Makux

Lai Makux.

Simin Ting 1

Grawng: Yohan Cao: com rawm:

1:2-8 koe: daux lai Mth 3:1-11; Lukax 3:2-16

1 Dee jah lox bwan: gauxrhawm: gauxrhi: Cao: Yesux Khrit, Kawn: Siyiex awm: hoik tiem: daux lai Cao: Jhai: Isayax. 66 2 "Jhak heue:, Aux ploi: kawncau Aux hu: sivoe plakngai: Maix, pa tag sang cox krax Maix heue:. 67 3 "Lox pa kok pa yo daux tiag daux tu cox krax Simiang, yuh krax Nawh rah see heue:." 4 Yohan cao: baptis 68 hoek daux tiag daux tu, mai: sidiex grawh grawng: been baptis D pa doh keud doh sawn: ka phimap tom: pon luan khaing: daux phimap phigrham: heue:. 5 Mai: pui meung Yudax khawm: uik, mai: pui: veng Yerusaliem khawm: uik, hu: ka nawh. Kix krai doh phimap phigrham: tokaux tix, mai: baptis E ka nawh daux rawm: klawng: ting Yawdan heue:. 6 Mai: Yohan ceep kraung hauk kala-uk, mai: nhawt maox hak ka nyoi tix, mai: ih sido mai: rawm: hia: tiag heue:. 7 Mai: nawh sidiex ah nin:, "Khaix in tag sang hoek Tix kaux pa nie ting khaing: aux, pie maox kiep Nawh ang aux keung: nom: tix kah. 8 Aux baptis E pex ka daux rawm:, viang mawh kawx nan: Nawh tag baptis F pex ka daux Khwan: singax singeh heue:."

Yesux com Tix ka rawm:

1:9-11 koe: daux lai Mth 3:13-17; Lukax 3:21-22, 1:12-13 koe: daux lai Mth 4:1-11; Lukax 4:1-13

9 Ka daux bawg yam singaix an khankix, Yesux kaoh khaing: veng Nazariet, meung Galilie:, mai: hoek baptis G daux tawm: taix Yohan ka daux rawm: Yawdan, 10 Mai: yam Nawh lih khaing: daux rawm: dom: mawx dom: an, Nawh yaox baoh raoma:, mai: Khwan: lih awm: sikaux ka piang Nawh heue:. 11 Mai: lox lih khaing: raoma: ah nin:, "Maix mawh kawn: pa moh Aux, pa khaw: pa caw rhawm: Aux heue:."

Yesux kham: geu: krax pa nyaw glaw:

12 Mai: dom: mawx dom: an, Khwan: Cao: grheu: Nawh hu: ka daux tiag daux tu heue:. 13 Mai: Nawh ot ka daux tiag daux tu tipon: (40) ngaix, mai: kham: geu: pa nyaw Satan, mai: ot tau mai: totiag totu, mai: Kawncau Siyiex khankix khan: kheu: ka Nawh Cao: heue:.

Kok ka pui teei kax pon: kaux

1:16-20 koe: daux lai Mth 4:18-22; Lukax 5:2-11; Yohan 1:35-42

14 Khaix hoik sau: Yohan daux thawng: Yesux hoek ka daux meung Galilie:, mai: sidiex gau lox bwan: gauxrhawm: gauxrhi: pa dex pa dawd mai: Siyiex. 15 Mai: ah nin:, "Bawg yam hoik naog, mai: meung Siyiex dex sang hoek, doh keud doh sawn: ka phimap, mai: yumrhawm: ka lox bwan: gauxrhawm: gauxrhi: heue:."

16 Mai: yam Nawh hoek dex rawm: nhawng: Galilie:, Nawh yaox Simon mai: Andare pux Simon, ploi: rub ka daux rawm: nhawng:, kheu kiex mawh pui pa teei kax heue:. 17 Mai: Yesux ah nin: ka kiex, "Hawt khaix Aux heue:, mai: Aux tag sang kieh pax lih mawh pui pa teei pui heue:." 18 Mai: dom: mawx dom: an kiex prah rub khankix tan:, mai: hawt khaix Nawh Cao:. 19 Mai: Nawh hu: sivoe ceeix mai: Nawh yaox Yakop, kawn: Zebedie: mai: pux nawh Yohan, ot daux reu mai: cox rub tan:. 20 Mai: Nawh kok kiex dom: mawx dom: an, mai: kiex prah keeing: kiex Zebedie: mai: pui cang: pui caing khankix ka daux reu, mai: hawt khaix Nawh Cao:.

Grheu: phi: pa seeing: pa brai: lih

1:21-28 koe: daux lai Lukax 4:31-37

21 Mai: kix hu: ka veng Kapeniom, mai: dom: mawx dom: an singaix tuah Nawh laig ka daux nyiex sidiex mai: sidiex gau tan: heue:. 22 Mai: kix daox deng: ka lox sidiex lox gau Nawh Cao:, kheu lox gau Nawh awm: pa koe: siawp sibrawm, mai: ang awm: pui tiem: lai khankix heue:. 23 Mai: daux nyiex dee sidiex kix tan:, koe: pui pa laig phi: pa seeing: pa brai: tix kaux, mai: nawh kok nawh yo, 24 ah nin:, "Yesux Pui veng Nazariet eue: ex koe: pa yuh mai: Maix ceu pa tix. Maix hoek tix yuh ex laux lie? Kaw pa Singax Singeh Siyiex eue:, aux hoik tawng Maix mawh mawx." 25 Mai: Yesux ah ka nawh yuh nin:, "Paw nye:, lih hu: khaing: daux nawh heue:." 26 Mai: phi: pa seeing: pa brai: an, kieh pui an goh mai: kok lox sinum lih hu: khaing: daux nawh heue:. 27 Mai: pui khawm: uik khawm: leeing: daox deng: kah, tom: kix chawk paox tix, tix kaux hoik tix kaux ah nin:, "In mawh pa tix? Lox sidiex lox gau pa khraox pa koe: siawp sibrawm. Nawh tawx lox ka phi: pa seeing: pa brai: kawx, kix nghiet lox Nawh heue:. 28 Mai: dom: an lox grawh grawng: Nawh Cao: tah hu: ku dah ku dee ka daux meung Galilie: ka praok sivie sivheng: tan:.

1:29-31 koe: daux lai Mth 8:14-15; Lukax 4:38-39 1:32-34 koe: daux lai Mth 8:16-17; Lukax 4:40-41

Cox pai: miex moeng Simon

29 Mai: dom: mawx dom: an yam lih kix khaing: daux nyiex sidiex, kix hu: mai: laig ka daux nyiex Simon mai: Andare, tau mai: Yakop mai: Yohan heue:. 30 Miex moeng Simon kiex saux mai: it, mai: dom: mawx dom: an kix krai grawh grawng: kiex ka Nawh Cao: heue:. 31 Mai: Nawh Cao: hu: giex taix kiex yaog kiex kaoh, mai: jhawm: saux kiex grai: dom: mawx dom: an, mai: kiex khan: kheu: ka kix heue:.

32 Yam klip singaix, yam ponbo kix viex pui pa koe: jhawm: saux jhawm: ngia mai: pui pa laig phicaox khawm: uik hoek ka Nawh Cao:. 33 Mai: pui veng khawm: uik khrawm: paox tix ot praok sivie tan: heue:. 34 Nawh Cao: cox pui pa koe: jhawm: saux ku ceu kieh kix moi:, mai: Nawh grheu: phicaox lih tom: nie, mai: Nawh ang kieh phicaox khankix sikah, kheu kix hoik tawng Nawh Cao: heue:.

Hu: sidiex ku dah ku dee

1:35-38 koe: daux lai Lukax 4:42-43

35 Yam pon ngawb yam ang praix bax mung riang, Nawh Cao: kaoh mai: hu: ka daux tiag tix dah, mai: rawg bwan: dee an. 36 Mai: Simon mai: pui pa ot tau mai: nawh khankix hawt Nawh Cao: heue:. 37 Kix yaox Nawh Cao:, mai: ah nin: ka Nawh, "Pui khawm: uik sawg Maix heue:." 38 Mai: Nawh Cao: ah nin: ka kix, "Ex hu: tang: dah tang: dee, ka daux tang: yaong: tang: vie, yuh ka mawx viang mawh tan: kawx Aux ka pon tix sidiex, kheu Aux hoek son ceu in heue:." 39 Mai: Nawh Cao: laig sidiex ka daux nyiex sidiex kix khankix daux meung Galilie: ku dah ku dee, mai: Nawh grheu: phicaox khankix lih hu: heue:.

Kieh pui sipawg singax

1:40-44 koe: daux lai Mth 8:2-4; Lukax 5:12-14

40 Pui sipawg tix kaux hoek ka Nawh Cao:, grux ngawng khyox ka Nawh ah nin:, "Phan: Maix koe: rhawm: tix cox aux kieh aux singax Maix chix heue:." 41 Yesux caoxrhawm: ka nawh, mai: nyeu taix Tix teeh ka kaw an, mai: ah nin: ka nawh, "Aux koe: rhawm: heue:. Kieh maix singax heue:." 42 Mai: jhawm: saux sipawg an grai: dom: mawx dom: an, mai: nawh singax heue:. 43 Mai: Nawh Cao: kieh kaw an lih hu:, khaix hoik tawx Nawh lox. 44 Pa ah nin: ka nawh, "Rien rhawm: tix paw vi krai tix ceu kawx ka pui tix kaux kawx, viang mawh kawx nan: hu: mai: jhi: cao: giex kaing: li yaox ka tokaux tix, mai: tan lu kheu hoik singax maix, awm: ceu pa hoik nhie: Mose, son sang mawh mhai: sakse: ka kix heue:." 45 Viang mawh kawx nan:, kaw an lih hu: jah tix krai grawh grawng: ceu in tom: nie, tah ku dah ku dee, tom: Yesux ang pon tix laig ka daux veng sidawng:. Nawh ot ka plak praix daux tiag, mai: pui ku dah ku dee hoek ka Nawh Cao: heue:.

Simin Ting 2

Cox moi: ka pui pa yum taix yum caong

2:3-12 koe: daux lai Mth. 9:2-8; Lukax 5:18-26

1 Khaix an tix singaix Nawh Cao: baox deeh laig ka daux veng Kapeniom, mai: yam kix mhong: grawh grawng: Nawh Cao: ot ka daux nyiex tix nyiex. 2 Pui haoh pui hun: khrawm: paox tix tan:, tom: dee ot, tom: dex siviex ka ang koe:, mai: Nawh krai kix mhong: gumlox bwan: heue:. 3 Yam an kix viex pui pa koe: jhawm: saux pa yum taix yum caong hoek ka Nawh Cao: tix kaux. Pui pon: kaux klawm: nawh hoek heue:. 4 Yam an kheu cub pui haoh pui hun: kix ang pon hoek dex ka Nawh Cao:, kix tom: yieh braux nyiex piang dee ot Nawh, mai: khaix kix hoik yieh braux nyiex kix teei ku: dee it kaw pa yum taix yum caong an, mai: kix koi ploi: lih dee an heue:. 5 Yesux yaox krax yumrhawm: kix mai: Nawh ah nin: ka kaw pa yum taix yum caong an, "Kawn: eue:, hoik pluat phimap maix heue:." 6 Pui tiem: lai tiblah ngawm tan:, mai: kix keud daux rhawm: tix yuh nin:, 7 "Yuh ka mawx Pui in ah lox yuh nin:, Nawh sa lao ka Siyiex heue:. Lheu: khaing: Siyiex tix kaux khaing:, pui mawx chix ploi: phimap?" 8 Dom: mawx dom: an Yesux tawng ka daux rhawm: Tix, grawh grawng: pa keud kix daux rhawm: kix, mai: ah nin: ka kix, "Pex lai keud ceu in khankix ka daux rhawm: pex yuh ka mawx? 9 Lox yuh ka mawx lheu: yie tix ah, ka kaw pa koe: jhawm: saux pa yum taix yum caong, 'Hoik pluat phimap maix heue:,' yie tix ah lie? Phan: sang mawh: nan:, 'Kaoh, viex kraung it maix mai: hu: heue:, yie tix ah lie? 10 Viang mawh kawx nan:, yuh ka mawx son sang tawng pex grawh grawng: Kawn: kawn: pui chix pluat phimap ka piang haktiex, (Nawh ah nin: ka kaw pa koe: jhawm: saux pa yum taix yum caong), 11 Aux krai ka maix, kaoh, viex kraung it maix mai: deeh ing: ka nyiex maix heue:." 12 Mai: kaw an kaoh dom: mawx dom: an mai: teei kraung it tix lih hu: sivoe ngai: pui khawm: uik, tom: kix khawm: uik daox deng: kah, mai: yaogyaw Siyiex, ah nin:, "Ex ang sax yaox pa yuh nin: tix bawg kawx."

Kok ka Lewix

2:14-17 koe: daux lai Mth. 9:9-13; Lukax 5:27-32

13 Mai: Nawh Cao: deeh hu: ka dex praok rawm: nhawng: tix bawg mai: cub pui haoh pui hun: khawm: uik hoek ka Nawh, mai: Nawh Cao: sidiex gau ka kix heue:. 14 Yam hu: krax Nawh Cao: yaox Lewix kawn: simex Alaphie:, ngawm daux nyiex koh mau, mai: Nawh Cao: ah nin: ka nawh, "Hawt Aux heue:." Mai: nawh kaoh mai: hawt khaix Nawh Cao: heue:.

Sawm: tau mai: pui koh mau mai: pui pa koe: map grham:

15 Khaix an yam ngawm neung Nawh dex pheen: ka daux nyiex kaw an, pui koh mau mai: pui koe: map koe: grham: khankix ngawm neung tau mai: Yesux mai: kawncau Nawh khankix, kheu kix pui haoh pui hun: hawt khaix Nawh Cao: heue:. 16 Yam pui tiem: lai mai: Pharishie: khankix yaox Nawh sawm: tau mai: pui pa koh mau mai: pui koe: map koe: grham: khankix, kix ah nin: ka kawncau Nawh khankix, "Nawh lai sawm: tau mai: pui koh mau mai: pui koe: map koe: grham khankix yuh ka mawx?" 17 Mai: yam mhong: Yesux Nawh ah nin: ka kix, "pui pa nyawm ot nyawm koe:, ang lo pui pa chix sidah dim:, viang mawh kawx nan: mawh pui pa koe: jhawm: saux jhawm: ngia khaing: pa lo pui chix sidah. Aux hoek son sang kok pui pa rah pa see ang mawh, viang mawh kawx nan:, hoek tix kok pui pa koe: map koe: grham: heue:."

Grawng: twah pa ih pa un:

2:18-22 koe: daux lai Mth. 9:14-17; Lukax 5:33-38

18 Bawg yam an kawncau Yohan mai: Pharishie: khankix twah pa ih pa un:, mai: kix hoek mai: ah nin: ka Nawh Cao:, "Kawncau Yohan mai: kawncau Pharishie: khankix twah pa ih pa un:, viang mawh nan: yuh ka mawx kawncau Maix lai ang twah pa ih pa un:?" 19 Mai: Yesux chawk kix ah nin:, "Yam pui yuh kapaox ot tau mai: paoxgrawm nawh khankix, kix chix twah pa ih pa un: lie? Yam pui yuh kapaox kawn: ot mai: kix, kix ang tau tix chix twah pa ih pa un:. 20 Viang mawh kawx nan:, bawg yam singaix tag sang hoek, yam tag sang teei kaw pa yuh kapaox khaing: kix, mai: ka daux singaix an kix tag sang twah pa ih pa un: heue:. 21 Pui tix kaux kawx ang sax teei man: pa khraox blaox kraung ceep pa prim:, phan: yuh nan: kienie, man: pa khraox pa hoik blaox daux griah tag kieh pa prim: laux, mai: daux griah tag nie vieh khaing: phaoxka: heue:. 22 Mai: pui tix kaux kawx ang sax teei rawm: plix siiet pa khraox sau: ka daux chee: hak pa prim:, phan: yuh nan: kienie, rawm: plix siiet pa khraox tag kieh chee: hak an bih, mai: khawm: rawm: plix siiet mai: khawm: chee: hak tag laux tag nai: kah heue:. Viang mawh kawx nan: kix sau: rawm: plix siiet pa khraox ka daux chee: hak pa khraox heue:."

Grawng: singaix twah

2:23-28 koe: daux lai Mth. 12:1-8; Lukax 6:1-5

23 Ka daux singaix twah tix singaix yam Nawh Cao: hu: preeng: daux ma: nghoxca, kawncau Nawh khankix caik tix teei sigleem: nghoxca heue:. 24 Mai: Pharishie: khankix ah nin: ka Nawh Cao:, "Jhak heue:, yuh pa tix kix lai yuh pa ang khaw: mai: been li singaix twah?" 25 Nawh Cao: baox pawk lox mai: ah nin: ka kix "Ang pex sax phat grawh grawng: pa yuh Dawit yam lo nawh, yam nawh mai: pui ot tau mai: nawh kied cairhawm: lie? 26 Grawh grawng: yam laig nawh ka daux nyiex Siyiex, yam Abyathax mawh cao: giex kaing: li pa ting, mai: ih hkaomun, mai: tawx ka khawm: pui pa ot tau mai: nawh, pa pui pa ang mawh cao: giex kaing: li ang khaw: tix ih lie?" 27 Mai: Nawh Cao: baox ah nin: ka kix, "Singaix twah hoik yuh son kawn: pui heue:. Yuh kawn: pui son singaix twah ang mawh. 28 Mawh kheu in Kawn: kawn: pui mawh Simiang singaix twah heue:."

Simin Ting 3

Cox pai: jhawm: saux singaix twah

3:1-6 koe: daux lai Mth. 12:9-14; Lukax 6:6-11

1 Nawh Cao: deeh laig ka daux yiex dee sidiex, mai: pui pa taix nawh hoik yum hoik kroh tix khawn:, ot tan: tix kaux. 2 Nawh Cao: sang cox ka kaw an singaix twah lie, ang cox lie, kix jhak tix yaox Nawh Cao:, yuh ka mawx son sang pon tix deuh phimap ka Nawh heue:. 3 Mai: Nawh Cao: ah nin: ka pui pa hoik yum taix, kroh taix tix khawn: an, "Kaoh cung tin: heue:." 4 Mai: Nawh Cao: baox chawk ah nin: ka kix, "Khaw: mai: been li tix yuh pa mhawm: singaix twah lie, phan: ang mawh nan: khaw: tix yuh laux lie? Khaw: tix taoh ju lie, phan: ang mawh nan: khaw: tix pah yum lie?" Viang mawh nan: kix ang nye: heue:. 5 Khaix an Nawh Cao: songrhawm: mai: jhak sivie tan: ka piang kix, Nawh Cao: khirhawm: kheu kien: rhawm: kix, mai: ah nin: ka pui an, "Nyeu taix maix heue:," mai: nawh nyeu taix tix, mai: taix nawh deeh mhawm: heue:. 6 Mai: Pharishie: khankix lih hu: mai: dom: mawx dom: an kix kum: kawng: mai: kawncau mau soi: Herut grawh grawng: kix sang pon tix yuh Nawh Cao: laux yuh ka mawx heue:.

Cox pai: pui saux khankix hawt praok rawm: nhawng:

3:7-12 koe: daux lai Mth. 12:15-16; Lukax 6:17-19

7 Yesux mai: kawncau Nawh khankix hu: ka rawm: nhawng: mai: cub pui haoh pui hun: pa kaoh khaing: meung Galilie:, hawt khaix kix heue:. Mai: meung Yudax, 8 mai: khaing: veng Yerusaliem, mai: khaing: veng Idom, mai: haktiex plak toi: rawm: Yawdan, mai: kix pa ot sivie sivheng: veng Turux mai: veng Sidom khankix, pui haoh pui hun: mhong: grawh grawng: pa yuh Nawh Cao:, mai: hoek ka Nawh heue:. 9 Mawh kheu pui kied haoh kied hun: tan:, yuh ka mawx son ang kix sang theen: Nawh tom: tip, Nawh Cao: nhie: kawncau Nawh khankix kieh reu iak krox dex Nawh tix lhang: heue:. 10 Mawh kheu Nawh hoik cox pui moi: tom: nie, can pui pa koe: jhawm: saux jhawm: ngia khawm: uik, tom: theen: ka Nawh son sang pon teeh kix ka Nawh Cao:. 11 Mai: yam phi: pa seeing: pa brai: khankix yaox Nawh Cao: kix goh gup sivoe Nawh mai: kok yo ah nin:, "Maix mawh Kawn: Siyiex heue:." 12 Mai: Nawh tawm: lox ka kix tom: nie, yuh ka mawx son ang kix sang kieh pui tawng Nawh Cao: heue:.

