Lai Vax
Phuk Lai Gau
Glawg 2
Cao thut = Ai Pao Pleek Sgu
Cao tawx akhwang mai cao teem plak mau khri = Simieang Vax plak jee. (361)
Cao teem cao jhi daux krax Kawmpyuteu (Computer) = Mr. David Morse.
Cao teem plak cox sinax lai = Mr. Eliya.
Hoit = 1994 - 5 - 26
Yang li bawk - 1 = 500 phuk.
P.O. Box 21, Chiangmai, Thailand. 50000.
Lawg (1)
Lox Tawm Son Sang Gau Lai Vax
Ju tax ex ju yiex ex dix,
Chix pih kix ang kix chix Pai.
Simie Prim kix deh sang pruat,
Son ang pruat ex mhai tix tawng.
Ju mie ex ju keeing ex dix,
Chix krai kix ang kix chix pawd.
Been lao kuad kix deh sang grai,
Son ang grai caw tix chix lai.
Son sang ang lox kuad kix grai,
Mhai tix priex daux phuk lai Vax.
Son sang chix ex ngai lai Vax,
Gau lai Vax ku kaux awawx.
(Yuh tix chix ah chix pawd glip ngai, mai een daux rhawm tix jeeng jeeng.)
Lawg (2)
Lox Klieh Kawn Nyawm Ra Grawng
1. Khix Long Long
(Khix Liung Liung)
Khix long long khix haok long long,
Tawx ex vai sivawg maix liex,
Sivawg maix sivawg paing lawm;
Khix long long khix haok long long,
Tawx ex kawg bau law maix liex,
Bau law maix bau law mhawm preeih.
2. Lhiex Heue Praix
Lhiex heue lhiex heue lhiex heue praix,
Lhiex tom gawng ma hu yix praix.
Yix lawg tung maix ih tawm ia,
Yix lawg dia maix sawm eep nghox.
Kieh yix yaox tix ceep kraung mhawm,
Kieh yix yaox tix sawm eeppit.
(Yuh tix chix ah chix pawd glip ngai, mai een daux rhawm tix jeeng jeeng.)
Lawg (3)
Lox Jhawm Kab Sam Luang Sai, Ai Luang Nyi
Sam Luang Sai,
Maox rhix ex phex lang khaing lang,
Simie prim ang doh cu pruat,
Lox tawm keeng ex piang tai griex,
Mhaing ex kie yaung kie tix luat,
Niad kieh pruih yaung pruih lawm tai.
Ai Luang Nyi,
Been tang ex phex mhawm khaing mhawm,
Lox deuh kuad ang doh cu grai,
Been priex miex ex piang tai goe,
Mhaing ex phruat yaung phruat tix pre,
Niad kieh lai yaung lai huan rawm.
(Yuh tix chix ah chix pawd glip ngai, mai een daux rhawm tix jeeng jeeng.)
Lawg (4)
Lox Sidiex Dim Gum
1. Ux ia ah khrang,
Rieang praix ah khroih.
2. Ux ia liang sim rawng pawd lai,
Jih rieang praix Sai Sung krai lox.
3. Kawn rian ih nex dux,
Kawn nieh pux nge ngu.
4. Pui tok duh cieh ma,
Pui yuh gra hot caox.
5. Lox tawm keeing vien ka niex,
Lox tawm miex priex daux rhawm.
6. Lung rhang ex tom grum nyiah,
Luah caong ex tom grum hu.
7. Khaox kian teem paox tix grawng,
Nawng ting teem paox tix gaih.
8. Rawm tai puih tom siah keei gling,
Ting ngu phru tom nyawm eep kuih.
9. Moe tom lawm tom pon tix muk,
Lox tom ruk tom pon tix krai.
(1) nex dux ---------- nex daig,
(2) pux nge ngu -------- awm khaox, mhong lox.
(Yuh tix chix ah chix pawd glip ngai, mai een daux rhawm tix jeeng jeeng.)
Lawg (5)
Been Mawie Krak mai Sivai
Yam jah didix, rung mawie lang awm rung krak, tosat ku ceu hoit kin lhat ka heue. Lheu khaing an, sivai nie kin lhat ka mai ang sax pon chuh mawie heue.
Ti bawk, sivai sidauh mawie, chu jeei lox ah nin, "Mawie pake moh eue, rung maix phex tix lang yuh nin, maix hu daux tiak daux tu, hu daux nong daux nam hawt sivix ngie, maix khaw ceen tat ngoing khaing." Mawie mhong ah sivai nan, keut nawh hoit mawh lox paoxgrawm mhawm rhawm tete, ah pawx nin ka sivai, "Sivai paoxgrawm, ruk mawh lox ah maix heue, maix peung tat aux ih ngoing khaing. Sivai uik briex gaux ngie ka, mai hu teei vaig tat rung mawie kieh ngoing heue. Rung mawie ang lai kwe phao, ceu pa sang rian nawh kaux cao tix ka ang lai kwe. Sivai ang lai lhat ka mawie phao, yaox mawie dee mawx kiiet tix ih nex dee an heue.
Sivai sak ka nex mawie, kawn simie tix ih nex krak, nawh hu nyaw tix ah nin ka krak, "Krak pake moh eue, "Rung maix phex tix nie lang yuh nan, kin beuh grang tix yaox, maix hu daux tiak daux tu, hu daux nong daux nam, hawt sivix ngie jee blaong, maix khaw ceen tat ngoing khaing."
Viang mawh nan, krak kiet sidaing moh rung tix, nawh mhong ah sivai nan, tawng mawh lox lhen lox nyaw, pawk lox sivai ah nin, "Ang, ang doh tat, rung aux mawh pa pau kaux aux, ceu pa tix sang yuh aux, aux vat nawh ka rung tix tom blan tu." Sivai mhong lox ah krak nan, uik yaoh ka, dom mawx dom an, nawh to hu singai khaing krak heue.
Lox chawk:
1. Jao pa tix sivai kiiet mawie, ang kiiet krak lie?
2. Been lao in, sidiex ex yuh ka mawx?
Lawg (6)
Kawn Vax mai Lik Lai Mhai Ce
Kawn Vax (Paraok) mawh ceu kawn pui haktiex nyiex yaong tax guah yiex luan pa hoit rheung pang lang kwe, pa mi pa laoh, pa vieh, pa va ka piang haktiex tix ceu heue.
Mai maw ceu kawn pui laoh ka kaing, daing ka lox, riex riang, brax kua ka kaing ka jhaw, khaw lox tawm, mhawm lox krai, hun ka graoh, haoh pui ngeei, kwe rhawm ka puing pieh klieh lin heue.
Tom yam jah khaox tix pang, rang tix loi, tom yam jah tix kaoh khaing daux singian rang sigang lih didix, Tax Guah Yiex Luan kawn Vax hoit dawg ot dawg kwe ka piang haktiex in miex reng miex mheen num mawx dix heue.
Jah tom yam an, hwet tom in singaix, Kawn Vax pa haoh pa hun, pa ton pa lheu, ot ka daux yuh kaing yuh jhaw, viex rhawm lhak rhawm lhiao, kwe cuyi pingnya, tang hoit yuh Lik Lai Mhai Ce tix kwe heue.
Kieh kawn pui ceu cie tix kaux rong cong nyiex, nyawm puing nyawm pieh, nyawm klieh nyawm lin, kieh kawn pui tix mawh lox tix gum jum tix mu, tuk taix dai caong paox tix, ih rhawm rhi khri mau paox tix khawm ot daux kaing daux jhaw heue.
Lik lai mhai ce mawh blawng een tax, rhax sum keeing ex kawn Vax. Awm been lao jhawm kab, lox ngeei, lox sidiex lox gau, lox prie ex mai pon to tiak to tu inki, ang jing mawh in khaing, kawn haoh ceu, hun grawng, ang uik simin jieh, simie ceu, mai tang kwe dee mhawm, tang kwe dee ting ceu ao min awm paox ti, toh lawk khri, singi lawk shieang heue.
Viang mawh nan, glang ka sivoe in dix, mawh jao ot ex daux been prim, been faik, been saik been song, ex kawn Vax yaox krai gut kaing aing ngai, lik lai mhai ce ex Vax tom lih tix mawh ra loe ceu jao heue.
Vaig kawg tax ex sibaug lang, rawm nyaux yiex ex sigang keut, rhoi deuh tax krai prah keeing, lox tawm keeing ex piang tai griex, lox krai miex ex piang tai nghoe, tawm ex paok tix ih guh, yuh tix ih kaing, lox tawm kuad ah, "Lao kawn pui ang soh ih brum, pie sim seed kawn tuah ih gai, lao kawn pui ang sum ih nyiex, pie kiang lai: kawn kraix ih mheem."
Can ceu lik lai mhai ce, mawh ceu pa chix daog ex huan, muan ex ting, mawh ceu pa chix kieh jeeh ex awn, sawn ex lhak, mawh sin ngao pa ting ceu, ngawh jum pa hoit deuh tax yie miex keeing ex dix, ex caw yaog nawh kwe ceu, yeu nawh kwe jhawm, ang pon kieh yeet yai grai yian, paw doh dha rhawm tiam ngai ka heue.
