Titux

Titux

Simin Ting 1

Lox nawb

1 Pawlux pa mawh siliex Siyiex mai: kawncau pa ting Yesux Khrit, awm: pa khaw: mai: krax yumrhawm: pui pa hoik laug Siyiex khankix, mai: krax tawng krax yung ka pa mawh pa meh, pa khaw: mai: pa nab pa yam mai: pa yuh pa khaw: ka Siyiex 2 ka daux krax keud pot jun pot son ju leeing: ju leeing: phan:, pa Siyiex, pa ang chix pie chix lhen: hoik tawx lox mukheu tom: ka: sivoe yam jah tix koe: bawg yam. 3 Viang mawh kawx nan: ka daux bawg yam pa caw mai: Nawh, Nawh hoik kieh sidawng: ka daux gumlox Tix, ka daux ceu pa sidiex pa hoik tawx hoik pong ka aux awm: pa khaw: mai: lox tawm: Siyiex Cao: Taoh ex, 4 tawx ka Titux pa mawh kawn: aux tete kheu krax yumrhawm: pa neuex ax, mawh tix ceu khaing: heue:. Kieh koe: bwanson: mai: pa nhim: pa kaoh khaing: Siyiex Keeing: Cao:, mai: Yesux Khrit Cao: Taoh ex liak.

Glawk pa mawh kuad song:

1:6-8 jhak daux lai 1.Kawrin 3:2-4

5 Mawh kheu grawng: in aux hoik prah maix ka klawn: tiex Karete, son sang kieh maix cox ka ceu pa ang nyang bax hoik khankix, mai: son sang ciak tix deuh kuad ceucao, ka daux ku veng awm: hoik tawm: aux ka maix heue:. 6 Phan: koe: pui tix kaux kaux, pa ang koe: dee deuh phimap kah, pa koe: moeng tix kaux khaing:, pa koe: kawn: praix pa yumrhawm:, pa ang pui deuh phimap ka grawng: pa cuci: pa maw:, mai: ka pa ang chix cu chix nghiet, ciak tix deuh pa yuh nan: heue:. 7 Grawh grawng: nawh pui pa mawh cao: giex kaing: ceucao, tag lai mawh pa ang koe: dee deuh phimap kah, awm: mawh kawncau pa priex kraung Siyiex, mai: pa ang nieb hawt alo tokaux tix, pa ang dawdrhawm:, pa ang nieb pleung: ka plai: rawm: plix siiet, pa ang nieb tap nguh pui, mai: pa ang keud tix pon mau yie ka krax pa ang khaw:. 8 Viang mawh kawx nan: tag lai mawh pa chix khre: ka nyo sinie, pa moh ka pa mhawm:, pa chix keud tix priex rhawm: tix, pa rah pa see, pa singax singeh, pa chix priex rhawm: tix heue:. 9 Tag lai mawh pui pa giex ka gumlox sijax pa khaw: mai: pa gau, yuh ka mawx son sang mawh nawh pa chix jeeh: nyaw ka lox gau pa mawh pa meh, mai: son sang chix pawk lox ka pui pa kieh pa thiang: khankix heue:.

Ceu pa khreeing: pa brai: cao: gau pa pie pa lhen:

10 Grawh grawng: nawh koe: pui pa ang chix cu chix nghiet tom: nie, pa nieb krai lox pa ang tie koe: bwanson:, mai: pie ka pui, nie ting mawh ka kix pa mawh cub pa pat hak, 11 tag lai thox jheeh kix, pui pa klup tix kieh laux ka pui khawm: nyiex khankix, ka pa gau pa ang kix khaw: tix gau, son sang pon kix mau yie ka grawng: pa ang khaw: heue:. 12 Ka daux kix tix kaux pa mawh cao: jhai: ceu kix, hoik ah nin:, "Pui Karete mawh pui pie pui lhen:, totiag pa caox, mai: pui nieh pa chax nie luan ih ku jheeng: jheeng: heue:." 13 Lox pa kham: mhai: sakse: an mawh pa mawh pa meh heue:. Mawh kheu nan: nied tix ah ka kix yuh ka mawx son sang kieh kix kaux cong: ka daux krax yumrhawm:, 14 mai: son ang sang nghiet ka lox been pui Yudax pa ang tie mawh, mai: ka lox tawm: pui khankix pa hoik tieh hu: khaing: pa mawh pa meh heue:. 15 Ka pui pa singax singeh ku ceu khawm: uik mawh pa singax singeh heue:. Viang mawh kawx nan: ka kix pa seeing: pa brai:, mai: pa ang yumrhawm:, tix ceu kawx ang singax, viang mawh nan: rhawm: kix mai: khawm: dee chix keud chix tawng kix mawh pa seeing: pa brai: heue:. 16 Viang kix dhua: kix tawng ka Siyiex kawx, kix thiang: tix tik Nawh ka ceu pa yuh tix, kheu mawh kix pa greeing, mai: pa ang chix cu chix nghiet, mai: pa ang koe: bwanson: tid tix ka son pa yuh kaing ceu pa mhawm: heue:.