Pa kok ka kawncau kankix

3:16-19 koe: daux lai Mth. 10:2-4; Lukax 6:14-16; Kawncau 1:13

13 Mai: Nawh Cao: haok ka gawng mai: kok pui pa simie Nawh tix kok khankix, mai: kix hoek ka Nawh heue:. 14 Mai: Nawh Cao: ciak tix deuh pui kao: kaux ra:, son sang ot kix tau mai: Nawh mai: yuh ka mawx son sang ploi: kix hu: sidiex, 15 mai: Nawh tawx kix siawp sibrawm son sang chix cox jhawm: saux jhawm: ngia moi:, mai: chix grheu: phicaox lih heue:. 16 Kao: kaux ra: an mawh, Simon pa sum: Nawh Cao: ceukaux khraox Petrux, 17 mai: Yakop kawn: simex Zebedie:, mai: Yohan pa mawh pux Yakop, mai: (Nawh Cao:, sum: ceukaux khraox kiex Bawnaji, dee bleeh ceukaux an, mawh kawn: simex sinum praix.) 18 Mai: Andare, mai: Philipux, mai: Bathawlamie:, mai: Mathiex, mai: Thomax, mai: Yakop pa mawh kawn: simex Alaphie:, mai: Thatdie:, mai: Simon pui Kananix. 19 Mai: Yudax Isakariut, pa tik pa tawx Nawh Cao: heue:.

Mai: kix hu: laig daux nyiex tix nyiex, 20 mai: pui haoh pui hun: deeh khrawm: tan: tix bawg, tom: kix ang pon tix ih pa ih pa un: heue:. 21 Yam puxaik kawn: keeing: Nawh khankix mhong: grawh grawng: an, kix hoek tix giex Nawh Cao: kheu kix ah Nawh yhot heue:.

Grawng: phimap pa ang lai chix pon pluat ploi:

3:23-27 koe: daux lai Mth. 12:25-29; Lukax 11:17-22

22 Mai: pui pa tiem: lai khankix pa lih hoek khaing: veng Yerusaliem kawx, ah nin:, "Nawh koe: Belazebulax mai: kheu een: Nawh rhawm: ka simiang phicaox Nawh tom: grheu: phicaox khankix lih heue:." 23 Mai: Nawh Cao: kok kix hoek ka Nawh, mai: Nawh teei lox phektem: ah nin: ka kix, "Satan chix grheu: Satan lih yuh ka mawx? 24 Mai: phan: meung tix meung ang khaw: paox tix, gwieh paox tix, meung an ang chix kaux chix cong: heue:. 25 Mai: phan: nyiex tix nyiex ang khaw: paox tix, gwieh paox tix, nyiex an ang chix kaux chix cong: heue:. 26 Mai: phan: Satan kaoh mai: ang khaw: ka tokaux tix, gwieh paox tix, nawh ang chix kaux chix cong:, tag sidah tag laux heue:. 27 Pui tix kaux kawx ang chix laig ka daux nyiex pui pa ting riang, mai: yuh kraung cie nawh laux, phan: nawh ang phyawk pui pa ting riang an ka:, mai: khaix an nawh tag yuh nyiex nawh laux heue:. 28 Aux krai lox tete telai ka pex, tag sang pluat phimap kawn: pui khawm: uik, mai: lox pa sa pa lao ka Siyiex khawm: uik heue:. 29 Viang mawh kawx nan:, pui mawx ang ah pa sa pa lao ka Khwan: Singax Singeh, ang pluat phimap nawh tix bawg kawx, viang mawh nan: phimap pa yuh nawh an, mawh phimap leeing: ju leeing: phan: heue:." 30 Mawh kheu hoik ah kix, "Nawh koe: phi: pa seeing: pa brai:" Nawh tom: ah nan:.

Grawng: paoxnyiex paoxma: tete

3:31-35 koe: daux lai Mth. 12:46-50; Lukax 8:19-21

31 Mai: miex Nawh Cao: mai: pux Nawh khankix hoek cung plak praix, mai: kix ploi: pui hu: ka Nawh tix kok Nawh heue:. 32 Mai: cub pui haoh pui hun: ngawm sivie Nawh Cao:, mai: kix ah nin: ka Nawh, "Jhak heue:, miex Maix mai: pux Maix khankix ot plak praix mai: sawg Maix heue:." 33 Mai: Nawh Cao: pawk lox ah nin: ka kix, "Miex Aux mai: pux Aux khankix mawh mawx?" 34 Mai: Nawh jhak ka piang pui pa ngawm sivie sivheng: Nawh khankix, mai: Nawh Cao: baox ah nin:, "Jhak heue:, miex Aux mai: pux Aux khankix. 35 Mawh kheu pui mawx ang ah pa yuh alo pa khaw: pa caw rhawm: Siyiex, pui an mawh pux Aux, mai: nan: Aux, mai: miex Aux heue:."

Simin Ting 4

Grawng: lox phektem: ka pa rhuat simie

4:1-12 koe: daux lai Mth. 13:1-15; Lukax 8:4-10, 4:13-20 koe: daux lai Mth. 13:18-23; Lukax 8:11-15

1 Mai: Nawh deeh jah tix sidiex gau dex praok rawm: nhawng: Mai: cub pui kied haoh kied hun: khrawm: paox tix hoek ka Nawh Cao:, kheu nan: Nawh laig ngawm ka daux reu, mai: reu ot ka daux rawm: nhawng:, mai: cub pui haoh pui hun: ngawm piang tiex ka praok rawm: nhawng: heue:. 2 Mai: Nawh Cao: sidiex gau kix tom: nie ceu ka daux lox phektem:, mai: Nawh ah nin: ka kix ka daux lox sidiex lox gau Nawh. 3 "Nghiet heue:, jhak heue:, pui rhuat simie hu: tix rhuat simie heue:. 4 Mai: yam rhuat nawh simie, simie tiblah cod ka dex krax, mai: sim: khankix hoek sut tix ih simie khankix heue:. 5 Mai: simie tiblah cod ka piang tiex dee koe: simaox, dee ang tiex koe: tom: nie, mai: simie an kuah dom: mawx dom: an, mawh kheu ang tiex raux tan:. 6 Mai: yam hoik lih singaix, kied hax: koek, mai: kheu ang kix koe: riah, kix kroh hu: heue:. 7 Mai: simie tiblah cod ka sinax pang: kat, mai: pang: kat an ting tom: kheem: gut kix, mai: kix ang chix plix plix heue:. 8 Mai: simie tiblah cod ka dee mhawm: tiex, mai: plix plix heue:, mai: kix ting mai: piien: tom: pon tingoe: (30) son, mai: tigliah (60) son, mai: tix yieh (100) son heue:." 9 Mai: Nawh baox ah nin:, "Kaw pa koe: yhaok tix mhong:, kieh nawh mhong: heue:."

10 Mai: yam ot Nawh Cao: nong: nong:, kix pa ot sivie sivheng: Nawh mai: kawncau Nawh kao: kaux ra: khankix hoek mai: chawk Nawh grawh grawng: lox phektem: khankix heue:. 11 Mai: Nawh Cao: ah nin: ka kix, "Hoik tawx kieh pex tawng grawh grawng: pa raux pa dex pa dawd mai: Meung Siyiex, Viang mawh kawx nan: ka kix pa ot plak praix tag krai ku ceu ka daux lox phektem: heue:. 6912 'Yuh ka mawx viang kix yaox kawx, kix yaox mai: ang yaox, mai: viang kix mhong: kawx, kix mhong: mai: ang pon tix tawng, phan: ang mawh nan: ha: kix kox deeh tieh hoek mai: luan khaing: phimap kix.'"

13 Mai: Nawh Cao: baox ah nin: ka kix, "Pex ang tawng lox phektem: in lie? Phan: mawh nan: pex tag chix tawng lox phektem: khawm: uik yuh ka mawx? 14 Pui pa rhuat simie kienie, rhuat gumlox bwan: heue:. 15 Grawh grawng: pa rhuat simie lox bwan: dex krax mawh nin:, yam hoik mhong: kix gumlox, Satan hoek dom: mawx dom: an mai: teei gumlox pa hoik rhuat ka daux kix heue:. 16 Grawh grawng: pa rhuat simie dee haoh simaox mawh nin: yam hoik mhong: kix lox bwan:, kix gauxrhawm: mai: rieb tix teei dom: mawx dom: an. 17 Mai: kix ang koe: riah ka daux tokaux tix, viang mawh nan: kix kaux kix cong: tivud khaing:. Mai: yam yaox kix krax tuktiak tukte: kheu lox bwan: kix laux rhawm: dom: mawx dom: an heue:. 18 Grawh grawng: pa rhuat simie ka daux pang: kat mawh nin:, in mawh kix pa hoik mhong: lox bwan:, 19 Mai: pa khirhawm: khirhi: pa dex pa dawd mai: haktiex, mai: pa chix pie chix lhen: sinngao, mai: pa simie tix pon tang: ceu khankix, kheem: gut lox bwan: tom: ang chix plix plix heue:. 20 Grawh grawng: pa rhuat simie dee mhawm: tiex mawh nin:, mawh kix pa mhong: gum lox bwan: mai: rieb tix teei, mai: plix plix tingoe: (30) son, mai: tigliah (60) son, mai: tix yieh (100) son heue:."

Kawkngu pa ot greem: phliex

21 Mai: Nawh Cao: baox ah nin: ka kix, "Viex kawkngu son sang sau: greem: phliex greem: ku: lie? Mai: ang mawh son sang deuh piang dee deuh kawkngu lie? 22 Mawh kheu pa hoik mox ang koe: tix ceu kawx, pa tag ang kieh sidawng:, mai: pa hoik yuh kieh glip ang koe: tix ceu kawx, pa tag ang plak kieh sidawng:. 23 Phan: pui tix kaux kaux koe: yhaok tix mhong:, kieh nawh mhong: heue:." 24 Mai: Nawh Cao: baox ah nin: ka kix, "Grawh grawng: pa hoik mhong: pex rien rhawm: tix kah, pex tong: pex tiag tix tawx ka pui tang: kaux miex ding, tag sang deeh tong: deeh tiag tix tawx ka pex yuh nan:, mai: pa lheu: khaing: an ka sang tawx ka pex heue:. 25 Mawh kheu kaw pa hoik koe:, tag sang baox tawx ka nawh heue:, mai: kaw pa ang koe:, viang pa hoik koe: nawh kawx, tag sang teei khaing: nawh heue:."

Lox phektem: grawng: pa kuah simie

4:30-32 koe: daux lai Mth. 13:31-32; Lukax 13:18-19

26 Mai: Nawh Cao: baox ah nin:, "Meung Siyiex awm: pui pa rhuat simie piang tiex. 27 Mai: nawh it ponsawm: mai: deeh kaoh ponsingaix, viang mawh nan:, grawh grawng: simie an kuah, mai: ting lhaong: yuh ka mawx, nawh ang tawng heue:. 28 Haktiex chix kieh koe: plix nong: nong: heue:. Phaoxka: kieh koe: gawng:, koe: lhax, mai: khaix an kieh koe: sigiag, mai: khaix an kieh koe: plix pa naog ka daux sigleem: nawh heue:. 29 Yam hoik kaux plix, pui an teei sivawg vawg dom: mawx dom: an, kheu bawg yam kaux hoik hoek heue:." 30 Mai: Nawh Cao: baox ah nin:, "Meung Siyiex awm: ceu pa tix? Ex tag teei lox phektem: yuh ka mawx, krai grawh grawng: nawh? 31 Awm: simie taux klaox tix mu:, pa yam rhuat piang tiex, ceu pa iak khaing: simie ku ceu khawm: uik pa koe: ka piang haktiex in heue:. 32 Viang mawh kawx nan: khaix hoik rhuat simie an, nawh kuah lih ting tom: ting khaing: num: rib num: riem khawm: uik, mai: koe: kak pa ting, tom: sim: raoma: khankix pon tix ot tix laux lee: greem: veei nawh heue:."

Grawng: teei lox phektem:

4:35-41 koe: daux lai Mth. 8:18, 23-27; Lukax 8:22-25

33 Mai: Nawh Cao: teei lox phektem: pa awm: an tom: nie, sidiex krai gumlox bwan: ka kix, pa chix nghiet kix heue:. 34 Mai: phan: ang mawh ka daux lox phek tem: Nawh ang sidiex ang krai lox ka kix, viang mawh nan: ka kawncau Nawh khankix, Nawh krai sidawng: ku ceu khawm: uik dee ang pui ot heue:.

35 Daux singaix an yam ponbo Nawh Cao: ah nin: ka kix, "Ex hu: plak toi: rawm: heue:." 36 Mai: kix prah cub pui haoh pui hun:, mai: kix viex Nawh Cao: awm: ot Nawh daux reu, mai: reu tang: reu tiblah hu: tau mai: Nawh heue:. 37 Mai: bhaung: ting hoek tix phlu:, mai: pukpak rawm: chun: laig daux reu, tom: reu an uik sang naog heue:. 38 Mai: tokaux Nawh Cao: ot plak sidax reu, it ka piang mhawn: gaong mai: kix so: Nawh siduad, mai: ah nin: ka Nawh, "Sara Cao: Gau eue:, Maix ang keud grawh grawng: hoek ex krax laux lie." 39 Mai: Nawh Cao: kaoh mai: ah ka bhaung:, mai: Nawh ah nin: ka rawm: nhawng: "Kieh nhim:, yien: heue:." Mai: bhaung: yien:, mai: rawm: nhawng: yawg tix heue:. 40 Mai: Nawh Cao: baox ah nin: ka kix, "Pex lhat yuh ka mawx? Pex ang nyang koe: krax yumrhawm: lie?" 41 Mai: kix die lhat kah, mai: tix kaux hoik tix kaux ah nin: ka paox tix, "Kaw in mawh mawx? viang bhaung: mai: rawm: nhawng: kawx nghiet lox Nawh heue:."

Simin Ting 5

Grawng: pa laig phi: pa khreeing: pa brai: ka daux lig khankix

5:1-17 koe: daux lai Mth. 8:28-34; Lukax 8:26-37, 5:18-20 koe: daux lai Lukax 8:38-39

1 Mai: kix hoek plak toi: rawm: nhawng:, ka daux meung Gadarax. 2 Mai: khaix hoik lih Nawh Cao: khaing: daux reu dom: mawx dom: an, pui tix kaux pa koe: phi: pa seeing: pa brai:, lih khaing: daux simeeig mai: rieb Nawh Cao: heue:. 3 Kaw an ot ka daux simeeig khankix, mai: pui tix kaux kawx ang pon phyawk nawh, pie ka maox ceng kawx ang pon. 4 Mawh kheu hoik sax phyawk nawh ka ceng mai: sau: gang: ka nawh lawx lawx glang: ka: an, mai: nawh hoik rud ceng mai: gang: khankix dud, mai: pui tix kaux kawx ang koe: riang tix kieh nawh nge heue:. 5 Mai: yam ponngaix ponsawm: nawh ot ka daux simeeig mai: piang gawng khankix, mai: nawh kok nawh yo, mai: teei simaox pat tokaux tix kah jheeng: jheeng: heue:. 6 Mai: yam yaox nawh Yesux dee singai nawh to: hu: mai: krub ka Nawh Cao: heue:. 7 Mai: nawh kok nawh yo lox sinum mai: ah nin:, "Yesux, Kawn: Siyiex pa ting pa lhaong: khaing: khawm: uik eue:, aux koe: pa yuh mai: Maix ceu pa tix? Aux khyox khaw: ka Maix ka daux ceukaux Siyiex, pawvi tuktiak tukte: aux heue:." 8 Kheu Nawh Cao: ah nin: ka nawh, "Phi: pa seeing: pa brai: eue:, lih hu: khaing: daux pui in heue:." 9 Mai: Nawh Cao: chawk nawh ah nin:, "Ceukaux maix kaux pa tix?" Mai: nawh pawk lox ka Nawh Cao: mai: ah nin:, "Ceukaux aux kaux Liecong70, kheu kied haoh hun: ex heue:." 10 Mai: nawh khyox khaw: ka Nawh Cao: tom: nie, yuh ka mawx son ang Nawh sang grheu: kix lih khaing: daux meung an heue:. 11 Ka dee an koe: cub lig pa kied hun: sawm: ka gawng tan: heue:. 12 Mai: kix khyox khaw: ka Nawh Cao: ah nin:, "Ploi: ex hu: ka daux lig khankix, son sang laig ex ka daux kix heue:." 13 Mai: Nawh Cao: tawx akhwang: ka kix, mai: phi: pa seeing: pa brai: khankix lih hu:, mai: laig ka daux lig khankix, mai: cub lig an pa dex koe: ra: rheng:, to: lih ka dee nie rieh nie jun: jee laig ka daux rawm: nhawng:, mai: nok yum ka daux rawm: nhawng: heue:. 14 Mai: pui liang lig khankix to: hu:, mai: krai grawh grawng: ceu an ka daux yaong: daux veng khankix, mai: pui khankix hoek tix jhak grawh grawng: pa hoik mawh an, 15 Yam hoek kix ka Yesux, mai: yaox kaw pa hoik laig phicaox khankix glangka: in pa koe: Liecong71, ngawm tan: mai: ceep kraung mai: nawh hoik deeh mhawm:, kix lhat kah heue:. 16 Mai: kix pa hoik yaox krai ka pui khankix grawh grawng: pa hoik mawh ka kaw pa laig phicaox khankix, mai: grawh grawng: lig khankix heue:. 17 Mai: kix khyox khaw: ka Nawh Cao: nhie: Nawh lih hu: khaing: daux meung kix heue:. 18 Yam laig Nawh Cao: ka daux reu, kaw pa hoik laig phicaox kah glangka: an, khyox khaw: mhaing: tix ot tau mai: Yesux. 19 Viang mawh nan: Nawh Cao: ang tawx akhwang: ka nawh, mai: ah nin: ka nawh, "ing: ka nyiex maix, mai: puxaik kawn: keeing: maix, mai: krai kix mhong: grawh grawng: pa ting pa lhaong: pa caoxrhawm: Simiang mai: yuh bwanson:, son maix heue:." 20 Mai: kaw an hu: ka daux meung Dekapolix mai: jah tix krai grawh grawng: ceu pa ting pa lhaong: pa hoik yuh Yesux son nawh, mai: pui khawm: uik daox deng: kah heue:.

Grawng: kawn: bon: YaIrux mai: bon: pa koe: jhawmsaux lih nham:

5:22-43 koe: daux lai Mth. 9:18-26; Lukax 8:41-56

21 Mai: Yesux deeh hu: plak toi: rawm: daux reu, mai: cub pui haoh pui hun: khrawm: paox tix hoek ka Nawh, yam ot Nawh dex rawm: nhawng: tan: heue:. 22 Mai: pui giex kaing: nyiex sidiex tix kaux, pa kaux YaIrux, yam yaox nawh Nawh Cao:, nawh krub dex caong Nawh, 23 mai: khyox khaw: ka Nawh Cao: ah nin:, "Kawn: nyawm bon: iak aux, dex sang yum, hoek son sang deuh Maix taix Tix piang nawh liak, yuh ka mawx son sang deeh moi: nawh mai: im: heue:." 24 Mai: Nawh Cao: hu: tau mai: kaw an, mai: cub pui haoh pui hun: hawt khaix Nawh, mai: theen: ka Nawh Cao: heue:.