Simie prim ang pon kieh pruat, lox deuh kuad ang pon kieh grai, ex caw riam riex, priex mhawm, caw tiem daux lai mhai daux ce, giex nawh tom kian:, mian nawh tom sied, jawg kie daux man luat, phuat daux man pre, priex daux rhawm tix leeing ju leeing phan.
Kieh ex kawn Vax lai plut moe toe ju, plix ku kak, lhak ku kaux, kieh lik lai mhai ce kawn Vax pruih awm tai lai awm rawm, kieh kawn Vax ka piang haktiex niad tix haok huan heue.
Lox chawk:
1. Kawn Vax maw kawn pui pa yuh ka mawx?
2. Tax guah yiex luan kawn taug khraox kwe ka piang haktiex lie?
3. Maw kheu tix, kawn Vax hoit tang tawng tix chix yuh lik lai mhai ce cie tix tang kwe lie?
4. Ex kawn Vax sang kieh paox ceu tix haok huan yuh ka mawx?
5. Lik lai mhai ce, maw blawng eun mawx, mawh rhax sum mawx lie?
6. Lik lai mhai ce mawh ceu pa chix kieh ex yuh ka mawx?
Lawg (7)
Plix Dieh Sibloe Haok Phao
Kawn nyawm loe kaux dieh pli dieh (plix chiux) hawt num khao ting, plix dieh tang tuad, laik daux dawh num khaox heue. Daux dawh khaox sidaing raux, ang lai pon teei plix dieh lih phao.
Nyawm an tix kaux viex pheeng hu puk rawm hwet, rauk rawm daux dawh khaox, khaix hoit naog rawm daux dawh khaox, plix dieh sibloe haok phao, mai kawn nyawm ankix loe kaux kiet gauxrhawm heue.
Lox chawk:
1. Kawn nyawm loe kau yuh pa tix?
2. Thie lox daux yi,
(1) ( ) ( ) loe kaux ( ) plix dieh.
(2) Plix dieh ( ) ( ), laig daux ( ) ( )
(3) ( ) naog daux dawh khaox, plix dieh ( ) haok phao.
Lawg (8)
Ai Meung Hu Ah Lai
Ponngawp Ai Meung hu ah lai. Hwet greung krax, nawh yaog tix mhong lox yiam sigrid hawt krax heue, Ai Meung tawng sigrid daing brax kwe daux pang rip mai nawh brieh kawie hu ngie ka, sivih tix gaig daux pang rip, yaox ka sigrid ting ti mu tan heue.
Ai Meung nyhawp nawh ka taix tix ang pon, sigrid tiad tix, baox hu laik daux pang rip heue. Ai Meung baox pheet naw, sivih rip cheu tix sawk yuh ka mawx ka ang yaox heue.
In phao, Yex Lawm kok yo daux krax, "Ai Meung, maix gaih ang niad tix phai hu, lha hwet khaix awawx."
Ai Meung niad tix lih khaing daux pang rip, phu phiah tiex kawb kraung tix, to hu nyiex gau lai mai Ye Lawm heue.
Yam kawn taug laik kiex daux nyiex gau lai, hing luah, mai Ai Meung briex simi Yex Lawm khawm nyiah um tix heue.
Lox chawk:
1. Ai Meung mawh kawn nyawm pa tix?
2. Ai Meung mhong lox yiam pa tix?
3. Ai Meung pon nyhawp sigrit ka taix tix lie?
4. Mawh pui mawx pa kok yo Ai Meung lie?
5. Ai meung to tix hu dee mawx?
Lawg (9)
Nawh Mawh Mawx
Am Nap mai Sai Pleek hu ah lai tau ku singaix heue. Tix singaix, yam hu kiex, yiex kuad tix kaux lawng krax sivoe kiex, mawh mai lhiex, krax kin nyu, yiex kuad ang rian rhawm tix goh piang tiex heue. Am Nap to tix hu jhak, yaok yiex kuad kaoh cung, Sai Pleek chawk Am Nap, " Keem mawh nawh yiex maix pah." Am Nap pawk, "Ang mawh." "Mawh nawh miex ting maix pah?" "Ka ang mawh." "Nawh mawh mawx pawx?" " Ang aux tawng nawh."
Lox chawk:
1. Am Nap mai Sai Pleek yaox pa tix daux krax lie?
2. Gumlox inkix plak greem, mawh lox ah mawx?
(1) "Mawh nawh miex ting maix pah?"
(2) "ka ang mawh."
(3) "Nawh mawh mawx?"
(4) "Ang aux tawng nawh."
Lawg (10)
Kawn Peh Tix Mu
Khai naox lai, Pa Theux lawng krax ing plak nyiex, mhong lox kawn peh ah miex miex, sawk nawh jee blaong tak hu yaox kawn peh ka daux rawng tix mu heue.
Pa Theux klian kawn peh hu chawk pui ka ku sidah, "Mawh nyiex mawx pa grai kawn peh lie?" Pui to ah ang peh tix grai heue. Mawh kheu praix uik deh sang faik, Pa Theux ceen klian kawn peh ing ka nyiex kix heue.
Ngaix khaix, Pa Theux kaoh cao cao hu gaig kawn peh, tawx nawh nyaux rawm teeih. Pa Theux kaoh khaing gau lai, miex nawh ah nin, "Kawn peh mawh pa grai yuh yaong Vu Tui. Pa Theux ang lai tien sawm, klian kawn peh, niad to hu tawx ka yaong Vu Tui, kawn peh taug deeih hwet hawt miex tix heue.
1. Lox chawk:
(1) Pa Theux yaox kawn peh dee mawx? Bawk yam lai mawx?
(2) Pa Theux yuh pa tix klian kawn peh ing nyiex kix?
(3) Kawn peh deeih hwet hawt miex tix yuh ka mawx?
2. Thie lai daux yi:
(1) Pa Theux sawk kawn peh ( ) ( ), taug hu yaox ka ( ) ( ) tix mu.
(2) Pa Theux kaoh cao hu ( ) kawn peh, tawx nawh ( ) rawm ( ).
(3) Pa Theux ang lai tien ( ), ( ) kawn peh, niad ( ) ( ) tawx ka Vu Tui.
Lawg (11)
Lak Nyaux Rawm
Lak tix mu, kin sang nyaux rawm, hu sawk ti nyaux ku sidah ang yaox. Lak an yaox kawng ti mu, rawm kwe daux kawng an, khawm mawh nan kawng lhaong moing gawb rawm kwe daux ang nie, lak ang hwet nyaux heue.
Yuh pawx ka mawx in, lak yaox haoh loi simaox vuviang tix, nawh lih keut phao. Lak sut lon simaox tix mu tix mu ngie, sau daux kawng. Rawm haok haok ka moing kawng, lak tom taug pon tix nyaux*awm heue.
1 Lox chawk:
(1) Lak sang nyaux pa tix lie?
(2) Mawh pa tix pa kwe daux kawng?
(3) Son sang pon lak tix nyaux rawm pa kwe daux kawng, nawh keut tix sang yuh ka mawx? (4) Lak in, lhak liex? aw lie?
2. Thie lai daux yi:
(1) Lak tix mu, kin ( ) ( ) rawm.
(2) Lak lih keut ( ) ( ) phao.
(3) Lak sut ( ) ( ) ( ) tix mu tix mu ngie ( ) ( ) ( ).
(4) Rawm ( ) ( ) ka moing kawng.
(5) Lak taug pon tix ( ) ( ).
Lawg (12)
Sivaig Po Deeih Hwet
Hoit hwet khix vaw phao, kawn sivaig po hawt miex tix kaoh khaing caong ma seh heue
Po ---, po ---, kix po piang yaong tix yaong: Kawn sivaig simi greem tix, chawk miex tix ah nin, "Miex miex, mawh rang paing dee mawx jung tix daux yaong an ding lie?" Miex nawh nyiah mai ah tix nin, "Kawn aux, an mawh nyiex beung khraox sum pui tix ot ka heue,"
Po ---, po ---, kix po piang tong kaung tix dah, kawn sivaig simi greem tix, chawk miex tix ah nin, "Miex miex, mawie krak thai pui kaung ka, yuh ka mawx chix pruih taox ngu liex?" Miex nawh nyiah mai ah tix nin, "Kawn eue, an ang mawh mawie krak, mawh thai pui ka cag thai rhiem (thawlaci) heue.
Po ---, po ---, kix po hwet nyiex prim tix, a miex eue! nyiex nyhee keh miex sivaig kawn sivaig ka ang lai yaox, in ngaix hoit tieh tix mawh nyiex beung khraox phao. Kawn sivaig kok simi plak daux nyiex Sam Meung lieh lox an dix, pawd lai piang pheen heue. Kawn sivaig gauxrhawm tix krai miex tix mhong, "Miex miex, Sam Meung ah lai nghiet lox ngaix, sau riang tix gau lai." Miex sivaig nyiah mai ah tix nin, "Mawh tete heue, rug hoit tieh loh ku ceu tix miex nyao phao heue."
