Lai Vax
Phuk Lai Gau
Glawk Ra:
Pa thut tix shiao khaing: Lai Vax Phuk Lai Gau Glawk Tix pa hoik yuh Num: Cub Caw Ting Pa Yuh Phuk Lai Vax Lih daux 2001 num, mai: pa deeh cox daux khix-4, 2002 num.
STB 2003
Lox Voe
Phuk lai in: mawh lai pa yuh ex sonsang chix ka lai Vax kukaux heue. Yam gau ka lai in: caw tix gau chix Miex lai mai: Kawn: lai voe heue. Daux lai Vax yam pawng: ngai: lai, kieh mawh lox koe: ra: (2) glawk heue.
(1) Miex ang : brawm: mai: Kawn: ang: brawm:.
Lox tiag,- kak, tawk, mon:, pot, awm: ankix, kawn: nie heue.
(2) Miex brawm: mai: Kawn: brawm:.
Lox tiag,- klia:, grang, khrio, mhia:, mhio, kawn: nie khaing:
inkix, ca mawh jhi: ex pakpeung: ngie heue.
Grawng shiao ex mhai: khankix, pa nie shiao ex yam tiem tix lai, mawh mhai: in: (:) ex ah mhai: lhaong: ka heue.
Lox tiag,- kang, kang:, ke, ke:, kie, kie:, kaing, kaing:, to, to:, hu, hu:
In: mawh miex tix mu: mai: kawn: tix mu: khaing:.
Yam hoek ex ka miex brawm: -
Lox tiag,- klawng, klawng:, khrawm, khrawm:, rhawm, rhawm:,
blon, blon:, kawn: koe: tom: nie heue.
Ex rawg can pui pa doh yhaok riang ngai: deeh baox teem: coi thienthie: ka heue.
~~~~~~~~~~~~~~~
Khix Jhai: 2003 num
Lawg ( 1 )
Tax Nyi Lai:
Tax Lai: hoik thai: krax ot Vax.
Sim: sai: Ai: Nyi, ang: lai khi:.
Eep sawm: rawm: nyaux kieh awm: paox.
Taoh klawng: gawng praix hoik yiien: yawg.
Dawg mawh rhawm: keud Tax Nyi Lai:.
Kai kui: tui: lox ang: cot pui
Ot shia: dia: preh, mai: Tax Lai:.
Ngai: jhak rawm jhim: Tax Nyi Lai:.
Kai: haktiex Vax ang: kieh nai:.
Cox bre kuceu, mawh muah tix reu ceu tix mu:.
Teh taux saux yum:, ang: kieh tum:.
Yum: grai: nai: maung, ang: tawx koe:.
Num: rang: pang: braik plaik daux lai.
Tax Lai: ngai: jhak piang gawng Vax.
Kieh krax lawli doh ku klawng:.
Gawng praix meung Vax, Tax Lai: kieh mawh,
dee tai khaox gix, dee plix mau kawn.
Tax Lai: krai ex mhong:, Ot rong: tiah yuh tix mawh laux.
Ot lat kraux yuh mawh caomi.
~~~~~~~~~~~~~~~~~~~~~~~~~~~~~~~
Tax Ngaox Kat Mang Hong (2000 Khix 6)
Lawg ( 2 )
Tax Log Pang:
Tax Pang: mawh rang: ting meung Vax.
Piang gawng piang lua hoik doh krax cheu:.
Kheu jao pa keud sawn: Tax Pang:.
Lang: rhawm: mhawm: keud son meung Vax.
Eep sawm: rawm: nyaux koe: ku nyiiex.
Priex ih nyiiex ot hoik loh tix.
Tax Pang: sidiex, ih rhawm: paox.
Yuh awm: nyiiex tix lhang:, prang: tix gawng:.
Lailing ing: tiang ang: lai lhat.
Mat saux Tax Pang: ang: kieh koe:.
Kawndoe:, pui loeg, cha:, mi ang: pi kix.
Chix keud chix sawn: kawn: pui mhawm:.
Ang gwieh ceu pui, ang: gwieh ru.
Been Tax been Yax ang: cu ex prah.
Ah lox awn: sawn: paox lhak.
~~~~~~~~~~~~~~~~~~~~~~~~~~~~~~~
Tax Ngaox Kat Mang Hong (2000 Khix 6)
Lawg ( 3 )
Grawng Baux Yam Praix Klawng:
Baux Raux, Baux Rung, Baux Kuat
Baux yam raux, jah daux khix-5 hoek daux khix-9, lhiex lih daux khix-5, kawn: pui sum: to: ma:, nghox, sivawng, khawx, koi: daux khix-8, rawm: pa: vai lih ku gawng ku klawng: jah khix-8, kawn: pui teei to: ma: khraox, awm: koi sivawng khankix, phan: mawh nghox khraox jah tix kaux daux khix-9 heue.