25 Mai: bon: tix kaux pa hoik koe: jhawm: saux pa lih nham: kao: num ra:. 26 Pa hoik kham: geu: tom: nie ceu daux tawm: taix pui chix sidah khankix, mai: hoik cai: can pa koe: nawh khawm: uik, viang mawh nan: nawh ang moi: ceeix kawx, baox nie khaing:. 27 Kheu hoik mhong: nawh grawh grawng: Yesux, nawh hoek daux cub pui plak khaix mai: teeh kraung ceep Nawh Cao: heue:. 28 Nawh keud ah nin:, "Phan: aux teeh kraung ceep Nawh Cao: khaing:, aux tag moi: heue:." 29 Mai: nham: nawh hit dom: mawx dom: an, mai: nawh tawng daux tokaux tix grawh grawng: jhawm: saux nawh hoik moi: heue:. 30 Mai: dom: mawx dom: an Yesux tawng daux tokaux Tix, grawh grawng: siawp sibrawm hoik lih khaing: Nawh, mai: Nawh Cao: deeh gi cub pui an mai: ah nin:, "Pui mawx pa teeh kraung ceep Aux?" 31 Mai: kawncau Nawh khankix ah nin: ka Nawh Cao:, "Maix yaox cub pui haoh hun: niex ding niex dod theen: ka Maix, mai: Maix chawk, 'Pui mawx pa teeh Aux' lie?" 32 Mai: Nawh Cao: simi tix yaox vungvieang Nawh, son sang yaox pui pa hoik yuh ceu in. 33 Bon: an nawh hoik tawng pa hoik yuh ka tokaux tix, nawh tom: lhat tom: siyaung:, mai: hoek mai: krub sivoe Nawh Cao:, mai: krai ka Nawh khawm: uik rah see heue:. 34 Mai: Nawh Cao: ah nin: ka nawh, "Kawn: bon: Aux eue:, krax yumrhawm: maix hoik kieh maix moi:, hu: mhawm: mhawm: heue:. Kieh maix luan khaing: jhawm: saux maix heue:."

35 Yam kawn: sikah Nawh Cao:, pui hoek khaing: nyiex pui giex kaing: nyiex sidiex mai: ah nin:, "Kawn: bon: maix hoik yum heue:. Yuh pa tix maix lai kawn: laklheut ka Sara Cao: Gau?" 36 Yesux mhong: lox pa hoik krai an, mai: ah nin: ka pui giex kaing: nyiex sidiex, "Paw vi lhat yumrhawm: khaing: heue:." 37 Mai: Nawh Cao: ang kieh pui tix kaux kawx hawt Tix, lheu: khaing: Petrux, mai: Yakop, mai: Yohan pux Yakop heue:. 38 Mai: kix hoek ka daux nyiex pui giex kaing: nyiex sidiex, mai: Nawh Cao: yaox pa sinum siaox, mai: pui haoh pui hun: nied tix yiem riag yiem yo heue:. 39 Khaix hoik laig Nawh Cao: tan: Nawh ah nin: ka kix, "Yuh pa tix pex lai sinum siaox, mai: yiem riag yuh nin:? Kawn: nyawm in hoik yum ang mawh, mawh ngie laig it nawh khaing:." 40 Mai: kix nieb yuh pa ang nab ang yam: nyiah ka Nawh Cao: heue:. Nawh Cao: kieh pui pa ot tan: khawm: uik lih hu:, mai: Nawh teei miex keeing: kawn: nyawm an mai: kix pa ot tau mai: Nawh, mai: laig ka dee ot kawn: nyawm an heue:. 41 Mai: Nawh Cao: teei taix kawn: nyawm an mai: ah nin: ka nawh, "Talita kumix," phan: toe: lox an dee bleeh ah nin:, "Kawn: nyawm bon: eue:, Aux krai ka maix, kaoh heue:." 42 Mai: dom: mawx dom: an kawn: nyawm bon: an kaoh mai: hu:, kheu ju nawh hoik koe: kao: num ra: heue:. Mai: dom: mawx dom: an kix kied koe: krax daox krax deng: kah heue:. 43 Mai: Nawh Cao: tawm: lox ka kix tom: nie, paw kieh pui tix kaux kawx tawng grawh grawng: ceu in. Mai: Nawh Cao: nhie: kix tawx nawh ih pa ih pa un: heue:.

Simin Ting 6

Pui veng Nazariet ang yumrhawm: ka Yesux

6:1-6 koe: daux lai Mth. 13:54-58

1 Mai: Nawh Cao: lih hu: khaing: tan: mai: hoek ka daux meung tokaux Tix, mai: kawncau Nawh khankix hawt Nawh Cao: heue:. 2 Mai: yam hoek singaix twah Nawh Cao: jah tix sidiex gau ka daux nyiex sidiex, mai: pui haoh hun: pa mhong: Nawh Cao:, kied daox kied deng: mai: ah nin:, "Pui in pon ceu in khankix dee mawx? Mai: hoik tawx pingnya cuyi, pa yuh ka mawx ka Pui in? Kaing pa ting siawp sibrawm ceu in chix mawh daux tawm: taix Nawh yuh ka mawx? 3 In mawh Cang Mai, Kawn: Marix, mai: puxke: Yakop mai: Yose, mai: Yudax, mai: Simon khankix ang mawh lie?" Mai: kix laux rhawm: ka Nawh Cao: heue:. 4 Mai: Yesux ah nin: ka kix, "Cao: jhai: ang mawh pa ang koe: min: plakngai:, lheu: khaing: daux meung tokaux tix, mai: sinax paoxceu paoxcat tix, mai: ka daux nyiex tokaux tix heue:." 5 Mai: Nawh Cao: ang pon yuh kaing pa ting siawp sibrawm tan:, lheu: khaing: teei taix Tix deuh ka piang pui pa koe: jhawm: saux tiblah mai: kieh kix moi:. 6 Mai: Nawh Cao: daox deng: ka krax pa ang kix yumrhawm: heue:. Mai: Nawh Cao: hu: lailing tix sidiex gau ka daux yaong: khankix sivie sivheng: tan: heue:.

Ploi: kawncau kao: kaux ra: hu:

6:7-11 koe: daux lai Mth. 10:1,9-14; Lukax 9:1,3-5

7 Mai: Nawh Cao: kok kawncau Nawh kao: kaux ra: hoek ka Tix, mai: ploi: kix hu: tix cub ra: kaux, ra: kaux. Mai: Nawh Cao: tawx siawp sibrawm ka kix piang phi: pa seeing: pa brai: khankix heue:. 8 Mai: Nawh Cao: tawx lox ka kix, nhie: kix paw vi viex tid tix hu:, son yam hu: daux krax, lheu: khaing: khaox gix. Paw vi viex bau:, mai: khaomun, mai: mau daux hau: maox khlax. 9 Viang mawh nan: ceep kiep, mai: paw vi ceep sibex ra: pheen: heue:. 10 Mai: Nawh Cao: ah nin: ka kix, "Pex laig ka daux nyiex dee mawx ang ah, ot tan: tom: lih hu: pex khaing: tan: heue:. 11 Mai: dee mawx ang ah, pa ang rieb pex, mai: dee ang kix nghiet lox pex, yam lih hu: pex khaing: tan: khruah phawng: tiex pa koe: greem: caong pex, som sang mawh mhai: sakse: ka kix heue:." 12 Mai: kix lih hu: mai: sidiex gau, yuh ka mawx kawn: pui sang doh keud doh sawn: ka phimap heue:. 13 Mai: kix grheu: phicaox phicaig lih tom: nie, mai: kix groi rawm: bee ka pui saux haoh hun: mai: cox kix moi: heue:.

Grawng: pa yum Yohan Cao: com rawm:

6:14-29 koe: daux lai Mth. 14: 1-12, 6:14-16 koe: daux lai Lukax 9:7-9

14 Mawh kheu hoik tawng grawh grawng: ceukaux Nawh Cao: ku dah ku dee, simiang khunhawkham Herut kawx, mhong: mai: nawh ah nin:, "Yohan cao: baptis (cubcom) hoik deeh kaoh im: khaing: krax yum, mai: mawh kheu nan: siawp sibrawm khankix tom: yuh kaing ka daux nawh heue:." 15 Viang mawh kawx nan: pui tang: kaux tiblah ah, "Mawh Eliyax heue:." Mai: tang: kaux tiblah ah, "Mawh Cao: Jhai:, awm: cao: jhai: khankix tix kaux kaux pa koe: phaoxka: heue:." 16 Viang mawh kawx nan:, yam mhong: Herut grawh grawng: ceu an nawh ah nin:, "In mawh Yohan pa hoik kid aux kaing: nawh, pa hoik deeh kaoh im: heue:." 17 Grawh grawng: nawh, tokaux Herut hoik ploi: pui hu: giex Yohan mai: phyawk nawh sau: daux thawng:. Kheu Herodix moeng pux nawh Philipux, mawh kheu hoik teei nawh tix moeng heue:. 18 Kheu Yohan hoik ah nin: ka Herut, "Pa teei maix moeng pux maix, ang khaw: mai: been heue:." 19 Mai: tokaux Herodix koeng ka nawh, mai: koe: rhawm: tix sang pah nawh yum, viang mawh nan: ang kiex pon yuh. 20 Herut lhat ka Yohan, kheu tawng nawh grawh grawng: mawh nawh pui rah pui see mai: pa singax singeh, mai: nawh kia: ngien nawh heue:. Mai: yam nawh nghiet lox nawh, nawh kied sivix rhawm:, viang mawh nan: nawh koe: rhawm: gauxrhawm: tix sang nghiet nawh heue:. 21 Yam hoek bawg yam pa yie pa khaw: tix ngaix, yam Herut yuh poi singaix keh tix, son simiang nawh, mai: pui giex kaing: naing, mai: pui pa ting pa lhaong: daux meung Galilie: khankix. 22 Mai: yam kawn: bon: tokaux Herodix hoek mai: yuh thiao:, Herut mai: pui khankix pa ngawm sawm: tau mai: nawh khawrhawm: khawrhi:, mai: simiang khunhawkham: ah nin: ka bon: krih an, "Maix simie ceu pa tix ang ah, rawg ka aux mai: aux tag tawx ka maix heue:." 23 Nawh tiex nawh tu mai: baox ah nin: ka nawh, "Maix rawg maix mhaing: ceu pa tix ang ah ka aux, tom: hoek haktiex aux tix plak kawx, aux tag tawx ka maix heue:." 24 Mai: bon an lih hu: chawk ka miex nawh ah nin:, "Aux sang rawg sang mhaing: ceu patix?" Mai: miex nawh pawk lox ah nin:, "Rawg kaing: Yohan cao: baptis72 heue:." 25 Mai: bon: an grhawm: tix laig ka simiang khunhawkham dom: mawx dom: an, mai: rawg mhaing: ah nin:, "Aux simie maix tawx kaing: Yohan cao: baptis B daux tawg ka aux yamin heue:." 26 Viang simiang khunhawkham kied khirhawm: kawx, kheu lox pa hoik tiex hoik tu nawh, mai: kheu pui pa ngawm sawm: tau mai: nawh khankix, nawh ang rhawm: lheu: lox bon: an heue:. 27 Mai: dom: mawx dom: an simiang khunhawkham ploi: pui naing pa pau tix, tix kaux hu:, mai: nhie: nawh hu: viex kaing: Yohan hoek. Mai: kaw an hu: kid kaing: Yohan ka daux thawng:. 28 Mai: viex kaing: nawh daux tawg tawx ka bon: krih an heue:. Mai: bon: an tawx ka miex tix heue:. 29 Yam kawncau Yohan khankix mhong:, kix hoek mai: teei tokaux yum nawh, mai: hu: deuh hu: sipaung: nawh daux simeeig heue:.

Grawng: pa daox pa am: khaomun phwan: lon: mai: kax ra: mu:

6:32-44 koe: daux lai Mth. 14:13-21; Lukax 9:10-17; Yohan 6:5-13, 6:32-44 jhak daux lai Makux 8:2-9

30 Mai: kawncau pa ting khankix khrawm: paox tix hoek ka Yesux, mai: krai Nawh Cao: grawh grawng: khawm: uik, pa hoik yuh kix mai: pa hoik sidiex gau kix heue:. 31 Mai: Nawh Cao: ah nin: ka kix, "Pex hoek ka daux tiag dee ang pui ot, mai: laux lee: tivud heue:." Kheu pui haoh pui hun: hoek hoek hu: hu:, tom: ang kix koe: bawg yam sawm: heue:. 32 Mai: kix brug reu hu: daux tiag tix dah dee ang pui ot. 33 Mai: yam yaox pui kix hu:, mai: tawng mawh kix, pui khrawm: paox tix to: hu: ka caong tix, khaing: yaong: khaing: veng khawm: uik, mai: hoek ka sivoe kix heue:. 34 Mai: yam lih Nawh Cao: Nawh yaox cub pui haoh pui hun:, mai: Nawh Cao: caoxrhawm: ka kix, mawh kheu awm: kix yung: pa ang koe: cao: liang cao: kia:, mai: Nawh Cao: sidiex gau ka kix tom: nie ceu heue:. 35 Yam uik dex sang hoek ponbo, kawncau Nawh khankix hoek ka Nawh Cao: mai: ah nin:, "Ka dee in mawh ka daux tiag heue:, mai: dex sang hoek yam ponbo. 36 Kheu nan: kieh pui khankix hu: ka daux yaong: khankix pa koe: sivie sivheng: tin:, yuh ka mawx son sang liag kix pa ih pa un: son tokaux kix heue:." 37 Viang mawh nan: Nawh Cao: pawk lox ah nin: ka kix, "Pex tawx kix ih heue:." Mai: kix baox ah nin: ka Nawh Cao:, "Ex sang teei mau denari ra: yieh hu: liag khaomun mai: tawx kix ih lie?" 38 Mai: Nawh Cao: baox ah nin: ka kix, "Pex koe: khaomun miex lon:? Hu: jhak tix yaox." Mai: khaix hoik tawng kix kix ah nin:, koe: khaomun phwan: lon: mai: kax ra: mu: heue:." 39 Mai: Nawh Cao: nhie: pui khawm: uik yuh cub yuh caw: mai: ngawm ka piang rib pa klai heue:. 40 Mai: kix ngawm daux cub daux caw: pa koe: been tix yieh mai: pa koe: been tiphwan: (50) tix cub heue:. 41 Mai: Nawh Cao: teei khaomun phwan: lon: mai: kax ra: mu:, mai: maong ka raoma: mai: Nawh nawb bwan:, mai: Nawh sivit lon: khaomun khankix mai: tawx ka kawncau khankix, son sang viex kix tix tawx ka pui khankix heue:. Mai: Nawh Cao: gwieh kax an ra: mu: ka pui khawm: uik heue:. 42 Mai: kix khawm: uik ih mai: sak heue:. 43 Mai: kix deeh khrawm: tix teei khaomun pa max pa phawng: mai: kax, mai: naog kao: phliex ra: heue:. 44 Pui pa ih khaomun an simex giex koe: phwan: rheng: heue:.

Pa hu: Yesux ka piang rawm: nhawng:

6:45-51 koe: daux lai Mth. 14:22-32; Yohan 6:15-21, 6:53-56 koe: daux lai Mth. 14:34-36

45 Mai: khaix an dom: mawx dom: an Nawh Cao: nhie: kawncau Nawh khankix laig daux reu mai: hu: sivoe Nawh plak toi: rawm: ka veng Biesedax. Yam kawn: ploi: tokaux Nawh Cao: cub pui haoh pui hun: khankix hu:. 46 Mai: khaix Nawh Cao: hoik ploi: pui khankix, Nawh haok ka gawng son sang rawg bwan: heue:. 47 Yam hoek ponsawm: reu an ot ka greung rawm: nhawng:, mai: Nawh Cao: ot ka haktiex nong: nong: heue:. 48 Mai: Nawh Cao: yaox kawncau Nawh khankix kharhawm: tix vai: reu, kheu ang caw plak bhaung:. Yam hoek bawg yam pa pau pon: bawg tix bawg, yam ponsawm:, Nawh Cao: hu: ka caong Tix piang rawm: nhawng: hoek ka kix, mai: Nawh yuh awm: sang luan hu: khaing: kix heue:. 49 Yam yaox kix Nawh Cao: hu: ka caong Tix ka piang rawm: nhawng:, kix ce: mawh miang mai: kix tom: riag yo; 50 Kheu kix khawm: uik yaox Nawh, mai: die lhat kah. Viang mawh kawx nan: dom: mawx dom: an Nawh Cao: sikah ka kix mai: ah nin: ka kix. "Gauxrhawm: heue:. mawh Aux, paw vi lhat kah." 51 Mai: Nawh Cao: hoek dee ot kix laig daux reu, mai: bhaung: yien:, mai: kix kied daox kied deng: kah, ka daux tokaux tix heue:. 52 Mawh kheu ang kix tawng grawh grawng: lon: khaomun khankix, rhawm: kix tom: kien: heue:.

Cox pai: pui saux pui ngia ka haktiex Giennesarit

53 Mai: yam hoik tiang hoek kix plak an, kix hoek ka haktiex, ka meung Giennesarit, mai: phyawk reu ka praok heue:. 54 Yam lih kix khaing: daux reu dom: mawx dom: an pui khankix tawng mawh Nawh Cao:, 55 mai: to: hu: ku dah ku dee ka daux haktiex an. Kix mhong: grawh grawng: Nawh Cao: ot dee mawx ang ah, kix klawm: pui saux khankix piang ku: hoek tan: heue:. 56 Mai: Nawh Cao: laig daux yaong:, daux veng, daux ma: khankix, dee mawx ang ah, kix deuh pui saux khankix daux lah daux cau mai: khyox khaw: ka Nawh Cao:, yuh ka mawx son sang pon teeh kix caong sibex Nawh khaing: heue:. Mai: pa pon teeh ka Nawh Cao: ku kaux daux pui moi: heue:.

Simin Ting 7

Grawng: pa khreeing: mai: pa singax

7:1-23 koe: daux lai Mth. 15:1-20

1 Pharishie: khankix mai: pui tiem: lai tiblah kaoh khaing: veng Yerusaliem mai: khrawm: paox tix hoek ka Nawh Cao:. 2 Mai: yaox kawncau Nawh tiblah, teei taix pa seeing: pa brai:, pa mawh taix ang khoek, mai: ih khaomun, mai: kix deuh phimap heue:. 3 Mawh kheu Pharishie: khankix mai: pui Yudax khawm: uik ang ih pa ih pa un:, ka: ang kix nyang khoek taix tix mhawm: mhawm:, kheu kix hawt been tax yiex miex keeing: kix heue:. 4 Mai: yam hoek kix khaing: daux lah, ka: ang kix nyang heem: tokaux tix, kix ang ih pa ih pa un:, mai: lheu: khaing: nan: kawn: koe: been tang: ceu tom: nie pa hoik rieb kix tix teei tix hawt, pa mawh been phak kawk, mai: aw:, mai: klong: tawng khankix heue:. 5 Pharishie: mai: pui tiem: lai khankix chawk ka Nawh Cao: ah nin:, "Yuh ka mawx kawncau Maix khankix ang hawt been tax yiex miex keeing:, mai: teei taix pa seeing: pa brai: ih khaomun cie kix?" 6 Mai: Nawh Cao: ah nin: ka kix, "Cao: Jhai: Isayax hoik grux krai mhawm: mhawm: grawh grawng: pex pa mawh pui pie pui lhen: ah nin:, 73'Pui ceu in yungyi: Aux ka siyieb jheeh tix, viang mawh kawx nan: rhawm: kix singai khaing: Aux heue:. 7 Viang mawh nan: kix krub ka Aux giex going, kheu sidiex gau kix been pa yuh kawn: pui heue:.' 8 Pex tik vud lox tawm: jhawm: krai Siyiex, mai: giex been kawn: pui tom: sied heue:." 9 Mai: Nawh Cao: baox ah nin: ka kix, "Pex tik mhawm: mhawm: lox pa hoik nhie: Siyiex pex yuh, yuh ka mawx son sang pon hawt pex been pex. 10 Mawh kheu Mose hoik ah nin:, 74'Yungyi: ka miex maix mai: keeing: maix heue:,' mai: 75'kaw pa map ka miex ka keeing: tix tag kieh nawh yum tete heue:.' 11 Viang mawh kawx nan:, pex ah, 'Phan: pui tix kaux ah nin: ka miex tix, phan: ang mawh nan:, ka keeing: tix, cie aux ceu pa tix ang ah pa lo mai: pa sang koe: bwanson:, son maix mawh Kawban,' (Pa ah nan:, sang ah, 'pa hoik tan hoik tawx ka Siyiex'). 12 Pex ang baox kieh nawh yuh tix ceu kawx son miex keeing: nawh. 13 Mawh kheu nan: pex yuh laux gumlox Siyiex, kheu been pex pa toe: tix tawx tix ju hoik tix ju heue:. Mai: pex yuh pa awm: in tom: nie ceu heue:." 14 Mai: yam an Nawh Cao: kok pui khawm: uik hoek ka Tix, mai: Nawh Cao: ah nin: ka kix, "Pex ku kaux daux pui nghiet Aux, mai: kieh tawng heue:. 15 Pa koe: plak praix kawn: pui ang koe: tix ceu kawx, pa chix laig daux nawh mai: kieh nawh seeing: brai:, viang mawh kawx nan: mawh ceu pa lih khaing: daux kawn: pui pa chix kieh nawh seeing: brai: heue:. 16 Pui mawx ang ah, phan: nawh koe: yhaok tix mhong:, kieh nawh mhong: heue:." 17 Yam Nawh Cao: lih khaing: cub pui haoh pui hun:, mai: hoik laig daux nyiex tix nyiex, kawncau Nawh khankix chawk Nawh grawh grawng: lox phektem: an heue:. 18 Mai: Nawh Cao: ah nin: ka kix, "Pex kawx ang chix tawng ang chix nghiet lie? Pex ang tawng grawh grawng: ceu pa ot plak praix mai: laig ka daux kawn: pui, ang chix kieh nawh seeing: brai: lie? 19 Mawh kheu ceu an khankix ang laig ka daux rhawm: nawh, viang mawh nan: laig ka daux vaig nawh mai: baox lih hu: ka daux, daux iang: heue:." Pa krai Nawh nan:, Nawh sang ah pa ih pa un: khawm: uik mawh pa singax heue:. 20 Mai: Nawh Cao: baox ah nin:, "Mawh ceu pa lih khaing: daux kawn: pui pa chix kieh nawh seeing: brai: heue:. 21 Kheu mawh khaing: plak daux, daux rhawmrhi: kawn: pui pa chix keud ceu pa ang mhawm: ang mhiem: khankix heue:. Pa mawh ceu pa phit mai: moeng pui, mai: ceu pa phit pa vao mai: bon:, mai: ceu pa pah pui yum, 22 mai: ceu pa briex pa lak, mai: ceu pa ghoing: ka cie pui, mai: ceu pa yuh pa caox khankix, mai: ceu pa pie pa lhen:, mai: ceu pa simie tix yuh ceu pa ang khaw: ang jiet, mai: ceu pa bohrhawm: pa khoi:, mai: ceu pa sa pa lao ka Siyiex, mai: ceu pa ting rhawm: ting rhi:, mai: pa yuh ceu pa daox pa aw: khankix heue:. 23 Ceu pa ang mhawm: ang mhiem: ceu in khawm: uik, mawh ceu pa lih khaing: plak daux, mai: kieh pui seeing: brai: heue:."

