Philippix

Philippix

Simin Ting 1

Lox nawb mai: pa yaogyaw bwanson:

1 Pawlux mai: Timose, pa mawh siliex Yesux Khrit tawx hu: ka pui singax singeh ka daux Yesux Khrit, pa ot ka veng Philippix khawm: uik, mai: ka cao: giex kaing: ceucao mai: ka pui bung: kaing: ceucao khankix. 2 Kieh pex koe: bwanson: mai: pa nhim: pa kaoh khaing: Keeing: ex Siyiex mai: Simiang Yesux Khrit heue:.

3 Yam doh keud aux ka pex ku bawg aux yaogyaw ka Siyiex aux, 4 mai: yam rawg mhaing: aux son pex khawm: uik ku bawg, aux rawg bwan: daux krax gauxrhawm: gauxrhi:, 5 kheu pex yuh paox yuh pie ka daux pa kieh lox bwan: gauxrhawm: gauxrhi: tah hu:, jah ka singaix pa mhong: pex lox bwan: an, tom: yamin heue:. 6 Aux hoik yumrhawm: mhawm: mhawm:, grawh grawng: Kaw pa hoik jah tix yuh kaing pa mhawm: ka daux pex, tag kawn: sang yuh tom: grum hoik, tom: hoek singaix Yesux Khrit heue:. 7 Pa keud aux yuh nin: son pex khawm: uik hoik khaw:, mawh kheu pex ca: koe: daux rhawm: aux, ka daux pa phyawk aux in, mai: khawm: ka daux pa kham: mhai: sakse: tix tieb tie mai: kieh lox bwan: gauxrhawm: gauxrhi: kaux cong: kawx, pex khawm: uik hoik mawh pa neuex pa rom tix pon bwanson: tau mai: aux heue:. 8 Grawh grawng: nawh, Siyiex mawh cao: pa kham: mhai: sakse: aux, grawng: pa byaong aux ka pex khawm: uik, ka daux ceu pa moh pa rhawm: Yesux Khrit heue:. 9 Mai: aux rawg bwan: yuh ka mawx son sang ting krax moh pex sinyek sinyek, ka daux pa chix tawng chix yung ku ceu khawm: uik, 10 yuh ka mawx son sang chix tawng tix cheu: ceu pa tang: pa siyox khankix, mai: son sang singax singeh pex mai: ang koe: dee cha: tom: hoek singaix Yesux Khrit, 11 kheu hoik naog pex ka plix ceu pa rah pa see, pa hoik mawh kheu Yesux Khrit, son sang kieh Siyiex koe: min: plakngai: mai: pa yaogyaw heue:.

Ting gauxrhawm: ka daux Cao: Khrit

12 Puxaik khankix eue:, aux simie tix kieh pex tawng grawh grawng: ceu pa hoik mawh ka aux, hoik pluk pliak tix mawh ceu pa teem: tix kieh lox bwan: gauxrhawm: gauxrhi: tah hu:, khaing: pa kieh pa raw kah heue:. 13 Kheu in ceu pa phyawk aux in hoik sidawng: grawng: mawh kheu mawh son Cao: Khrit ka kru naing pa pau nyiex haw: khawm: uik, mai: ka pa deuk khankix khawm: uik heue:. 14 Mai: puxaik ka daux Simiang plak nie, viex rhawm: kaux rhawm: cong: kheu pa phyawk aux in, mai: nie lheu: koe: rhawm: kua:, pa ang ring tix sidiex gumlox Siyiex heue:. 15 Pui tiblah sidiex grawng: Cao: Khrit kheu krax bohrhawm: bohrhi:, mai: krax simah simaing:, viang mawh nan: tiblah sidiex kheu krax mhawm: rhawm:, 16 pa ghoik tix krai khaix khankix sidiex kheu koe: krax moh krax rhawm:, mai: kheu tawng kix grawng: hoik deuh aux son sang tieb tie tix priex lox bwan: gauxrhawm: gauxrhi:, 17 viang mawh kawx nan:, pa krai phaoxka: khankix, sidiex grawng: Cao: Khrit kheu krax pa ang khaw: paox tix, ang tie viex khawm: rhawm: tix, mai: nieb yuh, mai: keud tix sang nie lheu: baox tiien baox thie: ka pa kharhawm: kharhi: daux ceu pa phyawk aux heue:. 18 Mawh kheu nan: mawh pa yuh ka mawx? Nieb lak pie tix sidiex ang ah, sidiex ka daux pa mawh pa meh ang ah, sidiex yuh ka mawx ang ah, mawh pa sidiex grawh grawng: Cao: Khrit heue:. Mawh kheu grawng: in aux gauxrhawm: kah, mawh heue:, mai: aux tag sang baox deeh gauxrhawm: kah heue:. 19 Grawh grawng: nawh, aux tawng grawng: in tag sang tieh tix mawh pa taoh aux, kheu pa rawg pex bwan:, mai: pa teem: Khwan: Yesux Khrit, 20 awm: pa khaw: mai: pa nied keud pot jun pot aux, yuh ka mawx son ang aux sang kaig sang tua ka daux tix ceu kawx, viang mawh kawx nan: son sang koe: rhawm: pa grum kua:, awm: pa sax koe: jheeng: jheeng:, yamin kawx Cao: Khrit tag sang ting sang lhaong: ka daux tokaux aux, viang sang mawh ka pa im: aux ang ah, ka pa yum aux ang ah heue:.