1. Krai been kawn sivaig glip ngai.
2. Thie lai daux yi, ah gumlox hu khaix.
(1) Kawn sivaig hawt miex tix kaoh khaing ( ) ( ) ( )
(2) Mawh ( ) ( ) sum pui tix ot.
(3) Mawh thai pui ka ( ) ( ) ( ).
(4) ( ) ( )sau riang tix gau lai.
(5) ( ) ( ) ku ceu tix miex nyao.
3. Shiao lai lox ah gumlox.
Kaoh khaing Lieh lox Gauxrhawm
Lawg (13)
Kangkoi Paing mai Kangkoi Pau
Didix, tax kuad peh tix mu, hu pon taux paing daux sipeem, kangkoi paing mai kangkoi pau hwet tix teem gaw nawh heue. Hoit pon kix taux, tax kuad peh tawx kiex cie taux sum tix. Kangkoi pau riep taux, ah nin mai, "Laoh lie maix!"
Kangkoi paing ang cie taux ah nin, "Tawx aux cie simie taux khaing." Tax kuad peh tawx kangkoi paing cie simie taux paing tix gie heue. Kangkoi paing ing hwet ka nyiex, ciag sipeem taux, ruad simie taux ka, kwe ra loe ngaix, taux paing kuah sibraw ngie heue.
Kangkoi paing ang lai nyawm ot kheu gauxrhawm tix, lhauk rawm, sau phon, nyhawp kawng, riam rip, kawn taux khankix daing phai huan heue.
Kangkoi pau viex taux tawx tax kuad peh ing hwet ka nyiex kix, nawh yu kaing jhaw, cai rhawm, nawh ca ih taux tawx tax kuad peh, ang kwe miex ngaix tix, naw uik ih taux an heue. Kangkoi pau ang lai kwe ceu pa ih, sang baox hu mhaing taux paing nyiex tax kuad peh heue. Yam hwet nawh ka nyiex tax kuad peh, nawh yaox klawm kangkoi paing taux paing tix glawm hwet tawx nyiex tax kuad peh heue.
Kangkoi pau daox deng ka, chawk nawh, "Kangkoi paing, teei maix taux inkix dee mawx?" Kangkoi paing ah nin, "Mawh pa tang sum aux, phan ex tang sum, ex tom ang chix die taux ih heue."
(kangkoi = cakpie = pet la)
1. Pawk lox chawk:
(1) Tax kuad peh tawx kangkoi paing mai kangkoi pau cie taux paing, kiex cie ang cie?
(2) Ing hwet ka nyiex, kangkoi paing yuh pa tix? Kangkoi pau yuh pa tix?
(3) Lox goit kangkoi paing tix krai, ah ka mawx?
2. Thie lai khaw daux yi.
(1) Kangkoi paing mhaing tix cie ( ) ( ) ( ) tix gie.
(2) Kangkoi pau riep tix cie ( ) ( ).
(3) Kangkoi paing ang lai nyawm ot kheu gauxrhawm, ( )( ) ( )( ),( )( ),( ) ( ).
(4) Kangkoi pau ( ) ( ) ( ) ceu pa ih, sang baoh hu mhaing ( ) ( ) nyiex tax kuad peh heue.
(5) Kangkoi paing ( ) taux paing ( ) ( ), hwet ( ) nyiex tax kuad peh.
(6) Phan ex ( ) sum, ex tom ang chix ( ) taux ih heue.
3. Yuh tix krai been grawng in mhawm mhawm.
Lawg (14)
Kawn Raokhaox Lih Khaing Gawng
Tix ngaix dix, kawn raokhaox lih khaing gawng. Nawh hu hwet daux ma sivawng tix guang, nawh yaox tux sivawng uik brat brat ngie, kiet gauxrhawm ka, leh sivawng tix tux klawm nawh hu heue.
Kawn raokhaox klawm tux sivawng hwet num pang khaox tie, nawh yaox tie hoit teem raoh ngie khawm khaox, kiet gauxrhawm ka, tik tux sivawng haok pieh plix tie heue.
Kawn raokhaox giang plix tie ra mu, hu hwet biang ma tangtao tix guang, Nawh yaox plix tangtao hoit klung kling ngie bing ma, kiet gauxrhawm ka, tik plix tie hu pieh tangtao heue.
Kawn raokhaox klian tangtao deeih ing, hwet daux krai, nawh yaox kawn kangkoi tix mu phoh phoh ngie, kiet mhawm tix yaox, nawh gauxrhawm ka, tik tangtao hu pheet kawn kangkoi heue.
Kawn kangkoi to laik daux raog khaox, ang lai yaox. Kawn raokhaox yiam, viex taix yi tix ing ka nyiex khaix heue.
1. Lox chawk:
(1) Kawn raokhaox kaoh khaing dee mawx?
(2) Kawn raokhaox leh tix viex sivawng miex tux lie?
(3) Mawh kheu pa tix, kawn raokhaox tik plix tie viex tix lie?
(4) Mawh kheu pa tix, kawn raokhaox yiam khawm ing tix ka nyiex lie?
2. Thie lai daux yi.
(1) Nawh yaox tux sivawng uik ( ) ( ) ngie.
(2) Nawh yaox plix tie uik ( ) ( ) ngie khawm khaox.
(3) Nawh yaox plix tangtao uik ( ) ( ) ngie.
Lawg (15)
Kawn Vax Maw Pui Yuh Ka Mawx
Kawn Vax mawh pui laoh kaing, Mawh pui daing lox.
Kix paog tix ih guh, Kix yuh tix ih kaing.
Caw klawng kix sau sipauk, Caw rhauk kix sau sidawm.
Ton dee mawx, kix sau ngiex sawk, Klawk dee mawx ki sau bilaing.
Kix tauk ku bon, Kix non ku simex.
Ceep kix kiab lhaong peen, Sawm kix pheen lhaong caong.
Prauk kix tix nyaux plai, Pai kix tix yawt sub.
Ang sub jud khaing hau, Ang mau jut khaing taix.
Mawh kix pui khaw lox tawm:, Mawh kix pui mhawm lox krai.
Mawh kix pui hun graoh, Haoh pui ngeei.
Pah ia ang mox kaing:, Pah lik ang mox ba.
Ru tax kok keeing, Ru yax kok paox.
Moeng pake, kok mawh O; Mex nan mhawm, kok mawh Aik.
Dawg mawh kix pui chix nab yam, Dawg mawh kix pui chix kab lox.
Siyoh moing lox kix yam sawm, Grum rhawm muih kix yam naing.
Been yungyam, Lox yungyi, pa gau tax yiex, pa priex miex keeing.
Paw kieh grai, paw kieh nai, krai paox Vax ex mhong ku ju.
(Yuh tix chi ah chix pawd glip ngai mai een dau rhawm tix jeeng jeeng.)
Lawg (16)
Gau Tix Chix Tiem Dee Bleeh Ngai Lai Khankix
kap kab nap nab kak kag lak lag
kuat kuad liak liag lieak riang rieang
shiang shieang moi mawie cak cag
vaik vaig vait lo lox loh co cox coh
mo mox moh kaing kaing: lai laix laih lai:
lauh laux taox taoh kiet kiiet lawng lawng:
gau gaux ka kax kah ka: rawm rhawm
mai maix mhai
Lawg (17)
Kawn Lien Vax Tix Kaux
Nawh mawh mawx? Maix gaig nawh ceep kraung lien, ceep mhok lien, ceep kiap ox, ka klip nawh kwe ngai lai, nawh mawh lien daux krung naing Vax tix kaux heue. Naw hoit rheung ot daux lien, chix nghiet lox cao kaing:, sidaing vao ka puing tix naing heue.
Tawx kwe yam laux, nawh hu ngawm piang rang, teei kawn phuk lai lih pawd lai, phat lai, coca tix chix lai mhawm mhawm heue.
Nawh tawng tokaux tix mawh pui pa kaoh khaing miex keeing pui meung,
naw kiet sidaing moh ka ceu pui tix, nawh kiet sidaing moh ka haktiex een tax rhax een keeing tix tete heue. Hu nawh dee mawx nawh ah lox mhawm, ngawm nawh dee mawx, nawh krai pui mhong been mai tawx rang rao ka pui heue.
Pui iak ju khaing nawh, nawh moh; pui ting ju khaing nawh, naw nab yam. Ang nieh ka pui hot, ang cot ka pui mi, lih rawm ngai mai pui pa yiam, viex rhawm tiam mai pui pa hai. Kawn lien Vax tix kaux in, kiet kwe bwan son, caw ex hawt gau tix mai nawh heue.
1. Lox chawk:
(1) Maix tawng nawh mawh kawn lien yuh ka mawx?
(2) Nawh ot daux kru naing pui mawx?