Krax yumrhawm: bon: ceu pui meung Suripiniki

7:24-30 koe: daux lai Mth. 15:21-28

24 Mai: Nawh Cao: kaoh khaing: tan: mai: hu: daux haktiex veng Turux mai: veng Sidom, mai: laig ka daux nyiex tix nyiex, Nawh ang rhawm: kieh pui tawng, viang mawh kawx nan: Nawh ang pon tix mox heue:. 25 Mai: bon: tix kaux pa koe: kawn: bon: iak tix kaux pa laig phi: pa seeing: pa brai:, mhong: grawh grawng: Nawh Cao:, mai: hoek krub ka caong Nawh heue:. 26 Bon: an mawh ceu Helasax, pui meung Suripiniki. Mai: kiex khyox khaw: ka Nawh Cao:, nhie: Nawh grheu: phicaox an lih khaing: kawn: bon: tix heue:. 27 Mai: Nawh Cao: ah nin: ka kiex, "Kieh kawnpraix sawm: tom: sak ka: ha:, mawh kheu ang khaw: tix teei khaomun cie kawnprai khankix taing ka sox heue:.' 28 Viang mawh kawx nan: bon: an deeh pawk lox mai: ah nin: ka Nawh Cao:, "Mawh heue:, Simiang eue:, viang mawh sox khankix kawx, ih pa cod pa roik greem: pheen: sawm: kawnpraix khankix heue:." 29 Mai: Nawh Cao: baox ah nin: ka kiex, "Mawh kheu gumlox in pax hu: heue:. Phicaox hoik lih hu: khaing: daux kawn: bon: pax heue:." 30 Mai: bon: an deeh ing: ka nyiex tix, mai: yaox kawn: nyawm an it ka piang ku:, mai: phicaox hoik lih hu: heue:.

Cox pai: ka pui pa lheet pa kle:

7:31-37 koe: daux lai Mth. 15:29-31

31 Mai: Nawh Cao: baox lih hu: khaing: haktiex Turux, mai: hu: preeng: meung Sidom, mai: hu: preeng: sinax meung Dikapolix mai: sidah sidu hoek ka rawm: nhawng: Galilie: heue:. 32 Mai: kix viex pui pa lheet yhaok, mai: kle: yam sikah tikaux, mai: kix khyox khaw: ka Nawh Cao:, nhie: Nawh deuh taix Tix piang kaw an heue:. 33 Mai: Nawh Cao: teei nawh lih hu: khaing: cub pui haoh pui hun:, dee ang pui ot, mai: Nawh Cao: teei gien: taix Tix sau: daux yhaok kaw an, mai: Nawh Cao: baig rawmmya: mai: teeh ka dak nawh heue:. 34 Mai: Nawh maong plak raoma: mai: ngia mai: ah nin: ka kaw an, "Ephathax." (Pa ah nan:, sang ah, "Paoh heue:.") 35 Mai: yhaok nawh paoh heue:, mai: siniag dak nawh deeh ghah, mai: nawh chix sikah sidawng: heue:. 36 Mai: Nawh Cao: tawm: lox ka kix, yuh ka mawx son ang kix krai ka pui tix kaux kawx. Viang mawh nan: Nawh Cao: tawm: lox ka kix miex ding, kix nie kieh tah hu: heue:. 37 Mai: kix kied daox kied deng: ka tete tom: ang chix tiag chix krai, mai: ah nin:, "Nawh hoik yuh khawm: uik mhawm: mhawm: heue:. Viang mawh pui pa lheet yhaok kawx Nawh deeh cox kieh mhong:, mai: pui aw: kawx, deeh kieh chix sikah heue:."

Simin Ting 8

Khaomun aliah lon: pui pon: rheng: ih sak

8:1-9 koe: daux lai Mth. 15:32-39, 8:1-9 jhak daux lai Makux 6:32-44, 8:11-21 koe: daux lai Mth. 16:1-12

1 Daux bawg yam singaix an khankix, yam baox koe: cub pui haoh pui hun:, mai: kix ang koe: pa ih pa un: tid tix. Nawh Cao: kok kawncau Nawh khankix mai: ah nin: ka kix, 2 "Aux caoxrhawm: ka pui haoh pui hun: khankix, kheu hoik ot kix mai: Aux loe: singaix mai: ang koe: pa ih tid tix heue:. 3 Mai: phan: Aux ploi: kix ing: ka nyiex kix, yam kawn: cairhawm: kix, kix tag khrup rhawm: hawt krax heue:. Lheu: khaing: in, kix tiblah hoek khaing: dee singai heue:." 4 Mai: kawncau Nawh khankix pawk lox mai: ah nin: ka Nawh Cao:, "Pon tix kieh pui khankix sak ka khaomun daux tiag yuh ka mawx?" 5 Mai: Nawh Cao: chawk kix ah nin:, "Pex koe: khaomun miex lon:?" Mai: kix deeh krai "Koe: aliah lon: heue:." 6 Mai: Nawh Cao: nhie: pui haoh pui hun: khankix ngawm piang tiex, mai: Nawh teei khaomun aliah lon: an, mai: khaix hoik yaogyaw bwanson:, Nawh Cao: sivit mai: tawx ka kawncau Nawh khankix, kieh kix tawx ka pui khankix. Mai: kix viex hu: tawx ka pui haoh pui hun: khankix heue:. 7 Mai: kax iak kawx kix koe: ceeix. Khaix hoik nawb bwanson:, kax an kawx, Nawh Cao: nhie: tawx ka pui khankix heue:. 8 Mai: kix ih tom: sak heue:, mai: kix khrawm: pa max pa phawng: pa lheu:, aliah phliex heue:. 9 Mai: kix pa hoik ih khankix dex koe: pon: rheng: heue:. Mai: Nawh Cao: ploi: pui khankix hu: heue:. 10 Mai: dom: mawx dom: an Nawh Cao: laig ka daux reu, tau mai: kawncau Nawh khankix, mai: hoek ka daux haktiex Dalamanutha heue:.

Grawng: pa ang tawx yaox mhai: pa daox pa am: pa mhaing: kixtix yaox

11 Mai: Pharishie: khankix lih hoek mai: chawk lox ka Nawh Cao:, mai: sawg tix kieh Nawh Cao: jhi: kix yaox mhai: pa daox pa am: khaing: raoma:, son sang cheuk tix yaox rhawm: Nawh heue:. 12 Mai: Nawh Cao: ngia daux khwan: Tix mai: ah nin:, "Yuh pa tix pui ju in sawg mhai: pa daox pa am:? Aux krai lox tete telai ka pex, tag ang tawx mhai: pa daox pa am: ka pui ju in tix ceu kawx heue:." 13 Mai: Nawh Cao: lih khaing: kix, mai: deeh laig ka daux reu, mai: hu: plak toi: rawm: heue:.

Susaix pui Pharishie: khankix

14 Mai: kix piawm: tix viex khaomun hu:, mai: ang lai koe: khaomun mai: kix daux reu, lheu: khaing: tix lon: khaing:. 15 Mai: Nawh Cao: tawm: lox ka kix ah nin:, "Rien rhawm: tix ka susaix Pharishie: khankix, mai: susaix Herut heue:." 16 Mai: kix tix kaux hoik tix kaux keud tix ah nin: ka paox tix, "Mawh kheu ang koe: khaomun heue:." 17 Mai: Yesux tawng grawh grawng: an, tom: ah nin: ka kix, "Yuh pa tix pex keud tix ah ka paox tix, kheu ang pex koe: khaomun? Pex ang chix yaox ang chix tawng lie? Rhawm: rhi: pex kawn: kien: lie? 18 Pex koe: ngai: kawx, ang chix yaox lie? Pex koe: yhaok kawx, ang chix mhong: lie? Pex ang nyang doh keud kah lie? 19 Yam sivit Aux khaomun phwan: lon: tix tawx ka pui phwan: rheng:, pex hoik pon tix khrawm: pa max pa phawng: miex phliex?" Mai: kix ah nin: ka Nawh Cao:, "Pon kao: phliex ra: heue:." 20 "Yam Aux sivit khaomun aliah lon: tawx ka pui pon: rheng:, pex pon tix khrawm: pa max pa phawng: miex phliex?" Mai: kix baox ah nin: ka Nawh Cao:, "Pon aliah phliex heue:." 21 Mai: Nawh Cao: baox ah nin: ka kix, "Pex ang nyang bax tawng lie?"

Pa pai: pui dugngai:

22 Mai: kix hoek ka veng Biesedax. mai: pui viex pui pa dugngai: tix kaux hoek ka Nawh Cao:, mai: kix khyox khaw: ka Nawh Cao: nhie: Nawh teeh ka kaw an heue:. 23 Mai: Nawh Cao: giex taix pui dugngai: an mai: viex nawh lih hu: plakpraix veng, mai: khaix hoik baig Nawh Cao: rawmmya: ka piang ngai: nawh, mai: deuh taix Tix ka piang nawh, Nawh Cao: chawk ah nin: ka kaw an, "Maix uik chix yaox tix ceu ceu lie?" 24 Mai: kaw an yaog tix jhak mai: ah nin:, "Aux yaox pui heue:, kheu aux yaox kix awm: khaox pa hu: krax heue:." 25 Mai: Nawh Cao: baox deuh taix Tix ka piang ngai: kaw an, mai: nawh jhak mhawm: mhawm:, mai: nawh moi: deeh chix yaox, tom: nawh uik grum yaox ku ceu sidawng: heue:. 26 Mai: Nawh Cao: ploi: nawh ing: ka nyiex nawh, mai: ah nin:, "Paw vi laig ka daux yaong: an, mai: paw vi krai ka pui tix kaux kawx ka daux yaong: an heue:."

Krax pa tawng mai: pa yumrhawm: Petrux

8:27-29 koe: daux lai Mth. 16:13-16; Lukax 9:18-20

27 Mai: Yesux lih hu: tau mai: kawncau Nawh khankix mai: laig ka daux yaong: Kesarix Philipux khankix. Yam kawn: hu: krax Nawh Cao: chawk ka kawncau Nawh khankix ah nin:, "Pui khankix ah Aux mawh mawx?" 28 Mai: kix krai ka Nawh Cao: ah nin:, "Tiblah ah mawh Yohan cao: baptis76, mai: tiblah ah mawh Eliyax, viang mawh nan: tiblah ah mawh Cao: Jhai: tix kaux kaux heue:." 29 Mai: Nawh Cao: baox ah nin: ka kix, "Viang mawh nan: pex ah Aux mawh mawx?" Petrux pawk lox mai: ah nin: ka Nawh Cao:, "Maix mawh Khrit heue:." 30 Mai: Nawh Cao: tawm: lox ka kix, son ang kix sang krai grawh grawng: Nawh Cao: ka pui tix kaux kawx heue:.

Pa grux krai Yesux ka pa sang kham: geu: Tix krax yum

8:31-9:1 koe: daux lai Mth. 16:21-28; Lukax 9:22-27

31 Mai: Nawh Cao: jah tix gau ka kix, "grawh grawng: Kawn: kawn: pui tag sang kham: geu: tom: nie ceu, mai: tag kham: geu: pa tik pa vud kuad song: khankix, mai: cao: giex kaing: li pa ting khankix, mai: pui tiem: lai khankix, mai: grawh grawng: tag kham: geu: pa teei yum, mai: grawh grawng: khaix an loe: singaix tag deeh kaoh im: heue:." 32 Mai: Nawh Cao: krai ceu an sidawng: heue:. Petrux teei Nawh Cao: hu: mai: ah ka Nawh heue:. 33 Viang mawh kawx nan: khaix Nawh Cao: hoik veeh mai: yaox kawncau Nawh khankix, Nawh Cao: ah ka Petrux yuh nin:, "Satan eue:, hu: plak khaix Aux, kheu ang maix keud grawh grawng: ceu pa dex pa dawd mai: Siyiex, viang mawh nan: maix keud grawh grawng: ceu pa dex pa dawd mai: kawn: pui khaing:." 34 Mai: Nawh Cao: kok cub pui haoh pui hun: khankix mai: kawncau Nawh khankix, hoek ka Tix, mai: ah nin: ka kix, "Phan: pui tix kaux kaux simie tix hoek khaix Aux, kieh nawh thiang: tix tik tokaux tix, mai: klawm: khaoxlhak tix, mai: hawt Aux heue:. 35 Mawh kheu pui mawx ang ah, pa simie tix taohju tokaux tix, tag sang som ju heue:. Mai: pui mawx ang ah pa som ju son Aux, mai: son lox bwan: gauxrhawm: gauxrhi:, tag pon tix taoh ju heue:. 36 Grawh grawng: nawh, phan: pui tix kaux kaux pon haktiex khawm: uik, mai: som ju tokaux tix, sang koe: bwanson: yuh ka mawx? 37 Grawh grawng: nawh, pui pon tix teei pa yuh ka mawx, deeh taoh ju tix kah? 38 Mawh kheu pui mawx ang ah, pa kaig kheu Aux mai: gumlox Aux, ka daux bawg yam ju pui in, pa phit pa vao mai: pa ting map ting grham:, Kawn: kawn: pui kawx, tag sang kaig kheu nawh, yam Nawh viex min: plakngai: Keeing: Tix, mai: kawncau Siyiex pa singax singeh hoek heue:."

Simin Ting 9

Pa loh Nawh tokaux Tix ka piang gawng

9:2-8 koe: daux lai Lukax 9:28-36, 9:2-13 koe: daux lai Mth. 17:1-13

1 Mai: Nawh Cao: baox ah nin: ka kix, "Aux krai lox tete telai ka pex. Koe: pui pa cung dex tin: tiblah, pa tag ang cim krax yum, tom: ka: ang kix bax yaox pa hoik hoek Meung Siyiex ka daux siawp sibrawm heue:."

2 Khaix an liah singaix, Yesux teei Petrux, mai: Yakop, mai: Yohan, mai: viex kix haok ka piang gawng lhaong: nong: nong:, ka dee ang pui ot, mai: tokaux Nawh Cao: loh sivoe kix tan: heue:. 3 Mai: kraung ceep Nawh kied paing cawt tom: lih riang, mai: tom: pui sidaux kraung piang haktiex in tix kaux kawx, ang chix kieh paing awm: an heue:. 4 Mai: kix yaox Eliyax hoek tau mai: Mose, mai: kiex sikah mai: Yesux heue:. 5 Mai: Petrux ah nin: ka Yesux, "Rabi eue:, ex ot tin: mhawm: son ex heue:, kieh ex yuh nyiex bang: loe: lhang:. Son Maix tix lhang:, mai: son Mose tix lhang:, mai: son Eliyax tix lhang: heue:." 6 Kheu kix kied lhat, mai: nawh ang tawng lox pa sang krai, nawh tom: ah nan: heue:. 7 Mai: paiawm: hoek tix kheem: veei kix, mai: lox lih khaing: paiawm: an ah nin:, "In mawh Kawn: pa moh Aux heue:, nghiet Nawh heue:." 8 Yam an dom: mawx dom: an kix jhak vung viang kix, mai: ang kix yaox pui tix kaux kawx lheu: khaing: Yesux nong: nong:, pa ot tau mai: kix heue:.

9 Mai: yam lih hoek kix khaing: gawng, Nawh Cao: tawm: lox ka kix, "yuh ka mawx son ang kix krai ka pui tix kaux kawx, grawh grawng: ceu pa hoik yaox kix, ka: ang Kawn: kawn: pui nyang bax deeh kaoh khaing: krax yum heue:." 10 Kix priex tix hawt lox an, mai: chawk paox tix tix kaux hoik tix kaux grawh grawng: dee tag bleeh lox pa ah, "Deeh kaoh khaing: krax yum heue:." 11 Mai: kix chawk Nawh Cao: ah nin:, "Yuh ka mawx pui tiem: lai khankix ah Eliyax tag sang hoek phaoxka:?" 12 Mai: Nawh Cao: ah nin: ka kix, "Eliyax tag hoek phaoxka: tete, mai: cox mhawm: khawm: uik heue:. Mai: pa hoik tiem: grawh grawng: Kawn: kawn: pui, tag kham: geu: tom: nie ceu, mai: pa tik pa vud sang yuh ka mawx? 13 Viang mawh nan: Aux krai ka pex, Eliyax hoik hoek heue:, mai: kix hoik yuh ka nawh awm: pa simie kix tix yuh awm: pa hoik tiem: grawh grawng: nawh heue:."

