Lai Kawncau

Pa Yuh Kawncau

Simin Ting 1

Cao: Khrit kawn: ca: kia: ngiien ka kaing jhaw:

1 Thawphilux eue:, lai pa hoik tiem: aux phaoxka:, mawh grawh grawng: pa jah Yesux tix syuh, mai: grawng: pa gau Nawh khawm: uik, 2 tom: sidah sidu hoek singaix pa reb tix teei Nawh Cao: haok, khaix hoik tawm: Nawh lox ka daux Khwan: Singax Singeh, ka kawncau pa ting Nawh hkankix, pa hoik laug Nawh tix teei heue:. 3 Ka kix kawx Nawh Cao: jhi: yaox tokaux pa im: Tix, khaix hoik geu: Nawh tix yum, ka daux mhai: sakse: pa mawh pa meh tom: nie, mai: kieh kix yaox tokaux Tix, ka daux tipon: (40) singaix, mai: krai grawh grawng: ceu pa dex pa dawd mai: Meung Siyiex heue:. 4 Mai: yam Nawh Cao: khrawm: tau mai: kix, Nawh tawm: lox ka kix son ang kix sang lih khaing: veng Yerusaliem, viang mawh nan: krox tom: hoik pon, awm: lox mukheu pa tawx Keeing: Cao:, pa ah Nawh, "Hoik mhong: pex ka Aux. 5 Grawh grawng: nawh Yohan baptis156 ka rawm: tete heue:, viang mawh nan:, khaix in ang awt rheung: miex ngaix tix, pex tag sang baptis B ka daux Khwan: Singax Singeh heue:."

6 Mawh kheu nan:, yam hoik khrawm: kix paox tix, kix chawk Nawh Cao: ah nin:, "Simiang eue:, Maix sang deeh tawx meung ka pui Isarilax yamin lie?" 7 Mai: Nawh Cao: deeh ah nin: ka kix, "Bawg yam khankix pa hoik ciak Keeing: Cao: tix deuh, daux siawp sibrawm tokaux Tix, ang mawh pa sang tawx pex tawng. 8 Viang mawh kawx nan:, pex tag sang pon siawp sibrawm, yam hoik hoek Khwan: Singax Singeh ka piang pex, mai: pex tag sang mawh pui pa kham: mhai: sakse: son Aux, jah ka veng Yerusaliem khawm: meung Yudax khawm: uik, mai: meung Samarix, mai: sidah sidu tom: hoek dee sidah haktiex heue:."

Teei Nawh Cao: haok ka raoma:

9 Mai: khaix hoik krai Nawh Cao: ceu an khankix, yam kawn: jhak kix, teei Nawh Cao: haok, mai: paiawm: rieb tix teei Nawh khaing: dee chix yaox kix. 10 Mai: yam kix kawn: maong tix jeung: ka raoma:, jhak heue:, pui ra: kaux pa ceep kraung pa paing cung liep kix, 11 pa ah nin:, "Pui Galilie: khankix eue:, pex cung tix jhak ka raoma: yuh ka mawx? Yesux in, pa hoik rieb tix teei haok ka daux meung raoma: khaing: pex, tag sang deeh hoek, awm: yaox pex Nawh haok hu: ka daux meung raoma: heue:."

Laug Matthi plud Yudax

12 Yam an kix deeh khaing: gawng pa kok mawh Sanlun, pa dex ka veng Yerusaliem, pa singai krax singaix twah, tix singaix heue:. 13 Yam kix hoik laig tan:, kix haok daux lawg plak piang, dee ot kix, khawm: Petrux mai: Yohan, mai: Yakop, mai: Andare. Philipux mai: Thoma, Bathawlamie: mai: Mathiex, Yakop kawn: Alaphie:, mai: Simon Zelot, mai: Yudax pux Yakop heue:. 14 Mai: kix khawm: uik ih rhawm: paoxtix, nied tix rawg bwan:, tau mai: bon: khankix, khawm: Marix miex Yesux, mai: pux Nawh Cao: khankix heue:.

15 Mai: ka daux singaix bawg yam an, Petrux kaoh cung sinax puxaik khankix, (pui pa khrawm: tix tan: dex koe: tix yieh tinga: kaux), mai: nawh ah nin:, 16 "Puxaik khankix eue:, lox Phuk lai singang: khri:, pa Khwan: Singax Singeh hoik krai ka jheeh Dawit grawh grawng: Yudax, pa thong: kix pa hoik hu: giex Yesux, phan: ang naog ang doh pon heue:. 17 Grawh grawng: nawh, hoik simin nawh tau ka daux ex, mai: nawh hoik pon tix yuh kaing cao: sidiex cao: gau in, pa mawh son cie tix heue:. 18 (Pui in teei ngawh riang phimap ceu pa hoik yuh tix, mai: liag haktiex tix dah, mai: nawh goh glung: kaing: tix, mai: vaig nawh bih, mai: kraung vaig nawh lhua: khawm: uik heue:. 19 Mai: pui pa ot ka daux veng Yerusaliem khawm: uik tawng grawh grawng: an, tom: hawt ka daux lox kix kok haktiex an mawh, Akeladama, pa ah nan: sang ah "Haktiex Nham:" heue:.) 20 Mawh kheu hoik tiem: ka daux hpuk lai Yaogyaw ah nin:,

157"Kieh yuh dee ot nawh yi, ang koe: tid tix, mai: paw kieh pui ot tan: tix kaux kawx."

mai:,

158"Kaing pa giex nawh kieh pui tang: kaux teei heue:."

21 "Mawh kheu nan: ka daux pui khankix pa hoik rom tau mai: ex, yam ot Simiang Yesux tau mai: ex, tix lai ling kling klang: ku bawg ku yam, 22 jah ka yam baptis159 Nawh mai: Yohan, tom: sidah sidu hoek singaix, yam rieb tix teei Nawh haok khaing: ex. Ka daux kix tix kaux tag lai mawh, pui kham: mhai: sakse: tau mai: ex, grawh grawng: pa kaoh Nawh Cao: khaing: krax yum heue:." 23 Mai: kix laug ra: kaux pa mawh Yosiep, pa kok mawh Basabax, pa ceukaux ru nawh mawh Yusatu, mai: Matthi heue:. 24 Mai: kix rawg bwan: ah nin:, "Simiang eue:, Maix pa tawng rhawm: rhi: kawn: pui khawm: uik. Ka daux kiex ra: kaux pa hoik laug Maix, mawh kaw pa yuh ka mawx jhi: ex yaox liak. 25 Son sang kieh nawh teei kaing cao: sidiex cao: gau in, mai: son sang yuh kawncau pa ting, ka dee hoik rau hoik gwieh Yudax, yuh ka mawx son sang pon hu: nawh tix ot dee ot cie tix heue:." 26 Mai: kix nieb tix yaox grawng: kiex, mai: caw ka Matthi heue:. Mai: simin nawh tau mai: kawncau pa ting kao: kaux tix an heue:.

Simin Ting 2

Khwan: Singax Singeh lih hoek daux poi Pientekote

1 Yam singaix poi Pientekote hoik hoek tix grum naog, kix khawm: uik ih rhawm: paox tix, mai: lox tix gum cum tix dah, ot tau tix dah heue:. 2 Mai: dom: mawx dom: an lox lih hoek khaing: raoma: awm: lox phlu: bhaung: ting, mai: naog daux nyiex khawm: uik ka dee ngawm kix heue:. 3 Mai: kix yaox bleeh dak kukak khankix pa awm: ngu, mai: tum: piang kix ku kaux heue:. 4 Mai: kix khawm: uik naog ka Khwan: Singax Singeh, mai: jah tix sikah ka daux lox tang: ceu khankix, awm: pa tawx Khwan: kix ah heue:.

5 Mai: ka daux bawg yam an koe: pui Yudax ka daux veng Yerusaliem, pa mawh pui pa chix nab chix yam ka Siyiex, pa kaoh khaing: meung pui ku meung pa koe: greem: raoma: heue:. 6 Yam mhong: lox pa sinum an, pui haoh pui hun: khrawm: paox tix mai: daox am: kah kheu kix ku kaux daux pui, mhong: kawncau khankix sikah ka daux lox tokaux tix heue:. 7 Mai: kix khawm: uik kied daox kied deng: kah, mai: ah nin: ka paox tix tix kaux hoik tix kaux, "Jhak heue:, pui pa sikah khankix khawm: uik, mawh pui Galilie: ang mawh lie? 8 Phan: mawh nan:, ex ku kaux daux pui pon mhong: lox tokaux tix, dee hoik keh ex yuh ka mawx? 9 Ex pa mawh pui meung Pathi, mai: pui meung Mede mai: pui meung Elam, mai: pui pa ot ka daux meung Mesopotemia, mai: ka daux meung Yudax, mai: meung Kapadosia mai: ka daux meung Pawntux mai: meung Asix, 10 mai: ka daux meung Pharuki, mai: meung Pampuli, ka daux meung Ejiptux, mai: haktiex meung Libya, mai: sivie veng Kurene mai: nyo sinie khankix pa kaoh khaing: veng Romax, pui Yudax mai: khawm: pui pa hoik ih li kix. 11 Pui meung Karete, mai: pui meung Arebia khankix, mai: ex mhong: kix sikah ka daux lox ex, krai grawh grawng: pa ting pa lhaong: pa hoik yuh Siyiex heue:." 12 Mai: kix khawm: uik kied daox kied deng: kah, mai: ah nin: ka paox tix, "Dee bleeh grawng: in mawh pa yuh ka mawx?" 13 Viang mawh kawx nan: tang: kaux tiblah nieb ah pa ang cee ang cak ah nin:, "Kix sak kix yoek ka rawm: plix siiet pa tie: heue:."

Petrux sidiex

14 Viang mawh nan: Petrux cung tau mai: kawncau kao: kaux tix, mai: kieh lox tix sinum, mai: sidiex ka kix ah nin:, "Pui meung Yudax, mai: pui pa ot ka daux veng Yerusaliem khawm: uik eue:, kieh pex tawng grawng: ceu in, mai: nghiet gumlox aux heue:. 15 Grawh grawng: nawh kix yoek awm: pa ce: pex ang mawh, kheu kawn: tag hoek ngie ponngawb loe: nari160 heue:. 16 Viang mawh nan: in mawh grawng: ceu pa hoik grux krai cao: jhai: Yoelax ah nin:,

16117 'Siyiex ah, ka daux bawg yam singaix sidah khankix, Aux tag kieh Khwan: Aux lih ka piang pui khawm: uik heue:. Mai: kawn: simex kawn: bon: pex tag sang krai lox jhai:, mai: pui pa awn: ju pex, tag sang yaox riang susai, mai: pui kuad pui song: pex tag sang camaox tix yaox heue:. 18 Mawh heue:, Aux tag sang kieh Khwan: Aux lih ka piang kawncau simex cie Aux mai: kawncau bon: cie Aux ka daux singaix Aux khankix, mai: kix tag sang krai lox jhai: heue:. 19 Mai: Aux tag jhi: yaox mhai: pa daox pa am:, ka raoma: dee long:, mai: mhai: ka greem: ka piang haktiex, pa mawh nham:, mai: ngu, mai: taox ngu heue:. 20 Singaix tag tieh tag loh tix mawh pa vhaik, mai: khix tag sang mawh nham:, phaoxka: sivoe sang hoek singaix pa ting pa lhaong: Simiang an heue:. 21 Mai: pui mawx ang ah pa kok ka ceukaux Simiang, tag sang hoek krax taoh heue:.'

22 "Pui Isarilax eue:, nghiet gumlox in khankix heue:. Yesux Pui veng Nazariet, Pui tix kaux pa Siyiex hoik jhi: pex yaox grawng: pa khaw: pa caw rhawm: Nawh, ka daux kaing pa ting siawp sibrawm, mai: ka daux mhai: pa daox pa am:, pa hoik yuh Siyiex ka daux Nawh Cao: sinax pex, awm: tokaux pex kawx hoik tawng heue:. 23 Kaw pa Siyiex hoik dud keud, grux tawng, mai: tawx, pex hoik teei tix tawk Nawh yum piang khaoxlhak, ka tawm: taix pui ceu pa ang koe: lai been li heue:. 24 Viang mawh nan: Siyiex hoik deeh kieh Nawh kaoh im:, khaix hoik yah ceu pa saux krax yum, mawh kheu krax yum ang lai chix pon giex pong gang: Nawh heue:. 25 Mawh kheu Dawit hoik krai grawh grawng: Nawh yuh nin:,

162'Aux yaox Simiang sivoe pakngai: aux jheeng: jheeng: Kheu Nawh ot plak taix khawn: dawm: aux, yuh ka mawx son ang pon tix yungyiang: aux. 26 Mawh kheu nan: rhawm: aux gaux kah, mai: dak aux tom: gauxrhawm: heue:. Lheu: khaing: an nex aux kawx, tag ot ka daux krax keud pot jun pot heue:. 27 Mawh kheu Maix tag ang grham: ju aux ka daux meung yum. Lheu: khaing: an Kaw Pa Singax Singeh cie Maix kawx, tag ang kieh pon cux pon sium: heue:. 28 Maix hoik kieh aux tawng krax pa im: ju khankix heue:. Maix tag sang kieh aux naog pa gauxrhawm: gauxrhi:, ka pakngai: Maix heue:.'

29 "Puxaik khankix eue:, aux pon tix krai grawh grawng: tax ex Dawit ka pex mhawm: mhawm:, grawng: hoik yum hoik sipaung: nawh, mai: simeeig nawh koe: tau mai: ex tom: singaix yamin heue:. 30 Mawh kheu mawh nawh cao: jhai:, mai: kheu tawng nawh Siyiex hoik tiex tu tix krai grawng: Nawh tag sang kieh ceucat nawh tix kaux ngawm piang dangngeung nawh heue:. 31 Kheu nawh hoik grux yaox ceu in, nawh tom: krai grawng: pa sang deeh kaoh im: Cao: Khrit, mai: grawng: tag ang grham: Nawh daux meung yum, mai: grawng: nex Nawh kawx tag ang hoek krax cux krax sium: heue:. 32 Yesux in, Siyiex hoik deeh kieh kaoh im:, mai: ex khawm: uik mawh pui pa kham: mhai: sakse: grawh grawng: an heue:. 33 Mawh kheu hoik yaog Nawh, mai: kheu ot Nawh plak taix khawn: dawm: Siyiex, mai: kheu hoik pon awm: lox mukheu pa hoik tawx Keeing: Cao: grawng: Khwan: Singax Singeh, pa Nawh hoik kieh ceu in lih pa yaox pa mhong: pex kah heue:. 34 Grawh grawng: nawh, Dawit ang haok ka daux meung raoma:, viang mawh nan: tokaux nawh ah nin:,

163'Simiang ah nin: ka Simieag aux, ngawm plak taix khawn: dawm: Aux, 35 tom: Aux kieh pui pa koeng ka Maix, mawh ngot dee deuh Maix caong tix heue:.'

36 "Mawh kheu nan: kieh geh pui Isarilax khawm: uik khawm: leeing:, tawng mhawm: mhawm:, grawng: Yesux pa hoik tawk pex piang khaoxlhak, Siyiex hoik kieh Nawh mawh Simiang mai: Khrit heue:."

Nhie: pui hun: deeh thai: lox cox rhawm: tix hoek ka Nawh Cao:

37 Yam kix mhong: lox an, dung: ka rhawm: kix, mai: kix chawk ah nin: ka Petrux mai: kawncau pa ting tang: kaux khankix, "Puxaik khankix eue:, ex tag sang yuh ka mawx?" 38 Mai: Petrux deeh ah nin: ka kix, "Doh keud doh sawn: ka phimap pex, mai: baptis164 pex ku kaux ka daux ceukaux Yesux Khrit, son sang pon luan khaing: daux phimap phigrham: pex, mai: pex tag sang pon khawngphak Khwan: Singax Singeh heue:. 39 Mawh kheu lox mukheu pa hoik tawx an, mawh son pex, mai: son kawnpraix pex, mai: pui pa ot dee singai khawm: uik. Awm: kok hoek Simiang Siyiex ex ka Nawh miex ding ang ah, mawh ding heue:." 40 Mai: nawh teei lox tang: ceu tom: nie, mai: kham: mhai: sakse:, sidiex gau ka kix ah nin:, "Taoh tokaux pex khaing: ju pa kawk pa vawk in heue:." 41 Kix pa rieb tix teei gumlox nawh, baptis B daux rawm:, mai: ka daux singaix an pui pa baox tiien: kix dex koe: loe: reng: heue:. 42 Kix nghiet lox pa sidiex kawncau pa ting khankix jheeng: jheeng:, mai: yuh paox yuh pie ka daux pa sivit khaomun mai: pa rawg bwan: heue:.

Pui pa yumrhawm: ot tau

43 Mai: pui ku kaux daux pui lhat graung kah, ceu pa daox pa am: tom: nie, mai: mhai: pa daox pa am: pa hoek tix mawh ka tawm: taix kawncau pa ting khankix heue:. 44 Mai: pui pa yumrhawm: khawm: uik ot tau, mai: pa koe: kix khawm: uik kix rom tix shao: tau heue:. 45 Mai: kix coh haktiex kix mai: kraung khrai: cie kix, mai: gwieh ka paox tix khawm: uik, awm: pa lo pui mawx pui an heue:. 46 Mai: tix ngaix hoik tix ngaix kix ih rhawm: rhi: li long paox tix, ot ka daux nyiex bwan:, mai: kix sivit khaomun tau ka daux nyiex kix. Kix gaux sile: he: sivoek, ih pa ih pa un: kix, mai: ih rhawm:, ang tang lox siyox moing, 47 yaogyaw Siyiex, mai: pon pa khaw: pa caw rhawm: pui khawm: uik heue:. Mai: tix singaix hoik tix singaix Simiang baox tiien ka kix pa hoek krax taoh heue:.

Simin Ting 3

Kawncau yuh mhai: pa daox am: kieh pa laux caong chix hu:

1 Petrux mai: Yohan haok hu: ka nyiex bwan:, ka bawg yam nari rawg bwan:, yam mawh 165dim: nari heue:. 2 Mai: pui klawm: pui hoek tix kaux pa hoik laux caong tom: yam ot ka daux vaig miex tix, pa deuh kix dex siviex nyiex bwan: ku singaix pa kok mawh pa "Mhawm: Grang," son sang rawg sang mhaing: ka pui pa laig ka nyiex bwan: heue:. 3 Yam nawh yaox Petrux mai: Yohan dex sang laig ka daux nyiex bwan:, nawh rawg mhaing: ka kiex heue:. 4 Mai: Petrux jawg tix jeung: ngai: tix piang kaw an, tau mai: Yohan, ah nin:, "Jhak ka yiex heue:." 5 Mai: nawh yaog tix jhak kiex, kheu ce: tix sang pon tix ceu ceu khaing: kiex heue:. 6 Viang mawh kawx nan: Petrux ah nin:, "Aux ang koe: mau khri:, viang mawh nan:, pa koe: aux, aux sang tawx ka maix heue:. Ka daux ceukaux Yesux Khrit Pui veng Nazariet, kaoh hu: ka caong tix heue:." 7 Mai: nawh giex taix khawn: dawm: kaw an, mai: yaog nawh kaoh, mai: dom: mawx dom: an caong nawh mai: ngai: liag nawh koe: riang heue:. 8 Mai: nawh jalo: tix kaoh cung, mai: nawh jah tix hu: ka caong tix heue:. Mai: nawh laig ka daux nyiex bwan: tau mai: kiex, hu: ka caong tix, mai: jaloh tix, mai: yaogyaw Siyiex heue:. 9 Mai: pui khawm: uik yaox nawh hu: ka caong tix, mai: yaogyaw Siyiex heue:. 10 Mai: kix tawng nawh mawh kaw pa ngawm tix caung ka dex Siviex Mhawm: Grang nyiex bwan:, mai: kix khawm: uik daox deng: ka ceu pa hoik mawh ka nawh heue:.

Petrux sidiex bawg ra:, nhie: pui Yudax Thai: lox cox rhawm: tix

11 Mai: yam kaw an jhawp ka Petrux mai: Yohan, mai: pui khawm: uik kied daox deng: kah mai: to: hu: ka kix, ka piang grah pa kok mawh "Grah Sawlamun" heue:. 12 Yam yaox Petrux pa yuh nan:, nawh deeh ah nin: ka kix, "Pex pa maw pui Isarilax eue:, pex lai daox deng: kah pui in yuh ka mawx? Mai: pex jawg tix jeung: ngai: pex ka yiex, awm: pa hoik mawh siawp sibrawm, mai: pa rah pa see yiex, pa hoik kieh nawh deeh chix hu: ka caong tix, yuh ka mawx? 13 Siyiex Abraham, mai: Icak, mai: Yakop. Siyiex tax ex, du ex, hoik yaog min: plakngai: Kawn: Nawh Yesux, pa teei pex tix tawx, mai: thiang: tix tik sivoe simiang Pilat, yam nawh keud tix sang ploi: Nawh Cao: heue:. 14 Viang mawh nan:, pex thiang: tix tik Kaw Pa Singax Singeh, mai: Pa Rah Pa See mai: pex rawg son sang tawx ka pex, pui tix kaux pa mawh pui pa pah pui yum heue:. 15 Mai: pex hoik teei Simiang Pa Im: Ju yum, Kaw pa Siyiex hoik kieh deeh kaoh im: khaing: krax yum, mai: yiex mawh pa kham: mhai: sakse: grawng an heue:. 16 Mai: mawh kheu krax yumrhawm: ka daux ceukaux Nawh Cao:, ceukaux Nawh hoik kieh pui in koe: riang rao, pa yaox mai: tawng pex heue:. Mawh heue:, krax yumrhawm: ka Nawh Cao:, hoik tawx pa grum mhawm: ka nawh, sivoe ngai: pex khawm: uik heue:. 17 Mai: yamin puxaik khankix eue:, aux tawng grawh grawng: pex mai: simiang pex kawx, hoik yuh nan: kheu ang pex tawng. 18 Viang mawh kawx nan: ceu pa Siyiex hoik grux jhi: ka jheeh cao: jhai: khankix, grawh grawng: Khrit tag sang kham: geu:, Nawh hoik kieh naog yuh nan: heue:. 19 Mawh kheu nan: doh keud doh sawn: ka phimap tix, mai: deeh tieh tix, yuh ka mawh son sang preet phimap phigrham: tix, yuh ka mawx son sang hoek bawg yam pa kieh nyawm ot nyawm koe:, pa kaoh khaing: Simiang heue:. 20 Mai: yuh ka mawx son sang ploi: Nawh Khrit pa hoik laug Nawh son pex, pa mawh Yesux heue:. 21 Kaw pa raoma: tag sang rieb tix priex, tom: hoek bawg yam pa hoik cox ku ceu khawm: uik, pa Siyiex hoik krai ka jheeh cao: jhai: pa singax khankix, jah tom: di dix heue:. 22 Mose hoik ah nin:,

166'Simiang Siyiex tag sang kieh Cao: Jhai: lih tix kaux, khaing: ka daux puxaik pex, pa awm: aux heue:. Pex tag sang nghiet pa krai Nawh ka pex ku ceu khawm: uik heue:. 23 Mai: pui pa ang nghiet lox Cao: Jhai: an ku kaux daux pui, tag sang kieh nawh laux lak pak leeing: khaing: sinax pui ceu nawh heue:.'

24 Mawh heue:, jah ka cao: jhai: Samoelax mai: cao: jhai: pa koe: khaix nawh khawm: uik, cao: pa krai koe: miex kaux ang ah, kix kawx hoik krai grawh grawng: bawg yam singaix in khankix heue:. 25 Pex mawh kawnpraix cao: jhai: khankix, mai: mukheu pa hoik yuh Siyiex tau mai: tax pex du pex, pa ah nin: ka Abraham,

167'Ka daux ceucat maix, geh pui ka piang haktiex khawm: uik khawm: leeing: tag sang pon bwanson: heue:.' 26 Phaoxka: Siyiex hoik ploi: Kawn: Nawh Yesux lih ka pex, son sang tawx bwanson: ka pex, ka daux pa kieh pex ku kaux, deeh tieh khaing: phimap phigrham: tix heue:."

Simin Ting 4

Petrux. Yohan laig thawng:

1 Mai: yam kiex sidiex gau ka pui khankix, cao: giex kaing: li khankix, mai: cao: giex kaing: nyiex bwan: mai: Sadukie: khankix hoek ka kiex, 2 kheu sung sang rhawm: kix, mawh kheu sidiex gau kiex ka pui khankix, grawh grawng: pa deeh kaoh im: pui khaing: krax yum ka daux Yesux heue:. 3 Mai: kix giex kiex mai: sau: daux thawmg: tom: hoek pasax, kheu hoik mawh yam ponbo heue:. 4 Viang mawh nan: pui pa mhong: gumlox an tom: nie yumrhawm: kah, mai: simex giex dex koe: phwan: rheng: heue:.

5 Singaix pasax simiang kix khankix, mai: kuad song: khankix, mai: pui tiem: lai khankix khrawm: paox tix ka daux veng Yerusaliem, 6 mai: Anax cao: giex kaing: li pa ting, mai: Kayaphax, mai: Yohan, mai: Alezandru, mai: can pa mawh paoxceu paoxcat cao: giex kaing: li pa ting khawm: uik ot tan: heue:. 7 Yam kix hoik deuh kiex ka sinax, kix chawk kiex ah nin:, "Pax teei siawp sibrawm pa yuh ka mawx, phan: ang mawh nan:, pax hoik yuh ceu in ka daux ceukaux pui mawx?" 8 Yam an Petrux naog ka Khwan: Singax Singeh, mai: ah nin: ka kix, "Pex pa mawh simiang giex kaing: pui khankix, mai: kuad song: khankix eue:, 9 phan: chawk cheng: yiex ka daux singaix in, ka grawng: ceu pa mhawm: pa hoik yuh ka pui pa laux maung, mai: pui in pon tix deeh moi: ka pa yuh ka mawx, 10 kieh pex khawm: uik, mai: pui Isarilax khawm: uik een: tix tawng, grawng: mawh ka daux ceukaux Yesux Khrit Pui veng Nazariet, Kaw pa hoik tawk pex piang khaoxlhak, pa Siyiex hoik deeh kieh kaoh im: khaing: krax yum, mawh ka daux ceukaux Nawh, kaw in tom: moi: mai: cung sivoe pex heue:.

16811 Kaw in mawh simaox, pa hoik tik pex pa mawh cao: yuh nyiex, pa hoik kieh mawh kaing: ka daog heue:.

12 Mai: ang koe: ceu pa taoh ka daux tang: kaux tix kaux kawx, mawh kheu ang koe: ceukaux tang: kaux greem: raoma:, pa hoik tawx ka sinax kawn: pui, ka daux dee sang hoek ex krax taoh heue:."

Glhat kiex mai: deeh ploi:

13 Yam yaox kix grawng: ceu pa kua: rhawm: Petrux mai: Yohan, mai: tawng grawng: kiex ang tie tawng lai, mai: mawh pui pheem:, kix daox deng: kah, mai: kix doh rhawm: kah, grawng: kiex mawh pa hoik ot tau mai: Yesux heue:. 14 Mai: mawh kheu kix yaox kaw pa hoik cox moi: cung tau mai: kiex, kix ang nieb pon ah tid tix heue:. 15 Viang mawh nan: khaix kix hoik nhie: kiex lih hu: plak praix, khaing: cub kuad pa prawng see:, kix kum: kawng: paox tix, 16 ah nin:, "Ex tag sang yuh ka mawx ka pui in kiex? Mawh kheu kiex hoik yuh mhai: pa daox pa am: pa koe: cee, mai: hoik sidawng: ka pui pa ot ka daux veng Yerusaliem khawm: uik, mai: ex ang pon thiang: ka grawng: an heue:. 17 Viang mawh kawx nan:, son ang sang nie baox tah ka sinax pui khankix, ex glhat kiex ka lox, yuh ka mawx, khaix in, son ang kiex sang baox sidiex ka pui tix kaux kawx, ka daux ceukaux in heue:." 18 Mai: kix kok kiex, mai: tawm: lox ka kiex, yuh ka mawx son ang sang baox sidiex gau ka daux ceu kaux Yesux, ceeix kawx heue:. 19 Viang mawh nan: Petrux mai: Yohan pawk lox mai: ah nin: ka kix, "Pex keud tix yaox, mawh pa yuh ka mawx lheu: khaw: ka sivoe ngai: Siyiex, ceu pa nghiet lox pex khaing: lox Siyiex lie? 20 Mawh kheu grawng: ceu pa hoik yaox hoik mhong: yiex, phan: ang krai ang doh pon heue:." 21 Mai: khaix kix hoik baox glhat kiex, kix ploi: kiex hu:, kheu kix ang yaox tid tix grawng: sang pon tix ciyang kiex, mawh kheu pui khankix heue:. Kheu pui khawm: uik yaogyaw Siyiex, son grawng: ceu pa hoik mawh an heue:. 22 Mawh kheu pui pa kiex hoik yuh mhai: pa daox pa am:, ceu pa kieh moi: an kah, hoik koe: tipon: (40) num haoh heue:.

23 Mai: yam hoik ploi: kiex hu:, kiex hoek ka paox cub kiex, mai: krai grawh grawng: ceu pa cao: giex kaing: li pa ting khankix, mai: kuad song: khankix hoik ah ka kiex khawm: uik heue:. 24 Mai: yam kix hoik mhong: grawng: an, kix yuh lox tix gum cum tix dah, pa sinum ka Siyiex mai: ah nin:, "Simiang eue:, Maix hoik yuh raoma:, mai: haktiex, mai: rawm: sigrit sigra:, mai: can pa koe: ka daux khankix khawm: uik. 25 Kaw pa hoik krai ka daux Khwan: Singax Singeh, ka jheeh keeing: ex Dawit pa mawh kawncau Maix ah nin:,

169 'Pui tang: ceu tang: cat cong: rhawm: ka grawng: pa yuh ka mawx? Mai: ceu pui khankix nieb keud grawng pa giex pa going yuh ka mawx? 26 Laux simiang haktiex in khankix bre tokaux tix, mai: cao: giex kaing: khankix khrawm: paox tix, tiex cha: ka Siyiex mai: Khrit cie Nawh heue:.'

27 Grawh grawng: nawh, ka daux veng in kix hoik tiex hoik cha: tix yuh ka Kawn: Maix Yesux, pa singax singeh tete heue:. Kaw pa hoik groi Maix rawm: bee kah, khawm: Herut mai: Pawnti Pilat, tau mai: pui tang: ceu tang: cat khankix, mai: pui Isarilax khrawm: paox tix, 28 tix yuh awm: taix Maix mai: pa keud Maix hoik grux ciak tix kieh mawh heue:. 29 Mai: yam in, Simiang eue:, jhak ka piang pa glhat kix liak, mai: tawx kawncau Maix khankix, rhawm: pa cong: pa kua: tix sidiex gau lox bwan: Maix. 30 Yam Maix nyeu taix Tix, tix cox moi: heue:. Mai: yuh ka mawx son sang pon yuh mhai: mai: ceu pa daox pa am:, ka daux ceukaux pa singax singeh Kawn: Maix Yesux heue:." 31 Khaix hoik rawg kix bwan:, dee khrawm: kix paox tix yung: yiang:, mai: kix khawm: uik naog ka Khwan: Singax Singeh, mai: kix kua: tix sidiex gumlox Siyiex heue:.

