Romax

Romax

Simin Ting 1

Grawng: krax pa simawd

1 Pawlux pa mawh siliex Yesux Khrit, pa hoik kok tix kieh mawh kawncau pa ting, pa hoik tiah tix deuh son sang sidiex lox bwan: gauxrhawm: gauxrhi: Siyiex, 2 pa hoik grux tawx Nawh Cao: lox mukheu ka cao: jhai: khankix tix tiem: daux phuk lai sigang: khri: pa singax singeh khankix, 3 grawh grawng: Kawn: Nawh Cao:, pa hoik keh awm: pa khaw: plak nex nham: ka daux ceucat Dawit, 4 phan: mawh awm: pa khaw: plak khwan: pa dex mai: pa singax singeh, hoik sidawng: mawh Kawn: Siyiex tau mai: siawp sibrawm, ka pa deeh kaoh im: khaing: krax yum heue:. Pa mawh Simiang ex Yesux Khrit. 5 Mawh ka daux Nawh heue:, pa pon ex bwanson:, mai: ara kawncau pa ting, son sang kieh ceu pui khawm: uik koe: krax cu krax nghiet ka krax yumrhawm:, son ceukaux Nawh Cao:, 6 viang pex kawx mawh ka daux kix, pa hoik kok tix mawh cie Cao: Khrit heue:. 7 Tawx ka pui pa ot ka daux veng Romax khawm: uik, can pa moh Siyiex kah, pa hoik kok tix kieh mawh pui singax singeh heue:. Kieh pex koe: bwanson:, mai: pa nhim: pa kaoh khaing: Keeing: ex Siyiex, mai: Simiang Yesux Khrit liak.

Yawgyaw bwanson: mai: rawg bwan:

8 Ka: sivoe paox tix, aux yaogyaw bwanson: Siyiex aux, ka daux Yesux Khrit, son pex khawm: uik, kheu grawng: krax yumrhawm: pex hoik krai hoik tah ka piang haktiex ku dah ku dee khawm: uik heue:. 9 Grawh grawng: nawh, Siyiex mawh cao: pa kham: mhai: sakse: aux, pa mawh Kaw pa yuh aux son Nawh ka daux khwan: aux, ka daux lox bwan: gauxrhawm: gauxrhi: Kawn: Nawh Cao:, grawh grawng: pa simawd aux ka pex ang jud ang jai, ka daux pa rawg aux bwan: ku jheeng: jheeng:. 10 mai: rawg mhaing:, yuh ka mawx phan: khaw: mai: alo Siyiex, aux tag sang pon hoek ka pex sax heue:. 11 Grawh grawng: nawh, aux simie tix yaox pex, yuh ka mawx son sang pon aux tix tawx khawngphak khwan: tix ceu ceu ka pex, son sang kieh pex kaux cong: heue:. 12 Grawng: ah nan: sang ah nin:, yuh ka mawx aux mai: pex sang pon pa nyawm rhawm: tau, ex ku kaux kheu krax yumrhawm: paoxtix tang: kaux, khawm: ka krax yumrhawm: cie pex mai: cie aux heue:.

Grawh grawng: pa tiem: lai

13 Puxaik khankix eue:, aux ang rhawm: kieh pex ang tawng, grawng: pa yiag aux tix hoek ka pex tom: nie bawg (viang mawh nan: hoik kieh hoik raw aux tom: yamin), yuh ka mawx son sang pon aux tix koe: plix khawm: ka daux pex ceeix, awm: pa hoik koe: aux ka daux pui tang: ceu tang: cat pa tang: khankix heue:. 14 Aux mawh pa koe: ceuk ka pui Helasax mai: ka khawm: pui pheem: khankix, mai: ka pui koe: pingnya mai: ka khawm: pui pa ang koe: pingnya heue:. 15 Mawh kheu nan: aux koe: rhawm: tix sang viex khawm: rhawm: khawm: rhi: tix, tix sidiex lox bwan: gauxrhawm: gauxrhi: viang ka khawm: pex pa ot ka daux veng Romax heue:.

16 Grawh grawng: nawh, ang aux kaig tua kheu lox bwan: gauxrhawm: gauxrhi:, mawh kheu lox bwan: an mawh siawp sibrawm Siyiex, son can pui pa yumrhawm: ku kaux sang hoek krax taoh, son pui Yudax ka: paoxtix, mai: khawm: son pui Helasax heue:. 17 Grawh grawng: nawh pa rah pa see Siyiex plak sidawng: ka daux lox bwan: an, kheu krax yumrhawm:, son sang yumrhawm:, awm: hoik tiem: tix deuh ah nin:,

210"Pui pa rah pa see tag sang im: kheu krax yumrhawm: heue:."

Pui tang: ceu tang: cat kham: krax deuh phimap

18 Grawh grawng: nawh pa songrhawm: songrhi: Siyiex plak sidawng: khaing: raoma:, ka piang pui pa ang nab ang yam ka Siyiex, mai: pa ang rah ang see khawm: uik, pa mawh pa kieh pa raw ka pa mawh pa meh, ka daux pa ang rah ang see heue:. 19 Mawh kheu can pa pon tix tawng grawng: Siyiex hoik sidawng: ka daux kix, grawh grawng: nawh Siyiex hoik plak sidawng: ka kix heue:. 20 Grawh grawng: nawh ceu pa ang chix yaox cie Nawh Cao:, tom: yam jah tix kaw: tix phan: haktiex dix, pa mawh siawp sibrawm leeing: ju, cie Nawh, mai: pa mawh Nawh leeing: ju, pon tix yaox sidawng, kheu pon tix yaox ka daux ceu pa hoik yuh Nawh Cao:, mawh kheu nan: ang kix koe: dee duh grawng: phimap tix, 21 mawh kheu viang kix hoik tawng kah Siyiex kawx, kix ang yaog ang yaw Nawh ting, awm: pa khaw: kix tix yaog tix yaw Siyiex, mai: ang kix deeh yaogyaw bwanson: Nawh, mai: kix lih tix mawh pa ang koe: bwanson: ka daux ceu pa keud tix, mai: rhawmrhi: pa sivix pa ang chix tawng kix hoik vhaik hu: heue:. 22 Viang kix dhua: tokaux kix mawh pa koe: pingnya cuyi, kix lih mawh pui daox pui aw:, 23 mai: loh min: plakngai: Siyiex, pa ang chix laux chix leeing: ka son rieang rao pa yaung pui pa chix lau chix leeing:, mai: rieang rao yaung sim: khankix, mai: rieang rao yaung tosat pa koe: caong pon: khawn: khankix, mai: rieang rao yaung ceu pa chix mo hu: khankix heue:.

24 Mawh kheu nan: Siyiex tom: grham: kix ka daux alo nex nham: rhawmrhi: kix, tix yuh ceu pa ang singax singeh, yuh ka mawx tokaux kix sang hoek krax laux min: plakngai: ka paox tix tiru heue:. 25 Mawh kheu kix hoik loh pa mawh pa meh Siyiex ka son pa pie pa lhen:, mai: krub mai: yuh son ceu pa hoik phan: hoik yuh, mai: ang krub ang yuh son Cao: Phan: Cao: Yuh, Kaw pa koe: bwanson: leeing: ju leeing: phan:. Amen.

26 Mawh kheu jao in Siyiex tom: grham: kix yuh alo nex nham: pa seeing: pa brai:, grawh grawng: nawh bon: kix khankix deeh loh ceu pa khaw: tix shiao tix awm: pa khaw: mai: been nex nham:, tix nieb yuh ka ceu pa ang khaw:, 27 mai: awm: an simex khankix kawx, kix tik been ceu pa khaw: tix shiao ka bon:, mai: koe: rhawm: kraing: ka paox tix tix kaux lai tix kaux, mai: nieb yuh pa ang doh khaw: ka paox simex tix, mai: son pa phit pa lud an kix deeh pon ka daux tokaux kix, awm: pa keung: kix tix pon heue:.

28 Mai: awm: pa ang kix rhawm: tawng ka Siyiex, Siyiex hoik grham: kix tix koe: rhawm: pa keud pa ang keung: ang khaw:, son sang yuh ceu pa ang khaw: ang jiet heue:. 29 Mai: kix naog ka can pa ang rah ang see khawm: uik, pa mawh pa caox pa caig, mai: pa ghoing:, mai: pa koe: rhawm: tix sang yuh pui laux, pa naog ka pa boh rhawm: boh rhi:, mai: pa pah pui yum, mai: pa simah simaing:, mai: pa pie pa lhen:, mai: pa koeng, mai: pa ah lox suksiep, 30 mai: pa nieb yuh plakngai: pui laux, mai: pa koeng Siyiex kah, mai: pa ang chix nab chix yam, mai: pa canyhau: ting rhawm:, mai: pa nieb yaw tix, mai: pui pa lih tix keud tix yuh ceu pa caox pa caig, mai: pa ang chix cu chix nghiet ka lox miex keeing: tix, 31 mai: pa ang chix tawng chix yung, mai: pa ang kaux sijax ka lox mukheu, mai: pa ang koe: krax moh awm: pa sax koe: been moh pui paoxtix, mai: pa ang chix caoxrhawm: caoxrhi:. 32 Viang kix hoik tawng grawng: pa prawng pa ca: Siyiex, hoik een: grawng: pui pa yuh nan: khaw: tix yum kawx, tokaux kix ang joeng yuh ceu an khaing:, viang mawh kawx, tokaux kix ang joeng yuh ceu an khaing:, viang mawh kawx nan: kix yaw mai: caw rhawm: khawm: ka pui pa yuh nan: heue:.

Simin Ting 2

Pui Yudax kham: krax deuh phimap

1 Mawh kheu nan: pui pa prawng pa ca: ku kaux eue:, maix ang koe: dee duh ka phimap tix, grawh grawng: nawh pa prawng ca: maix ka pui tang: kaux, maix hoik prawng hoik ca: taix tokaux tix mawh pa khaw: tix pon krax ciyang, mawh kheu maix, pa prawng pa ca:, yuh nang: ceu pa awm: an heue:. 2 Mai: ex tawng grawng: pa prawng pa ciyang Siyiex ka piang kix pa yuh ceu an, mawh awm: pa khaw: mai: pa mawh pa meh heue:. 3 Pui pa prawng pa ca: ka pui pa yuh ceu an kix, mai: pa tokaux tix kawx yuh nang: ceu pa awm: an eue:, maix ce: tix sang pon luan khaing: krax prawng krax ciyang Siyiex lie? 4 Phan: ang mawh nan: maix nieb yuh pa ang cee ang cak ka krax pa nie mi nie koe: ceu pa mhawm:rhawm:, mai: pa gun pa yeung, mai: pa lang: gun lang: yeung Nawh Cao:, kheu ang maix tawng grawng: pa mawh in rhawm: Siyiex mawh son sang thong: maix tix doh keud doh sawn: ka phimap tix lie? 5 Kheu pa kiien: rhawm: mai: rhawm: pa ang chix doh keud doh sawn: ka phimap tix mai: rhawm: tix deuh ceu pa songrhawm: songrhi: son tokaux tix, ka daux singaix pa songrhawm: songrhi:, mai: yam sang sidawng: pa prawng pa ciyang Siyiex rah see. 6 Kaw pa tag sang tawx ka ku kaux daux pui awm: pa khaw: mai: kaing pa yuh tix heue:. 7 Ka kix pa chix viex rhawm: gun rhawm: yeung mai: ca: yuh kaing pa mhawm: mai: sawg son min: plakngai: mai: krax yung: yi:, mai: pa ang chix laux chix leeing:, tag tawx ju leeing ju leeing: phan: heue:. 8 Viang mawh kawx nan: ka kix pa yuh sipie lie sivoe mai: ang cu ang nghiet ka pa mawh pa meh, viang mawh nan: pa cu pa nghiet ka pa ang rah ang see, tag tawx pa songrhawm: songrhi:, 9 mai: pa lang: teung: kharhawm: kharhi:, mai: pa khirhawm: khirhi:, ka piang ju pui pa yuh pa caox ku kaux, ka pui Yudax ka: paox tix mai: ka khawm: pui Helasax, 10 viang mawh kawx nan: min: plakngai: mai: pa yungyi: mai: pa nhim:, ka pui ku kaux pa yuh ceu pa mhawm:, ka pui Yudax ka: paoxtix, mai: ka khawm: pui Helasax heue:. 11 Grawh grawng: nawh Siyiex ang jhak ka pakngai: pui heue:. 12 Grawh grawng: nawh can kix pa ang koe: lai been li mai: hoik phit hoik lud, tag sang laux leeing: khawm: ang tix koe: lai been li, mai: can kix pa hoik phit hoik lud greem: lai been li, tag sang prawng ca: kix ka lox lai been li heue:. 13 Grawh grawng: nawh pui pa mhong: lox lai been li mawh pa rah pa see sivoe Siyiex ang mawh, viang mawh nan: mawh pui pa hawt yuh lox tawm: lai been li pa tag hoek krax rah krax see, 14 (Grawh grawng: nawh yam pui tang: ceu tang: cat khankix pa ang koe: lai been li, lak chix yuh sipie ceu pa koe: ka daux lai been li, pui in kix, viang ang kix koe: lai been li kawx, kix mawh lai been li ka tokaux tix tiru heue:. 15 Kheu jhi: kix kaing pa yuh lai been li pa hoik tiem: daux rhawm: rhi: kix, mai: dee chix keud chix tawng kix kham: mhai: sakse: ka an, mai: kheu tawng kix tix deuh phimap ka paoxtix, phan: ang mawh nan: tix pluat ploi: phimap ka paoxtix heue:.) 16 ka daux singaix yam Siyiex tag sang teei Yesux Khrit mai: prawng ca: ka ceu pa hoik mox kawn: pui, awm: pa khaw: mai: lox bwan: gauxrhawm: gauxrhi: pa sidiex aux heue:.

