2 Thesalonix

Thesalonix Phuk Ra:

Simin Ting 1

Krax yaogyaw bwanson: ka pa yumrhawm: mai: pa gun yeung pui pa yumrhawm:

1 Pawlux mai: Silwanux mai: Timose, tawx ka ceucao pui veng Thesalonix pa ot ka daux Keeing: ex Siyiex mai: Simiang Yesux Khrit heue:. 2 Kieh pex koe: bwanson: mai: pa nhim: khaing: Siyiex Keeing: Cao: mai: Simiang Yesux Khrit liak.

3 Puxaik khankix eue:, ex yaogyaw bwanson: ka Siyiex, son pex ku jheeng: jheeng:, mawh kheu grawng: pa kied haok huan: krax yumrhawm: pex, mai: kheu kied nie moh pex ku kaux khawm: uik ka paox tix tix kaux lai tix kaux heue:. 4 Mawh kheu nan: ex tom: yaw rangdi grawng: pex ka daux ceucao Siyiex khankix, kheu krax chix gun chix yeung pex, mai: krax yumrhawm: pex, ka daux pa yaox pex tix kham: krax tuktiak tukte: mai: krax kharhawm: kharhi: khawm: uik, 5 ceu in kix mawh mhai: ka grawng: pa rah pa see ceu pa prawng pa ca: Siyiex, mai: grawng: pa een: pa sawn: pex mawh pa keung: son meung Siyiex, pa yaox pex tix kham: geu: yamin kawx mawh son meung an heue:. 6 Phan: mawh pa khaw: mai: pa rah pa see Siyiex tag deeh tawx pa tug pa kha: ka kix, pa hoik yuh pa tug pa kha: ka pex, 7 mai: kieh pex pa yaox krax tug krax kha: laux lee: tau mai: ex, yam lih bleeh Simiang Yesux khaing: raoma:, tau mai: kawncau Siyiex pa ting siawp sibrawm cie Tix khankix ka daux rao ngu, 8 mai: pawk bix ka kix pa ang tawng ka Siyiex, mai: ka kix pa ang cu ang nghiet ka lox bwan: gauxrhawm: gauxrhi: Simiang ex Yesux Khrit. 9 Kix tag sang yaox tix kham: geu: krax ciyang pa mawh krax pa laux leeing: ju leeing: phan:, mai: pa gwieh khaing: pakngai: Simiang mai: khaing: min: plakngai: Nawh Cao: pa koe: siawp sibrawm, 10 yam hoek Nawh Cao: son sang koe: min: plakngai: ka daux pui singax singeh Nawh khankix, mai: son pui pa yumrhawm: khawm: uik sang daox deng: kah, (mawh kheu hoik yumrhawm: pex ka lox pa kham: ex mhai: sakse: ka pex), ka daux singaix an heue:. 11 Mawh kheu in, ex rawg bwan: ka son pex, ka Siyiex ex ku jheeng: jheeng:, yuh ka mawx son sang een: sang sawn: pex mawh pa keung: ka ceu pa hoik kok pex kah, mai: kieh ceu pa simie pex pa mhawm: ku ceu, mai: kieh kaing krax yumrhawm: ku ceu, tau mai: siawp sibrawm, naog heue:. 12 Yuh ka mawx son sang koe: min: plakngai: ceukaux Simiang ex Yesux ka daux pex, mai: son sang koe: min: plakngai: pex ka daux Nawh Cao:, awm: pa khaw: mai: bwanson: Siyiex ex mai: Simiang Yesux Khrit heue:.