Baux yam kuat jah daux khix-10 hoek khix-2, kawn: pui sum: to: rung dau khix-11 hoek khix-12, sidaing: kuat, lih rawm: sidap, rawm: simawg, rha: kawn: pui daing: ki kaing hu: kid khix tang: khix, sivoe vaw num khraox, baux yam kuat kawn: pui daing: phlu: tix co ngu kheu sidaing: kuat, mai: ceep sibex, khlax pu bawg yamin: pui sum: taux lhax mai: lhax si oe: kuceu heue.
Baux yam rung jah daux khix-2 hoek khix-5, sidaing: siaoh sieem:, praix klawng: mai: koek ka sidaing: hax lhax khaox lhax ox, khrum: khaing: kak, kawn: pui sidaing: heem: rawm: mai: sawg tix ot greem veei khaox, dee sidap, dee phlu: bhaung: mai daing: lih hu: sawg fi: yuh laih lai plak praix, yam an: caw bawg yam ang: pui lai tien, son kaing gha: ma: hu: tix, paog, pai:, khawp nyhee: daux kaing pa yuh tix heue.
Lawg ( 4 )
Pui Vawk Rhawm: Yaox Krax Yum:
Didix, koe: sox praix tix mu: heue. Sox praix an: koe: rhawm: pa vawk ka piang paoxgrawm tix cak mai: ah nin:, "Paoxgrawm eue, ka daux tiag tix dah aux yaox dee koe: rib praox tix dah mai: sidaing: mhawm: heue. Sonsang hu: ka daux tiag an: aux thong maix hu: mai: jhi: maix yaox daux krax awx."
Khaix hoik jhi: sox praix nawh yaox daux krax, cak hu: teei tix sawm: rib praox ku singaix heue. Cao yuh kaung: taong: tix een: jhawk mai: jhawk taong: nawh krix ka cak heue. Yam yaox krix cak ka jhawk sox praix hoik fahrhawm: fahrhi: ka ceu pa keud tix heue. Cak ah nin: "Paoxgrawm sox praix eue, sonsang luad luan aux khaing: jhawk in: teem: coi aux liak, aux kheox khaw: ka maix heue." Paoxgrawm cak eue, jhawk in: aux sang chix kraing dud yuh ka mawx? Khaix hoik ah nawh nin:, sox praix to: tix mox ka daux yeem: mai: pau tix jhak cak heue.
Yamin: sonsang kiied aux tix ih cak, ang: tau tix nyang chix, phan: aux kiied nawh yum: yamin: tiblah teu ce: aux mawh pa pie pa lhen: ka piang paoxgrawm tix heue.
Mawh kheu nan:, phan: nawh tang: yum: cao:, aux tag sang teei tix ih nawh, mai: keud yuh nan: daux rhawm: tix heue.
Khaix an: yam yaox cao: yuh kaung: krix cak ka jhawk taong: tix, nawh gauxrhawm: gauxrhi: mai: to: tix hu: dex cak, mai: jhak tix yaox cak heue. Yam an: cak yuh tix yum: plak sivoe ngai: cao: yuh kaung: heue. Cao: yuh kaung: ah nin:, "Cak in: hoik yum: tom: ponbo mai: vaig kawx hoik ploh hoik pong heue. Khaix an: cao: yuh kaung: tom: yah jhawk khaing: cak mai: hu: sawg nhu: maox khaing: tan: heue. Yam an: lak tix mu: po: tix tum: ka piang cak mai: riag yo ka lox tix mai: cak kaoh to: dom mawx dom an: heue.
Yam yaox cao: yuh kaung: kaoh to: cak, nawh teei vaig pa viex tix mai: sivun ka cak ang: krox heue. Viang mawh kawx nan:, vaig pa sivun nawh hu: krox ka sox praix pa vawk rhawm: ka dee mox nawh tix ka daux yeem: mai: sox praix tom: yum: heue.
Lox chawk
1. Mawh mawx pa kieh cak hu: ka daux rib praox lie?
2. Mawh pui mawx pa taong: jhawk lie?
3. Mawh mawx pa krix ka jhawk taong: lie?
4. Sox praix pa vawk rhawm: yaox krax yuh ka mawx lie?
Ting ngawg vawk rhawm: dawd ju cao yum:.
Kum: rhawm: mai: kuad, mhawm: tawng grawng been.
Deen rhawm: jhawm: caox.
Pluat ploi phimap, nabyam: ka paox, mawh kaing mhawm:
Lawg ( 5 )
Paoxgrawm Mhawm:
Sai Kat mawh kawn: nyawm cawng: tix kaux, mai: nawh ot daux glawk 3 heue.