Pui yumrhawm: khankix rom tix shiao tau ceu pa koe: kix

32 Cub pui haoh pui hun: pa yumrhawm:, mawh rhawmrhi: tix mu: khaing:, mai: tix kaux kawx, ang ah kraung ceu pa koe: tix mawh cie tix, viang mawh nan: kix rom paox tix shiao ceu pa koe: khawm: uik heue:. 33 Kawncau pa ting khankix kham: mhai: sakse: ka daux siawp sibrawm pa ting grawh grawng: pa deeh kaoh im: Simiang Yesux, mai: bwanson: pa ting koe: ka piang kix khawm: uik heue:. 34 Ka daux kix pa ang kub ang koe: tix kaux kawx, mawh kheu kix pa koe: haktiex, phan: ang mawh nan: pa koe: nyiex, coh khankix, mai: viex ngawh can pa hoik coh kix hoek, 35 mai: deuh ka caong kawncau pa ting khankix, mai kix gwieh ka ku kaux awm: pa lo nawh heue:.

36 Mai: Yosiep, kaw pa kawncau pa ting khankix tawx ceukaux Banabax, (Phan: toe: lox an dee bleeh mawh, "Kawn: simex pa khu: rhawm:" heue:.) nawh mawh pui Lewix, ceu pui meung Kuparux, 37 pa hoik coh haktiex pa koe: nawh tix dah, mai: viex mau ngawh mai: deuh ka caong kawncau pa ting khankix heue:.

Simin Ting 5

Ananix mex moeng pie lhen: ka Khwan: Singax Singeh

1 Viang mawh kawx nan: pui tix kaux pa kaux Ananix mai: moeng nawh Sapphirax coh ceu pa koe: kiex tix ceu, 2 mai: nawh khawm: moeng nawh, awm: caw rhawm: paox tix mai: mox tix een: ngawh an tiblah, mai: viex ngie tiblah hu: een: ka caong kawncau pa ting khankix heue:. 3 Viang mawh nan: Petrux ah nin:, "Ananix eue:, yuh ka mawx maix lai kieh Satan naog ka rhawm: maix, son sang pie ka Khwan: Singax Singeh, mai: mox tix een: ngawh haktiex an tiblah? 4 Yam kawn: koe: haktiex an mawh cie maix ang mawh lie? Mai: khaix hoik coh haktiex an, maix sang yuh ka mawx ka ngawh an koe: ka maix ang mawh lie? Yuh ka mawx maix lai keud tix yuh ceu in ka daux rhawm: maix? Maix hoik pie ka kawn: pui ang mawh, viang mawh nan:, hoik pie ka Siyiex heue:." 5 Mai: yam mhong: Ananix lox ceu an khankix nawh goh mai: dud rhawm: heue:. Mai: pui pa mhong: grawng: an khawm: uik kied lhat kah heue:. 6 Mai: pui pa awn: ju khankix kaoh mai: pua: nawh, mai: klawm: nawh lih hu:, mai: sipaung: nawh heue:.

7 Mai: khaix an rheung: dex koe: loe: nari, moeng nawh ang tawng grawng: pa hoik mawh an, mai: hoek tix laig tan:. 8 Mai: Petrux chawk nawh ah nin:, "Krai ka aux, pax coh haktiex an pon ngie ding khaing: lie?" Nawh deeh krai ah nin:, "Mawh, pon ding khaing: heue:." 9 Viang mawh kawx nan: Petrux baox chawk ah nin: ka nawh, "Yuh ka mawx pax lai kum: tix mawh rhawm: tix mu:, son sang cheuk sang nyaw ka Khwan: Simiang? Jhak heue:, caong kix pa hoik sipaung: mex maix ot ka siviex, mai: kix tag sang klawm: maix lih heue:. 10 Mai: bon: an goh dom: mawx dom: an ka liep caong nawh, mai: dud rhawm: heue:. Mai: pui pa awn: ju an khankix laig mai: yaox pa hoik yum nawh, mai: kix klawm: nawh lih, mai: sipaung: nawh liep mex nawh heue:. 11 Mai: pui ceucao khawm: uik, mai: pui pa mhong: grawh grawng: ceu in khankix khawm: uik die lhat kah heue:.

Kawncau yuh mhai: daox am: pa ting

12 Mai: ka tawm: taix kawncau pa ting khankix yuh mhai: tom: nie mai: pa daox pa am: tom: nie, ka sinax pui khankix, mai: kix khawm: uik ih rhawm: paox tix ot ka piang grah Sawlamun heue:. 13 Viang mawh kawx nan: pa deuk pa taik khankix, ring yuh paox yuh pie mai: kix, viang mawh nan: pui khankix yaogyaw ka kix heue:. 14 Mai: cub pui pa yumrhawm: khawm: simex khawm: bon:, kied baox nie thie: ka Simiang heue:. 15 Tom: kix klawm: pui pa koe: jhawm: saux jhawm: ngia hu: ka daux krax, mai: een: kix ka piang ku:, piang bi:, yuh ka mawx yam Petrux lawng krax, peue: nawh sang kheem: sang veei ka kix tiblah heue:. 16 Mai: pui haoh pui hun: pa ot daux veng khankix pa koe: sivie sivheng: veng Yerusaliem khrawm: paox tix viex pui pa koe: jhawm: saux jhawm: ngia, mai: pui pa phi: pa seeing: pa brai: tuk tiak tuk te: khankix, mai: cox kix ku kaux daux pui khawm: uik moi: heue:.

Kawncau kham: geu: krax tuktiak

17 Viang mawh kawx nan: cao: giex kaing: li pa ting, mai: pui pa ot tau mai: nawh khawm: uik (pa mawh cub pui Sadukie:) kaoh mai: naog krax bohrhawm: heue:. 18 Mai: kix giex kawncau pa ting khankix, mai: sau: kix ka daux thawng:. 19 Viang mawh kawx nan: kawncau Siyiex tix kaux hoek yam pon sawm:, paoh siviex thawng: mai: viex kix lih, mai: ah nin:, 20 "Pex hu: mai: cung ka daux nyiex bwan:, mai: sidiex gau ka pui khankix, grawh grawng: gumlox pa im: ju khawm: uik heue:." 21 Mai: yam kix mhong: grawng: ceu in, kix laig ka daux nyiex bwan: yam dex sang riang praix, mai: sidiex gau heue:. Viang mawh kawx nan: cao: giex kaing: li pa ting mai: kix pa ot tau mai: nawh hoek, mai: kok cub kuad song: pa prawng see:, mai: kuad pui Isarilax pa giex kaing: khankix khrawm: paox tix khawm: uik, mai: ploi: kix hu: ka nyiex thawng:, son sang viex kawncau pa ting khankix hoek heue:. 22 Viang mawh kawx nan: yam pui cau pui soi: khankix hu: mai: ang yaox kix ka daux thawng: kix deeh hoek mai: krai, 23 ah nin:, "Ex yaox pa hoik song: siviex nyiex thawng: mhawm: mhawm:, mai: pui pa pau cung dex ka siviex khankix heue:. Viang mawh nan: yam ex paoh siviex ang ex yaox pui ka daux tix kaux kawx heue:." 24 Yam cao: giex kaing: nyiex bwan:, mai: cao: giex kaing: li pa ting khankix mhong: lox an, kix keud ang doh grawng: in tag sang yuh ka mawx. 25 Mai: pui tix kaux hoek mai: krai ka kix, "Jhak heue:, pui pa hoik sau: pex daux thawng:, cung ka daux nyiex bwan: mai: sidiex gau ka pui khankix heue:." 26 Khaix an cao: giex kaing: nyiex bwan: mai: pui cau pui soi: khankix, hu: mai: viex kawncau pa ting khankix hoek, viang mawh nan: kix ang nieb yuh, nieb khin: ka kix, kheu lhat kix pui khankix teei simaox dheem: kix kah heue:. 27 Mai: yam kix hoik viex kawncau pa ting khankix, kix deuh kix sivoe cub kuad song: pa prawng see: heue:. Mai: cao: giex kaing: li pa ting chawk kix, 28 ah nin:, "Ex hoik tawm: lox ka pex, ang kieh sidiex gau ka daux ceukaux in, mai: jhak heue:, pex hoik kieh veng Yerusaliem naog ka lox sidiex lox gau pex mai: keud tix sang viex nham: Pui in hoek ka piang ex heue:." 29 Viang mawh nan: Petrux mai: kawncau pa ting tang: kaux khankix, pawk lox mai: ah nin:, "Ex tag lai nghiet lox Siyiex khaing: lox kawn: pui heue:. 30 Siyiex tax ex, keeing: ex, hoik kieh Yesux deeh kaoh im:, Kaw pa hoik preue: pex ka khaox mai: teei yum heue:. 31 Siyiex hoik yaog Nawh Cao: deuh ka taix khawn: dawm: Nawh, son sang kieh mawh Simiang mai: Cao: Taoh, son sang tawx krax doh keud doh sawn: mai: pluat ploi: phimap phigrham: ka pui Isarilax heue:. 32 Mai: ex mawh pui pa kham: mhai: sakse: grawh grawng: ceu in khankix, mai: Khwan: Singax Singeh pa tawx Siyiex ka pui pa nghiet lox Nawh kawx, mawh pa kham: mhai: sakse: heue:."

Lox tawx Gamalelax satix

33 Viang mawh kawx nan: kix pa mhong: lox an dung: ka rhawm: kix, mai: kix koe: rhawm: tix sang pah kawncau pa ting khankix yum heue:. 34 Viang mawh nan:, pui tix kaux ka daux cub kuad song: pa prawng see:, pa mawh Pharishie:, pa kaux Gamalelax, pa mawh cao: gau lai been, pa yungyi: pui kah khawm: uik, kaoh cung mai: tawx lox kieh kawncau pa ting khankix lih hu: tivud heue:. 35 Mai: nawh ah nin: ka kix, "Pui Isarilax khankix eue:, rien rhawm: tokaux tix, ka grawng: pa dex sang yuh pex ka pui in kix heue:. 36 Grawh grawng: nawh, glangka: singaix in khankix dix, pui pa kaux Thudax tix kaux lih hoek mai: yaw tokaux tix mawh pa koe: min: plakngai:, mai: pui tiblah pa dex koe: pon: yieh, neuex tokaux kix mai: nawh heue:. Hoik pah kaw an yum, mai: pui pa nghiet lox nawh khawm: uik prung: prang: mai: laux leeing: heue:. 37 Khaix an ka daux bawg yam singaix yam teei yam tiem: ceukaux an kix, pui meung Galilie: pa kaux Yudax tix kaux lih hoek mai: nyaw glaw: pui tom: nie hawt khaix nawh heue:. Tokaux nawh kawx hoik laux leeing:, mai: pui pa nghiet lox nawh khawm: uik kawx, prung: prang: hu: heue:. 38 Mai: yam in aux krai ka pex, grham:, paw chuh ka pui in kix, mai: kieh kix ot nong: nong: heue:. Mawh kheu can pa yuh pa keud kix, phan: mawh pa kaoh khaing: kawn: pui tag laux tag leeing: heue:. 39 Viang mawh kawx nan: phan: mawh pa kaoh khaing: Siyiex, pex ang pon yieh laux heue:. Phan: ang mawh nan: ha: pex kox tag awm: pui pa cha: pa yuh ka Siyiex heue:." 40 Mai: kix nghiet lox nawh, mai: yam kix hoik kok kawncau pa ting khankix hoek, kix sivied kix, mai: tawm: lox ka kix, yuh ka mawx son ang kix sang sidiex gau ka daux ceukaux Yesux, mai: ploi: kix hu: heue:. 41 Mai: kawncau pa ting khankix lih khaing: cub kuad song: pa prawng see:, mai: gauxrhawm: gauxrhi: kheu hoik sawn: kix pa keung: tix kham: geu: pa kaig pa tua, son Ceukaux an heue:. 42 Mai: ku singaix kix sidiex gau grawh grawng: Yesux mawh Cao: Khrit ka daux nyiex bwan:, mai: ka daux nyiex kix, ang jud ang jai heue:.

Simin Ting 6

Cieak laug ka pui aliah kaux

1 Ka daux singaix an khankix, yam kawncau mausoi: khankix baox nie haoh nie hun:, pui Yudax pa dex pa dawd mai: Helasax sa lao pui Hebrie, kheu yam khan: yam kheu: kix ku singaix, kix ang kia: ang ngien ka miexmai kix mhawm: mhawm: heue:. 2 Mai: kawncau pa ting kao: kaux ra: kok cub kawncau mausoi: khankix hoek ka kix, mai: ah nin:, "Ex ang khaw: tix tik tix grham: gumlox Siyiex, mai: khan: kheu: ngie ka pheen: khankix heue:. 3 Mawh kheu nan: puxaik khankix eue:, pex sawg pui aliah kaux khaing: ka daux pex, pa yaw pui kah, pa naog Khwan: Cao:, mai: pingnya cuyi, mai: laug kix kieh bung: kaing piang ceu in heue:. 4 Viang mawh nan: ex kawn: sang nied tix rawg bwan:, mai: sidiex gau gumlox bwan: jheeng: jheeng: heue:." 5 Mai: pui khawm: uik khaw: rhawm: khaw: rhi: ka lox an, mai: kix laug tix teei Sathephan, pa mawh pui tix kaux pa naog krax yumrhawm:, mai: Khwan: Singax Singeh, mai: Philipux, mai: Prawkhaw, mai: Nikanaw, mai: Timon, mai: Pamenax, mai: Nikawlax pa mawh pui veng Antiuk, pa hoik laig ka been li pui Yudax heue:. 6 Kix deuh kix sivoe kawncau pa ting khankix, mai: khaix hoik rawg kix bwan:, kix teei taix tix deuh piang kix heue:.

7 Mai: gumlox bwan: Siyiex baox nie tah hu:, mai: kawncau mau soi: baox nie haoh nie hun: ka daux veng Yerusaliem, mai: cub cao: giex kaing: li tom: nie koe: krax cu krax nghiet ka krax yumrhawm: in heue:.

Sathephan kham: krax pa kiex pui tix

8 Mai: Sathephan naog ka bwanson: mai: siawp sibrawm, mai: yuh ceu pa daox pa am: pa ting, mai: mhai: ka sinax pui khankix heue:. 9 Viang mawh nan: kix tiblah pa dex pa dawd mai: nyiex sidiex, pa kok mawh Liberatin, mai: pui meung Kurene, mai: pui veng Alezandre, mai: kix pa mawh pui meung Kiliki mai: meung Asix tiblah, thung: thiang: mai: Sathephan heue:. 10 Mai: kix ang pon tieb pon tie ka pingnya cuyi pa krai pa sidiex nawh ka daux Khwan: Cao: heue:. 11 Mai: kix briex chun: praok ka pui tiblah pa kham: mhai: sakse: ah nin:, "Ex hoik mhong: nawh salao ka Mose mai: ka Siyiex heue:." 12 Mai: kix cheeik ka pui khankix, pa mawh kuad song:, mai: pui tiem: lai khankix, mai: kix hoek ka Sathephan mai: giex nawh, mai: viex nawh ka cub kuad song: pa prawng see:, 13 mai: kix kok pui pa kham: mhai: sakse: pa ang mawh ang meh khankix pa ah nin:, "Pui in ah lox sa ang jud ka grawng: dee singax in, mai: grawng: lai been li heue:. 14 Grawh grawng: nawh ex hoik mhong: nawh ah, 'Yesux Pui veng Nazariet an, tag sang yieh dee in laux, mai: deeh loh ka been li pa hoik tawx Mose ka ex heue:.'" 15 Mai: pui pa ngawm ka daux cub kuad song: pa prawng see: khawm: uik, jeung: ngai: tix ka nawh, mai: yaox pakngai: nawh awm: hoik mawh pakngai: pakbaox kawncau Siyiex heue:.

Simin Ting 7

Sathephan ah ka ang pui Isarilax yumrhawm:

1 Mai: cao: giex kaing: li pa ting chawk ah nin:, "Grawng: ceu in khankix mawh tete lie?" 2 Mai: nawh deeh ah nin:, "Puxaik khankix mai: keeing: khankix eue:, nghiet heue:. Siyiex pa ting min: plakngai: hoik bleeh ka keeing: ex Abraham yam ot nawh ka daux meung Mesopotemia, ka: sang ot nawh ka daux veng Haran, 3 mai: ah nin: ka nawh,

170'Maix lih khaing: daux haktiex maix, mai: paox ceu paox cat maix, mai: hoek ka daux haktiex pa tag sang jhi: Aux maix yaox heue:.'

4 Khaix an nawh lih khaing: haktiex pui Kaladie:, mai: hu: ot ka daux veng Haran, mai: khaix hoik yum keeing: nawh, Siyiex gah nawh khaing: tan:, bleeh ka daux haktiex in, dee ot pex yamin heue:. 5 Mai: Nawh ang tawx sin: ka nawh daux haktiex in. Viang mawh dee kub dig nawh caong tix, tix khawn: kawx ang tawx, mai: Nawh hoik grux tawx lox mukheu ka nawh, grawng: sang tawx haktiex in ka nawh, mai: ka simie ceucat nawh khankix, yam ang nawh nyang bax koe: kawn: tix kaux kawx heue:. 6 Mai: Siyiex hoik ah nin:,

171'Simie ceucat nawh tag sang mawh nyo sinie ka daux meung pui tang: ceu, mai: kix tag sang mawh siliex cawng, mai: kham: geu: ceu pa khin: pui, son pon: yieh num heue:. 7 Mai: ceu pui dee kix tag sang yuh siliex yuh cawng,'

Siyiex ah,

172'Aux tag sang prawng sang ca:, mai: khaix an kix tag sang lih hu:, mai: kix tag sang krub Aux ka dee in heue:.'

8 Mai: Nawh tawx nawh mukheu pa mawh been pa pat hak heue:. Mai: nawh koe: kawn: pa mawh Icak, mai: yam uik hoek daix singaix, nawh pat hak nawh heue:. Mai: Icak koe: kawn: pa mawh Yakop, mai: Yakop koe: kawn: pa mawh tax du kao: kaux ra: heue:. 9 Mai: tax du khankix bohrhawm: bohrhi: ka Yosiep, mai: coh tix tawx nawh ka daux meung Ejiptux, viang mawh kawx nan: Siyiex ot tau mai: nawh. 10 Mai: taoh nawh khaing: krax kharhawm: kharhi: nawh khawm: uik, mai: tawx nawh ceu pa khaw: pa caw rhawm:, mai: pingnya cuyi sivoe simiang Pharaw, pa mawh khunhawkham meung Ejiptux, mai: nawh kieh nawh mawh, simiang giex kaing: piang meung Ejiptux, mai: piang nyiex haw: nawh khawm: uik heue:. 11 Yam an meung Ejiptux khawm: uik, mai: meung Khanan hoek sibhawm: ting, mai: kied kharhawm: kharhi:, mai: tax du ex sawg ang lai yaox pa ih pa un: heue:. 12 Viang mawh kawx nan: yam mhong: Yakop, grawh grawng: koe: pa ih pa un: ka daux meung Ejiptux, nawh ploi: tax du ex bawg phaoxka: heue:. 13 Yam hu: ra: bawg tix bawg, Yosiep kieh puxaik nawh khankix tawng tokaux nawh. Mai: Pharaw tawng grawng: ceucat Yosiep heue:. 14 Mai: Yosiep ploi: hu: kok keeing: nawh Yakop, mai: ceucat nawh khawm: uik, pa koe: atigliah phwan: (75) kaux heue:. 15 Mai: Yakop lih hu: ka daux meung Ejiptux, mai: nawh mai: tax du ex khankix yum tan: heue:. 16 Mai: kix klawm: kix hu: ka daux veng Shekhim, mai: deuh kix ka daux simeeig pa Abraham hoik teei mau liag khaing: kawn: simex Hemaw khankix, ka daux veng Shekhim heue:. 17 Viang mawh kawx nan: yam bawg yam pa Siyiex hoik grux tawx lox mukheu ka Abraham dex sang hoek, pui baox nie haoh nie hun: ka daux meung Ejiptux, 18 tom: lih koe: simiang khunhawkham tikaux piang meung Ejiptux, pa ang tawng ka Yosiep heue:. 19 Kaw an yuh cuyi: lukliak lukle: ka pui ceu ex, mai: yuh pa ang khaw: ang jiet ka tax du ex yuh ka mawx kix sang tik kawn: ngie: kix khankix, son ang kix sang im: heue:. 20 Ka daux bawg yam an Mose keh, mai: kied jiet mhawm: grang heue:. Mai: eei: tix ka daux nyiex keeing: nawh loe: khix heue:. 21 Mai: yam tik nawh, kawn: bon: Pharaw teei nawh, mai: eei: nawh awm: pa mawh kawn: lih tix heue:. 22 Mai: gau ka Mose pingnya cuyi pui meung Ejiptux khawm: uik mai: nawh ting siawp sibrawm ka daux gumlox mai: khawm: kaing pa yuh tix heue:. 23 Viang mawh kawx nan: yam dex hoek ju nawh tipon: (40) num, nawh koe: rhawm: tix sang hu: vhi: ka puxaik nawh, pa mawh pui Isarilax heue:. 24 Mai: nawh yaox kix tix kaux kham: geu: pa ang caw, mai: nawh ot plak nawh, mai: pawk bix kaw pa pui khin: an, mai: pah pui Ejiptux an yum heue:. 25 Mai: nawh ce: puxaik nawh khankix tawng grawng: Siyiex sang tawx pa kieh kix luan ka tawm: taix nawh, viang mawh nan: kix ang tawng. 26 Singaix pasax nawh hoek mai: yaox pui pa simah ka paox tix, mai: nawh sang kieh raw kieh yien: nhim:, ah nin:,

173'Pui eue:, pax mawh puxaik, pax lai yuh pa ang khaw: ka paox tix, tix kaux hoik tix kaux yuh kah mawx?'

27 Viang mawh nan: kaw pa yuh pa ang khaw: ka paox plawg paox nyhawm: nawh an, nyheen: nawh yoi:, ah nin:,

174'Mawx pa kieh maix mawh cao: giex kaing:, mai: cao: prawng cao: ca: ka piang ex? 28 Maix khex simie tix pah aux yum awm: pah maix pui Ejiptux yum kawx kawx lie?'

29 Mai: Mose to: kheu lox an, mai: mawh pui pa hu: ot ka daux haktiex Midian, dee koe: nawh kawn: simex ra: kaux heue:. 30 Mai: khaix hoik naog tipon: (40) num, kawncau Siyiex tix kaux lih bleeh ka nawh, ka daux tiag gawng Sina, ka daux raongu, ka daux yeem khaox heue:. 31 Mai: yam yaox Mose ceu an, nawh daox deng: ka pa yaox tix, mai: yam nawh greed dex tix jhak, lox Simiang lih hoek tix ah nin:, 32

175'Aux mawh Siyiex tax du maix khankix, pa mawh Siyiex Abraham, mai: Siyiex Icak, mai: Siyiex Yakop heue:.'

Mai: Mose siyaung: mai: ring jhak heue:. 33 Mai: Simiang ah nin: ka nawh,

176'Peeik kiep khaing: caong maix, mawh kheu dee cung maix mawh haktiex pa singax singeh heue:. 34 Aux hoik yaox pui cie Aux pa kharhawm: kharhi:, pa ot ka daux meung Ejiptux tete, mai: hoik mhong: lox riag lox ngia kix, mai: Aux hoik lih hoek son sang kieh kix luan heue:. Hoek yamin heue:, mai: Aux sang ploi: maix hu: ka daux meung Ejiptux.'

35 Mose kaw pa ang kix rieb tix teei ah nin:, 'Mawx pa kieh maix mawh cao: giex kaing: mai: cao: prawng cao: ca: ka piang ex?' Kaw an Siyiex hoik kieh mawh khawm: cao: giex kaing: mai: cao: pa taoh, ka tawm: taix kawncau Siyiex, pa hoik lih bleeh ka nawh ka daux yeem khaox an heue:. 36 Pui in hoik thong: kix lih, khaix hoik yuh ceu pa daox pa am:, mai: mhai: ka daux meung Ejiptux, mai: ka daux rawm: sigrit sigra: raoh, mai: ka daux tiag daux tu tipon: (40) num heue:. 37 In mawh Mose, kaw pa hoik ah nin: ka pui Isarilax,

177'Siyiex tag sang kieh Cao: Jhai: lih tix kaux, khaing: ka daux puxaik pex, pa awm: aux heue:.' 38 Kaw in mawh pa hoik ot ka daux cub an, daux tiag daux tu, tau mai: kawncau Siyiex an, pa hoik sikah mai: nawh ka gawng Sina, mai: tau mai: tax du ex khankix, pa hoik pon lox pa im: ju tix tawx ka ex heue:. 39 Kaw pa tax du ex ang nghiet, mai: nyheen: khaing: kix, mai: koe: rhawm: tix sang deeh nie ka meung Ejiptux, 40 mai: ah nin: ka Arun,

178'Yuh siyiex son ex, pa sang hu: sivoe ex, grawh grawng: nawh kheu Mose in, pa hoik thong: ex lih khaing: daux meung Ejiptux, ang ex tawng, hoik mawh pa yuh ka mawx ka nawh heue:.' 41 Mai: ka daux bawg yam singaix an khankix, kix yuh rieang kawn: moi, mai: kix viex pa tan pa lu ka rieang an, mai: kix gauxrhawm: gauxrhi: ka daux khaix taix pa hoik yuh tix heue:. 42 Mawh kheu nan: Siyiex deeh veeh khaing: kix, mai: grham: kix krub cub raoma:, awm: hoik tiem: ka daux phuk lai cao: jhai: khankix ah nin:,

179'Geh pui Isarilax eue:, pex hoik tan hoik lu ka Aux to: khawng: to: brie pa hoik pah yum tipon: (40) num ka daux tiag daux tu lie? 43 Pex hoik yaog nyiex gox Molawk, mai: simuing: siyiex Rephan, rieang pa hoik yuh pex tix krub kah khankix. Mawh kheu nan: Aux tag viex pex hu: ka veng Babulon heue:.'

44 "Tax du ex khankix hoik koe: nyiex gox bwan:, pa kham: mhai: sakse: ka daux tiag daux tu, awm: hoik krai Nawh ka Mose, yuh ka mawx son nawh sang yuh hawt rieang pa hoik yaox nawh heue:. 45 Tax du ex hoik toe: tix viex nyex gox an laig yam caw bawg yam kix, yam hu kix greem: Yawsux tix teei haktiex pui tang: ceu tang: cat, pa grheu: Siyiex tix tik sivoe ngai: tax du ex, tom: hoek bawg yam singaix Dawit khankix heue:. 46 Kaw pa pon bwan: sivoe ngai: Siyiex, mai: rawg mhaing: son sang pon tix yaox dee ot son Siyiex Yakop heue:. 47 Viang mawh kawx nan:, mawh Sawlamun pa yuh nyiex son Nawh heue:. 48 Viang mawh nan: Kaw pa ting pa lhaong: khaing: khawm: uik, ang ot ka daux nyiex pa yuh ka taix, awm: hoik krai cao: jhai: ah nin:,

18049 'Raoma: mawh dangngeung Aux, mai: haktiex mawh ngot dee deuh Aux caong Tix heue:. Simiang ah nin:, tag sang sum: nyiex pa yuh ka mawx son Aux? Phan: ang mawh nan:, Aux tag koe: dee laux lee: pa yuh ka mawx? 50 Taix Aux hoik yuh ceu in khankix khawm: uik ang mawh lie?'

51 "Pui pa cong: ngawg, mai: pa ang pat hak ka daux rhawm:, mai: yhaok eue:, pex sidien ka Khwan: Singax Singeh jheeng: jheeng:, pex yuh awm: pa sax yuh tax du pex heue:. 52 Hoik koe: cao: jhai: kaw pa yuh ka mawx, pa tax du pex ang tuk tiak tuk te: kah? Mai: kix teei yum kix pa jhi: sivoe ka: sang hoek. Kaw Pa Rah Pa See heue:. Kaw pa pex hoik lih mawh pui pa tik pa vud, mai: pui pa teei yum heue:. 53 Pex pa hoik pon lai been li pa hoik tawx kawncau Siyiex khankix, viang mawh nan: pex ang priex tix hawt heue:."

Sathephan som ju tix ka son sidiex lox bwan:

54 Yam kix hoik mhong: lox grawng: ceu in khankix, dung: ka rhawm: kix, mai: kix song: rhawm: mai: greeik rhang: tix ka Sathephan heue:. 55 Viang mawh nan: nawh naog ka Khwan: Singax Singeh mai: jawg tix maong ka raoma:, mai: yaox min: plakngai: Siyiex, mai: yaox Yesux cung plak tai khawn: dawm: Siyiex, 56 mai: ah nin:, "Jhak heue:, aux yaox raoma: uik baoh, mai: Kawn: kawn: pui cung plak taix khawn: dawm: Siyiex heue:." 57 Viang mawh nan: kix kok yo lox sinum, mai: thox yhaok tix, mai: kix khrawm: paox tix tau, mai: hu: plab ka nawh. 58 Mai: kix taing nawh plakpraix veng, mai: teei simaox dheem: nawh kah, mai: pui pa kham: mhai: sakse: khankix teei kraung ceep tix, mai: een: dex caong pui pa awn: ju tix kaux, pa kaux Sawlux heue:. 59 Mai: kix dheem: Sathephan ka simaox, yam rawg nawh bwan: ah nin:, "Simiang Yesux eue:, rieb tix teei khwan: aux liak." 60 Mai: nawh grux ngawng tix, kok yo lox sinum ah nin:, "Simiang eue:, paw teei tix deuh phimap in ka piang kix liak." Mai: khaix hoik ah nawh nan:, nawh man: it tix heue:.

Simin Ting 8

Sawlux tuktiak tukte: ka Ceu Cao

1 Mai: Sawlux khaw: caw rhawm: ka pa teei kix nawh yum heue:.

Mai: ka singaix an, krax tuk tiak tuk te: pa ting lih tix mawh ka piang ceu cao pa koe: ka daux veng Yerusaliem, mai: lheu: khaing: kawncau pa ting khankix, kix khawm: uik prung: prang: hu: ku dah ku dee ka daux meung Yudax mai: meung Samarix heue:. 2 Mai: pui pa chix nab chix yam tiblah, sipaung: Sathephan, mai: kix yiem riag yiem yo lox sinum son nawh heue:. 3 Viang mawh nan: Sawlux yieh ceu cao laux, laig ka daux ku nyiex, mai: reu: simex, mai: bon:, mai: hu: sau: kix ka daux thawng: heue:.

Philipux sidiex gau ka daux veng Samarix

4 Mawh kheu nan: kix pa hoik prung: prang: ku dah ku dee, hu: sidiex gau gumlox bwan: heue:. 5 Mai: Philipux lih hu: ka veng Samarix mai: sidiex gau grawh grawng: Cao: Khrit ka kix heue:. 6 Mai: cub pui haoh pui hun: khankix, ih rhawm: paox tix, nghiet tau, grawng: ceu pa krai Philipux, yam kix mhong: mai: yaox mhai: pa daox pa am: pa yuh nawh heue:. 7 Grawh grawng: nawh pui pa laig phi: pa seeing: pa brai: tom: nie, kok yo lox sinum mai: lih hu: heue:. Mai: pui pa yum tix plak ton: nie, mai: pa laux caong khankix deeh moi: heue:. 8 Mai: ka daux veng an kied koe: krax gauxrhawm: gauxrhi: heue:.