Simin Ting 2

Pui pa ang hawt been

1 Puxaik khankix eue:, ex khyox khaw: ka pex grawng: pa dex mai: pa sang hoek Simiang ex Yesux Khrit, mai: grawng: pa sang krawk khrawm: ex tau ka Nawh Cao:, 2 yuh ka mawx son ang rhawm: pex sang khran: sungsang, mai: son ang sang khirhawm:, viang kheu khwan: ang ah, phan: ang mawh nan: kheu lox sikah, phan: ang mawh nan: kheu lai awm: pa pon khaing: ex, grawng: uik sang hoek singaix Simiang heue:. 3 Paw kieh pui tix kaux kawx pie lhen: pex ka grawng: tix ceu kawx, grawh grawng: nawh singaix an tag ang sang hoek, phan: ang nyang bax hoek ceu pa deeh tieh deeh thui: phaox ka:, mai: ka: ang pui phimap pa mawh kawn: sime pa laux pa leeing: lih bleeh heue:. 4 Kaw an mawh pa kieh raw, pa cha:, ka can pa kok mawh Siyiex, mai: ka ceu pa krub pui ka khawm: uik, mai: yaw tokaux tix ting, tom: ngawm nawh daux nyiex bwan: Siyiex, mai: yuh grang tokaux tix mawh Siyiex heue:. 5 Ang pex doh keud ka grawng: pa hoik krai aux, grawh grawng: ceu in khankix ka pex, yam kawn: ot aux tau mai: pex lie? 6 Mai: yamin pex tawng mawh pa tix pa kieh pa sidien ka nawh, yuh ka mawx son sang lih bleeh nawh yam hoek bawg yam tix heue:. 7 Grawh grawng: nawh, ceu pa raux pa mox, pa ang hawt been, hoik ca: kawn: yuh kaing, viang mawh kawx nan: koe: tix kaux pa tag ca: kawn: kieh kawn: sidien tom: hoek yam teei nawh lih heue:. 8 Yam an kaw pa ang hawt been sang lih bleeh, pa mawh kaw pa Simiang Yesux tag sang pah yum ka bhawm: jheeh Nawh Cao:, mai: yuh kaw an laux ka ceu pa toh riang yam hoek Nawh heue:. 9 Pa hoek kaw pa ang hawt been, tag khaw: mai: kaing pa yuh Satan tau mai: siawp sibrawm khawm: uik, mai: mhai:, mai: ceu pa daox pa am: pa pie pa lhen: khankix, 10 tau mai: pa pie pa lhen: mai: pa ang rah ang see khawm: uik ka son kix pa sang hoek krax laux krax leeing:, mawh kheu ang kix rieb tix teei pa moh ceu pa mawh pa meh, son sang hoek kix krax taoh heue:. 11 Mawh kheu jao in, Siyiex tom: ploi: ceu pa yuh kaing pa pie pa lhen: ka kix, yuh ka mawx son sang yumrhawm: kix ka pa pie pa lhen: heue:. 12 Yuh ka mawx son sang pon tix prawng ca: ka kix ku kaux khawm: uik pa ang yumrhawm: ka pa mawh pa meh, viang mawh nan: pa hoik gauxrhawm: ka daux pa ang rah ang see heue:.

13 Puxaik pa moh Simiang khankix eue:, ex yaogyaw bwanson: ka Siyiex, son pex ku jheeng: jheeng:, kheu Siyiex hoik laug pex khaing: tom: yam jah son sang hoek ka krax taoh, ka daux pa kieh Khwan: Cao: pex singax singeh mai: ka daux pa yumrhawm: ka pa mawh pa meh heue:. 14 Nawh Cao: hoik kok pex ka an, ka daux lox bwan: gauxrhawm: gauxrhi: ex, son sang pon min: plakngai: Simiang ex Yesux Khrit heue:. 15 Mawh kheu nan: puxaik khankix eue:, cung cong: sijung:, mai: jhawp ka been pa hoik gau ka pex khankix, viang mawh ka lox sikah ang ah, phan: ang mawh nan: ka lai pa tawx ex ang ah heue:.

16 Kieh tokaux Simiang ex Yesux Khrit, mai: Keeing: ex Siyiex, pa hoik moh ex mai: hoik tawx ex krax nyawmrhawm: nyawmrhi: leeing: ju leeing: phan:, mai: krax keud pot jun pot pa mhawm: ka daux bwanson:, 17 kieh rhawm: pex nyawmrhawm: nyawmrhi:, mai: kieh pex kaux cong:, ka daux kaing pa mhawm: ku ceu, mai: gumlox ku ceu heue:.