17 Phan: maix kok tokaux tix mawh pui Yudax mai: een: rhawm: tix ka lox lai been li, mai: yaw rhang: di ka daux Siyiex, 18 mai: tawng alo Nawh Cao:, mai: chix cheu: chix liiem ka pa tang: siyox, yam mhong: maix pa phat lox tawm: lai been li, 19 mai: hoik yiag tokaux tix mawh cao: pa jhi: krax ka pui dug ngai:, mai: pa mawh pa riang ka kix pa ot ka daux pa vhaik, 20 mai: pa gau ka pui daox pui aw: khankix, mai: pa mawh sara cao: gau ka kawn: nyawm khankix, kheu koe: maix grang krax tawng krax yung, mai: grang pa mawh pa meh, ka daux lox lai been li. 21 Mawh kheu nan: maix pa gau ka pui tang: kaux, ang maix gau ka tokaux tix tiru lie? Maix pa sidiex gau nhie: pui paw briex paw lak, tokaux maix lai briex lie? 22 Maix pa ah pui ang khaw: tix phit vao, tokaux maix lai phit vao lie? Maix pa nieb yuh tix seeing: ka rieang rao khankix, tokaux maix lai mawh pui briex ka nyiex vad lie? 23 Maix pa yaw rangdi ka daux lox lai been li, maix lai yuh min: plakngai: Siyiex laux, kheu lheu: maix lox tawm: lai been li lie?

21124 Grawh grawng: nawh pui tang: ceu tang: cat khankix salao ka ceukaux Siyiex kheu pex, awm: hoik tiem: daux phuk lai sigang: khri: heue:.

25 Grawh grawng: nawh been pat hak mawh pa koe: bwanson: phan: maix mawh pui pa hawt yuh lox tawm: lai been li, viang mawh kawx nan: phan: maix mawh pa lheu: lox tawm: lai been li, pa pat hak maix, hoik lih tix mawh pa ang pat hak heue:. 26 Mawh kheu nan: phan: pui pa ang pat hak chix priex tix hawt been khankix pa koe: daux lai been li, pa ang pat hak nawh an, tag sang sawn: tix mawh awm: pa pat hak ang mawh lie? 27 Mai: kix pa ang pat hak ka pa dex mai: nex nham:, phan: kix grum hawt lox tawm: lai been li, tag sang prawng ka maix, pa hoik koe: lox tawm: lai been ka ngai: lai, mai: pa hoik pat hak, mai: baox lheu: ka lox tawm: lai been li ang mawh lie? 28 Grawh grawng: nawh pui pa mawh pui Yudax plakpraix, ang tie mawh pui Yudax tete, viang pa pat hak ka nex nham: plakpraix kawx, ang tie mawh pa pat hak tete, 29 viang mawh kawx nan: pa mawh pui Yudax tete, mawh pa mawh pui Yudax ka plak daux heue:. Mai: ceu pa pat hak mawh pa dex mai: rhawmrhi: mai: khwan:, mai: ang mawh ka daux ngai: lai heue:. Ang lai mawh pa yaogyaw pui kah, viang mawh nan: mawh pa yaogyaw Siyiex kah heue:.

Simin Ting 3

Pui haktiex khawm: uik kham: krax deuh phimap

1 Phan: mawh nan: pui Yudax chix nie lheu: koe: bwanson: yuh ka mawx? Phan: ang mawh nan: pa pat hak koe: bwanson: yuh ka mawx? 2 Koe: bwanson: tom: nie ka daux ku ceu heue:. Phaox ka: tix ceu, hoik tawx hoik pong lox tawm: jhawm: krai Siyiex ka kix heue:. 3 Viang pui tiblah ang yumrhawm: kawx, khex sang yuh ka mawx pawx? Krax pa ang yumrhawm: kix, sang chix laux yuh ceu pa kaux sijax Siyiex lie? 4 Ang doh mawh nan:. Viang pui khawm: uik laux sijax kawx, kieh Siyiex kaux sijax awm: hoik tiem: tix deuh daux Phuk lai sigang: khri: ah nin:,

212"Yuh ka mawx son sang yaox pa rah see Maix, ka daux gumlox Maix, mai: son sang pex Maix, yam laig Maix daux dee prawng ca: heue:."

5 Viang mawh kawx nan: phan: pa ang rah ang see ex, kieh pa rah pa see Siyiex sidawng:, ex sang ah ka mawx? Yam tawx Siyiex pa song: rhawm: pa ciyang Nawh ang rah ang see lie? (Aux ah hawt rhawm: pui heue:.) 6 Ang doh mawh nan:. Grawh grawng: nawh, phan: mawh nan: Siyiex tag chix prawng ca: pui haktiex yuh ka mawx? 7 Viang mawh nan: phan: pa kaux sijax Siyiex, nie lheu: ting min: plakngai:, kheu pa laux sijax aux, lai kawn: prawng ca: aux awm: pui pa koe: phimap yuh ka mawx? 8 Mai: yuh ka mawx ang ah, (awm: pui tiblah nieb ah grawng: ex, mai: dhua: ex ah) "Kieh ex yuh ceu pa caox, son sang lih hoek ceu pa mhawm:?" Pa ciyang ka pui pa yuh nan: khaw: heue:. 9 Phan: mawh nan: yuh ka mawx? Ex lheu: mhawm: khaing: kix lie? Ang doh lheu: mhawm: ceeix kawx heue:. Grawh grawng: nawh ex hoik ah grawng: pui Yudax mai: khawm: pui Helasax, mawh pa ot greem: phimap khawm: uik, 10 awm: pa hoik tiem: tix deuh ah nin:,

213"Ang koe: pui pa rah pa see, pon ang koe: tix kaux kawx heue:. 11 Pui pa tawng pa yung ang koe:. Pui pa sawg ka Siyiex ang koe: heue:. 12 Kix hoik lud loe: khawm: uik. Kix hoik rom tix mawh pa ang koe: bwanson: heue:. Pui pa yuh pa mhawm: ang koe:, pie tix kaux kawx pon ang koe: heue:."

21413 "Ghok kix mawh simeeig pa hoik bhang: heue:. Kix hoik teei dak tix, tix shiao pa pie pa lhen: heue:."

215" Jai: siuing: pa cai: koe: greem: siyieb jheeh kix heue:."

21614 "Jheeh kix naog ka lox jhax mai: lox pa song: heue:."

21715 "Caong kix khran: phai: tix kieh nham: lih heue:. 16 Pa laux pa leeing: mai: pa kharhawm: kharhi: koe: daux krax pa hu: kix heue:. 17 Mai: krax pa nhim: kix ang sax tawng heue:."

21818 "Ceu pa lhat pa graung ka Siyiex ang koe: sivoe ngai: kix heue:."

19 Ex tawng grawng: can pa ah lox lai been li, sang ah ka kix pa ot greem: lox lai been li. Yuh ka mawx son sang thox jheeh ku mu:, mai: son sang viex pui haktiex khawm: uik hoek greem: pa prawng pa ca: Siyiex heue:. 20 Mawh kheu pui tix kaux kawx ang lai hoek krax rah krax see ka sivoe Siyiex, kheu pa tuah pa klaung: hawt lai been li, Grawh grawng: nawh pon tix tawng grawng: phimap phigrham: kheu lai been li heue:.

Pon krax rah see kheu yumrhawm: ka Cao: Khrit

21 Viang mawh kawx nan: yamin, pa rah pa see Siyiex, pa tang: pa ang dex mai: lox lai been li hoik plak sidawng:, mai: lox lai been li mai: cao: jhai: khankix hoik kham: mhai: sakse: ka an, 22 pa mawh pa rah pa see Siyiex kheu krax yumrhawm: ka Yesux Khrit, ka can kix pa yumrhawm: khawm: uik. Grawh grawng: nawh ang lai tang: siyox heue:. 23 Grawh grawng: nawh pui hoik yuh phimap khawm: uik mai: ang pon ang hoek ka min: plakngai: Siyiex, 24 viang mawh nan:, kheu bwanson: Siyiex kix pon hoek krax rah krax see, giex, ang tawx ngawh, kheu krax taoh pa koe: ka daux Yesux Khrit, 25 pa Siyiex hoik een: tix kieh mawh pa tan pa lu, kheu krax yumrhawm: ka daux nham: Nawh Cao:, son sang jhi: pa rah pa see Nawh, kheu pa gun pa yeung Siyiex ka daux pa kieh luan phimap phigrham: pa hoik yuh glang: ka: khankix, 26 Yuh ka mawx son sang jhi: pa rah pa see Nawh ka daux bawg yam in, mai: son sang rah see tokaux Nawh, yam kieh pui pa yumrhawm: daux Yesux Khrit mawh pa rah pa see heue:. 27 Phan: mawh nan: grawng: pa yaw rangdi koe: dee mawx? Hoik nyeep kieh ot plak praix heue:. Hoik mawh kheu been li pa yuh ka mawx? Kheu krax tuah krax klaung: lie? Ang mawh. viang mawh nan: hoik mawh kheu been li krax yumrhawm: heue:. 28 Mawh kheu nan: ex tom: sawn: pa hoek pui ka krax rah krax see, mawh kheu krax yumrhawm:, mai: ang dex ka pa tuah pa klaung: hawt lai been li heue:. 29 Siyiex mawh ngie Siyiex pui Yudax khaing: lie? Nawh mawh khawm: Siyiex pui tang: ceu tang: cat ang mawh lie? Mawh heue:, mawh khawm: Siyiex pui tang: ceu tang: cat heue:. 30 Grawh grawng: nawh koe: ngie Siyiex tix kaux khaing:, mai: Nawh Cao: tag sang kieh pui pa pat hak hoek krax rah krax see kheu krax yumrhawm:, mai: kieh pui pa ang pat hak hoek krax rah krax see ka daux krax yumrhawm: heue:.

31 Phan: mawh nan: ex yuh tix kieh lox lai been li mawh pa giex going kheu krax yumrhawm: lie? Ang doh mawh nan:. Ex kieh lox lai been li kaux cong: heue:.

Simin Ting 4

Krai sidawng: daux krax pa rah see kheu krax yumrhawm: khaing: daux lai sigang: si prim:

1 Phan: mawh nan: ex sang ah ka mawh grawng: Abraham pa mawh tax du ex hawt plak nex nham:, hoik pon nawh bwanson: patix? 2 Grawh grawng nawh phan: Abraham hoik pon krax rah krax see kheu krax tuah krax klaung: pa yuh tix, nawh koe: grawh koe: grawng: dee yaw tix, viang mawh nan: ang mawh plak sivoe Siyiex heue:. 3 Grawh grawng: nawh Phuk lai sigang: khri: ah ka mawx?

219"Abraham hoik yumrhawm: ka Siyiex, mai: hoik sawn: mawh pa rah pa see son nawh heue:."

4 Ngawh riang pa tawx ka kaw pa yuh kaing, ang lai chix sawn: mawh pa yuh bwanson:, 220viang mawh nan: hoik mawh ceuk heue:. 5 Viang mawh kawx nan: kaw pa ang yuh kaing, mai: yumrhawm: ka Kaw pa kieh pui caox pa ang nab ang yam mai: pa yuh pa ang khaw: ka Siyiex rah see, pa yumrhawm: nawh an hoik sawn: mawh pa rah pa see heue:. 6 Awm: khawm: pa hoik krai Dawit grawh grawng: pa ting bwanson:, pui pa Siyiex hoik sawn: mawh pa rah pa see, ka pa ang dex mai: krax tuah pa yuh tix, 7 pa ah nin:,

221"Kix pa pon pa pluat ploi: phimap phigrham: tix, mai: pa hoik kheem: phimap ting bwanson: heue:. 8 Pui pa Siyiex ang deuh ang sawn: grawng: phimap tix, ting bwanson: heue:."

9 Phan: mawh nan: bwanson: in mawh son pui pa pat hak khaing: lie? Phan: ang mawh nan: mawh khawm: son pui pa ang pat hak lie? Grawh grawng: nawh ex ah, krax yumrhawm: Abraham hoik sawn: mawh pa rah pa see heue:. 10 Phan: mawh nan: hoik sawn: yuh ka mawx? Mawh khaix hoik pat hak nawh lie? Phan: ang mawh nan: mawh ka: sang pat hak lie? Ang lai mawh khaix hoik pat hak, viang mawh nan: hoik mawh tom: ka: sang pat hak heue:. 11 Mai: nawh pon mhai: pa pat hak, pa mawh cum: pa rah pa see, pa dex mai: krax yumrhawm:, pa hoik koe: nawh tom: ka: sang pat hak, yuh ka mawx son sang mawh nawh keeing: can kix pa yumrhawm: khawm: uik, viang ang kix pat hak kawx, yuh ka mawx son sang pon sawn: kix mawh pa rah pa see, 12 mai: son sang mawh keeing: pa pat hak, mai: ang joeng mawh ngie keeing: kix pa pat hak khaing:, viang mawh nan: mawh son khawm: kix pa hawt hu: daux khaix caong krax yumrhawm: keeing: ex Abraham, pa hoik koe: nawh ka: sang pat hak heue:. 13 Grawh grawng: nawh lox mukheu pa hoik tawx ka Abraham. Phan: ang mawh nan: ka simie ceucat nawh, grawng: sang mawh nawh cao: sin: haktiex khawm: uik, ang lai mawh kheu lox lai been li, viang mawh nan: mawh kheu pa rah pa see pa dex mai: krax yumrhawm: heue:. 14 Grawh grawng: nawh phan: kix pa dex mai: lox lai been li mawh cao: sin:, hoik yuh krax yumrhawm: mawh pa giex going, mai: lox mukheu an kawx hoik yuh mawh pa ang koe: bwanson: heue:. 15 Grawh grawng: nawh lox lai been li mawh pa yuh pa songrhawm: songrhi:, viang mawh kawx nan: dee ang koe: lox lai been li, viang dee lheu: dee lud kawx ang koe: heue:.

16 Mawh kheu grawng: in, pa rah pa see tag mawh kheu krax yumrhawm:, yuh ka mawx son sang mawh kheu bwanson:, mai: yuh ka mawx son sang kaux lox mukheu ka simie ceucat khawm: uik khawm: leeing:. Ang joeng mawh ngie ka simie ceucat pa dex mai: lox lai been li, viang mawh nan: mawh ka khawm: simie ceucat pa dex mai: krax yumrhawm: Abraham, pa mawh keeing: ex khawm: uik. 17 (Awm: pa hoik tiem: ah nin:,

222"Aux hoik ciak tix kieh maix mawh keeing: ceu pui tom: nie heue:")

ka sivoe Siyiex pa yumrhawm: nawh kah, pa mawh Kaw pa kieh pui yum deeh im:, mai: 223pa grux krai grawng: ceu pa ang nyang bax mawh, awm: pa hoik mawh heue:. 18 Viang Abraham ang koe: dee keud pot jun pot, grawng: sang mawh nawh keeing: ceu pui tom: nie, nawh ca: keud pot jun pot mai: yumrhawm: grawng: sang mawh awm: pa hoik grux krai ah nin:,

224"Simie ceucat maix tag mawh nan: heue:."