Im: mawh Cao: Khrit

21 Grawh grawng: nawh ka aux, pa im: mawh Cao: Khrit, mai: pa yum mawh bwanson: heue:. 22 Viang mawh kawx nan: phan: pa im: aux ka daux nex nham: sang mawh pa kieh kaing jhaw: aux plix plix kah, aux sang laug tix cie pa yuh ka mawx, ang aux tawng heue:. 23 Viang mawh nan: aux lai keud ang doh ka sinax an ra: ceu, kheu simie aux tix lih hu: ot tau mai: Cao: Khrit, mawh kheu an mawh pa kied nie lheu: lang: teung: mhawm:, 24 viang mawh nan: pa ot ka daux nex nham: mawh pa nie lheu: lo son pex heue:. 25 Mai: mawh kheu hoik yumrhawm: aux grawng: ceu in, aux tawng grawng: aux tag sang ot tau mai: pex khawm: uik, son sang ting sang lhaong: pex, mai: gauxrhawm: ka daux krax yumrhawm: in heue:. 26 Yuh ka mawx ceu pa yaw rangdi pex tag nie lheu: ting ka daux Yesux Khrit, ka daux aux, kheu baox deeh ot aux tau mai: pex tix bawg heue:. 27 Kieh ngie pa yuh pex keung: mai: been lox bwan: gauxrhawm: gauxrhi: Cao: Khrit, yuh ka mawx phan: aux hoek ka pex ang ah, siyang: ot ang ah, aux tag pon tix mhong: grawng: kaux cong: pex mai: viex khwan: tix mu: mai: rhawm: tix mu: khaing:, mai: nied tix yuh son krax yumrhawm: pa dex pa dawd mai: lox bwan: gauxrhawm: gauxrhi:, 28 mai: grawng: ang lhat ang graung ka pa koeng khankix heue:. Grawh grawng: nawh pa ang pex lhat mawh mhai: mawh khen: ngha: sang laux kix, viang mawh nan: sang mawh mhai: grawng: pa taoh pex, mai: an mawh khaing: Siyiex heue:. 29 Mawh kheu hoik tawx ka pex, ka son Cao: Khrit, pa ang joeng mawh ngie pa yumrhawm: ka Nawh Cao:, viang mawh nan: khawm: pa sang kham: geu: son Nawh, 30 kheu pex ngah paox tix ka ceu pa awm: pa hoik yaox pex aux ngah kah, mai: pa pon pex tix mhong: yamin heue:.