Simin Ting 3

Krax pa jeeh pa sidiex

1 Lox pa deuk mawh nin:, puxaik khankix eue:, rawg bwan: ka son ex, yuh ka mawx gumlox bwan: Simiang sang to tah hu: mai: koe: min: plakngai:, awm: nang: hoik mawh mai: pex, 2 mai: yuh ka mawx son sang taoh ex khaing: pui pa nieb keud pa ang khaw:, mai: pa caox khankix, grawh grawng: nawh ang pui khawm: uik doh koe: krax yumrhawm: heue:. 3 Viang mawh kawx nan: Simiang mawh pa kaux sijax, pa tag sang kieh pex kaux cong:, mai: pau pex son sang luan khaing: kaw pa caox heue:. 4 Ex yumrhawm: ka daux Simiang, ka grawh grawng: pa hawt yuh pex yamin mai: grawng: baox sang hawt yuh pex, ceu pa hoik tawm: ex ka pex khankix heue:. 5 Mai: kieh Simiang thong: jhi: rhawmrhi: pex laig ka daux pa moh Siyiex, mai: ka daux pa gun pa yeung Cao: Khrit liak.

6 Puxaik khankix eue:, yamin ex tawm: lox ka pex, ka daux ceukaux Simieng ex Yesux Khrit, yuh ka mawx son sang gwieh pex tix lih khaing: puxaik pa hu: ang khaw:, mai: pa ang hawt lox been pa hoik rieb kix khaing: ex heue:. 7 Grawh grawng: nawh tokaux pex hoik tawng, grawng: pa khaw: pex tix hawt jawh ex yuh ka mawx, mawh kheu ang ex lai yuh pa ang khaw: ka sinax p ex, 8 mai: ang ex sax ih giex khaomun khaing: tawm: taix pui tix kaux kawx, viang mawh kawx nan: ex nyhap mao yuh kaing leeing: ngaix leeing: sawm:, yuh ka mawx son ang ex sang mawh beeh mawh glawm: ka pex tix kaux kawx, 9 pa yuh ex nan: ang mawh kheu ang ex koe: akhwang:, viang mawh kawx nan: yuh son sang kieh tokaux ex mawh mhai: tix hawt jawh ka son pex, yuh ka mawx son sang hawt jawh pex ka ex heue:. 10 Grawh grawng: nawh viang yam ot ex tau mai: pex kawx, ex hoik tawm: lox pa ah nin: ka pex, "Phan: pui tix kaux kaux ang cu tix yuh kaing, paw kieh nawh sawm:." 11 Grawh grawng: nawh ex mhong: grawng: hu: pui tiblah ka sinax pex, daux pa yuh pa ang khaw:, mai: pa ang yuh kaing tid tix, viang mawh nan: pa nieb ah nieb yuh ceu pa ang dex ka tokaux tix heue:. 12 Ex tawm: lox mai: jeeh nyaw ka kix pa yuh kix kaing yien: yien: mhawm: mhawm:, mai: tang: ih khaomun cie tokaux tix heue:. 13 Viang mawh kawx nan:, puxaik khankix eue:, paw laux rhawm: laux rhi: ka pa yuh ceu pa mhawm: pa mhiem: heue:. 14 Mai: phan: pui tix kaux kaux ang cu ang nghiet ka lox ex, daux lai in, een: tix tawng pui an, mai: paw yuh paox yuh pie mai: nawh, yuh ka mawx son sang kaig sang tua nawh kah heue:. 15 Viang mawh kawx nan: paw een: paw sawn: nawh mawh pui koeng, viang mawh nan: tawx satix ka nawh, awm: mawh puxaik heue:.

Lox ghoik

16 Kieh tokaux Simiang pa nhim:, tawx pa nhim: ka pex ka daux grawng: ku ceu, ku jheeng: jheeng: liak, Kieh Simiang ot tau mai: pex khawm: uik liak.

17 Aux Pawlux teei taix tokaux tix tiem: lox nawb in, pa mawh mhai: ka daux lai ku phuk, aux tom: tiem: yuh nin: heue:. 18 Kieh bwanson: Simiang ex Yesux Khrit ot tau mai: pex khawm: uik liak, Amen.