Tix singaix Sara cao: gau nawh tawx lai kaing nyiiex "Simin" ka nawh ra: phuk heue. Viang mawh kawx nan: tokaux nawh ang: doh rhawm: doh rhi: ang: chix sawn: hu: heue.
Khaix an: tokaux nawh tom: kaoh caocao mai: hu: ka nyiiex cawng:, mai: yaox paoxgrawm tix Nyi Tao: mai: nawh mhaing: tix briex tiem ka daux lai cie nawh heue. Viang mawh kawx nan:, Nyi Tao: ang: tawx nawh briex tiem ka daux lai cie tix heue. Sonsang doh rhawm: doh rhi: nawh mai: sonsang chix sawn: nawh, Nyi Tao: tom: gau sawn: nawh sidawng: mhawmmhawm: heue.
Khaix hoik gaux sawn: Nyi Tao: ka nawh, Sai Kat kied gauxrhawm: gauxrhi: mai: hoik tang: chix yuh chix sawn: lai simin mhawmmhawm: heue. Mawh kheu nan: Nyi Tao: mawh paoxgrawm pa mhawm: ka son Sai Kat tete telai heue.
Gau sawn: paox lhak,
Hak paox gau lai.
Ngai: riang piang pui,
Awm: veei khaox rung.
Cung ot dee mawx,
Pui moh hun: nie.
Lox Chawk
1. Sai Kat mhaing krax teem: krax coi ka Nyi Tao: yuh ka mawx lie?
2. Sonsang doh rhawm: Sai Kat, Nyi Tao: gau nawh yuh ka mawx lie?
Lawg (6)
Kawn: Cak Klih Ka Pa Keud Cao Tix
Ka daux tiag tix dah, koe: kawn: cak pa mhawm: grang ka tix mu: heue. Tix singaix, kawn: cak an: lih hu: nyaux rawm: ka daux rawm: dung pa singax singaong: tix mu: heue.
Yam nyaux nawh rawm: nawh deeh yaox pangpeue pakpeung: rung: cao: tix heue. Nawh kied gauxrhawm: mai: ting rhawm: ting rhi: tete heue. Phan: pui tix kauxkaux yaox rung: cie aux, pui pa ang: ghoing: pa ang: simie tix cie ang: tau tix koe: tix kaux kawx heue. Mai: nawh ting rhawm: mai: yaw rung: cao: tix ku bawg ku yam heue.
Khaix hoik nyaux nawh rawm: nawh tom: lih hu: ka piang gawng, yam hoek nawh ka piang gawng, nawh tom: lia caong tix mai: ah nin:, "Caong aux in: ang: doh mhawm: awm: rung: aux mai: ang: nyawm tix jhak mai: ang: khaw: rhawm: rhi: aux tix bawg kawx heue." Khaix an: nawh to: tix laig ka daux tiag dom mawx dom an: heue.
Khaix an: koe: pui jaw tix kaux pheet tix puing: kawn: cak ka ak pa viex tix, yam an: kawn: cak lhat tix yum: mai: to: tix laig ka daux tiag dee nhik yeem: dom mawx dom an: heue. Yam to: kawn: cak tix laig ka daux tiag, rung: nawh fak tix ka kak khaox kak yeem: mai: ang: lai pon to: khaing: tan: heue. Dom mawx dom an: nawh doh keud ka tokaux tix mai: ah nin:, "Mawh kheu rung: pa jiet mhawm: grang aux in: aux tom: yaox tix yum: heue. Caong pa sibriem aux in: ang: sax kieh aux yaox krax pa laux pa leeing tix bawg kawx heue. Yamin: mawh kheu jao rung: pa jiet mhawm: grang aux in: aux tom yaox krax pa saux pa yum: ka daux tawm: taix pui jaw heue.
Ngud ngai: lung baoh, khoi: riang ciang paox,
Kid khaox ka rao, jao: paox ang: mhawm:.
Jhawm: keud tix laoh, yie yaox caox.
Viang iak caox grang tang: koe: dee shiao.
Lox Chawk
1. Yam nyaux cak rawm: nawh yaox patix lie?
2. Cak yaw ka rung: tix yuh ka mawx lie?
3. Mawh pui mawx pa pheet tix puing: ka kawn: cak lie?
4. Kawn: cak to: dee mawx lie?
5. Rung: cak fak tix ka patix lie?
Lawg (7)
Singax Singeh Ang: Pon Jhawm: Saux
Tokaux mu: ceu, nex hak ex kawn: pui mawh pa ting ceu tete telai heue. Phan: rawm: shiao ex ang: singax singeh, kaux hak ex ngiiex mai: pon jhawm: saux, phan: priex ih ex ang: singax singeh ex kawx pon jhawm: saux ka heue.