Simin Ting 2

Jhawm: pon mhawm: pui pa yumrhawm:

1 Viang mawh kawx nan:, maix krai grawh grawng: khankix ceu pa khaw: mai: lox gau pa mawh pa meh. 2 Yuh ka mawx son simex pa riex ju khankix sang mawh pa chix rien tix, mai: pa chix keud mhawm: mhawm:, mai: chix priex rhawm: tix, pa kaux cong: ka daux krax yumrhawm:, mai: ka daux krax moh, mai: ka daux krax gun krax yeung heue:. 3 Awm: an yuh ka mawx bon: riex ju khankix kawx sang mawh pa chix nab chix yam ka daux ceu pa yuh tix, mai: son ang kix sang mawh pui pa nieb bied tix krai grawng: pui, mai: siliex plai: plix siiet tom: nie, son sang mawh cao: gau ka ceu pa mhawm:, 4 yuh ka mawx son sang gau kix ka bon: pa awn: ju khankix, tix moh ka mex tix, mai: moh ka kawn: tix, 5 mai: son sang mawh pa chix keud tix priex rhawm: tix, pa singax singeh, pa chix yuh kaing nyiex tix, pa mhawm: rhawm:, mai: pa chix cu chix nghiet ka mex tix, yuh ka mawx son ang sang koe: dee sa lao ka gumlox Siyiex heue:. 6 Awm: an ka simex awn: ju khankix kawx gau son sang mawh kix pa chix keud tix priex rhawm: tix. 7 Ka daux ku ceu khawm: uik jhi: tix kieh tokaux tix mawh mhai: dee jawh ka grawng: pa mhawm: pa yuh tix, ka daux ceu pa gau maix, paw kieh koe: pa ang mhawm: pa sium:, kieh koe: rhawm: pa chix keud mhawm: mhawm:, 8 kieh lox pa diex pa gau maix mawh pa mawh pa meh, pa ang koe: dee deuh phimap kah, yuh ka mawx son kaw pa ang khaw: plak ex, sang hoek krax kaig krax tua kheu ang nawh koe: ceu pa caox tix ah grawng: ex heue:. 9 Jeeh nyaw ka pa mawh siliex khankix, son sang chix cu chix ot kix greem: cao: tix, mai: yuh ceu pa khaw: ka cao: kix ka daux ku ceu khawm: uik, paw vi kieh thiang:, 10 paw vi kieh briex tieh, viang mawh nan: kieh jhi: sijax pa mhawm: ka daux khawm: uik, yuh ka mawx son sang kieh kix ceu pa gau cie Siyiex, Cao: Taoh ex, koe: pa mhawm: grang ka dau ku ceu khawm: uik heue:. 11 Grawh grawng: nawh bwanson: Siyiex hoik lih bleeh, mai: viex krax taoh ka pui khawm: uik, 12 mai: gau ka ex, yuh ka mawx son sang thiang: ex tix tik ka ceu pa ang nab ang yam mai: pa ang khaw: ka Siyiex, mai: alo pa dex pa dawd mai: haktiex, mai: son sang chix keud tix priex rhawm: tix, mai: yuh pa rah pa see, mai: yuh pa nab pa yam mai: ceu pa khaw: ka Siyiex ka daux ju in heue:. 13 Mai: jhak son krax keud pot jun pot pa ting bwanson:, mai: pa lih bleeh min: plakngai: Siyiex pa ting pa mawh Yesux Khrit Cao: Taoh ex, 14 Kaw pa hoik tawx tokaux Tix son ex, yuh ka mawx son sang taoh Nawh ex khaing: daux phimap phigrham: khawm: uik, mai: yuh tix kieh pui tix ceu singax son sang mawh cie tokaux Tix, pa nied tix coca: tix yuh kaing pa mhawm: heue:.

