simaox pa sang doh keud kix kah kawn: simex Isarilax. Mai Arun tag viex ceukaux kix kah sivoe Simiang Siyiex kah piang klip nawh khawm: ra: khawn:, sonsang mawh krax pa doh keud kah."
Maix tag yuh jawk aw: simaox an: kah khri:.
Mai maix tag yuh maox khri: pa mhawm: ra: nyaing awm: maox duing: mai phyawk tix deuh maox pa hoik duing: an: kah jawk aw: simaox.
"Maix tag yuh man: tie naok, sonsang shiao bawg yam prawng see:, yuh awm: sibex da: dawd taix pa taing kah keei: khri: pa klai raoma:, pa lung pliex mai pa raoh rawt man: ceu pa mhawm: pa blon: mhawm: taing: khaing: paox tix.
Man: an: tag yuh koe: ra: gawp, mai kieh krax lang: koe: tix diex, krax vieh tix diex, mai kieh daog sidu khawm: pon: plak.
Mai maix tag sau: siang: simaox kah piang man: tie naok an: pon: rhoi:. rhoi tix tag mawh siang: simaox raoh, siang: simaox Utapharax siang: simaox yi: pa raoh.
Rhoi: ra: tag mawh siang: simaox pa klai (pathamya:), siang: simaox pa klai riex (siang: Nilax) mai siang: simaox kiien: (siang: paing).
Rhoi: loe: tag mawh siang: simaox klai singi siang: simaox pawd paing mai siang: simaox raoh klai.
Rhoi: pon tag mawh siang: simaox raoh toh siang: simaox paing pau:, mai siang: simaox pa toh riang, siang: simaox ankix khawm: uik tag priex daux jawk aw: simaox khri:.
Mai kah piang siang: simaox ankix, tag kieh ceukaux kawnpraix Isarilax khankix koe: kah awm: koe: ceukaux kix kao: ra: kaux. Kah piang siang: simaox an: tix mu:, tag kieh kix saik tix deuh ceukaux cum: kao: ra: mu:. Siang: simaox ankix tag kieh koe: awm: doeh ceucat kix kao: ra: cub.
Maix tag yuh maox koe: kah toh man: tie naok, kah maox khri: mhawm: pa duing: tix tau.
Mai maix tag yuh daux jhup khri: ra: mu: pa koe: daux son man: tie naok an:, mai tok daux jhup khri: ra: daux kah toh man: tie naok khawm: ra: plak.
Khaix an:, maix tag sau: maox khri: pa hoik duing: tix ramu: kah daux jhup khri: pa koe: kah toh man: tie naok an:.
Mai toh maox khri: pa duing: kliien: ra: nyaing tag phyawk tix deuh kah aw: simaox ra: mu: kah piang maox rawd piang klip, pa koe: kah sibex da: dawd taix an: plak sivoe ngai:.
Maix tag dee yuh daux jhup khri: ra: mu:, mai sau: nawh kah piang toh man: tie naok an: ra: plak kah daog plak daux sibex da: dawd taix.
Maix tag baox yuh daux jhup khri: ra: mu:, mai sau: kah piang maox rawd piang klip ra: mu: kah plak greem: sibex da: dawd taix kah plak sivoe ngai:. Mai kieh gawng caing sitoe: paox tix, kah plak dee kleuk gawng caing pa taing: kix, sibex da: dawd taix an:.
Kix tag sitoe: daux jhup khri:, pa koe: piang man: tie naok an:, kah daux jhup maox khri: pa koe: kah sibex da: dawd taix. Mai kieh kix sitoe: nawh kah maox keei: pa klai raoma:, mai kieh an: koe: kah plak piang gawng caing pa hoik taing: kix kah sibex da: dawd taix, sonsang ang man: tie naok an:, chix gah tix hu: khaing: sibex da: dawd taix.
Arun tag viex ceukaux kawn: simex pwi Isarilax khankix, kah piang man: tie naok pa prawng see: an: ot kah piang dieb rhawm: tix, yam laig nawh kah dee singax singeh, sonsang mawh krax pa doh keud kah sivoe ngai: Simiang Siyiex ku bawg ku yam.
Mai nawh tag sau: Urim mai Tumin kah daux man: tie naok prawng see: an:. Mai ankix tag koe: kah piang dieb rhawm: Arun, yam hu: nawh kah plak sivoe ngai: Simiang Siyiex. Mawh kheu nan:, Arun tag viex krax prawng see:, piang dieb rhawm: tix, son kawnpraix Isarilax khankix, kah plak sivoe ngai: Simiang Siyiex jheengjheeng: heue.
Grawng: Sibex Paceep Cao: Giex Kaing: Li Tang: Kaux
"Maix tag yuh sibex da: jiet khaw: peung mai sibex da: dawd taix kah man: klai raoma:.
Kieh plak kaing: koe: daux ceep sigreung, mai kieh man: pa hoik taing: an: kawb hawt vungviang moing daux ngawg sibex da: an: tix grawng: son ang lai chix griah.
Mai kah piang hawt vungviang caong sibex da:, maix tag sau: plix sibex pa lawmle: khankix, pa yuh tix kah man: pa klai raoma:, man: lung pliex, man: raoh rawt hawt vungviang caong sibex da: an:. Mai kieh plix hing: khri: koe: kah sinax plix lawmle: an:.
Kieh plix hing: khri: tix mu:, mai plix sibex pa awm: plix makcang tix mu:, khan: sinax paox tix kah piang hawt vungviang caong sibex da: ceep kix ku plak.
Arun tag ceep kah sibex da: in: yam yuh nawh kaing jhaw: Siyiex, mai lox luah ankix, tag kieh pwi mhong: yam laig nawh kah dee pa singax singeh kah sivoe ngai: Simiang Siyiex, khawm: yam deeh lih nawh kah praix, sonsang ang nawh lai yaox tix yum: kah.
"Maix tag deeh baox yuh khlawp plah khri: tix khlawp mai saik ngai: lai kah piang pa awm: cum: tix mu:, pa ah nin: kieh mawh pa SINGAX SINGEH SON SIMIANG SIYIEX.
Krax Pa Singax Singeh Son Siyiex
Mai maix tag phyawk kah maox pa klai raoma:, mai kieh koe: kah piang man: lawk kaing: an:, kah plak sivoe ngai:.
Khlawp plah khri: an: tag koe: kah piang dong: re: Arun, sonsang mawh Arun cao: pa klawm: phimap pa dex dawd mai pa tan pa lu pa singax singeh Pwi Isarilax, mai viex hoek sigrah sonsang mawh krax tan krax lu pa singax singeh, mai khlawp khri: an: kieh ot piang dong: re: Arun jheengjheeng: sonsang pon mawh kix pa rieb tix teei kah sivoe ngai: Siyiex.
"Maix tag taing: sibex da: ceep nawh plak daux kah keei: ceu pa mhawm:. Maix tag yuh lawk kaing: kah man: ceu pa mhawm: mai maox rawd nyoi kah man: pa hoik taing: tix kah rawm: siang: kuceu pa blon: mhawm: khaing: paox tix.
"Maix tag yuh sibex da: son kawn: simex Arun khankix, mai maix tag yuh maox rawd nyoi son kix. Mai maix tag baox yuh mhok pa koe: min: plakngai: mai pa mhawm: grang.
Maix tag ceep ankix kah piang puxke: tix Arun, mai kah piang kawn: simex nawh khankix. Maix tag groi bee kah kix, appong: kix mai kieh kix singax singeh, sonsang mawh kix pa yuh kaing jhaw: cao: giex kaing: li son Aux.
Maix tag caing kix ceep khlax kah man:, sonsang kheem: kix krax kaig krax tua tix, jah kah nyoi tom: hoek kah ba:.
Kraung ceep ankix, tag koe: kah piang Arun mai kawn: simex nawh khankix, yam hoek kix kah daux nyiiex gox bwan: man: bang: kum: pwi hun:. Phan: ang mawh nan: kix tag ceep kraung ankix yam hoek kix hawt dex khu: dee tan son kaing jhaw: Siyiex kah dee pa singax singeh, son ang kix koe: phimap mai yum:. In: mawh grawng: beenli pa caw tix yuh leeing ju leeing phan:, nawh khawm: doeh simie ceucat nawh khankix heue.
Krax Appong: Arun Mai Kawn: Simex Nawh
"Inkix tag mawh grawng: pa sang yuh maix Arun mai kawn: simex nawh singax singeh, son kaing jhaw: cao: giex kaing: li son Aux, teei kawn: moi mhaing: tix mu:, mai kawn: yung: mhaing: ra: mu: pa ang koe: dee ne pa mhawm: loig.
Khaomun pa ang sau: susaix, mai khaomun pa kluklao mai bee pa ang sau: susaix, mai khaomun rhi: khlawp pa sau: bee mai pa ang sau: susaix. Maix tag yuh khaomun an: kah phawng: gaox nghox ca.
Maix tag sau: khaomun an: kah daux khrawng: tix mu:, mai viex hoek tau mai kawn: moi mhaing: mai kawn: yung: iak ra: mu:.
Arun mai kawn: simex nawh khankix tag kieh kix hoek daux diang siviex nyiiex gox bwan: man: bang: kum: pwi hun:. Maix tag kieh kix heem: tix kah rawm:.
Maix tag tawx Arun ceep kraung, pa mawh sibex da: plak daux tau mai sibex da: dawd taix, mai man: tie naok, mai kieh nawh rawd maox rawd nyoi pa nie blon: mhawm: taing pa koe: kah sibex da: dawd taix an:.
Maix tag ceep man: lawk kaing: kah piang kaing: nawh, mai sau: mhok khri: pa singax kah piang man: lawk kaing: an:.
Maix tag teei bee mai groi kah piang kaing: nawh,
Maix tag tok kawn: simex nawh khankix hoek mai ceep kix cie sibex da: plak daux.
Maix tag rawh maox rawd nyoi, kah nyoi Arun mai kawn: simex nawh khankix mai ceep kix cie mhok, kraung ceep cao: giex kaing: li khankix tag mawh cie kix, awm: mhai: sakse gumlox beenli leeing ju. Mawh kheu nan:, maix tag appong: kaing jhaw: cao: giex kaing: li kah Arun mai kawn: simex nawh khankix.
"Maix tag viex moi mhaing: an:, hoek kah daux bang: kum: pwi hun: sivoe nyiiex gox bwan: man: mai Arun khawm: kawn: simex nawh khankix, tag deuh taix tix kah piang kaing: moi mhaing: an:.
Khaix an: maix tag suat moi: mhaing: an: sivoe ngai: Simiang Siyiex hawt diang siviex laig bang: kum: pwi hun: daux nyiiex gox bwan: man:.
Maix tag teei nham: moi mhaing: an: tiblah kah giien: taix tix mai kraix kah piang rung: khu: dee tan, maix tag hieh nham: pa kawn deuk kah praok caong khu: dee tan khawm: uik tan:.
Mai maix tag teei bee pa kheem: kraung vaig, bee pa kheem: kah piang tawm:, mai bee pa koe: piang sok lax, mai khawm: sok lax an: ra: mu:, maix tag deuh an: khankix kah piang khu: krub dee tan mai gleeing kah ngu.
Phan: mawh nex moi an:, hak khawm: roeng khankix, maix tag gleeing nawh kah ngu kah plak praix nyiiex bang:, Ii mawh son krax tan pa pluat ploi: phimap.
"Maix tag teei yung: mhaing: tix mu:, kieh Arun mai kawn: simex nawh khankix deuh taix tix kah piang kaing yung: mhaing: an:.
Maix tag suat yung: an:, teei nham: nawh mai phruah kah praok vungviang khu: dee tan.
Khaix an: maix tag pat nex yung: khik mawx khik an:, mai sigrhah kraung vaig mai caong khankix kah rawm:, mai sau: tix deuh khik nex mai kaing: tau.
Mai maix tag gleeing nex yung: an: kix khawm: uik kah piang khu: dee tan. An: mawh krax tan pa gleeing son Siyiex pa sioe: baux, mai an: mawh krax tan, pa gleeing tix kah ngu son Simiang Siyiex.
"Maix tag baox teei yung: mhaing: an: tang: mu:, kieh Arun mai kawn: simex nawh khankix deuh taix tix kah piang kaing: yung: an:.
Khaix an: maix tag suat yung: an:, teei nham: nawh tiblah mai kraix kah piang dawng: yhaok plak dawm: Arun, mai kah piang dawng: yhaok kawn: simex nawh khankix, mai kah piang giien: ting taix khawn: dawm: kix, mai kah piang giien: ting caong khawn: dawm: kix mai phruah nham: ankix khawm: uik hawt vungviang praok khu: dee tan.
Maix tag teei nham: pa koe: kah piang khu: dee tan tiblah, mai bee tiblah phruah kah piang Arun mai kawn: simex nawh khankix, mai kah piang kraung ceep kix, tokaux cao: nawh mai kraung ceep nawh tag kieh singax, mai tokaux kawn: simex nawh khankix, mai kraung ceep kix tag kieh singax.
"Maix tag teei bee yung: mai sidax, mai bee pa kheem: kah piang kraung vaig, bee pa kheem: kah piang tawm:, mai sok lax ra: mu:, mai bee pa koe: kah piang sok lax mai ba: taix khawn: dawm:; in: mawh yung: pa hoik appong: tix tan lu son Ara kix.
Maix teei khaomun tix lon:, khaomun pa hoik kluklao tix mai bee tix lon:, khaomun pa rhi: khlawp tix khlawp, pa mawh khaomun pa ang sau: susaix khaing: daux kraung pa koe: sivoe ngai: Simiang Siyiex,
maix tag sau: inkix khawm: uik kah daux tawm: taix Arun, mai kah daux tawm: taix kawn: simex nawh khankix, kieh mawh krax tan pa yang yeuh, mai yang yeuh sivoe Simiang Siyiex.
Maix tag deeh rieb tix teei ankix khaing: daux tawm: taix kix, mai gleeing kah ngu kah piang khu: dee tan krax tan pa gleeing, pa sioe: bhawng: kah sivoe Simiang Siyiex mawh krax tan pa gleeing kah ngu son Simiang Siyiex.
"Maix tag teei yung: mhaing: pa hoik appong: Arun ara kieh mawh krax tan, mai yang yeuh sivoe Simiang Siyiex, euk an: tag mawh son cie maix.
Khaing: yung: mhaing: pa hoik appong: an:, maix tag kieh nex euk pa yang yeuh khaing: pa hoik yang yeuh mai krax tan pa yaog khawn: ba:, pa hoik yaog tix mawh pa singax. Ankix tag mawh son Arun mai kawn: simex nawh khankix,
an: tag mawh krax tan pa kaoh khaing: kawnpraix Isarilax son Arun mai kawn: simex nawh khankix, leeing ju. Mawh kheu krax tan pa yaog pa kaoh khaing: kawnpraix Isarilax, khaing: pa hoik appong: kix kah krax tan pa nhim:, ankix tag mawh krax tan pa yaog son Simiang Siyiex.
"Mai kraung ceep pa singax singeh Arun, tag mawh cie kawn: simex nawh khankix khaix nawh sax, kix tag ceep yam groi bee kah kix mai yam appong: kix tokaux tix, kah kaing jhaw: cao: giex kaing: li.
Kawn: simex pa plud tix mawh cao: giex kaing: li tang: nawh, tag ceep kraung ankix, aliah singaix, yam laig nawh kah daux nyiiex gox bwan: man:, bang: dee kum: pwi hun:, sonsang yuh nawh kaing jhaw: Siyiex kah dee pa singax singeh.
"Maix tag teei nex yung: mhaing: pa hoik appong: son Ara, mai ngaik kah dee pa singax singeh.
Khaix an: Arun mai kawn: simex nawh khankix, tag ih nex yung: mhaing: mai khaomun pa koe: daux khrawng: hawt diang siviex nyiiex gox bwan: man: dauh dee bang: kum: pwi hun:.
Kix tag ih ceu ankix pa pluat ploi: phimap sonsang appong: kix tokaux tix mai kieh kix mawh pa singax. Viang mawh nan:, pwi tang: kaux tag ang pon tix ih ankix, mawh kheu ceu ankix mawh pa singax singeh.
Mai phan: nex pa hoik appong: son ara mai khaomun pa kawn deuk tom: hoek plak ponngawb, maix tag gleeing tix tik kah ngu. Kheu mawh pa singax singex mai pwi mawx kawx, tag ang pon tix ih.
"Mawh kheu nan:, maix tag yuh ankix kah Arun mai kawn: simex nawh khankix, awm: gumlox beenli pa hoik tawm: Aux kah maix. Maix tag appong: Ara kix tom: hoek aliah singaix.
Maix tag tan moi mhaing: tix mu: ku singaix, son krax tan pa taoh phimap, maix tag cox khre: khu: dee tan an: singax yam yuh maix krax pluat ploi: phimap tix, maix tag awt nawh kah bee, sonsang deeh singax.
Daux aliah singaix maix tag yuh krax pluat ploi: phimap tix son khu: mai kieh singax. Mai khu: dee tan an: tag mawh pa kied singax. Can ceu pa hu: teeh kah khu: dee tan an:, tag mawh pa singax heue.
Grawng: Krax Tan Son Ku Ngaix
"Pa sang tan lu maix kah piang khu: dee tan ku ngaix, mawh kawn: yung: pa naog tix num ra: mu:,
maix tag tan kawn: yung: tix mu:, plak ponngawb, mai kawn: yung: an: tix mu: kah plakbo.
Pa tan tau mai kawn: yung: tix mu:, tag mawh phawng: ngox ca im: kao: son tix son tix Epha pa klao tix tau mai bee khaox Sanlun pon: son tix son pa mawh tix Hing:, mai rawm: plix siiet pon: son tix son pa mawh tix Hing:, son krax tan pa nyaux.
Mai kawn: yung: an: tix mu: tag mawh pa tan plakbo, maix tag tan tau mai krax tan phawng: ngox ca im: mai krax tan pa nyaux, awm: plak ponngawb, son pa sioe: bhawng: pa mawh krax tan pa gleeing tix kah ngu son Simiang Siyiex.
In: tag mawh krax tan pa gleeing si jheeng: son doeh simie ceucat pex ku ju, kah diang siviex nyiiex gox bwan: man: bang: dee kum: pwi hun:, sivoe Simiang Siyiex, Aux sang yaox pex tan: sikah tau mai pex.
Mai Aux tag yaox kawnpraix Isarilax khankix tan:, mai nyiiex gox bwan: man: an: tag singax singeh kheu min: plakngai: Aux.
Aux tag kieh nyiiex gox bwan: man: bang: kum: pwi hun: mai khu: dee tan singax singeh, Aux tag kieh Arun mai kawn: simex nawh khankix singax singeh mai kieh kix yuh kaing jhaw: cao: giex kaing: li son Aux.
Aux tag ot sinax kawnpraix Isarilax khankix mai mawh Siyiex kix.
Mai kix tag tawng mawh Aux Simiang Siyiex kix, pa viex kix lih khaing: haktiex Ejiptux. Aux tag ot sinax kix mai Aux tag mawh Simiang Siyiex kix heue."
Grawng: Khu: Dee Tan Nyawng Bhawng:
"Maix tag yuh khu: dee tan kah khaox Akashax, sonsang gleeing nyawng bhawng: kah piang an:.
Krax lang: kieh koe: tix sawk mai krax viex tix sawk, mai kieh sidu khawm: pon: daog, mai krax lhaong: tag kieh koe: ra: sawk. Rung: kawx tag mawh pa kleuk tau tix mai nawh.
Mai maix tag om: khri: pa mhawm: plak piang hawt vungviang praok an: khankix, mai rung: nawh khankix, maix tag kawb rhang: khri: kah praok vungviang khawm: uik.
Maix tag yuh daux jhup khri: ra: mu: son an:, kah greem: dee kawb tix rhang: khri: khawm: ra: plak. Maix tag deuh ankix kah praok khawm: ra: plak, mai an: tag mawh dee sau: kix tix giex khaox glawm: sonsang mawh dee klawm: kix nawh.
Maix tag yuh khaox glawm: kah khaox Akashax mai om: nawh kah khri:.
Maix tag deuh an: sivoe man: tieb teug pa kham: mhai: sakse see dangngeung krax caoxrhawm:, kah teug pa kham: mhai: sakse dee sang yaox Aux maix.
Arun tag gleeing nyawng bhawng: kah piang an: ku ngawb yam cox nawh kah kawk ngu khankix, mai nawh tag gleeing nyawng bhawng: kah piang an:.
Mai yam tok Arun kawk ngu khankix plak bo, nawh tag gleeing nyawng bhawng: kah piang an: sivoe Simiang Siyiex, pa mawh nyawng bhawng: pa gleeing jheengjheeng: son doeh simie ceucat maix ku ju.
Maix tag ang pon tix gleeing nyawng bhawng: pa ang khaw: kah piang. Krax tan pa gleeing ang ah, krax tan phawng: nghox ca im: ang ah, mai krax tan pa lhauk pa nyaux ang ah, maix tag ang pon tix yuh kah piang.
Mai Arun tag yuh krax tan pa pluat ploi: phimap kah piang rung khu: dee tan an: tix num tix bawg tau mai nham: krax tan son krax pluat ploi: phimap. Nawh tag yuh krax pluat ploi: phimap kah piang an: tix num tix bawg, mawh beenli kah son doeh simie ceucat maix ku ju. Khu: dee tan an: mawh pa kied singax singeh son Simiang Siyiex heue."
Grawng: Mau Krax Taoh Phimap
Simiang Siyiex ah nin: kah Mose,
"Yam teei maix ca rang ceu pwi Isarilax khankix grawng: koe: kix miex ding, khaix an: pwi kukaux tag yaox tix tawx mau pa taoh tokaux tix kah Simiang Siyiex yam simin maix kix. An: mawh son ang krax kharhawm: lai koe: sinax kix yam simin: maix kix.
Can pwi pa hoik laig carang kukaux tag tawx mau tix plak Shekhe awm: mau Shekhe pa hoik appong: kix tix tan, (Mau Shekhe tix plah koe: tinga: gerax.) Mau tix plah Shekhe tag mawh pa tan pa lu kah Simiang Siyiex.
Pwi pa hoik teei kix carang kukaux jah kah tinga: num haok kah piang, tag tawx krax tan ceu an: kah Simiang Siyiex.
Cao: mi tag ang yaox tix tawx lheu:, mai pwi pa hot pa shia: tag ang yaox tix tawx yawm khaing: tix plak Shekhe yam tawx maix krax tan lu tix kah Simiang Siyiex. Sonsang yuh maix krax pluat ploi: phimap tokaux cao: tix.
Maix tag teei mau tan pa pluat ploi: ceu pwi Isarilax khankix kah phimap tix, mai deuh mawh pa shiao son nyiiex gox bwan: bang: kum: pwi hun:, an: tag mawh krax pa doh keud kah ceu pwi Isarilax khankix, sivoe Simiang Siyiex, sonsang yuh kix krax pluat ploi: phimap sonsang taoh tokaux cao: tix."
Grawng: Pan Khoek Pa Yuh Kah Tawng
Simiang Siyiex ah nin: kah Mose,
"Maix tag yuh pan khoek mai yuh caong nawh kah tawng sonsang khoek kah. Maix tag deuh nawh sinax nyiiex gox bwan: man: bang: kum: pwi hun: mai khu: dee tan, maix tag sau: rawm: kah daux.
Arun mai kawn: simex nawh khankix, tag khoek taix caong tix kah rawm: an:.
Yam laig kix daux nyiiex gox bwan: man: bang: kum: pwi hun:, phan: ang mawh nan:, yam hoek kix kah khu: dee tan, sonsang yuh kaing jhaw: Siyiex, mai yam gleeing kix krax tan tix, kah ngu son Simiang Siyiex, kix tag khoek tix kah rawm: an:, son ang kix yum: kah.
Mawh kheu nan:, kix tag khoek taix caong tix, son ang kix yum: kah. Mai an: tag mawh gumlox beenli son nawh mai son doeh simie ceucat nawh khankix, tom: hoek sidauh leeing ju khawm: uik."
Bee Groi Mai nyawng Bhawng:
Simiang Siyiex deeh ah nin: kah Mose,
"Mai baox teei nyawng bhawng: son cao: maix, pa mawh Muran phwan: yieh Shekhe, khaox cai: hung: pa sioe bhawng: ra: yieh tiphwan: Shekhe, mex pa nyawm sioe bhawng: ra: yieh tiphwan: Shekhe;
Khaox cai: hung: phwan: yieh Shekhe mai bee Sanlun tix Hing:.
Maix tag teei kah bee groi pa singax singeh, pa mawh bee groi pa hoik klao pwi pa chix yuh ceu pa sioe: bhawng: mhawmmhawm:.
Maix tag groi ankix kah nyiiex gox bwan: man: mai bang: kum: pwi hun:, khwi: sijax mukheu pa kham: mhai: sakse khanki;
Pheen: mai kraung shiao piang pheen: khawm: uik, pang: jawk ten: khri: mai kraung shiao tau mai an:, mai khu: dee gleeing kix tix tan nyawng bhawng:;
Khu: dee tan krax tan pa gleeing mai kraung shiao tau mai pan khoek mai khawm: caong nawh.
Maix tag kieh ankix singax singeh, sonsang mawh pa kied singax singeh, mai can pa teeh kah an: tag pon pa singax singeh.
Maix tag groi bee kah Arun, mai kawn: simex nawh khankix, mai appong: kix, sonsang yuh kix kaing jhaw: cao: giex kaing: li son Aux.
Maix tag krai kah ceu pwi Isarilax khankix ah nin:, in: tag mawh bee groi pa singax singeh, kah son Aux daux doeh simie ceucat pex ku ju.
Bee an: tag ang pon tix kraix kah pwi, maix tag ang pon tix yuh bee ceu pa awm: an: tix ceu kawx, an: mawh pa singax singeh, mai tag deuh an: mawh pa singax singeh kah son maix.
Pwi pa yuh ceu bee pa awm: an:, phan: ang mawh nan:, pwi mawx pa kraix an: kah pwi pa ang mawh cao: giex kaing: li tag teei tix tik nawh khaing: pwi ceu nawh.
Simiang Siyiex ah nin: kah Mose, "Teei ceu pa sioe: bhawng:, pa mawh peeh khaox Natap mai lhox khaox pa sioe: bhawng:, mai peeh khaox Galaban, mai peeh khaox Lawban pa singax tau mai pa sioe: bhawng: khawm: uik, mai ciang sidu ceu mawx ceu an:.
Maix tag yuh nyawng bhawng: kah ceu inkix, cao: pa chix yuh mhawmmhawm:, klao tau mai kih sonsang kieh ankix singax singeh.
Mai maix tag teei ceu ankix tiblah, mai tauh tom: phawng: deuh kah sivoe teuk bwan: pa kham: mhai: sakse daux nyiiex gox bwan: man:, bang: kum: pwi hun: kah dee sang yaox Aux maix tan:. An: tag mawh pa kied singax singeh kah son pex.
Nyawng bhawng: pa sang yuh maix in:, maix tag ang pon tix yuh kah son tokaux tix, awm: pa hoik klao kix tix yuh pex tag sang deuh an: mawh pa singax singeh kah son Simiang Siyiex.
Pwi mawx ang ah pa yuh nyawng bhawng: awm: an:, sonsang ngheet kah, tag teei tix tik nawh khaing: pwi ceu nawh khankix heue."
Grawng: Pwi Chix Kaing Taix Sum: Nyiiex Gox Bwan: Man:
Simiang Siyiex ah nin: kah Mose,
"Jhak heue Aux tag kok kah ceukaux mai laug Bezalelax, kawn: simex Urix, pa mawh kawn: simex Hurax kah daux doeh simie ceucat Yudax.
Aux hoik kieh khwan: Siyiex naog kah daux nawh, tawx pingnya cuyi:, mai krax tawng krax yung, mai krax keud krax sawn mai son grawng: pa nhim: kah kaing khawm: uik.
Mai sonsang min: yuh nawh kaing jhaw: khaox kraung pa mhawm:, kraung khri:, kraung mau, kraung tawng;
Mai grawng: kaing pa chix pat chix klaing: chix kleuk siang: simaox, mai kaing pa chix saik khaox mai grawng: kaing pa chix yuh nawh kuceu.
Aux hoik yaog Aholibax kawn: simex Ahisamat, doeh simie ceucat Dan, yuh kaing tau mai nawh. Mai Aux tag tawx pingnya cuyi: kah pwi pa koe: pingnya cuyi: daux rhawm: khankix, sonsang pon yuh kix can ceu pa tawm: Aux kah kix,
pa mawh nyiiex gox bwan: man: bang: kum: pwi hun:, mai khwi: pa kham: mhai: sakse mai dangngeung pa caoxrhawm:, pa koe: kah piang an:, mai can kraung pa shiao kuceu daux nyiiex gox bwan: man:;
pheen: mai kraung pa shiao tau mai pheen:, pang: jawk ten: khri: pa singax mai kraung pa shiao tau mai an:, mai hu: dee tan pa tok nyawng bhawng:;
khu: dee tan kix krax tan pa gleeing tau mai kraung pa shiao kah an:, pan khoek, mai caong pan khoek,
kraung ceep yam yuh kaing jhaw: Siyiex, kraung ceep pa singax singeh son cao: giex kaing: li pa mawh Arun, mai kraung ceep kawn: simex nawh khankix, sonsang yuh kix kaing jhaw: cao: giex kaing: li son Siyiex.
Bee groi mai nyawng bhawng: son dee singax singeh, kix tag yuh ceu an: awm: gumlox pa tawm: Aux kah maix heue."
Grawng: Been Singaix Twah
Simiang Siyiex ah nin: kah Mose,
"Maix krai kah pwi Isarilax khankix ah nin:,pex tag priex kah singaix twah Aux. mawh kheu an: mawh mhai: sakse sinax Aux mai pex, ku ju leeing ju, sonsang tawng pex mawh Aux Simiang Siyiex pex, pa kieh pex singax singeh.
Mawh kheu nan:, pex tag priex rien kah singaix twah, mawh pa singax singeh son pex. Can pwi pa yieh singaix twah an:, tag kieh nawh yum: kah tete. Grawhgrawng: nawh pwi pa yuh kaing kah daux singaix an:, tag teei tix tik khaing: sinax pwi ceu nawh khankix.
Yuh kaing daux liah singaix, viang mawh nan:, kah daux aliah singaix, mawh singaix twah klaung: mai singaix laux lee: tix, mai mawh singaix pa singax singeh son Simiang Siyiex. Pwi pa yuh kaing kah daux singaix twah an:, tag kieh nawh yum:.
Mawh kheu nan:, daux doeh simie ceucat ceu pwi Isarilax khankix tag priex rien kah singaix twah mawh gumlox sijax mukheu leeing ju.
An: mawh mhai: sakse sinax Aux mai ceu pwi Isarilax khankix leeing ju. Grawhgrawng: nawh kah daux liah singaix, Simiang Siyiex hoik yuh raoma: mai haktiex, mai kah daux singaix aliah Nawh Cao: ang lai yuh kaing mai laux lee: tix"
Yam hoik sikah Nawh Cao: tau mai Mose kah piang gawng Sina, Nawh Cao: tawx khlawp simaox khlawp kah Mose, pa mawh lox tawm: pingnyap pa hoik tiem Siyiex kah giien: taix Tix heue.
Grawng: Riang Moi Khri:
Yam yaox pwi Isarilax khankix kah rheung: ang Mose lih khaing: piang gawng, kix kraix khrawm: paox tix hoek kah Arun mai ah nin:, "Kaoh heue, Yuh rieng siyiex kah son yix pa sang thong: yix hu: sivoe, mawh kheu viex Mose yix lih khaing: haktiex Ejiptux, yix ang tawng ceu pa hoik lih tix mawh kah nawh."
Arun ah nin: kah kix, "Peeik krim khri: pa koe: kah yhaok moeng pex, mai kah kawn: simex kawn: bun: pex khankix mai viex hoek kah aux."
Mawh kheu nan:, pwi khawm: uik peeik krim khri: pa koe: kah yhaok tix, mai viex hoek kah Arun.
Mai nawh rieb tix teei khri: khaing: daux taix kix, mai nawh yuh rieng pakpeung: kah kraung taix tix, mai raug tix tawx rieng kawn: moi. Khaix an: kix ah nin: ceu pwi Isarilax eue, in: mawh siyiex pex pa viex pex lih khaing: meung Ejiptux."
Mawh kheu nan:, yam yaox Arun an:, nawh sum: khu: dee tan kah sivoe kawn: moi an:, mai Arun kok pao: lox ah nin:, "Pasax mawh singaix pwie son Simiang Siyiex."
Singaix pasax kix kaoh caocao, mai yuh krax tan pa gleeing, mai krax tan pa nhim:, pwi khankix ngawm tix ih mai nyaux. Khaix an: kix deeh kaoh mai yuh krax klieh krax nyiah.
Simiang Siyiex ah nin: kah Mose, "Lih hu: heue, Grawhgrawng: nawh, pwi maix pa hoik viex maix lih khaing: haktiex Ejiptux khankix, hoik yuh krax pa laux pa leeing: kah tokaux tix.
Kix hoik niied tix veeh hu: khaing: daux krax pa hoik tawm: Aux kah kix. Kix hoik raug rieng kawn: moi son tokaux kix mai krub kah, mai appong: krax tan tix kah an: ah nin:,pwi Isarilax khankix eue, in: mawh siyiex pa viex pex lih khaing: meung Ejiptux"
Simiang Siyiex ah nin: kah Mose, "Aux hoik yaox pwi inkix, mai kix mawh ceu pwi pa kiien: ngawg tete.
Mawh kheu nan:, maix grham: Aux, sonsang lih krax songrhawm: Aux kah piang kix, Aux sang yuh kix lauxleeing:. Mai Aux tag kieh maix mawh ceu pwi pa ting pa lhaong:."
Mose khyox khaw: kah Simiang Siyiex ah nin:, "Simiang Siyiex eue, Maix songrhawm:, kah piang pwi Maix khankix yuh kah mawx? pwi inkix mawh pa hoik viex Maix lih khaing: haktiex Ejiptux kah siawpsibrawm pa ting pa lhaong: Maix, khawn: taix pa ting riang ting rao Maix.
Chix sang kieh pwi Ejiptux pon tix krai ah nin: yuh kah mawx?Nawh Cao: hoik viex kix lih hu:, sonsang yuh krax kharhawm: kix, mai sonsang pah Nawh kix daux tiag, mai sonsang yuh kix lauxleeing: kah piang haktiex: deeh veeh krax songrhawm: Maix Cao:, mai deeh tieh rhawm: Maix ang tawx krax kharhawm: kah pwi inkix, son ceu pwi Maix khankix.
Doh keud kah Abraham, Icak mai Isarilax pa mawh kawncau Maix khankix, pa hoik tiextu Maix Cao: tix kah ah nin:Aux tag kieh doeh simie ceucat pex haoh hun:, awm: simuing: piang raoma: long:, mai haktiex inkix khawm: uik, pa hoik ah Aux tix tawx kah doeh simie ceucat kix, mai kix tag mawh pwi pa pon sinngao ankix leeing ju"
Mawh kheu nan:, Simiang Siyiex deeh doh keud tieh loh rhawm: Tix mai ang lai tawx krax kharhawm: pa hoik ah Nawh Cao: tix sang yuh kah ceu pwi Nawh khankix.
Mose veeh tix lih hu: khaing: kah piang gawng tau mai khlawp simaox ra: plah, pa hoik tiem: kah gumlox tawm: pingnyap kah daux tawm: taix nawh. Khlawp simaox an: ra: plah hoik tiem: tix khawm: ra: plah.
Khlawp simaox ra: plah an:, hoik mawh kaing pa yuh Siyiex mai khaix taix pa tiiem: an:, hoik mawh khaix taix pa hoik tiem: hoik pawt Siyiex kah piang khlawp simaox an:.
Yam mhong: Yawsux kah lox sinum riag yo pwi khankix, nawh ah nin: kah Mose, "Lox sinum naing koe: daux nyiiex bang:."
Mose deeh ah nin:, "Lox ankix ang lai mawh lox riag yo kix kah pex tix naing," Ang laix mawh lox pa yiiem kix kah som tix naing, "Awm: pa mhong: aux, lox ankix mawh lox rhax kix lai."
Yam hoek nawh dex nyiiex bang: dom: mawx dom: an:, nawh yaox kah rieng kawn: moi mai krax graoh krax klieh kix, mai Mose songrhawm: mai taing tix tik khlawp simaox an: pa koe: daux taix nawh, mai pah tix max kah greem: caong gawng.
Khaix an: nawh teei rieng kawn: moi pa hoik yuh kix mai gleeing kah daux ngu, krid tom: phawng:, mai rhuat ankix kah piang rawm:, mai kieh pwi Isarilax khankix nyaux kah.
Mose ah nin: kah Arun, "Pwi inkix yuh patix kah maix kieh maix viex phimap pa ting hoek kah piang kix yuh kah mawx?"
Arun tom: ah nin:, "Paw nyang kieh krax songrhawm: simiang aux lih ha liak. Maix hoik tawng koe: krax pa caox pa caig kah daux rhawmrhi: pwi inkix.
Kix ah nin: kah aux,yuh rieng siyiex son yix, pa sang thung: yix hu: sivoe, mawh kheu Mose cao: pa viex yix lih khaing: haktiex Ejiptux an:, yix ang lai tawng ceu pa hoik lih tix mawh kah nawh
Aux ah nin: kah kix, "Can pwi pa koe: krim khri: kieh peeik lih, kix tom: tawx khankix kah aux, mai aux sau: kah daux ngu, mai lih timawh rieng kawn: moi."
Yam yaox Mose kah ang pwi khankix ceep kraung, (mawh Arun pa hoik grham: kix sonsang kieh pwi koeng kah sinax kix nyiah kix,)
Mose cung diang siviex nyiiex bang: kix mai ah nin:, "Pwi mawx pa ot plak Simiang Siyiex, kieh nawh hoek kah aux!" mai kawn: simex Lewix khankix khrawm: paox tix hoek kah nawh.
Nawh ah nin: kah kix, "Simiang Siyiex pa mawh Siyiex ceu pwi Isarilax ah yuh nin:,kieh pwi kukaux tang: giieb vaig kah nyoi tix, mai hu: lailing kah daux nyiiex bang:, laig kah daux siviex nyiiex in: tom: hoek kah siviex nyiiex an:, mai kieh pwi kukaux pah kah puxaik tix, paoxgrawm paoxgrux tix, mai paoxplawg paoxnyhawm: tix kukaux"
Kawn: simex Lewix khankix yuh awm: gumlox Mose, mai pwi khankix yum: been loe: rheng: kaux kah daux singaix an:.
Mose ah nin:, "Tang yuh tokaux tix singax mai appong: kah Simiang Siyiex daux singaix, sonsang tawx Nawh bwanson: kah piang pex, mawh kheu hoik tieh feen pwi kukaux kah kawn: simex tix mai puxaik tix."
Singaix khaix Mose ah nin: kah pwi khankix, "Pex hoik phit lud mai yuh phimap pa ting, mawh kheu nan:, yamin: aux sang deeh haok kah piang gawng dee ot Simiang Siyiex, sonsang deeh pon aux tix yuh krax pluat ploi: son phimap pex."
Mose deeh hoek kah Simiang Siyiex mai ah nin:, "Pwi inkix hoik phit lud mai yuh phimap pa ting, mai hoik yuh rieng siyiex khri: son cao: tix.
Phan: Maix Cao: koe: rhawm: tix pluat ploi: kah phimap kix pluat ploi: liak. Viang mawh nan:, phan: Maix Cao: ang koe: rhawm:, aux rawg Maix preet ceukaux aux khaing: daux phuk lai pa hoik tiem: Maix Cao: liak."
Simiang Siyiex deeh ah nin: kah Mose, "Pwi mawx ang ah pa hoik phit lud kah Aux, Aux tag preet ceukaux nawh khaing: daux phuk lai Aux.
Yamin: deeh hu: mai thong: pwi in: hu: kah dee pa hoik tawm: Aux kah maix, jhak heue, kawncau Aux tag hu: kah plak sivoe maix, yuh kah mawh ang ah, kah daux singaix yam hoek Aux tix tawx krax ciyang, Aux tag hoek tix tawx krax ciyang kah piang kix, son phimap pa yuh kix."
Simiang Siyiex tawx krax kharhawm: jhawm: saux preng kah pwi an: khankix, kheu jao yuh kix rieng kawn: moi tau mai Arun.
Grawng: tawx gumlox lih Hu: Khaing: Gawng Sina
Simiang Siyiex ah nin: kah Mose, "Lih hu: khaing: tin:, maix khawm: can pwi pa viex maix lih khaing: meung Ejiptux khawm: uik hu: kah haktiex pa hoik tiextu Aux tix tawx kah Abraham, Icak mai Yakop awm: lox pa hoik ah Aux yuh nin:,Aux tag sang tawx ankix kah son doeh simie ceucat maix.
Aux tag ploi: kawncau Siyiex Aux hu: sivoe maix, mai Aux tag grheu: ceu pwi Khanan, ceu pwi Amawrix ceu pwi Hitix, ceu pwi Parazi, ceu pwi Hiwix mai ceu pwi Yebusix lih khaing: tan:."
Hu: kah haktiex dee lih rawm:teeih mai rawm: hia:, Aux tag ang lai hu: tau mai pex, phan: ang mawh nan:, Aux lhat tix yuh pex lauxleeing: hawt krax, kheu mawh pex ceu pwi pa kiien: ngawg."
Yam mhong: pwi kah lox grawng: pa caox in:, kix riag yo mai lauxrhawm: tix, mai pwi tix kaux kawx ang lai ceep khaox kraung.
Grawhgrawng: nawh Simiang Siyiex hoik ah nin: kah Mose, "Krai kah ceu pwi Isarilax khankix,pex mawh ceu pwi kiien: ngawg. Phan: Aux pon tix laig daux sinax pex been tivud ticu, mai Aux sang yuh pex lauxleeing:, mawh kheu nan:, yamin: peeik khaox kraung pa koe: kah kaux pex, sonsang tawng Aux pa sang yuh tix kah pex."
Ceu pwi Isarilax khankix peeik khaox kraung koe: kah to: kaux tix, hawt caong gawng Hawrap tan:.
Grawng: Yaox Mose Kah Simiang Siyiex
Mose sum: nyiiex gox bwan: man: kah praix nyiiex bang:, kah dee singai khaing: nyiiex bang:, mai nawh kok an: mawh nyiiex gox bwan: man: bang: kum: pwi hun:, mai can pwi kukaux pa sawg kah Simiang Siyiex, lih hu: kah nyiiex gox bwan: man: bang: kum: pwi hun:, pa koe: kah praix nyiiex bang:.
Yam lih hu: Mose kah nyiiex gox bwan: man: yam mawx ang ah, pwi kaoh cung kukaux, hawt diang siviex tix mai jhak kah Mose tom: laig nawh kah daux nyiiex gox bwan: man:.
Yam laig Mose kah daux nyiiex gox bwan: man:, rong: paiawm: lih cung kah diang siviex nyiiex gox bwan: man:, Simiang Siyiex sikah tau mai Mose.
Pwi khawm: uik yaox kah cung rong: paiawm: hawt diang siviex nyiiex gox bwan: man:, mai pwi kukaux kaoh mai krub nawh daux diang siviex nyiiex gox cao: tix.
Simiang Siyiex sikah tau mai Mose pakngai: taw pakngai:, awm: pa sikah pwi tau mai paoxgrawm tix, khaix an:, Mose deeh ing: kah nyiiex gox tix, mawh kheu nan:, Yawsux kawn: nyawm simex Nun pa ang lai lih hu: khaing: nyiiex gox bwan: man: heue.
Gumlox Sijax Mukheu Pa ot Siyiex Mai Kix
Mose ah nin: kah Simiang Siyiex, "Jhak heue, Maix Cao: hoik ah nin: kah aux, viex pwi inkix hu:, viang mawh nan:, Maix Cao: ang nyang kieh aux tawng kah pwi pa sang ploi: Maix Cao: hu: tau mai aux. Maix Cao: hoik ah nin: kah aux,Aux tawng kah ceukaux maix mai maix hoik mawh pa pon bwanson: kah plak sivoe ngai: Aux
Phan: aux mawh pa pon bwanson: kah sivoe ngai: Maix, aux rawg mhaing: Maix jhi: aux yaox daux krax Maix Cao:, sonsang tawng aux kah Maix Cao:, mai sonsang pon aux bwanson: kah sivoe ngai: Maix Cao:, mai doh keud kah pwi inkix mawh ceu pwi Maix Cao:."
Nawh Cao: ah nin:, "Aux tag hu: tau mai maix mai Aux tag tawx maix laux lee: tix."
Mose deeh ah nin: kah Nawh Cao:, "Phan: Maix Cao: ang hu: tau mai yix, paw doh viex yix lih khaing: tin: liak.
Ceu pwi Maix Cao: mai tokaux aux, pwi tang: ceu tag sang tawng krax pa pon yix bwanson: kah sivoe ngai: Maix Cao: kah grawng: ceu patix lie? mawh kheu hu: Maix Cao: tau mai yix mai kieh yix tang: siyox khaing: ceu pwi tang: ceu pa ot kah piang ca: haktiex in: ang mawh lie?"
Simiang Siyiex ah nin: kah Mose, "Aux tag yuh ceu inkix, pa hoik rawg mhaing: maix, mawh kheu hoik pon maix bwanson: kah plak sivoe ngai: Aux, mai Aux tag tawng kah ceukaux maix."
Mai nawh ah nin: "Yuh bwanson: jhi: aux yaox min: plakngai: Maix Cao: liak!"
Nawh Cao: ah nin: "Aux tag kieh pa mhawm: Aux hu: sivoe ngai: maix, mai Aux tag kieh ceukaux Simiang Siyiex kok yo sivoe maix." Aux tag yuh bwanson: kah pwi pa si mie Aux tix yuh bwanson: kah, mai Aux tag caoxrhawm: kah pwi pa si mie Aux tix caoxrhawm: kah."
Viang mawh nan: Nawh Cao: ah nin:, "Maix ang pon tix yaox kah pakngai: Aux; grawhgrawng: nawh pwi pa yaox pakngai: Aux tag ang pon tix im: ju tix kaux kawx."
Simiang Siyiex ah nin:, "Jhak heue, koe: dee ot dex Aux tin: tix dauh mai maix tag cung kah piang rang:."
"Yam kawn: hu: min: plakngai: Aux, mai Aux tag sau: maix kah daux, doh rang: an:, mai tawb veei maix kah taix tix, yam hu: Aux hawt maix."
"Khaix an: Aux tag deeh yawn: taix Cao: Tix hoek mai maix tag yaox kah plak blawg Aux. Viang mawh nan:, maix tag ang pon tix yaox kah pakngai: Aux heue."
Mose Deeh Yuh Khlawp Simaox Pa Khraox
Simiang Siyiex ah nin: kah Mose, "Deeh saik khlawp simaox ra: mu:, awm: khlawp simaox pa yuh sivoe nhaox, mai Aux tag tiem: gumlox Aux khankix kah piang khlawp simaox an:, awm: pa koe: kah piang khlawp simaox pa hoik tik maix nhaox.
"Mawh kheu nan:, kieh khlawp simaox an: hoik kah plak ponngawb pasax mai haok kah piang gawng Sina jhi: tokaux maix kah Aux, kah piang choek gawng tan:."
Pwi mawx ang ah tag ang pon tix haok tau mai maix, pwi mawx ang ah, tag ang pon tix ot vungviang gawng khawm: uik, pie cub kawn: yung: mai cub khawng: brie khankix kawx, tag ang pon tix sawm: rib riem hawt caong gawng an:."
Mose saik khlawp simaox ra: mu: awm: khlawp simaox pa yuh sivoe nhaox, Mose kaoh caocao plak ponngawb mai haok kah piang gawng Sina, awm: gumlox pa hoik tawm: Simiang Siyiex kah nawh, nawh viex khlawp simaox an: ra: mu: kah daux tawm: taix tix.
Simiang Siyiex lih hoek kah daux paiawm:, cung tau mai Mose tan:, mai krai pao: ceukaux Simiang Siyiex.
Simiang Siyiex hu: plak sivoe nawh, mai krai pao: ah nin:, "Simiang! Simiang Siyiex pa koe: krax caoxrhawm: mai pa koe: bwanson:, pa koe: krax lang: rhawm:, mai pa grum naog kah daux krax moh, mai pa mawh pa meh;
"Pa priex krax caoxrhawm: kah pwi kaing: rheng: kaing: mheen:, pa pluat ploi: kah pa phit pa lud, mai phimap pwi khankix, yuh kah mawh kawx Nawh Cao: ang doh pluat ploi: phimap ankix daux krax pa mawh pa giex pa going, son phimap keeing: nawh khankix, tag ciyang piang kawnpraix nawh, mai kawn: saux kawn: sex nawh tom: hoek doeh simie ceucat nawh loe: pon: ju."
Mose nied tix gup kaing: tix piang tiex mai krub kah Nawh cao:,
ah nin:, "Phan: aux hoik mawh pa pon bwanson: kah sivoe Maix Cao:, Simiang eue, aux rawg mhaing: kah Maix Cao: mai kieh Maix Simiang Siyiex hu: tau sinax yix, viang yix mawh ceu pwi pa kiien: ngawg kawx, mai pluat ploi: phimap pa caox pa caig pa hoik yuh yix, khawm: phimap tokaux yix, mai teei yix mawh sinngao Maix Cao:."
Gumlox Sijax Mukheu Pa Deeh Cox Nawh Cao:
Nawh Cao: ah nin: "Jhak heue, Aux yuh gumlox sijax mukheu tix mu: sivoe ngai: pwi inkix khawm: uik, Aux tag yuh krax pa daox pa am: pa ang sax yuh kah daux haktiex in:, mai kah ceu pwi tix cub kawx. pwi tang: ceu pa ot sivie siveng maix, tag yaox kah kaing pa yuh Simiang Siyiex. mawh kheu krax pa yuh Aux kah pex mawh krax pa lhat pa graung kah."
"Deuh tix tawng can gumlox pa hoik tawx Aux kah maix daux in: singaix, jhak heue, Aux tag grheu: ceu pwi Amawrix ceu pwi Khanan, ceu pwi Hitix, ceu pwi Pharazix, ceu pwi Hiwix, mai ceu pwi Yebusix lih hu: sivoe maix."
"Rien rhawm: tix paw lai yuh sijax mukheu tau mai ceu pwi pa ot haktiex an:, dee sang hu: maix kah, phan: ang mawh nan:, Aux lhat kix mawh kie taung kah daux sinax pex."
"Viang mawh nan:, maix tag yieh khu: dee tan kix lauxleeing: khawm: uik mai raig tix tik rong: simaox rieng rao pa krub kix, mai kid tix tik rieng rao pa mawh khaox krub kix khawm: uik."
"(Maix tag ang pon tix krub kah siyiex tang: kaux tang: hak, mawh kheu Simiang Siyiex mawh pa bak pa viang (koeng kah pa caox) , mai ceukaux Nawh Cao: kawx mawh pa bak pa viang (koeng kah pa caox)."
"Aux lhat maix yuh sijax mukheu tau mai can pwi pa ot haktiex an:, mai pwi khankix hawt yuh kaing jhaw: kah siyiex kix mai phit lud kah, mai yam appong: kix krax tan tix kah siyiex kix, mai pwi tix kauxkaux khaing: daux kix, tag kok kah maix, mai maix tag ih kah pa appong: pa tan lu kix."
"Lhat maix kieh kawn: simex tix khankix teei kawn: bun: kix, mai hawt yuh krax phit krax lud tau mai siyiex kix, mai kieh kawn: simex maix khankix phit lud tau mai siyiex kix."
"Ang pon rauk tix yuh rieng rao siyiex son tix."
"Maix tag priex rien kah pwie khaomun pa ang koe: susaix, maix tag ih khaomun pa ang koe: susaix kah daux aliah singaix, awm: gumlox pingnyap pa hoik tawx Aux kah maix bawg yam khix Abibax pa hoik tat Aux tix deuh, mawh kheu lih maix khaing: daux meung Ejiptux kah daux khix Abibax an:."
"Can kawn: ai: plix num: mawh cie Aux, khawng: brie pa eei: pex, moi ang ah, yung: ang ah, kawn: pa pon pex phao kah: pa mawh mhaing: khawm: uik tag mawh cie Aux."
"Viang mawh nan:, kawn: la pa kex phao kah:, maix tag deeh taoh nawh kah kawn: yung:, phan: maix ang deeh taoh tag raig tix tik ngawg nawh, maix tag deeh taoh kah kawn: ai: tix khankix. Paw kieh pwi tix kaux kawx hoek mai taix yi tix kah sivoe Aux."
"Maix tag yuh kaing jhaw: liah singaix, daux singaix aliah maix tag laux lee: tix, viang mawh bawg yam yuh ma: yuh kaung: ang ah, mai bawg yam vawg nghox koi: khankix, maix tag laux lee: tix."
"Maix tag yuh pwie gaing: nghox daux aliah vang twah, son plix nghox ca pa vawg maix phao kah:, mai pwie priex rhawm: nghox ca yam hoik sidauh num."
"Pwi maix pa mawh simex khankix tag hoek bleeh plak sivoe ngai: Cao: Simiang Siyiex, pa mawh Siyiex ceu pwi Isarilax tix num loe: bawg."
"Aux tag grheu: pwi tang: ceu tang: cat sivoe maix, mai kieh mee: haktiex maix khankix nie baox vieh va:, mai tag ang koe: pwi pa ghoing: kah haktiex maix yam hoek maix plak sivoe Simiang Siyiex tix num loe: bawg."
"Maix tag ang pon tix tan lu nham: tau mai khaomun pa koe: susaix, maix tag ang pon tix deuh pa tan lu tix daux pwie Pasakha tom: hoek plak ponngawb."
"Plix khaox plix ox pa liang maix tix pon khaing: haktiex maix khankix, tag viex laig kah daux nyiiex bwan: Simiang Siyiex maix, maix tag ang pon tix ngaik kawn: pex daux rawm:teeih miex nawh."
Simiang Siyiex ah nin: kah Mose, "Tiiem: tix deuh gumlox in: khankix, grawhgrawng: nawh awm: gumlox ceu pa kied ting lhaong: in:, Aux tag yuh sijax mukheu mai maix khawm: ceu pwi Isarilax khankix."
Mose ot tau mai Simiang Siyiex tan: tipon: singaix tipon: sawm:, nawh ang ih priex preem mai ang nyaux rawm:, mai Nawh Cao: tiiem: gumlox sijax mukheu kah piang khlawp simaox an:, pa mawh gumlox pingnyap kao: gum heue.
Pa riieng Pakngai: Mose
Yam lih Mose khaing: piang gawng Sina, mai khlawp gumlox tawm: pingnyap ra: mu: koe: daux taix Mose, yam lih nawh khaing: kah piang gawng. Mose ang tawng kah rieng hak nex pakngai: tix, yam sikah nawh tau mai Nawh Cao:.
Yam jhak Arun mai ceu pwi Isarilax khankix kah Mose, yaox hak nex pakngai: nawh hoik riang, mai kix koe: krax lhat krax graung sonsang hoek kix dex nawh.
Mose kok kah kix, mai Arun khawm: cao: kaing: hoek kah tix, mai sikah tau mai kix.
Khaix an: ceu pwi Isarilax khankix hoek dex nawh, mai nawh tawx gumlox pingnyap khankix kah kix, awm: gumlox pa hoik sikah Simiang Siyiex tau mai nawh khawm: uik kah piang gawng Sina.
Yam hoik sikah Mose tau mai kix, nawh tie man: kah pakngai: tix.
Viang mawh nan:, yam laig Mose tix sikah tau mai Nawh Cao: yam mawx ang ah, nawh plak man: tie pakngai: an:, sivoe ang nawh nyang lih hu: kah plak praix, mai nawh tag lih plak praix mai krai gumlox ceu pa hoik tawm: Simiang Siyiex kah ceu pwi Isarilax khankix.
Yam yaox ceu pwi Isarilax khankix kah pakngai: Mose yam mawx ang ah, hak nex pakngai: Mose riang, Mose tag baox deeh tie pakngai: tix kah man: tie, tom: hoek bawg yam laig sikah nawh tau mai Nawh Cao: heue.
Grawng: Been Singaix Twah
Mose kraix khrawm: cub pwi hun: ceu pwi Isarilax khankix mai ah nin:, "Inkix mawh gumlox pa hoik tawm: Simiang Siyiex kah pex sonsang hawt yuh pex kah."
"Yuh kaing kah daux liah singaix, singaix aliah mawh singaix pa singax singeh, mai mawh singaix twah singaix laux lee: son Simiang Siyiex, can pwi pa yuh kaing kah daux singaix an:, tag kieh nawh yum:."
"Maix tag ang pon tix phlu: ngu, kah dee ot tix daux singaix twah."
Krax Tan Krax Lu son Nyiiex Gox Bwan: Man:
Mose krai kah cub pwi hun: ceu pwi Isarilax khankix ah nin:, "In: mawh ceu pa hoik tawm: Simiang Siyiex."
"Kah daux pex pa sang tan lu son Simiang Siyiex, can pwi pa koe: rhawmrhi: kieh nawh viex an: khankix hoek mai tan lu kah Simiang Siyiex, can pa mawh khri: mau mai tawng,
"Mai man: pa klai raoma:, man: lung pliex, man: raoh rawt, man: keei: ceu pa mhawm: mai hauk pex khankix,
"Hak yung: mhaing: pa siang: tix raoh, hak phix mai khaox Akasax,
"Bee tok mai bee groi, mai ceu pa sioe: bhawng: son nyawng bhawng: pa sang gleeing,
"Siang: simaox bawt raoh mai siang: simaox tang: ceu khankix pa sang sau: daux kraung ceep sibex da: dawd taix, mai kah daux man: tie naok."
Kraung Pa Shiao Son Nyiiex Gox Bwan: Man:
"Can pwi pa min: pa koe: pingnya kah kaing khawm: uik daux sinax pex, tag hoek mai yuh kaing ceu pa hoik tawm: Simiang Siyiex khawm: uik;
"Nyiiex gox bwan: man: mai pa tawb kah piang nyiiex gox, can ceu gok, khaox phia: mai lat mai rong: khaox, mai daux jhup jaong khankix;
"Teug bwan: sijax mukheu mai khaox glawm:, mai diep teuk bwan: dangngeung krax pa caoxrhawm: mai man: tieb pa sang tie khankix,
"Pheen: mai khaox glawm: nawh, mai kraungkhrai: pa shiao khankix mai khaomun pa khan: kheu kah plak sivoe ngai: Siyiex;
"Pang: jawk ten: khri: mai kraung pa shiao tau mai an:, mai kawk ngu mai bee tok,"
"Khu: dee tan dee gleeing kix nyawng bhawng:, mai khaox glawm: khankix, mai bee groi, mai ceu pa sioe: bhawng: son nyawng bhawng: pa sang gleeing, mai man: tieb diang siviex dee laig kix kah daux nyiiex gox bwan: man:,
"Khu: tan dee tan krax tan pa gleeing tau mai grheeng: tawng, mai khaox glawm: nawh, mai pa shiao tix khawm: uik, mai pan khoek khawm: caong nawh,
"Man: pa sang feuk tix daux biang nyiiex gox bwan: man: mai rong: khaox nawh khankix, mai jhup jaong daux nawh khankix, mai man: tie kah diang siviex dee laig kix kah daux biang nyiiex gox bwan: man:,
mai lhak nyiiex gox bwan: man: khankix, lhak pa shiao son daux biang nyiiex gox bwan: mai maox nawh khankix khawm: ra: plak,
Kraung ceep yam yuh kaing cao: giex kaing: li khankix, kah daux dee pa singax singeh mai kraung ceep pa singax singeh son cao: giex kaing: li Arun mai kraung ceep son kawn: simex nawh khankix yam yuh kix kaing jhaw: cao: giex kaing: li heue.
Khawngphak Son Nyiiex Gox Bwan:
Cub pwi hun: ceu pwi Isarilax khawm: uik li hu: khaing: sivoe Mose.
Can pwi kukaux pa ceh daux rhawmrhi: mai can pwi kukaux pa koe: rhawmrhi: khankix, viex krax tan krax lu tix kah Simiang Siyiex, son pa yuh kix nyiiex gox bwan: man:, bang: kum: pwi hun:, grawng: kaing jhaw: nawh khawm: uik, mai son kraung ceep pa singax singeh khankix.
Kix khawm: simex mai bun:, awm: pa koe: rhawmrhi: tix, mai kix viex ble, krim meeh, jheep giien:, mai kong nhang: khankix, mai kraung khri: kraung mau khawm: uik, pwi kukaux tawx ceu pa tan pa lu pa mawh khri: kah Simiang Siyiex.
Mai pwi kukaux viex man: klai raoma: man: lung pliex man: raoh rawt man: pa taing: tix kah keei: ceu pa mhawm:, hauk pex khankix, hak pex pa siang: tix raoh mai hak phix khankix hoek.
Can pwi kukaux pa tan pa lu kah mau mai tawng khankix kawx, mai viex hoek sonsang tan lu kah Siyiex, mai pwi kukaux pa koe: khaox Akashax khankix, mai viex hoek tawx sonsang shiao kah kaing jhaw: Siyiex.
Bun: pa chix taing: khankix, taing: man: kah taix cao: tix, pa mawh man: pa klai raoma:, man: lung pliex mai man: raoh rawt tau mai man: pa taing: tix kah keei: ceu pa mhawm: khankix hoek.
Can bun: pa ceh daux rhawmrhi: mai pa koe: pingnya cuyi: khawm: uik taing: hauk pex.
Kuad song: cao: pa kwang: piang kix viex siang: simaox bawt raoh siang: simaox tang: ceu khankix pa sang tok kix kah piang kraung ceep sibex da: dawd taix mai kah piang man: tie naok,
mai teei ceu pa sioe: bhawng: yuh nyawng bhawng:, bee tok mai bee groi khankix.
Ceu pwi Isarilax khankix, viex ceu pa tan pa lu hoek kah Simiang Siyiex, awm: pa koe: rhawm: kix tix tawx, can simex bun: pa koe: rhawm: tix viex kraung kuceu, pa hoik chix yuh kix, son kaing kuceu khawm: uik, kah Simiang Siyiex kix yuh awm: gumlox pa hoik tawm: Siyiex kah Mose.
Can Pwi Pa Chix Yuh Kaing Taix Son Nyiiex Gox Bwan: Man:
Mose ah nin: kah ceu pwi Isarilax khankix, "Nghiiet heue, Simiang Siyiex hoik kok kah ceukaux Bezalelax pa mawh kawn: simex Urix, Urix pa mawh kawn: simex Hurax, pa mawh doeh ceucat pwi Yudax;"
Mai nawh hoik naog kah khwan: Siyiex, pa kieh koe: pingnya cuyi:, mai daux krax pa chix keud chix yuh, mai krax tawng krax yung pa chix yuh grawng: kaing kuceu;
"Mai kaing pa chix yuh rieng pakpeung: kuceu kah khri:, kah mau mai tawng khankix;
"Mai pa chix pat chix kleuk kah siang: simaox khankix, pa chix saik rieng pakpeung: kah khaox, mai pa min: kah grawng: kaing kuceu khawm: uik.
Mai Nawh Cao: hoik tawx krax keud krax chix kuceu daux rhawmrhi: nawh, mai kah Ahawliba kawn: simex Ahisamat doeh ceucat Dan, sonsang deeh chix gau chix sawn: kiex kah pwi khankix.
Nawh Cao: hoik kieh kix grum naog kah pingnya pa chix pa min: kah kaing kuceu, son kaing pa saik mai kaing pa chix yuh pakpeung: kuceu, mai kaing pa chix taing: man: kuceu, sonsang taing: kix man: pa klai raoma:, man: lung pliex, man: raoh rawt mai man: keei: ceu pa mhawm: mai kaing krax chix taing: pakpeung: kuceu khankix heue.
Bezalelax mai Ahawliba, mai can pwi pa chix yuh kaing taix awm: pa koe: piangnya cuyi: kix, pa hoik sau: Simiang Siyiex pingnya cuyi: daux rhawm: kix, mai pa chix keud chix yuh, sonsang tawng kix tix yuh kaing khawm: uik, mai son kaing jhaw: dee pa singax singeh, kix tag yuh an: awm: lox tawm: Simiang Siyiex."
Pwi Khankix Viex Kraung Tan Tom: Nie
Mose kok kah Bezalelax mai Ahawliba mai can pwi pa chix yuh kaing taix kukaux, pa hoik tawx Simiang Siyiex pingnya cuyi: daux rhawm: kix, mai pwi kukaux pa ceh rhawmrhi: tix yuh kaing khankix hoek tix yuh kaing.
Mai kix rieb tix teei kraung pa tan pa lu ceu pwi Isarilax khankix khaing: Mose, pa mawh kraung pa viex kix hoek, son kaing jhaw: pa sang yuh kix dee pa singax singeh, mai kix baox viex kraung pa tan pa lu hoek awm: pa koe: rhawm: kix ku ngawb.
Khaix an: can pwi pa yuh kaing taix khankix mai pa yuh kaing kuceu, son dee pa singax singeh hoik naox kaing jhaw: pa yuh tix mai tang: ing: kaux mawx kaux an:;
mai kix hoek krai kah Mose ah nin:, "Pwi khankix hoik viex pa nie lheu: khaing: pa kub shiao ex son kaing jhaw: pa hoik tawm: Simiang Siyiex ex."
Mose tawx lox kieh kix krai pao: pwi pa ot daux nyiiex bang: mhong: ah nin:. "Simex ang ah, bun: ang ah, paw lai baox viex kraung pa tan dee pa singax singeh hoek." Mai pwi khankix dee yoi: tix khaing: krax tan tix.
Grawhgrawng: nawh, kraungkhrai: pa pon kix, hoik kub hoik naog son kaing pa sang yuh kix khawm: uik hoik nie tete heue.
Grawng: Sum: Nyiiex Gox Bwan: Man
Can pwi pa chix yuh kaing kuceu daux sinax kix pa mawh pwi pa koe: pingnya cuyi: daux rhawm: khankix, yuh man: tie kao: plah kah man: pa hoik taing: tix kah keei: ceu pa mhawm:, pa mawh man: pa klai raoma:, man: lung pliex, mai man: pa raoh rawt, mai kix yuh rieng pakpeung: Cherubin kah piang man: an:, awm: pa chix yuh kix.
Krax lang: man: tie ku plah koe: tinga: daix sawk, krax vieh koe: pon: sawk, mai man: tie an: sidu tau khawm: uik.
Mai kix kleuk tix caing man: tie an: phwan: pheen: lih mawh tix pheen:, mai baox kleuk tix caing pa deuk an: phwan: pheen: mawh tix pheen:.
Nawh yuh daux jhup maox koe: kah praok man: tie kah man: pa klai raoma: see dee sitoe: kix tix caing ku pheen:, awm: pa hoik yuh kah piang praok kah praix man: tie an: tix pheen:, pa mawh man: tie ra: pheen: tix pheen:.
Nawh yuh daux jhup maox koe: tix phwan: daux, kah piang man: tie tix pheen:, mai baox yuh daux jhup maox koe: tix phwan: daux kah praok plak laong: kah man: tie an: ra: pheen: tix pheen:, mai kieh daux jhup maox an: lai giex man: tie an: tix pheen: hoik tix pheen:.
Mai nawh yuh gok feuk khri: tix phwan: mu:, mai brawm: man: tie an: tau kah kraung pa feuk an:, sonsang lih tix mawh nyiiex gox bwan: man: tix lhang:.
Nawh yuh man: tawb braux nyiiex gox bwan: man: kah hauk pex mai yuh koe: kao: tix pheen:.
Krax lang: man: tawb braux an: ku mu:, koe: tix ngoe: sawk, mai krax vieh koe: pon: sawk, Man: tawb brau an: kao: tix pheen:, mawh pa sidu tau.
Nawh kleuk tix caing man: tie an: phwan: pheen: lih mawh tix pheen:, mai man: tieb an: liah pheen: baox kleuk mawh tix pheen: tau.
Mai nawh yuh daux jhup maox koe: tix phwan: daux kah piang praok man: tie an: see plak praix tix pheen:, mai nawh baox yuh daux jhup maox koe: tix phwan: daux kah piang praok man: tie an: pa mawh ra: pheen: tix pheen:.
Nawh baox yuh gok kah tawng tix phwan: mu:, sonsang kleuk man: tawb nyiiex gox bwan: man: tau, mai kieh mawh tix lhang: khaing:.
Nawh yuh pa tawb braux nyiiex gox bwan: man: kah hak yung: pa hoik siang: raoh, mai deeh yuh pa tawb piang an: kah hak phix.
Son nyiiex gox bwan: man:, nawh yuh phia: jung kah khaox Akashax khawm: uik.
Krax lang: phia: ku plah koe: kao: sawk, mai krax viex ku plah koe: tix sawk mai tix diex.
Phia: ku plah kieh kawp tix kah lat ra: mu:, sonsang kleuk pao: tix, mawh kheu nan: nawh yuh phia: an: khankix son nyiiex gox bwan: man: awm: paox tix.
Mai nawh baox deeh yuh khaox phia: khankix son nyiiex gox bwan: man: tinga: plah, son pa sang sau: kah plak seh.
Nawh yuh daux jhup jaong tix pon: mu: kah mau, mai kieh koe: greem: khaox phia: an: tix nga plah. Mai kah greem: phia: tix plah kieh daux jhup jaong koe: ra: mu:, son lat ra: mu:, mai daux jhup jaong ra: mu: kah greem: phia: an: tix plah, mai son lat ra: mu:.
Mai son plak laong: nyiiex gox bwan: man: pa koe: plak an: tix plak, nawh yuh phia: koe: tix nga: plah,
Mai daux jhup jaong an: khankix tix pon: mu:, pa yuh tix kah mau. Mai kieh daux jhup jaong koe: ra: mu: greem: phia: tix plah, mai baox kieh daux jhup jaong koe: ra: mu: kah phia: an: tix plah.
Son plak klip singaix nyiiex gox bwan: man:, nawh yuh phia: koe: liah plah.
Nawh baox deeh yuh phia: ra: plah son daog plak khaix nyiiex gox bwan: man: khankix khawm: ra: daog.
Mai deeh kleuk an: khankix kah plak greem:, mai kah plak toh tau kah daux jhup tix mu:, mawh kheu nan: nawh yuh ceu an: khawm: ra:, son daog ra: daog.
Phia: koe: daix plah, khawm: daux jhup jaong hankix kao: liah daux pa yuh kix kah mau, mai kieh daux jhup jaong koe: ra: mu: kah greem: phia: an: khankix ku plah.
Mai nawh yuh khaox jhong: pa sang chup kah khaox Akashax tix plak phwan: gawng: pa sang chup kah phia: an: khankix kah nyiiex gox bwan: man;
mai nawh baox yuh khaox jhong: phwan: gawng: pa sang chup tix kah khaox phia: an: khankix son praok nyiiex gox bwan: man: kah plak an: tix plak, mai khaox jhong: pa sang chup tix kah phia: an: phwan: gawng: son praok pa koe: kah plak klip singaix nyiiex gox bwan: man:.
Mai nawh yuh khaox jhong: pa sang chup tix kah daux sigreung phia: an: khankix, sonsang chix laig tom: hoek kah toeh an: tix plak mai plak an: tix plak.
Nawh om: phia: an: kah rawm: khri:, mai yuh daux jhup khankix kah khri:, sonsang ra lai giex khaox jhong: pa hoik chup tix tau, nawh deeh om: khaox jhong: pa hoik chup an: kah khri:.
Mai nawh yuh man: tie pa taing: tix pheen: kah man: pa klai raoma:, mai man: lung pliex, mai man: raoh rawt pa hoik taing: kah keei: ceu pa mhawm:. Man: an: khankix hoik taing: tix kah grawng: pa chix keud tix, mai kix yuh rieng pakpeung: Cherubin kah piang.
Mai nawh yuh rong: khaox pon: mu:, kah khaox Akashax mai om: kah khri:, khawm: gok khri: pa koe: kah rong: mai deeh raug daux jhup jaong pon: mu: kah mau son rong: an: khankix.
Mai nawh baox deeh yuh man: tie diang siviex nyiiex gox bwan: man: tix pheen:, kah man: pa hoik taing tix pa mawh man: klai raoma: mai man: lunng pliex, mai man: raoh rawt, mai man: pa taing: tix kah keei: ceu pa mhawm: khaing: cao: pa taing: man: tix kaux;
mai kieh rong: khaox an: phwan: mu: grum tau mai gok nawh khankix, mai nawh om: kaing: rong: an: khankix mai toh khaox lat kah khri:, viang mawh nan:, daux jhup jaong phwan: mu: yuh kah tawng heue.
Grawng: Pa Yuh Teuk Bwan: Sijax Mukheu
Bezalelax yuh teug bwan: sijax mukheu kah khaox Akashax, krax lang: koe: ra: sawk mai tix diex, krax vieh koe: tix sawk mai tix diex, krax lhaong: koe: tix sawk mai tix diex.
Nawh om: khri: pa nawnaw plak daux, mai plak praix, mai kawb rhang: khri: kah hawt vungviang gawng nawh khawm: uik.
Mai nawh raug daux jhup khri: pon: mu:, sonsang sau: nawh kah daog teug pon: daog, daux jhup khri: an: sau: tix plak ra: mu:.
Nawh yuh khaox glawm: kah khaox Akashax mai om: khri: kah piang an:.
Mai nawh sau: khaox glawm: an: kah daux jhup khri: pa koe: kah praok teug bwan:, sonsang pon klawm: kix kah teug bwan: an:.
Nawh baox deeh yuh dangngeung krax pa caoxrhawm: kah khri: nawnaw, krax lang: koe: ra: sawk mai tix diex krax vieh koe: tix sawk mai tix diex.
Nawh yuh rieng Cherubin ra: mu: kah khri: pa hoik raug tix, mai deuh kah piang dangngeung krax pa caoxrhawm: an: tix plak tix mu:.
Rieng Cherubin di pruik tix kheem: kah piang dangngeung pa caoxrhawm: an:, mai kieh pakngai: Cherubin khankiex ra lai veeh kah paox tix kah piang dangngeung krax pa caoxrhawm: an:.
Rieng Cherubin di pruik tix kah piang mai kheem: dangngeung krax pa caoxrhawm: an: kah pruik tix, mai kieh pakngai: Cherubin khankiex jhak simi kah paox tix, kah piang dangngeung krax caoxrhawm: an: heue.
Grawng: Yuh Pheen: Khan: Khaomun
Nawh yuh pheen: kah khaox Akashax, plak lang: koe: koe: ra: sawk, plak vieh koe: tix sawk mai plak lhaong: koe: tix sawk.
Mai nawh om: an: kah khri: nawnaw, mai kawb rhang: khri: khankix hawt gawng vungviang praok khawm: uik.
Mai nawh baox yuh khaox lat praok pheen: pa vieh been tix tiag taix, kah praok vungviang pheen: mai kawb khri: hawt vungviang praok an: khawm: uik.
Mai nawh raug daux jhup khri: pon: mu: kah son pheen: an:, mai sau: daux jhup khri: an: khankix kah daog pon: daog kah piang caong pheen: pon: mu:.
Mai daux jhup khri: koe: dex hawt khaox lat praok pheen: kah dee chup khaox yam klawm: kix pheen: an: hu:.
Mai nawh yuh khaox glawm: kah khaox Akashax, sonsang klawm: kix pheen: hu:, mai om: khri: kah an:.
Nawh yuh kraung shiao piang pheen: khankix kah khri: nawnaw, pa mawh pan, klong:, lawk tuh, mai kawk nyaux sonsang lhauk heue.
Grawng: Yuh Pang: Jawk Ten: Khri:
Nawh baox yuh pang: jawk ten: khri: kah khri: nawnaw, jaong num:, pang: nawh, klong: nawh, plix nawh, mai rieng tai pa pruh hoik mawh pa tawk kleuk tau khawm: kreng.
Mai kak liah mu: pa lih khaing: jawk ten: khri: an: ra: plak, mai lih khaing: jawk ten: khri: plak in: loe: mu:, plak an: loe: mu:.
Piang kak pa koe: plak in: koe: klong: loe: mu: pa awm: pakpeung: pruh tai khaox Batan mai koe: plix koe: tai, kah piang kak pa koe: plak an: kawx koe: klong: loe: mu: pa awm: pakpeung: pruh tai khaox Batan mai koe: plix koe: tai, kah kak pa lih kah khaing: jawk ten: khri: an: khawm: liah kak, tag awm: an: khawm: uik.
Mai kah piang jawk ten: khri: an:, koe: klong: pon: mu:, pa yuh awm: pakpeung: pruh tai khaox Batan, khawm: plix nawh mai pruh tai nawh.
Kah greem: kak pa lih khaing: pang: jawk ten: khri: ra: mu:, koe: plix pa hoik kleuk tix tau mai kak an: ra: mu:, kak khankix liah mu: pa lih khaing: pang: jawk ten: khri: hoik yuh nan: khawm: uik.
plix nawh mai kak nawh khankix mawh pa kleuk tix tau mai pa hoik tawk tix yuh kah khri: nawnaw tau.
Mai nawh yuh kawk ngu aliah mu:, mai gip ngu, mai tawg nyaox khankix kah khri: nawnaw.
Nawh yuh pang: jawk ten: khri: mai kraung pa shiao khankix kah khri: nawnaw tix talantan heue.
Grawng: Pa Yuh Khu: Dee Tan Nyawng Bhawng:
Nawh yuh khu: dee tan pa gleeing nyawng bhawng: kah khaox Akashax, krax lang: tix sawk, krax vieh tix sawk, khawm: pon: daog sidu paox tix, krax lhaong: koe: ra: sawk, rung: khankix mawh pa kleuk tix tau mai an: khankix.
Nawh om: khri: kah piang an: khankix, mai praok vungviang, mai rung: nawh khankix; nawh baox deeh kawb hawt vungviang praok nawh kah rhang: khri: khawm: uik.
Nawh yuh daux jhup khri: ra: mu: koe: kah greem: rhang: khri: khankix kah plak daog khawm: ra: plak, sonsang giex khaox glawm: yam klawm: kix hu:.
Mai nawh yuh khaox glawm: kah khaox Akashax mai om: kah khri: heue.
Grawng: Pa Yuh Bee Groi Mai Nyawng Bhawng:
Nawh baox yuh bee groi pa singax singeh, mai nyawng bhawng: pa singax, kah ceu pa jiet nyawm sioe: bhawng:, awm: pa yuh cao: sidax kah ceu pa sioe: bhawng: khankix heue.
Grawng: Yuh Khu: Dee Tan Krax Tan Pa Gleeing
Nawh yuh khu: dee tan krax tan pa gleeing kah khaox Akashax, plak lang: koe: phwan: sawk, plak vieh koe: phwan: sawk, plak lhaong: koe: loe: sawk, mai daog sidu khawm: pon: daog.
Nawh yuh rung: koe: kah daog pon: daog pa kleuk tix tau mai khu: dee tan, mai om: khankix kah tawng.
Nawh yuh kraung pa shiao son khu: dee tan kah tawng, aw:, sipeed, pan, sigawng: nex, mai pan khoek khankix.
Mai nawh yuh grheeng: tawng tix mu: son khu: dee tan, mai deuh kah vungviang khu: dee tan, jah kah plak caong hoek kah sigreung.
Nawh raug daux jhup pon: mu:, son grheem: tawng an: pon: daog, sonsang chup khaox glawm: kah.
Mai nawh yuh khaox glawm: kah khaox Akashax mai om: tawng kah piang an:.
Nawh chup khaox glawm: kah daux jhup pa koe: praok khu: dee tan, sonsang mawh dee klawm: kix kah, nawh yuh daux doh kah piang mai plak greem: kah phia: heue.
Grawng: Pa Yuh Pan Khoek Tawng
Nawh yuh pan khoek tawng, mai caong kah tawng, mai deuh siliak tawng kah diang siviex nyiiex gox bwan: man: bang: kum: pwi hun: tan:, son bun: pa khrawm: paox tix hoek kum:.
Grawng: Yuh Vie Gwang Nyiiex Bwan:
Nawh yuh gwang nyiiex bwan: plak seh, mai vie gwang an: kah man: taing: ceu pa mhawm:, lang: tiyieh sawk.
Rong: khaox son an: tinga: gawng:, tau mai daux jhup jaong tawng tinga: mu:, mai gok pa ot kah rong: khaox an:, mai lat khankix mawh pa yuh kah mau khawm: uik.
Kah plak laong: man: tie khankix koe: tiyieh sawk, tau mai rong: khaox tinga: gawng: mai daux jhup jaong tawng tinga: mu:, gok ot kah rong: an: khankix mai khaox lat mawh pa yuh kah mau khawm: uik.
Mai plak klip singaix man: tie koe: tix phwan: sawk, tau mai rong: khaox kao: gawng:, mai daux jhup jaong kao: mu:, gok ot kah rong: khaox an: kix mai lat mawh pa yuh kah mau khawm: uik.
Son plak lih singaix man: tie koe: tix phwan: sawk.
Man: tie khankix pa koe: kah praok diang siviex tix plak, krax lang: koe: kao: phwan: sawk tau mai rong: loe: rong: khawm: daux jhup jaong loe: mu:;
mai krax plak sidu praok diang siviex plak an: tix plak, koe: man: tie lang: kao: phwan: sawk, tau mai rong: khaox loe: rong:, khawm: daux jhup jaong loe: mu:.
Can man: pa vie kah hawt vungviang biang khankix, mawh pa taing: kah man: ceu pa mhawm: khawm: uik.
Daux jhup jaong rong: khaox khawm: uik, mawh pa yuh kah tawng mai gok pa koe: kah rong: mai kah khaox khankix, mawh pa yuh kah mau mai kah toh rong: mawh pa om: kah mau, khawm: can rong: khaox pa koe: hawt vungviang biang mawh pa kleuk tau mai lat mau.
Man: tie vungviang biang siviex khankix, mawh pa taing kah man: klai raoma:, man: lung pliex mai man: pa raoh rawt pa taing: kah keei: ceu pa mhawm:, krax lang: koe: tinga: sawk mai krax lhaong: koe: phwan: sawk awm: man: tie pa koe: vungviang biang an:.
Rong: khaox pon: rong: tau mai daux jhup jaong tawng pon: mu:, gok khankix pa koe: kah rong: mai lat mawh pa yuh kah mau, mai kah piang toh rong: mawh pa om: kah mau.
Can lhak pa tawk kah nyiiex gox bwan: man:, mai hawt vungviang biang khawm: uik mawh pa yuh kah tawng heue.
Kraung Pa Hoik Shiao Son Nyiiex Gox Bwan: Man:
Inkix mawh carang yuh kix nyiiex gox bwan: man:, pa mawh nyiiex gox bwan: man: teug pa kham: mhai: sakse, awm: pa hoik simin kix khaing: gumlox pa krai Mose, son kraung pa hoik shiao ceu pwi Lewix khankix, khaing: daux tawm: taix Itama kawn: simex cao: giex kaing: li Arun.
Bezalelax kawn: simex Urix, Urix pa mawh kawn: simex Hurax doeh simie ceucat Yudax, yuh an: kix khawm: uik awm: gumlox pa hoik tawm: Simiang Siyiex kah Mose.
Pwi pa yuh kaing tau mai nawh, mawh Ahawliba kawn: simex Ahisamat doeh simie ceucat Dan, nawh mawh pwi pa chix yuh kaing taix ku cau, mai pa chix yuh rieng pakpeung: kuceu, mai pa chix taing: man: pa klai raoma:, man: lung pliex man: raoh rawt mai pa chix taing: kah keei: ceu pa mhawm: khawm: uik.
Can khri: pa shiao kix kah daux kaing jhaw: son dee pa singax singeh, mawh khri: pa tan lu kix khawm: uik, koe: tinga: dim: Talantan mai aliah yieh tix ngoe: Shekhe, awm: pa sawn: kix kah plak jiang dee pa singax.
Mai kraung mau pa hoik yuh kix carang, pa pon kix khaing: cub pwi haoh pwi hun: khankix, koe: tiyieh Talantan, mai tix rheng: aliah yieh atigliah phwan: Shekhe, awm: pa hoik sawn: kix jiang dee pa singax.
Jah kah pwi pa koe: ju tix nga: num tom: haok kah piang, pa hoik simin carang koe: pwi liah sien: mai loe: rheng: phwan: yieh tiphwan: kaux, kix mawh pwi pa yaox tix tawx mau tix plak shekhe awm: pa hoik sawn: kix jiang dee pa singax.
Mai khaing: mau an: tiyieh Talantan, kix raug daux jhup jaong khankix kah dee pa singax singeh, mai daux jhup jaong kah plak caong man: tie, kix yuh daux jhup jaong tiyieh mu: kah mau tiyieh Talantan, son daux jhup jaong tix mu: caw tix mawh mau tix Talantan.
Khaing: mau an: tix rheng: aliah yieh atigliah phwan: Shekhe, nawh yuh gok pa ot kah rong: khankix, mai son pa om: nawh kah piang toeh rong: mai yuh lat kah mau an: kix.
Tawng pa tan kix khawm: uik koe: atigliah Talantan mai ra: rheng: pon: yieh Shekhe.
Mai khaing: ankix, nawh yuh daux jhup jaong, son diang siviex nyiiex gox bwan: man: bang: kum: pwi hun:, mai khu: tawng dee tan, grheeng: tawng, mai can kraung pa shiao kix kah khu: dee tan.
Mai daux jhup jaong khankix hawt vungviang biang, son daux jhup jhaong diang siviex biang, son lhak nyiiex gox bwan: man: mai son lhak pa shiao kix hawt vungviang gwang heue.
Grawng: Kraung Ceep Cao: Giex Kaing: Li
Kix caing kraung ceep pwi pa yuh kaing jhaw: Siyiex kah man: klai raoma:, man: lung pliex, mai man: raoh rawt, sonsang yuh kix kaing kah dauh dee pa singax singeh, mai caing kraung ceep pa singax singeh son Arun, awm: gumlox pa hoik tawm: Simiang Siyiex kah Mose.
Nawh caing sibex da: dawd taix kah keei: khri: tau mai man: klai raoma:, man: lung pliex, mai man: raoh rawt, pa hoik taing: kah keei: ceu pa mhawm:.
Mai kix tawk khri: lih mawh khlawp rhi: mai kip lih mawh keei: khri: sonsang caing kah man: klai raoma:, man: lung pliex, mai man: raoh rawt pa hoik taing: kah keei: ceu pa mhawm: kah kaing ceu pa min:.
Kix caing maox rawd piang klip sibex da: dawd taix ra: nyaing, sonsang kleuk tau, mai kieh toeh maox an: ra: plak kleuk paox tix.
Mai maox pa taing: son pa rawd piang klip sibex da: dawd taix an:, hoik awm: krax grawng: pa taing kix kah khri: tau mai man: klai raoma:, man: lung pliex, man: raoh rawt, pa taing: kah keei: ceu pa mhawm:, awm: lox pa hoik tawm: Simiang Siyiex kah Mose.
Mai baox teei siang: simaox bawd raoh ra: mu: mai saik ceukaux kawn: simex ceu pwi Isarilax khankix kah daux, awm: ngai: lai cum: mai sau: kah daux jawk aw: simaox khri:.
Nawh sau: siang: simaox an: ra: mu: kah piang klip sibex da: dawd taix, sonsang mawh siang: simaox ra: mu: pa doh keud, son kawn: simex ceu pwi Isarilax khankix awm: lox pa hoik tawm: Simiang Siyiex kah Mose heue.
Grawng: Yuh Kix Man: Tie Naok
Nawh yuh man: tie naok kah man: pa chix taing: kix kuceu awm: krax grawng: pa caing kix sibex da: dawd taix kah khri: kah man: klai raoma:, man: lung pliex, man: raoh rawt, pa hoik taing: kah keei: ceu pa mhawm:.
Kix yuh man: tie naok an: sidu pon: daog mai kix niiep kieh gawp piang paox tix, krax lang: koe: tix diex mai krax vieh koe: tix diex.
Mai kix sau: siang: simaox kah daux rhoi: khawm: pon: rhoi:, kix tom: sau: siang: simaox raoh, siang: simaox raoh eem: mai siang: simaox yi: raoh kah rhoi: tix,
kah rhoi: ra:, kix sau: siang: simaox klai, siang simaox klai riex, mai siang: simaox paing.
Kah rhoi: loe:, kix sau: siang: simaox klai singi, siang: simaox lung pliex, mai siang: simaox raoh klai;
Kah rhoi: pon:, kix sau: siang: simaox raoh toh, siang: simaox paing pau:, mai siang: simaox pa toh riang, kix sau: siang: simaox ankix kah daux jawk aw khri: pa hoik raug tix khankix.
Siang: simaox koe: kao: ra: mu:, awm: ceukaux kawn: simex Isarilax khankix, ceukaux kix hoik saik tix deuh awm: cum: ngai: lai, son siang: simaox tix mu:, hoik tang: koe: ceukaux cao: kix kah piang, awm: koe: doeh simie ceucat kix kao: ra: ceu.
Mai kix yuh maox khri: kah plak toeh man: tie naok, awm: maox pa hoik duing: tau kah khri:.
Kix baox yuh jawk aw: khri: ra: mu:, mai daux jhup khri: ra: mu:, mai sau: kah piang toeh man: tie naok khawm: ra: plak.
Mai kix sau: maox khri: pa hoik duing: tau ra: nyaing, daux jhup khri: ra: mu:, pa koe: kah toeh man: tie naok an:.
Kix deeh phyawk toeh maox khri: an: ra: nyaing kah daux jawk aw: khri: ra: mu:, mai deuh kah piang maox rawd klip, pa koe: plak sivoe ngai: sibex dawd taix.
Mai kix yuh daux jhup khri: ra: mu:, mai sau: kah greem: toeh praok man: tie naok, pa koe: kah daux sibex da: dawd taix.
Mai kix baox yuh daux jhup khri: ra: mu:, mai sau: kah piang maox rawd klip an: ra: nyaing, kah plak greem: sivoe ngai: sibex dh dawd taix, kah plak piang dee sitoe: tix tau mai maox rawd klip sibex dawd taix an:.
Mai kix teei kah maox klai raoma: tix nyaing, pa hoik taing: tix kah keei: ceu pa mhawm: mai phyawk kah man: tie naok mai chup kah daux jhup khri: pa koe: kah sibex da: dawd taix, son ang man: tie naok pon tix tang: tiah khaing: sibex da: dawd taix, awm: lox pa hoik tawm: Simiang Siyiex kah Mose heue.
Kraung Ceep Tang: Ceu Son Cao: Giex Kaing: Li
Nawh yuh sibex da: jiet khaw: peung mai sibex da: dawd taix kah man: klai raoma: khawm: uik.
Mai kieh dee paoh koe: tix mu: kah daux sibex da: plak piang an:, son ang chix griah, kix caing praok vungviang dee paoh an:, khawm: uik kah keei: pa kab tix tau.
Kix yuh plix sibex pa awm: plix mak cang, hawt vungviang caong sibex da: plak piang an:, kah man: klai raoma:, man: lung pliex man: raoh rawt pa hoik taing: tix kah keei: ceu pa mhawm:.
Mai kix yuh hing: plix sibex kah khri: nawnaw, mai sau: hing: plix sibex an: sinax plix sibex pa awm: plix mak cang pa koe: kah hawt vung vieng caong sibex da: plak piang an:.
Mai kieh hing: plix sibex tix mu: kham: kah sinax plix sibex pa awm: plix mak cang, kah hawt vungviang caong sibex da: plak piang yam yuh kaing Siyiex, awm: lox pa hoik tawm: Simiang Siyiex kah Mose.
Kix yuh sibex da: plak daux pa ceep Arun mai kawn: simex nawh khankix kah man: ceu pa mhawm: pa min: taing: kix;
mai yuh lawk kaing: kah man: ceu pa mhawm: mai mhok kah man: ceu pa mhawm:, mai khlax kah man: ceu pa mhawm:;
mai kix yuh maox rawd nyoi tix nyaing kah man: klai raoma:, man: lung pliex, mai man: raoh rawt pa taing: tix kah keei: ceu pa mhawm: awm: lox pa tawm: Simiang Siyiex kah Mose.
Mai kix yuh khlawp mhok khri: pa singax singeh kah khri: nawnaw, mai tiiem: ngai: lai kah piang mhok an:, awm: cum: pa hoik saik tix daux tix mu: pa ah nin: "Kieh Mawh Pa Singax Singeh kah Siyiex."
Dee Singax Singeh Son Simiang Siyiex
Mai kix phyawk khrawp khri: kah maox klai raoma: tix nyaing, kah piang man: lawk kaing:, awm: lox pa hoik tawm: Simiang Siyiex kah Mose.
Mawh kheu nan:, can kaing nyiiex gox bwan: man: bang: kum: pwi hun: hoik khawm: uik, mai ceu pwi Isarilax khankix, yuh awm: ankix, awm: lox pa hoik tawm: Simiang Siyiex kah Mose.
Mai kix viex nyiiex gox bwan: man: hoek kah Mose, khawm: man: tie mai can kraung pa shiao khankix, pa mawh gok, phia:, jhong:, rong: mai khawm: daux jhup jaong khankix;
hak yung: pa hoik siang: tix raoh, pa sang lhop, mai hak phix pa sang lhop, mai man: tie plak daux khankix,
teug bwan: sijax mukheu pa kham: mhai: sakse tau mai khaox glawm:, mai dawb teug bwan:, mai dangngeung krax pa caoxrhawm:;
pheen: khawm: kraung pa shiao khawm: uik, mai khaomun pa khan: plak sivoe Nawh Cao:;
pang: jawk ten: khri: nawnaw tau mai kawk ngu, (kawk ngu pa deuh dee mawx dee an:) khawm: kraung pa shiao khawm: uik, mai bee tok;
Khu: khri: dee tan, bee groi mai ceu pa sioe: bhawng:, mai man: tie kah diang siviex nyiiex gox bwan: man:;
Khu: tawng dee tan, grheeng: tawng, khaox glawm:, mai kraung nawh khawm: uik, pan khoek khawm: caong nawh,
man: tie khankix son vungviang biang rong:, mai daux jhup jaong, man: tie son diang siviex biang mai maox nawh mai lhak tawk khankix, pa mawh kraung pa shiao son nyiiex gox bwan: man:, bang: kum: pwi hun;
Mai kraung ceep yam yuh kaing jhaw: khankix, sonsang yuh kix kaing jhaw: kah dee pa singax singeh, kraung ceep pa singax singeh son Arun, mai kraung ceep kawn: simex nawh khankix, yam yuh kix kaing jhaw: cao: giex kaing: li.
Awm: lox pa hoik tawm: Simiang Siyiex kah Mose, ceu pwi Isarilax khankix yuh ceu ankix khawm: uik.
Mose jhak kah kaing jhaw: pa yuh kix khawm: uik, mai kix yuh awm: lox pa hoik tawm: Simiang Siyiex khawm: uik, mai Mose nawb bwan: kah piang kix heue.
Grawng: Yuh Nyiiex Gox Bwan: Man: Mai Ap Kah Siyiex
Simiang Siyiex ah nin: kah Mose,
"Kah daux khix tix tixngaix, maix tag sum: nyiiex gox bwan: man: bang: kum: pwi hun:.
Maix tag deuh teug bwan: sijax mukheu daux lawg mai tie kah man: tie.
Maix tag viex pheen: hoek tau mai can kraung pa shiao kah piang, mai khre: tix deuh kraung nawh khankix mhawmmhawm:, maix tag viex pang: jawk ten: khri: hoek, mai tok kawk ngu khankix.
Maix tag baox deuh khu: khri: dee tan, dee tok kix nyawng bhawng:, kah plak sivoe teug bwan: pa kham: mhai: sakse, mai sau: man: tie khankix, kah diang siviex nyiiex gox bwan: man:.
Maix tag deuh khu: dee tan krax tan pa gleeing kah plak sivoe siviex nyiiex gox bwan: man: bang: kum: pwi hun:.
Maix tag deuh pan khoek sinax nyiiex gox bwan: man: bang: kum: pwi hun: mai khu: dee tan, mai sau: tix deuh rawm: kah daux.
Maix tag jung tix priex man: tie hawt vungviang biang, mai feuk kah dee laig kix daux siviex biang.
Maix tag teei bee groi, mai kraix kah nyiiex gox bwan: man: mai kah can pa koe: plak daux khawm: uik, maix tag kieh nawh singax singeh khawm: uik, mai khankix tag mawh pa singax singeh.
Maix tag kraix kah khu: dee tan krax tan pa gleeing mai can kraung pa shiao khawm: uik, mai kieh khu: dee tan an: singax, khu: dee tan an: tag mawh pa singax singeh khaing: paox tix.
Mai maix tag kraix kah pan khoek, mai caong nawh khankix, mai kieh nawh mawh pa singax.
Maix tag viex Arun mai kawn: simex nawh khankix hoek kah diang siviex nyiiex gox bwan: man: bang: kum: pwi hun: tan:, mai heem: kix.
Maix tag tawx Arun ceep kraung pa singax singeh mai groi nawh kah bee, kieh nawh singax singeh sonsang yuh nawh kaing jhaw: cao: giex kaing: li Aux.
Maix tag viex kawn: simex nawh khankix hoek, mai tawx kix ceep sibex da: plak daux.
Maix tag groi bee kah kix, awm: hoik groi maix kah keeing: kix, sonsang yuh kix kaing jhaw: cao: giex kaing: li Aux, kah can pa hoik groi maix bee khankix, tag mawh pa kieh kix yuh kaing jhaw: cao: giex kaing: li tom: sidauh doeh simie ceucat kix tix ju hoik tix ju leeing ju leeing phan:."
Mawh kheu nan:, Mose yuh an: khankix, awm: lox pa hoik tawm: Simiang Siyiex kah khawm: uik.
Daux num ra: khix tix tix ngaix, kix yaok jung nyiiex gox bwan: man: mai sum: kah.
Mose yaog tix sum: nyiiex gox bwan: man:, sau: daux jhup jaong mai tok kah phia:, sau: jhong: mai jung rong: nawh khankix.
Mai nawh nih man: lhop kah piang nyiiex gox bwan: man: mai sau: braux kah piang choek an:, awm: lox pa hoik tawm: Simiang Siyiex kah Mose.
Nawh teei khlawp simaox pingnyap, mai sau: kah daux teug mai chup khaox glawm: kah daux jhup teug mai sau: dawb dangngeung krax pa caoxrhawm:, kah piang teug.
Mai nawh viex teug laig daux nyiiex gox bwan: man:, mai feuk man: tie, sonsang tie nawh lawg dee koe: teug awm: lox pa hoik tawm: Simiang Siyiex kah Mose.
Nawh deuh pheen: daux nyiiex gox bwan: man:, bang: kum: pwi hun:, kah praok plak laong: nyiiex gox bwan: man:, kah plak praix man: tie an: khankix;
Mai khan: kheu: khaomun kah piang pheen: kah plak sivoe ngai: Simiang Siyiex, awm: lox pa hoik tawm: Simiang Siyiex kah Mose.
Nawh deuh pang: jawk ten: khri:, kah daux nyiiex gox bwan: man: bang: kum: pwi hun:, see dee koe: pheen: plak an:, kah plak seh nyiiex gox bwan: man:;
Mai nawh tok kawk ngu an: khankix sivoe Simiang Siyiex, awm: lox pa hoik tawm: Simiang Siyiex kah Mose.
Nawh deuh khu: khri: dee tan, kah daux nyiiex gox bwan: man: bang: kum: pwi hun: kah plak sivoe man: tie,
mai nawh gleeing nyawng bhawng: pa sioe: bhawng: kah piang an:, awm: lox pa hoik tawm: Simiang Siyiex kah Mose.
Nawh feuk man: tie khankix, kah diang siviex nyiiex gox bwan: man:.
Nawh deuh khu: dee tan krax tan pa gleeing kah plak sivoe siviex nyiiex gox bwan: man: bang: kum: pwi hun:, mai tan lu krax tan pa gleeing, mai krax tan phawng: nghox ca im: kah piang an:, awm: lox pa hoik tawm: Simiang Siyiex kah Mose.
Nawh deuh pan khoek sinax nyiiex gox bwan: man: bang: kum: pwi hun: mai dee tan, nawh sau: tix deuh rawm: kah daux sonsang khoek kix tix kah;
Mose mai Arun khawm: kawn: simex nawh khankix khoek taix caong tix kah rawm: an:.
Yam laig kix kah daux nyiiex gox bwan: man: bang: kum: pwi hun:, mai yam hoek kix dex khu: dee tan, kix khoek taix caong tix awm: lox pa hoik tawm: Simiang Siyiex kah Mose.
Mai nawh yaog tix jung man: tie, hawt vungviang biang nyiiex gox bwan: man: mai khu: dee tan khawm: uik, mai nawh feuk man: tie khankix kah diang siviex laig kix uik, mawh kheu nan:, Mose hoik yuh kaing in: khankix khawm: uik heue.
Paiawm: Min: Plakngai: Siyiex
Yam an: paiawm: ceep kah piang nyiiex gox bwan: man: bang: kum: pwi hun:, mai min: plakngai:
Simiang Siyiex grum naog kah daux nyiiex gox bwan: man:.
Mose ang pon laig kah daux nyiiex gox bwan: man: bang: kum: pwi hun: kheu hoik ceep paiawm: kah piang, mai min: plakngai: Simiang Siyiex hoik grum naog kah daux nyiiex gox bwan: man:.
Yam hoik deeh haok paiawm: khankix khaing: piang nyiiex gox bwan: man: ku bawg, ceu pwi Isarilax khankix lih hu: krax hu: tix.
Viang mawh nan: phan: paiawm: ang nyang haok khaing: tan:, kix ang nyang hu: krax hu: tix, krox tom: hoek singaix deeh haok paiawm:.
Mawh kheu ponngaix paiawm: Simiang Siyiex koe: kah piang nyiiex gox bwan: man:, mai yam ponsawm: koe: ngu pa jhan: riieng kah piang sivoe nyiiex ma: ceu pwi Isarilax khanix, kah daux krax hu: kix leeing: lang: krax heue.
LAI KRUB
(Leviticus)
Krub
Grawng: Krax Tan Pa Gleeing
Simiang Siyiex kok kah mose mai sikah kah nawh khaing: daux nyiiex gox bwan:, mai ah nin:,
"Krai kah ceu pwi Isarilax, mai ah nin:, kah daux pex yam viex pwi tix kauxkaux krax tan kah Simiang Siyiex, nawh tag viex tix tan khawng: brie pa mawh moi, yung:, mai pex khankix.
"Phan: nawh sang yuh krax tan pa gleeing kah moi, kieh nawh tan moi mhaing: pa loig; kah diang siviex nyiiex gox bwan: man: bang: kum: pwi hun:, sonsang mawh pa khaw: pa caw sivoe ngai: Simiang Siyiex;
nawh tag deuh taix tix kah piang kaing: moi sang tan an:, mai an: tag mawh pa pon rieb tix teei son pa sang pluat ploi: phimap nawh.
Nawh tag pah moi mhaing: an: sivoe Simiang Siyiex; mai kawn: simex Arun cao: giex kaing: li khankix tag teei nham: mai phruah hawt vungviang piang khu: dee tan, pa koe: hawt diang siviex nyiiex gox bwan: man: bang: kum: pwi hun:.