(3) Naw tawng tokaux tix maw pui kaoh dee mawx?
(4) Tawx kwebawk yam laux, nawh yu pa tix?
2. Thie lai daux yi:
(1) Chix nghiet ( ) ( ) ( ).
(2) ( ) ( ) ka puing tix naing.
(3) Moh ka ( ) ( ) ( )
(4) Hu dee mawx ( ) ( ) ( ) ( )
(5) Pui iak ju ( ) ( ), pui ting ju nawh ( ) ( )
Lawg (18)
Sang Lhiex Praix Phao
Kangkoi paing num tix tuah rib ka rieh gawng. Praix klawng hoit aoh eed ngie, kangkoi paing yaog tix jung rauh, toek toek nyoi tix heue.
Kawn sim sivaig po hu piang nawh tix mu, kangkoi paing bleei lox tix yo,"Sivaig sivaig, yuh pa tix maix leui po tiam yuh nan?" Sivaig po mai ah tix nin, "Sang lhiex praix phao. Leed bhawm praix klawng, rawm hoit caux yu pruik bru maing, ang kix lhaong po, aux tom sawg tix nyhawp kix heue.
Rug mawh sang lhiex praix tete pleue? Kangkoi paing buan sivoe tix, daux dung tiuh tiuh, kawn kax loe tix haok piang rawm uik heue.
Kangkoi paing to tix hu chawk, "Kawn kax kawn kax, yuh pa tix pex loe tix lih piang rawm ngaix?" Kawn kax ah nin, "Sang lhiex praix phao, daux rawm aoh eed ngie, yix keem loe tix haok piang rawm loh bhawm tix. Kangkoi paing niad maix ing ka nyiex, lauh lhiex maix kie."
Kangkoi paing giang khrawng rib niad to ing plak nyiex. Nawh yaox phung meeik praok krax, krai phung meeik mhong ka sang lhiex praix, meeik ting mu ah nin, "Rong mawh sang lhiex praix heue, yix keem niad gaih tix haok dee lhaong."
Kangkoi paing niad tix to phai ing plak nyiex mai yo tix miex tix, "Miex ---, miex ---, sang lhiex praix phao."
Tuih saih sinum praix tix vut, pra, pra, pra, lhiex ting lih tete heue.
1. Lox chawk:
(1) Jao pa tix sivaig tiam po?
(2) Jao pa tix kawn kax leue haok piang rawm?
(3) Meeik tawng tix gaih nyiex tix jao pa tix?
(4) Kangkoi paing giang pa tix ing ka nyiex liex?
(5) Khaix hoit tuih saih sinum praix, lih tix mawh pa tix?
Lawg (19)
Lhiex Tuih Saih
Paiawm lung faik yuh raoma, awm pa sang lih gud piang haktiex. Yaog bhaung ting tix lih, vuviet yeem khaox yeem ox. Greeih tix mu lih kaing nyiex tix, hwet piang tiex to hu mox tix heue.
Saih nie tuih, pukplak praix nie rieang, saih nie tuih lox nie ting heue.
Pra, pra, pra, lhiex praix phao. Lhiex nie lih nie ting. Ot daux nyiex simi plak praix. Khaox ox, nyiex yaong ang lai yaox sidawng. Kawie hu sinyek sinyek, lox tuih saih iak sinyek, lox lhiex iak sinyek heue.
Praix klawng deeih rieang phao, paoh daux doh nyiex, bhawm khraox singax haok daux nyiex, jiet saux sin ngie ka ngai baoh ex heue.
Lhiex hoit vai, singaix lih phao, siyawng kakngaw daux rao ma, ca deeih nye phao. Greeih deeih ot ka nyiex tix phao. Rawm hoit naog daux dung, paing luklak awm rawm pang lai heue.
1. Lox chawk:
(1) Mawh pa tix faik yuh raoma?
(2) Mawh pa tix pa vuviet yeem khaox yeem ox?
(3) Pukplak praix nie rieang jao pa tix?
2. Tie lai daux yi:
(1) Paiawm lung ( ) yuh raoma.
(2) Lih bhaung ting ( ) ( ) yeem khaox.
(3) ( ) lih khaing nyiex, ( ) hu mox tix.
Law (20)
Sarama Yex Pleek
Lox hing ah lai luah phao, nyawm ah lai niad tix laik daux nyiex gau lai heue. Sam Meung laik khaix paox tix, nawh viex lai gau pa tawx yix kawx hwet, ah nin, "Sarama Yex Pleek saux, yix sang mhaing nawh laux tix, nawh kawn khin tix hwet gau ex ka lai heue."
In phao Sarama Yex Pleek viex ngai ngiah tix laik daux nyiex gau lai, kawn nyawm gau lai yaog tix yian yawg khawm uik, mai ngai kix simi tix jhak ka Sarama Yex Pleek heue.
Sarama Yex Pleek jah tix gau yix ka lai phao, lox nawh siem kra:, lox sikax nawh ang lai phex ting awm ku jeeng, vang maw kawx nan, lox lai krai nawh kawn sidawng, Nawh pawd lai tiex paing ka phia lung, taix nawh siem singua, khawm mawh nan, lai pawd nawh ca kawn sidaing mhawm pot heue.
Nyawm gau lai ku kaux bre tix nghiet ka krai nawh lai, bre tix gaig ka pawd nawh lai, Sarama Yex Pleek eue, maix mawh sarama mhawm yix tete heue.
1. Lox chawk:
(1) Sarama daux cawng an, ceukaux nawh kaux pa tix?
(2) Sam Meung viex lai pa tix hwet lie?
(3) Yam laik sarama daux lawg gau lai, nyawm gau lai khankix caw tix yuh ka mawx?
Lawg (21)
1. Shiao ngai lai inkix plak greem kieh mawh grawng lox
Pakpeung; ex(ex hu ah lai)
(1) maix ( )
(2) nawh( )
(3) ah ( )
(4) pax ( )
(5) yiex ( )
(6) kiex ( )
(7) aux ( )
(8) pex ( )
(9) yix ( )
(10) kix ( )
2. Sum ceukaux pui Vax
Ai ( ) Nyi ( ) Sam ( ) Sai ( )
Ngaox ( ) Lok ( ) Ciet ( ) Cip ( )
Yex ( ) I ( ) Am ( ) Ok ( )
IEt ( ) p ( ) U ( ) Vox ( )
3. Grawng keut sawn Vax khix num mai bawk yam.
Grawng keut sawn Vax khix num, ex ah Naknhi Pi meung ka. Ceu lox noh kwe ra ceu, kab tau tom mawh ceukaux singaix heue.
Pui = Ka, Kap, Nap, Rai, Meung, Pleek, Kat, Khwat, Rong, Tao, (khawm uik kwe 10 ceu.)
Tosat = Kiang, Mawie, Sivai, Kangkoi, Siyawng, Siuing Brung, Peh, Raokhaox, Ia, Sox, Lig. (khawm uik kwe 12 ceu)
1 num kwe 12 khix, (365 (a) 366 ngaix)
1 khix kwe 30 ngaix.
1 vang twah kwe 7 ngaix
1 ngaix kwe 24 taix
1 taix kwe 60 minit
1 minit kwe 60 sakkan
Lawg (22)
Miao Krih Ting
Daux biang dee ot tosat Pejing, tosat kiet mhawm kiet nguah haoh ka. Pa nie lheu moh pui sawn nawh mawh miao krih ting heue.
Miao krih ting kluing mu mih, ngoing sitax, hauk plang nyu ngie, taix caong mai klip lung, kaux nawh mai kaing paing ngie, pa kin sang yaox pui mawh lung sifeng ngai mai yayhaok khawm ra khawn heue.
Miao krix ting, yam iak kiet kin rian klieh, Moh tix haok dee lhaong, lih dee tiam. khai hoit ting ang lai phex rian chuh, rian kawm kaing: tix it du ngie heue. Yam it nawh phan maix hu lawk law nawh, nawh blah ngai tix simi maix, khaix an nawh baoh deeih it du heue.
Tawx kaoh nawh khaing it, nawh hu dudi ngie mai lailing sawk tix ih priex.
Miao krix ting moh tix sawm lhax ox klai mai plaung ox. Maix gaig nawh sawm lhax ox uik nyawm ngie heue.
1. Lox chawk:
(1) Daux biang dee ot tosat Pejing, tosat pa nie lheu moh pui mawh pa tix?
(2) Pui lheu moh nawh kheu jao pa tix? (3) Miao krix ting mhon tix ih ceu pa tix?
2. Thie lai daux grawng yi:
(1) Miao krix ting____________ mi mih, ____________ sitax.
(2) Mioa krix ting moh tix ih____________ ____________
(3) Miao krix ting yam iak kin____________, khaix hoit ting____________
Lawg (23)
Ai Rai Riem
Didix, kwe kawndoe daux Vax tix kaux, ceukaux nawh mawh Ai Rai Riem heue. Mawh kheu ang nawh lai kwe miex kwe keeing, pui kiet map ti muan nawh, ang kieh nawh kwe ceu kwe cak, mai pui kiet seeing ka nawh khawm simex khawm bon heue.