15 Jeeh nyaw mai: sidiex gau ceu in khankix, viex siawp sibrawm khawm: uik tix ah kah heue:. Paw kieh pui tix kaux kawx nunai: ka maix awawx.

Simin Ting 3

Beeh glawm: pui pa yumrhawm:

1 Kieh kix doh keud kah, yuh ka mawx son sang chix ot kix greem: simiang giex kaing:, mai: pa koe: siawp sibrawm khankix, mai: son sang koe: krax chix cu chix nghiet, mai: son sang rien tix ka son kaing pa mhawm: ku ceu, 2 mai: son ang sang ah lox caox ka grawng: pui: tix kaux kawx, mai: son ang sang simah simaing:, viang mawh nan: son sang koe: rhawm: pa mhawm:, mai: son sang plak jhi: rhawm: pa awn: pa tiem ka pui khawm: uik heue:. 3 Grawh grawng: nawh, ex kawx hoik sax mawh pui pa daox pa aw: tix bawg, pa ang chix cu chix nghiet, pa hoik pie hoik lhen: kah, pa hoik yuh son alo nex nham: mai: krax gauxrhawm: ku ceu, mai: ot ka daux pa nieb keud tix yuh pui laux, mai: pa bohrhawm: bohrhi:, mai: pa chix koeng, mai: koeng ka paox tix tix kaux lai tix kaux heue:. 4 Viang mawh kawx nan: yam ceu pa mhawm: rhawm: Siyiex Cao: Taoh ex, mai: krax moh ka kawn: pui lih bleeh. 5 ang mawh kheu pa hoik yuh tokaux ex ka daux pa rah pa see, viang mawh nan: mawh kheu pa caoxrhawm: Nawh, Nawh hoik taoh ex, ka pa sigrhah pa dex pa dawd mai: ceu pa deeh keh, mai: ka Khwan: Singax Singeh deeh kieh mawh pa khraox, 6 pa hoik prauk Nawh Cao: lih ka piang ex tom: nie grum, ka daux Yesux Khrit Cao: Taoh ex, 7 yuh ka mawx son sang hoek ex ka krax rah krax see kheu bwanson: Nawh, mai: son sang mawh ex pui pa sang pon sin:, pa khaw: mai: krax keud pot jun pot son ju leeing: ju leeing: phan: heue:. 8 Lox in mawh pa kaux sijax, mai: aux simie tix kieh maix sidiex grawng: ceu in khankix mawh pa lung pa loi, yuh ka mawx son pui pa hoik yumrhawm: ka Siyiex khankix, tag rien rhawm: tix tix yuh kaing ceu pa mhawm: heue:. Ceu in khankix mawh pa mhawm:, mai: pa koe: bwanson: son kawn: pui heue:.

Tawx stix son kaing pa tieh lox been

9 Viang mawh kawx nan: via hu: khaing: lox chawk cheng: pa daox pa aw:, mai: ka grawng: ru ceucat pa ang jud ang jai khankix, mai: pa simah simaing:, mai: pa thung: thiang: ka grawng: lox lai been li, grawh grawng: nawh ceu an khankix mawh pa ang koe: bwanson:, mai: pa giex pa going heue:. 10 Pui pa yieh kieh pui ang khaw: gwieh paox tix, khaix hoik sidiex nawh tix bawg ra: bawg paw lai baox rieb nawh heue:. 11 Maix pon tix tawng grawng: pui pa yuh nan: hoik tieh tix lud hu: khaing: krax, mai: yuh phimap phigrham:, viang tokaux nawh kawx hoik deuh phimap kah tiru.

Lox ghoik

12 Yam ploi: aux Atemax phan: ang mawh nan: Tukhik hu: ka maix, coca: tix hoek ka aux ka veng Nikawpolix, mawh kheu hoik bak aux tix ot tan: yam kuat heue:. 13 Nied tix coca: teem: Zenax pa mawh cao: gau lai been li, mai: Apawlux, son krax sang hu: kiex, yuh ka mawx son ang kiex lai sang taik sang cud tix ceu kawx heue:. 14 Mai: kieh pui ex khankix gau tix yuh ceu pa mhawm: jheeng: jheeng:, son sang koe: pa shiao kix, son ceu pa lo khankix, yuh ka mawx son ang kix sang mawh pa ang plix plix heue:. 15 Can pui pa ot mai: aux khawm: uik nawb ka maix heue:. Nawb ka kix pa moh ka ex daux krax yumrhawm: awawx. Kieh bwanson: ot mai: pex khawm: uik liak.