Mai nawh tag lieh moi krax tan pa gleeing an: mai tat nex lih khik mawx khik an:;
kawn: simex Arun pa mawh cao: giex kaing: li khankix tag phlu: ngu kah piang khu: dee tan, mai nawm: khix kah piang ngu an:;
mai kawn: simex Arun pa mawh cao: giex kaing: li khankix tag teei khik nex moi khawm: kaing:, khawm: bee, mai deuh piang khix pa koe: ngu piang khu: dee tan;
mai nawh tag sigrhah kraung vaig mai caong kah rawm:. mai cao: giex kaing: li tag gleeing an: khawm: uik kah piang khu: dee tan, kieh mawh krax tan pa gleeing kah ngu, pa sioe: bhawng: kah Simiang Siyiex.
"Phan: nawh sang yuh krax tan pa gleeing kah yung:, phan: ang mawh nan: kah pex khankix, mai tag tan lu mhaing: pa loig;
nawh tag pah an: kah plak laong: khu: dee tan sivoe Simiang Siyiex, mai kawn: simex Arun pa mawh cao: giex kaing: li khankix tag phruah nham: hawt vungviang piang khu: dee tan khawm: uik.
Mai nawh tag tat nex to: tan an: lih khik mawx khik an:, mai bee nawh, cao: giex kaing: li tag teei tix deuh kah piang nawm: khix pa koe: ngu kah piang khu: dee tan;
mai nawh tag sigrhah kraung vaig mai caong khankix kah rawm:. Mai cao: giex kaing: li tag viex nawh khawm: uik, mai gleeing kah piang khu: dee tan; kieh mawh krax tan pa gleeing kah ngu pa sioe: bhawng: kah Simiang Siyiex,
"Phan: nawh sang yuh krax tan pa gleeing kah sim: khankix, mai nawh tag viex pa mawh keukie:, phan: ang mawh nan:, kawn: sikaux nhum:.
Cao: giex kaing: li tag viex hoek kah khu: dee tan mai siyiied kaing: nawh dud, mai gleeing nawh kah piang khu: dee tan; mai tag briiet nham: lih hawt praok khu: dee tan;
mai nawh tag pih tix tik ble mai can pa seeing:, hu: tik kah dee tik nyaox, kah praok khu: dee tan plak lih singaix;
nawh tag giex pruik sim: an: khawm: hauk, mai lug naok nawh son ang dud khaing: paox tix, mai cao: giex kaing: li tag teei tix gleeing piang nawm: khix pa koe: ngu piang khu: dee tan, kieh mawh krax tan pa gleeing kah ngu, pa sioe: bhawng: kah Simiang Siyiex heue.
Krax Tan Phawng: Nghox Ca Pa Im:
"Yam pwi tix kauxkaux tan lu phawng: nghox ca im: kah Simiang Siyiex, kieh nawh viex phawng: ngox ca im: pa mhawm:, mai see: bee kah piang phawng: nghox ca im: an:, mai baox sau: law pan kah,
Nawh tag viex an: kix hoek kah sivoe ngai: kawn: simex Arun pa mawh cao: giex kaing: li khankix, mai cao: giex kaing: li tag teei phawng: nghox ca im: tix jhawp mai bee tiblah, mai can law pan pa koe:; khaix an: tag kieh ceu in: mawh pa doh keud mai gleeing kah piang khu: dee tan, kieh mawh krax tan pa gleeing kah ngu pa sioe: bhawng: kah Simiang Siyiex.
Phawng: nghox ca im: pa kawn deuk tag mawh son Arun mai kawn: simex nawh khankix; an: mawh krax tan pa nie blon: singax singeh khaing: paox tix khaing: daux pa tan pa lu kah Simiang Siyiex pa gleeing kah ngu.
"Phan: maix sang yuh krax tan phawng: nghox ca im: pa ping: daux glah ngu, an: tag mawh khaomun pa ang sau: susaix mai pa yuh tix kah phawng: nghox ca im: pa mhawm: pa hoik klao kah bee; phan: ang mawh nan: khaomun rhi: khlawp pa ang sau: susaix mai pa hoik klao tix kah bee.
Phan: maix sang yuh krax tan phawng: nghox ca im: pa ping: kah diang rhiem:, an: tag mawh phawng: nghox ca im: ceu pa mhawm: pa ang sau: susaix pa hoik klao tix kah bee;
maix tag sivit khaomun an: lih mawh bliah mawx bliah an:,mai see: bee kah piang an:, in: mawh krax tan phawng: nghox ca im:.
Phan: maix sang yuh krax tan phawng: nghox ca im: diag daux aw: khang:, an: tag mawh pa yuh tix kah phawng: nghox ca im: pa mhawm: tau mai bee.
Maix tag viex krax tan phawng: nghox ca im: pa hoik yuh tix kah ceu inkix kah Simiang Siyiex; mai ap kah cao: giex kaing: li, nawh tag viex an: hoek kah khu: dee tan.
Cao: giex kaing: li tag teei khaing: daux krax tan phawng: nghox ca im: an: tix nyum: sonsang mawh krax tan pa doh keud mai gleeing kah piang khu: dee tan, kieh mawh krax tan pa gleeing kah ngu, mai pa sioe: bhawng: kah Simiang Siyiex.
Phawng: nghox ca im: pa kawn deuk khankix, tag mawh son Arun mai kawn: simex nawh khankix; an: mawh krax
tan pa nie blon: singax singeh khaing: paox tix khaing:
daux pa tan pa lu kah Simiang Siyiex pa gleeing kah ngu.
"Krax tan phawng: nghox ca im: pa viex maix hoek kah Simiang Siyiex tag ang sau: susaix; kah daux krax tan pa gleeing kah Simiang Siyiex maix tag ang nyaox tix gleeing susaix mai rawm: hia: kah.
Maix tag yaox tix viex krax tan plix liang pa pon tix kah Simiang Siyiex, viang mawh nan:, maix tag ang pon tix gleeing kah piang khu: dee tan sonsang mawh pa sioe: bhawng:.
Kah daux krax tan phawng: nghox ca im: pa yuh maix kuceu, maix tag sau: kih kah, maix tag ang pon tix kieh kih sijax mukheu Siyiex maix ceet khaing: kah daux krax tan phawng: nghox ca im: maix, ceu pa tan maix khawm: uik, maix tag sau: kih kah.
"Phan: maix sang tan plix pa liang maix tix pon pa mawh krax tan phawng: nghox ca im: kah Siyiex, maix tag teei sigleem: nghox pa kawn klai mai kah: praok ngu, mai boi: tix teei plix nawh.
Maix tag sau: bee kah piang an:, mai baox sau: law pan kah piang an:; an: mawh krax tan phawng: nghox ca im:.
Cao: giex kaing: li tag gleeing son krax pa doh keud khaing: sigleem: nghox pa hoik boi: an: tix nyum: pa mawh bee tau mai law pan; in: mawh krax tan pa gleeing kah ngu son Simiang Siyiex heue.
Krax Tan Pa Nhim:
"Phan: pwi tix kauxkaux yuh krax tan pa nhim:, mai kieh nawh tan moi mhaing:, phan: ang mawh nan: moi shiang:, pa mhawm: loig tix mu: mu: kah plak sivoe Simiang Siyiex.
Nawh tag deuh taix tix kah piang moi pa sang tan an:, mai pah hawt diang siviex nyiiex gox bwan: man: bang: kum:; mai kawn: simex Arun pa mawh cao: giex kaing: li tag phruah nham: hawt vungviang piang khu: dee tan.
Nawh tag teei bee pa kheem: kraung vaig khawm: uik, pa mawh krax tan pa nhim: mai krax tan gleeing kah ngu son Simiang Siyiex,
soklax ra: mu: pa koe: kah daux nyoi mai bee pa koe: piang nawh, mai bee pa kawb tawm khankix tag teei lih.
Mai kawn: simex Arun khankix tag gleeing an: kix kah piang khu: dee tan kah piang nawm: khix pa koe: ngu; kieh mawh krax tan pa gleeing kah ngu, pa sioe: bhawng: kah Simiang Siyiex.
"Phan: sang tan krax tan pa nhim: kah Simiang Siyiex, pa mawh yung:, pex, mai kieh nawh tan pa mawh mhaing: phan: ang mawh nan: shiang: pa mhawm: loig tix mu: mu:.
Phan: nawh sang yuh krax tan kah kawn: yung: tix mu:, nawh tag ap an: kah sivoe Simiang Siyiex,
nawh tag deuh taix tix kah piang kaing: yung: pa sang tan an:, mai pah an: sivoe nyiiex gox bwan: man: bang: kum:; mai kawn: simex Arun khankix tag phruah nham: ankix kah piang vungviang khu: dee tan.
nawh tag yuh krax tan khaing: krax tan pa nhim: an:, pa mawh krax tan pa gleeing kah ngu kah Simiang Siyiex, tag teei khlawp bee to: tan an:, bee pa kawb si-ang: krawng: tom: hoek kah sidax, mai bee pa kheem: kraung vaig, mai can bee pa koe: kah piang kraung vaig khawm: uik,
soklax ra: mu: pa koe: kah nyoi to: tan, mai bee pa koe: piang an:, mai bee pa kawb kah tawm: khankix tag teei lih,
mai cao: giex kaing: li tag gleeing an: kix, kah piang khu: dee tan, awm: priex preem pa mawh krax tan, pa hoik gleeing tix kah ngu son Simiang Siyiex.
"Phan: nawh sang yuh krax tan kah pex tix mu:, nawh tag ap kah sivoe Simiang Siyiex,
nawh tag deuh taix tix kah piang kaing: pex pa sang tan an:, mai pah kah sivoe nyiiex gox man: bang: kum:; mai kawn: simex Arun khankix tag phruah nham: ankix hawt vungviang piang khu: dee tan.
Nawh tag tan khaing: an:, awm: krax tan pa gleeing kah ngu kah Simiang Siyiex, mai bee pa kheem: kah piang kraung vaig, mai can bee pa koe: kah piang kraung vaig khawm: uik;
soklax ra: mu: pa koe: kah nyoi to: tan, mai bee pa koe: kah piang an:, mai bee pa kawb kah piang tawm: khankix tag teei lih,
mai cao: giex kaing: li tag gleeing ankix kah piang khu: dee tan, awm: priex preem pa mawh krax tan pa hoik gleeing kah ngu pa sioe: bhawng:. Bee khawm: uik mawh cie Simiang Siyiex.
In: tag mawh gumlox pingnyap sijax leeing ju kah dauh dee ot doeh simie ceucat maix kudauh kudee, pex tag ang pon tix ih bee mai nham: heue."
Krax Tan Pa Pluat Ploi: Phimap
Mai Simiang Siyiex ah nin: kah Mose,
"Krai ah nin: kah pwi Isarilax khankix, phan: pwi tix kauxkaux phit lud kah gumlox pingnyap Siyiex kah daux pa ang nawh khaw: tix yuh tix ceuceu,
mai phan: cao: giex kaing: li pa hoik groi rawm: bee kah phit lud, mai kieh krax phit krax lud hoek kah piang pwi khankix, kieh nawh viex krax tan kah moi mhaing: pa loig son krax tan pa pluat ploi: phimap kah sivoe Simiang Siyiex,
nawh tag viex moi mhaing: hoek kah diang siviex nyiiex gox bwan: man: bang: kum: kah sivoe Simiang Siyiex, nawh tag deuh taix tix kah piang kaing: moi an:, mai pah kah sivoe Simiang Siyiex.
Mai cao: giex kaing: li pa hoik groi rawm: bee kah tag teei nham: moi an: tiblah mai viex hoek kah nyiiex gox bwan: man: bang: kum:.
Cao: giex kaing: li tag cub giien: taix tix kah daux nham: mai phruah nham: aliah bawg kah sivoe Simiang Siyiex, sivoe man: tie dee pa singax singeh.
Mai cao: giex kaing: li tag sau: nham: tiblah kah piang rung: khu: dee tan nyawng bhawng: kah sivoe Simiang Siyiex, pa koe: kah daux nyiiex gox bwan: man: bang: kum:, mai nham: moi pa kawn deuk an: nawh tag hieh kah caong khu: dee tan krax tan pa gleeing pa koe: kah diang siviex nyiiex gox bwan: man: bang: kum:.
Nawh tag teei bee khawm: uik khaing: moi mhaing: pa mawh krax tan pa pluat ploi: phimap, can bee pa kawb kah piang kraung vaig mai can bee pa koe: kah piang kraung vaig khawm: uik,
soklax ra: mu: pa koe: kah nyoi to: tan mai bee pa koe: kah piang an:, mai bee pa kawb kah piang tawm: khankix tag teei lih,
(awm: pa hoik teei tix khaing: moi mhaing: pa tan tix son krax tan pa nhim:), mai cao: giex kaing: li tag gleeing an: kix piang khu: dee tan pa tan krax tan pa gleeing.
Viang mawh nan:, hak moi mai nex khawm: uik, tau mai kaing:, caong, khawm: kraung vaig khankix mai roeng,
nawh tag viex moi an: khawm: mu: lih hu: kah plak praix nyiiex bang: kah dee hoik yuh kix blang:, kah dee tik nyaox, mai gleeing kah piang nawm: khix pa koe: ngu mai gleeing kah dee tik kix nyaox tan:.
"Phan: pwi haoh pwi hun: Isarilax khankix lud loe: kah daux pa ang tix tawng mai can pa glip kah plak sivoe pwi hun:, mai phit lud kah gumlox pingnyap, mai an: lih mawh pa phit pa lud,
yam deeh tawng kix kah phimap pa hoik phit lud tix, mai pwi haoh pwi hun: tag tan moi mhaing: tix mu: son krax pa pluat ploi: phimap mai viex hoek kah sivoe nyiiex gox bwan: man: bang: kum:,
mai kuad song: nong: yu cub pwi haoh pwi hun: khankix, tag deuh taix tix kah piang kaing: moi an: sivoe Simiang Siyiex, mai pah moi mhaing: an: kah sivoe Simiang Siyiex.
Cao: giex kaing: li pa hoik groi rawm: bee kah tag viex nham: moi an: tiblah hoek kah nyiiex gox bwan: man: bang: kum:,
mai cao: giex kaing: li tag cub giien: taix tix kah daux nham:, mai phruah aliah bawg kah sivoe Simiang Siyiex kah plak sivoe man: tie.
Mai nawh tag sau: nham: tiblah kah piang rung: khu: krub dee tan, pa koe: sivoe Simiang Siyiex, kah daux nyiiex gox bwan: man: bang: kum:, mai nham: pa kawn deuk an: tag hieh kah caong khu: dee tan krax tan pa gleeing, pa koe: hawt diang siviex nyiiex gox bwan: man: bang: kum:.
Nawh tag teei khlawp bee khawm: uik khaing: moi mai gleeing kah piang khu: dee tan.
Mai nawh tag yuh moi mhaing: an:; awm: pa hoik yuh tix kah moi mhaing: pa tan kix son krax tan pluat ploi: phimap, mai nawh tag yuh awm: an:; mai cao: giex kaing: li tag yuh krax khyox khaw: son kix, mai kix tag pon krax pluat ploi: phimap.
Mai nawh tag viex moi lih kah praix dee bang: kix, mai gleeing awm: moi phaoka:; an: mawh krax tan pa pluat ploi: phimap son pwi hun:.
"Phan: cao: pa kwang: tix kauxkaux lud loe: kah daux pa ang tix tawng, mai can pa glip kah gumlox pingnyap Siyiex kah daux pa ang nawh khaw: tix yuh kah plak sivoe pwi haoh pwi hun:, mai phit lud kah gumlox pingnyap mai an: lih mawh pa phit pa lud,
phan: nawh hoik tawng dee phit lud tix, nawh tag viex krax tan pa pluat ploi: phimap kah kawn: pex mhaing: pa loig tix mu:, son phimap pa hoik yuh tix.
Mai nawh tag deuh taix tix kah piang kaing: kawn: pex mhaing: an:, mai pah kah dee gleeing kix krax tan pa gleeing sivoe Simiang Siyiex, in: mawh krax tan son krax pluat ploi: phimap.
Cao: giex kaing: li tag teei nham: tiblah khaing: krax tan pa pluat ploi: phimap kah giien: taix tix mai sau: kah piang rung: khu: dee tan pa gleeing mai nham: pa kawn deuk an: tag hieh kah caong khu: dee tan krax tan pa gleeing.
Mai nawh tag gleeing bee khawm: uik kah piang khu: dee tan, awm: bee pa hoik appong: tix tan son krax tan pa nhim:; mai cao: giex kaing: li tag khyox khaw: son phimap pa yuh nawh; mai nawh tag pon krax pluat ploi:.
"Phan: pwi pa hot pa shia tix kauxkaux daux pwi Isarilax lud loe: kah daux pa ang tix tawng mai can pa glip kah plak sivoe ngai: pwi hun:, mai phit lud kah gumlox pingnyap mai an: lih mawh pa phit pa lud,
phan: nawh hoik tawng dee phit lud tix, nawh tag viex krax tan pa pluat ploi: phimap kah kawn: pex shiang: pa loig tix mu:, son phimap pa hoik yuh tix.
Mai nawh tag deuh taix tix kah piang kaing: pex krax tan pa pluat ploi: phimap an:, mai pah kah dee gleeing kix krax tan pa gleeing.
Cao: giex kaing: li tag teei nham: tiblah kah giien: taix tix mai sau: kah piang rung: khu: dee tan pa gleeing, nham: pa kawn deuk nawh tag hieh kah caong khu: dee tan krax tan pa gleeing.
Mai nawh tag teei bee an: lih awm: teei bee khaing: krax tan pa nhim:, mai cao: giex kaing: li tag gleeing an: kah piang khu: dee tan, son krax tan pa sioe: bhawng: kah Simiang Siyiex; mai cao: giex kaing: li tag khyox khaw: son nawh, mai nawh tag pon krax pluat ploi: phimap.
"Phan: nawh viex kawn: yung: son krax tan pa pluat ploi: phimap; kieh nawh viex kawn: yung: shiang: pa loig tix mu:,
nawh tag deuh taix tix kah piang kaing: kawn: yung: krax tan pa pluat ploi: phimap, mai pah an: son krax tan pa pluat ploi: phimap kah dee pah kix krax tan pa gleeing.
Khaix an: cao: giex kaing: li tag teei nham: tiblah khaing: krax tan pa pluat ploi: phimap kah giien: taix tix, mai sau: kah piang rung: khu: dee tan kah krax tan pa gleeing, nham: pa kawn deuk tag hieh caong khu: dee tan krax tan pa gleeing.
Mai nawh tag teei bee an: lih, awm: teei bee khaing: kawn: yung: krax tan pa nhim:, mai cao: giex kaing: li tag gleeing an: kah piang khu: dee tan, awm: krax tan pa hoik gleeing kah ngu kah Simiang Siyiex; cao: giex kaing: li tag yuh krax khyox khaw: son phimap pa hoik phit nawh, mai nawh tag pon krax pluat ploi: phimap heue.
Krax Tan Son Krax Phit Krax Lud
"Phan: pwi tix kauxkaux mhong: lox pa tiextu tix ceu mai nawh mawh sakse an:, mai phan: nawh yaox kah an: mai tawng kah grawng: an:, phan: nawh ang krai, nawh tag yaox tix kham: kah phimap.
Mai phan: pwi tix kaux loe: tix teeh kah pa ang singax tix ceu ceu, pa mawh to: yum: tosat pa ang singax ang ah, to: yum: khawng: brie pa ang singax khankix ang ah, to: yum: totiag can ceu pa chix chuh chix mo ang ah, mai an: khankix pa ang tien yaox, nawh lih tix mawh pa ang singax nawh tag phit lud.
Phan: nawh loe: tix teeh kah ceu pa ang singax, pa koe: kah pwi khankix, mai an: lih mawh pa seeing: yuh mawh, khaix hoik tawng nawh kah an: nawh tag lih mawh pa phit lud.
Phan: pwi tix kauxkaux tiextu mai ang koe: krax keud, sonsang yuh ceu pa caox ang ah, ceu pa mhawm: ang ah, mai pa hoik tiextu pwi tix kaux kah nawh, kah ceu pa ang nawh tien tawng kah sivoe nawh khankix, yam hoik deeh tawng nawh grawng: an:, nawh tag lih koe: pa phit lud kah grawng: an:.
Yam hoik koe: krax phit lud nawh kah grawng: ceu an: khankix, nawh tag yaox tix krai sidawng: phimap tix mai khyox khaw:,
mai nawh tag viex krax tan kah Simiang Siyiex son phimap pa hoik yuh tix kah kawn: yung: shiang: tix mu:, phan: ang mawh nan:, kawn: pex shiang: tix mu:, son krax tan pa pluat ploi: phimap tix; cao: giex kaing: li tag khyox khaw: son phimap pa hoik yuh nawh.
"Phan: nawh ang pon tan lu kawn: yung: iak, nawh tag teei tix tan lu sikaux ra: mu: phan: ang mawh nan:, kawn: keukie: ra: mu: kah Simiang Siyiex, son krax phit krax lud pa hoik yuh tix, son krax tan pa pluat ploi: phimap tix mu: mai son krax tan pa gleeing tix mu:.
Mai nawh tag viex an: hoek kah cao: giex kaing: li, mai cao: giex kaing: li tag tan lu krax tan pa pluat ploi: phimap phaoka:, mai siyiied kaing: khaing: ngawg an:, Viang mawh nan: ang pon tix kieh dud,
nawh tag phruah nham: krax tan pa pluat ploi: phimap tiblah kah praok khu: dee tan, mai nham: pa kawn deuk tag biiet kah caong khu: dee tan; in: mawh krax tan pa pluat ploi: phimap.
Mai nawh deeh tan sim: an: ra: mu: tix mu:, son krax tan pa gleeing awm: pa hoik koe: lox tawm: pingnyap; mai cao: giex kaing: li tag yuh krax khyox khaw: tang nawh, mai son phimap pa hoik phit lud nawh, mai nawh tag pon krax pluat ploi: phimap.
"Phan: nawh ang pon viex sikaux ra: mu:, keukie: ra: mu: ang ah, pwi pa hoik phit lud an:, tag viex phawng: gaox nghox ca ceu pa mhawm: kao: son tix son, khaing: tix Epha hoek son krax pluat ploi: phimap, nawh tag ang pon tix sau: bee mai lawpan kah piang, kheu mawh an: krax tan pa pluat ploi: phimap.
Nawh tag viex an: hoek kah cao: giex kaing: li, mai cao: giex kaing: li tag teei phawng: nghox ca tix jhawp sonsang mawh pa doh keud mai gleeing an: kah piang khu: dee tan, awm: krax tan pa gleeing kah ngu son Simiang Siyiex; in: mawh krax tan pa pluat ploi: phimap.
Cao: giex kaing: li tag yuh krax khyox khaw: son phimap pa hoik phit lud nawh kah grawng: tix ceuceu, nawh tag pon krax pa pluat ploi:, mai pa kawn deuk khankix tag mawh cie cao: giex kaing: li, awm: krax tan phawng: nghox ca im: heue.
Krax Tan Pa Pluat Ploi: Krax Phit Lud
Simiang Siyiex krai ah nin: kah Mose,
"Phan: pwi tix kauxkaux phit lud kah ceu pa ang tix tien tawng kah ceu pa singax singeh Simiang Siyiex, mai lih tix mawh phimap, nawh tag viex kawn: yung: mhaing: phan: ang mawh nan:, kawn: pex mhaing: pa loig hoek kah Simiang Siyiex tix mu: sonsang mawh krax tan pa pluat ploi: krax phit krax lud, maix tat jum khawng: brie an: kah mau shekhe pa hoik ciang tix kah jiang dee pa singax singeh; in: mawh krax tan pa pluat ploi: krax phit krax lud.
Kieh nawh viied son krax lud loe: nawh kah kraung pa dex pa dawd mai dee pa singax singeh, mai nawh tag dee baox thie: kah piang an: phwan: son tix son, mai ap kah cao: giex kaing: li, cao: giex kaing: li tag yuh krax khyox khaw: son nawh, kah kawn: yung: son krax tan pa pluat ploi: krax phit krax lud, nawh tag pon krax pluat ploi:.
"Phan: pwi tix kauxkaux lud loe:, kah lox tawm: Simiang Siyiex pa ang kieh nawh yuh, tix ceuceu viang nawh ang tawng pa yuh tix phit lud kawx, nawh hoik phit lud mai tag yaox tix kham: geu: son phimap an:.
Nawh tag yaox tix viex kawn: yung: mhaing:, phan: ang mawh nan:, kawn: pex mhaing: pa loig tix mu: kah cao: giex kaing: li, tau mai mau ngawh viied son krax tan pa phit pa lud tix, mai son pa ang nawh koe: krax tawng krax yung:, kah daux pa hoik lud loe: tix, mai cao: giex kaing: li tag yuh krax khyox khaw: kah son nawh, nawh tag pon krax pluat ploi:.
An: mawh krax tan pa pluat ploi: krax phit krax lud, mawh kheu hoik phit lud nawh kah Simiang Siyiex heue."
Khaix an: Simiang Siyiex krai ah nin: kah Mose,
"Phan: pwi tix kauxkaux koe: krax phit, mai phit lud kah Simiang Siyiex, kah daux pa pie lhen: tix kah paoxplawg paoxnyhawm: tix, son grawng: kraung pa ap pwi tix deuh ang ah, son kraung pa tang pwi tix deuh ang ah, son kraung pa gut kheem: ang ah, mai son kraung pa tud pa rhim: nawh khaing: paoxplawg paoxnyhawm: tix ang ah;
phan: nawh yaox kah ceu pa grai pwi yuh mai pie lhen: kah grawng: an: mai tiextu kah pa ang mawh ang meh mai phit lud kah ceu pa phit lud pwi tix ceu ceu.
Yam pwi tix kauxkaux phit lud mai lih tix mawh phimap, nawh tag deeh yaox tix viied kah kraung pa ap pwi tix deuh ang ah, kraung pa tang pwi ang ah kraung pa gut kheem: ang ah, kraung pa tud pa rhim: ang ah, mai kraung pa grai: yuh pwi pa yaox nawh khankix,
mai grawng: pa hoik tiextu nawh kah daux pa ang mawh ang meh; nawh deeh yaox tix viied ngawh kraung tom: naog, mai deeh baox thie: phwan: son tix son kah piang an:, mai tawx an: kah cao: kraung, kah daux singaix yuh nawh krax tan pa phit pa lud.
Nawh tag yaox tix viex kawn: yung: mhaing: pa loig hoek kah Simiang Siyiex sivoe ngai: cao: giex kaing: li, tau mai ngawh mau pa viied tix can krax tan pa pluat ploi: krax phit krax lud tix.
Mai cao: giex kaing: li tag yuh krax khyox khaw: son nawh kah sivoe ngai: Simiang Siyiex, mai nawh tag pon krax pluat ploi: khaing: pa phit pa lud tix kuceu."
Grawng: Been Krax Tan Pa Gleeing
Simiang Siyiex krai ah nin: kah Mose,
"Tawx lox kah Arun mai kawn: simex nawh khankix, in: mawh grawng: been krax tan pa gleeing. Krax tan pa gleeing tag koe: kah piang glah ngu khu: dee tan leeing: sawm: tom: hoek plak ponngawb, mai kieh glah ngu khu: dee tan rup jheengjheeng:.
Mai cao: giex kaing: li tag ceep sibex man: tix, mai khlax man: kah piang tokaux tix, mai nawh tag hok nyaox krax tan pa gleeing kah piang khu: dee tan, mai deuh kah praok khu: dee tan.
Nawh tag loh kraung ceep tix mai deeh ceep kraung tang: ceu, mai viex nyaox an: lih kah praix nyiiex bang: kah dee hoik yuh kix blang:.
Ngu pa koe: kah piang khu: dee tan tag ang pon kieh yeet tibawg kawx, tag kieh rup jheengjheeng:; mai cao: giex kaing: li tag sau: khix sau: ngu kah piang an: ku ngawb, mai deuh krax tan pa gleeing kah piang nawm: khix pa rup piang khu: dee tan, mai yaox tix gleeing khlawp bee krax tan pa nhim:.
Ngu pa rup kah piang khu: dee tan, tag ang pon tix kieh yeet tibawg kawx tag kieh rup jheengjheeng:.
Grawng: Been Krax Tan Phawng: Nghox Ca Im:
"In: mawh grawng: been son krax tan phawng: nghox ca im:, kawn: simex Arun khankix tag tan an: kah piang khu: dee tan, sivoe Simiang Siyiex.
Nawh teei an: khaing: phawng: gaox nghox ca im: tix jhawp tau mai bee mai law pan pa koe: daux krax tan an: khawm: uik, mai gleeing an: kah piang khu: dee tan sonsang mawh pa sioe: bhawng: pa doh keud kah Simiang Siyiex.
Mai pa kawn deuk an: Arun mai kawn: simex nawh khankix tag ih khaomun pa ang sau: susaix kix tag ih kah dee pa singax singeh kah biang nyiiex gox bwan: man: bang: kum:, tau mai khaomun pa ang sau: susaix.
An: tag ang pon tix yuh sin: tau mai susaix, mawh krax tan pa hoik tawx kah kix khaing: krax tan pa gleeing; hoik mawh pa singax singeh, awm: krax tan son pa pluat ploi: phimap mai krax tan pa pluat ploi: krax phit krax lud.
Can pa mawh simex kah daux kawnpraix Arun khawm: uik, tag ih kah an:, an: tag mawh gumlox beenli pa hoik deuh kah son doeh simie ceucat pex tix ju hoik tix ju, khaing: krax tan pa gleeing pex kah ngu kah Simiang Siyiex, can pwi kukaux pa teeh kah krax tan an: tag caw tix mawh pa singax singeh."
Simiang Siyiex krai ah nin: kah Mose,
"In: mawh krax tan Arun mai kawn: simex nawh khankix pa yaox kix tix tan phawng: nghox ca im:, kah Simiang Siyiex jah kah daux singaix hoik kham: tix rieb pa groi rawm: bee kah nawh: kix tag tan phawng: nghox ca im: kao: son tix son khaing: tix Epha son krax tan ku singaix, plak ponngawb tix plak mai plak plak ponbo tix plak.
sau: bee tau mai phawng: an: yuh sin: kah diang rhiem: tix mu:; maix tag viex hoek mai sivit tix tan mawh krax tan phawng: nghox ca im:, son krax tan pa sioe: bhawng: kah Simiang Siyiex.
Kah daux kawn: simex nawh khankix, pa kham: tix rieb pa groi rawm: bee tang: nawh, tag yuh krax tan an:, in: mawh gumlox pingnyap grawng: krax tan kah Simiang Siyiex leeing ju, tag yaox tix gleeing khawm: uik.
Can krax tan phawng: nghox ca im: kuceu son cao: giex kaing: li khankix, tag yaox tix gleeing khawm: uik tag ang pon tix ih heue."
Grawng: Been Krax Tan Son phimap
Khaix an: Simiang Siyiex krai ah nin: kah Mose,
"Krai kah Arun mai kawn: simex nawh khankix, in: mawh grawng: been son krax tan pa pluat ploi: phimap; krax tan son phimap an: tag yaox tix pah kah dee gleeing kix krax tan pa pluat ploi: phimap kah plak sivoe Siyiex; an: mawh pa kied singax singeh.
Cao: giex kaing: li khankix pa tan pa lu kah son phimap; tag ih an: kah dee pa singax singeh tidauh, pa koe: kah daux nyiiex gox bwan: man: bang: kum: pwi hun:.
Can pwi pa teeh kah nex an: tag singax singeh; mai kraung ceep pa caw nham: tix phreeh kah, tag deeh sidaux kah dauh dee pa singax singeh.
Aw: tiex pa hoik ngaik kix nex kah daux, tag pah max; mai phan: kix ngaik nex kah daux aw: tawng lheung:, tag caw tix thui: mai lang singax kah rawm:.
Can simex daux cao: giex kaing: li khankix tag ih kah nex an:, an: mawh pa kied singax singeh.
Viang mawh nan:, krax tan lu son pa pluat ploi: phimap pa viex kix nham: laig kah daux nyiiex gox bwan: man: bang: kum:, son pa sang yuh krax khyox khaw: kah dee pa singax singeh; tag ang pon tix ih kah nex an:, tag gleeing an: kah ngu heue.
Grawng: Been Krax Tan Pa Pluat Ploi: Krax Phit Lud
Grawng: been son krax tan pa pluat ploi: krax phit krax lud. Mawh pa kied singax singeh;
kah dee pah kix to: tan pa gleeing kix tag pah krax tan pa pluat ploi: krax phit krax lud, tag phruah nham: hawt vungviang piang khu: dee tan khawm: uik.
Mai nawh tag tan khlawp bee nawh khawm: uik tau mai bee pa koe: plak sidax mai bee pa kheem: kah piang kraung vaig,
mai sok lax ra: mu:, mai bee pa koe: kah plak daux nyoi, mai khlawp bee pa kawb tawm:, kah piang sok lax khankix nawh tag teei lih;
mai cao: giex kaing: li tag gleeing an: kah piang khu: dee tan awm: krax tan pa gleeing kah ngu kah Simiang Siyiex; an: mawh krax tan pa pluat ploi: krax phit krax lud.
Can simex daux cao: giex kaing: li khankix, tag yaox tix ih an:; mai caw tix ih dee pa singax singeh; an: mawh pa kied singax singeh.
Krax tan son pa pluat ploi: krax phit krax lud mawh pa awm: krax tan pa pluat ploi: phimap, been an: mawh ngie tix mu: khaing:, cao: giex kaing: li pa yuh tix tawx krax khyox khaw: kah son an: khankix tag pon tix cie an:.
Mai cao: giex kaing: li pa yuh krax tan pa gleeing son pwi tix kauxkaux, mai cao: giex kaing: li an: tag yaox tix cie hak krax tan pa gleeing pa hoik tan lu nawh.
Krax tan phawng: nghox ca im: kuceu pa hoik ping: sin: kah daux glah ngu mai can pa hoik khre: rien nawh kah daux aw: khang: phan: ang mawh nan: kah daux diang rhiem: tag mawh cie cao: giex kaing: li pa yuh krax tan kah son an:.
Can krax tan phawng: nghox ca im:, pa hoik klu klao tix kah bee ang ah, pa kroh ang ah tag mawh cie kawn: simex Arun khankix, kieh kix gwieh sidu awm: paox tix heue.
Grawng: Been Krax Tan Pa Nhim:
"In: mawh grawng: been son krax tan pa appong: krax tan pa nhim: pa tag sang tan lu tix kah Simiang Siyiex.
Phan: nawh yuh krax tan son krax tan pa yaogyaw, khaix an: nawh tag yuh krax tan an: tau mai krax tan pa yaogyaw kah khaomun rhi: khlawp pa klu klao kah bee pa ang sau: susaix, kaomun rhi: khlawp pa yuh kah phawng: nghox ca im:, pa hoik klu klao tix mai bee pa hoik diag sin:.
Lheu: khaing: khaomun rhi: khlawp an: nawh tag yuh khaomun pa sau: susaix tau mai son krax tan pa yaogyaw kah krax tan pa nhim:.
Khaing: kah daux krax tan khaomun rhi: khlawp kuceu, nawh tag teei tix ceu tix khlawp pa yaog kah Simiang Siyiex; an: tag mawh cie cao: giex kaing: li pa phruah nham: krax tan pa nhim:.
Nex pa yuh nawh krax tan pa yaogyaw son krax pa nhim: tag ih nex an: kah daux singaix pa yuh nawh krax tan, nawh tag ang pon tix deuh an: tom: hoek plak ponngawb.
Viang mawh nan:, phan: mawh krax tan pa hoik yuh nawh sijax ang ah, mai krax tan pa kaoh khaing: rhawmrhi: nawh ang ah, tag yaox tix ih kah daux singaix pa yuh tix krax tan, mai pa kawn deuk tag pon tix ih tom: hoek singaix khaix;
nex pa kawn deuk khaing: krax tan khankix yam hoek loe: ngaix tix ngaix, tag caw tix gleeing kah ngu,
yam hoek loe: ngaix tix ngaix phan: ih kah nex krax tan pa nhim: an: ceeix ngie khaing:, Nawh Cao: ang khaw: rhawm: kah cao: pa tan can pwi pa tan kah an: tag mawh pa seeing: pa brai:, mai pwi pa ih kah an: khankix tag yaox tix kham: phimap.
"Nex pa hoik teeh kah ceu pa seeing: pa brai: tix ceu ceu tag ang pon tix ih, an: tag caw tix gleeing kah ngu. Can pwi pa singax kukaux tag pon tix ih kah nex pa singax an:.
Phan: pwi tix kauxkaux ih kah nex krax tan pa nhim: pa appong: kah Simiang Siyiex, yam ang tokaux tix singax tag teei tix tik pwi an: khaing: ceu pwi nawh.
Phan: pwi tix kauxkaux hu: teeh kah pa seeing: pa brai:, pa seeing: khaing: kawn: pwi ang ah khaing: khawng: brie ang ah, can viag pa seeing: pa ang singax tix ceu ceu, mai ih kah nex krax tan pa nhim: pa appong: kah Simiang Siyiex, tag teei tix tik pwi an: khaing: ceu pwi nawh heue."
Ang Pon Tix Ih Kah Bee Mai Nham:
Khaix an: Simiang Siyiex krai ah nin: kah Mose,
"Krai kah pwi Isarilax khankix; pex tag ang pon tix ih khlawp bee moi, yung:, mai khlawp bee pex.
Mai khlawp bee totiag pa tang: yum:, mai bee khawng: brie pa hoik kiied totiag khankix, tag shiao son tang: ceu, mai pex ang pon tix ih kah.
Mawh kheu pwi pa ih kah khlawp bee khawng: brie pa hoik gleeing kah ngu kah Simiang Siyiex tag teei tix tik pwi an: khaing: ceu pwi nawh.
Lheu: khaing: an: pex tag ang pon tix ih nham: tix ceu kawx, kah can dee ot tix, pa mawh nham: ang ah mai nham: tosat ang ah.
Can pwi pa ih nham: tix ceu ceu tag teei tix tik pwi an: khaing: ceu pwi nawh.
Yung: Cie Arun Mai Kawn: Simex Nawh
Khaix an: Simiang Siyiex ah nin: kah Mose,
"Krai kah pwi Isarilax khankix pwi pa yuh krax tan pa nhim: pa appong: kah Simiang Siyiex, nawh tag viex krax tan tix hoek kah Simiang Siyiex khaing: krax tan pa nhim:,
tokaux nawh tag yaox tix viex krax tan pa gleeing kah ngu son Simiang Siyiex; nawh tag viex khlawp bee tau mai nex eek, son nex eek pa mawh krax tan yang yeuh, mai yang yeuh sivoe Simiang Siyiex.
Cao: giex kaing: li tag gleeing khlawp bee kah piang khu: dee tan, mai nex eek an: tag mawh cie Arun mai kawn: simex nawh khankix.
Maix tag tawx ba: khawn: dawm: kah cao: giex kaing: li, son krax tan pa yaog khaing: krax tan pa nhim: pa appong: tix.
Kah daux kawn: simex Arun khankix, pa tan nham: mai khlawp bee son krax tan pa nhim:, ba: taix khawn: dawm: tag mawh nyum: cie nawh.
Mawh kheu nex eek krax tan pa yang yeuh an: mai ba: krax tan pa yaog Aux hoik teei khaing: pwi Isarilax khankix, mai khaing: pa appong: kix krax tan pa nhim:, Aux hoik tawx kah cao: giex kaing: li Arun mai kawn: simex nawh khankix, Aux hoik deuh mawh pingnyap leeing ju kah daux ceu pwi Isarilax.
In: mawh yung: pa pon Arun mai kawn: simex nawh khankix khaing: krax tan pa gleeing kah ngu kah Simiang Siyiex, kah daux singaix pa hoik ap kix yuh kaing jhaw: cao: giex kaing: li cie Simiang Siyiex.
Simiang Siyiex hoik tawx lox kah pwi Isarilax khankix mai ap ceu in: kah kix, jah kah singaix pa hoik kham: kix tix rieb pa groi rawm: bee, an: hoik mawh pingnyap leeing ju kah daux doeh simie ceucat kix tix ju hoik tix ju."
In: mawh grawng: been krax tan pa gleeing, krax tan phawng: nghox ca im:, krax tan pa pluat ploi: phimap, krax tan pa pluat ploi: krax phit krax lud, krax tan pa nhim: in: mawh grawng: krax pa appong: tix yam yuh kaing jhaw: pa singax singeh.
Pa hoik tawm: Simiang Siyiex kah Mose kah piang gawng Sina daux singaix tawm: Nawh Cao: pwi Isarilax khankix sonsang viex krax tan kah Simiang Siyiex kah daux tiag sina heue.
Arun Mai Kawn: Simex Nawh Tan Lu Tokaux Tix
Simiang Siyiex krai ah nin: kah Mose,
viex Arun mai kawn: simex nawh khankix tau mai kraung ceep mai bee pa sang groi mai moi mhaing: son krax tan pa pluat ploi: mai kawn: yung: mhaing: ra: mu:, mai khaomun pa ang sau: susaix tix khrawng:;
mai krawk khrawm: cub pwi hun: kah diang siviex nyiiex gox bwan: man: bang: kum:."
Mose yuh awm: lox pa tawm: Simiang Siyiex kah nawh, mai cub pwi hun: khankix khrawm: paox tix kah diang siviex nyiiex gox bwan: man: bang: kum:.
Mose ah nin: kah cub pwi hun:, "In: mawh lox pa hoik tawm: Simiang Siyiex sonsang hawt yuh."
Mose viex Arun mai kawn: simex nawh khankix, mai heem: kix kah rawm:.
Mai nawh ceep sibex da: plak daux kah Arun, mai rhawt maox rawd nyoi mai ceep sibex da: plak piang, mai deeh ceep sibex da: dawd taix kah piang nawh, mai rhawt kah man: pa taing: kah keei: kuceu, pa koe: kah piang sibex da: dawd taix, mai rhawt kah piang an:.
Mai sau: man: tie naok kah piang naok nawh mai deeh sau: Urim mai Tumim kah daux man: tie naok an:.
Mai ceep lawk kaing: kah kaing: Arun, mai kawb khlawp khri: kah sivoe ngai: man: lawk kaing: pa mawh mok khri: awm: pa hoik tawm: Simiang Siyiex kah Mose.
Mose teei bee groi, mai groi kah nyiiex gox bwan: man: mai can pa koe: daux nyiiex, mai yuh an: khankix singax singeh;
Nawh phruah bee kah piang khu: dee tan aliah bawg, mai groi kah khu: dee tan mai can kraung pa shiao, kah pan khoek mai khawm: kah caong nawh sonsang mawh pa singax singeh.
Mai nawh groi bee groi kah piang kaing: Arun, mai groi nawh kah bee sonsang singax singeh.
Mose deeh kok kah kawn: simex Arun khankix, mai ceep sibex da: plak daux kah piang kix, mai rhawt maox rawd nyoi kah kix, mai baox dee ceep mhok kah piang kix awm: gumlox pa hoik tawm: Simiang Siyiex kah Mose.
Mai nawh tuk moi mhaing:, son krax tan pa pluat ploi: phimap; Arun mai kawn: simex nawh khankix, deuh taix tix kah piang kaing: moi mhaing: an:, son krax tan pa pluat ploi: phimap.
Mose pah kah moi an: mai teei nham: kah giien: taix tix mai sau: kah piang rung: khu: dee tan hawt vungviang khawm: uik, mai kieh khu: dee tan singax kah, nham: pa kawn deuk nawh hieh kah caong khu: dee tan kieh mawh pa singax singeh sonsang yuh krax pa pluat ploi:.
Nawh teei khlawp bee pa koe: piang kraung vaig, mai bee pa kawb tawm: mai pa kawb soklax ra: mu:, mai Mose gleeing an: khankix kah piang khu: dee tan.
Viang mawh nan:, nawh tag gleeing moi an:, khawm: hak, nex, mai roeng kah ngu kah plak praix nyiiex bang: awm: gumlox pa hoik tawm: Simiang Siyiex kah Mose.
Nawh deeh viex kawn: yung: mhaing: son krax tan pa gleeing; Arun mai kawn: simex nawh khankix deuh taix tix kah piang kaing: kawn: yung: an:.
Mose pah to: tan an:, mai phruah nham: kah piang khu: hawt vungviang khu: dee tan.
Mai nawh tat nex kawn: yung: khik mawx khik an:, mai Mose gleeing kaing:, mai khik nex mai khlawp bee khankix.
Mai sigrhah kraung vaig mai caong kah rawm:, Mose gleeing kawn: yung: khawm: mu: kah piang khu: dee tan; mawh krax tan pa gleeing pa sioe: bhawng: mai krax tan pa gleeing kah ngu son Simiang Siyiex awm: gumlox pa hoik tawm: Simiang Siyiex kah Mose.
Mai nawh baox deeh viex kawn: yung: mhaing: tang: mu:. pa hoik laug sonsang tawx ara Arun mai kawn: simex nawh khankix deuh taix tix kah piang kaing: kawn: yung: an:.
Mose pah to: tan an: mai teei nham: tiblah sau: kah dawng: yhaok plak dawm: Arun, mai kah piang giien: ting taix khawn: dawm:, mai kah piang giien: ting caong khawn: dawm:.
Khaix an: nawh kok kawn: simex Arun khankix, Mose sau: nham: tiblah kah piang giien: ting taix khawn: dawm: kix, mai kah piang dawng: yhaok khawn: dawm: kix, mai kah piang giien: ting caong khawn: dawm:, mai Mose phruah nham: hawt vungviang piang khu: dee tan.
Nawh teei khlawp bee mai sidax, khlawp bee pa koe: kah piang kraung vaig khawm: uik, mai khlawp bee pa kawb tawm: mai bee pa kawb soklax ra: mu: mai bee khankix mai; ba: khawn: dawm:;
nawh teei khaomun tix lon: pa ang sau: susaix khaing: kraung pa deuk sivoe Simiang Siyiex, nawh teei khaomun pa ang sau: susaix pa mawh khaomun pa hoik yuh kah bee, mai khaomun rhi: khlawp tix khlawp; nawh deuh kah piang khlawp bee mai kah piang ba: khawn: dawm:;
nawh sau: an: khankix kah daux tawm: taix Arun mai kawn: simex nawh khankix, yang yeuh an: khankix kah plak sivoe Simiang Siyiex, mai yuh krax tan pa yang yeuh.
Mose teei an: khaing: daux tawm: taix kix mai gleeing kah piang khu: dee tan krax tan pa gleeing, an: mawh krax tan pa sioe: bhawng: pa tawx ara, mawh krax tan pa gleeing kah ngu son Simiang Siyiex.
Mose teei nex eek, mai yang yeuh sivoe Simiang Siyiex; mai yuh krax tan pa yang yeuh, nex eek kawn: yung: pa tawx ara an: mawh nyum: cie Mose, awm: gumlox pa hoik tawm: Simiang Siyiex kah Mose.
Mose teei bee groi tiblah mai nham: tiblah, pa koe: kah piang khu: dee tan, mai; phruah kah piang Arun mai kraung ceep nawh, mai kah piang kawn: simex mai kraung ceep kix, nawh kieh Arun mai kraung ceep nawh mai kawn: simex nawh khankix, singax singeh tau mai nawh.
Mose ah nin: kah Arun mai kawn: simex nawh khankix, "Ngaik nex hawt diang siviex nyiiex gox bwan: man: bang: kum:, ih tan: tau mai khaomun pa koe: daux khrawng: pa tan son pa tawx ara, awm: gumlox pa hoik tawm: Aux ah nin:,Arun mai kawn: simex nawh khankix tag ih an:,
maix tag gleeing can nex pa kawn deuk mai khaomun kah ngu.
Maix tag ang pon tix lih kah praix diang siviex nyiiex gox bwan: man: bang: kum: been aliah ngaix, tom: ang singaix bawg yam tawx ara kah maix nyang sidauh, mawh kheu bawg yam tawx ara kah maix rheeng: aliah singaix.
awm: pa hoik yuh kah daux in: singaix, Simiang Siyiex hoik tawm: lox, sonsang yuh krax pa pluat ploi: son pex.
Maix tag ot kah diang siviex nyiiex gox bwan: man: bang: kum: aliah singaix leeing: ngaix leeing: sawm:, mai yuh kaing jhaw: pa tawx Simiang Siyiex, son ang maix sang yum: awm: gumlox pa hoik tawm: kah aux yuh nin:."
Mawh kheu nan:, Arun mai kawn: simex nawh khankix, yuh ceu an: awm: gumlox pa hoik tawm: Simiang Siyiex kah Mose heue.
Kaing Jhaw: Pa Jah Cao: Giex Kaing: Li Tix Yuh
Yam hoek daux daix singaix, Mose kok kah Arun mai kawn: simex nawh khankix mai kuad song: nong: yu ceu pwi Isarilax;
Nawh ah nin: kah Arun, "Teei kawn: moi iak tix mu: son krax tan pa pluat ploi: phimap, mai kawn: yung: tix mu: son krax tan pa gleeing, pa loig khawm: ra: mu: mai tan an: kah sivoe Simiang Siyiex.
Krai ah nin: kah ceu pwi Isarilax,teei kawn: pex mhaing: iak tix mu: son krax tan pa pluat ploi: phimap, kawn: moi iak tix mu: mai kawn: yung: iak tix mu:, pa hoik naog num pa loig khawm: ra: mu: son krax tan pa gleeing.
Teei moi mhaing: tix mu: mai kawn: yung: mhaing: tix mu:, son krax tan pa nhim:, son pa sang appong: tix sivoe Simiang Siyiex, mai krax tan phawng: nghox ca im: pa hoik klao tau mai bee, mawh kheu Simiang Siyiex tag lih bleeh kah pex kah daux in: singaix "
Mai kix viex can pa hoik tawm: Mose sivoe nyiiex nghox bwan: man: bang: kum:; mai cub pwi hun: greed dex mai cung sivoe Simiang Siyiex.
Mose ah nin:, "In: mawh pa hoik tawm: Simiang Siyiex pex yuh; mai min: plakngai: Simiang Siyiex tag lih bleeh kah pex."
Mose ah nin: kah Arun, "Hu: kah khu: dee tan mai tan krax tan son pa pluat ploi: phimap mai khawm: krax tan pa gleeing; mai yuh krax khyox khaw: pa pluat ploi: phimap son tokaux maix mai son pwi khankix; tan krax tan pa viex pwi hoek mai yuh krax khyox khaw: son kix; awm: gumlox pa hoik tawm: Simiang Siyiex."
Arun hu: kah khu: dee tan, mai pah kawn: moi iak son krax tan pa pluat ploi: phimap kah son cao: tix.
Mai kawn: simex Arun khankix viex nham: hoek kah nawh, nawh cub giien: taix tix kah daux mai nham: sau: kah piang rung: khu: dee tan, mai hieh nham: pa kawn deuk an: hawt caong khu: dee tan;
nawh gleeing khlawp bee soklax mai khlawp bee tawm:, son krax tan pa pluat ploi: phimap kah piang khu: dee tan, awm: gumlox pa hoik tawm: Simiang Siyiex kah Mose.
Nawh gleeing nex mai hak tau kah daux ngu kah plak praix nyiiex bang:.
Nawh pah kah to: krax tan pa gleeing; mai kawn: simex Arun khankix viex nham: hoek plak sivoe nawh, mai nawh phruah nham: an: khankix hawt vungviang piang khu: dee tan.
Mai kix deeh viex krax tan pa gleeing hoek kah plak sivoe nawh khawm: khik nex, mai kaing: ; nawh gleeing an: khankix kah piang khu: dee tan.
Nawh sigrhah kraung vaig mai caong, nawh gleeing an: khankix tau mai krax tan pa gleeing kah piang khu: dee tan.
Nawh viex krax tan pwi khankix hoek, mai teei kawn: pex son krax tan pa pluat ploi: phimap son pwi khankix, mai pah tix tan son phimap, awm: pa hoik tan kix phaoka: tix mu:.
Nawh baox viex krax tan pa gleeing hoek, mai tan awm: pa hoik koe: been.
Nawh baox viex krax tan phawng: nghox ca im:, mai teei kah taix tix naok tix jhawp, mai gleeing an: kah piang khu: dee tan, sivoe dee gleeing kix krax tan plak ponngawb.
Nawh baox pah moi mhaing: mai kawn: yung: iak, pa ap kix son krax tan pa nhim: son pwi khankix; kawn: simex Arun khankix viex nham: hoek, nawh phruah nham: an: vungviang piang khu: dee tan khawm: uik.
Khlawp bee moi mhaing: mai kawn: yung:, khawm: khlawp bee sidax, mai khlawp bee pa kawb kraung vaig, soklax mai tawm;
kix deuh khlawp bee an: khankix kah piang nex eek, nawh gleeing khlawp bee an: khankix kah piang khu: dee tan,
mai Arun yang yeuh nex eek mai ba: khawn: dawm:, son krax tan pa yang yeuh sivoe Simiang Siyiex, awm: gumlox pa hoik tawm: Mose.
Arun yaog taix tix kah plak pwi hun:, mai nawb bwan: piang kix, mai lih khaing: kah dee krax tan son pa pluat ploi: phimap, mai krax tan pa gleeing khawm: krax tan pa nhim: khankix.
Mose mai Arun laig daux nyiiex gox bwan: man: bang: kum: pwi hun:, mai deeh lih plak praix, mai nawb bwan: kah piang pwi khankix. Khaix an: min: plakngai: Simiang Siyiex plak jhi: tix kah pwi khawm: uik;
mai ngu lih khaing: sivoe ngai: Simiang Siyiex, mai gleeing kah krax tan pa gleeing mai khlawp bee pa koe: kah piang khu: dee tan, yam yaox pwi khankix kah an:, kix kok yo mai gup ngai: tix piang tiex khawm: uik heue.
Grawng: Gleeing Ngu Pa Seeing: Pa Yuh Nadat Mai Abihux
Kawn: simex Arun pa mawh Nadat mai Abihux viex pan ngu hoek tix kaux tix mu:, mai sau: ngu kah mai baox sau: pa sioe: bhawng: kah piang an:, mai kiex lak yuh krax tan pa gleeing kah ngu, kah sivoe Simiang Siyiex, pa ang Nawh Cao: nyang tawm: kiex yuh.
Ngu lih khaing: sivoe ngai: Simiang Siyiex, mai gleeing kiex khawm: ra:, mai kiex yum: plak sivoe Simiang Siyiex.
Mose ah nin: kah Arun, "Simiang Siyiex hoik krai ah nin:,Aux tag mawh pa singax singeh sinax ceu pwi pa dex pa dawd mai Aux, mai sivoe pwi hun: khankix Aux tag mawh pa koe: min: plakngai:, "Mai Arun ot yiien: yawg tix.
Mose kok kah Mishelax mai Elizapha kawn: simex Awzalax, pa mawh keeing: iak Arun, mai nawh ah nin: kah kiex. "Hoek dee dex mai klawm: puxaik maix lih khaing: sivoe dee pa singax singeh kah plak praix nyiiex bang:."
Kiex hoek dex mai klawm: nawh hu: kah sibex da: ceep kiex kah plak praix nyiiex bang:, awm: gumlox pa hoik ah Mose.
Mose ah nin: kah Arun mai kawn: simex nawh Eliza mai Itama, "Pex paw peeik mhok mai paw ploi: hauk kaing: tix yih, mai paw riah kah kraung ceep tix, aux lhat pex yum: kah, mai lhat krax songrhawm: Siyiex hoek kah piang pwi khawm: uik, viang mawh nan:, kieh puxaik pex mai kawn: nyiiex ma: pwi Isarilax khawm: uik, yiiem yo mai khirhawm: kah ngu pa hoik yuh Simiang Siyiex.
Pex tag ang pon tix lih khaing: daux siviex nyiiex gox bwan: man: bang: kum: pwi hun: kheu lhat Aux pex yum:. Grawhgrawng: nawh bee groi pa hoik appong: Simiang Siyiex koe: kah piang pex. "Mai kix yuh awm: gumlox Mose heue.
Been Pa Caw Cao: Giex Kaing: Li Tix Yuh
Simiang Siyiex ah nin: kah Arun,
"Maix khawm: kawn: simex maix khankix yam laig pex kah daux nyiiex gox bwan: man: bang: kum: pwi hun:, paw nyaux rawm: plix siiet mai plai:, kheu lhat Aux pex yum:, an: tag mawh gumlox been pa caw pex tix hawt khawm: doeh simie ceucat pex leeing ju leeing phan:;
sonsang chix gwieh pex pa singax singeh khaing: pa ang singax singeh, mai pa singax khaing: pa ang singax,
mai sonsang chix gau pex ceu pwi Isarilax khankix kah gumlox beenli pa hoik sikah Simiang Siyiex kah kix khawm: uik kah Mose."
Mose krai ah nin: kah Arun mai kawn: simex nawh pa kawn deuk pa mawh Eliza mai Itama, "Teei krax tan phawng: nghox ca im: pa kawn deuk khaing: krax tan pa gleeing kah ngu son Simiang Siyiex mai ih an: kix tau mai pa ang sau: susaix, hawt vungviang khu: dee tan, mawh kheu an: mawh pa kied singax singeh.
"Pex tag ih an: khankix kah dee pa singax singeh, kheu hoik mawh an: son maix, khawm: kawn: simex maix khankix, pa mawh krax tan pa gleeing kah ngu son Simiang Siyiex. Mawh kheu gumlox beenli Siyiex hoik tawm: kah aux yuh nin:."
Eek krax tan pa yang yeuh, mai ba: krax tan pa yaog, maix tag ih dee pa singax tau mai kawn: simex kawn: bun: tix. Mawh kheu an: mawh son maix mai son kawn: simex maix, pa pon kix khaing: pa appong: tix son krax tan pa nhim:, pa kaoh khaing: pwi Isarilax.
Kix tag viex khawn: ba: krax tan pa yaog mai eek krax tan pa yang yeuh hoek tau mai khlawp bee krax tan pa gleeing kah ngu, sonsang mawh krax tan pa yang yeuh sivoe Simiang Siyiex, mai an: tag mawh cie maix, khawm: cie kawn: simex maix khankix, in: mawh son pa caw pex tix pon leeing ju leeing phan:, awm: gumlox pa hoik tawm: Simiang Siyiex.
Khaix an: Mose coca: tix sawg kah pex mhaing: son krax tan pa pluat ploi: phimap, mai nawh yaox kah hoik gleeing kix nawh tan:. Mai nawh songrhawm: kah kawn: simex Arun pa deuk an: pa mawh Eliza mai Itama mai nawh ah nin:;
"Pex lai ang ih krax tan son pa pluat ploi: phimap kah dee pa singax singeh yuh kah mawx? awm: hoik mawh ankix pa kied singax singeh, pa tawx Siyiex kah pex, sonsang klawm: pex phimap cub pwi hun: khankix, mai sonsang yuh pex krax khyox khaw:, mai krax pluat ploi: phimap son kix sivoe Simiang Siyiex.
Jhak heue, pex ang nyang viex nham: laig kah daux dee pa singax singeh, pex khaw: tix ih nex tan an: kah daux dee pa singax singeh, awm: gumlox pa hoik tawm: Aux."
Arun deeh ah nin: kah Mose, "Kix hoik tan lu krax tan pa pluat ploi: phimap tix daux in: singaix, mai krax tan pa gleeing kah sivoe Simiang Siyiex, mai grawng: ceu inkix hoik klup kah piang aux, phan: aux hoik pon tix ih kah krax tan pa pluat ploi: phimap an: daux in: singaix, khex mawh pa khaw: pa caw kah sivoe ngai: Simiang Siyiex lie?"
Yam mhong: Mose lox an:, nawh koe: krax fahrhawm: kah heue.
Pa Ih Mai Pa Ang Pon Tix Ih
Simiang Siyiex ah nin: kah Mose mai Arun.
"Krai kah ceu pwi Isarilax khankix ah nin:, inkix mawh ceu totiag pa caw pex tix ih khaing: totiag khankix pa koe: piang hakhiex;
Can totiag pa koe: gip pa jiah gip caong, mai totiag pa deeh sai roeng tix khankix, pex tag pon tix ih.
Viang mawh nan: pex tag ang pon tix ih totiag pa deeh sai roeng tix, totiag pa jiah gip caong pa mawh Kala-uk, mawh kheu totiag pa deeh sai roeng tix pa ang jiah gip, mawh pa ang singax kah son pex;
Ghot (Saphan) pa deeh sai roeng tix, kheu ang gip caong kix jiah mawh pa ang singax kah son pex;
mai pat la pa deeh sai roeng tix kheu ang gip caong jiah, mawh pa ang singax kah son pex;
Mai lig khankix viang gip jiah kawx, nawh ang deeh sai roeng tix, mawh pa ang singax son pex.
Nex totiag ceu in: khankix pex tag ang pon tix ih, mai ang pon tix hu: teeh kah tokaux yum: an:, kix mawh pa ang singax son pex.
Inkix mawh pa pon pex tix ih khawm: uik khaing: tosat pa koe: daux rawm:, pa koe: pruik, pa koe: sibiak, can pa koe: daux rawm: sigrit sigra: ang ah, daux rawm: klawng: khankix ang ah pex tag pon tix ih.
Viang mawh nan: pa koe: daux rawm: sigrit sigra: mai pa koe: daux rawm: klawng:, pa ang koe: pruik mai sibiak, pa chix chuh chix hu: daux rawm:, khawm: can ceu pa im: ju daux rawm: khawm: uik, mawh pa seeing: son pex.
An: kix mawh pa seeing: son pex, mai pex tag ang pon tix ih nex an: kix, viang mawh kah to: yum: an: kawx mawh pa seeing: son pex.
Can ceu pa koe: daux rawm:, pa ang koe: pruik mai sibiak, tag mawh pa seeing: son pex.
"Mai inkix tag mawh pa seeing:, khaing: daux ceu sim: sai: pa ang pex pon tix ih, pa mawh klang: ting, klang: preng mai klang: krih.
Klang: teei ia: mai klang: cie: khawm: paox ceu nawh khankix,
Lak mai paox ceu nawh khankix;
Sim: kala-uk, klang: pon sawm:, klang: kax mai paox ceu nawh khankix;
Plang: plawh, sim: Tareei, mai klang: pet;
sim: klang: tareei, sim: vampo mai klang: preng;
Klang: lang: gaoh, sim: saoh, mai paox ceu nawh khankix, gawx, mai blak.
"Can ceu viag pa koe: pruik pa chix mo kah caong pon: khawn: khawm: uik, tag mawh pa seeing: son pex.
Viang mawh nan:, inkix tag mawh pa pon pex tix ih khaing: can ceu viag pa koe: pruik pa chix mo kah caong pon: khawn:, pa koe: caong pa koe: ba: khankix, sonsang pon phoh kix tix kah piang tiex.
Pex tag pon tix ih sido nghox mai paox ceu nawh khankix, sido khaox glawm: mai paox ceu nawh, tawn mai paox ceu nawh, sigra: mai paox ceu nawh.
Viang mawh nan: can ceu viag pa koe: pruik tang: ceu, pa koe: caong pon: khawn: tag mawh pa seeing: son pex heue.
To Tiag Pa Ang Singax Khankix
"Inkix mawh pa kieh maix ang singax kah, can pwi pa hu: teeh kah to: yum: ankix, tag mawh pa ang singax tom: hoek plak bo.
Can pwi pa viex to: yum: inkix mai tix, tag sidaux kraung tix, mai nawh mawh pa ang singax tom: hoek plak bo.
Can tosat pa jiah gip caong, pa ang jiah gip caong ang ah, pa ang deeh sai roeng tix, ceu an: khankix mawh pa seeing: son pex, can pwi pa hu: teeh kah to: yum: an: kukaux, tag mawh pa seeing: kah.
Mai can tosat pa hu: kah caong tix khaing: daux sinax tosat khawm: uik, pa koe: caong pon: khawn:, mawh pa ang singax kah son pex, can pwi pa hu: teeh kah to: yum: an:, tag mawh pa ang singax tom: hoek plak bo.
Can pwi pa viex to: yum: ankix mai tix, tag yaox tix sidaux kraung tix, mai nawh mawh pa ang singax tom: hoek plak bo, ankix mawh pa ang singax son pex.
"Ceu inkix kawx mawh pa ang singax son maix, khaing: ceu pa chix mo, mai pa mo tix hu: piang tiex, pa mawh beei:, kiang mai goe: khawm: paox ceu nawh,
Mai goe: tawk kie, lai tang:, lai lee, goe: rang:, goe: rham:.
Ankix mawh pa ang singax son pex, khaing: sinax ceu pa chix mo chix hu:, can pwi pa hu: tee kah ceu pa hoik yum: an: khankix, tag mawh pa ang singax tom: hoek plak bo.
Phan: to: yum: an: cod kah piang kraung ceu patix ang ah, an: tag mawh pa ang singax kah, phan: rau kah piang khaox pa shiao ang ah, piang kraung ceep ang ah, piang hak ang ah, piang chee: khankix ang ah, ceu pa yuh kah mawx kawx, tag mawh pa ang singax, kraung an: khankix tag yaox tix ce daux rawm:, mai an: khankix tag mawh pa ang singax tom: hoek plak bo, khaix an: kraung khankix tag deeh singax.
Phan: to: yum: an: cod kah daux aw: tiex, maix tag pah aw: an: max. Can ceu pa koe: kah daux aw: an: khankix tag mawh pa ang singax;
Mai phan: to: yum: an: cod kah daux aw: pa koe: pa ih mai daux rawm: nyaux, ceu an: tag lih tix mawh pa ang singax, mai rawm: nyaux an: tag mawh pa ang singax son maix.
Mai ceu pa hoik cod to: yum: an: khankix tix ceeix ceeix kawx tag mawh pa ang singax, viang mawh kah tao: ngu mai kiang ngu kawx caw tiyieh laux, an: khankix tag mawh pa ang singax kah son pex.
Viang mawh nan:, dee lih rawm: klawng: khankix ang ah, rawm: maw: pa kaong: pex ang ah, tag mawh pa singax, can pwi pa hu: teeh kah to: yum: an: khankix ngie, tag lih tix mawh pa ang singax kah.
Mai phan: to: yum: an: cod kah piang simie pa sang sum: pex ceeix khaing:, simie an: kawn: mawh pa singax.
Viang mawh nan:, phan: to: yum: cod kah piang simie pa hoik ce hoik dum: pex, an: tag lih tix mawh pa ang singax son pex.
"Mai phan: tosat pa chix pex tix ih yum:, pwi pa hu: krox hu: teeh kah to: yum: an:, tag mawh pa ang singax tom: hoek plak bo.
Pwi pa ih nex to: yum: an:, tag yaox tix sidaux kraung ceep tix, mai nawh tag mawh pa ang singax tom: hoek plak bo. Pwi pa viex to: yum: an: hu: kawx, tag yaox tix sidaux kraung ceep tix, mai nawh tag mawh pa ang singax tom: hoek plak bo.
"Mai can ceu pa chix mo tix hu: kah piang tiex khankix mawh pa seeing:, pex tag ang pon tix ih kah.
Can ceu pa mo tix hu: kah vaig tix, mai can ceu pa hu: kah caong pon: khawn: ang ah, can ceu pa koe: caong haoh hun: khaing: ceu pa mo tix hu:, pa chix mo tix hu: piang tiex, ceu inkix pex tag ang pon tix ih, mawh kheu an: khankix mawh ceu pa seeing:.
Pex tag ang pon tix yuh krax pa seeing: kah tokaux tix, kah ceu pa chix mo chix hu: tix ceu kawx, pex tag ang pon tix yuh tokaux tix seeing: kah ceu an: khankix, aux lhat pex seeing: brai: kah jao an:.
Aux mawh Simiang Siyiex pa mawh Siyiex pex. Mawh kheu nan:, pex tag mawh pa singax, grawhgrawng: nawh Aux mawh pa singax, pex tag ang pon tix seeing: brai: kah jao ceu pa chix mo tix hu: tix ceu kawx, mai kah pa mo tix hu: kah piang tiex khankix.
Aux mawh Simiang Siyiex pa hoik viex pex lih hu: khaing: daux haktiex Ejiptux, sonsang mawh Aux Siyiex pex. Mawh kheu nan:, pex tag mawh pa singax, mawh kheu mawh Aux pa singax singeh.
In: mawh grawng: been son tosat mai sim: sai: khankix, mai can ceu pa im: ju pa koe: daux rawm: kuceu mai ceu pa chix mo tix hu: piang tiex;
Sonsang gwieh Aux tix deuh pa ang singax khaing: sinax ceu pa singax, mai sinax ceu pa pon pex tix ih, mai ceu pa ang pex pon tix ih khankix heue.
Gumlox Beenli Khaix Keh
Simiang Siyiex ah nin: kah Mose.
"Krai kah ceu pwi Isarilax khankix ah nin:, phan: bun: nghe: mai keh kawn: simex, nawh tag mawh pa ang singax aliah singaix, awm: yam hoek mee: seeing: nawh tag mawh pa ang singax.
Mai yam hoek daix singaix, tag yaox tix pat hak kawn: simex an:.
Khaix an:, nawh tag baox yaox tix ot tingoe: loe: ngaix glang: deeh singax nham: nawh, nawh tag ang pon tix hu: krox hu: teeh kah ceu pa singax tix ceu kawx. Mai nawh tag ang pon tix laig kah daux dee pa singax singeh, glang: ang nawh nyang deeh naog singaix pa singax.
Phan: nawh keh kawn: bun:, nawh tag mawh pa ang singax ra: vang twah, awm: yam ang mee: seeing: nawh nyang singax, mai nawh tag baox deeh yaox tix ot tigliah liah singaix glang: sang deeh nham: nawh.
"Yam hoik deeh naog singaix singax nawh, son kawn: simex nawh ang ah, son kawn: bun: ang ah, nawh tag viex kawn: yung: pa taug naog num hoek tix mu: kah cao: giex kaing: li, son krax tan pa gleeing mai kawn: sikaux keukie: tix mu: ang ah, sikaux tix mu: ang ah, son krax tan pa pluat ploi: phimap, kah diang siviex nyiiex gox bwan: man: bang: kum:.
Cao: giex kaing: li tag tan ankix sivoe Simiang Siyiex, mai yuh krax khyox khaw: pluat ploi: phimap son nawh, mai nawh tag singax khaing: pa lih nham: tix. In: mawh grawng: been son bun:, pa hoik keh kawn: simex, kawn: bun: ang ah.
Phan: nawh ang pon tan kawn: yung: tix mu: khaix an: nawh tag yaox tix viex sikaux ra: mu:, phan: ang mawh nan:, keukie: ra: mu: hoek son krax tan pa gleeing tix mu:, mai son krax tan pa pluat ploi: phimap tix mu:. Mawh kheu nan:, cao: giex kaing: li tag yuh krax khyox khaw: pluat ploi: phimap son kiex, mai kiex tag mawh pa singax heue."
Gumlox Beenli Son Saux Sipawg
Simiang Siyiex ah nin: kah Mose mai Arun.
Phan: pwi tix kaux koe: krax saux uah ang ah, saux dao: ang ah, saux muad kah piang hak nawh ang ah, mai yam koe: krax saux an: piang hak tokaux nawh awm: pa saux sipawg, kieh kix viex nawh hoek kah cao: giex kaing: li Arun, phan: ang mawh nan:, kieh hoek kah kawn: simex nawh tix kauxkaux pa mawh cao: giex kaing: li.
Cao: giex kaing: li tag jhak krax saux pa koe: piang hak nex nawh, phan: hauk pa koe: kah piang dee saux nawh lih tix mawh pa paing, mai krax saux an: raux khaing: hak nex nawh, an: mawh jhawm: saux sipawg, khaix an: cao: giex kaing: li tag jhak kah nawh mai tat nawh mawh pa ang singax.
Phan: dee saux an: mawh pa paing kah piang hak tokaux nawh, mai ang raux khaing: hak nawh, mai hauk nawh kawx ang paing, khaix an: cao: giex kaing: li tag gang: kaw pa koe: jhawm: saux an: ot nongnong: been aliah singaix.
Mai cao: giex kaing: li tag jhak lia kah nawh, yam hoik naog daux aliah singaix, mai phan: jhawm: saux an: ang nyang tah kah piang hak nawh, cao: giex kaing: li tag baox deeh gang: tix jhak lia nawh aliah singaix.
Khaix an: cao: giex kaing: li tag deeh baox jhak lia nawh, yam hoik hoek aliha singaix, phan: jhawm: saux an: hoik lung, mai ang nyang tah kah piang hak nawh, khaix an: cao: giex kaing: li tag krai pao: nawh mawh pa singax, in: mawh ngie jhawm: saux dao: mai nawh mawh pa singax khaix hoik sidaux nawh kraung ceep tix.
Viang mawh nan:, phan: jhawm: saux dao: nawh hoik pon tix tah kah piang hak nawh, khaix hoik jhak lia cao: giex kaing: li kah pa hoik singax nawh, nawh baox deeh kieh cao: giex kaing: li jhak lia jhawm: saux nawh.
Mai phan: cao: giex kaing: li hoik yaox tah saux dao: an: kah piang hak nawh tete, khaix an: cao: giex kaing: li tag krai pao: nawh mawh pa ang singax, an: mawh jhawm: saux sipawg.
Pwi mawx tix kauxkaux pa hoik koe: jhawm: saux sipawg, khaix an: kix tag viex nawh hoek kah cao: giex kaing: li.
Mai cao: giex kaing: li tag jhak lia kah nawh, mai jhawm: saux muad an: hoik paing kah piang hak nawh tete, mai kieh hauk nawh lih tix paing, mai nex nawh lih tix raoh kah dee saux muad an:;
An: mawh jhawm: saux sipawg pa prim: kah piang hak tokaux cao: nawh, cao: giex kaing: li tag krai pao: nawh mawh pa ang singax, mai ang lai gang: nawh ot nongnong: kheu mawh nawh pa ang singax.
Mai phan: jhawm: saux sipawg an: hoik naog kah piang kaw pa pon jhawm: saux an: khawm: uik, jah kah kaing: tom: hoek kah caong, mai yam hoek jhak lia cao: giex kaing: li nawh see dee mawx ang ah;
Khaix an:, cao: giex kaing: li tag jhak lia nawh, mai phan: jhawm: saux sipawg hoik pon tix tah kah tokaux nawh, nawh tag krai pao: nawh pwi pa pon jhawm: saux an: mawh pa singax, ankix hoik lih tix mawh pa paing piang nawh khawm: uik, nawh mawh pa singax.
Viang mawh nan:, yam deeh lih saux nex raoh ankix kah piang nawh yam mawx ang ah, tag deeh mawh pa ang singax kah.
Mai cao: giex kaing: li tag jhak lia kah nex saux raoh pa hoik lih an:, mai krai pao: nawh mawh pa ang singax. Mawh kheu nex raoh an: mawh pa ang singax, an: mawx jhawm: saux sipawg.
Mai phan: nex raoh an: deeh loh tix, mai deeh tieh tix paing, nawh tag hoek kah cao: giex kaing: li.
Mai cao: giex kaing: li tag jhak lia kah nawh, mai phan: jhawm: saux nawh hoik lih tix mawh pa paing, khaix an: cao: giex kaing: li tag krai pao: nawh mawh pa singax, kah kaw pa hoik pon jhawm: saux an: nawh mawh pa singax.
"Phan: jhawm: saux muad lih tix koe: kah piang nex hak nawh, mai phan: deeh moi;
jhawm: saux dao: pa paing ang ah, jhawm: saux pa dee raoh mai dee paing ang ah, koe: kah dee saux muad an:, khaix an: nawh tag mawh pa jhi: tix kah cao: giex kaing: li;
mai cao: giex kaing: li tag jhak lia, phan: yaox raux laig jhawm: saux khaing: daux hak kaux nawh, mai phan: hauk nawh deeh tieh tix mawh pa paing, cao: giex kaing: li tag krai pao: nawh mawh pa ang singax, an: mawh jhawm: saux sipawg pa hoik lih khaing: jhawm: saux muad nawh.
Viang mawh nan:, phan: cao: giex kaing: li jhak lia kah an: kix, mai yaox kah ang hauk paing lai koe: kah daux dee saux nawh mai hoik grai: hu:, khaix an: cao: giex kaing: li tag gang: nawh ot nongnong: aliah singaix;
Mai phan: jhawm: saux an: hoik tah kah piang kaux hak nawh khawm: uik, cao: giex kaing: li tag krai pao: nawh mawh pa ang singax, an: mawh jhawm: saux sipawg.
Viang mawh nan:, phan: khaix rhoi: dee saux an: koe: kah daux tix dauh nongnong: mai ang prungprang:tix tah hu: tang: dauh, an: mawh rhoi: khaix saux muad, mai cao: giex kaing: li tag krai pao: nawh mawh pa singax.
"Phan: dee saux khaix hax ngu koe: kah tokaux nawh, mai khaix hax an: mawh dee saux dao:, mai lih tix raoh ang ah, paing ang ah;
cao: giex kaing: li tag jhak lia kah an:, mai phan: hauk pa koe: kah dee saux dao: an: tieh tix mawh pa paing, mai raux greem: hak nawh, an: mawh saux sipawg pa pon nawh khaing: krax saux hax ngu, cao: giex kaing: li tag krai pao: nawh mawh pa ang singax, an: mawh jhawm: saux sipawg.
Viang mawh nan: phan: cao: giex kaing: li jhak lia kah an: mai phan: hauk paing nawh khankix ang koe: kah daux dee saux dao:, mai dee saux an: ang tie mawh pa raux greem: hak mai hoik deeh grai:, khaix an: cao: giex kaing: li tag gang: nawh ot nongnong: aliah singaix.
Mai cao: giex kaing: li tag deeh jhak lia kah nawh, yam hoek aliah singaix, phan: saux an: tah kah piang hak kaux nawh, khaix an: cao: giex kaing: li tag krai pao: nawh mawh pa ang singax, an: mawh jhawm: saux sipawg.
Phan: dee saux dao: an: kawn: koe: daux tix dauh, mai ang nyang tah kah piang hak kaux nawh, mai hoik deeh grai:, an: mawh krax saux khaix hax ngu, cao: giex kaing: li tag krai pao: nawh mawh pa singax, mawh ngie khaix rhoi: saux nawh khaing: pa hax ngu.
"Simex ang ah bun: ang ah, Phan: koe: krax saux kah piang kaing: nawh, phan: ang mawh nan:, kah piang hauk bheup nawh,
Khaix an: cao: giex kaing: li tag jhak lia kah jhawm: saux an:, mai phan: jhawm: saux raux kah greem: hak nawh, mai koe: hauk lheung: pa cie kah plak daux, khaix an: cao: giex kaing: li tag krai pao: nawh mawh pa ang singax, an: mawh jhawm: saux maux sipawg kah kaing: nawh, phan: ang mawh nan:, kah bheup nawh.
Mai cao: giex kaing: li jhak lia jhawm: saux maux an:, mai phan: dee saux an: ang tie raux kah hak kaux nawh, mai hauk lheung: kawx ang tie koe: daux saux an:, khaix an: cao: giex kaing: li tag gang: kaw pa koe: jhawm: saux maux an: ot nongnong: aliah singaix.
Mai yam hoik hoek kah daux aliah singaix, cao: giex kaing: li tag jhak lia kah jhawm: saux nawh, phan: jhawm: saux maux ang nyang tah, mai hauk lheung: ang nyang koe: kah daux nawh, mai jhawm: saux maux an: ang nyang raux plak greem: hak;
nawh tag khlao: hauk tix, viang mawh nan:, nawh tag ang pon tix khlao: kah dee koe: jhawm: saux maux an:, mai cao: giex kaing: li tag baox gang: kaw pa hoik pon jhawm: saux an: ot nongnong: aliah singaix.
Yam hoik hoek daux aliah singaix, cao: giex kaing: li tag deeh jhak lia kah dee koe: jhawm: saux maux, mai phan: jhawm: saux maux ang nyang tah kah piang hak kaux nawh, mai ang raux kah greem: hak nawh, cao: giex kaing: li tag krai pao: nawh mawh pwi pa singax, nawh tag sidaux kraung tix mai nawh mawh pa singax.
Viang mawh nan:, phan: jhawm: saux maux an: deeh tah kah piang hak kaux nawh, khaix hoik singax nawh;
cao: giex kaing: li tag deeh jhak lia kah nawh, mai phan: jhawm: saux maux hoik tah kah piang hak kaux nawh cao: giex kaing: li tag ang lo tix jhak lia kah hauk lheung:, nawh mawh pa ang singax.
"Phan: jhawm: saux maux lih tix koe: tix dauh ngie, mai hauk lung kuah kah, jhawm: saux maux an: hoik pon tix moi:, nawh mawh pa singax mai cao: giex kaing: li tag krai pao: nawh mawh pa singax.
"Simex ang ah bun: ang ah phan: koe: jhawm: saux dao: kah hak tokaux nawh, pa mawh jhawm: saux dao: pa paing hak khankix;
cao: giex kaing: li tag jhak lia kah nawh, mai phan: jhawm: saux dao: pa koe: kah piang hak tokaux nawh, pa ang tie paing an: mawh dao: pa paing pa koe: kah piang hak nawh, mai nawh mawh pa singax.
"Phan: pwi mawx greeid hauk kaing: khaing: kaing nawh, an: mawh pwi pa pak kaing:, viang mawh nan:, nawh mawh pwi pa singax.
Pwi pa hoik greeid hauk kaing: khaing: kah piang dongre: nawh, nawh mawh pwi pa pak dongre:, viang mawh nan:, nawh mawh pwi pa singax.
Phan: khaix rhoi: saux pa raoh mai pa paing koe: kah piang kaing pak nawh ang ah, kah piang dongre: nawh ang ah, an: mawh jhawm: saux sipawg pa lih piang kaing: nawh, mai kah piang dongre: nawh.
Khaix an: cao: giex kaing: li tag jhak lia kah, mai phan: jhawm: saux uah nawh raoh mai paing kah piang kaing: pak nawh ang ah, piang dongre: nawh ang ah, awm: grang jhawm: saux sipawg kah piang hak tokaux nawh;
nawh mawh pwi pa saux sipawg, nawh mawh pa ang singax, cao: giex kaing: li tag krai pao: nawh mawh pa ang singax, jao jhawm: saux pa koe: piang kaing nawh.
"Yaminkix tag riah kraung ceep pwi pa koe: jhawm: saux sipawg an:, mai kieh nawh bhang kaing tix mai nawh tag kheem: siyiep jheeh plak piang tix mai kok yo lox tix yuh nin:;ang singax, ang singax,
glang: koe: jhawm: saux nawh, nawh tag mawh pa ang singax, nawh ang singax, mai nawh tag yaox tix ot nongnong: plak praix nyiiex bang:.
Gumlox Beenli Son Kraung Ceep Pwi Saux Sipawg
"Kraung pa hoik kawb jhawm: saux sipawg kah pa mawh kraung hauk yung: ang ah, kraung ceep man: ang ah;
viang mawh keei: pa taing: ang ah, maox pa sang taing: ang ah, man: ang ah, hauk yung: ang ah, hak ang ah mai can ceu pa yuh tix kah hak ang ah;
phan: jhawm: saux an: klai ang ah, raoh ang ah hoik koe: kah piang kraung ceep ang ah, kah piang hak ang ah, viang mawh kah piang keei: pa taing: ang ah, maox pa sang taing: ang ah, mai kraung pa sang yuh kah hak ang ah, an: mawh jhawm: saux sipawg, tag mawh pa hu: jhi: tix kah cao: giex kaing: li.
Mai cao: giex kaing: li tag jhak lia kah jhawm: saux an:, mai deuh kraung pa koe: jhawm: saux an: ot nongnong: aliah singaix.
Yam hoek daux aliah singaix, nawh tag deeh jhak lia kah jhawm: saux an:, phan: jhawm: saux an: hoik tah kah piang kraung ceep nawh, pa mawh keei: taing: ang ah, maox pa sang taing: ang ah, mai hak ang ah, can ceu kraung pa yuh kah hak ang ah, jhawm: saux sipawg an: mawh pa kieh nawh koe: jhawm: saux, an: mawh pa ang singax.
Kraung ceep pa koe: jhawm: saux sipawg pa mawh keei: pa taing: ang ah, maox pa sang taing: ang ah, hauk yung: mai man: ang ah, kraung ceep hak, mai kraung pa yuh kah hak ang ah, mawh kheu koe: jhawm: saux sipawg kah piang nawh, an: tag mawh pa gleeing tix kah daux ngu.
"Mai cao: giex kaing: li tag jhak lia mai phan: jhawm: saux sipawg an: ang nyang pon tix tah kah piang kraung ceep khankix, pa mawh keei: taing: ang ah, maox pa sang taing: ang ah, mai kah piang kraung pa hoik yuh tix kah hak,
khaix an: cao: giex kaing: li tawx lox kah kix, sonsang sidaux kix kah kraung pa koe: jhawm: saux sipawg, mai tag baox deeh deuh tix yaox kraung an: kix aliah singaix.
Khaix an: cao: giex kaing: li tag jhak lia kah jhawm: saux sipawg khaix hoik sidaux kix kraung tix, mai phan: jhawm: saux sipawg an:, ang nyang tieh loh tix, viang jhawm: saux sipawg an: ang nyang pon tix tah kudauh kawx, an: mawh pa ang singax mai mawh jhawm: saux pa si-um: kah plak daux ang ah, plak praix ang ah, maix tag gleeing tix tik can ceu kraung ankix kah ngu.
"Phan: cao: giex kaing: li hoik jhak lia, mai phan: jhawm: saux sipawg an: kawn: deeh koe: khaix sidaux kix kraung, khaix an: nawh tag riah kraung ceep khankix, keei: pa taing: ang ah, maox pa sang taing: ang ah, mai kraung ceep pa yuh kah hak ang ah, kah dee koe: jhawm: saux an:.
Viang mawh nan:, phan: jhawm: saux sipawg an:, kawn: deeh koe: kah piang kraung ceep, keei: pa taing: ang ah, maox pa sang taing: ang ah, mai can kraung hak ang ah, an: mawh jhawm: saux sipawg pa sang tah hu:, pex tag gleeing kraung pa koe: jhawm: saux sipawg an: kah daux ngu.
Mai kraung ceep pa hoik sidaux maix, keei: pa taing: ang ah, maox pa sang taing: ang ah, mai can kraung pa yuh tix kah hak ang ah, phan: jhawm: saux sipawg hoik grai: hu: khaing: piang kraung an: khankix, khaix an: nawh tag deeh sidaux kraung an: ra: bawg tix bawg, mai an: tag mawh pa singax.
In: mawh grawng: beenli son jhawm: saux sipawg pa koe: kah piang kraung ceep, pa mawh hauk yung: mai man: khankix, viang mawh pa koe: piang keei: pa taing: ang ah, maox pa sang taing: ang ah, mai can kraung pa yuh kah hak ang ah, sonsang krai pao: mawh pa singax, phan: ang mawh nan:, sonsang krai pao: mawh pa ang singax heue.
Gumlox Beenli Khaix Singax Saux Sipawg
Simiang Siyiex ah nin: kah Mose,
"In: tag mawh grawng: beenli, son pwi pa saux sipawg, khaix hoik hoek daux singaix pa singax nawh, kix tag viex nawh hoek kah cao: giex kaing: li.
Mai cao: giex kaing: li lih hu: kah praix nyiiex bang:, mai cao: giex kaing: li jhak lia kah nawh, phan: pwi saux sipawg an: hoik moi: khaing: jhawm: saux sipawg;
cao: giex kaing: li tag tawx lox sonsang teei kix kawn: sim: pa im: mai pa singax ra: mu:, khaox Arit mai maox keei: raoh rawt khawm: rao taux im: krim son pwi pa sang deeh singax an:.
Mai cao: giex kaing: li tawx lox tix, sonsang pah kix sim: an: tix mu:, kah daux aw: tiex pa hoik kin kix tix sau: rawm: im: kah.
Cao: giex kaing: li teei sim: pa kawn im: an: mai khaox Arit mai maox keei: raoh rawt mai rao taux im: krim cub khankix tau mai sim: pa im: kah daux rawm: nham: sim: pa hoik pah kix kah daux rawm: im: pa hoik kin kix.
Mai phruah an: aliah bawg kah piang kaw pa sang deeh kieh singax khaing: jhawm: saux sipawg, mai tag krai pao: nawh mawh pa singax, mai ploi: sim: im: an: lih hu: kah daux kaung:.
Pwi pa sang deeh kieh nawh mawh pa singax, tag yaox tix sidaux kraung ceep tix, mai khlao: hauk tix khawm: uik, mai heem: tix, sonsang mawh nawh pa singax, khaix hoik an: nawh tag laig kah daux nyiiex bang:, mai nawh tag yaox tix ot kah plak praix nyiiex gox cao: nawh aliah singaix.
yam hoik hoek kah daux aliah singaix, nawh tag baox khlao: hauk kaing: tix, mai hauk bheup khawm: hauk ngai: tix, nawh tag khlao: tix tik hauk tix khawm: uik, nawh tag sidaux kraung ceep tix mai heem: tix, mai nawh tag mawh pa singax.
"Mai yam hoik hoek kah daux daix singaix, nawh tag teei kawn: yung: mhaing: ra: mu:, pa ang koe: dee mat dee ne, mai kawn: yung: shiang: tix mu:, pa tag naog num, pa ang koe: dee mat dee ne, mai nawh tag baox teei phawng: ngox ca im: pa jiet mhawm:, loe: son khaing: kao: son kah daux tix Epha pa hoik klao tix mai bee, son krax tan phawng: ngox ca im:, mai bee tix Lawga.
Khaix an: cao: giex kaing: li pa yuh krax singax kah nawh, tag viex pwi pa sang kieh nawh mawh pa singax hoek tau mai ceu an: khankix sivoe Simiang Siyiex, kah daux diang siviex nyiiex gox bwan: man: bang: kum: pwi hun:.
Mai cao: giex kaing: li tag teei kawn: yung: mhaing: an: tix mu:, mai tan son krax tan pa pluat ploi: pa phit pa lud tau mai bee tix Lawga mai yang yeuh an: khankix son krax tan yang yeuh sivoe Simiang Siyiex.
Khaix an: nawh tag pah kawn: yung: an:, kah dee pah nawh to: tan pa pluat ploi: phimap, mai to: tan pa gleeing kah dauh dee pa singax singeh, mawh kheu krax tan pa pluat ploi: pa phit pa lud mawh cie cao: giex kaing: li, awm: krax tan son pa pluat ploi: phimap, an: mawh pa kied singax.
Cao: giex kaing: li tag teei nham: tiblah, khaing: krax tan pa deeh pluat ploi: pa phit pa lud mai cao: giex kaing: li tag kraix nham: an: kah piang dawng: yhaok plak dawm: kaw pa sang deeh kieh mawh pa singax, mai kah piang giien: ting taix dawm: nawh, mai giien: ting caong plak dawm: nawh.
Mai cao: giex kaing: li tag teei bee tiblah, khaing: daux tix lawga mai hieh kah daux tawm: taix khawn: gwiex tix.
Khaix an: cao: giex kaing: li cub giien: taix khawn: dawm: tix kah daux bee pa koe: kah daux tawm: tai plak gwiex, mai nawh tag phruah bee an: tiblah kah giien: taix tix aliah bawg sivoe Simiang Siyiex.
Mai cao: giex kaing: li tag kraix bee pa kawn deuk daux tawm: taix nawh tiblah kah piang dawng: yhaok khawn: dawm: pwi pa sang deeh singax an:, mai kah piang giien: ting taix khawn: dawm: nawh, khawm: kah piang giien: ting caong khawn: dawm: nawh, mai kah piang dee kraix nham: krax tan pa pluat ploi: pa phit pa lud.
Cao: giex kaing: li kraix bee pa kawn deuk an: daux tawm: taix tix kah piang kaing: pwi pa sang deeh kieh nawh mawh pa singax, mawh kheu nan:, cao: giex kaing: li tag yuh krax khyox khaw: pa pluat ploi: son nawh sivoe Simiang Siyiex.
Khaix an: cao: giex kaing: li tag tan krax tan pa pluat ploi: phimap, mai yuh krax pa khyox khaw: mai krax pa pluat ploi: son pwi pa sang deeh kieh nawh mawh pa singax, khaing: krax pa ang nawh nyang singax, khaix hoik ceu an: khankix nawh tag pah kah khawng: brie krax tan pa gleeing.
Mai cao: giex kaing: li tag tan krax tan pa gleeing, mai krax tan phawng: nghox ca im: kah piang khu: dee tan, mawh kheu nan:, cao: giex kaing: li tag yuh krax khyox khaw: mai krax pa pluat ploi: son nawh, mai nawh tag mawh pa singax.
Viang mawh nan:, phan: nawh mawh pa hot pa shia: mai ang pon tix tawx ceu an: khankix, khaix an: tag teei kawn: yung: mhaing: tix mu: son krax tan pa pluat ploi: pa phit pa lud, pa sang yang yheuh, mai sonsang yuh krax khyox khaw: mai krax pa pluat ploi: son nawh, mai tag teei phawng: nghox ca im: pa mhawm: kao: son tix son khaing: tix Epha pa hoik klao tau mai bee, son krax tan phawng: nghox ca im: mai bee tix Lawga;
mai sikaux ra: mu: ang ah, kawn: keukie: ra: mu: ang ah, son krax tan pa pon nawh tix tan, tix mu: tag mawh son pa pluat ploi: phimap, mai an: tix mu: tag mawh son krax tan pa gleeing.
Nawh tag viex an: khankix hoek kah cao: giex kaing: li, yam hoik hoek kah daux daix singaix, son krax pa sang dee singax nawh, kah diang siviex nyiiex gox bwan: man: bang: kum: pwi hun: sivoe Simiang Siyiex.
Mai cao: giex kaing: li tag teei kawn: yung: pa tan nawh son krax tan pa pluat ploi: pa phit pa lud mai bee tix Lawga, mai cao: giex kaing: li tag yang yheuh ankix, mawh krax tan pa yang yheuh sivoe Simiang Siyiex.
Khaix an: nawh tag pah kah kawn: yung:, krax tan pa pluat ploi: pa phit pa lud mai cao: giex kaing: li tag teei nham: krax tan pa pluat ploi: pa phit pa lud tiblah, mai kraix kah piang dawng: yhaok khawn: dawm: pwi pa sang deeh kieh nawh mawh pa singax, mai kah piang giien: ting taix khawn: dawm:, khawm: kah piang giien: ting caong khawn: dawm:.
Mai cao: giex kaing: li tag hieh bee an: khankix tiblah kah daux tawm: taix khawn: gwiex tix.
Khaix an: cao: giex kaing: li tag phruah bee an: khankix tiblah kah giien: taix khawn: dawm: tix, khaing: pa koe: kah daux tawm: taix gwiex nawh aliah bawg sivoe ngai: Simiang Siyiex.
Mai cao: giex kaing: li tag kraix bee an: khankix, pa koe: daux tawm: taix nawh tiblah, kah piang dawng: yhaok khawn: dawm: pwi pa sang deeh kieh nawh mawh pa singax an:, mai kah piang giien: ting taix khawn: dawm: tau mai kah piang giien: ting caong khawm: dawm: nawh, mai kah piang dee hoik kraix kix nham: krax tan pa pluat ploi: pa phit pa lud.
Cao: giex kaing: li tag kraix bee pa kawn deuk an:, pa koe: daux tawm: taix cao: nawh kah piang kaing: pwi pa sang deeh kieh nawh mawh pa singax mai nawh tag yuh krax khyox khaw: mai krax pluat ploi: son nawh sivoe Simiang Siyiex.
Mai nawh tag tan sikaux tix mu: ang ah, kawn: keukie: tix mu: ang ah, awm: pa pon tan nawh;
awm: can pa pon tan nawh, tix mu: tag mawh son krax tan pa pluat ploi: phimap, mai tix mu: tag mawh pa tan son krax tan pa gleeing tau mai krax tan phawng: nghox ca im:, Mawh kheu nan:, cao: giex kaing: li tag yuh krax pa khyox khaw: mai krax pa pluat ploi: son pwi pa sang deeh kieh nawh mawh pa singax sivoe Simiang Siyiex.
In: mawh son pwi pa hoik kham: jhawm: saux sipawg, pa ang pon yuh sonsang singax tix awm: pa koe: grawng: beenli heue."
Beenli Padex Padawd Mai Nyiiex Ma: pwi Saux Sipawg
Simiang Siyiex ah nin: kah Mose;
"Yam hoik hoek pex kah daux haktiex Khanan pa tawx Aux kah pex, mai phan: jhawm: saux sipawg koe: kah daux nyiiex tix lhang: daux haktiex pa hoik kieh Aux pex pon tix cie;
mai cao: nyiiex tag hoek tix krai kah cao: giex kaing: li ah nin:,aux hoik yaox awm: pa hoik koe: jhawm: saux sipawg tiblah kah daux nyiiex aux
Khaix an: cao: giex kaing: li tag tawx lox sonsang grux gah kix kraung uik sivoe sang laig cao: giex kaing: li tix jhak lia kah jhawm: saux sipawg an:, can pa koe: kah daux nyiiex an: khawm: uik, tag ang pon tix yuh nawh mawh pa ang singax, mai khaix hoik ceu an: khankix cao: giex kaing: li tag laig tix jhak lia kah daux nyiiex.
Mai nawh tag jhak lia kah jhawm: saux sipawg an: mai phan: jhawm: saux sipawg hoik koe: kah daux klawk ding: nyiiex, klai ang ah, raoh ang ah, viang mawh nan:, hoik raux laig kah daux ding:;
khaix an: cao: giex kaing: li tag lih plak praix nyiiex kah daux diang siviex mai nawh tag nyeep tix deuh nyiiex an: aliah ngaix.
Mai cao: giex kaing: li tag baox hoek tix jhak lia yam hoik hoek kah daux aliah singaix, mai phan: jhawm: saux sipawg an: hoik tah kah piang ding: nyiiex,
khaix an: cao: giex kaing: li tag tawx lox sonsang khut kix simaox an: lih, pa koe: jhawm: saux sipawg, mai kix tag teei tix tik kah dee pa ang singax kah plak praix veng.
Mai kix tag khut plak daux vungviang nyiiex khawm: uik, mai phawng: tiex pa hoik khut tix, tag khrawm: tix tik kah dee pa ang singax plak praix veng.
Khaix an: kix tag teei lon: simaox tang: dauh, mai sau: kah daux dee pa hoik sivaoh kix simaox an: khankix, mai tag teei tiex ceu pa kraix mai deeh kap nyiiex.
"Mai phan: jhawm: saux sipawg deeh baox lih kah daux nyiiex, khaix hoik sivaoh kix lon: simaox an: hu: dee singai, mai khaix hoik khut kix kah daux nyiiex, mai khaix hoik dee cox kawb kix ding:;
khaix an: cao: giex kaing: li tag deeh hoek tix jhak lia, phan: jhawm: saux sipawg an: hoik pon tix tah kah daux nyiiex, an: mawh jhawm: saux sipawg pa chix haok kah daux nyiiex, an: mawh pa ang singax.
Nawh tag yieh nyiiex, lon: simaox, khaox mai can pa kab tix kah nyiiex tag gah plak praix veng kah dee pa ang singax.
Lheu: khaing: an: can pwi pa laig kah daux nyiiex an:, yam hoik nyeep kix kah, mai nawh tag mawh pa ang singax tom: hoek plak ponbo.
Mai can pwi pa it kah daux nyiiex an:, tag yaox tix sidaux kraung ceep tix, mai can pwi pa ih nyaux kah daux nyiiex an:, tag yaox tix sidaux kraung ceep tix.
"Phan: cao: giex kaing: li laig kah daux mai jhak lia kah, mai phan: jhawm: saux sipawg ang nyang tah kah daux nyiiex, khaix hoik deeh cox kawb kix kah nyiiex, khaix an: cao: giex kaing: li tag krai pao: nyiiex an: mawh pa singax, mawh kheu hoik grai jhawm: saux sipawg.
Nawh tag teei sim: ra: mu:, mai khaox Arit, mai maox keei: pa raoh rawt khawm: rao lhax im: krim sonsang deeh yuh nawh nyiiex singax,
nawh tag pah sim: tix mu: kah daux aw: tiex, pa hoik kin tix sau: rawm: im: kah,
nawh tag teei khaox Arit mai rao lhax im: krim khawm: maox keei: pa raoh rawt, mai sim: pa im: tix mu:, mai cub tau kah daux nham: sim: pa hoik pah tix, kah daux rawm: im: pa hoik kin tix deuh, mai nawh tag phruah an: khankix kah nyiiex aliah bawg.
Nawh tag yuh nyiiex an: singax kah nham: sim: mai rawm: im: pa hoik kin, mai sim: pa im: tau mai khaox Arit khawm: rao lhax im: krim, mai keei: raoh rawt.
Khaix an: nawh tag deeh ploi sim: pa im: an:, kah plak praix veng kah daux kaung, mai yuh krax pa khyox khaw: mai krax pa pluat ploi: son nyiiex an:, mai nyiiex an: tag mawh pa singax."
In: mawh grawng: beenli son jhawm: saux sipawg kuceu mai son jhawm: saux maux sipawg;
Mai son kraung ceep mai nyiiex pa koe: jhawm: saux sipawg,
jhawm: saux muad, mai jhawm: saux dao: khawm: jhawm: saux dao: paing;
sonsang chix tawng chix gwieh kix, yam ang singax, mai yam singax, in: mawh grawng: beenli son jhawm: saux sipawg heue.
Beenli Jhawm: Saux Lih Rawm: seeing: Khaing: Tokaux
Simiang Siyiex ah nin: kah Mose mai Arun;
"Krai kah ceu pwi Isarilax khankix ah nin:, yam koe: jhawm: saux lih rawm: seeing: khaing: tokaux simex, jhawm: saux lih rawm: seeing: an: mawh pa ang singax.
In: tag mawh pa yuh nawh ang singax, kheu jao jhawm: saux lih rawm: seeing: an:, phan: rawm: seeing: kawn: lih khaing: tokaux nawh ang ah, phan: hoik hit khaing: tokaux nawh ang ah, an: mawh krax pa ang nawh singax.
Dee it pa hoik it pwi pa koe: jhawm: saux lih rawm: seeing: an: kawx mawh pa ang singax, mai khaix ngawm nawh khankix kawx tag mawh pa ang singax.
Can pwi pa hu: krox hu: teeh kah kraung it nawh, tag yaox tix sidaux kraung tix mai heem: tix kah daux rawm:, mai nawh tag mawh pa ang singax tom: hoek plakbo.
Kaw pa ngawm kah dee hoik ngawm pwi pa koe: jhawm: saux an:, tag yaox tix sidaux kraung ceep tix mai heem: tix kah daux rawm:, mai nawh tag mawh pa ang singax tom: hoek plakbo.
Mai kaw pa hu: krox hu: teeh kah tokaux kaw pa koe: jhawm: saux an:, tag yaox tix sidaux kraung ceep tix, mai heem: tix kah daux rawm:, mai nawh tag mawh pa ang singax tom: hoek plakbo.
Phan: pwi pa koe: jhawm: saux an: hu: baik kah pwi pa singax, pwi an: tag yaox tix sidaux kraung ceep tix, mai heem: tix kah daux rawm:, mai nawh tag mawh pa ang singax tom: hoek plakbo.
Mai an: bruk kaw pa koe: jhawm: saux an: kawx, tag mawh pa ang singax.
Can pwi pa hu: krox hu: teeh, kah kraung pa koe: greem: nawh tag mawh pa ang singax tom: hoek plakbo, pwi pa viex kraung ceu an: hu:, tag yaox tix sidaux kraung ceep tix mai heem: tix kah daux rawm:, mai nawh tag mawh pa ang singax tom: hoek plakbo.
Mai phan: pwi pa koe: jhawm: saux an:, hu: krox hu: teeh kah pwi tix kauxkaux, yam ang nawh nyang khoek taix tix kah daux rawm:, pwi an: tag yaox tix sidaux kraung ceep tix mai heem: tix kah daux rawm:, mai nawh tag mawh pa ang singax tom: hoek plakbo.