Lheu: khaing: an: pa nie lheu: ting ceu son tokaux mu: ceu ex mawh "Hak" heue. Hak mawh pa kheem: tokaux ex khawm: uik, sonsang ang: ka daux tokaux ex mat, saux, nawh mawh pa tiebtie pa siaoh pa sikiied jheengjheeng: heue.
Sonsang mhawm: pakpeung, nex nham: riang rao ex, hak mawh pa ting ceu khawm: uik heue. Phan: hak ex ang: mhawm: ka daux tokaux ex kawx chix lih mawh jhawm: saux jhawm: ngia mai: chix lih mawh pa ngiiex pa ngoi: pa seeing: son ex heue. Mawh kheu nan: hak ex caw tix yuh satix tix mai: caw tix kieh singax singeh ku bawg ku yam heue.
Mai: yam khoek heem: ex tokaux tix caw tix shiao rawm: pa singax, rawm: pa siu: mai: sipiak khoek heue. Viang mawh kraung khrai: pa ceep ex kawx, caw tix kieh singax, caw tix thai: loh tix ceep, caw tix sidaux mai: caw tix priex tokaux tix mhawmmhawm: heue. Sonsang ang: pon jhawm: saux jhawm: ngia, sonsang ang: kawb ka pa seeing: pa ang: singax, caw tix kip nghim: taix nghim: caong mai: caw tix heem: rawm: ku singaix heue.
Phan: koe: dee saux, dee mat, dee plix mai: dee muad ang: pon tix pupi: giex kraig ka taix pa ang: singax heue. Phan: ex ang: pon priex tokaux tix mhawmmhawm: ka piang kaing: ang ah, ka daux tokaux ang ah, six, breeing, viag pa ang: mhawm: khankix kawb ka ex mai: ex pon jhawm: saux pa ang: mhawm: ka heue.
Mawh kheu nan: sonsang ang: pon jhawm: saux jhawm: ngia ka daux tokaux tix, caw tix singax singeh jheengjheeng: heue.
Lox Chawk
1. Ka piang tokaux kawn: pui, mawh ceu patix pa tiebtie son ex lie?
2. Hak ex kawn: pui chix pon jhawm: saux ceu patix lie?
3. Sonsang ang: pon jhawm: saux, caw tix yuh ka mawx lie?
Lawg (8)
Ia: Simex Mhawm: Grang
Didix, koe: ia: simex tix mu:, ce: tix kin: mhawm: grang, mai: yuh grang tix mai: ah lox ngeei:, ia: simex phex grang yuh nin: sigoe raoh mai: sibex preeih, singi: ghok mai: di graing: caong, silah mhawm: grang aux nambad tix.
Koe: tix ngaix, ia: simex hoik sak ka kaoh tix, yaog naok tix ah lox tix num: khaox ting heue. Nawh yaox gawx tix mu: mai: ah nin: "Gawx lang jheeh, ax silah paox tix, mawx pa mhawm: grang?"
Gawx ah nin: mai: dhah rhawm: tix, "Paw nyang ha: ka daux khaox in: sang pai: aux nawh." Ia: simex mhong: ah gawx nan: ah lox tix, baox niiet tix hu: heue.
Ia: simex hu: hoek daux ma: plix, yaox kun: hia: ah nin:, "Kun: hia: ton: to ngai: ax silah paox tix, mawx pa mhawm: grang?" Kun: hia: dhah rhawm: mai: ah nin:, "Ang: aux tien, hoik pruih tai khaox plix, sang hu: aux teei rawm:" Ia: simex mhong: lox in: ah lox tix baox niied tix hu: heue.
Ia: simex hu: hawt tong kaung: yaox khiiet tix mu: ah nin:, "Khiiet prauh vaig, ax silah paox tix, mawx pa mhawm: grang?" Khiiet ah nin: mai: dhah rhawm: tix, koe: kaing aux, kawng ka nghox, sang hu: aux nyhawp kawng." Ia: simex yaox ang: mawx silah mhawm: grang mai: tix, ceen deeh ing : khaing: heue.
Hoek greung krax, ia: simex yaox brung kuad tix mu: tang: priex preem, ah nin: mai: voi rhawm: tix, "Tax brung, aux sang silah tix mai: yuh patix kix ang: simi aux lie?" Brung kuad ah nin:, "mawh jao tawng kix mhawm: ang mhawm: , ang: mawh ngie gaig plak praix, kawn gaig nang: teem: ang: teem: coi kawn: pui yuh kaing jhaw:" Ia: simex mhong: lox inkix kaig ka, ang: lai pon hu: silah ka mhawm: grang tix mai: pui mawx tix khaix. Khaix an: ku singaix, ka: ang: praix nyang riang , nawh sau: lox ux tix, so: kawn: pui kaoh heue.