Grawng: pa ang kawncau khankix pon grheu: phi:

9:14-28, 30-32 koe: daux lai Mth. 17:14-19, 22-23; Lukax 9:37-45

14 Mai: yam hoek kix ka kawncau Nawh khankix, kix yaox cub pui haoh pui hun: ot sivie kix tan:, mai: pui tiem: lai khankix chawk lox ka kix tan: heue:. 15 Mai: dom: mawx dom: an yam cub pui haoh pui hun: khawm: uik yaox Nawh Cao:, kix kied daox kied deng: kah, mai: to: hu: ka Nawh Cao: mai: ah lox nawb ka Nawh heue:. 16 Mai: Nawh Cao: ah nin: ka kix, "Pex chawk lox pa tix ka kix?" 17 Mai: pui tix kaux ka daux cub pui hun: pawk lox mai: ah nin: ka Nawh Cao:, "Sara Cao: Gau eue:, aux hoik viex kawn: simex aux pa laig phi: pa aw: hoek ka Maix heue:. 18 Mai: phi: an giex nawh dee mawx ang ah, nyhot nawh goh, mai: bai lih khaing: jheeh nawh, mai: nawh greeik rhang: tix, mai: krawx hu: heue:. Mai: aux khyox ka kawncau Maix khankix nhie: kix grheu: phi: an lih, viang mawh nan: kix ang pon grheu: lih heue:." 19 Mai: Nawh Cao: pawk lox mai: ah nin: ka kix, "Pui ju pa ang koe: krax yumrhawm: yumrhi: eue:, Aux tag kawn: sang ot mai: pex miex grheung:? Aux tag kawn: sang gun sang yeung pex miex grheung:? Viex nawh hoek ka Aux heue:." 20 Mai: kix viex nawh hoek ka Nawh Cao:, mai: yam phi: an yaox Nawh Cao: dom: mawx dom: an nawh nyhot kaw an goh piang tiex, mai: nawh lulieh tix, mai: bai lih khaing: jheeh nawh heue:. 21 Mai: Nawh Cao: chawk ka keeing: nawh ah nin:, "Ceu in hoik hoek ka nawh miex grheung:?" Mai: keeing: nawh pawk lox ah nin:, "Mawh tom: yam mawh nawh kawn: nyawm iak heue:. 22 Mai: yuh ka mawx son sang yuh nawh laux, phi: an hoik taing nawh daux ngu, mai: daux rawm: lawx lawx heue:. Viang mawh nan:, phan: Maix chix yuh tix ceu ceu, caoxrhawm: ka ex, mai: teem: liak." 23 Mai: Yesux baox ah nin: ka nawh, "Maix ah, 'Phan: Maix chix,' pui pa yumrhawm: yumrhi: chix ku ceu heue:." 24 Mai: dom: mawx dom: an keeing: kawn: nyawm an yo mai: ah nin:, "aux yumrhawm: heue:, teem: krax ang yumrhawm: aux liak." 25 Mai: yam yaox Yesux cub pui haoh pui hun: to: hoek tau, Nawh Cao: ah ka phi: pa seeing: pa brai:, lox ah nin:, "Phi: pa aw: pa lheet eue:, Aux tawx lox ka maix, lih khaing: daux nawh, mai: paw lai baox laig ka nawh heue:." 26 Mai: phi: an kok yo mai: biak nawh mai: lih hu: khaing: daux nawh heue:. Mai: kawn: nyawm an lih mawh awm: pui pa hoik yum, tom: pui haoh hun: ah nin:, "Nawh hoik yum heue:." 27 Viang mawh nan: Yesux teei taix nawh mai: yaog nawh, mai: nawh kaoh heue:. 28 Yam hoik laig Nawh Cao: ka daux nyiex, mai: yam kawncau Nawh ot tau mai: Nawh Cao: nong: nong:, kix chawk Nawh ah nin:, "Yuh ka mawx ang ex pon tix grheu: phi: an lie?" 29 Mai: Nawh Cao: pawk lox mai: ah nin: ka kix, "Phi: ceu in phan: ang mawh kheu rawg bwan: mai: pa twah pa ih pa un: ang pon tix lih heue:." 30 Mai: kix lih hu: khaing: tan:, mai: hu: preeng: ka daux meung Galilie:, mai: Nawh Cao: ang rhawm: kieh pui tawng tix kaux kawx heue:. 31 Kheu Nawh Cao: gau ka kawncau Nawh khankix, mai: ah nin: ka kix, "Tag sang tawx Kawn: kawn: pui ka daux tawm: taix kawn: pui khankix, mai: kix tag teei Nawh yum, mai: khaix hoik yum Nawh loe: singaix Nawh tag deeh kaoh im: heue:." 32 Viang kix ang tawng dee bleeh lox an kawx, kix lhat chawk ka Nawh Cao: heue:.

Daux Meung Raoma: mawx pa ting

9:33-37 koe: daux lai Mth. 18:1-5; Lukax 9:46-48

33 Mai: kix hoek ka veng Kapenion, mai: yam ot Nawh Cao: ka daux nyiex, Nawh chawk kix ah nin:, "Yam hoek pex daux krax pex kum: pex thung: thiang: paox tix grawh grawng: patix?" 34 Viang mawh nan: kix ang nye:, kheu hoik thung: thiang: kix paox tix, yam hoek daux krax, grawh grawng: pui mawx daux kix, lheu: ting khaing: paox tix heue:. 35 Mai: Nawh Cao: ngawm kok kix kao: kaux ra: hoek, mai: Nawh ah nin: ka kix, "Phan: pui tix kaux kaux simie tix ting khaing: paox tix, nawh tag mawh kaw pa dah khaix khawm: uik, mai: siliex khawm: uik heue:." 36 Mai: Nawh Cao: teei kawn: nyawm iak tix kaux, mai: deuh nawh sinax kix, mai: kawm nawh ka taix Tix, mai: Nawh Cao: ah nin: ka kix, 37 "Pui mawx ang ah pa rieb tix teei kawn: nyawm iak pa awm: in khankix, tix kaux, ka daux ceukaux Aux, rieb tix teei Aux, mai: pui mawx ang ah pa rieb tix teei Aux, rieb tix teei Aux ang mawh, viang mawh nan: rieb tix teei Kaw pa ploi: Aux hoek heue:."

Grawng: pa nyaw glaw: phimap

9:38-40 koe: daux lai Lukax 9:49-50

38 Yohan ah nin: ka Nawh Cao:, "Sara Cao: Gau eue:, ex yaox pui tix kaux pa grheu: phicaox lih ka daux ceukaux Maix, mai: ex kieh nawh kheu ang nawh hawt mai: ex heue:." 39 Viang mawh nan: Yesux ah nin:, "Paw vi kieh nawh, kheu ang koe: pui tix kaux kawx, pa yuh kaing pa ting siawp sibrawm ka daux ceukaux Aux, pa pon tix krai pa caox grawh grawng: Aux laung laung heue:. 40 Mawh kheu pui pa ang koeng ka ex, ot plak ex heue:. 41 Pui mawx ang ah pa tawx pex nyaux rawm: tix kawk, mawh kheu mawh pex cie Cao: Khrit, Aux krai lox tete telai ka pex, bwanson:, cie nawh tag ang piawm: ang grai: heue:. 42 Mai: pui mawx ang ah pa kieh kawn: nyawm iak khankix pa yumrhawm: ka Aux tix kaux kaux sideeing caong tix, lheu: mhawm: son kaw an, phan: preue: simaox mhaw: pa ting ka ngawg nawh mai: taing nawh ka daux rawm: sigrit sigra: heue:. 43 Mai: phan: taix maix kieh maix sideeing caong tix, kid tix tik heue:. Laux taix maix mai: laig ka daux pa im: ju, mhawm: khaing: koe: taix ra: khawn: mai: laig ka daux mawnarhok, ka daux ngu pa ang chix yeet heue:. 44 Dee ang kawng chix yum mai: dee ang ngu chix yeet. 45 Mai: phan: caong maix kieh maix sideeing caong tix, kid tix tik heue:. Laux caong maix mai: laig ka daux pa im: ju, mhawm: khaing: koe: caong ra: khawn: mai: taing sau: ka daux mawnarhok, ka daux ngu pa ang chix yeet heue:. 46 Dee ang kawng chix yum, mai: dee ang ngu chix yeet. 47 Mai: phan: ngai: maix kieh maix sideeing caong tix, koh tix tik heue:. Koe: ngai: maix tix khawn: mai: laig ka daux Meung Siyiex, mhawm: khaing: koe: ngai: ra: khawn: mai: taing sau: daux mawnarhok heue:." 48 Dee ang kawng chix yum, mai: dee ang ngu chix yeet. 49 Kheu tag teei kih ngu sau: ka pui ku kaux daux pui, mai: pa tan pa lu ku mu:, tag teei kih sau: kah heue:. 50 Kih kienie mawh pa mhawm:, viang mawh kawx nan: phan: pa laoh kih hoik grai:, tag sang teei pa yuh ka mawx tix deeh chix kieh nawh laoh? Kieh kih koe: ka daux tokaux pex, mai: kieh tix kaux hoik tix kaux khaw: paox tix heue:."

Simin Ting 10

Grawng: pa tik moeng

10:1-12 koe: daux lai Mth. 19:1-9

1 Mai: Nawh cao: kaoh khaing: tan: mai: hoek ka daux haktiex Yudax plak toi: rawm: Yawdan, mai: cub pui haoh pui hun: baox deeh khrawm: paox tix hoek ka Nawh Cao:, mai: Nawh Cao: baox deeh sidiex gau ka kix awm: pa hoik sax yuh Nawh heue:. 2 Mai: Pharishie: tiblah hoek ka Nawh mai: chawk Nawh Cao: ah nin:, son sang cheuk tix yaox Nawh, "Pui khaw: tix tik moeng tix lie?" 3 Mai: Nawh Cao: baox pawk lox mai: ah nin: ka kix, "Mose hoik nhie: pex yuh ka mawx?" 4 Mai: kix ah nin:, "Mose kieh tiem: lai grawh grawng: hoik hoik lox, mai: kieh tik nawh heue:." 5 Viang mawh kawx nan:, Yesux ah nin: ka kix, "Mawh kheu kien: rhawm: pex Mose tom: tiem: tix deuh lox tawm: pa yuh nan: heue:. 6 Tom: yam jah vah ma: la: rawm: dix, Siyiex yuh simex mai: bon: heue:. 777 'Mawh kheu grawng: in simex tag prah miex keeing: tix, mai: ot tau mai: moeng tix. 8 Mai: kiex ra: kaux tag mawh nex nham: tix mu: khaing:,' mawh kheu nin:, kiex ang lai deeh mawh ra: kaux, viang mawh kawx nan: mawh tix kaux khaing: heue:. 9 Mawh kheu in pa hoik kleuk Siyiex tau paw kieh pui yieh heue:." 10 Mai: yam ot ka daux nyiex kawncau Nawh khankix baox chawk ka Nawh Cao: grawh grawng: ceu an heue:. 11 Mai: Nawh ah nin: ka kix, "Pui mawx ang ah pa tik moeng tix, mai: baox moeng tang: kaux, phit vao ka bon: an heue:. 12 Mai: phan: bon: tik mex tix, mai: baox mex tang: kaux, nawh phit nawh vao heue:."

Nawb bwan: ka kawn: nyawm iak khankix

10:13-16 koe: daux lai Mth. 19:13-15; Lukax 18:15-17

13 Mai: kix viex kawn: nyawm iak khankix hoek ka Nawh Cao:, yuh ka mawx son sang teeh Nawh kix, viang mawh nan: kawncau khankix ah ka pui khankix heue:. 14 Viang mawh kawx nan: yam yaox Yesux, Nawh Cao: songrhawm:, mai: ah nin: ka kix, "Kieh kawn: nyawm iak khankix hoek ka Aux, paw vi sidien kix, kheu Meung Siyiex mawh cie pa awm: kix heue:. 15 Aux krai lox tete telai ka pex, pui mawx ang ah pa ang rieb tix teei Meung Siyiex awm: kawn: nyawm iak, tag ang tau tix pon tix laig tan: heue:." 16 Mai: Nawh Cao: kawm kix daux taix Tix, mai: deuh taix Tix ka piang kix, mai: nawb bwan: ka kix heue:.

Grawng: lox pa chawk Cao: mi pa awn: ju

10:17-31 koe: daux lai Mth. 19:16-30; Lukax 18:18-30

17 Mai: yam Nawh Cao: lih hu: ka daux krax, pui tix kaux to: hoek ka Nawh, mai: grux ngawng mai: chawk ka Nawh Cao: ah nin:, "Sara Cao: Gau pa mhawm: eue:, aux tag yuh ka mawx, son sang pon aux ju leeing: ju leeing: phan:?" 18 Mai: Yesux pawk lox ah nin: ka nawh, "Yuh ka mawx maix lai kok Aux mawh 'pa mhawm:?' Lheu: khaing: Siyiex tix kaux khaing:, tix kaux kawx ang mhawm: heue:. 19 Maix tawng lox pingnyap khankix, 78'Paw teei ju pui yum, paw phit paw vao, paw briex paw lak, paw kham: mhai: sakse: pa ang mawh ang meh, paw lhen: tix teei kraung cie pui, yung: yi: ka miex ka keeing: tix heue:.'" 20 Mai: kaw an pawk lox mai: ah nin: ka Nawh Cao:. "Sara Cao: Gau eue:, aux hoik hawt tix yuh ceu an khankix khawm: uik tom: yam iak aux heue:." 21 Yesux jhak ka kaw an mai: moh nawh, mai: ah nin: ka nawh, "Pa taig mai: kawn: koe: tix ceu. Hu: coh pa koe: maix ku ceu mai: tawx ka pui hot pui sibhawm: khankix, mai: maix tag koe: kraung khrai: ka daux meung raoma:, mai: hoek tix hawt Aux heue:." 22 Mai: nawh khirhawm: khirhi: voi rhawm: tix mai: lih hu: heue:. Kheu mawh nawh pui pa koe: kraung khrai: tom: nie heue:.

23 Mai: Yesux jhak tix yaox vung viang Nawh, mai: ah nin: ka kawncau Nawh khankix, "Pui pa mawh cao: mi nu son sang laig ka daux Meung Siyiex miex ding heue:." 24 Mai: kawncau Nawh khankix kied daox deng: ka lox Nawh Cao: an, viang mawh nan: Yesux baox deeh ah nin: ka kix, "Kawn: praix eue:, pui pa een: rhawm: ka sinngao tix khankix, nu son sang laig ka daux Meung Siyiex miex ding heue:. 25 Laig Kala-uk daux kre: nyex lheu: yie khaing: laig cao: mi ka daux Meung Siyiex heue:." 26 Viang mawh nan: kix kied daox kied deng: kah, mai: ah nin: ka Nawh Cao:, "Phan: mawh nan:, pui mawx tag sang pon hoek krax taoh?" 27 Yesux jhak ka piang kix mai: ah nin:, "Grawh grawng: in kawn: pui ang chix yuh. Viang mawh nan: ang mawh pa ang Siyiex chix yuh, kheu Siyiex chix yuh ku ceu ku cawng khawm: uik heue:." 28 Yam an Petrux ah nin: ka Nawh Cao:, "Jhak heue:, ex hoik prah hoik tik khawm: uik, mai: hoik hawt Maix heue:." 29 Yesux ah nin:, "Aux krai lox tete telai ka pex, ang koe: pui tix kaux kawx pa hoik prah hoik grham: nyiex nawh, phan: ang mawh nan:, puxaik nawh, phan: ang mawh nan:, nan: nawh, phan: ang mawh nan:, miex nawh, phan: ang mawh nan:, keeing: nawh, phan: ang mawh nan:, kawnpraix nawh, phan: ang mawh nan:, ma: kaung: nawh khankix, kheu Aux, mai: kheu lox bwan: gauxrhawm: gauxrhi:. 30 Pa tag ang pon nyiex, mai: puxaik, mai: nan:, mai: miex, mai: kawnpraix, mai: ma: kaung:, tix yieh son ka daux bawg yam in, tau mai: krax tuktiak tukte:, mai: daux ju khaix, tag pon ju leeing: ju leeing: phan: heue:. 31 Viang mawh nan:, pui pa ot ka: tom: nie, tag da: khaix, mai: pui pa ot khaix tom: nie, tag ot ka: heue:."

Yesux baox grux krai pa sang kham: geu: Tix krax yum

10:32-34 koe: daux lai Mth. 20:17-19; Lukax 18:31-33

32 Yam kawn: hu: kix krax, yam haok kix ka veng Yerusaliem, Yesux hu: sivoe kix, mai: kix kied daox kied deng: kah, mai: pa hawt Nawh khankix die lhat heue:. Mai: Nawh Cao: baox teei kix kao: kaux ra:, mai: krai ka kix grawh grawng: ceu pa tag sang mawh ka tokaux Nawh, 33 ah nin:, "Jhak heue:, ex tag sang haok hu: ka veng Yerusaliem, mai: tag sang teei tix tawx Kawn: kawn: pui ka cao: giex kaing: li pa ting khankix, mai: pui pa tiem: lai khankix, mai: kix tag sang prawng kieh Nawh yum, mai: tawx Nawh ka pui tang: ceu tang: cat khankix, 34 mai: kix tag sang yuh pa ang cee ang cak ka Nawh, mai: baig rawmmya: ka piang Nawh, mai: sivied Nawh, mai: teei Nawh yum heue:. Mai: khaix an loe: singaix Nawh tag deeh kaoh im: heue:."

Krax pa rawg pa mhaing: Yakop, Yohan

10:35-45 koe: daux lai Mth. 20:20-28

35 Mai: Yakop mai: Yohan, pa mawh kawn: Zebedie: hoek dex ka Nawh Cao: mai: ah nin: ka Nawh, "Sara Cao: Gau eue:, yiex rawg mhaing: ceu pa tix ka Maix ang ah, yiex simie kieh Maix yuh son yiex heue:." 36 Mai: Nawh Cao: chawk ah nin: ka kiex, "Pax simie kieh Aux yuh ceu pa tix son pax?" 37 Mai: kiex baox ah nin: ka Nawh Cao:, "Kieh yiex tix kaux ngawm plak taix khawn: dawm: Maix, mai: tix kaux plak taix khawn: gwiex Maix, ka daux min: plakngai: Maix liak." 38 Viang mawh kawx nan: Yesux ah nin: ka kiex, "Pax ang tawng grawh grawng: pa rawg pax. Pax chix nyaux kawk pa nyaux Aux lie? Phan: ang mawh nan:, pax chix kham: krax baptis pa baptis79 Aux lie?" 39Mai: kiex baox ah nin: ka Nawh Cao:, "Chix tix heue:." Mai: Yesux baox ah nin: ka kiex. "Kawk pa nyaux Aux, pax tag sang nyaux heue:, mai: pax tag sang baptis, B ka daux krax baptis pa baptis C Aux heue:. 40 Viang mawh kawx nan:, pa ngawm plak taix khawn: dawm: Aux, mai: plak taix khawn: gwiex Aux, ang mawh cie Aux tix tawx, viang mawh nan: hoik cox son pui mawx ang ah, tag mawh son kix heue:." 41 Yam mhong: kawncau Nawh kao: kaux grawh grawng: ceu an, kix songrhawm: ka Yakop mai: Yohan heue:. 42 Mai: Yesux kok kix, hoek ka Tix, mai: ah nin: ka kix, "Pex tawng grawh grawng: pa yuh simiang piang pui tang: ceu tang: cat khankix, giex kaing: kix, mai: pui pa ting pa lhaong: kix, khin: ka kix heue:. 43 Viang mawh nan:, ka daux pex tag ang mawh nan:, ka daux pex pui mawx ang ah, pa simie tix ting tix lhaong:, tag mawh kawncau pex heue:. 44 Mai: ka daux pex, pui mawx ang ah, pa simie tix giex kaing: pex, tag mawh siliex pui khawm: uik heue:. 45 Grawh grawng: nawh, Kawn: kawn: pui kawx, hoek son sang kieh pui yuh son Nawh ang mawh. Viang mawh nan: hoek son sang yuh son pui, mai: tawx ju tokaux Tix, son sang taoh pui tom: nie heue:."

Pa deeh chix yaox Batimie: pariang

10:46-52 koe: daux lai Mth. 20:29-34; Lukax 18:35-43

46 Mai: kix hoek ka veng Yerikho:, mai: yam lih Nawh Cao: khaing: veng Yerikho: tan:, tau mai: kawncau Nawh khankix, mai: pui haoh pui hun:, kawn: Timie:, pa mawh Batimie: pa dugngai: mai: caung tix ih, ngawm dex krax heue:. 47 Yam mhong: nawh grawh grawng: mawh Yesux pui Nazariet, nawh kok nawh yo ah nin:, "Yesux kawn: Dawit eue:, caoxrhawm: ka aux liak." 48 Mai: pui tom: nie ah ka nawh, son sang yawg nawh tix heue:, viang mawh nan: nawh nie baox yo ah nin:, "Kawn: Dawit eue:, caoxrhawm: ka aux liak." 49 Yesux cung kaog mai: ah nin:, "Kok nawh hoek heue:." Mai: kix kok pui pa dugngai: an, mai: ah nin: ka nawh, "Gauxrhawm: heue:, kaoh, Nawh Cao: kok maix heue:." 50 Mai: nawh tik man: vhua: tix, ja loh tix kaoh mai: hoek ka Yesux heue:." 51 Mai: Yesux chawk nawh mai: ah nin:, "Maix simie tix kieh Aux yuh pa tix ka maix?" Mai: pui dugngai: an ah nin: ka Nawh Cao:, "Rabonix eue:, kieh ngai: aux chix yaox liak." 52 Mai: Yesux baox ah nin: ka nawh, "Hu: heue:, krax yumrhawm: maix hoik kieh maix moi: heue:." Mai: dom: mawx dom: an nawh deeh chix yaox, mai: hu: hawt Nawh Cao: daux krax heue:.