Kraung aw: tiex pa hoik krox hoik teeh kaw pa koe: jhawm: saux an:, tag pah max mai tawg khaox, tag phak kah rawm:.
"Yam hoik moi: kaw pa koe: jhawm: saux an: khaing: jhawm: saux lih rawm: seeing:, nawh tag simin tix yaox tom: hoek aliah singaix son krax pa singax nawh, mai nawh tag sidaux kraung ceep tix mai heem: tix kah daux rawm:, pa lih hu:, khaix an: nawh tag mawh pa singax.
Yam hoik hoek daix singaix, nawh tag teei sikaux ra: mu: ang ah, kawn: keukie: ra: mu: ang ah, mai viex hoek sivoe Simiang Siyiex, hawt daux diang siviex nyiiex gox bwan: man: bang: kum: pwi hun:, mai tawx an: kah cao: giex kaing: li.
Cao: giex kaing: li tag tan an: son krax tan pa pluat ploi: phimap tix mu:, mai tan an: tix mu: son krax tan pa gleeing, mai cao: giex kaing: li tag yuh krax khyox khaw: mai krax pa pluat ploi: son nawh, sivoe Simiang Siyiex jao jhawm: saux lih rawm: seeing: khaing: nawh.
"Phan: simex lih rawmngang, kieh nawh heem: tix kah daux rawm:, mai nawh tag mawh pa ang singax tom: hoek plakbo.
Kraung ceep mai kraung hak pa hoik kawm: kah rawmngang, tag mawh pa sidaux tix kah rawm:, mai an: tag mawh pa ang singax tom: hoek plakbo.
Yam it simex tau mai bun:, phan: rawmngang nawh hoik pon tix lih, kiex khawm: ra: tag heem: tix kah daux rawm:, kiex mawh pa ang singax tom: hoek plakbo.
"Phan: bun: hoik hoek bawg yam lih nhammee: tix, bun: an: tag mawh pa ang singax aliah singaix, mai can pwi pa hu: krox hu: teeh kah bun: an:, tag mawh pa ang singax tom: hoek plakbo.
Can kraung it nawh glang: lih nhammee: nawh, tag mawh pa ang singax, can ceu pa ngawm nawh piang khankix kawx tag mawh pa ang singax.
Pwi mawx ang ah pa hu: krox hu: teeh kah kraung it nawh, tag yaox tix sidaux kraung ceep tix, mai heem: tix kah daux rawm:, mai nawh tag mawh pa ang singax tom: hoek plakbo.
Mai pwi mawx ang ah pa hu: krox hu: teeh kah kraung pa hoik ngawm nawh piang kawx, tag yaox tix si daux kraung ceep tix mai heem: tix kah daux rawm:, mai nawh tag mawh pa ang singax tom: hoek plakbo.
Yam hu: krox hu: teeh pwi kah kraung pa koe: kah dee it nawh ang ah, kah dee ngawm nawh ang ah, pwi an: tag mawh pa ang singax tom: hoek plakbo.
Phan: simex it tau mai bun: yam ang mee: seeing: bun: an: nyang singax, pwi an: tag mawh pa ang singax aliah singaix, mai can kraung pa hoik it nawh kah kawx tag mawh pa ang singax.
"Phan: bun: tix kaux lih jhawm: saux rawm: seeing: tom: rheung: khaing: bawg yam yie hoek nham: pa ang singax nawh awm: ku bawg, mai phan: hoik luan khaing: bawg yam yie lih nham: pa ang singax nawh ang ah, glang: singaix kawn: hoek nham: jhawm: saux rawm: seeing: an:, tag deuh nawh awm: singaix hoek nham: bawg yam pa ang singax nawh, nawh tag mawh pa ang singax.
Dee it dee tum nawh khawm: uik glang: singaix lih jhawm: saux rawm: seeing: nawh, tag mawh dee it dee tum pa ang singax, mai can ceu pa ngawm nawh kawx tag mawh pa ang singax awm: ang nawh singax.
Can pwi pa hu: krox hu: teeh kah ceu an: tag mawh pa ang singax, nawh tag yaox tix sidaux kraung ceep tix mai heem: tix kah daux rawm:, mai nawh mawh pa ang singax tom: hoek plakbo.
Phan: bun: an: hoik singax khaing: jhawm: saux lih rawm: seeing: an:, nawh tag simin tom: hoek aliah singaix, khaix an: nawh tag mawh pa singax.
Mai yam hoek daix singaix, nawh tag teei sikaux ra: mu: ang ah, kawn: keukie: ra: mu: ang ah, mai viex an: hoek kah cao: giex kaing: li hawt daux diang siviex nyiiex gox bwan: man: bang: kum: pwi hun:.
Khaix an: cao: giex kaing: li tag tan an: tix mu: son krax tan pa pluat ploi: phimap, mai an: tix mu: son krax tan pa gleeing, mai cao: giex kaing: li tag yuh krax khyox khaw: mai krax pa pluat ploi: son bon an: sivoe Simiang Siyiex, son jhawm: saux lih rawm: seeing: pa ang singax khaing: nawh.
"Mawh kheu nan: maix tag tang gwieh ceu pwi Isarilax khankix khaing: pa ang singax kix, phan: ang mawh nan: Aux lhat kix yum: kah daux pa ang kix singax, yam kieh kix nyiiex gox bwan: man: Aux seeing: pa mawh ceu pa koe: kah daux sinax kix."
In: mawh grawng: beenli son pwi pa koe: jhawm: saux lih rawm: seeing: mai rawmngang, nawh tag mawh pa ang singax;
Mai son bun: pa hoik pon jhawm: saux lih rawm: seeing: mai hoek bawg yam mee: pa ang nawh singax; pa mawh simex ang ah, bun: ang ah, mai son pwi pa hoik it tau mai bun: pa ang singax heue.
Singaix Yuh Krax Pa Khyox Khaw: Mai Pa Pluat Ploi:
Simiang Siyiex ah nin: kah Mose, khaix hoik yum: kawn: simex Arun ra: kaux, kheu jao pa tan kiex ngu pa seeing: sivoe Simiang Siyiex mai yum: kah,
Mai Simiang Siyiex ah nin: kah Mose, "Krai kah puxke: maix Arun, son ang nawh nieb hoek daux pa kied singax singeh jheengjheeng:, kah plak daux man: tie, sivoe dangngeung krax pa caoxrhawm:, pa koe: kah piang teug bwan:, phan: ang mawh nan:, Aux lhat nawh yum: kah, grawhgrawng: nawh, Aux tag sang plak jhi: Tix kah daux paiawm:, pa koe: kah piang dawb teug bwan:, kah dangngeung krax pa caoxrhawm:.
Arun tag laig kah daux dee pa singax singeh mai viex kawn: moi mhaing: tix mu:, son krax tan pa pluat ploi: phimap, mai kawn: yung: mhaing: tix mu: son krax tan pa gleeing.
Nawh tag ceep man: sibex mhawm: da: plak daux pa singax singeh, mai man: khlax mhawm: pa singax singeh kah piang tix, nawh tag rhawt nyoi tix kah maox rawd nyoi pa mhawm:, mai nawh tag ceep man: lawk kaing: pa mhawm:, inkix mawh kraung ceep pa singax singeh, nawh tag heem: tix kah daux rawm:, mai ceep kraung an: khankix.
Mai nawh tag rieb tix teei kawn: pex mhaing: ra: mu:, khaing: cub pwi hun: ceu pwi Isarilax khankix, son krax tan pa pluat ploi: phimap, mai kawn: yung: mhaing: tix mu: son krax tan pa gleeing.
"Arun tag tan moi mhaing: son krax tan pa pluat ploi: phimap, mai yuh krax pa khyox khaw: mai krax pluat ploi: son tokaux tix, khawm: son kawn: nyiiex ma: tix.
Nawh tag teei pex ra: mu:, mai deuh kah sivoe Simiang Siyiex hawt diang siviex nyiiex gox bwan: man: bang: kum: pwi hun:.
Arun tag yuh nieb son pex an: ra: mu:, nieb tix mu: mawh son Simiang Siyiex, mai nieb an: tix mu: mawh son pa deeh ploi: lih hu:.
Mai Arun tag viex pex son pa hoik caw nieb cie Simiang Siyiex hoek, mai tan son krax tan pa pluat ploi: phimap.
Viang mawh nan:, nawh tag viex pex pa caw nieb pa pluat ploi: an: hoek khawm: im: kah sivoe Simiang Siyiex, sonsang yuh krax khyox khaw:, mai krax pa pluat ploi: kah an:, mai deeh ploi: lih hu: kah daux tiag daux tu, mawh pex pa hoik pon tix luat luan.
"Mai Arun tag viex moi mhaing: hoek son krax tan pa pluat ploi: phimap, mai yuh krax pa khyox khaw: son cao: tix, mai son kawn: nyiiex ma: nawh, mai nawh tag pah moi mhaing: an:, son krax tan pa pluat ploi: phimap, pa mawh son cie nawh.
Khaix an: nawh tag teei pan ngu, pa hoik naog gaox ngu khaing: plak khu: dee tan sivoe Simiang Siyiex mai ceu pa bhawng: nyawng sioe: bhawng: naog daux tawm: taix tix, mai viex laig plak daux man: tie.
Mai sau: nyawng bhawng: kah piang ngu sivoe Simiang Siyiex, sonsang kheem: taox nyawng bhawng: an: kah piang dangngeung krax caoxrhawm:, pa koe: kah plak piang teug pa kham: mhai: sakse, phan: ang mawh nan: lhat nawh yum: kah.
Nawh tag teei nham: moi mhaing: tiblah mai phruah kah piang dangngeung krax caoxrhawm: kah giien: taix tix, kah plak lih singaix, mai tag phruah nham: tiblah sivoe dangngeung krax caoxrhawm: kah giien: taix tix aliah bawg.
"Khaix an: nawh tag pah pex krax tan pa pluat ploi: phimap son pwi khawm: uik, mai viex nham: laig kah plak daux man: tie, mai nawh yuh nham: an: khankix awm: hoik yuh nawh kah nham: moi mhaing:, mai phruah kah piang dangngeung krax caoxrhawm: sivoe dangngeung krax caoxrhawm:.
Mawh kheu nan:, nawh tag yuh krax pa khyox khaw: mai krax pa pluat ploi:, son dee pa singax singeh, kheu jao ang ceu pwi Isarilax khankix singax, mai kheu krax phit krax lud kix, khawm: son phimap phigrham: kix khawm: uik. Nawh tag yuh krax pa khyox khaw: mai krax pa pluat ploi: son nyiiex gox bwan: man: bang: kum: pwi hun:, pa kawn koe: sinax kix kheu ang kix nyang singax.
Mawx tix tag ang yaox tix ot kah daux nyiiex gox bwan: man: bang: kum: pwi hun: yam laig yuh nawh krax khyox khaw: mai krax pluat ploi:, kah dee pa singax singeh, tom: hoek bawg yam lih nawh plak praix, nawh tag yuh krax pa khyox khaw: son tix, son kawn: nyiiex ma nawh mai son cup pwi hun: ceu pwi Isarilax khankix.
Mai nawh tag lih hu: kah khu: dee tan sivoe Simiang Siyiex mai yuh krax khyox khaw: son an:, nawh teei nham: moi mhaing: tiblah, mai nham: pex mhaing: tiblah mai kraix kah piang rung: khu: dee mai hawt vungviang tan:.
Mai phruah nham: tiblah kah piang khu: dee tan aliah bawg kah giien: taix tix, mai kieh mawh pa singax mai kieh ceu pwi Isarilax khankix singax khaing: pa ang singax.
"Yam hoik yuh Arun krax khyox khaw: mai krax pluat ploi: son dee pa singax singeh, son nyiiex gox bwan: man: bang: kum: pwi hun:, mai khu: dee tan nawh tag viex pex pa im: an: hoek;
Mai Arun tag deuh taix tix khawm: ra: khawn: kah piang pex kawn: im: an:, mai krai doh kah grawng: phimap ceu pwi Isarilax khankix, mai krax pa phit pa lud kix khawm: uik, pa dex pa dawd mai phimap kix khawm: uik, mai nawh tag plee ceu an: khankix kah piang kaing: pex, mai kieh pwi pa hoik laug kix viex pex an: hu: kah daux tiag, mai ploi: lih hu: dee singai.
Pex an: tag klawm: phimap kix khawm: uik, mai hu: plak ang pwi ot mai nawh tag ploi: pex an: kah daux tiag.
"Arun tag laig kah daux nyiiex gox bwan: man: bang: kum: pwi hun:, mai peeik sibex man: mhawm: pa ceep tix, yam laig nawh kah daux dee pa singax singeh mai prah an: tan:.
Mai nawh tag heem: tix kah rawm:, kah daux dee pa singax singeh, mai ceep kraung tix mai lih plak praix, mai tan krax tan pa gleeing son tix, mai krax tan pa gleeing son pwi hun: khankix. nawh yuh krax pa khyox khaw:, mai krax pa pluat ploi: son tix mai son pwi khankix.
Nawh tag gleeing khlawp bee son krax tan phimap kah piang khu: dee tan.
Mai pwi pa hu: ploi: kah pex pa pon krax pa luat luan an:, tag sidaux kraung ceep tix mai heem: tokaux tix kah daux rawm:, khaix an: nawh tag pon tix laig kah daux nyiiex bang:.
Nham: moi mhaing: mai nham: pex pa hoik viex kix laig plak daux dee pa singax singeh, sonsang yuh kix krax khyox khaw: mai krax pluat ploi:, nawh tag deeh viex an: kix lih hu: plak praix nyiiex bang:, mai tag gleeing hak, nex, mai roeng khankix kah daux ngu.
Pwi pa hu: gleeing kah ceu an: khankix, tag sidaux kraung ceep tix mai heem: tokaux tix kah daux rawm:, khaix an: nawh tag pon tix laig kah nyiiex bang:.
"In: mawh grawng: beenli son pex leeing ju, yam hoek kah daux khix aliah haok khix kao: ngaix, pex tag twah pa ih pa un:, viang mawh kawn: meung haktiex cao: pex ang ah, nyo sinie pa hoek tix peung sinax pex tivud ticu ang ah, kah daux singaix an: tag ang pon tix yuh kaing tix ceu kawx.
Grawhgrawng: nawh kah daux singaix an:, cao: giex kaing: li tag yuh krax khyox khaw: mai krax pluat ploi: son pex, sonsang singax pex mai sonsang singax pex khaing: phimap sivoe Simiang Siyiex.
An: mawh singaix twah singaix klaung:, sonsang laux lee: pex tix, mai twah pa ih pa un:, an: mawh grawng: beenli son pex leeing ju.
Mai cao: giex kaing: li pa hoik pon beeh glawm:, pa hoik appong: tokaux tix son kaing jhaw: cao: giex kaing: li pa hoik plud tang: keeing: nawh, nawh tag yuh krax khyox khaw: mai krax pluat ploi:, mai nawh tag ceep man: sibex mhawm: pa singax singeh.
Khaix an: nawh yuh krax khyox khaw: mai krax pluat ploi: son dee pa kied singax singeh, mai nawh tag yuh krax khyox khaw: mai krax pluat ploi: son nyiiex bwan: man: bang: kum: pwi hun: mai son khu: dee tan, nawh tag yuh krax khyox khaw: mai krax pluat ploi: son cao: giex kaing: li khankix, khawm: son cub pwi hun: khawm: uik.
In: tag mawh grawng: beenli kah son pex leeing ju, sonsang yuh pex krax khyox khaw: mai krax pluat ploi:, son ceu pwi Isarilax khankix, mai son phimap kix khawm: uik tix num tix bawg." Mai Mose hawt yuh awm: gumlox pa hoik tawm: Simiang Siyiex heue.
Grawng: Deeh Tan Nham: Khankix
Simiang Siyiex ah nin: kah Mose;
"Krai kah Arun mai kawn: simex nawh khankix, mai kah ceu pwi Isarilax khankix ah nin:, in: mawh gumlox pa hoik tawx Simiang Siyiex.
Phan: pwi Isarilax khankix tix kauxkaux pah moi, yung:, pex ang ah kah daux nyiiex bang:, phan: ang mawh nan:, kah praix nyiiex bang:;
mai phan: ang viex ceu an: hoek kah daux diang siviex nyiiex gox bwan: man: bang: kum: pwi hun:, sonsang tan kah Simiang Siyiex, sivoe nyiiex gox bwan: man: Simiang Siyiex, tag klup nham: phimap an: kah piang pwi an:, mawh kheu hoik kieh nawh nham: lih, kix tag tik nawh khaing: paox pwi ceu nawh;
ceu pwi Isarilax khankix, tag deeh viex krax pa appong: kix tix tan, daux tiag daux kaung, mai kix tag viex khankix hoek hawt diang siviex nyiiex gox bwan: man: bang: kum: pwi hun: kah cao: giex kaing: li mai tan lu an: khawm: uik son krax tan pa nhim: kah Simiang Siyiex.
Mai cao: giex kaing: li tag phruah nham: kah piang khu: dee tan Simiang Siyiex, hawt diang siviex nyiiex gox bwan: man: bang: kum: pwi hun:, mai gleeing khlawp bee son krax tan pa sioe: bhawng: kah Simiang Siyiex.
Kix tag ang lai baox yaox tix tan krax pa appong: kah phicaox phicaig, mai ang lai yaox tix phit vao mai paox tix, in: tag mawh grawng: beenli leeing ju son kix kah doeh simie ceucat kix.
"Mai maix tag ah nin: kah kix, can pwi pa kaoh khaing: nyiiex ma: ceu pwi Isarilax khankix ang ah, nyo sinie pa ot sinax pex ang ah, yam tan kix krax tan pa gleeing, mai krax tan pa appong:,
Mai ang viex ceu an: khankix hoek hawt diang siviex nyiiex gox bwan: man: bang: kum: pwi hun:, sonsang tan lu kah Simiang Siyiex, pwi tag tik nawh khaing: paox pwi ceu nawh.
"Mai can pwi daux nyiiex daux ma: ceu pwi Isarilax khankix ang ah, nyo sinie pa ot sinax pex ang ah, phan: nawh ih nham: Aux tag veeh pakngai: tix khaing: pwi an: pa ih nham: mai Aux tag tik nawh khaing: paox pwi ceu nawh.
Mawh kheu ju pa im: koe: kah daux nham:, mai Aux hoik tawx an: kah pex kah piang khu: dee tan, sonsang mawh pa yuh krax pa khyox khaw: mai krax pluat ploi: son ju pex, grawhgrawng: nawh an: mawh nham: pa yuh krax pa khyox khaw: mai krax pa pluat ploi: son ju.
Mawh kheu nan:, Aux hoik ah nin: kah ceu pwi Isarilax khankix, pwi mawx ang ah kah daux pex tag ang pon ih nham:, mai nyo sinie pa ot mai pex kawx tag ang pon tix ih nham:.
Ceu pwi Isarilax khankix ang ah, nyo sinie pa ot sinax pex ang ah, hu: leue totiag mai pon sim: ang ah sonsang ih an:, nawh tag teei tix tik nham: mai kheem: kah phawng: tiex.
"Grawhgrawng: nawh, nham: mawh ju son tokaux khawm: uik, kheu mawh nham: pa priex jhung: ju nawh, mawh kheu nan:, Aux ah nin: kah ceu pwi Isarilax khankix, pex tag ang pon tix ih nham: pa kaoh khaing: tokaux tix ceu kawx, mawh kheu ju pa im: tokaux khawm: uik, koe: kah daux nham:, can pwi pa ih kah nham: tag mawh pa teei tix tik.
Mai pwi kukaux pa ih kah nex to: pa tang: yum: ang ah, nex pa hoik kiied totiag ang ah, viang nawh mawh pwi pa keh daux haktiex cao: pex ang ah, nyo sinie ang ah, nawh tag yaox tix sidaux kraung ceep tix mai heem: tix kah daux rawm:, mai nawh tag mawh pa ang singax tom: hoek plakbo, Khaix an: nawh tag mawh pa singax.
Viang mawh nan:, phan: nawh ang sidaux, ang heem: tix kah rawm:, nawh tag kham: geu: kah phimap tix heue.
Gumlox Beenli Ang Cu Phit Vao Kah Paox Tix
Simiang Siyiex ah nin: kah Mose,
"Krai kah ceu pwi Isarilax khankix ah nin:, Aux mawh Simiang Siyiex, pa mawh Siyiex pex.
Pex tag ang pon tix yuh awm: jhawm: pa hoik yuh pex kah daux meung Ejiptux, kah dee hoik ot pex, mai pex tag ang pon tix yuh jhawm: pa hoik yuh pex, kah daux meung Khanan dee viex Aux pex hoek, pex tag ang pon tix hawt been cie kix.
Pex tag hawt lox tat jhawm: prawng Aux, mai hawt grawng: lawng khaix beenli krax ot krax koe: Aux, mai hu: kah daux beenli an: khankix. Aux mawh Simiang Siyiex, pa mawh Siyiex pex.
Mawh kheu nan: pex tag priex tix hawt gumlox beenli Aux, mai lox tat jhawm: prawng Aux, phan: pwi tix kauxkaux hawt tix yuh awm: an:, nawh tag im: ju kah, Aux mawh Simiang Siyiex.
"Pex tag ang pon tix dex dawd mai paox ceu paox cat tix tix kaux kawx, son ang pex pon plih tokaux kakaong: nawh, Aux mawh Simiang Siyiex.
Maix tag ang pon tix yuh krax kaig krax tua kah keeing: tix, mai krax kaig krax tua kah miex tix, maix tag ang pon tix plih tokaux kakaong: krax pa kaig pa tua kah miex tix mai phit vao kah nawh; kheu mawh nawh miex maix.
Maix tag ang pon tix plih tokaux kakaong miex seeb tix, mai phit vao kah nawh, an: mawh krax pa kaig pa tua keeing: maix.
Krax pa kaig pa tua pux bun: maix mai puxke: bun: maix pa mawh kawn: bun: keeing: maix ang ah, kawn: bun: miex maix ang ah, viang kix mawh pa keh kah daux nyiiex ang ah, dee mawx ang ah, maix tag ang pon plih tokaux kakaong: pa kaig pa tua kix.
Krax pa kaig pa tua kawn: saux bun: maix, plak kawn: simex ang ah, kawn: saux bun: plak kawn: bun: ang ah, mai tag ang pon tix plih tokaux kakaong: pa kaig pa tua kix, mawh kheu cie kix mawh krax pa kaig pa tua son maix.
kawn: bun: pa hoik pon keeing: maix khaing: moeng tix, hoik mawh nan: maix, maix tag ang pon tix plih tokaux kakaong: krax pa kaig pa tua nawh.
Maix tag ang pon tix plih tokaux kakaong: pa kaig pa tua nan: keeing: maix, nawh mawh pa dex pa dawd mai ceucat nex nham: keeing: maix.
Maix tag ang pon tix plih tokaux kakaong: pa kaig pa tua puxke: bun: miex tix, mawh kheu bun: an: mawh pa dex pa dawd ceucat nex nham: miex maix.
Maix tag ang pon tix kieh keeing: ting tix, koe: krax kaig krax tua, mai ang pon tix dex dawd mai moeng nawh, kheu mawh nawh miex ting maix.
Maix tag ang pon tix plih tokaux kakaong: pa kaig pa tua mun tix, nawh mawh moeng kawn: simex maix, maix tag ang pon tix plih tokaux kakaong: pa kaig pa tua nawh.
Maix tag ang pon tix plih tokaux kakaong: pa kaig pa tua moeng puxke: tix, mai moeng pux tix, an: mawh krax pa kaig pa tua puxke: maix khawm: pux maix.
Maix tag ang pon tix plih tokaux kakaong: pa kaig pa tua bun: tix kaux mai kawn: bun: nawh, maix tag ang pon tix teei kawn: saux bun: pa keh khaing: kawn: simex nawh ang ah, kawn: saux bun: puxke: khaing: kawn: bun: nawh ang ah, son pa sang plih tokaux kakaong: pa kaig pa tua nawh, kix mawh pa dex pa dawd mai ceucat nex nham: nawh, in: mawh pa seeing: pa brai:.
Maix tag ang pon tix plih tokaux kakaong: kah pux o: moeng maix, mai ang pon teei tix moeng kah kiex yam kawn: im: ju moeng maix.
"Maix tag ang pon tix dex dawd tau mai bun:, sonsang plih tokaux kakaong: mai krax pa kaig pa tua kiex, yam kawn: lih nhammee: kiex.
Maix tag ang pon tix it tau mai moeng paoxplawg paoxnyhawm: tix, sonsang yuh maix tokaux tix seeing: brai:.
Maix tag ang pon tix kieh doeh simie ceucat tix tix kaux kawx, hu: krub siyiex Mulawk kah ngu, maix tag ang pon tix kieh ceukaux Siyiex maix, mawh pa seeing: pa brai:, Aux mawh Simiang Siyiex.
Maix tag ang pon tix it tau mai paox simex tix, mai phit lud kah nawh, awm: phit vao maix kah bun:, an: mawh pa seeing: pa brai:.
Maix tag ang pon tix phit vao kah tosat, sonsang kieh maix tokaux tix seeing: brai:, bun: kawx tag ang pon tix cung sivoe tosat sonsang phit vao tau, in: mawh krax pa lud pa loe: tete.
"Paw doh kieh tokaux cao: pex seeing: brai: tau mai ceu in: khankix. Grawhgrawng: nawh kheu jao inkix khawm: uik, ceu pwi pa hoik grheu: Aux kix lih hu: khaing: plak sivoe ngai: pex khankix, hoik seeing: brai: kah ceu in:.
Meung haktiex kix hoik seeing: brai:, mawh kheu nan:, Aux tag hoek mai ciyang kah phimap kix, mai haktiex tag hao: tix tik kawnpraix pa ot baoh an: khankix.
Mawh kheu nan:, pex tag hawt gumlox beenli Aux, mai lox tat jhawm: prawng Aux, mai pex tag ang pon tix phit lud kah pa seeing: brai: in: khankix tix ceu kawx, mai pwi ceu pex tix kauxkaux ang ah, nyo sinie pa ot sinax pex ang ah, tag ang pon tix phit lud kah an: khankix.
(Grawhgrawng: nawh can pwi pa hoik ot sivoe pex kah daux haktiex an:, hoik yuh pa seeing: pa brai: inkix khawm: uik, mawh kheu nan: haktiex hoik seeing: hoik brai: kah.)
Aux lhat haktiex deeh hao: tix tik pex, yam yuh pex krax pa seeing: pa brai:, awm: hao: haktiex tix tik ceu pwi pa hoik ot sivoe pex khankix.
Pwi pa phit lud kah pa seeing: pa brai: in: khankix, mai pwi pa phit lud kah ceu an: tag mawh pa teei tix tik nawh khaing: daux sinax pwi ceu nawh.
Mawh kheu nan:, pex tag priex tix hawt beenli Aux, son ang pex phit lud kah pa seeing: pa brai: in: khankix, pa hoik phit lud kix sivoe pex, mai paw doh kieh tokaux pex seeing: brai: kah ceu an:, Aux mawh Simiang Siyiex pex heue.
Gumlox Beenli Pa Singax Mai Pa Rah Pa See
Simiang Siyiex ah nin: kah Mose;
"Krai kah cub pwi hun: ceu pwi Isarilax khankix ah nin:, pex tag mawh pa singax singeh, kheu mawh Aux Simiang Siyiex pex pa singax singeh.
Pex kukaux tag yungyi: kah miex keeing: tix, mai priex tix hawt singaix twah singaix klaung: Aux, Aux mawh Simiang Siyiex pex.
Paw doh veeh tix krub rieng rao, mai paw raug tix yuh rieng rao siyiex khankix son tokaux pex awawx. Aux mawh Simiang Siyiex, pa mawh Siyiex pex.
Phan: pex tan krax pa appong: son krax tan pa nhim: kah Simiang Siyiex, pex tag tan an: khankix, sonsang mawh pa pon rieb tix teei.
An: tag mawh pa ih kah daux singaix tan pex mai singaix khaix, mai phan: ankix kawn: deuk tom: hoek loe: singaix, tag gleeing tix tik kah daux ngu.
Mai phan: pex ih an: khawm: uik, yam hoek daux loe: singaix, an: mawh pa seeing: pa brai:, tag mawh pa ang pon tix rieb kah.
Pwi pa ih an: khankix tag yaox tix kham: geu: phimap tix, mawh kheu hoik yuh nawh krax pa seeing: brai:, kah krax tan pa singax singeh cie Simiang Syiex, mai tag tik pwi an: khaing: pwi ceu nawh.
"Yam vawg pex nghox daux kaung: tix, pex tag ang pon tix vawg pa koe: daox kaung: khawm: uik, pex tag ang pon tix khrawm: nghox pa cod pa kawn deuk khaix tix khankix.
Mai maix ang pon tix kloi: pieh plix siiet tix khawm: uik khaing: daux sipeem plix siiet, maix ang pon tix khrawm: plix siiet, pa cod pa rau khaing: sipeem plix siiet tix, maix tag prah son pwi hot pwi shia: mai nyo sinie, Aux mawh Simiang Siyiex pa mawh Siyiex pex.
"Maix ang pon tix briex lak, ang pon tix sikah lox pa ang mawh ang meh mai ang pon tix pie lhen: kah paox tix tix kaux hoik tix kaux.
Mai maix ang pon tix tiextu pa ang mawh ang meh kah daux ceukaux Aux, maix tag ang pon tix yuh ceukaux Siyiex maix mawh pa seeing:, Aux mawh Simiang Siyiex.
"Maix ang pon tix kheem: gut kah paoxplawg paoxnyhawm: tix, mai ang pon tix tud rhim: kah kraungkhrai: nawh, mau ngawh riang cang:, pwi pa vai maix nawh yuh kaing khankix, tag ang pon tix koe: kah maix leeing: sawm: tom: hoek plak ponngawb.
Maix ang pon tix jhax lawg kah pwi pa lheet, mai ang pon tix deuh ceu pa si deeing caong sivoe pwi pa dug ngai:, maix tag koe: krax lhat krax graung kah Siyiex maix, Aux mawh Simiang Siyiex.
"Pex ang pon tix yuh pa ang rah ang see, kah daux krax pa prawng see:, maix ang pon tix nu nai: pwi pa hot pa shia:, awm: an: maix ang pon tix jhak kah pakngai: pwi ting pwi lhaong:, mai tag prawng see: kah paoxplawg paoxnyhawm: tix, kah daux pa rauh pa see.
Maix ang pon tix hu: lailing salao tix krai grawhgrawng: pwi, daux sinax pwi ceu maix, maix ang pon keud tix yuh pa koeng riang ciang khoi:, mai kieh paoxplawg paoxnyhawm: tix yum: kah, Aux mawh Simiang Siyiex.
"Maix ang pon tix koeng kah puxaik tix daux rhawm: tix, maix tag sidiex gau kah paoxplawg paoxnyhawm: tix, mai son ang maix kham: geu: phimap kheu jao nawh.
Maix ang pon tix pawk bix, mai ang pon tix koeng riang ciang khoi: kah kawnpraix pwi ceu maix khankix, maix tag moh kah paoxplawg paoxnyhawm: tix, awm: moh maix tokaux tix, Aux mawh Simiang Siyiex.
"Maix tag priex tix hawt gumlox beenli Aux, maix ang pon tix kieh khawng: brie pa eei: tix lih tix koe: kawn: tau mai pa ang mawh paox ceu nawh, maix ang pon tix ruat simie pa hoik khon: tix tau kah daux kaung: maix, maix ang pon tix ceep kraung pa khao: tix kah keei: mai hauk yung:.
"Phan: pwi it phit vao mai bun: siliex pa hoik chawk pwi, mai pa ang nyang pon tix deeh taoh deeh ploi: kah nawh, son grawng: ceu inkix kiex khawm: ra: tag pon pa ciyang, viang mawh nan:, tag ang pon tix pah kiex yum: kheu jao mawh bun: siliex pa ang nyang pon krax pa luat luan.
Mai simex an: tag yaox tix viex kawn: yung: mhaing: tix mu: son krax tan pa pluat ploi: pa phit lud hoek kah Simiang Siyiex hawt diang siviex nyiiex gox bwan: man: bang: kum: pwi hun:.
Cao: giex kaing: li tag yuh krax pa khyox khaw: mai krax pa pluat ploi: son nawh mai kawn: yung: mhaing: krax tan pa pluat ploi: pa phit lud sivoe Simiang Siyiex, son phimap pa hoik yuh nawh, mai phimap pa hoik yuh nawh tag pon krax pa pluat ploi: son nawh.
"Yam hoek pex kah daux Khanan, mai yam hoik sum: pex khaox plix pa ih kuceu khawm: uik, khaix an: pex tag deuh tix tawng khaox plix cie pex, mai deuh awm: khaox pa ang nyang pat hak, kah daux loe: num plix khaox an: tag awm: pa ang pat hak tix kah son pex, an: tag mawh pa ang pex pon tix ih kah.
Mai yam hoek kah daux num pon:, plix khaox an: khawm: uik tag mawh pa singax singeh, mai son pa yaogyaw kah bwanson: Simiang Siyiex.
Mai yam hoek kah daux num phwan:, pex tag pon tix ih plix nawh, phan: pex yuh nan: khaox an: tag deeh nie plix son pex, Aux mawh Simiang Siyiex pa mawh Siyiex pex.
"Pex ang pon tix ih ceu pa koe: tau mai nham:, pex ang pon tix gau tix kah ceu pa ang mawh ang meh, pex ang pon tix tawx sibawk chawk jhai:.
Pex ang pon tix khlao: hauk kaing: tix vungviang kaing: tix, pex ang pon tix khlao: kah hauk bheup tix.
Pex ang pon tix pat kah nex hak tix son pwi pa yum:, pex ang pon tix breeh nam meug kah piang tix. Aux mawh Simiang Siyiex.
"Paw kieh kawn: bun: maix laux jhawm:, sonsang lih nawh tix mawh bun: coh kaux, phan: yuh nan: pwi haktiex khawm: uik tag lih tix mawh pa phit pa vao, mai pa caox pa caig khankix tag lih naog kah piang haktiex.
Pex tag priex singaix twah Aux, mai yungyi kah dee pa singax singeh Aux, Aux mawh Simiang Siyiex.
"Paw hu: sawg kah pwi chix yuh phi: mai pwi chix yuh simeed pa dex mai phicaox, mai paw doh kieh tokaux tix seeing: brai: kah ceu an:, Aux mawh Simiang Siyiex pa mawh Siyiex pex.
"Maix tag kaoh cung sivoe ngai: pwi kuad paing hauk kaing:, mai yungyi: kah kuad riex ju, mai koe: krax lhat krax graung kah Siyiex maix, Aux mawh Simiang Siyiex.
"Phan: nyo sinie hoek tix peung mai pex kah daux haktiex pex, pex ang nieb pon tix yuh krax pa ang khaw: ang jiet kah nawh.
Mai nyo sinie pa ot sinax pex, tag kieh nawh awm: pwi pa keh daux sinax pex, pex tag moh nawh awm: moh pex kah tokaux tix, grawhgrawng: nawh, pex hoik sax mawh nyo sinie kah daux meung Ejiptux, Aux mawh Simiang Siyiex pa mawh Siyiex pex.
"Pex tag ang pon tix yuh pa ang rah ang see kah daux krax prawng krax ca:, kah pa tiag pex plak lang:, kah pa ciang pex ngai: jiang mai kah pa tong: pex kah kraung tong: pa koe: pex khankix kawx, mawh awm: an:.
"Pex tag koe: jiang yoi pa rauh pa see, kla: jiang pa rauh pa see, phliex tong: pa rauh pa see, mai jiang pa rauh pa see, Aux mawh Simiang Siyiex pa mawh Siyiex pex, pa hoik viex pex lih khaing: meung Ejiptux.
Mawh kheu nan:, pex tag priex tix hawt gumlox beenli Aux khawm: uik, mai lox tat jhawm: prawng Aux khawm: uik, Aux mawh Simiang Siyiex heue."
Grawng: Ci Yang Kah Pwi Ang Nghiiet Lox Beenli
Simiang Siyiex ah nin: kah Mose,
"Krai ah nin: kah ceu pwi Isarilax khankix, can ceu pwi Isarilax ang ah, nyo sinie pa hoek ot sinax ceu pwi Isarilax ang ah, kaw pa hu: tawx doeh simie ceucat tix kah siyiex Molawk ang ah, nawh tag pon krax yum: tete, pwi haktiex khankix tag dheem: nawh kah simaox.
Aux tag veeh pakngai: tix khaing: nawh, mai teei tix tik nawh khaing: daux ceu pwi nawh, kheu hoik tawx nawh doeh simie ceucat tix tiblah kah siyiex Molawk sonsang yuh nawh dee pa singax singeh Aux seeing: brai: mai kieh ceukaux pa singax singeh Aux, mawh pa nu nai: giex going.
Mai phan: pwi haktiex khankix mox ngai: tix kah pwi pa hu: tawx doeh simie ceucat tix kah siyiex Molawk mai phan: kix ang pah kah nawh.
Aux tag veeh pakngai: tix khaing: pwi an:, mai kawn: nyiiex ma: nawh, mai Aux tag teei tix tik nawh khaing: daux ceu pwi nawh, khawm: can pwi pa yuh pa phit pa vao, tau mai siyiex Molawk.
"Mai kaw pa hu: sawg hu: peung kah pwi pa chix yuh phi:, mai pa chix yuh simeed pa dex mai phicaox, Aux tag veeh pakngai: tix khaing: kaw an:, mai teei tix tik nawh khaing: ceu pwi nawh.
Mawh kheu nan:, kieh tokaux pex singax mai mawh pa singax singeh, grawhgrawng: nawh Aux mawh Simiang Siyiex pa mawh Siyiex pex.
Mai pex tag priex tix hawt gumlox beenli Aux, mai hawt tix yuh, Aux mawh Simiang Siyiex pex, pa kieh pex singax singeh.
Can pwi pa jhax lawg kah keeing: tix ang ah, miex tix ang ah, tag kieh nawh yum: tete, mawh kheu jhax lawg nawh kah miex keeing: tix, nham: phimap nawh tag hoek kah piang nawh.
"Pwi pa phit vao kah moeng pwi tang: kaux, mai pwi pa phit vao mai moeng paoxplawg paoxnyhawm: tix, tag yum: tete, khawm: simex pa phit mai bun: pa koe: krax phit an:.
Pwi mawx it tau mai moeng keeing: tix, mawh pwi plih tokaux kakaong: pa kaig pa tua keeing: tix, kiex khawm: ra: tag yum: tete, nham: phimap kiex tag hoek kah piang kiex.
Phan: pwi tix kaux it mai mun tix, kiex khawm: ra: tag yum: kah tete, mawh kheu jao hoik phit hoik lud kiex khawm: ra: kah daux pa seeing: brai:, nham: phimap kiex tag hoek kah piang kiex.
Phan: simex it mai paox simex tix, awm: it mai bun: kiex khawm: ra: hoik yuh ceu pa seeing: brai:, kiex tag yum: khawm: ra: nham: phimap kiex tag hoek kah piang kiex.
Phan: simex tix kaux teei tix moeng bun: miex khawm: kawn:, an: mawh pa caox pa caig, tag gleeing tix tik kix khawm: loe: kah ngu, son ang pa caox pa caig lai koe: kah daux sinax pex.
Phan: simex tix kaux phit vao kah tosat, nawh tag yum: tete, mai pex tag pah tosat an:.
Phan: bun: tix kaux dex dawd mai tosat ceu patix ang ah, mai phit vao mai tosat an:, maix tag pah bun: khawm: tosat an:, kiex tag yum: tete, nham: phimap kiex tag hoek kah piang kiex.
"Phan: simex tix kaux teei tix moeng nan: tix, pa mawh kawn: bun: keeing: nawh ang ah, kawn: bun: miex nawh ang ah, mai plih tokaux kakaong: krax pa kaig pa tua nawh, mai phan: bun: an: yaox kah krax kaig pa tua simex, an: mawh ceu pa kaig pa tua, mai tag teei tix tik kiex khaing: sivoe ngai: ceu pwi kix, kheu hoik pon nawh tix plih tokaux kakaong: pa kaig pa tua nawh, kiex tag kham: geu: phimap tix.
Phan: simex tix kaux hu: it mai bun: yam kawn: koe: nhammee: nawh, mai plih tokaux kakaong: krax kaig krax tua nawh, mai phan: nawh hoik yaox krax lih nham: nawh, mai phan: bun: an: ang kheem: kah nham: tix, kiex khawm: ra: tag mawh pa teei tix tik khaing: ceu pwi kix.
Pex tag ang pon tix plih tokaux kakaong: pa kaig pa tua pux o: miex tix, mai nan: keeing: tix, grawng: grawng: nawh an: mawh pa plih tokaux kakaong: mai paox nyiiex paox ma: tix, kiex tag yaox tix kham: geu: phimap tix.
Phan: simex tix kaux it tau mai moeng keeing: iak tix, nawh hoik mawh pa plih tokaux kakaong: pa kaig pa tua keeing: iak tix, kiex tag kham: geu: phimap tix mai kiex tag mawh pa ang lai chix koe: kawn:.
Phan: simex tix kaux teei tix moeng puxaik tix, an: mawh pa seeing: brai:, nawh hoik plih tokaux kakaong: pa kaig pa tua puxaik tix, kiex tag mawh pa ang lai chix koe: kawn:.
"Mawh kheu nan:, pex tag hawt gumlox beenli Aux, mai lox tat jhawm: prawng Aux khankix, mai hawt tix yuh an: kix son ang haktiex dee pa sang viex Aux pex ot, hao: tix tik pex.
Mai pex tag ang pon tix hawt grawng: lawng khaix grawng: beenli pwi an: khankix, pa sang grheu: Aux tix tik sivoe pex, grawng: grawng: nawh kix hoik phit lud kah grawng: ceu inkix khawm: uik, mawh kheu nan:, Aux koeng kah kix.
Viang mawh nan:, Aux hoik ah nin: kah pex, pex tag pon tix cie haktiex kix, mai Aux tag sang tawx mawh sinngao sonsang pon pex tix cie haktiex dee lih rawm:teeih, mai rawm: hia:, Aux mawh Simiang Siyiex pa mawh Siyiex pex, pa hoik tang: gwieh pex khaing: pwi tang: ceu tang: cat khankix.
Mawh kheu nan:, pex tag tang: gwieh tosat pa singax, mai tosat pa ang singax sidawng: daux sinax pex, pex tag ang pon tix kieh tokaux tix seeing: brai:, kah tosat khankix, mai sim: sai:, mai can ceu pa im: ju kuceu, pa chix mo chix hu: piang tiex, mai pa hoik tang: gwieh Aux tix deuh khaing: pex, awm: ceu pa ang singax khankix.
Mai pex tag mawh pa singax singeh kah son Aux, mawh kheu Aux mawh Simiang Siyiex pa singax singeh, mai Aux hoik tang: gwieh pex khaing: pwi tang: ceu tang: cat, sonsang mawh pex cie Aux.
"Simex ang ah, bun: ang ah, pa mawh pwi pa yuh phi: pwi pa chix simeed khankix tag yum: tete, pwi tag dheem: kix yum: kah simaox, nham: phimap kix tag hoek kah piang kix heue."
Gumlox Beenli Sonsang Singax Cao: Giex Kaing: li
Simiang Siyiex ah nin: kah Mose; "Krai kah cao: giex kaing: li pa mawh kawn: simex Arun ah nin:, cao: giex kaing: li tag ang pon tix kieh tokaux tix seeing: brai:, kah tokaux pwi yum: daux sinax pwi ceu tix;
Lheu: khaing: paox nyiiex paox ma: pa dex pa dawd mai nawh khankix, pa mawh miex keeing: khawm: kawn: simex kawn: bun:, mai puxaik nawh ang ah;
Mai pux o: bunkrih pa ang nyang koe: mex, nawh tag pon tix kieh tokaux tix seeing: brai: kah.
Nawh tag ang pon kieh tokaux tix seeing: brai:, kah an: khankix, kheu mawh nawh cao: kaing: pa ting tix kaux daux sinax ceu pwi nawh khankix.
Kix tag ang pon tix khlao: hauk kaing: tix pak, kix tag ang pon tix khlao: hauk bheup tix, mai ang pon tix pat tokaux tix kah vaig kah gawn:.
Kix tag mawh pa singax singeh son Siyiex kix, mai ang pon tix kieh ceukaux Siyiex tix nu nai: giex going, grawhgrawng: nawh kix mawh pwi pa tan krax tan pa yuh tix kah ngu son Simiang Siyiex, mai pa tan khaomun kah Siyiex, mawh kheu nan:, kix tag mawh pa singax singeh.
Kix tag ang pon tix teei bun: coh kaux tix, bun: pa hoik seeing: hoik brai:, mai bun: pa hoik tik mex tix mawh moeng tix, grawhgrawng: nawh cao: giex kaing: li mawh pa singax singeh son Siyiex.
Mawh kheu nan:, pex tag yuh nawh mawh pa singax singeh, kheu mawh pa tan pa lu tix tawx khaomun kah Siyiex pex, nawh tag mawh pa singax singeh kah son pex, kheu mawh Aux Simiang Siyiex pa singax singeh mai pa kieh pex singax singeh.
Phan: kawn: bun: cao: giex kaing: li yuh bun: coh kaux mai kieh tokaux tix seeing: brai:, nawh mawh pa kieh keeing: tix seeing: brai:, tag gleeing tix tik nawh kah ngu.
Nawh mawh cao: giex kaing: li, pa ting pa lhaong: kah sinax puxaik tix, pa hoik groi kix bee kah piang kaing:, mai mawh pwi pa appong: tix ceep kraung pa singax singeh, nawh tag ang pon tix bhang: kaing: tix mai riah tix tik kraung ceep tix khankix.
Nawh tag ang pon tix hu: dex tokaux yum: tix ceu kawx, mai nawh ang pon tix kieh tokaux tix seeing: brai: son miex keeing: tix.
Nawh tag ang pon tix hu: plak praix khaing: dee pa singax singeh mai ang pon tix nu nai: kah dee pa singax singeh Siyiex tix, grawhgrawng: nawh bee groi pa appong: Siyiex, koe: kah piang kaing: nawh, Aux mawh Simiang Siyiex.
Mai nawh tag teei tix moeng kah bunkrih.
Miexmai: ang ah, bun: hoik tik mex ang ah, bun: coh kaux pa hoik seeing: brai: ang ah, ceu bun: inkix nawh tag ang pon tix teei mawh moeng tix, mai nawh tag pon tix teei bunkrih mawh moeng tix tikaux khaing: daux ceu pwi tix.
Nawh tag ang pon tix ah pa ang khaw: ang jiet kah kawnpraix tix kah sinax pwi ceu tix, grawhgrawng: nawh Aux mawh Simiang Siyiex pa kieh nawh singax singeh.
Simiang Siyiex krai kah Mose ah nin:.
"Krai kah Arun ah nin:, kah daux doeh simie ceucat maix ku ju, pa koe: dee mat dee ne, tag ang pon tix hoek dex, sonsang tan nawh kah khaomun Siyiex nawh.
Grawhgrawng: nawh can pwi pa hoik koe: dee mat dee ne, pwi pa dug ngai: ang ah, pwi pa laux caong ang ah, pwi laux meeh ang ah, pwi kak giien: taix giien: caong ang ah;
mai pwi pot taix pot caong ang ah,
pwi kawk nyoi ang ah, pwi kalu: ang ah, pwi pa koe: jhawm: saux ngai: ang ah, pwi pa saux ngoi: saux dao: ang ah, pwi pa laux kla: ang ah, nawh tag ang pon tix hoek dee dex.
Pwi daux doeh simie ceucat cao: giex kaing: li Arun, pa koe: dee mat dee ne, tag ang pon tix hoek dex sonsang tan krax tan pa gleeing kah ngu son Simiang Siyiex, mawh kheu hoik koe: krax phit krax lud nawh, nawh tag ang pon tix hoek dex sonsang tan nawh khaomun Siyiex.
Nawh tag pon tix ih khaomun Siyiex, pa singax singeh khawm: pa kied singax singeh.
Nawh tag ang pon tix hu: dex man: tie mai ang pon tix hoek dex kah khu: dee tan, mawh kheu hoik koe: dee mat dee ne nawh, Aux lhat nawh yuh pa nu nai: kah dee pa singax singeh Aux, mawh kheu Aux mawh Simiang Siyiex pa kieh kix singax singeh.
Mose krai inkix kah Arun khawm: kawn: simex nawh khankix, mai kah ceu pwi Isarilax khankix heue.
Simiang Siyiex ah nin: kah Mose;
Krai kah Arun mai kawn: simex nawh khankix, sonsang chix tang: gwieh kix tokaux tix khaing: ceu pa singax singeh ceu pwi Isarilax khankix mai son ang kix pon nu nai: kah min: ceukaux Aux, kah daux ceu an: kix, son pa yuh kix mawh pa singax singeh son Aux, Aux mawh Simiang Siyiex.
Krai kah kix ah nin:, kah daux doeh simie ceucat pex khankix ku ju, can pwi pa hu: dex ceu pa hoik gwieh ceu pwi Isarilax mawh pa singax singeh son Simiang Siyiex, mai yam koe: pa ang singax kah piang nawh, tag teei tix tik pwi an: khaing: sivoe ngai: Aux, Aux mawh Simiang Siyiex.
Pwi pa koe: jhawm: saux sipawg ang ah, jhawm: saux lih rawm: seeing: ang ah, doeh simie ceucat Arun; tag ang pon tix ih krax tan pa singax singeh, tom: ang nawh nyang pon ti singax, mai can pwi pa hu: krox hu: teeh kah tokaux yum: pa ang singax ang ah, mai pwi pa hoik lih rawmngang ang ah,
pa hu: krox hu: teeh kah tosat pa chix mo chix hu: pa sang kieh nawh mawh pa ang singax ang ah, mai hu: krox hu: teeh pwi pa sang kieh nawh ang singax ang ah, ceu pa ang nawh singax koe: yuh kah mawx kawx,
Pwi pa hu: krox hu: teeh kah ceu ankix, tag mawh pa ang singax tom: hoek plakbo, nawh tag ang pon tix ih krax tan pa singax singeh khankix, tom: ang nawh nyang bax heem: tix kah rawm:.
Mai nawh tag mawh pa singax yam hoik klip singaix, khaix an: nawh tag pon tix ih krax tan pa singax singeh, grawhgrawng: nawh an: mawh pa ih pa un: nawh.
Nawh tag ang pon tix ih nex pa tang: yum:, nex pa hoik kiied totiag khankix, sonsang kieh nawh tokaux tix seeing: brai: kah an: khankix. Aux mawh Simiang Siyiex.
Mawh kheu nan: kix tag priex tix hawt gumlox beenli Aux, phan: ang mawh nan:, kix tag yaox tix kham: geu: phimap tix mai yum:, Aux mawh Simiang Siyiex pa kieh pex singax singeh.
Pwi tang: ceu tang: cat tag ang pon tix ih krax tan pa singax singeh, pwi pa hoek tix peung tivud ticu tau mai cao: giex kaing: li ang ah, siliex pa cang: ang ah, tag ang pon tix ih ceu pa singax singeh.
Viang mawh nan:, phan: cao: giex kaing: li liag pwi kah mau, nawh tag pon tix ih an:, mai pwi pa keh kung kah daux nyiiex daux ma: nawh, tag pon tix ih pa ih pa un: nawh.
Phan: kawn: bun: cao: giex kaing: li mex kah pwi tang: ceu tang: cat, kawn: bun: an: tag ang pon tix ih kah krax tan pa singax singeh.
Viang mawh nan:, phan: kawn: bun: cao: giex kaing: li an: mawh miexmai: ang ah, bun: pa hoik tik mex ang ah, mai phan: nawh ang nyang koe: kawn:, mai phan: nawh deeh ing: kah nyiiex keeing: tix, awm: yam mawh nawh kawn: nyawm, bun: an: tag pon tix ih pa ih pa un: keeing: nawh, viang mawh nan:, pwi tang: ceu tang: cat tag ang pon tix ih.
phan: pwi kox ih krax tan pa singax singeh mai ang tix tawng, khaix an: nawh tag deeh plud tix tan krax tan pa singax singeh kah cao: giex kaing: li phwan: son tix son kah piang an:.
Cao: giex kaing: li tag ang pon tix nu nai:, kah krax tan pa singax singeh ceu pwi Isarilax khankix, pa tan kix tix tawx kah Simiang Siyiex;
mai tag ang kieh kix kham: geu: kah phimap pa hoik phit hoik lud kix, kheu hoik pon kix tix ih kah krax tan pa singax singeh khankix, grawhgrawng: nawh Aux mawh Simiang Siyiex pa kieh kix singax singeh heue.
Krax Tan Pa Khaw: Tix Rieb Mai Pa Ang Khaw: Tix Rieb
Simiang Siyiex ah nin: kah Mose;
"Krai kah Arun mai kawn: simex nawh khankix, mai kah ceu pwi Isarilax khawm: uik ah nin:, can pwi pa kaoh khaing: daux nyiiex ma: ceu pwi Isarilax khankix ang ah, nyo sinie pa ot tau mai kix ang ah, pa tan krax pa appong: son pa tiextu ang ah, son pa tan nawh khawm: rhawm: tix, mai pa tan kix kah Simiang Siyiex pa mawh krax tan pa gleeing.
Nawh tag tan tix tawx pa mawh moi mhaing:, yung: mhaing: ang ah, pex mhaing: ang ah pa ang koe: dee mat dee ne, tag mawh pa pon tix rieb.
Viang mawh nan:, can pa hoik koe: dee mat dee ne, maix tag ang pon tix tan, grawhgrawng: nawh tag ang pon tix rieb tang: maix.
Can pwi pa tan krax pa appong: son krax tan pa nhim: kah Simiang Siyiex, sonsang grum naog lox pa tiextu nawh, krax tan pa koe: rhawm: nawh khaing: khawng: brie pa eei: nawh, moi ang ah, yung: ang ah, an: tag mawh pa grum naog, sonsang mawh pa pon tix rieb, An: khankix tag kieh nawh mawh pa ang koe: dee mat dee ne.
Pa dug ngai: ang ah, pa pot si-ang: ang ah, pa laux maung ang ah, pa uah ang ah, pa ngoi: mai pa dao: ang ah, tag ang pon tix tan kah Simiang Siyiex, tag ang pon tix yuh krax tan pa gleeing piang khu: krub dee tan, son Simiang Siyiex.
Maix tag pon tix tan moi mhaing: ang ah, kawn: yung: iak ang ah, pa hoik nie lheu: pakpeung: tokaux, mai pa cud pa cha: pakpeung: tokaux khankix, son krax tan pa koe: rhawm: koe: rhi: tix, viang mawh nan: phan: an: mawh son krax pa tiextu, an: tag mawh pa ang pon tix rieb.
Maix tag ang pon tix tan pa hoik laux kla:, pa hoik phawng:, pa hoik pliag, mai pa hoik sieh tix khankix kah Simiang Siyiex. Maix tag ang pon tix yuh krax tan ceu an: khankix kah daux haktiex pex.
Maix tag ang pon rieb tix tan ceu in: khankix tix ceu kawx, khaing: daux tawm: taix pwi tang: ceu tang: cat, awm: pa mawh khaomun pa khan: maix son Siyiex tix, mawh kheu koe: krax pa laux pa leeing: mai koe: dee mat dee ne, an: khankix tag mawh pa ang pon tix rieb son maix.
Simiang Siyiex ah nin: kah Mose,
yam keh kawn: moi tix mu: ang ah, kawn: yung: tix mu: ang ah, mai kawn: pex tix mu: ang ah, tag yaox tix ot tau mai miex tix aliah singaix, jah khaix daix singaix hu: sivoe ngai:, an: tag rieb tix teei son krax tan pa gleeing, son Simiang Siyiex.
Viang mawh moi shiang: ang ah, kawn: yung: shiang: ang ah, paw doh pah an: khawm: ra:, mai kawn: nawh kah daux tix singaix ngie.
Mai yam tan maix pa appong: tix, son krax pa yaogyaw bwanson: kah Simiang Siyiex, maix tag tan mawh pa pon rieb tix.
An: tag mawh pa ih kah daux singaix an:, maix tag ang pon tix deuh an: khankix tom: hoek plak ponngawb, Aux mawh Simiang Siyiex.
Pex tag priex tix hawt gumlox pingnyap Aux khankix mai hawt tix yuh awm: an: khankix, Aux mawh Simiang Siyiex.
"Pex tag ang pon tix nu nai: kah ceukaux pa singax singeh Aux, viang mawh nan:, Aux tag mawh pa singax singeh kah daux sinax ceu pwi ceu pwi Isarilax khankix, Aux mawh Simiang Siyiex pa kieh pex singax singeh;
Aux mawh pa hoik viex pex lih khaing: daux meung Ejiptux, sonsang mawh Aux Siyiex pex, Aux mawh Simiang Siyiex heue."
Grawng: Pwie Simiang Siyiex
Simiang Siyiex krai ah nin: kah Mose,
"Krai kah pwi Isarilax khankix, pex tag krai pao: pwie Simiang Siyiex, awm: pa hoik tat bawg yam sonsang yuh pex pwie pa singax singeh in: mawh pwie Aux.
Grawng: Singaix Twah
Pex tag yuh kaing kah daux liah singaix; viang mawh nan: daux aliah singaix mawh singaix twah singaix laux lee: pex tix, mai singaix pwie pa singax singeh; pex tag ang pon tix yuh kaing tix ceu kawx; an: mawh singaix twah Simiang Siyiex kah can dee ot pex kudauh kudee.
Pwie Pasakha Mai Pwie Khaomun Pa Ang Sau: Susaix
"In: khankix mawh pwie Simiang Siyiex, pwie pa yuh pex daux pa singax singeh, mai pa sang krai pao: pex tix yuh yam hoik hoek bawg yam.
Kah daux khix jah, kao: pon: ngaix plak ponbo, an: mawh singaix pwie Pasakha Simiang Siyiex.
Kah daux khix an: kao: phwan: ngaix mawh singaix pwie Azuma (pwie khaomun pa ang sau: susaix) son Simiang Siyiex; pex tag ih khaomun pa ang sau: susaix aliah singaix.
Kah daux singaix jah pex tag yuh pwie pa singax singeh tau; pex tag ang pon tix yuh kaing pa dex mai haktiex tix ceu kawx.
Pex tag tan krax tan pa gleeing son Simiang Siyiex glang: daux aliah singaix an:; singaix aliah tag mawh singaix pwie pa singax singeh; pex tag ang pon tix yuh kaing pa dex mai haktiex tix ceu kawx."
Grawng: Pwie Plix Khaox Plix Ox Pa Liang
Simiang Siyiex krai ah nin: kah Mose,
"Krai kah pwi Isarilax khankix, yam hoek pex kah daux haktiex pa tawx Aux kah pex, phan: pex vawg kah nghox khankix, pex tag viex lhiem: nghox pa pa liang pex tix vawg hoek kah cao: giex kaing: li;
sonsang mawh pa rieb tix teei son tang: pex, khaix hoik luan khaing: daux singaix twah singaix klaung:, cao: giex kaing: li tag yang yeuh lhiem: nghox an: sivoe Simiang Siyiex.
Pex tag pon tix tawx kawn: yung: mhaing: pa hoik naog num pa loig tix mu:, son krax tan pa gleeing son Simiang Siyiex kah singaix an:, yam yang yeuh nawh kah lhiem: nghox.
Krax tan phawng: nghox ca im: pa dex dawd mai to: tan an: tag mawh phawng: nghox ca im: pa hoik klao tix tau mai bee kao: son ra: son khaing: tix Epha pa mawh krax tan pa gleeing kah Simiang Siyiex, son pa sioe: bhawng:; krax tan pa nyaux tag mawh rawm: plix siiet pon: son tix son khaing: tix Hing (3 Awga).
Pex tag ang pon ti ih khaomun, pa yuh kah gaox diag mai plix nghox plix koi pa im: khankix tom: hoek kah daux singaix ang pex nyang viex tix tan sivoe Siyiex pex, an: tag mawh been leeing ju daux doeh simie ceucat pex can dee ot pex kudauh kudee.
Grawng: Pwie Pa Yuh Daux Singaix Vang Twah
"Khaix hoik luan singaix twah daux singaix pasax, khaix hoik viex pex lhiem: nghox son krax tan pa yang yeuh; pex tag simin tom: grum naog aliah vang twah,
khaix hoik luan singaix twah jah pasax simin kieh naog tix phwan: singaix; khaix an: pex tag tan krax tan phawng: nghox ca im: kah Simiang Siyiex.
Pex tag viex khaomun pa yang yeuh ra: lon: khaing: daux nyiiex ma: tix, kao: son ra: son khaing: tix Epha (2 Awmie); kah phawng: gaox nghox ca im: pa hoik yuh sin: tau mai susaix, pa mawh plix khaox plix ox pa liang tix plix khankix kah son Simiang Siyiex.
Pex tag tan kawn: yung: iak pa loig pa naog num aliah mu: tau mai khaomun, mai kawn: moi mhaing: tix mu:, mai kawn: yung: ra: mu:, an: tag mawh krax tan pa gleeing son Simiang Siyiex, tau mai krax tan phawng: nghox ca im: mai krax tan pa nyaux kix mai krax tan pa gleeing kah ngu pa sioe: bhawng: kah Simiang Siyiex.
Pex tag tan kawn: pex mhaing: tix mu: son krax tan pa pluat ploi: phimap, mai kawn: yung: pa hoik naog num ra: mu: son pa sang yuh krax tan pa nhim:.
Cao: giex kaing: li tag yang yeuh an: tau mai khaomun, plix khaox plix ox pa liang tix pon son krax tan pa yang yeuh sivoe Simiang Siyiex, tau mai kawn: yung: iak an: ra: mu:, an: khankix tag mawh pa singax singeh son cao: giex kaing: li kah Simiang Siyiex.
Kah daux tix ngaix an: pex tag krai pao: mawh pwie pa singax singeh kah son pex; pex tag ang pon tix yuh kaing pa dex mai haktiex tix ceu kawx, an: tag mawh been leeing ju kah can dee ot pex, daux doeh simie ceucat pex.
"Yam vawg pex nghox kah daux haktiex tix, pex tag ang pon tix vawg kah can pa koe: kah daog kaung: pex khawm: uik, pex tag ang pon tix khrawm: nghox pa cod pa roik pa kawn deuk khaix tix; pex tag prah an: khankix son pwi hot pwi shia: mai nyo sinie; Aux mawh Simiang Siyiex pa mawh Siyiex pex.
Grawng: Pwie Teettawng
Simiang Siyiex krai ah nin: kah Mose,
"Krai kah pwi Isarilax khankix kah daux khix aliah, haok khix tix ngaix, pex tag laux lee: tix mai twah klaung:, pex tag phlu: teettawng sonsang doh keud kah mawh pwie pa singax singeh.
"Pex tag ang pon tix yuh kaing pa dex mai haktiex; mai pex tag yuh krax tan pa gleeing kah ngu kah Simiang Siyiex."
Singaix Khyox Khaw: Son Pa Pluat Ploi: Phimap
Mai Simiang Siyiex krai ah nin: kah Mose,
"Kah daux khix aliah haok khix kao: ngaix, mawh singaix yuh pa khyox khaw: pa pluat ploi: phimap; an: tag mawh singaix pwie pa singax singeh son pex, pex tag khin: kah tokaux tix mai yuh krax tan pa gleeing kah ngu kah Simiang Siyiex.
Daux singaix an: pex tag ang pon tix yuh kaing tix ceu kawx, mawh kheu an: mawh singaix yuh pex krax khyox khaw: mai krax pa pluat ploi: phimap son tix, sivoe Simiang Siyiex.
Mawh kheu pwi mawx ang ah, pa ang pon khin: tokaux tix singaix an:, tag tat nawh khaing: daux ceu pwi nawh.
Pwi mawx ang ah pa yuh kaing tix ceuceu kah daux singaix an:, Aux tag yuh lauxleeing:, khaing: daux sinax ceu pwi nawh.
Pex tag ang pon tix yuh kaing tix ceu kawx, an: tag mawh been leeing ju tix ju hoik tix ju. Mai can dee ot pex daux doeh simie ceucat pex.
Singaix an: tag mawh singaix twah ot yiien: yawg tix, mai pex tag khin: tokaux tix jah plakbo singaix dim: khix an:, tom: hoek plakbo pasax pex tag priex tix hawt mai twah mhawmmhawm:.
Grawng: Pwie Nyiiex Gox Bang:
Simiang Siyiex krai ah nin: kah Mose,
"Krai kah pwi Isarilax khankix, kah daux khix aliah kao: phwan: ngaix, daux aliah singaix an: tag mawh singaix pa yuh pex pwie nyiiex gox bang: son Simiang Siyiex.
Kah daux singaix jah an: tag mawh singaix pwie pa singax singeh, pex tag ang pon tix yuh kaing pa dex mai haktiex.
Pex tag yuh krax tan pa gleeing kah ngu kah Simiang Siyiex aliah singaix; kah daux singaix daix pex tag yuh pwie pa singax singeh, mai pex tag yuh krax tan pa gleeing kah ngu kah Simiang Siyiex; an: mawh pwie pa blon: ting; pex tag ang pon tix yuh kaing pa dex mai haktiex.
"In: mawh pwie Simiang Siyiex pa hoik tat tix deuh, pwie pa singax singeh pa sang krai pao: pex bawg yam sonsang yuh pex krax tan pa gleeing kah ngu kah Simiang Siyiex, pa mawh krax pa gleeing, mai krax tan phawng: nghox ca im:, mai krax tan pa nyaux kuceu, daux singaix mawx singaix an:;
Lheu: khaing: singaix twah Simiang Siyiex, pex tag yaox tix yuh krax tan pa appong:, krax tan pa pa yuh sijax mukheu tix sang tan, mai krax tan pa koe: rhawmrhi: pex tix sang tan khawm: uik, pex tag tan an: khankix kah Simiang Siyiex.
"Khaix hoik khrawm: pex plix nghaox plix koi: khaing: daux haktiex, jah kah daux khix aliah kao: phwan: ngaix, pex tag yuh pwie Simiang Siyiex aliah singaix; singaix tix tag mawh singaix twah sonsang laux lee: pex tix, mai singaix daix kawx tag baox mawh singaix twah sonsang laux lee: pex tix.
Kah daux singaix tix maix tag viex plix khaox plix ox pa mhawm:, kak khaox jhie: yaong:, kak khaox pa mhawm: lhax khankix, mai lhax kak khaox siglai khankix, pex tag yuh krax gauxrhawm: gauxrhi: sivoe Simiang Siyiex pa mawh Siyiex pex aliah singaix.
Pex tag yuh pwie an: ku num son Simiang Siyiex aliah singaix; an: tag mawh been leeing ju kah daux doeh simie ceucat pex; pex tag yuh pwie an: kah daux khix aliah.
Pex tag yaox tix ot kah daux nyiiex gox lhax khaox aliah singaix; can pwi pa keh kung khaing: ceu pwi Isarilax khankix tag yaox tix ot kah daux nyiiex gox lhax khaox,
Sonsang tawng doeh simie ceucat pex mawh Aux pa kieh pwi Isarilax khankix ot kah daux nyiiex gox lhax khaox yam viex Aux kix lih khaing: meung Ejiptux; Aux mawh Simiang Siyiex pa mawh Siyiex pex."
Mawh kheu nan:, Mose krai pao: grawng: pwie Simiang Siyiex kah ceu pwi Isarilax khankix heue.
Pa Priex Rien Jawk Ten: Khri: Nyiiex Gox Bwan: Man:
Simiang Siyiex krai ah nin: kah Mose,
"Tawm: lox kah pwi Isarilax khankix, sonsang viex kix bee singax singeh pa hoik tauh tix khaing: plix Sanlun son kawk ngu hoek kah maix sonsang tok maix kawk ngu riang ang jud ang jai.
Kah plak praix man: tie dee koe: teug bwan: sijax mukheu, kah daux nyiiex gox bwan: man: bang: kum:, Arun tag mawh cao: pa bung: kaing: an:, jah kah plakbo, tom: hoek kah plak ponngawb, sivoe Simiang Siyiex ang jud ang jai; an: tag mawh been leeing ju kah daux doeh simie ceucat pex.
Nawh tag mawh pa khrex rien kah kawk ngu pa koe: kah piang jawk ten: khri: ceu pa singax singeh, sivoe Simiang Siyiex ang jud ang jai heue.
Grawng: Khaomun Khan: Daux Nyiiex Gox Bwan: Man:
"Maix tag teei phawng: gaox nghox ca im: ceu pa mhawm:, mai yuh khaomun kao: ra: lon:; Khaomun ku lon:, tag mawh pa koe: phawng: nghox ca kao: son ra: son khaing: tix Epha (2 Awmie).
Maix tag deuh khaomun an: kah piang pheen: khri: pa singax singeh ra: pum:, tix pum: liah lon: sivoe Simiang Siyiex.
Mai maix tag sau: lawpan pa singax singeh kah piang pum: khaomun an: khawm: ra: pum:, sonsang mawh an: nyum: krax tan pa doh keud son krax tan pa gleeing kah ngu son Simiang Siyiex.
Daux singaix twah ku twah, Arun tag deuh pan khaomun an: sivoe Simiang Siyiex ang jud ang jai tang: kawnpraix Isarilax khankix, awm: gumlox sijax mukheu leeing ju leeing phan:.
An: tag mawh son Arun mai kawn: simex nawh khankix; kix tag ih an: dee pa singax singeh, mawh kheu mawh an: krax tan pa kied singax singeh pa gleeing kah ngu kah Simiang Siyiex, pa mawh been leeing ju leeing phan:.
Pa Pon Krax Ciyang Kheu Nu Nai: Kah Siyiex
Kawn: simex khaing: bun: ceu pwi Isarilax, keeing: nawh pa mawh pwi Ejiptux, lih hu: sinax pwi Isarilax; yam an: kawn: simex bun: ceu pwi Isarilax an:, mai pwi Isarilax tix kaux simah kah paox tix daux nyiiex bang:.
Mawh kheu kawn: simex pa keh khaing: bun: ceu pwi Isarilax an:, hoik nu nai: ceukaux Simiang Siyiex mai hoik jhax lawg kah, tom: viex nawh hoek kah Mose. (Ceukaux miex nawh mawh Shelawmix kawn: bun: Dibarix ceu pwi Dan.)
Mai kix gang: tix deuh nawh tom: sidauh ang kix nyang tawng kah alo Simiang Siyiex mawh pa yuh kah mawx kah kaw an:.
Khaix an: Simiang Siyiex krai ah nin: kah Mose,
"Teei kah kaw pa jhax lawg an: lih kah plak praix nyiiex bang:, khaix an: kieh pwi pa hoik mhong: lox pa jhax lawg nawh khawm: uik, deuh taix tix kah piang kaing: nawh, mai kieh cub pwi hun: dheem: nawh kah simaox.
Mai krai ah nin: kah pwi Isarilax khankix, can pwi pa jhax lawg kah Siyiex tix, tag yaox tix kham: geu: phimap tix.
Can pwi pa phit mai nu nai: ceukaux Simiang Siyiex tag yaox tix yum: tete, cub pwi hun: tag dheem: nawh kah simaox, daux pwi ceu pex ang ah, daux pwi tang: ceu ang ah, phan: phit lud mai nu nai: ceukaux Simiang Siyiex, tag yaox tix yum: tete.
Can pwi pa pah kah pwi tix kauxkaux tag yaox tix yum: tete.
Can pwi pa pah kah khawng: brie tag yaox tix deeh plud khawng: brie son khawng: brie, mai plud ju son ju.
Phan: pwi tix kaux yuh krax saux krax mat kah paoxplawg paoxnyhawm: tix, tag deeh yuh awm: an: kah nawh,
pot si-ang: son pot si-ang:, ngai: son ngai:, rhang: son rhang:, awm: hoik yuh nawh krax saux krax mat kah pwi tix kaux, tag deeh yuh awm: an: kah nawh.
Pwi pa pah khawng: brie nawh tag deeh yaox tix plud khawng: brie; pwi pa pah kah pwi tag yaox tix yum: tete.
Pex tag yaox tix koe: been lox tat jhawm: prawng tix ceu khaing: son daux pwi ceu pex ang ah, pwi tang: ceu ang ah, mawh kheu Aux mawh Simiang Siyiex pex."
Khaix hoik krai Mose ceu an: kah pwi Isarilax khankix, mai kix viex kaw pa hoik jhax lawg an: lih kah plak praix nyiiex bang:, mai dheem: nawh yum: kah simaox. Mawh kheu nan:, pwi Isarilax khankix yuh awm: gumlox pa hoik tawm: Simiang Siyiex kah Mose heue.
Grawng: Singaix Twah Aliah Num Tix Num
Simiang Siyiex krai ah nin: kah Mose kah piang gawng Sina,
"Krai ah nin: kah pwi Isarilax, mai yam hoek pex kah haktiex pa tawx Aux kah pex, kieh haktiex an: priex rien singaix twah son Simiang Siyiex.
Pex tag sum: simie nghox koi: kah daux kaung: beenliah num, mai pex tag cox pawt nhu: plix siiet daux sipeem tix daux liah num, mai khrawm: plix khankix.
Kah daux num aliah, an:, tag mawh num pa twah mai kieh haktiex laux lee: tix, mai mawh singaix twah son Simiang Siyiex, maix ang pon sum: simie nghox koi: daux kaung: tix mai ang pon pawt kah nhu: plix siiet kah daux sipeem tix.
Nghox koi: pa tu: khaing: daux kaung: pex kawx, ang pon tix vawg, pex tag ang pon pieh pon khrawm: kah plix siiet, pa ang pex cox pawt khaing: daux sipeem plix siiet tix, mawh kheu mawh num laux lee: son haktiex.
Ceu pa lih khaing: num pa twah haktiex an:, tag mawh pa ih pa un: son maix, son siliex simex, siliex bun: son pwi cang:, mai son nyo sinie pex,
Can ceu pa lih tix koe: khawm: uik, tag mawh pa ih pa un:, son khawng: brie pa eei: pex mai son totiag totu pa koe: daux haktiex pex heue.
Grawng: Pwie Naog Num Jubili
"Maix tag simin num singaix twah aliah num aliah bawg, bawg yam num twah aliah num, tag mawh tipon: dim: num kah maix.
Kah daux khix aliah kao: ngaix phlu: teettawng pwie naog num Jubili lih; kah daux singaix pa khyox khaw: pa pluat ploi: pex phimap tix, mai pex tag phlu: teettawng luah daux haktiex tix khawm: uik.
Mai maix tag appong: num naog tiphwan: num an: mawh num pa singax singeh mai krai pao: krax luat luan son pwi pa ot daux haktiex an: khawm: uik; an: tag mawh pwie naog num Jubili son pex, mai pwi kukaux tag deeh ing: kah dee koe: sinngao cie tix, mai kah dee ot paox nyiiex paox ma: tix.
Num naog tiphwan: num an:, tag mawh pwie naog num Jubili son pex, kah daux num an: pex tag ang pon tix ruat simie, ang pon tix vawg kah nghox pa tu: mai ang pon tix khrawm: plix siiet pa ang pex nyang cox pawt khankix.
Mawh kheu pwie naog num Jubili mawh num pa singax singeh kah pex, mai pex tag ih ceu pa lih khaing: daux kaung: daux ma:.
"Kah daux pwie naog num Jubili in:, pex tag deeh ing: kah dee koe: sinngao cie cao: tix kukaux.
Phan: pex coh tix ceu ceu kah paoxplawg paoxnyhawm: tix ang ah, liag tix ceu ceu khaing: paoxplawg paoxnyhawm: tix ang ah, pex ang pon tix yeen ya kah paox tix tix kaux hoik tix kaux.
Pex simin tix yaox khaix pwie naog num Jubili pex tag liag khaing: paoxplawg paoxnyhawm: tix, awm: num pa simin pex tix yaox kah krax lih plix nghox koi: khankix, nawh tag coh tix tawx an: kah pex.
Num nie pon pex plix tom: nie, pex tag yaog ngawh jum nawh haok, mai num iak lih plix pex tag ngreuh jum an: yawm, mawh kheu hoik coh nawh plix an: kah maix, awm: num pa hoik pon tix plix.
Pex tag ang pon kheem: pon yeen kah paox tix tix kaux hoik tix kaux, viang mawh nan:, lhat graung kah Siyiex pex, mawh kheu Aux mawh Simiang Siyiex pex heue.
Grawng: Pa Khre: Son Num Aliah
"Pex hawt yuh awm: been pa deuh Aux khankix, mai priex tix hawt awm: lox lai beenli Aux khankix, mai pex tag yaox tix ot yiien: yawg kah daux haktiex an:.
Mai haktiex tag tawx plix tix, mai pex tag yaox tix ih tom: sak, mai yaox tix tan kah daux krax pa yiien: yawg.
Phan: pex ah nin:,kheu ang yix yaox tix ruat simie, mai khrawm: kah plix nghox koi: tix, kah daux num aliah yix sang ih patix?:
Kah daux liah num Aux tag tawx lox nawb bwanson: kah piang pex, mai tag kieh plix nghox koi: kub son pex loe: num.
Pex tag yaox tix ruat simie kah daux num daix, mai ih kah plix nghox koi: pa prim: tom: hoek kah daux num dim:, tom: yam hoek bawg yam khrawm: pex plix nghox koi: pa khraox kah daux num dim:, pex tag yaox tix ih plix nghox koi: pa prim: heue.
Grawng: Deeh Taoh Kah Sinngao
Ang pon tix coh haktiex kah pwi leeing ju, mawh kheu haktiex mawh cie Aux kheu mawh pex nyo sinie mai pwi hoek paung mai Aux.
Kah daux haktiex pa mawh sinngao cie pex, pex tag pon akhwang: tix deeh taoh kah haktiex an:.
"Phan: puxaik maix lih tix mawh pwi pa hot pa shia:, mai hoik coh haktiex cie tix tix dauh dauh, phan: doeh paox nyiiex paox ma: nawh deeh hoek tix taoh kah an:, nawh tag deeh pon tix taoh kah ceu pa hoik coh puxaik nawh.
Phan: pwi pa sang taoh kah an: ang koe: tix kaux kawx, mai phan: tokaux cao: nawh deeh pon taoh kah an:,
Kieh nawh simin tix yaox kah num pa hoik coh nawh an:, kieh nawh dee plud ngawh haktiex kah pwi pa hoik coh nawh kah, sonsang deeh mawh haktiex an: cie nawh.
Phan: nawh ang nyang pon plud ngawh an:, nawh tag deuh haktiex koe: kah daux taix kaw pa liag tom: hoek pwie naog num Jubili, yam hoek pwie naog num Jubili an: tag bheeik khaing: nawh, mai tag deeh hoek kah cao: pa prim:.
"Phan: pwi tix kaux coh nyiiex tix daux veng pa koe: plak daux guh veng, khaix hoik coh nawh nyiiex an:, kah daux tix num nawh tag pon tix deeh taoh kah.
Phan: nawh ang lai pon taoh kah daux tix num, khaix an: nyiiex daux veng pa koe: plak daux guh veng tag mawh cie pwi pa hoik liag leeing ju, tom: hoek baux ju doeh simie ceucat nawh; an: tag ang lai bheeik khaing: nawh tom: hoek pwie naog num naog Jubili.
Phan: mawh nyiiex pa koe: daux yaong: pa ang koe: guh veng hawt vungviang tag sawn: nawh awm: ma: kaung:, kix tag deeh pon tix taoh an:, mai kix tag yaox tix kieh bheeik kah daux pwie naog num Jubili.
Yuh kah mawx kawx, veng ceu pwi Lewix, mai nyiiex pa koe: daux veng pa mawh cie kix khankix, yam mawx ang ah, pwi Lewix tag yaox tix deeh taoh kah.
Phan: pwi tix kaux liag nyiiex khaing: ceu pwi Lewix khaing: veng cie kix tag yaox tix bheeik khaing: daux taix nawh yam hoek daux pwie naog num Jubili, mawh kheu nyiiex ceu pwi Lewix pa koe: kah daux veng khankix tag mawh sinngao cie kix daux sinax ceu pwi Isarilax khankix.
Viang mawh nan:, haktiex ma: kaung: cie pwi hun: pa koe: daux veng kix, tag mawh pa ang pon tix coh, mawh kheu an: mawh sinngao cie kix leeing ju.
Grawng: Ceuk Rawm Pwi Hot Pwi Shia:
"Phan: puxaik pex tix kauxkaux, mawh pwi hot pwi shia:, mai ang lai pon eei tokaux tix sinax pex, pex tag teem: coi eei: nawh, awm: nyo sinie tix kaux kah daux sinax pex, sonsang pon ot nawh mai pex.
Paw lai teei rao khaing: nawh, mai paw lai baox gawp rao kah nawh, viang mawh nan:, lhat graung kah Siyiex pex, sonsang pon ot puxaik maix tau mai maix.
Maix tag ang pon tix tawx nawh ceuk mau tix, sonsang pon rao, mai ang pon tix tawx nawh yaog ceu pa ih pa un: sonsang pon lih rao.
Aux mawh Simiang Siyiex pex pa hoik viex pex lih khaing: meung Ejiptux sonsang tawx meung Khanan kah pex, mai sonsang mawh Aux Siyiex pex heue.
Gumlox Beenli Pa Dex Pa Dawd Mai Siliex
"Phan: puxaik pex tix kauxkaux, hot shia: sinax pex, mai coh tokaux tix kah pex, maix tag ang pon tix khin: nawh yuh kaing awm: siliex;
Nawh tag ot tau mai maix awm: pwi cang:, awm: kawncau mai awm: nyo sinie, nawh tag yaox tix yuh kaing jhaw: maix tom: hoek bawg yam pwie naog num Jubili;
Nawh tag lih hu: khaing: maix, tau mai kawnpraix tix khankix, mai kix tag deeh ing: kah nyiiex ma: tix, mai deeh hoek kah haktiex keeing: tix.
Mawh kheu kix mawh kawncau Aux pa hoik viex Aux lih khaing: meung Ejiptux; tag ang pon tix coh kix awm: siliex.
Maix tag ang pon tix kwang: mai ang pon yuh pa khin: kah nawh, maix tag lhat kah Simiang Siyiex tix.
Phan: mawh siliex simex siliex bun: maix an:, maix tag liag kawncau pwi pa ot hawt vungviang maix.
Lheu: khaing: an:, maix tag pon tix liag kah nyo siniex khankix, pa ot sinax maix khawm: kawn: nyiiex kawn: ma: nawh, pa keh kah daux haktiex maix, mai kix tag mawh cie maix.
Maix tag pon tix kieh kix mawh sinngao pa pluat kawnpraix maix khankix khaix maix, sonsang mawh sinngao kah kix leeing ju, maix tag pon cau kix awm: siliex, viang mawh nan:, phan: mawh son puxaik maix, pwi Isarilax maix tag ang pon tix kwang: kah piang kix tix kaux hoik tix kaux, kah daux krax pa khin:.
"Phan: pwi tang: ceu tang: cat ang ah, nyo sinie pa ot dex maix ang ah, pon tix magmi mai phan: puxaik maix pa ot hawt nawh tix kauxkaux, lih tix hot shia: mai coh tokaux tix kah nyo sinie an: ang ah, kah pwi pa hoek tix ot tivut ticu, pa deh hawt maix ang ah, mai kah pwi tix kauxkaux pa mawh kawn: nyiiex kawn: ma: nyo sinie khankix;
Khaix hoik coh nawh tokaux tix, nawh tag deeh pon tix deeh taoh kah tix, mai puxaik nawh khankix tix kaux kawx tag deeh pon taoh kah nawh;
Paox nawh ang ah, kawn: pux kawn: aik nawh ang ah, tag pon tix deeh taoh kah nawh, phan: ang mawh nan:, paox nyiiex paox ma: pa dex mai ceucat nawh, tag pon tix deeh taoh kah nawh, phan: nawh deeh koe: mau, nawh tag deeh taoh kah tokaux tix.
Nawh tag jah tix simin kah num jah tix coh tokaux tix tom: hoek kah pwie naog num Jubili, tau mai cao: pa liag, tag sawn: ngawh riang yam mawh nawh pwi cang: hawt num iak num nie.
Phan: num kawn: deuk tom: nie, nawh tag yaox tix deeb tawx ngawh pa deeh taoh kix nawh khaing: mau ngawh pa hoik liag kix kah nawh.
Phan: num khankix kawn: deuk ngie ceeix khaing:, tom: hoek bawg yam pwie naog num Jubili, khaix an: nawh tag simin num an: khankix tau mai nawh, hawt awm: num an: khankix nawh tag deeh tawx ngawh pa deeh taoh kix kah nawh.
Nawh tag yaox tix ot tix num hoik tix num awm: pwi cang:; ang yaox tix kwang: kah piang nawh daux pa khin:.
Phan: nawh ang nyang pon deeh taoh kah daux num in:, yam hoek pwie naog num Jubili, khaix an: nawh tag pon tix luat luan khawm: kawnpraix nawh khankix tau.
Mawh kheu pwi Isarilax khankix mawh kawncau Aux, kix mawh kawncau Aux khankix, pa hoik viex Aux lih khaing: meung Ejiptux; Aux mawh Simiang Siyiex pa mawh Siyiex pex heue.
Bwanson: Khaing: Pa Cu Nghiiet
"Pex tag ang pon tix yuh rieng rao son tokaux tix, rieng rao pa saik ang ah, rong: khaox pa mhawm: ang ah, kah daux haktiex pex tag ang pon tix jung simaox pa hoik saik kah taix tix, sonsang krub tix kah, mawh kheu Aux mawh Simiang Siyiex pa mawh Siyiex pex.
Pex tag priex tix hawt singaix twah Aux mai yungyi: kah dee pa singax singeh Aux; Aux mawh Simiang Siyiex.
Phan: pex hawt grawng: lawng khaix beenli Aux, mai priex tix hawt gumlox pingnyap Aux khankix mai hawt tix yuh,
Aux tag tawx rawm: lhiex kah pex, bawg yam mawx bawg yam an:, haktiex tag sang tawx plix tix, mai khaox pa koe: daux kaung: khankix tag lih tix koe: plix.
Kaing pah pex nghox tag sang sidauh tom: hoek bawg yam pieh plix siiet, mai kaing pieh pex plix siiet tag sidauh tom: hoek bawg yam ruat simie; pex tag yaox tix ih tom: sak, mai luat luan khaing: pa lhat graung daux haktiex tix.
Aux tag tawx pa nhim: koe: daux haktiex, mai ang koe: pwi pa ghlat pex lhat graung, mai pex tag yaox tix it mhawmmhawm:, Aux tag grheu: totiag pa hai khankix mai pwi caox pwi caig khaing: haktiex pex, mai lawm vaig lawm pliah tag ang lai kieh koe: kah daux haktiex pex.
Pex tag pheet pwi koeng mai kix tag goh kah lawm vaig lawm pliah sivoe ngai: pex.
Pex phwan: kaux tag pon pheet kah pwi tiyieh kaux, pex tiyieh kaux tag pon pheet kah pwi tix mheen: kaux; pwi koeng pex khankix tag yum: kah lawm vaig lawm pliah sivoe ngai: pex.
Mawh kheu Aux tag kia: ngiien kah pex mai kieh pex haoh hun:, mai kieh gumlox sijax mukheu Aux, kaux cong: tau mai pex.
Pex tag ih nghox prim:, mai kieh thawk pa prim: lih kheu jao hoik hoek nghox khraox pa hoik pon pex.
Aux tag sum: nyiiex gox bwan: tix daux sinax pex, mai Aux tag ang lai seeing: kah pex.
Aux tag lailing daux sinax pex, mai mawh Siyiex pex, mai pex tag mawh ceu pwi Aux.
Aux mawh Simiang Siyiex pa mawh Siyiex pex, pa hoik viex pex lih khaing: daux meung Ejiptux, son ang pex lai mawh siliex kix; Aux hoik raig khaox glawm: pex khankix, mai hoik kieh pex jung see see.
Phan: pex ang cu nghiiet kah gumlox Aux, mai ang hawt yuh awm: lox tawm: pingnyap Aux khankix,
phan: pex seeing: kah lox tawm: jhawm: krai Aux khankix, mai phan: pex nu nai: kah beenli Aux khankix, son ang pex pon hawt tix yuh kah gumlox pingnyap Aux, mai yieh laux kah sijax mukheu Aux;
Aux tag deeh yuh in: khankix kah pex, Aux tag kieh krax lhat krax graung koe: kah piang pex, mai kieh jhawm: saux jhawm: ngia, jhawm: saux kraw, jhawm: saux pa laux ngai:, mai kieh rhawmrhi: pex hoek kah daux pa lauxrhawm: pex tag yaox tix ruat simie kah daux pa giex pa going, mawh kheu pwi koeng pex khankix tag ih an:;
Aux veeh pakngai: tix khaing: pex, mai pex tag som kah plak sivoe ngai: pwi koeng pex, mai pwi koeng kah pex tag kwang: kah piang pex, mai pex tag to: khawm: ang pwi tie pheet kah pex.
Pex hoik yaox tix kham: geu: ding dod kawx, phan: pex ang cu tix nghiiet kah lox Aux, Aux tag tawx krax ciyang pa nie lheu: kheu jao phimap pex aliah son.
Aux tag raig tix tik siawpsibrawm riang rao pex, Aux tag kieh raoma: awm: rhiem: mai haktiex awm: tawng lheung:.
Mai pex tag uik riang rao giex going, haktiex pex tag ang chix tawx plix mai khaox pa koe: piang haktiex tag ang chix plix plix.
"Phan: pex ang nghiiet lox Aux, Aux tag viex krax kham: krax geu: hoek kah piang pex aliah son, kheu jao phimap pex.
Aux tag ploi: totiag pa hai khankix, laig daux sinax pex, mai kieh yuh laux kah kawnpraix pex, mai khawng: brie pex, mai kieh ceu pwi pex nie iak hu: si pie, mai krax lawng pex tag yiien:.
"Viang hoik yaox tix kham: geu: yuh nin: kawx, ang cox rhawm: tix, mai ca: kawn: tieh feen kah Aux;
Aux kawx tag tieh feen kah pex, mai Aux tag tawx krax pa ciyang kah pex aliah son kheu jao phimap pex.
Aux tag kieh vaig lawm pa ot plak sijax mukheu Aux hoek kah pex, mai prawng ca: kah pex; yam khrawm: pex paox tix tau kah daux veng, Aux tag ploi: jhawm: saux preng hoek sinax pex, mai pex tag lauxleeing: daux tawm: taix pwi pa koeng.
Yam hoik tat Aux krax teem: krax coi pa ih kah pex, bun: kao: kaux tag yuh khaomun sin: kah daux glah ngu tix mu:, mai kix tag deeh ciang tix tawx khaomun son pex; pex tag ih, mai ang sak.
"Viang pex hoik kham: geu: yuh nin: kawx, pex ang nghiiet lox Aux, mai ca: kawn: tieh feen kah Aux,
Aux tag tieh feen kah pex kah daux pa kied songrhawm: songrhi: Tix, Aux tag deeh tawx krax ciyang kah pex aliah son kheu jao phimap pex.
Pex tag ih nex kawn: simex kawn: bun: tix khankix,
Aux tag yuh dee lhaong: dee krub pex lauxleeing:, mai raig khu: dee tan pa tok pex nyawng bhawng: khankix mai taing tix tik tokaux yum: pex kah piang rieng rao yum: pa krub pex, Mai Aux tag seeing: kah pex.
Aux tag yuh veng pex laux mai yieh dee singax singeh pex khankix lauxleeing:, mai Aux tag ang lai ngheet kah taox nyawng bhawng: pex.
Aux tag kieh haktiex pex lauxleeing:, mai pwi koeng pa ot kah daux haktiex pex, tag koe: krax daox deng: kah an:.
Aux tag kieh pex prungprang:kah daux sinax ceu pwi tang: ceu tang: cat, lawm vaig hawt pheet khaix pex; haktiex pex tag mawh pa yi, mai veng pex tag hoek krax laux krax leeing:.
Yam hoik yiien: pwi kah daux haktiex pex, haktiex pex tag gauxrhawm: daux singaix twah Nawh, mai pex tag ot kah daux haktiex pwi koeng pex khankix; yam an: haktiex tag yiien: mai laux lee: tix gauxrhawm: daux singaix twah Nawh.
Glang: bawg yam kawn: yiien: pwi, an: tag mawh pa laux lee: tix, mawh kheu ang koe: bawg yam yiien: yawg daux singaix twah yam kawn: ot pex kah daux veng an:.
Mai kix pa kawn deuk kah daux pex khankix Aux tag sau: krax yaoh yeung kah daux rhawmrhi: kix daux haktiex pwi koeng kix, lox lwah lhax khaox kawx tag pheet kix to:, mai kix tag to: awm: to: kix khaing: lawm vaig, mai kix tag goh khawm: ang pwi hawt khaix kix tix kaux kawx.
Kix tag sideeing mai goh kah piang paox tix, tix kaux hoik tix kaux, awm: to: tix kah lawm vaig, khawm: ang pwi pheet kix tix kaux kawx; mai pex tag ang lai koe: siawpsibrawm tix cung sivoe ngai: pwi koeng tix.
Pex tag lauxleeing: sinax pwi kuceu, mai haktiex pwi pa koeng pex tag bleet kah pex.
Can pex pa kawn deuk an: khankix, tag khrup kah daux haktiex pwi pa koeng pex kheu phimap pa yuh keeing: kix. Kix tag khrup kah daux krax an: awm: keeing: kix.
"Phan: kix khyox khaw: pluat ploi: phimap tix, mai phimap yuh keeing: kix, kheu pa tieh feen tix kah Aux, mai pa tieh feen tix ang hu: daux krax Aux,
mawh kheu nan:, Aux kawx tag tieh feen kah kix, mai hu: tawx kix kah haktiex pwi koeng kix; phan: rhawmrhi: pa ang pat hak tix yeen tix tiem, mai rieb kah phimap pa yuh tix,
Aux tag doh keud kah sijax mukheu pa yuh Tix mai Yakop, sijax mukheu pa yuh tix mai Icak mai sijax mukheu pa yuh Tix mai Abraham, Aux tag doh keud kah haktiex.
Kix tag prah haktiex tix, mai haktiex an: tag koe: krax gauxrhawm: kah daux singaix twah, yam hoik yi pwi khaing: dee an:, kix tag yaox tix rieb kah phimap pa yuh tix, kheu hoik nu nai: kix kah lox lai beenli Aux, mai rhawmrhi: kix seeing: kah lox tat jhawm: prawng Aux.
Viang yuh nan: kawx, yam ot kix daux haktiex pwi koeng tix, Aux ang tik vud kah kix, mai ang seeing: kah kix, awm: pa sang khaw: kix tix lauxleeing:, mai Aux ang yieh kah sijax mukheu pa hoik yuh Aux tau mai kix, mawh kheu Aux mawh Simiang Siyiex kix.
Aux tag doh keud kah sijax mukheu pa hoik yuh Aux tau mai doeh simie ceucat kix, pa hoik viex Aux lih khaing: meung Ejiptux, plak sivoe ngai: pwi kuceu sonsang mawh Aux Siyiex kix, Aux mawh Simiang Siyiex."
In: khankix mawh gumlox pingnyap mai lox tat jhawm: prawng, mai gumlox beenli khankix, pa hoik yuh Simiang Siyiex sinax pwi Isarilax kah piang gawng Sina khaing: daux taix Mose heue.
Grawng: Deeh Taoh Kah Kawn: Pwi Mai Kraungkhrai:
Simiang Siyiex krai ah nin: kah Mose,
Krai kah pwi Isarilax khankix, phan: pwi tix kauxkaux yuh sijax tix sang tan kah Simiang Siyiex, awm: pa tat maix jum nawh tag mawh cie Simiang Siyiex.
Phan: mawh jum pa caw maix tix tat son simex tix kaux pa koe: ju tinga: num tom: hoek tigliah num, jum nawh tag mawh tiphwan: plah Shekhe kah mau dee pa singax singeh.
Phan: mawh bun:, jum nawh tag mawh tingoe: plah shekhe.
Phan: nawh mawh pa koe: ju phwan: num tom: hoek tinga: num, maix tat jum simex mawh tinga: plah shekhe mai jum bun: mawh kao: plah shekhe,
phan: ju nawh koe: tix khix, tom: hoek phwan: num, maix tat jum simex mawh phwan: plah mau shekhe, mai jum bun: loe: plah mau shekhe,
phan: ju nawh koe: tigliah num haok plak piang, maix tat jum simex mawh kao: phwan: plah mau shekhe, mai jum bun: kao: plah shekhe.
Phan: nawh mawh pa kied hot sonsang plud tix kah ngawh jum pa hoik tat maix, tag viex nawh hoek plak sivoe cao: giex kaing: li; cao: giex kaing: li tag tat jum nawh, awm: sijax pa hoik yuh nawh, cao: giex kaing: li tag tat jum.
"Phan: pwi viex tix tan tosat kah Simiang Siyiex, ceu pa tan an: kah Simiang Siyiex tag mawh pa singax singeh.
Pa mhawm: ang ah, pa caox ang ah, ang pon tix loh kah tang: mu:, mai phan: nawh sang loh an: khawm: ra: tag mawh pa singax singeh.
Phan: mawh tosat pa ang singax mai pa ang khaw: tix tan kah Simiang Siyiex, nawh tag jhi: tosat an: kah cao: giex kaing: li,
cao: giex kaing: li tat jum an: mhawm: ang ah, ang mhawm: ang ah, maix caw tix hawt awm: jum pa tat cao: giex kaing: li.
Phan: nawh simie tix deeh taoh kah an:, nawh tag deeh naok tix tawx phwan: son tix son kah piang jum an:.
"Phan: pwi tix kaux sang ap nyiiex tix sonsang mawh pa singax singeh son Simiang Siyiex, cao: giex kaing: li tag tat jum son nawh, mhawm: ang ah, ang mhawm: ang ah, maix caw tix hawt awm: jum pa tat cao: giex kaing: li.
Phan: kaw pa ap nyiiex tix singax simie tix deeh taoh kah nyiiex tix, nawh tag baox naok mau phwan: son tix son kah piang jum an:, mai tag deeh teei nyiiex an:.
Phan: pwi sang ap kaung cie tix tix dauh dauh mawh pa singax, son Simiang Siyiex, maix tag tat awm: jum simie nghox koi: pa van: nawh; phan: van: simie tix Awmie jum tag mawh tix phwan: plah mau shekhe.
Phan: nawh jah tix ap kaung: cie tix singax, kah daux pwie naog num Jubili, nawh tag yaox tix tawx ngawh awm: pa tat maix.
Phan: nawh ap kaung: tix singax, khaix hoik luan bawg yam pwie naog num Jubili, cao: giex kaing: li tag simin num glang: sinax pa kawn deuk, tom: hoek daux bawg yam pwie naog num Jubili, mai yawm jum pa tat maix kah nawh.
Phan: nawh simin tix deeh taoh kah kaung pa hoik ap tix singax an:, nawh tag deeh naok mau, phwan: son tix son kah piang jum an:, mai an: tag deeh mawh kaung: cie nawh.
Phan: nawh ang lai simie tix taoh kah kaung: an:, mai hoik coh kaung: an: kah pwi tang: kaux, nawh ang lai pon tix deeh taoh kah;
Yam hoik luan kaung: an:, daux pwie naog num Jubili, tag mawh pa singax singeh, kah son Simiang Siyiex, awm: kaung: pa hoik tiextu; mai an: tag mawh cie cao: giex kaing: li.
Phan: pwi tix kaux ap kaung: pa hoik liag nawh, mai pa ang mawh cie nawh, sonsang singax kah Simiang Siyiex,
Cao: giex kaing: li tag simin num sinax pa kawn deuk tom: hoek bawg yam pwie naog num Jubili, nawh tag tawx ngawh jum awm: pa hoik tat maix kah daux singaix an:, awm: krax tan pa singax singeh kah son Simiang Siyiex.
Yam hoek daux pwie naog num Jubili, nawh tag deeh tawx kaung: an: kah kaw pa hoik liag pa mawh cao: haktiex, sonsang deeh mawh cie nawh.
Maix tag tat jum khawm: uik hawt awm: jum mau plah shekhe dee pa singax tinga: Gerax mawh tix shekhe.
"Tosat pa liang tix keh khankix, moi ang ah yung: ang ah, hoik mawh cie Simiang Siyiex, pwi tix kaux kawx tag ang pon tix baox deeh tang: gwieh mawh pa singax, mawh kheu an: mawh cie Simiang Siyiex.
Phan: an: mawh tosat pa ang singax, tag pon tix deeh taoh awm: jum pa hoik tat maix, mai deeh naok mau phwan: son tix son kah piang an:; phan: an: ang lai deeh taoh, tag coh awm: jum pa hoik tat maix.
"Viang yuh kah mawx kawx, krax tan pa hoik tiextu nawh tix tawx kah Simiang Siyiex, kah daux pa koe: tix khankix, pwi khawm: khawng: brie, mai kaung cie nawh khankix, tag ang pon tix coh, mai ang pon tix deeh taoh; can ceu krax tan pa hoik tiextu nawh kuceu mawh pa kied singax singeh son Simiang Siyiex.
Pwi pa hoik tiextu appong: tan lu tokaux tix, pa sang hoek krax laux krax leeing: mai krax yum: kah daux sinax pwi khankix tix kauxkaux, tag ang lai pon tix deeh taoh kah, tag yaox tix pah yum: tete.
"Ceu pa lih khaing: daux tiex, kao: son tix son, pa mawh plix nghox koi: ang ah, plix khaox plix ox ang ah, mawh cie Simiang Siyiex; an: mawh pa singax singeh son Simiang Siyiex.
Phan: pwi tix kaux simie tix deeh taoh pa mawh kao: son tix son an:, nawh tag deeh naok phwan: son tix son kah piang an:.
Moi ang ah, pex ang ah, yung: ang ah, can pa tiang tix hu: greem: khaoxgix pex khankix kao: son tix son, tag mawh pa singax singeh son Simiang Siyiex.
Nawh tag ang pon tix chawkcheng:, sonsang tawng grawng: an: khankix, mawh pa mhawm: ang ah, pa caox ang ah, nawh tag ang pon tix loh ceu an: khankix; phan: nawh sang deeh lo an: khankix pa deeh loh son an: khawm: ra: tag mawh pa singax singeh; an: tag mawh pa ang lai pon tix deeh taoh."
Inkix mawh gumlox tawm: pingnyap pa hoik deuh Simiang Siyiex kah Mose, son ceu pwi Isarilax khankix kah piang gawng Sina heue.
LAI SIMIN
(Numbers)
Simin
Grawng: Teei Carang Pwi Isarilax Khankix Bawg Tix
Yamin, Simiang Siyiex sikah mai Mose kah daux tiag gawng sina, kah daux nyiiex gox bwan: man: bang: kum: pwi hun:, kah daux num ra:, khix ra: tix ngaix, khaix hoik lih hu: kix khaing: daux meung Ejiptux mai ah nin:.
"Teei carang cub caw: pwi hun: ceu pwi Isarilax khankix khawm: uik, mai kawn: nyiiex kawn: ma: kix, mai nyiiex ma: keeing: kix, maix simin ceukaux can pa mawh simex kukaux;
jah kah pa koe: ju tinga: num haok plak piang, can pwi pa pon hu: daux naing, khaing: daux ceu pwi Isarilax khankix, maix mai Arun tag simin tix deuh kix tau mai kru naing kix heue.