9 Viang mawh nan: pui tix kaux pa kaux Simon, pa hoik ot ka ka daux veng an phaox ka:, mai: yuh cao: sibawk, mai: pa hoik kieh pui Samarix khankix daox deng: kah, pa hoik yaw tokaux tix mawh pa ting pa lhaong: tix kaux. 10 Kaw pa pui khawm: uik, jah ka pa iak khaing: paox tix tom: hoek ka pa ting khaing: paox tix, hoik nghiet kah ah nin:, "Pui in mawh siawp sibrawm Siyiex an, pa kok mawh Pa Ting heue:." 11 Mai: kix nghiet nawh, kheu nawh hoik kieh kix daox deng: ka ceu sibawk pa yuh nawh, rheung nyao heue:. 12 Viang mawh kawx nan: yam yumrhawm: kix ka lox pa mhawm: pa mhiem:, pa sidiex gau Philipux, grawh grawng: pa dex pa dawd mai: Meung Siyiex, mai: ceukaux Yesux Khrit, kix baptis181 khawm: simex khawm: bon: heue:. 13 Mai: tokaux Simon kawx yumrhawm: heue:. Mai: nawh baptis B tix ka rawm:, ot tau mai: Philipux, mai: nawh daox deng: ka mhai: pa daox pa am:, mai: siawp sibrawm pa ting pa yuh nawh heue:.

14 Yam kawncau pa ting khankix, pa ot ka daux veng Yerusaliem, mhong: grawh grawng: Samarix hoik rieb tix teei gumlox bwan: Siyiex, kix ploi: Petrux mai: Yohan hu: ka kix heue:. 15 Yam kiex lih hoek ka kix, kiex rawg bwan: son kix, yuh ka mawx son sang pon kix Khwan: Singax Singeh heue:. 16 Mawh kheu Nawh ang nyang bax lih ka piang kix tix kaux kawx, kix hoik baptis C ngie rawm: ka daux ceukaux Simiang Yesux khaing:.

17 Yam an kiex deuh taix tix ka piang kix, mai: kix pon Khwan: Singax Singeh heue:. 18 Yam yaox, Simon kheu deuh taix kawncau pa ting khankiex, hoik tawx Khwan: Singax Singeh kah, nawh tawx tix yaox mau ka kiex, 19 ah nin:, "Ka aux kawx tawx siawp sibrawm in, yuh ka mawx aux sang deuh taix tix ka piang pui mawx ang ah, son sang pon nawh Khwan: Singax Singeh heue:." 20 Viang mawh kawx nan: Petrux ah nin: ka nawh, "Kieh mau maix laux leeing: tau mai: maix, kheu maix ce: tix sang pon khawng: phak Siyiex ka mau heue:. 21 Maix ang kleuk ang neuex ka grawng: ceu in, kheu rhawm: maix ang caw sivoe ngai: Siyiex heue:. 22 Mawh kheu nan:, doh keud ka phimap ceu pa caox pa caig pa yuh maix in, mai: rawg bwan: ka Siyiex, yuh ka mawx son sang ploi: Nawh phimap pa hoik keud maix daux rhawm: tix heue:. 23 Grawh grawng: nawh aux yaox hoik ot maix ka daux ghin: pa song:, mai: ka daux ceu pa hoik phyawk phimap phigrham: heue:." 24 Mai: Simon deeh pawk lox ah nin:, "Pax rawg bwan:, son aux ka Siyiex liak, yuh ka mawx son ceu pa hoik ah maix khankix tag ang hoek ka piang aux tix ceu kawx heue:."

25 Mawh kheu nan: yam kix hoik kham: mhai: sakse:, mai: hoik sidiex gau gumlox Simiang, kix deeh ing: ka veng Yerusaliem, mai: sidiex gau lox bwan: gauxrhawm: gauxrhi: ka daux yaong: Samarix tom: nie heue:.

Philipux sidiex gau ka pui sieh: pui meung Ethiopia

26 Yam an kawncau Siyiex tix kaux sikah mai: Philipux ah nin:, "Kaoh mai: hu: plak caong ma: seh, ka krax pa kaoh khaing: veng Yerusaliem mai: bleeh ka veng Gaza, pa mawh krax daux tiag heue:." 27 Mai: nawh kaoh mai: hu:. Mai: jhak heue:, pui meung Ethiopia tix kaux, pa mawh pui sieh pa kied ting siawp sibrawm ka greem: nanghawkham Kandeki, pa mawh simiang pui meung Ethiopia, kaw an mawh pa kia: piang sinngao nang an khawm: uik, nawh hoik hoek tix krub ka veng Yerusaliem heue:. 28 Mai: deeh nawh khaing: tan:, ngawm daux ling: brung cie tix, mai: phat lai cao: jhai: Isayax heue:. 29 Mai: Khwan: Cao: ah nin: ka Philipux, "Hu: dex mai: neuex tokaux maix ka ling: an heue:. 30 Mai: Philipux to: hu: dex kah, mai: mhong: kaw an phat lai cao: jhai: Isayax, mai: chawk ah nin: ka nawh, "Maix tawng dee bleeh pa phat maix lie?" 31 Mai: kaw an deeh ah nin:, "Phan: ang koe: cao: pa jhi: aux yaox, aux chix tawng yuh ka mawx?" Mai: nawh khyox ka Philipux, nhie: nawh haok ngawm tau mai: heue:. 32 Mai: phuk lai sigang: khri: dee phat nawh mawh nin:,

182"Hoik tok Nawh hu: tix pa yum awm: yung: heue:. Mai: awm: kawn: yung: ang nye: ka sivoe cao: rhip hauk, Nawh ang ang: moing Tix heue:. 33 Ka daux krax tiem rhawm: tiem rhi: Nawh, rud tix teei pa prawng pa ca:, ceu pa mawh pa meh khaing: Nawh heue:. Mawh mawx pa sang krai grawh grawng: ju Nawh? Mawh kheu hoik teei ju Nawh khaing: haktiex heue:."

34 Mai: pui sieh an deeh chawk Philipux ah nin:, "Aux khyox tix chawk maix, cao: jhai: in krai grawng: pui mawx? Krai grawng: tokaux tix lie, phan: ang mawh nan:, krai grawng: tang: kaux lie? 35 Mai: Philipux ang: moing tix, mai: jah tix sidiex ka nawh khaing: lox phuk lai sigang: khri: an, lox bwan: gauxrhawm: gauxrhi: grawh grawng: Yesux heue:. 36 Mai: yam kawn: lawng kix krax kix hoek ka dee koe: rawm: tix dah, mai: pui sieh an ah nin:, "Jhak heue:, rawm: koe: tin:, mawh pa yuh ka mawx pa sang kieh sang tie aux khaing: baptis183?" 37 Mai: Philipux ah nin:, "Phan: maix yumrhawm: khawm: rhawm: khawm: rhi: tix, chix maix heue:." Mai: nawh deeh pawk lox mai: ah nin:, "Aux yumrhawm: grawng: Yesux Khrit mawh Kawn: Siyiex heue:." 38 Mai: nawh tawx lox kieh ling: brung an kaog heue:. Mai: kiex khawm: ra: kaux lih hu: ka daux rawm:, kiex pa mawh Philipux mai: pui sieh an, mai: nawh baptis184 kaw an ka rawm: heue:. 39 Mai: yam kiex kaoh khaing: ka daux rawm:, Khwan: Simiang loe: Philipux hu:, mai: pui sieh an ang lai baox yaox nawh heue:. Kheu nawh gauxrhawm: gauxrhi: mai: kawn: hu: krax hu: nawh heue:. 40 Philipux yaox tokaux tix ot ka daux veng Asado, mai: nawh sidiex gau lox bwan: gauxrhawm: gauxrhi: ka veng khawm: uik tom: nawh hoek ka daux veng Kesarix heue:.

Simin Ting 9

Sawlux mawh cie Simiang

9:1-19 koe: daux lai Kawcau 22:3-16; 26:9-18

1 Viang mawh nan: Sawlux kawn: blin lox glhat, grawng: pa sang pah kawncau mau soi: Simiang yum, mai: hu: ka cao: giex kaing: li pa ting, 2 mai: rawg mhaing: ka nawh, son lai pa sang tawx ka nyiex sidiex khankix ka daux veng Damase, yuh ka mawx phan: nawh yaox simex ang ah, bon: ang ah, pa hawt Krax An tix kaux kaux, nawh sang pon tix phyawk mai: viex kix hoek ka veng Yerusaliem heue:. 3 Mai: yam kawn: hu: nawh krax nawh hoek dex ka veng Damase, mai: dom: mawx dom: an pa riang pa lih khaing: raoma: jhan: rob nawh heue:. 4 Mai: nawh goh gup piang tiex, mai: mhong: lox pa ah nin: ka nawh, "Sawlux eue:, Sawlux eue:, maix lai tuktiak tukte: Aux yuh ka mawx?" 5 Mai: nawh chawk ah nin:, "Simiang eue:, Maix mawh mawx?" Mai: Nawh Cao: deeh ah nin:, "Aux mawh Yesux pa tuktieak tukte: maix kah heue:. 6 Viang mawh kawx nan: kaoh mai: laig ka daux veng, mai: tag sang krai ka maix grawh grawng: maix tag lai yuh pa yuh ka mawx." 7 Mai: pui pa hu: tau mai: nawh khankix, cung mai: ang pon nye:, kheu viang kix mhong: lox an kawx, kix ang yaox pui tix kaux kawx heue:. 8 Mai: Sawlux kaoh khaing: piang tiex, mai: yam blah nawh ngai: tix, nawh ang ku yaox tid tix, mai: kix tok taix nawh, mai: viex nawh laig ka daux veng Damase heue:. 9 Mai: ka daux loe: singaix nawh ang chix yaox, mai: ang ih ang nyaux heue:.

10 Yam an koe: kawncau tix kaux pa kaux Ananix, pa ot ka daux veng Damase, mai: Simiang ah nin: ka nawh ka daux riang susai, "Ananix eue:." Mai: Ananix deeh ah nin:, "Jhak heue:, Simiang eue:, aux ot tin: heue:." 11 Mai: Simiang baox ah nin: ka nawh, "Kaoh mai: hu: ka daux krax pa kok mawh 'Pa See,' mai: hu: sawg tix chawk ka nyiex Yudax, son pui veng Tasux tix kaux pa kaux Sawlux, mawh kheu rawg nawh bwan: heue:. 12 Mai: nawh hoik yaox pui tix kaux pa kaux Ananix hoek tix laig mai: deuh taix tix ka piang nawh, yuh ka mawx son sang deeh chix yaox nawh heue:." 13 Viang mawh nan: Ananix deeh pawk lox ah nin:, "Simiang eue:, aux hoik mhong: grawh grawng: pui in khaing: pui tom: nie, grawng: pa hoik yuh nawh pa caox pa caig tom: nie, ka pui singax singeh pa ot ka veng Yerusaliem. 14 Mai: nawh hoik koe: akhwang: khaing: cao: giex kaing: li pa ting khankix, tix phyawk pui pa kok ka ceukaux Maix tin: khawm: uik heue:." 15 Viang mawh nan: Simiang baox ah nin: ka nawh, "Maix hu: heue:. Kheu mawh nawh aw: pa hoik laug Aux, son sang viex ceukaux Aux hu: sivoe ka pui tang: ceu tang: cat khankix, mai: simiang khunhawkham khankix, mai: pui Isarilax khankix heue:. 16 grawh grawng: nawh Aux tag sang jhi: nawh yaox, grawng: nawh tag sang kham: geu: miex ceu son ceukaux Aux heue:." 17 Mai: Ananix lih hu:, mai: laig ka daux nyiex an, mai: deuh taix tix ka piang Sawlux ah nin:, "Pux Sawlux eue:, Simiang Yesux pa hoik lih bleeh ka maix, daux krax pa hoek maix, ploi: aux, yuh ka mawx son sang pon maix tix deeh yaox mai: naog ka Khwan: Singax Singeh heue:." 18 Mai: dom: mawx dom: an ceu pa awm: sibriak cod khaing: ngai: nawh, mai: nawh pon tix deeh yaox, mai: nawh kaoh mai: baptis185 ka rawm: heue:. 19 Mai: nawh ih pa ih pa un: mai: baox koe: riang heue:.

Mai: nawh ot tau mai: kawncau mausoi: ka daux veng Damase tix vong heue:.

Sawlux jah tix sidiex gau

20 Mai: dom: mawx dom: an nawh jah tix sidiex gau ka daux nyiex sidiex khankix grawh grawng: Yesux, grawng: mawh Nawh Kawn: Siyiex heue:. 21 Mai: pui pa mhong: nawh khawm: uik daox deng: kah mai: ah nin:, "In ang mawh kaw pa yieh kix laux pa kok ka Ceukaux in ka daux veng Yerusaliem lie? mai: nawh hoik hoek tin: tix yuh ceu an, yuh ka mawx son sang phyawk tix viex kix hu: ka sivoe cao: giex kaing: li pa ting khankix heue:. 22 Viang mawh kawx nan: Sawlux nie baox ting riang, mai: kieh pui Yudax pa ot ka daux veng Damase khankix daox deng: ka mhai: sakse: grawng: Yesux mawh Cao: Khrit heue:.

23 Khaix hoik naog singaix tom: nie, pui Yudax khankix kum: kawng: paox tix grawh grawng: sang teei nawh yum. 24 Viang mawh kawx nan: Sawlux pon tix tawng grawng: ceu pa hoik yiag kix, Mai: kix pau siviex veng khankix leeing: ngaix leeing: sawm:, son sang pon tix teei nawh yum heue:. 25 Viang mawh nan: kawncau nawh khankix teei nawh yam ponsawm:, mai: koi ploi: nawh daux phliex plakpraix guh veng heue:.

26 Mai: yam hoik hoek nawh ka veng Yerusaliem, nawh keud tix sang neuex tokaux tix mai: kawncau khankix, mai: kix khawm: uik lhat ka nawh, kheu ang kix yumrhawm: grawng: hoik mawh nawh kawncau heue:. 27 Viang mawh nan: Banabax teei nawh mai: viex nawh hoek ka kawncau pa ting khankix, mai: krai kix grawh grawng: pa hoik yaox nawh Simiang ka daux krax, mai: grawng: pa hoik sikah Nawh Cao: ka nawh, mai: grawng: hoik viex nawh rhawm: kua: tix sidiex gau ka daux ceukaux Yesux, ka daux veng Damase heue:. 28 Mai: nawh ot tau mai: kix ka veng Yerusaliem, lih lih laig laig, 29 viex rhawm: kua: tix sidiex gau ka daux ceukaux Simiang heue:. Mai: nawh sikah mai: thung: thiang: ka pui Yudax meung Helasax, viang mawh nan: kix sawg tix teei nawh yum heue:. 30 Mai: yam hoik tawng puxaik khankix grawh grawng: ceu an, kix viex nawh lih hu: ka veng Kesarix, mai: ploi: nawh hu: ka veng Tasux heue:.

31 Mai: ceucao: pa koe: ka daux meung Yudax, mai: meung Galilie:, mai: meung Samarix khawm: uik koe: krax nhim:, mai: baox ting baox lhaong:, mai: kix hu: ka daux pa lhat ka Simiang mai: ka daux ceu pa nyawm rhawm: pa khu: Khwan: Singax Singeh, mai: baox nie haoh nie hun: heue:.

Mhai: tix deuh ka kaing jhaw: pa yuh Petrux

32 Yam an yam Petrux hu: lai ling ku dah ku dee, ka pui singax singeh pa ot ka daux veng Ludax kawx, nawh hoek kah heue:. 33 Mai: ka dee an Petrux yaox pui pa kaux Enex, pa hoik it dee it tix daix num, kheu hoik yum nawh tix plak heue:. 34 Mai: Petrux ah nin: ka nawh, "Enex eue:, Yesux Khrit kieh maix moi:, kaoh mai: cox dee it maix heue:." Mai: nawh kaoh dom: mawx dom: an heue:. 35 Mai: pui pa ot ka daux veng Ludax, mai: veng Sharon yaox kaw an, mai: kix deeh tieh tix hoek plak Simiang heue:.

36 Ka daux veng Yawppax koe: kawncau tix kaux pa kaux Tabithax, phan: toe: lox an kok mawh Dawka heue:. Bon: in naog ka kaing jhaw: ceu pa mhawm:, mai: pa yuh bwanson: tan lu pa yuh tix heue:. 37 Ka daux singaix an khankix nawh saux mai: yum heue:, mai: khaix kix hoik heem: nawh, kix deuh nawh daux lawg plak piang heue:. 38 Mawh kheu veng Ludax, dex ka veng Yawppax, kawncau mausoi: khankix mhong: grawng: Petrux ot tan:, mai: ploi: pui ra: kaux hu: ka nawh, tix khyox ka nawh ah nin:, "Paw vi jun tix baox nien hoek ka ex heue:." 39 Mai: Petrux kaoh mai: hu: tau mai: kiex heue:. Mai: yam nawh hoik hoek tan:, kix viex nawh haok ka daux lawg plak piang, mai: miexmai khawm: uik cung yiem liep Petrux, mai: jhi yaox sibex mai: kraung ceep, pa hoik yuh Dawka, yam kawn: ot nawh tau mai: kix heue:. 40 Viang mawh nan: Petrux kieh kix lih khawm: uik, mai: grux ngawng tix rawg bwan:, mai: veeh plak tokaux yum an ah nin:, "Tabithax eue:, kaoh heue:." Mai: bon: an blah ngai: tix, mai: yam yaox nawh Petrux, nawh yaog tix ngawm heue:. 41 Mai: nawh tawx taix tix ka bon: an, mai: yaog nawh kaoh, mai: kok pui singax singeh mai: miexmai khankix, mai: nawh deeh tawx bon: pa im: an ka kix heue:. 42 Mai: pui pa ot ka daux veng Yawppax khawm: uik tawng grawng: an, mai: pui tom: nie yumrhawm: ka Simiang heue:. 43 Mai: Petrux rheung: ot tom: nie singaix ka daux veng Yawppax, tau mai: Simon pa cox hak tix kaux heue:.

Simin Ting 10

Sidiex lox bwan: gauxrhawm: gauxrhi: ka Kawnilix

1 Ka daux veng Kesarix koe: pui tix kaux pa kaux Kawnilix, pa mawh cao: giex kaing: naing, pui naing tix yieh kaux, pa kok mawh cub pui naing Itali heue:. 2 Nawh mawh pui pa chix nab chix yam. mai: pa chix lhat ka Siyiex, mai: khawm: pui daux nyiex nawh khawm: uik kawx awm: an. Nawh mawh pa sax yuh bwanson: tan lu tom: nie, ka pui khankix, mai: rawg bwan: ka Siyiex jheeng: jheeng: heue:. 3 Tix singaix yam dex hoek 186dim: nari nawh sidawng: yaox ka daux riang susai, kawncau Siyiex tikaux laig hoek ka nawh, mai: ah nin:, "Kawnilix eue:." 4 Mai: nawh lhat kah, jeung: ngai: tix ka piang kawncau Siyiex an ah nin:, "Mawh pa tix, Simiang eue:?" Mai: kawncau Siyiex an ah nin: ka nawh, "Ceu pa rawg maix bwan:, mai: ceu pa tan pa lu maix, hoik haok, son sang mawh ceu pa doh keud doh sawn:, ka sivoe Siyiex heue:. 5 Yamin ploi: pui hu: ka veng Yawppax, mai: viex Simon pa kok kaux mawh Petrux. 6 Nawh ot tau mai: Simon, pa mawh pui cox hak tix kaux, mai: nyiex nawh koe: dex rawn: sigrit sigra: heue:." 7 Mai: khaix hoik hu: kawncau Siyiex pa sikah mai: nawh, Kawnilix kok kawncau daux nyiex tix ra: kaux, mai: pui naing pa chix nab chix yam tix kaux, pa khrien: khre: ka nawh jheeng: jheeng:, 8 mai: khaix hoik krai grawng: ku ceu khawm: uik ka kix, nawh ploi: kix hu: ka veng Yawppax heue:.

Grawng: yaox Petrux riang susai

10:9-32 jhak daux lai Kawncau 11:5-14

9 Singaix pasax, yam kawn: hu: kix krax, mai: uik dex sang hoek ka veng an, yam dex hoek 187liah nari Petrux haok ka piang braux yiex son sang rawg bwan: heue:. 10 Mai: nawh hoek cairhawm: mai: simie tix sawm:, viang mawh nan: yam kawn: tag khre: kix nawh, nawh lip lu, 11 mai: nawh yaox baoh raoma:, mai: tix ceu pa awm: man: tawm pa ting, pa hoik phyawk pon: daog mai: ploi: lih ka piang haktiex heue:. 12 Ka daux an koe: tosat pa koe: caong pon: khawn: ku ceu, mai: pa chix hu: chix mo ka piang tiex, mai: khawm: sim: raoma: khankix heue:. 13 Mai: lox lih hoek ka nawh yuh nin:, "Petrux eue:, kaoh, mai: pah tix ih heue:." 14 Viang mawh nan: Petrux deeh ah nin:, "Ang doh mawh Simiang eue:, kheu ang aux sax ih ceu pa seeing: pa brai:, mai: ceu pa ang singax heue:." 15 Mai: lox baox deeh hoek ka nawh ra: bawg tix bawg ah nin:, "Ceu pa Siyiex hoik kieh singax singeh maix paw kok mawh pa seeing: pa brai: heue:." 16 Khaix hoik yuh nan: loe: bawg, rieb tix deeh teei ceu an haok ka daux meung raoma: dom: mawx dom: an heue:.

17 Yam Petrux kied daox deng: ka daux tokaux tix, grawng: deeh bleeh riang susai pa hoik yaox nawh mawh pa yuh ka mawx, jhak heue:, pui pa ploi: Kawnilix hoik chawk nyiex Simon, mai: cung sivoe siviex, 18 mai: kok chawk grawng: Simon pa kok mawh Petrux, ot tan: lie, ang ot lie. 19 Mai: yam Petrux kawn: keud grawng: riang susai an, Khwan: Cao: ah nin: ka nawh, "Jhak heue:, pui loe: kaux sawg maix. 20 Kaoh mai: lih heue:, mai: paw lai keud jee keud blaong, hu: tau mai: kix, mawh kheu Aux hoik ploi: kix hoek heue:." 21 Mai: Petrux lih hu: ka pui khankix mai: ah nin:, "Jhak heue:, aux mawh kaw pa sawg pex, mawh kheu nan: pex hoek kheu grawng: pa yuh ka mawx? 22 Mai: kix deeh ah nin:, "Kawnilix pa mawh cao: giex kaing: naing tix kaux, pa mawh pui rah pui see, mai: pa chix lhat ka Siyiex pa yaw pui Yudax kah khawm: uik, Siyiex hoik ploi: kawncau pa singax singeh Tix hu: nhie: nawh, ploi: pui hu: kok maix hoek ka daux nyiex tix, mai: son sang kieh mhong: gumlox pa kaoh khaing: maix khankix heue:.

Petrux hoek ka daux veng Kesarix

23 Mawh kheu nan: nawh kok kix laig paung mai: tix heue:.

Mai: pasax nawh kaoh mai: lih hu: tau mai: kix, mai: puxaik pa mawh pui veng Yawppax tiblah kawx hu: tau mai: nawh heue:. 24 Mai: khaix an tix singaix kix laig ka daux veng Kesarix. Mai: Kawnilix hoik kok paox ceu paox cat nawh, mai: paoxgrawm nawh khankix khrawm: paox tix, mai: krox jun son kix heue:. 25 Yam Petrux laig ka daux nyiex, Kawnilix rieb nawh, mai: gup tix krub ka caong nawh heue:. 26 Viang mawh nan: Petrux yaog nawh kaoh ah nin:, "Cung heue:, tokaux aux kawx mawh ngie pui." 27 Mai: yam kawn: sikah Petrux mai: nawh, nawh laig mai: yaox pui pa hoik khrawm: paox tix tan: tom: nie, 28 mai: nawh ah nin: ka kix, "Tokaux pex hoik tawng grawng: ang khaw: mai: been, son pui pa mawh pui Yudax tix neuex tix rom, phan: ang mawh nan: tix hoek ka pui pa mawh pui tang: ceu tang: cat, viang mawh kawx nan:, Siyiex hoik jhi: aux yaox yuh ka mawx son aux tag mawh nan: pa ang singax singeh heue:. 29 Mawh kheu in yam ploi: tix kok aux, aux ang thiang: mai: hoek heue:. Mawh kheu nan: aux tom: chawk pex, pex ploi: tix kok aux kheu keud pex yuh ka mawx?" 30 Mai: Kawnilix ah nin:, "Ka: in pon: singaix, aux twah pa ih pa un: tom: hoek nari in, mai: yam hoek 188dim: nari aux rawg bwan: ka daux nyiex aux, mai: jhak heue:, pui tix kaux pa ceep kraung pa jahn: riang cung sivoe aux, 31 mai: ah nin:, 'Kawnilix eue:, hoik mhong: lox rawg maix bwan:, mai: ceu pa tan pa lu maix khankix kawx, Siyiex hoik doh keud kah heue:. 32 Mawh kheu nan: ploi: pui hu: ka veng Yawppax, tix kok Simon, pa kok mawh Petrux hoek tin: heue:. Nawh ot ka daux nyiex Simon pui pa cox hak, pa ot praok rawm: sigrit sigra:, yam hoik hoek nawh, nawh tag sang sidiex ka maix heue:.' 33 Mawh kheu nan: aux tom: ploi: pui hu: ka maix dom: mawh dom: an heue:. Kheu hoek maix tin:, maix hoik yuh mhawm: mhawm:. Mawh kheu in ex khawm: uik ot tin: sivoe Siyiex, son sang mhong: sang nghiet, ku ceu, pa hoik tawm: Simiang ka maix heue:."

Sidiex: gau ka pui tang: ceu tang: cat

34 Mai: Petrux ang: moing tix ah nin:,

"Aux hoik tawng tete, grawh grawng: Siyiex ang mawh pa jhak ka pakngai: kawn: pui heue:. 35 Viang mawh kawx nan: ka daux pui ku ceu, pui pa chix lhat chix graung ka Nawh, mai: pa yuh pa rah pa see, Nawh sang rieb tix teei heue:. 36 Nawh hoik ploi: lox ka ceucat pui Isarilax khankix, mai: kieh kix tawng, lox bwan: gauxrhawm: gauxrhi: pa dex pa dawd mai: pa nhim:, ka daux Yesux Khrit, pa mawh Simiang piang khawm: uik heue:. 37 Pex hoik tawng grawng: gumlox bwan: an, pa hoik tah hu: ku dah ku dee ka daux meung Yudax, pa jah ka meung Galilie:, khaix krax pa tawx baptis189, ceu pa sidiex gau Yohan heue:. 38 Grawng: Siyiex hoik groi rawm: bee ka Yesux pui veng Nazariet, ka Khwan: Singax Singeh mai: siawp sibrawm, Kaw pa hoik hu: lai ling yuh ceu pa mhawm:, mai: cox pui pa tuktiak phicaox khawm: uik moi:, mawh kheu Siyiex ot tau mai: Nawh heue:. 39 Mai: ex mawh pui pa kham: mhai: sakse: grawh grawng: ceu pa hoik yuh Nawh khawm: uik, ka daux veng Yerusaliem, mai: khawm: daux meung pui Yudax khawm: uik, Kaw pa hoik preue: kix tix teei yum piang khaox heue:. 40 Viang mawh kawx nan: Siyiex hoik kieh Nawh deeh kaoh im:, ka daux loe: singaix, mai: kieh Nawh sidawng: heue:. 41 Viang mawh nan: ang kieh sidawng: ka pui khawm: uik, mawh ngei ka pui pa hoik laug Siyiex, son sang kieh kham: mhai: sakse:, pa mawh ex, pa hoik ih hoik nyaux tau mai: Nawh, khaix hoik kaoh Nawh khaing: krax yum heue:. 42 Mai: Nawh Cao: tawm: lox ka ex nhie: ex sidiex gau ka pui khankix, mai: son sang kham: mhai: sakse: grawng: mawh Nawh Kaw pa hoik ciak Siyiex tix mawh Cao: Prawng Cao: Ca: ka pui pa im: mai: khawm: pui yum khankix heue:. 43 Cao: jhai: khawm: uik kham: mhai: sakse: grawh grawng: pui pa yumrhawm: ka daux ceu kaux Nawh ku kaux daux pui, tag sang hoek krax pa luan khaing: phimap phigrham: heue:."

44 Yam Petrux kawn: tag ah gumlox ceu in khankix, Khwan: Singax Singeh lih piang kix pa mhong: gumlox an khawm: uik heue:. 45 Mai: kix pa dex pa dawd mai: been pa pat hak, pa hoik yumrhawm: mai: pa hoek tau mai: Petrux khankix daox deng: kah, mawh kheu piang pui tang: ceu tang: cat kawx, khawng: phak Khwan: Singax Singeh hoik prauk lih heue:. 46 Kheu kix mhong: kix sikah ka lox pui tang: ceu khankix, mai: yaogyaw Siyiex heue:. Yam an Petrux baox ah nin:, 47 "Kaux pui mawx sang pon sidien rawm:, yuh ka mawx son ang pon tix tawx krax baptis B ka pui inkix, pa hoik pon Khwan: Singax Singeh awm: hoik pon ex?" 48 Mai: nawh tawx lox nhie: kix baptis C ka daux ceukaux Yesux Khrit. Khaix an kix khyox khaw: nhie: nawh ot tan: tix vong heue:.