Simin Ting 11

Yesux brug ka kawn: la laig daux veng Yerusaliem

11:1-10 koe: daux lai Mth. 21:1-9; Lukax 19:29-38, 11:7-10 koe: daux lai Yohan 12:12-15

1 Mai: yam dex hoek kix ka veng Yerusaliem, ka yaong: Bephake mai: yaong: Betanix, ka gawng Sanlun, Nawh Cao: ploi: kawncau Nawh ra: kaux hu:, 2 mai: ah nin: ka kiex, "Hu: ka daux yaong: pa koe: sivoe pax, mai: yam laig pax ka daux yaong: an, dom: mawx dom: an pax tag yaox, kawn: la pa hoik phyawk tan: pa ang pui sax ngawm piang heue:. Kah mai: viex nawh hoek heue:. 3 Mai: phan: pui tix kaux kaux chawk pax ah nin:, 'Pax yuh ceu in kheu pa tix?' pax deeh krai ah nin:, 'Simiang lo nawh heue:.' Mai: kaw an tag deeh ploi: nawh hoek tin: dom: mawx dom: an heue:." 4 Mai: kiex hu:, mai: yaox kawn: la tix mu: pa hoik phyawk dex siviex plak praix ka daux krax. Mai: kiex kah nawh heue:. 5 Mai: pui pa cung tan: tiblah ah nin: ka kiex, "Pax kah la in yuh ka mawx?" 6 Mai: kiex ah ka kix awm: pa hoik krai Yesux, mai: kix ploi: kiex hu: heue:. 7 Mai: kiex viex kawn: la an ka Yesux, mai: teei kraung ceep tix sau: ka piang kawn: la an, mai: Nawh Cao: ngawm ka piang nawh heue:. 8 Mai: pui haoh pui hun: teei krang ceep tix nih tix tawm ka daux krax, mai: tiblah teei kak khaox pa hoik kid kix khaing: daux ma: mai: tawm heue:. 9 Mai: kix pa hu: sivoe, mai: kix pa hawt khaix khankix kok yo ah nin:, "Hosanna, Kaw pa hoek ka daux ceukaux Simiang ting bwanson: heue:. 10 Meung keeing: ex Dawit pa uik sang hoek, ting bwanson: heue:. Hosanna dee lhaong: khaing: paox tix heue:."

11 Mai: Nawh Cao: laig ka daux veng Yerusaliem, mai: laig ka daux nyiex bwan:, mai: khaix hoik jhak Nawh Cao: vung viang ka ku ceu ku cawng, mawh kheu hoik hoek bawg yam ponbo, Nawh Cao: lih hu: tau mai: kawncau Nawh kao: kaux ra: ka yaong: Betanix heue:.

Grawng: kroh hu: khaox ruh

11:12-14 koe: daux lai Mth. 21:18-22, 11:15-18 koe: daux lai Mth. 21:12-16; Lukax 19:45-47; Yohan 2:13-16

12 Mai: singaix pasax yam hoik lih hoek kix khaing: yaong: Betanix, Nawh Cao: cairhawm: heue:. 13 Mai: Nawh Cao: yaox khaoxruh tix khaox ka dee singai pa koe: lhax, kheu nan: Nawh hu: son sang sawg tix yaox plix. Mai: yam hoek Nawh Cao: ka khaox an, Nawh yaox ngie lhax khaing:, kheu bawg yam plix plixruh ang nyang bax hoek. 14 Mai: Yesux ah nin: ka khaox an, "Jah yam in tom: hoek leeing: ju leeing: phan:, paw kieh pui tix kaux kawx ih plix khaing: maix" Mai: kawncau Nawh khankix mhong: lox an heue:.

Yesux kieh nyiex bwan: singax

15 Mai: kix hoek ka veng Yerusaliem, mai: Nawh Cao: laig ka daux nyiex bwan:, mai: jah tix grheu: pui pa coh pa liag ka daux nyiex bwan: khankix lih, mai: cot pheen: pui pa loh mau khankix, mai: dee ngawm pui coh sikaux khankix cangklud heue:. 16 Mai: Nawh Cao: ang cu tix kieh pui tix kaux kawx, viex kraung tid tix hu: preeng: daux nyiex bwan:. 17 Mai: Nawh Cao: sidiex gau ah nin: ka kix, "Hoik tiem: tix deuh ah nin:, 80'Nyiex Aux tag kok mawh nyiex dee rawg pui ku ceu bwan:,' ang mawh lie? viang mawh kawx nan: pex hoik kieh mawh daux, dee ot pui tud pui rhim: heue:." 18 Mai: cao: giex kaing: li pa ting khankix, mai: pui tiem: lai khankix mhong: grawng: an, mai: sawg tix yaox, kix sang pon tix yuh Nawh Cao: laux yuh ka mawx. Kheu kix lhat ka Nawh Cao:, mawh kheu cub pui haoh pui hun: daox deng: ka lox sidiex lox gau Nawh heue:.

Lox sidiex ka grawng: kroh vhit khaoxruh

11:20-24 koe: daux lai Mth. 21:19-22

19 Mai: yam hoek ponbo ku bo Nawh Cao: lih khaing: daux veng heue:. 20 Pon ngawb yam hu: kix krax, kix yaox khaoxruh an hoik vhit hoik kroh hu: khawm: uik jah tom: riah nawh heue:. 21 Mai: Petrux doh keud ka grawh grawng: ceu an, mai: ah nin: ka Nawh Cao:, "Rabi eue:, jhak heue:, khaoxruh pa hoik jhax Maix, hoik vhit hoik kroh hu: khawm: uik heue:." 22 Mai: Yesux pawk lox mai: ah nin: ka kix, "Yumrhawm: ka daux Siyiex heue:. 23 Aux krai lox tete telai ka pex, pui mawx ang ah pa ah ka gawng in, 'Gah dee ot maix, mai: rau ka daux rawm: sigrit sigra: heue:, Mai: ang koe: krax ang yumrhawm:, viang mawh kawx nan: phan: nawh yumrhawm: grawh grawng: pa hoik ah nawh tag mawh, tag mawh son nawh heue:. 24 Mawh kheu nan: Aux krai ka pex, pa rawg bwan: mai: pa mhaing: pex ku ceu khawm: uik, pex yumrhawm: grawh grawng: pex pon khankix, mai: pex tag sang pon heue:. 25 Mai: yam mawx ang ah, yam cung pex tix rawg bwan:, phan: pex koe: dee deuh phimap ka pui tang: kaux, pluat phimap nawh heue:. Yuh ka mawx son Keeing: pex pa ot ka daux meung raoma: tag pluat phimap phigrham: pex heue:. 26 Viang mawh kawx nan: phan: pex ang pluat phimap pui tang: kaux, Keeing: pex pa ot ka daux meung raoma: kawx tag ang pluat phimap phigrham: pex heue:."

Pui Yudax chawk mhaing: Yesux pon Nawh siawp sibrawm dee mawx

11:27-33 koe: daux lai Mth. 21:23-27; Lukax 20:1-8

27 Mai: kix deeh hoek ka daux veng Yerusaliem, mai: yam hu: lai ling Nawh Cao: ka daux nyiex bwan:, cao: giex kaing: li mai: pui tiem: lai, mai: kuad song: khankix hoek ka Nawh Cao: heue:. 28 Mai: kix chawk ah nin: ka Nawh Cao:, "Maix pon akhwang: siawp sibrawm tix yuh ceu in khankix dee mawx? Mai: pui mawx tawx akhwang: siawp sibrawm in ka Maix, tix yuh ceu in khankix?" 29 Viang mawh nan: Yesux ah nin: ka kix, "Aux sang chawk pex ka grawh grawng: tix ceu, mai: pex deeh krai ka Aux, mai: Aux tag sang krai ka pex grawh grawng: pon Aux akhwang: siawp sibrawm tix yuh ceu in khankix dee mawx heue:. 30 Krax baptis81 Yohan kaoh khaing: raoma: lie? Phan: ang mawh nan: kaoh khaing: kawn: pui lie? deeh krai ka Aux liak." 31 Mai: kix keud tau ah nin:, "Phan: ex ah 'Kaoh khaing: raoma:,' Nawh Cao: tag chawk ah nin:, 'Phan: mawh nan: yuh pa tix pex ang yumrhawm: ka nawh?' 32 Viang mawh nan: phan: ex ah 'kaoh khaing: kawn: pui.'" Kix lhat ka pui khankix, kheu pui khawm: uik een: Yohan mawh cao: jhai: tete heue:. 33 Mai: kix pawk lox ka Yesux ah nin:, "Ex ang tawng heue:." Mai: Yesux baox ah nin: ka kix, "Aux ka ang krai ka pex grawh grawng: pon Aux akhwang: siawp sibrawm tix yuh ceu in khankix dee mawx heue:."

Simin Ting 12

Lox phektem: Ka pui yuh sipeem pa canyhau:

12:1-12 koe: daux lai Mth. 21:33-46; Lukax 20:9-19

1 Mai: Nawh Cao: baox jah tix sidiex ka kix ka daux lox phek tem: heue:. "Pui tix kaux nawh sum: sipeem plix siiet tix dah, mai: sum: khaox vie vung viang sipeem an, mai: kaong: daux dee biiet rawm: plix siiet, mai: sum: nyiex lhaong: tix lhang:, mai: yaog mai: tawx vai ka pui pa yuh sipeem plix siiet, mai: hu: tang: praix tang: klawng: heue:. 2 Mai: yam hoek bawg yam nawh ploi: kawncau tix tikaux hu: ka pui yuh sipeem an khankix, son sang rieb tix teei plix khaing: sipeem plix siiet, ka pui pa yuh sipeem khankix heue:. 3 Mai: kix teei nawh mai: tap nawh, mai: ploi: nawh ing: giex, taix yi heue:. 4 Mai: nawh baox deeh ploi: kawncau tang: kaux tix kaux, mai: kix teei simaox dheem: kaing: nawh saux, mai: yuh pa ang khaw: ang jiet ka nawh mai: ploi: nawh ing: heue:. 5 Mai: nawh baox ploi: kawncau tang: kaux, mai: kix teei nawh yum. Mai: nawh baox ploi: kawncau tang: kaux tom: nie, mai: kix tap tiblah, mai: teei yum tiblah heue:. 6 Nawh kawn: koe: kawn: pa moh tix tix kaux khaing:, mai: nawh ploi: nawh hu: ghoik khaix ka kix ah nin:, 'Kix tag yungyi: ka kawn: aux heue:.' 7 Viang mawh kawx nan: pui pa yuh sipeem an khankix, ah nin: ka paox tix, 'Kaw in mawh cao: sin:. Hoek heue:, ex teei nawh yum, mai: sin: nawh tag mawh cie ex heue:.' 8 Mai: kix giex nawh mai: teei nawh yum, mai: taing nawh khaing: daux sipeem plix siiet heue:. 9 Mawh kheu nan: cao: sipeem plix siiet tag sang yuh ka mawx? Nawh tag hoek mai: yieh tix yuh laux pui yuh sipeem an khankix, mai: tawx sipeem plix siiet an ka pui tang: kaux heue:. 10 Ang pex sax phat Phuk lai sigang: khri: pa ah nin: lie? 82'Simaox pa hoik tik pui yuh nyiex, hoik yuh kieh mawh kaing: ka daog. 11 In mawh pa hoek khaing: Simiang, mai: mawh pa daox pa deng: ka ngai: ex heue:.'" 12 Mai: kix sawg tix giex Nawh Cao:, viang mawh nan: kix lhat ka cub pui haoh pui hun:, kheu tawng kix Nawh hoik sidiex lox phektem: an ka grawh grawng: kix, mai: kix prah Nawh Cao: mai: hu: heue:.

Grawng: pa tawx gha: keun: ka Kesa

12:13-17 koe: daux lai Mth. 22:15-22; Lukax 20:20-26

13 Mai: kix ploi: Pharishie: mai: kawncau Herut tiblah hu: ka Nawh Cao:, yuh ka mawx son sang pon kix tix giex, dee lud lox sikah Nawh heue:. 14 Mai: yam hoek kix kix ah nin: ka Nawh Cao:, "Sara Cao: Gau eue:, ex tawng Maix mawh pa mawh pa meh, mai: ang lhat ka pui tix kaux kawx, kheu ang Maix jhak ka pakngai: kawn: pui, mai: sidiex gau grawh grawng: krax Siyiex tete heue:. Khaw: tix tawx mau koh ka simiang Kesa lie, ang khaw: tix tawx lie? 15 Ex tag tawx lie? Phan: ang mawh nan:, ex tag ang tawx lie?" Viang mawh kawx nan: Nawh Cao: tawng grawh grawng: pa pie pa lhen: kix, mai: ah nin: ka kix, "Pex nyaw pex cheuk tix yaox Aux yuh ka mawx? Viex denari tix plah son sang jhak Aux nawh." 16 Mai: kix viex, mai: Nawh Cao: chawk ah nin: ka kix, "In mawh rieang mawh lai pui mawx?" Mai: kix ah nin: ka Nawh Cao:, "Mawh rieang mawh lai simiang Kesa heue:." 17 Mai: Yesux baox ah nin: ka kix, "Ceu pa mawh cie Kesa, tawx ka simiang Kesa heue:. Mai: ceu pa mawh cie Siyiex tawx ka Siyiex heue:." Mai: kix kied daox kied deng: ka Nawh Cao: heue:.

Grawng: pa deeh kaoh im:

12:18-27 koe: daux lai Mth. 22:23-33; Lukax 20:27-38

18 Sadukie: khankix hoek ka Nawh Cao:, pa ah ang koe: pa deeh kaoh im: heue:. Mai: kix chawk Nawh Cao: ah nin:, 19 "Sara Cao: Gau eue:, Mose tiem: tix deuh ka ex ah nin:, 'Phan: puxaik pui tix kaux yum, mai: prah moeng tix khaix tix, mai: ang koe: kawn:, pux nawh, tag teei moeng nawh mai: eei: kawn: ceucat son puxke: nawh heue:.' 20 Koe: puxaik aliah kaux. Kaw phaoxka: teei tix koe: moeng, nawh ang koe: kawn: mai: yum heue:. 21 Mai: ra: kaux tix kaux kawx teei bon: an, ang koe: tix prah kawn: khaix nawh, mai: yum heue:. Mai: loe: kaux tix kaux ka awm: an heue:. 22 Aliah kaux tix kaux kawx ang koe: kawn: tix prah heue:. Khaix kix khawm: uik, bon: an kawx yum heue:. 23 Mawh kheu nan: yam hoek bawg yam deeh kaoh im:, ka daux kix nawh tag mawh moeng kaw pa yuh ka mawx? Kheu kix khawm: aliah kaux hoik to moeng bon: an heue:." 24 Yesux pawk lox mai: ah nin: ka kix "Pex phit pex lud kheu ang pex tawng Phuk lai sigang: khri: mai: siawp sibrawm Siyiex, ang mawh lie? 25 Mawh kheu yam kix tag deeh kaoh im: khaing: krax yum, kix ang teei mex moeng, mai: ang teei tix tawx ka paox tix, viang mawh nan:, kix tag awm: kawncau Siyiex ka daux meung raoma: heue:. 26 Lheu: khaing: an grawh grawng: pui yum khankix tag sang deeh kaoh, ang pex sax phat ka daux phuk lai Mose lie? dee koe: grawh grawng: yam sikah Siyiex mai: nawh ka daux yeem khaox ah nin:, 83'Aux mawh Siyiex Abraham, mai: Siyiex Icak, mai: Siyiex Yakop. Lie?' 27 Nawh ang mawh Siyiex pui yum, viang mawh nan:, Nawh mawh Siyiex pui im:. Pex kied phit kied lud heue:."

Lox pingnyap pa blon: ting:

12:28-34 koe: daux lai Mth. 22:34-40

28 Pui tiem: lai tix kaux hoek mai: mhong: lox pa chawk kix ka paox tix, mai: nawh tawng grawh grawng: Nawh Cao: hoik pawk lox ka kix mhawm: mhawm:, mai: chawk Nawh Cao: ah nin:, "Lox pingnyap pa yuh ka mawx lheu: ting khaing: paox tix khawm: uik?" 29 Yesux baox pawk lox ah nin:, "Pa lheu: ting khaing: paox tix mawh in, 84'Pui Isarilax eue:, nghiet heue:, Simiang Siyiex ex, mawh Simiang tix kaux khaing:. 30 Mai: maix tag moh Simiang Siyiex maix khawm: rhawm: khawm: rhi: tix khawm: uik, mai: khawm: ju tix, mai: khawm: ka dee chix keud tix khawm: uik, mai: khawm: riang khawm: rao tix khawm: uik heue:.' 31 Pingnyap ra: gum tix gum mawh in, 85'Maix tag moh paox plawg paox nyhawm: tix awm: moh tokaux tix heue:.' Lox pingnyap pa lheu: ting khaing: ceu in ang koe:." 32 Mai: pui tiem: lai an ah nin: ka Nawh Cao:, "Mawh pa mawh pa meh heue:. Sara Cao: Gau eue:. pa krai Maix mhawm:, Siyiex koe: tix kaux khaing:, mai: lheu: khaing: Nawh Cao: Siyiex tang: kaux ang koe:. 33 Mai: pa moh Nawh khawm: rhawm: khawm: rhi: khawm: uik, mai: pa chix tawng khawm: uik, mai: khawm: riang khawm: rao khawm: uik, mai: pa moh paox plawg paox nyhawm: tix awm: moh tokaux tix, nie lheu: khaing: pa tan pa lu khawm: uik, pa gleeing ka ngu heue:" 34 Mai: yam yaox Yesux nawh chix keud tix pawk lox mhawm: mhawm:, Nawh Cao: ah nin: ka nawh, "Maix ang singai khaing: Meung Siyiex heue:." Mai: khaix an pui tix kaux kawx ang pon chawk Nawh Cao: ka lox tid tix heue:.

Ceu kawn: praix Dawit

12:35-37 koe: daux lai Mth. 22:41-46; Lukax 20:41-44, 12:38-40 koe: daux lai Mth. 23:1-7; Lukax 20:45-47

35 Yam sidiex gau Yesux ka daux nyiex bwan: Nawh ah nin:, "Pui tiem: lai khankix ah 'Khrit mawh kawn: Dawit' yuh ka mawx? 36 Tokaux Dawit hoik ah nin: ka daux Khwan: Singax Singeh, 86'Simiang ah nin: ka Simiang aux, ngawm plak taix khawn: dawm: Aux, tom: Aux kieh pui koeng ka Maix mawh ngot dee deuh caong Maix heue:.' 37 Tokaux Dawit hoik kok Nawh mawh Simiang. Nawh chix mawh kawn: nawh yuh ka mawx?" Pui haoh pui hun: khankix gauxrhawm: tix nghiet lox Nawh Cao: heue:.

Ah ka pui tiem: lai khankix

38 Mai: yam sidiex gau Nawh Cao:, Nawh baox ah nin: ka kix, "Rien rhawm: tix ka pui tiem: lai khankix, pa simie tix ceep sibex dha: mai: hu:, mai: kieh pui ah lox yungyi: ka daux lah daux cau khankix. 39 Mai: kix moh dee ngawm pa mhawm: khaing: paox tix;, daux nyiex sidiex khankix, mai: dee mhawm: khaing: paox tix dee yuh poi khankix heue:. 40 Kix mawh pa chix rud tix ih nyiex miexmai khankix, mai: son sang chix pie chix lhen: kix rawg bwan: tom: lang:. Kix tag nie pon krax prawng krax ciyang pa ting heue:."

Mau ra: plah pa tan miex mai

12:41-44 koe: daux lai Lukax 21:1-4

41 Mai: Nawh Cao: ngawm dex ka dee deuh mau, mai: jhak ka pui haoh pui hun: sau: mau, dee sau: mau tan, mai: cao: mi tom: nie sau: tom: nie. 42 Mai: miexmai pa hot pa sibhawm: hoek tix kaux, mai: sau: tawng ra: bliah iak, pa keung: been tix piak. 43 Mai: Nawh Cao: kok kawncau Nawh khankix hoek ka Tix, mai: ah nin: ka kix, "Miex mai pa hot pa sibhawm: in hoik sau: nie lheu: khaing: kix pa sau:, ka daux dee sau: mau khawm: uik. 44 Kheu kix khawm: uik, hoik sau: khaing: pa lheu: kix, viang mawh kawx nan:, bon: in hoik sau: khaing: pa hot tix pa koe: nawh khawm: uik, viang mawh pa mawh son sang im: ju tix, nawh hoik sau: heue:."