Mai can pwi pa ot tau mai maix khankix, tag mawh pwi tix kaux, pa kaoh khaing: doeh ceucat mawx ceucat an: ku cub, mai pa mawh cao: kaing: tix kaux kah nyiiex ma: keeing: nawh khankix heue.
Inkix mawh ceukaux pwi pa sang teem: coi cung tau mai maix, khaing: ceu pwi Rubin, mawh Elizurax pa mawh kawn: simex Shedurax;
khaing: ceu pwi Simion mawh Shelumilax pa mawh kawn: simex Zurishadie;
khaing: ceu pwi Yudax mawh Nashon pa mawh kawn: simex Aminadat;
khaing: ceu pwi Isakha mawh Natanelax pa mawh kawn: simex Zuah;
khaing: ceu pwi Zebulun mawh Eliabax pa mawh kawn: simex Helon,
khaing: kawn: simex Yosiep khankix, khaing: ceu pwi Epharen mawh Elishama pa mawh kawn: simex Amihut; khaing: ceu pwi Manashe mawh Gamalelax pa mawh kawn: simex Pedazurax;
khaing: ceu pwi Binyamin mawh Abidan pa mawh kawn: simex Gidawnix;
khaing: ceu pwi Dan mawh Aheza pa mawh kawn: simex Amishadie,
khaing: ceu pwi Asha mawh Pagelax pa mawh kawn: simex Awran;
khaing: ceu pwi Gat mawh Elishaphax pa mawh kawn: simex Doelax;
khaing: ceu pwi Napthalix mawh Ahirax pa mawh kawn: simex Enan khankix heue.
Inkix mawh pa hoik laug tix khaing: cub caw: pwi hun: khankix, pa mawh cao: thung: cao: bung: kah doeh ceucat keeing: kix, mai cao: kaing: kah piang pwi tix rheng:, ku cub ku caw: daux ceu pwi Isarilax heue.
Khaix an: Mose mai Arun kok pwi in: khankix, pa hoik laug tix mhai: ceukaux kix;
mai kix kraix khrawm: cub pwi hun: khawm: uik tau, haok khix tix ngaix, daux khix ra: heue. Mai kix deeh ciied tix yaox doeh simie ceucat kix, tau mai kawn: nyiiex kawn: ma: kix, tau mai nyiiex ma: keeing: kix, awm: pa hoik simin ceukaux khankix, jah kah pa koe: ju tinga: num haok plak piang kaux mawx kaux an: kukaux daux pwi heue.
Awm: hoik tawx Simiang Siyiex lox kah Mose, mawh kheu nan: nawh simin kix kah daux tiag daux tu gawng sina heue.
Kawn: Ai: Isarilax pa mawh Rubin, mai kawnpraix nawh khankix, mai doeh simie ceucat kix, mai kawn: nyiiex kawn: ma: kix, mai nyiiex ma: keeing: kix, awm: pa simin kix ceukaux kix khankix, can simex kukaux, jah kah pa koe: ju tinga: num haok plak piang, pa pon hu: daux naing khawm: uik;
can pwi ankix pa hoik simin khaing: daux doeh ceucat ceu pwi Rubin khankix, koe: pon: mheen: liah rheng: pheen: yieh (46500) kaux heue.
Khaing: daux kawnpraix Simion khankix, doeh simie ceucat kix, mai kawn: nyiiex kawn: ma: kix, khawm: nyiiex ma: keeing: kix, carang pa hoik teei kix, awm: pa simin kix kah ceukaux kix khankix, can pa mawh simex, jah kah pa koe: ju tinga: num haok plak piang, pa pon hu: daux naing khawm: uik;
Mai khaing: daux ceucat ceu pwi Simion khankix, koe: pheen: mheen: dim: rheng: loe: yieh (59300) kaux heue.
Khaing: daux ceu pwi Gat khankix, pa mawh doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khawm: uik,
can pwi ankix pa hoik simin tix khaing: daux doeh ceucat ceu pwi Gat, koe: pon: mheen: pheen: rheng: liah yieh tiphwan: (45650) kaux heue.
Khaing: daux kawnpraix ceu pwi Yudax doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khawm: uik;
can pwi ankix pa hoik simin khaing: daux doeh simie ceucat ceu pwi Yudax koe: aliah mheen: pon: rheng: liah yieh (74600) kaux.
Khaing: daux kawnpraix ceu pwi Isakha khankix doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh ceucat ceu pwi Isakha koe: pheen: mheen: pon: rheng: pon: yieh (54400) kaux heue.
Khaing: daux kawnpraix ceu pwi Zebulun doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh simie ceucat pwi Zebulun, koe: pheen: mheen: aliah rheng: pon: yieh ( 57400) kaux heue.
Khaing: kawn: simex Yosiep khankix, pa mawh ceu pwi Epharem, mai doeh simie ceucat kix, khawm: paox nyiiex paox ma: kix, mai nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh ceucat ceu pwi Epharem koe: pon: mheen: mai pheen: yieh (40500) kaux.
Khaing: daux ceu pwi Manashe doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh ceucat pwi Manashe koe: loe: mheen: ra: rheng: ra: yieh (32200) kaux heue.
Khaing: daux kawnpraix ceu pwi Binyamin doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh simie ceucat ceu pwi Binyamin koe: loe: mheen: pheen: rheng: pon: yieh (35400) kaux heue.
Khaing: daux kawnpraix ceu pwi Dan doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh ceucat ceu pwi Dan, koe: liah mheen: ra: rheng: aliah yieh (62700) kaux heue.
Khaing: daux kawnpraix ceu pwi Asha doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh simie ceucat ceu pwi Asha koe: pon: mheen: tix rheng: pheen: yieh (41500) kaux heue.
Khaing: daux kawnpraix ceu pwi Napthalix doeh simie ceucat kix, mai paox nyiiex paox ma: kix, khawm: nyiiex ma: keeing: kix, awm: carang ceukaux pa hoik koh kix khankix, jah kah pa koe: ju tinga: num haok plak piang, pa pon hu: daux naing khankix khawm: uik;
can pwi ankix pa hoik simin khaing: daux doeh simie ceucat ceu pwi Napthalix koe: pheen: mheen: loe: rheng: pon: yieh (53400)kaux heue.
Inkix mawh pwi pa hoik simin Mose mai Arun, mai cao: kaing: ceu pwi Isarilax khankix kao: ra: kaux, son tang: nyiiex ma: keeing: nawh, kaux mawx kaux an: heue.
Mawh kheu nan: can pwi pa hoik simin tix khaing: daux ceu pwi Isarilax khankix, mai nyiiex ma: keeing: kix, jah kah pa koe: ju tinga: num haok plak piang, pa pon hu: daux naing khankix khawm: uik, kah daux ceu pwi Isarilax khankix,
can pwi pa hoik simin tix khawm: uik koe: liah sien: mai loe: rheng: pheen: yieh tiphwan: (603550) kaux heue.
Viang mawh nan: ang simin kah ceu pwi Lewix, mai doeh ceucat keeing: kix heue.
Grawhgrawng: nawh Simiang Siyiex hoik ah nin: kah Mose,
"Maix tag ang pon tix simin doeh simie ceucat ceu pwi Lewix nongnong:, mai ang pon tix koh carang pwi kix, khaing: daux sinax ceu pwi Isarilax khankix heue.
Viang mawh nan:, maix tag tawx beeh glawm: kah ceu pwi Lewix, son kaing jhaw: daux nyiiex gox bwan: man: pa koe: teug kham: mhai: sakse sijax mukheu, mai kah piang kraungkhrai: pa shiao kah daux nyiiex gox bwan: man: khawm: uik, mai can ceu pa mawh cie daux nyiiex gox bwan: man: khawm: uik heue. Kix tag mawh pa klawm: nyiiex gox bwan: man:, mai kraungkhrai: nawh khankix hu: khawm: uik, kix tag yuh kaing: nyiiex gox bwan: man:, mai peung tix ot hawt vungviang praok nyiiex gox bwan: man: heue.
Mai yam gah nyiiex gox bwan: man: hu: kah plak sivoe ngai:, ceu pwi Lewix khankix tag teei nawh lih. Mai yam jung kix tix sum: kah nyiiex gox bwan: man:, ceu pwi Lewix khankix, tag jung tix sum nawh heue. Pwi tang: kaux pa hoek dex an:, tag mawh pa pon tix yum: heue.
Ceu pwi Isarilax khankix tag sum: nyiiex bang: cao: tix, mai nyiiex bang: cao: nawh kukaux, mai glawk cie cao: nawh kukaux, awm: man: chix pa koe: kru naing kix heue.
Viang mawh kawx nan: ceu pwi Lewix tag bang: tix ot hawt vungviang nyiiex gox bwan: man: Teug kham: mhai: sakse, son ang krax songrhawm: songrhi: lih tix koe: kah piang cub caw: pwi hun: ceu pwi Isarilax khankix, mai ceu pwi Lewix tag mawh pwi pa priex rien kah nyiiex gox bwan: man: Teug kham: mhai: sakse heue."
Mawh kheu nan: ceu pwi Isarilax khankix, hawt tix yuh awm: gumlox pa hoik tawm: Simiang Siyiex kah Mose khankix khawm: uik heue.
Grawng: Ceucat Kix Mai Cao: Kaing: Kru Naing
Simiang Siyiex ah nin: kah Mose mai Arun,
"Pwi kukaux khaing: daux ceu pwi Isarilax khankix, tag peung tix ot tau mai bang: glawk cie cao: kix, hawt praok man: chix nyiiex ma: keeing: nawh khankix, kix tag bang: hawt vungviang see nyiiex gox bwan: man: bang: kum: pwi hun: khawm: pon: daog heue.
Kah plak lih singaix, kah dee hoik ciak dauh dee son kix, mawh glawk cie cub kru naing ceu pwi Yudax tau mai man: chix cie nawh, mai kix tag bang: tan:, awm: koe: kru naing kix. Mai Nashon pa mawh kawn: simex Aminadat tag mawh cao: kaing: naing ceu pwi Yudax heue.
Mai kru naing nawh pa hoik simin tix, koe: aliah mheen: pon: rheng: liah yieh (74600) kaux heue.
Can pwi pa bang: tix ot dia: hawt khaix nawh, tag mawh doeh ceucat Isakha, mai Natanelax pa mawh kawn: simex Zu-ax tag mawh cao: kaing: naing ceu pwi Ishakha heue.
Mai kru naing nawh pa hoik simin tix, koe: phwan: mheen: pon: rheng: pon: yieh (54400) kaux heue.
Khaix an: pa bang: tix ot tag mawh doeh ceucat Zebulun mai Eliabax pa mawh kawn: simex Helon tag mawh cao: kaing: naing ceu pwi Zebulun heue.
Mai kru naing nawh pa hoik simin tix, koe: phwan: mheen: aliah rheng: pon: yieh (57400) kaux heue.
Can pwi pa hoik simin tix khawm: uik, awm: pa koe: riang rao kru naing kix tau mai Yudax, koe: tix sien: daix mheen: liah rheng: pon yieh (186400) kaux heue. Inkix tag mawh cub kru naing pa preeng: tix hu: sivoe heue.
"Kah plak seh tag mawh cub glawk riang rao kru naing pa koe: tau mai man: chix Rubin, awm: pa mawh dee ot son kru naing cie kix khankix, mai cao: kaing: naing ceu pwi Rubin, tag mawh Elizurax pa mawh kawn: simex Shedurax heue.
Mai kru naing nawh pa hoik simin tix koe: pon: mheen: liah rheng: phwan: yieh (46500) kaux heue.
Can pwi pa bang: tix ot hawt khaix nawh, tag mawh ceucat ceu pwi Simion mai cao: kaing: naing ceu pwi Simion tag mawh Shelumelax pa mawh kawn: simex Zurishadie heue.
Mai kru naing nawh pa hoik simin tix khankix, koe: phwan: mheen: dim: rheng: loe: yieh (59300) kaux heue.
Khaix an: pa bang: tix ot hawt khaix nawh tag mawh ceucat Gat mai cao: kaing: naing ceu pwi Gat, tag mawh Elishaphax pa mawh kawn: simex Doelax heue.
Mai kru naing nawh pa hoik simin tix khankix, koe: pon: mheen: phwan: rheng: liah yieh tiphwan: (45650) kaux heue.
Can pwi pa hoik simin tix khawm: uik, awm: pa koe: riang rao kru naing kix tau mai Rubin, koe: tix sien: phwan: mheen: tix rheng: pon: yieh tiphwan: (151450) kaux, kix tag mawh kru naing cub ra: pa preeng: tix lih hu: khaing: nyiiex bang: heue.
Khaix an: nyiiex gox bwan: man: bang: kum: pwi hun: tag gah tix lih hu: tau mai nyiiex gox bang: ceu pwi Lewix, mai kieh kix ot kah daux sigreung nyiiex gox bang: kix, awm: pan: peung kix tix ot, mawh kheu nan: kix tag gah tix lih hu: kaux mawx kaux an:, khaing: dee ot dee koe: kix, awm: pa koe: glawk ot kix khankix heue.
Kah plak glip singaix, tag mawh cub glawk cie riang rao kru naing pa koe: tau mai man: chix Epharem, awm: dee ot son kru naing kix, mai cao: kaing: naing ceu pwi Epharem tag mawh Elishama pa mawh kawn: simex Amihut heue.
Mai kru naing nawh pa hoik simin tix khankix, koe: pon: mheen: mai phwan: yieh (40500) kaux.
Hawt khaix Epharen, tag mawh ceucat ceu pwi Manashe mai cao: kaing: naing ceu pwi Manashe, tag mawh Gamalelax pa mawh kawn: simex Pedazurax heue.
Mai kru naing nawh pa hoik simin tix khankix, koe: loe: mheen: ra: rheng: ra: yieh (32200) kaux heue.
Khaix an: pa bang: tix ot khaix nawh tag mawh ceucat ceu pwi Binyamin, mai cao: kaing: naing ceu pwi Binyamin, tag mawh Abidan pa mawh kawn: simex Gidawnix heue.
Mai kru naing nawh pa hoik simin tix khankix, koe: loe: mheen: phwan: rheng: pon: yieh (34500) kaux heue.
Can pwi pa hoik simin tix khawm: uik, awm: pa koe: riang rao kru naing kix tau mai Epharem, koe: tix sien: mai daix rheng: tiyieh (108100) kaux, kix tag mawh cub kru naing cub loe: pa preeng: tix lih hu: khaing: nyiiex bang: heue.
Kah plak laong:, tag mawh cub glawk cie riang rao kru naing pa koe: tau mai man: chix Dan, awm: pa koe: kru naing kix, mai cao: kaing: naing ceu pwi Dan tag mawh Aheza pa mawh kawn: simex Amishadie heue.
Mai kru naing nawh pa hoik simin tix khankix, koe: liah mheen: ra: rheng: aliah yieh (62700) kaux heue.
Can pwi pa bang: tix ot hawt nawh tag mawh ceucat ceu pwi Asha, mai cao: kaing: naing ceu pwi Asha tag mawh Pagelax pa mawh kawn: simex Awkharan heue.
Mai kru naing nawh pa hoik simin tix khankix khawm: uik, koe: pon: mheen: tix rheng: phwan: yieh (41500) kaux heue.
Khaix an: cub pa bang: tix ot hawt khaix nawh, tag mawh ceucat ceu pwi Napthalix, tag mawh Ahirax pa mawh kawn: simex Enan heue.
Mai kru naing nawh pa hoik simin tix khankix khawm: uik, koe: phwan: mheen: loe: rheng: pon: yieh (53400) kaux heue.
Can pwi pa hoik simin tix khawm: uik, awm: pa koe: riang rao kru naing kix tau mai Dan, koe: tix sien: phwan: mheen: aliah rheng: liah yieh (157600) kaux, kix tag mawh cub kru naing pa preeng: tix lih hu: khaing: nyiiex bang:, mai ghoik tix ot plak khaix, tau mai glawk cub caw: cao: kix heue.
Inkix mawh carang pwi pa hoik simin tix khaing: ceu pwi Isarilax khankix, khaing: doeh nyiiex ma: keeing: kix khawm: uik heue. Can pwi pa hoik simin tix, awm: pa koe: riang rao kru naing kix, koe: liah sien: mai loe: rheng: phwan: yieh tiphwan: (603500) kaux heue.
Viang mawh nan: ceu pwi Lewix, mawh pa ang simin daux sinax ceu pwi Isarilax, awm: lox pa hoik tawm: Simiang Siyiex kah Mose heue.
Mawh kheu nan: ceu pwi Isarilax khankix, hawt tix yuh awm: lox pa hoik tawm: Simiang Siyiex kah Mose khawm: uik, kix bang: tix ot awm: pa koe: glawk cie kix, mai kix preeng: tix lih hu: khaing: nyiiex bang: tix, cub nyiiex ma: mawx, cub nyiiex ma: an:, awm: pa koe: doeh ceucat nyiiex ma: keeing: kix khankix heue.
Grawhgrawng: Kawn: Simex Arun
Inkix mawh doeh doe Arun mai Mose khankix, yam sikah Simiang Siyiex mai Mose kah piang gawng Sina heue.
Mai inkix mawh ceukaux kawn: simex Arun, Nadap mawh kawn: Ai:, mai Abihu, Eliza mai Itama heue.
Inkix mawh ceukaux kawn: simex Arun pa hoik groi kix rawm: bee tix tawx mawh cao: giex kaing: li, mai pwi pa hoik appong: kix yuh kaing jhaw: Siyiex, awm: cao: giex kaing: li heue.
Nadap mai Abihu yum: sivoe Simiang Siyiex, yam tan kix ngu pa ang singax kah sivoe Simiang Siyiex kah daux tiag gawng Sina, mai kiex ang koe: kawnpraix, mawh kheu nan: Eliza mai Itama yuh kaing jhaw: cao: giex kaing: li, kah greem: sivoe keeing: kix Arun heue.
Ceu Pwi Lewix Pa Yuh Kaing Daux NyiexGox Bwan: Man:
Simiang Siyiex ah nin: kah Mose,
"Teei doeh simie ceucat pwi Lewix khankix hoek dee dex, mai deuh kix kah plak sivoe cao: giex kaing: li Arun, sonsang pon kix tix yuh kaing jhaw: son nawh heue.
Mai kix tag yuh kaing tang: nawh, mai son pa lo cub pwi hun: khawm: uik, daux sivoe nyiiex gox bwan: man: bang: kum: pwi hun:, sonsang yuh kix kaing jhaw: son nyiiex gox bwan: man: heue.
Mai kix tag yaox tix khre: rien kah kraungkhrai: pa koe: kah daux nyiiex gox bwan: man: bang: kum: pwi hun:, mai ceu pa lo kawnpraix Isarilax, sonsang yuh kix kaing jhaw: nyiiex gox bwan: man: heue.
Maix tag tawx ceu pwi Lewix khankix kah Arun, mai kah kawn: simex nawh khankix, kix mawh pa hoik tawx maix kah nawh khawm: uik, khaing: daux sinax ceu pwi Isarilax heue.
"Mawh kheu nan: maix tag tawx beeh glawm: kah Arun mai kawn: simex nawh khankix, mai kix tag priex rien kah kaing cao: giex kaing: li, pwi tang kaux pa hoek dex tan: tag pon tix yum: heue."
Khaix an: Simiang Siyiex sikah kah Mose mai ah nin: heue.
"Jhak heue, tokaux Aux hoik laug tix teei ceu pwi Lewix khaing: sinax ceu pwi Isarilax khankix, son tang kawn: ai: kukaux, pa liang tix keh, sinax ceu pwi Isarilax khankix, mawh kheu nan: ceu pwi Lewix khankix, tag mawh pwi cie Aux,
Mawh kheu kawn: ai: khawm: uik mawh cie Aux, kah daux singaix pa hoik pah Aux kah kawn: ai: khankix khawm: uik, kah daux meung Ejiptux; Aux hoik kieh kawn: ai: pa koe: daux ceu pwi Isarilax khawm: uik singax singeh, son tokaux Cao: Aux, khawm: pwi mai khawm: khawng: brie khankix, kix tag mawh cie Aux, Aux mawh Simiang Siyiex heue.
Grawng: Teei Carang Ceu Pwi Lewix
Simiang Siyiex sikah mai Mose kah daux tiag gawng Sina ah nin:,
"Simin ceu pwi Lewix khankix, awm: koe: nyiiex ma: keeing: kix, mai kawn: nyiiex kawn: ma: kix, maix tag simin simex kukaux, jah kah pa koe: ju tix khix haok plak piang heue.
Mawh kheu nan: Mose simin kix awm: gumlox pa hoik tawm: Simiang Siyiex kah nawh heue.
Inkix mawh ceukaux kawn: simex Lewix, Gerashon, Kawhat mai Merarix.
Ceukaux kawn: simex Gerashon, mawh Libanix mai Shimi awm: pa koe: kawn: nyiiex kawn: ma: kix.
Kawn: simex Kawhat, mawh Amaran, Izaha, Hebaron, mai Awzazilax, awm: pa koe: kawn: nyiiex kawn: ma: kix.
Kawn: simex Merarix mawh Mahalix mai Mushix, awm: pa koe: kawn: nyiiex kawn: ma: kix, inkix mawh kawn: nyiiex kawn: ma: ceu pwi Lewix khankix, awm: pa koe: doeh nyiiex ma: keeing: kix heue.
Pa lih tix koe: khaing: Gerashon mawh doeh nyiiex ma: ceu pwi Libanix khankix, mai doeh nyiiex ma: ceu pwi Shimix, inkix mawh doeh nyiiex ma: ceu pwi Gerashon heue.
Ceu pwi an: kix pa hoik simin tix, awm: pa koe: kawn: simex khankix, jah kah pa koe: ju tix khix, haok plak piang can pwi pa hoik simin tix ddeuh, koe: aliah rheng: phwan: yieh (7500) kaux heue.
Doe nyiiex ma: ceu pwi Gerashon khankix, tag mawh pa sang bang: tix ot plak khaix nyiiex gox bwan: man: kah plak glip singaix heue.
Cao: kaing: pa kwang: kah piang nyiiex ma: keeing: ceu pwi Gerashon khankix, mawh Eliasa kawn: simex Lelax heue.
Beeh glawm: kawnpraix ceu pwi Gerashon kah daux nyiiex gox bwan: man:, mawh man: vie vungviang nyiiex gox bwan: man: mai braux, man: tie son diang siviex nyiiex gox bwan: man: bang: kum: pwi hun: khankix,
mai man: tie son diang siviex gwang nyiiex gox bwan: man:, mai can pa feuk hawt vungviang nyiiex gox bwan: man:, mai dee koe: khu: dee tan, khawm: maox pa shiao khankix, mai kaing jhaw: pa dex pa dawd mai kix khawm: uik khawm: leeing: heue.
Pa lih tix koe: khaing: Kawhat mawh doeh nyiiex ma: ceu pwi Amaram, doeh nyiiex ma: ceu pwi Izaha, doeh nyiiex ma: ceu pwi Hebaron, mai doeh nyiiex ma: ceu pwi Awzalax khankix, inkix mawh doeh nyiiex ma: ceu pwi Kawhat heue.
Awm: pa hoik simin kix tix yaox simex khawm: uik jah kah pa koe: ju tix khix haok plak piang, koe: daix rheng: liah yieh (8600) kaux, kix mawh cub pwi pa priex rien kah dee pa singax singeh heue.
Doeh nyiiex ma: Kawhat tag mawh pa bang: tix ot kah plak plak seh nyiiex gox bwan: man: heue.
Mai cao: kaing: pa kwang: kah piang doeh nyiiex ma: keeing: ceu pwi Kawhat mawh Elizaphan pa mawh kawn: simex Awzelax heue.
Beeh glawm: kix mawh pa viex teug bwan: pa kham: mhai: sakse, pheen:, pang: jawk ten: khri:, mai khu: dee tan, khawm: kraung pa shiao dee pa singax singeh, man: tie plak daux, mai can ceu pa shiao khawm: uik heue.
Eliza kawn: simex cao: giex kaing: li Arun tag mawh cao: kaing: ting kah piang cao: kaing: ceu pwi Lewix mai kia: ngien kah pa priex rien dee singax singeh khankix heue.
Pa lih tix koe: khaing: Merarix mawh doeh nyiiex ma: ceu pwi Mahalix, mai doeh nyiiex ma: ceu pwi Mushix, inkix mawh doeh nyiiex ma: Merarix khankix heue.
Mai ceu pwi pa hoik simin tix, pa hoik simin tix yaox kah simex khawm: uik, jah kah pa koe: ju tix khix haok plak piang, koe: liah rheng: ra: yieh (6200) kaux heue.
Cao: kaing: pa kwang: kah piang nyiiex ma: keeing: ceu pwi Merarix mawh Zurelax pa mawh kawn: simex Abihielax, in: Khankix mawh pwi pa bang: tix ot kah praok plak laong: nyiiex gox bwan: man: heue.
Beeh glawm: son kawn: prai Merarix khankix mawh pa viex ceu in: khankix, phia:, lat, rong:, daux jhup jaong kraungkhrai: pa shiao, mai kaing jhaw: pa dex pa dawd mai ceu an: khawm: uik;
Mai rong: hawt vungviang gwang nyiiex gox bwan: man:, tau mai daux jhup jaong, lag, mai maox khankix heue.
Can kix pa bang: tix ot sivoe nyiiex gox bwan: man: plak lih singaix, mai plak sivoe nyiiex gox bwan: man: bang: kum: pwi hun: mawh Mose, Arun mai kawn: simex nawh khankix, kix mawh pa priex kah dee pa sngax singeh, sonsang pon yuh tix tawx ceu pa lo kuceu son ceu pwi Isarilax khankix, pwi tang: kaux pa hoek dex tan: tag pon tix yum: heue.
Can pwi pa hoik simin khaing: ceu pwi Lewix khawm: uik, pa hoik simin Mose mai Arun awm: gumlox pa hoik tawm: Simiang Siyiex, awm: pa koe: doeh nyiiex ma: kix, pa mawh kawn: simex, jah kah pa koe: ju tix khix haok plak piang koe: ra: mheen: ra: rheng: (22000)kaux heue.
Grawng: Appong: Pwi Lewix Kah Tang: Kawn: Ai:
Simiang Siyiex ah nin: kah Mose, "Simin kawn: ai: ceu pwi Isarilax khawm: uik jah kah pa koe: ju tix khix haok plak piang, mai teei carang kix khawm: uik heue.
Maix tag teei ceu pwi Lewix mawh son Aux, Aux mawh Simiang Siyiex, mai teei kix son tang: kawn: ai: khaing: daux sinax ceu pwi Isarilax khawm: uik, mai khawng: brie pa eei: ceu pwi Lewix khankix, son tang: kawn: liang pa keh daux sinax khawng: brie ceu pwi Isarilax khawm: uik heue.
Mawh kheu nan: Mose simin kah carang kawn: ai: pa keh daux sinax ceu pwi Isarilax khankix, awm: gumlox pa hoik tawm: Simiang Siyiex kah nawh heue.
Can kawn: simex pa mawh kawn: ai:, pa hoik simin kah ceukaux khawm: uik, jah kah pa koe: ju tix khix, haok plak piang, can pa hoik simin khawm: uik koe: ra: mheen: ra: rheng: ra: yieh atigliah loe: (22273) kaux heue.
Khaix an: Simiang Siyiex sikah kah Mose ah nin:,
"Teei ceu pwi Lewix khankix, son tang: kawn: ai:, khaing: daux sinax ceu pwi Isarilax, mai teei khawng: brie cie ceu pwi Lewix khankix, son tang: khawng: briex pa eei: ceu pwi Isarilax khankix, ceu pwi Lewix tag mawh cie Aux, Aux mawh Simiang Siyiex heue.
Mai sonsang deeh taoh maix kah kawn: ai:, ceu pwi Isarilax khankix, ra: yieh atigliah loe: kaux, pa nie lheu: khaing: carang ceu pwi Lewix khankix;
Maix tag teei mau phwan: shekhe, kah kix kukaux, maix tag teei an: khankix, kah plak mau shekhe pa priex kix singax singeh, pa mawh mau tix shekhe sidu tinga: gerax heue.
Maix tag tawx mau pa tawx kix khaing: ngawh pa deeh taoh kix pwi pa lheu: kah Arun mai kawn: simex nawh khankix.
Mawh kheu nan: Mose teei mau pa deeh taoh khaing: pwi an: pa lheu: khaing: pwi pa hoik deeh taoh ceu pwi Lewix kah.
Khaing: kawn: ai: ceu pwi Isarilax khankix, nawh teei mau tix rheng: loe: yieh tigliah phwan: (1365) shekhe, awm: pa koe: ngawh jum mau shekhe pa hoik priex nawh singax singeh heue.
Mai Mose tawx mau pa deeh taoh kix kah Arun, mai kawn: simex nawh khankix, awm: lox krai Simiang Siyiex, mai awm: gumlox pa hoik tawm: Simiang Siyiex heue.
Beeh Glawm: Kawn: Simex Kawhat
Simiang Siyiex ah nin: kah Mose mai Arun,
"Teei carang kawn: simex Kawhat khankix, khaing: daux sinax ceu pwi Lewix, awm: pa koe: nyiiex ma: kix, mai nyiiex ma: keeing: kix;
jah kah pa koe: ju tingoe: num haok plak piang, tom: hoek kah pa dex koe: ju tix phwan: num, pa sang laig tix yuh kaing jhaw: kah daux nyiiex gox bwan: man: bang: kum: pwi hun:.
In: mawh kaing jhaw: kawn: simex Kawhat khankix, kah daux nyiiex gox bwan: man: bang: kum: pwi hun:, pa dex dawd mai ceu pa kied singax singeh khankix heue.
Yam khre: rien kix tix lih hu: khaing: dee bang: dee peung tix, Arun mai kawn: simex nawh khankix tag hoek mai kix tag teei man: tie plak daux lih, mai tawb tix deuh teug bwan: pa kham: mhai: sakse kah an: heue.
Khaix an: kix tag lhop hak phix (Tahashax) kah piang an: tix plah, mai baox lhop man: klai raoma: tix plah kah piang, mai kix tag chup tix deuh khaox glawm: nawh heue.
Kah piang pheen: khan: khaomun, kix tag tawm tix deuh man: pa klai raoma: tix pheen:, mai deuh pan, cawn:, tawg, mai klong: rawm:, son pa sang see: tix khankix kah piang, mai khaomun pa khan:, tag mawh pa koe: kah piang an: heue.
Kix tag tawb man: pa raoh rawt tix pheen: kah piang an: kix, mai baox deeh tawb hak phix (Tahashax) tix plah kah piang an: mai kix tag chup tix deuh khaox glawm: nawh heue.
Mai kix tag teei man: pa klai raoma: tix pheen:, mai tawb kah piang pang: jawk ten: khri:, mai kawk ngu, sigiep ngu, tawg nyia ngu, mai kawk bee mai ceu pa sang shiao kix kah son an:.
Khaix an: kix tag sau: kraungkhrai: pa shiao khankix, kah plak daux mai tawb kah hak phix (Tahashax) tix plah, mai deuh kah piang khaox glawm:.
Kah piang khu: khri: dee tan, kix tag tawb man: pa klai raoma: tix pheen: mai kheem: kah hak phix (Tahashax) tix plah, mai chup tix deuh khaox glawm: kah heue.
Khaix an: kix tag teei kraungkhrai: pa shiao tix khawm: uik son kaing jhaw: pa sang yuh kix kah dauh dee pa singax singeh, mai sau: kah plak daux man: klai raoma: tix pheen:, mai kix deeh kheem: an: khankix kah hak phix (Tahashax) tix plah, mai sau: an: kah piang khaox glawm.
Kix tag teei tix tik nyaox khaing: kah piang khu: dee tan mai tawm man: lung pliex tix pheen: kah piang.
Kix tag sau: tix deuh kraungkhrai: pa sang shiao kix kah daux kaing jhaw: pa yuh tix tan: khawm: uik, pa mawh pan ngu, khaox sigawng: nex, sipeed vieh plah, mai pan khoek, mai can kraung pa shiao kix son khu: dee tan. mai kix tag lhop tix deuh hak phix (Tahashax) tix plah kah piang kraung an:, mai chup tix deuh khaox glawm: kah heue.
Yam hoik tawb Arun mai kawn: simex nawh khankix kah dee pa singax singeh, mai can kraungkhrai: pa shiao kix son dee pa singax singeh khawm: uik, yam deeh lih hu: kix khaing: nyiiex bang: tix; khaix an: kawn: simex Kawhat khankix tag hoek tix klawm: ceu an: khankix hu: heue. Viang mawh nan: kix tag ang pon tix hu: krox hu: teeh kah ceu pa singax singeh an: tix ceu kawx, son ang kix pon tix hoek krax yum:. Inkix mawh can ceu pa koe: kah daux nyiiex gox bwan: man: bang: kum: pwi hun:, pa sang klawm kawn: simex Kawhat hu: heue.
Beeh glawm: pa hoik ap kah Eliza kawn: simex cao: giex kaing: li Arun, mawh bee tok, mai nyawng bhawng:, krax tan phawng: nghoxca im: son ku singaix, bee groi, mai can kraungkhrai: kah daux nyiiex gox bwan: man: khawm: uik, mai can pa koe: daux nawh khawm: uik tau mai dee pa singax singeh, mai kraungkhrai: pa shiao kix khawm: uik.
Simiang Siyiex ah nin: kah Mose mai Arun,
"Paw tat tix tik doeh nyiiex ma: ceu pwi Kawhat khankix khaing: daux sinax ceu pwi Lewix,
Viang mawh nan: yuh ceu inkix pa dex pa dawd mai kix, sonsang im: ju kix, mai son ang kix pon tix yum: kah, yam hoek kix dex ceu pa kied singax singeh. Arun mai kawn: simex nawh khankix tag hu: laig kah plak daux sivoe, mai tawx beeh glawm: kah kix kaux mawx kaux an:, son kaing jhaw:, mai kaing pa sang yuh kix.
Viang mawh nan: kix tag ang pon tix laig kah plak daux, sonsang jhak simi kah ceu pa singax singeh, phan: ang mawh nan: kix tag yum: kah heue."
Beeh Glawm: Kawn: Simex Gerashon
Simiang Siyiex ah nin: kah Mose,
"Baox teei carang kawn: simex Gerashon khankix, awm: pa koe: doeh nyiiex ma: keeing: kix, mai pa koe: doeh nyiiex ma: kix.
Jah kah pa koe: ju tingoe num haok plak piang tom: hoek kah pa koe: ju tix phwan: num, maix tag simin kah pwi pa laig tix yuh kaing jhaw:, mai pa sang pon yuh kaing: daux nyiiex gox bwan: man: bang: kum: pwi hun:.
In: mawh kaing jhaw: cie doeh nyiiex ma: ceu pwi Gerashon, mai pa sang teei kix beeh glawm: khankix.
Kix tag klawm: man: tie nyiiex gox bwan: man:, mai man: tawb kah piang nyiiex gox bwan: man: bang: kum: pwi hun:, mai hak phix (Tahashax) pa kheem: kah piang an:, khawm: man: tie siviex nyiiex gox bwan: man: bang: kum:;
Mai man: tie siviex laig daux biang, man: feuk son hawt vungviang biang nyiiex gox bwan: man: mai khu: dee tan, mai maox nawh khankix, kraung pa shiao, son kaing jhaw: khawm: uik, mai can ceu pa hoik yuh kix tix deuh khawm: uik, kix tag yuh kaing jhaw: inkix.
Arun mai kawn: simex nawh khankix, tag ap kaing jhaw: kah kawn: simex Gerashon, khawm: kaing pa sang yuh kix mai kaing jhaw: pa koe: beeh glawm: kix tix yuh khawm: uik, mai maix tag gwieh kaing pa sang yuh khawm: uik awm: pa koe: beeh glawm: kix.
Inkix mawh kaing jhaw: cie doeh nyiiex ma: kawn: simex Gerashon khankix kah daux nyiiex gox bwan: man bang: kum:, beeh glawm: kix tag koe: greem: tawm: taix Itama pa mawh kawn: simex Arun cao: giex kaing: li heue.
Beeh Glawm: Kawn: Simex Merarix
"Son kawn: simex Merarix khankix, maix tag simin awm: koe: doeh nyiiex ma: kix, mai doeh nyiiex ma: keeing: kix.
Jah kah pa koe: ju tingoe: num haok plak piang tom: hoek kah pa koe: ju tiphwan: num, maix tag simin kix pa pon laig daux kaing jhaw: kukaux, sonsang yuh kix kaing jhaw: daux nyiiex gox bwan: man: bang: kum:.
Mai kaing pa caw kix tix teei beeh glawm:, son nyiiex gox bwan: man: bang: kum:, mawh pa tag klawm: kah khaox phia: nyiiex gox bwan: man:, lat, rong:, mai daux jhup jaong khankix;
Mai rong: hawt vungviang biang mai daux jhup jaong khankix, lag mai maox, khawm: kraung pa shiao kix tau mai an: khawm: uik, mai kaing jhaw: pa caw kix tix yuh, maix tag tawx beeh glawm: awm: pa koe: ceukaux kix.
In: mawh kaing jhaw: cie doeh nyiiex ma: kawn: simex Merarix khankix, son nyiiex gox bwan: man: bang: kum:, greem: tawm: taix Itama kawn: simex Arun cao: giex kaing: li heue."
Grawng: Ceu Pwi Lewix
Mose mai Arun khawm: cao: kaing: pwi hun: hoik simin kawn: simex ceu pwi Kawhat khankix, awm: pa koe: doeh nyiiex ma: kix, mai doeh nyiiex ma: keeing: kix,
jah kah pa koe: ju tingoe: num haok plak piang tom: hoek kah pa koe: ju tiphwan: num, pa pon laig daux kaing jhaw: kukaux, son kaing pa koe: kah daux nyiiex gox bwan: man: bang: kum: khankix;
Mai can pwi pa hoik simin tix, awm: pa koe: doeh nyiiex ma: kix, koe: ra: rheng: aliah yieh tiphwan: (2750) kaux.
Inkix mawh doeh nyiiex ma: ceu pwi Kawhat, pa pon tix yuh kaing kah daux nyiiex gox bwan: man: bang: kum:, pa hoik simin Mose mai Arun, awm: lox pa hoik tawm: Simiang Siyiex kah Mose heue.
Can pwi pa hoik simin tix khaing: kawn: simex Gerashon, awm: pa koe: doeh nyiiex ma: kix mai doeh nyiiex ma: keeing: kix;
jah kah pa koe: ju tingoe: num haok plak piang tom: hoek kah pa koe: ju tiphwan: num, pa pon tix laig daux kaing jhaw: kukaux, son kaing pa koe: kah daux nyiiex gox bwan: man: bang: kum:,
Mai can pwi pa hoik simin tix, awm: pa koe: doeh nyiiex ma: kix, khawm: doeh nyiiex ma: keeing: kix, koe: ra: rheng: liah yieh tingoe (2630) kaux.
Inkix mawh pwi pa hoik simin kix khaing: doeh nyiiex ma: kawn: simex Gerashon, pa sang pon tix yuh kaing jhaw: kah daux nyiiex gox bwan: man: bang: kum: pwi hun: khawm: uik, pa hoik simin Mose mai Arun awm: lox pa hoik tawm: Simiang Siyiex heue.
Inkix mawh doeh nyiiex ma: kawn: simex Merarix, pa hoik simin tix khaing: nyiiex ma: kix, mai doeh nyiiex ma: keeing: kix khankix,
jah kah pa koe: ju tingoe: num haok plak piang tom: hoek kah pa koe: ju tiphwan: num kukaux, pa pon tix yuh kaing jhaw:, son kaing pa koe: kah daux nyiiex gox bwan: man: bang: kum: pwi hun: khankix;
Can pwi pa hoik simin tix awm: pa koe: doeh nyiiex ma: kix khankix, koe: loe: rheng: ra: yieh (3200) kaux heue.
Inkix mawh pwi pa hoik simin tix khaing: doeh nyiiex ma: kawn: simex Merarix, pa hoik simin Mose mai Arun, awm: lox tawm: Simiang Siyiex kah Mose heue.
Can pwi pa hoik simin tix khaing: ceu pwi Lewix khawm: uik, pa hoik simin Mose mai Arun, khawm: cao: kaing: ceu pwi Isarilax khankix, awm: pa koe: doeh nyiiex ma: kix, mai doeh nyiiex ma: keeing: kix,
jah kah pa koe: ju tingoe: num haok plak piang tom: hoek kah pa koe: ju tiphwan: num kukaux, pa sang hoek tix yuh kaing jhaw:, mai pa kham: tix yuh kaing ceu an: khankix, kah daux nyiiex gox bwan: man: bang: kum: pwi hun:.
Can pwi pa hoik simin tix deuh, koe: daix rheng: phwan: yieh tidaix (8580) kaux.
Awm: lox pingnyap pa hoik tawx Simiang Siyiex, kix mawh pa hoik simin Mose kaux mawx kaux an:, awm: pa koe: kaing jhaw: kix, mai awm: kaing pa caw kix tix yuh khankix; mawh kheu nan: kix mawh pa hoik simin tokaux Mose, awm: lox pa hoik tawm: Simiang Siyiex heue.
Grawng: Tang: Deuh Pwi Ang Singax Ot Nongnong:
Simiang Siyiex krai kah Mose ah nin:,
"Tawx lox kah ceu pwi Isarilax khankix, sonsang kieh pwi saux sipawg mai pwi pa koe: jhawm: saux lih nham: seeing: kukaux, mai can pwi pa seeing: brai: kah hu: teeh tokaux pa yum: khankix deuh kah plak praix dee bang: kix.
Maix tag deuh simex mai bun: khankix ot kah plak praix. Khaing: bang: son ang kix pon kieh dee bang: seeing: brai: kah dauh dee ot Aux.
Mai ceu pwi Isarilax yuh an: khankix, mai deuh kix kah plak praix nyiiex bang: kix, awm: pa hoik tawm: Simiang Siyiex kah Mose, mawh kheu nan: ceu pwi Isarilax khankix, hawt tix yuh awm: an: heue.
Grawng: Pa Khyox Khaw: Mai Pa Deeh Plud
Simiang Siyiex ah nin: kah Mose,
"Krai kah ceu pwi Isarilax khankix, yam phit lud simex ang ah, bun: ang ah, awm: pa yie phit kawn: pwi mai nawh phit lud kah Simiang Siyiex.
Nawh tag krai doh kah phimap pa hoik yuh tix mai nawh khyox Khaw: heue, mai nawh deeh plud kah pwi pa phit nawh kah, mai baox naok tix tawx phwan: son tix son kah piang an:,
viang mawh nan: phan: pwi pa phit nawh kah hoik yum:, mai ang lai koe: paox nyiiex paox ma: sonsang rieb tix krax pa pluat son pa phit nawh, mai nawh tag hu: kah cao: giex kaing: li Simiang Siyiex, mai tan kawn: yung: mhaing: tix mu: sonsang pluat ploi: phimap pa yuh nawh.
Krax tan kuceu pa singax ceu pwi Isarilax khawm: uik, pa viex kix hoek kah cao: giex kaing: li tag mawh cie kix.
Can ceu pa singax pa tan pwi kukaux kah cao: giex kaing: li tag mawx cie cao: giex kaing li khankix heue,
Been Pa Dex Mai Mex Moeng
Simiang Siyiex krai ah nin: kah Mose,
"Krai kah ceu pwi Isarilax khankix, mai ah nin: kah kix, phan: moeng tix kauxkaux sawg tix hu: vungviang mai yuh krax pa ang kaux sijax kah mex nawh;
phan: simex tix kaux, it tau mai nawh phan: mex nawh ang tawng, mai mawh pa mox tix mai laux min: pakngai:, kah Grawng: pa ang singax kah tokaux tix, mai pa ang koe: sakse, mai viang pwi ang yaox dee phit kiex kaw;
Phan: laux pakngai: ang ah, ang laux ang ah, phan: nawh ang yumrhawm: kah moeng tix,
nawh tag viex moeng tix hoek kah cao: giex kaing: li mai nawh tag viex krax tan phawng: nghoxca im:, tix Epha kao: son tix son kah pa tan son nawh. Nawh tag ang pon tix see: bee kah piang an:, mai ang pon tix sau: bee Lawpan pa sioe bhawng: kah piang an:, kheu mawh an: krax tan pa ang yumrhawm: kah moeng tix, mai sonsang doh keut kah phimap pa yuh tix.
"Mai cao: giex kaing: li tag viex nawh hoek dee dex, mai deuh nawh kah plak sivoe Simiang Siyeix;
cao: giex kaing: li tag teei rawm: pa singax mai sau: daux aw: tiex, mai teei phawng: tiex, pa koe: kah piang tiex daux nyiiex gox bwan: man: mai sau: ankix kah daux rawm:.
Cao: giex kaing: li tag deuh bun: an: kah plak sivoe ngai: Simiang Siyiex, mai plak tix tik pa kheem: kah piang kaing: bun:, mai sau: krax tan son pa doh keud, kah daux taix nawh, pa mawh krax tan phawng: nghoxca im:, pa viex krax pa ang yumrhawm:, mai cao: giex kaing: li tag giex tix deuh kawk rawm: song: pa viex krax pa jhax lawg kah daux tawm: taix tix.
Cao: giex kaing: li tag kieh nawh tiextu, mai nawh ah nin: kah bun: an:, phan: simex tang: kaux, ang it tau mai maix mai phan: maix ang phit mai simex tang: kaux mai ang seeing: brai:, kieh maix lawt luan khaing: rawm: song: in: pa viex krax pa jhax lawg.
Viang mawh nan: phan: maix hoik phit kah simex tang: kaux kah piang mex tix, mai hoik kieh tokaux tix seeing: brai:, mai phan: simex tang: kaux pa ang mawh mex maix hoik it tau mai maix,
(Cao: giex kaing: li tag kieh bun: an: tiextu tix kah gumlox pa jhax lawg, mai nawh tag ah nin: kah bun: an:). Simiang Siyiex tag sang tawx krax pa jhax lawg, mai krax pa tiextu, kah piang maix, khaing: daux sinax ceu pwi maix, Simiang Siyiex tag kieh ba: maix fit hu: mai kieh vaig maix uah.
Rawm: pa hoik jhax lawg, tag sang laig daux vaig maix, mai kieh vaig maix uah, mai kieh khawn: ba: maix fit hu: mai bun: an: tag sang ah,Amen Amen
"Cao: giex kaing: li tag tiem: tix deuh gumlox pa tiextu kah daux phuk lai, mai nawh tuk taik tix sau: an: kah daux rawm: pa song:.
Mai nawh tag tawx bun: an: nyaux rawm: pa song:, pa viex krax pa jhax lawg an:, mai rawm: song: pa viex krax pa jhax lawg, tag laig daux nawh, sonsang lih tix mawh pa song:.
Cao: giex kaing: li tag teei krax tan phawng: nghoxca im: pa ang yumrhawm: kah moeng tix, mai yuh krax tan yangyeuh kah sivoe Simiang Siyiex, mai viex nawh hoek kah khu: dee tan;
cao: giex kaing: li tag teei krax tan an: tix jhawp kah taix tix son pa doh keud, mai gleeing an: kah piang khu: dee tan, khaix an: nawh tag tawx bun: nyaux rawm: an: heue.
Khaix hoik tawx nawh bun: an: nyaux rawm:, ceu an: lih tix mawh, phan: nawh hoik yuh pa seeing: kah tokaux tix mai hoik yuh pa phit lud piang mex tix, rawm: an: pa viex krax pa jhax lawg tag laig kah daux nawh mai lih tix mawh pa song:, mai vaig nawh tag uah mai ba: nawh tag fit hu:, mai bun: an: tag lih tix mawh pa pon krax jhax lawg, khaing: sinax ceu pwi nawh khankix heue.
Viang mawh nan: phan: bun: ang nyang yuh pa seeing: kah tokaux tix mai phan: nawh mawh pa singax, khaix an: nawh tag lawt luan mai nawh tag deeh koe: kaux.
"In: mawh gumlox beenli pa ang yumrhawm: kah moeng tix, pa phit lud kah simex tang: kaux piang mex tix, mai koe: pa seeing: pa brai:,
yam ang simex koe: krax yumrhawm: kah piang moeng tix, khaix an: nawh tag deuh kah plak sivoe ngai: Simiang Siyiex, mai cao: giex kaing: li tag prawng ca: nawh awm: gumlox beenli in:,
Mai simex tag lawt luan khaing: phimap, bun: tag yaox tix kham: geu kah phimap tix heue.
Gumlox Been Son Nazarix
Simiang Siyiex krai ah nin: kah Mose,
"Krai ah nin: kah ceu pwi Isarilax khankix, simex ang ah, bun: ang ah, yam tiextu nawh tokaux tix yuh sijax mukheu kah gumlox been Nazarix mai sonsang tang: gwieh nawh tokaux tix kah son Simiang Siyiex;
Nawh tag twah rawm: plix siiet, mai plai: khiien:, nawh tag ang pon tix nyaux plai: rawm: plix siiet pa niex pa hoik yuh kah plix siiet, nawh tag ang pon tix nyaux kah rawm: plix siiet ang pon tix ih kah plix siiet pa im: ang ah, pa kroh ang ah.
Glang: yam tang: tiah nawh tokaux tix, nawh tag ang pon tix ih khaing: nhu: plix siiet tix ceu kawx, pa mawh simie ang ah, ghlaok ang ah.
"Glang: yam kawn: yuh nawh sijax mukheu mai tang: tiah tokaux tix, nawh tag ang pon tix khlao: hauk kaing: tix tom: hoek singaix grum naog, krax pa tang: tiah tokaux tix son Simiang Siyiex, nawh tag caw tix singax singeh; khaix an: nawh tag kieh hauk kaing: tix kwah tom: lang:.
"Glang: yam kawn: tang: tiah nawh tokaux cao: tix son Simiang Siyiex, nawh tag ang pon tix hu: dex tokaux pa yum:.
Nawh tag ang pon yuh tokaux tix seeing: yam yum: keeing: nawh ang ah, miex nawh ang ah, mai pux aik pux o: nawh ang ah, mawh kheu hoik tang: tiah nawh tix ot son Siyiex, koe: kah piang kaing: nawh.
Glang: yam kawn: tang: tiah nawh tokaux tix son Simiang Siyiex, nawh tag caw tix singax singeh.
"Phan: pwi tix kauxkaux yum: sijaox hawt dex nawh, mai nawh kieh kaing pa appong: tix singax seeing: brai:, nawh tag khlao: hauk kaing: tix, kah daux singaix pa sang deeh kieh nawh tokaux tix singax kah daux singaix aliah.
Kah daux daix singaix nawh tag viex sikaux ra: mu:, phan: ang mawh nan: kawn: keukie ra: mu: ang ah, cao: giex kaing: li hawt diang siviex nyiiex gox bwan: man: bang: kum:,
mai cao: giex kaing: li tag tan son krax tan pa pluat ploi: phimap tix mu:, mai tang: mu: tan son krax tan pa gleeing, mai yuh krax pa khyox Khaw:, son krax pa pluat ploi: son nawh, kheu hoik phit lud nawh, kah Grawng: tokaux pa yum:. Mai nawh tag kieh kaing: tix singax tau kah daux singaix an:.
Nawh tag viex kawn: yung: pa naog num son krax tan pa pluat ploi: son krax phit lud, mai ap peu tokaux tix son Simiang Siyiex kah bawg yam pa hoik tang: tiah nawh tokaux tix singaix pa hoik luan khankix, tag mawh pa grai: pa grup, mawh kheu pa hoik tang: tiah nawh tokaux tix hoik mawh pa seeing:.
"In: mawh gumlox been son Nazarix yam hoik grum naog singaix pa tang: tiah nawh tokaux tix mai tag viex nawh hoek kah diang siviex nyiiex gox bwan: man: bang: kum:.
Mai nawh tag tan kawn: yung: mhaing: pa naog num pa loig tix mu: son krax tan pa gleeing kah Siyiex, mai kawn: yung: shiang:, pa naog num pa loig tix mu: son krax tan pa pluat ploi: phimap, mai pex pa loig tix mu: son krax tan pa nhim;
khaomun pa ang sau: susaix tix khrawng:, khaomun plah phawng: nghoxca im: ceu pa mhawm:, pa hoik klao: tix tau mai bee, khaomun rhi: khlawp pa hoik kleeid tau mai bee, mai krax tan phawng: nghoxca im:, khawm: krax tan pa nyaux khankix.
Cao: giex kaing: li tag viex an: khankix hoek sivoe ngai: Simiang Siyiex, mai yuh krax tan pa pluat ploi: phimap, mai krax tan pa gleeing,
nawh tag tan pex mhaing: son krax tan pa nhim: kah Simiang Siyiex tau mai khaomun pa ang sau: susaix tix khrawng:; cao: giex kaing: li tag tan krax tan phawng: nghoxca im: mai krax tan pa nyaux.
Mai pwi Nazarix tag khlao: hauk kaing: pa hoik appong: tix hawt diang siviex nyiiex gox bwan: man: bang: kum:, mai kix teei hauk khankix khaing: kaing: pa appong: tix, mai sau: kah piang ngu greem: krax tan pa nhim: pa tan tix.
Mai cao: giex kaing: li tag teei klip taix pex mhaing: pa hoik ngaik tix tau mai khaomun pa ang sau: susaix tix plah khaing: daux khrawng:, mai khaomun rhi: khlawp pa ang sau: susaix tix khlawp, mai deuh an: kah piang taix pwi Nazarix khaix hoik khlao: nawh hauk kaing: pa appong: tix khankix,
Mai cao: giex kaing: li yangyeuh an: son krax tan pa yangyeuh sivoe Simiang Siyiex; nex eek krax tan pa yangyeuh mai nex ba: krax tan pa yaox mawh pa singax singeh son cao: giex kaing: li; khaix an: pwi Nazarix pon tix nyaux rawm: plix siiet heue.
"In: mawh beenli son pwi Nazarix pa yuh sijax mukheu son pa yuh nawh krax tan pa tang: tiah tix kah Simiang Siyiex, lheu: khaing: an:, can krax pa pon yuh nawh khankix, mawh krax pa yuh nawh sijax mukheu, nawh tag caw tix hawt yuh awm: beenli pa hoik tang: tiah nawh tix yuh sijax mukheu pa yuh tix heue."
Bwanson: Pa Nawb Cao: Giex Kaing: li
Simiang Siyiex krai ah nin: kah Mose,
"krai ah nin: kah Arun mai kawn: simex nawh khankix, in: mawh Grawng: pa sang nawb maix bwan:, kah ceu pwi Isarilax maix tag ah nin: kah kix.
Kieh Simiang Siyiex nawb bwan: kah maix mai priex rien kah maix,
kieh Simiang Siyiex jhan: pa riieng pakngai: Tix kah piang maix mai tawx bwanson: krax pa caoxrhawm: caoxrhi: Tix kah maix;
kieh Simiang Siyiex maong tix jhak kah piang maix; mai tawx krax pa nhim: kah maix.
Mai kix tag deuh min: ceukaux Aux, kah piang ceu pwi Isarilax, mai Aux tag nawb bwanson: kah kix heue."
Grawng: Krax Tan Lu Cao: Kaing:
Yam hoik sidauh yuh Mose nyiiex gox bwan: man:, nawh groi bee kah piang nyiiex gox bwan: man:, mai khrawm: kraung pa shiao khankix, mai baox groi rawm: bee kah piang khu: dee tan, mai kraung pa shiao khankix tau mai kieh ceu an: singax singeh heue.
Cao: kaing: ceu pwi Isarilax khankix, mai cao: kaing: doeh nyiiex ma: keeing: kix, pa mawh cao: kaing: doeh ceucat kix, mai pwi pa hoik laig carang khankix yuh krax tan,
mai kix viex krax tan tix hoek sivoe Simiang Siyiex, ling: lawx koe: braux liah lhang:, mai moi mhaing: kao: ra: mu:, son cao: giex kaing: ra: kaux ling: lawx koe: braux tix lhang: mai moi mhaing: tix kaux tix mu:, kix tan ceu an: kah Simiang Siyiex sivoe nyiiex gox bwan: man: heue.
Khaix an: Simiang Siyiex ah nin: kah Mose,
"Rieb ceu in: khaing: kix sonsang shiao kah daux kaing jhaw: nyiiex gox bwan: man: bang: kum:, mai ap ceu an: kah ceu pwi Lewix awm: pa koe: kaing jhaw: pa yuh kix heue."
Mose rieb ling: lawx an: mai moi khankix, mai ap kah ceu pwi Lewix.
Nawh tawx ling: lawx ra: lhang: mai moi pon: mu: kah kawn: simex Gerashon, awm: kaing jhaw: pa yuh kaux mawx kaux an:;
mai nawh tawx ling: lawx pon: lhang:, mai moi daix mu: kah kawn: simex Merarix, awm: kaing jhaw: pa yuh kix pa ot greem: pa thong: Itama pa mawh kawn: simex Arun cao: giex kaing: li heue.
Viang mawh nan: nawh ang tawx kah kawn: simex Kawhat, mawh kheu kaing jhaw: kix mawh kaing jhaw: pa klawm: kraung pa singax singeh.
Cao: kaing: khankix yuh krax tan pa appong: kah khu: dee tan kah daux singaix pa groi rawm: bee, mai cao: kaing: khankix yuh krax tan tix kah plak sivoe khu: dee tan.
Mai Simiang Siyiex ah nin: kah Mose, "Cao: kaing: tag yaox tix yuh krax tan tix ngaix tix kaux son krax tan pa appong: kah khu: dee tan heue.
Pwi pa tawx krax tan singaix jah, mawh Nashon kawn: simex Aminadap khaing: doeh ceucat ceu pwi Yudax;
pa tan nawh mawh panmau pa cien tiyieh tingoe: shekhe, mai pan khoek mau pa cien atigliah shekhe, awm: pa hoik sawn: kix kah plak mau shekhe dee pa singax singeh, an: khawm: ra: naog kah phawng: nghoxca ceu pa mhawm:, pa hoik klao: tix mai bee son krax tan phawng: nghoxca im:,
mai klong: khri: pa koe: kao: shekhe tix mu: pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax pa appong: krax tan pa nhim:, tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Nashon kawn: simex Aminadap.
Kah daux ra: ngaix Natanelax kawn: simex Zurax, pa mawh cao: kaing: doeh ceucat Isakha yuh krax tan;
pa tan nawh mawh panmau tix mu: pa cien tiyieh tingoe: shekhe, khawm: pan khoek mau tix mu: pa koe: atigliah shekhe, awm: pa hoik sawn: kix kah plak mau shekhe dee pa singax singeh, an: khawm: ra: naog kah phawng: nghoxca ceu pa mhawm:, pa hoik klao: tix mai bee son krax tan phawng: nghoxca im:;
klong: khri: pa koe: kao: shekhe tix mu:, mai pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax pa appong: kah krax tan pa nhim:, tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Natanelax kawn: simex Zurax.
Kah daux loe: ngaix Eliabax kawn: simex Helon, pa mawh cao: kaing: doeh ceucat Zebulun yuh krax tan;
Krax tan nawh mawh panmau tix mu: pa cien tiyieh tingoe: shekhe, khawm: pan khoek mau tix mu: pa cien atigliah shekhe awm: pa hoik sawn: kix kah plak mau shekhe dee pa singax singeh; an: khawm: ra: naog phawng: nghoxca ceu pa mhawm:, pa hoik klao: tix mai bee son krax tan phawng: nghoxca im:;
klong: khri: pa koe: kao: shekhe tix mu: pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu: mai kawn: yung: mhaing: pa naog num tix mu:,
son krax tan pa gleeing kawn: pex iak tix mu:;
mai son krax pa appong: kah krax tan pa nhim:, tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Eliabax kawn: simex Helon heue.
Kah daux pon: ngaix Elizurax kawn: simex Shedurax, pa mawh cao: kaing: doeh ceucat Rubin yuh krax tan;
krax tan nawh mawh panmau tix mu: pa cien tiyieh tingoe: shekhe, khawm: pan khoek mau tix mu: pa cien atigliah shekhe, awm: pa hoik sawn: kix kah plak mau shekhe dee pa singax singeh; an: khawm: ra: naog kah phawng: nghoxca ceu pa mhawm:, pa hoik klao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: yung: iak tix mu:;
mai son krax pa appong: krax tan pa nhim:, tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Elizurax kawn: simex Shedurax heue.
Kah daux phwan: ngaix Shelumilax kawn: simex Zurishadie, pa mawh cao: kaing: doeh ceucat Simion yuh krax tan;
krax tan nawh mawh panmau tix mu:, pa cien tiyieh tingoe: shekhe, khawm: pan khoek mau tix mu: pa cien atigliah shekhe, awm: krax pa hoik sawn: kix kah plak mau shekhe dee pa singax singeh, an: khawm: ra: naog kah phawng: nghoxca ceu pa mhawm: pa hoik klao: tix mai bee son krax tan phawng: nghoxca: im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax pa appong: krax tan pa nhim: tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Shelumilax kawn: simex Zurishadie heue.
Kah daux liah ngaix Eliasap kawn: simex Doelax, pa mawh cao: kaing: doeh ceucat Gat yuh krax tan;
krax tan nawh mawh panmau tix mu: pa cien tiyieh tingoe: shekhe, khawm: pan khoek mau tix mu: pa cien atigliah shekhe, awm: krax pa hoik sawn: kix kah plak mau shekhe dee pa singax singeh, an: khawm: ra: naog kah phawng nghoxca ceu pa mhawm: pa hoik klao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax tan pa ap pong krax tan pa nhim:; tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Eliasap kawn: simex Doelax heue.
Kah daux aliah ngaix Elishama kawn: simex Amihut, pa mawh cao: kaing: doeh ceucat Epharen yuh krax tan;
krax tan nawh mawh panmau tix mu: pa cien tiyieh tingoe: shekhe, khawm: pan khoek mau tix mu: pa cien atigliah shekhe, awm: pa hoik sawn: kix kah plak mau shekhe dee pa singax singeh, an: khawm: ra: naok kah phawng: nghoxca ceu pa mhawm: mai pa hoik klao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax tan pa appong: krax tan pa nhim:, tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Elishama kawn: simex Amihut heue.
Kah daux daix ngaix Gamalelax kawn: simex Pedazurax pa mawh cao: kaing: doeh ceucat Manashe yuh krax tan;
krax tan nawh mawh panmau tix mu: pa cien tiyieh tingoe: shekhe, khawm: pan khoek mau pa cien atigliah shekhe awm: pa hoik sawn: kix kah plak mau shekhe dee pa singax singeh, an: khawm: ra: naog kah phawng: nghoxca ceu pa mhawm:, mai pa hoik klao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa hoik naog num tix mu:;
son krax tan pa pluat ploi: phimap kawn: pex iak tix mu:;
mai son krax tan pa appong: krax tan pa nhim:, tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa tag naog num phwan: mu:. In: mawh krax tan Gamalelax kawn: simex Pedazurax heue.
Kah daux dim: ngaix Abidan kawn: simex Gidawnix, pa mawh cao: kaing: doeh ceucat Binyamin yuh krax tan;
krax tan nawh mawh panmau tix mu: pa cien tiyieh tingoe: shekhe, khawm: pan khoek mau pa cien atigliah shekhe, awm: pa hoik sawn: kix kah plak mau shekhe dee pa singax singeh, an: khawm: ra: naog kah phawng: nghoxca ceu pa mhawm:, mai pa hoik klao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax tan pa appong: krax tan pa nhim; tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Abidan kawn: simex Gidawnix heue.
Kah daux kao: ngaix Aheza kawn: simex Amishadie, pa mawh cao: kaing: doeh ceucat Dan yuh krax tan;
krax tan nawh mawh panmau tix mu: pa cien tiyieh tingoe: shekhe, khawm: pan khoek mau pa cien atigliah shekhe, awm: pa hoik sawn: kix plak mau shekhe dee pa singax singeh, an: khawm: ra: naog kah phawng: nghoxca ceu pa mhawm:, pa hoik kluklao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax tan pa appong: krax tan pa nhim:, tag mawh moi ra: mu:, yung: phwan: mu:, pex mhaing: phwan: mu:, mai kawn: yung: mhaing: pa naog num phwan: mu:. In: mawh krax tan Aheza kawn: simex Amishadie heue.
Kah daux kao tix ngaix, Pagelax kawn: simex Awkharan pa mawh cao: kaing: doeh ceucat Asha yuh krax tan,
krax tan nawh mawh panmau tix mu: pa cien tiyieh tingoe: shekhe, khawm: pan khoek mau pa cien atigliah shekhe, awm: pa hoik sawn: kix plak mau dee pa singax singeh, an: khawm: ra: naog kah phawng: nghoxca ceu pa mhawm: pa hoik klao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:,
mai son krax tan pa appong: krax tan pa nhim:, tag mawh moi ra: mu:, yung: phwan: mu:, pex mhaing: phwan: mu: mai kawn: yung: pa naog num phwan: mu:. In: mawh krax tan Pagelax kawn: simex Awkharan heue.
Kah daux kao ra: ngaix Ahirax kawn: simex Enan pa mawh cao: kaing: doeh ceucat Napthalix yuh krax tan,
krax tan nawh mawh panmau tix mu: pa cien tiyieh tingoe: shekhe, khawm: pan khoek mau pa cien atigliah shekhe, awm: pa hoik sawn: kix plak mau shekhe dee pa singax singeh, an: khawm: ra: naog kah phawng: nghoxca ceu pa mhawm: pa hoik klao: tix mai bee son krax tan phawng: nghoxca im:;
klong: khri: pa cien kao: shekhe tix mu:, pa naog nyawng bhawng: pa sang gleeing;
son krax tan pa gleeing moi mhaing: pa awn: ju tix mu:, yung: mhaing: tix mu:, mai kawn: yung: mhaing: pa naog num tix mu:;
son krax tan pa pluat ploi: phimap kawn: pex iak tix mu:;
mai son krax tan pa appong: krax tan pa nhim:, tag mawh moi ra: mu:, yung: phwan: mu:, pex mhaing: phwan: mu: mai kawn: yung: mhaing: pa naog num phwan: mu:. In: hoik mawh krax tan Ahirax kawn: simex Enan heue.
In: mawh krax tan khaing: cao: kaing: pwi Isarilax, singaix groi rawm: bee mai pa appong: khu: dee tan panmau kao: ra: mu:, pan khoek mau kao: ra: mu:, mai klong: khri: kao: ra: mu:.
Panmau ku mu: cien tiyieh tingoe: shekhe mai pan khoek mau ku mu: cien atigliah shekhe, tawg klong: mau khankix khawm: uik cien ra: rheng: pon: yieh shekhe, awm: pa hoik sawn: kix plak mau shekhe dee pa singax singeh;
klong: khri: kao: ra: mu:, pa naog nyawng bhawng: pa sang gleeing, ku mu: cien kao: shekhe awm: pa hoik sawn: kix plak mau shekhe dee pa singax singeh, klong: khri: khankix khawm: uik cien tiyieh tinga: shekhe;
son krax tan pa gleeing khawm: uik mawh moi mhaing: kao ra: mu:, yung: mhaing: kao: ra: mu:, kawn: yung: mhaing: pa naog num kao: ra: mu:, tau mai krax tan phawng: nghoxca im:; mai son krax tan pa pluat ploi: phimap kawn: pex iak kao: ra: mu:;
mai son krax pa appong: krax tan pa nhim: moi tinga: pon: mu:, yung: tixgliah mu:, pex mhaing: tixgliah mu:, mai kawn: yung: mhaing: pa naog num tixgliah mu:. In: mawh krax tan pa appong: son khu: dee tan khaix hoik groi rawm: bee heue.
Yam laig Mose kah daux nyiiex gox bwan: man: bang: kum: sonsang sikah tix tau mai Siyiex, nawh mhong: lox pa sikah kah nawh khaing: kah piang dangngeung krax pa caoxrhawm:, pa koe: kah piang dawb teug bwan: pa kham: mhai: sakse, khaing: sinax riang Cherubin ra: mu:; Nawh Cao: sikah mai nawh heue.
Grawng: Tok Tix Deuh Kawk Ngu
Simiang Siyiex krai ah nin: kah Mose,
"Krai ah nin: kah Arun, yam tok maix kawk ngu, kawk ngu aliah mu: tag kieh jhan: riieng kah piang pang: jawk ten: khri: khawm: ra: plak."
Mai Arun yuh awm: an:; nawh tok kawk ngu sonsang jhan: riieng kah piang pang: jawk ten: khri: khawm: ra: plak, awm: gumlox pa hoik tawm: Simiang Siyiex kah Mose.
Grawng: pa yuh kah jawk ten: khri: in:, hoik yuh awm: pakpeung: pa krai Simiang Siyiex kah Mose, pang: nawh kho: tai nawh khankix hoik mawh pa tawk tix yuh kah khri: khawm: kreng; tom: lih tix mawh jawk ten khri: heue.
Pa Yuh Pwi Lewix Singax Mai Appong:
Simiang Siyiex krai ah nin: kah Mose,
"Teei ceu pwi Lewix khankix lih khaing: daux sinax pwi Isarilax, mai kieh kix singax.
Sonsang singax kix maix tag yuh in: khankix, teei kah rawm: singax mai phruah kah piang kix, mai kieh kix khlao: hauk pa koe: kah piang tokaux tix khawm: uik, mai kieh kix sidaux kraung ceep tix sonsang yuh kix tokaux tix singax.
Kieh kix teei moi mhaing: awn: ju tix mu:, mai krax tan phawng: nghoxca im: pa mhawm: pa hoik klao: tix mai bee, mai baox teei moi mhaing: awn: ju tix mu: son krax tan pa pluat ploi: phimap.
Mai maix tag viex ceu pwi Lewix khankix hoek sivoe nyiiex gox bwan: man: bang: kum:, mai kieh ceu pwi Isarilax khawm: uik khrawm: paox tix.
Maix tag viex ceu pwi Lewix khankix hoek sivoe ngai: Simiang Siyiex, mai ceu pwi Isarilax tag deuh taix tix kah piang ceu pwi Lewix khankix,
Mai Arun tag appong: ceu pwi Lewix kah plak sivoe ngai: Simiang Siyiex, son krax tan yangyeuh, tang: ceu pwi Isarilax khankix, sonsang pon yuh kix kaing jhaw: Simiang Siyiex.
Ceu pwi Lewix khankix tag deuh taix tix kah piang kaing: moi mhaing: awn: ju an: khankix, mai maix tag tan tix mu: son krax tan pa pluat ploi: phimap, mai tan an: tix mu: son krax tan pa gleeing kah Simiang Siyiex, sonsang yuh pa khyox Khaw: mai pa pluat ploi: son ceu pwi Lewix khankix.
Maix tag viex tix deuh ceu pwi Lewix sivoe Arun mai kawn: simex nawh khankix, mai appong: tix tawx kix son krax tan pa yangyeuh kah Simiang Siyiex.
"Maix tag tang: gwieh tix deuh ceu pwi Lewix khaing: daux sinax ceu pwi Isarilax, mai ceu pwi Lewix tag mawh pwi Aux heue.
Khaix an: ceu pwi Lewix tag hu: laig yuh kaing kah daux nyiiex gox bwan: man: bang: kum:, maix tag kieh kix singax mai appong: kix son krax tan pa yangyeuh.
Kix mawh pa hoik laug tix tawx Aux khawm: uik khaing: daux sinax ceu pwi Isarilax; Aux hoik teei tix cie pa liang tix keh khaing: sinax ceu pwi Isarilax khankix.
Grawhgrawng: nawh kawn: ai: pa keh khaing: daux sinax ceu pwi Isarilax khankix, pwi khawm: tosat mawh cie Aux; kah daux singaix khaix hoik ciyang Aux kawn: ai: pa keh kah daux haktiex Ejiptux khankix, Aux hoik kieh kix mawh pa singax singeh son Cao: Tix,
Aux hoik teei ceu pwi Lewix, son tang: kawn: ai: pa keh khaing: ceu pwi Isarilax khankix.
Mai Aux hoik tawx ceu pwi Lewix khankix awm: khawngphak tix ceu son Arun mai kawn: simex nawh khankix khaing: daux sinax ceu pwi Isarilax, sonsang yuh kix kaing son ceu pwi Isarilax kah daux nyiiex gox bwan: man: bang: kum:, mai sonsang yuh kix krax pa khyox Khaw: mai krax pa pluat ploi: son ceu pwi Isarilax khankix, son ang krax pa lauxleeing: lai koe: daux sinax ceu pwi Isarilax, yam hoek ceu pwi Isarilax khankix dex dauh dee pa singax singeh heue."
Mose mai Arun mai cub pwi hun: ceu pwi Isarilax appong: kah ceu pwi Lewix; awm: gumlox pa hoik tawm: Simiang Siyiex kah Mose son Grawng: pa dex pa dawd mai ceu pwi Lewix khankix, mawh kheu nan: ceu pwi Isarilax yuh an: kah ceu pwi Lewix.
Mai ceu pwi Lewix yuh tokaux tix singax, mai sidaux kraung ceep tix; mai Arun appong: kix, awm: krax tan pa yangyeuh sivoe Simiang Siyiex, Arun tag yuh krax khyox Khaw: mai krax pa pluat ploi: son kix, sonsang kieh kix singax heue.
Khaix an: ceu pwi Lewix laig kah daux nyiiex gox bwan: man: bang: kum:, kah plak sivoe Arun mai kawn: simex nawh khankix; sonsang yuh kix kaing jhaw: awm: lox pa hoik tawm: Simiang Siyiex kah Mose son Grawng: pa dex pa dawd mai ceu pwi Lewix, mawh kheu nan: kix yuh an: kah piang kix heue.
Simiang Siyiex krai ah nin: kah Mose,
"In: mawh Grawng: pa dex pa dawd mai ceu pwi Lewix khankix, pwi pa hoik koe: ju tinga: phwan: num haok plak piang tag yaox tix laig yuh kaing jhaw: kah daux nyiiex gox bwan: man: bang: kum:;
yam hoik hoek ju kix tix phwan: num, kix tag laux tix khaing: kaing pa yuh tix, mai kix tag ang lai baox yuh kaing tix bawg kawx,
kix tag yaox tix yuh kaing jhaw: pa teem: coi kah puxaik tix kah daux nyiiex gox bwan: man: bang: kum:, viang mawh nan: kix tag ang pon tix teei beeh glawm: tix ceu kawx, maix tag yuh nawh kah ceu pwi Lewix awm: grawng: beeh glawm: pa dex dawd mai kix heue."
Grawng: Pwie Pasakha Bawg Ra:
Simiang Siyiex sikah mai Mose kah daux tiag Sina, kah daux num ra: khix tix khaix hoik lih kix khaing: meung Ejiptux, mai ah nin:,
"Kieh ceu pwi Isarilax khankix yuh pwie Pasakha kah daux bawg yam pa hoik tat tix deuh.
Daux khix in: kao: pon: ngaix plak bo, maix tag yuh pwie an:, kah daux bawg yam pa hoik tat tix deuh; awm: pa koe: been mai pa hoik tat tix deuh khankix pex tag yuh nawh.
Mose krai kah ceu pwi Isarilax khankix, sonsang yuh kix pwie Pasakha.
Mai kix yuh pwie Pasakha kah daux khix tix kao: pon: ngaix, ponbo, kah daux tiag Sina, awm: lox pa hoik tawm: Simiang Siyiex kah Mose, mawh kheu nan: ceu pwi Isarilax khankix yuh pwie an:.
Yam an: koe: pwi tiblah, pa hoik seeing: yuh tokaux tix kah pa yum: pwi son ang tix lai pon yuh pwie pasakha kah daux singaix an:; mai kix hoek kah plak sivoe ngai: Mose mai Arun daux singaix an:;
kix ah nin: kah nawh, "Yix hoik seeing: yuh tokaux tix kah pa yum: mawh sang pon kieh maix yix viex krax tan tix kah Simiang Siyiex kah daux bawg yam pa hoik tat tix deuh daux sinax ceu pwi Isarilax khankix lie?"
Mai Mose ah nin: kah kix, "Jun ha:, Aux sang krox tix nghiiet Simiang Siyiex sang ah yuh kah mawx kah grawng: pa dex mai pex."
Simiang Siyiex krai ah nin: kah Mose,
"Krai kah ceu pwi Isarilax khankix, kah daux pex mai doeh simie ceucat pex tix kauxkaux seeing: yuh tokaux tix kah pa yum:, phan: ang mawh nan: hu: krax deeh singai ang ah, nawh tag pon tix yuh pwie Pasakha cie Simiang Siyiex.
Kah daux khix ra: kao: pon: ngaix plak bo, kix tag pon tix yuh pwie, kix tag ih nex kawn: yung: tau mai khaomun pa ang sau: susaix, mai taux lhax pa song:.
Kix tag ang pon tix kieh nex an: deuk tom: hoek plak ponngawb, mai ang pon tix kieh si-ang: pot tix nyaing kawx; kix hawt tix yuh awm: koe: been pwie pasakha.
Phan: mawh pwi pa singax mai pa ang koe: krax hu:, phan: nawh ang yuh pwie Pasakha, tag teei tix tik kaw an: khaing: daux sinax pwi ceu nawh, kheu ang nawh viex krax tan tix hoek kah Simiang siyiex, kah daux bawg yam pa hoik tat tix deuh; nawh tag yaox tix kham: geu: phimap.
Mai nyo sinie pa hoek tix peung sinax pex tivud ticu, phan: nawh simie tix yuh pwie pasakha cie Simiang Siyiex, nawh tag hawt tix yuh awm: pa koe: been pwie pasakha, mai yuh awm: pa hoik tat kix tix deuh; kah son kawnpraix pa keh daux haktiex pex kah son nyo sinie ang ah tag koe: been tix ceu khaing: heue.
Grawng: Paiawm: Mai Ngu Pa riieng
Kah daux singaix yam jung kah nyiiex gox bwan: man:, paiawm: hoik kheem: kah piang nyiiex gox bwan: man: pa koe: teug pa kham: mhai: sakse, jah ponbo tom: hoek ponngawb, an: hoik awm: grang ngu.
Ponngaix paiawm: kheem: kah nyiiex gox bwan: jheengjheeng:, ponsawm: jhan: riieng awm: grang ngu.
Yam hoik yaog paiawm: tix haok khaing: kah piang nyiiex gox bwan: man:, ceu pwi Isarilax khankix yaox tix hu: krax, mai yam jung paiawm: tix ot dee mawx ang ah, ceu pwi Isarilax khankix tag sum: nyiiex bang: tix tan:.
Awm: lox pa tawm: Simiang Siyiex, ceu pwi Isarilax khankix tag lih hu: krax, mai awm: lox pa tawm: Simiang Siyiex, kix tag sum: nyiiex bang: tix, mai glang: kawn: ot paiawm: kah piang nyiiex gox bwan: man:, kix ca: kawn: ot daux nyiiex bang:.
Glang kawn: ot paiawm: kah piang nyiiex gox bwan: man: tom: rheung: singaix, ceu pwi Isarilax khankix yuh awm: pa tawm: Simiang Siyiex, mai ang lai hu: krax.
Bawg blah yam kawn: kheem: paiawm: kah piang nyiiex bang: tivud ticu, awm: lox tawm: Simiang Siyiex kix ca: kawn: ot kah daux nyiiex bang:; mai awm: lox tawm: Simiang Siyiex kix tag lih hu: krax.
Bawg blah yam kawn: kheem: paiawm:, jah ponbo tom: hoek ponngawb, mai yam deeh yaog paiawm: tix haok ponngawb, kix tag hu: krax, ponngaix ang ah, ponsawm: ang ah, yam deeh yaog paiawm: tix kix tag hu: krax.
Ra: singaix, tix khix ang ah, tix num ang ah, yam kawn: kheem: paiawm: kah piang nyiiex gox bwan: man:, ceu pwi Isarilax khankix, kix ot daux nyiiex bang:, mai kix ang pon tix hu: krax; viang mawh nan:, yam hoik deeh yaog paiawm: tix kix hu: krax.
Awm: lox pa tawm: Simiang Siyiex, kix ca: kawn: ot kah daux nyiiex bang:, mai awm: lox pa tawm: Simiang Siyiex kix hu: krax, kix yuh awm: pa tawm: Simiang Siyiex, awm: lox tawm: Simiang Siyiex kah Mose heue.
Teettawng Mau Ra: Mu:
Simiang Siyiex krai ah nin: kah Mose,
"Maix tag yuh teettawng mau ra: mu: sonsang kraix khrawm: kah pwi haoh pwi hun:, mai sonsang gah kah nyiiex bang:.
Yam phlu: kah teettawng an: khawm: ra:, cub pwi hun: khawm: uik, tag kraix khawm: paox tix hoek kah plak sivoe maix hawt diang siviex nyiiex gox bwan: man: bang: kum:.
Phan: phlu: kah teettawng tix mu: ngie, cao: kaing: pa kwang: kah piang pwi tix rheng: khaing: daux ceu pwi Isarilax khankix, tag kraix khrawm: paox tix hoek kah maix.
Yam phlu: maix teettawng pa so: cub nyiiex bang: pa ot plak lih singaix, yaog tix hu: krax.
Yam phlu: teettawng pa so: bawg ra:, cub nyiiex bang: pa ot plak seh, yaog tix hu: krax, mai yam phlu: kah teettawng pa so: yam mawx ang ah, kix tag lih hu: krax.
Yam sang kraix khrawm: maix pwi haoh pwi hun: tau mai paox tix, maix tag phlu: teettawng, viang mawh nan: maix paw phlu: lox teettawng pa so:.
Kawn: simex Arun pa mawh cao: giex kaing: li khankix tag phlu: teettawng. In: tag mawh been pa caw pex tix hawt yuh kah daux doeh simie ceucat pex leeing ju heue.
Yam hu: puing: pex naing daux haktiex tix, kah pwi koeng pa yeen pa khin: kah piang pex, khaix an: pex tag phlu: teettawng pa so: sonsang mawh krax pa doh keud pex kah sivoe Simiang Siyiex tix, mai pex tag pon tix lawt luan khaing: pwi pa koeng tix.
Kah dau singaix koe: krax gauxrhawm: gauxrhi: pex, daux bawg yam singaix yuh pex pwie, mai singaix haok khix khraox pex tag phlu: teettawng kah piang krax tan pa gleeing pex khankix, mai krax tan pa appong: krax tan pa nhim:, sonsang mawh krax pa doh keud pex kah Siyiex, Aux mawh Simiang Siyiex, Siyiex pex heue."
Grawng: Lih Hu: Khaing: Gawng Sina
Kah daux num ra:, khix ra:, haok khix tinga: ngaix, paiawm: yaog tix haok khaing: kah piang nyiiex gox bwan: man: pa koe: teug pa kham: mhai: sakse,
mai ceu pwi Isarilax khankix lih hu: khaing: daux tiag Sina; khaix an: paiawm: lih kaog daux tiag Paran.
Mawh kheu nan: kix jah tix lih hu: bawg tix awm: lox pa tawm: Simiang Siyiex kah Mose.
Cub nyiiex bang: Yudax khankix lih hu: sivoe tau mai chix kru naing tix, Nashon kawn: simex Aminadat mawh cao: kaing: naing kah piang cub pwi Yudax.
Natanelax kawn: simex Zuah mawh cao: kaing: naing kah cub pwi Isakha.
Eliabax kawn: simex Helon mawh cao: kaing: naing kah cub pwi Zebulon.
Mai yam hoik yieh nyiiex gox bwan: man:, kawn: simex Gerashon mai kawn: simex Merarix khankix klawm: nyiiex gox bwan: man: an: lih hu: heue.
Cub nyiiex bang: Rubin khankix lih hu: tau mai chix kru naing tix; Elizurax kawn: simex Shedurax mawh cao: kaing: naing kah cub pwi Rubin.
Shelumelax kawn: simex Zurishadie mawh cao: kaing: naing kah cub pwi Simion.
Eliasap kawn: simex Doelax mawh cao: kaing: naing kah cub pwi Gat.
Ceu pwi Kawhat khankix lih hu: mai klawm: kraung ceu pa singax singeh, mai kix sum: nyiiex gox bwan: man: sivoe kah: sang hoek kix.
Mai cub nyiiex bang: Epharem lih hu: tau mai chix kru naing tix; Elishama kawn: simex Amihut mawh cao: kaing: naing kah cub pwi Epharem.
Gamalelax kawn: simex Pedazurax mawh cao: kaing: naing kah cub pwi Manashe.
Abidam kawn: simex Gidawnix mawh cao: kaing: naing kah cub pwi Binyamin.
Cub nyiiex bang: Dan ghoit tix hu: tau mai chix cub kru naing tix, Aheza kawn: simex Amishadie mawh cao: kaing: naing kah cub pwi Dan.
Pagelax kawn: simex Awkharan mawh cao: kaing: naing kah cub pwi Asha.
Ahirax kawn: simex Enan mawh cao: kaing: naing kah cub pwi Napthalix.
In: mawh Grawng: pa sang yaog ceu pwi Isarilax khankix tix lih hu: krax cub mawx cub an:, yam lih hu: kix krax heue.
Mose ah nin: kah Hawbax kawn: simex Yoelax kah ceu pwi Midian pa mawh paox nawh, "Ex sang lih hu: kah dee pa hoik ah Simiang Siyiex, Aux tag sang tawx an: kah pex;: hoek tau mai yix, mai ex tag yuh ceu pa mhawm: kah maix, mawh kheu Simiang Siyiex hoik yuh sijax mukheu pa mhawm: kah pwi Isarilax."
Mai Hawbax deeh ah nin: kah nawh, "Aux ang hu:, aux deeh ing: kah haktiex cao: tix kah paox nyiiex paox ma: tix."
Mai Mose deeh ah nin:, "Yuh bwanson: paw prah yix liak, mawh kheu maix hoik tawng yix sang yaox tix bang: kah daux tiag mawh kheu maix hoik pon tix mawh ngai: yix.
Phan: maix hu: tau mai yix awm: yuh Simiang Siyiex pa mhawm: kah yix, yix kawx tag yuh pa mhawm: kah maix."
Cub pwi Isarilax lih hu: khaing: gawng Simiang Siyiex, been loe: singaix krax; mai teug bwan: sijax mukheu Simiang Siyiex thong: kix hu: sivoe loe: singaix krax, sonsang sawg kah dee laux son kix.
Mai paiawm: Simiang Siyiex koe: kah piang kix ponngaix yam lih hu: kix krax.
Yam lih hu: teug bwan: sijax mukheu yam mawx ang ah, Mose ah nin:, "Simiang Siyiex eue kaoh heue, kieh pwi koeng maix khankix, prungprang: rairuat; mai kieh pwi koeng maix to: sivoe Maix."
Mai yam kaog teug bwan: sijax mukheu, Mose ah nin:; "Simiang Siyiex eue, deeh hoek heue, deeh hoek kah dee ot ceu pwi Isarilax kaing: rheng: kaing: mheen: liak."
Grawng: Pa Ngau Pwi Khankix
Simiang Siyiex mhong: kah lox pa ngau pa ngheek ceu pwi Isarilax kah Grawng: pa caox pa caig; mai krax pa songrhawm: Nawh Cao: lih, mai ngu Simiang Siyiex gleeing: kah daux sinax kix mai proe kah pwi pa paung kah praok nyiiex bang: tiblah.
Pwi khankix riag yo kah Mose; mai Mose rawg bwan: kah Simiang Siyex ngu an: kawx yeet.
Nawh kok ceukaux dee an: mawh Taberax kheu hoik gleeing ngu Simiang Siyiex kah daux sinax kix.
Pwi pa hoik khon: tix kah sinax pwi hun:, kied koe: rhawm: pa ghoing:, ceu pwi Isarilax baox yiiem mai ah nin:; "Pwi mawx sang tawx yix ih nex lie?"
"Ex doh keud kah nex kax pa yie ih ex, kah daux meung Ejiptux, khawm: ke:, ke: khwang:, tauxka:, tauxmo:, mai tauxhaw: khankix;
Yamin: rhawmrhi: yix hoik khrup, lheu: khaing: khaomun Mannax in:, sivoe ngai: yix ang lai yaox koe: tidtix."
Mannax an: hoik awm: simie taux kila, mai pakpeung: awm: mu: ploi.
Pwi khankix hu: lailing kah plak praix, mai khrawm: Mannax, krit kah mhaw:, mai tauh daux po:, ngaik daux aw:, yuh khaomun kah an:, jhawm: nyawm awm: khaomun pa hoik diag tau mai bee.
Yam lih rawm: ciex kah piang nyiiex bang: kix ponsawm:, Mannax lih tau mai an:.
Mose mhong: yien pwi khaing: diang siviex nyiiex bang:, kah nyiiex ma: pwi mawx pwi an:, mai pa songrhawm: Simiang Siyiex baox nie kaoh kah, mai Mose ang nyawmrhawm: kah.
Mose ah nin: kah Simiang Siyiex, "Maix Cao: lai yuh krax kharhawm: kah kawncau Tix yuh kah mawx? mai aux lai mawh pa ang pon bwanson: kah plak sivoe ngai: Maix Cao:, mai deuh beeh glawm: cien pwi inkix khawm: uik kah piang aux yuh kah mawx?"
Khex mawh aux pa nghe: kah pwi inkix lie? khex mawh aux pa keh kix sonsang ah Maix Cao: kah aux yuh nin: lie?Kliien kix kah daux naok Maix awm: pwi kia: ngien kah kawn: nyawm pa kawn peuex teeh, mai kliien kix hu: kah daux haktiex pa hoik tiextu Maix Cao: tix tawx kah keeing: kix
Aux sang pon teei nex sonsang tawx kah pwi in: khankix khaing: dee mawx? mawh kheu kix riag yiiem sivoe aux ah nin:,tawx yix ih nex liak
Aux ang pon klawm: beeh glawm: pwi inkix nongnong:, kheu mawh in: beeh glawm: pa kied cien son aux.
Phan: Maix Cao: yuh awm: ceu in: kah aux, yuh bwanson: pah kah aux yamin:, phan: aux mawh pa pon bwanson: kah plak sivoe ngai: Maix Cao:, paw doh kieh aux yaox krax kha: liak."
Pwi Riex Ju Atigliah Kaux
Simiang Siyiex ah nin: kah Mose, "Khrawm: pwi riex ju atigliah kaux son Aux, khaing: daux pwi Isarilax pa tawng maix mawh pwi riex ju mai pa mawh cao: kaing: kah piang kix, viex kix hoek kah nyiiex gox bwan: man: bang: kum: cung tau mai maix tan:.
Aux tag lih hoek sikah tau mai maix tan:; Aux tag teei khwan: pa koe: kah piang maix tiblah mai deuh kah piang kix, mai kix tag klawm: beeh glawm: tau mai maix son ang maix lai klawm: beeh glawm: an: nongnong:.
Mai ah nin: kah pwi khankix,kieh tokaux pex singax son pasax, mai pex tag yaox tix ih nex; mawh kheu Simiang Siyiex hoik mhong: lox riag yiiem pex ah nin:, "Pwi mawx sang tawx yix ih nex lie? mawh kheu yix hoik mhawm: kah daux meung Ejiptux." Mawh kheu Simiang Siyiex tag tawx nex kah pex, mai pex tag yaox tix ih.
Pex tag ang yaox tix ih ngie son tix ngaix, ra: ngaix, phwan: ngaix, kao: ngaix, mai tinga: ngaix,
pex tag yaox tix ih leeing: khix tom: hoik lih nex khaing: daux meeh pex tom: hoik seeing: pex kah, kheu hoik thiang: pex tix tik kah Simiang Siyiex pa ot kah daux sinax pex, mai riag yiiem sivoe Nawh Cao: ah nin:, "Yuh kah mawx yix lai lih khaing: daux meung Ejiptux lie?:"
Mai Mose ah nin:, "Can pwi liah sien: kaux pa ot tau mai Aux khankix, Maix Cao: hoik ah nin:,Aux tag sang tawx kix ih nex tom: naog tix khix
Mawh sang pah kah phung: yung:, moi mai pex son kix, sonsang kub ih kix lie? Phan: ang mawh nan: mawh sang khrawm: kax pa koe: daux rawm: sigrit sigra: son kix sonsang kub ih kix lie?"
Simiang Siyiex ah nin: kah Mose, "Mawh dawd plawng: taix Simiang Siyiex lie? yamin: maix tag yaox kah lox pa krai Aux kah maix mawh ang mawh."
Mose lih hu: mai krai lox Simiang Siyiex kah pwi hun:, mai nawh khrawm: simex pwi riex ju atigliah kaux khaing: daux pwi hun:, mai kieh kix cung vungviang nyiiex gox bwan: man:.
Simiang Siyiex lih hoek khaing: daux paiawm: mai sikah kah Mose, mai teei khwan: pa koe: kah piang nawh tiblah, mai deuh kah piang pwi riex ju atigliah kaux; yam hoek khwan: kah piang kix, kix sikah lox jhai:, mai kix ang lai baox krai khaix an:.
Kawn: koe: pwi ra: kaux pa kut tix ot kah daux nyiiex bang:, tix kaux mawh Eladat, mai an: tix kaux mawh Medat, mai khwan: hoek kah piang kiex khawm: ra: kaux, kiex hoik mawh pa laig daux carang, viang kiex ang lih hu: kah nyiiex gox bwan: man: kawx, kiex sikah lox jhai: kah nyiiex bang:.
Nyawm simex awn: ju tix kaux to: hoek krai kah Mose ah nin:, "Eladat mai Medat, sikah lox jhai: daux nyiiex bang:."
Yawsux kawn: simex Nun cao: teem: Mose, pwi pa hoik laug nawh tix kaux ah nin:, "Simiang aux Mose tiebtie kah kix liak."
Mose ah nin: kah nawh, khoi: rhawm: maix kah aux jao tix? kieh pwi Simiang Siyiex sikah lox jhai: khawm: uik mai kieh Simiang Siyiex tawx khwan: hoek kah piang kix."
Mose mai pwi riex ju Isarilax khankix deeh ing: kah nyiiex bang: heue.
Pa Tawx Simiang Siyiex Keed
Bhaung: ting lih khaing: Simiang Siyiex, mai tah keed hoek khaing: rawm: sigrit sigra:, mai kieh keed prungprang: rawb rim nyiiex bang: been tix ngaix krax, kah plak in:, mai been tix ngaix krax, kah plak an:, hawt vungviang nyiiex bang:, mai lhaong: pu: khaing: tiex been ra: sawk.
Pwi khankix kaoh khrawm: keed leeing: ngaix leeing: sawm:, mai ngaix khaix leeing: ngaix, pwi pa khrawm: keed dee iak pon khrawm: kao: Awmie:, mai hok hawt vungviang nyiiex bang: ku sidauh son tix.
Yam kawn: koe: nex keed kah sinax rhang kix, mai ang nyang tien kraing krax songrhawm: Simiang Siyiex lih kah pwi khankix, mai tawx preng pa kied ting kah pwi khankix.
Nawh tom: kok dee an: mawh Kibarok-hatava, kheu sipaung kix pwi pa koe: rhawm: ghoing: kah dee an:.
Pwi khankix deeh gah tix khaing: Kibarok-hatava mai hu: bang: kah Hazarot heue.
Grawng: Ang Arun Mai Meriam Khaw: Rhawm:
Meriam mai Arun ne raw kah Mose, kheu jao teei nawh tix moeng bun: Kushax;
Mai kiex ah nin:, "Mawh sikah Simiang Siyiex kah maix ngie lie? Mawh ang Nawh Cao: sax sikah kah yix nang: lie?" Simiang Siyiex mhong: kah lox sikah kix.
Mose mawh pa kied koe: rhawm: awn: rhawm: tiiem lheu: khaing: pa koe: kah piang haktiex.
Simiang Siyiex ah nin: kah Mose, khawm: Arun mai Meriam dom: mawx dom: an:, "Pex loe: kaux, lih hoek kah nyiiex gox bwan: man: bang: kum:." Mai kix loe: kaux lih hu: hoek.
Simiang Siyiex lih hoek kah daux rong: paiawm:, mai cung kah diang siviex nyiiex gox bwan: man:, kok kah Arun mai Meriam; mai kiex khawm: ra: hoek sivoe.
Nawh Cao: ah nin:, "Nghiiet kah lox Aux, phan: cao: jhai: koe: kah daux sinax pex, Aux Simiang Siyiex tag plak jhi: tokaux Tix kah nawh kah daux riieng susai:, Aux tag sikah mai nawh kah daux camaox.
Kawncau Aux Mose ang lai mawh nan:; nawh mawh pa kaux sijax daux nyiiex Aux khawm: uik.
Aux sikah tau mai nawh pakngai: taw pakngai:, kah daux pa sidawng:, ang lai mawh pa ang sidawng kah, mai nawh yaox kah grang pakpeung: Aux. Pax lai ang lhat graung kah neraw tix kah kawncau Aux Mose yuh kah mawx?"
Simiang Siyiex songrhawm: kah kiex, mai Nawh cao: lih hu:.
Yam gah paiawm: tix khaing: piang nyiiex gox bwan: man:, Meriam lih koe: saux sipawg, awm: paing rawmrha:, Arun veeh tix jhak kah Meriam mai yaox koe: saux sipawg kah nawh.
Arun ah nin: kah Mose, "Simiang aux eue, paw deuh phimap kah piang yiex, kheu pa daox pa aw: yiex mai pa caox pa caig yuh yiex liak.
Paw kieh Meriam yum: awm: pa laux nex tix plak yam lih keh nawh khaing: vaig miex tix."
Mose riag yo kah Simiang Siyiex ah nin:, "Siyiex eue, yuh bwanson: pai: nawh moi: liak."
Simiang Siyiex ah nin: kah Mose, "Phan: keeing: Meriam baig kah ngai: Meriam, nawh tag kaig aliah ngaix ang mawh lie? kieh nawh lih ot plak praix nyiiex bang: aliah ngaix, khaix an: tag pon tix deeh viex nawh hoek."
Meriam lih ot plak praix nyiiex bang: aliah ngaix, pwi khankix ang pon hu: krax tom: hoek bawg yam deeh viex kix nawh laig kah daux nyiiex bang:.
Khaix an: pwi khankix deeh gah tix khaing: Hazarot mai hu: bang: kah daux tiag Paran heue.
Grawng: Ploi: Cao: Jiang Kah Meung Khanan
Simiang Siyiex krai ah nin: kah Mose,
"Ploi: cao: kaing: tix cub tix kaux, khaing: doeh simie ceucat keeing: kix hu: jiang kah meung Khanan, pa sang tawx Aux kah ceu pwi Isarilax,"
Mose ploi: kix lih hu: khaing: daux tiag Paran, awm: lox tawm: Simiang Siyiex kah cao: kaing: ceu pwi Isarilax heue.
In: mawh ceukaux kix, khaing: ceucat Rubin mawh Shamua kawn: simex Zakhurax,
khaing: ceucat Simion mawh Shaphat kawn: simex Hawrix,
khaing: ceucat Yudax mawh Kaliep kawn: simex Yiephunie:,
khaing: ceucat Ishakha mawh Igalax kawn: simex Yosiep,
khaing: ceucat Epharon mawh Hawshe kawn: simex Nun,
khaing: ceucat Binyamin mawh Palatix kawn: simex Raphu,
khaing: ceucat Zebulon mawh Gadelax kawn: simex Sawdix,
khaing: ceucat Yosiep pa kaoh khaing: ceucat Manashe mawh Gadix kawn: simex Susix,
khaing: ceucat Dan mawh Amelax kawn: simex Gemalix,
khaing: ceucat Asha mawh Seturax kawn: simex Mikhelax,
khaing: ceucat Napthalix mawh Nabix kawn: simex Vophasix,
khaing: ceucat Gat mawh Goelax kawn: simex Makhix.
In: khankix mawh ceukaux pwi ploi: Mose lih hu: jiang kah haktiex an:. Mai Mose sum: ceukaux Hawshe kawn: simex Nun deeh mawh Yawsux.
Mose ploi: kix hu: jiang kah haktiex khanan, mai ah nin: kah kix, "Hu: krax plak seh mai haok kah piang gawng,
jhak tix yaox kah haktiex an: koe: yuh kah mawh, can pwi pa ot kah daux haktiex an:, mawh ting riang phan: ang mawh nan: mawh iak riang, mawh tux phan: ang mawh nan: mawh hun:,
haktiex ot kix mawh mhawm: mawh caox, veng ot kix mawh nyiiex bang: mawh nyiiex kaux,
haktiex an: mhawm: lie, ang mhawm: lie, koe: ang koe: khaox ox lie, kieh pex koe: rhawm: kua: rhawm: vao, mai viex plix kix tiblah khaing: daux haktiex an:." Yam an: hoik mawh bawg yam jah plix siiet tix teem.
Kix lih hu: jiang kah haktiex an:, khaing: daux tiag Zinax kah veng Rehawbax, dex krax laig daux veng Hamat.
Kix lih hu: plak seh tom: hoek kah veng Hebaron, dee ot ceucat Anagax pa mawh Ahiman, Sheshie:, mai Talamie:, (veng Hebaron hoik cao sum: tix aliah num sivoe veng Zawnax daux meung Ejiptux.)
Kix hoek kah ngawd Eshakawlax, mai tat nhu: plix siiet tix kak, pa koe: plix siiet tix sigleem:, mai klawm: kah khaox glawm: ra: kaux; kix baox viex plix mak cang mai plix ruh hoek tiblah.
Dee an: kok mawh ngawd Eshakaw mawh kheu tat pwi Isarilax sigleem: plix siiet tan:.
khaix hoik luan tipon: singaix, kix deeh hoek khaing: jiang tix haktiex an:.
Kix deeh hoek kah Mose mai Arun, mai pwi hun: Isarilax kah daux tiag Paran baoh Kadeshax, kix viex lox satang hoek kah kiex mai pwi hun:, mai jhi: kix yaox plix khaing: haktiex an:.
Kix krai kah Mose ah nin:, "Yix hoik hoek kah haktiex dee ploi: maix yix hu:, rug mawh dee lih rawm:teeih mai rawm: hia:, in: mawh plix khaing: tan:.
Can pwi pa ot daux haktiex an:, mawh pa ting riang, mai veng kix kawx hoik sum: tix tom: kaux mai kied ting kied vieh, lheu: khaing: an: yix hoik yaox ceucat Anagax tan:.
Pwi Amaliet ot kah daux haktiex an: baoh plak seh, pwi Hitix, pwi Yebusix mai pwi Amawrix ot kah piang gawng, pwi Khanan ot praok rawm: sigrit sigra:, mai praok rawm: klawng: Yawdan."
Kaliep kieh pwi hun: yawg tix kah plak sivoe Mose, mai ah nin:, "Kieh ex lih hu: dom: mawx dom: an:, mai teei haktiex an:, mawh kheu ex koe: riang tix pex kah kix."
Kix pa hu: jiang kah haktiex an:, deeh krai Grawng: satang pa caox kah pwi Isarilax ah nin:, "Haktiex pa lih hu: jiang yix, mawh haktiex pa ot pwi pa bleet tix ih pwi, mai can pwi pa hoik yaox yix tan: mawh pwi pa kied ting lhaong: kaux hak khawm: uik.
Yix yaox pwi Nefelim pa ting pa lhaong:, (Doeh simie ceucat Anagax pa kaoh khaing: pwi Nefelim pa ting pa lhaong:); yix hoik awm: sido kah daux pa jhak yix kah cao: tix, mai yix hoik mawh awm: an: kah daux pa yaox kix heue."
Pa Thiang: Pwi Isarilax Tix Laig Meung Khanan
Cub pwi haoh pwi hun: riag yo khawm: uik, mai pwi hun: yiiem daux sawm: an:.