Son sang yaox pui tix ih nex kax, pui taing: tix cie jawk, sawk ti taong kax ka daux rawm, mai pui yaox tix ih kax khawm nyiex khawm yaong heue. Ai Rai Riem kawx kiet simie tix ih nex kax awm pui, rawk tix ih pa haoh pa pruat pui, pui mawx kawx ang tawx ka nawh. Nawh simie tix taing tix cie jawk kax, nawh ang chix taing:, mawh kheu nan, nawh hu chawk yiex kuad nyiex sex ah nin, "Yiex eue, caohrhawm krai aux mhong grawng taing: pex jawk kax lieak." Yiex kuad an pawk lox ah nin, "Ceu maix kawndoe pa seeing pa brai yuh nan, ang aux doh krai maix mhong." Nawh deeih haok ka yiex kuad nyiex laong, bao hu chawk ah nin, " Yiex eue, caohrhawm caohrhi ka aux ceeix, krai aux mhong grawng taing: pex jawk kax lieak." Mai yiex kuad an pawk lox mai ah nin, " Ceu maix kawndoe pa seeing pa brai yuh nan, aux ang doh krai maix mhong."
Pui nyiex pui yaong seeing brai ka kawndoe an ding mawx, pie jawk kax pa caoh pa prim pa hoit lauh kix khankix, pui ang tawx nawh rawk, ang tawx nawh yaox, kix gleeing pa lauh pa prim khankix hax ka ngu khawm uik heue. Pui nyiex pui yaong khankix kok Ai Rai Riem mawh kawndoe sioe nghaik heue.
Ka daux tix singaix, Ai Rai Riem yaox griang hax jawk daux ngu, nawh hawt tix yuh, hawt tix taing: mai nawh pon taing: jawk kax mhawm mhawm heue.
Khaix an, nawh hu chawk yiex kuad nyiex sex, grawng pa taong pui jawk kax yuh ka mawx, viang mawh nan, yiex kuad an ang krai kheu kiet seeing kiex ka nawh heue.
Mai nawh deeih haok chawk yiex kuad nyiex laong, yiex kuad kieh nawh haok taong ka piang rao khaox heue. Awm pa krai yiex kuad nyiex laong, Ai Rai Riem teei jawk kax cie tix mai haok taong: ka piang kak khaox, hwet ponsawm lhiex ting lih, rawm klawng rawm rawng haok huan, sivuk khaox ox mai kax laik ka daux jawk kax taong naw ra mu heue.
Hwet yam ponngawp cao, kawndoe hu' jhak jawk kax taong tix mai yaox krix ka kax ra mu mai nawh sau tix deu daux tom heue.
Khai sawm ngawp, nawh hu daux ma cie tix, hwet plak bo nawh deeih ing ka nyiex tix, yam hwet nawh daux nyiex tix an, nawh yaox prieh hoit sin hoit kwe sivoe nawh heue.
Mawh kheu nan, nawh hu chawk pui pa ot rawb nyiex tix, tix kaux hoit tix kaux, pui ku kaux pawk lox ah nin ka nawh, "Maung maix kawndoe sioe nghaik yuh nan, pui mawx sang kuh eep yuh taux tix tawx ka maix, seeing brai yix ka maix, ang doh yu maix ih prieh sivoe sang hwet maix."
Kawndoe an kiet daoh deng ka grawng pa lih tix mawh son nawh, hwet tix ngaix, plakbo nawh phai cao ing khaing ma yuh tix, nawh brieh mox tix greem toeh prang piang siduk nyiex, ngeh singaix deh hwet plakbo, kax pa deuh nawh daux tom lulax lih khaing daux tom, maw bon krix mhawm tix kaux heue.
Bon krix an teei beh pih nyiex, khaix an nawh phlu ngu , tang aw kuh, cung piang sipaong, deuh bia greem tix, sat kaing tix lih tix mawh gaox, teei gaox an sau ka daux aw, teei laktu vukviiet gaox daux aw, ceu pa hoit yuh bon krix mhawm an Ai Rai. Riem hoit yaox ka mhawm mhawm heue. Dom mawx dom an, Ai Rai Riem (kawndoe) lih khaing brauh sidug mai hu giex ka bon krix an, mai bon krix an ang lai lih tix mawh kax heue.
Ai Rai Riem chawk bonkrix an ah nin, "Mawh mawx pa nhie maix yuh prieh sivoe aux ku singaix lie? Bonkrix mhawm an pawk lox mai ah nin, Mawh miex keeing aux, kheu kix mhong mawh maix kawndoe pui loeg, ot mai kharhawm kharhi tix, mhong kiet seeing brai pui ka maix, mawh kheu nan miex keeing aux tom kieh yiex pux aux ing teem maix, phan mawh pux aux, maix hoit pah tix ih nex nawh heue.
Khaix an kawn bon an. ang lai mawh kax tix bawk kawx, hoit lih tix mawh pui heue. Khai an kiex ra kaux ot tau, kiet kwe rhawm moh ka paox tix, mai kiex teei paox tix mawh mex moeng heue.
Kawn bon an ah nin ka Ai Rai Riem, "Hoit mawh ax mex moeng phao, ax deeih hu tawx miex keeing aux yaox ngai ax, miex keeing aux ot ka daux dung raux sien, yaox maix laik aux, maix kawx hawt laik khaix aux awawx." Ai Rai Riem kawx nghiet lox moeng nawh, mai hawt laik ka daux dung raux, mai hu yaox dee ot miex keeing bon an tete heue.
Kawn bon mhawm an, krai grawh grawng hoit mawh kiex Ai Rai Riem mex moeng ka miex keeing tix, mai kiex mex moeng yuh krai nab krai yam ka miex keeing tix, mai miex keeing bon an riep Ai Rai Riem mawh kheue tix heue.
Viang mawh kawx nan, miex keeing bon an, sang cheuk tix yaox grawh grawng kheue tix, mai ah nin ka nawh, " Maix hu soh ma tix gwang, kieh hoit tix singaix ngie khaing, phan ang hoit, yix ang kieh maix mawh kawn kheue tix awawx."
Ai Rai Riem kiet kwe krai khirhawm khirhi, ang lai tawng grawng pa sang yuh tix phao, hoit nu tix keut heue phao. Nawh chawk moeng tix grawng sang pon yuh nawh kaing pa tawx paox miex ka nawh yuh ka mawx? Mawh kheu kiet moh moeng nawh ka nawh, moeng nawh gau nawh yuh nin, "Maix sawk vaig pon kre, tix kre deuh kaing: ma, tix kre deuh kre ma, tix kre deuh praok ma plak dawm, tix kre deuh praok ma plak gwiex, khaix an maix tom deeih ing ka nyiex awawx." Ai Rai Riem kawx yuh awm pa ah moeng tix heue. Khaix hoit ing nawh ka nyiex, ka daux ponsawm, ma hoit soh tix khawm uik, mai khaix hoit kroh lauk tiak, kix keeik ka ngu heue.
Khaix an kix deeih nhie nawh hu ciag, hu paog ka ma an, kieh hoit tix singaix ngie heue. Ai Rai Riem baox yaox pa khirhawm khirhi ra bawk tix bawk phao, viang maw nan, moeng nawh deeih gau nawh yuh nin, "Maix paw vi khirhawm khirhi, maix hu sawk khaw pon mag, hu deuh ka kaing: ma tix mag, hu deuh ka kre ma tix mag, hu deuh ka praok ma plak dawm. tix mag, hu deuh ka praok ma plak gwiex tix mag, khaix an, maix deeih ing ka nyiex awawx." Ai Rai Riem yuh awm pa ah moeng nawh, deeih hwet singaix khaix ponngawp caocao, Ai Rai Riem hu jhak ma, ma hoit ciag hoit paog tix sivoe nawh khawm uik heue.
Khaix an, caw tix pai ma phao, paox miex Ai Rai Riem baoh khin nawh hu pai ma kieh hoit tix singaix heue. Ai Rai Riem baox yaox krai khirhawm khirhi loe bawk tix bawk phao. Moeng nawh baox teem nhie nawh teei ge pai pon mu, deuh tix plak tix mu awm deuh nawh khaw phao voe, ka daux tix sawm khaing, ma hoit pai tix uik heue.
Khaix an, naw teei ge khawp pon mu, deuh tix plak tix mu awm hoit deuh nawh ge pai phao voe, ka daux tix sawm khaing, ma hoit khawp tix uik heue.
Khaix an, kix gleeing sinawm ma, khaix hoit gleeing kix sinawm ma khawm uik, kix raih sinawm ma khawm uik, khaix an kix ruat simie nghox heue.