Simin Ting 13

Mhai: singaix yam sidah

13:1-37 koe: daux lai Mth. 24:1-51; Lukax 21:5-36

1 Mai: yam lih hu: Nawh Cao: khaing: daux nyiex bwan:, kawncau Nawh tix kaux hoek mai: ah nin: ka Nawh, "Sara Cao: Gau eue:, jhak heue:, simaox an khankix awm: pa yuh ka mawx, mai: nyiex an khankix awm: pa yuh ka mawx." 2 Mai: Yesux ah nin: ka nawh, "Yaox maix nyiex pa ting an khankix lie? Tag ang grham: simaox koe: tin: kieh koe: piang paox tix tix lon: kawx, pa tag ang yieh tix tik heue:."

3 Mai: yam ngawm Nawh Cao: ka piang gawng Sanlun, pa koe: sivoe nyiex bwan:, Petrux, mai: Yakop, mai: Yohan, mai: Andare, hoek mai: chawk Nawh dee ang pui ot, ah nin:, 4 "Ceu in khankix tag sang mawh lai mawx? Mai: yam tag sang dex mawh ceu in khankix, tag koe: mhai: pa yuh ka mawx? Krai ka ex liak." 5 Mai: Yesux ah nin: ka kix, "Yuh ka mawx son ang pui sang pon pie pon lhen: pex kieh lud, rien rhawm: tix kah heue:. 6 Pui tom: nie tag sang briex tix teei ceukaux Aux, mai: hoek ah nin:, 'Aux mawh Nawh heue:.' Mai: tag pon pie pon lhen: kieh pui lud tom: nie heue:. 7 Mai: yam pex tag sang mhong: grawh grawng: naing, mai: grawh grawng: tag sang yuh naing, paw vi khirhawm: khirhi: kah heue:, ceu in tag sang mawh, viang mawh nan: ang nyang bax mawh bawg yam sidah heue:. 8 Mawh kheu pui tix ceu mai: tix ceu, tix meung mai: tix meung tag cha: paox tix, mai: kla: reem tag sang tok dee haoh dee, mai: praix tag sang sibhawm:. Ceu in khawm: uik mawh pa jah tix kharhawm: kharhi: heue:.

9 "Rien rhawm: tix kah, kheu kix tag tawx pex ka cub kuad song: cao: prawng cao: ca: khankix, mai: tag sang sivied pex ka daux nyiex dee sidiex khankix, mai: pex tag sang cung sivoe cao: giex kaing: haktiex, mai: simiang khunhawkham khankix, son Aux, son sang mawh mhai: sakse: ka kix heue:. 10 Mai: tag sang sidiex gau lox bwan: gauxrhawm: gauxrhi: ka ceu pui khawm: uik phaoxka:. 11 Mai: yam tok kix pex hu: tawx dee prawng dee ca:, paw khirhawm: grawh grawng: lox pa sang ah sang krai pex phaoxka:, viang mawh kawx nan:, lox pa sang tawx ka pex daux bawg yam nari an, pex krai pex ah lox an, mawh kheu ang mawh pex pa krai pa ah, viang mawh nan:, mawh Khwan: Singax Singeh heue:. 12 Mai: puxaik tix kaux hoik tix kaux tag sang teei tix tawx puxaik tix, son sang pah yum, mai: keeing: kawx tag teei tix tawx kawn: tix, mai: kawn: praix khankix kawx tag kaoh tix yuh ka miex keeing: tix mai: kieh pah kix yum heue:. 13 Mai: pui khawm: uik tag koeng ka pex mawh kheu ceukaux Aux, viang mawh kawx nan: kaw pa kaux pa cong: tom: sidah, kaw an tag sang hoek krax taoh heue:.

14 "Viang mawh nan: yam yaox pex ceu pa greeing pa yuh laux, cung dee ang nawh khaw: tix cung, (kieh kaw pa phat tix yaox tawng heue:), yam an kieh kix pa ot ka daux meung Yudax to: hu: ka piang gawng khankix heue:. 15 Mai: pui pa ot ka piang prang: nyiex, paw kieh nawh lih laig daux nyiex, tix teei tix ceu kawx khaing: daux nyiex tix. 16 Mai: pui pa ot ka daux ma:, paw kieh nawh deeh ing: tix teei kraung ceep tix heue:. 17 Bon: pa koe: kaux, mai: bon: pa tawx kawn: tix peuex, ka daux bawg yam singaix an khankix, tag kharhawm: kharhi: heue:. 18 Mai: pex rawg bwan:, yuh ka mawx son bawg yam an, tag ang caw yam kwat heue:. 19 Mawh kheu yam an tag sang koe: pa kharhawm: kharhi:, ceu pa ang sax koe:, tom: yam jah Siyiex tix vah ma: la: rawm:, sidah sidu hoek bawg yam in, mai: khaix an kawx tag ang lai baox koe: heue:. 20 Mai: phan: Simiang ang kieh bawg yam singaix an khankix dawd, tix kaux kawx ang pon tix luan, viang mawh kawx nan: mawh kheu pui pa laug Siyiex, pa hoik laug Nawh, Nawh kieh singaix an khankix dawd heue:. 21 Yam an phan: pui tix kaux kaux ah nin: ka pex, 'Jhak heue:, Khrit ot tin:,' phan: ang mawh nan:, 'Jhak heue:, ot tan:,' paw vi yumrhawm: kah. 22 Mawh kheu Khrit pa ang mawh ang meh, mai: cao: jhai: pa ang mawh ang meh khankix tag sang lih hoek, mai: tag sang jhi: yaox mhai: mai: ceu pa daox pa am:, yuh ka mawx son sang pon pie pon lhen: kieh lud, phan: chix tix, ka pui pa hoik laug Siyiex heue:. 23 Viang mawh nan: pex rien rhawm: tix, jhak heue:, Aux hoik grux krai ka pex grawh grawng: ku ceu sivoe ka: sang mawh heue:.

24 "Khaix pa kharhawm: kharhi: daux bawg yam singaix an khankix, singaix tag vhaik, mai: khix tag ang tawx pa riang tix, 25 mai: simuing: khankix tag sang rau khaing: raoma:, mai: siawp sibrawm pa koe: ka daux raoma: khankix tag sang yung: yiang: heue:. 26 Yam an kix tag yaox Kawn: kawn: pui viex siawp sibrawm pa ting mai: min: plakngai:, mai: hoek ka daux paiawm: heue:. 27 Mai: yam an Nawh tag sang ploi: kawncau Siyiex khankix hu: khrawm: pui pa hoik laug cie Nawh, khaing: bhaung: pon: plak, jah dee sidah haktiex, tom: hoek dee sidah raoma: ku dah ku dee heue:.

28 "Gau ka khaoxruh grawh grawng: lox phektem: nawh. Yam awn: kak nawh mai: lih lhax, pex tawng bawg yam raux dex sang hoek, 29 awm: an yam yaox pex ceu in khankix uik sang mawh, kieh tawng Nawh dex hoek tix ot ka praok siviex khankix heue:. 30 Aux krai lox tete telai ka pex, pui ju in tag ang bax luan, tom: ceu in khankix khawm: uik tag hoik mawh heue:. 31 Raoma: mai: haktiex tag sang grai:, viang mawh kawx nan: gumlox Aux in tag ang grai: heue:. 32 Singaix bawg yam nari an tix kaux kawx ang tawng, viang mawh kawncau Siyiex ka daux meung raoma: khankix kawx ang tawng, Kawn: Cao: kawx ang tawng, mawh ngie Keeing: Cao: pa tawng heue:.

33 "Mawh kheu ang pex tawng bawg yam an, rien rhawm: tix, pau tix jhak mai: rawg bwan: heue:. 34 Grawh grawng: in tag awm: pui tix kaux, pa prah nyiex tix mai: hu: ot tang: praix tang: klawng:, khaix hoik tawx nawh siawp sibrawm ka kawncau nawh khankix, mai: hoik tawx kaing ka kaux pui mawx kaux pui an, mai: hoik nhie: pui pau siviex pau tix jhak heue:. 35 Mawh kheu nan: pau tix jhak heue:, kheu ang pex tawng bawg yam sang hoek simiang cao: nyiex, tag mawh yam ponbo lie, phan: ang mawh nan:, yam greung sawm: lie, phan: ang mawh nan:, yam ux ia: lie, phan: ang mawh nan:, yam ponngawb lie, pex ang lai tawng heue:. 36 Phan: ang mawh nan:, ha Nawh kox hoek yam ang pex ce:, mai: yaox laig it pex heue:. 37 Pa krai Aux ka pex, Aux krai kah khawm: uik, pau tix jhak heue:."

Simin Ting 14

Sawg krax pa sang pon teei tix Yesux yum

14:1-11 koe: daux lai Mth. 26:2-16, 14:1-2, 10-11 koe: daux lai Lukax 22:1-6, 14:3-8 koe: daux lai Yohan 12:1-8

1 Khaix an ra: singaix mawh poi Pasakha mai: poi khaomun pa ang sau: susaix mai: cao: giex kaing: li pa ting khankix mai: pui tiem: lai khankix, sawg tix lhen: tix nyaw Nawh Cao:, yuh ka mawx son sang pon giex mai: teei Nawh yum heue:. 2 Kheu kix ah nin:, "Paw yuh yam yuh poi, phan: ang mawh nan: ha pui khankix kox lih koe: krax maw: lawh cuci: kheu heue:."

Groi sidah bhawng: ka Nawh Cao:

3 Yam ot Nawh Cao: ka daux yaong: Betanix, daux nyiex Simon pui sipawg, yam ngawm Nawh tix sawm:, bon: tix kaux hoek ka Nawh Cao: pa koe: sidah bhawng: Nadu pa kied ngawh, daux kawng: simaox paing, mai: nawh pah kawng: an max, mai: groi sidah an ka piang kaing: Nawh Cao: heue:. 4 Viang mawh kawx nan: koe: tiblah pa songrhawm: mai: ah nin: ka paox tix, "Kieh sidah bhawng: in nai: giex going yuh nin: yuh ka mawx? 5 Phan: coh sidah bhawng: in tag sang pon ngawh lheu: denari loe: yieh plah, mai: tawx ka pui hot pui sibhawm: khankix heue:." Mai: kix ah, kix deuh phimap ka bon: an heue:. 6 Viang mawh nan:, Yesux ah nin:, 'Paw chuh nawh, pex lai laklheut nawh yuh ka mawx? Nawh hoik yuh kaing pa mhawm: ka piang Aux heue:. 7 Mawh kheu pui hot pui sibhawm: ot mai: pex jheeng: jheeng:, mai: pex simie tix yuh pa mhawm: ka kix lai mawx ang ah, pex pon tix yuh, viang mawh nan:, Aux ot mai: pex jheeng: jheeng: ang mawh. 8 Nawh hoik yuh pa chix yuh tix. Nawh hoik groi sidah bhawng: ka tokaux Aux, sivoe, son bawg yam sipaung: heue:. 9 Aux krai lox tete telai ka pex, dee mawx ang ah, dee sang sidiex gau lox bwan: gauxrhawm: gauxrhi: in ka piang haktiex ku dah ku dee khawm: uik, grawh grawng: ceu pa yuh bon: in kawx, tag sang krai, son sang doh keud ka nawh heue:."

Yudax Isakariut coh ka Nawh Cao:

10 Mai: Yudax Isakariut pa mawh tix kaux ka daux kawncau kao: kaux ra:, hu: ka cao: giex kaing: li pa ting khankix, yuh ka mawx son sang tawx Nawh Cao: ka kix heue:. 11 Mai: kix, yam mhong: kix lox an, gauxrhawm: mai: tawx lox mukheu grawh grawng: sang tawx mau ka nawh heue:. Mai: nawh sawg bawg yam pa mhawm: yuh ka mawx, son sang pon tawx nawh Nawh Cao: ka kix heue:.

Khan: poi pasakha

14:12-26 koe: daux lai Mth. 26:17-30; Lukax 22:7-23, 14:22-25 koe: daux lai 1.Kawrin 11:23-25

12 Daux singaix tix, khaomun pa ang sau: susaix, khaix hoik pah hoik tan kix yung: Pasakha, kawncau Nawh khankix ah nin: ka Nawh Cao:, "Maix simie tix kieh ex hu: cox dee sang ih Maix poi Pasakha dee mawx? 13 Mai: Nawh Cao: ploi: kawncau Nawh ra: kaux hu:, mai: ah nin: ka kiex, "Hu: ka daux veng, mai: pui pa viex aw: rawm: tix kaux tag sipub pax heue:. Hawt khaix nawh. 14 Mai: nawh laig dee mawx ang ah, ah nin: ka cao: nyiex an, Sara Cao: Gau ah nin:, 'Lawg son nyo maix, dee tag sang ih Aux Pasakha tau mai: kawncau Aux khankix, koe: dee mawx?' 15 Mai: tokaux nawh tag sang jhi: pax yaox lawg pa ting plak piang, pa hoik koe: kraung mai: pa hoik cox. Cox khre: dee an son ex heue:." 16 Mai: kawncau khankiex hu: laig ka daux veng, mai: yaox awm: pa hoik krai Nawh Cao: ka kiex, mai: kiex cox khre: poi Pasakha heue:.

17 Mai: yam hoek ponbo Nawh Cao: hoek tau mai: kix kao: kaux ra:. 18 Mai: yam ngawm neung kix mai: sawm:, Yesux ah nin:, "Aux krai lox tete telai ka pex, ka daux pex tix kaux pa sawm: tau mai: Aux, tag sang tik sang tawx Aux heue:." 19 Kix khirhawm: khirhi: kah, mai: tix kaux hoik tix kaux ah nin: ka Nawh Cao:, "Mawh aux lie?" 20 Mai: Nawh Cao: baox ah nin: ka kix, "Mawh ka daux kao: kaux ra: tix kaux, pa mawh kaw pa cub daux klong: tau mai: Aux heue:. 21 Kawn: kawn: pui tag hu:, awm: hoik tiem: grawh grawng: Nawh, viang mawh kawx nan: pui pa tik pa tawx Kawn: kawn: pui tag kharhawm: kharhi: heue:. Lheu: mhawm: son pui an phan: nawh ang keh heue:."

22 Mai: yam sawm: kix Nawh Cao: teei khaomun, mai: khaix hoik nawb Nawh bwan:. Nawh sivit mai: tawx ka kix ah nin:, "Pex teei heue:, in mawh tokaux Aux heue:." 23 Mai: Nawh Cao: teei kawk, mai: khaix hoik yaogyaw Nawh bwanson:, Nawh tawx ka kix mai: kix khawm: uik nyaux kah heue:. 24 Mai: Nawh Cao: ah nin: ka kix, "In mawh nham: Aux pa dex pa dawd mai: sijax mukheu pa khraox, pa lih son pui tom: nie heue:. 25 Aux krai lox tete telai ka pex, Aux tag ang nyaux rawm: plix nhu: plix siiet in, tom: sidah singaix yam tag nyaux Aux pa khraox ka daux meung Siyiex heue:."

Grux krai ka thiang: Petrux Nawh Cao:

14:27-31 koe: daux lai Mth. 26:31-35

26 Mai: khaix hoik rhax kix lai rhax tix mu: kix lih hu: ka gawng Sanlun heue:.

27 Mai: Yesux ah nin: ka kix, "Pex khawm: uik tag sang laux rhawm: kah heue:. Kheu hoik tiem: ah nin:, 87'Aux tag pah cao: liang yung:, mai: yung: khankix tag prungprang: heue:.' 28 Viang mawh kawx nan:, khaix hoik deeh kaoh Aux, Aux tag sang hu: sivoe pex ka daux meung Galilie: heue:." 29 Viang mawh nan: Petrux ah nin: ka Nawh Cao:, "Viang kix khawm: uik laux rhawm: kawx, aux tag ang laux rhawm: heue:." 30 Mai: Yesux ah nin: ka nawh, "Aux krai lox tete telai ka maix, daux singaix, daux sawm: in, ka: ang ia: nyang ux ra: bawg, maix tag sang thiang: tix tik tix vud Aux loe: bawg heue:." 31 Viang mawh nan: nawh baox krai lox kied riex ah nin:, "Phan: aux tag yum tau mai: Maix kawx, ang aux doh thiang: tix tik tix vud Maix heue:." Mai: kix khawm: uik kawx, ah awm: an heue:.

Rawg bwan: ka daux sipeem Kesasemanix

14:32-42 koe: daux lai Mth. 26:36-46; Lukax 22:40-46

32 Mai: kix hoek tix dah dee kaux Kesasemanix, mai: Nawh Cao: ah nin: ka kawncau Nawh khankix, "Pex ngawm tin: yam Aux hu: rawg bwan: heue:." 33 Mai: Nawh Cao: teei Petrux, mai: Yakop, mai: Yohan, hu: tau mai: Nawh, mai: Nawh Cao: kied daox kied deng: mai: sungsang rhawm: heue:. 34 Mai: Nawh Cao: ah nin: ka kix, "Aux kied khirhawm: khirhi:, tom: dex sang yum, pex ot tin:, mai: pau heue:." 35 Mai: Nawh Cao: hu: sivoe ceeix mai: grux gup ka piang tiex, mai: rawg bwan:, yuh ka mawx bawg yam nari an tag luan khaing: Nawh, phan: chix kieh luan heue:. 36 Mai: Nawh Cao: ah nin:, "Abax, Keeing: eue:, Maix chix yuh ku ceu heue:. Teei kawk in khaing: Aux liak, viang mawh kawx nan:, paw kieh mawh alo pa caw pa khaw: rhawm: Aux, viang mawh nan: kieh mawh pa caw pa khaw: rhawm: Maix heue:." 37 Mai: Nawh Cao: deeh hoek mai: yaox kix laig it mai: ah nin: ka Petrux, "Simon eue:, laig it maix lie? Ang maix pon tix pau tix nari khaing: lie? 38 Pau mai: rawg bwan: heue:, yuh ka mawx son ang pex sang laig ka daux pa nyaw pa glaw:. Khwan: koe: rhawm: tix sang yuh tete, viang mawh nan: nex mawh pa iak riang iak rao heue:." 39 Mai: Nawh Cao: baox deeh lih hu:, mai: rawg bwan: mai: ah lox awm: phaoxka: heue:. 40 Mai: Nawh Cao: baox deeh hoek mai: yaox kix laig it, kheu ngai: kix cien. Mai: kix ang tawng lox pa sang pawk ka Nawh heue:. 41 Mai: Nawh Cao: deeh hoek loe: bawg tix bawg mai: ah nin: ka kix. "Yam in kawn: it mai: laux lee: tix heue:. Ding heue:, bawg yam nari hoik hoek, jhak heue:, tag sang tik sang tawx Kawn: kawn: pui daux tawmtaix pui phimap phigrham: khankix heue:. 42 Kaoh, ex hu: heue:, jhak heue:, kaw pa sang tik sang tawx Aux dex hoek heue:."

Giex ka Yesux

14:43-50 koe: daux lai Mth. 26:47-56; Lukax 22:47-50; Yohan 18:3-11

43 Mai: yam kawn: sikah Nawh Cao:, dom: mawx dom: an, Yudax pa mawh tix kaux ka daux kix kao: kaux ra:, hoek tau mai: cub pui haoh hun:, pa viex vaid viex khaox, mai: lih hoek khaing: cao: giex kaing: li pa ting, mai: pui tiem: lai, mai: kuad song: khankix heue:. 44 Mai: kaw pa tik pa tawx Nawh Cao: hoik tawx mhai:, son sang kieh kix tawng tix ceu ah nin:, "Aux ngheut pui mawx ang ah, mawh Kaw an. Giex Nawh, mai: tok Nawh hu: mhawm: mhawm:." 45 Mai: yam hoek nawh, nawh hoek ka Nawh Cao: dom: mawx dom: an, mai: ah nin:, "Rabi eue:," mai: ngheut ka Nawh heue:. 46 Mai: kix giex tix teei Nawh Cao: heue:. 47 Viang mawh nan: ka daux kix pa cung de tan: tix kaux lawd vaid tix, mai: kid yhaok siliex cao: giex kaing: li pa ting piang khawm: uik dud heue:. 48 Mai: Yesux ah nin: ka kix, "Pex viex vaid viex khaox hoek tix giex Aux awm: giex ka pui tud pui rhim: lie? 49 Aux ot tau mai: pex mai: sidiex gau ka daux nyiex bwan: ku singaix, mai: pex ang giex Aux. Viang mawh kawx nan: ceu in hoik mawh son sang naog Phuk lai sigang: khri: heue:." 50 Mai: kawncau Nawh khawm: uik prah Nawh Cao:, mai: to: hu: heue:.