Ceu pwi Isarilax ngau kah Mose mai Arun, mai pwi hun: khawm: uik ah nin: kah kiex, "Yix mhawm: tix yum: kah haktiex Ejiptux, phan: ang mawh nan:, yix mhawm: tix yum: kah daux tiag!
Simiang Siyiex lai viex yix hoek kah haktiex in:, sonsang yum: yix kah lawm vaig yuh kah mawx? Moeng yix, kawnpraix yix tag sang kham: krax pa giex pa laung, yix deeh ing: kah meung Ejiptux ang lheu: mhawm: lie?"
Kix ra lai ah nin: kah paox tix, "Kieh ex laug cao: kaing: tix kaux, mai deeh ing: kah meung Ejiptux."
Mose mai Arun gup tix kah plak sivoe ngai: pwi hun: ceu pwi Isarilax pa kum: paox tix.
Yawsux kawn: simex Nun mai Kaliep kawn: simex Yephunie pa hoik hu: tau sinax pwi jiang kah haktiex khankix riah tix tik kraung ceep tix,
mai krai ah nin: kah pwi hun: ceu pwi Isarilax, "haktiex pa hoik lailing yix tix jiang, mawh haktiex pa kied sidaing: mhawm:.
Phan: Simiang Siyiex Khaw: rhawm: kah ex, Nawh Cao: tag viex ex laig kah haktiex in:, mai tawx haktiex an: dee lih rawm:teeih mai rawm: hia: kah ex.
Paw doh tieh feen kah Simiang Siyiex; paw lhat kah pwi ot kah daux haktiex an:, mawh kheu kix mawh priex ih son ex; krax tiep tie hoik lih hu: khaing: kix, mai Simiang Siyiex ot tau mai ex, paw lhat kah kix."
Pwi hun: ah nin: dheem: kiex kah simaox, yam an: min: pakngaix Simiang Siyiex lih bleeh kah daux nyiiex gox bwan: man: bang: kum: kah ceu pwi Isarilax heue.
Pa Khyox Khaw: Mose Kah Pwi Hun:
Simiang Siyiex ah nin: kah Mose, "Mawh sang nunai: pwi in: khankix kah Aux miex ghreung:? mai kix kawn: ang yumrhawm: kah Aux, kah mhai: pa daox pa am: pa hoik yuh Aux daux sinax kix miex ghreung:?
Aux tag sivied kix kah jhawm: saux preng mai deeh teei sinngao an: khaing: kix, Aux tag kieh maix mawh ceu pwi ting riang mai pa ting siawpsibrawm khaing: kix.
Mose ah nin: kah Simiang Siyiex, "Khaix an: pwi Ejiptux tag mhong: kah an:, mawh kheu Maix Cao: hoik viex pwi in: khankix lih khaing: sinax kix kah siawpsibrawm Maix Cao:,
mai kix tag krai kah pwi pa ot kah daux haktiex in:. Kix hoik mhong: koe: Maix Cao: kah sinax pwi in: khankix, Simiang Siyiex eue, Maix Cao: hoik jhi: kix yaox pakngai: tix, mai paiawm: Maix Cao: hoik ot kah piang kix ponngaix Maix Cao: hoik thong: kix hu: kah rong: paiawm:, mai ponsawm: Maix Cao: hoik thong: kix hu: kah rong: ngu paiawm:.
Phan: Maix Cao: pah kah pwi in: khankix awm: pwi tix kaux, pwi pa hoik mhong: kah min: Maix Cao: tag ah nin:,
mawh kheu ang Simiang Siyiex ang pon viex pwi in: khankix hu: kah haktiex pa hoik tiextu Nawh Cao: sonsang tawx kah kix, Nawh Cao: tom: pah kix kah daux tiag
Aux rawg bwan: kah Maix Cao: jhi: ex yaox kah siawpsibrawm Siyiex, awm: lox tawm: Maix Cao: liak.
Simiang Siyiex mawh pa lang: rhawm:, mawh pa naog kah krax caoxrhawm:, mai mawh pa pluat ploi: phimap, pluat ploi: krax phit krax lud, viang mawh nan: Nawh Cao: ang doh deuh pwi koe: phimap mawh pa ang koe: phimap, Nawh Cao: deeh viied deeh pawk kah phimap keeing: kix tom: hoek kah piang kawnpraix, tom: hoek loe: ju pon: ju kah doeh simie ceucat kix
Aux khyox Khaw: rawg mhaing: kah Maix Cao: pluat ploi: phimap pwi in: khankix awm: koe: krax moh krax rhawm: pa kied ting Maix Cao:, mai awm: pluat ploi: Maix Cao: kah pwi in: khankix khaing: meung Ejiptux tom: hoek yamin:."
Simiang Siyiex ah nin:, "Aux hoik pluat ploi: kix awm: pa khyox Khaw: maix;
mawh kheu nan: awm: im: ju Aux tete, haktiex tag naog kah min: plakngai: Simiang Siyiex tete,
pwi khawm: uik pa hoik yaox kah min: plakngai: Aux, mai kah mhai: pa daox pa am yuh Aux kah meung Ejiptux, mai kah daux tiag, kawn: cheukcheu: kah Aux tom: kao: bawg mai ang nyang cu nghiiet kah lox Aux,
kix tag ang yaox kah haktiex pa hoik tiextu Aux kah keeing: kix, pwi khawm: uik pa nunai: kah Aux, tag ang yaox haktiex an: tix kaux kawx.
Viang mawh nan: phan: mawh kawncau Aux Kaliep, kheu koe: khwan: pa siyox kah daux nawh, mai hawt khaix Aux jheeing: jheeing:, Aux tag viex nawh laig kah daux haktiex dee hoik hu: nawh, mai doeh simie ceucat nawh tag pon kah sinngao an:.
Cub pwi Amaliet mai cub pwi Khanan pa ot kah daux ngawd, pasax pex tag veeh tix hu: kah daux tiag kah krax hu: kah rawm: sigrit sigra: raoh heue."
Pa Kham: Geu: Krax Yum: Son Pa Tieh Feen
Simiang Siyiex ah nin: kah Mose mai Arun,
"Aux kawn: yaox tix gun yeung kah pa ngau pwi hun: pa caox in: khankix miex ghreung:? Aux hoik mhong: pa ngau pa deuh pwi Isarilax phimap kah Aux.
Krai kah kix, Simiang Siyiex ah nin:,awm: im: ju Aux, Aux tag yuh an: awm: mhong: Aux pa krai pex.
Tokaux yum: pex pa ngau kah Aux, tag tik kah daux tiag in:, mai can pex pa hoik simin tix, awm: pa koe: pex khawm: uik, jah kah pa koe: ju tinga: num haok plak piang,
tag ang yaox tix laig daux haktiex tiextu Aux tix tawx kah pex, lheu: khaing: Kaliep kawn: simex Yephunie: mai Yawsux kawn: simex Nun.
Viang mawh nan: kawn: nyawm iak pex, pa hoik ah pex mawh pa sang kham: pa giex pa laung, Aux tag viex kix laig, mai kix tag tawng kah haktiex pa seeing: pex kah.
Phan: mawh son pex, tokaux yum: pex tag tik daux tiag.
Kawnpraix pex tag mawh cao: liang yung: kah daux tiag tipon: num, mai kham: geu: son krax pa ang pex yumrhawm:, tom: hoek bawg yam tik kah tokaux yum: pex kah daux tiag.
Awm: bawg yam hu: jiang pex kah haktiex an: tipon: singaix, tix ngaix tag deuh mawh tix num, pex tag yaox tix kham: geu: phimap yuh tix tipon: num, mai pex tag tawng krax pa tik vud Aux pex.
Aux Simiang Siyiex, hoik ah nin:; Aux tag yuh ceu in: tete kah pwi haoh pwi hun: pa caox pa caig, pa khrawm: paox tix tieh feen kah Aux mai kix tag lauxleeing:, mai kix yum: kah daux tiag in:."
Pwi pa deeh hoek pa hoik ploi: Mose hu: jiang kah haktiex an:, krai Grawng: pa caox khaing: haktiex an: mai kieh pwi hun: khankix ngau mai tieh feen kah Mose,
pwi khankix pa viex Grawng: pa caox khaing: haktiex an:, tag yum: kah saux preng plak sivoe ngai: Simiang Siyiex.
Viang mawh nan: can kix pa hu: jiang kah haktiex pa kawn im: ju mawh Yawsux kawn: simex Nun mai Kaliep heue.
Grawng: Yum: Pwi Jiang Kao: Kaux
Mose krai gumlox in: kah pwi Isarilax khankix, mai pwi khankix kied ngau kah.
Mai kix kaoh caocao ponngawb, mai haok kah piang choek gawng mai ah nin:, "Jhak heue, yix ot tin:, yix tag hu: kah dee pa hoik yuh Simiang Siyiex sijax mukheu, mawh kheu yix hoik phit lud."
Mai Mose deeh ah nin:, "Yuh patix pex phit lud kah lox tawm: Simiang Siyiex, mawh kheu in: pex tag ang chix pex kah.
"Paw vi hu:, pex tag som nai: sivoe pwi koeng pex khankix, mawh kheu Simiang Siyiex ang ot sinax pex heue.
Mawh kheu ceu pwi Amaliet mai ceu pwi Khanan hoik ot sivoe pex, mai pex tag goh kah lawm vaig, kheu jao hoik veeh pex tix khaing: pa hawt tix Simiang Siyiex, Simiang Siyiex tag ang ot tau mai pex."
Kix kawn: viex rhawm: kua: tix haok kah piang choek gawng, Viang mawh nan: teug bwan: sijax mukheu Simiang Siyiex, mai Mose ang lai lih khaing: nyiiex bang:.
Khaix an: ceu pwi Amaliet mai ceu pwi Khanan pa ot kah piang gawng lih puing kix mai pheet kix, tom: hoek kah veng Hawma heue.
Krax Tan Phawng: NghoxCa Im: Mai Krax Tan Pa Nyaux
Simiang Siyiex ah nin: kah Mose,
"Krai kah pwi Isarilax khankix, yam hoek pex kah daux haktiex pa ot tix pa tawx Aux kah pex,
pex tag yuh krax tan kah Siyiex, pa mawh krax tan pa yuh kah ngu ang ah, krax tan pa gleeing ang ah, krax tan pa appong: ang ah, sonsang grum naog krax tan pa tiextu pex, awm: krax tan pa koe: rhawmrhi: pex ang ah, mai pwie pa hoik tat tix deuh khankix, sonsang mawh krax tan pa sioe: bhawng: pa Khaw: rhawm: Siyiex, khaing: moi mhaing: mai pex mhaing: ang ah, yung: mhaing: ang ah,
nawh tag viex krax tan tix hoek kah Simiang Siyiex, pa mawh krax tan phawng: nghoxca im: kao: son tix son khaing: tix Epha mai phawng: nghoxca ceu pa mhawm:, pa hoik klao: tix tau kah bee pon: son tix son, khaing: tix Heng:;
mai rawm: plix siiet pon: son tix son khaing: tix Heng:, son krax tan pa nyaux, maix tag khre: tau mai krax tan pa gleeing ang ah, krax tan pa appong: ang ah, son kawn: yung: ku mu: heue.
Mai son yung: mhaing: maix tag khre: awm: krax tan phawng: nghoxca im: ra: son khaing: kao: son daux tix Epha khaing: phawng nghoxca ceu pa mhawm:, pa klao: tix tau mai bee loe: son tix son khaing: tix Heng:;
son krax tan pa nyaux, maix tag tan rawm: plix siiet loe: son tix son khaing: tix Heng:, son krax tan pa sioe: bhawng: kah Simiang Siyiex.
Mai yam khre: maix moi mhaing: tix mu: son krax tan pa gleeing, phan: ang mawh nan: son krax tan pa appong:, sonsang grum naog krax pa tiextu pex, phan: ang mawh nan: son krax tan pa nhim: kah Simiang Siyiex,
maix tag viex tix tan phawng: nghoxca im: loe: son tix son khaing: tix Epha, khaing: phawng: nghoxca im: ceu pa mhawm:, pa kluklao: tix tau mai bee tix plak Heng: tau mai moi mhaing: tix mu:,
mai pex tag viex rawm: plix siiet son krax tan pa nyaux tix plak Heng:, pa mawh krax tan pa gleeing kah ngu pa sioe bhawng: pa Khaw: rhawm: Siyiex.
Maix tag yuh awm: in: kah moi mhaing: ang ah, yung: mhaing: ang ah, son kawn: yung: iak ang ah, son kawn: pex mhaing: ku mu: ang ah.
Awm: diag koe: khawng: brie pa khre: pex tix deuh, mawh kheu nan: pex tag yuh tau awm: diag pa koe: an: ku mu:.
Can pwi haktiex khawm: uik, yam yuh krax tan pa gleeing kah ngu, pa mawh krax tan pa sioe: bhawng: kah Simiang Siyiex.
Mai phan: nyo sinie hoek tix peung tau mai pex, phan: ang mawh nan: pwi tix kauxkaux pa ot daux sinax doeh simie ceucat pex, phan: nawh simie tix yuh krax tan pa gleeing kah ngu pa mawh krax tan pa sioe: bhawng: kah Simiang Siyiex, kieh kix yuh awm: pa yuh pex.
Been pa deuh pex son pwi hun: mai son nyo sinie; tag mawh tix ceu khaing:, mai been pa caw pex tix priex kah daux doeh simie ceucat tix leeing ju, mawh pa yuh kah mawx kah pex tag kieh awm: an: kah nyo sinie sivoe Simiang Siyiex.
Caw tix koe: lox tat jhawm: prawng mai lox lai beenli tix mu: khaing: son nyo sinie pa hoek tix peung tau mai pex heue."
Simiang Siyiex ah nin: kah Mose,
"Krai ah nin: kah pwi Isarilax, yam hoek pex kah daux haktiex pa viex Aux pex hoek,
yam ih pex priex kah daux haktiex an:, pex tag caw tix viex krax tan pa yaogyaw kah Simiang Siyiex.
Pex tag yuh khaomun tix khlawp khaing: nghoxca pa liang tix pon, kieh mawh krax tan pa yaog; awm: krax tan pa yaog khaing: glah nghox; maix tag caw tix tan awm: an:.
Pex tag tawx nghoxca pa liang tix pon kah Simiang Siyiex, sonsang mawh krax tan pa yaog khaing: doeh simie ceucat pex leeing ju heue.
Lox Tat Jhawm: Prawng Pa Dex Dawd Son Phimap Pa Ang Bak Tix Yuh
Phan: pex phit lud kah daux pa ang bak tix yuh, mai ang pon hawt yuh awm: lox tawm: pingnyap in: khawm: uik, pa hoik krai Simiang Siyiex kah Mose,
awm: lox pa hoik tawm: Simiang Siyiex kah pex, khaing: Mose khawm: uik, jah kah singaix tawx Simiang Siyiex lox tawm: pingnyap, kah doeh simie ceucat pex khankix leeing ju,
phan: pwi kawn: phit lud kah daux pa ang tix bak tix yuh, mai kah daux pa ang pwi hun: koe: krax tawng krax yung, mai pwi hun: khankix, tag tan kawn: moi mhaing: tix mu:, son krax tan pa gleeing, pa sioe: bhawng: pa Khaw: rhawm: Siyiex tau mai krax tan phawng: nghoxca im:, mai krax tan pa nyaux, mai kawn: pex mhaing: tix mu: son krax tan pa pluat ploi: phimap awm: pa koe: been.
Mai cao: giex kaing: li tag yuh krax khyox Khaw: son pwi hun: ceu pwi Isarilax khawm: uik, mai kix tag pon krax pluat ploi:, kheu mawh pa lud loe:, kix tag viex krax tan tix, krax tan pa gleeing kah ngu kah Simiang Siyiex mai krax tan son phimap kix kah plak sivoe ngai: Simiang Siyiex, son phimap pa lud loe: kix.
Mai pwi haoh pwi hun: pwi Isarilax khawm: uik, mai nyo sinie pa peung sinax kix tag pon krax pa pluat ploi:, mawh kheu pwi khawm: uik, hoik phit lud kah daux pa lud loe: tix.
"Phan: pwi tix kaux phit lud kah daux pa lud loe: tix, nawh tag tan pex shiang: naog num tix mu:, son krax tan pa pluat ploi: phimap.
Mai cao: giex kaing: li tag yuh krax pa khyox Khaw: sivoe Simiang Siyiex son pwi pa phit lud kah daux pa lud loe:, yam yuh nawh phimap pa ang bak tix yuh, mai yuh pa khyox Khaw: son nawh; mai nawh tag pon krax pa pluat ploi:.
Maix tag deuh lox tat jhawm: prawng tix mu: ngie son pwi pa phit lud kah daux krax pa ang tix bak tix yuh tix ceuceu, son ceu pwi Isarilax, mai son nyo sinie pa hoek peung sinax pex heue.
Lox Tat Jhawm: Prawng Pa Dex Dawd Mai Phimap Pa Kua: Tix Yuh
Phan: pwi tix kauxkaux kua: rhawm: tix phit, pa mawh pwi haktiex an:, mai nyo sinie ang ah, yuh pa ang Khaw: ang jiet kah Simiang Siyiex, tag teei tix tik pwi an: khaing: sinax ceu pwi nawh.
Mawh kheu hoik nunai: nawh kah lox Simiang Siyiex, mai yieh laux kah lox tawm: pingnyap Nawh Cao:, tag teei tix tik kah kaw an:, phimap nawh tag koe: kah piang nawh heue."
Grawng: Ciyang Kah Pwi Phit Singaix Twah
Yam kawn: ot pwi Isarilax khankix kah daux tiag, kix yaox pwi tix kaux kraix khix singaix twah.
Pwi pa yaox kah cao: kraix khix, viex nawh hoek kah Mose mai Arun mai kah cub pwi hun:.
Kix laung nawh, kheu ang kix nyang tawng pa sang yuh tix kah nawh.
Simiang Siyiex ah nin: kah Mose, "Tag kieh pwi an: yum: tete; cub pwi hun: tag dheem: nawh kah simaox, kah plak praix nyiiex bang:."
Awm: gumlox pa hoik tawm: Simiang Siyiex kah Mose, cub pwi hun: viex nawh lih plak praix nyiiex bang:, mai dheem: nawh yum: kah simaox heue,
Grawng: Ciem Sibex Dha:
Simiang Siyiex ah nin: kah Mose,
"Krai kah pwi Isarilax khankix, kieh kix yuh ciem taix sibex hawt daog sibex ceep tix, tom: sidauh ju simie ceucat kix, mai sonsang sau: ciem tai keei: klai raoma: hawt daog sibex du daog.
Yam jhak pex kah ciem tai sibex an:, sonsang mawh pa doh keud kah lox tawm: pingnyap Simiang Siyiex, mai son ang pex sang hawt yuh awm: alo rhawmrhi: cao: tix, mai awm: pa khaw: kah ngai: pex awm: pa hoik sax lud pex.
Sonsang doh keud pex mai hawt yuh awm: lox tawm: pingnyap Aux khawm: uik, mai mawh pwi pa singax kah son Siyiex pex.
Aux mawh Simiang Siyiex pex, pa hoik viex pex lih khaing: meung Ejiptux sonsang mawh Siyiex pex, Aux mawh Simiang Siyiex pex heue.
Grawng: Pa Tieh Feen Kah Mose Mai Arun
Yamin: Kawrax kawn: simex Izaha, kawn: simex Kawhat, kawn: simex Lewix tau mai Datan, mai Abiram kawn: simex Eliabax mai Awnax kawn: simex Pelet, kawn: simex Rubin kok pwi khankix hu:,
tau mai pwi Isarilax tiblah mai cao: kaing: cub pwi hun: pa laug kix pa ao: min: ra: yieh tiphwan: kaux khaing: daux pwi hun:, yaog tix cung mai tieh feen kah Mose.
Kix khrawm: paox tix, sonsang tieh feen kah Mose mai Arun, mai kix ah nin: kah kiex, "Kaing yuh pax kied sidaing: kin:, mawh kheu pwi hun: khawm: uik mawh pa singax singeh kukaux mai Simiang Siyiex ot sinax kix; yuh kah mawx pax lai kawn: sang yuh tix ting kah piang cub pwi hun: Simiang Siyiex?"
Yam mhong: Mose Grawng: in:, nawh gup ngai: baoh tix;
nawh sikah kah Kawrax mai cub paox nawh khankix ah nin:, "Daux ponngawb pasax, Simiang Siyiex tag jhi:, pwi mawx mawh pwi Nawh Cao:; mai mawh pwi mawx pa singax singeh, tag kieh nawh hoek dex Nawh Cao:; mawh pwi mawx pa sang laug Nawh Cao: kah! Nawh tag kieh kix hoek dex Nawh Cao:;
Kawrax mai paox cub maix khawm: uik eue, yuh awm: in:, viex pan ngu hoek;
daux pasax sau: ngu mai nyawng bhawng: kah daux an:, sivoe Simiang Siyiex, mai pwi pa laug Siyiex kah nawh tag mawh pa singax singeh. Kawn: simex Lewix khankix eue, kaing pa yuh pex sidaing: kin:."
Mai Mose ah nin: kah Kawrax, "Pex pa mawh kawn: simex Lewix khankix eue, nghiiet yamin:,
pa gwieh Simiang Siyiex Isarilax pex khaing: pwi hun: Isarilax, sonsang viex pex dex hawt tokaux Nawh Cao:, sonsang yuh pex kaing jhaw: nyiiex gox bwan: man: Simiang Siyiex, mai sonsang cung pex plak sivoe ngai: pwi hun:, sonsang yuh pex kaing jhaw: son kix, keud pex mawh kaing pa iak lie;
Nawh Cao: hoik viex pex hoek dex kah tokaux Tix, maix mai khawm: pux aik maix pa mawh kawn: ceu pwi Lewix, tau mai maix ang mawh lie? Mai pex kawn: sawg kah ara cao: giex kaing: li lie?
Mawh kheu nan: maix mai paox cub paox caw maix khankix, hoik khrawm: paox tix yuh krax pa tieh feen kah Simiang Siyiex. Arun mawh pwi yuh kah mawx, pex lai ngau mai tieh feen kah nawh?"
Mai Mose ploi pwi hu: kok kah Datan mai Abiram, kawn: simex Eliabax, mai kix ah nin:, "Yix tag ang hoek,
pa hoik viex maix yix lih khaing: haktiex pa lih rawm:teeih mai rawm: hia:, sonsang pah yix kah daux tiag mai sonsang yaog maix tix yuh cao: kaing: kah piang yix kawn: keut maix mawh pa iak lie?
Lheu: khaing: an: maix ang tie viex yix laig kah haktiex lih rawm:teeih mai rawm: hia:, mai ang tie tawx yix cie sinngao, ma: kaung: mai sipeem plix siiet khankix. Mawh sang koik maix tix teei sok ngai: pwi inkix lie? Yix tag ang hoek."
Mose kied songrhawm: mai ah nin: kah Simiang Siyiex, "Paw lai rieb kah krax tan kix, Aux ang sax teei la khaing: kix tix mu: kawx, mai ang sax yuh pa kin: kah kix tix kaux kawx."
Mai Mose ah nin: kah Kawrax, "Pasax maix viex paox cub paox caw: maix, maix khawm: kix tau mai Arun hoek sivoe ngai: Simiang Siyiex;
teei pan pex kukaux, mai sau: nyawng bhawng: kah daux, mai viex pan pex hoek kah plak sivoe Simiang Siyiex kukaux, pa mawh pan ra: yieh tix phwan: mu:; maix mai Arun kawx, tag hoek tau mai pan tix, tix kaux tix mu:.
Mawh kheu nan: pwi kukaux teei pan cie tix, mai sau: ngu, mai nyawng bhawng: kah piang an:, mai cung hawt diang siviex nyiiex bwan: man: bang: kum: tau mai Mose mai Arun.
Mai Kawrax khrawm: cub pwi hun: khankix, sonsang tieh feen kix kah hawt diang siviex nyiiex gox bwan: man: bang: kum:. Mai min: plak ngai: Simiang Siyiex lih bleeh kah piang cub pwi hun:.
Mai Simiang Siyiex sikah kah Mose mai Arun ah nin:,
"Yoi: tokaux tix khaing: sinax cub pwi hun: in:, sonsang yuh Aux kix lauxleeing: daux tivud khaing:.
Kiex gup pakngai: tix mai ah nin:, "Siyiex eue, Siyiex pa mawh ju khwan: kah piang nex nham: kawn: pwi khawm: uik, kheu jao phimap pwi tix kaux, mai Maix Cao: songrhawm: kah cub pwi hun: khawm: uik lie?"
Simiang Siyiex ah nin: kah Mose,
"Krai kah pwi hun: ah nin:, lih hu: singai khaing: dee ot Kawrax, Datan mai Abiram."
Mose krai ah nin: kah Datan, mai Abiram, mai kuad song: nong: yu pwi Isarilax hawt khaix nawh.
Mose krai ah nin: kah pwi hun:, "Lih hu: khaing: nyiiex gox pwi pa caox pa caig inkix, paw doh hu: krox hu: teeh kah kraungkhrai: kix tix ceu kawx, ha pex kox lauxleeing: tau mai phimap kix."
Mawh kheu nan: kix lih hu: dee singai khaing: dee ot Kawrax, Datan mai Abiram; Datan mai Abiram hoek cung kah siviex nyiiex gox kix tau mai moeng kix, kawn: simex kix, mai kawn: nyawm iak kix.
Mose ah nin:, "Pex tag tawng kah hoik ploi: Simiang Siyiex Aux yuh ceu in:, ang lai mawh pa yuh aux hawt alo tix.
Phan: pwi inkix yum:, awm: been yum: kawn: pwi khawm: uik ang ah, mai phan: kix yaox tix kham: geu: awm: koe: been pwi khawm: uik, Simiang Siyiex ang tau tix ploi: aux hoek.
"Viang mawh nan:, phan: Simiang Siyiex sang phan: ceu pa khraox tix ceu, mai tiex tag ang daux jheeh tix mai bleet kah kix tau mai can pa koe: kix khawm: uik, mai kix tag laig kah daux meung yum: khawm: tokaux im: tix, pex tag tawng mawh pwi inkix, pa hoik map kah Simiang Siyiex."
Khaix hoik ah nawh nan:, tiex greem: dee ot kix hoik bih,
tiex ang jheeh tix mai bleet kix tau mai nyiiex khawm: pwi Kawrax khawm: kraungkhrai: cie kix khawm: uik,
Mawh kheu nan: kix mai can pwi pa koe: kix khawm: uik laig kah daux meung yum: khawm: tokaux im: tix; mai tiex deeh nyeep tix kah piang kix, mai kix lauxleeing: khaing: sinax cub pwi hun:.
Pwi Isarilax pa ot hawt vungviang kix, to: tau mai yiiem tix; mai kix hoik ah nin:, "Phan: ang mawh nan:, tiex tag sang bleet ex khawm: uik!"
Mai ngu lih hoek khaing: Simiang Siyiex, mai gleeing pwi pa tan nyawng bhawng: khankix, ra: yieh tix phwan: kaux.
Simiang Siyiex ah nin: kah Mose,
"Krai kah Eliza kawn: simex Arun cao: giex kaing: li, sonsang deeh sut nawh pan ngu khaing: dee gleeing ngu, mai prungprang: gaox ngu singai khaing: paox tix, mawh kheu nan: pan ngu an: mawh pa singax singeh.
Pan ngu cie pwi pa phit lud tom: som ju tix; mai tawk mawh khliep plah tawng sonsang mawh dawb tawb son khu: dee tan, sonsang tan an: sivoe Simiang Siyiex; mawh kheu an: mawh pa singax, mai tag mawh mhai: sakse son pwi Isarilax khankix."
Eliza cao: giex kaing: li teei pan ngu tawng, pa hoik gleeing tix khaing: pwi pa tan khankix, mai kix tawk mawh khliep plah tawng sonsang tawb kah khu: dee tan.
Sonsang mawh krax pa doh keud, son ceu pwi Isarilax khankix, mai son ang pwi tang: kaux pa ang mawh doeh simie ceucat Arun yuh cao: giex kaing: li son ang pon gleeing nyawng bhawng: kah plak sivoe Simiang Siyiex, ha kox lih awm: Kawrax mai paox cub paox caw: nawh, awm: pa hoik krai Simiang Siyiex kah Eliza khaing: pa hoik tawm: kah Mose heue.
Pa Ngau Pwi Khankix
Kah daux pasax pwi hun: pwi Isarilax khankix, ngau tieh feen kah Mose mai Arun ah nin:, "Pax hoik pah kah pwi Simiang Siyiex."
Yam khrawm: cub pwi hun: khankix paox tix tieh feen kah Mose mai Arun, kix veeh ngai: tix plak sivoe nyiiex gox bwan: man: bang: kum:; jhak heue, Paiawm: lih kheem: kah piang nyiiex gox bwan: man:, mai min: plak ngai: Simiang Siyiex lih bleeh.
Mose mai Arun hoek sivoe nyiiex gox bwan: man: bang: kum:,
mai Simiang Siyiex ah nin: kah Mose,
"Lih hu: singai khaing: sinax pwi hun: inkix, sonsang yuh Aux kix lauxleeing:, daux tivud khaing:." Mai kiex gup pakngai: tix.
Mai Mose ah nin: kah Arun, "Teei pan ngu cie maix mai sau: ngu pa koe: kah piang khu: dee tan mai sau: nyawng bhawng: kah piang, mai viex hoek kah pwi hun: phaiphai:, sonsang yuh krax khyox Khaw: son kix, kheu hoik lih krax songrhawm: khaing: Simiang Siyiex, jhawm: saux preng hoik hoek."
Mai Arun teei pan ngu awm: lox pa krai Mose, mai to: sinax pwi hun: khankix, jhak heue, Jhawm: saux preng hoik jah tix lih sinax pwi hun:; nawh sau: nyawng bhawng: kah daux an:, mai yuh krax khyox Khaw: son pwi khankix.
Nawh cung sinax pwi yum: mai pwi im:, mai jhawm: saux preng yiien:.
Ang sawn: pwi pa yum: kah Grawng: pa yuh Kawrax, can pwi pa yum: kah jhawm: saux preng koe: tix mheen: pon: rheng: aliah yieh (14700) kaux.
Yam hoik yiien: jhawm: saux preng, Arun deeh ing: kah Mose hawt diang siviex nyiiex gox bwan: man: bang: kum: heue.
Khaox Gix Arun
Simiang Siyiex ah nin: kah Mose,
"Krai kah pwi Isarilax mai teei khaox gix, khaing: nyiiex ma: keeing: kix, tix cub tix gawng:, teei khaox gix kao: ra: gawng:, khaing: cao: kaing: kix khawm: uik, awm: pa koe: nyiiex ma: keeing: kix, tiem: tix deuh ceukaux pwi kukaux kah piang khaox gix kix,
Mai tiem: ceukaux Arun kah piang khaox gix ceu pwi Lewix. Mawh kheu doeh nyiiex ma: keeing: kix, tag caw tix koe: khaox gix tix nyiiex tix gawng:.
Maix tag deuh an: khankix, kah daux nyiiex gox bwan: man: bang: kum:, sivoe teug bwan: sijax mukheu kah dee pub Aux kah pex.
Khaox gix pwi pa laug Aux, tag pruh tai; mawh kheu nan: Aux tag kieh lox ngau khaing: pwi Isarilax mai lox ngau pa tieh feen kix kah maix yiien:."
Mose krai kah pwi Isarilax khankix; mai; cao: kaing: kix kukaux tawx khaox gix tix kah nawh tix kaux tix gawng:, son cao: kaing: kukaux, awm: koe: nyiiex ma: keeing: kix, kao: ra: gawng:; mai khaox gix Arun koe: sinax khaox gix cie kix.
Mai Mose deuh khaox gix an: khankix, kah plak sivoe Simiang Siyiex, kah daux nyiiex gox bwan: man: teug bwan: sijax mukheu.
Kah daux singaix pasax, Mose laig kah daux nyiiex gox bwan: man: dee koe: teug bwan: sijax mukheu; jhak heue, khaox gix Arun, khaing: nyiiex ma: ceu pwi Lewix hoik glaoh lhax, lih tix koe: tux, pruh tai, mai lih tix koe: plix khaox Batan pa teem.
Mose viex khaox gix khankix lih khaing: plak sivoe Simiang Siyiex kah pwi Isarilax khawm: uik; mai kix jhak tix yaox mai pwi kukaux tang: deeh teei khaox gix cie tix.
Simiang Siyiex ah nin: kah Mose, "Deeh viex khaox gix Arun, deeh deuh kah plak sivoe teug bwan: sijax mukheu, sonsang priex mawh mhai: sakse son pwi pa tieh feen khankix, sonsang pon kieh maix krax pa ngau pa tieh feen kix kah Aux grai:, son ang kix yum:."
Awm: pa hoik tawm: Simiang Siyiex kah nawh; nawh yuh awm: an:,
pwi Isarilax khankix ah nin: kah Mose, "Jhak heue, Yix hoik lauxleeing:. Yix hoik grai: grup. Yix hoik grai grup heue.
Can pwi pa hoek dex nyiiex gox bwan: man: Simiang Siyiex kukaux tag yum:, mawh tag sang yaox yix tix yum: khawm: uik lie?"
Beeh Glawm: Cao: Giex Kaing: li Mai Lewix
Simiang Siyiex ah nin: kah Arun, "Maix mai kawn: simex maix khawm: nyiiex ma: keeing: maix pa ot tau mai maix, tag yaox tix klawm: phimap pa dex pa dawd dee pa singax singeh; maix mai kawn: simex pa ot tau mai maix khankix, tag yaox tix klawm: phimap Grawng: pa yuh cao: giex kaing: li.
Viex puxaik maix khanix, pa mawh doeh simie ceucat pwi Lewix mai doeh simie keeing: maix hoek kah maix, sonsang kleuk kix tix tau mai maix, mai yuh kaing jhaw: tau mai maix, yam ot maix mai kawn: simex maix khankix sivoe nyiiex gox bwan: man: teug sijax mukheu.
Kix tag yuh can ceu pa lo maix mai can ceu pa lo son nyiiex gox bwan: man: khankix. Kix tag ang pon tix hoek dex kraungkhrai: dee singax singeh kah khu: dee tan, phan: ang mawh nan: kix mai maix tag yum:.
Kix tag kleuk tix tau mai maix, mai yuh kaing jhaw: nyiiex gox bwan: man: bang: kum:, son kaing jhaw: nyiiex gox bwan: man: khawm: uik, mai pwi tang: kaux tag ang pon tix hoek dex pex.
Mai maix tag yaox tix teei beeh glawm: priex dee pa singax singeh, mai beeh glawm: khu: dee tan, son ang pa songrhawm: lai sang baox lih kah piang pwi Isarilax.
Jhak heue, Tokaux cao: Aux hoik teei puxaik maix khankix, ceu pwi Lewix khaing: daux sinax pwi Isarilax; kix mawh khawngphak pa hoik tawx Simiang Siyiex kah maix, sonsang yuh kix kaing jhaw: nyiiex gox bwan: man: bang: kum:.
Maix mai kawn: simex maix khankix, tag yuh kaing jhaw: beeh glawm: cao: giex kaing: li pa dex pa dawd mai khu: dee tan khawm: uik, mai pa koe: plak daux man: tie; maix tag yuh kaing jhaw: an:. Aux tawx khawngphak ara cao: giex kaing: li kah maix, mai pwi tang: kaux pa hoek dex tag pah yum: heue.
Krax Tan Pa Joh Jhan: Son Cao: Giex Kaing: li
In: tag mawh cie maix kah daux pa kied singax singeh khaing: pa ang nyang gleeing kah ngu; krax tan kix kuceu pa mawh krax tan phawng: nghoxca im:, mai krax tan pa pluat ploi: phimap, krax tan pa phit lud kah Siyiex, pa mawh krax tan kix kah Aux, tag mawh pa kied singax son maix mai kah kawn: simex maix khankix.
Maix tag ih an: khankix kah dee pa kied singax singeh, simex kukaux tag ih kah an:, an: tag mawh pa singax singeh kah son pex.
In: baox mawh cie maix. Krax tan pa yaog khaing: daux khawngphak kix, tau mai krax tan pa yangyeuh cie kawnpraix Isarilax khankix, Aux tag tawx an: khankix, son maix khawm: son kawn: simex kawn: bon maix, pa koe: tau mai maix, awm: beenli pingnyap leeing ju, pwi pa singax singeh kukaux khaing: daux nyiiex ma: maix, tag pon tix ih.
Khaing: daux bee pa mhawm: khawm: uik, mai khaing: daux rawm: plix siiet pa mhawm: khawm: uik mai khaing: nghoxca khankix, mai plix khaox pa liang tix pon pa tawx kix kah Simiang Siyiex, Aux hoik tawx kah maix.
Plix khaox pa liang tix teem khaing: daux haktiex kix khawm: uik, pa viex kix hoek kah Simiang Siyiex, tag mawh cie maix; pwi pa singax singeh khaing: daux nyiiex ma: maix kukaux, tag pon tix ih.
Can ceu pa hoik tiextu kix tix tan, kah daux ceu pwi Isarilax khankix, tag mawh cie maix.
Can ceu pa liang tix keh khaing: daux khawm: uik pwi ang ah, khawng: brie ang ah, pa tan kix kah Simiang Siyiex, tag mawh cie maix, viang mawh nan:, kawn: ai: plix num: pa keh khaing: pwi, maix tag deeh taoh kah, mai khawng: brie pa liang tix keh pa ang singax khankix kawx, maix tag deeh taoh kah.
Yam hoik naog ju kix tix khix maix caw tix deeh taoh kah kix, awm: pa hoik tat maix jum kah mau shekhe phwan: plah, pa koe: dee pa singax singeh, pa sidu ngai: jiang kah mau tix shekhe mawh tinga: Kerax.
Viang mawh nan: kawn: moi pa liang tix keh ang ah, yung: pa liang tix keh ang ah, kawn: pex pa liang tix keh ang ah, maix tag ang pon tix deeh taoh; an: khankix mawh pa singax singeh. Maix tag phruah nham: kix kah piang khu: dee tan, mai gleeing khlawp bee khankix son krax tan pa gleeing kah ngu pa sioe: bhawng: pa Khaw: rhawm: Simiang Siyiex;
nex nawh khankix tag mawh cie maix, nex eek pa yangyeuh, mai ba: dawm: tag mawh cie maix.
Krax tan pa singax singeh pa viex pwi Isarilax kah Simiang Siyiex khawm: uik, Aux hoik tawx kah maix, kah kawn: simex, kawn: bon pa ot tau mai maix, awm: beenli pingnyap leeing ju. An: mawh sijax mukheu pa hoik tiag tix awm: kih, kah plak sivoe Simiang Siyiex mai kah son maix mai son doeh simie ceucat maix leeing ju.
Simiang Siyiex ah nin: kah Arun, "Maix tag ang pon tix koe: sinngao kah daux haktiex kix, maix tag ang pon tix koe: nyum: khaing: sinax kix. Aux mawh son plak cie maix, mai sinngao cie maix khaing: sinax pwi Isarilax heue.
Grawng: Kao: Son Tix Son Pa Teem: Kah Pwi Lewix
"Aux hoik tawx sinngao cie pwi Isarilax kao: son tix son kah ceu pwi Lewix, sonsang pon yuh kix kaing jhaw:, kah daux nyiiex gox bwan: man: bang: kum:.
Jah yamin: pwi Isarilax khankix, tag ang pon tix hoek dex nyiiex gox bwan: man: bang: kum:, phan: ang mawh nan: tag yaox tix kham: kah phimap tix, mai yum: kah heue.
Viang mawh nan: ceu pwi Lewix khankix, tag yuh kaing jhaw: nyiiex gox bwan: man: bang: kum:, mai kix tag yaox tix kham: kah phimap cao: tix. An: tag mawh lox pingnyap leeing ju, tom: sidauh hoek doeh simie ceucat pex; kix tag ang yaox tix pon sinngao kah daux sinax pwi Isarilax.
Mawh kheu krax tan pwi Isarilax kao: son tix son, pa viex kix tix tan kah Simiang Siyiex, Aux hoik tawx kah ceu pwi Lewix som samg mawh sinngao kix, kix tag ang pon tix koe: sinngao kah sinax pwi Isarilax heue.
Kao: Son Tix Son Cie Pwi Lewix
Simiang Siyiex krai ah nin: kah Mose,
"Krai ah nin: kah ceu pwi Lewix,yam teei maix krax tan kao: son tix son khaing: pwi Isarilax mai pa hoik tawx Aux mawh sinngao pa sang pon maix khaix kix, khaing: kah daux an: kao: son tix son, maix tag tan kah Simiang Siyiex.
Krax tan pa tan maix, maix tag caw tix deuh mawh awm: krax tan simie nghoxca pa kaoh khaing: daux glah, mai rawm: plix siiet pa hoik pon tix khaing: dee biiet rawm: plix siiet.
Awm: an: maix tag tan kao: son tix son khaing: daux pa koe: tix kah Siyiex, khaing: kao: son pa pon maix kah pwi Isarilax; khaing: daux an: maix tag tan kah Simiang Siyiex kah Arun cao: giex kaing: li.
Khaing: daux krax tan pa pon pex khankix, laug nyum: pa nie mhawm: mai pa singax khaing: kah daux kuceu mai tan kah Simiang Siyiex.
Mawh kheu nan: maix ah nin: kah pwi Lewix,yam laug pex tix tan pa kied mhawm: khaing: daux an:, pa kawn deuk khankix tag simin tix tawx kah ceu pwi Lewix, awm: pa pon tix khaing: glah nghox, mai awm: rawm: plix siiet pa pon tix khaing: dee biiet rawm: plix siiet;
maix mai kawn: nyiiex ma: maix khawm: uik tag pon tix ih an:, kudauh kudee, mawh kheu an: mawh khawngphak pa tawx Aux son kaing jhaw: pa yuh maix daux nyiiex gox bwan: man: bang: kum:.
Khaix hoik tan maix ceu pa kied mhawm: khaing: daux an:, maix tag ang yaox tix kham: geu phimap, mai maix tag ang pon tix kieh krax tan pa singax singeh khaing: pwi Isarilax seeing: brai:, phan: ang mawh nan: maix tag yum: heue "
Been Pa Dex Pa Dawd Mai Pa Singax Singeh
Simiang Siyiex ah nin: kah Mose mai Arun,
"In: mawh been lox jhawm: prawng pa tawm: Simiang Siyiex, mai krai kah pwi Isarilax khankix, sonsang viex kix kawn: moi shiang: raoh pa loig tix mu:, pa ang preeh mai pa ang sax sau: iak kah piang.
Maix tag tawx an: kah Eliza cao: giex kaing: li, sonsang teei an: lih kah plak praix nyiiex gox bang:, mai pah moi an: sivoe nawh,
Eliza cao: giex kaing: li, tag teeei nham: tiblah kah gien: taix tix, mai phruah nham: an: aliah bawg sivoe nyiiex gox bwan: man: bang: kum:.
Tag gleeing kawn: moi shiang: an: kah plak sivoe ngai: cao: giex kaing: li, mai gleeing hak, nex, nham: tau mai roing khawm: uik.
Cao: giex kaing: li teei khaox Akashax, mai rao imkrim, man: raoh rawt, mai taing an: khankix kah daux sigreung ngu pa gleeing kah moi shiang: an:.
Khaix an: cao: giex kaing: li tag sidaux kraung mai heem: tokaux tix kah daux rawm:, khaix an: nawh tag laig kah daux nyiiex gox bang:, mai cao: giex kaing: li tag mawh pa ang singax tom: hoek plakbo.
Mai kaw pa gleeing kah an:, tag sidaux kraung mai heem: tokaux tix kah daux rawm:, mai nawh tag mawh pa ang singax tom: hoek plakbo.
Mai kieh pwi pa singax kaux khrawm: kah nyaox kawn: moi shiang an: khankix, mai priex an: kah plak praix nyiiex bang: kah dee pa singax; mai kix tag priex an: son pwi hun: Isarilax, sonsang shiao rawm: an: kieh kix singax khaing: phimap.
Pwi pa khrawm: nyaox kawn: moi shiang an:, tag sidaux kraung tix, mai nawh tag mawh pa ang singax tom: hoek plakbo, an: tag mawh gumlox beenli leeing ju son pwi Isarilax, mai son nyo sinie pa hoek peung kah daux sinax kix.
Kaw pa hu: teeh kah tokaux pwi yum: tix kauxkaux, tag mawh pa ang singax aliah singaix;
Yam hoek daux loe: ngaix tix ngaix, mai daux aliah ngaix tix ngaix nawh tag kieh tokaux tix singax kah rawm: an:, phan: nawh ang kieh tokaux tix singax yam hoek daux loe: singaix, mai daux aliah singaix tix ngaix nawh tag mawh pa ang singax.
Pwi hu: teeh kah tokaux pwi yum: tix kauxkaux, mai ang kieh tokaux tix singax, nawh mawh pa kieh nyiiex gox bwan: man: Simiang Siyiex seeing: brai:, mai tag teei tix tik kaw an: khaing: pwi Isarilax, mawh kheu ang phruah rawm: pa kieh singax kah tokaux tix, pa ang singax kawn: koe: kah piang nawh.
"In: mawh been lox tat jhawm: prawng yam yum: pwi kah daux nyiiex bang:. Can pwi pa laig kah daux nyiiex bang: kukaux, mai can pwi pa ot kah daux nyiiex bang: kukaux tag mawh pa ang singax kah daux aliah singaix,
mai aw: pa ang tawb tix deuh ku mu:, tag mawh pa ang singax.
Can pwi pa ot plak praix daux kaung: khankix, pa hu: teeh kah pwi pa yum: kah vaig ang ah, yum: kah jhawm: saux ang ah, si-ang: pwi yum: ang ah, simeeig ang ah, tag ang singax aliah singaix.
Son kaw pa ang singax an:, kix tag teei nyaox kawn: moi shiang: pa hoik gleeing tiblah sonsang kieh phimap kix singax, sau: tau mai rawm: klawng: pa lih hu: kah piang an: kah daux aw:;
Pwi pa singax tag teei rao imkrim, mai cub kah daux rawm:, phruah nawh kah piang nyiiex gox bang:, mai kah piang kraungkhrai:, mai kah piang pwi pa ot baoh tan:, mai kah piang pwi pa hu: teeh kah si-ang: pwi yum:, mai pa yum: kah pah pwi, mai pa yum: kah jhawm: saux, mai kah piang pwi pa teeh kah simeeig;
Pwi pa singax tag phruah kah piang pwi pa ang singax daux loe: singaix, mai daux aliah singaix; yam hoek daux singaix aliah, nawh yuh tokaux tix singax, tag sidaux kraung tix mai heem: tix kah rawm:, yam hoek plakbo, nawh tag mawh pa singax.
"Pwi pa ang singax phan: ang nyang yuh tokaux tix singax, tag teei tix tik kaw an: khaing: sinax pwi hun:, mawh kheu hoik yuh nawh dee pa singax Simiang Siyiex seeing: brai:; jao ang nawh phruah rawm: pa kieh singax kah piang tokaux tix, nawh ang singax.
An: tag mawh pingnnyap son kix leeing ju. Pwi pa phruah rawm: singax kawx, tag yaox tix sidaux kraung tix; mai pwi pa hu: teeh kah rawm: singax an:, tag mawh pa ang singax tom: hoek plakbo.
Can ceu pa hu: teeh pwi pa ang singax an: tag mawh pa ang singax; mai pwi pa hu: teeh kah ceu an:, tag mawh pa ang singax tom: hoek plakbo heue."
Krax Pa Lud Loe: Mose Baoh Kadeshax
Mai cub pwi hun: pwi Isarilax khankix, hoek kah daux tiag Zin khix tix, mai pwi khankix ot baoh Kadeshax; Meriam yum: tan:, mai kix sipaung: nawh tan: heue.
Mawh kheu rawm: nyaux son pwi hun: khankix ang koe:; mai kix khrawm: paox tix tieh feen kah Mose mai Arun.
Pwi khankix deuh phimap kah Mose mai ah nin:, "Yix Khaw: tix hoik yum:, yam yum: pux aik yix khankix kah plak sivoe Simiang Siyiex!
maix lai viex cub pwi hun: Simiang Siyiex hoek kah daux tiag tin:, sonsang yum: yix tau mai khawng: brie tix tin: yuh kah mawx?
Mai hoik kieh yix lih khaing: meung Ejiptux, sonsang viex yix hoek kah dee pa caox pa caig in: yuh kah mawx? Kah dee in: mawh dee ang pon sum: simie khaox plix ruh, nhu: plix siiet mai plix makcang khankix; mai rawm: nyaux kawx ang koe:."
Mose mai Arun lih khaing: dee ot pwi hun: mai hu: kah diang siviex nyiiex gox bwan: man: bang: kum:, mai kiex gup pakngai: tix tan:. Mai min: plakngai: Simiang Siyiex lih bleeh kah kiex heue.
Simiang Siyiex ah nin: kah Mose,
"Teei khaox gix, kok puxke maix Arun mai khrawm: pwi hun:, tawx lox kah rang: plak sivoe ngai: kix, kieh nawh tawx rawm:; awm: an: maix tag kieh rawm: lih son kix khaing: daux rang:; mai tawx rawm: nyaux kah cub pwi hun: mai khawng: brie kix."
Mose teei khaox gix khaing: plak sivoe Simiang Siyiex, awm: pa hoik tawm: Nawh Cao:.
Mose mai Arun khrawm: pwi hun: tau kah plak sivoe rang:, mai ah nin: kah kix, "Pex pa tieh pa feen nghiiet yamin:; mawh sang kieh ex rawm: lih son pex khaing: daux rang: in: lie?"
Mose yaog taix tix mai lah rang: kah khaox gix tix ra: bawg, khaix an: rawm: lih tom: nie, cub pwi hun: mai khawng: brie cie kix yaox tix nyaux kah.
Simiang Siyiex ah nin: kah Mose mai Arun, "Mawh kheu ang pax yumrhawm: kah Aux, mai ang yungyi: kah Aux, kah plak sivoe ngai: pwi Isarilax, pax tag ang pon viex pwi hun: inkix laig kah daux haktiex pa hoik tawx Aux kah kix."
In: mawh rawm: Meribax, grawhgrawng: nawh, viang pwi Isarilax yuh simah simaing: mai Simiang Siyiex kawx, Nawh kawn: jhi: pa singax singeh Tix daux sinax kix heue.
Grawng: Thiang: Pwi Edom Kah Pwi Isarilax
Yamin: Mose ploi: pwi cau tix khaing: Kadeshax, mai hu: kah khunhawkham Edom, pux maix Isarilax ah nin:, "Maix tawng kah krax kharhawm: kharhi: pa hoek kah piang yix khawm: uik;"
keeing: yix khankix hoik hu: kah Ejiptux, yix ot daux meung Ejiptux, tom: rheung:; mai pwi Ejiptux khankix, hoik tuktiaktukte: kah yix mai kah keeing: yix khankix;
Yam riag yo yix kah Simiang Siyiex, Nawh Cao: hoik mhong: lox yix, mai Nawh ploi: kawnceu Siyiex, mai viex yix lih khaing: haktiex Ejiptux; yix ot tin: kah daux Kadeshax, pa mawh veng pa koe: kah sinax mee haktiex maix.
"Yuh bwan: son kieh yix tiang kah daux haktiex maix. Yix tag ang tiang kah daux kaung: daux sipeem plix siiet, mai yix tag ang nyaux rawm: khaing: rawm: maw: pex; yix tag sang lawng hu: krax ting cie khunhawkham, yix tag ang veh plak dawm:, plak gwiex, tom: sidauh tiang yix kah daux haktiex pa kwang: maix."
Khaix an: simiang Edom ah nin: kah nawh, "Pex tag ang pon tiang haktiex aux, phan: pex yuh nan:, aux tag lih tiebtie pex kah vaig."
Mai pwi Isarilax ah nin: kah nawh, "Yix tag hoek krax ting; phan: yix mai khawng: brie yix nyaux kah rawm: pex, yix tag tawx ngawh son an:; kieh ngie yix tiang tix hu: kah caong tix nongnong:, yix tag ang yuh tidtix kah tang: ceu."
Mai nawh ah nin:, "Pex tag ang pon tix tiang." Pwi Edom hoek tix puing: kix tom: nie tau mai riang rao kru naing pa ting.
Pwi Edom thiang: pwi Isarilax kah mee: haktiex tix, mawh kheu nan: pwi Isarilax veeh tix hu: singai khaing: nawh heue.
Grawng: Yum: Arun
Cub pwi hun: pwi Isarilax khawm: uik, lih hu: khaing: Kadeshax mai hoek kah gawng Hawrax.
Simiang Siyiex krai ah nin: kah Mose mai Arun kah piang gawng Hawrax hawt mee: haktiex Edom.
"Arun tag hu: kah dee khrawm: pwi ceu nawh khankix paox tix, mawh kheu nawh tag ang pon tix laig kah daux haktiex pa tawx Aux kah pwi Isarilax, kheu hoik tieh feen kiex kah gumlox Aux hawt rawm: Meribax.
Kok Arun mai kawn: simex nawh Eliza, viex kiex haok kah piang gawng Hawrax;
mai peeik kraung ceep Arun mai ceep an: kah piang kawn: simex nawh Eliza; Arun yum: mai hu: kah dee khrawm: paox ceu paox cat nawh khankix heue."
Mose yuh ceu an: awm: lox pa tawm: Simiang Siyiex; mai kix haok kah piang gawng Hawrax, kah plak sivoe ngai: cub pwi hun:.
Mose peeik kraung ceep Arun, mai ceep kah piang kawn: simex nawh Eliza; Arun yum: kah piang choek gawng tan: Khaix an: Mose mai Eliza deeh lih khaing: piang gawng.
Yam yaox pwi hun: khankix hoik yum: Arun, nyiiex ma: ceu pwi Isarilax khawm: uik, yiiem doe: son Arun tingoe: ngaix heue.
Grawng: Som Ceu Pwi Khanan Kah Gawng Hawma
Yam mhong: khunhawkham Arat ceu pwi Khanan pa ot kah Nekep kah hoek ceu pwi Isarilax khankix, kah krax Etarim, nawh puing: kah pwi Isarilax khankix, mai ngiex kix tiblah mawh pwi giex pwi laung.
Pwi Isarilax khankix yuh sijax kah Simiang Siyiex mai ah nin:, "Phan: Maix Cao: ap kix daux tawm: taix yix, yix tag yuh veng kix laux lak pak leeing."
Mai Simiang Siyiex nghiiet kah lox pwi Isarilax mai ap pwi Khanan kah kix, mai yuh kix mai veng laux lak pak leeing; mawh kheu nan: tom: kok ceukaux dee an: mawh Hawma heue.
Grawng: Rieng Siuing: Tawng
Kix lih krax khaing: gawng Hawrax, mai hu: kah plak rawm: sigrit sigra: raoh, sonsang via kah rawb rim haktiex Edom; mai kix kied lauxrhawm: kheu nu krax.
Mai pwi khankix ah lox tieh feen kah Siyiex mai Mose, "Yuh kah mawx maix lai viex yix lih hu: khaing: meung Ejiptux sonsang yum: kah daux tiag lie? Mawh kheu pa ih pa un mai rawm: kawx ang koe:, yix hoik seeing: kah khaomun pa ang koe: jhawmjheet in:."
Mawh kheu nan: Simiang Siyiex ploi: siuing: ngu, kah sinax pwi khankix, mai siuing: tut kah pwi khankix, mai pwi Isarilax yum: tom: nie.
Mai pwi khankix hoek kah Mose mai ah nin:, "Yix hoik yuh phimap kheu hoik ah yix lox tieh feen kah Simiang Siyiex mai maix; yuh bwanson: rawg bwan: kah Simiang Siyiex, sonsang teei Nawh Cao: tix tik siuing: ngu hu: singai khaing: yix liak." Mawh kheu nan: Mose rawg bwan: son pwi khankix.
Simiang Siyiex ah nin: kah Mose, "Yuh rieng siuing: ngu tixmu, mai deuh kah piang khaox tix gawng:; yam maong pwi pa hoik tut siuing: tix jhak kah an: nawh tag deeh im:."
Mawh kheu nan: Mose yuh rieng siuing: tawng tix mu:, mai deuh kah piang khaox tix gawng; phan: siuing: tut kah pwi tix kauxkaux, yam maong nawh tix jhak kah rieng siuing: tawng an: nawh tag im: heue.
Khaing: Gawng Hawrax Tom: Hoek Kah Gawng Mawbax
Yamin: pwi Isarilax khankix, gah tix mai hu: bang: kah Awbok.
Mai kix gah tix khaing: Awbok, mai bang: kah hawt Iyeabarim, kah daux tiag pa koe: see Mawbax kah plak lih singaix.
Kix deeh gah tix khaing: tan:, mai bang: daux ngawd Zariet.
Kix deeh gah tix hu: khaing: tan:, mai bang: praok rawm: klawng: Anon kah praok plak an:, pa koe: daux tiag pa kleuk tix daux khaing: mee: haktiex Amawrix; mawh kheu rawm: klawng: Anon mawh mee: haktiex Mawbax mai haktiex Amawrix.
Awm: pa hoik tiem: tix deuh kah daux phuk lai naing Simiang Siyiex pa mawh baoh Wahiet awm: Suphax, khawm: rawm: klawng: Anon khankix,
mai lih kah baoh plak seh tom: hoek kah haktiex Arax, mai mawh pa koe: kah piang mee: haktiex Mawbax."
Kix lih khaing: tan: mai hu: kah Berax pa mawh rawm: maw: dee hoik ah Simiang Siyiex nin: kah Mose, "Khrawm: pwi khankix tau mai Aux tag tawx rawm: kah kix."
Pwi Isarilax khankix ah lai rhax, "Rawm: maw: eue, kieh rawm: maix lih liak! mai rhax lai sonsang lih rawm:.
"Rawm: maw: pa kaong: cao: kaing: cao: kap, mai pa kaong: cao: thong: cao: bung: khankix, mai pa hoik kaong: cao: prawng see:, kah khaox gix tix." Kix lih khaing: daux tiag mai hu: kah plak Matanax,
Mai lih khaing: Matanax hu: kah plak Nahalelax, mai lih khaing: Nahalelax hu: kah Bamot,
Mai lih khaing: Bamot hu: kah ngawd mee: haktiex Mawbax, mai haok kah choek gawng Pisaga, simi tix jhak haktiex Yeshimon heue.
Grawng: Som Simiang Sihon
Pwi Isarilax ploi: kawncau tix khankix hu: kah Sihon khunhawkham Amawrix mai ah nin:,
"Kieh yix tiang kah haktiex cie maix; yix tag ang laig kah daux kaung:, daux sipeem plix siiet pex, yix tag ang nyaux rawm: khaing: daux rawm: maw: pex, yix tag lawng hu: kah daux krax ting cie khunhawkham tom: sidauh tiang yix kah daux haktiex pa kwang: maix."
Khunhawkham Sihon ang tawx akhwang: tiang pwi Isarilax kah mee: haktiex tix, nawh khrawm pwi tix tau khawm: uik, mai lih sonsang puing kah pwi Isarilax kah daux tiag, mai hoek kah veng Zahat mai puing kah pwi Isarilax.
Pwi Isarilax pah khunhakwham yum: kah lawm vaig mai rhim: tix teei haktiex cie nawh, jah khaing: rawm: klawng: Anon tom: hoek kah rawm: klawng: Yabok tom: singai khaing: ceu pwi Amon, mawh kheu meu haktiex ceu pwi Amon, hoik mawh pa kaux pa cong:.
Mai pwi Isarilax khankix rhim: kah veng in: khawm: uik, mai pwi Isarilax khankix laig ot kah daux veng pwi Amawrix khankix, mai kah daux veng Heshabon mai kah daux yaong: kix khawm: uik.
Mawh kheu veng Heshabon, mawh veng ting khunhawkham Sihon ceu pwi Amawrix, mawh pwi pa puing: kah khunhawkham haktiex Mawbax, mai rhim: haktiex khaing: daux taix nawh, tom: singai hoek kah rawm: klawng: Anon.
Mawh kheu nan: can pwi pa ah lox leng: khankix ah nin:, "Hoek kah veng Heshabon, kieh deeh sum: kah an:, deeh pang: kah veng khunhawkham Sihon.
"Ngu lih khaing: veng Heshabon, rao ngu khaing: veng Sihon gleeing veng Arax mai pa koe: daux haktiex Mawbax, mai simiang pa kwang: dee lhaong: hawt rawm: klawng: Anon.
Haktiex Mawbax eue pex tag kharhawm: kharhi:! ceu pwi Khemoshax khankix eue pex tag lauxleeing:! siyiex pex hoik kieh kawn: simex pex to: tua, mai kawn: bun: pex khankix mawh pa giex pa laung kah khunhawkham Sihon meung Amawrix.
Mai baox deeh yuh doeh simie ceucat kix laux, jah kah veng Heshabon tom: hoek kah veng Dibon, khaix an: baox deeh yuh kix laux jah kah veng Nawpha tom: hoek kah veng Medabax."
Mawh kheu nan: ceu pwi Isarilax khankix yaox tix ot kah daux haktiex ceu pwi Amawrix khankix.
Mose ploi: cao: jiang hu: kah veng Yaza; mai kix rhim: nyiiex yaong: khankix, mai grheu: ceu pwi Amawrix pa ot tan: to: heue.
Grawng: Som Simiang Awgax
Mai kix deeh veeh tix hu: krax haktiex Bashan; mai Awgax khunhawkham meung Bashan hoek tix puing: kah kix, nawh mai pwi nawh khankix yuh naing kah haktiex Edarix.
Simiang Siyiex ah nin: kah Mose, "Paw lhat kah nawh; mawh kheu Aux hoik ap nawh mai pwi nawh mai haktiex nawh kah daux taix maix, maix tag yuh kah nawh awm: hoik yuh maix kah Sihon khunhawkham ceu pwi Amawrix pa ot haktiex Heshabon.
Mai kix pah nawh khawm: kawn: simex nawh, tau mai pwi nawh khawm: uik, tom: ang lai deuk tix kaux kawx, mai kix rhim: sinngao haktiex nawh khankix heue.
Simiang Baliet Kok Kah Balam
Khaix an: pwi Isarilax deeh gah tix mai bang: tix ot kah daux lung: Mawbax plak lih singaix hawt praok rawm: klawng: Yawdan plak toi: veng Yerikho:.
Baliet kawn: simex Ziphaw yaox kah pa hoik yuh pwi Isarilax kah ceu pwi Amawrix.
Pwi haktiex Mawbax kied lhat graung kah pwi Isarilax kheu kied haoh hun: kix.
Pwi Mawbax ah nin: kah kuad song: nong: yu pwi Midian, "Awm: sawm: moi rib pa koe: rawb rim tix, cub pwi hun: in: khankix tag yuh can ceu pa koe: rawb rim ex lauxleeing:," yam an: Baliet kawn: simex Ziphaw: mawh khunhawkham pwi Mawbax.
Nawh ploi: pwi cau khankix hu: kah Balam kawn: simex Bawrax, pa ot kah veng Petaw pa koe: dex rawm: klawng: Yufrethix haktiex Amaw mai kok nawh ah nin:, "Jhak heue pwi khankix hoek khaing: Ejiptux; mai kix hoik kheem: kah piang haktiex mai kix hoik ot see aux.
Yuh bwanson: jhax lawg kah pwi in: khankix son aux liak, mawh kheu kied ting riang kix khaing: aux; aux bak tix pon ghreu kix lih khaing: daux haktiex in:; mawh kheu tawng aux pwi pa nawb maix bwan: kah pon bwanson:, mai pwi pa jhax lawg maix kah kawx tag pon pa jhax lawg."
Mawh kheu nan: kuad song: nong: yu pwi Mawbax, mai kuad song: nong: yu pwi Midian, viex khawngphak mau sonsang yuh simeed kah taix tix mai hoek kah Balam, mai krai lox simiang Baliet kah nawh.
Balam ah nin: kah kix, "Paung tin: daux sawm: in:, aux tag deeh krai lox kah pex, awm: pa krai Simiang Siyiex kah aux." Mawh kheu nan: cub cao: kaing: Mawbax khankix, ot tau mai Balam.
Siyiex hoek mai ah nin: kah Balam, "Pwi in: khankix pa ot tau mai maix mawh pwi mawx?"
Mai Balam deeh ah nin: kah Siyiex, "khunhawkham Baliet kawn: simex Mawbax, ploi: pwi hoek ah nin: kah aux,
"Jhak heue, pwi tix cub kaoh khaing: meung Ejiptux, mai hoik kheem: kah piang haktiex; yamin: hoek jhax lawg kix son aux liak; aux bak tix pon puing: kix mai grheu: kix"
Siyiex ah nin: kah Balam, "Paw lai hu: mai kix. Maix tag ang pon tix jhax lawg kah pwi in: khankix, mawh kheu kix mawh ceu pwi pa pon bwanson:."
Balam kaoh ponngawb mai ah nin: kah cao: kaing: cao: kap cie Baliet khankix, "Deeh ing: kah haktiex pex; mawh kheu Simiang Siyiex hoik thiang: aux ang hu: mai pex."
Mai cao: kaing: cao: kap Mawbax khankix kaoh, mai ing: ah nin: kah Baliet, "Balam thiang: tix ang hoek mai yix."
Baliet baox ploi: cao: kaing: cao: kap tom: nie pa nie lheu: ting min: plakngai: khaing: pa hu: sivoe.
kix hoek kah Balam mai ah nin: kah nawh, "Baliet kawn: simex Ziphaw ah yuh nin:; paw kieh pa tiebtie tix ceu kawx koe: kah maix, sonsang hoek maix kah aux;
Mawh kheu aux tag yaog maix ting min:, mai aux tag yuh can ceu pa ah maix kah aux khankix; hoek mai jhax lawg pwi inkix son aux liak"
Balam deeh pawk lox ah nin: kah pwi cau simiang Baliet, "Viang simiang Baliet sang tawx mau khri: tom: naog kah nyiiex haw: tix kawx, aux tag ang pon lheu: lox tawm: Simiang Siyiex tix, sonsang yuh tix kaing ceu pa tiag mai ceu pa iak ang ah.
"Mawh kheu nan: pex baox ot tin: daux sawm: in:, sonsang tawng aux ceu pa sang baox ah Simiang Siyiex kah aux.
Siyiex hoek kah Balam ponsawm: mai ah nin: kah nawh, "Phan: pwi hoek kok maix kaoh hu: tau mai tix; viang mawh nan: maix tag yuh awm: pa hoik krai Aux kah maix khaing:."
Awm: an: Balam kaoh ponngawb mai sau: an: brug tix kah piang la, mai lih hu: tau mai cub cao: kaing: Mawbax heue.
Balam, La Mai Kawncau Siyiex
Simiang Siyiex songrhawm: kheu lih hu: nawh; mai kawncau Simiang Siyiex tix kaux cung kah daux krax, mai tiebtie kah nawh. Nawh brug la tix mai hu: tau mai kawncau tix ra: kaux.
Mai la yaox kah cung kawncau Simiang Siyiex kah daux krax tau mai vaig pa lawd kah daux taix nawh, la veeh tix hu: kah praok krax mai laig daux kaung; mai Balam sivied kah la sonsang lawng daux krax.
Kawncau Simiang Siyiex deeh cung kah dee sikhawp krax pa koe: guh lhaong: khawm: ra: plak sinax sipeem plix siiet,
Yam yaox la kah kawncau Simiang Siyiex, nawh greed tix kah plak guh mai yeen caong Balam kah guh; mawh kheu nan: Balam baox sivied kah la.
Khaix an: kawncau Simiang Siyiex hu: sivoe mai cung kah dee sikhawp krax dee ang krax via lai koe: kah plak dawm: mai plak gwiex.
Yam yaox la kah kawncau Simiang Siyiex, la gup tix kah greem: Balam mai Balam songrhawm: mai baox sivied la kah khaox gix tix.
Khaix an: Simiang Siyiex paoh jheeh la ah nin: kah Balam, "Hoik yuh aux ceu tix kah maix, maix lai sivied aux tom: loe: bawg?"
Mai Balam ah nin: kah la, "Mawh kheu hoik map maix kah aux. Aux simie tix koe: vaig tix kre: daux taix tix sonsang pah aux kah maix.
Mai la deeh ah nin: kah Balam, "Aux mawh la pa hoik brug maix jih jang: glang: gleeing: tom: hoek in: singaix ang mawh lie? Khex sax yuh aux ceu in: kah maix lie?" Mai Balam deeh ah nin:, "Maix ang sax yuh."
Khaix an: Simiang Siyiex paoh kah ngai: Balam, mai nawh yaox kawncau Simiang Siyiex pa cung daux krax, tau mai vaig pa lawd tix kah daux taix tix; Balam num: kaing: tix mai gup ngai: tix.
Mai kawncau Simiang Siyiex ah nin: kah nawh, "Yuh kah mawx maix lai sivied la tix, tom: loe: bawg? Jhak heue, Aux hoek tix cung sonsang tiebtie Tix kah maix, mawh kheu krax hu: maix mawh krax pa lud loe: kah plak sivoe Aux;
phan: La ang yaox Aux mai via khaing: Aux loe: bawg, Aux hoik dawg pah maix yam an: mai kieh la im: ju."
Mai Balam ah nin: kah kawncau Simiang Siyiex, "Aux hoik phit lud kheu ang aux tawng Maix Cao: cung kah daux krax, sonsang tiebtie kah aux. Phan: ang mawh pa Khaw: kah plak sivoe ngai: Maix aux tag deeh ing:."
Mai kawncau Simiang Siyiex ah nin: kah Balam, "Hu: mai pwi an: khankix; viang mawh nan: maix tag krai awm: lox pa kieh Aux maix krai ngie." Mawh kheu nan: Balam hu: tau mai kawncau Baliet.
Yam mhong: Baliet kah hoek Balam, Baliet lih hu: rieb nawh kah veng Mawbax, kah toh mee: hawt rawm: klawng: Anon,
Baliet ah nin: kah Balam, "Aux ploi: pwi hu: kok maix, tix bawg hoik tix bawg ang mawh lie? yuh kah mawx maix lai ang cu tix hoek kah aux ang aux mawh pa pon yaog min: maix lie?"
Balam deeh ah nin: kah Baliet, "Jhak heue, Aux hoek kah maix phao! mawh koe: sibrawm aux tix sang krai tix ceuceu lie? Aux sang krai ngie lox pa deuh Siyiex kah daux jheeh aux khaing:."
Khaix an: Balam hu: tau mai Baliet, mai kix hoek kah veng Kiriyat Huzot.
Mai Baliet yuh krax tan kah moi mhaing: mai yung: mai ap krax tan an: kah Balam khawm: cao: kaing: pa hoek tau mai nawh heue.
Lox Jhai: Balam Bawg Tix
Kah daux singaix pasax Baliet kok kah balam mai viex nawh haok kah dee pa singax dee koe: siyiex Balax; khaing: tan: nawh pon simi tix jhak kah pwi Isarilax pa ot dee dex heue.
Balam ah nin: kah Baliet, "Sum: khu: dee tan son aux aliah mu: tin:, khre: tix tawx moi mhaing: aliah mu: mai yung: mhaing: aliah mu: son aux."
Baliet yuh awm: pa krai Balam; Baliet mai Balam tan moi mhaing: tix mu: mai yung: mhaing: tix mu:, kah piang khu: dee tan ku mu:.
Balam ah nin: kah Baliet, "Cung dex praok krax tan pa gleeing maix, mai aux tag lih hu:, aux bak Simiang Siyiex sang hoek tix rieb kah aux; mai can ceu pa jhi: Nawh Cao: kah aux khankix, aux tag krai kah maix." Mawh kheu nan: nawh kawx haok kah dee pa kied lhaong:.
Siyiex rieb tix yaox Balam, mai Balam ah nin: kah Nawh Cao:, "Aux hoik khre: rien khu: dee tan aliah mu:, mai hoik tan moi mhaing: tix mu:, mai yung: mhaing: tix mu: kah piang khu: dee tan ku mu:."
Simiang Siyiex sau: lox Tix kah daux jheeh Balam mai ah nin:, "Deeh ing: kah Baliet, mai maix tag krai awm: in:."
Balam deeh ing: kah Baliet, mai yaox Baliet mai cao: kaing: Mawbax khankix kawn: cung dex praok krax tan pa gleeing tix.
Mai Balam krai lox jhai: mai ah nin:, "Baliet khunhawkham pwi Mawbax, viex aux hoek khaing: haktiex Aram mai khaing: gawng plak lih singaix;hoek heue, jhax lawg kah pwi Yakop son aux, mai hoek heue, ap pwi Isarilax khankix hoek krax laux krax leeing:
"Aux tag sang jhax lawg kah pwi pa ang Siyiex jhax lawg yuh kah mawx? mai aux tag sang ap pwi pa ang Siyiex nyang ap hoek yuh krax laux krax leeing: yuh kah mawx?
Mawh kheu Aux yaox nawh khaing: kah piang choek gawng mai hoik simi nawh khaing: kah piang ton:, jhak heue ceu pwi tix cub ot nong nong:, ang lai neuex tix daux sinax ceu pwi tang: ceu!
mawh pwi mawx pa pon simin kah ceu pwi Yakop pa nie awm: phawng: tiex, phan: ang mawh nan:, mawh pwi mawx pa pon simin kah ceu pwi Isarilax pa koe: pon: son tix son! kieh aux yum: awm: pwi rah pwi see, mai kieh dee sidauh sidu aux, awm: dee sidauh sidu nawh.
Mai Baliet ah nin: kah Balam, "Hoik yuh maix patix kah aux? aux kok maix, sonsang jhax lawg maix kah pwi pa koeng tix, mai jhak heue maix ang yuh tidtix mai hoik nawb bwanson: kah piang kix,"
nawh pawk lox mai ah nin:, "Mawh ang aux Khaw: tix rien lox sikah ceu pa hoik deuh Simiang Siyiex kah daux jheeh aux lie?"
Lox Jhai: Balam Bawg Ra:
Baliet ah nin: kah nawh, "Hoek tau mai aux kah tang: dauh, khaing: dee chix yaox maix kix; maix tag yaox ngie kix ceeix ceeix, mai ang yaox kix khawm: uik; mai maix jhax lawg kah kix son aux dee an:."
Mai nawh viex Balam hoek kah daux kaung: Zophim kah piang choek gawng Pisaga mai sum: khu: dee tan aliah mu:, mai tan moi mhaing: tix mu:, mai yung: mhaing: tix mu:, kah piang khu: dee tan ku mu:.
Balam ah nin: kah Baliet, "Cung dex praok krax tan pa gleeing maix tin:, yam kawn: hu: pub aux kah Simiang Siyiex plak an:."
Simiang Siyiex pub Balam, mai sau: lox sikah Tix kah daux jheeh nawh ah nin:, "Deeh ing: kah Baliet, mai maix tag sikah awm: in:."
Mai Balam deeh hoek kah nawh, yaox kawn: cung nawh praok krax tan pa gleeing tix tau mai cub cao: kaing: Mawbax khankix, mai Baliet ah nin: kah nawh, "Simiang Siyiex krai lox patix?"
Mai Balam krai lox jhai: ah nin:, "Simiang Baliet kaoh mai nghiiet heue, kawn: simex Ziphaw nghiiet kah lox aux heue,
"Siyiex ang mawh kawn: pwi pa sang pie lhen:, mai ang mawh kawn: pwi pa sang doh keud, ang Nawh Cao: yuh awm: pa hoik ah tix lie? Awm: koe: sijax mukheu Nawh mai Nawh Cao: ang yuh awm: pa hoik krai Tix lie?
Jhak heue aux hoik pon rieb lox tawm: son pa nawb bwanson:; Nawh Cao: hoik nawb bwanson:, mai aux ang lai pon preet kah bwanson: an:.
"Nawh Cao: ang doh pon yaox kah krax kharhawm: kah daux ceu pwi Yakop, mai ang doh pon yaox kah pa caox pa caig, kah daux pwi Isarilax khankix. Simiang Siyiex kix ot tau mai lox kok yo khunhawkham koe: sinax kix.
Siyiex hoik viex kix lih khaing: meung Ejiptux; mai hoik kieh kix koe: riang koe: rao awm: rung: moi praix.
"Ang koe: pwi simeed sonsang yuh kah ceu pwi Yakop laux; mai ang koe: pwi yuh sibawk sonsang yuh ceu pwi Isarilax laux, yamin: hoik mawh bawg yam ah pwi lox ceu in: kah pwi Yakop, mai kah pwi Isarilax, Siyiex tag sang yuh kah mawx?
Jhak heue, pwi tix cub tag kaoh awm: sivai sangsi: shiang:, mai yaog tix kaoh awm: sivai sangsi: mhaing:; nawh ang lai it lai tum tom: ang nawh nyang ih kug pa pon tix, mai yot kah nham: totiag pa hoik pah tix."
Mai Baliet ah nin: kah Balam, "Paw doh jhax lawg kah kix mai paw doh nawb bwan: kah kix."
Balam pawk lox Baliet ah nin:, mawh ang aux hoik dawg krai lox kah maix, mai aux tag sang yuh awm: lox pa hoik krai Simiang Siyiex khawm: uik ang mawh lie?"
Lox Jhai: Simiang Balam Bawg Loe:
mai Baliet ah nin: kah Balam, "Hoek heue, Aux tag viex maix hu: kah tang: dauh; Aux bak an: mawh pa Khaw: pa caw rhawm: Siyiex, sonsang jhax lawg maix kix, son aux kah dee an:."
Mai Baliet viex Balam haok kah piang choek gawng Pegurax, pa veeh ngai: tix kah tiag Yeshimon.
Mai Balam ah nin: kah Baliet, "Sum: khu: dee tan son aux aliah mu:, mai khre: moi mhaing: aliah mu: mai yung: mhaing: aliah mu: kah son aux.
Mai Baliet yuh awm: pa hoik krai Balam, mai tan moi mhaing: tix mu: mai yung: mhaing: tix mu:, kah piang khu: dee tan ku mu: heue.
Yam yaox Balam koe: rhawm: Simiang Siyiex tix sang nawb bwan: kah pwi Isarilax khankix, nawh ang lai hu: awm: ku bawg, sonsang chawk tix jhai:, mai nawh veeh ngai: tix hu: kah plak daux tiag.
Mai Balam maong tix jhak mai yaox kah bang: ceu pwi Isarilax khankix, awm: pa koe: doeh simie ceucat kix tix ceu hoik tix ceu, mai khwan: singax Siyiex lih kah piang nawh,
mai nawh krai lox jhai: tix ah nin:, "Gumlox pa plak jhi: khaing: Balam kawn: simex Bawrax, gumlox pa plak jhi: khaing: pwi pa hoik riang ngai:,
pwi pa pon mhong: gumlox Siyiex khaing: pwi pa hoik plak jhi: mai pwi pa yaox riieng susai: khaing: kaw pa ting siawpsibrawm tau mai pa goh gup tix mai ngai: nawh hoik baoh.
Pwi Yakop eue, nyiiex gox maix khankix mawh pa mhawm: grang miex ding, pwi Isarilax khankix eue, dee ot maix khankix mawh pa mhawm: grang miex ding!
Awm: daux ngawd pa vieh tom: hoek dee singai, awm: sipeem pa koe: hawt praok rawm: klawng: khankix mai awm: khaox nyawng pa hoik sum: Simiang Siyiex khankix. Awm: khaox Arit pa kuah hawt praok rawm: khankix.
Rawm: tag lih khaing: daux pung rawm: nawh khankix, mai simie nawh tag koe: kah daux dee nie rawm: khankix, mai khunhawkham nawh tag ting lhaong: khaing: Agat mai meung haktiex nawh tag mawh pa blon: ao: min:.
Siyiex viex nawh lih khaing: meung Ejiptux; nawh hoik koe: riang rao awm: moi praix, nawh tag kiied tix ih ceu pwi khankix, pa mawh pwi koeng nawh khankix, nawh tag raig tix tik si-ang: kix graig siag mawx siag an:, mai te ak nawh tag phlat kah kix.
Nawh tum mai nyat tix awm: sivai sangsi: mhaing: mai awm: sivai sangsi: shiang:, pwi mawx pa sang pon so: nawh kaoh lie? pwi pa nawb bwan: kah maix tag pon bwanson:, mai pwi pa jhax lawg kah maix tag pon krax pa jhax lawg."
Mai Baliet songrhawm: kah Balam mai dieh taix tix; simiang Baliet ah nin: kah Balam, aux kok maix sonsang jhax lawg kah pwi pa koeng tix, jhak heue, maix hoik nawb bwan: kah piang kix tom: loe: bawg.
"Mawh kheu nan: yamin: nied to: ing: kah dee ot maix;aux hoik ah tix sang tawx min: kah maix, viang mawh nan: Simiang Siyiex hoik kieh maix veeh tix khaing: pa tawx min: plak ngai:."
Balam deeh ah nin: kah simiang Baliet, "Aux hoik krai kah pwi cau maix khankix pa ploi: maix hoek kah aux,
Viang simiang Baliet sang tawx mau khri: tom: naog kah nyiiex haw: tix kawx aux tag ang pon lheu: lox tawm: Simiang Siyiex tix, sonsang yuh aux kaing ceu pa mhawm: ang ah, ceu pa caox ang ah, son alo tokaux tix, aux tag krai ngie lox pa hoik krai Simiang Siyiex kah aux khaing: ang mawh lie?:
Aux tag sang deeh hu: kah ceu pwi tix khankix; hoek heue, Aux tag sang kieh maix tawng pa sang yuh pwi in: khankix kah piang ceu pwi maix khankix daux singaix khaix heue."
Lox Jhai: Balam Pon: Bawg Tix Bawg
Mai nawh krai lox jhai: tix ah nin:, "Gumlox pa plak jhi: khaing: Balam kawn: simex Bawrax, mai gumlox pa plak jhi: khaing: pwi pa hoik riang ngai:,
pwi pa pon mhong: gumlox Siyiexx khaing: pwi pa hoik plak jhi: mai tawng kah pingnya khaing: Kaw pa ting lhaong:, mai pwi pa yaox riieng susai: khaing: Kaw pa ting siawpsibrawm tau mai pa goh gup tix, mai ngai: hoik baoh."
Aux yaox kah Nawh Cao:, viang mawh nan: ang nyang mawh yamin:; aux simi kah Nawh Cao:, viang mawh nan: ang nyang mawh pa dex, simuing: tag lih khaing: daux ceu pwi Yakop, pliah Simiang tix giang tag lih kaoh khaing: ceu pwi Isarilax; mai tag tawk kah dongre: ceu pwi Mawbax, mai yuh kawn: simex Shetax laux lak pak leeing:.
Nawh tag rhim: kah haktiex Edom mai gawng Sirax kawx tag mawh cie pwi koeng nawh khankix, viang mawh nan: ceu pwi Isarilax khankix tag koe: rhawm: vao rhawm: kua:.
Pwi pa kwang: tix kaux tag lih hoek khaing: ceu pwi Yakop, mai yuh veng pa kawn deuk khankix lauxleeing:!"
Nawh jhak kah piang haktiex Amaliet mai nawh krai lox jhai: ah nin:, "Viang ceu pwi Amaliet mawh pa kied cheung: sinax ceu pwi khankix kawx, dee sidauh nawh tag mawh pa grai: grup."
Nawh jhak kah piang ceu pwi Kenix, mai nawh krai lox jhai: ah nin:, "Dee ot maix mawh pa kaux pa cong:, mai tag deuh mheem: maix daux rang:;
Viang mawh nan: ceu pwi Kenix tag lauxleeing:, tom: hoek bawg yam viex Simiang Ashurix pex hu: mawh pwi pa giex pa laung rheung: miex ding lie?"
Nawh krai lox jhai: ah nin:, "A lo lo! pwi mawx pa sang im: ju, yam yuh Siyiex inkix lie?"
Mai reu sang phaw: khankix tag hoek khaing: haktiex Kitim, mai yuh kah meung Ashurix mai meung Heba; mai pwi Amaliet khankix kawx tag lauxleeing: tau."
Khaix an: Balam kaoh mai ing: kah dee ot tix; mai Simiang Baliet kawx deeh hu: krax hu: tix heue.
Grawng: Nyawm Ot Pwi Isarilax Kah Haktiex Mawbax
Yam ot pwi Isarilax khankix kah daux Shittim mai pwi khankix jah tix koe: pa phit pa vao tau mai kawn: bun: ceu pwi Mawbax.
Bun: khankix kok pwi hoek kah dee yuh kix krax tan kah siyiex tix, pwi khankix ih kah pa tan lu kix mai krub kah siyiex kix.
Pwi Isarilax khankix rom tix tau mai siyiex Balax Pegurax mai Simiang Siyiex songrhawm: kah pwi Isarilax khankix;
Simiang Siyiex ah nin: kah Mose, "Viex cao: kaing: cao: kap khaing: pwi hun:, mai teuk teue: kah kix pwi pa phit pa lud kah daux koek sivoe ngai: Simiang Siyiex sonsang veeh Simiang Siyiex kah pa songrhawm: Tix singai khaing: ceu pwi Isarilax."
Mose ah nin: kah cao: prawng see: pwi Isarilax khankix. "Pex kukaux pah kah pwi khankix pa rom tix tau mai Balax Pegurax."
Jhak heue, pwi Isarilax tix kaux viex bun: pwi Midian hoek kah puxaik tix, kah sivoe ngai: Mose mai kah sivoe ngai: cub pwi hun: kawnpraix Isarilax, yam yiiem grai kix kah diang siviex nyiiex gox bwan: man: bang: kum:.
Yam yaox Phenihat kawn: simex Eliza pa mawh kawn: simex Arun cao: giex kaing: li kah an:, nawh yaog tix kaoh khaing: sinax cub pwi hun:, mai giex pliah tix giang kah daux taix tix;
Mai hu: kah pwi Isarilax kah daux lawg, mai suat kah pwi Isarilax mai bun: an:, tom: phlat kah kiex khawm: ra:, mawh kheu nan: jhawm: saux preng hoik grai: khaing: pwi Isarilax khankix.
Mai pwi yum: kah jhawm: saux preng an: koe: ra: mheen: pon: rheng: kaux heue.
Simiang Siyiex ah nin: kah Mose,
"Phenihat kawn: simex Eliza pa mawh kawn: simex Arun cao: giex kaing: li, hoik kieh krax pa songrhawm: Aux veeh tix khaing: pwi Isarilax khankix, mawh kheu kied koe: rhawm koe: rhi: nawh, tau mai krax pa kied koe: rhawmrhi: Aux daux sinax kix, sonsang ang Aux yuh pwi Isarilax hoek daux pa laux pa leeing:, kah daux krax pa kied koe: rhawmrhi: Aux.
Mawh kheu nan: maix ah nin:, "Jhak heue, aux tawx gumlox sijax mukheu pa nhim: kah nawh;
gumlox sijax mukheu in: tag mawh son nawh, mai son doeh simie ceucat pa koe: khaix nawh, pa mawh gumlox sijax mukheu pa dex dawd mai cao: giex kaing: li, mawh kheu nawh kied koe: rhawm: kah son Siyiex, mai nawh hoik yuh krax khyox Khaw: son pwi Isarilax khankix"
Ceukaux pwi Isarilax pa hoik pah kix tau mai bun: pwi Midian, mawh Zimarix kawn: simex Salux pa mawh cao: kaing: daux nyiiex ma: keeing: kix, pa ao: min: sinax ceu pwi Simion khankix.
Mai ceukaux bun: Midian pa hoik pah kix, mawh Khawzabix kawn: bun: Zurax, pa mawh cao: kaing: pwi pa ao: min: khaing: daux nyiiex ma: keeing: kix pwi Midian heue.
Simiang Siyiex ah nin: kah Mose,
"Yuh cuyi: kah ceu pwi Midian khankix, mai pah kah kix;"
mawh kheu kix hoik yuh cuyi: tau mai pa pie lhen: kah pex, sonsang yuh kix pex lauxleeing:, kah grawng: pa dex dawd mai siyiex Pegurax, mai kah grawng: bun: Khawzabix kawn: bun: cao: giex kaing: ceu pwi Midian, pa mawh nan: kix, pa hoik pah kah daux singaix lih saux preng jao siyiex Pegurax heue."
Grawng: Koh Carang Pwi Isarilax Ra: bawg Tix bawg
Khaix hoik luan jhawm: saux preng, Simiang Siyiex ah nin: kah Mose mai Eliza kawn: simex Arun cao: giex kaing: li,
"Teei carang cub pwi hun: pwi Isarilax khankix, jah kah pwi koe: ju tinga: num haok plak piang, awm: pa koe: doeh nyiiex ma: keeing: kix, pa pon hu: daux naing, kah daux pwi Isarilax khawm: uik."
Mose mai Eliza cao: giex kaing: li, krai lox ah nin: kah kix daux lung: Mawbax hawt rawm: klawng: Yawdan, pa koe: toi: veng Yerikho:,
"Teei carang pwi khankix, jah kah pwi pa koe: ju tinga: num haok plak piang, awm: pa hoik tawm: Simiang Siyiex kah Mose mai pwi Isarilax pa hoik lih khaing: meung Ejiptux:
Rubin mawh kawn: ai: kah ceu pwi Isarilax; mai kawnpraix Rubin khankix mawh Hanok, pa lih mawh doeh nyiiex ma: ceu pwi Hanawkhix, Palux pa lih mawh doeh nyiiex ma: ceu pwi Paluwix khankix;
Hezaron pa lih mawh doeh nyiiex ma: ceu pwi Hezarawnix; mai Khamit pa lih mawh doeh nyiiex ma: ceu pwi Khamaik.
In: mawh doeh nyiiex ma: ceu pwi Rubin; pa laig carang koe: pon: mheen: loe: rheng: aliah yieh tingoe: (43730) kaux.
Mai kawn: simex Palux mawh Eliabax.
Kawn: simex Eliabax mawh Nemoelax, Datan mai Abiram. Inkix mawh Datan mai Abiram pa hoik laug kix daux pwi hun:, pa tieh feen kah Mose mai Arun pa rom paox tix mai cub Kawrax yam tieh feen kix kah Simiang Siyiex,
mai haktiex ang jheeh tix bleet kix khawm: uik tau mai Kawrax, yam yum: paox cub paox caw: kix, tau mai yam gleeing ngu kix ra: yieh tiphwan: kaux, mai kix lih mawh mhai: sakse pa tawx satix.
Viang mawh nan: kawnpraix Kawrax khankix ang yum:.
Doeh nyiiex ma: kawn: simex Simion khankix mawh Nemoelax pa lih tix mawh doeh nyiiex ma: Nemoelix; mai Yamin pa lih mawh doeh nyiiex ma: Yaminix, mai Yakhin lih mawh doeh nyiiex ma: Yakhinix;
Zerax pa lih mawh doeh nyiiex ma: Zerahix mai Shawlax pa lih mawh doeh nyiiex ma: Shawlix.
In: khankix mawh doeh nyiiex ma: ceu pwi Simion koe: ra: mheen: ra: rheng: ra: yieh (22200) kaux,
doeh nyiiex ma: kawn: simex Gat khankix mawh Zephon, pa deeh lih mawh doeh nyiiex ma: Zephawnix; mai Hagie pa lih mawh doeh nyiiex ma: Hagix; mai Shunix pa lih mawh doeh nyiiex ma: Shunit;
mai Awzanix pa lih mawh doeh nyiiex ma: Awzanet, mai Erix pa lih mawh doeh nyiiex ma: Erit;
mai Arot pa lih mawh doeh nyiiex ma: Arodix; mai Arelix pa lih mawh doeh nyiiex ma: Arelit.
In: khankix mawh doeh nyiiex ma: kawn: simex Gat pa hoik laig carang koe: pon: mheen: mai phwan: yieh (40500) kaux.
Doeh nyiiex ma: kawn: simex Yudax mawh Erax mai Awnan; Erax mai Awnan yum: kah daux meung Khanan.
Doeh nyiiex ma: kawn: simex Yudax mawh Shelax, pa lih mawh doeh nyiiex ma: Shelanix; mai Pariet pa lih mawh doeh nyiiex ma: Parazix; mai Zerax pa lih mawh doeh nyiiex ma: Zerahix.
Doeh nyiiex ma: kawn: simex Pharet mawh Hezaron, pa lih mawh doeh nyiiex ma: Hezarawnix; mai Hamulax pa lih mawh doeh nyiiex ma: Hamulix.
In: khankix mawh doeh nyiiex ma: Yudax pa hoik laig carang, koe: aliah mheen: liah rheng: phwan: yieh (76500) kaux.
Doeh nyiiex ma: kawn: simex Isakha khankix mawh Tawlax, pa lih mawh doeh nyiiex ma: Tawlix; mai Phua: pa lih mawh doeh nyiiex ma: Phunit;
mai Yashu pa lih mawh doeh nyiiex ma: Yashubit; mai Shimaron pa lih mawh doeh nyiiex ma: Shimaronit.
In: khankix mawh doeh nyiiex ma: Isakha, pa hoik laig carang koe: liah mheen: pon: rheng: loe: yieh (64300) kaux.
Doeh nyiiex ma: kawn: simex Zebulun khankix mawh Sariet, pa lih mawh doeh nyiiex ma: Saradix; mai Elon pa lih mawh doeh nyiiex ma: Elonit; mai Yalelax pa lih mawh doeh nyiiex ma: Yalelit.
In: mawh doeh nyiiex ma: Zebulun pa hoik laig carang koe: liah mheen: mai phwan: yieh (60500) kaux.
Doeh nyiiex ma: kawn: simex Yosiep; mawh Manashe mai Ehparem.
Doeh nyiiex ma: kawn: simex Manashe khankix, mawh Makhirax, pa lih mawh doeh nyiiex ma: Makhirit; mai; Makhirax pon kawn: tix Gilat; mai Gilat lih mawh doeh nyiiex ma: Gilidix.
In: khankix mawh kawn: simex Gilat; mai Yezerax lih mawh doeh nyiiex ma: Yezerit; mai Heliet lih mawh doeh nyiiex ma: Helikit;
mai Asarilax lih mawh doeh nyiiex ma: Asarilit; mai Shekhim lih mawh doeh nyiiex ma: Shekhimit;
mai Shemidax lih mawh doeh nyiiex ma: Shemidit; mai Hephax lih mawh doeh nyiiex ma: Hepharit.
Zelophihat kawn: simex Hephax ang koe: kawn: simex, nawh koe: kawn: bun: nongnong: ceukaux kawn: bun: Zelophihat khankix mawh Mala, Nawa, Hawgala, Milaka mai Tiraza.
In: khankix mawh doeh nyiiex ma: manashe; pa hoik laig carang koe: phwan: mheen: ra: rheng: aliah yieh (52700) kaux.
In: khankix mawh doeh nyiiex ma: kawn: simex Ehparem, mai Shutelax lih mawh doeh nyiiex ma: Shutalit; mai Bekha lih mawh doeh nyiiex ma: Bekharit; mai Tahan lih mawh doeh nyiiex ma: Tahanit.
Mai in: khankix mawh kawn: simex Shutelax, mai Eran lih mawh doeh nyiiex ma: Eranit.
In: khankix mawh doeh nyiiex ma: kawn: simex Epharem pa hoik laig carang, koe: loe: mheen: ra: rheng: phwan: yieh (32500) kaux. In: khankix mawh doeh nyiiex ma: kawn: simex Yosiep.
In: khankix mawh doeh nyiiex ma: kawn: simex Beyamin; mai Belax lih mawh doeh nyiiex ma: Belit; mai Ashabelax lih mawh doeh nyiiex ma: Ashabelit, mai Ahiram lih mawh doeh nyiiex ma: Ahiramit;
mai Shuphan lih mawh doeh nyiiex ma: Shuphamit; mai Hupham lih mawh doeh nyiiex ma: Huphamit.
Mai kawn: simex Belax mawh Aradax mai Neman; Aradax lih mawh doeh nyiiex ma: Aradit; mai Neman lih mawh doeh nyiiex ma: Nemanmit.
In: khankix mawh doeh nyiiex ma: kawn: simex Binyamin; mai pwi pa hoik laig carang koe: pon: mheen: phwan: rheng: liah yieh (45600) kaux.
In: khankix mawh doeh nyiiex ma: kawn: simex Dan, mai Shuham lih mawh doeh nyiiex ma: Shuhamit. In: khankix mawh doeh nyiiex ma: Dan.
doeh nyiiex ma: Shuhamit pa hoik laig carang, koe: liah mheen: pon: rheng: pon: yieh (64400) kaux.
Doeh nyiiex ma: kawn: simex Asha; mai Yimanax lih mawh doeh nyiiex ma: Yimanit, mai Yesuwix lih mawh doeh nyiiex ma: Yesuwit, mai Berix lih mawh doeh nyiiex ma: Berit.
Mai kawn: simex Berix khankix mawh Hebarax lih mawh doeh nyiiex ma: Hebarit; mai Malakhelax lih mawh doeh nyiiex ma: Malakhelit.
Mai ceukaux kawn: bun: Asha mawh Sera.
In: khankix mawh doeh nyiiex ma: kawn: simex Asha pa hoik laig carang, koe: phwan: mheen: loe: rheng: pon: yieh (53400) kaux.
Doeh nyiiex ma: kawn: simex Napthalix; mai Yazelax lih mawh doeh nyiiex ma: Yazelit; mai Gunix lih mawh doeh nyiiex ma: Gunit;
mai Yezerax lih mawh doeh nyiiex ma: Yezerit, mai Shilin lih mawh doeh nyiiex ma: Shilimit.
In: khankix mawh doeh nyiiex ma: kawn: simex Napthalix; pa hoik laig carang, koe: pon: mheen: phwan: rheng: pon: yieh (45400) kaux.
In: khankix mawh pwi pa hoik laig carang kah daux pwi Isarilax, koe: liah siien: mai tix rheng: aliah yieh tingoe: (601730) kaux heue.
Simiang Siyiex ah nin: kah Mose,
"Tag gwieh haktiex in: awm: pa hoik koe: ceukaux kix sonsang mawh sinngao kix.
Son cub pwi pa nie, maix tag gwieh sinngao awm: pa nie kix, mai son cub pwi pa iak, maix tag gwieh sinngao awm: pa iak kix; pwi ku cub tag pon sinngao awm: pa hoik koe: carang kix.
Viang mawh nan: caw tix yuh nieb mai gwieh kah; kix tag pon sinngao awm: pa koe: ceukaux doeh simie ceucat keeing: kix.
Awm: pa hoik cawk kix nieb, kix tag pon tix cie sinngao hawt nie mai hawt iak pwi kix."
Mai in: khankix mawh pwi pa hoik laig carang kah daux doeh nyiiex ma: pwi Lewix, mai Geshon lih mawh doeh nyiiex ma: Geshonit; mai Kawhat lih mawh doeh nyiiex ma: Kawhatit; mai Merarix lih mawh doeh nyiiex ma: Merarit.
In: khankix mawh doeh nyiiex ma: pwi Lewix, pa mawh doeh nyiiex ma: Libanit, doeh nyiiex ma: Hebaronit, doeh nyiiex ma: Mahali, doeh nyiiex ma: Mushi mai doeh nyiiex ma: Kawratit. Mai Kawhat pon kawn: simex tix Amaram.
Moeng Amaram kaux Yawkhebiet pa mawh kawn: bun: Lewix pa keh khaing: Lewix, kah daux meung Ejiptux; bun: an: keh Arun mai Mose khawm: Meriam pa mawh pu ke bun: kix son Amaram.
Arun koe: kawn: simex pa mawh Nadax mai Abihux, Eliza mai Itama.
Nadax mai Abihux yum:, yam tan kiex ngu pa seeing: kah plak sivoe Simiang Siyiex.
Mai kix pa hoik laig carang koe: ra: mheen: loe: rheng: (23000) kaux, kix ang lai sau: carang kawn: nyawm simex jah kah pa koe: ju tix khix haok plak piang, sinax pwi Isarilax, mawh kheu ang sinngao pa sang tawx kah kix koe: sinax pwi Isarilax.
In: khankix mawh pwi an: kix pa hoik laig carang pa hoik simin: Mose mai Eliza cao: giex kaing: li daux kawnpraix Isarilax daux lung: Mawbax hawt rawm: klawng: yawdan plak toi: veng Yerikho:.
Viang mawh nan: pwi in: khankix, ang laig kah daux carang tix kaux kawx pa hoik simin Mose mai Arun cao: giex kaing: li, yam simin kix pwi Isarilax kah daux tiag gawng Sina.
Mawh kheu Simiang Siyiex hoik ah nin: kah kix, "Kix tag yum: kah daux tiag." ang lai koe: pwi pa deuk kah daux kix tix kaux kawx, lheu: khaing: Kaliep kawn: simex Yephunie:, mai Yawsux kawn: simex Nun heue.
Gumlox Beenli Pa Dex Dawd Mai Sinngao
Yam an: kawn: bun: Zelophehat mawh Mala, Nawa, Hawgala, Milaka, Tiraza, khaing: Hepha, khaing: kawn: simex Gilat, khaing: kawn: simex Makhirax, khaing: kawn: simex Manashe, khaing: kawn: simex Yosiep.
Mai kix cung kah plak sivoe Mose, mai kah plak sivoe Eliza cao: giex kaing: li, mai kah plak sivoe cao: kaing: cao: kap, mai kah plak sivoe pwi hun: kah diang siviex laig kah daux nyiiex gox bwan: man: bang: kum: pwi hun: mai ah nin:,
keeing: yix yum: kah daux tiag; nawh ang laig kah daux sinax cub pa kraix khrawm: paox tix tieh feen kah Simiang Siyiex, tau mai cub Kawrax, viang mawh nan: nawh yum: kheu phimap tix, mai nawh ang koe: kawn: simex tix kaux kawx.
Mawh kheu ang keeing: yix koe: kawn: simex tix kaux kawx, tag sang tik yix khaing: daux doeh nyiiex ma: nawh lie? Mawh kheu nan:, tawx sinngao cie yix khaing: daux sinax puxaik keeing: yix khankix liak."
Mose viex Grawng: see: kix hoek sivoe Simiang Siyiex.
Mai Simiang Siyiex ah nin: kah Mose,
"Lox krai kawn: bun: Zelophihat Khaw: heue; maix tag tawx kix cie sinngao kah daux sinax puxaik keeing: kix, mai kieh sinngao keeing: kix mawh cie kix.
Mai maix ah nin: kah pwi Isarilax khankix,phan: pwi tix kauxkaux pa ang koe: kawn: simex yum:, maix tag kieh sinngao nawh mawh son kawn: bun: nawh.
Phan: nawh ang koe: kawn: bun:, maix tag tawx sinngao nawh kah puxaik nawh khankix.
Phan: nawh ang koe: puxaik, maix tag tawx sinngao nawh kah puxaik keeing: nawh khankix.
Mai phan: keeing: nawh ang koe: puxaik, maix tag tawx sinngao nawh kah ceucat pa dex dawd mai doeh nyiiex ma: nawh khankix, mai nawh tag pon tix cie kah an:. Mai an: tag mawh been lox tat jhawm: prawng kah son kawnpraix Isarilax, awm: pa hoik tawm: Simiang Siyiex kah Mose heue"
Yawsux Deeh Mawh Cao: Kaing: Kah Pwi Isarilax
Simiang Siyiex ah nin: kah Mose, "Haok kah piang gawng Abarim, mai jhak kah haktiex pa hoik tawx Aux kah pwi Isarilax."
Yam hoik yaox maix kah an:, maix kawx tag khrawm: tix tau mai pwi, awm: khrawm: puxke: maix Arun tix tau mai kix,
mawh kheu pax hoik tieh feen kah gumlox Aux kah daux tiag Zin, yam thungthiang: pwi hun: paox tix maix ang yungyi: kah Aux kah plak sivoe ngai: kix. (In: mawh rawm: klawng: Meribax pa koe: hawt Kadesha kah daux tiag Zin.)