Simin Ting 2

Deuh Cao: Khrit mawh pakpeung

1 Mawh kheu nan: phan: koe: pa jeeh pa sidiex ka daux Cao: Khrit, phan: koe: pa nyawmrhawm: nyawmrhi: ka daux krax moh krax rawm, phan: koe: ceu pa yuh paox yuh pie mai: Khwan: Cao:, phan: koe: ceu pa moh pa caoxrhawm:, 2 kieh krax gauxrhawm: aux grum naog kah, yuh ka mawx son sang koe: pex rhawm: pa awm: paox tix, mai: koe: krax moh krax rhawm: pa awm: paox tix, pa koe: rhawm: tix mu: khaing:, pa chix ih rhawm: paox tix heue:. 3 Paw yuh tix ceu kawx ka daux pa simah simaing:, phan: ang mawh nan: kheu pa nieb yuh grang pa giex pa going, viang mawh kawx nan: yuh ka daux rhawm: pa tiem, mai: een: tang: kaux mawh pa nie lheu: mhawm: khaing: tokaux tix, 4 paw vi jhak ngie ka ceu cie tokaux tix khankix, viang mawh nan: pex ku kaux jhak ka khawm: ceu cie pui tang: kaux khankix heue:. 5 Kieh rhawm: pa hoik koe: ka daux Yesux Khrit koe: ka daux pex. 6 Kaw pa viang Nawh hoik mawh ka daux rieang pakpeung Siyiex kawx, ang lai een: lai sawn: ceu pa mawh pa sidu mai: Siyiex tix mawh pa jhawp kah, 7 viang mawh nan: klop tix kieh yi min: plakngai: tokaux Tix, mai: teei rieang pakpeung siliex, mai: yuh tix lih mawh awm: kawn: pui, 8 mai: yam mawh Nawh rieang pakpeung kawn: pui, Nawh yuh tokaux Tix tiem mai: cu nghiet tom: geu: pa yum, mawh heue:, tom: yum ka piang khaoxlhak heue:. 9 Mawh kheu nan: Siyiex hoik yaog tix kieh Nawh ting, mai: tawx ceukaux pa nie lheu: blon: ting lhaong: khaing: can ceukaux khawm: uik ka Nawh heue:. 10 Yuh ka mawx ngawng ku ngawng tag sang grux ngawng ka daux ceukaux Yesux can pa koe: ka daux meung raoma: ang ah, mai: ka piang haktiex ang ah, mai: ka greem: haktiex ang ah, 11 mai: yuh ka mawx dak ku dak tag sang kham: grawng: Yesux Khrit mawh Simehang, son sang mawh min: plakngai: ka Keeing: Siyiex heue:.

12 Mawh kheu nan: pa moh aux ka khankix eue:, awm: hoik nghiet pex jheeng: jheeng:, ang mawh ngie yam ot aux, viang mawh kawx nan: yamin yam ang aux ot, pex khaw: tix nie lheu: yuh son sang pon krax taoh tix, ka daux pa lhat pa siyaung: heue:. 13 Grawh grawng: nawh mawh Siyiex, pa mawh Kaw pa yuh kaing ka daux pex, son sang koe: rhawm: tix yuh, mai: son sang yuh kaing, son pa caw rhawm: Nawh heue:. 14 Yuh ku ceu khawm: uik ka daux pa ang koe: pa bawg be mai: pa thungthiang:, 15 yuh ka mawx son sang lih pex tix mawh pa ang koe: dee phit, mai: pa ang chix phit, pa mawh kawn: Siyiex pa loig, ka sigreung ju pa kawk pa vawk, pa tieh lud, jhi: tokaux pex ka sinax pui pa yuh nin: awm: ceu pa toh riang ka daux haktiex, 16 mai: yaog tix jung gumlox pa im: ju, yuh ka mawx son sang koe: aux ceu pa yaw rangdi kah, ka daux singaix Cao: Khrit, yuh ka mawx pa to: aux ang mawh pa giex pa going, mai: viang pa nyhap pa yuh aux ang mawh pa giex pa going heue:. 17 Viang mawh kawx nan: viang sang prauk aux lih ka piang ceu pa tan, mai: ceu pa tan lu krax yumrhawm: pex, aux gauxrhawm: kah, mai: aux rom tix gauxrhawm: tau mai: pex khawm: uik heue:. 18 Mai: pa awm: an viang pex kawx gauxrhawm:, mai: rom tix gauxrhawm: tau mai: aux heue:.