Simin Ting 11

Petrux hoek tix krai nghaox lox ka daux veng Yerusaliem

1 Kawncau pa ting khankix mai: puxaik khankix pa ot ka daux meung Yudax, mhong: grawh grawng: pui tang: ceu tang: cat kawx, hoik rieb tix teei gumlox bwan: Siyiex. 2 Mawh kheu nan: yam Petrux haok hu: ka veng Yerusaliem, cub pui been pa pat hak, thung: thiang: mai: nawh, 3 ah nin:, "Maix hoik laig ka daux nyiex pui pa ang pat hak khankix, mai: hoik sawm: tau mai: kix heue:." 4 Viang mawh kawx nan: Petrux plak kix mhong: grawh grawng: ceu an jah ka num: tom: sidah ah nin:, 5 "Yam ot aux ka daux veng Yawppax, mai: rawg bwan:, yam lip lu aux yaox riang susai, pa mawh tix ceu pa awm: man: tawm pa ting, pa hoik phyawk pon: daog mai: ploi: lih khaing: raoma:, mai: hoek dex ka aux heue:. 6 Yam jeung: aux ngai: tix kah, aux jhak tix yaox mhawm: mhawm:, mai: yaox tosat pa koe: caong pon: khawn: ka piang haktiex, mai: totiag totu, mai: pa chix hu: chix mo khankix, mai: sim: raoma: khankix heue:. 7 Mai: lox kawx, aux mhong: pa ah nin: ka aux, 'Petrux eue:, kaoh, mai: pah tix ih heue:.' 8 Viang mawh kawx nan: aux ah nin:, 'Ang doh mawh Simiang eue:, mawh kheu ceu pa seeing: pa brai:, phan: ang mawh nan: ceu pa ang singax ang sax laig ka daux jheeh aux heue:.' 9 Viang mawh kawx nan: lox an baox deeh pawk khaing: raoma: ra: bawg tix bawg ah nin:, 'Ceu pa Siyiex hoik kieh singax singeh maix paw kok mawh pa seeing: pa brai: heue:.' 10 Khaix hoik yuh nan: loe: bawg, deeh bluh khawm: uik haok ka daux meung raoma: heue:. 11 Mai: jhak heue: dom: an, pui loe: kaux cung sivoe nyiex dee ot ex an, pa hoik ploi: hoek ka aux khaing: veng Kesarix heue:. 12 Mai: Khwan: Cao: nhie: aux hu: tau mai: kix, mai: paw yuh tang: siyox heue:. Mai: puxaik liah kaux kawx hu: tau mai: aux, mai: ex laig ka daux nyiex pui an, 13 mai: nawh krai ka ex grawh grawng: hoik yaox nawh kawncau Siyiex pa cung ka daux nyiex nawh ah nin:, 'Ploi: hu: ka veng Yawppax mai: viex Simon pa kok mawh Petrux heue:. 14 Nawh tag sang krai gumlox ka maix, pa sang pon maix, mai: pui nyiex maix khawm: uik krax taoh heue:.' 15 Mai: yam jah aux tix sidiex, Khwan: Singax Singeh lih ka piang kix, awm: hoik lih ka piang ex yam jah heue:. 16 Mai: aux doh keud ka gumlox Simiang, pa hoik ah Nawh nin:, 'Yohan baptis190 ka rawm: tete heue:. Viang mawh kawx nan: pex tag sang baptis B ka daux Khwan: Singax Singeh heue:.' 17 Mawh kheu nan: phan: Siyiex hoik tawx khawng: phak ka kix, awm: hoik tawx Nawh ka ex, yam ex yumrhawm: ka Simiang Yesux Khrit, aux mawh pui pa yuh ka mawx, pa sang pon tieb pon tie ka Siyiex?" 18 Mai: yam mhong: kix grawng: ceu an khankix, kix ang nye: kah, mai: yaogyaw Siyiex ah nin:, "Phan: mawh nan: ka pui tang: ceu tang: cat khankix kawx, hoik tawx ceu pa doh keud doh sawn:, tom: pon ju pa im: heue:."

19 Kix pa hoik prung: prang: rai rhuat hu: ku dah ku dee, kheu krax kharhawm: kharhi: pa hoik mawh kheu grawng: Sathephan, hu: tom: hoek ka meung Phinit, mai: ka meung Kuparux, mai: ka veng Antiuk, sidiex gau ngie gumlox bwan: ka pui Yudax khaing: heue:. 20 Viang mawh kawx nan: kix tiblah pa mawh pui meung Kuparux, mai: meung Kurene, yam hoek kix ka veng Antiuk, kix sidiex gau grawng: Simiang Yesux ka khawm: pui Helasax kawx heue:. 21 Mai: taix Simiang ot tau mai: kix, mai: pui tom: nie pa yumrhawm: deeh tieh tix hoek ka Simiang heue:. 22 Mai: lox grawh grawng: kix hoek ka yhaok ceucao pa koe: ka daux veng Yerusaliem, mai: kix ploi: Banabax hu: tom: hoek ka veng Antiuk heue:. 23 Yam hoek nawh tan:, mai: hoik yaox bwanson: Siyiex, nawh gauxrhawm: kah, mai: sidiex gau kix khawm: uik, yuh ka mawx son sang deuh kix rhawm: tix kaux, mai: kawm ka Simiang tom: sied. 24 Kheu mawh nawh pui pa mhawm:, mai: pa naog ka Khwan: Singax Singeh mai: pa yumrhawm: heue:. Mai: pui tom: nie baox tiien baox thie: ka plak Simiang heue:. 25 Mai: nawh lih hu: ka veng Tasux, son sang sawg Sawlux, 26 mai: yam nawh hoik yaox nawh, nawh viex nawh hoek ka veng Antiuk heue:. Mai: kix khrawm: tix ot tau mai: ceucao tan:, tom: naog tix num, mai: sidiex gau ka pui tom: nie. Mawh ka daux veng Antiuk, dee jah tix kok kawncau mausoi: khankix, mawh Khrityan phaoxka: heue:.

27 Ka daux singaix an khankix cao: jhai: tiblah yaog tix lih khaing: veng Yerusaliem hoek ka veng Autiuk heue:. 28 Mai: ka daux kix tix kaux pa kaux Agabux kaoh cung mai: grux krai lox jhai: ka daux Khwan:, grawh grawng: tag sang kied sibhawm: praix piang haktiex khawm: uik heue:. Mai: sibhawm: ting an hoek tix mawh ka daux bawg yam singaix simiang Kesa Klawdi heue:. 29 Mai: kawncau khankix, ku kaux daux pui, keud tix sang sipaox ceu pa teem: ka puxaik khankix pa ot ka daux meung Yudax, awm: pa chix tix kaux mawx kaux an heue:. 30 Kix kawx yuh awm: an, mai: sipaox ceu pa teem: hu: tawx ka kuad song: khankix, ka daux tawm: taix Banabax mai: Sawlux heue:.

Simin Ting 12

Pa giex Petrux laig daux thawng:

1 Yam an simiang khunhawkham Herut, nyeu taix tix son sang tuktiak pui ceucao tiblah. 2 Mai: nawh teei Yakop puxke: Yohan yum ka vaid heue:. 3 Mai: yam yaox nawh pa khaw: pa caw rhawm: pui Yudax khankix grawng: an, viang mawh Petrux kawx nawh baox giex heue:. Bawg yam an caw bawg yam singaix khaomun pa ang sau: susaix khankix heue:. 4 Yam nawh hoik teei Petrux, nawh sau: nawh daux thawng:, mai: tawx nawh ka pui naing kao: kaux liah, son sang kieh kix pau nawh, mai: nawh keud tix sang viex nawh lih ka pui khankix khaix hoik hoik poi Pasakha heue:. 5 Mawh kheu nan: kawn: laung Petrux ka daux thawng:, viang mawh kawx nan: pui ceucao khankix nied tix rawg bwan: ka Siyiex son nawh heue:. 6 Mai: yam Herut dex sang viex nawh lih, daux sawm: an Petrux it ka sinax pui naing ra: kaux, mai: hoik phyawk ka ceng ra: nyaing, mai: pui pa pau khankix ot sivoe siviex, mai: pau thawng: an heue:. 7 Mai: jhak heue:, kawncau Siyiex cie Simiang tix kaux cung liep nawh, mai: pa riang jhan: ka daux lawg thawng: an heue:. Mai: kawncau Siyiex an dieh paw: Petrux, mai: kieh nawh siduad ah nin:, "Nied tix kaoh heue:." Mai: kieh ceng an grhuah khaing: taix nawh heue:. 8 Mai: kawncau Siyiex ah nin: ka nawh, "Nhawt maox grawd nyoi maix, mai: ceep kiep maix heue:." Mai: nawh yuh nan:. Mai: kawncau Siyiex an baox ah nin: ka nawh, "Vhua: man: vhua: maix mai: hawt aux heue:." 9 Mai: nawh lih hawt hu: heue:. Mai: nawh ang tawng grawng: pa yuh kawncau Siyiex an mawh ceu pa mawh pa meh tete, viang mawh kawx nan: nawh ce: mawh yaox tix riang susai heue:. 10 Mai: khaix hoik luan kiex khaing: cub pui pa pau sivoe, mai: pui pa pau ra: cub tix cub, kiex hoek ka siviex rhiem: pa bleeh tix laig ka daux veng, mai: siviex an lak baoh nong: son kiex, mai: kiex lih hu: lawng krax tix nyaing, mai: dom: mawx dom: an kawncau Siyiex an gwieh hu: khaing: nawh heue:. 11 Yam Petrux doh rhawm: doh rhi: nawh ah nin:, "Yam in aux hoik tawng grawng: Simiang hoik ploi: kawncau Siyiex Tix hoek tix taoh aux khaing: tawm: taix Herut, mai: ceu pa pui Yudax khankix hoik keud khawm: uik tete heue:." 12 Mai: yam nawh hoik keud grawng: ceu an, nawh hoek ka nyiex Marix pa mawh miex Yohan pa ceukaux ru nawh mawh Makux, dee hoik khrawm: pui tom: nie paox tix, mai: rawg bwan: heue:. 13 Mai: yam nawh gleuh ka siviex brawk, nyawm bon: pa kaux Rode tix kaux hoek tix pawk. 14 Mai: yam tawng nawh mawh lox Petrux, nawh ang paoh siviex kah, kheu gauxrhawm: nawh, viang mawh nan: to: laig ka daux, mai: krai grawh grawng: Petrux cung ka sivoe siviex heue:. 15 Mai: kix ah nin: ka nawh, "Yhot maix." Viang mawh kawx nan:, nawh nied tix ah mawh tete heue:. Mai: kix ah, "Mawh kawncau Siyiex cie Petrux heue:." 16 Viang mawh nan: Petrux kawn: baox gleuh, mai: yam kix hoik paoh siviex, kix yaox nawh mai: daox deng: kah heue:. 17 Viang mawh nan:, nawh teei taix tix ne kix, nhie: kix paw nye:, mai: krai kix mhong: grawh grawng: Simiang hoik viex nawh lih khaing: daux thawng: yuh ka mawx heue:. Mai: nawh ah nin:, "Krai grawng: ceu in kix ka Yakop, mai: ka puxaik khankix heue:." Khaix an nawh lih hu:, mai: hu: tang: dah heue:. 18 Yam hoik bah riang praix, pui naing khankix lawh maw: ceeix ngie ang mawh, grawng: hoik mawh pa yuh ka mawx ka Petrux. 19 Khaix hoik sawg Herut Petrux mai: ang yaox nawh, nawh chawk cheng: grawng: an ka pui pa pau khankix, mai: tawx lox nhie: teei kix yum heue:. Khaix an nawh lih hu: khaing: meung Yudax, mai: hu: ka veng Kesarix, mai: ot tan: heue:.

Krax pa yum Herut

20 Yam an Herut kied song: rhawm: ka pui veng Turux mai: veng Sidom, mai: kix viex rhawm: tix mu: khrawm: paox tix hoek, mai: khaix hoik pon Balasatux, pa mawh kawncau pa khrien: khre: lawg dee it simiang khunhawkham kieh nawh mawh paoxgrawm kix, kix khyox khaw: son pa nhim:, kheu kix een: rhawm: tix ka haktiex khunhawkham an son pa ih pa un: heue:. 21 Ka daux tix singaix pa hoik ciak tix deuh, Herut ceep kraung ceep simiang, mai: ngawm piang dangngeung, mai: krai lox ka kix heue:. 22 Mai: pui khankix yo ah nin:, "Lox in mawh lox siyiex tix kaux, ang mawh lox pui heue:." 23 Mai: dom: mawx dom: an kawncau Siyiex cie Simiang tix kaux dieh nawh kah, kheu ang nawh tawx min: plakngai: ka Siyiex, mai: viag ih kaux nawh, mai: yum kheu heue:.

24 Viang mawh kawx nan: gumlox Siyiex haok hwan: mai: baox nie haoh nie hun: heue:.

25 Banabax mai: Sawlux deeh khaing: veng Yerusaliem, khaix hoik yuh kiex kaing pa teem: pa khan:, mai: kiex viex Yohan pa ceukau ru nawh mawh Makux ing: mai: tix heue:.

Simin Ting 13

Krax lai ling Pawlux tix sidiex bawg tix

1 Ka daux ceucao pa koe: ka daux veng Antiuk, koe: pui pa mawh caojhai:, mai: cao: gau, pa mawh Banabax, mai: Simeon pa kok mawh Nika. mai: Lukix pui meung Kurene, mai: Manaen pa hoik yuh tix mawh puxaik simiang Herut, mai: Sawlux heue:. 2 Yam kix kawn: tag krub Simiang mai: twah pa ih pa un:. Khwan: Singax Singeh ah nin:, "Gwieh tix een: Banabax mai: Sawlux, son kaing pa hoik kok Aux kiex yuh heue:." 3 Khaix kix hoik twah pa ih pa un: mai: rawg bwan:. mai: hoik deuh taix tix ka piang kiex. Kix ploi: kiex hu: heue:.

4 Mawh kheu Khwan: Singax Singeh ploi: kiex hu:. Kiex lih hu: ka veng Selukix, mai: kiex brug reu tan: hu: ka klawn: tiex Kuparux heue:. 5 Mai: yam ot kiex ka daux veng Salamix, kiex sidiex gau lox bwan: Siyiex ka daux nyiex sidiex pui Yudax khankix. Viang mawh Yohan kawx kiex koe: son cao: teem: cao: coi heue:. 6 Mai: khaix hoik lai ling kix ka daux klawn: tiex an khawm: uik, kix hoek ka veng Phapux mai: yaox cao: sibawk tix kaux, pa mawh cao: jhai: pa ang mawh ang meh, pa mawh pui Yudax, pa kaux Bayesux heue:. 7 Nawh ot tau mai: simiang Seragix Pawlux pa mawh pui pa lhak pa tawng. Simiang aux kok Banabax mai: Sawlux hoek ka tix, mai: sawg tix mhong: tix nghiet gumlox Siyiex heue:. 8 Viang mawh kawx nan: Eluma cao: sibawk an (mawh kheu toe: ceukaux nawh dee bleeh mawh nan: heue:.) kieh tie kix, mai: sawg tix kieh simiang an via khaing: krax yumrhawm: heue:. 9 Viang mawh nan: Sawlux, pa kok khawm: ceukaux Pawlux, naog ka Khwan: Singax Singeh mai: jeung: ngai: tix piang kaw an, 10 mai: ah nin:, "Pui pa naog mai: pa nieb pie nieb lhen:, mai: pa caox pa caig ku ceu ku cawng khawm: uik, kawn: phicaox eue:, maix pa mawh pa koeng ka pa rah pa see khawm: uik, maix tag ang naox, ceu pa yieh krax pa rah pa see Simiang lie? 11 Mai: yamin, jhak heue:, taix Simiang hoik koe: ka piang maix, mai: maix tag duk ngai: ang chix yaox singaix tix vong heue:." Mai: dom: mawx dom: an paiawm: mai: pa vhaik grhup piang nawh, mai: nawh vuvie tix sawg pui pa sang tok taix nawh heue:. 12 Yam simiang an yaox grawng: pa hoik yuh nan:, nawh yumrhawm: kheu daox deng: nawh ka lox sidiex lox gau Simiang heue:.

13 Pawlux mai: cub nawh brug reu kaoh khaing: veng Phapux mai: hoek ka veng Perage pa koe: ka daux meung Pampuli, mai: Yohan gwieh khaing: kiex tan: mai: deeh ing: ka veng Yerusaliem heue:. 14 Viang mawh kawx nan: kiex kaoh khaing: veng Perage, mai: hoek ka veng Antiuk ka daux meung Pisidix, mai: kiex laig ka daux nyiex sidiex singaix twah, mai: ngawm heue:. 15 Mai: khaix hoik phat lai been li mai: lai cao: jhai: khankix, pui giex kaing: nyiex sidiex an khankix, ploi: pui hu: ka kiex ah nin:, "Puxaik eue:, phan: pax koe: lox tix sidiex ka pui khankix tix ceu ceu, sidiex heue:." 16 Mai: Pawlux kaoh cung yuh kix yaox taix tix, mai: ah nin:,

"Pui Isarilax mai: pui pa lhat ka Siyiex khankix eue:, nghiet ha:. 17 Siyiex pui ceu Isarilax in, hoik laug tax du ex, mai: yaog pui khankix ting, yam mawh kix nyo ka daux haktiex meung Ejiptux mai: Nawh teei plawng: taix pa hoik yaog lhaong: tok kix lih khaing: tan: heue:. 18 Mai: son dex tipon: (40) num Nawh priex kix ka daux tiag awm: Keeng: pa chix eei: heue:. 19 Mai: khaix hoik yieh Nawh pui aliah ceu laux ka daux haktiex meung Khanan, Nawh tawx haktiex kix an ka kix, son sang mawh sin:, dex pon: yieh tiphwan: (450) num heue:. 20 Mai: khaix an Nawh tawx cao: prawng cao: ca: ka kix, tom: hoek ka cao: jhai: Samoelax heue:. 21 Mai: khaix an kix rawg kix mhaing: son simiang khunhawkham, mai: Siyiex tawx kix Sawlux kawn: Kisa pa mawh pui ceu Binyamen, son bawg yam tipon: (40) num heue:. 22 Mai: khaix hoik gah hoik tik nawh, Siyiex yaog Dawit tix kieh mawh simiang khunhawkham kix, pa hoik kham: Nawh mhai: sakse: ka ah nin:,

191'Aux hoik yaox Dawit pa mawh kawn: Yesie:, pui pa khaw: pa hawt rhawm: Aux, pa tag sang yuh alo Aux khawm: uik heue:.'

23 Ka daux simie ceucat pui an Siyiex hoik viex Yesux pa mawh Cao: Taoh ka pui Isarilax khankix awm: pa khaw: mai: lox mukheu heue:. 24 Ka: sang hoek Nawh Cao: Yohan hoik sidiex gau been baptis192 daux rawm:, pa dex pa dawd mai: krax doh keud doh sawn: ka phimap ka pui Isarilax khawm: uik heue:. 25 Yam kawn: tag yuh Yohan son sang naog pa yuh tix, nawh ah nin:, 'Pex ce: aux mawh pa yuh ka mawx? Aux ang mawh Kaw an. Viang mawh nan: jhak heue:, khaix aux tag sang hoek Tix Kaux, pie maox kiep caong Nawh ang aux keung: tix kah heue:.' 26 Puxaik khankix pa mawh kawn: ceucat Abraham, mai: pui ka daux pex pa lhat ka Siyiex eue:, gumlox bwan: grawng: krax pa taoh in hoik sipaox ka pex heue:. 27 Mawh kheu kix pa ot ka daux veng Yerusaliem, mai: simiang kix kheu kix pa ot ka daux veng Yerusaliem, mai: simiang kix khankix ang tawng Nawh Cao:, mai: kheu ang kix tawng lox pa hoik grux krai cao: jhai: khankix, pa phat ku singaix twah, kix kieh gumlox an kix naog, ka daux pa prawng pa ca: kix ka Nawh heue:. 28 Mai: viang kix ang yaox grawng: pa khaw: Nawh tix yum kawx, kix rawg nhie: simiang Pilat teei Nawh yum heue:. 29 Mai: khaix hoik yuh kix ku ceu khawm: uik naog, pa hoik tiem: tix deuh grawng: Nawh Cao:, kix teei Nawh lih khaing: khaox an, mai: een: Nawh ka daux simeeig heue:. 30 Viang mawh nan: Siyiex hoik kieh Nawh deeh kaoh im: khaing: krax yum heue:. 31 Mai: kix pa hoik haok tix hoek tau mai: Nawh, khaing: meung Galilie: ka veng Yerusaliem, hoik yaox Nawh tom: nie singaix, mai: yam in kix mawh pui pa kham: mhai: sakse: grawng: Nawh ka pui khankix heue:. 32 Mai: yiex viex lox gauxrhawm: gauxrhi: ka pex, pa dex pa dawd mai: lox mukheu pa hoik dawg tawx ka tax du ex. 33 Grawh grawng: Siyiex hoik kieh lox an naog ka kawn: praix ex, ka daux pa hoik kieh Nawh, Yesux deeh kaoh im:, awm: pa hoik tiem: tix deuh ka daux Lai Yaogyaw ka daux simin ra: ah nin:,

193'Maix mawh Kawn: simex Aux, Aux hoik kieh Maix keh ka daux singaix in heue:.'

34 Mai: grawng: Nawh hoik kieh Nawh Cao: deeh kaoh khaing: krax yum, son ang sang baox deeh hoek ka krax cux krax sium:, Nawh hoik ah nin:,

194'Aux tag tawx ka Maix bwanson: pa singax mai: pa kaux pa cong: cie Dawit heue:.'

35 Mawh kheu Nawh baox ah nin: ka daux Lai Yaogyaw tang: pheen:,

195'Mawh kheu Maix tag ang tawx tix kieh Kaw Pa Singax Singeh cie Maix sium: heue:.'

36 Kheu khaix Dawit hoik hawt yuh alo Siyiex ka daux bawg yam ju tix, nawh laig it, mai: deuh nawh tau mai: tax du nawh khankix, mai: nawh yaox krax cux krax sium: heue:. 37 Viang mawh kawx nan:, Kaw pa Siyiex hoik deeh kieh kaoh, ang yaox krax cux krax sium: heue:. 38 Mawh kheu nan: puxaik khankix eue:, kieh pex tawng grawh grawng: ceu pa sidiex pa gau in ka pex grawng: pa pluat pa ploi: phimap mawh ka daux Kaw an heue:. 39 Mai: pa yumrhawm: ka Nawh ku kaux daux pui, pon tix hoek krax rah kra: see khaing: ku ceu khawm: uik, pa pex ang tau tix pon rah pon see kheu lox lai been li Mose heue:. 40 Mawh kheu nan:, rien rhawm: tix, yuh ka mawx son ceu pa hoik krai daux lai cao: jhai:, tag ang sang hoek ka piang pex, pa ah nin:,

19641 'Jhak heue:, pex pa mawh pui ang nab ang yam khankix eue:, daox am: mai: laux leeing: heue:. Kheu Aux tag yuh kaing tix ceu daux bawg yam singaix ju pex. Kaing pa pex tag ang tau tix yumrhawm: kah, viang pui krai ka pex kawx heue:.'

42 Mai: yam lih hu: kiex, kix khyox kiex yuh ka mawx son sang baox deeh sidiex lox ceu in khankix, daux singaix twah hoek heue:. 43 Yam pui pa khrawm: ka daux nyiex dee sidiex an gwieh paoxtix, pui Yudax tom: nie, mai: khawm: pui pa laig been kix hawt Pawlux mai: Banabax. Mai: kiex sikah ka kix, nhie: kix ot kaux cong: daux bwanson: Siyiex heue:.

Pawlux deeh veeh tix sidiex pui tang: ceu tang: cat

44 Mai: yam hoek singaix twah khaix, pui dex khawm: veng khrawm: paoxtix son sang nghiet gumlox bwan: Siyiex heue:. 45 Viang mawh nan: yam yaox pui Yudax khankix pui haoh pui hun: khankix, kix naog krax bohrhawm: bohrhi:, mai: thiang: grawh grawng: ceu pa krai Pawlux khankix, mai: sa lao kah heue:. 46 Mai: Pawlux mai: Banabax viex rhawm: kua: sidiex gau ah nin:, "Tag lai sidiex gau gumlox bwan: Siyiex in ka pex phaoxka: heue:. Viang mawh kawx nan: kheu pex nyhot tix tik khaing: pex, mai: prawng ca: tokaux tix, mawh pa ang keung: tix pon ju leeing: ju leeing: phan:. Yiex tom: veeh ka pui tang: ceu tang: cat khankix heue:. 47 Mawh kheu Simiang hoik tawm: lox ka yiex ah nin:.

197'Aux hoik deuh Maix son sang mawh pa riang ka pui tang: ceu tang: cat khankix, yuh ka mawx son sang mawh Maix ceu pa taoh tom: sidah ghoik haktiex heue:."

48 Mai: yam pui tang: ceu tang: cat khankix mhong: lox an kix gauxrhawm: gauxrhi: mai: yaogyaw gumlox bwan: Siyiex. Mai: kix pa hoik ciak tix laug son sang pon ju leeing: ju leeing: phan: khawm: uik yumrhawm: heue:. 19 Mai: gumlox bwan: Simiang tah hu: daux praix an khawm: uik. 50 Viang mawh kawx nan: pui Yudax khankix, cheeik bon: pa chix nab chix yam ka Siyiex mai: pa ting min: plakngai: khankix, mai: pui pa ting pa lhaong: ka veng an khankix, kieh lih koe: krax tuktiak tukte: ka Pawlux mai: Banabax, mai: grheu: kiex lih khaing: haktiex kix heue:. 51 Viang mawh kawx nan: kiex khruah phawng: tiex khaing: caong tix son sang mawh khin: ka kix, mai: hu: hoek ka veng Ikawnix heue:. 52 Mai: kawncau khankix naog ka pa gauxrhawm: gauxrhi:, mai: ka Khwan: Singax Singeh heue:.

Simin Ting 14

Krax pa thiang: mai: pa rieb

1 Mai: ka daux veng Ikawnix kix khrawm: tix laig tau ka daux nyiex sidiex pui Yudax, mai: sidiex gau tom: pui haoh pui hun:, pa mawh pui Yudax mai: khawm: pui Helasax yumrhawm: heue:. 2 Viang mawh kawx nan: pui Yudax pa ang koe: krax cu krax nghiet khankix, cheeik rhawm: pui tang: ceu tang: cat khankix, mai: kieh kix caox caig ka puxaik khankix heue:. 3 Mawh kheu nan: kix ot tan: tom: rheung: mai: viex rhawm: kua: sidiex gau ka daux Simiang. Simiang kawx, kham: mhai: sakse: ka gumlox bwan: Nawh, kieh yuh mhai:, mai: ceu pa daox pa am:, ka taix kix heue:. 4 Viang mawh kawx nan: pui veng an ang khaw: ang caw paox tix, tiblah ot plak pui Yudax khankix, mai: tiblah ot plak kawncau pa ting heue:. 5 Mai: yam pui tang: ceu tang: cat mai: pui Yudax khawm: simiang giex kaing: kix khankix, sang khrawm: tix hu: son sang yuh ceu pa ang cee ang cak ka kawncau pa ting mai: dheem: kix ka simaox. 6 Mai: kix mhong: grawh grawng: an mai: to: hu: ka veng Lusatra mai: veng Derabe, mai: haktiex sivie sivheng: tan:, daux meung Lukawnix, 7 mai: kix sidiex gau lox bwan: gauxrhawm: gauxrhi: tan: heue:.

8 Mai: ka daux veng Lusatra koe: pui pa ngawm tan: tikaux, pa laux caong, pa hoik laux maung khaing: vaig miex tix, mai: pa ang sax hu: ka caong tix tix bawg kawx heue:. 9 Kaw an mhong: pa sidiex Pawlux heue:. Pawlux jeung: ngai: tix ka piang kaw an, mai: kheu yaox grawh grawng: nawh koe: krax yumrhawm: son sang kieh tix deeh mhawm:, 10 mai: kok lox sinum ah nin:, "Kaoh cung ka caong tix rah see heue:." Mai: kaw an jaloh tix kaoh mai: hu: ka caong tix heue:. 11 Mai: yam pui haoh pui hun: yaox ceu pa hoik yuh Pawlux, kix yo lox sinum ka lox meung Lukawnix ah nin:, "Siyiex khankix hoik lih hoek ka ex, yaung rieang kawn: pui heue:." 12 Mai: kix kok Banabax mawh "Zusa," mawh kheu Pawlux mawh pa nie lheu: sidiex, kix kok nawh mawh "Heumi" heue:. 13 Yam an cao: giex kaing: li Zusa, pa ot sivoe veng, viex moi mai: tai pa hoik taing: laklo: khankix, ka siviex, mai: koe: rhawm: tix sang tan lu tau mai: cub pui haoh pui hun: khankix heue:. 14 Viang mawh kawx nan: yam kawncau pa ting Banabax mai: Pawlux mhong: grawng: an, kiex riah kraung ceep tix, mai: hu: plab sinax cub pui haoh pui hun: khankix, kok yo, 15 mai: ah nin:, "Pui khankix eue:, pex lai yuh ceu in kix yuh ka mawx? Yiex kawx mawh kawn: pui, pa koe: ceu pa chix keud lawk pex, mai: viex ka pex lox gauxrhawm: gauxrhi:, yuh ka mawx son sang deeh tieh pex khaing: ceu pa giex going in kix, ka Siyiex pa im: ju, Kaw pa hoik yuh raoma:, mai: haktiex, mai: rawm: sigrit sigra:, mai: can pa koe: ka daux kix khawm: uik heue:. 16 Daux ju pa hoik luan khankix, Nawh hoik kieh ceu pui ku ceu khawm: uik, hawt yuh krax pa lak keud kix heue:. 17 Viang mawh nan: Nawh ang grham: tokaux Tix, tix ang koe: ceu pa kham: mhai: sakse:, kheu Nawh hoik yuh pa mhawm:, mai: tawx pex rawm: lhiex khaing: raoma:, mai: bawg yam pa piien: plix, kieh rhawm: pex sak ka pa ih pa un: mai: pa gauxrhawm: gauxrhi: heue:." 18 Mai: kiex ne raw cub pui haoh pui hun: khankix ka lox ceu in, yuh ka mawx son ang sang yuh krax tan krax lu ka kiex heue:.

19 Yam an pui Yudax khankix hoek khaing: veng Antiuk mai: veng Ikawnix, mai: khaix hoik nyaw glaw: kix mai: pon cub pui haoh, kix dheem: Pawlux ka simaox, mai: khheu: ce: kix nawh hoik yum, tom: reu: nawh lih khaing: veng an heue:. 20 Viang mawh kawx nan: yam kawncau khankix cung rob nawh, nawh kaoh cung mai: deeh laig ka daux veng heue:. Mai: singaix pasax nawh lih hu: khaing: tan:, tau mai: Banabax mai: hu: ka veng Derabe heue:. 21 Mai: yam kiex hoik sidiex gau lox bwan: gauxrhawm: gauxrhi: ka veng an, mai: hoik yuh kieh koe: kawncau mau soi: tom: nie, kiex deeh ing: ka veng Lusatra mai: ka veng Ikawnix, mai: ka veng Antiuk. 22 Mai: kieh rhawm: kawncau mau soi: khankix kaux cong:, mai: sidiex gau kix yuh ka mawx son kawn: sang ot ka daux krax yumrhawm: yumrhi: mai: krai ka kix yuh nin:, "Ex tag lai kham: geu: pa kharhawm: kharhi: tom: nie tix laig ka daux meung Siyiex heue:." 23 Mai: kiex laug tix teei pui bung: kaing: ceucao, ka daux ku ceucao son kix, mai: khaix kix hoik rawg bwan: mai: twah pa ih pa un:, kiex tawx pong kix ka Simiang pa hoik yumrhawm: kix kah heue:. 24 Mai: kiex hu: preeng: ka daux meung Pisidix, mai: hoek ka meung Pampuli. 25 Mai: khaix hoik sidiex gau kiex lox bwan: ka daux veng Perage, kiex lih hu: ka veng Attali, 26 mai: kiex brug reu hu: khaing: tan: ka veng Antiuk, ka dee hoik tawx hoik pong kiex ka bwanson: Siyiex, son kaing pa hoik yuh kiex heue:. 27 Mai: khaix hoik hoek kiex tan:, mai: hoik raug rum grum phroik tau mai: pui ceucao khawm: uik, kiex krai grawh grawng: ceu pa hoik yuh Siyiex tau mai: kiex ku ceu khawm: uik, mai: grawh grawng: hoik paoh Nawh siviex krax yumrhawm: ka pui tang: ceu tang: cat khankix heue:. 28 Mai: kiex ot tau mai: kawncau mau soi: khankix tan: rheung: nyao heue:.