Mose ah nin: kah Simiang Siyiex,
"Kieh Simiang Siyiex pa mawh Khwan: kah piang kawn: pwi khankix laug pwi tix kaux thung: kah pwi hun:,
Pwi pa sang pon hu: laig kah plak sivoe kix, mai pwi pa pon thung: kix lih mai pa pon viex kix laig; sonsang ang pwi Simiang Siyiex khankix awm: yung: pa ang koe: cao: liang."
Mai Simiang Siyiex deeh ah nin: kah Mose, "Kok Yawsux kawn: simex Nun pa mawh pwi pa koe: khwan: kah daux nawh, mai deuh taix tix kah piang nawh;
"Mai kieh nawh cung sivoe ngai: Eliza cao: giex kaing: li, mai sivoe ngai: pwi hun:, mai ap beeh glawm: nawh kah plak sivoe kix.
Mai tag tawx min: siawpsibrawm tix kah nawh tiblah, sonsang cu nghiiet cub pwi hun: Isarilax kah nawh.
Nawh tag cung kah plak sivoe Eliza cao: giex kaing: li, mai cao: giex kaing: li tag chawkcheng: Grawng: krax prawng krax ca: been Urim kah plak sivoe ngai: Simiang Siyiex kah son nawh; mai pwi kukaux tag lih tag laig awm: gumlox nawh, tau mai nawh khawm: pwi Isarilax mai cub pwi hun: khankix."
Mose yuh awm: lox pa hoik tawm: Simiang Siyiex kah nawh; nawh kok Yawsux mai kieh nawh cung sivoe ngai: Eliza cao: giex kaing: li, mai pwi hun: khankix.
Mai nawh deuh taix tix kah piang Yawsux, mai ap beeh glawm: kah nawh, awm: pa hoik tawm: Simiang Siyiex kah Mose heue.
Krax Tan Son Ku Singaix
Simiang Siyiex ah nin: kah Mose,
"Tawm: lox kah pwi Isarilax mai ah nin: kah kix,krax tan son Aux, pa ih pa un: Aux, mai krax tan pa gleeing kah ngu pa mawh krax tan pa sioe: bhawng: pa Khaw: rhawm: Aux, maix tag yuh satix tix yam tan maix kah Aux, kah daux bawg yam pa hoik tat tix deuh."
Mai maix tag ah nin: kah kix, "In: mawh krax tan pa gleeing kah ngu, pa sang tan maix kah Simiang Siyiex; tag mawh kawn: yung; mhaing: iak pa naog num, pa loig ra: mu: tix ngaix hoik tix ngaix jheengjheeng:.
Maix tag tan kawn: yung: iak ponngawb tix mu:, mai tan kah plakbo tix mu:.
Tau mai phawng: nghoxca ceu pa mhawm: kao: son tix son khaing: tix Epha pa mawh krax tan phawng: nghoxca im:, pa hoik klao: tix tau mai bee Sanlon pa krid tix lih khaing: plix Sanlon pon: son tix son khaing: tix Hing.
An: mawh krax tan pa gleeing jheengjheeng: pa hoik tat tix deuh kah piang gawng Sina krax tan pa sioe: bhawng: pa Khaw: rhawm: Siyiex pa mawh krax tan pa gleeing kah ngu.
Maix tag tan kawn: yung: tix mu: tau mai krax tan pa nyaux, pon son tix son khaing: tix Hing; maix tag hieh krax tan pa nyaux an: dee pa singax singeh son Simiang Siyiex.
Maix tag tan kawn: yung: tang: mu: kah plakbo awm: krax tan phawng: nghoxca im: kah plak ponngawb tau mai krax tan pa nyaux. Maix tag tan krax tan pa gleeing kah ngu, mai krax tan pa sioe: bhawng: pa Khaw: rhawm: Simiang Siyiex heue.
Krax Tan Son Singaix Twah
"Kah daux singaix twah maix tag tan kawn: yung: iak pa naog num pa loig ra: mu:, mai phawng: nghoxca ceu pa mhawm: pa hoik klao: tau mai bee kao: son ra: son khaing: tix Epha, tau mai krax tan pa nyaux;
lheu khaing: krax tan pa gleeing tau mai krax tan pa nyaux jheengjheeng:, in: tag mawh krax tan pa gleeing son singaix twah ku twah heue.
Krax Tan Son Ku Khix
Haok khix khraox tix ngaix, maix tag viex tix tan kawn: moi mhaing: ra: mu:, kawn: yung: mhaing: tix mu:, mai kawn: yung: pa naok num pa loig aliah mu: son krax tan pa gleeing kah Simiang Siyiex;
Mai phawng: nghoxca ceu pa mhawm:, kao: son loe: son khaing: tix Epha mawh son moi mhaing: tix mu:, krax tan phawng: nghoxca im: ceu pa mhawm: pa hoik klao: tau mai bee kao: son ra: son khaing: tix Epha son yung: tix mu:;
phawng: nghoxca ceu pa mhawm: kao: son tix son khaing: tix Epha pa hoik klao: tix tau mai bee, son kawn: yung: iak ku mu:; mai son krax tan pa gleeing pa sioe: bhawng:, pa mawh krax tan pa gleeing kah ngu pa Khaw: rhawm: Simiang Siyiex.
Krax tan pa nyaux kix rawm: plix siiet tix plak Hing mawh son moi mhaing: tix mu:, mai loe: son tix son khaing: tix Hing mawh son yung: tix mu:, mai pon: son tix son khaing: tix Hing mawh son kawn: yung: tix mu:; in: mawh krax tan pa gleeing son ku khix, tom: sidauh num.
Lheu: khaing: krax tan pa gleeing jheengjheeng: mai krax tan pa nyaux; maix tag baox viex kawn: pex tix mu: son krax tan son phimap kah Simiang Siyiex heue.
Krax Tan Son Pwie Pasakha
"Kah daux khix tix kao: pon: ngaix mawh pwie Pasakha Simiang Siyiex.
Mai kah daux khix in: kao: phwan: ngaix mawh singaix pwie; kah daux aliah ngaix tag yaox tix ih khaomun pa ang sau: susaix.
Kah daux singaix jah pex tag khrawm: paox tix kah daux pa singax singeh. Pex tag ang pon tix yuh kaing jhaw: tix ceu kawx,
mai pex tag yuh krax tan pa yuh kah ngu, son krax tan pa gleeing kah Simiang Siyiex, kah moi mhaing: ra: mu:, yung: tix mu:, mai kawn: yung: iak pa naog num aliah mu:; an: khawm: uik tag mawh pa loig.
Krax tan phawng: nghoxca im: ceu pa mhawm: pa hoik klao: tau mai bee kao: son loe: son khaing: tix Epha mawh son moi mhaing: tix mu:, mai kao: son ra: son mawh son yung: tix mu:;
pex tag tan kao: son tix son khaing: tix Epha son kawn: yung: iak an: kix khawm: aliah mu:,
son krax tan pa pluat ploi: phimap pex tag yuh krax tan pa khyox Khaw: kah pex mhaimg: tix mu: son pex.
Lheu: kkhaing: krax tan pa gleeing kah plak ponngawb, pa mawh krax tan pa gleeing jheengjheeng: pex tag tan krax tan in: khankix.
Krax tan pa gleeing jheengjheeng: mai krax tan pa nyaux khankix pex tag tan pa ih pa un: pa mawh krax tan pa yuh kah ngu aliah singaix pa sioe: bhawng: pa Khaw: rhawm: Simiang Siyiex.
Kah daux singaix aliah pex tag khrawm: paox tix kah daux pa singax singeh; pex tang: ang pon tix yuh kaing jhaw: heue.
Krax Tan Son Pwie Daux Singaix Aliah Vang Twah
"Awm: an: kah daux singaix tan pex plix pa liang, pex tag tan krax tan phawng: nghoxca pa khraox kah Simiang Siyiex kah daux pwie aliah vang twah, pex tag khrawm: paox tix kah daux pa singax singeh; pex tag ang pon tix yuh kaing jhaw:,
Pex tag viex krax tan pa gleeing pa sioe: bhawng: pa Khaw: rhawm: Simiang Siyiex. pa mawh kawn: moi mhaing: ra: mu:, mai kawn: yung: tix mu:, mai kawn: yung: pa naog num aliah mu:;
tau mai krax tan pa mawh phawng: nghoxca ceu pa mhawm: pa hoik klao: mai bee kao: son loe: son khaing: tix Epha son moi mhaing: tix mu:, mai kao: son ra: son, son yung: tix mu:,
kao: son tix son, son kawn: yung: aliah mu:;
tau mai kawn: yung: mhaing: tix mu:, sonsang yuh krax pa khyox Khaw: son pex.
Lheu: khaing: krax tan pa gleeing jheengjheeng: tau mai krax tan phawng: nghoxca im:, pex tag tan krax tan pa nyaux, an: kix tag mawh pa loig heue.
Krax Tan Pwie Phlu Teettawng
"Kah daux haok khix aliah tix ngaix, pex tag khrawm: paox tix kah dee pa singax singeh; pex tag ang pon tix yuh kaing jhaw:. singaix an: mawh singaix phlu: pex teettawng,
pex tag yuh krax tan pa gleeing kah moi mhaing: tix mu:, kawn: yung: tix mu:, mai kawn: yung: pa naog num pa loig aliah mu:; pa sioe: bhawng: pa Khaw: rhawm: Simiang Siyiex.
Mai krax tan phawng: nghoxca im: ceu pa mhawm:, pa hoik klao: tau mai bee kao: son loe: son khaing: tix Epha kah son moi mhaing:, mai kao: son ra: son kah son yung: mhaing:,
mai kao: son tix son, son kawn: yung: aliah mu:;
tau mai kawn: pex tix mu: son krax tan pa pluat ploi phimap, sonsang khyox Khaw: kah son pex;
lheu: khaing: krax tan pa gleeing yam haok khix khraox maix tag tan phawng: nghoxca im: mai krax tan pa gleeing tix jheengjheeng: tau mai krax tan phawng: nghoxca im:, mai krax tan pa nyaaux khankix awm: pa koe: deen maix tag yuh krax tan kah ngu pa sioe bhawng: pa Khaw: kah rhawm: Simiang Siyiex.
Krax Tan Yuh Singaix Pa Khyox Khaw:
"Yam haok khix aliah, kao: ngaix, pex tag khrawm: paox tix kah daux pa singax singeh, pex tag twah pa ih pa un:, mai pex tag ang pon tix yuh kaing jhaw:.
Pex tag tan krax tan pa gleeing son pa sioe: bhawng: pa Khaw: rhawm: Simiang Siyiex khawm: moi mhaing: tix mu:, kawn: yung: tix mu:, mai kawn: yung: pa naog num aliah mu:; an: khankix tag mawh pa gleeing;
mai krax tan phawng: nghoxca im: ceu pa mhawm: pa hoik klao: mai bee, kao: son loe: son khaing: tix Epha kah son moi mhaing: tix mu: mai kao: son ra: son, son yung: mhaing: tix mu:,
mai kao: son tix son, son kawn: yung: mhaing: aliah mu:,
lheu: khaing: krax tan pa plua ploi: phimap, pa mawh krax pa khyox Khaw: mai krax tan pa gleeing jheengjheeng: tau mai krax tan phawng: nghoxca im: khawm: krax tan pa nyaux, maix tag viex kawn: pex mhaing: tix mu: son krax tan pa pluat ploi: phimap heue.
Krax Tan Son Pwie Nyiiex Gox Bang:
"Yam haok khix aliah, kao: phwan: ngaix, pex tag khrawm: paox tix kah dee pa singax singeh; pex tag ang pon tix yuh kaing jhaw:, mai pex tag khre: rien pwie son Simiang Siyiex aliah singaix;
pex tag yuh krax tan pa gleeing, pa mawh krax tan pa yuh kah ngu, pa sioe: bhawng: pa Khaw: rhawm: Simiang Siyiex, kah kawn: moi mhaing: kao: loe: mu:, kawn: yung: ra: mu:, mai kawn: yung: pa naog num kao: pon: mu:; an: khankix tag mawh pa loig;
mai krax tan phawng: nghoxca im: ceu pa mhawm:, pa hoik klao: mai bee kao: son loe: son khaing: tix Epha son kawn: moi mhaing: kao: loe: mu: ku mu:, mai kao: son ra: son, son yung: ra: mu: ku mu:,
mai kao: son tix son, son kawn: yung: kao: pon: mu:;
mai baox viex kawn: pex iak tix mu:, son krax tan pa pluat ploi: phimap, lheu: khaing: krax tan pa gleeing jheengjheeng:, khawm: krax tan phawng: nghoxca im: mai krax tan pa nyaux khankix, maix tag viex kawn: pex tix mu: son krax tan pa pluat ploi: phimap.
"Kah daux singaix ra:, pex tag tan moi mhaing: kao: ra: mu: yung: ra: mu:, mai kawn: yung: pa naog num pa loig kao: pon: mu:,
tau mai krax tan phawng: nghoxca im:, mai krax tan pa nyaux, son moi mhaing: an: khankix, mai son yung: mhaing:, mai son kawn: yung: pa hoik simin tix awm: pa koe: been;
mai baox viex kawn: pex iak hoek tix mu:, son krax pa pluat ploi: phimap, lheu: khaing: krax tan pa gleeing tix jheengjheeng: mai krax tan phawng: nghoxca im:, mai krax tan pa nyaux khankix, maix tag viex kawn: pex son krax tan pa pluat ploi: phimap.
Kah daux singaix loe:, pex tag viex moi mhaing: kao: tix mu:, yung: mhaing: ra: mu:, mai kawn: yung: mhaing: pa naog num pa loig kao: pon: mu:;
tau mai krax tan phawng: nghoxca im:, mai krax tan pa nyaux son moi mhaing: son yung: mhaing: mai son kawn: yung: khankix pa hoik simin tix awm: pa koe: been;
lheu: khaing: krax tan pa gleeing jheengjheeng: tau mai krax tan phawng: nghoxca im:, mai krax tan pa nyaux khankix maix tag viex kawn: pex tix mu: son krax tan pa pluat ploi: phimap.
Kah daux singaix pon:, pex tag tan moi: mhaing: kao: mu:, yung: mhaing: ra: mu:, mai kawn: yung: pa naog num pa loig kao: pon: mu:,
tau mai krax tan phawng: nghoxca im: mai krax tan pa nyaux khankix, son moi mhaing:, son yung: mhaing:, mai son kawn: yung: khankix, pa hoik simin tix awm: pa koe: been;
lheu: khaing: krax tan pa gleeing jheengjheeng:, mai krax tan phawng: nghoxca im: mai krax tan pa nyaux khankix maix tag viex kawn: pex tix mu: son krax tan pa pluat ploi: phimap.
Kah daux singaix phwan:, pex tag tan moi mhaing: dim: mu:, yung: ra: mu:, mai kawn: yung: pa naog num pa loig kao: pon: mu:,
tau mai krax tan phawng: nghoxca im:, mai krax tan pa nyaux, son moi mhaing:, son yung: mhaing:, mai son kawn: yung: pa hoik simin: tix awm: pa koe: been;
lheu: khaing: krax tan pa gleeing jheengjheeng: tau mai krax tan phawng: nghoxca im:, mai krax tan pa nyaux khankix, maix tag viex pex mhaing: tix mu: son krax tan pa pluat ploi: phimap.
Kah daux singaix liah, pex tag tan moi mhaing: daix mu:, yung: mhaing: ra: mu:, mai kawn: yung: pa naog num pa loig kao: pon: mu:,
tau mai krax tan phawng: nghoxca im:, mai krax tan pa nyaux, son moi mhaing:, son yung: mhaing:, mai son kawn: yung: pa hoik simin tix awm: pa koe: been;
lheu: khaing: krax tan pa gleeing jheengjheeng:, mai krax tan phawng: nghoxca im:, mai krax tan pa nyaux khankix, maix tag viex pex mhaing: tix mu: son krax tan pa pluat ploi: phimap.
"Kah daux singaix aliah pex tag tan moi mhaing: aliah mu:, yung: mhaing: ra: mu:, mai kawn: yung: pa naog num pa loig kao: pon mu:,
tau mai krax tan phawng: nghoxca im:, mai krax tan pa nyaux khankix, son moi mhaing:, son yung: mhaing:, mai son kawn: yung: pa hoik simin tix awm: pa koe: been;
mai baox viex pex hoek tix mu:, awm: krax tan pa pluat ploi: phimap, lheu: khaing: krax tan pa gleeing jheengjheeng:, tau mai krax tan phawng: nghoxca im:, mai krax tan pa nyaux khankix, maix tag viex pex mhaing: tix mu: son krax tan pa pluat ploi: phimap.
Kah daux singaix daix, pex tag khrawm: paox tix kah dee pa singax singeh; pex tag ang pon tix yuh kaing jhaw:.
Viang mawh nan: pex tag yuh krax tan pa gleeing kah ngu, awm: krax tan pa sioe: bhawng: pa Khaw: rhawm: Simiang Siyiex, kah moi mhaing: tix mu:, yung: mhaing: tix mu:, mai kawn: yung: pa naog num pa loig aliah mu:,
tau mai krax tan phawng: nghoxca im: mai krax tan pa nyaux, son moi mhaing:, son yung: mhaing:, mai son kawn: yung: khankix pa hoik simin tix awm: pa koe: been;
lheu: khaing: krax tan pa gleeing jheengjheeng:, tau mai krax tan phawng: nghoxca im:, mai krax tan pa nyaux khankix, maix tag viex pex mhaing: tix mu: son krax tan pa pluat ploi: phimap.
"Pex tag tan ceu in: khankix kah Simiang Siyiex, awm: pwie pa hoik tat pex tix deuh, son krax tan pa gleeing mai krax tan phawng: nghoxca im:, son krax tan pa nyaux, mai krax tan pa nhim:. (An: khankix mawh krax tan pa lheu: yuh pex khaing: krax tan pa tiextu pex, mai krax tan pa koe: rhawmrhi: pex khankix)."
Mai Mose hoik krai ceu in: khankix kah pwi Isarilax, awm: pa hoik tawm: Simiang Siyiex kah nawh heue.
Been Padex Dawd Mai Pa Tiextu
Mose ah nin: kah cao: kaing: doeh simie ceucat pwi Isarilax, "In: mawh lox pa hoik tawm: Simiang Siyiex.
Phan: simex tix kauxkaux yuh sijax tix ceuceu kah Simiang Siyiex, phan: ang mawh nan: tiextu phyawk laung tokaux tix kah lox pa kham: tix, nawh tag ang pon tix tieh loh kah lox tix, nawh tag yuh an: awm: lox pa lih khaing: daux jheeh tix.
Phan: ang mawh nan: phan: bun: tix kauxkaux yuh sijax tix ceuceu kah Simiang Siyiex, mai pa phyawk laung tokaux tix, kah lox pa kham: tix, yam ot nawh kah daux nyiiex ma: keeing: tix yam awn: ju nawh,
mai phan: keeing: nawh mhong: lox sijax pa kham: nawh, mai pa phyawk nawh tokaux tix kah lox pa kham: tix, mai ang nye: ang nyux kah nawh khaix an: lox sijax pa yuh nawh tag mawh pa kaux cong:, mai pa phyawk laung nawh tokaux tix kah lox pa kham: tix tag mawh pa kaux cong.
Viang mawh nan: phan: keeing: nawh mhong: kah lox sijax pa kham: nawh mai pa phyawk laung nawh tokaux tix kah lox pa kham: tix, mai tiextu kah, khaix an: lox sijax pa yuh nawh tag ang kaux cong:, mai Simiang Siyiex tag pluat ploi: nawh, mawh kheu keeing: nawh hoik tiebtie nawh.
Phan: bun: an: koe: mex tix kauxkaux yuh sijax mai phyawk laung tokaux tix kah lox pa kham: nawh kah jheeh tix,
phan: mex nawh mhong: kah lox an: mai ang nye: ang nyux kah nawh yam mhong: tix lox sijax pa kham: nawh mai pa phyawk laung nawh tokaux tix tag kaux cong.
Viang mawh nan: phan: mex nawh hoik mhong: daux singaix an: mai tiebtie kah lox sijax pa kham: nawh mai pa hyawk laung nawh kah tokaux tix mai gumlox pa lih khaing: jheeh mai pa phyawk laung nawh tokaux tix, tag mawh pa giex going mai Simiang Siyiex tag pluat ploi: nawh.
Viang mawh nan: miexmai: tix kauxkaux ang ah, bun: pa hoik tik mex tix, tix kauxkaux ang ah, yuh sijax pa kham: nawh pa phyawk pa laung tokaux tix, an: khakix tag mawh pa kaux cong: nawh.
mai phan: nawh yuh sijax kah daux nyiiex mex tix, phan: ang mawh nan: pa phyawk laung tokaux tix kah daux pa tiextu tix,
mai phan: mex nawh hoik mhong: kah lox an:, mai ang nye ang nyux mai ang tiebtie nawh, khaix an: lox pa kham: nawh pa phyawk pa laung tokaux tix tag mawh pa kaux cong:.
Viang mawh nan: phan: mex nawh mhong: kah daux singaix an:, mai tiebtie kah lox pa lih khaing: daux jheeh nawh, sijax pa yuh nawh mai pa phyawk pa laung nawh pa dex dawd mai tokaux tix, tag mawh pa ang kaux cong:. Mawh kheu hoik tiebtie mex nawh kah nawh Simiang Siyiex tag pluat ploi: nawh.
Lox sijax pa yuh nawh tix ceuceu mai pa phyawk laung nawh tokaux tix kah lox pa kham: nawh, mai pa khin: kah tokaux tix, mex nawh pon kieh kaux cong:, mai pon: yieh laux.
Viang mawh nan: phan: mex nawh ang nye ang nyux kah nawh, tix ngaix hoik tix ngaix, lox sijax pa yuh nawh, phan: ang mawh nan: can lox pa kham: pa koe: kah piang nawh khawm: uik; mex nawh tag kieh an: khankix kaux cong:, mawh kheu ang nawh nye: nyux daux singaix mhong: nawh kah ceu an:.
Phan: mex nawh tag thiang: ceu an: khaix singaix hoik mhong: nawh kah nawh tag klawm: kah phimap moeng tix.
In: khankix mawh lox tat jhawm: prawng pa tawm: Simiang Siyiex kah Mose, sinax simex mai moeng nawh, mai sinax keeing: mai kawn: bun: nawh, yam awn: ju yam ot nyiiex keeing: tix heue.
Pa Pawk Bix Kah Ceu Pwi Midian
Simiang Siyiex ah nin: kah Mose,
"Maix tag pawk bix kah ceu pwi Midian tang: pwi Isarilax; maix tag khrawm: tix tau mai cub pwi maix."
Mai Mose ah nin: kah pwi khankix, "Khrawm: pwi naing kah daux pex tiblah sonsang yuh naing mai hu: puing kah pwi Midian khankix, sonsang pawk pex bix tix son Simiang Siyiex kah ceu pwi Midian."
Laug pwi khaing: daux doeh simie ceucat tix ceu tix rheng: kaux, sonsang hu: puing kah naing.
Kix khrawm: pwi naing khaing: daux pwi Isarilax pa koe: kaing: rheng: kaing: mheen:, mai khrawm: pwi khaing: doeh ceucat kix ku cub, tix cub tix rheng: khawm: uik koe: tix mheen: ra: rheng: kaux sonsang puing naing.
Mai Mose ploi: kix hu: daux naing tix ceu pwi, tix rheng: hu: tau mai Phenahat kawn: simex Eliza cao: giex kaing: li tau mai kraung naing pa singax mai teettawng pa sang phlu: kah daux tawm: taix nawh.
Mai kix puing: pwi Midian, awm: pa hoik tawm: Simiang Siyiex kah Mose mai pah simex kukaux.
Kix pah khunhawkham pwi Midian phwan: kaux, pa mawh Ewix, Rekin, Zurax, Hurax, Rebax; mai kix baox pah Balam kawn: simex Bawrax kah vaig.
Pwi Isarilax khankik viex bun: Midian mai kawn: nyawm khankix mawh pa giex pa laung tau mai khawng: brie kix, moi, pex, yung: mai kraungkhrai: khawm: uik.
Kix gleeing veng kix mai dauh dee ot kix, mai tab kix khawm: uik kah ngu.
Mai kix khrawm: kraung pa pon rhim: tix khawm: pwi mai khawng: brie khankix heue.
Pa Deeh Hoek Khaing: Naing
Kix viex pwi pa giex pa laung mai kraung pa pon mai pa rhim: kix hoek kah Mose, mai Eliza cao: giex kaing: li, mai pwi hun: pwi Isarilax khankix kah daux tab lung: Mawbax hawt rawm: klawng: Yawdan kah toi: veng Yerikho:.
Mose mai Eliza cao: giex kaing: li khawm: cao: kaing: cao: kap pwi hun: khankix, lih hu: sonsang rieb kix plak praix nyiiex bang:.
Mose songrhawm: kah cao: kaing: naing mai cao: kaing: pa kwang: pwi kaing: rheng: khankix, mai pa kwang: kah piang pwi kaing: yieh, pa kaoh khaing: daux naing.
Mose ah nin: kah kix, "Mawh kawn: kieh pex bun: khankix im: ju lie?"
Jhak heue, bun: khankix hoik kieh pwi Isarilax lud loe: kah daux pa hawt krax keud krax sawn: pa kaoh khaing: Balam, mai tieh feen phit lud kix kah Simiang Siyiex kah kaing jhaw: siyiex Pegurax, mai jhawm: saux preng hoik hoek kah piang pwi hun: cie Simiang Siyiex,
mawh kheu nan: pah simex kukaux daux sinax kawn: nyawm khankix, mai pah bun: kukaux pa hoik it tau mai simex,
viang mawh nan: deuh kawn: nyawm bun: awn: ju khankix, pa ang nyang sax it mai simex im: ju.
Pex tag yaox tix ot kah praix nyiiex bang: aliah singaix, kaw pa hoik pah pwi tix kauxkaux, mai kaw pa hoik hu: teeh kah pwi yum:, tau mai pwi pa giex pa laung tag kieh tokaux tix singax kah daux singaix loe:, mai singaix aliah.
Kieh kraung ceep pex singax pa mawh pa yuh kah hak ku plah, mai can pa taing: kah hauk pex khankix, mai kraung shiao can pa yuh kah khaox khankix."
Eliza cao: giex kaing: li ah nin: kah pwi naing pa hoik hu: daux naing khankix "In: mawh lox lai beenli lox tat jhawm: prawng pa hoik tawm: Simiang Siyiex kah Mose;
mawh ngie khri:, mau, tawng lheung:, rhiem:, tawng paing mai sivun khankix,
can ceu pa pon kham: kah ngu khankix, pex tag thi: kah daux ngu, mai ankix tag mawh pa singax, yuh kah mawx kawx caw tix sighrah pa seeing: singax kah rawm: mai pa ang pon kham: daux ngu khankix, pex tag cub kah daux rawm:.
Pex tag sidaux kraung tix kah daux singaix liah, mai pex tag mawh pa singax; khaix hoik an: khankix, pex tag pon tix laig kah daux nyiiex bang: heue."
Gwieh Kah Kraung Pa Rhim: Tix Viex
Mai Simiang Siyiex krai kah Mose ah nin:,
"Maix mai cao: giex kaing: li Eliza, khawm: cao: kaing: pwi hun: cub mawx cub an:, deeh simin khraung pa pon rhim: hoek, khawm: pwi mai khawng: brie khankix.
Mai gwieh kraung pa pon rhim: hoek khankix lih ra: son, tix son tawx kah pwi pa hu: daux naing, mai tix son tawx kah pwi hun:.
Mai gwieh tix tawx gha: can pa pon khaing: daux naing kah Siyiex, pa mawh pwi, moi, la, mai yung khankix phwan: yieh mu: tix mu:.
mai deeh teei an: khankix tix plak khaing: cie kix, tawx kah cao: giex kaing: li Eliza, son krax tan pa yaog sivoe Simiang Siyiex.
Mai khaing: daux cie pwi Isarilax khankix tix plak, maix tag teei khaing: daux tix phwan: mu: tix mu: son kuceu, khaing: pa mawh pwi, moi, la, mai yung: khankix, mai tawx kah ceu pwi Lewix, pa priex kah nyiiex gox bwan: man: Simiang Siyiex."
Mawh kheu nan: Mose mai cao: giex kaing: li Eliza yuh awm: lox tawm: Simiang Siyiex kah Mose.
Mai kraungkhrai: pa kawn deuk khaing: pa pon rhim: pwi naing tix viex hoek khankix, mawh yung: liah sien: aliah mheen: phwan: rheng: (675000)mu:,
Moi aliah mheen: ra: rheng: (72000) mu:,
La liah mheen: tix rheng: (61000) mu:,
mai bun: pa ang nyang sax dex dawd mai simex, khawm: uik koe: loe: mheen: ra: rheng: (32000) kaux.
An: tix plak pa mawh son pwi pa lih hu: kah daux naing khankix, mawh yung: loe: sien: loe: mheen: aliah rheng: phawn: yieh (337500) mu:,
Mai gha: pa tawx kah Simiang Siyiex, mawh yung: liah yieh atigliah phwan: (675) mu:;
kah daux moi koe: loe: mheen: liah rheng: (36000) mu:, tawx gha: son cie Simiang Siyiex atigliah ra: (72) mu:;
kah daux la khankix koe: loe: mheen: mai phwan: yieh (30500) mu:, tawx gha: son cie Simiang Siyiex tigliah tix (61) mu:;
kah daux pwi khankix tix mheen: liah rheng: kaux, tawx gha: son cie Simiang Siyiex tingoe: ra: (32) kaux.
Mose tawx gha: khankix kah Eliza cao: giex kaing: li son krax tan pa yaog sivoe Simiang Siyiex, awm: lox pa hoik tawm: Simiang Siyiex kah nawh.
Mai cie pwi Isarilax khankix tix plak, pa hoik gwieh Mose tix tawx kah kix khaing: pwi pa hu: puing naing,
Mai pa mawh cie pwi hun: khankix tix plak an:, mawh yung: loe: sien: loe: mheen: aliah rheng: phwan: yieh (337500) mu:,
Moi loe: mheen: liah rheng: (36000) mu:,
La loe: mheen: mai phwan: yieh (30500) mu:,
pwi tix mheen: liah rheng: (16000) kaux,
khaing: daux cie pwi Isarilax khankix tix plak, Mose deeh teei khaing: daux tiphwan mu: tix mu: son kuceu khaing: pwi, khaing: khawng: brie mai kah ceu pwi Lewix khankix, pa priex kah nyiiex gox bwan: man: Simiang Siyiex, awm: lox pa hoik tawm: Simiang Siyiex kah Mose.
Khaix an: cao: kaing: naing pa kwang: kah piang kru naing, cao: kaing: naing pa kwang: pwi kaing: rheng:, mai cao: kaing: naing pa kwang: pwi kaing: yieh khankix hoek dex Mose,
mai kix ah nin: kah Mose, "Siliex maix cao: khankix, hoik teei carang pwi naing pa ot greem: pa kwang: yix, mai pwi yix tix kaux kawx ang grai:.
Yamin: yix hoik viex krax tan hoek kah Simiang Siyiex, kah pa hoik pon pwi kukaux, pa mawh kraung khri:, ble, kong, jheep giien:, beu: yhaok, mai maox soi: khankix, sonsang taoh ju yix khaing: phimap kah plak sivoe Simiang Siyiex."
Mawh kheu nan: Mose mai cao: giex kaing: li Eliza rieb tix teei kraung khri: khaing: kix, pa hoik mawh kraung pa shiao khawm: uik.
Khri: pa tan kix kah Simiang Siyiex, khaing: cao: kaing: naing pa kwang: pwi kaing: rheng: mai cao: kaing: naing pa kwang: pwi kaing: yieh khawm: uik koe: tix mheen: liah rheng: aliah yieh tiphwan: shekhe.
Pwi naing khankix hoik teei tix viex kraungkhrai: kah daux naing, son tokaux cao: tix kukaux.
Mose mai cao: giex kaing: li Eliza rieb tix teei kraung khri: khaing: cao: kaing: naing pwi kaing: rheng:, mai cao: kaing: naing pwi kaing: yieh khankix, mai viex laig kah daux nyiiex gox bwan: man: bang: kum: son krax pa doh keud son pwi Isarilax khankix kah plak sivoe Simiang Siyiex heue.
Ceucat Pa Ot Plak Lih Singaix Rawm: Klawng: Yawdan
Kawnpraix Rubin mai kawnpraix Gat khankix koe: khawng: brie tom: haoh hun:, mai kix yaox haktiex Yaza mai haktiex Gilat, pa mawh dee mhawm: rib riem son khawng: brie tix,
tom: hoek ah nin: kah Mose mai cao: giex kaing: li Eliza, mai kah cao: kaing: pwi hun: khankix ah nin:,
"Atarok, Dibon, Yaza, Nimarax, Heshabon, Elale, Shebam, Nibo mai Beon,
can haktiex pa hoik pex Simiang Siyiex kah sivoe pwi Isarilax khankix, mawh haktiex pa mhawm: sonsang eei: khawng: brie, mai siliex maix khankix hoik koe: khawng: brie tom: nie."
Mai kix ah nin:, "Phan: yix hoik mawh pa pon bwanson: kah plak sivoe ngai: maix, tawx haktiex in: kah siliex maix khankix sonsang mawh sinngao cie yix, mai paw viex yix luan kah plak toi: rawm: klawng: Yawdan liak."
Mose ah nin: kah kawnpraix Gat, mai kawnpraix Rubin khankix. "glang: hu: puxaik pex khankix daux naing, mawh sang ngawm pex tix ot tin: lie?
Pex lai sang kieh rhawmrhi: pwi Isarilax khankix ang koe: rhawm: kua: rhawm: cong:, sonsang tiang kix tix hu: kah daux haktiex pa hoik tawx Simiang Siyiex kah kix yuh kah mawh?
Keeing: pex khankix hoik yuh nawh awm: in:, yam ploi: aux kix hu: khaing: Kadeshabanax, sonsang jhak tix kah haktiex an:.
Yam hu: kix kah daux ngawd Eshakawlax, mai khaix hoik hu: kix jhak kah haktiex an:, kix kieh rhawmrhi: pwi Isarilax khankix, ang koe: rhawm: kua: rhawm: cong:, son ang kix laig kah daux haktiex pa hoik tawx Simiang Siyiex kah kix.
Yam an: krax songrhawm: Simiang Siyiex hoik lih mai Nawh Cao: tiextu ah nin:,
can pwi pa kaoh khaing: daux meung Ejiptux, pwi pa hoik koe: ju tinga: num haok kah piang, tag ang pon tix yaox kah haktiex pa hoik tiextu Aux kah Abraham, Icak mai Yakop tix kaux kawx, mawh kheu kix ang viex rhawm: tix hawt khaix Aux,
mawh ngie Kaliep kawn: simex Yephunie: pa mawh ceu pwi Keniet mai Yawshux kawn: simex Nun khankiex pa pon tix yaox, mawh kheu kiex ra: kaux hoik hawt khaix Aux khawm: rhawm: khawm: rhi: tix
Krax songrhawm: Simiang Siyiex lih kah piang pwi Isarilax khankix, mai Nawh Cao: kieh kix vungviang kah daux tiag tipon: num, tom: sidauh hoik lauxleeing: cub pwi pa yuh pa caox pa caig khankix kah plak sivoe ngai: Simiang Siyiex.
Mai jhak heue, pex hoik kaoh tang: keeing: pex, mai hoik baox pwi pa koe: phimap khankix, sonsang nie baox lih krax songrhawm: songrhi: Simiang Siyiex kah piang pwi Isarilax khankix tom: sigrien sigre.
phan: pex veeh tix hu: khaing: pa hawt Grawng: lawng khaix Nawh Cao:, Nawh tag baox deeh prah pex kah daux tiag daux tu, mai pex tag mawh pa yuh pwi in: khankix lauxleeing:."
Kix hoek dex nawh mai ah nin:, "Yix tag sang sum: kawg son khawng: brie tin:, mai yuh veng son kawn: nyawm khankix,
mai tokaux yix tag sang giex kraung naing tix mai hu: kah plak sivoe pwi Isarilax khankix, tom: hoik viex yix kix hoek kah dee ot dee koe: kix, viang mawh nin: kawn: nyawm yix khankix tag ot kah daux veng pa kaux pa cong:, kheu jao kawn: koe: pwi pa ot baoh haktiex in:.
Yix tag ang lai deeh ing: kah nyiiex ma: tix, glang: bawg yam ang kawnpraix Isarilax kukaux nyang bax pon tix rieb kah sinngao tix.
Yix tag ang teei tix cie sinngao pa koe: toi: rawm: klawng: Yawdan kah plak an: tau mai kix, mawh kheu hoik caw sinngao cie yix tix koe: kah plak lih singai rawm: klawng: Yawdan."
Mose ah nin: kah kix, "Phan: pex yuh nin:, khre: rien kraung naing cao: tix, kah plak sivoe Simiang Siyiex son naing,
kieh can kru naing pex khankix, tiang kah plak toi: rawm: klawng: Yawdan, kah plak sivoe Simiang Siyiex glang: ang Nawh Cao: nyang grheu: pwi koeng Nawh Cao: khankix khaing: sivoe Nawh;
phan: haktiex an: mawh pa hoik pex tix kah plak sivoe Simiang Siyiex, khaix an: pex tag pon tix deeh ing:, mai pex tag ang lai mawh pa koe: krax deuh phimap kah plak sivoe Simiang Siyiex, mai kah plak sivoe ceu pwi Isarilax khankix, haktiex in: tag mawh sinngao cie pex kah plak sivoe Simiang Siyiex.
Phan: pex ang yuh nin:, pex tag tawng kah hoik phit lud tix kah Simiang Siyiex, mai phimap pex tag mawh pa hawt kah tokaux pex.
Sum: veng khankix son kawn: nyawm pex, mai kawg yung: son yung: pex khankix, mai yuh awm: gumlox pa lih khaing: daux jheeh pex."
Mai kawnpraix Gat, khawm: kawnpraix Rubin khankix ah nin: kah Mose, "siliex maix tag yuh awm: lox pa tawm: maix cao: simiang.
Kawn: nyawm yix moeng yix khankix, cub yung: yix mai khawng: brie yix khankix khawm: uik tag mawh pa ot kah daux veng haktiex Gilat tan.
Viang mawh nan: siliex maix khankix, tag sang tiang toi: plak an: tau mai kraung naing kukaux son naing kah plak sivoe Simiang Siyiex, mai puing naing awm: pa ah cao: Simiang ex."
Mawh kheu nan: Mose kok cao: giex kaing: li Eliza mai Yawsux kawn: simex Nun, mai cao: kaing: doeh simie ceucat pwi Isarilax khankix.
Mai Mose ah nin: kah kix, "Phan: kawnpraix Gat, mai kawnpraix Rubin khankix pa giex kraung naing kah plak toi: rawm: klawng: Yawdan tau mai pex, sonsang puing naing kah plak sivoe Simiang Siyiex, mai phan: pex hoik pex kah haktiex an:. Khaix an: pex tag tawx haktiex Gilat mawh sinngao cie kix.
Viang mawh nan: phan: kix tiang toi: plak an:, mai ang tix giex kraung naing tau mai pex, kix tag pon tix cie haktiex Khanan kah daux sinax pex."
Kawnpraix Gat mai kawnpraix Rubin khankix deeh pawk lox ah nin:, "Awm: pa hoik ah Simiang Siyiex kah siliex maix khankix, mawh kheu nan: yix tag yuh.
Yix tag tiang toi: plak an: mai giex tix kraung naing kah plak sivoe Simiang Siyiex, kah daux haktiex Khanan, viang mawh nan: sinngao cie yix kah praok rawm: klawng: Yawdan plak in:, tag mawh cie yix.
Mose tawx meung Shihon cie khunhawkham Amawrix, mai meung Awgax cie khunhawkham Bashan, khawm: haktiex khawm: veng khankix, pa hoik koe: kah daux meung an: khankix, mai veng pa koe: hawt vungviang mee: haktiex an: kah kawnpraix Gat, mai kah kawnpraix Rubin khankix, mai doeh simie ceucat Manashe kawn: simex Yosiep tix plak.
Mai kawnpraix Gat, sum: veng Dibon, veng Atarok mai veng Araw,
veng Atarotsophan veng Yaza mai veng Yobehax,
veng Betnimara mai veng Betharan mawh veng pa kaux pa cong: khawm: uik mai kix sum: kawg yung: khankix.
Mai kawnpraix Rubin sum: veng Heshabon, veng Elale mai veng Kirayatin khankix,
veng Nebaw veng BalaMawnax,(ceukaux veng in: kiex hoik mawh pa deeh loh tix mawh pa khraox), mai veng Shibamax khankix.
Mai ceu pwi Makhirax kawn: simex Manashe, hu: kah veng Gilat, mai rhim: tix cie haktiex an:, mai grheu: ceu pwi Amawrix pa dawg ot daux haktiex an: to:.
Mose tawx veng Gilat kah ceu pwi Makhirax kawn: simex Manashe mai kix ot tan heue.
Ya-irax kawnpraix Manashe hu: rhim: tix cie yaong: Gilat khankix, mai kok ceukaux an: kix mawh Havotya-irax.
Nawba hu: rhim: tix cie veng Kenat mai nyiiex yaong: khankix, mai kok mawh Nawba hawt ceukaux tix heue.
Grawng: Plak Jhi: Krax Hu: Pwi Isarilax Khaing: Meung Ejiptux
Inkix mawh krax lih hu: ceu pwi Isarilax khankix khaing: meung Ejiptux, awm: pa koe: kru naing kix, greem: tawm: taix Mose mai Arun.
Mose tiem: tix deuh Grawng: pa sang hu: kix awm: lox tawm: Simiang Siyiex. Mai in: mawh Grawng: krax pa jah kix tix lih hu:.
Kix lih khaing: veng Ramase kah daux khix tix kao: phwan: ngaix, khaix ngaix hoik pwie Pasakha, ceu pwi Isarilax khankix lih hu: mai ang tix lai ring kah plak sivoe ngai: ceu pwi Ejiptux khankix.
Yam an: ceu pwi Ejiptux tag sipaung: kawn: ai: tix khawm: uik, pa hoik pah Simiang Siyiex kah daux sinax kix; kah siyiex krup kix kawx, Simiang Siyiex hoik ciyang kah uik.
Ceu pwi Isarilax khankix, gah tix hu: khaing: veng Ramase, mai bang: baoh Sukot.
Kix deeh lih hu: khaing: baoh Sukot, mai bang: hawt veng Etam pa koe: dex praok daux tiag daux tu.
Kix deeh gah tix khaing: veng Etam, mai deeh veeh tix hu: kah plak veng Pihahirok pa koe: see veng Balazephon, mai bang: kah veng Migadawlax.
Kix deeh gah tix hu: khaing: veng Pihahirot, mai kix tiang daux rawm: sigrit sigra: raoh, mai hoek kah daux tiag daux tu. Khaix hoik hu: kix krax loe: ngaix kah daux tiag daux tu Etam, kix bang: hawt baoh Marax.
Kix deeh gah tix hu: khaing: Marax mai hoek kah yaong: Elim, kah yaong: Elim koe: rawm: keut kah kao: ra: mu:, mai khaox jhie: yaong: atigliah gawng, mai kix tom: bang: tan:.
Kix deeh gah tix khaing: yaong: Elim mai hu: bang: hawt praok rawm: sigrit sigra: raoh Edom.
Kix deeh gah tix khaing: hawt praok rawm: sigrit sigra: raoh mai hoek tix bang: kah daux tiag daux tu Zin.
Kix deeh gah khaing: daux tiag daux tu Zin mai bang: hawt baoh Dawphaka.
13 Kix deeh gah tix khaing: Dawphaka mai bang: hawt baoh Alushax.
Kix deeh gah tix khaing: baoh Alushax mai bang: hawt baoh Rephidim, kah dee ang rawm: nyaux koe: son pwi khankix,
Kix deeh gah tix khaing: baoh Rephidim, mai bang: kah daux tiag daux tu Sina.
Kix deeh gah tix khaing: baoh daux tiag daux tu Sina mai bang: hawt baoh Kibarok-hatava.
Kix deeh gah tix khaing: baoh Kibarok-hatava, mai bang: hawt baoh Hazarok.
Kix deeh gah tix khaing: baoh Hazarok, mai bang: hawt baoh Ritama.
Kix deeh gah tix khaing: Ritama, mai bang: hawt baoh Rimonpariet.
Kix deeh gah tix khaing: Rimonpariet, mai bang: hawt baoh Libanax.
Kix deeh gah tix khaing: yaong: Libanax, mai bang: hawt baoh Risa.
Kix deeh gah tix khaing: baoh Risa, mai bang: hawt baoh Kehalatax.
Kix deeh gah tix khaing: baoh Kehalatax, mai bang: hawt gawng Shepha.
Kix deeh gah tix khaaing: gawng Shepha, mai bang: baoh Haradax.
Kix deeh gah tix khaing: Haradax, mai bang: hawt baoh Makhelok.
Kix deeh gah tix khaing: Makhelok, mai bang: hawt baoh Tahat.
Kix deeh gah tix khaing: Tahat, mai bang: hawt baoh Tarax.
Kix deeh gah tix khaing: Tarax, mai bang: hawt baoh Mitakha.
Kix deeh gah tix khaing: Mitakha, mai bang: hawt baoh Hashamawnax.
Kix deeh gah tix khaing: Hashamawnax, mai bang: hawt baoh Mawsarot.
Kix deeh gah tix khaing: Mawsarot, mai bang: hawt baoh Beniyakan.
Kix deeh gah tix khaing: Beniyakan, mai bang: hawt baoh Hawhagidagat,
Kix deeh gah tix khaing: Hawhagidagat, mai bang: hawt baoh Yobatax.
Kix deeh gah tix khaing: Yobatax, mai bang: hawt baoh Abonax.
Kix deeh gah tix khaing: Abonax, mai bang: hawt baoh Eziongeba.
Kix deeh gah tix khaing: Eziongeba, mai bang: kah daux tiag daux tu Zin, baoh Kadishax.
Kix deeh gah tix khaing: Kadishax, mai bang: hawt baoh gawng Hawrax pa koe: kah mee: haktiex Edom.
Khaix hoik lih hu: ceu pwi Isarilax khankix khaing: daux meung Ejiptux tipon: num, kah daux khix phwan: tix ngaix, Arun cao: giex kaing: li haok kah piang gawng Hawrax, awm: lox tawm: Simiang Siyiex mai nawh yum: tan:.
Nawh hoik koe: ju tiyieh tinga: loe: num, yam yum: nawh kah piang gawng Hawrax,
Khunhawkham Arat ceu pwi Khanan pa ot kah plak seh haktiex Khanan, mhong: kah hoek pwi Isarilax khankix.
Pwi Isarilax deeh gah tix khaing: gawng Hawrax, mai bang: hawt baoh Zalamawnax.
Kix deeh gah tix khaing: Zalamawnax, mai bang: hawt baoh Punon.
Kix deeh gah tix khaing: Punon, mai bang: hawt baoh Awbot.
Kix deeh gah tix khaing: Awbot, mai bang: hawt baoh Iyaabarim hawt mee: haktiex Mawbax.
Kix deeh gah tix khaing: Iyaabarim, mai bang: hawt baoh Dibon-gat.
Kix deeh gah tix khaing: Dibon-gat, mai bang: hawt baoh Alamondibalatin.
Kix deeh gah tix khaing: Alamondibalatin, mai bang: piang gawng Abarim pa koe: kah sivoe gawng Nebaw.
Kix deeh gah tix khaing: piang gawng Abarim, mai bang: kah daux lung: Mawbax hawt rawm: klawng: Yawdan kah toi: veng Yerikho:.
Kix bang: hawt rawm: klawng: Yawdan, jah kah veng Betyesimot tom: hoek kah veng Abelashitin kah daux lung: haktiex Mawbax heue.
Gumlox Tawm: Pa Pex Kix Kah Meung Khanan
Simiang Siyiex sikah kah Mose kah daux lung: Mawbax hawt rawm: klawng: Yawdan pa koe: plak toi: veng Yerikho: mai ah nin:.
"Krai ah nin: kah pwi Isarilax khankix, yam hoik tiang pex rawm: klawng: Yawdan mai laig kah daux haktiex Khanan,
pex tag grheu: pwi pa ot baoh haktiex an: khawm: uik, khaing: plak sivoe ngai: pex, mai yuh can ceu pa saik kix kah simaox khankix laux lak pak leeing:, mai yuh rieng rao pa hoik raug kix laux lak pak leeing: khawm: uik, mai yieh tix tik nyiiex meeig kix khawm: uik,
pex tag grheu: pwi pa ot kah daux haktiex an: khankix to:, mai ot kah daux haktiex an:. Kheu Aux hoik tawx haktiex an: mawh sinngao cie pex.
Mai pex tag gwieh haktiex an: hawt awm: pa koe: doeh nyiiex ma: pex kah krax pa yuh nieb, son pa hun: pwi, pex tag tawx sinngao pa nie, mai son pa tux pwi, pex tag tawx sinngao pa iak, son pwi kukaux tag pon awm: pa caw nieb cie kix, pex tag pon tix cie sinngao an: awm: pa koe: doeh simie ceucat keeing: pex khankix.
Mai phan: pex ang grheu: pwi pa ot baoh haktiex an:, pwi pa kawn prah pex khankix, tag mawh krix kah daux ngai: pex, mai mawh kat lawm son paw: pex, mai kix tag tuktiaktukte: kah pex, kah daux haktiex dee ot pex.
Lheu: khaing: an: awm: pa keud Aux tix sang yuh kah piang kix, tag lih tix yuh kah piang pex heue."
Grawng: Tat Mee: Haktiex Meung Khanan
Simiang Siyiex ah nin: kah Mose,
"Tawx lox maix kah pwi Isarilax khankix mai ah nin:, yam hoik hoek pex kah daux haktiex Khanan, in: mawh haktiex sinngao pa sang pon pex, pa mawh mee: haktiex Khanan.
Daog haktiex plak seh, jah khaing: daux tiag Zin dex hawt mee: haktiex Edom, mee: haktiex plak seh jah khaing: taoh rawm: sigrit sigra: kih kah plak lih singaix,
mai deeh ghua: tix bleeh kah praok plak seh ton: gawng Akarabim, mai deeh sitoe: tix hu: kah plak yaong: Zin, mai bleeh kah plak seh yaong: Kadeshax Banax, mai deeh sitoe: tix hu: kah yaong: Hazaadax, mai deeh bleeh kah yaong: Azamon,
deeh veeh tix khaing: yaong: Azamon, mai hawt kah kawn: klawng: Ejiptux, tom: hoek sidauh sidu hawt rawm: sigrit sigra:.
"Son mee: haktiex plak klip singaix, mawh rawm: sigrit sigra: ting, in: tag mawh mee: haktiex pex, kah plak klip singaix.
Mai mee: haktiex plak laong:, jah khaing: rawm: sigrit sigra: ting, pex tag mhai: tix deuh rhoi: mee: hawt kah gawng Hawrax,
jah khaing: gawng Hawrax, pex tag mhai: tix deuh rhoi: mee: hoek kah diang krax laig kah veng Hamat, mai phlat hu: kah plak yaong: Zedax,
mai deeh sitoe: tix hu: kah plak yaong: Zipharon, tom: sidauh hoek hawt yaong: Hazaraenan. In: tag mawh mee: haktiex pex plak laong:.
"Pex tag mhai: tix deuh mee: haktiex plak lih singaix, jah khaing: yaong: Hazaraenan, tom: hoek kah yaong: Shephan.
Mee: haktiex in: tag lih khaing: yaong: Shephan, mai hoek kah yaong: Ribalax, pa koe: plak lih singaix yaong: A-inax, deeh hu: plak jee mai hoek kah plak lih singaix kah rawm: nhawng: Ginesiet.
Mee: haktiex in: tag hu: hawt praok klawng: Yawdan, mai sidauh kah rawm: sigrit sigra: kih. In: tag mawh haktiex pex, tau mai mee: haktiex hawt vungviang khankix heue."
Mose tawx lox kah pwi Isarilax khankix mai ah nin:, "In: mawh haktiex sinngao pa sang pon pex tix cie kah daux krax pa yuh nieb, awm: pa hoik tawm: Simiang Siyiex kah doeh simie ceucat pex dim: ceu mai tix plak.
Mawh kheu doeh simie ceucat Rubin, mai doeh simie ceucat Gat, awm: krax pa koe: doeh nyiiex ma: keeing: kix, hoik pon rieb tix cie sinngao cie kix, mai doeh simie ceucat Manashe tix plak, hoik pon tix cie kah sinngao cie kix.
Doeh simie ceucat an: ra: cub, mai doeh simie ceucat an: tix plak, hoik pon rieb tix cie sinngao kix kah praok plak in: khaing: rawm: klawng: Yawdan, toi: veng Yerikho: kah plak lih singaix heue."
Pa Laug Tix Deuh Cao: Kaing: Sonsang Gwieh Haktiex
Simiang Siyiex ah nin: kah Mose,
"In: khankix mawh ceukaux pwi pa sang gwieh tix tawx haktiex sinngao kah daux sinax pex, an: mawh cao: giex kaing: li Eliza mai Yawsux kawn: simex Nun.
Maix tag laug cao: kaing: tix kaux khaing: doeh simie ceucat kix ku cub, sonsang teem: coi kah kiex.
In: mawh ceukaux pwi khankix pa sang laug maix, khaing: daux doeh simie ceucat Yudax, tag mawh Kaliep kawn: simex Yephunie:.
Khaing: daux doeh simie ceucat Simion, mawh Shemoelax, kawn: simex Amihut.
Khaing: daux doeh simie ceucat Binyamin mawh Elidat, kawn: simex Khisalon.
Cao: kaing: tix kaux khaing: daux doeh simie ceucat Dan, mawh Bukhix kawn: simex Yawgalix.
Khaing: daux kawn: simex Yosiep, cao: kaing: tix kaux khaing: doeh simie ceucat Manashe, mawh Hanelax kawn: simex Ephot.
Mai cao: kaing: tix kaux khaing: daux doeh simie ceucat Epharem, mawh Kemoelax kawn: simiex Shiphatan.
Cao: kaing: tix kaux khaing: daux doeh simie ceucat Zebulon, mawh Elizaphan kawn: simex Panat.
Cao: kaing: tix kaux khaing: daux doeh simie ceucat Isakha, mawh Palatelax kawn: simex Azan.
Cao: kaing: tix kaux khaing: daux doeh simie ceucat Asha, mawh Arihut kawn: simex Shelawmix.
Mai cao: kaing: tix kaux khaing: daux doeh simie ceucat Napthalix, mawh Pedauhelax kawn: simex Amihut."
Inkix mawh pwi pa hoik tawm: Simiang Siyiex lox sonsang gwieh kix tix tawx sinngao daux sinax pwi Isarilax khankix, kah daux haktiex Khanan heue.
Veng Son Pwi Lewix Khankix
Mai Simaieng Siyiex sikah kah Mose kah daux lung: Mawbax, hawt rawm: klawng: Yawdan, kah plak toi: veng Yerikho: mai ah nin:.
"Tawx lox maix kah pwi Isarilax khankix, mai kieh kix tawx veng kah ceu pwi Lewix, sonsang ot kix kah daux, khaing: haktiex sinngao cie tix, mai tawx haktiex pa koe: hawt vungviang veng an: kah ceu pwi Lewix khankix.
Veng an: khankix mawh sonsang ot kix kah daux, mai haktiex pa koe: hawt vungviang veng, tag mawh haktiex dee eei: kix moi, yung:, khawng: brie khankix mai son dee deuh kix kraung khawm: uik.
Haktiex hawt vungviang pa sang tawx pex kah ceu pwi Lewix, tag kieh vieh khaing: kah plak praix, hawt vungviang guh veng tix rheng: sawk.
Mai tiag plak praix veng, kah praok plak lih singaix ra: rheng: sawk, kah plak seh ra: rheng: sawk, kah plak klip singaix ra: rheng: sawk, mai kah plak laong: ra: rheng: sawk, veng tag mawh pa koe: kah daux sigreung. In: tag mawh haktiex son veng cie kix.
Khaing: kah daux sinax veng pa sang tawx pex kah ceu pwi Lewix khankix, tag tat tix deuh veng liah veng son dee peung pan pwi pa loe: tix pah pwi tix klawd kah. Lheu: khaing: veng inkix, tag baox tawx veng tipon: ra: veng kah kix.
Veng pa sang tawx maix kah ceu Pwi Lewix khankix, tag mawh tipon: daix veng. Maix tag tawx in: khankix tau mai haktiex hawt vungviang khawm: uik kah kix.
Veng pa sang tawx maix khankix, tag mawh khaing: daux cie pwi Isarilax khankix; khaing: daux doeh simie ceucat pa nie lheu: pon, maix tag teei tix tawx tom: nie, mai khaing: daux doeh simie ceucat pa iak pon, maix tag teei tix tawx iak, ku cub tag tawx veng cie tix tix blah kah ceu pwi Lewix, khaing: daux sinngao pa pon kix ku cub heue.
Veng Dee Peung Pan Pwi To: Pwi Tua
Simiang Siyiex ah nin: kah Mose,
"Krai kah pwi Isarilax khankix, yam tiang pex rawm: klawng: Yawdan, mai hoek kah daux haktiex Khanan,
khaix an: pex tag tat tix deuh veng khankix son tix, sonsang mawh veng pa to: pwi pa lud loe: tix pah pwi mai hoek peung tix klawd kah.
Veng an: khankix tag mawh veng pa sang hoek pwi pa lud loe: tix pah pwi tix peung, son ang pwi pa pah pwi an: sang pon tix yum: kah cao: pa pawk bix, tom: hoek bawg yam cung nawh kah plak sivoe cub caw: pwi hun: khankix, kah daux pa prawng kah.
Veng pa sang tawx pex khankix, son pwi pa hoek to: tix peung koe: liah veng.
Pex tag laug veng loe: veng kah plak lih singaix rawm: Yawdan, mai loe: veng kah daux haktiex Khanan, pa sang peung kix kah.
Veng inkix liah veng, tag mawh dee peung pwi lud tix pah pwi, son pwi Isarilax, son nyo sinie, mai son pwi pa hoek ot tivud ticu daux sinax pex, sonsang pon kix tix klawd kah.
"Phan: nawh tawk nawh tom: yum: kah rhiem:, nawh mawh pa pah kah pwi. Cao: pah an: tag hoek krax yum:.
Phan: nawh tawk nawh tom: yum: kah simaox pa koe: daux taix tix, nawh mawh pa pah kah pwi. Cao: pa pah an: tag hoek krax yum:.
Phan: nawh tawk nawh tom: yum: kah khaox giex tix, nawh mawh pa pah kah pwi. Cao: pa pah an: tag hoek krax yum:.
Cao: pa pawk bix son nham: tokaux pwi yum: an:, phan: yaox kah cao: pa pah pwi an: yam mawx ang ah tag pon tix deeh pah kah nawh.
Phan: nawh nyhot nawh kah daux pa koeng tix ang ah, yam jawm tix khwang: nawh tom: yum: kah tix ceuceu ang ah,
phan: tawk nawh tom: yum: kah taix tix, kah daux pa koe: rhawm: koeng tix kah nawh, nawh mawh pa pah pwi yum:. Cao: pa pawk bix son nham: tokaux pwi yum: an:, phan: yaox kah cao: pa pah pwi an: yam mawx ang ah, tag pon tix deeh pah kah nawh.
"Phan: ang mawh nan:, phan: nawh nyhot mai ang tix koe: rhawm: koeng, mai khwang: nawh kah tix ceuceu daux pa ang tix jawm ang ah,
mai phan: nawh khwang: kah simaox yum: yuh pwi tix kaux, kah daux pa ang nawh yaox kah pwi an:, mai ang mawh pwi koeng nawh kah, mai ang su: tix yuh kah nawh ang ah,
cub pwi hun: tag prawng sinax cao: pah pwi, mai cao: pa pawk bix nham: tix, awm: pa koe: lox lai beenli.
Cub pwi hun: tag ploi: kah cao: pa pah pwi an:, khaing: daux tawm: taix cao: pa pawk bix nham: tix, tag deeh tawx nawh hu: kah veng dee peung pwi to: tix klawd kah. Mai nawh tag ot tan:, tom: sidauh yum: cao: giex kaing: li pa ting, pa hoik groi kix rawm: bee pa singax singeh kah piang.
Phan: cao: pa pah pwi an: lih plak praix kah mee: veng khaing: pa hoik tat kix tix deuh, sonsang pon nawh tix klawd kah,
cao: pa pawk bix nham:, phan: yaox nawh kah plak praix mee: veng pa hoik tat kix tix deuh son pwi to: tix klawd, mai pah nawh yum:, cao: pa pah tag ang koe: phimap.
Grawhgrawng: nawh, nawh tag caw tix ot kah daux veng pa peung pwi to: tix klawd, tom: sidauh yum: cao: giex kaing: li an:, khaix hoik yum: cao: giex kaing: li pa ting cao: pa pah pwi an: tag deeh pon tix ing: kah haktiex cao: tix.
"In: mawh gumlox beenli mai lox tat jhawm: prawng, son doeh simie ceucat pex khankix, mai kah can dee ot pex khankix,
Can pwi pa pah kah pwi, pa mawh cao: pa hoik pah pwi tag pah nawh yum: kah daux pa koe: mhai: sakse, viang mawh nan: phan: sakse koe: tix kaux khaing: tag ang pon tix pah nawh yum:.
Lheu: khaing: an: pex tag ang pon tix teei mau deeh taoh kah nawh, tix ceu kawx son ju cao: pa pah pwi pa koe: phimap krax yum:, mawh kheu nawh tag yaox tix yum: tete.
Pex tag ang pon teei mau pa deeh taoh kah pwi pa hoik pon to: tix klawd kah daux veng peung pwi to:, sonsang deeh ing: ot kah daux haktiex cao: tix, sivoe ang cao: giex kaing: li pa ting nyang yum:.
Pex tag ang pon tix kieh haktiex ot tix seeing: brai:. Mawh kheu nham: mawh pa kieh haktiex seeing: brai:, lheu: khaing: nham: nawh pa deeh jah son an: ang koe: tix ceu kawx pa pon kieh haktiex singax.
Mawh kheu nan: paw kieh haktiex ot pex seeing: brai: kah daux sinax dee ot Aux. Mawh kheu Aux mawh Simiang Siyiex pa ot kah daux sinax pwi Isarilax khankix heue."
Been Pa Caw Bun: Koe: Mex Tix Plud Sinngao
Cao: kaing: cao: kap nyiiex ma: pwi Gilat kawn: simex Makhirax pa mawh kawn: simex Manashe, khaing: daux nyiiex ma: kawn: simex Yosiep khankix, hoek kah plak sivoe Mose mai pa mawh cao: kaing: ceucat pwi Isarilax,
kix ah nin: "Simiang Siyiex hoik tawm: lox kah cao: Simiang ex kieh yuh nieb mai gwieh haktiex sonsang tawx sinngao, son pwi Isarilax khankix, mai cao: Simiang ex hoik pon lox pa tawm: Simiang Siyiex, sonsang tawx sinngao puxaik yix, Zelophat kah kawn: bun: nawh khankix.
Phan: kix mawh pa mex kah kawn: simex doeh simie ceucat tang: ru daux pwi Isarilax khankix, sinngao kix tag teei lih khaing: doeh simie ceucat keeing: ex, mai deeh naok kah piang sinngao doeh simie ceucat pa mex kix, mawh kheu nan: sinngao yix tag mawh pa dieh hu: khaing: yix.
Mai yam hoek num Jubili pwi Isarilax khankix, sinngao kix tag mawh pa deeh naok tix kah piang sinngao doeh simie ceucat pa mex kix, mawh kheu nan: tag teei sinngao kix lih khaing: sinngao cie doeh simie ceucat keeing: ex."
Mai Mose krai awm: lox tawm: Simiang Siyiex kah pwi Isarilax khankix ah nin:, "Can lox pa krai ceucat kawn: simex Yosiep mawh pa Khaw: pa caw.
In: mawh lox pa tawm: Simiang Siyiex, son Grawng: pa dex pa dawd mai kawn: bun: Zelophat pa ah nin:.Kieh kix mex kah pwi pa simie kix tix mex, viang mawh nan: kix tag yaox tix mex kah daux doeh simie ceucat nyiiex ma: keeing: tix khaing:.
Mawh kheu nan: sinngao pwi Isarilax khankix, tag ang pon tix luan khaing: daux tawm: taix doeh simie ceucat mawx ceucat an:. Mawh kheu pwi Isarilax khankix, tag priex sinngao doeh simie ceucat keeing: tix.
Bun: pa pon tix cie sinngao, kah daux doeh simie ceucat pwi Isarilax khankix ku cub, tag yaox tix mex khaing: daux doeh simie keeing: tix, sonsang pon nawh tix cie sinngao keeing: tix.
Mawh kheu nan: sinngao pon kix, tag ang lai yaox tix gah khaing: daux tawm: taix doeh simie ceucat kix tix cub mai tix cub, kix tag priex rien kah sinngao cie cao: tix"
Awm: lox pa hoik tawm: Simiang Siyiex kah Mose, kawn: bun: Zelophat khankix hawt tix yuh awm: an:.
Kawn: bun: Zelophat mawh Mala, Tiraza, Hawgala, Milakha, mai mex Nawa mawh kawn: simex puxke: keeing: kix.
Kix teei tix mex daux doeh simie ceucat Manashe kawn: simex Yosiep, mai sinngao kix tag kaux kah daux doeh simie ceucat nyiiex ma: keeing: kix khawm: uik.
In: mawh beenli lox tat jhawm: prawng pa hoik tawm: Simiang Siyiex kah pwi Isarilax khankix, kah daux tawm: taix Mose kah daux lung: haktiex Mawbax, hawt rawm: klawng: Yawdan, pa koe: kah plak toi: veng Yerikho: heue.
LAI SIDIEX
(Deuteronomy)
Sidiex
Gumlox Tawm: Sonsang Laig Kah Haktiex Khanan
In: mawh lox pa hoik krai Mose kah pwi Isarilax kah daux tiag hawt praok rawm: klawng: Yawdan, kah daux lung: toi: veng Suphax, sinax veng Paran, veng Tawphelax, veng Laban, veng Hazarot mai veng Izahat khankix.
Jah khaing: Hawrax kah gawng Sina, mai hoek kah Kadesha Bana koe: kao: tix ngaix krax.
Kah daux tipon: num, khix kao: tix, tix ngaix, Mose krai lox tawm: pingnyap pa dex pa dawd mai pwi Isarilax, awm: pa tawm: Simiang Siyiex kah nawh khawm: uik,
khaix hoik pex nawh Shihon khunhawkham Amawrix, pa ot kah veng Heshabon, mai Awgax khunhawkham Bashan, pa ot kah Ashatarot mai kah veng Edarix.
Mose jah tix nih nai krai lao kah lox tat jhawm: prawng kah plak lih singaix rawm: klawng: Yawdan kah haktiex Mawbax mai ah nin:.
"Simiang Siyiex hoik sikah kah ex baoh Hawrax ah nin:,pex hoik ot kah piang gawng in: tom: rheung: bawg yam;
"Veeh pex mai deeh hu: krax, mai hu: kah piang gawng Amawrix, kah dee dex hawt an:, kah daux lung:, kah piang gawng mai kah daux ngawd, kah plak seh, mai kah praok rawm: sigrit sigra:, kah meung Khanan, mai kah Lebanon, tom: hoek dee singai rawm: klawng: ting Yufrethix.
Jhak heue, Aux hoik deuh haktiex an: sivoe pex; laig kah haktiex an:, mai teei tix cie haktiex pa hoik tiextu Simiang Siyiex kah keeing: pex, Abaraham, Icak mai Yakop, sonsang tawx kah kix, mai kah doeh simie ceucat pa plud khaix kix
Grawng: Laug Cao: Kaing: Doeh Simie Ceucat
"Aux hoik krai ah nin: kah pex yam an:,aux ang pon klawm: beeh glawm: kah son pex nongnong:;
Simiang Siyiex pex, hoik kieh pex haoh hun:, kah daux in: singaix pex hoik haoh hun: awm: simuing: kah raoma:.
Kieh Simiang Siyiex keeing: pex, baox kieh pex koe: kaing: rheng: son, khaing: pa nie haoh hun: pex yamin:, mai nawb bwan: kah piang pex, awm: hoik yuh Nawh Cao: sijax mukheu kah pex!
Aux sang pon klawm: pa taug pa mao pex, beeh glawm: pex, mai pa thungthiang: pex nongnong: yuh kah mawx?
Laug pwi koe: pingnya cuyi:, pwi lhak pwi lhiem: mai pwi koe: krax tawng krax yung khankix, khaing: sinax simie ceucat pex, mai aux tag yaog nawh mawh cao: kaing: kah piang pex
Mai pex hoik pawg kah aux ah nin:,ceu pa hoik krai maix kah yix, mawh pa mhawm: sonsang yuh yix kah
Aux tom: laug cao: kaing: khaing: daux doeh simie ceucat pex, kah pwi pa koe: pingnya cuyi:, mai pa koe: krax tawng krax yung, mai kieh kix mawh cao: kaing: kah piang pex, pa mawh cao: kaing: kah piang pwi kaing: rheng:, cao: kaing: piang pwi kaing: yieh, cao: kaing: piang pwi tiphwan: kaux, cao: kaing: piang pwi kao: kaux, mai cao: kaing: kah piang doeh simie ceucat pex khankix.
Yam an: aux tawx lox kah cao: prawng see: pex khankix,nghiiet kah grawng: see: pa koe: sinax puxaik pex, mai prawng ca: pa rauh pa see kah sinax pwi mai puxaik nawh, mai nyo sinie pa ot tau mai nawh.
Pex tag ang pon jhak pakngai: pwi tix kaux kawx kah daux pa prawng see:; pex tag nghiiet kah see: pa iak mai see: pa ting awm: paox tix; paw pex lhat kah pwi tix kaux kawx, mawh kheu krax prawng krax ca: mawh cie Siyiex; can see: pa nu kah pex viex hoek kah aux, mai aux tag nghiiet kah see: an:
Yam an: aux tag tawx lox kah can ceu pa khaw: pex tix yuh khawm: uik.
Pa Tiang Pwi Isarilax Tix Laig Kah Daux Haktiex
"Ex lih khaing: Hawrax, mai hu: phlat daux tiag ting pa koe: krax lhat awm: pa hoik yaox pex, kah krax hu: kah gawng haktiex Amawrix, awm: pa hoik tawm: Simiang Siyiex kah ex; mai ex hoek kah haktiex Kadesha Bana.
Mai aux ah nin: kah pex,pex hoik hoek kah gawng Amawrix pa tawx Simiang Siyiex ex, kah ex.
Jhak heue, Simiang Siyiex pex hoik deuh haktiex kah plak sivoe pex; haok mai teei tix cie, awm: hoik krai Simiang Siyiex keeing: pex kah pex; paw lhat paw graung mai paw lauxrhawm: kah
Mai pex kukaux greed tix dex aux mai ah nin:,kieh ex ploi: pwi hu: sivoe ex, mai jiang kah haktiex son ex, mai kieh kix deeh viex lox satang hoek kah ex, sonsang tawng ex krax pa sang khaw: ex tix haok, mai sonsang hoek ex kah veng yuh kah mawx
Mai grawng: an: aux khaw: rhawm: kah, aux tom: laug pwi kao: ra: kaux, khaing: daux ceucat pex tix cub tix kaux;
kix veeh tix mai haok kah piang gawng, tom: hoek kah daux ngawd Eshakawlax mai jiang kah dee an:.
Kix pieh tix viex plix khaox hoek daux taix tix tiblah, mai viex hoek kah ex, mai kix viex lox satang hoek kah ex ah nin:,an: mawh haktiex pa mhawm: pa sang tawx Simiang Siyiex ex kah ex
"Viang mawh nan: pex ang cu tix haok, mai tieh feen kah lox tawm: Simiang Siyiex pex;
mai pex bawgbe kah daux nyiiex gox tix ah nin:,mawh kheu Simiang Siyiex koeng kah ex. Nawh Cao: hoik viex ex lih khaing: daux meung Ejiptux, sonsang ap ex kah daux tawm: taix pwi Amawrix, sonsang yuh ex lauxleeing:.
Ex sang haok yuh kah mawx? Puxaik ex khankix hoik kieh ex lauxrhawm: ah nin:, "Pwi haktiex an: kied ting lhaong: khaing: ex; veng kix kawx ting mai guh veng lhaong: cux raoma:; lheu: khaing: an: yix hoik yaox kawn: simex Anakax khankix ot tan:."
Khaix an: aux ah nin: kah pex,paw yaoh paw yee: mai paw lhat kah kix.
Simiang Siyiex pex pa hu: sivoe pex, tag puing: son pex, awm: hoik yuh Nawh Cao: kah son pex kah meung Ejiptux kah plak sivoe ngai: pex,
mai kah daux tiag, pex hoik yaox kliien Simiang Siyiex tix, awm: kliien pwi kah kawn: tix, kah daux krax pa hoik lawng pex tom: sidauh hoek pex kah dee in:
Viang yuh nan: kawx, pex ang yumrhawm: kah Simiang Siyiex tix,
kaw pa hoik hu: sivoe pex, sonsang jhi: krax hu: pex mai sawg dauh dee sum: pex nyiiex gox, mai kah plak ponsawm: kah rong: ngu, mai kah plak ponngaix kah rong: paiawm:.
Krax Ciyang Kheu Tieh Feen Ceu Pwi Isarilax
"Simiang Siyiex mhong: kah lox pex, mai Nawh Cao: songrhawm:, mai tiextu ah nin:,
haktiex mhawm: pa tiextu Aux tix tawx kah keeing: pex khankix, ceu pwi pa caox in: tag ang pon tix yaox kah tix kaux kawx,
mawh ngie Kaliep kawn: simex Yephunie; pa yaox kah haktiex an:, mai Aux tag tawx haktiex pa hoik dig nawh kah caong tix kah nawh, mai kawnpraix nawh khankix, mawh kheu nawh hoik hawt grawng: lawng khaix Simiang Siyiex khawm: rhawm: tix
mawh kheu jao pex Simiang Siyiex songrhawm: kah aux mai ah nin:,maix tag ang pon tix laig tan:;
Yawsux kawn: simex Nun, pa cung kah sivoe maix, tag yaox tix laig tan:; tawx riang rao kah nawh, mawh kheu nawh tag kieh pwi Isarilax teei tix cie sinngao an:.
Lheu: khaing: an: kawn: nyawm iak maix khankix, pa ah maix mawh pa tud pa rhim:, pa mawh kawnpraix maix pa ang nyang tawng pa mhawm: mai pa caox daux in: singaix, kix tag laig kah dee an:, pa sang tawx Aux kah kix, mai kix tag pon tix cie an:.
Viang mawh nan:, phan: mawh pex, deeh veeh tix hu: kah daux tiag, kah krax rawm: sigrit sigra: raoh (rawm: sigrit sigra: Edom)
"Khaix an: pex deeh pawk lox ah nin: kah aux, yix hoik phit lud kah Simiang Siyiex; yix tag haok puing: awm: lox pa hoik tawm: Simiang Siyiex ex kah yix, pwi kukaux nhawt kah kraung naing tix, mai khre: rien tix haok kah piang gawng.
Mai Simiang Siyiex ah nin: kah aux,krai kah kix, paw haok paw puing: mawh kheu Aux ang ot sinax pex, phan: ang mawh nan:, pex tag som kah pwi koeng tix
Mai aux hoik krai kah pex, viang mawh nan:, pex ang nghiiet kah; mai pex tieh feen lox tawm: Simiang Siyiex, mai haok kah piang gawng tau mai rhawm: kua: rhawm: vao tix.
Mai pwi Amawrix pa ot kah piang gawng puing: mai pheet kah pex, awm: pheet phung: hia: kah pwi, mai yuh pex laux jah kah Sirax tom: hoek kah veng Hawma.
Mai pex deeh ing:, mai yiiem kah plak sivoe Simiang Siyiex; viang mawh nan:, Simiang Siyiex ang cu tix nghiiet kah lox pex, mai ang lai daong yhaok kah pex.
Pex dauh tix ot kah Kadasha tom: rheung: singaix, awm: bawg yam pa yaox pex tix ot tan: heue.
Num Khix Singaix Ot Kix Daux Tiag
"Khaix an: ex deeh veeh tix hu: krax daux tiag tom: hoek kah rawm: sigrit sigra: raoh (rawm: sigrit sigra: Edom), awm: pa krai Simiang Siyiex kah aux, mai ex hoik vungviang hawt gawng Sirax tom: rheung: singaix,
mai Simiang Siyiex ah nin: kah aux,
pex vungviang hawt gawng in:, hoik rheung: bawg yam; veeh tix hu: kah plak laong:.
Mai tawm: lox kah pwi khankix ah nin:, pex tag tiang tix hu: kah mee: haktiex puxaik pex, pa mawh doeh simie ceucat pex Esaw pa ot kah haktiex Sirax; mai kix tag lhat graung kah pex. Viang mawh nan:, yuh satix mhawmmhawm:;
paw doh cheeik kah kix, mawh kheu Aux tag ang tawx haktiex kix kah pex pie ceeix kawx, pie tix tiag caong dig kawx ang tawx kah pex, mawh kheu hoik tawx Aux gawng Sirax mawh cie Esaw.
Pex tag yaox tix liag pa ih pa un: khaing: kix kah mau, sonsang yaox pex tix ih, mai pex tag liag rawm: khaing: kix kah mau, sonsang nyaox pex tix nyaux kah.
Mawh kheu Simiang Siyiex pex hoik nawb bwan: kah piang kaing jhaw: pa yuh pex kah taix tix khawm: uik; Nawh Cao: hoik tawng pex vungviang kah daux tiag ting in:; daux tipon: num, Simiang Siyiex hoik ot tau mai pex, mai pex ang lai koe: ceu pa cud pa cha:
Mai ex lih hu: krax luan hu: khaing: puxaik ex, kawnpraix Esaw pa ot haktiex Sirax, khaing: krax hu: ex daux lung:, khaing: veng Elat, mai veng Eziyon Gaba, ex deeh veeh tix tiang kah krax hu: daux tiag Mawbax.
Simiang Siyiex ah nin: kah aux,paw yuh krax tuktiaktukte: kah pwi Mawbax, mai paw yuh naing kah kix, mawh kheu Aux tag ang tawx pex cie kah haktiex kix ceeix kawx, mawh kheu Aux hoik tawx kawn: simex Lotax cie kah haktiex Arax.
(Pwi Emim hoik dawg ot tan: tom: dix, mai kix mawh ceu pwi pa ting mai kied nie, mai kied lhaong: awm: ceu pwi Anakax;
pwi ceu in: khankix baox kok ceukaux kix mawh Rephem awm: pwi Anakax, viang mawh nan:, pwi Mawbax kok kix mawh ceu pwi Emim.
Can pwi Hawrix khankix hoik dawg ot kah haktiex Sirax tom: dix, viang mawh nan:, kawn: simex Esaw khankix, grheu: kix mai yuh kix lauxleeing: kah plak sivoe kix, mai kawnpraix Esaw ot kah dee ot kix, awm: yuh pwi Isarilax kah haktiex tawx Simiang Siyiex kah kix pa pon kix tix cie.)
Yamin: kaoh mai tiang kah plak klawng: Zeriet Mai ex tiang kah plak toi: rawm: klawng: Zeriet.
Mai bawg yam jah ex tix lih khaing: Kadesha Bana, tom: sidauh tiang ex kah rawm: klawng: Zeriet hoik koe: tingoe: daix num, mai tom: sidauh hoek bawg yam lauxleeing: doeh ceucat pwi naing khaing: daux tab, awm: hoik tiextu Simiang Siyiex kah kix.
Mawh kheu plawng: taix Simiang Siyiex teei tix tik kah kix, khaing: daux tab, tom: sidauh lauxleeing: kix.
"Mai pwi naing khankix hoik lauxleeing: mai yum: sinax pwi hun: khankix,
Simiang Siyiex ah nin: kah aux,
in singaix pex tag tiang kah mee: haktiex Arax mai Mawbax;
yam hoek pex kah dex pwi Amon, paw tuktiak mai paw cheeik kah kix mawh kheu Aux tag ang tawx pex cie haktiex kawn: simex Amon tix ceeix kawx, mawh kheu Aux hoik tawx an: mawh cie kawn: simex Lotax
(Kah dee ankix sawn: mawh haktiex pwi Rephem; mawh kheu pwi Rephem hoik dawg ot kah dee an:, viang mawh nan:, pwi Amon kok kix mawh Zamzum Mim,
ceu pwi an:, mawh pa ting mai kied nie, mai kied lhaong: awm: pwi Anakax; viang mawh nan:, Simiang Siyiex yuh kix lauxleeing: kah plak sivoe kix; mai grheu: kix, mai plud tix ot dee ot kix;
Nawh Cao: hoik yuh kah doeh ceucat Esaw awm: an:, pa ot kah Sirax, yam yuh Nawh Cao: pwi Hawrix lauxleeing: khaing: kah: sivoe kix, kix grheu: kix, mai plud tix ot kah dee an: tom: hoek in: singaix.
Mai pwi Avin pa ot kah yaong:, pa singai khaing: veng Gaza, ceu pwi Katawren pa kaoh khaing: veng Katawrax, yuh kix lauxleeing: mai plud tix ot kah dee ot kix.)
Kaoh mai lih hu: krax, mai tiang kah rawm: Anon; Jhak heue, Aux hoik ap Shihon pwi Amawrix, pa mawh khunhawkham Heshabon, mai haktiex nawh kah daux tawm: taix pex, jah pex teei tix cie, mai puing: kah kix.
Jah kah daux in: singaix Aux tag kieh pwi kuceu piang haktiex yaoh yee: mai lhat graung kah pex, pwi pa mhong: kah grawng: pex tag lhat graung mai khirhawm: kheu jao pex
Grawng: Som Khuhawkham Shihon
"Mai Aux hoik ploi: kawncau khankix hu: kah Shihon khunhawkham meung Heshabon, khaing: daux tiag Kedemot, mai lox pa nhim: ah nin:,
kieh aux tiang kah haktiex maix; aux tag lawng ngie kah daux krax ting, mai aux tag ang veh kah plak khawn: dawm:, mai kah plak khawn: gwiex.
Maix coh pa ih son aux kah mau, sonsang pon aux tix ih, mai coh rawm: son aux kah mau, sonsang nyaux aux, kieh ngie aux tiang kah caong tix nongnong:,
awm: yuh kawn: simex Esaw pa ot kah Sirax mai pwi Mawbax pa ot kah Arax kah son aux, tom: sidauh tiang aux rawm: klawng: Yawdan, mai hoek kah meung pa tawx Simiang Siyiex ex kah ex
Viang mawh nan:, Shihon khunhawkham Heshabon ang kieh ex tiang kah haktiex tix; mawh kheu Simiang Siyiex hoik kieh rhawmrhi: nawh kiien:, mai rhawm: nawh kied kua: sonsang ap nawh tix daux taix pex, awm: pa hoik yaox pex in: singaix.
Mai Simiang Siyiex ah nin: kah aux,jhak heue, Aux hoik jah tix ap Shihon, mai haktiex nawh kah pex; pex puing: kah mai teei tix cie kah
Khaix an: Shihon mai pwi nawh khankix hoek tix puing: kah ex kah veng Yahat.
Mai Simiang Siyiex ex ap nawh kah ex, mai ex hoik pex kah nawh mai kawn: simex nawh, mai khawm: pwi nawh khankix.
Yam an: ex hoik teei veng nawh khawm: uik, mai ex hoik yuh simex, bun:, mai khawm: kawn: nyawm pa ot daux veng ku veng, laux lak pak leeing: mai ex ang lai prah tix ceu kawx;
ex teei ngie khawng: brie awm: kraung pa rhim: son cao: ex, tau mai kraung pa pon ex khaing: daux veng khankix.
Jah khaing: veng Araw kah praok rawm: klawng: Anon mai khaing: veng pa koe: hawt rawm: klawng: khankix, tom: singai hoek kah veng Gilat, ang lai koe: veng pa ang ex pex tix veng kawx; Simiang Siyiex ex hoik ap kah daux tawm: taix ex khawm: uik.
Pex paw hu: ngie dex haktiex kawn: simex Amon, mai hawt rawm: klawng: Yabok, mai kah veng pa koe: kah piang gawng khankix, pa tiebtie Simiang Siyiex ex kah ex heue.
Pa Som Khunhawkham Awgax
"Ex deeh veeh tix hu: kah krax Bashan; mai Awgax khunhawkham Bashan nawh mai pwi nawh khankix hoek tix puing: kah ex, kah Edarix.
Mai Simiang Siyiex ah nin: kah aux,paw lhat paw graung kah nawh; mawh kheu Aux hoik ap nawh mai pwi nawh mai haktiex nawh khankix kah daux tawm: taix pex; pex tag yuh kah nawh awm: hoik yuh pex kah Shihon khunhawkham pwi Amawrix, pa ot kah veng Heshabon
Simiang Siyiex ex hoik ap Awgax khunhawkham Bashan, mai pwi nawh khawm: uik, ex pah nawh tom: ang pwi nawh lai klawd tix kaux kawx.
Yam an: ex teei veng nawh khawm: uik, mai veng pa ang ex teei ang koe: tix veng kawx, ex teei veng tigliah veng, pa koe: hawt Agawbax khankix, meung haktiex Awgax khunhawkham Bashan.
Veng in: khawm: uik mawh veng pa lhaong: guh veng pa kaux, tau mai siviex veng, mai jhong:, lheu: khaing: an: yaong: kawn: koe: tom: nie kah plak praix veng.
Mai ex hoik yuh kix laux lak pak leeing:, awm: hoik yuh ex kah Shihon khunhawkham Heshabon, mai yuh veng ku veng, simex, bun:, mai kawn: nyawm khankix laux lak pak leeing:.
Khawng: brie mai kraung pa rhim: ex khaing: daux veng khankix, ex hoik teei mawh cie tix.
Yam an: ex hoik teei haktiex khaing: daux taix khunhawkham pwi Amawrix ra: kaux, pa ot kah rawm: klawng: Yawdan plak in:, khaing: rawm: klawng: Anon tom: hoek kah gawng Heramon.
(Ceu pwi Sidon kok ceukaux gawng Heramon mawh Sirion, mai kok ceu pwi Amawrix mawh Sinirax.)
Ex hoik teei veng pa koe: kah daux lung: khawm: uik, mai pa koe: hawt haktiex Gilat, mai pa koe: hawt haktiex Bashan, tom: singai hoek kah veng Salaka mai veng Edarix, mai veng meung haktiex Awgax khunhawkham Bashan.
Mawh ngie Awgax khunhawkham Bashan ceu pwi Rephem tix kaux ngie pa kawn deuk; jhak heue, ku: it nawh mawh ku: riiem; (an: koe: kah veng Rabat, dee ot pwi Amom ang mawh lie?). Krax lang: koe: sidim: sawk, krax vieh koe: pon: sawk, awm: pa khaw: mai sawk cie pwi hun:.
Gwieh Haktiex Plak Lih Singaix Rawm: Klawng: Yawdan
"Yam hoik teei ex kah haktiex yam an:, jah khaing: veng Araw, pa koe: hawt rawm: klawng: Amom, mai gawng Gilat tix plak, mai veng an: khankix, Aux hoik tawx kah Rubin mai Gat;
pa deuk khaing: gawng Gilat, mai Bashan meung haktiex khunhawkham Awgax, Aux hoik tawx kah Manashe tix plak. (Haktiex pa koe: kah daux Bashan khawm: uik, kok mawh pwi Rephem.
Ya-irax doeh simie ceucat Manashe teei tix cie haktiex baoh Agawbax, pa mawh meung Bashan, tom: singai kah mee: praix Geshurix, mai Makhati, khaix an: kix kok ceukaux mawh Havot Ya-irax tom: in: singaix.)
Aux tawx veng Gilat kah pwi Makhirax,
kah pwi Rubin mai pwi Gat khankix, Aux tawx haktiex kah kix jah khaing: veng Gilat, tom: hoek kah rawm: klawng: Anon, tau mai sigreung klawng: an:, tom: hoek kah rawm: klawng: Yabok, mee: haktiex pwi Amon khankix;
daux lung: tau mai rawm: klawng: Yawdan tom: mee: haktiex, jah khaing: Ginesariet plak lih singaix rawm: sigrit sigra: Arabat (nhawng kih), kah caong gawng Pisaga.
"Mai Aux hoik tawm: lox kah pex, yam an: ah nin:,Simiang Siyiex pex hoik tawx pex cie kah haktiex in:; pwi kua: pwi vao khankix tag tiang tau mai kraung naing sivoe puxaik pex pwi Isarilax.
Viang mawh nan:, moeng pex, kawnpraix pex, mai khawng: brie pex khankix, (Aux tawng kah hoik nie khawng: brie pex) tag ot kah daux veng pa hoik tawx aux kah pex,
tom: hoek bawg yam tawx Simiang Siyiex puxaik pex laux lee: tix, awm: tawx nawh kah pex, tom: hoek bawg yam teei kix kah haktiex pa tawx Simiang Siyiex pex kah kix, kah plak toi: rawm: klawng: Yawdan; khaix an: pex kukaux tag deeh hoek kah dee ot tix pa hoik tawx Aux kah pex
Mai Aux hoik tawm: lox kah Yawsux yam an:,ngai: pex hoik yaox kah ceu pa hoik yuh Simiang Siyiex pex, kah khunhawkham ra: kaux; mai Simiang Siyiex tag yuh ceu in: kah meung haktiex can dee hoek maix.
Paw pex lhat graung kah kix, mawh kheu tokaux Simiang Siyiex pex tag puing: son pex
Grawng: Ang Mose Pon Laig Kah Meung Khanan
Mai aux khyox khaw: kah Simiang Siyiex, yam an: ah nin:,
Simiang Siyiex eue:, Maix Cao: hoik jah tix jhi: kawncau Tix yaox pa ting lhaong: Tix, mai pa ting riang rao taix Tix; Siyiex piang raoma: mai piang haktiex mawx pa chix yuh awm: kaing jhaw: Maix Cao:, mai pa ting siawpsibrawm pa yuh Maix Cao: lie?
Kieh aux hu: kah plak an:, mai jhak kah haktiex mhawm: pa koe: toi: rawm: klawng: Yawdan, mai gawng pa jiet mhawm: gawng Lebanon
Mawh kheu jao pex Simiang Siyiex hoik songrhawm: kah aux, mai ang lai nghiiet kah lox aux, mai Simiang Siyiex ah nin: kah aux,ding heue; paw lai krai grawng: an: kah Aux.
Haok kah piang choek gawng Pisaga mai jhak kah plak lih singaix plak klip singaix kah plak laong:, mai kah plak seh, mai jhak an: kix kah ngai: tix; maix tag ang pon tiang kah plak toi: rawm: klawng: Yawdan.
Mai maix tawm: lox kah Yawsux, mai tawx riang rao mai joh jhan: kah nawh, mawh kheu nawh tag hu: sivoe pwi in: khankix, mai nawh tag kieh kix pon tix cie haktiex pa hoik yaox maix.
Mawh kheu nan:, ex hoik ot kah daux ngawd see veng Bet Pegurax heue.
Mose Tawm: Lox Kieh Cu Nghiiet
"Yamin: pwi Isarilax eue, nghiiet kah lox lai beenli mai lox tat jhawm: prawng pa gau aux pex yuh khankix, sonsang im: ju pex, mai hu: laig teei tix cie haktiex pa tawx Simiang Siyiex keeing: pex kah pex.
Pex tag ang pon baox kah gumlox tawm: Aux kah pex, mai ang pon tix tieh khaing: an:; pex tag priex kah lox tawm: pingnyap Simiang Siyiex pex awm: pa tawm: Aux kah pex.
Pex hoik yaox pa yuh Simiang Siyiex kah Balapegurax kah ngai: tix, mawh kheu Simiang Siyiex pex hoik yuh pwi pa hawt khaix Balapegurax khawm: uik laux lak pak leeing: khaing: sinax pex;
pex pa een: rhawm: kah Simiang Siyiex tix tom: kaux tom: cong, hoik yaox tix im: ju kukaux tom: in: singaix.
Aux hoik gau pex kah lox lai beenli mai lox tat jhawm: prawng awm: pa hoik tawm: Simiang Siyiex aux kah aux, sonsang hawt yuh pex awm: an: kah daux haktiex pa teei pex tix cie.
Priex rien mai hawt tix yuh; mawh kheu in: tag mawh pingnya mai krax tawng krax yung son pex kah sivoe ngai: pwi pa mhong: kah lox lai beenli in: tag ah nin:,ceu pwi pa ting haoh hun: in:, mawh pa koe: pingnya mai koe: krax tawng krax yung tete
Mawh Siyiex mawx pa ot dex ceu pwi pa ting haoh hun: in: awm: ot Simiang Siyiex ex dex ex, yam kok yo ex kah Nawh Cao: lie?
Mawh ceu pwi pa ting haoh hun: mawx pa koe: lox lai beenli mai lox tat jhawm: prawng pa rauh pa see khankix, awm: koe: lox tat jhawm: prawng pa deuh Aux kah sivoe pex daux in: singaix lie?
"Yuh satix pex mai rien rhawm: tix, phan: ang mawh nan:, pex tag piawm: kah ceu pa hoik yaox pex kah ngai: tix khankix, mai ankix tag lih khaing: daux rhawm: pex, kah daux singaix pa im: ju pex; mai kieh kawnpraix pex, mai kawn: saux kawn: sex pex tawng kah ceu in: khankix,
kah daux singaix cung pex kah plak sivoe Simiang Siyiex pex kah baoh Hawrax, Simiang Siyiex ah nin: kah aux,khrawm: pwi hoek kah Aux, mai Aux tag kieh kix mhong: kah lox Tix, sonsang gau kix tix lhat graung kah Aux yam im: ju tix kah piang haktiex, mai sonsang gau kix kah kawnpraix tix khankix
Pex hoek dex mai cung hawt caong gawng, mai ngu gleeing kah gawng tom: faik hoek kah sigreung raoma:, tau mai paiawm: pa faik.
Mai Simiang Siyiex hoik sikah kah pex khaing: daux sigreung ngu; pex hoik mhong: sinum lox sikah khankix, viang mawh nan:, pex ang yaox kah rieng pakpeung:; mai pex mhong: ngie lox sinum khaing:.
Mai Nawh Cao: hoik krai lox sijax mukheu pa hoik tawm: Nawh Cao: kah pex, sonsang hawt yuh pex kah, pa mawh lox pingnyap kao: gum; mai Nawh Cao: hoik tiem: khankix kah piang khlawp simaox ra: khlawp.
Mai Simiang Siyiex hoik tawm: lox kah aux yam an:, sonsang gau aux pex kah lox lai beenli mai lox tat jhawm: prawng, sonsang hawt yuh pex kah an: kah daux haktiex pa tiang pex tix hu: teei tix cie.
Grawng: Tawx Satix Kah Pa Krub Rieng Rao
"Yuh satix pex mhawmmhawm:. Mawh kheu singaix an: pex tag ang yaox rieng pakpeung: tix ceu kawx, yam sikah Simiang Siyiex kah pex, kah baoh Hawrax khaing: daux sigreung ngu,
phan: ang mawh nan:, lhat pex yuh krax pa lud pa loe: mai yuh rieng rao pakpeung: pa hoik saik tix son tokaux tix, mai pa koe: rieng pakpeung: tix ceu ceu, pa mawh rieng pakpeung: simex, bun:,
pa awm: rieng pakpeung: tosat pa koe: kah piang haktiex, mai pa awm: rieng pakpeung: sim: koe: pruik pa po: kah raoma:,
pa awm: rieng pakpeung: pa chix mo tix ceu ceu, kah piang tiex, mai pa awm: rieng pakpeung: kax tix ceu ceu pa koe: kah daux rawm: greem: haktiex.
Mai yuh satix tix lhat pex maong tix jhak kah raoma:, mai yam yaox pex kah singaix, khix, simuing:, mai kraungkhrai: raoma: khawm: uik, pex tag krub mai yuh kaing son an:, kah pa gwieh Simiang Siyiex kah kawn: pwi pa koe: greem: raoma: khawm: uik.
Mai Simiang Siyiex hoik teei pex lih khaing: daux glah ngu rhiem:, meung Ejiptux, sonsang mawh pex pwi cie Nawh Cao: awm: pa koe: pex daux in: singaix.
Lheu: khaing: an: Simiang Siyiex hoik songrhawm: kah aux kheu jao pex, mai tiextu sonsang ang aux pon tiang toi: rawm: klawng: Yawdan, mai sonsang ang aux pon laig kah daux haktiex mhawm: pa tawx Simiang Siyiex pex mawh sinngao cie pex.
Mai aux tag yum: kah daux haktiex in:, aux tag ang yaox tix tiang kah toi rawm: klawng: Yawdan; viang mawh nan: pex tag tiang kah plak an: mai teei tix cie kah haktiex mhawm: an:.
Yuh satix tix, son ang pex piawm: kah sijax mukheu Simiang Siyiex pex, pa hoik yuh Nawh Cao: mai pex, mai paw yuh rieng rao pa saik tix, mai pakpeung: rieng rao tix ceu ceu pa ang Simiang Siyiex cu pex yuh.
Mawh kheu Simiang Siyiex pex mawh ngu pa gleeing, mai mawh Siyiex pa bak pa viang.
"Yam pon pex kawnpraix tix, mai kawn: saux kawn: sex tix khankix, mai hoik ot kah daux haktiex an: tom: rheung:, phan: pex lud loe: mai yuh rieng rao pa saik tix mawh rieng pakpeung: tix ceu ceu, mai baox yuh yuh pa caox pa caig kah plak sivoe ngai: Simiang Siyiex pex, sonsang so Nawh Cao: songrhawm: songrhi:,
Aux tag kok yo raoma: mai haktiex mawh sakse sonsang puing: kah pex daux in: singaix, mai pex tag grai: grup dom: mawx dom: an: khaing: haktiex pa tiang pex plak toi: rawm: klawng: Yawdan, pa pon pex tix cie; pex tag ang yaox tix ot rheung: kah daux haktiex an:, viang mawh nan:, pex tag laux lak pak leeing:.
Mai Simiang Siyiex tag kieh pex prungprang:rai ruat kah sinax ceu pwi hkankix, mai pex tag deuk kah sinax pwi tang: ceu tang: cat ceeix khaing: kah dee grheu: Simiang Siyiex kah pex.
Kah dee an: pex tag yuh kaing jhaw: siyiex pa yuh kah taix tix, pa mawh khaox, simaox, pa ang chix yaox, pa ang chix mhong:, pa ang chix ih, mai pa ang chix ngheet.
Phan: pex sawg tix yaox Simiang Siyiex tix baoh an:, phan: pex sawg Nawh Cao: khawm: rhawm: khawm: rhi: mai khawm: ju tix pex tag yaox kah.
Yam yaox pex krax lauxrhawm:, mai ceu inkix hoek kah piang pex, kah daux singaix pa sang hoek, pex tag deeh hoek kah Simiang Siyiex tix, mai cu nghiiet kah lox Nawh Cao:,
mawh kheu Simiang Siyiex pex, mawh Siyiex pa caoxrhawm:; Nawh Cao: ang tik vud pex, mai ang kieh pex lauxleeing:, mai ang piawm: sijax mukheu pa tiextu Tix kah keeing: pex khankix.
"Mawh kheu nan: yamin: chawk pex yaox grawng: singaix pa hoik luan, pa hoik koe: sivoe pex, jah kah singaix hoik phan: Siyiex kawn: pwi kah piang haktiex, mai chawk khaing: caong ma: seh, tom: hoek kah caong ma: laong:, hoik sax koe: grawng: pa ting lhaong: awm: in: phan: ang mawh nan:, hoik sax mhong: pex grawng: ceu in: lie?
Hoik sax mhong: pwi lox sikah Siyiex khaing: daux sigreung ngu, awm: hoik mhong: pex mai im: ju awm: pex lie?
Mawh siyiex mawx pa hoik coca: tix teei ceu pwi tix cub khaing: daux sinax pwi tang: ceu tix cub, kah daux pa cheukcheu: tix yuh mhai: sakse, kah daux pa daox pa am:, kah daux naing, mai kah plawng: taix pa ting riang pa nih tix, mai kah daux pa lhat graung, awm: pa hoik yuh Simiang Siyiex pex son pex, kah daux meung Ejiptux kah plak sivoe ngai: pex?
Pa jhi: Nawh Cao: pex yaox khankix mawh sonsang tawng pex Simiang Siyiex mawh Siyiex, lheu: khaing: Nawh ang lai koe: Siyiex tang: kaux.
Nawh Cao: kieh pex mhong: lox Tix khaing: raoma:, sonsang pon sidiex gau kah pex, Nawh Cao: hoik jhi: pex yaox ngu pa ting pa lhaong: Nawh Cao: kah piang haktiex, mai pex hoik mhong: lox Nawh Cao: khaing: daux sigreung ngu.
Mawh kheu hoik moh Nawh Cao: kah keeing: pex, mai laug doeh simie ceucat pex, mai viex pex lih khaing: meung Ejiptux kah sivoe ngai: Tix tau mai pa ting siawpsibrawm Nawh,
mai grheu: ceu pwi pa ting lhaong:, mai pa ting riang rao khaing: pex, kah sivoe pex, sonsang viex pex laig kah daux, mai tawx pex cie haktiex kix tom: hoek kah daux in: singaix;
Mawh kheu nan: kieh pex tawng kah daux in: singaix, mai een: kah daux rhawm: tix, Simiang Siyiex mawh Siyiex pa koe: kah piang raoma:, mai kah piang haktiex; ang lai koe: Siyiex tang: kaux.
Pex tag priex lox lai beenli mai lox pingnyap Nawh Cao:, pa tawm: aux kah pex in: singaix, sonsang hu: mhawm: hoek mhawm: pex tau mai kawnpraix pex, mai kawn: saux kawn: sex pex, sonsang lang: singaix ju pex, daux haktiex pa tawx Simiang Siyiex pex kah pex leeing ju."
Veng Peung Pwi To: Plak Lih Singaix
Mose gwieh tix deuh veng loe: veng kah plak lih singaix rawm: klawng: Yawdan,
sonsang to: pwi pa pah kah pwi tix klawd tan:, pa mawh pwi pah kah paoxplawg paoxnyhawm: tix kah daux pa ang su: tix yuh, mai pa ang koe: krax koeng kah nawh kah bawg yam pa hoik luan, mai yam to: nawh tix hoek kah veng an: tix veng veng, nawh tag im: ju.
Veng an: khankix mawh veng Beza pa koe: kah daux tiag, daux lung: mawh son pwi Rubin, veng Ramok pa koe: kah daux haktiex Gilat mawh son pwi Gat, mai veng Golan pa koe: kah daux haktiex Bashan mawh son pwi Manashe. s Pa Kieh Tawng Kah Lox Tat Jhawm: Prawng Siyiex
In: mawh lox tat jhawm: prawng pa deuh Mose kah plak sivoe kawnpraix Isarilax;
in: khankix mawh lox kham: mhai: sakse, kah lox lai beenli mai lox tat jhawm: prawng, pa hoik krai Mose kah kawnpraix Isarilax yam lih kix khaing: meung Ejiptux,
kah plak lih singaix rawm: klawng: Yawdan kah ngawd see veng Betpegurax, kah daux haktiex Shihon khunhawkham Amawrix, pa ot veng Heshabon, pa hoik pex Mose mai kawnpraix Isarilax yam lih kix khaing: meung Ejiptux.