19 Aux keud pot jun pot ka daux Simiang Yesux tix sang ploi: Timose hu: ka pex, khaix ang awt reung:, yuh ka mawx son sang nyawmrhawm: aux khaix tawng aux grawh grawng: pex heue:. 20 Grawh grawng: nawh aux ang koe: pui tix kaux kawx pa awm: rhawm: nawh, pa sang viex khawm: rhawm: tete tix keud grawh grawng: ceu pa dex mai: pex heue:. 21 Grawh grawng: nawh kix khawm: uik sawg ceu son cie tokaux tix, mai: ang sawg ceu son cie Yesux Khrit khankix heue:. 22 Viang mawh kawx nan: pex tawng mhai: sakse: grawng: nawh, grawng: pa yuh nawh tau mai: aux son lox bwan: gauxrhawm: gauxrhi:, awm: yuh kawn: tau mai: keeing: heue:. 23 Mawh kheu nan: aux keud pot jun pot tix sang ploi: nawh hu: dom: mawx dom: an, khaix hoik yaox aux ceu pa sang mawh ka aux heue:. 24 Aux een: rhawm: ka daux Simiang, yuh ka mawx tokaux aux kawx sang hoek ka pex khaix ang awt rheung: heue:. 25 Viang mawh kawx nan: aux keud pon lox pa ploi: Epaphrawdit, puxaik aux, mai: paox pa yuh kaing aux, mai: paox pui naing aux, pa mawh kawncau pex pa kia: ngien ka ceu pa lo aux, 26 mawh kheu nawh byaong ka pex khawm: uik, mai: kied lulax rhawm: kah, kheu hoik mhong: pex grawng: saux nawh heue:. 27 Grawh grawng: nawh, nawh hoik saux tete tom: dex sang yum tix, viang mawh kawx nan: Siyiex hoik caoxrhawm: ka nawh, mai: ang joeng mawh ngie ka nawh, viang mawh nan: khawm: ka aux kawx, yuh ka mawx son aux tag ang koe: pa khirhawm: piang pa khirhawm: heue:. 28 Mawh kheu nan: aux nie lheu: coca: tix ploi: nawh hu:, yuh ka mawx yam deeh yaox pex ka nawh, pex tag sang gauxrhawm: kah, mai: son krax khirhawm: aux sang moi: dieh moi: iak kah heue:. 29 Mawh kheu nan: rieb tix teei nawh ka daux Simiang, tau mai: krax gauxrhawm: khawm: uik, mai: yungyi: ka pui pa yuh nan:, 30 mawh kheu son kaing Cao: Khrit nawh dex sang yum, mai: hoik nyawk ka mawh ka ju tix, yuh ka mawx son sang kieh naog, pa kawn: cha: ka ceu pa yuh pex ka aux heue:.

Simin Ting 3

Mhai: dee sang hoek ka son ju ex

1 Pa mawh ceu pa deuk, puxaik aux khankix eue:, kieh gauxrhawm: ka daux Simiang heue:. Pa tiem: ceu pa awm: paox tix ka pex, ang mawh pa dah rhawm aux kah, mai: ka pex mawh pa kaux cong: heue:. 2 Rien rhawm: tix ka sox khankix, rien rhawm: tix ka pa yuh pa caox khankix, rien rhawm: tix ka cub pa pat pa kid dud khankix heue:. 3 Grawh grawng: nawh ex pon mawh cub pat hak pa mawh pa meh, pa yuh kaing krub ka daux Khwan: Siyiex mai: pa yaw rangdi ka daux Yesux Khrit, mai: pa ang een: rhawm: ka daux nex nham:, 4 viang aux khaw: tix chix pon een: rhawm:, pie ka daux nex nham: heue:. Phan: pui tang: kaux ce: chix een: rhawm: tix ka nex nham:, aux nie lheu: chix tix. 5 Hoik pat hak aux yam koe: daix singaix, aux mawh ceu Isarilax, pa mawh ceucat Benyamin, aux mawh pui Hebrie pa mawh khaing: pui Hebrie, phan: hawt lox been li mawh Pharishie:. 6 Phan: mawh plak viex rhawm: tix coca:, aux mawh pa tuktiak tukte: ka ceucao, phan: mawh pa rah pa see pa koe: ka daux lox lai been li ang koe: dee khluk khlaik dee cha: heue:. 7 Viang mawh kawx nan: ceu pa mawh ceu pa koe: bwanson: ka aux, aux hoik een: hoik sawn: mawh pa som pa nai: son Cao: Khrit heue:. 8 Lheu: khaing: an viang ku ceu khawm: uik kawx aux een: aux sawn: mawh pa som pa nai:, mawh kheu ceu pa kied nie lheu: ting mhawm: krax tawng krax yung ka Simiang aux Yesux Khrit, kheu Nawh Cao: aux hoik geu: pa som pa nai: ku ceu khawm: uik, mai: hoik een: hoik sawn: khankix mawh ngie pa seeing: pa tik pa vud khaing:, yuh ka mawx son sang pong aux Cao: Khrit, 9 mai: son sang yaox ka aux ka daux Nawh Cao:, pa ang koe: pa rah pa see cie tokaux tix pa mawh khaing: lox lai been li, viang mawh kawx nan: pa rah pa see pa pon kheu krax yumrhawm: ka daux Cao: Khrit, pa mawh pa rah pa see khaing: Siyiex kheu krax yumrhawm:, 10 yuh ka mawx son sang tawng aux Nawh Cao:, mai: siawp sibrawm ceu pa deeh kaoh im: Nawh, mai: pa yuh paox yuh pie ka krax kham: geu: pa kharhawm: kharhi: Nawh, mai: yum awm: yum Nawh Cao:, 11 ka daux krax keud pot jun pot son sang pon aux krax pa deeh kaoh im: khaing: krax yum heue:. 12 Ang aux lai ah hoik pon tix mai: hoik grum mhawm: tix, viang mawh kawx nan: aux nied tix hu: sivoe, yuh ka mawx son sang pon giex aux ka ceu pa hoik giex Yesux Khrit ka aux, ka son an heue:. 13 Puxaik khankix eue:, aux ang een: ang sawn: tokaux tix mawh pa hoik pon, viang mawh kawx nan: aux yuh ngie tix ceu khaing:, aux piawm: ceu pa hoik koe: plak khaix, mai: nyeu tix sang pon ceu pa koe: plak sivoe khankix, 14 aux kawn: nied tix baox hu: ka dee koe: mhai:, dee sang pon khawngphak pa dex mai: pa kok Siyiex dee long: ka daux Yesux Khrit heue:. 15 Mawh kheu nan: kieh can ex pa hoik grum die huan: deuh rhawm: tix yuh nin:, mai: phan: pex koe: rhawm: pa tang: siyox ka daux tix ceu ceu, grawng: an kawx Siyiex tag plak kieh pex yaox, 16 viang mawh nan: ex hoik pon hu: sivoe die pie mawx, kieh ex hu: awm: pa khaw: mai: ceu an heue:.