Singaix ruat kix simie nghox an, ang caw singaix tix, miex keeing bon caoh ka Ai Rai Riem, mai Ai Rai Riem kiet khirhawm ka tete heue. Mawh kheu nan, moeng Ai Rai Riem kok sim pa ot daux tiak daux tu teem tix sut simie nghox pa hoit lut ruat kix, sikaux sut simie cie tix brieh tix bleet daux vait tix, mai mox daux ble tix, kix tom myian ble sikaux an grai mu, tom singaix ble sikaux ang lai kwe jao heue. Sim ruik kawx teem kix sut ka simie nghox, mai nawh brieh tix bleet daux vait tix, mai mox daux ble tix, kix plukpliak ble nawh ot plak piang, tom singaix ble ruik ot piang blawk nawh heue.
Khai hoit laug kix singaix pa mhawm, kix hu ruat simie nghox daux ma, khaix an nghox deeih kuah mhawm mhawm heue.
Hwet bawk yam riam ma phao, Ai Rai Riem hu riam ma ku singaix, moeng nawh ot daux nyiex khaix nawh, yuh kaing nyiex mai caing mex tix ceep sibeh hauk sim heue.
Moeng Ai Rai Riem kiet sidaing mhawm tai khaing bon tang kaux, mawh nang bon pa kwe pingnya cuyi mai lhak lhiem khaing bon tang kaux heue.
Grawh grawng mhawm tai bon an, hoit tah hu ku dax ku dee, hoit ao min ku praix ku klawng, hoit sidawng ku haktiex heue. Mawh kheu nan, simieang khankix tiblax hoit simie nawh mawh moeng tix heue.
Kwe simieang Hawx tix kaux, khaix hoit mhong nawh grawng mhawm moeng Ai Rai Riem an, nawh kawx simie tix pon nawh mawh moeng tix tete, mai nawh khrawm kuad simiehang pa ot greem nawh, mai lien nawh khankix kieh ki hu teei ka moeng Ai Rai Riem heue.
Mawh kheu moeng Ai Rai Riem dha tix tawng grawng sang teei simieang Vawng tix kieh mawh moeng tix, nawh tom krai mex tix mhong sidawng yuh nin, "Simiehang teu sang kieh pui hwet teei ka aux, viang mawh nan, maix paw vi lauh rhawm ka, maix ca hu riam ma ex heue! Maix teei tix een rieang tokaux aux mai maix tix mu, preue ka kak khaox, deuh sivoe dee riam maix ma, phan maix yao bhaung hwet tix phlu rieang in, maix nghiet lox krai hia mhawm mhawm, ah lox tix yuh ka mawx maix hawt aux heue awawx. Phan maix sang hawt khaix aux tete, maix nghaong tix viex eeppit, nyiex vawng an kwe sox aliah mu, maix tom lua eeppit aliah glua, mai sau nyex ka tix glua tix taix awawx. Phan sox mawx raox ka maix, maix taing ka sox an, khaix an, maix tom haok daux nyiex ot au awawx." Ai Rai Riem kawx kwe kra gun krax yeung mai awx tix yuh awm pa tawm moeng tix, khaix an nawh viex rieang moeng tix hu daux ma heue.
Khaix hoit hu Ai Rai Riem daux ma, simieang Hawx kieh kru naing tix ing teei ka moeng nawh son sang mawh moeng tix heue. Bon an kawx ang lheu lox kix, mai nawh hawt hu mai kru naing Hawx, hwet ka simieang Haw, simieang an teei bon an mawh moeng tix heue. Yam yu bon an tix mawh moeng simieang Hawx, nawh ang sax tawx ngai nyiah ka tax simieang Hawx tix bawk kawx, viang maw kawx nan, kheu sidaing mhawm kawx hak tai jung nawh khaing bon tang kawx, simieang Hawx hoit fax rhawm ka nawh tete heue.
Ai Rai Riem ca hu riam ma tix ku singaix, nawh deuh rieang moeng tix sivoe dee riam tix ma mai fak ka piang kak khaox heue.
Ka daux tix singaix, bhaung keu kang-lu hwet phlu ka rieang moeng nawh luan, hia hwet ah lox tix, "vawng vawng vawng vawng" heue. Ai Rai Riem doh keut ka lox moeng tix, lox ah hia vawng vawng an, mawh son sang hawt nawh moeng tix daux nyiex vawng Hawx heue.
Ai Rai Riem yaog tix ing khaing daux ma, yam hwet nawh daux nyiex, nawh nghaong eeppit, khaix hoit sin eeppit an, nawh yuh aliah glua, mai sau nyex ka tix glua tix taix awm pa hoit t awm moeng nawh heue. Khaix an naw khre kraung pa sang viex tix, ceep ka sibe hauk sim, khaix an nawh yaog tix hu ka nyiex simieang vawng heue.
Yam hwet nawh ka brawk nyiex simieang vawng, sox eei vawng caong riep tix raox mai sang kiiet ka nawh heue. Yam an, nawh teei eeppit viex tix alia glua taing ka sox khankix, sox ang lai pon tix raox tix kiiet ka nawh heue. Khaix an nawh haok daux nyiex, moeng nawh yaox hwet mex tix, moeng nawh jiet kieh lox nyiax tix ting mai tawx nawh nyaux rawm heue.
Yam an, simieang Vawng ang hiex nyawmrhawm ka nyiax moeng nawh mai Ai Rai Riem, simieang ah nin, "Ax mawh mex moeng jih jang glang gleeing, maix ang sax nyiax mai aux tix bawk kawx, maix gah nyiax mai pui seeing pui brai yuh nin yuh ka mawx? Au ang nyawmrhawm ka tete heue." Dom mawx dom an, bon an deeih pawk lox ah nin, "Mawh kheu ceep nawh sibeh hauk sim, aux tom nyiax mai nawh. Phan maix sang kieh aux nyiax mai maix, maix ceep sibeh hauk sim mai lih plak praix tix vut, mai deeih haok daux nyiex, yam hwet maix au kawie riep ti nyiax mai maix heue.
Simieang Vawng kawx kiet simie moeng mhawm nawh nyiax mai tix sigrien sigre, mawh kheu nan, nawh gauxrhawm tix ceep sibeh hauk sim, khaix an, nawh lih hu plak praix heue. Yam deeih ing nawh, nawh hwet ka brawk nyiex cao tix, sox eei cao nawh khankix ce nawh mawh pui tang praix tang kawng, ce nawh mawh pui koeng tix kaux kaux, mai kix hu greeb tix kiiet nawh yum heue.
Pui pa ot daux nyiex haw mhong lox raox sox, mai kix lih tix jhak khawm simex khawm bon, yaox sox khankix simeem tix kiiet ka pui tix kaux mai kix ce mawh sox kiiet nyo, kix kok yo lox sinum ah nin, " Kiiet sox nyo, kiiet sox nyo, hwet pex jhak lieak." Pui pa ot daux haw khankix lih hu tix jhak, yaox mawh simieang vawng kix pa yum tan heue. Grawh grawng an tah hu ka pui pa ot daux veng khawm uik, mai pui kiet daox ding ka tete heue.
Khaix hoit yum simieang Vawng, Ai Rai Riem deeih yaox tix teei ka moeng tix, mai plut tix mawh simieang Vawng tix kawx heue.
Pui yaong ot Ai Rai Riem mhong Ai Rai Riem (Pa hoit kok kix mawh kawndoe sioe nghaik) mawh simieang Vawng, mai deeih kwang ka kawn pui yaong kix, kix kiiet lhat graung ka, mai deeih yuh krax nap krax yam ka Ai Rai Riem heue.
Paw nieh ka kawndoe, paw kwe rhawm ka caomi.
(Khaing lox khrawm Sara Lhong Sam Pleek & APP)
1. Lox chawk:
(1) Kwe kawndoe daux Vax tix kaux, ceukaux nawh mawh pa tix lie?
(2) Moh pui ka nawh liex? (a) koeng pui ka nawh lie?
(3) Ai Rai Riem taong jawk kax dee mawx?
(4) Ai Rai Riem pon kax miex mu?
(5) Nawh yuh tix ih kax khawm ra mu lie?
(6) Bon mhawm tai kaox khaing dee mawx?
(7) Nyiex miex keeing kax n bon an ot dee mawx?
(8) Mawh simieang mawx pa rhem tix teei kawn bon an mawh moeng tix
(9) Ai Rai Riem lua eeppit miex glua lie?
(10) Khaix hoit yum simieang Vawng, mawh mawx pa deeih plut tix mawh simieang lie?
Lawg (24)
Teei Khix Khaing Daux Rawm
Didix, raokhaox oix tix mu klieh hawt rawm dung, nawh simi daux rawm dung, yaox khix ka tix mu. Kawn raokhaox riak ah nin, "Miex eue, miex eue! khix hoit rau ot daux dung."
Raokhaox ting mhong nawh, to hwet gaig, riak nan ah nin, "Ang mawh, ang mawh! khix hoit rau ot daux dung!"
Raokhaox kuad mhong nawh, to hwet gaig, hawt tix riak nan ah nin, "Siyawng, siyawng! khix ruk hoit rau ot daux dung heue."