Lox Chawk
1. Ia: simex mhawm: grang hu: silah tix mai: pui mawx kix lie?
2. Yuh patix nawh hu: silah mhawm: tix mai: ankix lie?
3. Brung kuad sidiex ia: simex mhawm: grang yuh ka mawx lie?
4. Ka: ang : praix nyang riang ia: simex mhawm: grang teem: kawn: pui yuh ka mawx lie?
Lawg (9)
Miao: Sum: Kax
Ai Ka: mawh cao: yuh ma: kaung: tix kaux heue. Nawh sum: sivawng daux ma: tix, hoek baux kaux hoik pon sivawng miex nyao heue. Khaix hoik leh moeng nawh pa kaux Yex Hoing: sivawng uik. Pux nawh pa kaux Nyi Nap deeh sum: ceemtiex daux ma: hoek baux kaux, hoik pon ceemtiex miex nyao heue.
Kawn: miao: yaox yuh nan:, teei nang: kawn: kax viex tix hu: sum: daux ma:. Grawh grawng nawh, kawn: miao: kawx, simie tix pon kawn: kax miex nyao heue.
Lox Chawk
1. Ai Ka: mawh cao: yuh patix lie?
2. Yex Hoing: mawh pui mawx lie?
3. Khaix leh kix sivawng, pui mawx deeh sum: patix lie?
4. Miao: sum: patix daux ma: lie?
Lawg (10)
Kawn: Peh Yuh Paoxgrawm
Didix, koe: kawn: peh tix mu: hu: sawg tix yuh paoxgrawm mai: tosat tang: ceu tang: mu: heue. Yam jah nawh yuh paoxgrawm mai: kawn: ia:, kawn: ia: khankheu: nawh ih kawn: kawng, kheu: ang: nawh sax ih kawn: kawng, nawh ah lox ting bwanson: ka kawn: ia: yuh nin: "Paoxgrawm eue, laohlie pa yuh maix, viang mawh nan: aux ang: sax mawh pa ih kawn: kawng heue."
Khaix an: kawn peh deeh hu: yuh paoxgrawm mai: kawn: miao:, kawn: miao: hu: teei kax, khankheu: kawn: peh ih, kawn: peh ah lox ting bwanson: ka kawn: miao: yuh nin:, "Paoxgrawm eue, laohlie pa yuh maix, viang mawh nan: aux ang: sax mawh pa ih kax heue."
Khaix an: kawn: peh deeh hu: yuh paoxgrawm mai: kawn: sox, kawn: sox khankheu: kawn: peh khliak siang:, kawn: peh ah lox ting bwanson: ka kawn: sox yuh nin:, "Paoxgrawm eue, laohlie pa yuh maix, viang mawh nan:, aux ang: sax mawh pa khliak siang: heue.
Khaix an: kawn: peh deeh hu: yuh paoxgrawm mai: kawn moi , kawn: moi khankheu: kawn: peh sawm: rib klai heue. Kawn: peh ah lox ting bwanson: ka kawn: moi yuh nin:, "Paoxgrawm eue, laohlie pa yuh maix, sawm: ax tau heue."
Lox Chawk
1. Kawn: peh yuh paoxgrawm mai: ceu tix lie?
2. Kawn: miao: khankheu: kawn: peh ih patix lie?
3. Viang ang: kawn: peh ih ka pa khankheu: paoxgrawm nawh tiblah kawx, nawh deeh ah lox patix ka kix lie?
4. Kawn: peh chix khliak siang: lie?
5. Kawn: peh chix sawm: tau mai: ceu patix lie?
Lawg (11)
Toi: Hu: Mox Tix Daux Nong:
Tom: yam jah tiex tix loi:, moi tix bawh, raix tix pang:, rang: tix peem: didix, toi: mai: lak hoik ot tau sijheeng:, mawh paoxgrawm moh, hauk kiex paing khawm uik awm: paox tix heue.
Sonsang yuh kiex tix mhawm: grang, kiex tom phaw: lox tau, lai loh paox tix pawd rieng tai ka hauk paox tix heue. Lak jah tix gaw toi pawd rieng tai, lak shiao rawm: nammeug lung, bre tix pawd piang hauk toi: rhoi: mawx rhoi: an:, ot khaix baox teei rawm: nammeug raoh kraix ka gawng caong toi: raoh ngie, khaix hoik pawd nawh toi: uik, toi: kied mhawm: grang tete, khaix lak uik ghoing: ngie ka heue.
In: phao:, caw toi: pawd rieng tai ka hauk lak phao:, toi: taug sang jah tix pawd, keem mawh mhong: nawh lox patix ang tawng, toi: yaog tix tong sijaox, ah, "Mawh tit lox patix?" Lak deeh yaoh nang: ka lox toi:, taug sang yaog tix pu:, toi yaog tung rawm: nammeug lung lhauk nawh ka lak uik, lak hoik lung khawm jung tix, kiex tang: to: khaix heue.