17 Puxaik khankix eue:, pex rom tix hawt jawh ka aux, mai: jhak ka kix pa hu: yuh nin:, awm: pa koe: pex yix son sang mawh mhai: pa hawt tix jawh kah heue:. 18 Grawh grawng: nawh pui tom: nie hu: awm: hoik sax krai aux ka pex lawx lawx, mai: yamin kawx baox krai ka pex khawm: yiem tix, grawh grawng: mawh kix pui koeng ka khaoxlhak Cao: Khrit, 19 dee sidah cie kix mawh pa laux pa leeing:, Siyiex cie kix mawh vaig kix, mai: pa yaw kix kah mawh ceu pa kaig pa tua cie kix, kix ca: keud pot grawng: ceu pa dex mai: haktiex heue:. 20 Grawh grawng: nawh lai ceukaux grawng: mawh yix kawn: rai hoik koe: ka daux meung raoma:, ex tom: nied tix krox son Cao: Taoh khaing: tan: khawm:, pa mawh Simiang Yesux Khrit, 21 Kaw pa sang loh tokaux ex pa ang koe: cee tix kieh mawh, awm: pakpeung tokaux Nawh pa koe: min: plakngai:, ka siawp sibrawm pa koe: Nawh tix chix kieh ku ceu khawm: uik ot greem: tokaux Tix heue:.

Simin Ting 4

Gauxrhawm: ka daux Cao: Khrit jheeng: jheeng:

1 Mawh kheu nan: puxaik pa moh aux khankix, mai: pa byaong aux kah, pa mawh krax gauxrhawm: mai: mhok khri: aux, ot kaux cong: ka daux Simiang, pui pa moh aux khankix eue:. 2 Ka Eodia aux jeeh nyaw kah, mai: ka Suntukke aux jeeh nyaw kah, son sang koe: rhawm: pa awm: paox tix ka daux Simiang heue:. 3 Mawh heue:, aux khyox khaw: ka maix kaw pa mawh paox pa yuh tau mai: aux tete eue:, teem: coi ka bon: in kiex, mawh kheu kiex hoik yuh tau mai: aux ka daux lox bwan: gauxrhawm: gauxrhi:, tau mai: khawm: Klemen, mai: paox yuh kaing pa deuk khankix, pa ceukaux kix hoik koe: ka daux phuk lai ju pa im: heue:.