Mai kix teei tix cie haktiex nawh, mai haktiex Awgax pa mawh khunhawkha Bashon mai kiex mawh khunhawkham pwi Amawrix pa ot kah plak lih singaix rawm: klawng: Yawdan;
jah kah veng Araw pa koe: praok rawm: klawng: Anon tom: hoek kah gawng Zirion, (pa mawh gawng Heramon),
khawm: Arabax khawm: uik, pa koe: plak lih singaix rawm: klawng: Yawdan, tom: hoek kah rawm: sigrit sigra: Arabax mai caong gawng Pisaga heue.
Lox Tawm: Pingnyap Kao: Gum
Mose kok kah pwi Isarilax khankix mai ah nin:, "Pwi Isarilax khankix nghiiet heue, lox lai beenli mai lox tat jhawm: prawng pa sang krai aux pex mhong: daux in: singaix, pex tag gau tix kah mai yuh satix kah yuh tix an: khankix.
Simiang Siyiex ex hoik yuh sijax mukheu mai ex kah piang gawng Hawrap.
Simiang Siyiex ang yuh sijax mukheu tau mai keeing: ex nongnong:, viang mawh nan: yuh tau mai ex, can pwi pa ot tin pa im: ju in: singaix.
Simiang Siyiex hoik sikah tau mai pex pakngai: taw pakngai:, kah piang gawng daux sigreung ngu,
aux hoik cung sinax Simiang Siyiex mai pex yam an:, sonsang krai pao: gumlox Simiang Siyiex kah pex, mawh kheu pex hoik lhat kah ngu, pex ang cu tix haok kah piang gawng. Nawh Cao: ah nin:
"Aux mawh Simiang Siyiex pex, pa hoik viex pex lih khaing: meung Ejiptux, mai kah dee yuh pex siliex.
"Lheu: khaing: Aux ang pon tix koe: siyiex tang: kaux.
"Ang pon tix yuh rieng rao pa saik tix tix ceuceu son tokaux tix, pa mawh rieng pakpeung: tix ceuceu, pa koe: kah daux raoma: ang ah, pa koe: kah plak greem: mai kah piang haktiex ang ah, mai pa koe: kah daux rawm: greem: haktiex ang ah;
ang pon tix krub mai ang pon tix yuh kaing kix; mawh kheu Aux mawh Simiang Siyiex pex, mawh Siyiex pa bak pa viang mai pa tawx phimap keeing: pex, kah piang kawnpraix tom: hoek loe: pon: ju simie ceucat, kah pwi pa koeng kah Aux,
viang mawh nan:, Aux jhi: krax moh krax rhawm: tix kah pwi pa moh kah Aux, mai pwi pa hawt kah lox tawm: pingnyap Aux tom: hoek kaing: rheng: ju.
"Ang pon kok ceukaux Simiang Siyiex maix giex going, mawh kheu pwi pa kok kah ceukaux Siyiex giex going Siyiex tag ang deuh nawh mawh pa ang koe: phimap.
"Doh keud kah singaix twah mai een: mawh singaix singax singeh awm: lox tawm: Simiang Siyiex pex kah pex.
Maix tag yuh kaing jhaw: son tix liah singaix,
viang mawh nan:, daux singaix aliah, mawh singaix twah Simiang Siyiex maix, maix tag ang pon tix yuh kaing tix ceu kawx, maix, khawm: kawn: simex, kawn: bun: maix, kawncau simex kawncau bun: maix, khawm: khawng: brie maix, moi, la, nyo sinie maix pa ot daux diang siviex veng maix khankix, kawncau simex, kawncau bun: maix khankix tag laux lee: tix awm: maix.
Maix tag doh keud kah hoik sax mawh tix siliex kah daux meung Ejiptux, mai Simiang Siyiex pa mawh Siyiex pex viex pex lih khaing: tan: kah taix pa ting riang mai kah plawng: tai pa hoik nih tix; mawh kheu nan: Simiang Siyiex pex tawm: lox kieh pex priex kah singaix twah.
"Yungyi: kah miex keeing: maix awm: lox pa hoik tawm: Simiang Siyiex maix kah maix, sonsang lang: ju maix, mai sonsang hu: mhawm: hoek mhawm: pex tau kah daux haktiex pa tawx Simiang Siyiex maix kah maix.
"Maix tag ang pon pah pwi yum:.
"Maix tag ang pon tix phit vao mai moeng kawn: pwi.
"Maix tag ang pon tix briex lak.
"Maix tag ang pon tix kham: mhai: sakse pa ang mawh ang meh kah paoxplawg paoxnyhawm: tix.
"Maix tag ang pon tix ghoing: kah moeng paoxplawg paoxnyhawm: maix, mai paw simie tix cie kah nyiiex ma: paoxplawg paoxnyhawm: tix, kaung: nawh, kawncau simex, kawncau bun: nawh, moi nawh, la nawh, mai kraung tix ceuceu khaing: paoxplawg paoxnyhawm: maix.
Gumlox in: khankix mawh pa krai Simiang Siyiex kah pwi hun: khawm: uik, kah piang gawng khaing: sigreung ngu, daux paiawm:, mai kah daux pa faik sigrien sigre, tau mai lox ting sinum, mai ang lai baox tidtix. Mai Nawh Cao: hoik tiiem: kah piang khlawp simaox ra: khlawp, mai tawx an: kah aux.
Pwi Khankix Lhat Graung Kah Siyiex.
Mai yam mhong: pex lox pa kaoh khaing: sigreung pa faik, yam gleeing ngu kah gawng, hoek kah dex aux, pa mawh cao: kaing: doeh simie ceucat pex, mai kuad song: nong: yu khawm: uik;
mai pex ah nin:,jhak heue, Simiang Siyiex ex hoik jhi: min: plakngai: mai pa ting pa lhaong: Tix kah ex, mai ex hoik mhong: lox Nawh Cao: khaing: daux sigreung ngu, kah daux in: sigaix ex hoik yaox pwi sikah Siyiex tau kawn: im: ju.
Yamin: ex lai sang yum: yuh kah mawx lie? Mawh kheu ngu pa ting pa lhaong: in: tag gleeing kah ex; phan: ex baox mhong: kah lox Simiang Siyiex ex tag yum:.
Mawh kheu kawn: pwi khankix, pa mhong: kah lox sikah Siyiex pa im: ju, khaing: sigreung ngu, awm: mhong: ex mai im: ju lie?
Maix tag hu: dex mai nghiiet lox krai Simiang Siyiex ex khawm: uik, mai deeh viex gumlox pa krai Simiang Siyiex kah maix khawm: uik, mai krai ex mhong:, mai ex tag nghiiet mai hawt tix yuh
"Mai Simiang Siyiex hoik mhong: lox pex, yam sikah pex kah aux, mai Simiang Siyiex ah nin: kah aux, Aux hoik mhong: kah lox sikah pwi in: khankix kah maix, lox pa krai kix khawm: uik mawh pa khaw:.
Mai kieh kix koe: rhawmrhi: ceu an: tix kah daux kix, sonsang lhat graung kah Aux mai priex tix hawt gumlox pingnyap Aux khankix jheengjheeng:, sonsang pon kix mai khawm: kawnpraix kix bwanson: ceu pa mhawm: leeing ju leeing phan: heue.
hu: kah kix, "Deeh kieh kix ing: kah nyiiex gox tix."
Phan: mawh maix cung dex Aux tin:, Aux tag krai lox tawm: pingnyap mai lox lai beenli mai lox tat jhawm: prawng pa sang gau maix kah kix, sonsang hawt yuh kix kah daux haktiex pa tawx Aux kix cie
Mawh kheu nan:, pex tag rien rhawm: tix sonsang hawt yuh pex awm: gumlox pa hoik tawm: Simiang Siyiex kah pex heue. Pex tag ang pon tix veh plak gwiex plak dawm:.
Pex tag lawng daux krax pa hoik tawm: Simiang Siyiex pex kah pex, sonsang im: ju pex, mai pon bwanson: ceu pa mhawm: tau mai lang: ju kah daux haktiex pa sang pon pex tix cie heue.
Lox Tawm: Pingnyap Pa Kied Ting
In: mawh lox tawm: pingnyap, mai lox lai beenli mai lox tat jhawm: prawng pa hoik tawm: Simiang Siyiex pex, sonsang gau aux kah pex, mai sonsang hawt pex tix yuh kah daux haktiex pa tiang pex, tix hu: teei tix cie;
sonsang lhat graung pex kah Simiang Siyiex pex, mai kawnpraix pex kawn: saux kawn: sex pex, tag priex rien kah lox lai beenli mai lox tawm: pingnyap, pa tawm: Aux kah pex, daux singaix yam im: ju maix; sonsang lang: singaix im: ju maix.
O pwi Isarilax khankix nghiiet heue, yuh satix mai hawt yuh ceu an: khankix, mai sonsang hu: mhawm: hoek mhawm: pex tan:, sonsang haok hwan: ting lhaong: pex, awm: hoik yuh Simiang Siyiex, Siyiex keeing: pex sijax mukheu tau mai pex kah haktiex deeh lih rawm:teeih mai rawm: hia:.
"O pwi Isarilax khankix nghiiet heue, Simiang Siyiex, Siyiex ex mawh Siyiex tix kaux khaing:,
maix tag moh kah Simiang Siyiex, Siyiex maix khawm: rhawm: khawm: rhi: tix tau mai khawm: ju tix mai khawm: riang khawm: rao tix khawm: uik.
Mai priex lox tawm: Aux kah daux rhawm: tix daux in: singaix;
maix tag coca: tix gau kah kawnpraix tix, mai maix tag krai yam ngawm maix kah nyiiex tix, yam hu: maix krax laux, mai yam it yam tum maix, mai yam kaoh maix.
Maix tag vien tix deuh lox ankix awm: mhai: sakse pa koe: kah piang taix maix, mai ankix tag mawh pa awm: mhai: tiiem: tix deuh kah piang dong: re: tix.
Maix tag tiiem: tix deuh ankix kah piang pang: siviex nyiiex tix, mai kah piang siviex veng khankix.
Tawx Satix Kah Pa Ang Cu Ang Nghiiet
"Yam viex Simiang Siyiex pex, pex laig kah daux haktiex pa hoik tiextu Nawh Cao: kah keeing: pex Abraham, Icak mai Yakop, sonsang tawx Nawh Cao: veng pa ting mai pa mhawm: grang pa ang maix yaox tix sum:,
mai nyiiex ma: pa naog kraung mhawm: khankix, pa mawh pa ang pex tie khrawm:, mai rawm: maw: pa ang pex kaong:, sipeem plix siiet mai khaox sanlun, pa ang maix sum:, mai maix hoik yaox tix ih tom: sak,
yuh satix maix son ang maix piawm kah Simiang Siyiex, pa hoik viex maix lih khaing: meung Ejiptux, kah dee yuh maix siliex.
Lhat graung kah Simiang Siyiex tix; maix tag yuh kaing jhaw: Nawh, mai tiextu tix kah ceukaux Nawh.
Maix paw hawt khaix siyiex tang: kaux, pa mawh siyiex pwi pa ot vungviang maix;
mawh kheu Simiang Siyiex maix, pa ot sinax pex mawh Siyiex pa bak pa viang; mai lhat krax song rhawm: Siyiex maix lih kah piang maix, mai yuh maix lauxleeing: kah piang haktiex.
"Ang pon tix cheukcheu: kah Simiang Siyiex tix, awm: hoik cheukcheu: maix kah Nawh Cao: kah daux Masa.
Pex tag coca: tix priex kah lox tawm: pingnyap Simiang Siyiex, Siyiex pex, mai mhai: sakse Nawh Cao:, mai lox lai beenli pa hoik tawm: Nawh kah pex.
Pex tag yuh pa khaw: mai pa mhawm:, kah plak sivoe ngai: Simiang Siyiex, sonsang hu: mhawm: hoek mhawm: pex, sonsang pon pex tix laig mai teei tix cie haktiex pa mhawm:, pa hoik tiextu Simiang Siyiex tix tawx kah keeing: pex,
mai grheu: pwi koeng pex khankix khaing: sivoe ngai: pex, awm: pa hoik yuh Simiang Siyiex mukheu.
Bawg yam pa sang hoek kawnpraix pex tag chawk kah pex ah nin:, dee bleeh lox kham: mhai: sakse mai lox lai beenli lox tat jhawm: prawng pa hoik tawm: Simiang Siyiex ex kah pex mawh tix?:
Maix tag ah nin: kah kawn: simex tix,ex hoik mawh siliex Pharaw kah meung Ejiptux, mai Simiang Siyiex hoik viex ex lih khaing: meung Ejiptux tau mai plawng: taix pa ting riang Tix;
Simiang Siyiex hoik jhi: mhai: sakse pa daox pa am: kah plak sivoe ngai: ex, kah daux pa ting pa lhaong: mai krax pa lang: teung: kah meung Ejiptux, mai kah Pharaw mai kah pwi nyiiex pwi ma: nawh khankix;
mai Nawh Cao: viex ex lih khaing: tan:, sonsang vie Nawh ex laig kah daux mai tawx haktiex pa hoik tiextu Nawh kah keeing: ex khankix.
Simiang Siyiex hoik tawm: lox sonsang hawt ex kah lox lai beenli, mai lhat graung kah Simiang Siyiex, Siyiex ex, sonsang mhawm: ex jheengjheeng:, sonsang priex rhawm: Nawh ex im: ju, awm: pa yaox ex daux in: singaix.
Phan: ex yuh satix mai hawt yuh awm: lox tawm: pingnyap kah plak sivoe Simiang Siyiex, Siyiex ex, awm: pa hoik tawm: Nawh Cao: kah ex, an: tag mawh pa rauh pa see kah ex
Pa Hoik Laug Kah Pwi Tix Tix Cub
Yam viex Simiang Siyiex pex laig kah haktiex pa sang teei pex tix cie, mai grheu: ceu pwi kah plak sivoe pex pa mawh ceu pwi Hitix, ceu pwi Giragashi, ceu pwi Amawrix, ceu pwi Khanan, ceu pwi Pharazi, ceu pwi Hiwix, ceu pwi Yebusix, ceu pwi aliah cub khankix, pwi ting riang mai pa haoh hun: khaing: pex, kah plak sivoe pex,
yam ap Simiang Siyiex, kix kah daux taix pex, pex tag tap toi: kix; mai yuh kix laux lak pak leeing:; maix tag ang pon yuh sijax mukheu mai kix, mai ang pon yuh krax caoxrhawm: kah kix.
Maix tag ang pon mawh nyiiex ma: mai kix, mai ang pon tawx kawn: bun: tix kah kawn: simex kix, mai ang pon teei kawn: bun: kix son kawn: simex tix.
Kix tag deeh kieh kawn: simex pex khankix veeh tix singai khaing: pa hawt kix khaix Aux, sonsang yuh kaing jhaw: siyiex tang: kaux khankix; mai Simiang Siyiex songrhawm: kah pex, mai Nawh Cao: tag yuh pex lauxleeing: dom: mawx dom: an:.
Mai maix tag yuh nin: kah kix, maix tag yieh khu: dee tan kix, mai raig tix tik rong: simaox singax kix, mai tat tix tik rieng rao khaox Asharax kix, mai gleeing rieng rao pa hoik saik kix khankix kah ngu.
Mawh kheu maix mawh pwi pa singax singeh, son Simiang Siyiex, Siyiex pex, Simiang Siyiex, Siyiex pex, hoik laug pex, mawh pwi cie Nawh Cao:, khaing: ceu pwi kah piang haktiex.
Simiang Siyiex moh pex mai laug kah pex, mawh kheu haoh hun: pex khaing: pwi tang: ceu ang lai mawh, kheu pex hoik mawh pa kied tux, khaing: ceu pwi khawm: uik.
Mawh kheu Simiang Siyiex moh kah pex, mai Nawh Cao: priex rien lox tiextu, pa tiextu Nawh kah keeing: pex khankix, mai Siyiex hoik viex pex lih kah plawng: taix pa ting riang, mai taoh lawd pex khaing: dee yuh siliex, kah daux tawm: taix Pharaw khunhawkham meung Ejiptux.
Mawh kheu nan:, kieh pex tawng kah Simiang Siyiex, Siyiex pex mawh Siyiex pa kaux sijax, mai pa priex sijax mukheu mai krax moh krax rhawm: tau mai pwi pa moh kah Nawh Cao:, mai kah pwi pa priex rien pingnyap Nawh Cao: tom: hoek ju pwi kaing: rheng:,
mai pawk bix kah pwi pa koeng kah Nawh Cao: kah plak sivoe ngai: kix, mai yuh kix lauxleeing:, Nawh tag ang yawg tix kah pwi pa koeng kah Nawh Cao:, Nawh tag pawk bix kah nawh, kah plak sivoe ngai: nawh.
Maix tag priex rien mai hawt yuh lox tawm: pingnyap, mai lox lai beenli mai lox tat jhawm: prawng pa tawm: Aux kah pex, daux in: singaix.
Pa Pon Bwanson: Khaing: Pa Cu Pa Nghiiet
"Mai mawh kheu jao nghiiet maix lox tat jhawm: prawng in: khankix, mai priex rien mai hawt yuh kah an:, Simiang Siyiex, Siyiex pex tag yuh sijax mukheu mai krax moh krax rhawm: tix kah pex, kah pa hoik tiextu Nawh kah keeing: pex khankix;
Nawh Cao: tag moh pex, nawb bwan: kah pex, mai kieh pex haoh hun:, Nawh Cao: tag nawb bwan: kah doeh simie ceucat pex, mai plix kah daux haktiex pex, simie nghox pex, mai rawm: plix siiet pex, mai bee pex, mai kieh kawn: moi, kawn: yung: kawn: pex pex baox pre, kah daux haktiex pa tiextu Nawh Cao: tix tawx kah keeing: pex khankix.
pex tag pon bwanson: kah sinax ceu pwi khawm: uik; simex bun: tag ang koe: pwi neh daux sinax pex, mai kah daux sinax khawng: brie pex.
Simiang Siyiex tag teei tix tik jhawm: saux khaing: pex; mai jhawm: saux pa kied lang: teung:, pa hoik tawng pex, kah daux meung Ejiptux, tag ang kieh hoek kah piang pex, tag kieh hoek kah piang pwi pa koeng kah pex khankix.
Pex tag yuh pwi pa ap Simiang Siyiex kah pex lauxleeing:; ngai: pex tag ang pon caoxrhawm: kah kix; pex tag ang pon yuh kaing jhaw: siyiex kix, mawh kheu an: tag mawh kie kah son pex.
"Phan: pex keud kah daux rhawm: tix ah nin:,ceu pwi in: khankix, nie lheu: ting riang khaing: aux, aux sang pon grheu: kix to: yuh kah mawx?:
pex paw lhat kah kix, viang mawh kawx nan:, pex tag doh keud kah pa hoik yuh Simiang Siyiex, Siyiex pex kah Pharaw mai kah meung Ejiptux khawm: uik,
krax cheukcheu: pa ting, pa hoik yaox pex kah ngai: tix, mhai: sakse pa daox pa am:, mai taix pa ting riang, mai plawng: taix pa hoik nih tix, pa hoik viex Simiang Siyiex, Siyiex pex lih; Simiang Siyiex, Siyiex pex tag yuh awm: an: kah pwi pa lhat graung pex kah.
Lheu: khaing: an: Simiang Siyiex, Siyiex pex tag ploi: phung: awng: sinax kix, tom: sidauh lauxleeing: pwi pa kawn deuk mai kah pwi pa mox tix kah plak sivoe ngai: pex.
Paw pex yaoh yee: kah kix, mawh kheu Simiang Siyiex, Siyiex pa ot sinax pex mawh Siyiex pa ting sibrawm mai pa lhat graung pwi kah.
Simiang Siyiex, Siyiex pex tag grheu: ceu pwi khankix sivoe ngai: pex tix bawg ceeix ceeix; pex tag ang pon yuh kix lauxleeing: tix dom: neh, lhat totiag pa koe: daux tiag khankix, nie pre haoh hun: khaing: pex.
Viang mawh kawx nan:, Simiang Siyiex, Siyiex pex, tag ap kix kah pex, mai kieh kix som: nai tom: sidauh hoek kix krax laux krax leeing:.
Mai Nawh Cao: tag ap khunhawkham kix kah daux tawm: taix pex, pex tag yuh ceukaux kix laux khaing: greem: raoma:, pwi tix kaux kawx, tag ang pon cung pon tieb kah pex tom: sidauh yuh pex kix lauxleeing:.
Pex tag gleeing siyiex rieng rao pa saik kix kah ngu; pex paw ghoing: kah mau khri: pa koe: kah piang an:, mai paw teei son tix, lhat pex krix kah kie an:; mawh kheu an: mawh pa seeing: Simiang Siyiex, Siyiex pex kah.
Paw pex viex pa seeing: pa brai: laig kah daux nyiiex tix, lhat pex awm: kah kraung pa jhax pa lawg an:; kieh pex seeing: mai koeng kah an: kix; an: mawh ceu pa jhax lawg kah heue.
Doh Keud Kah Simiang Siyiex, Siyiex Pex
"Lox tawm: pingnyap pa tawm: aux kah pex kah daux in: singaix, pex tag priex mai hawt tix yuh sonsang im: ju mai nie pre haoh hun: pex, mai laig kah daux, sonsang teei tix cie haktiex pa tiextu Simiang Siyiex kah keeing: pex
Doh keud kah pa hoik thong: Simiang Siyiex pex, kah krax hu: pex kah daux tiag tipon: num, sonsang kieh Nawh Cao: koe: rhawm: awn: rhawm: tiiem, mai cheuk cheu rhawm: pex mawh pa yuh kah mawx, mai sonsang tawng kah priex rien pex kah lox tawm: pingnyap mai ang priex rien kah.
Nawh Cao: kieh pex koe: rhawm: awn: rhawm: tiiem mai ploi: pex cairhawm: mai tawx pex ih kah Mannax, pa ang pex sax tawng, mai pa ang keeing: pex sax tawng; mai sonsang kieh Nawh Cao: pex tawng kah ang pwi im: kah khaomun nongnong:, viang mawh nan: im: kheu lox pa lih khaing: jheeh Simiang Siyiex.
Kah daux tipon: num an:, kraung ceep pex ang sax prim: sax griah mai caong pex kawx ang sax saux sax uah.
Deuh pex tawng an: khankix kah daux rhawm: tix, awm: sidiex gau keeing: kah kawn: simex tix, Simiang Siyiex, Siyiex pex kawx sidiex gaux kah pex.
Mawh kheu nan:, pex tag priex rien kah lox tawm: pingnyap Simiang Siyiex, Siyiex pex, mai hawt daux krax Nawh mai lhat graung kah Nawh Cao:.
Mawh kheu Simiang Siyiex, Siyiex pex viex pex laig kah daux haktiex pa mhawm:, dee koe: rawm: klawng:, rawm: keut, rawm: maw:, pa lih khaing: daux ngawd, mai khaing: daux gawng khankix,
haktiex pa koe: nghox ca, koi:, nhu: plix siiet, khaoxruh, plix mak cang, khaox sanlun mai rawm: hia: khankix,
mawh haktiex pa sang yaox maix tix ih khaonum mai pa ang koe: ceu pa cud cha:, pa grum naog, mai haktiex simaox pa mhawm: rhiem:, pex tag yaox tix kaong: tawng khaing: gawng khankix.
pex tag yaox tix ih mai sak, mai pex tag yaogyaw bwanson: Simiang Siyiex, Siyiex pex, son haktiex mhawm: pa hoik tawx Nawh kah pex.
Yuh satix pex son ang pex piawm: kah Simiang Siyiex, Siyiex pex, kah daux pa ang tix priex rien lox tawm: pingnyap, lox tat jhawm: prawng, mai lox lai beenli pa tawm: Aux kah pex daux in: singaix.
lhat kah yam hoik ih pex, mai hoik sak, mai yam sum: pex kah nyiiex mhawm: khankix,
mai yam deeh pre haoh hun: cub khawng: brie pex, mai cub yung: pex, mai yam deeh haoh hun: mau khri: pex mai can ceu pa koe: pex khankix,
mai rhawmrhi: pex tag yaw rangdi kah kix, pex tag piawm: kah Simiang Siyiex, Siyiex pex, pa viex pex lih khaing: meung Ejiptux, khaing: dee mawh pex siliex,
kaw pa hoik thong: hu: kah daux tiag pa ting, dee lhat graung, kah dee koe: siuing: ngu mai tamtim: khankix, mai haktiex dee kroh ang rawm: koe: kawx pa hoik kieh rawm: lih khaing: daux rang: kiien: son pex,
Kaw pa hoik tawx pex ih mannax kah daux tiag, pa ang keeing: pex nyang sax tawng, sonsang kieh Nawh pex koe: rhawm: awn: rhawm: tiiem, mai cheuk kah pex, mai sonsang yuh pa mhawm: kah pex daux pa ghoik,
lhat pex keud ah nin: kah daux rhawm: tix,aux hoik magmi, kheu siawpsibrawm mai riang rao plawng: taix tix,
kieh pex doh keud kah Simiang Siyiex, Siyiex pex, mawh kheu Nawh mawh pa tawx siawpsibrawm riang rao krax magmi kah pex; sonsang kaux cong: sijax mukheu pa tiextu Nawh kah keeing: pex khankix, awm: pa koe: daux in: singaix.
Phan: maix piawm: kah Simiang Siyiex maix mai phan: maix hawt grawng: lawng khaix siyiex tang: kaux tang: hak, mai yuh kaing jhaw: kix mai krub kah kix, aux tag kham: mhai: sakse kah son maix, kah daux in: singaix, mai maix tag lauxleeing: tete.
Awm: ceu pwi pa hoik yuh Simiang Siyiex kix lauxleeing: kah plak sivoe maix khankix, mawh kheu ang kix cu nghiiet kah lox Simiang Siyiex, maix kawx tag lauxleeing: awm: an: heue.
Plak Jhi: Grawng: Tieh Feen Pwi Isarilax
Ceu pwi Isarilax khankix eue, nghiiet heue, pex tag tiang toi: rawm: klawng: Yawdan daux in: singaix, mai laig sonsang grheu: kah ceu pwi pa nie lheu: ting, mai pa nie lheu: ting riang khaing: pex, pon kah veng pa ting mai veng pa kaux pa cong: pa lhaong: tom: cux raoma:,
pwi pa ting lhaong: kaux hak, pa mawh doeh simie ceucat Anakax, awm: pa tawng maix khankix, mai pa hoik mhong: maix ah pwi nin:. "Mawh pwi mawx pa pon cung kah plak sivoe doeh simie ceucat pwi Anakax?"
Mawh kheu nan:, een: tix tawng kah daux in: singaix, Simiang Siyiex maix, tag hu: kah sivoe maix, awm: ngu pa gleeing. Nawh Cao: yuh kix lauxleeing: mai grheu: kix kah plak sivoe maix. Mawh kheu nan: maix tag grheu: kix lih mai nied tix yuh kix lauxleeing:, awm: lox pa hoik tawm: Simiang Siyiex kah maix.
khaix hoik grheu: Simiang Siyiex kix khaing: plak sivoe maix, paw doh keud tix ah nin: daux rhawm: tix, "Mawh kheu koe: pa rauh pa see aux, Simiang Siyiex hoik viex aux laig, sonsang pon aux tix cie haktiex in:, mawh kheu jao krax pa caox pa caig ceu pwi inkix, Simiang Siyiex tom: grheu: kix lih khaing: plak sivoe maix.
Ankix ang lai mawh, kheu pa rauh pa see maix, mai krax pa rauh rhawm: maix, sonsang laig teei maix tix cie haktiex kix. Mawh kheu jao pa caox pa caig ceu pwi inkix, Simiang Siyiex tom: grheu: kix lih khaing: plak sivoe maix, mai sonsang kieh Nawh Cao: lox sijax mukheu Tix grum naog kah pa hoik tiextu Nawh kah keeing: maix Abraham, Icak mai Yakop.
Mawh kheu nan:, een: tix tawng, Simiang Siyiex tawx haktiex mhawm: in: kah maix, sonsang pon maix tix cie ang mawh kheu rah see maix, Mawh kheu mawh maix ceu pwi pa kiien: ngawg.
Doh keud doh sawn: mai paw piawm: kah grawng: pa hoik kieh maix Simiang Siyiex songrhawm: kah daux tiag, jah kah singaix lih maix khaing: daux meung Ejiptux, tom: hoek kah dee in:, maix hoik mawh pa tieh feen kah Siyiex.
Maix baox kieh Simiang Siyiex songrhawm: kah daux haktiex Hawrax; Simiang Siyiex songrhawm: kah maix, sang yuh maix lauxleeing:.
Yam haok aux kah piang gawng, sonsang rieb aux tix teei khlawp simaox, pa mawh khlawp simaox gumlox sijax mukheu pa hoik yuh Simiang Siyiex tau mai pex, yam an: aux ot kah piang gawng tipon: ngaix tipon: sawm:, aux ang ih khaomun mai ang nyaux rawm:.
Simiang Siyiex ap khlawp simaox ra: khlawp kah aux, pa hoik tiiem: kah giien: taix Tix, mai kah piang an: hoik mawh gumlox pa sikah Simiang Siyiex kah pex, kah piang gawng khaing: sigreung ngu, singaix khrawm: pex paox tix.
Khaix hoik luan tipon: singaix tipon: sawm:, Simiang Siyiex ap khlawp simaox an: ra: khlawp kah aux, pa mawh khlawp simaox lox sijax mukheu.
Simiang Siyiex ah nin: kah aux,kaoh mai nied lih khaing: tin:. Grawhgrawng: nawh pwi pa viex maix lih khaing: meung Ejiptux khankix hoik yuh pa laux pa leeing:. Kix nied tix veeh tix khaing: daux pa tawm: Aux kah kix, kix hoik yuh rieng rao pa raug son tix
"Simiang Siyiex baox ah nin: kah aux,Aux hoik yaox kah ceu pwi in: khankix, mawh ceu pwi pa kiien: ngawg.
grham: Aux sonsang yuh Aux kix lauxleeing:, mai preet ceukau kix khaing: greem: raoma:, Aux tag kieh maix mawh ceu pwi pa nie lheu: ting riang ting rao, mai pa nie lheu: ting khaing: kix
Mawh kheu nan: Aux deeh veeh tix lih hu: khaing: piang gawng mai gawng hoik gleeing kah ngu, khlawp simaox gumlox sijax mukheu an: ra: khlawp hoik koe: kah daux tawm: taix aux,
yam jhak aux tix yaox, pex hoik phit hoik lud kah Simiang Siyiex pex, mai raug kah rieng rao kawn: moi, pex nied tix veeh khaing: pa hoik tawm: Simiang Siyiex.
Aux taing tix tik khlawp simaox an: ra: khlawp khaing: daux tawm: taix tix khawm: ra: khawn:, mai hoik max kah plak sivoe ngai: pex.
Aux deeh gup tix kah plak sivoe Simiang Siyiex awm: phao voe tipon: singaix tipon: sawm:, Aux ang ih khaomun mai ang nyaux rawm: kheu jao phimap pex khawm: uik, kah pa hoik phit lud pex kah daux pa yuh tix pa caox pa caig kah plak sivoe ngai: Simiang Siyiex, sonsang songrhawm: Nawh Cao:.
Mawh kheu aux lhat graung kah pa kied kin: songrhawm: Simiang Siyiex kah piang pex, mai pa sang yuh Nawh pex lauxleeing:; viang mawh nan:, kah daux bawg yam an:, Simiang Siyiex hoik baox deeh nghiiet kah lox aux,
Simiang Siyiex hoik kied songrhawm: kah Arun mai dex sang yuh nawh lauxleeing:, mawh kheu nan:, aux baox deeh rawg bwan:, son Arun kah daux bawg yam an:.
Aux teei rieng kawn: moi pa hoik raug pex pa hoik kieh pex phit lud mai gleeing kah daux ngu, mai krid tom: phawng, mai aux tik phawng: an: kah daux rawm: klawng: pa lih khaing: piang gawng.
"Pex hoik kieh Simiang Siyiex songrhawm: hawt baoh Taberax, baoh Masa, mai baoh Kibarot Hatava khankix.
Yam ploi: Simiang Siyiex pex lih khaing: haktiex Kadesha bana Nawh ah nin:,haok mai teei tix cie haktiex pa hoik tawx aux kah pex Yam an: pex deeh tieh feen kah lox pingnyap Simiang Siyiex mai ang yumrhawm: kah Nawh Cao: mai ang cu nghiiet kah lox Nawh Cao:.
Pex hoik tieh feen kah Simiang Siyiex jah khaing: daux singaix hoik tawng aux pex.
"Mawh kheu nan:, aux baox deeh gup tix kah plak sivoe Simiang Siyiex tipon: singaix tipon: sawm:, kheu hoik ah Simiang Siyiex tix sang yuh pex lauxleeing:.
Mawh kheu nan:, aux rawg bwan: kah Simiang Siyiex ah nin:,cao: Simiang Siyiex eue, paw yuh pwi maix khankix, lauxleeing: liak. kix mawh sinngao Maix Cao: pa hoik deeh taoh Maix Cao: kah krax pa ting riang ting rao Tix, mai pa hoik viex Maix Cao: kix lih khaing: daux meung Ejiptux kah plawng: taix pa ting riang Maix.
Doh keud doh sawn: kah kawncau maix Abraham, Icak, mai Yakop liak, paw nyang keud kah pa kiien: rhawm: kix, mai pa caox pa caig kix mai phimap kix.
Phan: ang mawh nan:, pwi haktiex pa viex Maix Cao: yix lih khaing: kah daux, tag sang ah nin:, "Mawh kheu ang Simiang Siyiex pon viex kix hu: kah daux haktiex pa hoik deuh Nawh Cao: lox sijax mukheu Tix kah kix, mawh kheu koeng Nawh Cao: kah kix, Nawh Cao: hoik viex kix lih sonsang pah kix kah daux tiag."
Mawh kheu kix mawh pwi Maix Cao:, mai mawh sinngao Maix Cao:, pa hoik viex Maix lih hu: kah siawpsibrawm pa ting riang ting rao Maix Cao: mai kah plawng: taix pa hoik nih Maix Cao: heue
Grawng: Pa Teei Khlawp Simaox Bawg Ra:
"Yam an: Simiang Siyiex ah nin: kah aux,saik khlawp simaox pa awm: phao voe ra: khlawp mai haok kah Aux kah piang gawng mai yuh teug khaox tix mu:.
Mai Aux tag sang deeh tiiem: gumlox pa hoik koe: kah piang khlawp simaox awm: bawg voe pa hoik kieh maix max, maix tag deuh khlawp simaox in: kah daux teuk
Mawh kheu nan:, aux tom: yuh teug kah khaox Akasha mai saik khlawp simaox ra: khlawp awm: phao voe, mai haok kah piang gawng tau mai khlawp simaox an: ra: khlawp daux taix tix.
Nawh Cao: tiiem: gumlox pingnyap kao: gum piang khlawp simaox an: awm: phao kah:, pa mawh lox sikah Simiang Siyiex kah pex kah piang gawng khaing: daux sigreung ngu, singaix khrawm: pex paox tix, Simiang Siyiex deeh tawx kah aux.
Khaix an: aux deeh lih khaing: gawng mai deuh khlawp simaox an:, kah daux teug pa hoik yuh aux, yamin: hoik koe: kah daux teug tan:, awm: gumlox pa hoik tawm: Simiang Siyiex kah aux.
(Pwi Isarilax khankix lih hu: khaing: rawm: maw: Beneyakan mai hoek kah haktiex Moserax. Arun hoik yum: mai kix sipaung: nawh tan:, mai kawn: simex nawh Eliza dee plud tix yuh kaing jhaw: cao: giex kaing: li tang: nawh.
Jah khaing: tankix lih hu: kah haktiex Gugodax mai kix deeh lih khaing: Gugodax mai hoek kah Yobatax haktiex koe: rawm: klawng: tix dauh.
Yam an: Simiang Siyiex tang: gwieh pwi Lewix, tawx beeh glawm: kieh klawm: teug bwan: sijax mukheu Simiang Siyiex, sonsang cung kix kah plak sivoe Simiang Siyiex, mai yuh kaing jhaw: son Nawh Cao:, mai sonsang nawb kix bwan: kah daux min: ceukaux Nawh Cao: tom: hoek in: singaix.
Mawh kheu nan:, pwi Lewix tag ang koe: nyum: cie, mai ang koe: sinngao tau mai puxaik nawh khankix, Simiang Siyiex mawh sinngao nawh, awm: hoik yuh Simiang Siyex maix sijax mukheu Tix kah nawh.)
"Aux ot kah piang gawng tipon: singaix tipon: sawm: awm: bawg phao kah:, yam an: Simiang Siyiex deeh baox nghiiet kah lox aux mai ang lai yuh pex lauxleeing:.
Simiang Siyiex ah nin: kah aux,kaoh thong: krax mai hu: sivoe pwi khankix, sonsang pon laig kix mai teei tix cie haktiex pa hoik tiextu Aux kah keeing: kix khankix, mai pa sang tawx Aux kah kix
Num: Miex Gumlox Beenli
"Pwi Isarilax khankix eue, yamin: pa mhaing: Simiang Siyiex pex yuh mawh ceu patix lie? ceu an: khankix mawh pa lhat graung pex kah Simiang Siyiex pex, mai sonsang hawt pex tix hu: kah daux krax Nawh Cao: khankix, mai sonsang moh pex kah Nawh Cao:, mai sonsang yuh pex kaing jhaw: Nawh, khawm: rhawm: khawm: rhi: tix mai khawm: ju tix khawm: uik.
Mai sonsang priex pex tix hawt gumlox pingnyap Nawh, mai gumlox beenli pa deuh Nawh Cao: khankix, awm: pa hoik tawm: aux kah pex in: singaix, sonsang pon pex bwanson: ceu pa mhawm:.
Meung raoma: mai kah piang raoma: pa kied lhaong: mawh cie Simiang Siyiex pex, haktiex in: mai khawm: pa koe: kah piang haktiex khawm: uik kawx mawh cie Nawh Cao:.
Simiang Siyiex khawrhawm: khawrhi: kah keeing: maix, mai kied moh kah kix, Nawh Cao: hoik laug tix teei doeh simie ceucat kix khaing: sinax ceu pwi khankix awm: pa koe: kah daux in: singaix.
Mawh kheu nan:, pat hak rhawmrhi: pex, mai paw lai baox kieh ngawg pex kiien: khaix in:.
Grawhgrawng: nawh Simiang Siyiex mawh Siyiex piang siyiex khankix, mai Nawh Cao: mawh Simiang piang simiang khankix, mai Nawh Cao: mawh Siyiex pa ting pa lhaong: mai pa ting riang rao mai pa khaw: tix lhat graung kah, mai pa ang jhak pakngai: pwi, mai pa ang teei kah khawngphak chun: praok khankix.
Nawh Cao: priex rien mai prawng ca: son miexmai: kawn: doe: kah daux pa rauh pa see, mai Nawh Cao: moh kah nyo sinie, mai tawx pa ih pa un: khawm: kraung ceep kah nawh.
Mawh kheu nan:, moh kah nyo sinie, pex kawx hoik mawh nyo sinie kah daux meung Ejiptux.
Maix tag koe: krax lhat krax graung kah Simiang Siyiex maix, mai yuh kaing jhaw: Nawh Cao:, mai maix tag kleuk tix mai Nawh Cao:, mai yuh krax tiextu kah daux ceukaux Nawh Cao:.
Nawh Cao: mawh krax pa yaogyaw maix, mai Nawh Cao: mawh Siyiex maix pa hoik yuh ceu pa ting pa lhaong:, mai ceu pa lhat grawng: an: khankix mawh pa hoik yaox maix kah ngai: tix.
Keeing: maix khankix lih hu: kah daux meung Ejiptux pwi atigliah kaux, mai yamin: Simiang Siyiex maix, hoik deeh yuh maix koe: awm: simuing: raoma: khankix kah daux pa nie pre haoh hun: heue.
Grawng: Pon Khawngphak Son Krax Moh
"Maix tag moh kah Simiang Siyiex tix, mai priex tix hawt gumlox tawm: Nawh mai lox lai beenli pa deuh Nawh Cao:, mai lox tat jhawm: prawng Nawh Cao: mai lox pingnyap Nawh Cao: khankix jheengjheeng:.
Priex tix tawng kah daux in: singaix, aux ang krai kawnpraix maix khankix pa ang nyang sax koe: krax tawng krax yung mai pa ang nyang sax yaox kah krax sidiex gau Simiang Siyiex maix khankix, mai krax pa ting pa lhaong: Nawh Cao:, mai plawng: taix pa hoik nih Nawh Cao: lih;
Mai mhai: sakse pa daox pa am: pa hoik yuh Nawh Cao: kah daux sigreung meung Ejiptux kah simiang Pharaw, pa mawh simiang meung Ejiptux, mai kah piang haktiex nawh khawm: uik;
Mai ceu pa hoik yuh Nawh Cao: kah kru naing meung Ejiptux khawm: brung kix, mai ling: brung kix, mai grawng: pa yuh Nawh Cao: rawm: sigrit sigra: raoh kheem: kix, yam hawt pheet kix khaix pex, mai pa hoik yuh Simiang Siyiex kix lauxleeing: tom: hoek kah daux in: singaix.
Mai grawng: pa hoik yuh Nawh Cao: son pex kah daux tiag, tom: sidauh hoek pex kah dee in:;
grawng: pa hoik yuh Nawh Cao: kah Datan mai Abiram kawn: simex Eliabax ceu pwi Rubin khankix, haktiex ang jheeh tix mai bleet kix, khawm: nyiiex khawm: ma: kix, khawm: nyiiex gox kix, mai khawm: kraungkhrai: khawng: brie kix khawm: uik, kah daux sigreung ceu pwi Isarilax khankix,
mai ngai: pex hoik yaox kah grawng: kaing pa ting pa lhaong: Simiang Siyiex, kah pa hoik yuh Nawh Cao: kuceu khawm: uik.
"Mawh kheu nan:, pex tag priex tix hawt gumlox pingnyap khawm: uik pa tawm: aux kah pex kah daux haktiex pa sang laig pex teei tix cie;
Mai sonsang lang: ju singaix im: ju pex kah daux haktiex pa hoik tiextu Simiang Siyiex tix tawx kah keeing: pex, kah son kix, mai kah son doeh simie ceucat kix pa mawh haktiex dee lih rawm:teeih mai rawm: hia: khankix.
Grawhgrawng: nawh haktiex pa sang hu: teei pex tix cie, ang lai awm: haktiex meung Ejiptux, dee hoik kaoh pex, mai kah dee hoik rhuat pex simie, mai dee shiao pex caong tix see: rawm: awm: sipeem taux lhax.
Haktiex pa sang teei pex tix cie, mawh haktiex koe: gawng lua mai daux ngawd daux lung:, pa pon rawm: lhiex,
mai mawh haktiex pa priex rien Simiang Siyiex pex, ngai: Simiang Siyiex, mawh pa kia: ngiien kah piang haktiex an: leeing: lang: num.
"Phan: pex jhawk tix nghiiet kah lox pingnyap pa tawm: aux kah pex daux in: singaix, moh kah Simiang Siyiex pex, mai yuh kaing jhaw: Nawh Cao: khawm: rhawm: khawm: rhi: tix mai khawm: ju tix khawm: uik,
Aux tag tawx rawm: lhiex kah haktiex pex, bawg yam mawx bawg yam an:, khawm: rawm: lhiex cao, mai rawm: lhiex lha:, sonsang pon pex tix khrawm: nghox koi:, rawm: plix siiet khraox, mai bee khankix.
Sonsang yaox pex tix ih tom: sak mai son khawng: eei: brie liang pex kawx Aux tag kieh rib kuah kah daux lung: pex khankix.
Yuh satix pex phan: ang mawh nan:, rhawmrhi: pex tag hawt khaix pa pie pa lhen: mai deeh veeh tix yuh kaing jhaw: siyiex tang: kaux tang: hak khankix, mai krub kah an: kix.
Phan: ang mawh nan:, krax songrhawm: Simiang Siyiex tag lih kah piang pex, mai Nawh Cao: tag nyeep raoma:, son ang lhiex lai lih, mai haktiex tag ang lai chix plix plix, mai pex tag grai: grup khaing: haktiex pa mhawm:, pa tawx Simiang Siyiex kah pex.
"Mawh kheu nan:, pex tag priex gumlox inkix pa hoik krai aux kah daux rhawm: pex, mai vien tix deuh awm: mhai: sakse kah piang taix pex, mai kah piang dong: re: pex.
Pex tag sidiex gau kawnpraix pex kah gumlox an:, mai krai grawng: an: kix yam ngawm pex kah daux nyiiex daux ma: mai yam lawng pex krax, mai yam it yam tum mai yam kaoh pex.
Mai maix tag tiiem: tix deuh kah piang pang: siviex nyiiex pex, mai kah piang siviex veng,
Mai sonsang baox nie lang: ju pex, mai kawnpraix pex khankix, sonsang baox nie pre haoh hun: pex, kah daux haktiex pa hoik tiextu Simiang Siyiex tix tawx kah keeing: pex khankix, awm: rheung: lang: singai raoma: kah piang haktiex kawx awm: an:.
Phan: pex yuh satix mai priex tix hawt kah gumlox pingnyap pa tawm: aux kah pex khawm: uik, moh kah Simiang Siyiex pex mai hawt grawng: lawng khaix Nawh Cao:, mai een: rhawm: kah Nawh Cao: tom: kaux tom: cong:,
Simiang Siyiex tag grheu: ceu pwi in: khankix lih kah plak sivoe pex. Mai pex tag pon tix cie haktiex ceu pwi pa nie lheu: ting lhaong:, mai pa nie lheu: ting riang rao khaing: pex.
Kah dee hoik dig pex kah caong tix kudauh tag mawh cie pex, jah khaing: daux tiag tom: hoek kah gawng Lebanon, mai jah kah rawm: Yufrethix tom: hoek kah plak klip singaix rawm: sigrit sigra: tag mawh dee kwang: pex.
Pwi tix kaux kawx tag ang pon tix cung kah plak sivoe ngai: pex, Simiang Siyiex tag kieh pwi lhat graung kah pex, mai kah piang haktiex dee hoik dig pex khankix, awm: lox pa hoik ah Nawh Cao: kah pex.
"Jhak heue, Aux deuh krax nawb bwanson: mai krax pa jhax lawg kah plak sivoe pex daux in: singaix,
phan: pex cu nghiiet kah lox pingnyap Simiang Siyiex pex, kah pa tawm: aux kah daux in: singaix, pex tag pon krax nawb bwan:.
Phan: pex ang cu nghiiet kah lox pingnyap Simiang Siyiex, mai phan: veeh tix khaing: daux krax pa hoik tawm: aux kah pex, daux in: singaix, mai hawt khaix siyiex tang: kaux tang: hak khankix, pa ang pex nyang sax tawng sax yung pex tag pon krax pa jhax pa lawg.
Yam hoik viex Simiang Siyiex pex laig kah daux haktiex pa sang hu: teei pex tix cie, mai pex tag deuh krax pa nawb bwan: kah piang gawng Gerizim, mai jhax lawg kah piang gawng Ebalax.
Grawng: an: kieh koe: kah toi: rawm: klawng: Yawdan, kah plak glip singaix, kah daux haktiex ceu pwi Khanan, pa koe: daux lung: plak toi: veng Gilagalax, hawt dex tiag khaox Piakvan More khankix ang mawh lie?
Pex tag sang tiang kah plak toi: rawm: klawng: Yawdan, mai laig kah daux haktiex pa sang teei pex tix cie, kah dee pa tawx Simiang Siyiex kah son pex, mai ot kah daux haktiex an:.
Pex tag priex tix hawt yuh awm: lox lai beenli pa deuh aux khankix, mai lox tat jhawm: prawng pa deuh aux kah plak sivoe pex khankix daux in: singaix heue.
Dah Dee Krub Tix Dah Khaing:
"In: mawh lox lai beenli mai lox tat jhawm: prawng pa sang priex rien pex tix hawt kah daux haktiex pa tawx Simiang Siyiex keeing: pex kah pex glang: singaix yam kawn: im: ju pex kah piang ca: haktiex in:.
Pex tag yieh laux lak pak leeing:, kah dee pa hoik yuh ceu pwi sang grheu: pex an: khankix, kaing jhaw: Siyiex Cao: tix, kah piang gawng lhaong:, kah piang ton: mai pa koe: kah greem: khaox klai ku num:.
Pex tag yieh tix tik khu: dee tan kix lauxleeing: mai raig tix tik rong: simaox kix khankix, mai gleeing khaox rieng rao Asharax kah ngu, pex tag kid rieng rao pa hoik saik mawh rieng siyiex kix khankix, mai yuh ceukaux kix lauxleeing: khaing: dee an:.
Pex tag ang pon tix krub Simiang Siyiex pex, awm: krub kix.
Viang mawh kawx nan:, pex tag sawg tix yaox kah dee pa laug Simiang Siyiex pex khaing: daux doeh simie ceucat pex khankix, sonsang deuh Nawh Cao: ceukaux Tix mai son dee ot dee koe: Nawh Cao: pex tag hu: tan:.
Pex tag teei tix viex krax tan pa gleeing, krax tan pa appong:, mai kao son tix son, mai krax tan pa yaog pa koe: daux tawm: taix pex, mai krax tan pa yuh sija mukheu, mai krax tan ceu pa koe: rhawm: koe: rhi: pex, mai krax tan pa liang pex tix pon khaing: cub yung: cub moi pex khankix.
Mai pex tag ih kah plak sivoe Simiang Siyiex pex tan:, pex mai kawn: nyiiex kawn: ma: pex khankix tag koe: krax gauxrhawm: gauxrhi: kah daux pa hoik yuh pex kah taix tix khawm: uik, pa hoik nawb Simiang Siyiex bwanson: kah pex.
Awm: pa yuh ex tin: daux in: singaix, can ceu pa yuh pwi kukaux, mawh pa khaw: pa caw kah ngai: cao: tix, pex tag ang pon tix yuh nin: khaix in: singaix.
Yamin: pex ang nyang bax hoek kah dee sang laux lee: tix, kah daux haktiex sinngao pa sang tawx Simiang Siyiex kah pex.
Yam tiang pex kah rawm: klawng: Yawdan, mai yam ot pex kah daux haktiex pa sang tawx Simiang Siyiex kah pex, pa mawh sinngao pa sang pon pex, yam tawx Nawh Cao: pex laux lee: tix khaing: pwi koeng pex khankix, pa koe: hawt rawb rim pex khawm: uik. Mawh kheu nan:, pex tag ot kah daux haktiex an: tau mai pa yiien: yawg.
Tag sang koe: dee pa laug Simiang Siyiex pex, sonsang deuh Nawh Cao: ceukaux tix ot tan:. Pex tag viex can ceu pa tawm: aux kah pex hoek tan:, pa mawh krax tan pa gleeing, krax tan pa appong:, mai kao: son tix son, mai krax tan pa yaog, pa koe: daux tawm: taix pex, mai krax tan pa laug pex awm: pa koe: lox sijax tix kah Simiang Siyiex.
Pex tag gauxrhawm: kah plak sivoe Simiang Siyiex, pex mai kawn: simex kawn: bun: pex khankix, mai kawn: ceu simex kawncau bun: pex, mai ceu pwi Lewix khankix pa paung kah pex, pa ang koe: nyum: cie mai pa ang koe: sinngao.
Yuh satix pex, son ang pex sang yuh krax tan pa gleeing kah can dee pa yaox pex kudauh kudee.
Viang mawh nan:, pex tag yuh krax tan pa gleeing kah dauh dee pa laug Simiang Siyiex, khaing: doeh simie ceucat pex, mai pex tag yuh an: khawm: uik awm: pa tawm: aux kah pex.
"Awm: pa nawp Simiang Siyiex bwan:, pex tag pon tix pah, mai ih nex pa koe: kah daux veng pex khankix, kah can ceu pa sang simie rhawm: pex tix ih, pwi pa singax ang ah, pa ang singax ang ah, tag pon tix ih tau, awm: ih kix kah nex cak mai nex kiah.
Viang mawh nan:, tag ang pon tix ih kah nham:, tag hieh kah piang tiex awm: rawm:.
Pex tag ang pon tix ih krax tan pa mawh kao: son tix son khaing: nghox koi: pex, rawm: plix siiet khraox pex, rawm: bee pex, mai khaing: khawng: brie pa liang pex tix pon khaing: cub yung: cub moi pex khankix, mai khaing: krax tan pa yuh sijax mukheu, mai krax tan pex khawm: rhawm: khawm: rhi: tix, mai krax tan pa yaog pa koe: kah daux tawm: taix pex kah veng baoh dee ot pex.
Pex tag pon tix ih an: khakix kah plak sivoe Simiang Siyiex kah dauh dee pa laug Simiang Siyiex, pex mai kawn: simex kawn: bun: pex, mai kawncau simiex kawncau bun: pex, khawm: ceu pwi Lewix pa paung daux veng pex khankix, mai pex tag gauxrhawm: tau kah plak sivoe Simiang Siyiex, kah can ceu pa hoik yuh pex kah taix tix.
Yuh satix pex, son ang pex piawm: kah ceu pwi Lewix khankix, glang: yam kawn: im: ju pex kah haktiex dee ot pex.
"Yam yuh Simiang Siyiex mee: haktiex maix vieh va:, awm: gumlox sijax mukheu pa hoik yuh Nawh Cao: kah maix, mai maix tag ah nin:,aux tag ih nex kheu koe: rhawm: tix sang ih nex, maix tag pon tix ih nex, awm: pa koe: rhawm: maix tix sang ih.
Phan: dauh dee pa laug Simiang Siyiex tix deuh son ceukaux Tix mawh pa singai khaing: dee ot maix, tag pon tix pah khawng: brie eei: maix, mai khaing: cub yung: cub moi pa hoik tawx Simiang Siyiex kah maix, awm: gumlox pa tawm: aux kah maix. Mai maix tag pon tix ih an:, kah daux veng baoh dee ot maix, awm: pa koe: rhawm: maix tix sang ih.
Maix tag pon tix ih nex an:, awm: pa ih tix nex kiah, mai nex cak, pwi pa ang singax mai pwi pa singax khankix tag pon tix ih tau.
Yuh satix maix son ang maix ih nham:, mawh kheu nham: mawh ju, tag ang pon tix ih ju tau mai nex.
Maix tag ang pon tix ih nham:, maix tag hieh nham: kah piang tiex awm: rawm:.
Sonsang pon maix mai kawnpraix maix bwanson: pa mhawm: tau mai kawn: saux maix khankix, yam yuh maix ceu pa khaw: pa caw kah plak sivoe ngai: Simiang Siyiex maix tag ang pon tix ih nham:.
krax tan ceu pa singax pa koe: maix, mai krax tan pa hoik yuh maix sijax mukheu, maix tag viex an: khankix, hu: kah dauh dee pa laug Simiang Siyiex.
Mai maix tag tan krax tan pa gleeing nex khawm: nham:, kah piang khu: dee tan Simiang Siyiex, nham: totan pa appong: maix khankix, maix tag hieh kah piang khu: dee tan Simiang Siyiex. Mai maix tag ih nex an:.
Sonsang pon maix mai kawnpraix maix bwanson: pa mhawm: tau mai kawn: saux maix tix ju hoik tix ju, yam yuh maix ceu pa mhawm:, mai pa khaw: pa caw kah plak sivoe ngai: Simiang Siyiex, yuh kaing pa khaw: rhawm: Nawh Cao:, mai nghiiet kah lox pa tawm: aux kah pex.
Tawx Satix Son Ang Krub Kah Siyiex Pa Ang Mawh Ang Meh
"Yam teei Simiang Siyiex tix tik kah ceu pwi haktiex pa sang laig ot maix kah daux khankix, khaing: plak sivoe maix, maix tag yaox tix ot kah daux haktiex kix.
Yuh satix maix, son ang maix sang krix kah kie taong:, mai son ang maix sang hawt khaix kix, pa hoik lauxleeing: kah plak sivoe maix, mai son ang maix lai chawk grawng: beenli pa krub kix,ceu pwi inkix hoik yuh kaing jhaw: siyiex kix yuh kah mawx, Aux tag sang yuh nawh awm: an:
Maix tag ang pon tix krub Simiang Siyiex maix awm: krax pa yuh kix, kix yuh ceu pa seeing: pa brai: Simiang Siyiex maix, mai ceu pa koeng Nawh Cao: khankix, kah siyiex kix, mai hoik gleeing tix tan kawn: simex, kawn: bun: tix kah siyiex kix.
"Can ceu pa tawm: aux kah maix khankix, maix tag priex rhawm: tix mai hawt tix yuh kah. Maix tag ang pon tix baox thie: gumlox kah piang an:, mai ang pon tix tieh khaing: an: heue.
Grawng: Ciyang Kah Cao: Jhai: Pa Ang Mawh Ang Meh
"Phan: cao: jhai: tix kauxkaux lih khaing: daux sinax pex, pa chix krai dee bleeh camaox, mai mhai: sakse pa daox pa am: ang ah,
mhai: sakse mai mhai: pa daox pa am: pa krai nawh kah pex khankix mawh pa hoik grum naog kawx, nawh ah nin:,kieh ex hawt khaix siyiex tang: kaux tang: hak pa ang pex nyang sax tawng, mai yuh kaing jhaw: kix
Pex ang pon tix nghiiet kah lox cao: jhai: pa chix krai dee bleeh camaox an:, mawh kheu Simiang Siyiex pex cheuk tix yaox pex, grawng: pa moh ang pex moh kah Simiang Siyiex tix khawm: rhawm: khawm: rhi: mai khawm: ju tix.
Pex tag hawt khaix Simiang Siyiex tix, daux pa lhat graung kah Nawh Cao:, mai priex tix hawt gumlox pingnyap Nawh Cao:, mai nghiiet kah gumlox sikah Nawh Cao:, mai yuh kaing jhaw: Nawh Cao:.
Cao: jhai: ang ah, cao: chix krai dee bleeh camaox ang ah, tag yaox tix pah yum:, kheu kraix kix grawng: pa sang deeh veeh pex tix hu: khaing: Simiang Siyiex pex, pa hoik viex pex lih khaing: daux meung Ejiptux, mai pa hoik taoh pex khaing: daux yuh pex siliex, mai nawh nyaw glaw: pex lud loe: khaing: daux krax pa hoik tawm: Simiang Siyiex kah pex, pa hoik hu: kah pex daux krax Nawh Cao:. Mawh kheu nan:, pex tag teei tix tik pa caox pa caig khankix khaing: daux sinax pex.
"Phan: puxaik maix, kawn: simex kawn: bun: maix khankix, mai moeng maix pa koe: kah piang naok maix, mai paoxgrawm pa sidu rhawm: maix khankix, nyaw glaw: maix ah nin:, kieh ex hu: mai yuh kaing jhaw: siyiex tang: kaux tang: hak, pa ang maix sax tawng khankix, mai pa ang keeing: maix sax tawng,
siyiex ceu pwi pa ot hawt rawb rim maix khankix, pa koe: dee dex mai dee singai ang ah, jah kah daog dee sidauh haktiex kah plak in:, tom: hoek kah daog dee sidauh haktiex plak an:,
maix tag ang pon tix rieb lox nawh, mai ang pon tix nghiiet lox nawh, ngai: maix tag ang pon tix koe: krax caoxrhawm: kah nawh, mai ang pon tix koe: rhawm: pa lhawk kah nawh mai ang pon mox nawh dee glip.
Viang mawh kawx nan:, maix tag pah tix tik nawh, taix maix tag hoek kah piang nawh phao kah:, sonsang kieh maix nawh yum:, khaix an: taix pwi hun: tag pon tix hoek kah piang nawh.
Mai pex tag dheem: nawh yum: kah simaox, kheu jao nyaw glaw: nawh pex hu: singai khaing: Simiang Siyiex, pa hoik viex pex lih khaing: daux meung Ejiptux, khaing: dee yuh pex siliex.
Mawh kheu nan:, pwi Isarilax khankix tag mhong: kah ceu in:, mai koe: krax lhat krax glaung, mai kix tag ang lai baox yuh pa caox pa caig an: kix, awm: hoik koe: ceu in: kah daux sinax pex.
"Phan: maix mhong: kah pwi tix kauxkaux pa ah nin:, kah daux veng pex tix veng veng kah veng pa tawx Simiang Siyiex sonsang ot maix kah daux,
pwi caox khankix, hoik lih koe: khaing: daux sinax pex, mai kix hoik nyaw glaw: kah pwi pa ot kah daux veng pex, mai ah nin: kah pex,kieh ex hu: yuh kaing jhaw: siyiex tang: kaux tang: hak, siyiex pa ang pex sax tawng khankix,
maix tag chawkcheng: mai sawg tix yaox mai mhaing: tix yaox grawng: an: kriem kre, phan: rug mawh, mai phan: krax pa seeing: pa brai: an: hoik yuh kah daux sinax pex,
pex tag pah kah pwi pa ot kah daux veng an: khankix kah lawm vaig, mai pah ceu pa koe: kah daux veng khawm: uik mai khawm: khawng: brie cie kix laux lak pak leeing: kah lawm vaig pex.
Mai pex tag khrawm: tix deuh kraungkhrai: pa tud pa rhim: pex khankix kah daux sigreung krax, mai gleeing khawm: veng mai khawm: kraungkhrai: pa tud pa rhim: pex khankix tau kah ngu khawm: uik, sivoe Simiang Siyiex maix. Mai veng an: tag mawh pum: nyhee: leeing ju leeing phan:. Tag ang lai baox deeh sum: kah veng an:.
Mawh kheu nan:, can ceu pa hoik jhax lawg khankix, tag mawh pa ang lai deuh kah daux taix pex tix ceu kawx, sonsang deeh veeh Simiang Siyiex tix khaing: pa kied songrhawm: Nawh Cao:, mai sonsang jhi: Nawh Cao: krax caoxrhawm: Tix kah maix, mai sonsang koe: rhawm: Nawh Cao: kah maix, mai Nawh Cao: tag deeh kieh maix baox nie pre haoh hun:, awm: pa hoik tiextu Nawh Cao: kah keeing: maix khankix,
phan: pex nghiiet kah lox sikah Simiang Siyiex, mai priex tix hawt lox tawm: pingnyap Nawh, pa hoik tawm: aux kah pex daux in: singaix, mai yuh pa khaw: pa caw kah plak sivoe ngai: Simiang Siyiex pex heue.
Grawng: Rien Rhawm: Son Pa Ang Khaw: Ang Caw:
"Pex mawh kawnpraix Simiang Siyiex pex. Pex tag ang pon tix pat nex cao: tix mai ang pon khlao: kah hauk dieb dong: tix pak son pwi yum:.
Grawhgrawng: nawh pex mawh ceu pwi pa singax singeh, son Simiang Siyiex pex. Simiang Siyiex hoik laug pex mawh ceu pwi Nawh Cao: khaing: ceu pwi pa ot kah piang haktiex khawm: uik.
To Tiag Pa Singax Mai Pa Ang Singax
"Pex tag ang pon tix ih ceu pa seeing: pa brai: tix ceu kawx.
Inkix mawh tosat pa pon pex tix ih, moi, yung: mai pex,
Cak mai poh ceu pa ting mai kia:, pex rang:, moi praix, cak lang: rung:, mai yung: tiag,
pex tag pon tix ih tosat kuceu pa koe: gip, pa gwieh tix koe: ra: plak, mai tosat pa deeh sai roing tix khankix.
Viang mawh nan:, khaing: daux sinax tosat pa deeh sai roing tix, mai pa koe: gip ra: mu, pex tag ang pon tix ih kala-uk mai pietla, Ghot (Saphan). Grawhgrawng: nawh, viang ceu ankix, mawh tosat pa deeh sai roing tix kawx, kheu jao ang kix koe: gip ra: mu:, ceu an: khankix mawh pa ang singax son pex.
Lig mawh pa ang singax kah son pex, viang koe: gip ra: mu: kawx, kheu ang mawh tosat pa deeh sai roing tix, pex tag ang pon tix ih nex, mai pex ang pon tix hu: krox hu: teeh kah to: pa yum: ankix.
"Inkix mawh pa pon pex tix ih pa koe: daux rawm: khankix, pex tag pon tix ih can ceu pa koe: kak pruik mai sibiak khankix.
Mai can ceu pa ang koe: kak pruik mai sibiak khankix, pex tag ang pon tix ih, an: mawh pa ang singax son pex.
"Pex tag pon tix ih sim: pa singax khawm: uik.
Viang mawh kawx nan:, pex tag ang pon tix ih, klang: lung, klang: preng mai klang: ting,
mai klang: raoh, klang: ce: mai can ceu pa mawh paox klang:,
mai lak kuceu mai paox ceu lak,
mai sim: kala-uk, sim: pang plawh dawd yhaok, sim: sivik rawm:, mai paox ceu klang: khankix,
mai sim: pang plawh iak mai sim: teek kreei, mai sim: pang plawh paing hauk khankix,
mai lak tiag, klang: preng, sim: klang: kax,
mai sim: paing ting, mai sim: sigaig mai paox ceu an: khankix, mai sim: gawxcux mai blak khankix.
Mai can ceu pa chix mo kuceu, pa koe: pruik, mawh pa ang singax kah son pex. An: khankix mawh pa ang pon tix ih.
Pex tag pon tix ih sim: pa singax khawm: uik.
"Pex tag ang pon tix ih to: pa tang: yum:, tix ceu kawx, pex tag tawx nyo sinie pa ot daux veng pex khankix ih, phan: ang mawh nan:, pex tag coh kah pwi tang: meung; grawhgrawng: nawh pex mawh ceu pwi pa singax kah Simiang Siyiex pex heue. "pex tag ang pon tix ngaik kawn: pex iak kah daux rawm:teeih miex nawh.
Grawng: Tan Kao Son Tix Son
"Pex tag gwieh tix deuh kao: son tix son mhawmmhawm: khaing: daux plix nghox plix koi: pa pon pex, pa lih khaing: daux kaung: pex khankix tix num hoik tix num.
Pex tag ih can kao: son tix son khaing: daux plix nghox plix koi: pex, mai rawm: plix siiet khraox pex mai rawm: bee pex, mai khaing: pa liang pex tix pon phao kah: khaing: cub yung: cub moi pex, kah plak sivoe Simiang Siyiex, kah dauh dee pa laug Nawh Cao: tix deuh ceukaux Tix ot kah, phan: yuh nan: mawh sonsang gau pex tix koe: krax lhat graung kah Simiang Siyiex jheengjheeng:.
Viang mawh nan:, phan: krax hu: pex mawh pa kied singai kah son pex, mai phan: pex ang pon viex krax tan kao: son tix son an: khankix ang ah, mai phan: dauh dee laug Simiang Siyiex tix deuh ceukaux Tix mawh pa kied singai khaing: dee ot pex, khaix hoik nawb Simiang Siyiex bwanson: kah piang pex,
pex tag deeh coh ceu an: khankix, teei tix viex mau an: kah daux taix pex, mai hu: kah dauh dee pa hoik laug Simiang Siyiex pex.
Mai pex tag cai: mau an: son ceu pa sang simie pex tix yuh kah daux rhawm: pex, liag moi ang ah, yung: ang ah, rawm: plix siiet ang ah, mai rawm: plai: khankix, mai son can ceu pa sang simie pex tix yuh kah daux rhawm: pex, pex tag ih kah plak sivoe Simiang Siyiex pex tan:, mai pex tag koe: krax gauxrhawm:, maix mai kawn: nyiiex kawn: ma: maix.
pex tag ang pon tix prah ceu pwi Lewix khankix, pa ot kah daux veng pex. Grawhgrawng: nawh kix mawh ceu pwi pa ang koe: nyum: cie, mai pa ang pon sinngao tau mai pex.
"Yam hoik naog loe: num ku num, pex tag viex kao: son tix son khaing: daux plix nghox plix koi: pa pon pex daux num an:, mai khrawm: tix deuh kah daux veng ot pex.
Pwi Lewix khankix kheu ang kix koe: nyum: cie mai ang kix pon sinngao tau mai pex, khawm: nyo sinie, mai miexmai: kawn: doe: pa ot daux veng pex khankix, tag hoek mai ih tom: sak, phan: pex yuh nan: Simiang Siyiex tag nawb bwan: kah piang pex mai kah kaing jhaw: pa yuh pex heue.
Grawng: Pa Pluat Ploi: Ceuk Aliah Num Tix Bawg
"Yam hoik naog aliah num ku num, maix tag pluat ploi: kah ceuk rom.
In: mawh grawng: pa pluat ploi:, cao: tawx ceuk rom kukaux, pa hoik tawx ceuk rom tix ceuceu kah paoxplawg paoxnyhawm: tix khankix, tag pluat ploi: ceuk rom an:, Nawh tag ang pon tix mhaing: ceuk rom an: kah paoxplawg paoxnyhawm: tix, mai kah puxaik tix khankix. Grawhgrawng: nawh, an: mawh pa kok mawh krax pluat ploi: Simiang Siyiex.
Maix tag pon tix mhaing: ceuk rom khaing: pwi tang: meung, viang mawh nan:, ceuk rom ceu patix ang ah maix tag pluat ploi: kah ceuk rom cie puxaik maix khankix,
phan: maix priex rhawm: tix mai nghiiet kah gumlox Simiang Siyiex maix, mai priex tix hawt lox pingnyap khankix, pa tawm: Aux kah maix daux in: singaix.
Pwi hot pwi sibhawm: tag ang lai koe: kah daux pex, mawh kheu Simiang Siyiex tag nawb bwan: pa ting lhaong: kah piang maix, kah daux haktiex pa sang tawx Simiang Siyiex mawh sinngao cie maix.
Simiang Siyiex maix tag nawb bwan: kah piang maix, awm: hoik yuh Nawh sijax mukheu kah maix, maix tag tawx pwi tom: nie ceuk rom. Viang mawh nan:, maix tag ang pon tix ceuk kah pwi, maix tag kwang: kah ceu pwi tom: nie, Viang mawh nan:, kix ang pon tix kwang: kah maix.
Pa Koe: Rhawmrhi: Kah Pwi Hot Sibhawm:
"Phan: puxaik pa hot maix koe: kah sinax pex tix kaux kah daux veng maix tix veng veng, kah daux haktiex tawx Simiang Siyiex kah pex, paw gun rhawm: tix, mai paw bhok taix tix khaing: puxaik pa hot maix khankix.
Maix tag yah taix tix vieh va: mai tawx nawh ceuk rom mai pa sibieh rhawm: tix tawx tom: kub mai naok can ceu pa lo nawh khankix.
Yuh satix maix mai ang pon tix keud pa caox pa caig kah daux rhawm: tix ah nin:,num aliah, num pa pluat ploi: hoik dex phao, ngai: maix tag koe: krax caox krax caig kah piang puxaik hot maix khankix, mai ang rhawm: tawx tix ceu kawx kah nawh, mai nawh tag riag yo kah Simiang Siyiex kheu jao maix, phimap tag hoek kah piang maix.
Maix tag tawx kah nawh tete, mai rhawm: maix tag ang pon tix lhawk yam tawx maix kah nawh, Simiang Siyiex maix tag nawb bwan: kah piang maix, kah kaing jhaw: maix khankix, mai kaing jhaw: pa yuh maix kah taix tix.
Mawh kheu pwi hot ang jud khaing: kah piang haktiex dee ot maix, mawh kheu nan:, aux tom: tawm: lox kah maix ah nin:, maix tag yah taix tix vieh va: kah puxaik maix khankix, mai kah pwi hot sibhawm: khankix, mai kah pwi pa koe: krax cu krax nghiiet kah daux haktiex maix.
Been Pa Dex Mai Siliex
"Phan: puxaik maix pwi Hebrie simex, bun: tix kauxkaux ang ah, mawh pa coh tix kah maix, mai phan: kix hoik yuh kaing jhaw: maix liah num, khaix an: yam hoek daux num aliah maix tag ploi: kieh lih hu: khaing: maix.
Mai yam ploi: maix nawh hu: luat luan khaing: tix, maix tag ang pon tix kieh nawh hu: mai taix yi tix,
maix tag teem: coi nawh tom: kub, khaing: daux cub yung: maix khankix, mai khaing: daux glah nghox maix, mai khaing: daux dee biiet maix rawm: plix siiet khankix, awm: pa hoik nawb Simiang Siyiex bwanson: kah piang maix, maix tag tawx ankix kah nawh.
Maix tag doh keud kah hoik mawh maix siliex kah meung Ejiptux, mai kah hoik taoh Simiang Siyiex kah maix, mawh kheu nan:, aux tawm: lox kah maix daux in: singaix.
Phan: nawh ah nin: kah maix,aux ang rhawm: hu: khaing: maix, mawh kheu moh aux kah maix mai kawn: nyiiex kawn: ma: maix, aux gauxrhawm: tix ot tau mai maix,
teei nyex lawm mai toh kah yhaok nawh, hawt diang siviex tan:, mai nawh tag mawh siliex maix leeing ju, kah siliex bun: maix kawx, maix tag yuh awm: an:.
Yam ploi: maix nawh hu: luat luan khaing: tix, maix tag ang pon tix kieh mawh pa nu son maix, mawh kheu nawh hoik yuh kaing maix liah num, lheu: khaix ngawh kaing pwi cang ra: son, khaix an: Simiang Siyiex tag nawb bwan: kah piang maix, kah can ceu pa yuh maix khawm: uik heue.
Been Pa Dex Mai Khawng: Brie Pa Liang Tix Keh
"Can khawng: brie maix pa liang tix keh pa mawh mhaing: khawm: uik, khaing: daux cub yung: cub moi, maix tag priex mawh pa singax singeh kah son Simiang Siyiex. Maix tag ang pon tix cau kah kawn: moi pa liang patix keh, khaing: daux cub moi maix khankix, mai maix tag ang pon tix rib hauk kawn: yung: pa liang tix keh khaing: daux cub yung: maix.
Kawn: moi kawn: yung: pa liang tix keh inkix, maix mai kawn: nyiiex ma: maix, tag pon tix ih ankix kah plak sivoe Simiang Siyiex, ku num kah dauh dee pa laug Simiang Siyiex tix deuh.
Viang mawh kawx nan:, phan: dee mat dee ne koe:, mai phan: mawh pa pot taix pot caong ang ah, mai dug ngai: ang ah, mai phan: mawh pa nie dee mat dee ne, maix tag ang pon tix tan kah Simiang Siyiex.
Maix tag pon tix ih kah daux veng ot maix, pwi pa ang singax mai pwi pa singax khankix, tag pon tix ih awm: paox tix, awm: pa ih kix kah nex kiah mai nex cak.
Maix tag ang pon tix ih ngie nham: nawh; maix tag hieh tix tik kah piang tiex awm: rawm: heue.
Grawng: Pwie Pasakha
Rien rhawm: maix daux khix Abibax mai priex rien pwie Pasakha son Simiang Siyiex; mawh kheu kah daux khix Abibax, Simiang Siyiex hoik viex maix lih khaing: daux meung Ejiptux kah plak ponsawm:.
Mawh kheu nan:, maix tag appong: khawng: brie pwie Pasakha kah son Simiang Siyiex, khaing: pa koe: kah daux cub yung: cub moi maix, kah dauh dee pa hoik laug Simiang Siyiex tix deuh ceukaux Tix.
Maix tag ang pon tix ih khaomun pa sau: susaix tau mai an: aliah singaix, maix tag ih khaomun pa ang sau: susaix pa mawh khaomun krax kharhawm:, (grawhgrawng: nawh maix hoik lih sijaox khaing: meung Ejiptux). Maix tag doh keud kah singaix lih maix khaing: meung Ejiptux, glang: singaix im: ju maix.
Mai khaomun pa sau: susaix tag ang pon tix yaox kah sinax pex, kah daux haktiex pa kwang: maix khankix, aliah singaix. Nex pa appong: maix plak bo, singaix liang tag ang pon tix deuh tom: hoek kah plak ponngawb.
Maix tag ang pon tix appong: khawng: brie pwie Pasakha kah daux veng ot maix tix dauh kawx, kah pa tawx Simiang Siyiex kah maix.
Viang mawh kawx nan:, maix tag appong: khawng: brie pwie Pasakha plak ponbo, bawg yam hoik laig singaix, awm: bawg yam lih hu: maix khaing: meung Ejiptux, kah dauh dee pa hoik laug Simiang Siyiex tix deuh ceukaux Tix.
Maix tag tong: tix ih ankix kah ngu, kah dauh dee pa hoik laug Simiang Siyiex, yam hoek plak ponngawb pex tag deeh ing: kah nyiiex gox tix.
Maix tag ih khaomun pa ang sau: susaix daux liah singaix, yam hoek kah daux singaix aliah, pex tag khrawm: paox tix daux pa singax singeh son Simiang Siyiex. Maix tag ang pon tix yuh kaing kah daux singaix an: heue.
Grawng: Pwie Aliah Vang Twah
Maix tag simin tix yaox aliah twah son cao: maix. Maix tag jah tix simin aliah twah khaing: bawg yam jah maix tix vawg nghox koi.
Khaix an: maix tag yuh pwie aliah vang twah son Simiang Siyiex, tau mai krax tan krax lu pa tan maix khawm: rhawm: khawm: rhi: tix, kah daux taix maix. Maix tag tan an: kix awm: pa hoik nawb Simiang Siyiex bwanson: kah piang maix.
Maix tag koe: krax gauxrhawm: gauxrhi: kah plak sivoe Simiang Siyiex, khawm: kawn: simex kawn: bun: maix khankix, mai kawncau simex kawncau bun: maix, mai khawm: ceu pwi Lewix khankix, pa ot kah daux veng ot maix, mai khawm: nyo sinie, mai khawm: miexmai: kawn: doe pa ot daux sinax pex, kah dauh dee pa hoik laug Simiang Siyiex tix deuh ceukaux Tix.
Maix tag doh keud kah hoik mawh maix siliex kah daux meung Ejiptux, mai maix tag priex tix hawt yuh awm: lox beenli in: khankix heue.
Grawng: Pwie Nyiiex Gox Bang:
Maix tag yuh pwie nyiiex gox bang: aliah singaix, khaix hoik khrawm: maix nghox koi: khaing: daux glah nghox, mai khaing: dauh dee briet maix rawm: plix siiet khankix,
maix tag koe: krax gauxrhawm: gauxrhi: kah daux pwie yuh tix, khawm: kawn: simex kawn: bun: maix, mai kawncau simex kawncau bun: maix khankix, mai khawm: ceu pwi Lewix khankix, mai khawm: nyo sinie, mai khawm: miexmai: kawn: doe: pa ot daux veng ot pex khankix.
Maix tag yuh pwie aliah singaix son Simiang Siyiex, kah dauh dee pa hoik laug Simiang Siyiex; grawhgrawng: nawh Simiang Siyiex, hoik nawb bwanson: kah piang maix, mai kah daux krax haok krax hwan: kaing jhaw: yuh maix kah taix tix khawm: uik, maix tag koe: krax gauxrhawm: gauxrhi: kah tete.
Tix num loe: bawg kawn: simex pex khawm: uik, tag hoek tix bleeh kah plak sivoe Simiang Siyiex, kah dauh dee pa hoik laug Nawh Cao: kah daux bawg yam pwie khaomun pa ang sau: susaix, mai kah daux bawg yam pwie aliah vang twah, mai kah daux bawg yam pwie nyiiex gox bang: khankix. Mai kix tag ang pon tix hoek bleeh kah plak sivoe Simiang Siyiex tau mai taix yi tix.
Pwi kukaux tag tawx pa pon tawx nawh, awm: pa pon nawh bwanson: khaing: Simiang Siyiex heue.
Cao: Prawng Pa Rah Pa See
Maix tag yaog tix deuh cao: prawng see: mai cao: kaing: khankix, awm: koe: doeh simie ceucat pex, kah daux veng pa hoik tawx Simiang Siyiex, kah pex khawm: uik. Mai kix tag prawng see: kah ceu pwi kah daux pa rauh pa see.
Maix tag ang pon tix veeh khaing: krax prawng pa rauh pa see. Maix tag ang pon jhak pakngai: pwi tix plak kawx, mai maix tag ang pon tix teei kraung chun: praok. Grawhgrawng: nawh kraung chun: praok, mawh pa kieh ngai: pwi pa koe: pingnya cuyi: dug, mai kieh lox sikah pwi pa rauh pa see klung kliien: tix mawh pa suksag.
Maix tag hawt khaix pa rauh pa see, sonsang pon maix tix im: ju, mai teei tix cie sinngao haktiex pa tawx Simiang Siyiex kah maix.
Maix tag ang pon tix sum: khaox rieng rao tix ceu kawx son cao: tix, hawt dex khu: dee tan pa hoik sum: maix, kah son Simiang Siyiex.
Maix tag ang pon tix jung rong: simaox rieng rao, in: mawh pa koeng Simiang Siyiex kah heue.
Maix tag ang pon tix appong: moi ang ah, yung: ang ah, pa koe: dee mat dee ne, mai pa koe: dee laux maung kah Simiang Siyiex, mawh kheu an: mawh pa seeing: pa brai Simiang Siyiex kah.
Kah daux sinax pex kah daux veng pa tawx Simiang Siyiex kah pex khankix, mai phan: sipub simex ang ah, bun: ang ah, pa yuh pa caox pa caig kah plak sovoe ngai: Simiang Siyiex, mai phit lud kah gumlox sijax mukheu Nawh Cao:,
mai nawh hoik lih hu: yuh kaing jhaw: mai krub siyiex tang: kaux tang: hak khankix, pa mawh singaix ang ah, khix ang ah, mai ceu pa koe: kah daux raoma: tix ceuceu pa ang Aux sax tawm: khankix,
mai phan: an: mawh pa hoik krai kah maix, mai phan: maix mhong: kah grawng: an: khankix, khaix an: maix tag jawg tix chawk tom: kriem; Mai phan: rug mawh tete, phan: grawng: pa seeing: pa brai: an: hoik mawh pa yuh kah daux ceu pwi Isarilax khankix,
khaix an: maix tag teei simex an: mai bun: an:, pa hoik yuh ceu pa caox pa caig an:, lih kah plak praix siviex veng, mai maix tag dheem: yum: kah simaox.
Pwi mawx pa keung: tix yum: tag kieh nawh yum: awm: pa kham: mhai: sakse son nawh ra: kaux, loe: kaux, viang mawh kawx nan:, phan: pa kham: mhai: sakse koe: tix kaux ngie tag ang pon tix kieh nawh yum:.
Pwi pa kham: mhai: sakse tag sau: taix tix kah, khaix an: pwi hun: tag sau: taix tix kieh nawh yum:. Mawh kheu nan:, maix tag teei tix tik pwi caox pwi caig khaing: daux sinax pex.
Phan: grawng: see: pa kied nu tix prawng koe: kah son maix, daux sinax veng ot pex, pa mawh grawng: see: pa pah pwi, grawng: see: pa simah simaing:, mai grawng: see: pa tang: toi: paox tix khankix, khaix an: maix tag yaog tix kaoh mai haok kah dauh dee pa hoik laug Simiang Siyiex,
Mai maix tag hoek kah cao: giex kaing: li ceu pwi Lewix khankix, pa mawh cao: prawng see: khankix tan:, kah daux baux yam an:, mai chawk tix yaox kah grawng: an:. Kix tag krai grawng: lox pa sang prawng kah maix.
Grawng: pa sang prawng ca: pa hoik krai kix kah maix, kah dauh dee pa hoik laug Simiang Siyiex tan:. Maix tag priex rhawm: tix sonsang yuh maix awm: gumlox pa tawm: kix kah maix.
Awm: grawng: prawngca pa tat kix kah maix, mai awm: grawng: lox prawngca: pa krai kix kah maix khankix, maix tag yuh awm: an:, maix tag ang pon veeh tix hu: kah plak khawn: gwiex kawn: dawm:, khaing: krax prawngca: pa hoik tat kix kah maix.
Phan: koe: pwi pa hawt tix yuh awm: koe: rhawm: vao tix, mai pa ang cu tix nghiiet kah cao: giex kaing: li pa cung tix yuh kaing jhaw: Siyiex tan:, kah plak sivoe Simiang Siyiex ang ah, kah plak sivoe cao: prawng see: ang ah, tag kieh pwi an: yum:, Mawh kheu nan:, maix tag teei tix tik pwi caox pwi caig khaing: daux sinax ceu pwi Isarilax khankix.
Pwi khawm: uik tag mhong: mai tag koe: krax lhat krax graung, mai kix tag ang lai baox yuh ceu an: khankix, kah daux pa koe: rhawm: vao tix khaix in: sax heue.
Grawng: Laug Simiang Kwang: Haktiex
Yam hoek maix kah haktiex pa tawx Simiang Siyiex kah maix, mai yam hoik pon ot pex kah daux an:, phan: maix ah nin:, "Aux tag yaog tix deuh khunhawkham tix kaux kah piang tix awm: ceu pwi khankix, pa ot hawt vungviang aux khankix.
"Maix tag yaog tix deuh khunhawkham tix kaux, kah daux puxaik maix khankix, kah pwi pa laug Simiang Siyiex. Maix tag ang pon yaog tix deuh pwi tang: meung pa ang mawh puxaik maix mawh khunhawkham.
Viang mawh nan:, khunhawkham an: tag ang pon tix eei: brung tom: nie, mai ang chix kieh pwi haktiex deeh ing: kah meung Ejiptux, sonsang baox nie brung eei: nawh; grawhgrawng: nawh Simiang Siyiex hoik ah nin: kah pex. "Pex tag ang pon tix deeh ing: kah krax an:."
Nawh tag ang pon tix koe: moeng tom: nie. ha rhawmrhi: nawh, veeh tix hu: plak pa caox, mai ang pon tix sawg mau, khri: tom: nie son tokaux tix.
Yam ngawm nawh kah piang dangngeung meung haktiex, nawh tag tiiem: thawk tix deuh gumlox been inkix kah daux phuk lai tix phuk son tokaux tix, khaing: daux phuk lai pa koe: kah plak sivoe cao: giex kaing: li, ceu pwi Lewix khankix.
Nawh tag deuh lai an: mai tix; nawh tag phat an: glang: singaix im: ju nawh khawm: uik, sonsang pon gau nawh tix lhat graung kah Simiang Siyiex, mai sonsang priex rien nawh tix hawt yuh awm: lox inkix, mai gumlox beenli inkix khawm: uik,
Mai son ang nawh pon tix lhaong: rhawm: ca nyhau: kah puxaik pux o: tix khankix, mai son ang nawh veeh tix hu: kah plak gwiex plak dawm: khaing: gumlox pingnyap in:, phan: yuh nan:, nawh khawm: kawnpraix nawh tag lang: ju lang: phan:, kah daux meung haktiex cao: nawh, mai kah daux sinax ceu pwi Isarilax khankix heue.
Grawng: Nyum: Cie Cao: Giex Kaing: li Mai Ceu Pwi Lewix
Cao: giex kaing: li ceu pwi Lewix khankix, pa mawh doeh simie ceucat ceu pwi Lewix khawm: uik, tag ang pon tix koe: nyum: cie, mai kix tag ang pon tix koe: sinngao tau mai ceu pwi Isarilax khankix, kix tag ih krax tan kah Simiang Siyiex pa hoik yuh kah ngu, mai sinngao Nawh Cao:.
Mawh kheu nan:, kix tag ang pon tix koe: sinngao, kah daux sinax puxaik pux o: nawh khankix. Simiang Siyiex mawh sinngao kix, awm: pa hoik koe: gumlox Nawh Cao: kah kix.
Mai in: tag mawh pa sang caw: cao: giex kaing: li tix pon, khaing: can pwi pa tan krax tan pa appong:, viang ankix mawh moi ang ah, yung: ang ah, kix tag tawx glip tix khawn:, mai kap ra: plak, mai kraung vaig kraung tu kah cao: giex kaing: li.
Plix khaox plix ox pa liang tix pon, nghox koi:, rawm: plix siiet khraox, rawm: bee, mai hauk yung: pa pon maix phao kah: maix tag tawx kah nawh.
Grawhgrawng: nawh Simiang Siyiex, hoik laug tix teei nawh khaing: doeh simie ceucat pex khawm: uik, sonsang cung kix tix yuh kaing jhaw: Siyiex, kah daux ceukaux Simiang Siyiex, nawh mai kawn: simex nawh khankix leeing ju.
Phan: ceu pwi Lewix lih tix hoek khaing: daux veng pa paung nawh kah tix veng veng, kah daux sinax ceu pwi Isarilax khankix, mai koe: rhawmrhi: kah dee pa laug Simiang Siyiex,
nawh tag pon tix yuh kaing jhaw: kah daux ceukaux Simiang Siyiex, awm: pa yuh puxaik nawh ceu pwi Lewix khankix, pa cung kah plak sivoe Simiang Siyiex tan.
Lheu: khaing: ceu pa pon coh nawh sinngao tix, nawh tag koe: krax pa sidu pon tau mai ceu pwi Lewix sonsang ih tau mai kix.
Grawng: Veeh Tix Khaing: Beenli Pacaox Pacaig
Yam hoek maix kah daux haktiex pa tawx Simiang Siyiex kah maix, maix tag ang pon gau tix hawt khaix pa seeing: pa brai: pwi ceu an: khankix.
Kah daux sinax pex tag ang pon tix koe: pwi pa kieh kawn: simex kawn: bun: tix khankix laig kah daux ngu mai ang pon koe: pwi pa yuh sibawk, pwi pa chix jhak mhai: lai taix, mai pa yuh simeed yuh sat, mai pa yuh phi: khankix,
pwi pa chix yuh sidauh moh, pwi pa yuh paox pie mai si ngie, pwi pa chix pih miang, mai pwi pa chix kok kah khwan: pa yum: khankix.
Can pwi pa yuh ceu inkix khawm: uik mawh pa seeing: pa brai: Simiang Siyiex kah; mawh kheu pa seeing: pa brai: pa yuh kix, Simiang Siyiex tom: grheu: kix lih khaing: kah plak sivoe maix.
Maix tag mawh pwi pa grum mhawm: kah plak sivoe Simiang Siyiex.
Pwi pa tag sang grheu: maix tix tik khankix, hoik nghiiet kah lox cao: sibawk, mai cao: pa jhak mhai: lai taix kix, phan: mawh son maix, Simiang Siyiex ang tawx akhwang: maix yuh ceu an: khankix.
Cao: Jhai: Khraox Tix Kaux Pa Awm: Mose
Simiang Siyiex maix tag sang kieh cao: jhai: lih tix kaux khaing: daux puxaik pex pa awm: aux. Mai pex tag nghiiet kah lox nawh.
Awm: krax pa khyox khaw: pex kah Simiang Siyiex tix hawt baoh Hawrax kah daux singaix khrawm: pex paox tix mai pex hoik ah nin:, "Paw lai baox kieh aux chix mhong: kah gumlox Simiang Siyiex aux. Paw lai kieh aux yaox kah ngu pa ting in: tix bawg kawx liak. Phan: ang mawh nan: aux tag yum: kah."
Simiang Siyiex ah nin: kah aux, "Can ceu pa hoik krai kix, mawh pa mhawm:."
"Aux tag kieh cao: jhai: pa awm: maix lih daux sinax puxaik pex khankix, mai Aux tag sau: gumlox Tix kah daux jheeh nawh, mai nawh tag krai gumlox pa tawm: Aux kah kix khawm: uik.
Can pwi pa ang nghiiet kah lox krai nawh kah daux ceukaux Aux, Aux tag ciyang kah pwi an:.
Phan: koe: cao: jhai: pa teei min: tix krai lox kah daux ceukaux Aux, pa ang Aux tawm: nawh krai khankix, mai pa krai kah daux ceukaux siyiex tang: kaux tang: hak khankix, tag pah cao: jhai: an: yum:.
Phan: maix keud ah nin: kah daux rhawm: tix, "Ex tag sang tawng gumlox pa ang Simiang Siyiex nyang bax krai yuh kah mawx lie?"
Yam krai cao: jhai: lox kah daux ceukaux Simiang Siyiex, phan: ang mawh tete awm: pa hoik krai nawh, mai ang mawh lox pa krai khaing: Simiang Siyiex khankix; mai phan: mawh pa tang: krai cao: jhai: kah rhawm: kua: tix, pex ang pon tix lhat kah nawh heue.
Veng Hoek Pwi To Tix Peung Loe Veng
"Yam teei Simiang Siyiex tix tik ceu pwi khankix, pa mawh haktiex pa tawx Simiang Siyiex kah pex, mai pex grheu: kix lih mai ot kah daux veng daux nyiiex kix,
pex tag tang: gwieh veng loe: veng son tix kah daux haktiex tawx Simiang Siyiex, Siyiex pex, pex cie.
Pex tag cox khre: krax, mai gwieh haktiex pa tawx Simiang Siyiex, Siyiex pex, pex cie loe: son, sonsang to: pwi pa pah pwi tix peung tan:.
In: mawh grawng: pa dex pa dawd mai cao: pah pwi to: tix klawd, mai pa loe: tix pah paoxplawg paoxnyhawm: tix, mai pa ang koe: krax cang krax khoi: kah nawh, bawg yam pa luan,
awm: yam hu: pwi tix kaux tix kid khix daux tiag, mai paoxplawg paoxnyhawm: tix, mai yam kid nawh khaox goh kah moe:, moe: goh khaing: krong: tix, mai moe: loe: krox kah paoxplawg paoxnyhawm: nawh mai yum:, nawh tag to: kah veng an: tix veng veng mai pon tix im: ju;
phan: cao: pawk bix nham: pheet sonsang krub kah cao: pah pwi yam kawn: songrhawm: tix, kheu kied singai krax mai sang pah nawh, nawh ang khaw: tix yum:, mawh kheu ang nawh koe: krax cang krax khoi: kah pwi yum: an:, kah bawg yam pa luan.
Mawh kheu nan:, Aux tawm: lox kah pex, pex tag tang: gwieh veng loe: veng.
Phan: Simiang Siyiex greed mee: haktiex pa hoik tiextu Nawh kah keeing: pex khankix, mai ap haktiex pa hoik yuh Nawh sijax mukheu sonsang tawx kah keeing: pex khankix,
Mawh kheu nan:, yuh satix pex mai hawt kah lox tawm: pingnyap pa tawm: Aux kah pex daux in: singaix, sonsang moh pex kah Simiang Siyiex tix, mai hawt daux krax Nawh Cao: jheengjheeng:, khaix an: pex tag baox veng loe: veng kah piang veng in: loe: veng,
mawh kheu lhat pwi ang koe: phimap jauh nham: kah daux haktiex pex, pa mawh haktiex pa tawx Simiang Siyiex pex cie, mawh kheu nan:, nham: phimap tag hoek kah piang maix.
Phan: pwi tix kauxkaux, koeng kah paoxplawg paoxnyhawm: tix, jawm tix pau mai tap toi: nawh, phan: nawh hoik yum: mai pwi an: tag to: kah veng an: tix veng veng,
mai kuad song: nong: yu kah daux veng ot pwi an:, tag ploi: pwi hu: teei pwi an: ing: khaing: tan:, mai ap pwi an: kah daux tawm: taix cao: pawkbix nham:, sonsang teei nawh yum:.
Pex tag ang pon tix koe: krax pa caoxrhawm: kah nawh, mai pex tag teei tix tik krax phit pa ang koe: phimap khaing: pwi Isarilax, sonsang hu: mhawm: ing: mhawm: pex khawm: uik.
Mee: Haktiex Sinngao Cie Pex
"Pex ang pon gah kah lhak simaox mee: haktiex paoxplawg paoxnyhawm: tix, pa hoik sum: pwi didix kah, kah daux sinngao haktiex pa tawx Simiang Siyiex, Siyiex pex, pex cie.
Gumlox Beenli Pa Dex Pa Dawd Mai Pa Kham: Mhai: Sakse
"Kah pwi tix kauxkaux pa yuh krax caox tix ceuceu, mai pa yuh phimap tix ceuceu ang ah, phan: cheukcheu: kah nawh, sakse pa kham: pwi tix kaux khaing: ang chix grum naog, phan: pwi kham: sakse koe: ra: loe: kaux tom: chix grum naog.
Phan: koe: sakse pa ang mawh ang meh pa kham: krax phit krax lud pwi tix kauxkaux,
mai kieh pwi koe: see: khawm: ra: kaux hoek sivoe Simiang Siyiex, sivoe cao: giex kaing: li, mai sivoe cao: prawng see:, pa yuh kaing jhaw: kah daux singaix an:;
cao: prawng see: tag jawg tix chawkcheng: kah grawng: an:, phan: sakse an: mawh sakse pa lud, mai yuh see: kah puxaik nawh awm: krax phit nawh,
pex tag yuh kah nawh, awm: krax keud nawh tix yuh kah puxaik tix, mawh kheu nan:, pex tag teei tix tik pa caox pa caig khaing: daux sinax tix.
Mai pwi pa deuk khankix, tag mhong: grawng: an:, mai lhat graung ang lai baox yuh pa caox pa caig daux sinax pex.
paw pex koe: krax caoxrhawm: caox rhi: kah, ju tag mawh son ju, ngai: son ngai:, rhang: son rhang:, taix son taix, mai caong son caong heue.
Been Kwang: Kah Krax Ot Krax Koe:
Yam lih hu: puing: pex naing kah pwi koeng pex khankix, yam yaox pex kah brung, kah ling: lawx brung, mai kah pwi haoh hun: khaing: pex, paw lhat paw graung kah kix; mawh kheu Simiang Siyiex, Siyiex pex, pa hoik viex pex lih khaing: Ejiptux, ot tau mai pex.
Yam dex bawg yam sang puing: naing cao: giex kaing: li tag hoek sivoe mai krai lox kah pwi hun:,
mai ah nin: kah kix,Isarilax khankix nghiiet heue, daux in: singaix pex tag hu: daux naing mai puing: kah pwi koeng pex khankix: paw pex koe: krax khirhawm:; paw lhat graung, paw siyaung:, mai paw yaoh yee: kah kix,
mawh kheu Simiang Siyiex, Siyiex pex hu: tau mai pex, sonsang puing: kah pwi koeng kah son pex, mai tawx pex pex kah
Mai cao: kaing naing tag ah nin: kah pwi hun:,pwi mawx pa sum: nyiiex khraox, mai ang nyang appong: lie? Kieh nawh deeh ing: kah nyiiex tix, lhat nawh yum: kah daux naing, mai pwi tang: kaux tag appong: nyiiex an:.
Pwi mawx pa hoik sum: sipeem plix siiet, mai ang nyang yaox tix ih plix lie? Kieh nawh deeh ing: kah nyiiex tix, lhat nawh yum: kah daux bang: naing mai pwi tang: kaux tag ih kah plix an:.
Pwi mawx pa chawk kah bun: sonsang moeng mai ang nyang yuh kah paox lie? Kieh nawh deeh ing: kah nyiiex tix, lhat nawh yum: kah daux bang: naing, mai pwi tang: kaux tag moeng kah nawh
Cao: kaing: naing tag baox krai kah pwi hun: ah nin:,mawh koe: pwi ot tin: pa koe: rhawm: lhat mai pa khirhawm: lie? kieh nawh deeh ing: kah nyiiex tix, lhat rhawmrhi: puxaik nawh iak rhawm: awm: iak rhawmrhi: nawh
Yam hoik krai cao: kaing: naing lox kah pwi hun:, mai kieh kix laug cao: kaing: kru naing kieh mawh cao: kaing: kah piang pwi hun:.
"Yam laig pex dex veng sonsang puing: kah, pex tag krai pao: sonsang yuh pa nhim: tau mai pwi veng an:.
Phan: kix deeh pawk lox pex daux pa nhim: mai paoh siviex veng kah pex, pwi hun: pa ot kah daux veng an:, tag tawx gha: kah pex, mai yuh kaing jhaw: son pex.
Phan: veng an: ang yuh pa nhim: mai pex, mai phan: kix sang yuh naing kah pex, pex tag lai lawm kah veng an:;
yam ap Simiang Siyiex, Siyiex pex kix daux tawm: taix pex, pex tag pah simex kukaux kah lawm vaig,
viang mawh nan: bun:, kawn: nyawm, khawng: brie, mai can pa koe: daux veng khankix, mai kraungkhrai: pa rhim: an: khawm: uik, pex tag teei tix cie; mai pex tag gauxrhawm: kah kraung pa rhim: tix khaing: pwi koeng khankix, pa tawx Simiang Siyiex, Siyiex pex kah pex.
Pex tag yuh awm: in: kah veng khankix pa ot singai khaing: pex, pa ang mawh veng ceu pwi in: khankix.
Viang mawh nan:, veng ceu pwi in: khankix, pa ap Simiang Siyiex, Siyiex pex, pex cie, pex tag ang pon kieh ceu pa toek bhawm: khankix im: ju tix ceu kawx,
pex tag yuh pwi Hetax, pwi Amawrix, pwi Khananix, pwi Pherazix, pwi Hiwix, mai pwi Yebusix khankix, laux lak pak leeing: awm: lox tawm: Simiang Siyiex, Siyiex pex, kah pex;
son ang kix gau sawn: pex yuh pa seeing: pa brai:, awm: pa yuh kix kaing jhaw: son siyiex kix, mawh kheu pa yuh kah ceu an: mawh pa phit pa lud kah Simiang Siyiex pex.
"Yam lai lawm pex kah veng tix veng tom: rheung:, yam puing: pex kah veng an:, pex paw kid khaox lauxleeing: kah moe:, mawh kheu pex tag ih plix khaing: khaox an:, paw pex kid goh. Khaox pa koe: daux kaung: khankix mawh pa koe: bwanson: son pwi, mawh kheu nan:, lai lawm mai priex kah.
Mawh ngie khaox pa tawng pex pa ang chix tix ih plix pa chix yuh lauxleeing:, mai kid goh, sonsang shiao kah kaing jhaw: lai lawm veng, pa sang puing: naing mai pex tom: sidauh lauxleeing: veng an: heue.
Beenli Pa Dex Mai Grawng: Pa Ang Sidawng:
"Phan: pwi tix kauxkaux yaox kah tokaux yum: pah pwi, pa ang tawng kah cao: pah kah daux bing: pak, haktiex pa tawx Siyiex, Siyiex pex, pex cie,
kieh kuad song: mai cao: prawng see:, tiag tix yaox kah veng pa koe: rawb rim pwi yum: an:;
kuad song: pa ot dex veng dee koe: tokaux yum: an:, tag viex moi shiang: tix mu: pa ang sax cau mai pa ang nyang sax sau: iak kah piang.
Mai kuad song: veng an: khankix, tag viex moi shiang: an: hu: kah daux ngawd dee lih rawm:, dee ang sax thai: mai dee ang sax ruat simie, mai kieh raig ngawg moi shiang: kah daux ngawd.
Mai cao: giex kaing: li kawn: simex Lewix khankix tag hoek dex, mawh kheu Simiang Siyiex, Siyiex pex hoik laug kix sonsang yuh kix kaing jhaw: Nawh, mai kieh nawb bwan: daux ceukaux Simiang Siyiex, krax simah simaing: mai krax tap toi:, tag yawg kheu cao: giex kaing: li.
Mai kuad song: veng an: pa ot dex tokaux yum: khankix, tag khoek taix tix, kah piang moi shiang: pa hoik raig ngawg kah daux ngawd;
mai kix kham: sakse ah nin:,taix yix ang kieh nham: pwi in: lih, mai ngai: yix ang yaox kah lih nham: pwi in:.