Khaix an:, phan: lak yaox ka beuh grang tix yuh nin:, nawh hoik kin: meet rhawm: ka jao, phan: sidauh toi: dee mawx, nawh pheet tix tut heue. Toi: lhat ka lak, to: laig daux nong:, hoek tom singaix, toi: tom ang lai pon lih khaing: daux nong: heue.
Lox Chawk
1. Yam jah dix, hauk toi: mai: lak mawh pa yuh ka mawx lie?
2. Toi: kiex lak phaw: lox patix ka paox tix lie?
3. Toi: kin: mhawm: grang khaix pawd lak patix ka nawh lie?
4. Mawh kheu jao patix lak lung khawm jung tix lie?
5. Mawh kheu jao patix toi: to: tix ot daux nong: lie?
Lawg (12)
GRAWNG: KEUD SON BHAO: KHAIX
Tax kuad tix kaux paog kaong: tiex daux sipeem yuh tix mai: ngawm caong kawn: khaox makmung sum: tix heue. Kawn: simiang tix kaux hu: lailing tix jaw dau tiag daux nong: mai: jiet caw tix pha: sipeem yu tax kuad heue.
Tax kuad an: yaox hoek kawn: simiang dee ot tix rieb nawh khawm: gauxrhawm: gauxrhi: tix mai: tawx ih plix makmung pa sidaing: tie: khawm: bhawng: tix heue.
Kied sidaing: nyawm plix makmung caong tawx maix aux ih nox tax eue. Viang mawh nan:, aux simie tix chawk tax ka lox tix gum, yam hoek aux nox, mawh sum: tax kawn: khaox patix lie?
Tax kuad - Sum: kawn: khaox makmung.
Kawn: simiang - Tax hoik koe: ju maix miex num lie?
Tax kuad - Ju aux hoik koe: tidaix (80) num heue.
Kawn: simiang - Tax, mawh kawn keud maix tix kawn baox im: miex num lie? Yamin: kawn: khaox makmung pa sum: tax mawh ce: maix tix kawn yaox tix ih lie? Kaing pa ang: ex tau lai yaox tix ih, nieb yuh mawh khaw: nang lie?
Tax kuad - Plix makmung pa ih maix yamin: nox, mawh pa sum: tax yiex aux tix deuh heue. Kawn: khaox makmung pa sum: aux tix deuh yamin:, phan: hoek ju kawnsaux kawnsex aux mai: cub pui bhao: khaix kix teu rien tix yaox tix ih heue. Tax kuad an: deeh pawk lox kawn: simiang an: yuh nin:, kawn: simiang an: kied sidaing: caw khaw: rhawm: ka tete heue.
Kawn: simiang - Lox tax mawh lox caw tix priex daux rhawm: khrawm: daux kaux tix tete. Man: aux tix krai lox yuh nin: nox, paw awt saux rhawm: ka liak "Tax". Jah daux in singaix ang: aux doh lai keud ngie son tix khaing:, aux lawk keud tix yuh kaing son tokaux aux mai son bhao: khaix awx. Aux simie tix krub ka Tax, khaix hoik ah kawn: simiang an: nan:, nawh peeik jip gien: shiang: ih tix krub tax kuad, khaix an: nawh yaog tix brug brung tix mai: ing: gaux sile: he: sivoeg tix heue.
Yam an: tax kuad an: gauxrhawm: gauxrhi:, kheu pon laksawng khaing: kawn: simiang, Tax an: ah nin:, khaox makmung pa sum: aux hoik plix khri:, plix shiang: son aux heue.
Yam yuh kaing, viang maing miex ding, paw deen paw gaing:.
Jhaing: yaox riang rao cao: tix voe.
Ceu pa sum: van: ang: doh nai:, grai: kaux ang nai: khaix.
Lawg (13)
Lak Pie Lhen: Tix Mawh Kaung:
Didix, koe: lak pa sidaing: yaw cao tix tix mu:, lak an: yaox jhawm: mhawm: grang kaung:, nawh ka simie tix mhawm: grang awm: kix heue. Mawh kheu nan:, nawh sawg tix sut hauk kaung: mai: seet daux kaux mu: tix, hu: dee ot kaung: heue.
Lak an: hoek dee ot kaung: mai: ah nin:, "Aux ka mawh nang: kaung: awm: pex heue." Yam an: cub kaung: pawk lox nawh ah nin, mai: baig ngai: nawh, " 'phuik' sim: pie lhen:, maix ang: tie mawh cub sim: kaung: awm: yix, maix mawh lak pa pie lhen:, yuh tix mawh yix kaung: ang: mawh lie?" Yam an:, kaung: khankix reeb tix tuih lak an:, lheu: khaing: hoik greeig hauk kaung: khaing: lak an:, pie hak cao: lak hoik greeig khaing: nawh uik heue.