19 Krax yumrhawm: nawh ang lai iak, viang nawh keud grawng: tokaux nawh awm: pa hoik yum, kheu nawh hoik dex koe: tix yieh num, mai: grawng: pa hoik neh hoik yum vaig Sara, 20 viang mawh nan: nawh ang keud jee keud blaong 'ka grawng: lox mukheu Siyiex, kheu krax ang yumrhawm:, viang mawh nan: nawh pon siawp sibrawm kheu krax yumrhawm: tix, mai: yaogyaw ka Siyiex, 21 mai: nawh vhah rhawm: grawng: Kaw pa tawx lox mukheu an, mawh Kaw pa koe: siawp sibrawm tix chix yuh heue:. 22 Mawh kheu nan: krax yumrhawm: nawh hoik sawn: mawh pa rah pa see son nawh heue:. 23 Viang mawh nan: pa hoik tiem: ah nin:,

225"Hoik sawn: mawh pa rah pa see."

ang mawh ngie son Abraham khaing:, 24 viang mawh nan: mawh khawm: son ex, pa tag sang sawn: mawh awm: nang: nan:, ka ex pa yumrhawm: ka Kaw pa kieh Simiang ex Yesux deeh kaoh im: khaing: krax yum heue:. 25 Hoik tawx Simiang Yesux an kheu phimap phigrham:, mai: hoik kieh deeh kaoh im:, son sang kieh ex hoek krax rah krax see heue:.

Simin Ting 5

Deeh mhawm: tau mai: Siyiex

1 Mawh kheu hoik pon hoek ex krax rah krax see kheu krax yumrhawm:, ex tom: koe: pa nhim: ka plak Siyiex kheu Simiang ex Yesux Khrit heue:. 2 Mawh kheu Simiang an ex hoik pon laig ka daux bwanson: in, dee ot dee cung ex, mai: ex yaw gauxrhawm: ka daux krax keud pot jun pot son sang pon min: plakngai: Siyiex heue:. 3 Mai: ang joeng mawh ngie nan:, viang ka daux krax kharhawm: kharhi: ex kawx, ex yaw gauxrhawm: kah, kheu tawng ex krax kharhawm: kharhi: chix yuh kieh lih pa pon kham: pon geu:, 4 mai: pa pon kham: pon geu: chix yuh kieh lih, pa hoik cheu: tix tawng mawh pa mhawm:, mai: pa hoik cheu: tix tawng mawh pa mhawm:, chix yuh kieh lih pa keud pot jun pot, 5 mai: pa keud pot jun pot, ang lai kieh kaig tua heue:. Mawh kheu krax moh krax rhawm: Siyiex hoik prauk sau: ka daux rhawmrhi: ex, kheu Khwan: Singax Singeh pa hoik tawx ka ex heue:. 6 Grawh grawng: nawh yam kawn: iak riang ex, yam caw bawg yam Cao: Khrit yum son pui pa ang chix nab chix yam mai: pa yuh pa ang khaw: ka Siyiex heue:. 7 Pie pui pa sang yum tang: son pui rah pui see kawx neue: pa koe:. Pui pa sang kua: tix yum tang: son pui mhawm: pui mhiem: tee: sang koe: tix kaux kaux pleue:. 8 Viang mawh kawx nan: Siyiex jhi: mhai: sakse: grawng: pa moh Nawh ka ex, ka daux pa yum Cao: Khrit son ex, yam kawn: mawh ex pui phimap phigrham: heue:. 9 Mawh kheu nan:, phan: ex hoik pon tix hoek krax rah krax see yamin, kheu nham: Nawh Cao:, ex tag sang nie lheu: pon pa taohkhaing: pa songrhawm: songrhi: Siyiex kheu Nawh Cao: heue:. 10 Grawh grawng: nawh, phan: yam kawn: mawh ex pui koeng hoik kieh ex deeh khaw: paox tix ka Siyiex kheu pa yum Kawn: Nawh Cao:, kheu hoik deeh khaw: ex paox tix, ex tag nie lheu: hoek krax taohkheu pa im: ju Nawh. 11 mai: ang joeng mawh ngie nan:, ex yaw gauxrhawm: khawm: ka daux Siyiex kheu Simiang ex Yesux Khrit, pa hoik pon ex pa deeh khaw: paox tix yamin, ka daux Nawh heue:.

12 Mawh kheu nan:, awm: phimap hoik laig daux haktiex kheu sipieag pui tix kaux, mai: krax yum hoik laig kheu phimap, mai: mawh kheu pui khawm: uik hoik yuh phimap, krax yum hoik tah ka pui khawm: uik heue:. 13 Ka: sang koe: lox lai been li phimap hoik dawg koe: ka daux haktiex, viang mawh kawx nan: phan: ang koe: lox lai been li ang lai koe: dee deuh dee jhawp phimap heue:. 14 Viang mawh nan: jah tom: ju Adam, tom: hoek ju Mose, krax yum hoik kwang: hoik giex kaing: heue:. Viang ka piang kix, pa ang yuh phimap awm: phimap pa yuh Adam kawx, hoik giex kaing: kah. Adam an mawh rieang phektem: Kaw pa tag sang hoek khaix heue:. 15 Viang mawh kawx nan: phimap mai: khawngphak pa tawx giex ang lai awm: paox tix. Grawh grawng: nawh phan: mawh kheu sipiag phimap pa yuh pui tix kaux, pui hoik yum tom: nie, bwanson: Siyiex hoik nie lheu: ting khaing: kub son pui tom: nie, kheu khawngphak bwanson: pui tix kaux pa mawh Yesux Khrit heue:. 16 Mai: grawng: phimap pa phit pui tix kaux, mai: grawng: khawngphak pa tawx giex ang lai awm: paox tix. Grawh grawng: nawh, kheu sipiag phimap tix mu:, hoik pon krax prawng krax ciyang, viang mawh nan: khawngphak bwanson: pa tawx giex, tawx kheu phimap tom: nie son sang kieh hoek krax rah krax see heue:. 17 Grawh grawng: nawh phan: mawh kheu sipiag phimap pui tix kaux, krax yum hoik pon kwang:, pon giex kaing:, kheu Tix Kaux, kix pa hoik pon bwanson: pa kied lheu: ting khaing: kub, mai: khawngphak pa rah pa see pa tawx giex, tag sang nie lheu: pon kwang: pon giex kaing: ka daux pa im: ju, kheu Tix Kaux, pa mawh Yesux Khrit heue:. 18 Mawh kheu nan: awm: pui khawm: uik hoek krax prawng krax ciyang kheu sipiag phimap pa yuh pui tix kaux, awm: an kheu pa rah pa see pa yuh Tix Kaux, pui khawm: uik tom: pon hoek krax rah krax see, pa dex mai: ju pa im: heue:. 19 Grawh grawng: nawh awm: kheu sipiag pui tix kaux pa lie lox, pui tom: nie hoik lih mawh pui phimap phigrham:, awm: an kheu pa cu pa nghiet Tix Kaux, pui tom: nie tag sang hoek krax rah krax see heue:. 20 Lheu: khaing: an lox tawm: lai been li baox hoek laig, son sang nie lheu: ting koe: phimap, viang mawh kawx nan: dee nie lheu: ting koe: phimap, bwanson: kied nie lheu: ting khaing: kub, 21 yuh ka mawx awm: phimap hoik kwang: hoik giex kaing: ka daux krax yum, viang bwanson: kawx, sang pon kwang: pon giex kaing: kheu pa rah pa see, tom: lih pon ju leeing: ju leeing: phan: kheu Simiang ex Yesux Khrit heue:.

Simin Ting 6

Si doe: tau tix ka daux krax yum Cao: Khrit mai: pa deeh kaoh im:

1 Phan: mawh nan: ex sang ah ka mawx? Ex sang kawn: ca: ot ka daux phimap, son sang kieh nie lheu: ting bwanson: lie? 2 Ang doh mawh nan:. Ex pa hoik yum ka phimap, ex kawn: baox chix im: ka daux phimap yuh ka mawx? 3 Phan: ang mawx nan:, ang pex tawng grawng: can ex pa hoik baptis226 rawm: ka daux Yesux Khrit, hoik baptis ka daux pa yum Nawh lie? 4 Mawh kheu nan: hoik sipaung: ex tau mai: Nawh Cao: kheu krax baptis ka daux pa yum Nawh, yuh ka mawx awm: hoik kieh Cao: Khrit deeh kaoh im: khaing: krax yum kheu min: siawp sibrawm Keeing: Cao:, ex kawx sang pon tix hu: ka daux ju pa khraox heue:. 5 Grawh grawng: nawh, phan: ex hoik kleuk tau mai: Nawh Cao:, ka daux pa yum awm: pa yum Nawh, ex kawx tag sang deeh kaoh im: awm: pa hoik deeh kaoh im: Nawh Cao:, 6 kheu hoik tawng ex grawng: pui prim: ex hoik yum tau mai: Nawh Cao: ka piang khaoxlhak, yuh ka mawx son sang yieh laux siawp sibrawm tokaux phimap, son ang ex sang baox mawh siliex ka phimap. 7 Grawh grawng: nawh, kaw pa hoik yum hoik pon tix rah see, mai: luan khaing: phimap heue:. 8 Viang mawh kawx nan:, phan: ex hoik yum tau mai: Cao: Khrit, ex yumrhawm: khawm: grawng: sang im: ex tau mai: Nawh Cao: heue:. 9 Kheu hoik tawng ex grawng: Cao: Khrit hoik deeh kaoh im: khaing: krax yum, mai: tag ang lai baox deeh yum khaix. Krax yum ang lai baox pon kwang: pon giex kaing: ka piang Nawh heue:. 10 Grawh grawng: nawh krax yum pa hoik yum Nawh Cao: an, Nawh hoik yum ka phimap tix bawg khaing:, viang mawh nan: ju pa im: Nawh Cao:, Nawh im: ka Siyiex heue:.

Pui prim: aux hoik yum, pui khaox aux tan tix ka Siyiex

11 Awm: an viang pex kawx, sawn: tokaux pex mawh pa hoik yum ka phimap, viang mawh nan: pa hoik im: ka Siyiex ka daux Yesux Khrit heue:.

12 Mawh kheu nan: paw kieh phimap kwang: giex kaing: ka daux tokaux pa chix yum pex, tix kieh cu nghiet hawt alo nex nham: tokaux. 13 Viang kraung pakpeung tokaux pex kawx, paw tawx tix kieh mawh kraung naing pa ang rah ang see, ka phimap, viang mawh kawx nan: tawx tokaux pex ka Siyiex, awm: pui pa hoik kaoh im: khaing: krax yum, mai: kieh kraung pakpeung tokaux pex mawh kraung naing pa rah pa see ka Siyiex heue:.

Khaing: pa yum mai: khwan: singax hoik luat luan khaing: been li

14 Grawh grawng: nawh phimap tag ang pon kwang: giex kaing: ka piang pex, kheu ang pex ot ka greem: lox lai been li, viang mawh nan: ot ka greem: bwanson: heue:.

15 Phan: mawh nan: sang yuh ka mawx? Kheu ang ex ot greem: lox lai been li, viang mawh nan: kheu ot greem: bwanson:, ex tag sang yuh phimap lie? Ang doh mawh nan:. 16 Ang pex tawng grawh grawng:, pex sang tawx tokaux tix, tix mawh siliex mai: cu nghiet ka pa yuh ka mawh ang ah, pex mawh siliex ka pa cu pa nghiet pex kah lie? Viang mawh ka phimap tom: hoek krax yum ang ah, phan: ang mawh nan: ka krax cu krax nghiet tom: hoek krax rah krax see ang ah heue:. 17 Viang mawh kawx nan: yaogyaw bwanson: Siyiex, mawh kheu viang pex hoik sax mawh siliex phimap kawx, pa hoik viex khawm: rhawm: khawm: rhi: tix cu nghiet ka been sidiex gau pa hoik rieb pex tix teei. 18 Mai: mawh kheu hoik kieh pex luan khaing: phimap, pex hoik lih mawh siliex ka pa rah pa see heue:. 19 Pa ah aux nan:, aux ah hawt been pui kheu iak riang iak rao nex nham: pex heue:. Grawh grawng: nawh awm: pa hoik tawx pex kraung pakpeung pex, tix mawh siliex ka pa ang singax singeh, mai: ka phimap, son sang lih mawh phimap sinyek sinyek, awm: an yamin tawx kraung pakpeung pex, tix mawh siliex ka pa rah pa see, son sang mawh pa singax heue:. 20 Grawh grawng: nawh yam mawh pex siliex phimap, pex hoik mawh pui ploi: ka pa dex mai: pa rah pa see heue:. 21 Pex hoik koe: plix pa yuh ka mawx ka bawg yam an, ka daux ceu pa kaig tua pex kah yamin? Grawh grawng: nawh dee sidah ceu an khankix mawh krax yum heue:. 22 Viang mawh nan:, yamin, kheu hoik luan pex khaing: phimap, mai: hoik lih mawh siliex Siyiex, mai: plix pa sang pon pex mawh pa singax singeh, mai: dee sidah mawh ju leeing: ju leeing: phan: heue:. 23 Grawh grawng: nawh ngawh riang phimap phigrham: mawh krax yum, viang mawh kawx nan: khawngphak bwanson: pa tawx Siyiex mawh ju leeing: ju leeing: phan: ka daux Simiang ex Yesux Khrit heue:.