Simin Ting 15

Krax kum: daux veng Yerusaliem

1 Mai: pui tiblah lih hoek khaing: meung Yudax mai: gau ka puxaik khankix ah nin:, "Phan: pex ang pat hak hawt been Mose, pex ang tau tix hoek krax taoh heue:." 2 Mai: khaix Pawlux mai: Banabax hoik thung: thiang: kix, mai: ang khaw: mai: kix ceeix ngie ang mawh, puxaik khankix laug tix ploi: Pawlux mai: Banabax mai: pui tang: kaux tiblah, son sang haok hu: ka veng Yerusaliem ka kawncau pa ting khankix mai: ka pui pa bung: kaing: ceucao khankix, ka grawng: ceu an heue:. 3 Mai: pui ceucao tawx kix ka krax tix baux, mai: kix hu: preeng: ka meung Phinit mai: khawm: meung Samarix, mai: krai grawng: pui tang: ceu tang: cat khankix hoik tieh tix ih li heue:. Mai: kix kieh puxaik khankix kied gauxrhawm: gauxrhi: kah heue:. 4 Lheu: khaing: an yam hoek ka veng Yerusaliem, kawncau pa ting khankix mai: pui pa bung: kaing: ceucao, mai: pui ceucao khankix caong rieb kix heue:. Kix kawx krai grawng: ceu pa hoik yuh Siyiex tau mai: kix ku ceu khawm: uik heue:. 5 Viang mawh kawx nan: pui tiblah daux cub Pharishie:, pa hoik yumrhawm: kaoh cung mai: ah nin:, "Tag lai pat hak kix, mai: tawm: nhie: kix priex tix hawt lox lai been li Mose heue:."

6 Mai: kawncau pa ting khankix, mai: pui pa bung: kaing: ceucao khankix khrawm: paox tix, son sang keud grawh grawng: an heue:. 7 Mai: khaix hoik chawk cheng: paoxtix tom: nie, Petrux kaoh cung mai: ah nin: ka kix,

"Puxaik khankix eue:, pex tawng grawh grawng: Siyiex hoik laug tix teei khaing: ka daux ex, daux yam nhaox nhaox, son sang kieh pui tang: ceu tang: cat khankix mhong: gumlox bwan: gauxrhawm: gauxrhi: khaing: daux jheeh aux, mai: yumrhawm: yumrhi: heue:. 8 Mai: Siyiex Kaw pa tawng rhawmrhi:, kham: mhai: sakse: son kix, mai: tawx Khwan: Singax Singeh ka kix, awm: pa hoik tawx Nawh ka ex heue:. 9 Mai: Nawh ang yuh tang: siyox sinax ex mai: kix, mai: yuh rhawm: kix singax singeh kheu krax yumrhawm: heue:. 10 Mawh kheu nan:, yamin, pex lai cheuk tix yaox Siyiex, son sang sau: pex iak ka piang ngawg kawncau mau soi: khankix, pa tax du ex, mai: ex kawx ang pon kham: tix vhak yuh ka mawx? 11 Viang mawh kawx nan: ex yumrhawm: grawng: sang hoek ex krax taoh ka daux bwanson: Simiang Yesux Khrit awm: kix heue:."

12 Mai: cub pui haoh pui hun: khawm: uik ang nye: kah, mai: nghiet lox krai Banabax mai: Pawlux grawng: mhai: mai: ceu pa daox pa am:, pa hoik yuh Siyiex sinax pui tang: ceu tang: cat ka daux kiex heue:.

Yakop krai pao: lox pa hoik but ka daux bang: kum:

13 Mai: khaix hoik ah kiex nan:, Yakop ah nin:, "Puxaik khankix eue:, nghiet lox aux liak, 14 Simon hoik krai grawh grawng: Siyiex hoik lai ling ka pui tang: ceu tang: cat phaoxka:, tix teei, pui tix ceu son ceukaux Tix heue:. 15 Mai: gumlox cao: jhai: khankix kawx, khaw: ka grawng: an, pa hoik tiem: tix deuh ah nin:,

19816 'Khaix ceu in khankix Aux tag sang deeh hoek, mai: deeh sum: nyiex gox Dawit pa hoik grhup hoik goh. Aux tag deeh sum: nyiex gox pa hoik laux an, mai: deeh kieh nawh jung heue:. 17 Yuh ka mawx son kawn: pui pa deuk khankix, tag sang sawg Simiang, mai: pui tang: ceu tang: cat khawm: uik, pa hoik kok ceukaux Aux ka piang kix heue:. 18 Simiang pa hoik kieh tawng ceu in khankix tom: didix, ah nin: heue:.'

19 Mawh kheu nan:, pa keud aux mawh nin:, ex ang khaw: tix lak lheut kix, ka daux pui tang: ceu tang: cat pa deeh tieh tix hoek ka Siyiex heue:. 20 Viang mawh kawx nan: ex khaw: tix tiem: lai ka kix, yuh ka mawx son kix tag ang dex ang teeh ka ceu pa hoik seeing: brai: kheu rieang rao mai: khaing: pa phit pa vao, mai: khaing: pa hoik rhawt ghok, mai: khaing: nham: heue:. 21 Grawh grawng: nawh tom: ju didix, Mose hoik koe: pui pa sidiex grawng: nawh ku veng, mai: phat lai nawh ka daux nyiex sidiex khankix ku singaix twah heue:."

22 Yam an kawncau pa ting khankix, mai: pui bung: kaing: ceucao, mai: pui ceucao khawm: uik, ce: mhawm: tix laug pui khaing: ka daux cub kix Yudax pa kok mawh Basabax, mai: Silax pa ao: min: plakngai: ka daux puxaik khankix, mai: ploi: kiex hu: ka veng Antiuk, tau mai: Pawlux mai: Banabax heue:. 23 Mai: kix viex lai pa yuh nin: hu: mai: kix, "Kawncau pa ting, khankix, mai: pui bung: kaing: ceucao khankix, mai: puxaik khankix, sipaox lai in son sang nawb hu: ka puxaik khankix pa mawh pui tang: ceu tang: cat, ka daux veng Antiuk, mai: ka meung Surix, mai: ka meung Kiliki heue:. 24 Mawh kheu ex hoik mhong: grawng: pui tiblah pa lih hu: khaing: ex, pa ang ex tie nhie: hu:, hoik lak lheut pex ka lox, mai: kieh rhawm: pex sung sang kah, 25 ex tom: ih rhawm: paox tix, mai: keud mhawm: tix laug pui mai: ploi: kiex hu: ka pex, tau mai: Banabax mai: Pawlux pa moh ex, 26 pa mawh pui pa hoik koe: rhawm: tix pon yum tang: ceukaux Simiang Yesux Khrit heue:. 27 Mawh kheu nin: ex tom: ploi: Yudax mai: Silax, pa tokaux kiex kawx, tag sang krai grawng: lox ceu in khankix ka jheeh tix heue:. 28 Mawh kheu Khwan: Singax Singeh, mai: khawm: ex, keud mhawm: tix ang deuh kraung pa lheu: cien, khaing: ceu in khankix pa phan: ang deuh ang doh pon. 29 Pa mawh pa ang pex khaw: tix dex tix teeh, ka ceu pa hoik tan hoik lu ka rieang rao, mai: khaing: nham:, mai: khaing: ceu pa hoik rhawt ghok, mai: khaing: pa phit pa vao. Phan: pex priex tokaux tix, mai: via khaing: ceu in khankix tag sang mhawm: son pex heue:. Kieh nyawm ot nyawm koe: liak."

30 Mawh kheu ploi: kix hu:, kix lih hu: ka veng Antiuk, mai: kieh pui khankix raug rum grum phroik, mai: kix tawx lai an kah heue:. 31 Mai: yam hoik phat kix lai an, kix gauxrhawm: gauxrhi:, kheu lox nyawm rhawm: an heue:. 32 Yudax mai: Silax, kheu tokaux kiex kawx mawh cao: jhai:, kiex gau puxaik khankix ka lox tom: nie, mai: kieh kix kaux cong: kah heue:. 33 Mai: khaix hoik ot kiex tan: tix vong, puxaik khankix deeh ploi: kiex ing: ka kix pa hoik ploi: kiex hoek nhim: mhawm: mhawm: heue:. 34 Viang mawh kawx nan: Silax koe: rhawm: tix kawn: ot tan: heue:. 35 Pawlux mai: Banabax kawn: ot ka daux veng Antiuk mai: sidiex gau lox bwan: Simiang, tau mai: pui tang: kaux tom: nie heue:.

Krax hu: sidiex Pawlux bawg ra:

36 Khaix an uik kub rheung: singaix, Pawlux ah nin: ka Banabax, "Hu: ax lai ling ka puxaik khankix pa ot ka daux veng ku veng, dee hoik sidiex ax lox bwan: Simiang, son sang yaox yuh kix ka mawx nieh." 37 Mai: Banabax koe: rhawm: tix sang viex Yohan pa kok mawh Makux hu: mai: kiex heue:. 38 Viang mawh kawx nan: Pawlux keud ang khaw: tix viex hu: mai: kiex, kaw pa hoik grham: mai: lih khaing: kiex ka daux meung Pampuli, mai: ang hu: mai: kiex dee yuh kaing heue:. 39 Mawh kheu grawng: an kiex ang khaw: paoxtix, mai: gwieh paoxtix tang: hu:, mai: Banabax viex Makux hu: mai: tix, mai: brug reu hu: ka klawn: tiex Kuparux heue:. 40 Viang mawh kawx nan: Pawlux laug tix teei Silax, mai: lih hu:, khaix puxaik khankix hoik tawx hoik pong ka bwanson: Simiang heue:. 41 Mai: nawh lai ling hu: ka meung Surix, mai: meung Kiliki, mai: kieh ceucao khankix kaux cong: heue:.

Simin Ting 16

Riang susai ka daux meung Makedonix

1 Mai: viang mawh ka veng Derabe mai: veng Lusatra kawx nawh hoek kah, mai: nawh yaox kawncau tix kaux tan:, pa kaux Timose, nawh mawh kawn: simex bon: Yudax pa yumrhawm:, viang mawh nan: keeing: nawh mawh pui Helasax heue:. 2 Nawh mawh pui pa yaw puxaik khankix pa ot ka daux veng Lusatra mai: veng Ikawnix kah heue:. 3 Pawlux koe: rhawm: tix sang viex nawh hu: tau mai: tix, mai: nawh teei tix pat hak nawh, kheu pui Yudax khankix, pa ot baux haktiex ankix, kheu kix khawm: uik hoik tawng grawng: keeing: nawh mawh pui Helasax heue:. 4 Mai: yam hu: lai ling kix daux veng khankix, kix tawx kix lox pa hoik tawm: kawncau pa ting khankix, mai: pui bung: kaing: ceucao khankix, pa ot ka daux veng Yerusaliem, son sang priex kix tix hawt heue:. 5 Mawh kheu nan: ceucao khankix baox kaux cong: ka daux krax yumrhawm:, mai: pui baox nie haoh nie hun: ku singaix heue:.

6 Mai: kix hu: lai ling ka daux meung Pharuki, mai: meung Kalatix, kheu Khwan: Singax Singeh hoik ne ang kieh kix sidiex gau lox bwan: ka daux meung Asix. 7 Mai: yam hoek kix ka meung Musi, mai: yam keud kix tix sang hu: ka meung Betuni, Khwan: Yesux ang kieh kix hu:. 8 Mai: kix via khaing: meung Musi, mai: lih hu: ka veng Troax heue:. 9 Yam pon sawm: Pawlux yaox riang susai pa yuh nin:, pui Makedonix cung mai: khyox khaw: nawh ah nin:, "Tiang tix hoek ka meung Makedonix, mai: teem: ex liak." 10 Mai: khaix hoik yaox nawh riang susai an, dom: mawx dom: an ex khru: khrieh sawg tix sang yaog tix hu: ka daux meung Makedonix, kheu ex yiag Siyiex hoik kok ex, son sang sidiex gau lox bwan: gauxrhawm: gauxrhi: ka kix heue:.

11 Mawh kheu nan: ex yaog tix brug reu hu: khaing: veng Troax, hu: see see ka klawn: tiex Samawtharit, mai: singaix pasax hoek ka veng Napawli heue:. 12 Mai: khaix baox hoik yaog khaing: tan: hoek ka veng Philippix, pa mawh veng tix veng ka daux meung Makedonix, pa mawh veng ting ka daux kien nyhawm: an, mawh pa hoik pang: pui meung Romax, mai: ex ot ka daux veng an tix vong heue:. 13 Mai: singaix twah ex lih hu: plakpraix khaing: siviex veng, ka praok rawm: klawng: ting tix klawng:, pa ce: ex koe: dee rawg bwan:, mai: ex ngawm mai: sidiex ka bon: pa khrawm: paox tix tan: heue:.

Plix lox bwan: pa liang tix plix haktiex Yurop

14 Mai: bon: tix kaux pa kaux Ludi, pa mawh pui coh kraung raoh klai, pa mawh pui veng Shwatire, pa krub ka Siyiex tix kaux, nghiet lox ex, Simiang paoh rhawm: bon: an, son sang koe: krax cu krax nghiet ka grawng: ceu pa sidiex gau Pawlux khankix heue:. 15 Mai: khaix kiex mai: pui khawm: nyiex kiex hoik baptis199, kiex khyox khaw: ka ex ah nin:, "Phan: pex yiag aux hoik yumrhawm: ka Simiang hoek tix ot daux nyiex aux heue:." Mai: kiex khin: ex hu: tan: heue:.

16 Mai: khaix an, yam kawn: tag hu: ex ka dee rawg bwan:, bon: siliex tix kaux pa koe: phi: jhai: si dauh ex, pa pon ngawh tawng tom: nie son cao: tix ka lox jhai: heue:. 17 Mai: nawh hawt khaix Pawlux mai: ex, yo ah nin:, "Pui in khankix mawh siliex Siyiex pa ting khaing: khawm: uik, pa sidiex gau ka pex grawng: krax pa sang hoek krax taoh heue:." 18 Mai: nawh yuh nan: tom: nie singaix, mai: kheu lulax rhawm: Pawlux kah, nawh tom: veeh tix ah nin: ka phi: an, "Aux nhie: maix daux ceukaux Yesux Khrit lih hu: khaing: daux nawh heue:." Mai: phi: an lih hu: nari dom: mawx dom: an heue:.

19 Viang mawh kawx nan: yam cao: nawh khankix yaox grawng: ang koe: dee sang keud pot jun pot mai: grawng: sang pon kix ngawh hoik grai: nai:, kix giex Pawlux mai: Silax, mai: reu: kiex hu: ka daux lah, sivoe simiang giex kaing: khankix heue:. 20 Mai: yam kix hoik viex kiex hu: ka simiang khankix, kix ah nin:, "Pui in kiex, pa mawh pui Yudax, kied laklheut veng ex heue:. 21 mai: sidiex gau been, pa ex pa mawh pui Romax ang koe: akhwang: tix rieb tix yuh heue:."

Pa kham: Pawlux mai: Silax krax sivied mai: laig daux thawng:

22 Mai: pui khawm: uik kaoh caox ka kiex, mai: simiang khankix riah tix tik kraung ceep kiex, mai: tawx lox son sang sivied kiex ka khaox heue:. 23 Mai: khaix hoik sivied kiex tom: nie taix, kix sau: kiex daux thawng:, mai: kix tawm: lox ka cao: giex kaing: thawng:, nhie: nawh jawg tix pau kiex mhawm: mhawm: heue:. 24 Kheu cao: giex kaing: thawng: an hoik pon lox tawm: yuh nan:, nawh tom: sau: kiex daux lawg thawng: plak daux, mai: sau: caong kiex daux gang: heue:. 25 Viang mawh kawx nan: yam dex hoek yam greung sawm:, Pawlux mai: Silax rawg bwan: mai: rhax lai yaogyaw ka Siyiex, mai: pui pa hoik laung daux thawng: nghiet lox kiex heue:. 26 Mai: dom: an tok kla: reem ting, tom: num: jaong nyiex thawng: yung: yiang: kah, mai: dom: mawx dom: an can siviex baoh khawm: uik, mai: gang: mai: ceng ku kaux daux pui lhua: heue:. 27 Yam siduad cao: giex kaing: thawng: khaing: it, mai: yaox siviex thawng: khankix hoik baoh, nawh lawd vaid tix mai: dex sang plaux tokaux tix yum, kheu ce: nawh pui pa hoik laung daux thawng: khankix hoik lih luan heue:. 28 Viang mawh kawx nan: Pawlux yo lox sinum ah nin:, "Paw vi yuh tokaux tix laux, kheu yix khawm: uik ot tin: heue:." 29 Mai: nawh rawg ngu mai: grhawm: tix laig ka daux, mai: nawh siyaung: kheu lhat tix, mai: gup sivoe Pawlux mai: Silax,

Cao: kaing: thawng: deeh tieh tix yumrhawm:

30 mai: nawh viex kiex lih plakpraix, mai: chawk ah nin:, "Simiang eue:, aux tag sang yuh ka mawx son sang hoek krax taoh?" 31 Mai: kiex deeh ah nin:, "Yumrhawm: ka Simiang Yesux Khrit, mai: maix khawm: pui nyiex maix, tag hoek krax taoh heue:." 32 Mai: kiex sidiex gau lox bwan: Simiang ka nawh, mai: khawm: pui pa ot ka daux nyiex nawh khawm: uik heue:. 33 Mai: nawh teei kiex daux sawm: an, nari dom: an, mai: khoek rhoi: khaix dee hoik sivied ka kiex, mai: tokaux nawh mai: khawm: pui nyiex nawh khawm: uik, baptis200 dom: mawx dom: an heue:. 34 Mai: nawh viex kiex haok ka daux nyiex tix, mai: khan: pa ih pa un: sivoe kiex, mai: kiex gauxrhawm: gauxrhi:, tau mai: khawm: pui nyiex nawh khawm: uik, kheu hoik yumrhawm: ka Siyiex heue:.

35 Yam hoek pon ngawb simiang khankix ploi: pui greem: kix hu: tix ah nin:, "Ploi: pui in kiex hu: heue:." 36 Mai: cao: giex kaing: thawng: an, krai grawng: lox an ka Pawlux ah nin:, "Simiang khankix hoik ploi: pui hoek tix kieh ploi: pax heue:. Mawh kheu nan:, yamin, lih hoek mai: hu: nhim: mhawm: mhawm: heue:." 37 Viang mawh kawx nan: Pawlux ah nin: ka pui pa ot greem: simiang khankix, "Kix hoik tap toi: yiex sivoe, yam ang bax prawng bax ca: pui pa mawh pui Romax, mai: sau: yiex ka daux thawng:, mai: yamin, kix lai briex mox tix ploi: yiex lie? Ang doh mawh nan:, viang mawh nan: kieh tokaux kix hoek tix teei yiex lih heue:." 38 Mai: pui pa ot greem: simiang khankix viex lox an hu: krai ka simiang khankix, mai: kix lhat kah yam kix mhong: mawh kiex pui Romax heue:. 39 Mai: kix hoek mai: khyox khaw: kiex, mai: khaix kix hoik viex kiex lih, kix mhaing: nhie: kiex lih hu: khaing: daux veng an heue:. 40 Mai: kiex lih hu: khaing: daux thawng: an, mai: laig ka daux nyiex Ludi, mai: khaix kiex hoik yaox puxaik khankix, mai: hoik kieh kix nyawm rhawm:, kiex lih hu: heue:.

Simin Ting 17

Pawlux hoek ka veng Thesalonix

1 Yam kiex hoik hu: preeng: veng Amphipawlix, mai: Apawlawni, kiex hoek ka veng Thesalonix, dee koe: nyiex sidiex pui Yudax tix lhang: heue:. 2 Mai: Pawlux laig ka kix, awm: sax koe: been nawh, mai: son loe: singaix twah, nawh kum: nawh jeeh mai: kix khaing: phuk lai sigang: khri:, 3 mai: plak jhi: grawh grawng: Cao: Khrit tag lai kham: geu:, mai: deeh kaoh khaing: krax yum, mai: nawh ah, "Yesux in pa sidiex aux ka pex mawh Khrit heue:." 4 Mai: kix tiblah koe: krax cu krax nghiet, mai: neuex tau mai: Pawlux mai: Silax, mai: khawm: pa mawh pui Helasax pa nab pa yam ka Siyiex tom: nie, mai: khawm: bon: pa ao: min: plakngai:, ceeix ngie ang mawh, kawx, koe: krax cu krax nghiet heue:. 5 Viang mawh kawx nan:, kheu pui Yudax khankix boh rhawm: kah, kix kok tix teei pui pa ang koe: bwanson:, pa nieb ot giex going, mai: khrawm: tix yuh cub, mai: kieh veng an lawh maw: heue:. Mai: kix yieh tix laig ka nyiex Yason, mai: sawg ka Pawlux mai: Silax, son sang viex kiex lih ka pui khankix heue:. 6 Mai: yam ang kix yaox kiex, kix reu: Yason mai: puxaik tiblah hu: sivoe simiang giex kaing: veng an khankix, mai: yo ah nin:, "Pui in pa hoik kieh haktiex, tieh cu ci:, dee in kawx hoik hoek heue:. 7 Mai: Yason hoik rieb tix teei kiex, mai: khinkix khawm: uik yuh pa ang khaw: ka lox tawm: simiang Kesa, mai: ah nin:, 'Koe: simiang khunhawkham tang: kaux tix kaux, pa mawh Yesux heue:.'" 8 Yam cub pui haoh pui hun: mai: simiang giex kaing: veng an khankix mhong: grawng: in khankix, kix sungsang rhawm: kah heue:. 9 Mai: khaix hoik teei kix ceu pa tang khaing: Yason mai: pa deuk khankix kix ploi: kix hu: heue:.

Pawlux hu: ka plak veng Berix

10 Mai: puxaik khankix ploi: Pawlux mai: Silax hu: dom: mawx dom: an yam ponsawm: ka veng Berix, yam kiex hoik hoek tan: kiex laig ka daux nyiex sidiex pui Yudax heue:. 11 Pui Yudax pa ot tan: lheu: mhawm: rhawm: khaing: kix pa ot ka daux veng Thesalonix, ka daux pa viex khawm: rhawm: tix, mai: rieb gumlox bwan:, sawg mai: tiag tix yaox ka daux phuk lai sigang: khri: ku singaix, son sang tawng: grawng: ceu in khankix mawh lie, ang mawh lie. 12 Mawh kheu nan: kix yumrhawm: tom: nie, mai: khawm: pui Helasax, pa mawh bon: pa ao: min: plakngai:, mai: simex kawx, yumrhawm: ceeix ngie ang mawh heue:. 13 Viang mawh kawx nan: yam pui Yudax pa ot ka daux veng Thesalonix khankix tawng grawh grawng: Pawlux hoik sidiex gau lox bwan: Siyiex ka daux veng Berix, dee an kawx kix hoek mai: cheeik kieh pui khankix lulax kah heue:. 14 Yam an dom: mawx dom: an puxaik khankix ploi: kieh Pawlux hu:, tom: sidaing: ka praok rawm: sigrit sigra:, viang mawh nan: Silax mai: Timose kawn: ot tan: heue:. 15 Viang mawh kawx nan: kix pa hu: tawx Pawlux, viex nawh hu: tom: hoek ka veng Athen, mai: khaix hoik pon kix lox tawm:, son sang tawx ka Silax mai: Timose, pa nhie: kiex nied tix hoek laung laung, kix yaog tix ing: heue:.

Pawlux ot ka veng Athen

16 Yam kawn: krox Pawlux son kiex ka veng Athen, mai: yaox rieang rao hoik naog daux veng an, nawh chu: rhawm: kah heue:. 17 Mawh kheu nan: nawh tom: kum: kawng: ka daux nyiex sidiex tau, mai: pui Yudax khankix, mai: ka pui pa chix nab chix yam ka Siyiex khankix, mai: ka kix pa sipub nawh ka daux lah ku singaix heue:. 18 Mai: pui Epikurux mai: khawm: pui Satawek, pa mawh pui ting pingnya cuyi ka grawng: been tiblah cha: ka Pawlux heue:. Mai: tiblah ah nin:, "Pui caung haoh jheeh in, sang ah pa yuh ka mawx?" Tang: kaux tiblah ah, "Nawh awm: pui pa sang sidiex gau grawng: siyiex tang: praix tang: meung heue:." Mawh kheu Pawlux sidiex gau grawng: Yesux mai: krax deeh kaoh im:, kix tom: ah nan: heue:. 19 Mai: kix teei nawh mai: viex nawh hoek ka gawng Are, mai: ah nin:, "Ex pon tix tawng grawng: lox gau pa khraox pa sidiex maix liak lie? 20 Kheu maix viex ceu pa ang ex sax tawng sax mhong: ka yhaok ex, mawh kheu nan: ex tom: simie tix tawng dee bleeh ceu in khankix heue:." 21 (Pui veng Athen mai: nyo pa ot ka dee an khawm: uik, ang yuh tid tix ka daux bawg yam pa koe: kix, lheu: khaing: pa krai, phan: ang mawh nan: pa nghiet grawh grawng: pa khraox tix ceu ceu heue:).

Pawlux sidiex ka sigreung gawng Are

22 Mai: Pawlux cung ka sigreung gawng Are, mai: sidiex ah nin:, "Pui veng Athen eue:, aux yaox grawh grawng: pex jiet chix nab chix yam ka siyiex khankix khawm: uik, ka grawng: ku ceu heue:. 23 Kheu yam lawng aux krax, aux bliex tix yaox ceu pa krub pex kah, mai: aux yaox khu: tix mu: pa hoik tiem: tix deuh lai ah nin: kah, 'SON SIYIEX PA ANG EX TAWNG.' Mawh kheu nan: pa ang pex tawng mai: krub kah, aux plak krai ka pex heue:. 24 Siyiex pa phan: pa yuh haktiex, mai: can pa koe: ka daux tan: khawm: uik, kheu mawh Nawh Simiang raoma: mai: haktiex, Nawh ang ot ka daux nyiex bwan: khankix pa hoik yuh ka taix. 25 Mai: ang pon khren: khre: ka Nawh ka taix pui, awm: mawh Nawh pa lo tix ceu ceu, kheu mawh Nawh pa tawx ju pa im:, mai: pa toek bhawm:, mai: ku ceu khawm: uik heue:. 26 Nawh hoik yuh kawn: pui ku ceu ka nham: tix mu: khaing:, son sang ot ka piang haktiex khawm: uik, mai: hoik ciak tix deuh bawg yam kix, mai: mee: dee sang ot kix, 27 yuh ka mawx son sang sawg kix Siyiex, mai: phan: kix sang pon tix pupi: hawt Nawh, pon tix yaox Nawh nieh, kheu Nawh ang singai khaing: ex ku kaux daux pui heue:. 28 Mawh kheu ka daux Nawh ex pon tix im: ju, mai: chix chuh, mai: pon tix mawh tix koe:, awm: pui chix kab chix kai: lox leng: pex tiblah hoik ah, 'Ex mawh ceucat Siyiex heue:.' 29 Mawh kheu mawh ex ceucat Siyiex, ex ang khaw: tix ce: Siyiex awm: khri:, phan: ang mawh nan: mau, phan: ang mawh nan: simaox, pa hoik keud kawn: pui tix saik tix yuh heue:. 30 Mawh kheu nan: daux bawg yam khankix yam daox yam ang pui tawng Siyiex bloi: kix, viang mawh nan: yamin Nawh tawx lox nhie: pui ku dah ku dee khawm: uik, doh keud doh sawn: ka phimap tix heue:. 31 Mawh kheu Nawh hoik ciak tix deuh tix singaix, yam Nawh tag sang prawng sang ca: haktiex in ka daux pa rah pa see, ka Pui tix kaux pa hoik laug Nawh, Nawh hoik plak pui khawm: uik yaox mhai: sakse: pa kaux, ka daux ceu pa Nawh hoik kieh Nawh Cao: deeh kaoh khaing: krax yum heue:."

32 Yam mhong: kix grawng: pui yum deeh kaoh im:, tiblah nie yuh pa ang cee ang cak, viang mawh nan: tang: kaux tiblah ah nin:, "Ex tag baox deeh loi tix nghiet grawh grawng: ceu in khankix tix bawg ha:." 33 Yam ah kix nan: Pawlux lih hu: khaing: sinax kix heue:. 34 Viang mawh kawx nan: pui tiblah kawb tokaux tix mai: nawh, mai: hoek krax yumrhawm: heue:. Pa neuex daux kix mawh Diyawnusi pa mawh simiang gawng Are tix kaux, mai: bon: pa kaux Damarix tix kaux, mai: pui tang: kaux kawx, ka mawh tau mai: kiex heue:.

Simin Ting 18

Pawlux ot ka veng Kawrinthux

1 Khaix ceu in khankix Pawlux lih hu: khaing: veng Athen, mai: hoek ka veng Kawrinthux heue:. 2 Mai: nawh yaox pui Yudax tix kaux pa kaux Akulax pa mawh ceu pui meung Pontux pa tag khraox hoek khaing: meung Itali, tau mai: moeng nawh Prisikilax, mawh kheu simiang Klawdi hoik tawx lox kieh pui Yudax lih khaing: veng Romax khawm: uik, mai: nawh hoek ka kiex heue:. 3 Mawh kheu ceu pa tang: yuh nawh tix ih, awm: kiex, nawh tom: ot tau mai: kiex mai: yuh kaing tau, kheu ceu pa yuh kiex mawh pa yuh nyiex gox man: heue:. 4 Mai: nawh kum: kawng: sidiex ka daux nyiex sidiex ku singaix twah, mai: jeeh nyaw pui Yudax mai: pui Helasax khankix heue:.

5 Yam Silax mai: Timose hoik lih hoek khaing: meung Makedonix, mai: hoek tan:, Pawlux nied tix coca: sidiex mai: kham: mhai: sakse: ka pui Yudax khankix grawng: Yesux mawh Khrit heue:. 6 Mai: yam kix sidien mai: salao, nawh teei tix sibluat kraung ceep tix, mai: ah nin: ka kix, "Kieh nham: pex koe: piang kaing: pex tiru, aux kienie singax heue:. Jah tom: yam in aux tag sang hu: ka pui tang: ceu tang: cat heue:." 7 Mai: nawh lih hu: khaing: tan: mai: laig ka daux nyiex pui tix kaux pa kaux Titux Yusatu, pa mawh pa krub ka Siyiex tix kaux, pa nyiex nawh koe: liep nyiex sidiex heue:. 8 Mai: Karipux pa mawh pui giex kaing: nyiex sidiex an, mai: khawm: pui nyiex nawh khawm: uik yumrhawm: ka Simiang heue:. Mai: pui veng Kawrinthux tom: nie pa mhong: yumrhawm: kah, mai: baptis201 ka rawm: heue:. 9 Mai: Simiang ah nin: ka Pawlux, yam ponsawm: ka daux riang susai, "Paw lhat paw graung, viang mawh nan: sidiex gau mai: paw sao paw siang, 10 kheu Aux ot tau mai: maix, pui tix kaux kawx ang pon sinyhup tix yuh maix laux, mawh kheu Aux koe: pui tom: nie ka daux veng in heue:." 11 Mai: nawh ot tan: tix num mai: liah khix, mai: sidiex gau gumlox bwan: Siyiex sinax kix heue:.