4 Gauxrhawm: ka daux Simiang jheeng: jheeng:, aux baox deeh ah gauxrhawm: heue:. 5 Ceu pa awn: rhawm: awn: rhi: pex kieh pui khawm: uik tawng kah heue:. Simiang ot dex heue:. 6 Paw khirhawm: ka grawh grawng: tix ceu kawx, viang mawh kawx nan: ka daux ku ceu, rawg bwan: mhaing: tau mai: krax yaogyaw bwanson:, mai: kieh Siyiex tawng pa rawg pa mhaing: pex, 7 mai: pa nhim: cie Siyiex, pa nie langteung: ting khaing: krax tawng krax yung khawm: uik, tag sang pau rhawmrhi: pex, mai: pa keud pex ka daux Yesux Khrit heue:.

8 Lox pa deuk mawh nin:, puxaik khankix eue:, can ceu pa mawh, pa mawh pa meh, can ceu pa koe: min: plakngai:, can ceu pa rah pa see, can ceu pa singax singeh, can ceu pa mhawm: pa mhiem:, can ceu pa yaw pa ao: min: pa mhawm: kah, phan: siep koe: bwanson:, phan: siep koe: krax yaogyaw, keud ka grawh grawng: ceu in khankix heue:. 9 Ceu pa hoik gau mai: khawm: pa hoik rieb pex tix teei, mai: pa hoik mhong:, mai: pa hoik yaox ka aux, hawt tix yuh ceu an khankix, mai: Siyiex pa nhim: tag sang ot tau mai: pex heue:.

Vhah rhawm: ka pa koe: tix daux Cao: Khrit

10 Aux kied ting gauxrhawm: ka daux Simiang, kheu yamin viang hoik koe: jih jang: glang: gleeing: kawx, krax pa kia: ngien pex ka aux hoik deeh pruh kah, viang hoik keud pex tix yuh tete kawx, pex ang yaox tix yuh heue:. 11 Aux ang ah grawng: pa ang kub tix, mawh kheu aux hoik gau tix chix vhahrhawm: viang aux yaox tix ot ka pa yuh ka mawx ang ah heue:. 12 Aux chix ot ka daux pa hot pa blai, mai: aux chix ot khawm: ka daux pa nie haoh nie lheu: khaing: kub, ka daux ku ceu khawm: uik aux hoik gau tix chix kham: pa sak, mai: khawm: tix chix cairhawm:, mai: tix chix koe: pa nie haoh nie lheu: khaing: kub, mai: khawm: pa ang kub tix heue:. 13 Aux chix yuh ku ceu khawm: uik ka daux Kaw pa tawx riang tawx rao ka aux heue:. 14 Viang mawh kawx nan: pa yuh pex paox pie mai: krax kharhawm: kharhi: aux, pex hoik yuh pa mhawm: heue:. 15 Pui Philippix khankix eue:, viang pex kawx hoik tawng, grawng: yam jah lox bwan: gauxrhawm: gauxrhi:, yam lih hu: aux khaing: meung Makedonix, ceucao tix mu: kawx ang yuh paox yuh pie mai: aux, ka daux krax tan krax lu, mai: ka daux pa rieb tix teei, lheu: khaing: pex khaing:, 16 grawh grawng: nawh pie yam ot ka daux veng Thesalonix kawx pex hoik sipaox son pa lo aux tix ra: bawg heue:. 17 Ang mawh kheu sawg aux khawngphak, viang mawh kawx nan: aux sawg son plix pa sang teen ka son pex heue:. 18 Viang mawh kawx nan: aux grum koe: ku ceu khawm: uik, mai: aux koe: nie haoh nie lheu: khaing: kub, aux hoik kub hoik naog, khaix hoik pon rieb aux ceu pa Epaphrawdit viex khaing: pex, pa mawh bhawm: pa sioe: baux, mai: pa tan pa lu ceu pa keung: pa khaw: pa caw ka Siyiex heue:. 19 Siyiex aux tag sang kieh grum naog ceu pa lo pex ku ceu, awm: pa khaw: mai: sinngao min: plakngai: Nawh, ka daux Yesux Khrit heue:. 20 Kieh Siyiex mai: Keeing: ex koe: min: plakngai: ku ju leeing: ju leeing: phan: liak. Amen.

Lox ghoik

21 Tawx lox nawb ka pui singax singeh ka daux Yesux Khrit ku kaux awawx. Puxaik pa ot tau mai: aux khankix kawx nawb ka pex heue:. 22 Pui pa singax singeh khawm: uik kawx nawb ka pex, nie lheu: mawh kix pa dex mai: geh nyiex haw: Kesa heue:.

23 Kieh bwanson: Simiang Yesux Khrit koe: tau mai: khwan: pex liak. Amen.