Simin Ting 7

Lox lai been li mai: phimap

1 Puxaik khankix eue:, (Grawh grawng: nawh aux sikah ka pui pa tawng lai been) ang pex tawng grawng: ting lox lai been ka piang pui yam kawn: im: ju nawh lie? 2 Grawh grawng: nawh, bon: pa hoik koe: mex, been li hoik phyawk nawh ka mex tix, yam kawn: klawd mex nawh heue:. Viang mawh kawx nan: phan: mex nawh yum, nawh luan khaing: lox been li mex tix heue:. 3 Mawh kheu nan: yam kawn: klawd mex nawh, phan: nawh hu: kleuk tokaux tix ka simex tang: kaux, tag kok nawh mawh bon: phit bon: vao heue:. Viang mawh nan: phan: mex nawh yum, nawh hoik luan khaing: lox been lih, mawh kheu nan:, nawh viang hu: kleuk ka simex tang: kaux kawx nawh ang mawh bon: phit bon: vao heue:. 4 Awm: an, puxaik aux khankix eue:, hoik yuh pui yum ka been li, kheu tokaux Cao: Khrit, yuh ka mawx son sang kleuk pex ka tang: kaux, pa mawh Kaw pa hoik deeh kaoh im: khaing: krax yum, son sang lih ex tix plix plix son Siyiex heue:. 5 Grawh grawng: nawh yam kawn: ot ex ka daux nex nham:, rhawm: pa sang yuh phimap, lih kheu lox lai been li, mai: yuh ka daux kraung pakpeung tokaux ex, son sang lih ex tix plix plix ka krax yum heue:. 6 Viang mawh nan:, yamin ex hoik luan khaing: lox lai been li, kheu hoik yum ex ka ceu pa hoik giex ka ex, yuh ka mawx son sang yuh ex ka daux khwan: pa khraox, mai: ang mawh ka daux been pa prim: pa hoik tiem: tix deuh heue:.

7 Phan: mawh nan:, ex sang ah ka mawx? Sang ah, lox lai been li mawh phimap lie? Ang doh mawh nan:. Viang mawh nan:, aux ang lai tawng ka phimap phan: ang mawh kheu lox lai been li, grawh grawng: nawh ang aux lai tawng ceu pa ghoing:, phan: lox lai been li ang nyang ah,

227"Maix paw vi ghoing: heue:."

8 Viang mawh nan: yam yaox phimap deeh pon yuh, kheu lox tawm: an, tom: yuh pa ghoing: ku ceu khawm: uik ka daux aux heue:. Grawh grawng: nawh phan: ang koe: lox lai been li, phimap mawh pa yum heue:. 9 Glangka: in, kheu ang koe: lox lai been li, aux im: ju heue:. Viang mawh kawx nan: yam lih hoek lox tawm:, phimap deeh im:, mai: aux yum heue:. 10 Mai: lox tawm: an, pa mawh son sang im: ju, aux yaox mawh pa kieh yum heue:. 11 Grawh grawng: nawh yam yaox phimap deeh pon yuh, kheu lox tawm:, tom: pie lhen: ka aux, mai: teei aux yum kheu heue:. 12 Mawh kheu nan: lox lai been li mawh pa singax, mai: lox tawm: mawh pa singax, mai: pa rah pa see, mai: pa mhawm: heue:. 13 Phan: mawh nan:, pa mhawm:, hoik lih mawh krax yum ka aux lie? Ang doh mawh nan:. Viang mawh nan: mawh phimap heue:, yuh ka mawh son sang sidawng: grawng: mawh phimap, hoik teei pa mhawm: an, mai: yuh krax yum ka aux heue:. Yuh ka mawx kheu lox tawm: an phimap tag sang lih mawh phimap pa lang: teung: ting sigrien sigre heue:. 14 Grawh grawng: nawh ex hoik tawng grawng: lai been li mawh pa dex mai: khwan:, viang mawh kawx nan: aux mawh pa dex mai: nex nham:, pa hoik coh ka phimap heue:. 15 Grawh grawng: nawh ang aux lai tawng ceu pa yuh tix, kheu aux ang yuh ceu pa koeng aux kah heue:. 16 Mawh kheu nan: phan: aux yuh ceu pa ang aux simie tix yuh, aux hoik rieb tix teei grawng: lox lai been li mawh pa khaw: pa caw heue:. 17 Mawh kheu nan: yamin ang lai baox mawh aux pa yuh, viang mawh nan: mawh phimap pa ot ka daux aux pa yuh heue:. 18 Grawh grawng: nawh aux tawng ka daux aux, pa ah nan: sang ah ka daux nex nham: aux, ceu pa mhawm: ang ot tix ceu kawx heue:. Grawh grawng: nawh viang aux koe: rhawm: tix sang yuh kawx, aux ang chix yuh lih ceu pa mhawm: heue:. 19 Grawh grawng: nawh ceu pa mhawm: pa simie aux tix yuh, aux ang yuh, viang mawh nan: ceu pa caox pa caig pa ang aux simie tix yuh, aux yuh heue:. 20 Phan: mawh nan:, phan: aux yuh ceu pa ang aux simie tix yuh, ang lai baox mawh aux pa yuh, viang mawh nan: mawh phimap pa ot ka daux aux pa yuh heue:. 21 Mawh kheu nan: aux yaox koe: been pa yuh nin:, yam simie aux tix yuh ceu pa mhawm:, pa caox ca: ot pot heue:. 22 Grawh grawng: nawh aux gauxrhawm: gauxrhi: ka daux lox lai been li Siyiex, phan: hawt pui plak daux, 23 viang mawh nan: aux yaox been pa tang:, ka daux kraung pakpeung aux, pa cheu: pa yuh naing ka been pa dex mai: rhawm: aux, mai: teei tix giex gang: aux ka daux been pa dex mai: phimap, pa koe: ka daux kraung pakpeung aux khankix heue:. 24 Aux mawh pui pa nie lang: teung: kharhawm: kharhi: heue:. Mawx pa sang taohaux khaing: tokaux pa dex mai: krax yum in? 25 Yaogyaw bwanson: Siyiex heue:. Mawh ka daux Simiang ex, Yesux Khrit heue:. Phan: mawh nan: rhawm: aux tom: yuh kaing siliex ka been li Siyiex, viang mawh kawx nan: plak nex nham: aux yuh kaing siliex ka been li phimap phigrham: heue:.

Simin Ting 8

Khwan: singax hoik kieh pui luat luan khaing: jhawm: prim: tix

1 Mawh kheu nan:, yamin, ang lai koe: dee prawng dee ciyang ka kix pa ot ka daux Yesux Khrit heue:. 2 Grawh grawng: nawh been pa dex mai: Khwan: pa Im: Ju, ka daux Yesux Khrit, hoik ploi: aux luan khaing: been phimap pa dex mai: krax yum heue:. 3 Grawh grawng: nawh ceu pa lox lai been li ang pon yuh, mawh kheu iak riang iak rao kheu nex nham:, Siyiex hoik ploi: Kawn: Tix lih ka daux pa yaung nex nham: phimap, mai: grawh grawng: phimap, Nawh prawng ciyang phimap ka daux nex nham:, 4 yuh ka mawx son been pa hoik nhie: ka daux lox lai been li, tag sang naog ka daux ex, pa ang hu: awm: pa khaw: mai: nex nham:, viang mawh nan: pa hu: awm: pa khaw: mai: Khwan: heue:. 5 Grawh grawng: nawh kix pa ot hawt pa khaw: mai: nex nham:, nie lheu: keud grawng: ceu pa dex mai: nex nham:, viang mawh nan: kix pa ot hawt pa khaw: mai: Khwan:, keud grawng: ceu pa dex mai: Khwan: heue:. 6 Grawh grawng: nawh rhawm: pa dex mai: nex nham: mawh krax yum heue:. Viang mawh kawx nan: rhawm: pa dex mai: Khwan:, mawh pa im: ju, mai: pa nhim: heue:. 7 Mawh kheu rhawm: pa dex mai: nex nham:, mawh pa ra lai koeng ka Siyiex, mawh kheu nawh ang cu ang nghiet, ka lox lai been li Siyiex. Chix: kawx, ang chix cu chix nghiet kah heue:. 8 Mai: kix pa ot ka daux nex nham:, ang chix yuh pa khaw: pa caw ka rhawm: Siyiex. 9 Viang mawh kawx nan: pex ang ot ka daux nex nham:, viang mawh nan: pex ot ka daux Khwan:, phan: Khwan: Siyiex ot ka daux pex heue:. Kaux pui mawx ang ah, phan: ang koe: Khwan: Cao: Khrit ang lai mawh cie Nawh heue:. 10 Viang mawh nan: phan: Cao: Khrit ot ka daux pex, viang tokaux hoik yum kheu phimap kawx, khwan: mawh pa im: kheu pa rah pa see heue:. 11 Lheu: khaing: an, phan: Khwan: Kaw pa kieh Yesux deeh kaoh im: khaing: krax yum ot ka daux pex, Nawh pa hoik kieh Cao: Khrit deeh kaoh im: khaing: krax yum tag sang kieh tokaux pex pa chix yum, im: kheu Khwan: Nawh Cao: pa ot ka dauh pex heue:.

12 Mawh kheu nan:, puxaik khankix eue:, ex mawh pa koe: ceuk ka nex nham:, son sang im: hawt nex nham:, ang mawh, 13 grawh grawng: nawh phan: pex im: hawt nex nham:, pex tag lai yum, viang mawh kawx nan phan: pex kieh ceu pa yuh tokaux tix, yum kheu Khwan: Cao:, pex tag sang im: heue:. 14 Grawh grawng: nawh can pui pa Khwan: Siyiex thong: hu: khankix, mawh kawn: Siyiex heue:. 15 Grawh grawng: nawh pex hoik pon rhawm: siliex pa deeh kieh chix lhat chix graung, ang mawh, viang mawh kawx nan: pex hoik pon rhawm:, pa sang sawn: kieh mawh kawn: lih, mawh kheu nan: ex tom: kok, Abax, Keeing: eue:. 16 Mawh tokaux Khwan: Cao: pa kham: mhai: sakse: ka khwan: ex, grawng: pa mawh ex kawn: Siyiex heue:. 17 Mai: phan: mawh kawn:, mawh cao: pa pon sin: heue:. Pa mawh cao: pa pon sin: Siyiex, mai: pa rom tix pon sin: tau mai: Cao: Khrit, phan: ex rom tix kham: geu: tau mai: Nawh Cao:, son sang pon khawm: min: plakngai: tau mai: Nawh heue:.

Min: plak ngai: pa tag sang hoek

18 Grawh grawng: nawh aux sawn: ceu pa yaox tix kham: geu: yamin, mawh pa ang keung: tix tiag yaox ka min: plakngai: pa tag sang plak jhi: ka ex sax heue:. 19 Can pa phan: pa deuh ca: keud pot jun pot, mai: krox son bawg yam sang plak jhi: kawn: Siyiex khankix heue:. 20 grawh grawng: nawh can pa phan: pa deuh hoik yaox tix ot greem: pa ang tie mawh, kheu alo tix ang mawh, hoik mawh kheu Kaw pa hoik kieh nawh ot greem: heue:. Viang mawh nan: hoik koe: krax keud pot jun pot, 21 grawh grawng: can pa phan: pa deuh kawx, tag sang yaox tix luan khaing: pa mawh siliex ka pa chix laux chix leeing:, mai: hoek ka daux pa pluat ploi: pa dex mai: min: plakngai: kawn: praix Siyiex heue:. 22 Grawh grawng: nawh ex tawng grawng: can pa phan: pa deuh khawm: uik, hoik rom ngia tau, ka daux ceu pa kharhawm: saux yha: tom: yamin heue:. 23 Mai: ang joeng mawh ngie nan:, viang mawh nan: pie tokaux ex kawx, pa hoik pon plix liang Khwan: Cao:, pie tokaux ex kawx, ngia ka daux tokaux tix, mai: ca: krox bawg yam pa sang sawn: tix mawh kawn: lih, pa mawh pa taoh ka tokaux ex heue:. 24 Grawh grawng: nawh ex hoek krax taohka daux pa keud pot jun pot heue:. Viang mawh kawx nan: pa keud pot jun pot, phan: hoik yaox, ang lai baox mawh pa sang keud pot jun pot heue:. Grawh grawng: nawh ceu pa hoik yaox pui, nawh lai baox keud pot jun pot yuh ka mawx? 25 Viang mawh kawx nan: phan: ex keud pot jun pot son ceu pa ang ex nyang bax yaox, ex tom: chix gun tix krox son ceu an heue:.

Alo Siyiex ang chix tieh loh tix leeng: ju

26 Mai: awm: an, Khwan: Cao: teem: coi ex, ka daux pa iak riang iak rao ex heue:. Grawh grawng: nawh ang ex tawng grawng: ex khaw: tix rawg bwan: yuh ka mawx, viang mawh kawx nan: tokaux Khwan: Cao: khyox khaw: son ex ka lox ngia pa ang jheeh chix ah heue:. 27 Mai: Kaw pa sawg pa liiem ka rhawmrhi:, tawng rhawm: Khwan: Cao:, mawh kheu Nawh khyox khaw: son pui pa singax singeh awm: pa khaw: mai: alo Siyiex heue:. 28 Mai: ex tawng grawng: ku ceu khawm: uik rom tix yuh tau, son sang mawh pa mhawm: ka son kix pa moh ka Siyiex, pa mawh pa hoik kok tix teei awm: pa khaw: mai: pa hoik yiag hoik bak Nawh Cao: heue:. 29 Grawh grawng: nawh kix pa hoik grux tawng Nawh Cao: ka:, Nawh hoik ciak tix kieh awm: riang Kawn: Tix, yuh ka mawx son sang mawh Nawh pa liang tix keh ka daux puxaik tom: nie heue:. 30 Mai: kix pa hoik ciak tix deuh Nawh Cao: khankix kawx, Nawh kok tix teei khawm: heue:. Mai: kix pa hoik kok Nawh Cao: tix teei kawx, Nawh kieh rah see khawm:. Mai: Nawh tawx khawm: min: plakngai: ka kix heue:.

31 Phan: mawh nan: ex sang ah ka mawx ka grawng: ceu in khankix? Phan: Siyiex ot plak ex, mawx pa sang ot tang: plak tix yuh ka ex? 32 Kaw pa ang deuh pie ka Kawn: Tix, viang mawh nan: hoik tawx Nawh son ex khawm: uik, Nawh tag ang yuh bwanson: tix tawx giex ka ex, ku ceu khawm: uik tau mai: Nawh lie? 33 Mawx pa sang chix deuh phimap ka pui pa hoik laug Siyiex tix teei? Mawh Siyiex pa kieh rah see heue:. 34 Mawh mawx pa sang prawng sang ca: tix deuh phimap? Mawh Cao: Khrit pa hoik yum, mawh heue:, nie lheu: mawh pa hoik deeh kaoh im: khaing: krax yum, mai: pa ot plak taix khawn: dawm: Siyiex, mai: pa khyox khaw: son ex heue:. 35 Mawh mawx pa sang gwieh ex khaing: krax moh krax rhawm: Cao: Khrit? Mawh pa kharhawm: kharhi:, phan: ang mawh nan: pa khirhawm: khirhi:, phan: ang mawh nan: pa tuktiak tukte:, phan: ang mawh nan: pa sibhawm: siya:, phan: ang mawh nan: pa ot kakaong:, phan: ang mawh nan: krax caox krax laux, phan: ang mawh nan: mawh vaid lie? 36 (Awm: hoik tiem: tix deuh ah nin:,

228"Hoik pah ex yum leeing: singaix ka son Maix heue:. Hoik deuh ex mawh awm: yung: son pa sang pah heue:.")