Raokhaox mhong nawh khawm phung uik, to tix hwet gaig, riak cuci ngie ah nin, "Ang doh mawh, ang doh maw! niad ex teei lih lieak.
Khaox ting kwe hawt dung rawm tix pang, raokhaox kuad breug kak khaox ka caong tix, kawm caong raokhaox ting, '`raokhaox ting breuk klip raokhaox kuad ka caong tic, kawm caong raokhaox iak tix mu heue. Kix sitoe paox tix yuh nin, tak teue hwet tom piang rawm dung, raokhaox oix mawh pa ghoit heue.
Raokhaox oix khre tix teei khix ot daux dung, nawh taug cub taix tix daux rawm, ang lai yaox khix heue.
Raokhaox kuad yaog kaing: tix simi, yaox kawn ot khix daux raoma, ah nin mai bhawm taug tix, "Paw lai sawk, khi lawk kawn ot daux raoma mhawm ngie long long heue."
Lox chawk:
(1) Mawh raokhaox tix pa klieh hawt rawm dung lie?
(2) Jao pa tix, raokhaox hu teei khix daux dung lie?
(3) Kix teei khix khaing dau dung yuh ka mawx?
(4) Pon teei kix khix, ang kix pon?
(5) Dee goit, raokhaox kuad yaox khix ot dee mawx lie?
Lawg (25)
Jhawm Kab Num Khraox
In uik mawh bawk glaoh lhax rho,
Mhaing kawn Yex ex tix ceep dai.
In uik mawh bawk cho lhax gix,
Mhaing kawn Ai ex tix thai khlax.
Glaoh lhax rho tix khix tix dum,
Ex tom yuh pot mheem sim saw.
Cho lhax gix tix num tix bawk,
Ex tom yuh pot vaw num khraox.
Yiam ka vao tix khix tix dum,
Ex tom sum khaox gix ka pak.
Klao eeppit tix num tix bawk,
Ex tom fak blauh nyax ka khu.
Tai caong krawg hoit pruih veng lawng,
Ex tom graoh dee in sinum.
Tai blag tawng hoit raoh veng nyiex,
Ex tom kum mang in sibua.
Lawg (26)
Jhawm Kab Van Simie Kie Sigiag
In hoit mawh bawk pruih tai au,
Sang ruat ex tix ih simie koi,
Kieh nawh plaung awm plaung lhax lai,
Sang cun ex num ka sipeed kawk.
In uik mawh bawk pau tai griex,
Sang groi ex tix ih simie nghox,
Kieh nawh ngai awm ngai siging,
Sang vawg ex nawh ka sivawg rhiem.
Ah sim sua mawh bawk van simie,
Sum ex nghox kieh nawh kwe rhoi,
Lhua sinum bawk kie sigiag,
Groi ex nghox jiat kieh kwe num.
Yiam ka vao hoit mawh bawk riam,
Sang ruat ex tix ih simie koi,
Kieh nawh naog krao ox ex sax,
Klao eeppit hoit mawh bawk van,
Sang groi ex tix ih simie nghox,
Kieh nawh sikhox krao phia ex sax.
Kieh ex peeih nawh tom ang pon,
Sang teei ex khawng Mian hu tang,
Kieh ex don nawh tom ang uik,
Sang teei ex sang Hawx hu don.
Nghox meung Noi tom leen ang kawb,
Mawh nghox peeih aux daux iap pai,
Koi meung Khreng ka cha ang khon,
Mawh koi dai aux daux iap sub.
Nghox meung Noi tom leen ang kawb,
Nawh viang ot tom singian rang,
Sip pui nghox meung Noi silawng,
Koi meung Khreng ka cha ang khon,
Nawh viang ot tom sigang lih,
Tawng pui koi meung Khreng sigreh.
Mawh Tax Koi pa daog ex huan,
Ex tom ruat tix ih simie koi,
Mawh Yiex nghox pa muan ex ting,
Ex tom groi tix ih simie nghox.
Lawg (27)
Jhawm Kab Sum Nyiex Khraox
Sum ex lat rho tix liex,
Nyiex lat rho rong geeih si ang,
Preeih nammeuk ex ku caong rang,
Khre ex nyiex cho gawng tix liex,
Nyiex cho gawng rong prang simaox,
Toh nam tang ex ku caong ding,
Sam Khawm Sai,
Hwet pex tix sum rong ex kaux,
Plong khawm beeih jiat grix yang yang.
Ai Khawm Nyi,
Hwet pex tix yuh brauh aux pu,
Geeih khawm glawm jiat grang yeeb yeeb.
Yam hu kid aux rong dang plai,
Khaox hu teei aux tawm ka lhong,
Yam hu thai aux rong dang aw,
Plong hu tuah aux tawm Siblaung.
Rham rong aux yuh nin ka lhiex,
Aux tom kid tix khaox Siam lhong,
Lauh nyiex aux yuh nin ka bhaung,
Au tom tuah tix plong Simiang.
Yam sang yeed aux tix kwe num,
Pux o ot aux tom yaong Lhaik,
Nawh jiad saik ka aux rong jawn,
Yam sang sum aux tix kwe nyiex,
Puaik ot aux tom Yaong Laong,
Nawh jiad sawn ka aux rhawm lhak.
Max singian dee nyaux aux rawm,
Sam khawm Sai hoit joh saux nyoi,
Bhawm sileed dee khawm aux khaox,
Ai khawm Nyi hoit coi saux gleh.
Miex rong teei aux tom Pangpat,
Hoit joh pex mai aux saux nyoi,
Miex lat teei aux tom Pang Hawm,
Hoit coi pex mai aux saux gleh.
Jiad chi preeih yuh nin sigrak,
Preeih sigrak nyiex yuh cangmai,
Jiad chi lak yuh nin singi,
Lak singi nyiex lai cangkam.
Lawg (28)
Jhawm Kab Haok Nyiex Khraox
Mawh maix Sam aux mawh maix Sai,
Yam paog pex yuh nin guang tai,
Maix jiad kok Sam Sai tom grum,
Mawh mai Ai aux mawh maix Nyi,
Yam haok pex yuh nin nyiex khraox,
Maix jiad khrawm nyawm yaong tom hwet.
Miex tang plah ex sinax plong,
Tang jiad kok aux daux teet law,
Miex tang yaong ex singai ot,
Tang jiad yaw aux daux teettawng.
Khix an nhaox pa tum an nhaox,
Maix rug ot nyiex ding rieh ia,
Num an nhaox pa luan an nhaox,
Maix rug ot nyiex phia jauh lhiex.
Kuah tix kwe rong graih Sam Sai,
Sam Sai kuih tix sawm ang laik,
Jauh rawm lhiex ku it Ai Nyi,
Ai Nyi glaik tix it ang nyawm.
Yam tuah maix yuh nin plong klai,
Ang yaox tuah mai maix tix beeih,
Ang brung bruk aux kwe pon lai,
Aux tom tai ka maix leg leg.
Yam tai maix yuh nin rong nyiex,
Ang yaox kid mai maix tix taix,
Ang ngai kaig aux kwe pon maing,
Aux tom kaig ka maix lhiam lhiam.
Yam yuh maix nyiex breeih cangmai,
Aux mhawm viex maox vien khawm mad,
Yam yuh maix nyiex lai cangkam,
Au mhawm viex lat rauh khawm lhang.
Nih nai pui nyiex breeih cangmai,
Nawh jiad lhaong khaing gawng tiak vaw,
Krai lao pui nyiex lai cangkam,
Naw jiad grang khaing haw Nghim Nheu.
Blek aux nawh kok blia aux nawh,
Pex hoit teei cang lhek pha Sai,
Kia aux nawh kok ngian aux nawh,
Pex hoit teei cangmai Tali.
Yam pawd pex yun nin bawng haok,
Pex hoit kok nyawm yaong tom to,
Yam haok pex yuh: nin nyiex khraox,
Pex hoit yo pui yaong tom grum.
Yam pawd pex yuh nin bawng haok,
Pex jiad yuh pot sin ka man,
Yam haok pex yuh nin nyiex khraox,
Pex hoit yuh pot tan ka lik.
Hoit ruat pex kawn keed kaoh koi,
Pui hoit sawm mai pex si ak,
Hoit ploi pex kawn mawie sawm glauh,
Pui hoit sak mai pex ku kaux.
Yaox kwe cah tix sang kwe ceng,
Dawg sidsub tix siah nyoi awng,
Lhax khaing in ang aux lai bee,
Yaox kwe kaing tix yaox kwe jhaw,
Dawg rian plai tix sawng kaux nghox,
Lheu khaing in ang aux lai yaox.
Sin aux kub ju keeing tix diex,
Mhawm viex khix ka maix khawm glawm,
Sin aux kub ju miex tix gaong,
Mhawm viex rawm ka maix khawm beeih.
Yam paog maix yuh nin guang tai,
Mhawm hwet tauh mai maix hwet kreem,
Lawk hwet yawt ngie sub maix nai,
Yam tai maix yuh nin nyiex ot.