Cied Nawh Cao: ka plak sivoe cao: giex kaing: li pa ting

14:53-65 koe: daux lai Mth. 26:57-68; Yohan 18:12-13, 19-24

14:61-63 koe: daux lai Lukax 22:67-71

51 Mai: pui pa awn: ju tix kaux hawt khaix Nawh Cao:, pa koe: man: vhua: tix pheen:, pa vhua: ka tokaux kakaong: tix, mai: kix giex nawh heue:. 52 Viang mawh kawx nan: nawh prah man: vhua: nawh tan:, mai: to: hu: kakaong: heue:.

53 Mai: kix tok Yesux hu: ka cao: giex kaing: li pa ting piang khawm: uik, mai: cao: giex kaing li pa ting khankix, mai: kuad song; mai: pui tiem: lai khankix, khrawm: paox tix tau mai: nawh heue:. 54 Petrux hawt khaix Nawh Cao: dee singai mai: hoek ka brawk nyiex cao: giex kaing: li pa ting an, mai: ngawm tau mai: pui cau simiang khankix, mai: co ngu heue:. 55 Cao: giex kaing: li pa ting khankix mai: kuad song: cao: prawng see: khawm: uik sawg mhai: sakse: grawh grawng: Yesux, son sang pon tix teei Nawh yum, mai: ang kix yaox. 56 Mawh kheu pui tom: nie kham: mhai: sakse: pa ang mawh ang meh grawh grawng: Nawh Cao:, mai: mhai: sakse: pa kham: kix ang khaw: paox tix. 57 Mai: tiblah cung mai: kham: mhai: sakse: grawh grawng: Nawh Cao: ah nan:, 58 "Ex mhong: Nawh ah nin:, 'Aux tag yieh nyiex bwan: in pa hoik yuh ka taix, mai: daux loe: singaix Aux tag baox yuh tix lhang: pa ang yuh ka taix heue:.'" 59 Viang mawh nan: kawx, mhai: sakse: kix ang khaw: paox tix. 60 Cao: giex kaing: li pa ting cung sinax kix, mai: chawk Yesux ah nin:, "Maix ang deeh pawk lox tid tix lie? Pa kham: mhai: sakse: ceu in grawh grawng: Maix, mawh pa yuh ka mawx?" 61 Viang mawh nan: Nawh Cao: ang nye:, ang pawk lox tid tix. Cao: giex kaing: li an, baox deeh chawk Nawh Cao: ah nin:, "Maix mawh Khrit, Kawn:, Cao: Pa Ting Bwan: lie?" 62 Mai: Yesux ah nin:, "Mawh Aux heue:. Mai: pex tag sang yaox Kawn: kawn: pui ngawm plak khawn: dawm: siawp sibrawm mai: hoek tau mai: paiawm: raoma: khankix heue:." 63 Mai: cao: giex kaing: li pa ting an riah kraung ceep tix, mai: ah nin:, "Ex baox lo mhai: sakse: yuh ka mawx? 64 Pex hoik mhong: lox sa lox lao Nawh ka Siyiex heue:. Pex ce: yuh ka mawx?" Mai: kix khawm: uik prawng ca: Nawh, ah Nawh keung: tix yum heue:. 65 Mai: tiblah baig rawmmya: ka piang Nawh Cao:, mai: tawb pakngai: Nawh Cao:, mai: jhawp taix tix klah Nawh Cao:, mai: ah nin: ka Nawh, "Krai lox jhai: heue:." Mai: pui cau simiang khankix kawx, yam rieb tix teei Nawh Cao:, kix teei taix tix simang: Nawh kah.

Petrux thiang: tix tik Nawh Cao:

14:66-72 koe: daux lai Mth. 26:69-75; Lukax 22:56-62; Yohan 18:16-18, 25-27

66 Yam ngawm Petrux greem: ka brawk, bon: pa mawh kawncau cao: giex kaing: li pa ting an hoek, 67 mai: yaox Petrux co ngu, mai: bon: an jhak ka nawh, mai: ah nin:, "Maix kawx, mawh pa ot tau mai: Yesux pui veng Nazariet heue:." 68 Viang mawh kawx nan: nawh thiang: ah nin:, "Aux ang tawng ang yung pa ah maix heue:." Mai: nawh lih hu: ka grah nyiex mai: ia: ux heue:. 69 Mai: bon: an baox yaox nawh tix bawg mai: ah nin: ka pui pa cung dex tan:, "In mawh kix tix kaux heue:." 70 Mai: nawh baox thiang: tix bawg, mai: khaix an tivud, kix pa cung dex tan: baox ah nin: ka Petrux, "Maix mawh daux kix tix kaux tete heue:, kheu maix mawh pui meung Galilie: heue:." 71 Viang mawh kawx nan: nawh jah tix jhax, mai: tiex tu ah nin:, "Ang aux tawng Pui in pa krai pex." 72 Mai: dom: mawx dom: an ia: ux ra: bawg tix bawg heue:. Mai: Petrux doh keud ka lox pa hoik krai Yesux ka nawh ah nin:, "Ka: ang ia: nyang ux ra: bawg, maix tag sang thiang: tix tik Aux loe: bawg heue:." Mai: yam nawh keud grawh grawng: ceu an nawh yiem heue:.

Simin Ting 15

Prawng Nawh Cao: sivoe simiang Pilat

15:2-15 koe: daux lai Mth. 27:11-26; Lukax 23:2-3, 18-25; Yohan 18:29-19:16

1 Daux ponngawb dom: mawx dom: an, cao: giex kaing: li pa ting khankix, mai: kuad song: mai: pui tiem: lai khankix, mai: cub cao: prawng see: khawm: uik, kum: paox tix, mai: phyawk Yesux, mai: viex Nawh Cao: hu: tawx ka simiang Pilat heue:. 2 Mai: simiang Pilat chawk Nawh Cao: ah nin:, "Maix mawh Simiang Khunhawkham pui Yudax lie? Mai: Nawh cao: pawk lox ka nawh ah nin: "Pa ah maix mawh heue:." 3 Mai: cao: giex kaing: li khankix deuh phimap ka Nawh Cao: tom: nie ceu heue:. 4 Mai: simiang Pilat baox deeh chawk Nawh Cao: ah nin:, "Maix ang pawk lox tid tix lie? Jhak heue:, kix deuh phimap ka Maix tom: nie ceu miex ding." 5 Viang mawh kawx nan: Yesux ang lai pawk lox tid tix, tom: simiang Pilat daox deng: kah heue:.

Tat see: Naoh Cao: mawh pa yum

6 Yam yuh poi an nawh hoik sax ploi: pui pa ot daux thawng: tix kaux ka kix, awm: kaw pa rawg kix ka nawh heue:. 7 Mai: koe: pui tix kaux pa kok mawh Barabax, pa phyawk tau mai: kix pa mawh pui feen pui tieh, pui pa hoik teei pui yum yam feen yam tieh kix heue:. 8 Mai: cub pui haoh pui hun: khankix hu: mai: rawg mai: mhaing: ka nawh, nhie: nawh yuh awm: pa sax yuh nawh, son kix heue:. 9 Mai: simiang: Pilat pawk lox ka kix ah nin:, "Pex simie tix kieh aux ploi: Simiang Khunhawkham Pui Yudax ka pex lie?" 10 Kheu nawh tawng cao: giex kaing: li pa ting khankix, hoik teei tix tawx Nawh kheu boh rhawm: kix kah heue:. 11 Viang mawh nan: cao: giex kaing: li pa ting khankix cheeik ka cub pui haoh pui hun: khankix, yuh ka mawx son sang ploi: nawh Barabax ka kix khaing: Nawh heue:. 12 Mai: simiang Pilat baox deeh chawk kix ah nin:, "Phan: mawh nan: aux tag yuh pa tix ka Kaw pa kok pex mawh Simiang Khunhawkham Pui Yudax?" 13 Mai: kix baox kok yo ah nin:, "Tawk Nawh piang khaoxlhak heue:." 14 Mai: simiang Pilat baox ah nin: ka kix, "Mawh kheu grawh grawng: pa tix, Nawh hoik yuh pa caox pa yuh ka mawx?" Viang mawh kawx nan: kix nied tix yo ah nin:, "Tawk Nawh piang khaoxlhak heue:." 15 Simiang Pilat simie tix kieh pui haoh pui hun: khankix vhah rhawm:, nawh tom: ploi: Barabax ka kix, mai: teei tix tawx Yesux, son sang sivied Nawh, mai: tawk Nawh Cao: piang khaoxlhak heue:.

Pui naing yuh pa ang ceu ang cak ka Yesux

15:16-20 koe: daux lai Mth. 27:27-31

16 Mai: pui naing khankix tok Nawh Cao: hu: ka brawk nyiex dee ot pui naing, mai: kok pui naing khawm: uik khrawm: paox tix heue:. 17 Mai: kix teei krang raoh klai ceep ka Nawh Cao:, mai: taing: mhok katlawm sau: ka Nawh Cao: heue:. 18 Mai: kix jah tix ah nin: ka Nawh Cao:, "Simiang Khunhawkham pui Yudax eue:, kieh nyawm ot heue:." 19 Mai: kix teei priem tix gawng: mai: sivied kaing: Nawh Cao: kah, mai: baig rawmmya: ka piang Nawh, mai: grux ngawng tix krub ka Nawh Cao: heue:. 20 Mai: khaix hoik yuh kix pa ang cee ang cak ka Nawh Cao:, kix peeik kraung pa raoh klai khaing: Nawh, mai: deeh ceep kraung cie Nawh. Mai: kix tok Nawh hu: song sang tawk Nawh Cao: piang khaoxlhak heue:.

Tawk Nawh Cao: ka piang khaoxlhak

15:22-32 koe: daux lai Mth. 27:33-44; Lukax 23:33-43; Yohan 9:17-24

21 Mai: kix khin: Simon pui meung Kurene, pa mawh keeing: Alezandru mai: Rufu, pa hoek khaing: daux tiag, hu: mai: kix, son sang kieh nawh klawm: khaoxlhak Nawh Cao: heue:.

22 Mai: kix viex Nawh Cao: hu: ka dee mawh Gawlagawthax, phan: toe: lox an dee bleeh mawh, "Dee Si:ang: Kaing:" heue:. 23 Mai: kix tawx tix yaox sidah niex pa hoik klao: tau mai: Muran ka Nawh Cao:. Viang mawh kawx nan: Nawh ang rieb tix teei. 24 Mai: kix tawk Nawh Cao: piang khaoxlhak, mai: gwieh kraung Nawh sinax kix, khaix hoik nieb kix tix yaox grawh grawng: pui mawx tag sang teei pa yuh ka mawx. 25 Yam tawk kix Nawh Cao: piang khaoxlhak, mawh bawg yam loe: nari88 heue:. 26 Lai grawh grawng: pa deuh phimap ka Nawh Cao:, hoik tiem: tix deuh plak piang, pa ah nin:, "SIMIANG KHUNHAWKHAM PUI YUDAX." 27 Mai: kix tawk pui tud pui rhim: ra: kaux tau mai: Nawh Cao: piang khaoxlhak, plak taix khawn: dawm: Nawh tix kaux, mai: plak khawn: gwiex Nawh tix kaux. 28 Mai: Phuk lai sigang: khri: pa ah nin: hoik naog, 89"Hoik simin Nawh tau mai: pui pa yuh pa ang khaw: ang jiet khankix heue:." 29 Mai: kix pa hu: pa hoek dex tan:, ah pa ang khaw: ang jiet ka Nawh Cao:, mai: vukvied kaing: tix, mai: ah nin:, "Ha:, Maix pa yieh nyiex bwan: mai: deeh yuh daux loe: singaix eue:, 30 taoh tokaux Maix mai: lih khaing: khaoxlhak heue:." 31 Awm: an cao: giex kaing: li pa ting mai: pui tiem: lai khankix kawx, ah pa ang cee ang cak ka Nawh Cao: ah nin:, "Nawh chix taoh pui tang: kaux, tokaux Nawh, Nawh ang chix taoh. 32 Kieh Khrit, Simiang Khunhawkham Pui Isarilax, lih khaing: khaoxlhak yamin, yuh ka mawx son sang yaox ex mai: yumrhawm: kah heue:." Mai: kiex pa hoik tawk tau mai: Nawh Cao: piang khaoxlhak kawx, ah pa ang cee ang cak ka Nawh heue:.

Grawng: yam yum Yesux

15:33-41 koe: daux lai Mth. 27:45-56; Lukax 23:44-49

33 Yam hoek liah nari90 praix vhaik piang haktiex khawm: uik tom: hoek dim: nari91. 34 Mai: yam hoek dim: nari92 Yesux kok yo lox sinum ah nin:, "Eloi, Eloi, lama sabaktani?" Phan: toe: lox an dee bleeh mawh, "Siyiex Aux, Siyiex Aux, Maix lai tik vud Aux yuh ka mawx?" 35 Pui pa cung dex tan: tiblah yam mhong: kix lox an, ah nin:, "Jhak heue:, Nawh kok ka Eliyax." 36 Mai: kix tix kaux to: hu: mai: teei ceu pa awm: tih pa koe: daux rawm: sigrit sigra: tix mu: pa naog rawm: sidah niex, mai: sau: ka toh gawng: priem, mai: tawx Nawh Cao: nyaux ah nin:, "Paw chuh, kieh ex jhak Eliyax sang hoek tix teei Nawh lih lie, ang hoek lie?" 37 Mai: Yesux ah lox sinum mai: deeh tawx khwan: Tix heue:. 38 Mai: yam an man: tie daux nyiex bwan: griah ra: pak, jah plak piang tom: hoek ka caong heue:. 39 Yam an pui giex kaing: naing pa cung dex Nawh Cao:, yaox Nawh deeh tawx khwan:, mai: nawh ah nin:, "Pui in mawh Kawn: Siyiex tete heue:." 40 Bon: khankix kawx ot dee singai mai: jhak heue:. Ka daux kix koe: Marix Magadalax: mai: Marix miex Yakop pa iak, mai: Yosiep, mai: Salom, 41 pa yam ot Nawh Cao: ka daux meung Galilie:, hoik hawt Nawh mai: khan: kheu ka Nawh Cao:, mai: bon: tang kaux tom: nie pa hoik hoek tau mai: Nawh Cao: ka veng Yerusaliem heue:.

Sipaung: Nawh Cao:

15:42-47 koe: daux lai Mth. 27:57-61; Lukax 23:50-56; Yohan 19:38-42

42 Yam hoek ponbo kheu mawh Singaix Khre:, pa mawh singaix sivoe singaix twah, 43 Yosiep pui Arimase, pa mawh simiang pa koe: min: plakngai: pa tokau: nawh kawx, krox tix jhak son yam sang hoek Meung Siyiex. Nawh viex rhawm: kua: hu: ka simiang Pilat, mai: rawg mai: mhaing: tokaux yum Yesux heue:. 44 Simiang Pilat daox deng: ka grawng: Nawh Cao: hoik khran: yum yam an, mai: nawh kok pui giex kaing: naing hoek ka nawh, mai: chawk ka nawh grawh grawng: hoik rheung: yum Nawh Cao: lie? 45 Mai: yam nawh hoik mhong: grawh grawng: ceu an ka pui giex kaing: naing, nawh tawx tokaux yum Nawh Cao: ka Yosiep heue:. 46 Mai: nawh liag man: paing, mai: teei Nawh Cao: lih, mai: pua: Nawh ka man: paing an, mai: sau: ka daux, daux simeeig, pa hoik saik ka daux rang: heue:. Mai: nawh plu: plie simaox mai: thox moing daux simeeig an heue:. 47 Mai: Marix Magadalax mai: Marix miex Yosie:, yaox dee een: tokaux yum Nawh Cao: heue:.

Simin Ting 16

Grawng: pa deeh kaoh im: Nawh Cao:

16:1-8 koe: daux lai Mth. 28:1-8; Lukax 24:1-10

1 Mai: yam hoik luan singaix twah, Marix Magadalax mai: Marix miex Yakop, mai: Salom liag sidah bhawng:, yuh ka mawx son sang kraix ka Nawh Cao:. 2 Mai: daux aliah singaix, singaix tix, yam kied cao, kix hu: hoek ka simeeig yam hoik lih singaix heue:. 3 Mai: kix ah nin: ka paox tix, "Pui mawx tag sang plu: plie simaox an khaing: moing daux simeeig son ex." 4 Mai: kix yaog tix jhak mai: yaox simaox an hoik plu: plie hoik gah tix. Simaox an mawh pa kied ting heue:. 5 Mai: kix laig ka daux simeeig mai: yaox pui awn: ju tix kaux ngawm plak khawn: dawm:, mai: ceep sibex dha: pa paing, mai: kix yaoh kah heue:. 6 Mai: nawh ah nin: ka kix, "Paw yaoh paw lhat heue:. Pex sawg Yesux pui veng Nazariet pa hoik tawk piang khaoxlhak. Nawh Cao: hoik kaoh. Nawh ang ot tin:, jhak ka dee hoik een: kix Nawh Cao: heue:. 7 Viang mawh kawx nan: hu: mai: krai kawncau Nawh khankix mai: Petrux. "Nawh sang hu: sivoe pex ka daux meung Galilie:, pex tag sang yaox Nawh Cao: tan:, awm: hoik krai Nawh ka pex heue:.'" 8 Mai: kix lih mai: to: hu: khaing: simeeig, kheu krax lhat krax siyaung:, mai: krax daox, krax deng:, hoik hoek piang kix, kix ang krai tid tix ka pui tix kaux kawx, kheu kied lhat kix heue:.

9 Yam Nawh Cao: hoik deeh kaoh im:, cao cao daux aliah singaix, singaix tix, Nawh jhi: tokaux Nawh yaox ka Marix Magadalax ka: heue:. Pa mawh bon: pa hoik sigrheu: Nawh Cao: phi: caox aliah kaux lih khaing: heue:. 10 Mai: nawh hu: mai: krai kix pa hoik ot tau mai: Nawh Cao:, yam kix khirhawm: mai: yiem. 11 Mai: kix, yam mhong: kix, grawh grawng: Nawh Cao: hoik deeh im:, mai: grawh grawng: nawh hoik yaox Nawh Cao: kix ang yumrhawm: kah.

12 Mai: khaix ceu in khankix Nawh Cao: baox jhi: yaox tokaux Nawh, daux rieang pak peung tang: ceu, yam hu: kawncau Nawh ra: kaux krax daux tiag heue:. 13 Mai: kiex hu: mai: krai grawh grawng: ceu in ka kawncau pa deuk khankix, mai: kix ang yumrhawm: ka kiex heue:.

14 Mai: khaix an Nawh Cao: baox jhi: yaox tokaux Nawh ka kix kao: kaux tix, yam ngawm: neung kix tix sawm:. Mai: Nawh Cao: ah ka kix, kheu krax ang yumrhawm:, mai: pa kien: rhawm: kix, mawh kheu kix ang yumrhawm: ka pui pa hoik yaox Nawh Cao:, khaix hoik deeh kaoh Nawh heue:. 15 Mai: Nawh Cao: ah nin: ka kix, "Pex hu: ka piang haktiex khawm: uik mai: sidiex gau lox bwan: pa gauxrhawm: gauxrhi: in, ka can pui pa hoik phan: hoik yuh khawm: uik heue:. 16 Pui pa yumrhawm: mai: baptis93, tag hoek krax taoh heue:, viang mawh kawx nan: pui pa ang yumrhawm: tag hoek krax prawng krax ciyang heue:. 17 Mai: mhai: sakse: ceu in khankix tag mawh ka kix pa yumrhawm:. Kix tag sang sigrheu: phicaox lih ka daux ceukaux Aux, mai: kix tag sang sikah daux lox pui ceu pa khraox. 18 Kix tag sang pon teei tix yaog siuing:, mai: phan: kix pon nyaux pa awp tix ceu ceu, ang chix kieh kix saux tid tix. Kix tag sang deuh taix tix piang pui saux pui ngia, mai: kix tag moi: heue:."

19 Khaix hoik krai Simiang Yesux ceu in ka kix, rieb tix teei Nawh haok ka daux meung raoma: mai: kieh ngawm plak taix khawn: dawm: Siyiex heue:. 20 Mai: kix lih hu: mai: sidiex gau ku dah ku dee. Mai: Simiang yuh kaing tau mai: kix, mai: kieh lox bwan: kaux cong:, kheu mhai: pa hawt khankix heue:.