37 Ang mawh, ka daux ceu in khankix khawm: uik, ex mawh pa nie lheu: mawh khaing: pa pex, kheu Kaw pa hoik moh ka ex heue:. 38 Grawh grawng: nawh aux hoik yumrhawm:, viang grawng: pa yum ang ah, pa im: ang ah, kawncau Siyiex khankix ang ah, pa giex kaing: khankix ang ah, ceu pa koe: yamin khankix ang ah, ceu pa sang hoek tix mawh khaix khankix ang ah, siawp sibrawm khankix ang ah, 39 pa lhaong: ang ah, pa raux ang ah, viang mawh pa phan: pa deuh tang: ceu, ceu tix ang ah, tag ang chix gwieh ex khaing: krax moh krax rhawm: Siyiex, pa koe: ka daux Simiang ex Yesux Khrit heue:.

Simin Ting 9

Krax pa ang pui Isarilax yumrhawm: ang pon tieb alo Siyiex

1 Aux krai pa mawh pa meh ka daux Cao: Khrit, ang aux pie lhen:, rhawm: aux kawx kham: mhai: sakse: tau mai: aux ka daux Khwan: Singax Singeh, 2 grawh grawng: kied ting khirhawm: aux, mai: pa kharhawm: rhawmrhi: aux ang jud ang jai heue:. 3 Grawh grawng nawh aux chix simie tix kieh tokaux aux mawh pa hoik jhax hoik lawg khaing: Cao: Khrit, son puxaik aux khankix, pa mawh paoxceu paoxcat aux awm: pa khaw: mai: nex nham: heue:. 4 Kix mawh pui Isarilax, pa hoik pon pa sawn: mawh kawn: lih, mai: min: plakngai:, mai: sijax mukheu khankix, mai: pa hoik tawx lai been li kah, mai: pa yuh kaing pa dex mai: pa krub ka Siyiex, mai: lox mukheu khankix heue:. 5 Kix mawh pa hoik toe: lih khaing: tax du khankix, mai: ka daux kix kawx Cao: Khrit lih mawh, awm: pa khaw: mai: plak nex nham:, pa mawh pa giex kaing: ka piang khawm: uik, pa mawh Siyiex pa ting bwanson: leeing: ju leeing: phan: heue:. Amen.

6 Viang mawh kawx nan: gumlox Siyiex hoik lih tix laux mawh pa ang koe: bwanson: ang mawh heue:. Grawh grawng: nawh kix pa toe: lih khaing: Isarilax, ang tie mawh pui Isarilax khawm: uik, 7 awm: an, kheu mawh kix simie ceucat Abraham, kix ang tie mawh kawn: praix khawm: uik heue:. Viang mawh kawx nan:,

229"Ka daux Icak tag sang kok mawh simie ceucat maix heue:."

8 Mawh kheu nan:, ang lai mawh kawnpraix pa dex mai: nex nham:, pa mawh kawnpraix Siyiex. viang mawh kawx nan: mawh kawnpraix pa dex mai: lox mukheu pa sawn: mawh simie ceucat heue:. 9 Grawh grawng: nawh lox mukheu an hoik mawh nin:.

230"Awm: pa khaw: mai: pa khop bawg yam in sax, aux tag sang hoek, mai: Sara tag sang koe: kawn: simex heue:."

10 Mai: ang joeng mawh ngie nan:. yam koe: kaux Rebekka kheu keeing ex Icak, 11 yam ang bax keh kawn: khankiex, ka: ang nyang bax yuh ceu pa mhawm:, phan: ang mawh nan: ceu pa caox yuh ka mawx son sang khaw: mai: pa yiag pa bak Siyiex, son sang kaux cong: awm: pa khaw: mai: pa laug tix teei, ang mawh pa dex mai: krax tuah krax klaung:, viang mawh nan: mawh pa dex mai: Kaw pa kok, 12 hoik grux ah nin: ka bon: an,

231"Pa mawh puxke: tag sang yuh siliex ka pa mawh pux heue:."

13 Awm: hoik tiem: tix deuh ah nin:,

232"Aux moh ka Yakop, viang mawh kawx nan: Aux koeng ka Esaw: heue:."

Siyiex yuh krax caoxrhawm: daux siawp sibrawm

14 Phan: mawh nan: ex sang ah ka mawx? Khex koe: pa ang rah ang see mai: Siyiex lie? Ang doh mawh nan:. 15 Grawh grawng: nawh, Nawh Cao: hoik ah nin: ka Mose.

233"Aux tag yuh bwanson: ka pui pa simie Aux tix yuh bwanson: kah, mai: Aux tag caoxrhawm: ka pui pa simie Aux tix caoxrhawm: kah heue:."

16 Mawh kheu nan: ang koe: ka alo pui, mai: ang koe: ka pa to: pui, viang mawh nan: koe: ka pa yuh Siyiex bwanson: heue:. 17 Grawh grawng: nawh phuk lai sigang: khri: hoik ah nin: ka Simiang Pharaw,

234"Grawh grawng: nawh Aux hoik yaog maix ting kheu jao in yuh ka mawx son sang pon jhi: Aux siawp sibrawm Aux ka daux maix, mai: son sang tah hu: ceukaux Aux ka piang haktiex khawm: uik heue:."

18 Mawh kheu nan: Nawh Cao: yuh bwanson: ka pui pa simie Nawh tix yuh kah, mai: Nawh Cao: kieh kiien: ka pui pa simie Nawh tix kieh kiien: heue:.

19 Phan: mawh nan: maix tag ah nin: ka aux, "Yuh ka mawx Nawh Cao: kawn: baox deuh phimap? Grawh grawng: nawh kaux pui mawx chix tiebtie ka alo Nawh Cao:?" 20 Pui pa deeh pawk lox thiang: ka Siyiex eue:, maix mawh mawx? Ceu pa hoik phan: hoik yuh, tag sang ah ka Kaw pa phan: pa yuh tix, "Maix lai yuh aux awm: in yuh ka mawx?", lie? 21 Phan: ang mawh nan:, cao: pa yuh aw: ang ting ka piang tiex klox, tix sang teei tiex khaing: tiex tix lon: ngie, mai: yuh aw: tix kieh koe: min: plakngai: tix mu:, mai: tix ang koe: min: plakngai: tix mu: ka lie? 22 Phan: Siyiex koe: rhawm: tix sang jhi: krax songrhawm: Nawh, mai: tix sang kieh tawng siawp sibrawm Nawh sidawng:, viang mawh kawx nan: hoik gun hoik yeung ka pa lang: gun lang: yeung tom: nie ka aw: son pa songrhawm: khankix, pa hoik cox son pa laux leeing:, tag sang koe: tix ah ka mawx? 23 Mai: yuh ka mawx son Nawh sang kieh tawng ka pa mi pa koe: min: plakngai: Nawh ka piang aw: pa caoxrhawm: khankix, pa hoik dawg grux cox Nawh son min: plakngai:, 24 pa mawh ex, pa hoik kok Nawh Cao: tix teei, ang mawh ngie khaing: pui Yudax, viang mawh nan: mawh khaing: khawm: pui tang: ceu tang: cat, tag sang koe: tix ah ka mawx? 25 Awm: pa hoik ah Nawh Cao: khawm: ka daux lai Hosia,

235"Aux tag kok mawh pui Aux, ka pa ang mawh pui Aux, mai: tag kok mawh bon: pa moh Aux, ka pa ang Aux moh heue:."

2362 6"Mai: tag sang mawh nin:, ka dee pa hoik ah ka kix, 'Pex ang mawh pui Aux' tag sang kok kix mawh kawn: Siyiex pa im: ju tan: heue:."

27 Lheu: khaing: an Isayax hoik kok yo ah nin: ka grawng: pui Isarilax,

237"Viang kawnpraix Isarilax hun: awm: mhaik rhawm: sigrit sigra: kawx, mawh ngie pa deuk khankix khaing: pa sang hoek krax taohheue:. 28 Grawh grawng: nawh, Simiang tag sang prawng gumlox Nawh ka piang haktiex, mai: kieh hoik, mai: tat dawd heue:."

29 mai: awm: pa hoik krai Isayax sivoe an,

238"Phan: Simiang giex kaing: kru naing Cao: Raoma: ang grham: simie ka ex, ex hoik lih mawh awm: veng Sawdom, mai: tag hoik yuh kieh awm: veng Gawmawrax heue:."

30 Mawh kheu nan: ex tag sang ah ka mawx? Sang ah, pui tang: ceu, tang: cat pa ang hawt leue khaix pa rah pa see, hoik pon giex ka pa rah pa see, pa mawh pa rah pa see pa dex mai: krax yumrhawm: lie? 31 Pui Isarilax pa hawt leue been li pa dex mai: pa rah pa see, ang krup ang hoek ka been li an heue:. 32 Mawh kheu pa tix ang hoek kah? Hoik mawh kheu ang kix viex krax yumrhawm: tix hawt leue kah, viang mawh nan: kheu hawt leue ka krax tuah krax klaung:. Kix hoik sideeing ka simaox dee sideeing, 33 awm: hoik tiem: tix deuh ah nin:,

239"Jhak heue:, Aux een: Simaox dee sang sideeing ka Zion, mai: Simaox pa sang kieh phit lud, mai: pui pa yumrhawm: ka Simaox an, tag ang hoek krax kaig krax tua heue:."

Simin Ting 10

Can pa yumrhawm: tag pon krax taoh

1 Puxaik khankix eue:, pa kied simie rhawmrhi: aux, mai: pa rawg bwan: ka Siyiex son kix, mawh son sang hoek kix krax taoh heue:. 2 Grawh grawng: nawh aux kham: mhai: sakse: son kix grawng: pa chix viex kix khawm: rhawm: khawm: rhi: tix yuh son Siyiex, viang mawh nan: ang khaw: mai: krax tawng krax yung pa mawh pa meh heue:. 3 Mawh kheu ang kix tawng ka krax rah krax see Siyiex, mai: sawg tix kieh koe: kieh kaux krax rah krax see tokaux tix, ang kix koe: krax cu krax nghiet ka pa rah pa see Siyiex heue:. 4 Grawh grawng: nawh Cao: Khrit mawh dee sidah dee ghoik lox lai been li tom: hoek krax rah krax see, son pui can pa yumrhawm: ku kaux heue:. 5 Grawh grawng: nawh Mose hoik tiem: grawng: krax rah krax see pa dex mai: lox lai been li, ah nin:,

240"Pui pa hawt yuh lox lai been li, tag im: kheu heue:."

6 Viang mawh kawx nan: krax rah krax see pa dex mai: krax yumrhawm:, ah nin:,

241"Paw ah daux rhawm: tix, 'Mawh mawx pa sang haok ka piang raoma:?'"

tix sang viex Cao: Khrit lih, 7 phan: ang mawh nan:,

"'Mawh mawx pa sang lih dee raux?'" tix sang viex Cao: Khrit haok khaing: dee yum. 8 Viang mawh kawx nan: hoik ah ka mawx?

242"Gumlox hoik koe: dex ka maix, ka daux jheeh maix, mai: ka daux rhawm: maix heue:."

Mawh in heue:, pa mawh gumlox pa dex mai: krax yumrhawm:, pa sidiex gau ex kah heue:. 9 Mawh kheu phan: maix kham: grawng: rieb tix teei Yesux mawh Simiang ka jheeh tix, mai: yumrhawm: ka daux rhawm: maix, grawng: Siyiex hoik kieh Nawh Cao: deeh kaoh im: khaing: krax yum, maix tag sang hoek krax taoh heue:. 10 Grawh grawng: nawh, mawh ka rhawm: rhi: heue:, pa yumrhawm: pui tix sang hoek krax rah krax see, mai: mawh ka jheeh heue:, pa kham: grawng: rieb tix teei, tom: hoek krax taoh heue:. 11 Grawh grawng: nawh phuk lai sigang: khri: ah nin:,

243"Kaux pui mawx ang ah, pa yumrhawm: ka Nawh Cao: tag ang lai hoek krax kaig krax tua heue:."

12 Grawh grawng: nawh pui Yudax ang ah, pui Helasax ang ah, ang lai tang: siyox, mawh kheu mawh ngie Simiang tix kaux khaing:, pa mawh Simiang khawm: uik, pa mawh pa mi pa koe: ka son kix can pa kok ka ka Nawh khawm: uik heue:.

13 Grawh grawng: nawh,

244"Can pa kok ka ceukaux Simiang ku kaux tag sang hoek krax taohheue:."

Lox bwan: tah ka piang ca: haktiex, son sang kieh Siyiex pui ku kaux pon krax taoh

14 Phan: mawh nan: kix tag sang chix kok ka Kaw pa ang kix nyang bax yumrhawm: kah, yuh ka mawx? Mai: kix tag sang chix yumrhawm: ka Kaw pa ang kix nyang bax pon tix mhong: grawh mhong: grawng: yuh ka mawx? Mai: phan: ang koe: cao: sidiex cao: gaux kix tag sang chix pon tix mhong: yuh ka mawx? 15 Mai: phan: ang ploi: pui hu:, kix tag sang pon tix sidiex gaux yuh ka mawx? Awm: pa hoik tiem: tix deuh ah nin:,

245"Caong kix pa viex lox bwan: gauxrhawm: gauxrhi: grawng: pa mhawm: pa mhiem: khankix, mhawm: grang miex ding heue:."

16 Viang mawh kawx nan: pui khawm: uik hoik nghiet ka lox bwan: gauxrhawm: gauxrhi: ang mawh, grawh grawng: nawh Isayax hoik ah nin:,

246"Simiang eue:, mawh mawx pa hoik yumrhawm: ka lox pa sidiex ex?"

17 Mawh kheu nan: krax yumrhawm: hoek kheu pa mhong:, mai: pa mhong: hoek kheu gumlox Cao: Khrit heue:. 18 Viang mawh kawx nan: aux ah nin:, ang kix yaox tix mhong: lie? Hoik mhong: tete telai heue:.