12 Viang mawh nan: yam Galio mawh simiang giex kaing: meung Akhayax, pui Yudax khankix khrawm: paox tix tau kaoh yuh ka Pawlux, mai: viex nawh hoek sivoe dee ngawm tix prawng tix ca:, 13 mai: ah nin:, "Pui in nawh nyaw glaw: ka pui, yuh ka mawx son sang krub ka Siyiex, ka daux ceu pa ang khaw: mai: lox lai been li heue:." 14 Viang mawh kawx nan: yam dex ang: Pawlux moing tix, Galio ah nin: ka pui Yudax khankix, "Pui Yudax khankix eue:, phan: grawng: in mawh pa ang khaw:, phan: ang mawh nan: pa caox pa caig, pa seeing: pa brai: tete, aux kawx khaw: tix nghiet lox pex heue:. 15 Viang mawh nan: phan: ceu an kix mawh grawng: pa chawk grawh grawng: gumlox khankix, mai: ceukaux khankix, mai: lox lai been li pex, aux ang rhawm: mawh cao: prawng ka grawng: ceu in khankix heue:." 16 Mai: nawh grheu: kix lih khaing: dee ngawm tix prawng tix ca: an heue:. 17 Mai: kix khawm: uik giex Sawtsani pui giex kaing: nyiex sidiex, mai: tap toi: nawh sivoe dee ngawm tix prawng tix ca: heue:. Mai: Galio ang keud tid tix ka grawng: ceu an khankix heue:.

18 Mai: khaix an Pawlux ot tan: tom: nie singaix nyao, mai: khaix hoik ah nawh lox gwieh ka puxaik khankix mai: nawh brug reu son sang hu: ka meung Surix, tau mai: Akulax mai: Prisikilax, nawh khlao: kaing: tix ka daux veng Kinkhre, kheu hoik koe: lox tiex lox tu nawh heue:. 19 Mai: kix hoek ka veng Efesux, mai: Pawlux prah Akulax mai: Prisikilax tan:, mai: tokaux nawh laig ka daux nyiex sidiex, mai: kum: kawng: jeeh nyaw mai: pui Yudax khankix heue:. 20 Mai: yam kix mhaing: nawh baox ot mai: kix liak ha:, nawh ang cu, 21 mai: nawh ah lox gwieh ka kix ah nin:, "Phan: Siyiex koe: alo aux tag sang baox deeh hoek ka pex sax." Khaix hoik ah nawh nan: nawh brug reu lih hu: khaing: veng Efesux heue:.

Daux krax lai ling Pawlux tix sidiex bawg loe:

22 Mai: yam hoik hoek nawh ka veng Kesarix, nawh haok hu: ka veng Yerusaliem mai: nawb ka ceucao tan:, mai: deeh lih hoek ka veng Antiuk heue:. 23 Mai: khaix hoik ot tan: tix vong, nawh lih hu:, mai: hu: preeng: ka daux haktiex meung Kalatix, mai: meung Pharuki, son sang kieh kawncau mau soi: kaux cong: khawm: uik heue:.

24 Pui Yudax tix kaux pa kaux Apawlux pa mawh ceu pui veng Alezandre, pa mawh pui pa jiet chix lai, hoek ka veng Efesux, mai: nawh kied tawng phuk lai sigang: khri: heue:. 25 Pui in hoik sax gau ka been krax Simiang, nawh koe: rhawm: rien: nied tix coca: tix sidiex gau ceu pa dex pa dawd mai: Yesux rah see mhawm: mhiem:, viang mawh nan: nawh tawng ngie krax baptis202 Yohan khaing:. 26 Mai: nawh viex rhawm: kua: jah tix sidiex gau ka daux nyiex sidiex. Viang mawh kawx nan: yam Prisikilax mai: Akulax mhong: lox nawh, kiex viex nawh ing:, mai: gau nawh kieh nawh baox nie lheu: tawng krax been li Siyiex rah see mhawm: mhiem: heue:. 27 Mai: yam koe: rhawm: nawh tix sang hu: ka meung Akhayax, puxaik khankix baox nie kieh nawh simie tix sang hu:, mai: tiem: lai ka puxaik khankix son sang rieb kix tix teei nawh, mai: yam hoik hoek nawh tan:, nawh teem: coi pui pa hoik yumrhawm: kheu bwanson: khankix tom: nie heue:. 28 Mawh kheu nawh pon tix thiang: pui Yudax ka daux siawp sibrawm, mai: nawh teei phuk lai sigang: khri:, mai: plak jhi: pui yaox sidawng: grawng: Yesux mawh Khrit heue:.

Simin Ting 19

Pawlux hoek tix vhi: ka veng Efesux

1 Mai: yam kawn: ot Apawlux ka daux veng Kawrinthux, khaix hoik lai ling Pawlux ka meung plak blaong nawh hoek ka veng Efesux, mai: yaox kawncau mau soi: tiblah tan:. 2 mai: nawh ah nin: ka kix, "Yam yumrhawm: pex, pex pon Khwan: Singax lie?" Mai: kix deeh ah nin: ka nawh, "Ang, viang mawh pie pa sang tawx Khwan: Singax Singeh kawx, ang ex sax pon tix mhong: heue:." 3 Mai: nawh baox chawk ah nin:, "Phan: mawh nan: pex baptis203 ka pa yuh ka mawx?" Mai: kix deeh ah nin:, "Ka krax baptis204 Yohan heue:." 4 Mai: Pawlux baox ah nin:, "Yohan baptis, ka krax baptis pa doh keud doh sawn: ka phimap, mai: krai ka pui khankix grawng: kix tag sang yumrhawm: ka Kaw pa tag sang hoek khaix nawh, pa ah nawh nan:, sang ah ka Yesux heue:." 5 Mai: yam kix hoik mhong: lox in, kix baptis ka daux ceukaux Simiang Yesux heue:. 6 Mai: yam Pawlux hoik deuh taix tix ka piang kix, Khwan: Singax Singeh lih hoek piang kix, mai: kix sikah ka lox pa tang: pa siyox khankix mai: krai lox jhai: heue:. 7 Mai: kix dex mawh pui kao: kaux ra: heue:.

8 Khaix an Pawlux laig ka daux nyiex sidiex, mai: viex rhawm: kua: sidiex gau son loe: khix, mai: kum: kawng: jeeh nyaw, ka ceu pa dex pa dawd mai: Meung Siyiex heue:. 9 Viang mawh kawx nan: yam kix tiblah kiien: rhawm: kiien: rhi:, mai: ang koe: krax cu krax nghiet, mai: ah pa caox pa caig ka grawng: Krax Been an, sivoe cup pui haoh pui hun: khankix, Pawlux lih hu: khaing: kix, mai: gwieh tix deuh kawncau mau soi: khankix, mai: kum: kawng: mai: kix ku singaix ka daux nyiex gau lai Turannu heue:. 10 Mai: kawn: ca: yuh nan: been ra: num, tom: pui pa ot ka daux meung Asix khawm: uik khawm: leeing: pon tix mhong: gumlox bwan: Simiang, pa mawh pui Yudax mai: khawm: pui Helasax heue:.

Mhai: pa daox pa am: daux veng Efesux

11 Mai: Siyiex yuh mhai: ceu pa daox pa am: pa lheu: tang: ka tawm: taix Pawlux, 12 tom: kix viex man: kawt, phan: ang mawh nan: man: klieb khaing: tokaux nawh, ka pui pa saux pa ngia, mai: jhawm: saux jhawm: ngia kix grai:, mai: phi: caox khankix kawx lih hu: heue:. 13 Viang mawh nan: pui Yudax pa mawh pui vung viang praix tiblah, pa mawh pui grheu: phicaox, ah tix yaox ceukaux Simiang Yesux ka piang kix pa laig phicaox ah nin:, "Aux nhie: maix lih ka daux Yesux, Kaw pa sidiex gau Pawlux heue:." 14 Kawn: simex cao: giex kaing: li pa ting pa mawh pui Yudax, pa kaux Sakeva, aliah kaux kawx yuh nan:. 15 Mai: phi: caox deeh pawk lox ah nin: ka kix, "Yesux aux uik tawng, mai: Pawlux kawx aux tawng mhawm: mhawm:, viang mawh nan: pex mawh mawx?" 16 Mai: pui pa laig phi: caox phi: caig an phoh ka piang kix ra: kaux, mai: pex kiex khawm: ra: kaux, tom: sidah kiex to: lih khaing: nyiex kax kaong:, mai: saux mat tix heue:. 17 Mai: pui khawm: uik pon tix tawng grawh grawng: in, khawm: pui Yudax mai: pui Helasax pa ot ka daux veng Efesux, mai: kix khawm: uik kied lhat kied graung kah, mai: ceukaux Simiang Yesux nied tix ting lhaong: heue:. 18 Mai: pui pa hoik yumrhawm: tom: nie kawx, hoek tix krai doh phimap, mai: ceu pa hoik yuh kix heue:. 19 Mai: kix ceeix ngie ang mawh pa yuh sibawk simeed, khrawm: tix viex phuk lai kix khankix gleeing ka ngu sivoe pui khawm: uik, mai: kix simin sawn: tix yaox ngawh lai an khankix, mai: yaox grawng: caw mau phwan: mheen: bliah heue:. 20 Mawh kheu nan: gumlox bwan: Simiang nied tix haok hwan: mai: pex hu: heue:.

21 Khaix hoik mawh ceu in khankix, Pawlux keud tix sang hu: ka daux rhawm: tix, preeng: ka meung Makedonix mai: meung Akhayax, yam hu: nawh ka veng Yerusaliem. Mai: nawh ah nin:, "Yam hoik hoek aux tan:, viang mawh veng Romax kawx aux tag lai yaox kah heue:." 22 Mai: khaix hoik ploi: pui ra: kaux hu: ka daux meung Makedonix khaing: ka daux pui pa khrien: khre: ka nawh, pa mawh Timose mai: Erattu, tokaux nawh kawn: ot ka daux meung Asix tix vong heue:.

23 Mai: daux bawg yam an koe: krax lawh maw: cuci: ceeix ngie ang mawh ka grawng: Krax Been an. 24 Mawh kheu pui tix kaux, pa kaux Demetri, pa mawh pui chix yuh kraung mau, pa yuh nyiex bwan: Atemi ka mau, pa pon kaing ceeix ngie ang mawh, son pui pa yuh mau khankix heue:. 25 Mai: nawh khrawm: kix tau, mai: pui pa yuh kaing awm: an khankix, mai: ah nin: ka kix, "Pui khankix eue:, pex tawng ex pon tix mi tix koe: kheu kaing ceu in heue:. 26 Mai: pex yaox mai: mhong: grawh grawng: ang mawh ngie ka daux veng Efesux, viang mawh nan: khawm: meung Asix kawx dex khawm: uik, Pawlux in hoik nyaw glaw: mai: kieh pui tom: nie tieh, kheu nawh dhua: siyiex pa yuh ka taix ang koe: heue:. 27 Mai: koe: dee lhat grawng: kaing ceu pa yuh ex in tag hoek krax laux min: plakngai: ngie ang mawh, viang mawh nan:, viang nyiex bwan: yiex siyiex Atemi pa ting kawx tag hoek krax ang nab ang yam, mai: pa mhawm: grang nawh cao: pa krub pui meung Asix khawm: uik, mai: pui haktiex kah, koe: dee lhat dee khi: grawng: sang hoek krax laux heue:." 28 Mai: yam mhong: kix grawng: ceu in, kix naog krax songrhawm: songrhi:, mai: kok yo ah nin:, "Atemi cie pui Efesux mawh pa ting pa lhaong: heue:." 29 Mai: veng an naog krax sung sang lulax, mai: kix ih rhawm: paox tix plab tix laig tau, ka nyiex dee khrawm: pui tix jhak krax gauxrhawm:, mai: giex ka Kayux mai: Arittakhux, pui meung Makedonix, pa mawh paox pa hu: krax tau mai: Pawlux heue:. 30 Yam Pawlux koe: rhawm: tix sang laig hu: ka pui khankix, kawncau mau soi: khankix ang kieh nawh hu: heue:. 31 Mai: simiang meung Asix tiblah kawx, pa mawh paox mawh pie Pawlux, ploi: pui hu: khyox khaw: nhie: nawh paw hu: ka daux nyiex dee khrawm: pui tix jhak krax gauxrhawm: heue:. 32 Mawh kheu nan: tiblah kok tix ceu, mai: tang: kaux tiblah kok tang: ceu, kheu cub pui pa khrawm: tix tan: sung sang lulax, mai: pui plak nie ang tawng grawng: kix hoik khrawm: paox tix tan: ka grawh grawng: yuh ka mawx heue:. 33 Mai: kix viex Alezandre lih khaing: daux cub pui haoh pui hun: an, mawh pui Yudax pa nyheun: nawh hu: sivoe kix heue:. Mai: Alezandre yuh kix yaox taix tix, mai: keud tix sang krai lox peeik map ka pui khankix. 34 Viang mawh nan: yam kix tawng grawng: mawh nawh pui Yudax, kix khawm: uik kok yo lox tix mu:,dex ra: nari tix ah nin:, "Atemi cie pui Efesux mawh pa ting pa lhaong: heue:." 35 Mai: yam cao: tiem: lai veng an hoik kieh cub pui khawm: uik yien: yawg tix, nawh ah nin:, "Pui veng Efesux eue:, koe: kaux pui mawx pa ang tawng grawng: veng pui Efesux in, mawh cao: pa priex nyiex bwan: Atemi pa ting pa lhaong:, mai: rieang rao pa hoik cod khaing: Cusa? 36 Mawh kheu grawng: in mawh ceu pa ang pon tix thiang:, pex khaw: tix yien: yawg tix, mai: ang khaw: tix nieb yuh tix ceu kawx heue:. 37 Mawh kheu pex hoik viex pui in kiex tin:, pa ang mawh pui briex ka nyiex bwan: khankix, viang mawh ka yiex siyiex ex kawx ang mawh pui sa pui lao heue:. 38 Mawh kheu nan: phan: Demetri, mai: pui pa yuh kraung mau tau mai: nawh, koe: see: koe: lox ka pui tix kaux kaux, nyiex dee prawng dee ca: hoik paoh, mai: simiang kawx koe: heue:. Kieh kix deuh phimap ka paox tix tan:. 39 Viang mawh nan: phan: pex baox koe: lox koe: see: tang: ceu tang: cawng, tag lai prawng dud, ka daux cub cao: prawng, pa khaw: tix prawng heue:. 40 Mawh kheu pa mawh pa lawh cuci: singaix, ex koe: dee lhat grawng: sang deuh phimap ka piang ex, kheu ang koe: grawh koe: grawng:, mai: ex ang koe: lox tix sang krai ka grawng: ceu pa ang khaw: ang caw in tix ceu kawx heue:." 41 Mai: khaix hoik ah nawh nan: nawh ploi: cub pui pa prom tix tan: heue:.

Simin Ting 20

Pawlux sidiex ka daux veng Makedonix mai: meung Helasax

1 Khaix hoik yien: ceu pa maw: lawh cuci: an, Pawlux kok kawncau mau soi: khankix, mai: khaix hoik gau kix, nawh grham: kix mai: lih hu: ka daux meung Makedonix heue:. 2 Mai: khaix hoik hu: lai ling nawh preeng: ka daux haktiex baux an khankix, mai: khaix hoik sidiex gau kix tom: nie, nawh hoek ka meung Helasax heue:. 3 Mai: khaix hoik ot nawh tan: loe: khix, yam nawh dex sang brug reu hu: ka meung Surix, kheu pui Yudax keud grawng: tix sang yuh pa caox ka nawh, nawh tom: keud tix sang deeh ing: preeng: ka meung Makedonix heue:. 4 Mai: Sopatarux, kawn: simex Purux, pa mawh pui veng Berix, mai: Arittakhux, mai: Sekhuntux, pa mawh pui veng Thesalonix, mai: Kayux pui veng Derabe, mai: Timose, mai: Tukhix, mai: Trawphim pui meung Asix, hu: tau mai: Pawlux tom: hoek meung Asix heue:. 5 Pui an khankix hoik hu: sivoe mai: krox ex ka daux veng Troax. 6 Mai: ex brug reu hu: khaing: veng Philippix, khaix singaix khaomun pa ang sau: susaix khankix, mai: khaix phwan: singaix ex hoek ka kix ka veng Troax, mai: ex ot tan: aliah singaix heue:.

7 Daux aliah singaix singaix tix, yam hoik khrawm: ex paox tix song sang sivit khaomun. Pawlux sidiex gau kix, kheu ce: tix sang yaog tix hu: pa sax, nawh sidiex kix tom: hoek greung sawm: heue:. 8 Mai: koe: kawkngu tom: nie daux lawg plak piang ka dee khrawm: ex paox tix tan: heue:. 9 Mai: pui awn: ju tixkaux pa kaux Utukhux ngawm ka diang siviex iak, mai: laig it tix, yam nie baox sidiex Pawlux tom: rheung:, kaw an lhiak it, mai: rau khaing: dee koe: loe: thaix tan:, yam yaog tix kliien, nawh hoik yum heue:. 10 Mai: Pawlux lih hu:, mai: gup ka piang nawh, mai: kawm nawh ah nin:, "Pex paw maw: paw lawh, kheu ju nawh kawn: koe: daux nawh heue:." 11 Mai: khaix hoik deeh haok nawh mai: hoik sivit tix ih khaomun, mai: sikah mai: kix tom: rheung: nyao, uik hoek tom: yam riang praix, mai: nawh lih hu: heue:. 12 Mai: kix viex kawn: nyawm pa hoik im: an hoek, mai: koe: krax nyawm rhawm: kheu, ceeix ngie ang mawh heue:.

Brug reu hu: ka veng Milet

13 Mai: ex hu: ka reu sivoe mai: brug hu: ka veng Asux, mai: keud tix sang rieb Pawlux laig daux reu tan: mawh kheu hoik bak nawh nan:. 14 Mai: yam nawh sidauh ex ka veng Asux, ex rieb nawh laig daux reu, mai: hu: hoek ka veng Mitulen heue:. 15 Mai: ex brug reu hu: khaing: tan:, mai: singaix pasax ex hoek sidieb klawn: tiex Khiux, mai: khaix an tix singaix ex hoek ka klawn: tiex Samox, mai: paung liep klawn: tiex Trawkuli, mai: khaix an tix singaix ex hoek ka veng Milet heue:. 16 Mawh kheu Pawlux keud tix sang brug reu via khaing: veng Efesux, yuh ka mawx son ang nawh lai uik bawg yam ka daux meung Asix, kheu nawh nied tix hu: ka veng Yerusaliem, yuh ka mawx son sang pon tix ot tan: singaix poi Pientekote, phan: chix tix heue:.

Pawlux hu: ka veng Efesux

17 Nawh ploi: pui khaing: veng Milet tix hu: kok pui bung: kaing: ceucao veng Efesux khankix hoek ka nawh heue:. 18 Mai: yam hoek kix ka nawh, nawh ah nin: ka kix,

"Tokaux pex hoik tawng, jah tom: singaix, yam dig caong aux ka meung Asix, aux lawk ot mai: pex awm: pa yuh ka mawx jheeng: jheeng:. 19 Mai: grawh grawng: aux hoik viex rhawm: awn: rhawm: tiem, mai: jauh rawm: ngai: tix yuh son Simiang, kheu ceu pa cheuk pa nyaw pa hoik kham: geu: aux ka grawng: pa caox pa pui Yudax khankix hoik keud tix yuh ka aux, 20 mai: grawh grawng: pa ang aux lhat krai ka pex grawng: pa koe: bwanson: ku ceu, mai: gau ka pex sivoe pui, mai: khawm: tix nyiex hoik tix nyiex, 21 mai: kham: mhai: sakse: ka pui Yudax khankix, mai: ka pui Helasax khankix grawng: ceu pa doh keud doh sawn: ka phimap tix plak Siyiex, mai: krax yumrhawm: plak Simiang ex Yesux Khrit heue:. 22 Mai: jhak heue:, yamin, aux hu: ka daux pa hoik phyawk Khwan: ka veng Yerusaliem, mai: ang tawng grawh grawng: ceu pa sang hoek ka piang aux tan:, 23 lheu: khaing: pa kham: Khwan: Singax Singeh mhai: sakse: ka aux ka daux ku veng, mai: krai aux grawng: pa phyawk mai: pa kharhawm: kharhi: krox son aux heue:. 24 Viang mawh kawx nan:, nyawk ka mawh ju aux, ang aux lai lhawk ka ju aux, yuh ka mawx son sang pon yuh aux tom: hoik, kaing sidiex gau pa hoik pon aux khaing: Simiang Yesux, son sang pon tix kham: mhai: sakse: grawh grawng: lox bwan: gauxrhawm: gauxrhi: pa dex pa dawd mai: bwanson: Siyiex heue:. 25 Mai: jhak heue:, yam in aux tawng grawng: pex khawm: uik, pa hoik hu: lai ling aux sinax tix sidiex gau, grawh grawng: meung Siyiex, tag ang lai baox yaox pakngai: aux heue:. 26 Mawh kheu nan: aux tom: kham: mhai: sakse: ka pex singaix, grawng: singax singeh aux khaing: nham: pui khawm: uik heue:. 27 Grawh grawng: nawh, ang aux sax lhat krai lox tawm: jhawm: krai Siyiex khawm: uik ka pex heue:. 28 Mawh kheu nan: rien rhawm: ka tokaux tix, mai: ka cub yung: khawm: uik, pa Khwan: Singax Singeh hoik kieh pex mawh cao: bung: cao: kia:, son sang tawx ceucao sawm: pa hoik liag Simiang ka nham: tokaux Tix heue:. 29 Aux tawng khaix hoik lih hu: aux, grawng: soxla pa caox khankix tag laig ka sinax pex, mai: tag ang deuh cub yung:, 30 mai: pui tiblah tag sang kaoh khaing: ka daux pex, mai: krai grawng: ceu pa phit pa lud, yuh ka mawx son sang bluh kawncau mau soi: khankix hawt khaix tokaux tix heue:. 31 Mawh kheu nan: pex pau tix jhak, mai: doh keud doh sawn: grawh grawng: son loe: num khawm: yam ponngaix, ponsawm:, aux ang laux ang lee: tix, jauh rawm: ngai: mai: sidiex gau ka ku kaux daux pui heue:. 32 Mai: puxaik khankix eue:, yam in aux tawx pong pex ka Siyiex, mai: ka gumlox bwanson: Nawh, pa chix kieh pex ting lhaong:, mai: tawx sin: ka pex, ka sinax kix pa singax singeh khawm: uik heue:. 33 Mai: aux ang sax ghoing: ka mau, ka khri:, phan: ang mawh nan: ka kraung ceep pui tix kaux kawx heue:. 34 Tokaux pex kawx hoik tawng grawng: taix aux in, hoik yuh tix pon ceu pa lo aux, mai: kix pa ot tau mai: aux khankix heue:. 35 Ka daux ku ceu khawm: uik aux hoik tawx pex ceu pa hawt jawh tix yuh, yuh ka mawx son sang yuh pex kaing, mai: khaw: tix teem: ka pui pa iak riang iak rao khankix, mai: son sang doh keud ka lox Simiang Yesux, pa hoik ah tokaux Nawh nin:, 'Ceu pa tawx lheu: ting bwanson: khaing: ceu pa pon heue:.'"

36 Mai: khaix hoik ah nawh nan:, nawh grux ngawng mai: rawg bwan: tau mai: kix khawm: uik heue:. 37 Mai: kix khawm: uik nied tix yiem mai: kawm ngawg nawh mai: ngheut nawh, 38 mai: kix nie lheu: khirhawm: kheu lox pa hoik ah nawh grawng: kix tag ang lai baox yaox pakngai: nawh, mai: kix viex tix hu: tawx nawh ka reu heue:.

Simin Ting 21

Yaog tix hu: khaing: veng Milet

1 Mai: khaix ex hoik pon breeng: tix gwieh khaing: kix, ex brug reu hu: ka klawn: tiex Kawsax rah see, mai: singaix pa sax hoek ka klawn: tiex Rawdax, mai: yaog khaing: tan: hoek ka veng Patarax heue:. 2 Mai: kheu yaox ex reu pa sang hu: ka meung Phinit, ex laig ka reu an mai: baox brug hu: heue:. 3 Mai: yam ex hoek dee pon yaox klawn: tiex Kuparux, ex grham: klawn: tiex an plak khawn: gwiex, mai: brug reu hu: ka meung Surix. mai: paung ka veng Turux, mawh kheu sang teei kraung lih khaing: daux reu an tan: heue:. 4 Mai: khaix hoik sawg ex tix yaox kawncau mau soi: khankix, ex ot tan: aliah singaix, mai: kix ne Pawlux ka daux Khwan: yuh ka mawx son ang nawh sang hu: ka veng Yerusaliem heue:. 5 Yam hoik naog singaix ex khankix tan:, ex lih hu: mai: kawncau mau soi: khankix, khawm: moeng khawm: kawn: kix khawm: uik, hu: tawx ex tom: hoek plakpraix veng, mai: ex grux ngawng tix ka caong raog tan:, mai: rawg bwan:, mai: ah lox gwieh ka paox tix tan: heue:. 6 Mai: ex haok ka piang reu mai: kix deeh ing: ka nyiex kix heue:.

7 Mai: khaix ex hoik sidah brug reu hoek khaing: veng Turux mai: hoek ka veng Patalemie:, ex nawb bwan: ka puxaik khankix mai: ot tan: tix singaix heue:. 8 Singaix pasax ex lih hu: mai: hoek ka veng Kesarix, mai: laig ka daux nyiex Philipux, pa mawh cao: sidiex, pa mawh tix kaux ka daux kix aliah kaux, mai: ex ot tau mai: nawh heue:. 9 Pui in koe: kawnbon: pa mawh bon: krih pon: kaux pa chix krai lox jhai: heue:. 10 Yam kawn: ot ex tan: singaix tiblah, cao: jhai: tix kaux, pa kaux Akabu lih hoek khaing: meung Yudax, 11 mai: hoek ka ex, mai: nawh teei maox rhawt nyoi Pawlux, mai: phyawk caong phyawk taix tokaux tix kah, mai: ah nin:, "Khwan: Singax Singeh ah ceu in, 'Pui pa mawh cao: maox rhawt nyoi in, pui Yudax khankix tag phyawk awm: in ka daux veng Yerusaliem, mai: teei tix tawx nawh ka daux tawm: taix pui tang: ceu tang: cat khankix heue:.'" 12 Mai: yam hoik mhong: ex lox ceu in, ex mai: khawm: pui pa ot dee an khyox khaw: ka nawh son ang nawh sang haok hu: ka veng Yerusaliem heue:. 13 Yam an Pawlux deeh pawk ah nin:, "Yuh ka mawx pex lai yiem mai: kieh rhawm: aux laux kah? Mawh kheu aux hoik rien tix pon kham: geu: pa phyawk ngie ang mawh, viang mawh phan: tag lai yum son ceukaux Simiang Yesux ka veng Yerusaliem kawx pon tix heue:." 14 Mai: yam ang nawh nghiet lox nyaw lox glaw:, ex glaik tix ah nin:, "Kieh mawh alo pa khaw: rhawm: Simiang heue:."

Pawlux haok ka veng Yerusaliem

15 Mai: khaix singaix inkix, ex khre: kraung tix mai: haok hu: ka veng Yerusaliem heue:. 16 Viang mawh kawncau mau soi: khaing: veng Kesarix tiblah kawx hu: mai: ex, mai: tawx ex ka Manason pui Kuparu, pa hoik dawg mawh kawncau, son sang tum: ex tau mai: nawh heue:.

17 Mai: yam hoek ex ka veng Yerusaliem, puxaik khankix gauxrhawm: mai: rieb tix teei ex heue:. 18 Mai: yam hoek singaix pasax Pawlux laig tau mai: ex ka nyiex Yakop, mai: pui bung: kaing: ceucao khawm: uik kawx ot tan: heue:. 19 Mai: khaix Pawlux hoik nawb bwan: ka kix, nawh krai grawh grawng: tix ceu hoik tix ceu pa hoik yuh Siyiex ka sinax pui tang: ceu tang: cat, ka daux kaing sidiex pa hoik yuh nawh heue:. 20 Mai: kix, yam kix hoik mhong: grawng: an, yaogyaw Siyiex, mai: ah nin: ka nawh, "Puxaik eue:, maix tawng grawh grawng: pui pa yumrhawm: ka daux pui Yudax koe: miex mheen: miex rheng:, mai: kix khawm: uik mawh pa nied tix hawt twah lox lai been li. 21 Mai: pui hoik krai kix mhong: grawh grawng: maix, grawng: sidiex maix ka pui Yudax khawm: uik, pa ot ka sinax pui tang: ceu tang: cat, son sang tik ka Mose, mai: nhie: kix paw pat hak kawnpraix kix, mai: viang mawh been khankix kawx nhie: paw hawt heue:. 22 Mawh kheu in khaw: tix yuh ka mawx? Kix tee: sang mhong: grawng: hoek maix tete heue:. 23 Mawh kheu nan: yuh awm: pa krai ex ka maix. Ex koe: pui pon: kaux tin: pa ot greem: lox tiex lox tu, 24 teei kix, mai: hu: yuh kieh tokaux maix singax tau mai: kix, mai: tawx ngawh son kix, yuh ka mawx son sang pon khlao: kaing: kix, phan: yuh nan: khawm: uik tag pon tix tawng, grawng: lox pa hoik mhong: kix grawh grawng: maix, ang mawh pa mawh pa meh, mai: grawng: tokaux maix kawx, twah klaung: mai: priex tix hawt lox lai been li heue:. 25 Viang mawh nan: ex hoik tiem: lai ka pui tang: ceu tang: cat pa hoik yumrhawm: khankix, prawng ca: tawx nhie: kix paw dex paw teeh ka rieang rao, mai: khaing: nham:, mai: khaing: ceu pa hoik rhawt ghok mai: khaing: pa phit pa vao heue:." 26 Singaix pasax Pawlux teei pui an kix, mai: yuh tix kieh tokaux tix singax tau mai: kix, mai: laig ka daux nyiex bwan:, mai: krai grawh grawng: hoik naog singaix pa kieh singax khankix, tom: hoik tan lu son kix ku kaux daux pui heue:.