Lak an: kied sidaing: saux nex saux kih, mai: deeh po: hoek dee ot paox lak tix heue. Maix kaux rhawm: ka ceu pui tang: ceu, tieh tix ang: kaux rhawm: ang: yumrhawm: ka ceu cao: tix, pi prah, map nai: ka ceu cao: tix pa mawh cub lak, maix paw lai hoek ka yix, paox lak ah nin: ka nawh, mai: grheu: nawh lih khaing: daux cub phung: lak heue.
Maix tik ceu cao: tix, yuh tix mawh pui tang: ceu, ja lao yix lak ang ah nin: ka maix, pie kaung: kix ka koeng ka maix. Khaix hoik ah kix nin: ka lak an:, kix ang lai cu lak an: ot tau mai kix heue.
Lox diex lox gau kuad ka ex.
Jah tiex tix loi:, kaw: moi tix bawh.
Kaw: raix tix pang:, kaw: rang: tix peem:.
Deem: ang: sax krix ka krak.
Cak ang: sax tuih ka rung:.
Bi: ang: sax plix tawg.
Krawg ang: krix, ang: sax koe:.
Ceucad mawh aux, kaux cong: yuh aux.
Lawg (14)
Grawng: Khaox Ox
Khaox ox mawh ceu pa kied sidaing: koe: bwanson: son ex kawn: pui heue. Phan: ex sang sum: tix ot nyiiex ma:, ex peung tix yuh rong: nyiiex, lat nyiiex, nuk nyiiex, siox nyiiex, prang: nyiiex, rung: nyiiex mai: phia: ka heue.
Phan: mawh khaox ka mawh nang: cao pa kieh baux yam praix klawng: mhawm: heue. Koe: khaox ting nong: ting dee mawx, rawm: lhiex, rawm: klawng: ka mhawm: dee an:, lheu: khaing: an:, ex kawn peung tix yuh reu, yuh khix, yuh khaox thai: krong baog, sipeed, mai: pheu: can kraung pa shiao son kaing jhaw: khankix heue.
Ox ka mawh nang: nan: awm: khaox, awm: ox ex sum: nyiiex yaong: pa ang: ox viex ang: sax koe: pie tix nyiiex kawx heue. Ex peung tix yuh maox vien kuceu ka heue. Awm: meung pa koe: cuyi: pingnya, kix krid ox yuh mawh ce tiem lai, yuh ngot, taoh mawh meeih mai: tawm daux nyiiex lhaong: ot tix heue. Ox ang: mawh ngie pa shiao ex son sum: tix nyiiex nongnong:, kawn yuh nang: kraung pa yip pa shiao daux nyiiex heue.
Lox tiag, sawng, yau, pheen: ox, khrawng:, iep, luk sawm:, jhat, lhak tuh, maox vien, maox thai:, toi: an: khankix ex kawn peung tix ih plaung, yuh khrauh niex, pung, ex kawx peung kieh mawh puan: son ex heue.
Khaox mai: ox ang: joeng mawh ngie koe: bwanson: son pa yip pa shiao phan: ex kid tix coh ex ka chix pon mau khri: ka heue. Son pa yip pa shiao ang ah, son plak magmi ang ah, khaox ox sidaing: joh jhan: ka ex heue.
Mawh kheu nin:, nyiiex mawx yaong: an:, sau: riang rao tix sum: khaox ox kukaux daux pui awx.
Khaox ox coh kix, chix mawh mau.
Kid khix bix kaing, taing: mawh yau.
Mau cai: ngai: lai, mawh khaox ox.
Sau: riang sum: ox, toh ku gawng.
Klawng: gawng rawm: nyaux mhawm: kheu khaox.
Lawg (15)
Jhak ngai: lai in: plak greem:, mai: kieh mawh lai phat awx.
Maix, Nawh, ah, Pax, Yex, Kiex, Aux, Ax, Pex, Yix, Kix, Tax, Keeing:, Miex, Aik, O,
(1) Maix, Maix bre priex nyiiex mhawmmhawm:.
(2) Nawh, Nawh hu: Pang Kham:
(3) Ah, Ah aux tix hu: laih Meungmau:.
(4) Pax, Pax niied hu: phaiphai: awx.
(5) Yex, Yex hu: maix ma: dee mawx?
(6) Kiex, Kiex sang hu: tix briex moi.
(7) Aux, Aux sang liag law tix mu:.
(8) Ax, Ax hu: ih priex prawng Yaong: Maw.
(9) Pex, Pex yuh patix ka lig in: lie?
(10) Yix, Yix hoik uik gaox sawm:.
(11) Kix, Kix hu: kid khix daux tiag.
(12) Tax, Tax ih patix?
(13) Keeing:, Keeing: kaoh maix khaing: dee mawx?
(14) Miex, Miex ting brax pax nang: lie?