Simiang Siyiex eue, pluat ploi: kah phimap pwi Isarilax, pa hoik taoh Maix Cao:, mai paw deuh nham: pa ang koe: krax phit krax lud in: kah sinax pwi Isarilax, mawh kheu nan:, kix tag luat luan khaing: pa pah ju pwi yum:
Mawh kheu nan:, pex tag teei tix tik phimap nham: pa ang koe: krax phit krax lud khaing: daux sinax tix, yam yuh pex pa khaw: pa caw, kah plak sivoe ngai: Simiang Siyiex.
Bun: Pa Pon Giex Khaing: Daux Naing
"Yam lih hu: pex daux naing: mai puing: pwi koeng tix khankix, mai Simiang Siyiex ap kix kah daux taix pex, mai giex kix mawh pwi giex pwi laung,
mai maix yaox pa mhawm: grang kah sinax pwi pa giex pa laung khankix, maix koe: rhawm: simie tix teei mawh moeng tix,
maix tag viex nawh hoek kah nyiiex tix, mai nawh tag khlao: hauk kaing: tix mai rhip nghim: tix.
Bun: an: tag peeik kraung ceep pa giex pa laung tix, mai prah nawh ot kah daux nyiiex maix, mai kieh nawh yuh krax doe: kah miex keeing: tix naog tix khix; khaix an:, maix tag pon hu: laig kah nawh, mai mawh mex nawh, mai nawh tag mawh moeng maix.
Khaix an:, phan: maix ang khaw: rhawm: kah nawh, maix tag ploi: nawh hu: kah dee sang hu: nawh; maix tag ang pon coh kah nawh, mai paw kieh nawh mawh siliex, kheu hoik kieh maix nawh kaig.
Pa Pon Kawn: Ai: Khankix Sinngao
"Phan: pwi tix kaux koe: moeng ra: kaux, nawh moh kah tix kaux, mai ang moh kah tix kaux, moeng pa moh nawh mai pa ang nawh moh khankiex keh kawn: simex, phan: kawn: ai: keh khaing: moeng pa ang nawh moh,
yam hoek singaix gwieh nawh sinngao kah kawn: simex tix, nawh tag ang pon tawx sinngao kawn: ai:, kah kawn: simex khaing: moeng pa moh nawh, tang: kawn: simex khaing: moeng pa ang nawh moh pa mawh kawn: ai:,
mai nawh tag rieb kawn: simex khaing: moeng pa ang tix moh mawh kawn: ai:, mai tawx sinngao kah nawh ra: son, khaing: pa koe: nawh khawm: uik, mawh kheu kawn: ai: an: mawh riang rao pa jah son keeing:, mai Arax kawn: ai: mawh cie nawh.
Kawn: Simex Pa Tieh Pa Feen
"Phan: pwi tix kaux koe: kawn: simex pa ang lih grawng: mai ang cee ang cak, pa ang nghiiet lox miex lox keeing: tix, viang miex keeing: sidiex kah nawh kawx, nawh ang nghiiet,
miex keeing: nawh tag giex tix viex nawh hu: kah kuad song: pa ot kah veng an: kah diang siviex veng,
mai kix tag ah nin: kah kuad song: pa ot kah veng an:,kawn: simex yix ang lih grawng: mai ang cee ang cak, nawh ang nghiiet kah lox yix, nawh mawh pa nie luan ih luan nyaux kah priex
Mai pwi pa ot kah daux veng khankix tag dheem: nawh yum: kah simaox, pex tag teei tix tik pa caox pa caig khaing: daux sinax tix; mai pwi Isarilax lhat graung kah mhong: tix kah grawng: an: heue.
Lox Been Son Kuceu
"Phan: pwi tix kaux hoik phit hoik lud kah pa keung: tix yum:, nawh tag caw tix yum:, mai preue: nawh kah piang khaox,
ang pon tix grham: tokaux yum: nawh leeing: sawm: kah piang khaox, pex tag sipaung: nawh kah daux singaix an:, son ang pex sang kieh haktiex tawx Simiang Siyiex, Siyiex pex, pex cie seeing: brai:; mawh kheu kaw pa preue: tix piang khaox ot greem: pa jhax pa lawg Siyiex heue.
"Phan: pex yaox kah moi mai yung: puxaik tix lud krax, pex tag ang pon prah grham:, mai deeh viex hoek kah puxaik tix.
Phan: puxaik pex ang ot dex pex, mai phan: pex ang tawng dee ot nawh, pex tag cax ing: kah nyiiex tix, tom: sidauh hoek sawg puxaik pex kah, mai pex tag deeh tawx kah nawh.
Pex tag yuh awm: an: kah la mai kraung ceep nawh; mai can pa grai: cie puxaik pex tix ceuceu, kah pa hoik grai: nawh yuh phan: pex deeh yaox; pex ang pon prah grham:.
Phan: pex yaox kah la mai moi puxaik tix goh hawt krax, pex ang pon prah grham: kah, mai deeh teem: nawh yaog cung.
"Bun: ang pon ceep kraung simex, mai simex ang pon ceep kah kraung bun:, mawh kheu pwi pa yuh ceu an: mawh pa seeing: pa brai: Simiang Siyiex, Siyiex pex kah.
"Phan: pex pub kah mheem: sim: koe: hawt krax, kah piang khaox mai kah piang tiex, tau mai kawn: nawh, mai tawm: nawh khankix yam kawn: num kah piang tawm: tix, pex paw vi teei khawm: miex khawm: kawn:,
pex tag ploi: miex pu: mai teei kawn: son cao: pex; sonsang mhawm: hu: mhawm: ing: pex, mai sonsang lang: ju pex.
Yam sum: pex nyiiex khraox, pex tag yuh pa tiebtie hawt braux nyiiex tix, sonsang ang pex kieh nham: phimap hoek piang nyiiex tix, phan: pwi tix kauxkaux cod khaing: an:.
Paw ruat simie ra: ceu kah daux sipeem plix siiet pex, phan: yuh nan:, simie plix mai plix plix siiet khawm: ra: tag lauxleeing: kah.
Pex ang pon thai: kah moi mai la tau.
Paw ceep kah kraung pa taing: kah tai mai hauk yung: tau.
"Pex tag yuh ciem tai khankix kah piang daog pon: plak kah kraung ceep pa kheem: pex tokaux tix.
Been Koe: Mex Moeng
"Phan: pwi tix kauxkaux koe: moeng, mai laig it tau mai nawh, mai deeh koeng kah bun: an:,
mai yaox bun: an: yuh ceu pa kaig pa tua, mai min: ceukaux nawh hoik laux, mai ah nin:,aux hoik rieb bun: in: mawh moeng tix, yam it aux mai nawh, aux hoik yaox ang nawh lai mawh bun: loig,
miex keeing: bun: an:, tag viex nawh sonsang jhi: sakse pa mawh bun: an: pa loig, kah kuad song: veng an: khankix hawt diang siviex veng;
mai keeing: bun: an:, tag ah nin: kah kuad song: khankix,aux hoik tawx pwi in: moeng kah kawn: bun: tix, viang mawh nan:, nawh deeh tieh tix koeng kah;
yamin: nawh hoik deuh phimap mai yuh pa kaig pa tua kah nawh ah nin:, "Aux hoik yaox kawn: bun: maix ang lai mawh bunkrih loig." In: khankix hoik mawh sakse pa mawh kawn: bun: aux bunkrih loig Mai kix tag nih kraung ceep nawh kah plak sivoe kuad song: khankix.
Mai kuad song: veng an: khankix, giex kah pwi an: mai tap toi: kah nawh;
kix kieh nawh se: mau tiyieh shekhe, mai ap mau an: kah keeing: bun: an:, kheu jao hoik kieh nawh bunkrih pwi Isarilax laux ceukaux; mai bun: an: tag mawh moeng nawh; mai ang pon tik bun: an: tom: leeing ju tix.
Viang mawh nan:, phan: ceu an: mawh tete, mai ang yaox sakse grawng: mawh bun: an: bunkrih loig,
kix tag viex bun: an: lih hoek kah diang siviex nyiiex keeing: nawh, mai simex daux veng an: khankix tag dheem: nawh yum: kah simaox, kheu jao hoik yuh nawh ceu pa kaig pa tua kah daux pwi Isarilax khankix, mai kheu jao yuh nawh krax phit krax vao kah daux nyiiex ma: keeing: nawh; pex tag teei tix tik pa caox pa caig khaing: sinax pex.
"Phan: yaox simex tix kaux it tau mai bun: koe: mex, kiex tag yum: khawm: ra: tix, khawm: simex pa it tau mai bun: an:, mai khawm: bun: an:, mai pex tag teei tix tik pa caox pa caig khaing: pwi Isarilax.
"Phan: koe: bunkrih loig tix kaux pa hoik chawk tix deuh, mai simex tix kaux pub nawh kah daux veng mai it tau mai nawh,
pex tag viex kiex khawm: ra: kaux lih kah daux diang siviex laig daux veng an:, mai pex tag dheem: kiex yum: kah simaox, kheu ang bun: an: riag yo kah daux veng, mai kheu nunai: simex an: kah moeng paoxplawg paoxnyhawm: tix; mai pex tag teei tix tik pa caox pa caig khaing: sinax pex.
"Phan: simex tix kaux pub kah bunkrih pa hoik chawk tix deuh kah daux tiag, mai simex an: khin: kah nawh, mai it tau mai nawh, mawh ngie simex pa it tau mai nawh pa yum: nongnong:.
Paw yuh tidtix kah bun: an:, mawh kheu bun: an: ang phit kah tidtix sonsang tawx phimap nawh tom: yum: nawh, mawh kheu see: in: awm: pwi tix kaux pa puing: mai pah kah paoxplawg paoxnyhawm: tix;
yam pub nawh bun: an: kah daux tiag, mai bun: an: riag yo pwi teem: kah nawh ang koe: tix kaux kawx.
"Phan: simex tix kaux pub bunkrih pa ang pwi nyang bax chawk, phan: nawh giex mai it tau mai nawh, mai phan: pwi yaox kah,
simex pa hoik it tau mai bun: an:, tag tawx mau tiphwan: shekhe kah keeing: bun: an:, mai kieh bun: an: mawh moeng nawh, mawh kheu hoik nunai: nawh kah bun: an:; ang lai pon tik bun: an: tom: leeing ju tix.
"Paw kieh pwi tix kaux kawx teei kah moeng keeing: tix, mai paw kieh seeing: yuh kraung it keeing: tix heue.
Pwi Tang: Tiah Tix Ot Khaing: Cub Pwi Hun:
"Pwi pa ang grum ang naog kah cie simex, pa pat tix tik khankix ang pon tix laig kah daux cub phung: hun: Simiang Siyiex.
Ang pon kieh kawn: kawn: cang: laig kah daux cub phung: hun: Simiang Siyiex; mai doeh simie ceucat nawh tom: hoek kao: ju kawx ang pon laig kah daux cub phung: hun: Simiang Siyiex.
"Pwi Amawrix ang ah, pwi Mawbax ang ah, ang pon tix laig kah daux cub phung: hun: Simiang Siyiex; mai doeh simie ceucat nawh tom: hoek kao: ju kawx, ang pon laig kah daux cub phung: hun: Simiang Siyiex leeing ju leeing phan:;
kheu ang kix rieb pex kah khaomun mai rawm:, kah daux krax yam lih pex khaing: meung Ejiptux, mai kheu vai kix kah Balam kawn: simex Bawrax veng Petaw, haktiex Mesopotemia: sonsang jhax lawg kah pex.
Yuh kah mawx ang ah Simiang Siyiex, Siyiex pex ang nghiiet kah lox Balam; mai Simiang Siyiex pex deeh tieh krax jhax lawg mawh krax pa nawb bwan: kah pex, mawh kheu moh Simiang Siyiex, Siyiex pex, kah pex.
Pex ang pon tix tawx pa nhim: kah kix mai krax mag mi khankix baux singaix im: ju pex leeing ju.
"Pex paw koeng kah pwi Edom, mawh kheu kix mawh puxaik pex; mai pex paw koeng kah pwi Ejiptux, mawh kheu hoik sax mawh pex siliex kah daux meung kix.
Tom: sidauh hoek kawnpraix doeh simie ceucat kix loe: ju, kix tag pon tix laig kah daux cub phung: hun: Simiang Siyiex.
Pa Kieh Dee Bang: Singax
"Yam hu: puing: pex naing kah pwi koeng tix khankix, mai yam kawn: ot pex daux tab, yuh satix via pex khaing: pa caox pa caig.
"Phan: pwi tix kauxkaux kah daux sinax pex, ang singax kah ceu pa lih tix mawh plak ponsawm:, nawh yaox tix lih ot plak praix tab, nawh ang pon ot daux tab;
yam hoek plakbo, nawh tag heem: tix kah rawm:, yam klip singaix, kieh nawh deeh laig kah daux tab.
"Pex caw tix koe: dauh dee kah plak praix tab sonsang hu: pex kah;
pex caw tix koe: sipeed khaox tix mu:, pa mawh kraung shiao pex, yam hu: tiag kah plak praix, pex tag kaong: daux kah, mai kheem: ceu pa seeing: pa lih khaing: pex kah.
Mawh kheu Simiang Siyiex, Siyiex pex tag lailing kah sinax tab pex, sonsang taoh kah pex, mai ap pwi koeng pex khankix kah pex, mawh kheu nan:, tab pex caw tix singax, mai son ang Nawh Cao: yaox pa ang singax kah daux sinax pex, mai veeh tix khaing: pex.
Been Son Grawng: Kuceu
"Phan: koe: siliex pa to: khaing: cao: nawh, hoek ot mai pex, paw giex tix deeh tawx kah cao: nawh;
kieh nawh ot mai pex, kah dauh dee pa laug nawh, kah daux veng pa moh tix; paw yuh krax kha: kah nawh.
Paw kieh bun: coh kaux koe: kah daux kawn: bun: Isarilax, mai paw kieh simex coh kaux koe: khaing: daux kawn: simex Isarilax.
Pex ang pon viex mau coh kaux, mai mau ngawh sox hoek kah nyiiex Simiang Siyiex, Siyiex pex, sonsang tiextu kah; mawh kheu in: khawm: ra: mawh pa seeing: pa brai: kah Simiang Siyiex, Siyiex pex.
Pex ang pon teei rao mau kah puxaik tix, rao mau kah piang mau, mai rao kah piang pa ih pa un:, mai rao kah piang ceu pa tawx ceuk rom, sonsang pon tix rao.
Pwi tang: ceu pex pon tix teei rao tawx nawh yaog, viang mawh nan:, puxaik pex Isarilax ang pon tix teei rao, sonsang nawb Simiang Siyiex, Siyiex pex bwan: kah pex, kah daux pa yuh pex kah taix tix khawm: uik, kah daux hahtiex laig teei pex tix cie.
"Yam yuh maix krax tiextu kah Simiang Siyiex, Siyiex tix, pex ang pon deuh bawg yam tom: rheung:, sonsang yuh tix kah an:, mawh kheu Simiang Siyiex, Siyiex pex tag mhaing: an: kah pex tete, phan: pex ang tawx, tag sang mawh phimap kah pex.
Phan: pex ang yuh krax tiextu, an: tag ang mawh phimap kah son pex.
Yuh satix pex hawt tix yuh awm: lox pa kaoh khaing: jheeh tix, awm: pa hoik khaw: rhawm: pex tix yuh kah Simiang Siyiex, Siyiex tix, pa hoik tawx pex sijax mukheu kah jheeh tix.
"Yam laig pex daux sipeem plix siiet paoxplawg paoxnyhawm: tix, pex pon tix ih plix siiet tom: sak tix, awm: pa koe: rhawm: pex tix ih, viang mawh nan:, pex ang pon sau: tix viex kah daux bau: tix.
Yam laig pex daux kaung: nghox ca pa kawn jung paoxplawg paoxnyhawm: tix, pex tag pon tix caik sigleem: nghox ankix kah taix tix, viang mawh nan:, pex ang pon tix shiao sivawg mai vawg sigleem: nghox paoxplawg paoxnyhawm: tix khankix heue.
Been Pa Dex Pa Dawd Pa Gwieh Paox Tix
Yam teei simex moeng tix, phan: simex ang lai moh kah bun: an:, kheu yaox simex an: ceu pa deuh phimap kah nawh, nawh tag tiiem: lai gwieh paox tix, mai ap an: kah daux taix nawh mai tag ploi: nawh ing: kah nyiiex tix.
Yam hoik lih bun: an: khaing: nyiiex, nawh deeh pon tix moeng pwi tang: kaux,
phan: mex khaix nawh ang moh kah nawh, kieh nawh tiiem: lai gwieh paox tix, mai ap kah daux taix bun: an: mai ploi: bun: an: lih khaing: nyiiex tix, phan: ang mawh nan:, phan: mex khaix yum:,
mex phao kah: nawh, pa hoik gwieh paox tix, ang lai deeh pon rieb mawh moeng tix, kheu hoik seeing: nawh; mawh kheu an: mawh pa seeing: pa brai: kah plak sivoe Simiang Siyiex, pex ang pon tix viex phimap an: hoek kah piang haktiex tawx Simiang Siyiex sinngao kah pex.
Been Son Kuceu
"Yam teei pwi tix kaux moeng khraox tix, nawh ang pon tix lih hu: daux naing, mai ang pon tawx beeh glawm: kah nawh; nawh tag ot giex kah nyiiex tix tix num, sonsang gauxrhawm: nawh tau mai moeng tix.
"Pwi mawx ang ah, ang pon tix teei khlawp simaox mhaw: plak greem: mai khlawp simaox mhaw: plak piang sonsang tang tix kah. Mawh kheu mhaw: pa tang nawh an: mawh pa een: nawh ju tix kah.
"Phan: pwi tix kaux yaox kah briex pwi kah kawnpraix ceu pwi Isarilax khaing: daux puxaik nawh tix kauxkaux, phan: deuh nawh mawh siliex ang ah, mai coh kah nawh ang ah, khaix an: tag caw tix pah cao: briex an: yum: pex tag teei tix tik pa caox pa caig an: khaing: daux sinax pex.
"Yuh satix pex kah grawng: jhawm: saux sipawg, yuh satix mai yuh awm: lox tawm: cao: giex kaing: li pwi Lewix, awm: hoik tawm: Aux kah kix, pex yuh satix yuh hawt awm: an:.
Doh keud kah pa hoik yuh Simiang Siyiex, Siyiex pex kah Meriam, daux krax yam lih pex khaing: meung Ejiptux.
Yam tawx pex puxaik tix yaog tix ceuceu, pex ang pon laig daux nyiiex nawh, ang pon teei kraung pa sang tang tix deuh.
Maix tag cung kah plak praix, pwi pa yaog yaing an:, tag viex kraung pa tang tix deuh hoek tawx kah maix.
Phan: nawh mawh pwi hot, pex ang pon priex kraung tang an: tiang sawm:,
yam laig singaix maix tag deeh tawx kraung pa tang nawh tix deuh, sonsang koe: ceu pa lhop nawh ponsawm:, mai sonsang nawb nawh bwan: kah maix, ceu an: tag mawh pa rauh pa see son maix, kah plak sivoe Simiang Siyiex, Siyiex maix.
"Pex paw yuh krax kharhawm: kah siliex vai tix, pa mawh pwi hot pa cud cha:, pa mawh puxaik pex ang ah mai nyo sinie ang ah, pa ot kah daux haktiex pex, mai daux veng pex;
pex tag tawx ngawh riang kaing yuh nawh, sivoe sang klip singaix, mawh kheu nawh mawh pwi hot, mai nawh een: rhawm: tix kah ngawh riang kaing yuh tix; lhat nawh riag yo deuh phimap kah pex sivoe Simiang Siyiex, Siyiex pex, mai an: lih tix mawh phimap kah pex.
"Keeing: khankix tag ang pon tix yum: tang: phimap kawnpraix tix, mai kawnpraix nawh tag ang pon tix yum: tang: phimap keeing: tix, pwi kukaux tag yum: tang: phimap cao: tix.
"Pex ang pon tieh loh kah been pa rauh pa see, grawng: nyo sinie mai kawn: doe: khankix, mai ang pon teei kraung ceep miexmai: mawh kraung pa tang tix deuh,
kieh pex doh keud kah mawh tix siliex kah meung Ejiptux mai Simiang Siyiex, Siyiex pex hoik taoh pex khaing: tan:, mawh kheu nan:, Aux tom: tawm: lox sonsang yuh pex ceu in: khankix.
"Yam vawg pex nghox daux kaung: tix, mai piawm: jhoi: nghox tix jhoi: daux kaung:, pex ang pon tix deeh hu: teei kah, kieh an: mawh son nyo sinie, son kawn: doe:, mai son miexmai:, sonsang nawb Simiang Siyiex, Siyiex pex bwan: kah pex kah kaing jhaw: yuh pex kah taix tix.
Yam pieh pex kah plix Sanlun, paw lai baox pieh pa deuk, kieh an: mawh son nyo sinie, son kawn: doe:, mai son miexmai:.
Yam khrawm: pex plix siiet daux sipeem plix siiet, pex ang pon sut plix an: khaix khrawm: tix, kieh an: mawh son nyo sinie, son kawn: doe:, mai son miexmai:.
kieh pex doh keud kah mawh tix siliex kah meung Ejiptux, mawh kheu nan:, Aux tom: tawm: lox sonsang yuh pex ceu in: heue.
Phan: pwi koe: see kah paox tix, mai hoek kah nyiiex prawng see:, yam tat cao: prawng see: kieh khawm: ra: kaux, mai kieh kaw pa ang koe: krax phit krax lud luat luan, mai ciyang kah kaw pa phit pa lud.
Phan: pwi phit mawh pa khaw: tix sivied kah, cao: prawng see: tag kieh nawh gup tix it, mai sivied nawh kah plak sivoe pwi, awm: koe: krax phit krax lud nawh, awm: pa keung: nawh tix pon krax pa sivied tix.
Kieh sivied kah nawh tipon: taix, mai paw kieh lheu: khaing: an:, phan: sivied lheu: khaing: an:, puxaik pex tag salao pex sivoe ngai: pex.
"Maix tag ang jup jheeh moi kah jup yam dig kah nghox heue.
Grawng: Prawng See: Kah Puxaik Pa Ang Koe: Kawn:
"Phan: puxaik ot tau mai paox tix, mai phan: tix kauxkaux yum:, mai ang koe: kawn: simex, moeng kaw pa yum: an: tag ang pon mex kah pwi plak praix paox nyiiex paox ma: tix, mai kieh puxaik mex nawh laig ot mai nawh, kieh mawh moeng tix, mai yuh beeh glawm: puxke: tix kah bun: an:.
Kawn: simex pa liang tix keh khaing: nawh tag deeh plud ceukaux puxke: pa hoik yum:, sonsang ang min: ceukaux nawh pon tix mawh pa preet tix khaing: ceu pwi Isarilax.
Phan: pwi an: ang rhawm: rieb moeng puxke: tix, khaix an: moeng puxke: nawh tag hu: kah diang siviex veng kah kuad song: mai ah nin:,pux mex aux ang cu tix plud ceukaux puxke: tix khaing: daux Isarilax; nawh ang cu tix teei beeh glawm: puxke: tix pa mawh mex aux
Mai kuad song: veng ot nawh, tag kok kah nawh mai krai lox kah nawh, phan: nawh ca: kawn: ah nin:,aux ang rhawm: simie tix teei kah nawh,
mai moeng puxke: nawh, tag hoek kah nawh, plak sivoe kuad song:, mai peeik kiep khaing: caong nawh, mai baig kah pakngai: nawh, bun: an: tag pawk lox ah nin:,tik kah simex pa ang pon sang nyiiex ma: puxke: tix
Kah daux pwi Isarilax tag kok nyiiex ma: in: mawh pa yaox tix peeik kiep tix.
Been Son Kuceu
Phan: pwi ra: kaux simah paox tix, mai phan: moeng pwi an: tix kaux hoek dex, sonsang teem: nawh kah mex tix khaing: daux taix pwi pa tawk kah nawh, phan: nawh giex bluh kah pa viex simex an:,
pex tag tat tix tik taix bun: an:, paw kieh ngai: pex caoxrhawm: kah nawh.
"Pex ang pon tix koe: kla: jiang tang: khaing: paox tix, pa mawh kla: jiang cien tix mu:, mai pa chaong: tix mu: kah daux bau: tix.
Pex ang pon kieh kraung tong: koe: ra: ceu daux nyiiex tix, pa ting tix mu:, mai pa iak tix mu:.
Pex caw tix koe: kla: jiang pa khaw: pa caw mai kraung tong: pa khaw: pa caw; sonsang lang: singaix ju pex kah daux haktiex pa tawx Simiang Siyiex, Siyiex pex kah pex.
Mawh kheu pwi pa yuh kah ceu in: khankix, mai pwi pa yuh pa ang rah ang see mawh ceu pa seeing: pa brai: kah Simiang Siyiex, Siyiex pex.
Grawng: Lauxleeing: Ceu Pwi Amaliet
"Doh keud kah pa hoik yuh pwi Amaliet kah pex daux krax, yam lih pex khaing: Ejiptux,
kix lih hoek puing: pex yam awn: riang mai yam taug mao pex, mai pah kah pwi pa dauh plak khaix; mai kix ang lhat kah Simiang Siyiex.
Mawh kheu nan:, yam hoik tawx Simiang Siyiex maix laux lee: tix, khaing: pwi koeng khankix, pa koe: hawt vungviang pex, kah daux haktiex pa tawx Simiang Siyiex mawh sinngao son maix, maix tag preeit krax pa doh keud doh sawn: kah ceu pwi Amaliet khankix khaing: greem: raoma:, maix tag ang pon tix piawm: an: heue.
Grawng: Tan Plix Khaox Pa Liang Tix Pon Mai Kao: Son Tix Son.
Yam laig teei maix tix ot kah daux hakteh pa sang tawx Simiang Siyiex mawh sinngao son maix,
teei can ceu pa liang maix tix pon phao kah: khaing: hakteh pa tawx Simiang Siyiex maix kah maix, maix tag sau: ankix daux khrawng: tix mu:, mai viex hu: kah dee pa hoik laug Simianng Siyiex maix tix deuh ceukaux Nawh Cao:;
mai hoek kah pwi pa yuh kaing jhaw: cao: giex kaing: li kah daux baux yam an:. Mai ah nin: kah nawh, "Aux doh keud tix kah Simiang Siyiex kah daux in: singaix, kah hoik hoek aux kah daux haktiex pa hoik tiextu Simiang Siyiex kah keeing: ex khankix, sonsang tawx ankix kah ex."
Khaix an: cao: giex kaing: li tag teei khrawng: an: khaing: daux taix maix, mai deuh kah plak sivoe khu: dee tan Simiang Siyiex maix.
Maix tag ah nin: kah plak sivoe Simiang Siyiex maix, "Keeing: aux hoik mawh ceu pwi Shurix tix kaux, pa hoik sang grai: hu:, mai nawh hoik lih hu: peung tix ot kah daux haktiex meung Ejiptux, viang pwi nawh mawh pa tux tan: kawx, deeh lih tix mawh ceu pwi pa ting pa lhaong: mai ceu pwi pa ting riang ting rao tix cub mai mawh ceu pwi pa nie pre haoh hun: tan:."
Ceu pwi Ejiptux khankix hoik yuh krax pa lang: teung: caox kah piang yix mai hoik khin: yix, thux yi mai teek yix yuh kaing jhaw: siliex pa kied kin: tete,
Khaix an: yix riag yo lox tix kah Simiang Siyiex keeing: yix, mai Simiang Siyiex hoik mhong: kah lox yix, mai hoik yaox kah krax pa kham: geu: yix, mai hoik yaox kaing jhaw: pa yuh yix, mai khawm: kah krax pa khinkix kah piang yix khankix.
Mawh kheu nan:, Simiang Siyiex hoik viex yix lih hu: khaing: daux meung Ejiptux kah plawng: taix pa ting riang Nawh Cao:, mai tawm: taix pa nih Nawh Cao:, mai krax pa lhat pa graung mai mhai: sakse khankix, mai khawm: krax pa daox pa am: khankix.
Nawh Cao: hoik viex ex hoek dee in:, mai hoik tawx haktiex in:, pa mawh haktiex dee lih rawm:teeih mai rawm: hia: kah ex;
Simiang Siyiex eue, yamin: aux hoik viex plix khaox plix ox pa liang tix pon phao kah: khaing: haktiex pa hoik tawx maix kah aux. Khaix an: maix tag deuh khrawng: an: kah plak sivoe Simiang Siyiex maix, mai krub kah Simiang Siyiex maix.
Mawh kheu nan:, maix tag gauxrhawm: kah daux bwanson: kuceu, kah pa hoik tawx Simiang Siyiex maix, kah maix, mai kah daux nyiiex ma: maix, khawm: ceu pwi Lewix mai nyo sinie pa ot kah daux sinax pex.
Yam hoik tawx maix krax tan krax lu kao: son tix son khaing: plix khaox plix ox pa pon tix kuceu, kah daux num loe: pa mawh num tan maix kao: son tix son, mai maix tag tawx ceu ankix kah ceu pwi Lewix, mai nyo sinie, mai kah miexmai: kawn: doe:, sonsang pon kix tix ih tom: sak kah daux veng maix khankix,
Khaix an: maix tag ah nin: kah plak sivoe Simiang Siyiex maix, aux hoik teei krax tan pa singax singeh, kao: son tix son lih khaing: daux nyiiex aux, mai aux hoik tawx an: kix kah ceu pwi Lewix, mai kah nyo sinie, mai kah miexmai: kawn: doe: awm: gumlox pingnyap pa hoik tawm: Maix Cao: kah aux khawm: uik. Aux ang phit lud kah gumlox pingnyap Maix Cao: mai aux ang nyang piawm: kah ankix.
Aux ang sax ih ceu ankix tix ceu kawx, yam koe: krax lauxrhawm: aux, mai aux ang sax teei ceu an: kix lih yam ang tix singax, mai aux ang tawx ankix tix ceu kawx kah son pwi yum:, aux hoik cu nghiiet kah gumlox Simiang Siyiex aux, mai aux hoik yuh awm: pa hoik tawm: Maix Cao: kah aux.
Num: tix jhak khaing: dee pa singax singeh ot Maix Cao: khaing: daux meung raoma:, mai nawb bwan: kah piang pwi ceu Maix Isarilax khankix, mai kah piang haktiex pa hoik tawx Maix Cao: kah yix, pa hoik tiextu Maix Cao: kah keeing: yix khankix, pa mawh haktiex dee lih rawm:teeih mai rawm: hia:."
Ceu Pwi Siyiex Pa Tang: Siyox Khaing: Paox Tix
Kah daux singaix in: Simiang Siyiex maix, hoik tawm: gumlox beenli mai lox tat jhawm: prawng Tix sonsang hawt maix tix yuh, mawh kheu nan:, maix tag priex tix hawt khawm: rhawm: khawm: rhi: tix mai khawm: ju tix khawm: uik.
Kah daux in: singaix maix hoik rieb Simiang Siyiex mawh Siyiex maix, mai hawt lawng kah daux krax Nawh Cao:, mai priex tix hawt gumlox beenli Nawh Cao: khankix, mai lox tat jhawm: prawng Nawh Cao:, mai cu nghiiet kah gumlox Nawh Cao:.
Lheu: khaing: an: kah daux in: singaix, Simiang Siyiex hoik rieb maix mawh ceu pwi Nawh Cao:, pa tang: siyox khaing: pwi tang: ceu, awm: hoik yuh Nawh Cao: mukheu kah maix, sonsang priex maix tix hawt gumlox pingnyap Nawh Cao: khawm: uik,
Mai Nawh Cao: tag deuh maix lhaong: kah piang ceu pwi khankix, pa hoik phan: hoik deuh Nawh Cao:, kah daux krax pa yaogyaw, mai kah daux krax pa ao: min:, mai kah daux krax pa koe: min: plakngai:, mai sonsang kieh maix mawh ceu pwi pa singax singeh, son Simiang Siyiex maix, awm: pa hoik koe: sijax mukheu Nawh Cao: kah maix heue.
Gumlox Beenli Pa Tiiem: Kah Piang Simaox
Khaix an: Mose mai kuad song: ceu pwi Isarilax khankix tawm: lox kah pwi khankix ah nin:. "Priex tix hawt gumlox pingnyap pa tawm: aux kah pex khankix daux in: singaix awawx."
Kah daux singaix yam tiang maix kah plak toi: rawm: klawng: Yawdan, kah haktiex pa sang tawx Simiang Siyiex pex, kah maix, mai maix tag sum: tix deuh lon: simaox ting, mai kraix simaox ceed kah piang an: kix.
Maix tag tiiem: gumlox beenli inkix khawm: uik kah piang, yam hoik tiang maix toi: plak an:, sonsang pon maix tix laig kah daux haktiex pa sang tawx Simiang Siyiex maix kah maix, pa mawh haktiex lih rawm:teeih mai rawm: hia:, awm: pa hoik yuh Simiang Siyiex sijax mukheu Tix kah keeing: maix khankix,
Yam hoik tiang maix kah plak toi: rawm: klawng: Yawdan, yam hoik hoek maix kah piang gawng Ebalax, maix tag sum: lon: simaox inkix, awm: pa tawm: aux maix kah daux in: singaix, mai maix tag kraix simaox ceed kah piang.
Maix tag sum: khu: dee tan kah lon: simaox son Simiang Siyiex maix tan: tix mu:, maix tag ang pon tix shiao kraung rhiem: tix ceu kawx kah piang simaox an:.
Maix tag sum: khu: dee tan Simiang Siyiex maix kah simaox pa ang max, mai maix tag tan krax tan pa gleeing kah piang son Simiang Siyiex maix.
Maix tag tan krax tan pa nhim: khankix, mai maix tag ih tan: tau mai krax gauxrhawm: tix kah plak sivoe Simiang Siyiex.
Mai maix tag tiiem: gumlox beenli in: khawm: uik sidawng: laing laing kah piang lon: simaox an:.
Khaix an:, Mose mai cao: giex kaing: li khankix, mai ceu pwi Lewix krai kah ceu pwi Isarilax khankix ah nin:. "Ceu pwi Isarilax khankix eue, jawg tix nghiiet singaix in: maix hoik lih mawh ceu pwi Simiang Siyiex maix."
"Mawh kheu nan:, maix tag cu nghiiet kah lox Simiang Siyiex maix, mai hawt tix yuh gumlox pingnyap Nawh Cao:, mai kah gumlox been Nawh Cao: khankix, pa tawm: aux kah maix, kah daux in: singaix heue.
Krax Jhax Lawg Pa Pao: Kah Piang Gawng Ebalax
Mai Mose tawm: kah pwi khankix kah daux singaix an: ah nin:.
Inkix tag mawh pa cung kah piang gawng Gerazim mai pa sang nawb bwan: kah piang pwi khankix, yam hoik tiang maix kah plak toi: rawm: klawng: Yawdan. Mai pwi inkix mawh Simion, Lewix, Yudax, Isakha, Yosiep mai Binyamin khankix.
Inkix mawh pa cung kah piang gawng Ebalax, sonsang krai pao: pa jhax lawg, mai pwi kix mawh Rubin, Gat, Asha, Zebulun, Dan, mai Napthalix khankix.
Mai ceu pwi Lewix khankix, yo lox ting sinum ah nin: kah pwi Isarilax khankix.
"Kieh krax pa jhax lawg koe: kah piang pwi pa yuh rieng rao pa saik ang ah, rieng pa raug ang ah, pa mawh ceu pa seeing: Simiang Siyiex kah, mai kaing jhaw: pa yuh kah taix, cao: yuh kaing taix mai pa jung tix deuh an: khankix kah dauh dee pa glip, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa yuh pa ang khaw: ang jiet kah miex keeing: tix, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa gah rong: mee: haktiex paoxplawg paoxnyhawm: tix. mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa kieh pwi dug ngai: lud hu: khaing: daux krax, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa tieh lox prawng pa rauh pa see kah piang nyo sinie, mai kah piang miexmai: kawn: doe: khankix, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa it tau mai moeng keeing: tix, mawh kheu hoik peeik nawh kraung ceep keeing: tix, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa phit vao mai tosat tix ceuceu, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa it tau mai pux bon tix pa mawh kawn: bun: pa hawt keeing: tix ang ah, mai kawn: bun: hawt miex tix ang ah, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa it tau mai miex moeng tix, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa tawk kah paoxplawg paoxnyhawm: tix, kah dauh dee glip, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa ih mau chun: praok, sonsang pah kah pwi pa ang koe: phimap tix kaux, mai pwi khawm: uik deeh pawk lox mai ah Amen!
kieh pa jhax lawg koe: kah piang pwi pa ang kaux sijax kah gumlox beenli in: khawm: uik, mai pwi khawm: uik deeh pawk lox mai ah Amen heue.
Krax Nawb Bwanson: Kah Pwi Pa Cu Pa Nghiiet
Phan: maix priex rhawm: tix nghiiet kah lox Simiang Siyiex tix mhawmmhawm:, mai hawt yuh awm: gumlox pingnyap Nawh Cao: khawm: uik, awm: pa tawm: aux kah maix daux in: singaix, Simiang Siyiex maix tag deuh maix lhaong: khaing: ceu pwi khawm: uik kah piang ca: haktiex in:.
Phan: maix cu nghiiet kah lox Simiang Siyiex maix, bwnson: inkix khawm: uik tag lih hoek kah piang maix mai hawt khaix maix;
maix ot daux veng daux yaong: kah tag pon bwanson: ot kah daux kaung: daux ma: kah tag pon bwanson:.
Kawnpraix tokaux maix mai can ceu plix pa lih khaing: daux haktiex maix, mai cub khawng: brie maix khankix, pa mawh kawn: moi mai kawn: yung: maix khankix, tag pon bwanson: pa pre haoh hun:.
Kah daux khrawng maix mai kah daux tawg klong: klu klao maix khaomun khankix kawx, tag mawh pa pon bwanson:.
Yam laig maix kah daux nyiiex tix, maix kah pon bwanson: mai yam lih maix khaing: nyiiex tix kawx maix kah pon bwanson:.
Simiang Siyiex tag kieh pwi koeng maix; pa yaog tix tieh feen kah maix khankix, mawh pa sum: pa nai: khaing: sivoe ngai: maix; kix lih hoek puing: maix kah daux krax tix nyaing, mai kix tag yaox tix to: daux krax aliah nyaing kah plak sivoe maix.
Simiang Siyiex tag nawb bwanson: hoek kah piang maix, kah daux krao: pa priex maix kraungkhrai: tix, mai kah can pa yuh maix kah taix tix khawm: uik. Mai Nawh Cao: tag nawb bwanson: kah piang maix, kah daux haktiex pa sang tawx Simiang Siyiex pex kah maix.
Phan: maix priex tix hawt gumlox pingnyap Simiang Siyiex maix khankix, mai phan: hawt hu: kah daux krax Cao: Simiang Siyiex, tag deuh maix mawh pwi pa singax kah son Tix, awm: pa hoik tiextu Nawh Cao: kah maix.
Khaix an: pwi haktiex khawm: uik tag yaox kah mawh maix pa hoik kok tix kah daux ceukaux Simiang Siyiex, mai kix tag koe: krax lhat krax graung kah maix.
Mai Simiang Siyiex tag sang tawx maix magmi tom: nie, mai kawn: prai maix, mai khawng: brie eei: maix khankix, mai plix khaox plix ox pa lih khaing: haktiex maix, kah daux haktiex pa hoik tiextu Simiang Siyiex kah keeing: maix, son pa sang tawx kah maix.
Simiang Siyiex tag paoh krao: raoma: khaing: dee priex Nawh Cao: kraungkhrai: cau pa mhawm:, sonsang tawx Nawh Cao: rawm: lhiex lih kah piang tiex maix, kah daux bawg yam praix klawng: an: khankix, mai nawb bwan: kah piang kaing jhaw: pa yuh maix kah taix tix. Maix tag pon tix tawx ceuk rawm: kah ceu pwi tom: nie, viang mawh nan:, maix tag ang pon tix ceuk kah kix.
Phan: maix koe: krax cu krax nghiiet kah gumlox pingnyap Simiang Siyiex maix, kah pa tawm: aux kah maix daux in: singaix, mai phan: maix priex rhawm: tix hawt yuh kah ceu an: khankix, Simiang Siyiex tag kieh maix mawh kaing ang kieh maix mawh sidax, maix tag ot kah piang mai ang ot kah greem:.
Mawh kheu nan:, maix tag ang pon veeh tix khaing: lox pa tawm: aux khankix kah maix, kah daux in: singaix, kah plak khawn: gwiex, khawn: dawm:, mai hu: hawt khaix siyiex tang: kaux tang: hak, mai yuh kaing jhaw: kix heue.
Jhax Lawg Piang Pa Ang Cu Ang Nghiiet
Viang mawh nan:, phan: maix ang cu ang nghiiet kah lox Simiang Siyiex tix, mai ang hawt tix yuh awm: gumlox pingnyap Nawh Cao:, mai been pa deuh Nawh Cao:, kah pa tawm: aux kah maix, daux in: singaix khawm: uik, krax pa jhax lawg tag hawt maix mai hoek piang maix.
Mawx ot daux veng daux yaong: kah pon pa jhax lawg, ot kah daux kaung: daux ma: kah pon pa jhax lawg.
Krax pa jhax lawg tag koe: kah daux khrawng: maix, mai kah daux tawg klong: klu klao maix khaomun.
Krax pa jhax lawg tag koe: kah piang kawnpraix maix, mai kah piang plix khaox plix ox pa lih khaing: daux haktiex maix, khawm: kah piang khawng: brie eei: maix, pa mawh moi, yung: maix khankix.
Yam laig maix kah daux nyiiex tix kah pon pa jhax lawg mai yam lih maix khaing: nyiiex tix kah pon pa jhax lawg.
Simiang Siyiex tag kieh pa jhax lawg, mai pa tuktiaktukte:, mai pa map nai: hoek kah piang maix, kah daux kaing jhaw: pa yuh maix kah taix tix tag pon pa lauxleeing:, mai tom: hoik khran: grai: grup maix, kheu jao pa caox pa caig yuh maix kah pa hoik tik vud maix Nawh Cao:.
Simiang Siyiex tag kieh jhawm: saux preng hoek kah piang maix, tom: sidauh yuh Nawh Cao: maix but khaing: haktiex pa sang hu: teei maix tix cie.
Simiang Siyiex tag sivied maix, mai tawx krax kham: geu: jhawm: saux nhao:, jhawm: saux hoek, jhawm: saux uah, mai jhawm: saux ngu, pa kied lang: teung: khaing: lawm vaig mai bhaung: si oh, pa yum: yuh pang: khaox, jhawm: saux lih rawm: im:, an: kix tag hawt khaix maix tom: sidauh grai: grup maix.
Mai raoma: kah piang kaing: maix, tag lih tix mawh tawng lheung:, mai tiex kah greem: caong maix tag lih tix mawh rhiem:.
Simiang Siyiex tag kieh rawm: lhiex pa sang lih kah piang haktiex maix, deeh tieh tix mawh phawng: tiex phawng: tug lih khaing: raoma: mai hoek kah piang maix, tom: sidauh lauxleeing: maix.
Simiang Siyiex tag kieh maix som nai: kah plak sivoe pwi koeng maix, maix lih hu: sonsang puing: kix kah daux krax tix nyaing, mai maix tag to: sivoe kix kah daux krax aliah nyaing, maix tag lih tix mawh pwi pa vungviang kah piang haktiex khawm: uik.
Tokaux yum: maix tag mawh priex ih sim: raoma: mai tosat kah piang haktiex, pwi mawx kawx tag ang pon tix grheu: an: kix.
Simiang Siyiex tag kieh maix kham: geu: jhawm: saux muad haktiex Ejiptux, jhawm: saux glhua: nex, jhawm: saux ngoi:, jhawm: saux dao:, pa ang maix lai pon pai: moi:.
Simiang Siyiex tag kieh maix kham: geu: jhawm: saux yhot, jhawm: sau dug ngai:, jhawm: saux lung lang rhawm: khankix.
Mai maix tag pu pi: tix hu: bawg yam jung singaix, awm: pwi dug ngai: pa pu pi: tix hu: kah daux krax pa faik, kaing pa yuh maix khankix tag ang koe: krax pa haok hwan:, maix tag kharhawm: tix, pwi tag tud rhim: maix jheengjheeng:, mai ang koe: pwi pa pon taoh maix.
Viang maix hoik teei tix koe: moeng kawx, pwi tang: kaux tag it tau mai nawh, viang maix hoik sum: sipeem plix siiet kawx, maix tag ang yaox tix ih plix khankix.
Moi eei: maix viang pah kah plak sivoe ngai: maix kawx, maix tag ang yaox tix ih nex, la eei: maix viang mawh pa tud pa rhim: khaing: plak sivoe maix kawx, tag ang lai deeh tawx kah maix, yung: eei: maix tag tawx kah pwi koeng maix, mai ang lai koe: pwi pa sang deeh taoh kah ankix tix kaux kawx.
Kawn: simex kawn: bun: maix, tag mawh pa hoek kah pwi tang: kaux, mai ngai: maix maong tix jhak kah kix, leeing: lang: singaix mai koe: krax pa lauxrhawm:, mai taix maix kawx tag mawh pa ang lai koe: riang.
Ceu pwi pa ang maix sax tawng, tag teei tix ih plix khaox plix ox haktiex maix, khawm: can ceu pa pon maix khaing: riang tokaux tix, mai maix tag mawh pa kham: geu: krax pa khin: pa thux pwi jheengjheeng:.
Mawh kheu nan:, maix tag mawh pa yhot, kheu jao pa yaox maix kah ngai: cao: tix khankix.
Simiang Siyiex tag sivied maix kah krax pa kham: geu: jhawm: saux muad pa lang: teung: pa ang maix pon pai: moi: kah nge: ngawng, mai kah gawng caong maix khankix, jah kah tiag caong maix tom: hoek kah piang kaing: maix.
Simiang Siyiex tag viex tokaux maix khawm: khunhawkham pa hoik yaog maix kwang: kah piang tix, hoek kah ceu pwi pa ang maix, keeing: maix nyang sax tawng sax yung, mai maix tag yuh kaing jhaw: siyiex tang: kaux tang: hak, pa mawh siyiex pa yuh tix kah khaox, mai siyiex pa yuh tix kah simaox khankix tan:.
Mai maix tag lih tix mawh pa daox pa am: mai been lox tiag, mai kah lox map lox sibriem, kah daux sinax ceu pwi khankix, kah dee sang grheu: Simiang Siyiex maix hu:.
Maix tag viex simie nghox tom: nie lih hu: kah daux tong kaung:, mai deeh yaox tix kraix khrawm: ceeix khaing:, mawh kheu sido tag ih ankix khawm: uik.
Viang maix sum: sipeem plix siiet, mai priex rien mhawmmhawm: kawx, maix tag ang yaox tix nyaux rawm: plix siiet, mai ang yaox tix khrawm:, grawhgrawng: nawh viag tag ih ankix.
Viang maix koe: khaox sanlun kah daux haktiex dee pa sang kwang: maix khawm: uik, maix tag ang yaox tix kraix bee an: kah tokaux tix, mawh kheu plix khaox sanlun maix hoik khrum: sivoe sang teem.
Viang maix keh kawn: simex kawn: bun: kawx, kix tag ang mawh cie maix. Grawhgrawng: nawh, kix luan tix mawh pwi pa giex pa laung kah daux taix pwi koeng maix khankix,
Sido tag ih pang: khaox maix, khawm: ceu pa sang pon maix khaing: daux haktiex maix khankix.
Ceu pwi tang: ceu pa ot kah daux sinax pex khankix, tag yaog tix lheu: laong:, mai baox nie lheu: laong: khaing: maix, mai maix tag mawh pa tiiem, mai baox nie lheu: tiiem khaing: kix.
Nawh tag pon tawx maix ceuk rawm. Viang mawh nan:, maix tag ang pon tawx nawh ceuk rawm; nawh tag mawh kaing: mai maix tag mawh sidax.
Krax pa jhax pa lawg inkix khawm: uik, tag hoek kah piang maix mai hawt khaix maix, mai krup maix, tom: hoek maix krax laux krax leeing:, kheu jao ang maix cu nghiiet kah lox Simiang Siyiex maix, ang priex rien tix hawt yuh awm: gumlox pingnyap Nawh Cao: mai kah beenli pa deuh Nawh Cao: khankix, kah pa hoik tawm: Nawh Cao: kah maix.
Ceu pa jhax pa lawg ankix tag mawh mhai: pa tang: pa yox, mai pa daox pa am: kah piang maix, khawm: kah piang doeh simie ceucat maix leeing ju leeing phan:.
Grawhgrawng: nawh, yam magmi maix mai ang gauxrhawm: tix yuh kaing jhaw: Simiang Siyiex tix,
Mawh kheu nan:, maix tag yaox tix yuh kaing jhaw: pwi pa koeng tix khankix, pa ploi: Simiang Siyiex hoek kah maix, kah daux pa cairhawm: tix, mai pa sang nyaux nie rawm:, mai pa ang koe: kraung ceep mai kah pa cud pa cha: kuceu, mai Nawh Cao: tag sau: iak rhiem: kah piang ngawg maix, tom: sidauh yuh Nawh Cao: maix lauxleeing:.
Simiang Siyiex tag viex ceu pwi tix ceu khaing: dee singai dee sidauh haktiex, mai kieh kix hoek puing: kah maix, awm: phai: pu: klang: ting, pa mawh ceu pwi pa ang maix sax tawng sax yung kah lox sikah kix.
Ceu pwi in: mawh pa riex hak pakngai:, pa ang koe: krax nab krax yam kah kuad song: nong: yu khankix, mai pa ang koe: krax caoxrhawm: kah kawn: nyawm khankix.
Mai kix tag ih khawng: brie eei: maix, mai plix khaox pa lih kah daux haktiex maix khankix, tom: hoek maix krax laux krax leeing:, nghox koi: ang ah, rawm: plix siiet pa khraox ang ah, rawm: bee ang ah, mai can khawng: brie pa eei: maix ang ah, mai kawn: yung: kawn: moi maix ang ah, kix tag ang lai prah maix cie tom: sidauh hoik yuh maix lauxleeing:.
Kix tag lai lawm kah maix hawt diang siviex maix, tom: hoek bawg yam grhup guh veng pa lhaong: pa kaux pa cong: maix, kah piang tiex khawm: uik, kah dauh dee pa een: maix rhawm: tix kah, mai kix tag lai lawm maix hawt diang siviex veng pex, pa koe: kah daux haktiex pex, kah dee pa hoik tawx Simiang Siyiex pex kah maix.
Yam ot maix kah daux pa lai lawm pwi koeng maix khankix, mai kah daux pa nied tix kin: kharhawm khankix, maix tag ih kah kawnpraix tokaux tix, pa mawh nex kawn: simex kawn: bun: maix, pa hoik tawx Simiang Siyiex maix kah maix.
Simex pa awn: nex nham: kaux hak kah daux sinax pex, tag koe: rhawm: pa koeng kah puxaik nawh mai kah moeng pa koe: piang naok nawh, mai khawm: kawnpraix pa kawn deuk khankix,
Nawh ang lai rhawm: tawx nex kawnpraix tix hkankix sonsang ih pwi pa dex pa dawd mai nawh, kheu jao ang nawh lai koe: ceu pa ih tix ceu kawx, kah daux bawg yam ot nawh, kah daux pa lai lawm pwi koeng khankix, mai kah daux pa hoik kied kin: yuh pwi koeng maix, krax kharhawm: kah daux veng ot pex khawm: uik.
Bun: pa awn: nex nham: kaux hak kah daux sinax pex pa ang sax pon kieh caong tix dig kah piang tiex kheu jao pa awn: nex nham: kaux hak an:, tag koe: rhawm: pa koeng kah mex pa koe: piang naok tix mai kah kawn: simex kawn: bun: tix,
rheem: pa lih kah sinax ba: nawh mai kawnpraix pa keh nawh an:, nawh tag mox tix ih dee glip, kheu jao hoik cud hoik cha: ceu pa ih yam ot nawh kah daux pa lai lawm pwi, mai kah pa kied kin: tix ot son nawh, yam yuh pwi koeng maix khankix krax kharhawm: daux veng ot pex khawm: uik.
Phan: maix ang yuh satix tix, mai ang hawt tix yuh awm: lox beenli pa hoik tiiem: tix deuh daux phuk lai, sonsang koe: krax lhat krax graung tix kah ceukaux SIMIANG SIYIEX MAIX, pa ting min: mai lhat graung kah.
Simiang Siyiex tag viex jhawm: saux preng pa lang: teung:, mai pa daox pa am:, mai jhawm: saux preng pa kied rheung:, mai jhawm: saux pa nie lheu: kin: mai pa kied rheung: bawg yam hoek kah piang maix mai kah piang doeh simie ceucat maix khankix.
Lheu: khaing: an: Nawh Cao: tag deeh viex jhawm: saux haktiex meung Ejiptux pa lhat graung maix kah, hoek kah piang maix, mai jhawm: saux ankix tag haok kawg kah piang maix.
Jhawm: saux kuceu mai jhawm: saux preng kuceu, pa ang nyang bax tiiem: kah daux phuk lai beenli in: khankix kawx, Simiang Siyiex tag viex hoek kah piang maix, tom: hoek maix krax laux krax leeing:.
Viang maix nie haoh hun: awm: simuing: raoma: kawx, maix tag lih tix mawh pwi tux, pwi iak pa deuk ceeix khaing:, mawh kheu ang maix cu nghiiet kah lox Simiang Siyiex maix khankix.
Awm: hoik khawrhawm: Simiang Siyiex tix yuh maix mawh pa mhawm: mai pre haoh hun:, awm: an: Simiang Siyiex tag khawrhawm: tix yuh maix laux lak pak leeing:, mai ang lai kieh maix koe: ceu koe: cak, mai tag deeh reeig tix tik maix khaing: daux haktiex pa sang hu: teei maix tix cie.
Simiang Siyiex tag kieh pex prungprang: rairuat sinax ceu pwi khankix, jah kah haktiex plak in: tom: sidauh hoek kah haktiex plak an:, mai maix tag yuh kaing jhaw: siyiex tang: kaux tang: hak pa ang cao: maix mai keeing: maix sax tawng, pa mawh siyiex khaox mai siyiex simaox tan:.
Kah daux sinax ceu pwi ankix, maix tag ang yaox krax laux lee: rhawm: tix, mai caong maix kawx, tag ang koe: dee sang laux lee: tix; Simiang Siyiex tag tawx rhawm: pa sikua mai iak riang ngai:, mai pa khrup rhawmrhi: maix tan:.
Ju maix tag koe: krax khi: krax glawh kah sivoe ngai: maix, maix tag koe: krax lhat graung leeing: ngaix leeing: sawm:, mai ang lai deeh pon taoh kah son ju tix.
Yam hoek plak ponngawb, maix tag ah nin:, kieh niied hoek plak ponbo, mai yam hoek plak ponbo, maix tag ah nin:, kieh niied hoek plak ponngawp, maix tag ah nan: kheu jao pa lhat pa graung pa yaoh daux rhawm: maix, mai pa yaox maix kah ngai: tix.
Mai Simiang Siyiex tag deeh teei maix ing: kah meung Ejiptux kah reu ting, awm: pa hoik sax krai Aux kah maix yuh nin:, maix tag ang lai baox yaox daux krax an:. Mai maix tag mawh pa coh tix kah pwi koeng maix khankix, mawh siliex simex siliex bun:, viang mawh nan:, tag ang koe: pwi liag kah maix heue.
Gumlox Sijax Mukheu Daux Haktiex Mawbax
Inkix mawh gumlox sijax mukheu pa hoik tawm: Simiang Siyiex kah Mose, sonsang yuh inkix tau mai ceu pwi Isarilax khankix, kah daux haktiex Mawbax, pa lheu: khaing: gumlox sijax mukheu pa hoik yuh Nawh Cao: tau mai kix kah daux baoh haktiex Hawrax.
Mose kok kah ceu pwi Isarilax khankix hoek ah nin:. "Pex hoik yaox ceu pa hoik yuh Simiang Siyiex kah plak sivoe ngai: pex khawm: uik, kah daux meung Ejiptux kah simiang Pharaw mai kah kawncau mausoi: nawh khankix, mai kah haktiex nawh khankix."
Mai grawng: pa cheukcheu: pa hoik yaox pex kah ngai: tix mai mhai: sakse pa daox pa am:, pa ting pa lhaong: ankix.
Viang mawh nan:, Simiang Siyiex ang nyang tawx pa chix keud chix sawn: kah daux rhawm: pex, mai pa chix yaox kah ngai: tix, mai pa chix mhong: kah yhaok tix khankix tom: hoek kah daux in: singaix.
Aux hoik thong: pex hu: kah daux tiag tipon: num, kraung ceep pex ang nyang griah khaing: pex, mai kiep pex kawx ang nyang laux khaing: pex,
Mai pex ang sax yaox tix ih khaomun, mai ang sax yaox tix nyaux rawm: plix siiet mai rawm: plai:, sonsang tawng pex mawh Aux Simiang Siyiex pex.
Mai yam hoik hoek pex dauh dee in:, Shihon khunhawkham haktiex Heshabon, mai Awgax khunhawkham haktiex Bashan khankix hoek tix puing: kah ex daux bang: naing mai ex hoik pex kah kix;
Ex hoik teei haktiex kix mai hoik tawx kah ceu pwi Rubin mai ceu pwi Gat mai ceu pwi Manashe tix plak mawh sinngao son kix.
Mawh kheu nan:, priex tix hawt gumlox sijax mukheu in: khankix, mai hawt tix yuh, sonsang pon pex tix haok hwan: kah daux krax pa sang yuh pex kuceu.
Daux in: singaix pex khawm: uik hoik cung kah plak sivoe Simiang Siyiex pex, jah kah cao: thong: pex, mai cao: kaing: doeh ceucat pex khankix, mai kuad riex ju khawm: cao: pa kwang: pex, mai cub kawn: simex ceu pwi Isarilax khankix,
mai kawn: pex, moeng pex, mai nyo sinie pa ot kah daux bang: pex, khawm: pwi pa kid khix pex, tom: hoek kah pwi pa kin rawm: pex khankix,
sonsang pon pex tix laig kah daux been gumlox sijax mukheu tau mai Simiang Siyiex pex, mai kah daux krax pa tiextu Nawh Cao: khankix, pa yuh Simiang Siyiex pex tau mai pex daux in: singaix,
mai Nawh Cao: hoik yaog tix deuh maix mawh ceu pwi tix cub son cao: Tix daux in: singaix, mai Nawh Cao: mawh Siyiex maix awm: pa hoik krai Nawh Cao: kah pex, mai krax pa hoik tiextu Nawh Cao: kah keeing: pex Abraham, Icak mai Yakop khankix.
Aux ang joeng yuh gumlox sijax mukheu in:, mai krax pa tiextu in: tau mai pex khaing:,
Aux hoik yuh tau mai can kix pa cung tin: tau mai ex kah daux in: singaix, kah plak sivoe Simiang Siyiex ex, khawm: kix pa ang ot tau mai ex kah daux in: singaix.
(Pex hoik tawng kah ot ex daux meung Ejiptux mai ex hoik lih khaing: sinax pwi tang: ceu pa hoik yaox ex nawh, yam hoik tiang ex tix hu:,
mai pex hoik yaox kah ceu pa seeing: pa koe: daux sinax kix, pa mawh khaox, simaox khankix, mai mau khri: khankix,)
mai khirhawm: kah daux sinax pex, simex, bun: mai kawn: nyiiex kawn: ma: pex kah daux doeh simie ceucat pex khankix, pa tang: tiah rhawm: tix singai khaing: Simiang Siyiex pex daux in: singaix, mai pa sang hu: yuh kaing jhaw: siyiex pwi tang: ceu khankix, mai lhat riah khaox nya mak liang: pa song: lih kuah kah daux sinax pex,
yam mhong: nawh kah lox pa jhax lawg in:, nawh tang: nawb bwanson: kah tokaux cao: tix kah daux rhawm: tix ah nin:, aux koe: pa nhim:, viang aux yuh alo tix, awm: pon cao: pa yoek kah plai: tix viex kah daux sinax pwi pa twah plai: khankix.
Simiang Siyiex tag ang pluat ploi: kah nawh, krax songrhawm: Simiang Siyiex mai krax pa bak pa viang Nawh Cao:, tag lih awm: taox ngu kah piang pwi an:, mai pa jhax lawg kuceu pa hoik tiiem: tix kah daux phuk lai in:, tag koe: kah piang nawh; mai Simiang Siyiex tag preet tix tik ceukau nawh khaing: greem: raoma:.
Mai Simiang Siyiex tag gwieh nawh khaing: doeh simie ceucat ceu pwi Isarilax khankix, sonsang kham: geu: phimap, awm: pa jhax lawg pa koe: kah daux gumlox sijax mukheu in: khankix, pa hoik tiiem: tix kah daux phuk lai beenli in:,
doeh simie ceucat kawnpraix maix, pa yaog tix kaoh khaix maix khankix, mai pwi tang: meung pa hoek khaing: daux haktiex dee singai khankix, yam yaox kix jhawm: saux preng daux haktiex an:, mai jhawm: saux pa hoik deuh Simiang Siyiex kah pwi ankix.
Kah daux haktiex khawm: uik hoik kieh mawh dee koe: mhat mai khaix hax ngu, ang koe: pa pon sum: plix simie nghox koi:, mai ang koe: plix koe: tai, mai ang koe: rib riem pa kuah baoh tan: tix ceu kawx, awm: pluk pliak Simiang Siyiex tix tik kah veng Sawdom mai veng Gawmawrax, veng Adama mai veng Zibo-im kah daux pa songrhawm: Tix, mai pa meet rhawm: Tix.
Can ceu pwi khankix tag ah nin:, "Simiang Siyiex hoik yuh ceu inkix kah haktiex in:, kheu jao patix lie? Krax pa hax krax songrhawm: ting in: mawh pa koe: dee bleeh yuh kah mawx lie?"
Pwi khankix ah nin:. "Mawh kheu hoik tik vud kix kah gumlox sijax mukheu Simiang Siyiex keeing: kix, pa hoik yuh Nawh Cao: tau mai kix, yam hoik viex Nawh Cao: kix lih khaing: meung Ejiptux.
Mawh kheu kix hoik yuh kaing jhaw: siyiex tang: kaux tang: hak, mai hu: krub kah siyiex pa ang kix tawng mai pa ang Nawh Cao: sax tawx kah kix.
Mawh kheu nan:, krax songrhawm: Simiang Siyiex, hoik yaog tix lih kah daux haktiex in:, mai kieh Nawh Cao: pa jhax lawg kuceu, pa hoik tiiem: tix deuh daux phuk lai in: lih hoek kah piang haktiex an: kix.
Simiang Siyiex hoik reeig tix tik kix khaing: daux haktiex kix, kah daux krax pa songrhawm:, mai kah daux pa meet rhawm: Tix, mai kah daux pa kied songrhawm: Tix, mai teei tix tik kix kah daux haktiex tang: dauh tang: dee, awm: pa koe: an: daux in: singaix.
Can kaing pa glip khankix mawh pa dex pa dawd mai Simiang Siyiex ex, mai ceu an: khankix pa deeh plak jhi: kieh sidawng: hoik mawh pa dex pa dawd kah ex, mai kah kawnpraix ex leeing ju, sonsang pon yuh ex awm: gumlox beenli in: khawm: uik heue.
Grawng: Pon Bwanson: Yam Deeh Hoek Kah Siyiex
Yam hoek ceu inkix kah piang maix, can krax pa nawb bwanson: mai pa jhax lawg, pa hoik deuh aux kah plak sivoe maix, maix tag deeh keud ceu an: khankix kah daux sinax ceu pwi khankix, kah dee pa grheu: Simiang Siyiex maix lih hu:,
phan: maix mai kawnpraix maix, deeh hoek kah Simiang Siyiex maix, mai cu nghiiet kah lox Nawh Cao:, khawm: rhawm: khawm: rhi: tix mai khawm: ju tix khawm: uik, awm: lox pa tawm: aux kah maix daux in: singaix,
mai Simiang Siyiex tag deeh viex maix ing: khaing: krax pa giex pa laung, mai Nawh Cao: tag koe: krax caoxrhawm: kah piang maix, mai deeh khrawm: maix khaing: ceu pwi khawm: uik, kah dee pa hoik kieh Simiang Siyiex pex prungprang:rai ruat.
Phan: pwi maix tix kauxkaux mawh pa hoik grheu: tix tik kah dee pa kied singai khaing: greem: raoma:, Simiang Siyiex maix tag deeh khrawm: maix hoek khaing: tan:,
Simiang Siyiex maix tag deeh viex maix hoek kah haktiex pa hoik tawx Nawh Cao: keeing: maix cie, mai maix tag sang pon tix cie ankix. Nawh Cao: tag kieh maix haok hwan: ting lhaong: mai kieh maix baox nie lheu: pre haoh hun: khaing: keeing: maix.
Simiang Siyiex maix tag pat hak rhawmrhi: maix, mai khawm: hak rhawmrhi doeh simie ceucat maix, sonsang moh maix kah Simiang Siyiex tix khawm: rhawm: khawm: rhi: tix, mai khawm: ju tix khawm: uik sonsang pon maix tix im: ju.
Simiang Siyiex maix, tag deuh pa jhax lawg inkix khawm: uik kah piang pwi koeng maix khankix, mai kah piang pwi pa koeng kah maix, mai kah piang pwi pa tuktiaktukte: kah maix khankix.
Maix tag cu nghiiet kah lox Simiang Siyiex, mai hawt yuh awm: gumlox pingnyap Nawh Cao: khawm: uik, kah pa tawm: aux kah maix daux in: singaix.
Phan: maix koe: krax cu nghiiet kah lox Simiang Siyiex tix, mai priex tix hawt gumlox tawm: pingnyap Nawh Cao:, mai beenli pa deuh Nawh Cao: khankix mai lox tat jhawm: prawng pa hoik tiiem: tix kah daux phuk lai in:, mai phan: maix deeh veeh tix ing: kah Simiang Siyiex tix, khawm: rhawm: khawm: rhi: tix mai khawm: ju tix khawm: uik;
Simiang Siyiex maix, tag kieh maix nie baox haok hwan:, kah daux kaing pa yuh maix kah taix tix khawm: uik, mai kawnpraix maix, mai khawng: brie eei: maix khankix, khawm: plix nghox plix koi: pa lih khaing: daux haktiex maix, son ceu pa mhawm: khankix; mawh kheu Simiang Siyiex tag deeh koe: krax khawrhawm: kah maix, mai nawb bwan: kah piang maix, awm: hoik koe: krax khawrhawm: Nawh Cao: kah piang keeing: maix khankix heue.
Grawng: Laug Krax Im: Ju Mai Krax Yum:
Gumlox pingnyap pa tawm: aux kah maix kah daux in: singaix, ang mawh ceu pa nu son maix, mai ang mawh pa koe: dee singai khaing: maix.
Ankix mawh pa ang koe: kah piang raoma:, sonsang ah maix nin:. "Pwi mawx sang haok kah piang raoma:, mai deeh viex ceu an: lih kah son ex, sonsang pon ex tix mhong: mai hawt tix yuh ceu ankix?"
Ceu ankix mawh pa ang koe: kah plak toi: rhawm: sigrit sigra:, sonsang ah maix nin:, "Pwi mawx pa sang tiang hu: kah plak toi: rhawm: sigrit sigra: mai deeh viex ceu ankix hoek kah son ex, sonsang pon ex tix mhong: mai hawt tix yuh ceu ankix?"
Gumlox in: mawh pa kied dex hawt maix, mai mawh pa koe: kah daux jheeh maix, khawm: daux rhawmrhi: maix, sonsang pon maix tix hawt yuh ankix.
"Jhak heue, aux hoik deuh krax im: ju mai pa mhawm:, krax yum:, mai pa caox pa caig kah plak sivoe maix kah daux in: singaix,
Aux tawm: maix moh kah Simiang Siyiex tix, sonsang hawt maix grawng: lawng maix khaix Nawh Cao:, mai sonsang priex rien maix tix hawt gumlox pingnyap Nawh Cao:, mai gumlox beenli pa deuh Nawh Cao: khankix, mai lox tat jhawm: prawng Nawh Cao:, sonsang pon maix tix im: ju, mai baox nie pre haoh hun:, Simiang Siyiex maix tag nawb bwan: kah maix, kah daux haktiex pa sang hu: teei maix tix cie.
Viang mawh nan:, phan: rhawm: maix veeh tix hu: singai, mai ang nghiiet lox Nawh Cao:, mai tieh tix hu: krub kah siyiex tang: kaux tang: hak, mai hawt tix yuh kaing jhaw: kix,
Aux krai pao: sidawng: kah maix kah daux in: singaix, maix tag sang grai: grup tete, maix tag ang lang: ju kah daux haktiex pa sang tiang maix plak toi: rawm: klawng: Yawdan, sonsang laig maix teei tix cie an:.
Aux kok yo raoma: mai haktiex kham: mhai: sakse son maix kah daux in: singaix, Aux hoik deuh krax im: ju mai krax yum:, krax nawb bwan: mai krax pa jhax lawg khankix kah plak sivoe maix; mawh kheu nan:, laug maix teei krax im: ju, sonsang pon maix tix im: ju khawm: doeh simie ceucat maix khankix,
Mai sonsang moh maix kah Simiang Siyiex tix, sonsang cu nghiiet kah lox Nawh Cao:, sonsang een: maix rhawm: tix ot dex Nawh Cao:, mawh kheu Nawh Cao: mawh krax im: ju maix mai krax lang: ju maix, sonsang pon maix tix ot kah daux haktiex pa tiextu Simiang Siyiex tix tawx kah keeing: maix Abraham, Icak mai Yakop heue.
Yawsux Mawh Cao: Kaing: Khraox Ceu Pwi Isarilax
Khaix an:, Mose hu: krai gumlox inkix kah ceu pwi Isarilax khankix,
ah nin:, yamin: aux hoik koe: ju tiyieh tinga: num, aux ang lai pon lih pon laig awm: ku bawg kah sivoe ngai: pex; Simiang Siyiex hoik ah nin: kah aux, "Maix tag ang pon tix tiang plak toi: rawm: klawng: Yawdan in:."
Simiang Siyiex pex tag tiang mai thong: pex hu: toi: plak an: kah plak sivoe pex, Nawh Cao: tag kieh ceu pwi inkix lauxleeing:, khaing: kah plak sivoe pex, mai pex tag teei tix cie haktiex cie kix, tokaux Yawsux tag tiang tix hu: kah plak sivoe pex, awm: pa hoik krai Simiang Siyiex kah pex.
Simiang Siyiex tag yuh ceu an: kah piang kix, awm: pa hoik yuh Nawh Cao: kah piang Sihon mai Awgax, pa mawh khunhawkham haktiex Amawrix mai kah piang haktiex kix, yam yuh Nawh Cao: kix lauxleeing:.
Simiang Siyiex tag ap kix kah pex, sonsang yuh pex kah kix, awm: gumlox pingnyap pa hoik tawm: aux kah pex khawm: uik.
Teei riang rao tix mai kieh koe: rhawm: kua:, paw khirhawm: mai paw lhat graung kah kix, Simiang Siyiex pex tag hu: tau mai pex, Nawh Cao: tag ang prah pex mai ang tik ang vud pex.
Mose kok kah Yawsux mai ah nin:, kah nawh kah plak sivoe ngai: ceu pwi Isarilax khankix, "Teei riang rao tix mai kieh koe: rhawm: kua:, mawh kheu maix tag sang yaox tix hu: tau mai pwi inkix kah daux haktiex pa tiextu Simiang Siyiex kah keeing: pex, sonsang tawx Nawh Cao: haktiex an: kah kix, mai kieh kix pon tix cie sinngao an: khankix.
"Tokaux Simiang Siyiex tag hu: kah plak sivoe maix, Nawh Cao: tag ot tau mai maix, Nawh Cao: tag ang prah maix, mai ang tik vud maix, paw lhat graung mai paw lauxrhawm: kah."
Gumlox Beenli Pa Caw Tix Phat Aliah Num Tix Bawg
Mawh kheu nan:, Mose tiiem: tix deuh gumlox beenli in: mai ap kah cao: giex kaing: li, pa mawh kawn: simex ceu pwi Lewix khankix, pa teei beeh glawm: tix klawm: teug bwan: gumlox sijax mukheu Simiang Siyiex, mai kah kuad song: nong: yu ceu pwi Isarilax khankix.
Mose tawm: lox ah nin:, "Yam hoik naog aliah num kah daux num pa hoik tat tix deuh, sonsang ploi: pex luat luan yam hoik hoek bawg yam yuh pex pwie nyiiex gox bang: khankix,
yam hoek bleeh ceu pwi Isarilax kah plak sivoe Simiang Siyiex pex kah dauh dee pa hoik laug Nawh Cao: tix deuh, pex tag phat gumlox beenli inkix plak sivoe ceu pwi Isarilax khankix, sonsang mhong: kix kah.
Khrawm: pwi khankix tau, simex, bun:, kawn: nyawm mai nyo sinie pa ot kah daux veng pex khankix, sonsang pon kix tix mhong:, mai sonsang gau kix tix chix koe: krax lhat krax graung kah Simiang Siyiex pex, mai sonsang priex hawt tix yuh, awm: gumlox pa koe: kah daux lox lai beenli in: khawm: uik,
Sonsang mhong: kawn: nyawm pa ang nyang sax tawng khankix, mai sonsang hoek gau kix tix koe: krax lhat krax graung kah Simiang Siyiex, glang: yam kawn: im: ju pex kah daux haktiex pa sang tiang pex tix hu:, kah plak toi: rawm: klawng: Yawdan, pa sang teei pex tix cie khankix.
Grawng: Pa Gruh krai Pa Deeh Tieh Feen Ceu Pwi Isarilax
Simiang Siyiex deeh ah nin: kah Mose, "Jhak heue, singaix sang yum: maix hoik dex, kok Yawsux hoek tau mai kah daux nyiiex gox bwan: man: bang: kum: pwi hun:, sonsang tawx aux beeh glawm: kah nawh." Mawh kheu nan:, Mose mai Yawsux laig kah daux nyiiex gox bwan: man: bang: kum: pwi hun: tau tan:,
Simiang Siyiex lih bleeh kah daux rong: paiawm:, hawt nyiiex gox bwan: man:, mai rong: paiawm: an: ot kah piang diang siviex nyiiex gox bwan: man:.
Simiang Siyiex ah nin: kah Mose, "Jhak heue, maix tag yaox tix laig it tau mai keeing: maix khankix, pwi inkix tag yaog tix kaoh hu: yuh pa phit tau mai siyiex tang: meung khankix, kah daux haktiex pa sang hu: pex tix ot daux sinax kix, mai kix tag tik vud Aux, mai yuh gumlox sijax mukheu Aux lauxleeing: kah pa hoik yuh Aux tau mai kix.
Krax songrhawm: Aux lih kah piang kix daux singaix an:, mai Aux tag tik vud kix, mai mox pakngai: tix khaing: kix, mai kix tag hoek krax laux krax leeing:, pa caox pa caig mai pa kharhawm:, tag hoek kah piang kix, mai kix tag ah nin: daux singaix an:, "Mawh kheu ang Siyiex ex lai koe: kah daux sinax ex, ceu pa caox pa caig inkix tom: hoek kah piang ex ang mawh lie?"
Kheu ceu pa caox pa caig pa hoik yuh kix grawng: pa hoik veeh tix hu: kah siyiex tang: kaux tang: hak khankix Aux tag mox pakngai: Tix daux ngaix an: tete.
Yamin: tiiem: tix deuh lai rhax in: son pex, mai gau kawnpraix Isarilax khankix, kieh kix pon rhax glip ngai:, sonsang mawh lai rhax in: mhai: sakse son Aux, kah sinax kawnpraix ceu pwi Isarilax khankix.
Yam hoik viex Aux kix hoek kah daux haktiex dee lih rawm:teeih mai rawm: hia:, pa hoik tiextu Aux kah keeing: kix, mai khaix hoik ih kix ceu an: tom: sak, mai kluing: kah, khaix an: kix tag veeh tix hu: kah siyiex tang: kaux tang: hak, mai hawt tix yuh kaing jhaw: kix, mai kix tag map kah Aux, mai thiang tix tik kah gumlox sijax mukheu Aux.
Yam lih ceu pa cao: pa caig, mai pa kharhawm: kharhi: tom: nie kah piang kix, lai rhax in: tag mawh jhi: mhai: sakse kah kix, tag ang yaox tix piawm: khaing: daux jheeh doeh simie ceucat kawnpraix pex, yamin: Aux tawng krax keud krax sawn: kix, sivoe ang Aux nyang viex kix hoek kah daux haktiex pa hoik tiextu Aux tix tawx kah kix.
Mawh kheu nan:, Mose hoik tiiem: tix deuh lai rhax in:, kah daux singaix an: mai gau pwi Isarilax khankix kah.
Nawh Cao: tawx lox kah Yawsux kawn: simex Nun ah nin:, "Teei riang rao tix mai kieh koe: rhawm: kua:, mawh kheu maix tag yaox tix viex ceu pwi Isarilax khankix laig kah daux haktiex pa hoik tiextu Aux kah kix, mai Aux tag ot tau mai maix.
Yam an: Mose tiiem: gumlox beenli in: tom: grum tom: naog kah daux phuk lai tix pheen: tom: hoik.
Mose tawx lox kah ceu pwi Lewix khankix, pa sang klawm: kah teug bwan: sijax mukheu Simiang Siyiex, mai nawh ah nin: kah kix.
"Teei phuk lai been in:, mai deuh praok teug bwan: sijax mukheu Simiang Siyiex, sonsang mawh mhai sakse kah son pex."
"Mawh kheu tawng aux pex koe: rhawm: pa tieh pa feen, mai grawng: pa kiien: ngawg pex, glang: yam kawn: im: ju Aux tau mai pex, daux in: singaix, pex hoik tieh feen kah Simiang Siyiex, khaix hoik yum: aux pex tag sang baox nie yuh miex ding?"
Khrawm: kuad song: nong: yu, dohdoe pex mai cao: kaing: pex khankix hoek kah aux, sonsang krai aux kix mhong: gumlox in: khankix mai kok raoma: mai haktiex mawh mhai: sakse kah daux sinax kix.
Grawhgrawng: nawh khaix yum: aux sax, aux tawng grawng: sang tieh feen pex, mai veeh tix khaing: daux krax pa hoik tawm: aux kah pex, mai kieh pa kharhawm: kharhi: hoek kah piang pex khaix singaix in:, jao yuh pa caox pa caig kah plak sivoe ngai: Simiang Siyiex, sonsang nie kieh pex krax pa songrhawm: Nawh Cao: koe: kah daux kaing pa yuh pex kah taix tix khankix.
Lai rhax pa krai Mose kah ceu pwi Isarilax khankix mhong:, tom: grum tom: naog ah nin:.
"Raoma: eue, veeh yhaok tix nghiiet mai aux sang krai, "Haktiex eue, nghiiet kah gumlox pa kaoh khaing: daux jheeh aux,
kieh lox pa sidiex gau aux lih awm: rawm: lhiex, mai kieh gumlox aux, jauh lih awm: rawm: ciex, mai jauh awm: rawm: lhiex kah piang khaox pa awn:, mai lih awm: lhiex poe kah piang rib riem.
Mawh kheu aux krai pao: min: ceukaux Simiang Siyiex, mai aux yaogyaw kah krax pa ting lhaong: Siyiex,
Nawh Cao: mawh rang: ting, kaing jhaw: Nawh Cao: mawh pa grum pa naog, daux krax Nawh Cao: mawh pa khaw: pa caw mai mawh Siyiex pa mawh pa meh, mai pa ang koe: krax phit krax lud, Nawh Cao: mawh pa rauh pa see mai pa kaux sijax.
Kix hoik yuh pa caox pa caig kah Nawh, mawh kheu koe: krax pa phit pa lud kix, mai kix mawh doeh simie ceucat pa tieh pa feen, mai ang kaux sijax.
Pwi pa daox pa aw: pa ang koe: pingnya khankix eue, mawh sang deeh pawk maix bwanson: kah Simiang Siyiex yuh nin: lie? Nawh Cao: mawh keeing: pa hoik kieh pex koe: ang mawh lie? Nawh Cao: hoik mawh pa phan: pa deuh pex, mai pa deuh pex kaux cong: ang mawh lie?
Deeh doh keud kah singaix pa hoik luan, mai deeh keud tix yaox, kah num: pa hoik luan, chawk tix yaox keeing: maix, mai nawh tag jhi: maix yaox, chawk tix yaox kuad song: khankix, mai kix tag krai kah maix,
Yam jah Siyiex dee pa kied lhaong: tix gwieh sinngao kah ceu pwi khankix, pa mawh doeh simex ceucat Adam khankix, Nawh Cao: tat tix deuh mee: haktiex kah son ceu pwi khankix, awm: diag koe: pwi Isarilax khankix.
Grawhgrawng: nawh son nyum: cie Simiang Siyiex mawh ceu pwi Nawh Cao: khankix, mai Yakop hoik mawh sinngao Nawh Cao:.
Nawh Cao: hoik yaox nawh kah daux haktiex dee yiien:, dee riag yo totiag totu khankix, Nawh Cao: hoik vie hoik lawm nawh, mai priex rien kah nawh, mai kia: ngiien kah nawh awm: kawn: ngai: Tix.
Awm: kraix klang: mheem: tix, mai di pruik tix kah piang kawn: tix, mai priex kix mai viex kix hu: kah piang pruik Tix.
Mawh Simiang Siyiex tix kaux khaing: pa thong: pa bung: Yakop hu:, mai siyiex tang: dauh tang: meung khankix ang lai ot tau mai nawh.
Nawh Cao: kieh nawh brug tix ot kah dauh dee pa kied lhaong: haktiex, mai nawh tag pon tix ih can ceu pa lih khaing: daux tong kaung: nawh khankix, Nawh Cao: tag kieh nawh teei rawm: hia: khaing: daux rang:, mai rawm: bee khaing: daux rang:.
Klon bee rawm:teeih moi, mai rawm:teeih yung:, mai khlawp bee kawn: yung: mai kawn: yung: mhaing: pa keh khaing: khawng: brie Bashan, mai pex mhaing:, khawm: nghox ca ceu pa mhawm: pa hoik laug tix deuh, maix tag yaox tix nyaux rawm: plix siiet, kaing plix siiet khankix.
Viang mawh nan:, Yeshurun baox nie kluing: nie bee, mai deeh tiied kah caong tix, khaix nie kluing: nie plang: kaux hak nawh, klon bee hoik kheem: kah piang nawh, khaix an: nawh tik vud kah Siyiex, pa phan: pa deuh nawh, mai nu nai: kah rang: ting pa mawh krax taoh nawh.
Kix hoik yuh tix kieh Nawh Cao: songrhawm: kheu krub siyiex tang: kaux tang: hak, ceu pa seeing: pa brai: yuh kix, hoik so: krax pa songrhawm: Nawh Cao:.
Kix hoik tan lu kah phicaox pa ang mawh siyiex, mai kah siyiex pa ang kix sax tawng khankix, mai kah siyiex ang keeing: kix sax koe: krax lhat krax graung kah.
Maix hoik piawm: kah rang: ting dee keh kung maix khaing:, maix ang lai doh keud kah siyiex pa mawh keeing: kah maix.
Yam hoik yaox Simiang Siyiex an:, Nawh Cao: songrhawm: kah kix, mai tik vud kah kawn: simex kawn: bun: Nawh Cao: khankix.
Nawh Cao: ah nin:, "Aux tag mox pakngai: tix khaing: kix, mai jhak tix yaox dee sidauh ceu pa sang lih mawh kix, mawh kheu kix mawh doeh ceucat pa kiien: rhawm: mai ang kaux sijax.
Kix hoik so: krax pa songrhawm: Aux lih, kah ceu pa ang mawh siyiex. Kix hoik kieh krax pa songrhawm: Aux lih kheu pa caox pa caig pa yuh kix kah rieng rao ceu pa giex going, mawh kheu nan:, Aux tag deeh teei pwi pa ang koe: cee koe: cak kieh yuh kix lauxrhawm: kah, mai teei pwi pa ang koe: pingnya cuyi: kieh yuh kix koe: krax pa songrhawm: songrhi: kah.
Mawh kheu krax pa songrhawm: Aux hoik lih rup awm: ngu, mai an: tag gleeing, tom: hoek dee pa kied raux meung yum:, mai an: tag gleeing haktiex lauxleeing:, tau mai plix khaox plix ox pa koe: daux haktiex, tom: hoek kah caong gawng.
Aux tag pum: krax pa laux pa leeing: kah piang kix, mai puing: te ak tix kah piang kix khawm: uik.
Kix tag krawx rao kheu cairhawm: mai lauxleeing: kah jhawm: saux, mai hoek kah daux pa kied lauxleeing:, Aux tag ploi: rhang: totiag hoek kah kix, tau mai jai: siuing: kah piang haktiex ot kix.
Plak praix tag mawh lawm vaig, plak daux tag mawh krax pa lhat graung, son nyawm sinaw mai bunkrih, son kawn: nyawm pa kawn peuex, mai son pwi pa hoik paing hauk kaing: khankix tag kieh lauxleeing: khawm: uik.
"Aux tag sang kieh kix prungprang:rai ruat, mai Aux tag yuh krax pa ang pwi lai doh keud kah kix, sonsang grai min ceukaux kix khaing: daux sinax pwi khankix."
Aux ang lhat kah krax pa songrhawm: pwi pa koeng Aux khankix, phan: ang mawh nan: pwi koeng khankix tag koe: krax pa yaw rangdi kah tokaux tix, phan: ang mawh nan: kix tag ah nin:, "Riang rao khawn: taix yix mawh pa ting pa lhaong:, mai inkix ang mawh Simiang Siyiex, pa hoik yuh inkix khawm: uik."
Mawh kheu kix mawh ceu pwi pa ang koe: krax keud krax sawn:, mai pa ang koe: krax tawng krax yung ceei kawx.
Kieh kix mawh pa koe: pingnya cuyi:, mai tawng kah ceu inkix, sonsang pon keut sawn kix dee sidauh sidu tix khaix in: sax.
Pwi tix kaux sang pon pheet kah pwi tix rheng: yuh kah mawx? mai pwi ra: kaux sang pon kieh pwi tix mheen: to: yuh kah mawx? Phan: rang: ting kix ang coh tix tawx kah kix, mai phan: Simiang Siyiex ang ap kix, ceu an: tag lih koe: yuh kah mawx?
Mawh kheu rang: ting kix, ang awm: rang: ting cie ex, pwi koeng ex khankix kawx, tokaux cao: kix, tag pon krax prawng krax ca:.
Mawh kheu nhu: plix siiet kix, mawh simie plix siiet Sawdom, mai mawh pa kuah daux haktiex Gawmawrax, plix siiet kix mawh pa song: awm: ghin:, sigleem: plix siiet kix mawh pa kied song: tete.
Rawm: plix siiet kix mawh pa koe: jai: siyawng, mai jai: siuing: pa kied caox khankix.
In: mawh pa priex tix deuh tau mai Aux, mai mawh pa hoik tawk tix deuh cum: kah daux krao: sinngao cie Aux ang mawh lie?
Pa pawk bix mai pa deeh plud khankix mawh cie Aux, caong kix tag cang klad yam hoek bawg yam. Mawh kheu singaix pa sang lauxleeing: kix hoik dex, mai can pa sang hoek khankix, hoik mawh pa kied phai: son kix.
Mawh kheu Simiang Siyiex tag prawng ca: kah ceu pwi Nawh Cao:, mai koe: krax caoxrhawm: kah piang siliex Nawh Cao: khankix. Yam yaox Nawh Cao: kah hoik grai: siawp siibrawm kix, mai ang lai koe: pa pon luan khaing: pa phyawk pa laung tix kaux kawx.
Mai Nawh Cao: tag ah nin:, "Siyiex krub kix koe: dee mawx, mai rang: ting pa sawk kix tix peung koe: dee mawh?"
Pwi mawx pa hoik ih kah pa appong: kix, mai pa hoik nyaux kah rawm: plix siiet krax tan pa nyaux kix ot dee mawx? Kieh kix yaog tix kaoh mai teem: coi kah pex mai kieh mawh dee peung pex.
"Jhak kah krax pa mawh Aux, lheu: khaing: Aux, Siyiex tang: kaux ang lai koe:, Aux pah ju mai Aux deeh kieh im: ju, Aux tawx krax mat, mai Aux deeh pai: moi:, pwi pa pon tix taoh glawd khaing: daux tawm: taix Aux ang koe: tix kaux kawx.
Aux yaog taix tix kah piang raoma: mai tiextu ah nin:, "Aux mawh pa im: ju leeing ju leeing phan:.
Aux tag klaing: vaig tix plang: Mai taix Aux tag giex kah krax prawng krax ciyang, Aux tag deeh pawk bix tix, kah pwi pa koeng Aux khankix, mai deeh viied kah can pwi pa koeng kah Aux.
Aux tag kieh te ak Aux khankix yoek kah nham:, mai vaig lawm Aux ih nex tau mai nham: pa hoik pah tix, mai kah pwi pa giex pa laung Aux khankix, tom: hoek kah kaing: cao: kaing: pwi pa koeng Aux khankix.
"Ceu pwi tang: ceu tang: cat khankix eue, gauxrhawm: tau mai ceu pwi Nawh Cao:, grawhgrawng: nawh Nawh Cao: tag deeh pawk bix tix kah son nham: siliex Tix khankix, mai Nawh tag deeh prawng ca: kah pwi koeng pwi khoi: Nawh Cao: khankix, Nawh Cao: tag sigrhah pa seeing: brai:, khaing: haktiex Nawh Cao:, mai khaing: ceu pwi Nawh Cao:."
Mawh kheu nan:, Mose hoek tau mai Yawsux kawn: simex Nun, mai krai lox lai rhax in: sonsang mhong: pwi khankix.
Khaix hoik krai Mose gumlox in: kah ceu pwi Isarilax khankix,
Nawh baox ah nin: kah kix, "Gumlox pa hoik kham: Aux mhai: sakse kah sinax pex daux in: singaix, een: kah rhawm: pex mai tawm: kawnpraix tix, sonsang priex kix tix yuh, awm: lox pa krai aux pa koe: kah daux lox lai beenli khawm: uik.
Mawh kheu ankix, ang mawh ceu pa giex pa going kah son pex, mawh pa dex dawd mai ju pex; gumlox in: tag kieh singaix im: ju pex lang: kah daux haktiex pa sang tiang pex kah plak toi: rawm: klawng: Yawdan mai pon pex tix cie heue."
Grawng: Sang Yum: Mose Kah Piang Gawng Nebo
Kah daux singaix an: Simiang Siyiex krai ah nin: kah Mose.
"Haok kah gawng Abarim kah piang choek gawng Nebo, pa koe: kah daux haktiex Mawbax see veng Yerikho:, mai simi tix yaox kah meung khanan, pa tawx Aux kah kawnpraix Isarilax awm: pa sang pon kix tix cie,
Maix tag yum: kah piang gawng pa hoik haok maix, mai mawh pa deeh khrawm: tix kah dee ot pwi ceu maix khankix, awm: hoik yum: puxke: maix Arun kah piang gawng Hawrax, mai nawh hoik mawh pa deeh khrawm: tix dee ot pwi ceu nawh khankix.
Mawh kheu hoik phit lud maix kah Aux, sinax kawnpraix Isarilax khankix, hawt dee lih rawm: Meribax, kah yaong: Kadesha, daux tiag Zina. Mawh kheu ang maix nab yam kah Aux, kah daux sinax pwi Isarilax.
Viang maix yaox haktiex pa ah Aux tix sang tawx kah pwi Isarilax khankix kah ngai: tix kawx, maix tag ang yaox tix laig kah daux haktiex an: heue."
Pa Ghoik Mose Tix Nawb Bwan: Kah Pwi Isarilax
In: mawh bwanson: pa nawb Mose pa mawh pwi Siyiex kah piang pwi Isarilax khankix, sivoe sang yum: nawh.
Mai nawh ah nin:, "Simiang Siyiex lih hoek khaing: gawng Sina, mai kieh singaix lih kah piang kix khaing: gawng Sirax, Nawh Cao: jhan: riieng tix khaing: choek gawng Paran, mai Nawh Cao: lih hoek tau mai pwi pa singax singeh tix mheen:, khaing: kah plak taix khawn: dawm: Nawh Cao:, ngu gumlox beenli hoik lih kah son pwi Isarilax.
Nawh Cao: moh kah pwi ceu ankix tete, pwi pa singax singeh khawm: uik hoik koe: kah daux tawm: taix Nawh Cao:, kix ngawm hawt greem: caong Nawh Cao:, mai kix nghiiet lox sikah Nawh Cao:.
Mose tawm: gumlox beenli pa mawh sinngao kah son cub pwi hun: ceu pwi Yakop khankix.
Yam khrawm: cao: kaing: pwi inkix mai doeh ceu pwi Isarilax khankix paox tix tau, Nawh Cao: mawh khunhawkham kah daux Yeshurun.
"Kieh ceu pwi Rubin khankix im: ju paw kieh hoek krax yum:, mai paw kieh pwi nawh tux."
Mai nawh krai ah nin: kah ceu pwi Yudax, "Simiang Siyiex eue. Nghiiet kah lox ceu pwi Yudax khankix liak! mai viex nawh hoek kah pwi ceu nawh, kieh taix nawh mawh pa yuh naing son nawh liak, kieh Maix Cao: mawh pa teem: coi kah nawh mai yuh pwi koeng nawh khankix laux."
Mai nawh ah nin: kah pwi Lewix khankix, Simiang Siyiex eue, "Kieh Tumin mai Urim Maix mawh pa koe: tau mai pwi pa singax, maix pa hoik cheuk Maix tix yaox hawt baoh Masa kah pwi pa hoik tieh feen kah Maix khankix, kah dee lih rawm: keut Neribax liak."
Nawh mawh pwi pa ah nin: kah miex keeing: tix, ang aux sax yaox pex, mai ang tawng kah puxaik tix, mai kah kawnpraix tix, viang mawh nan:, kix hoik mawh pa hawt tix yuh, awm: gumlox Maix Cao:, mai hoik priex rien kah gumlox sijax mukheu Maix Cao:.
Kix tag gau ceu pwi Yakop khankix, kah lox tat jhawm: prawng Maix Cao:, mai gau pwi Isarilax khankix kah gumlox beenli Maix Cao:, kix tag deuh nyawng bhawng: kah plak sivoe Maix Cao:, mai pa appong: kix son krax tan pa gleeing kah piang khu: dee tan Maix Cao:.
Simiang Siyiex eue, Nawb bwan: kah piang kraungkhrai: nawh liak! mai rieb tix teei kaing ceu pa yuh nawh, kah taix tix khankix, raig tix tik nyoi pwi pa yaog tix kaoh tieh feen kah nawh khankix, son ang kix lai baox pon yaog tix kaoh.
Son ceu pwi Binyamin nawh ah nin:, "Ceu pwi pa moh Simiang Siyiex yaox tix ot yiien: yawg dex Nawh Cao:, Nawh Cao: tag priex rien nawh leeing: lang: singaix, mai nawh tag ot kah sinax klip Nawh Cao:,"
son pwi Yosiep nawh ah nin:, kieh Simiang Siyiex nawb bwan: kah haktiex nawh, sinngao khaing: raoma: tau mai rawm: ciex khankix, mai can pa koe: dee raux greem: tiex,
plix khaox plix ox ceu pa laoh pa lie, pa kaoh khaing: singaix, tau mai ceu pa laoh pa lie, pa kaoh khaing: khix,
ceu pa nie lheu: mhawm:, pa kaoh khaing: daux gawng didix, tau mai ceu pa laoh pa lie, pa kaoh khaing: gawng lua leeing ju leeing phan:,
ceu pa laoh pa lie, pa kaoh khaing: daux tiex, mai ceu pa grum naog khankix, mai bwanson: Nawh Cao: pa koe: kah daux yeem khaox, kieh lih hoek kah piang kaing: Yosiep mai kah piang mhok khri: nawh pa mawh cao: kaing: kah daux puxaik tix.
Siawpsibrawm nawh, tag awm: riang moi mhaing: Utapha mai rung: nawh awm: rung: moi praix, nawh tag teei tix tik ceu pwi khankix, tom: hoek dee sidauh haktiex, kix mawh pwi kaing: mheen: khaing: ceu pwi Epharem, mai kix mawh pwi kaing: rheng: khaing: ceu pwi Manashe.
Son ceu pwi Zebulun nawh ah nin:, "Ceu pwi Zebulun khankix eue, gauxrhawm: kah daux krax lih hu: maix kah plak praix, ceu pwi Isakha eue, gauxrhawm: kah ot maix kah daux nyiiex gox tix.
Kix tag kok ceu pwi khankix hoek kah piang gawng, mai tan krax tan pa appong: tix khankix, kah daux pa rauh pa see, kix tag tik ceu pa naog kah daux rawm: sigrit sigra:, mai kraungkhrai: pa mox tix kah daux mhaik khankix.
Son ceu pwi Gat nawh ah nin:, "Kieh bwanson: koe: kah piang cao: pa kieh haktiex pwi Gat nie vieh mai nie ting, pwi ceu an: ot awm: sivai sangsi:, mai riah tix tik plawng: taix mai mhok khri: pa koe: kah piang kaing:.
Nawh hoik laug tix teei nyum: cie son tokaux cao: tix sivoe, mawh kheu Simiang cao: pa rauh pa see hoik gwieh tix deuh tan:, Nawh hoik hoek tau mai cao: kaing: pwi khankix, mai nawh kwang: kah pa rauh pa see Simiang Siyiex, mai khawm: krax prawng ca: Nawh Cao:, tau mai ceu pwi Isarilax khankix."
Son ceu pwi Dan nawh ah nin:, pwi Dan mawh kawn: sivai sangsi:, nawh tag yaog tix lih khaing: haktiex Bashan."
Son pwi Napthalix nawh ah nin:, "Ceu pwi Napthalix khankix eue, kieh koe: krax mag krax mi, tau mai pa nyawmrhawm:, mai pa grum naog kah daux bwanson: Simiang Siyiex, mai teei tix cie haktiex plak klip singaix, khawm: baoh haktiex plak seh khankix."
Son ceu pwi Asha nawh ah nin:, "Pwi Asha kieh koe: kawnpraix pa kied koe: bwanson:, kieh nawh mawh pa khaw: rhawm: khaing: puxaik nawh khankix, mai kieh nawh cub caong tix kah daux rawm: bee.
Pang: siviex maix khankix tag mawh pa yuh kah rhiem:, mai tawng, baux singaix im: ju maix mai riang rao maix tag mawh pa koe: awm: an:.
Pwi pa awm: Siyiex Yeshurun pa brug meung raoma: hoek, sonsang teem: coi kah maix, tau mai siawpsibrawm tix kah piang paiawm: ang lai koe: pa lheu: khaing: nawh tix kaux kawx,
Siyiex leeing ju leeing phan:, mawh dee een: maix rhawmrhi: tix, mai plawng: taix leeing ju Nawh mawh pa teem: kah maix, Nawh Cao: tag grheu: pwi koeng khaing: kah plak sivoe maix, mai Nawh Cao: kieh maix yuh kix lauxleeing:."
Pwi Isarilax khankix tag yaox tix ot kah daux pa yiien: yawg, kah dee lih rawm: keut pwi Yakop nongnong:, mai kah daux haktiex pa koe: nghox koi:, khawm: dee koe: plix siiet pa khraox khankix, raoma: tag kieh rawm: ciex lih kah piang nawh.
Pwi Isarilax khankix eue, kieh maix koe: krax gauxrhawm:, pwi pa hoik taoh Simiang Siyiex pa awm: maix tag ang lai koe:, Siyiex mawh pa tiebtie mai pa teem: kah maix, mai mawh vaig lawm cie maix, pwi koeng maix khankix tag som kah plak sivoe maix, mai maix tag dig dee pa kied lhaong: pa singax kix khawm: uik heue.
Grawng: Yum: Mose Kah Piang Gawng Nebo
Mose lih khaing: daux lung: Mawbax, mai haok kah piang gawng Nebo, kah choek gawng Pisaga, pa koe: see plak toi: veng Yerikho:, Simiang Siyiex jhi: nawh yaox haktiex Gilat khawm: uik tom: hoek kah veng Dan,
tom: hoek kah haktiex Napthalix, mai haktiex Epharen khawm: haktiex Manashe, mai kah haktiex Yudax khawm: uik, tom: hoek kah rawm: sigrit sigra: plak klip singaix,
mai haktiex pa koe: baoh plak seh, khawm: daux lung: daux ngawd pa koe: baoh veng Yerikho: pa mawh veng khaox jhie: yaong:, tom: hoek kah baoh Zawrax.
Simiang Siyiex ah nin: kah nawh, "In: mawh haktiex pa hoik tiextu Aux tix tawx kah Abraham, Icak mai Yakop, mai Nawh baox ah nin:, "Aux tag sang tawx inkix kah doeh simie ceucat maix khankix, Aux hoik kieh maix yaox inkix, kah ngai: tix, viang mawh nan:, maix tag ang pon tix tiang kah plak an:."
Mawh kheu nan:, Mose pa mawh siliex Simiang Siyiex yum: kah daux haktiex Mawbax tan, awn gumlox sikah Simiang Siyiex.
Mai Nawh Cao: sipaung: nawh kah daux ngawd, kah daux haktiex Mawbax, kah plak toi: veng Biet Pegurax, viang mawh nan: pwi tix kaux kawx ang tawng kah dauh dee simeeik nawh ton in: singaix.
Yam yum: Mose ju nawh hoik koe: tiyieh tinga: num, ngai: nawh ang nyang bax vuvi, mai riang rao nawh kawx ang nyang bax dieh.
Mai kawnpraix pwi Isarilax khankix, doh keud mai yiiem doe: son Mose kah daux lung: Mawbax, tix ngoe: ngaix, mawh kheu nan:, singaix yiiem kix mai singaix doh keud kix hoik sidauh tin:.
Yawsux kawn: simex Nun naog mai khwan: pingnya cuyi:, kheu hoik deuh Mose taix tix kah piang nawh, mawh kheu nan:, pwi Isarilax khankix, cu nghiiet kah nawh mai hawt yuh awm: pa tawm: Simiang Siyiex kah Mose.
Viang mawh nan:, jah khaix singaix an:, cao: jhai: pa awm: Mose, ang lai lih tix koe: kah daux pwi Isarilax khankix tix kaux kawx, pa hoik yaox Simiang Siyiex kah plak ngai: taw plak ngai:,
Mai mhai: sakse mai khawm: pa daox pa am: pa hoik ploi: Simiang Siyiex nawh hu: kah daux meung Ejiptux, kah plak sivoe simiang Pharaw, mai kah plak sivoe cao: kaing: greem: nawh khankix, mai kah daux haktiex nawh khawm: uik,
tau mai siawpsibrawm pa ting riang rao ankix khawm: uik, mai krax lhat krax graung pa kied ting an: kix khawm: uik, pa hoik yuh Mose kah plak sivoe ngai: ceu pwi Isarilax khankix heue.
1 “Ishamelax” Dee bleeh mawh Siyiex hoik mhong:
1 “Plix makkheu: niex” Daux lai num: jah, mawh plix pa awm: plix makkheu: som, koe: pang: awm: pang: makpreug, plix nawh sibraw tix lih khaing: daux pang: nawh, lox Kala ah “MANDRAKE” kah heue.
1 “Pwi tix kaux kawx ang pon yaog taix caong” Dee bleeh sang ah nin:, pwi tix kaux kawx ang pon yaog taix caong tix yuh kaing tix ceu kawx daux haktiex Ejiptux.