Mhawm hwet teem maix yuh kaing jhaw,
Lawk hwet nyaux ngie plai maix giex.
Khaox ting ang yaox teem maix grawng,
Leem aux li tix blawng een tax,
Nawng lang ang yaox teem maix klawm,
Pi aux rhawm tix krax deeih keeing.
Khaox khrawm tuah pex nong Ang Yeei,
Yuh si ox tix ka khaox khrawm,
Sui nyix teei pex tom Kaungsaung,
Tawm daux nyiex tix ka sui nyix.
Lia maix khaox ku gawng kawx liex,
Saux klip maix ka klawm tix moe,
Lawng maix krax ku nyaing kawx liex,
Saux meue caong ka haok tix blaong.
Singian kraix maix jiad yuh sin,
Maix jiad pauh mawie miex mawie tang,
Singaix sawm maix jiad cin tan,
Maix jiad cia plai num plai rheu.
Khix sang tum kix sax Sam Sai,
Eei maix lik kieh nawh sawm dia,
Num sang hwet kix sax Ai Nyi,
Eei maix ia jiad kieh tawm brawm.
Sum maix nghox kieh nawh kwe rhoi,
Ang doh kieh eeb sawm tix die,
Sau maix koi jiad kieh kwe num,
Ang doh kieh simie tix kut.
Yuh nghox ma maix tom ting gawng,
Paw lai kieh gawng pot ka bhaung,
Yuh sivawng maix tom ting tux,
Paw lai kihnawh rham ka lhiex.
Sin ma nghox maix jiad mhawm pang,
Maix jiad mox nawh khaing jeeh iai:,
Sin ma rang maix jiad mhawm kuah,
Maix jiad mox nawh khaing ngai klang.
Kieh saing tawm ang maix lai hok,
Kieh sok tawm ang maix lai kreem,
Kieh naog ka krao ox plak seh,
Kieh sikhox krao phia plak laong.
Kieh nawh taug yuh bon mad glauh,
Kieh nawh nun yuh simex pauh nghox.
Kieh bon peeih nawh tom saux kaing:,
Kieh simex gaing nawh tom saux ngawk.
Lawg (29)
Lhak Yaw Kwe Pon Aw Sia
Yaw mai Sia sidieh caw tix hwet nyaux rawm hawt klawng tau. Hoit nyaux kiex rawm tom sak, kiex laux tix khaix piang rang. Yaw, ceu sim in kub pui ah, "Yaw" kah kix, mawh kin brax yaw kix cao tix, mhaing tix kin grang kin lhak khaing paox sim tix uik heue. In phao, nawh lai sau lox ting mu yia to mai sia ah nin, Ex can pa kwe pruik pa po raoma inkix, phan ang roi mawh yix yaw pa grang pa lhak ex ih, ceu pa chuh ka piang haktiex rian tix map nunai ngie ex, aing ex ih. Lawg maung heu pex sia pa pheem pa aw yuh nin, tawng ngie kuah tix ih piang tiex khaing, po hu dee tiam sijeeng sijai, kaig ex tang pex miex nyao."
Sia yaox ah yaw nan, ca ot tix ih ang nye. In phao, pui jaw tix kaux viex ak lawng hawt klawng, hwet hawt yaw kiex sia. Yaw yaox pui jaw sivoe sia, tu tax tix ah nin, "Miex eue! An pui jaw. Sia pheem sia aw, nied tix mox tix!" Naw yaox ang pui pon haok khaox ka tix, sau sang tix ah lox tix, yu tix uik vawg ngie mai. Pui jaw vaik ak sau te, nyawn nawh ka yaw ah, "khlak pawk" nan, yaw cod piang tiex. Pui jaw baox vaik ak sau te, sawg tix puing sia, sia to laig daux pang yeem, pui jaw ang lai chi yaox tix puing nawh, pon glang sawk pui jaw tix jang nawh sinax pang yeem, nawh hoit dawg bleeih tom priex mawx nieh. Pui tom ah, "Lhak yaw kwe pon aw sia heue.
Lawg (30)
Sox Caw Khaix Lig
Kwe pui tix kaux, eei sox tix mu mai lig tix mu. An tix ngaix, nawh sang tawx sox kiex lig sawm, sau eep tix tawg mai taux tix tawg, yo sox kiex lig hwet tix sawm heue. Sox kiex lig hu tum tix sawm eep khawm ra tix, ang simi taux. Cao kiex deeih teei tawg eep, ah nin ka kiex, "Pax silaih tix yuh kaing tix grawng, mawx riex nie yuh sawm eep."
Cao sox kiex lig mhaing kiex silaih tix paog ma, kiex ah chix chix, yaok klawm khaw hu daux ma heue. Sox kiex lig taug yuh kaing ra loe taix, koek niep yaog hax simaox heue, uik ah " ving ving" nan dawng yhaok kiex heue.
Sox blex dak tix uik lang ngie, bhawm ngie, bhawm ah, "ieh ieh" nan, ang lai pon kan, nawh ceen hu it greem yeem daux veei. Lig sang yuh tom pon yaox tix sawm eep, yuh tix ang lai mhong hax koek, tawk lung loi keeih tiex ka jeeh leeing singaix. Hwet tom klip singaix nawh yaox hoit keeih tix ma miex nyao, yaog tix ing ka nyiex khaix heue.
Hwet ka nyiex, lig ah nin ka cao tix, "Hu maix gaig ma paog aux phao heue!" Lig tah khaw ah "bug" nan piang tiex. Cao nawh khre tix hu gaig khaix yuh so kiex lig kaing. Lig ang nyawmrhawm hawt cao tix deeih hu daux ma heue.
Khaix ing lig ka nyiex, sox kaing khaing it tix gaig ma khaix hoit paog lig kin vieh nyao. Sox keut ka ang tix pon paog ma pie ceeix, keut ka sang sawm lig eep naw khaing tix, kin ang nyawm daux rhawm nawh miex nyao heue. Dauh yuh ka mawx, sox keut tix sang pon yuh tom pon sawm eep naw. Nawh keut jee keut blaong ceu sang peh tix, tom yaog tix hu pupaik khaix keeih lig ku sidauh. In phao, cao sox kiex lig hwet daux ma, rug yaox mawh khaix nghim sox ku sidauh heue.
Cao sox kiex lig chawk lig, "Lig, maix paog cie tix dee mawx pawx?" Lig hoit daox ngie, ang lai tawng ka sang ah tix. Ing hwet ka nyiex, cao sox kiex lig rug tawx sox sawm eep, tawx Lig ih taux khaing heue.
Khaix an, sox kawn niad tix kheem lig ka daux kaing yuh kiex ra loe bawk, cao kiex pon tix tawng tete, ah ka sox, mhaing sox mawh pa lhulhia, tieh eep sawm sox, kieh nawh sawm ang sak, yaw lig ka rauh rhawm, com daux kaing, tawx lig sawm tom nie, kieh lig sawm tom sak heue.
Mawh jao kaoh khaing daux in, hwet tom singaix pui tom ah, "Sox caw khaix lig" ka pui caw yie khaix riang rao paox pui tix heue.
Lawg (31)
Jhaox Sigang Lih
Sa thox veg ex ox tix pang,
Sa kang lih ex taix tix mao.
Ian cuig caik ex nong thie,
Ian ru rie ex nong theeag.
Lai taog ex tix mawh bang,
Lai tang ex tix mawh phui.
Nab vutvit nah hawm thex bung,
Ex vuviung nah ang man yong.
Ian sa ngian ian grex.
Ian sa ngex ian sawm.
Riam nah rip gawm keue ka nyiex,
Phip tao li gawm a mex a bon.
Rhuat phiux ex lhax loi lawm,
Rhawm phiux ex nah tao li.
Ot ex nah pruik thih klang sawm,
Ot ex nah ka tawm sigang lih.
Khin ra am ex khin iad iad,
Nghiat tao li ex nghiat mhawm mhawm.
Pah kroek ang sawm tawx keng khut,
Pah lut ang sawm tawx aw hun.
Mawh ex plawng thox miux keng phui,
Mawh ex phui thox miux keng phiux.
Uik mawh ex sim eei kong vui.
Leh lhax: num thui lawm ru,
Prah ju ka ex thui ju khex.
Sawm ma paik thex hao koi, man,
Sawm ma pan ex ot ceung cheux.
Phik the puing ex phik blawng blawng,
Tawng tao li ex tawng mhawm mhawm.
In na khleeh klawng lix ceen ngeen,
In na pheen lao see thex ghee.
Rhuat phiux ex nah lhax loi lawm,
Rhawm phiux ex ghee lai leu Vax,
Klawm ex ox ex klawm nyuang nyuad,
Huat ex le ex huat mhawm mhawm.
Pliex ian jum ex plex ku kak,
Lhak rhawm sawn ex lhak ku kaix.
Thing ba tawm mawh sang,
Lang rhawm tawm mawh phui.
Jiad ak tawm krox puing klang,
Lang rhawm tawm pon prawng praix.