(15) Aik, Aik aux kied mhawm: grang.
(16) O:, O: aux kied mhawm: tai.
Lawg (16)
Ting Tu Pu Rhawm: Ang: Mhawm:
Didix, Tax kuad tix kaux, nawh koe: pet miex tix mu:, pet an: jiet mawh ceu pet pa daox pa am:, kheu jao tawm: nawh tawm: khri: ku singaix heue. Mawh kheu nan:, Tax in: nie mi tix ngaix khaing: tix ngaix heue.
Koe: tix singaix, tax kuad an: keud daux rhawm: tix yuh nin:, "Pet in: tawm: ngie tix singaix tix mu:, cha: luan rheeng:, daux vaig pet in: teu rien tawm: nawh tix nie pleue," khaix hoik ah nawh nan:, nawh tom mut pet an: pah yum: heue. Yam an: nawh sawg tawm: khri: daux vaig pet an: ang: yaox. Phao: in:, nawh deeh ah nin: ka tokaux cao: tix, "Man: aux tix pah pet tix yum:, hoik mawh krax lud ting son aux tete telai heue." Khaix an: nawh deeh keud mai deeh klih ka pa hoik luan yuh tix heue.
Fahrhawm: ka pa koe: mhawm: son maix.
Cawk ang: hoek taix, khlaix ang: hoek bhawm:
Ih pie nyawm, sawm: pie laig.
Paw yuh kaing nai:, paw yuh grai: kaux.
Koe: kraung thai:, koe: dai: loh miex ding, ot khawm: an: heue.
Lawg (17)
Phax Cao: Mai: Moi Law:
Didix, koe: cao: grheu: moilaw: tix kaux, nawh grheu: moilaw: cie tix laig daux eeng: daux glaox pa raux, yam grheu: hu: yuh nin:, law: cie nawh blawn daux glaox heue. Yam an: moilaw: ang: pon tuk pon reu: law: lih khaing; daux glaox ca: ot yuh nan: heue. Cao: moilaw: an:, ang: tie sau: riang tix cot law: sonsang pon lih law: khaing: daux glaox an:, nawh nieb ca: ot, mai: bhok taix tix ang: tie susiax tix yuh tidtix heue.
"Siyiex eue, teem: coi ka aux liak, kieh law: aux luan khaing glaox in: liak," nawh rawg bwan: ah yuh nan: heue.
Yam an: Tax Phax Cao: ah nin: ka nawh "he" pui nieh, sonsang luan law: maix khaing: daux glaox in:, maix ang: tie sau: riang mai: cot ka law:, ang: maix sau: riang tix lie? Sau: riang maix cot mai: kieh moi reu: nawh, yam cao: law: an: yuh awm: pa ah Tax Phax Cao:, law: nawh tom: tak pon tix lih khaing: daux glaox dee blawn tix heue.
Phan: yuh, phan: yaox kaing ceu patix ang ah, tom: ex plih riang rao, ang: nieh ang krien, tom chix hoik heue. Kaing ceu patix ang ah, nieb tang: chix yuh chix hoik khawm: ang: pui yuh, ang: sax koe: piang haktiex tix bawg kawx heue.
Thai: moi, koi hu:
Tu: ma: pa pon, don: ka moi.
Moi teem: saux nyoi, coi saux gleh ex.
Ih riang moi, coi tix kah.
Lox Tawm: Sonsang Gau Lai Vax
Ju tax ex ju yiex ex dix,
Chix pih kix ang kix chix pai:,
Simie prim: kix deh sang pruat,
Son ang pruat ex mhai: tix tawng.
Ju miex ex ju keeing: ex dix,
Chix krai kix ang kix chix pawd,
Been lao kuad kix deh sang grai:,
Son ang grai: caw tix chix lai.
Sonsang ang lox kuad kix grai:,
Mhai: tix priex daux phuk lai Vax,
Sonsang chix ex ngai: lai Vax,
Gau lai Vax kukaux awawx.
~~~~~~~~~~~~~~~~~~~~~
31 - 5 - 2003.
Krax Chix Kuceu
G 4/4 - 4
é ê þ ë ö çø ì ë ö é é þ è ö ë ê é ö
1. Ang chix lai ang chix sawn:, Phan chix sawn: tom: chix yuh.
2. Been lao kuad dex sang grai:, Son ang grai: caw tix mhai:.
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
é ê þ ë ö çø ì ë ö ë ë þ ë ë ì í çø ö ú ÿ
1. Son sang chix gau ka lai, Krax chix ku ceu lheu: khaing mau. ÿ
2. Son sang mhai: gau chix lai, Gau lai Vax ku kaux daux pui. ÿ
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
Num: cub caw ting pa yuh phuk lai Vax lih son krax lhak krax haing: haktiex Meung Vax. 1991. (4 - 6 - 2003)