247"Lox kix hoik tah hu: ka piang haktiex khawm: uik, mai: gumlox kix hoik hu: ka dee sidah haktiex heue:."

19 Viang mawh nan: aux baox ah nin:, pui Isarilax ang tawng ka in lie? Bawg phaoxka: Mose hoik ah nin:,

248"Aux tag cheeik tix kieh pex koe: krax bohrhawm: bohrhi: ka ceu pui pa ang mawh pui, Aux tag kieh pex songrhawm: songrhi: ka ceu pui pa ang koe: krax tawng krax yung heue:."

20 Mai: Isayax sidaing: kua: tix ah nin:,

249"Kix pa ang sawg ka Aux, hoik yaox ka Aux heue:. Aux hoik lih sidawng: ka kix pa ang chawk ka grawng: Aux heue:."

21 Viang mawh kawx nan: nawh hoik ah nin: grawng: pui Isarilax,

250"Aux hoik taong taix Tix leeing: singaix ka pui ceu pa lie lox mai: pa brax thiang: heue:."

Simin Ting 11

Krax pa taohlawd ka pui Isarilax

1 Phan: mawh nan:, aux ah nin: Siyiex hoik tik pui cie Nawh lie? Ang doh mawh nan:. Grawh grawng: nawh pie tokaux aux kawx mawh pui Isarilax, pa mawh simie ceucat Abraham, pa mawh ceu Benyamin heue:. 2 Siyiex ang lai tik ka pui cie Nawh pa hoik grux tawng Nawh ka:. Phan: ang mawh nan: ang pex tawng grawng: phuk lai sigang: khri: hoik ah ka mawx grawh grawng: Eliyax lie? Grawng: pa khyox khaw: nawh ka Siyiex, son sang deuh phimap ka pui Isarilax ah nin:,

2513 "Simiang eue:, kix hoik pah caojhai: Maix khankix yum, kix hoik kaong: tix tik khu: dee tan Maix khankix, taig ngie aux nong: nong: tix kaux khaing:, mai: kix sawg tix teei ju aux heue:."

4 Viang mawh kawx nan: lox pa pawk Siyiex, hoik ah ka mawx ka nawh?

252"Aux hoik prah kieh deuk pui aliah rheng: son tokaux Tix, pa ang sax grux ngawng ka Balax."

5 Awm: an daux bawg yam in kawx, kawn: koe: pui pa deuk, awm: pa khaw: mai: pa laug tix teei pa dex mai: bwanson: heue:. 6 Viang mawh nan: phan: hoik mawh kheu bwanson:, ang lai kawn: baox mawh kheu krax tuah krax klaung:, phan: ang mawh nan: bwanson: ang lai kawn: baox mawh bwanson: heue:. 7 Phan: mawh nan: sang mawh pa yuh ka mawx? Ceu pa hoik sawg pui Isarilax kah, kix ang lai pon heue:, viang mawh nan: pa hoik laug tix teei khankix hoik pon nawh, mai: pa deuk khankix hoik kiien: hu: heue:, 8 awm: pa khaw: mai: pa tiem: tix deuh ah nin:,

253"Siyiex hoik tawx kix rhawm: pa sang it nie, mai: ngai: pa ang kix pon tix yaox kah, mai: yhaok pa ang kix pon tix mhong: kah, tom: sidah hoek singaix yamin heue:."

9 Mai: Dawit ah nin:,

254"Kieh yuh pheen: kix mawh singoe, mai: kie, mai: dee sideeing, mai: pa keung: tix kham: tix pon ka kix liak. 10 Kieh ngai: kix vhaik hu:, yuh ka mawx son ang kix lai chix yaox, mai: Maix kieh nyoi kix bok ku jheeng: jheeng: liak."

Krax pa taoh lawd ka pui tang: ceu tang: cat

11 Phan: mawh nan: aux ah nin:, kix sang sideeing yuh ka mawx son sang goh lie? Ang doh mawh nan:. Viang mawh kawx nan: kheu goh kix krax taoh tom: hoek ka pui tang: ceu tang: cat, yuh ka mawx son sang cheeik tix kieh kix bohrhawm: bohrhi: kah heue:. 12 Phan: pa goh kix mawh pa mi pa koe: ka son pui haktiex, mai: pa som pa nai: kix mawh pa mi pa koe: ka son pui tang: ceu tang: cat, pa grum naog kix tag sang nie lheu: kah miex ding? 13 Viang mawh kawx nan: aux sikah ka pex pa mawh pui tang: ceu tang: cat, mawh kheu mawh aux kawncau pa ting ka son pui tang: ceu tang: cat, aux tom: yaogyaw krax kaing krax jhaw: pa yuh tix, 14 yuh ka mawx son sang pon aux tix cheeik kix pa mawh ceu nex nham: aux, ka tix ceu ceu son sang bohrhawm: bohrhi: kix kah, mai: hoek krax taoh tiblah kheu heue:. 15 Grawh grawng: nawh phan: pa tik pa vud kix mawh grawng: pa deeh khaw: deeh caw pui haktiex paox tix ka Siyiex, pa sang deeh rieb tix teei kix tag sang lih bleeh tix mawh pa tix, lheu: khaing: mawh pa deeh kaoh im: khaing: krax yum? 16 Mai: phan: khaomun pa hoik kleeig nhieao: pa ran: tix teei tix bin mawh pa singax singeh, mawh pa singax singeh khawm: pum: heue:. Mai: phan: riah mawh pa singax singeh, khawm: kak kawx mawh pa singax singeh heue:. 17 Viang mawh kawx nan: phan: hoik raig tix tik kak tiblah, mai: hoik teei maix pa mawh khaox Sanlun tiag, kab sau: ka sinax kix, mai: maix hoik lih mawh pa rom tix pon riah mai: bee khaox Sanlun an. 18 Paw vi yaw tix ting ka piang kak khankix, viang mawh kawx nan: phan: maix hoik luan yaw tokaux tix ting, paw piawm: grawng: ang mawh maix pa peeh riah khaox, viang mawh nan: mawh riah khaox pa peeh maix heue:. 19 Maix tee: sang ah, "Hoik raig tix tik kak khankix yuh ka mawx son sang kab sau: aux kah heue:." 20 Mawh heue:, mawh kheu ang kix koe: krax yumrhawm: tom: hoik raig tix tik kix, mai: kheu yumrhawm: maix, maix tom: yaox tix ot kah heue:. Paw vi ting rhawm: ting rhi:, viang mawh nan: lhat graung heue:. 21 Grawh grawng: nawh phan: Siyiex ang deuh ka kak pa mawh kak tete khankix, viang ka maix kawx Nawh ang tau tix deuh heue:. 22 Mawh kheu nan: jhak ka pa mhawmrhawm: mai: ka pa lang: teung: ciyang Siyiex heue:. Ka piang kix pa hoik goh khankix pa lang: teung: ciyang, viang mawh kawx nan: ka piang maix pa mhawmrhawm: Siyiex, phan: maix kawn: ca: ot ka daux pa mhawm: Nawh, phan: ang mawh nan: viang ka maix kawx tag sang kid tix tik heue:. 23 Mai: khawm: kix kawx, phan: kix ang kawn: ca: ot ka daux krax pa ang yumrhawm: kix, tag sang teei tix kab kix ka khaox heue:. Grawh grawng: nawh Siyiex chix tix teei kix tix deeh kab kah heue:. 24 Grawh grawng: nawh phan: hoik kid maix khaing: khaox pa koe: rhawm: khaox Sanlun tiag, mai: hoik kab maix sau: awm: pa ang khaw: mai: been rhawmrhi: ka khaox Sanlun pa mhawm:, tag sang nie lheu: teei in kix pa mawh kak tete, mai: deeh kab sau: ka khaox Sanlun cie tix miex ding.

25 Grawh grawng: nawh, puxaik khankix eue:, aux ang rhawm: keih pex mawh pa ang tawng ka grawng: pa raux pa mox in, pa mawh grawh mawh grawng: pa hoik kiien: rhawm: kiien: rhi: hu: pui Isarilax tiblah, tom: sang grum naog bawg yam pui tang: ceu tang: cat, phan: ang mawh nan: ha: pex kox yuh tix koe: pingnya, ka daux pa nieb lak yuh tix ting rhawm: tokaux pex tiru heue:. 26 Mawh kheu nan: pui Isarilax khawm: uik tag sang hoek krax taoh, awm: pa hoik tiem: tix deuh ah nin:,

255"Cao: Pa Pluat Ploi: tag sang lih hoek khaing: Zion. Nawh tag sang kieh veeh hu: khaing: pa ang nab ang yam ka Siyiex ka daux ceu Yakop heue:."

25627 "Mai: in mawh mukheu pa hoik yuh Aux mai: kix, yam sang teei aux tix tik phimap kix heue:."

28 Phan: mawh pa khaw: mai: lox bwan: gauxrhawm: gauxrhi: kix mawh pui koeng kheu sipiag pex, viang mawh kawx nan: phan: mawh pa khaw: mai: pa laug tix teei, kix mawh pa hoik moh kah, kheu sipiag tax du khankix heue:. 29 Grawh grawng: nawh khawngphak khankix mai: pa kok Siyiex kah, ang mawh ceu pa deeh tieh deeh loh khaing: heue:. 30 Grawh grawng: nawh, awm: pa ang pex koe: krax cu krax nghiet ka Siyiex, ka daux bawg yam pa hoik luan, viang mawh nan: yamin hoik pon krax pa caoxrhawm: kheu krax pa ang cu ang nghiet kix, 31 awm: an in kix kawx pa ang koe: krax cu krax nghiet yamin, yuh ka mawh kheu krax caoxrhawm: pa hoik tawx ka pex, kix kawx tag sang pon krax caoxrhawm: yamin heue:. 32 Grawh grawng: nawh Siyiex hoik laung pui khawm: uik tau ka daux krax pa ang cu ang nghiet, yuh ka mawx son sang pon tawx Nawh krax caoxrhawm: ka pui khawm: uik heue:.

Pingnya cuyi Siyiex ang koe: dee deek dee die

33 Pa mi pa koe: pingnya cuyi, mai: krax tawng krax yung Siyiex mawh pa raux miex ding miex glhaong:. Pa prawng pa ca: Nawh Cao: mawh pa ang uik tah sawg, mai: krax pa hu: Nawh Cao: khankix mawh pa ang chix tix sikaw miex ding miex glhaong:.

25734 "Grawh grawng: nawh mawh mawx pa sax tawng ka rhawm: Simiang? Phan: ang mawh nan: mawh mawx pa sax mawh cao: pa teem: kum: teem: ah ka son Nawh Cao:?"

25835 "Mawh mawx pa sax tawx ka Nawh Cao: ka: sivoe, son sang baox deeh pon kah?"

36 Grawh grawng: nawh can pa koe: ku ceu khawm: uik, hoik mawh kheu Nawh, mai: ka daux Nawh, mai: son Nawh heue:. Kieh Nawh Cao: koe: min: plakngai: leeing: ju leeing: phan: liak. Amen.

Simin Ting 12

Tawx tokaux tix mawh pa tan pa lu

1 Mawh kheu nan:, puxaik khankix eue:, aux tom: khyox khaw: ka pex, kheu pa caoxrhawm: caoxrhi: Siyiex, yuh ka mawx son sang tawx pex tokaux tix, tix mawh pa tan pa lu pa im:, pa singax singeh, pa khaw: pa caw ka rhawm: Siyiex, pa mawh kaing krub pa keung: pex tix yuh heue:. 2 Mai: paw kieh khaw: mai: rieang baux ju in, viang mawh kawx nan: kieh pex deeh tieh loh, kheu baox yuh rhawmrhi: tix pa khraox, yuh ka mawx son sang chix cheu: pex tix tawng, mawh pa yuh ka mawx pa mawh pa mhawm:, mai: pa khaw: pa caw rhawm:, mai: pa grum mawh alo Siyiex heue:.

3 Grawh grawng: nawh kheu bwanson: pa hoik tawx ka aux, aux tom: krai ka ku kaux daux pui pa ot ka daux pex, yuh ka mawx son ang lai chax nie luan keud grawng: pa ting tokaux tix tiru, khaing: pa keung: nawh tix keud, viang mawh kawx nan: yuh ka mawx son sang chix keud, pa khaw: ka pa chix priex rhawm: tix keud, awm: pa khaw: mai: krax yumrhawm: pa hoik gwieh Siyiex tix tawx ka kaux pui mawx kaux pui an heue:. 4 Grawh grawng: nawh awm: koe: ex kraung pakpeung tom: nie ka daux tokaux tix mu: khaing:, mai: kaing pa yuh kraung pakpeung khankix khawm: uik, ang lai awm: paoxtix, 5 awm: an ex pa mawx pui tom: nie, mawx tokaux tix mu: khaing: ka daux Cao: Khrit, mai: ralai mawh kraung pakpeung ka paoxtix heue:. 6 Mai: ex koe: khawngphak bwanson:, pa tang: siyox awm: pa khaw: mai: bwanson: pa hoik tawx ka ex, phan: mawh pa mawh caojhai: ang ah, kieh ex ah lox jhai: awm: pa khaw: mai: krax yumrhawm: tix heue:. 7 Phan: ang mawh nan: phan: mawh cao: sidiex, kieh ex viex khawm: rhawm: tix yuh kaing sidiex tix heue:. Phan: ang mawh nan: kaw pa yuh sara cao:gau, kieh nawh yuh kaing gau tix heue:. 8 Phang: ang mawh nan: kaw pa jeeh nyaw, kieh nawh yuh kaing jeeh nyaw tix heue:. Kaw pa tawx, kieh nawh viex rhawm: sibieh tix tawx heue:. Kaw pa giex kaing:, kieh nawh viex khawm: rhawm: tix yuh heue:. Kaw pa yuh krax caoxrhawm: caoxrhi: kieh nawh viex rhawm: haing: tix yuh heue:.