Pawlux kham: krax pa giex ka daux nyiex bwan:

27 Mai: yam hoik dex naog aliah singaix an, pui Yudax khankix pa kaoh khaing: meung Asix, yaox Pawlux ka daux nyiex bwan:, cheeik ka cub pui haoh pui hun: mai: giex nawh, 28 mai: yo ah nin:, "Pui Isarilax khankix eue:, teem: yix liak, Mawh pui in pa gau ka pui khawm: uik ku dah ku dee, son sang koeng ka pui ceu ex, mai: ka lox lai been li, mai: ka dee in, mai: lheu: khaing: an viang mawh pui Helasax kawx nawh hoik viex laig ka daux nyiex bwan:, mai: hoik kieh dee singax singeh in seeing: brai: heue:." 29 Mawh kheu sivoe an, kix hoik yaox nawh ka daux veng an, tau mai: Trawphimu, pa mawh pui Efesux, kix tom: ce: Pawlux hoik viex kaw an laig daux nyiex bwan: heue:. 30 Mai: pui veng an khawm: veng lulax, mai: khrawm: tix to: hoek tau, mai: giex Pawlux mai: reu: nawh lih plak praix nyiex bwan:, mai: klab siviex dom: mawx dom: an heue:. 31 Mai: yam kix sawg tix teei nawh yum, cao: giex kaing: naing piang pui tix rheng:, pon lox grawng: sungsang veng Yerusaliem khawm: uik heue:. 32 Mai: dom: mawx dom: an nawh teei pui naing mai: cao: giex kaing: naing greem: nawh khankix, mai: to: lih hu: ka kix heue:. Mai: kix, yam kix yaox cao: giex kaing: naing pa ting, mai: pui naing khankix, kix bloi: bleue: pa tap Pawlux heue:. 33 Mai: yam cao: giex kaing: naing pa ting an hoek dex, nawh giex Pawlux, mai: tawx lox son sang phyawk nawh ka ceng ra: nyaing, mai: chawk ah nin:, "Kaw in mawh mawx? mai: nawh hoik yuh pa yuh ka mawx?" 34 Mai: pui daux cub pui an, tiblah yo tix ceu, mai: tang: kaux tiblah yo tang: ceu, mai: yam nawh ang pon tawng grawh grawng: sidawng:, kheu lox maw: lox lawh, nawh tawx lox nhie: kix viex Pawlux hu: ka dee ot pui naing heue:. 35 Yam Pawlux hoek ka piang bawng:, kheu kied nieb yuh cub pui khankix, pui naing khankix tom: kliien nawh hu: heue:. 36 Mawh kheu cub pui haoh pui hun: hawt khaix mai: yo ah nin:, "Teei tix tik nawh heue:."

Grawng: krai Pawlux lox ka pui haoh pui hun:

37 Yam dex viex Pawlux laig ka daux dee ot pui naing, nawh chawk ka cao: giex kaing: naing pa ting ah nin:, "Khex pon krai aux lox ka maix ceeix lie?" Mai: cao: giex kaing: naing an chawk ah nin:, "Chix maix lox Helasax lie? 38 Phan: mawh nan: ang maix mawh pui Ejiptux pa hoik cheeik kieh pui tieh pui feen, mai: thong: kix pon: rheng: pa mawh pui pa plaux pui yum hu: daux tiag daux tu, bawg yam singaix glang: ka: in khankix lie?" 39 Viang mawh nan: Pawlux deeh ah nin:, "Aux mawh pui Yudax, pa mawh pui veng Tasux meung Kiliki, aux mawh pui veng pa ang lak law: tix mawh veng, mai: aux khyox khaw: ka maix, kieh aux sikah ka pui khankix liak." 40 Mai: khaix hoik tawx cao: giex kaing: naing an akhwang: ka nawh, Pawlux cung piang bawng:, mai: yuh pui khankix yaox ka taix tix, mai: khaix hoik yien: singiet, nawh sikah ka kix, ka lox Hebrie ah nin:,

Simin Ting 22

Pawlux krai lox pluat phimap khaing: nawh ka pui Yudax

22:3-16 koe: daux lai Kawncau 9:1-22; 26:9-18

1 "Puxaik mai: keeing: khankix eue:, nghiet lox pa sang tieb tie aux ka grawng: ceu pa deuh phimap ka aux, ka pex yam in heue:.

2 Mai: yam mhong: kix, nawh sikah ka kix, ka lox Hebrie, kix nie lheu: yawg tix heue:. Mai: nawh ah nin:,

3 "Aux mawh pui Yudax, pa keh ka daux veng Tasux, meung Kiliki, viang mawh nan: hoik eei: aux ting daux veng in, ka caong Gamalelax, mai: hoik gau aux ka lox been tax keeing: mai: ang kluik ang khluk khlaik, mai: koe: rhawm: tix son Siyiex, awm: koe: pex khawm: uik singaix heue:. 4 Mai: aux tuktiak tukte: ka Krax Been In, tom: teei yum, mai: phyawk khawm: simex khawm: bon: tawx tix sau: daux thawng: khankix heue:. 5 Awm: cao: giex kaing: li pa ting, mai: khawm: cub kuad song: nong: yu khankix mawh mhai: sakse: son aux. Ka kix kawx aux pon lai son puxaik khankix, mai: lawng krax hu: ka veng Damase son sang phyawk tix viex kix hoek ka veng Yerusaliem, son sang ciyang kix heue:. 6 Mai: yam hu: aux krax, mai: hoek dex ka veng Damase, yam dex jung singaix, dom: mawx dom: an pa riang pa ting jhan: lih khaing: raoma: mai: jhan: rob aux heue:. 7 Mai: aux goh gup piang tiex mai: mhong: lox pa ah nin: ka aux, 'Sawlux eue:, Sawlux eue:, maix lai tuktiak tukte: Aux yuh ka mawx?' 8 Mai: aux deeh chawk ah nin:, Simiang eue:, Maix mawh mawx?' Mai: Nawh deeh ah nin: ka aux, 'Aux mawh Yesux pui veng Nazariet, pa tuktiak tukte: maix kah heue:.' 9 Mai: kix pa ot tau mai: aux yaox pa riang an tete, mai: lhat graung kah viang mawh nan: kix ang mhong: lox Kaw pa sikah mai: aux heue:. 10 Mai: aux deeh chawk ah nin:, 'Simiang eue:, aux tag lai yuh ka mawx?' Mai: Simiang deeh ah nin: ka aux, 'Kaoh, mai: laig ka daux veng Damase, mai: tag sang krai grawh grawng: ku ceu ka maix dee an, pa hoik ciak tix deuh son sang yuh maix heue:.' 11 Mai: yam ang aux chix yaox kheu pruh pa riang an, pui pa hu: tau mai: aux tok taix aux hu:, mai: aux tom: hoek ka daux veng Damase heue:. 12 Mai: pui tix kaux pa kaux Ananix, pa chix nab chix yam hawt lox lai been li, pa yaw pui Yudax pa ot tan: khawm: uik kah, 13 hoek ka aux, mai: cung liep aux ah nin: ka aux, "Pux Sawlux eue:, kieh maix chix yaox heue:.' Mai: daux nari dom: an aux deeh chix yaox, mai: yaog tix jhak ka nawh heue:. 14 Mai: nawh baox ah nin:, 'Siyiex tax keeing: ex, hoik ciak tix kieh maix tawng alo Nawh Cao:, mai: kieh maix yaox Kaw Pa Rah Pa See, mai: son sang mhong: lox pa lih khaing: jheeh Nawh heue:. 15 Mawh kheu maix tag lai mawh pui kham: mhai: sakse: son Nawh ka pui khawm: uik khawm: leeing:, ka grawng: pa hoik yaox hoik mhong: maix heue:. 16 Yamin maix kawn: gla yuh ka mawx? Kaoh, kok ka ceukaux Nawh, mai: baptis205 ka daux rawm:, mai: sigrhah phimap phigrham: maix luan heue:.' 17 Mai: khaix hoik deeh ing: aux ka veng Yerusaliem, mai: yam rawg aux bwan: ka daux nyiex bwan:, aux liplu, 18 mai: yaox Nawh ah nin: ka aux, 'Nied tix lih hu: khaing: veng Yerusaliem laung laung, mawh kheu ang kix rieb tix teei lox pa kham: maix mhai: sakse: grawh grawng: Aux heue:.' 19 Mai: aux deeh ah nin:, "Simiang eue:, tokaux kix hoik tawng grawh grawng: aux sau: daux thawng: mai: tap toi: ka kix pa yumrhawm: ka Maix, ka daux nyiex sidiex ku lhang: heue:. 20 Mai: yam nham: Sathephan pui pa kham: mhai: sakse: son Maix lih, aux kawx cung dex tan:, mai: kieh yuh, mai: priex kraung ceep kix pa pah nawh yum heue:.' 21 Mai: Nawh Cao: baox ah nin: ka aux, 'Lih hu: heue:, mawh kheu Aux sang ploi: maix hu: dee singai khaing: tin:, ka pui tang: ceu tang: cat khankix heue:.'"

22 Kix nghiet lox nawh tom: hoek lox pa ghoik an, mai: kix yaog lox tix yo ah nin:, "Tik pui pa yuh nin: khaing: haktiex, kheu ang keung: tix kieh nawh klawd heue:." 23 Mai: yam kawn: tag yo kix, kix peeik kraung ceep tix, mai: rhuat phawng: tiex dee lhaong:, 24 mai: cao: giex kaing: naing pa ting an tawx lox kieh viex Pawlux laig ka daux dee ot pui naing, mai: nhie: sivied tix chawk nawh, yuh ka mawx son sang tawng nawh grawh grawng: lox pa yo kix tix deuh phimap ka Pawlux mawh grawng: pa yuh ka mawx. 25 Mai: khaix hoik phyawk kix nawh ka maox hak, Pawlux ah nin: ka cao: giex kaing: naing pa cung dex tan:, "Pa sivied maix pui pa mawh pui Romax, pa ang nyang bax prawng bax ca:, khaw: mai: been li lie?" 26 Mai: yam cao: giex kaing: naing an mhong: lox an, nawh hu: ka cao: giex kaing: naing pa ting, mai: krai ka nawh ah nin:, "Maix dex sang yuh pa yuh ka mawx? Mawh kheu pui in mawh pui Romax heue:. 27 Mai: cao: giex kaing: naing pa ting an hoek mai: chawk ah nin: ka Pawlux, "Krai ka aux liak, mawh maix pui Romax lie?" Mai: nawh deeh ah nin:, "Mawh heue:." 28 Mai: cao: giex kaing: naing pa ting an deeh ah nin:, "Aux pon tix mawh pui Romax, kheu hoik tawx mau kied nie heue:." Mai: Pawlux baox ah nin:, "Phan: mawh aux, hoik keh tix mawh pui Romax heue:." 29 Yam an kix pa dex sang chawk cheng: lih hu: khaing: nawh dom: mawx dom: an, cao: giex kaing: naing pa ting an kawx, lhat kah, yam tawng nawh, grawng: mawh nawh pui Romax, kheu nawh hoik phyawk Pawlux heue:.

30 Viang mawh kawx nan: singaix pasax, kheu simie nawh tix tawng sidawng:, grawh grawng: deuh pui Yudax phimap ka nawh ka grawng: pa yuh ka mawx, nawh tom: kah Pawlux, mai: tawx lox nhie: cao: giex kaing: li pa ting khankix, mai: cub kuad song: pa prawng pa ca: khawm: uik khrawm: paox tix, mai: viex Pawlux lih mai: deuh nawh sivoe kix heue:.

Simin Ting 23

Prawng Pawlux ka sivoe cub cao: prawng cao: ca:

1 Pawlux jeung: ka cub kuad song: cao: prawng cao: ca: khankix, mai: ah nin:, "Puxaik khankix eue:, aux hoik yuh ceu pa khaw: aux tix yuh sivoe Siyiex tom: sidah sidu hoek singaix in, mai: rhawm: aux ang koe: dee deuh phimap ka tokaux tix ka grawng: an heue:." 2 Mai: cao: giex kaing: li pa ting Ananix nhie: kix pa cung liep nawh, simang: jheeh nawh heue:. 3 Yam an Pawlux ah nin: ka nawh, "Siyiex tag sang simang: ka maix, ding: luk lin: pa kraix simaox ceed eue:, maix ngawm son sang prawng aux hawt lox lai been li, mai: nhie: pui simang: aux ka pa ang khaw: mai: been lie?" 4 Mai: kix pa cung dex tan: chawk ah nin:, "Maix lai map ka cao: giex kaing: li pa ting Siyiex lie?" 5 Mai: Pawlux deeh ah nin:, "Puxaik khankix eue:, ang aux tawng grawng: mawh nawh cao: giex kaing: li pa ting, mawh kheu hoik tiem: tix deuh ah nin:,

206'Maix tag ang ah lox pa caox grawng: cao: giex kaing: pui ceu maix heue:.'"

6 Viang mawh kawx nan: yam tawng Pawlux grawh grawng: cub kuad song: cao: prawng cao: ca: khankix, tiblah mawh Sadukie:, mai: tiblah mawh Pharishie:, nawh yo lox sinum sinax kix ah nin:, "Aux mawh Pharishie:, pa mawh kawn: Pharishie:, mai: aux kham: geu: pa chawk cheng: tin:, kheu keud pot jun pot aux ka ceu pa sang deeh kaoh im: khaing: krax yum heue:." 7 Khaix hoik ah nawh nan:, Pharishie: mai: Sadukie: khankix thung: thiang: ang khaw: paox tix, mai: cub kuad song: cao: prawng cao: ca: khankix, tang: gwieh tix heue:. 8 Mawh kheu Sadukie: khankix dhua: ang koe: krax deeh kaoh khaing: krax yum, viang mawh kawncau Siyiex, mai: khawm: khwan: kawx, kix dhua: ang koe:. Viang mawh kawx nan:, Pharishie: khankix ah, koe: khawm: ra: ceu heue:. 9 Yam an lih mawh krax lawh krax maw: pa ting, mai: pui tiem: lai plak Pharishie: tiblah, kaoh cung mai: riex thiang: ah nin:, "Ang ex yaox pa caox pa caig ka daux pui in ceeix kawx, viang mawh khwan: phan: ang mawh nan: kawncau Siyiex hoik sikah mai: nawh kawx, mawh pa yuh ka mawx?" 10 Mai: yam kix nie ang khaw:, ting thung: thiang: paox tix, cao: giex kaing: naing pa ting lhat kix rud Pawlux tom: mawh khik mawh phoi:, nawh tom: tawx lox kieh pui naing hu: teei nawh lih khaing: sinax kix, mai: viex nawh laig ka dee ot pui naing heue:.

11 Daux sawm: singaix pasax, Simiang cung liep nawh mai: ah nin:, "Kieh koe: rhawm: kaux rhawm: cong: heue:, mawh kheu awm: maix hoik kham: mhai: sakse: grawng: Aux ka veng Yerusaliem, viang mawh ka veng Romax kawx, maix tag lai kham: mhai: sakse: yuh nan: heue:."

Krax tiex tu pa yiag tix sang pah Pawlux

12 Mai: yam hoik riang praix pui Yudax tiblah yuh sijax mai: vien rhawm: tix tau greem: lox tiex lox tu ah nin:, "Ka: ang ex nyang bax pon tix teei Pawlux yum ex ang ih ang nyaux heue:." 13 Kix pa hoik yuh sijax yuh nan: koe: tipon: (40) kaux haoh heue:. 14 Mai: kix hu: ka cao: giex kaing: li pa ting khankix, mai: kuad song: khankix ah nin:, "Ex hoik vien rhawm: tix tau greem: lox tiex lox tu pa ting, son ang ex sang cim tix yaox tid tix, tom: hoik teei Pawlux yum heue:. 15 Mawh kheu nan: pex khawm: cub kuad song: cao: prawng cao: ca: khankix, nhie: cao: giex kaing: naing pa ting viex Pawlux lih hoek ka pex, mai: yuh awm: sang simie pex tix nie grum cox chawk nawh, mai: ka: sang hoek nawh dex tin: ex hoik rien tix pah nawh yum heue:." 16 Viang mawh kawx nan: kawn: simex nan: Pawlux mhong: grawng: sang jawm kix nawh, mai: nawh hu: laig dee ot pui naing, mai: krai ka Pawlux heue:. 17 Pawlux kok cao: giex kaing: naing tix kaux hoek ka tix, mai: ah nin:, "Viex pui awn: ju in hu: ka cao: giex kaing: naing pa ting liak, kheu koe: nawh grawng: pa sang krai ka nawh tix ceu ceu heue:." 18 Mawh kheu nan: nawh teei kaw an, mai: viex nawh hu: ka cao: giex kaing: naing pa ting ah nin:, "Pawlux pa hoik laung an kok aux hoek ka nawh, mai: nhie: aux viex pui pa awn: ju in hoek ka maix, pa koe: lox pa sang krai ka maix tix ceu ceu heue:." 19 Mai: cao: giex kaing: naing pa ting an teei taix nawh mai: hu: dee ang pui ot, mai: chawk nawh nong: nong: ah nin:, "Ceu pa sang koe: maix tix krai ka aux, mawh pa yuh ka mawx?" 20 Mai: nawh ah nin:, "Pui Yudax hoik ih rhawm: paox tix, son sang nhie: maix viex Pawlux lih hu: ka dee prawng dee ca: pasax, mai: yuh awm: sang simie kix tix nie grum cox chawk grawh grawng: nawh heue:. 21 Mawh kheu nan: maix paw cu lox kix liak, kheu pui ka daux kix tipon: (40) kaux lheu: pau tix jawm son nawh, pa hoik vien rhawm: tix tau greem: lox tiex lox tu, son ang sang ih sang nyaux tom: hoik pah kix nawh yum heue:. Mai: yam in kix hoik rien tix, mai: krox son lox khaing: maix heue:." 22 Mawh kheu nan: cao: giex kaing: naing pa ting an, ploi: pui awn: ju an hu:, khaix hoik tawm: nawh ka lox ah nin:, "Paw krai ka pui tix kaux kawx, ceu pa hoik krai maix ka aux grawh grawng: ceu in kix heue:."

Kah Pawlux mai: tawx hu: ka veng Kesarix

23 Cao: giex kaing: naing pa ting an kok cao: giex kaing: naing greem: nawh ra: kaux hoek ka tix, mai: ah nin:, "Rien pui naing ra: yieh son sang hu: tom: hoek ka veng Kesarix, ka daux sawm: in 207yam loe: nari, mai: pui naing brug brung atigliah (70) kaux, mai: pui naing klawm: pliah ra: yieh awawx." 24 Khawng: son sang brug Pawlux kawx nawh nhie: kix khre:, son sang pon tix viex nawh hoek ka simiang Felit mhawm: mhawm: heue:. 25 Lai kawx nawh tiem: hu: pa ah nin:,

26 "Aux pa mawh Klawdi Lusi tawx lai ka simiang Felit pa ting pa mhawm: heue:. Kieh nyawm ot siu: koe: liak. 27 Pui Yudax khankix giex pui in, mai: yam dex sang pah kix nawh yum, aux teei pui naing mai: lih hu: ka kix, mai: taoh nawh, kheu hoik tawng aux grawng: mawh nawh pui Romax heue:. 28 Mai: kheu simie aux tix tawng, grawng: deuh kix phimap pa yuh ka mawx ka nawh, aux tom: viex nawh lih ka cub kuad song: cao: prawng cao: ca: kix heue:. 29 Mai: aux yaox grawng: pa deuh kix phimap ka nawh, mawh pa dex pa dawd mai: been kix, viang mawh nan: ang koe: ceu pa deuh phimap ka nawh, ceu pa keung: nawh tix yum, phan: ang mawh nan: pa keung: tix phyawk tix laung nawh kheu heue:. 30 Yam pon aux tix mhong: grawh grawng: hoik keud tix sang yuh pa ang mhawm: ka pui in, aux tom: ploi: nawh hu: ka maix dom: mawx dom: an, mai: nhie: pui pa deuh phimap ka nawh, hu: krai grawng: nawh ka sivoe maix heue:."

31 Pui naing khankix teei Pawlux, awm: pa hoik nhie: ka kix, mai: viex nawh hu: yam ponsawm: tawx ka Antipatri heue:. 32 Viang mawh kawx nan: singaix pasax kix prah pui naing brug brung khankix hu: tau mai: Pawlux, mai: deeh ing: ka dee ot pui naing heue:. 33 Mai: kix, yam kix hoek ka veng Kesarix, teei tix tawx lai an ka simiang, mai: Pawlux kawx kix teei tix tawx sivoe nawh heue:. 34 Mai: khaix hoik phat nawh lai an, nawh chawk ka Pawlux grawng: mawh nawh pui meung mawx, mai: khaix hoik tawng grawng: mawh nawh pui meung Kiliki, 35 nawh ah nin:, "Aux tag nghiet maix grum ha:, khaix pui pa hoik deuh phimap ka maix kawx hoik hoek." Mai: simiang tawx lox nhie: gang: Pawlux ka daux nyiex haw: simiang Herut heue:.

Simin Ting 24

Felit chawk cheng: ka Pawlux

1 Khaix an phwan: singaix cao: giex kaing: li pa ting Ananix, mai: kuad song: tiblah, mai: pui tix kaux pa kaux Teratulu, pa chix nih nai krai lox, lih hoek mai: kix krai grawh grawng: Pawlux ka simiang heue:. 2 Mai: yam hoik kok Pawlux, Teratulu jah tix deuh phimap ka nawh ah nin:,

"Simiang Felit pa ting pa mhawm: eue:, kheu yaox ex, mawh kheu maix ex pon tix ot ka daux pa nhim: mhawm: mhawm:, mai: grawng: mawh kheu bwanson: maix ceu pa caox khankix, deeh cox mhawm: son meung in, 3 ex tom: yaogyaw bwanson: maix, mai: rieb tix teei nawh, ka daux ku ceu khawm: uik mai: ku dah ku dee heue:. 4 Viang mawh kawx nan: yuh ka mawx son ang aux baox kieh maix nyhap, aux khyox khaw: maix, viex rhawm: awn: caoxrhawm:, mai: nghiet lox ex tix gum ra: gum liak ha:. 5 Mawh kheu yaox ex, grawng: pui in mawh preng lukliak, mai: pa kieh pui tieh pui feen ka daux pui Yudax khankix ka piang haktiex khawm: uik, mai: cao: bung: cub been li Nazariet heue:. 6 Viang mawh nyiex bwan: kawx nawh yuh tix yaox, son sang kieh seeing: brai:, ex tom: giex nawh mai: simie tix prawng ca: nawh hawt been ex. 7 Viang mawh kawx nan: Lusi cao: giex kaing: naing pa ting, hoek ka ex mai: nied tix rud rhim: nawh hu: khaing: tawm: taix ex heue:. 8 Kieh pui pa deuh phimap ka nawh hoek ka maix. Phan: tokaux maix chawk cheng: nawx, maix sang tawng grawng: pa deuh ex phimap ka nawh mawh pa yuh ka mawx heue:." 9 Mai: pui Yudax khankix kawx dhua: ceu in khankix mawh pa caw heue:. 10 Mai: khaix simiang hoik yuh mhai: ka taix tix nhie: Pawlux sikah, Pawlux krai lox ah nin:,

"Mawh kheu tawng aux, grawng: hoik mawh maix cao: prawng cao: ca: son pui meung in tom: nie num, aux nie lheu: koe: krax gauxrhawm: tix sang krai lox tieb tie, son tokaux tix heue:. 11 Grawh grawng: nawh maix pon tix tawng, grawng: khaix hoik haok aux tix krub ka veng Yerusaliem, ang lheu: khaing: kao: ngaix ra: heue:. 12 Mai: viang mawh ka daux nyiex bwan: ang ah, phan: ang mawh nan: ka daux nyiex sidiex khankix ang ah, mai: ka daux veng an ang ah kix ang yaox aux thung: thiang: ka pui tix kaux kawx, mai: cheeik cub pui heue:. 13 Viang mawh ceu pa deuh kix phimap ka aux yamin kawx, kix ang pon jhi: mhai: sakse: heue:. 14 Viang mawh kawx nan: aux krai doh ka maix, grawng: hawt aux ka krax been pa ah kix ang khaw:, mai: krub ka Siyiex tax du ex, mai: yumrhawm: ka ku ceu khawm: uik, pa dex pa dawd mai: lox lai been li, mai: pa hoik tiem: tix deuh ka daux lai cao: jhai: khankix heue:. 15 Mai: koe: krax keud pot jun pot plak Siyiex, awm: tokaux kix kawx krox jun kah, grawh grawng: pui rah pui see, mai: khawm: pui pa ang rah ang see tag sang deeh kaoh khaing: krax yum heue:. 16 Mawh kheu nan: aux tom: nied tix coca: son rhawm: aux dee chix keud chix tawng tag ang koe: pa phit pa lud ka plak Siyiex mai: plak kawn: pui ku jheeng: jheeng: heue:. 17 Khaix hoik luan num tom: nie, aux hoek ka pui ceu aux, son sang viex khawng: phak tix yuh bwanson: kah, mai: son sang yuh krax tan krax lu heue:. 18 Yam kawn: yuh aux nan:, kix yaox aux ka daux nyiex bwan:, khaix hoik singax singeh, mai: ang ot tau mai: cub pui pa khrawm: paox tix, mai: ang koe: krax maw: krax lawh heue:. Viang mawh kawx nan: pui Yudax meung Asix tiblah, 19 khaw: tix ot tin: sivoe maix, mai: krai grawh grawng: pa deuh kix phimap, phan: kix koe: pa sang deuh phimap ka aux. 20 Phan: ang mawh nan: kieh tokaux pui pa ot tin: khankix, krai grawng: pa phit pa yaox kix, yam cung aux sivoe cub kuad song: pa prawng pa ca:. 21 Phan: ang mawh lox in tix gum, pa hoik yo aux yam cung sinax kix, 'Aux kham: geu: ceu pa chawk cheng: sivoe pex singaix, kheu grawng: pa deeh kaoh im: khaing: krax yum heue:.'"

22 Viang mawh kawx nan: kheu simiang Felit nie lheu: tawng grawng: Krax Been An, nawh kawn: grham: pa prawng pa ca: tix, mai: ah nin:, "Yam Lusi cao: giex kaing: naing pa ting lih hoek sax, aux koi prawng grawng: see: pex heue:." 23 Mai: nawh tawx lox ka cao: giex kaing: naing tikaux, son sang gang: Pawlux, viang mawh nan: nyawk ka yuh nawh, mai: son ang sang kieh raw paoxgrawm nawh khankix hoek tix hkren: khre: nawh heue:.

24 Khaix singaix tiblah simiang Felit hoek tau mai: moeng nawh Drusila pa mawh pui Yudax, mai: kok Pawlux mai: nghiet lox nawh grawng: pa dex pa dawd mai: krax yumrhawm: ka daux Yesux Khrit heue:. 25 Mai: yam Pawlux sidiex gau ka grawh grawng: pa rah pa see, mai: ka grawng: pa priex rhawm: tix, mai: grawng: krax prawng krax ca: pa tag sang hoek sax, simiang Felit die lhat kah mai: ah nin:, "Phaox in hu: dee hu: maix ha:, mai: yam tien aux mai: mhawm: bawg yam, aux tag kok maix hoek ka aux heue:." 26 Nawh keud pot jun pot grawng: sang tawx Pawlux mau ka nawh, mawh kheu nan: nawh tom: nie kok Pawlux lawx lawx, mai: kum: tau mai: nawh heue:. 27 Viang mawh kawx nan: khaix hoik naog ra: num, Pawki Fittux, pon tix yuh simiang khaix simiang Felit, mai: kheu simiang Felit simie pui Yudax caw rhawm: ka tix, nawh tom: laung tix grham: Pawlux heue:.

Simin Ting 25

Fittux chawk cheng: ka Pawlux

1 Khaix simiang Fittux hoik hoek ka daux haktiex an loe: singaix, nawh kaoh khaing: veng Kesarix mai: haok hu: ka veng Yerusaliem heue:. 2 Cao: giex kaing: li pa ting khankix, mai: kuad giex kaing: pui Yudax khankix, krai lox ka nawh deuh phimap ka Pawlux, mai: kix khyox khaw: ka nawh, 3 rawg mhaing: nhie: nawh yuh bwanson:, mai: ploi: tix kieh Pawlux hoek ka veng Yerusaliem. Kix keud kix yiag tix sang pah nawh yum yam lawng nawh krax heue:. 4 Viang mawh kawx nan: simiang Fittux deeh pawk tix krai, grawng: hoik gang: Pawlux ka veng Kesarix, mai: grawng: tokaux nawh uik dex sang hu: tan: heue:. 5 Nawh tom: ah nin:, "Kieh kix pa koe: siawp sibrawm ka daux pex, lih hu: tau mai: aux, mai: phan: koe: dee phit dee lud ka pui an, kieh kix deuh phimap ka nawh heue:."

6 Mai: khaix hoik ot nawh sinax kix ang lheu: khaing: daix ngaix, phan: ang mawh nan: kao: singaix, nawh lih hu: ka veng Kesarix, mai: singaix pasax nawh ngawm ka piang dee ngawm tix prawng tix ca:, mai: tawx lox nhie: viex Pawlux hoek heue:. 7 Mai: yam hoik hoek nawh, pui Yudax khankix pa hoik lih hoek khaing: veng Yerusaliem, cung rob nawh, mai: deuh phimap pa nu pa khawm: tom: nie ka nawh, pa ang kix pon tix jhi: mhai: sakse: kah heue:. 8 Pawlux krai lox tieb tie phimap tix ah nin:, "Viang mawh ka been pui Yudax ang ah, ka nyiex bwan: ang ah, ka simiang Kesa ang ah, aux ang phit ang lud tid tix heue:." 9 Viang mawh kawx nan: kheu simie simiang Fittux tix pon plakngai: pa khaw: rhawm: pui Yudax, nawh tom: deeh pawk tix chawk Pawlux ah nin:. "Maix sang haok hu: ka veng Yerusaliem, mai: kham: pa prawng pa ca: ka grawng: ceu in khankix sivoe aux lie?" 10 Viang mawh nan: Pawlux ah nin:, "Aux uik cung sivoe dee ngawm tix prawng tix ca: simiang Kesa, dee khaw: tix prawng tix ca: aux. Awm: maix kawx hoik tawng mhawm: mhawm:, aux ang sax phit sax lud tid tix ka pui Yudax khankix heue:. 11 Mawh kheu nan: phan: aux mawh pui phit pui lud, mai: hoik yuh pa khaw: tix yum tix ceu ceu, aux ang thiang: tix yum, viang mawh kawx nan: phan: grawng: pa deuh kix phimap ka aux khankix mawh pa ang mawh ang meh, pui tix kaux kawx ang pon tix tawx tix pong aux ka kix heue:. Aux khyox tix deuh rhawm: ka simiang Kesa heue:." 12 Yam an khaix simiang Fittux hoik kum: kawng: mai: cub kuad cao: prawng cao: ca:, nawh deeh pawk ah nin:, "Maix hoik khyox tix deuh rhawm: ka simiang Kesa, maix tag hu: ka simiang Kesa heue:."