Sang ot tau yuh ka mawx mai: pui daux nyiex Siyiex

9 Kieh krax moh krax rhawm: pex mawh pa ang koe: pa pie pa lhen:. Koeng ka ceu pa caox pa caig, mai: jawg tix giex ka ceu pa mhawm: heue:. 10 Ka daux krax pa moh pa rhawm: ka puxaik khankix, kieh tix kaux lai tix kaux moh paox tix mhawm: mhawm: heue:. Ka daux krax pa yaog pa yaw, tix kaux lai tix kaux, yaogyaw ka tang: kaux nie khaing: tokaux tix heue:. 11 Ka daux pa viex rhawm: tix yuh, paw kieh nieh kah. Viex rhawm: pa rien: tix yuh son Simiang. 12 Gauxrhawm: gauxrhi: ka daux pa keud pot jun pot. Gun yeung ka daux pa kharhawm: kharhi:. Kawn: ca: viex rhawm: kaux tix rawg bwan: jheeng: jheeng:. 13 Tawx ceu pa lo ka pui pa singax singeh khankix. Yuh krax khan: krax kheu: heue:. 14 Nawb bwan: ka kix pa tuktiak tukte: ka pex, nawb bwan: mai: paw jhax paw lawg kah. 15 Gauxrhawm: mai: kix pa gauxrhawm:, mai: yiem grai mai: kix pa yiem grai heue:. 16 Kieh koe: rhawm: pa awm: paoxtix ka tix kaux lai tix kaux. Paw deuh rhawm: pex ka ceu pa lhaong: khankix, viang mawh nan: yuh paox yuh pie ka pa tiem khankix.

259"Paw yuh tix koe: pingnya, ka daux pa nieb lak yuh tix ting rhawm: tix tiru."

Sang yuh ka mawx mai: pui tang: ceu tang: cat

17 Paw deeh tawx pa caox, ka son pa caox ka tix kaux kawx. Keud tix yu ceu pa khaw: pa mhawm: ka sivoe pui khawm: uik heue:. 18 Phan: chix tix, pa koe: ka plak maix, kieh koe: pa nhim: tau mai: pui khawm: uik heue:. 19 Pa moh khankix eue:. paw deeh pawk bix tokaux tix, viang mawh kawx nan: yoi: tix kieh koe: dee ot son krax songrhawm: songrhi: Siyiex heue:. Grawh grawng: nawh, hoik tiem: tix deuh ah nin:,

260"Pa pawk bix mawh cie Aux heue:, Aux tag sang deeh viied kah, Simiang ah nan: heue:."

20 Mawh kheu nan:,

261"Phan: pui pa koeng ka maix cairhawm:, tawx nawh sawm: heue:. Phan: nawh sang nyaux nie rawm:, tawx nawh nyaux heue:. Grawh grawng: nawh ka daux pa yuh nan:, maix tag sang pum: sau: gaoxngu ka piang kaing: nawh heue:."

21 Paw kieh pa caox pa caig pex ka pex, viang mawh nan: teei ceu pa mhawm:, mai: kieh pex ka pa caox pa caig heue:.

Simin Ting 13

Kawn:Khrit mai: pui pa giex kaing: haktiex

1 Kieh pui ku kaux koe: krax cu krax nghiet ka simiang pa giex kaing: pa ting piang tix. Grawh grawng: nawh ang koe: sibrawm tix mawh simiang, phan: ang mawh kheu Siyiex, mai: kix pa mawh simiang yamin kawx, mawh pa ciak Siyiex tix deuh heue:. 2 Mawh kheu nan: kaw pa lheu: lox simiang, mawh pa thieh ka been pa deuh Siyiex heue:. Mai: kix pa thieh kah, tag sang pon pa prawng pa ciyang ka tokaux tix heue:. 3 Grawh grawng: nawh pa giex kaing: khankix ang mawh ceu pa lhat pa graung kaing pa mhawm: kah, viang mawh kawx nan: mawh pa lhat pa graung ka son kaing pa caox pa caig heue:. Maix simie tix mawh pui pa ang lhat ka sibrawm simiang lie? Yuh ceu pa mhawm: mai: maix tag sang pon pa yaw simiang kah heue:. 4 Grawh grawng: nawh simiang mawh pui cau pui soi: Siyiex ka maix, son ceu pa mhawm: heue:. Viang mawh nan: phan: maix yuh pa caox pa caig, lhat graung kah awawx, grawh grawng: nawh simiang nieb kawg vaid giex ang mawh, mawh kheu simiang mawh pui cau pui soi: Siyiex, pa mawh cao: pa pawk bix, tang: pa songrhawm: songrhi:, ka pui pa yuh pa caox pa caig heue:. 5 Mawh kheu nan: pex tag lai koe: krax cu krax nghiet ka simiang, ang joeng mawh ngie kheu krax songrhawm: songrhi: an, viang mawh nan: mawh kheu khawm: pa koe: dee chix keud tix tawng grawng: mawh pa mhawm: ang mhawm: heue:. 6 Mawh kheu jao in pex tom: tawx mau koh heue:. Grawh grawng: nawh kix mawh pui cau pui soi: ka kaing Siyiex, pa kia: ka kaing ceu in ku jheeng: jheeng: heue:. 7 Mawh kheu nan: tawx ka kix khawm: uik awm: pa khaw: tix tawx kah. Tawx mau koh ka pui pa khaw: tix pon mau koh. Tawx mau koh keun: ka pui pa khaw: tix pon mau koh keun:. Lhat ka pui pa khaw: tix lhat graung kah. Yungyi: ka pui pa khaw: tix yungyi: kah heue:.

Daux blawng pa moh paox plawg paox nyhawm: tix

8 Paw koe: ceuk ka pui tix kaux kawx, lheu: khaing: pa moh ka paox tix. Grawh grawng: nawh kaw pa moh ka paoxplawg paoxnyhawm: tix, hoik kieh lox lai been li grum naog heue:. 9 Mawh kheu lox lai been li pa ah nin:,

262"Maix paw phit paw vao, Maix paw teei ju pui yum, Maix paw briex paw lak. Maix paw ghoing: kah heue:."

Mai: phan: koe: lox tawm: lai been li tang: ceu tix ceu ceu, hoik grum ka daux gumlox in,

263"Maix moh ka paoxplawg paoxnyhawm: awm: moh ka tokaux tix heue:."

10 Pa moh pa rhawm: ang chix yuh krax caox ka paoxplawg paoxnyhawm: tix heue:. Mawh kheu nan: pa moh pa rhawm: mawh pa kieh lox lai been li grum naog kah heue:.

11 Lheu: khaing: an, kheu tawng ka bawg yam in, pex tawng grawh grawng: hoik hoek bawg yam pa khaw: pex tix siduad khaing: it, grawh grawng: nawh krax taohnie lheu: dex ka ex yamin, khaing: yam jah ex tix yumrhawm: heue:. 12 Bawg yam ponsawm: dex sang hoik, mai: bawg yam pon singaix dex sang hoek heue:. Mawh kheu nan: kieh ex peeik tix tik kaing pa dex mai: pa vhaik, mai: kieh ex ceep kraung naing pa riang heue:. 13 Kieh ex hu: ka daux pa khaw: pa caw, awm: yam pon singaix, ang mawh ka daux pa silao: ka poi, mai: pa yoek ka plai:, ang mawh ka daux pa kraing: pa nieb yuh hawt alo nex nham:, ang mawh ka daux pa simah simaing: mai: pa bohrhawm: bohrhi: heue:. 14 Viang mawh kawx nan: pex teei tix ceep Simiang Yesux Khrit, mai: paw keud paw cox son nex nham:, son sang kieh alo nex nham: grum naog heue:.

Simin Ting 14

blawng pa yuh kaing pa teei beeh glawm:

1 Lheu: khaing: nan:, pex rieb tix teei kaw pa iak riang iak rao daux krax yumrhawm: tix, viang mawh nan: paw rieb tix teei son sang prawng dud, ka grawng: ceu pa tang: keud jee keud blaong khankix heue:. 2 Pui tix kaux kaux koe: krax yumrhawm: tix sang ih ku ceu khawm: uik, viang mawh nan: kaw pa iak riang iak rao ih ngie taux lhax khaing: heue:. 3 Paw kieh kaw pa ih, nieb een: maw pa ang koe: cee, ka kaw pa ang lai ih, mai: paw kieh kaw pa ang lai ih prawng ca: ka kaw pa ih, grawh grawng: nawh Siyiex hoik rieb tix teei nawh heue:. 4 Maix pa prawng ca: ka siliex pui tang: kaux mawh mawx? Nawh yaox tix cung ang ah, phan: ang mawh nan: nawh goh ang ah, koe: ka cao: nawh heue:. Grawh grawng: nawh Simiang koe: siawp sibrawm tix sang kieh nawh cung heue:. 5 Pui tix kaux kaux een: tix singaix, mawh pa nie lheu: ting khaing: tang: singaix, mai: pui tang: kaux een: ku singaix mawh pa awm: paoxtix heue:. Kieh pui ku kaux tawng tom: sidah, ka ceu pa keud daux rhawm: tix heue:. 6 Kaw pa keud grawh grawng: singaix, keud grawng: singaix an ka son Simiang, mai: kaw pa ih, ih ka son Simiang, mawh kheu yaogyaw nawh ka bwanson: Siyiex heue:. Mai: kaw pa ang lai ih, ang lai ih ka son Simiang, mai: yaogyaw bwanson: Siyiex nang: heue:. 7 Grawh grawng: nawh ka daux ex tix kaux kawx ang lai im: ka son tokaux tix nong: nong:, mai: ang yum ka son tokaux tix nong: nong: heue:. 8 Grawh grawng: nawh phan: ex im: ang ah, ex im: ka son Simiang, phan: ang mawh nan: ex yum ang ah, ex yum ka son Simiang heue:. Mawh kheu nan: ex im: ang ah, phan: ang mawh nan: ex yum ang ah, ex mawh cie Simiang. 9 Grawh grawng: nawh son sang sidah mawh nin:, Cao: Khrit tom: hoik yum mai: baox dee im:, yuh ka mawh son sang mawx Nawh Simiang khawm: pa yum mai: pa im: heue:. 10 Viang mawh kawx nan:, maix lai prawng ca: ka puxaik tix yuh ka mawx? Phan: ang mawh nan:, maix lai nieb deuh puxaik tix, mawh pa ang koe: cee yuh ka mawx? Grawh grawng: nawh ex khawm: uik tag sang cung ka sivoe dee ngawm Siyiex tix prawng ca: heue:. 11 Grawh grawng: nawh hoik tiem: tix deuh,

264"Simiang ah nin:, 'Awm: im: Aux, ngawng ku ngawng tag sang grux ka Aux, mai: dak ku dak tag sang krai doh ka Siyiex heue:.'"

12 Mawh kheu nan: ex ku kaux daux pui tag sang krai grawng: tokaux tix ka Siyiex heue:.

blawng sawg son sang koe: krax mhawm: ka pui

13 Mawh kheu nan: paw kieh ex baox prawng ca: ka paox tix, viang mawh nan: pex nie lheu: keud tix prawng ca: blawng in, yuh ka mawx pui tix kaux kawx tag ang lai deuh dee sideeing, phan: ang mawh nan: ceu pa sang kieh goh, ka daux krax pa hu: puxaik tix heue:. 14 Aux hoik tawng, mai: tawng tom: sidah, ka daux Simiang Yesux, grawh grawng: ang koe: tix ceu kawx pa nieb chix seeing: brai: tix tiru, phan: ang mawh ka kaw pa sawn: tix ceu ceu mawh pa seeing: pa brai:, ka son nawh ceu an tom: mawh pa seeing: pa brai: heue:. 15 Phan: puxaik maix saux rhawm: kheu pa ih pa un: maix, mawh sipiag pa ang maix hu: awm: pa khaw: mai: krax moh krax rhawm: heue:. Paw vi yuh laux ka kaw pa Cao: Khrit hoik yum ka son nawh kheu pa ih pa un: maix heue:. 16 Mawh kheu nan: paw kieh pa mhawm: pex, mawh pa sa pa lao pui kah, 17 grawh grawng: nawh meung Siyiex ang lai mawh pa ih pa nyaux, viang mawh kawx nan: mawh pa rah pa see, mai: pa nhim:, mai: pa gauxrhawm: ka daux Khwan: Singax Singeh heue:. 18 Grawh grawng: nawh kaw pa hawt yuh ceu in ka son Cao: Khrit, mawh pa khaw: pa caw ka rhawm: Siyiex, mai: pa yaw pui kah heue:. 19 Mawh kheu nan: kieh ex hawt khaix ceu pa dex mai: krax nhim:, mai: ka ceu pa ex chix ralai kieh paoxtix ting lhaong: heue:. 20 Paw vi yieh kaing jhaw: Siyiex laux kheu pa ih pa un:. Pa ih pa un: khawm: uik mawh pa singax singeh, viang mawh kawx nan:, pui pa kieh pa ih pa un: tix mawh dee sideeing phit lud heue:. 21 Mawh pa khaw: pa mhawm: tix ang ih nex, mai: rawm: plix siiet mai: tix ang yuh tix ceu kawx, pa sang kieh puxaik maix sideeing tix goh heue:.

blawng sawg son sang koe: min: plak ngai: Siyiex

22 Krax yumrhawm: pa koe: maix, kieh koe: ka tokaux tix nong: nong:, ka plak sivoe Siyiex heue:. Kaw pa ang prawng tix deuh phimap ka tokaux tix tiru, grawh grawng: ceu pa rieb nawh tix teei, mawh pa gauxrhawm: heue:. 23 Viang mawh kawx nan:, kaw pa keud jee keud blaong grawng: pa ih, phan: nawh lai ih, nawh tom: pon krax prawng ciyang phimap, mawh kheu ang nawh ih hawt krax yumrhawm: tix, mai: ceu pa yuh ka mawx ang ah, pa ang dex mai: krax yumrhawm: mawh phimap heue:.

Simin Ting 15

Yuh son pui ang keud dee mhawm: son tokaux tix

1 Ex pa mawh pa ting riang ting rao, khaw: tix yeung ka ceu pa iak riang iak rao kix pa ang koe: riang khankix, mai: ang khaw: tix yuh ceu pa khaw: rhawm: tokaux tix heue:. 2 Kieh ex ku kaux daux pui yuh pa khaw: pa caw rhawm: paoxplawg paoxnyhawm: tix, ka son ceu pa mhawm:, tom: sang ting sang lhaong: nawh kah heue:. 3 Grawh grawng: nawh pie Cao: Khrit kawx, ang lai yuh pa khaw: pa caw rhawm: tokaux Tix heue:. Viang mawh nan: awm: pa hoik tiem: tix deuh ah nin:,

265"Lox pa sa pa lao kix, pa sa pa lao ka Maix, hoik hoek ka piang Aux heue:."