13 Khaix hoik luan singaix tiblah ang awt rheung:, simiang khunhawkham Akrippax mai: Beranit hoek ka veng Kesarix, son sang nawb ka simiang Fittux heue:. 14 Mai: kix ot tan: tom: nie rheung: singaix nyao, simiang Fittux krai grawng: see: Pawlux ka simiang khunhawkham ah nin:, "Koe: pui tix kaux pa simiang Felit, hoik laung mai: prah bloi:. 15 Yam ot aux ka veng Yerusaliem, cao: giex kaing: li pa ting khankix, mai: kuad song: pui Yudax khankix, krai grawh grawng: nawh, mai: mhaing: tix kieh aux prawng phimap nawh heue:. 16 Aux tom: kraix ka kix grawng: ang khaw: mai: been pui Romax, tix tawx tix pong pui tix kaux kawx son sang ciyang, ka: ang nawh nyang bax pon tix taing tawx ka pakngai: pui pa deuh phimap ka nawh, mai: hoik pon tix krai lox tieb tie ka grawng: phimap ceu pa hoik deuh ka piang nawh heue:. 17 Mawh kheu nan: khaix hoik khrawm: kix paox tix tin:, aux ang lai nien, mai: singaix pasax aux ngawm ka piang dee ngawm tix prawng tix ca:, mai: tawx lox nhie: viex pui an hoek heue:. 18 Mai: yam hoik kaoh cung pui pa deuh phimap ka nawh, kix ang deuh phimap ceu pa caox tid tix, awm: pa hoik grux keud ce: aux kix sang deuh heue:. 19 Viang mawh kawx nan: kix deuh phimap ka nawh, grawh grawng: ceu pa dex pa dawd mai: been bwan: kix mai: grawng: Yesux tix kaux, pa hoik yum mai: pa Pawlux dhua: kawn: im: heue:. 20 Mai: kheu sivix aux, keud ang doh, grawng: khaw: tix chawk cheng: ka grawh grawng: ceu in khankix yuh ka mawx, aux tom: chawk Pawlux, ka grawng: nawh sang hu: ka veng Yerusaliem, mai: kham: pa prawng grawng: ceu in khankix tan: lie. 21 Mawh kheu Pawlux hoik khyox khaw: son sang priex tix, tix kieh simiang ting Awguttux prawng see: nawh, aux tom: tawx lox kieh priex nawh, tom: aux sang ploi: nawh hu: ka simiang Kesa heue:." 22 Simiang Akrippax ah nin: ka simiang Fittux, "Tokaux aux kawx simie tix nghiet lox pui an heue:." Simiang Fittux deeh pawk ah nin:, "Singaix pasax maix tag mhong: nawh heue:."

Akrippax nghiet krax pa prawng ca:

23 Mawh kheu nan: singaix pasax yam simiang Akrippax mai: Beranit hoik 208viex sinngao pa ting mai: hoek, kiex laig dee nghiet lox see: tau mai: cao: giex kaing: naing pa ting khankix, mai: khawm: pui pa ting pa lhaong: ka daux veng an, yam tawx simiang Fittux lox, kix viex Pawlux hoek heue:. 24 Mai: simiang Fittux ah nin:, "Simiang khunhawkham Akrippax mai: pui pa ot tau mai: ex tin: khawm: uik eue:, pex pon tix yaox pui in, pa pui Yudax ka veng Yerusaliem khawm: uik, mai: pa ot tin: kawx, hoik yo tix ah nin: ka aux, "Kaw in ang keung: tix kawn: baox klawd heue:.' 25 Viang mawh kawx nan: aux yaox grawng: nawh ang yuh ceu pa keung: nawh tix yum, mai: mawh kheu hoik khyox nawh tix deuh rhawm: ka simiang ting Awguttux, aux tom: yiag tix sang ploi: nawh hu: tan: heue:. 26 Aux ang koe: ceu pa sidawng: tix sang tiem: grawh grawng: nawh ka laux simiang ting ex tix ceu kawx, mawh kheu nan: aux tom: viex nawh lih sivoe pex, mai: lheu: khaing: paox tix, ka sivoe maix simiang khunhawkham Akrippax eue:, yuh ka mawx khaix hoik chawk cheng: ka nawh, aux tag koe: grawng: ceu pa tiem: tix heue:. 27 Mawh kheu phan: aux keud tix yaox, ang khaw: tix ploi: pui pa hoik laung hu:, phan: ang jhi: ang krai grawng: pa deuh phimap ka nawh heue:."

Simin Ting 26

Pawlux krai lox son tokaux tix sivoe Simiang Akrippax

26:12-18 koe: daux Kawncau 9:3-8; 22:6-11

1 Mai: simiang Akrippax ah nin: ka Pawlux, "Maix koe: akhwang: tix krai lox son tokaux tix heue:." Yam an Pawlux nyeu taix tix mai: krai lox tieb tie phimap tix ah nin:,

2 "Simiang khunhawkham Akrippax eue:, phan: aux keud tix yaox ka tokaux tix, aux koe: son tom: pon tix krai lox tieb lox tie phimap pa dex pa dawd mai: ku ceu khawm: uik pa hoik deuh pui Yudax khankix ka aux, ka plak sivoe ngai: maix singaix. 3 Mawh kheu maix jiet tawng been mai: ceu pa chawk cheng: khawm: uik ceu pa dex pa dawd mai: pui Yudax, mawh kheu nan: aux tom: khyox khaw: ka maix, yeung tix nghiet lox aux mhawm: mhawm: liak heue:. 4 Grawng: ju aux mawh pa yuh ka mawx, jah ka yam iak aux, tom: haok hwan:, pa hoik jah ka sinax ceu pui aux, mai: ka veng Yerusaliem, pui Yudax khawm: uik hoik grum tawng. 5 Kheu hoik tawng kix grawh grawng: aux tom: yam jah, phan: kix koe: rhawm: tix sang kham: mhai: sakse:, grawng: pa hoik hawt aux been bwan: ex, pa lang: teung: nu khaing: paoxtix, mai: mawh Pharishie: heue:. 6 Mai: yamin aux cung tix kham: geu: krax prawng krax ca: tin:, mawh kheu grawng: pa keud pot jun pot son mukheu pa hoik yuh Siyiex ka tax du ex khankix heue:. 7 Pa mawh mukheu pa pui ex kao: ceu ra:, nied tix yuh son Siyiex leeing: ngaix leeing: sawm:, mai: keud pot jun pot tix sang pon heue:. Simiang khunhawkham eue:, mawh kheu grawng: pa keud pot jun pot in, pui Yudax khankix tom: deuh phimap ka aux heue:. 8 Yuh ka mawx pex lai keud ang tau tix chix mawh, phan: Siyiex kieh pui yum deeh kaoh im:? 9 Glangka: in tokaux aux kawx ce: aux khaw: tix yuh, ceu pa ang khaw: tom: nie ka ceukaux Yesux pui veng Nazariet tete heue:. 10 Viang mawh ka veng Yerusaliem kawx aux hoik yuh nan:, mai: aux laung pui singax singeh tom: nie ka daux thawng: khankix, khaix hoik pon aux akhwang: khaing: cao: giex kaing: li pa ting khankix heue:. Mai: yam teei kix yum, aux kawx tawx lox deuh phimap ka piang kix heue:. 11 Mai: aux grhiem: kix lawx lawx ka daux nyiex sidiex khawm: uik, mai: yuh tix kieh kix sa lao ka Siyiex heue:. Mai: mawh kheu kied songrhawm: aux ka kix, aux tom: tuktiak tukte: kix, tom: hoek ka tang: veng khankix ka praix pui heue:. 12 Yam viex aux akhwang: mai: ara khaing: cao: giex kaing: li pa ting khankix, mai: hu: tix yuh nan:, yam tag kawn: hu: aux ka veng Damase. 13 Yam jung singaix, simiang khunhawkham eue:, aux yaox pa riang khaing: raoma:, pa lheu: riang khaing: singaix, jhan: rob aux, mai: kix pa hu: tau mai: aux hawt krax heue:. 14 Mai: khaix hoik goh gup ex ka tiex khawm: uik, aux mhong: lox pa ah nin: ka aux daux lox Hebrie, 'Sawlux eue:, Sawlux eue:, maix lai tuktiak tukte: Aux yuh ka mawx?, pa thip ka khaox lawm toh, cuat moi, nu son maix heue:.' 15 Mai: aux deeh chawk ah nin:, 'Simiang eue:, Maix mawh mawx?' Mai: Simiang deeh ah nin:, 'Aux mawh Yesux pa tuktiak tukte: maix kah heue:. 16 Viang mawh kawx nan: kaoh, mai: cung ka caong tix, mawh kheu Aux hoik hoek tix jhi: maix yaox tokaux Aux, son sang ciak tix kieh maix mawh cao: sidiex cao: gau Aux, mai: cao: kham: mhai: sakse: son Aux, grawng: ceu pa hoik yaox maix, mai: grawh grawng: ceu pa tag sang lih bleeh tix kieh Aux maix yaox khankix. 17 Mai: Aux tag sang taoh maix khaing: pui Yudax khankix, mai: pui tang: ceu tang: cat khankix, pa ploi: Aux maix hu: kah, 18 son sang paoh ngai: kix, yuh ka mawx son sang deeh tieh kix tix lih khaing: pa vhaik, mai: hoek ka pa riang, mai: khaing: siawp sibrawm Satan, mai: hoek ka Siyiex, yuh ka mawx son kix sang pon krax pluat krax ploi: phimap, mai: pon sin: tau mai: pui pa hoik singax singeh, kheu krax yumrhawm: ka daux Aux heue:.' 19 Mawh kheu nan:, simiang khunhawkham Akrippax eue:, aux ang yuh tix ang nghiet ka riang susai khaing: raoma: an heue:. 20 Viang mawh nan: aux jah tix sidiex ka kix pa ot ka daux veng Damase phaoxka:, mai: ka kix pa ot ka daux veng Yerusaliem, mai: ka pa ot ka daux meung Yudax ku dah ku dee khawm: uik, mai: ka khawm: pui tang: ceu tang: cat khankix, yuh ka mawx son sang doh keud doh sawn: kix ka phimap, mai: deeh tieh tix hoek ka Siyiex, mai: yuh ceu pa keung: ka pa doh keud doh sawn: ka phimap heue:. 21 Mawh kheu grawng: ceu in, pui Yudax khankix tom: giex aux ka daux nyiex bwan:, mai: keud tix sang pah aux yum heue:. 22 Viang mawh kawx nan: kheu pon aux krax teem: krax coi, pa kaoh khaing: Siyiex, aux tom: pon ot, pon cung tom: singaix in tix kham: mhai: sakse:, ka khawm: pa iak pa ting, mai: ang krai tid tix, lheu: khaing: pa koe: daux lai cao: jhai: khankix, mai: pa hoik krai Mose tag sang hoek tix mawh, 23 pa ah grawng: Khrit tag sang kham: geu:, mai: grawng: Nawh tag sang deeh kaoh im: khaing: krax yum ka: paox tix, mai: viex hoek tix sidiex grawng: pa dex pa dawd mai: pa riang, ka pui Yudax khankix, mai: ka pui tang: ceu tang: cat khankix heue:."

24 Yam krai Pawlux lox pa tieb tie phimap tix yuh nan:, simiang Fittux yo lox sinum ah nin:, "Pawlux eue:, yhot maix heue:, pingnya pa hoik gau maix kied nie, kieh maix yhot kah heue:." 25 Viang mawh kawx nan: Pawlux deeh ah nin:, "Simiang Fittux pa ting pa mhawm: eue:, ang aux yhot, viang mawh nan: aux krai lox pa mawh pa meh, pa khaw: pa jiet heue:. 26 Mawh kheu simiang khunhawkham Akrippax tawng grawh grawng: ceu in khankix, aux tom: ang ring krai sidawng: ka nawh, mawh kheu aux keud aux ce:, ceu in khankix ang mox khaing: nawh tix ceu kawx, mawh kheu grawng: ceu in ang mawh pa hoik yuh ka daog ka diem heue:. 27 Simiang khunhawkham Akrippax eue:, yumrhawm: maix ka lox cao: jhai: khankix lie. Aux uik tawng grawng: yumrhawm: maix kah heue:." 28 Mai: simiang Akrippax deeh ah nin: ka Pawlux, "Pie phan: maix nyaw glaw: aux ceeix ngie, maix tee: sang kieh aux mawh Khrityan heue:." 29 Mai: Pawlux deeh ah nin:, "Ceeix ang ah, nie ang ah, phan: lheu: khaing: ceng in, maix khaing: ang mawh, viang pui pa mhong: ka aux singaix khawm: uik kawx, aux rawg bwan: ka Siyiex tix kieh awm: aux heue:."

30 Mai: simiang khunhawkham Akrippax, mai: simiang Fittux mai: Beranit, mai: khawm: pui pa ngawm tau mai: kix kaoh, 31 mai: khaix hoik lih hu: kix dee glip, kix kum: paox tix ah nin:, "Pui in ang yuh tid tix, pa keung: pa khaw: tix yum, phan: ang mawh nan:, pa keung: pa khaw: tix phyawk tix gang: nawh kah heue:." 32 Mai: simiang Akrippax ah nin: ka simiang Fittux, "Phan: pui in ang khyox tix deuh rhawm: ka simiang Kesa, tee: pon tix ploi: nawh heue:."

Simin Ting 27

Kah Pawlux mai: tawx hu: ka Romax

1 Mai: yam kix yiag tix ploi: ex brug reu hu: ka meung Itali, kix teei tix tawx tix pong Pawlux mai: pui pa hoik laung tang: kaux khankix, ka cao: giex kaing: naing tix kaux pa kaux Yulix, pa dex pa dawd mai: cub naing Awguttux heue:. 2 Ex laig ka daux reu Adramuttix tix lhang:, pa dex sang hu: hawt praok meung Asix tix dah hoik tix dah, mai: ex yaog tix hu: ka rawm: sigrit sigra: heue:. Mai: Arittakhux pui veng Thesalonix, meung Makedonix kawx ot tau mai: ex heue:. 3 Singaix pasax ex hoek ka veng Sidom, mai: Yulix yuh bwanson: ka Pawlux, mai: tawx akhwang: kieh nawh hu: lai ling ka paoxgrawm nawh khankix, son sang khan: kheu: ka nawh heue:. 4 Mai: ex yaog tix brug reu hu: khaing: tan:, mai: kheu ang caw plak bhaung:, ex tom: hu: plak laong: klawn: tiex Kuparu heue:. 5 Mai: khaix hoik brug ex reu, tiang rawm: sigrit sigra:, pa koe: dex meung Kiliki, mai: meung Pampuli, ex hoek ka veng Mura meung Luki heue:. 6 Mai: cao: giex kaing: naing yaox reu Alezandre tan: tix lhang:, pa sang hu: ka meung Itali, mai: nawh sau: ex tan: heue:. 7 Mai: khaix hoik koi hu: ex tom: nie singaix, ex kied nu tix hoek ka sidieb Kanidu, kheu bhaung: klat ex, ex tom: hu: plak laong: klawn: tiex Karete, sidieb veng Salamon heue:. 8 Ex kied nu tix hu: hawt praok klawn: tiex an, mai: hoek ka dee kok mawh Dee Bang: Pa Mhawm: grang, dex ka veng Lashie: heue:.

9 Mai: khaix hoik uik bawg yam tix miex nyao, mai: hoik luan bawg yam pa twah pa ih pa un:, Pawlux tawx lox satix ka kix, 10 mai: ah nin: ka kix, "Pui khankix eue:, aux tawng grawh grawng: pa hu: ex yam in, kraung pa koe: daux reu mai: khawm: reu, mai: viang mawh ju ex kawx tag hoek krax laux krax leeing:, mai: krax som krax nai: heue:." 11 Viang mawh kawx nan:, cao: giex kaing: naing nhie: nghiet lox cao: giex kaing: reu mai: cao: reu khaing: lox pa hoik krai Pawlux khankix heue:. 12 Mai: mawh kheu ang mhawm: dee ot son bawg yam kwat, pui plak nie ah mhawm: tix baox yaog tix hu: khaing: tan: piang rawm: sigrit sigra:, son sang hu: tix yaox, yuh ka mawh son sang pon tix ot ka veng Phinit daux bawg yam kwat, pa mawh dee bang: ka klawn: tiex Karete, pa veeh ka plak sigreung caong ma: laong: plak klip singaix, mai: pa veeh ka plak sigreung caong ma: seh plak lih singaix heue:. 13 Mai: yam bhaung: briex koi phlu: khaing: plak caong ma: seh, kheu kix ce:, kix hoik pon pa bak kix tix yuh, kix deeh bluh rhiem: ngak ngaw: pa giex reu khaing: daux rawm:, mai: deeh brug reu hu: dex hawt praok klawn: tiex Karete heue:.

Caw bhaung: ting piang rawm: sigrit sigra:

14 Viang mawh nan: yam ang nyang bax rheung:, bhaung: keu: kang: lux ting pa kok mawh Urawklu, lih hoek tix klah reu. 15 Mai: giex reu, mai: kheu ang pon tie pon thang: bhaung: an, ex tom: grham: kieh bhaung: phlu: ex hu: heue:. 16 Mai: yam ex hu: plak laong: klawn: tiex iak pa kok mawh Klawde, viang nu kawx ex pon tix teei reu iak, 17 khaix hoik pon bluh reu iak an haok deuh piang reu ting, kix teei maox vien ka reu ting, son sang kieh kaux, mai: kheu lhat kix sang hu: chun: ka pak mhaik, kix tom: teei man: reu lih, mai: grham: kieh bhaung: phlu: hu: heue:. 18 Mai: kheu kied klah bhaung: ting lhiex ting ka ex, singaix pasax ex tom: jah tix tik kraung khrai: khaing: reu heue:. 19 Mai: yam hoek loe: singaix kix teei tix tik kraung pa shiao: daux reu ka taix tix heue:. 20 Mai: kheu ang pon tix yaox singaix mai: simuing: tom: nie singaix nyao, mai: kheu bhaung: pa klah ka ex, ang joeng mawh ceeix ngie, ceu pa keud pot jun pot ex grawng: sang hoek krax taoh krax luan hoik grai: uik heue:. 21 Mai: khaix ang kix ih pa ih pa un: rheung: nyao, Pawlux cung sinax kix mai: ah nin:, "Pui khankix eue:, phan: pex hoik nghiet lox aux mai: ang yaog tix lih khaing: klawn: tiex Karete, pex tee: hoik luan khaing: krax laux krax nai: in heue:. 22 Viang mawh nan: yamin aux sang krai pex lox son sang kieh pex nyawm rhawm: heue:. Grawh grawng: nawh, lheu: khaing: reu in ju pex tix kaux kawx ang som ang nai: heue:. 23 Mawh kheu daux sawm: in kawncau Siyiex cie Siyiex pa mawh aux cie Nawh, mai: Kaw pa yuh aux kaing son Nawh, hoek tix cung liep aux, 24 mai: ah nin:, 'Pawlux eue:, paw lhat paw graung, kheu maix tag cung sivoe simiang Kesa, mai: Siyiex hoik tawx ka maix pui pa brug reu tau mai: maix khawm: uik heue:.' 25 Mawh kheu nan: pui khankix eue:, kieh nyawm rhawm: heue:. Mawh kheu yumrhawm: aux ka Siyiex, grawng: tag sang mawh awm: pa hoik krai ka aux heue:. 26 Viang mawh kawx nan:, ex tag lai kham: geu: pa chun: pa taing ka piang klawn: tiex tix klawn: heue:."

27 Viang mawh nan: yam hoek kao: sawm: pon:, yam bhaung: phlu: ex hu: vuk vied jee jee blaong blaong ka daux rawm: sigrit sigra: Adri, yam dex hoek greung sawm: pui reu khankix ce: ex hoik hoek dex ka praok haktiex tix dah dah, 28 mai: kix tiag tix yaox rawm:, mai: yaox raux dieang tinga: tawp, mai: khaix an tivud kix baox deeh tiag tix yaox rawm: tix bawg, mai: yaox raux dieang kao: tawp phwan: heue:. 29 Mai: kheu lhat ex sang chun: sang taing ex, ka dee kruk khrek simaox, kix tom: ploi: rhiem: ngak ngaw: giex reu pon: mu:, khaing: ka plak sidax reu, mai: simie praix riang heue:. 30 Mai: yam pui reu khankix sawg tix to: khaing: reu ting, mai: hoik ploi: reu iak ka daux rawm: sigrit sigra:, kix yuh grang awm: sang ploi: rhiem: ngak ngaw: giex reu, ka plak kaing: reu heue:. 31 Pawlux tom: ah nin: ka cao: giex kaing: naing, mai: ka pui naing khankix, "Phan: pui in kix ang ot ka daux reu, pex ang tau tix pon hoek krax taoh krax luan heue:." 32 Yam an pui naing khankix tat tix tik maox reu iak an khankix mai: kieh rau heue:. 33 Yam dex sang riang praix Pawlux khyox kix khawm: uik nhie: kix ih pa ih pa un: ceeix ah nin:, "Singaix hoik mawh kao: ngaix pon: pa ca: krox pex mai: ang ih tid tix, 34 mawh kheu nan: aux tom: khyox khaw: pex ih pa ih pa un: ceeix, kheu mawh pa mhawm: son pex heue:. Grawh grawng: nawh hauk kaing: pex tix kaux kawx, tag ang hoek krax laux krax leeing: tix gawng: kawx heue:." 35 Mai: khaix hoik ah nawh nan:, nawh teei khaomun mai: yaogyaw bwanson: Siyiex ka sivoe kix khawm: uik, mai: nawh sivit khaomun, mai: jah tix ih heue:. 36 Yam an kix khawm: uik nyawmrhawm: nyawmrhi:, mai: tokaux kix kawx ih pa ih pa un: heue:. 37 Ex pa ot ka daux reu khawm: uik koe: ra: yieh atigliah liah (276) kaux heue:. 38 Mai: khaix hoik ih kix tom: sak tix, kix teei tix tik nghoxca ka daux rawm: sigrit sigra:, son sang kieh reu chaong: heue:. 39 Yam hoik riang praix, kix ang tawng haktiex an, viang mawh kawx nan: kix yaox dee kawk rawm: tix dah pa koe: caong raog, mai: kix kum: paox tix grawng: sang pon tix kieh reu hu: tum: piang caong raog an lie. 40 Mai: kix tik rhiem: ngak ngaw: giex reu, mai: kix grham: rhiem: an kix ka daux rawm: sigrit sigra:, mai: bawg yam tix yam ngie, kix kah maox khaox saoh ting pa koe: ka sidax reu, mai: kix yaog man: reu, pa koe: plak kaing: reu, tix kieh bhaung: phlu:, mai: kix hu: plak caong raog heue:. 41 Viang mawh kawx nan: yam hoek dee sidah rawm: sigrit sigra: ra: nyhawm:, mai: kix kieh reu hu: chun: ka piang tiex, mai: kaing: reu chun: tan:, mai: ang chix chuh, viang mawh nan: mawh kheu kied ting puk pak rawm:, plak sidax reu tom: uik jah tix jieh heue:. 42 Yam an pui naing khankix keud tix sang pah pui pa hoik laung khankix yum, mawh kheu lhat kix tix kaux kaux sang loe rawm: to: luan heue:. 43 Viang mawh kawx nan: kheu cao: giex kaing: naing simie tix taoh tix kieh Pawlux luan, nawh tom: kieh raw pa bak kix, mai: nawh tawx lox nhie: kix pa chix loe rawm:, phoh khaing: reu, son sang hoek ka praok ka: heue:. 44 Mai: pui pa deuk khankix tiblah brug piang khaox piang phia:, mai: tang: kaux tiblah piang tang: ceu khaing: reu heue:. Mawh kheu nan: pui khawm: uik pon tix hoek ka praok mhawm: mhawm: heue:.

Simin Ting 28

Hoek ka klawn: tiex Melite mhawm: mhawm:

1 Yam ex hoik pon luan, ex tawng grawng: klawn: tiex an, mawh pa kok mawh Melite heue:. 2 Pui tiag meung an, yuh bwanson: kia: ngien ka ex miex nyao, grawh grawng: nawh kix phlu: ngu mai: rieb tix teei ex khawm: uik, mawh kheu lih lhiex, mai: kheu kwat heue:. 3 Viang mawh nan: khaix Pawlux hoik kraix khix tix gawb mai: sau: piang ngu, mawh kheu hax, siuing: cai: tom: lih khaing: nge: khix mai: vung: vhien: ka taix nawh heue:. 4 Mai: yam yaox pui tiag khankix, siuing: pa cai: an tak teue: ka taix nawh, kix ah nin: ka paox tix, "Pui in tee: mawh pui pa pah pui yum, mai: viang nawh hoik luan khaing: rawm: sigrit sigra: kawx, ceu pa rah pa see ang doh lai kieh nawh im: kah heue:. 5 Viang mawh nan: nawh sibluat siuing: an ka daux ngu, mai: ang tie mawh tid tix. 6 Viang mawh kawx nan: kix ce: nawh sang uah, phan: ang mawh nan: nawh sang goh tix yum dom: mawx dom: an heue:. Viang mawh nan: khaix hoik krox kix tix jhak rheung: nyao, mai: ang yaox mawh pa ang mhawm: tid tix ka nawh, rhawm: kix deeh tieh mai: kix dhua: nawh mawh siyiex tix kaux heue:.

7 Ka sivie tan: koe: haktiex pa mawh cie simiang giex kaing: klawn: tiex an, pa kaux Publi, pa rieb tix teei ex, mai: khan: kheu: ka ex loe: singaix mhawm: mhawm: heue:. 8 Mai: yam an keeing: simiang Publi saux hoek mai: saux vaig nham: mai: it heue:. Pawlux laig hu: ka nawh, mai: rawg bwan: mai: deuh taix tix piang nawh, mai: cox nawh moi: heue:. 9 Mai: khaix hoik yuh nan:, pui tang: kaux khankix pa koe: jhawm: saux jhawm: ngia kawx pa ot ka piang klawn: tiex an, hoek son sang kieh cox tix moi: heue:. 10 Mai: kix yuh ceu pa yaw tom: nie mai: yaw ex kah, mai: yam ex yaog tix brug reu hu:, kix sau: can ceu pa lo ex khankix ka piang reu heue:.

Pawlux bleeh ka veng Romax

11 Mai: khaix hoik luan loe: khix ex brug reu Alezandre tix lhang:, pa koe: rieang Siyiex Puxaik Kawn: Brawm:, pa hoik bang: ka klawn: tiex an yam kwat heue:. 12 Mai: yam ex hoek ka veng Suraku, ex ot tan: loe: singaix heue:. 13 Mai: yam yaog ex tix hu: khaing: tan:, ex nied hu: mai: hoek ka veng Regium, khaix an tix singaix bhaung: khaing: caong ma: seh hoek tix phlu:, mai: bo singaix khaix ex tom: hoek ka veng Pawtilu heue:. 14 Mai: ex yaox puxaik khankix tan:, pa khyox khaw: nhie: ex ot tau mai: kix aliah singaix, mai: ex baox hu: hoek ka veng Romax heue:. 15 Yam puxaik khankix pa ot daux veng Romax mhong: grawh grawng: ex, kix hoek tix rieb ex tom: hoek ka Lah Appi mai: ka Nyiex Bang: Loe: Lhang:, mai: yam Pawlux yaox kix nawh yaogyaw bwanson: Siyiex mai: rhawm: nawh deeh haing: hiah kah heue:.

16 Mai: yam ex laig ka daux veng Romax, Pawlux pon akhwang: tix ot nong: nong:, tau mai: pui naing tix kaux pa pau nawh heue:.

17 Mai: khaix an loe: singaix Pawlux kok pui ting pui lhaong: pui Yudax khankix, mai: yam hoik khrawm: kix paox tix, nawh ah nin: ka kix, "Puxaik khankix eue:, viang aux ang yuh pa lud pa loe: ka ceu pui ex, mai: ka been tax du ex kawx, kix teei tix laung aux khaing: veng Yerusaliem mai: tawx aux ka daux tawm: taix pui Romax khankix heue:. 18 Mai: khaix hoik chawk hoik cheng: kix aux, mawh kheu ang kix yaox grawng: pa keung: aux tix yum, kix tom: koe: rhawm: tix sang ploi: aux heue:. 19 Viang mawh kawx nan: yam pui Yudax khankix ah lox kieh raw ka grawng: an, aux tom: khyox khaw: tix deuh rhawm: ka simiang Kesa, phan: ang mawh nan: ang doh pon heue:. Viang yuh aux nan: kawx, ang mawh kheu koe: aux ceu pa deuh phimap ka ceu pui aux heue:. 20 Mawh kheu jao in aux tom: kok pex hoek tix yaox, mai: tix sikah tau mai: aux, grawh grawng: nawh, mawh kheu ceu pa keud pot jun pot pui Isarilax, aux tom: kham: geu: ceu pa phyawk ka ceng in heue:." 21 Mai: kix deeh ah nin: ka nawh. "Ex ang nyang pon lai khaing: meung Yudax grawh grawng: maix, viang mawh puxaik khankix kawx ang sax hoek tix krai pa ang khaw: ang jiet grawng: maix tix kaux kawx heue:. 22 Viang mawh kawx nan: ex simie tix mhong: khaing: maix grawng: pa keud pa ce: maix, mawh kheu ex hoik tawng grawh grawng: been in, mawh pa map pui ka ku dah ku dee heue:."

23 Yam hoek singaix pa kix hoik bak tix een: son nawh, kix hoek ka dee ot nawh tom: nie heue:. Mai: nawh nih nai krai lao, kham: mhai: sakse: grawh grawng: meung Siyiex, mai: jeeh nyaw kix ka grawh grawng: Yesux, khaing: lox lai been li Mose, mai: khawm: lai cao: jhai: khankix, jah yam pon ngawb tom: hoek yam pon bo heue:. 24 Mai: tiblah yumrhawm: ka grawh grawng: pa krai nawh, viang mawh nan: tiblah ang yumrhawm: kah. 25 Mai: kheu tokaux kix tang: lox siyox moing, kix lih hu: khaix hoik krai Pawlux lox tix gum, pa ah nin:, "Khwan: Singax Singeh hoik krai lox ka jheeh cao: jhai: Isayax, ka tax du pex mhawm: mhawm: pa ah nin:,

20926 'Maix hu: ka ceu pui in khankix mai: ah nin:. Pex mhong: kawx, mhong: mai: ang tix tawng ceeix kawx. Pex yaox kawx, yaox mai: ang tix yaox ceeix kawx. 27 Kheu rhawm: pui ceu in hoik sivix, mai: yhaok kix ang hiex mhong:, mai: kix hoik yip ngai: tix, yuh ka mawx son ang kix sang yaox, mai: yuh ka mawx son ang yhaok kix chix mhong:, mai: rhawm: kix chix tawng. Mai: deeh tieh hoek son sang cox Aux tix kieh kix moi: heue:.'

28 Mawh kheu nan: kieh pex een: tix tawng, grawh grawng: krax pa taoh Siyiex in, hoik ploi: tix tawx hu: ka pui tang: ceu tang: cat khankix, mai: kix tag sang nghiet heue:." 29 Mai: khaix hoik ah nawh lox ceu an, pui Yudax khankix lih hu: khaix hoik thung: thiang: kix paox tix tom: nie heue:.

30 Khaix an Pawlux ot tom: naog ra: num, daux nyiex pa hoik vai nawh tix cie, mai: nawh rieb tix teei pui can pa hoek tix laig ka nawh khawm: uik. 31 Mai: nawh viex rhawm: kua:, sidiex grawh grawng: Meung Siyiex, mai: grawng: ceu pa dex pa dawd mai: Simiang Yesux Khrit, mai: pui tix kaux kawx ang kieh ang raw nawh heue:.