4 Grawh grawng: nawh can pa hoik tiem: tix deuh glangka: in dix, mawh pa hoik tiem: son sang gau ka ex, yuh ka mawx son sang koe: krax keud pot jun pot, kheu pa chix gun chix yeung, mai: pa nyawmrhawm: nyawmrhi: kheu phuk lai sigang: khri: heue:. 5 Kieh Siyiex pa tawx krax chix gun chix yeung, mai: krax nyawmrhawm: nyawmrhi:, kieh pex tix kaux lai tix kaux, koe: rhawm: tix mu: khaing:, awm: pa khaw: ka Yesux Khrit, 6 yuh ka mawx son pex sang chix viex rhawm: tix mu:, jheeh tix mu:, tix yaogyaw Siyiex mai: Keeing:, Simiang ex Yesux Khrit liak heue:. 7 Mawh kheu nan: pex tix kaux lai tix kaux rieb tix teei ka paox tix, awm: Cao: Khrit hoik rieb tix teei ka pex, son sang koe: min: plakngai: Siyiex kah heue:. 8 Grawh grawng: nawh pa sang ah aux mawh nin:, Cao: Khrit hoik lih mawh pui cau pui soi: ceu pui pa pat hak, son sang sidawng: pa mawh pa meh Siyiex, ka daux pa yuh tix kieh mawh, lox mukheu pa hoik tawx ka tax du ex khankix, 9 mai: yuh ka mawx pui tang: ceu tang: cat khankix tag sang yaogyaw ka Siyiex, son bwanson: Nawh Cao: awm: pa hoik tiem: tix deuh ah nin:,

266"Mawh kheu nan: aux tag sang yaogyaw ka Maix, ka daux pui tang: ceu tang: cat khankix, mai: aux tag sang rhax lai yaogyaw ka ceukaux Maix heue:."

10 Mai: nawh baox deeh ah nin:,

267"Pui tang: ceu tang: cat khankix eue:, pex gauxrhawm: tau mai: pui cie Nawh heue:."

11 Mai: baox deeh ah nin:,

268"Pui tang: ceu tang: cat khawm: uik eue:, yaogyaw ka Simiang. Mai: kieh ceu pui khawm: uik yaogyaw Nawh heue:."

12 Mai: Isayax baox deeh ah nin:,

269"Tag sang koe: riah Yesie:, mai: Kaw pa sang kaoh tix giex kaing: pui tang: ceu tang: cat. Pui tang: ceu tang: cat tag sang koe: krax keud pot jun pot ka Nawh heue:."

13 Kieh Siyiex pa tawx krax keud pot jun pot, kieh pex naog ka krax gauxrhawm: gauxrhi: mai: krax nhim: khawm: uik ka daux pa yumrhawm: yumrhi:, yuh ka mawx son pex sang nie lheu: ting krax keud pot jun pot ka daux siawp sibrawm Khwan: Singax Singeh heue:.

Rhawm: krax moh pa naog pa kreh kawn:Khrit

14 Puxaik aux khankix eue:, aux hoik yumrhawm: grawng: tokaux pex hoik naog ka pa mhawm: pa mhiem:, mai: naog ka krax tawng krax yung khawm: uik, mai: chix tix sidiex ka paoxtix tix kaux lai tix kaux heue:. 15 Aux hoik nie lheu: tiem: lox kua: ka pex, tix blawng mawh son sang kieh pex doh keud doh sawn:, mawh kheu bwanson: pa hoik tawx Siyiex ka aux, 16 yuh ka mawx son sang mawh aux pui cau pui soi: Yesux Khrit ka pui tang: ceu tang: cat khankix, tix yuh kaing cao: giex kaing: li ka lox bwan: gauxrhawm: gauxrhi: Siyiex, yuh ka mawx yam sang tan lu pui tang: ceu tang: cat khankix ka Nawh Cao:, son sang mawh kix pa khaw: pa caw rhawm: Nawh, pa mawh pa Khwan: Singax Singeh hoik kieh singax singeh kah heue:. 17 Mawh kheu nan: pa yaw rangdi aux mawh ka daux Yesux Khrit, ka daux ceu pa dex pa dawd mai: Siyiex heue:. 18 Grawh grawng: nawh aux ring tix krai grawng: tang: ceu, phan: lheu: khaing: grawng: pa hoik yuh Cao: Khrit ka daux aux, son sang kieh pui tang: ceu tang: cat koe: krax cu krax nghiet, kheu gumlox mai: ceu pa yuh, 19 ka daux siawp sibrawm pa mawh mhai:, mai: pa daox pa am:, ka daux siawp sibrawm Khwan: Singax Singeh heue:. Mawh kheu nan: jah ka veng Yerusaliem, mai: hawt sivie tan:, tom: hoek ka meung Ilirikam, aux hoik grum sidiex gau lox bwan: gauxrhawm: gauxrhi: Cao: Khrit heue:. 20 Aux koe: rhawm: tix sang sidiex gau lox bwan: gauxrhawm: gauxrhi: ngie ka dee ang nyang bax tawng ka ceukaux Cao: Khrit, yuh ka mawh son ang aux lai caw tix sum: ka piang jaong num: pa hoik kaw: pui tang: kaux heue:. 21 Awm: pa khaw: mai: pa hoik tiem: tix deuh ah nin:,

270"Kix pa ang pui sax krai grawh grawng: Nawh kah tag yaox, mai: kix pa ang sax mhong: grawng: Nawh tag sang tawng heue:."

22 Mawh kheu nan:, pa sang hoek aux ka pex, hoik koe: pa sidien tom: nie bawg heue:. 23 Viang mawh kawx nan:, yamin, mawh kheu ang lai baox koe: dee sang sidiex ka daux meung in khankix, mai: kheu hoik dawg simie aux tix hoek ka pex tom: nie num, 24 yam sang hu: aux ka meung Sapenix: lai mawx ang ah, aux koe: krax keud pot jun pot tix sang yaox pex yam hu: aux krax, mai: tix sang kieh pex hu: tawx aux tan:, khaix hoik ot aux tau mai: pex tom: kub vhah rhawm: heue:. 25 Viang mawh nan: yamin aux kawn: sang hu: ka veng Yerusaliem, tix sang viex krax teem: coi hu: ka pui pa singax singeh khankix heue:. 26 Grawh grawng: nawh pui meung Makedonix mai: pui meung Akhayax hoik viex khawm: rhawm:, gauxrhawm: tix tawx pa tan pa lu, son pui singax singeh pa hot khankix, pa ot ka daux veng Yerusaliem heue:. 27 Mawh heue:, kix hoik viex khawm: rhawm:, gauxrhawm: tix tawx, mai: kix mawh pui pa koe: ceuk, ka kix heue:. Grawh grawng: nawh phan: hoik kieh pui tang: ceu tang: cat mawh pa rom tix pon ceu pa dex mai: khwan: tau mai: pui Yudax, kix kawx khaw: tix deeh tawx kraung ceu pa dex mai: nex nham:, son sang teem: sang yuh son kix heue:. 28 Mawh kheu nan: khaix hoik yuh aux kaing in tom: hoik sidah, mai: hoik tawx hoik pong laksawng: pa tan pa lu ka kix mhawm: mhiem: aux tag sang veh ka pex mai: phlat hu: ka meung Sapenix: heue:. 29 Mai: aux tawng yam hoek aux ka pex, aux tag sang hoek ka daux pa grum naog bwanson: Cao: Khrit heue:.

30 Puxaik khankix eue:, aux khyox khaw: ka pex ka daux Simiang ex Yesux Khrit mai: kheu krax moh krax rhawm: Khwan: Cao:, yuh ka mawx son pex sang nied tix coca: tau mai: aux, ka daux pa rawg pex bwan: ka Siyiex son aux heue:. 31 Yuh ka mawx son sang pon luan aux khaing: kix pa ang koe: krax cu krax nghiet ka daux meung Yudax, mai: yuh ka mawh kaing teem: coi, pa sang hu: yuh aux son veng Yerusaliem tag sang mawh pa khaw: pa caw rhawm: mai: pa rieb tix teei pui singax singeh khankix, 32 yuh ka mawx son sang pon hoek aux ka pex ka daux krax gauxrhawm:, mai: ka daux pa khaw: mai: alo Siyiex, mai: son sang pon aux tix laux lee: tau mai: pex heue:. 33 Kieh Siyiex pa tawx krax nhim: ot tau mai: pex khawm: uik liak. Amen.

Simin Ting 16

Lox nawb

1 Aux sang tawx pong nan: ex Phibe ka pex, pa mawh bon: cau bon: soi: ka daux ceucao veng Kinkhre, 2 yuh ka mawx son sang rieb pex tix teei nawh ka daux Simiang, awm: pa keung: pa khaw: pui singax singeh tix yuh, mai: son sang teem: coi pex ka nawh, ka daux can ceu pa lo nawh khaing: pex heue:. Grawh grawng: nawh tokaux nawh kawx mawh cao: pa teem: ka pui tom: nie, mai: khawm: ka tokaux aux heue:.

3 Nawb ka Prisikilax mai: Akulax pa mawh paox pa rom tix yuh kaing tau mai: aux ka daux Yesux Khrit, 4 pa mawh pa hoik tang: kieh ngawg tix, ka son ju aux heue:. Ang lai mawh ngie aux pa yaogyaw bwanson: kiex, viang mawh nan: mawh khawm: ceucao pui tang: ceu tang: cat khawm: uik heue:. 5 Mai: nawb ka ceucao pa krawk khrawm: ka nyiex kiex heue:. Nawb ka Epenit pa moh aux kah, pa mawh plix liang ka son Cao: Khrit ka daux meung Asix heue:. 6 Nawb ka Marix, pa hoik nied tix yuh kaing tom: nie ka son pex heue:. 7 Nawb ka Andrawnit mai: Yunix, pa mawh paoxceu paoxcat aux, mai: paox pa hoik laung tau mai: aux. Pa mawh pa koe: cee ka sinax kawncau pa ting khankix, pa hoik ot ka daux Cao: Khrit ka sivoe aux heue:. 8 Nawb ka Ampalix pa moh aux kah, ka daux Simiang heue:. 9 Nawb ka Uraban pa mawh paox pa rom tix yuh kaing tau mai: ex ka daux Cao: Khrit, mai: ka khawm: Satakhux pa moh aux kah heue:. 10 Nawb ka Apele pa khaw: pa caw rhawm: Cao: Khrit heue:. Nawb ka kix pui geh nyiex Arittawbulux heue:. 11 Nawb ka Herodion pa mawh paoxceu paoxcat aux heue:. Nawb ka kix pui geh nyiex Nakisux, pa ot ka daux Simiang. 12 Nawb ka Taruphenix mai: Taruphosax, pa yuh kaing ka daux Simiang heue:. Nawb ka Perusix pa moh kah, pa hoik yuh kaing tom: nie ka daux Simiang heue:. 13 Nawb ka Rufux, pa mawh pa hoik laug Simiang, mai: ka miex nawh pa mawh khawm: miex aux heue:. 14 Nawb ka Asunkritux, Phalekhon, Heramet, Patrawbax, Heramat, mai: ka khawm: puxaik khankix pa ot tau mai: kix heue:. 15 Nawb ka Philologut mai: Yuliax, ka Nerux mai: nan: nawh, mai: ka Awlumpax, mai: ka khawm: pui singax singeh pa ot mai: kix khawm: uik heue:. 16 Nawb ka paoxtix tix kaux lai tix kaux, ka pa ngheut pa singax singeh heue:. Ceucao Cao: Khrit khawm: uik nawb ka pex heue:.

17 Puxaik khankix eue:, aux khyox khaw: ka pex, een: tix tawng ka kix pa kieh koe: krax tang: gwieh paoxtix, mai: dee sang phit lud pa ang khaw: mai: lox gau pa hoik gau pex kah, mai: veeh tix hu: khaing: kix heue:. 18 Grawh grawng: nawh kix pa awm: kix khankix, mawh pa ang yuh son Simiang ex Cao: Khrit, viang mawh nan: kix keud son vaig tix khaing:, mai: kix chix pie lhen: ka rhawmrhi: kix pa ang koe: dee phit dee lud, ka lox nyawm lox khoik nyaw kix heue:. 19 Grawh grawng: nawh krax cu krax nghiet pex hoik tah hu: ka pui khawm: uik, mawh kheu nan: aux tom: gauxrhawm: kheu pex, viang mawh kawx nan: aux simie tix kieh pex mawh pa tawng pa yung ka pa mhawm: pa mhiem:, mai: pa ang koe: dee phit dee lud ka pa mawh pa caox pa caig heue:. 20 Khaix in ang lai rheung:, Siyiex pa tawx krax nhim: tag sang teei Satan tix kieh nawh khlaix vid greem: caong pex heue:.

Kieh bwanson: Simiang ex Yesux Khrit ot tau mai: pex liak. 21 Timose pa mawh paox pa yuh kaing tau mai: aux, mai: Lukix, mai: Yason, mai: Sosipatax pa mawh paoxceu paoxcat aux khankix nawb ka pex heue:. 22 Aux Teratix, pa tiem: lai in, nawb ka pex ka daux Simiang heue:. 23 Kayux pa mawh cao: nyiex dee paung aux, mai: khawm: ceucao in nawb ka pex heue:. Eratux pa mawh cao: priex mau veng in, mai: Kwatux pa mawh puxaik nawb ka pex heue:. 24 Kieh bwanson: Simiang ex Yesux Khrit ot tau mai: pex khawm: uik liak. Amen.

Nawb bwan:

25 Yam in ka Kaw pa chix kieh pex kaux cong:, awm: pa khaw: mai: lox bwan: gauxrhawm: gauxrhi: aux, pa mawh pa sidiex grawh grawng: Yesux Khrit, awm: pa khaw: mai: pa hoik plak kieh yaox ka pa raux pa hoik mox tom: ju di dix, 26 viang mawh nan: pa hoik plak jhi: sidawng: yamin, kheu phuk lai sigang: khri: caojhai: khankix, awm: pa khaw: mai: lox tawm: jhawm: krai Siyiex leeing: ju leeing: phan:, pa hoik kieh tawng ka ceu pui khawm: uik, son sang koe: krax cu krax nghiet pa dex mai: krax yumrhawm:, 27 ka Siyiex pa mawh pa grum krax tawng krax yung tix kaux khaing:, kieh koe: min: plakngaix kheu Yesux Khrit leeing: ju leeing: phan: liak. Amen.