Yakop

Yakop

Simin Ting 1

Pa cheuk cheu: ka krax yumrhawm:

1 Yakop, pa mawh siliex Siyiex mai: Simiang Yesux Khrit tawx lox nawb hu: ka pui kao: ceu ra: pa hoik prung: prang: roi rhuat ku dah ku dee heue:.

2 Puxaik aux khankix eue:, yam pex yaox krax nyaw krax glaw: miex ceu, sawn: khawm: uik mawh pa gauxrhawm:, 3 mawh kheu tawng pex grawng: ceu pa cheu: tix yaox krax yumrhawm: pex, tag baox yuh tix kieh koe: pa gun pa yeung heue:. 4 Mai: kieh pa gun pa yeung yuh kaing tix tom: grum naog, yuh ka mawx son sang grum naog grum mhawm: pex, mai: ang koe: dee taik dee cha: heue:.

5 Phan: pex tix kaux kaux kawn: taik kawn: cud pingnya cuyi, kieh nawh rawg ka Siyiex, pa koe: rhawm: sibieh tix tawx ka pui khawm: uik, mai: pa ang chix map, mai: tag sang tawx ka nawh heue:. 6 Viang mawh nan: kieh nawh rawg ka daux krax yumrhawm:, mai: paw keud jee keud blaong, mawh kheu kaw pa keud jee keud blaong awm: puk pak rawm: sigrit sigra: pa phliah bhaung: hu: pa pukpliak lunglhiang: heue:. 7 Pui pa yuh nan:, paw kieh nawh ce: tix sang pon tix ceu kawx khaing: Siyiex. 8 Pui pa koe: rhawm: ra: mu: ang kaux ang cong: ka krax can pa yuh tix khawm: uik heue:.

9 Kieh puxaik pa tiem yaw mai: gauxrhawm:, ka pa hoik yaog nawh ting. 10 Viang mawh nan: kieh pa mi pa koe:, yaw mai: gauxrhawm: ka pa hoik yuh nawh tiem, mawh kheu nawh tag sang grai: hu: awm: tai rib tai riem heue:. 11 Grawh grawng: nawh yam uik lih singaix mai: kied hax koek, rib an vhit mai: kroh hu:, mai: tai nawh cia, mai: pa mhawm: grang nawh laux heue:. Awm: an pui pa mi pa koe:, tag sang laux sang grai: ka daux krax pa yuh tix heue:.

12 Pui pa chix kham: ka pa nyaw pa glaw: ting bwanson: heue:. Grawh grawng: nawh khaix hoik cheu: tix yaox ka nawh, nawh tag sang pon mhok khri: pa im: ju, pa Siyiex hoik deuh lox mukheu tix sang tawx ka pui pa moh ka Nawh khankix heue:. 13 Yam yaox nawh krax nyaw krax glaw:, paw kieh pui ah tix kaux kawx, "Mawh Siyiex pa nyaw pa glaw: aux." Mawh kheu Siyiex ang chix nyaw chix glaw: ka pa caox, mai: tokaux Nawh ang nyaw ang glaw: ka pui tix kaux kawx heue:. 14 Viang mawh kawx nan: yam kaux pui mawx kaux pui an yaox tix kham: krax nyaw krax glaw:, hoik mawh kheu alo nex nham: tokaux tix, pa nyaw mai: bluh nawh hu: heue:. 15 Mawh kheu nan:, yam alo nex nham: hoik nghe:, yam keh lih phimap phigrham:, mai: phimap yam uik die hwan: nawh viex lih krax yum heue:. 16 Puxaik pa moh aux khankix eue:, paw kieh pie lhen: ka pex. 17 Khawngphak pa mhawm: mai: pa grum ku ceu kaoh khaing: dee long:, mai: lih hoek khaing: Keeing: pa riang, pa ang chix siyox, mai: ang koe: veei pa tie heue:. 18 Nawh teei gumlox pa mawh pa meh, yuh tix kieh ex keh tix mawh awm: koe: alo Nawh, son sang mawh ex, plix pa liang tix plix370 ka daux ceu pa hoik phan: hoik yuh Nawh khankix heue:.

19 Puxaik pa moh aux khankix eue:, pex hoik tawng grawng: in, viang mawh kawx nan:, kieh pui ku kaux nied tix mhong: laung laung, mai: kieh briex koi sikah, mai: paw kieh hax songrhawm: heue:. 20 Grawh grawng: nawh, pa songrhawm: songrhi: pui, ang chix yuh pa rah pa see Siyiex heue:. 21 Mawh kheu nan: tik pa seeing: pa brai: ku ceu khawm: uik, mai: pa chax nie luan yuh pa caox, mai: viex rhawm: awn: rhawm: tiem mai: rieb tix teei gumlox pa hoik sum: ka daux pex, pa chix taoh ju pex heue:. 22 Mai: kieh mawh pui pa hawt yuh gumlox, mai: paw kieh mawh ngie pa mhong: giex, pa pie pa lhen: ka tokaux tix heue:. 23 Mawh kheu phan: tix kaux kaux pa mhong: gumlox, mai: ang mawh pa hawt tix yuh, nawh awm: pui tix kaux pa yaox pakngai: rieang pakpeung tix ka daux siliak. 24 Grawh grawng: nawh khaix hoik jhak hoik yaox nawh tokaux tix, nawh lih hu: krax hu: tix, mai: dom: mawx dom: an nawh piawm: grawng: mawh nawh pui yaung pa yuh ka mawx heue:. 25 Viang mawh kawx nan: pui mawx ang ah, pa jhak ka daux been li pa grum mhawm: pa chix kieh luan, mai: pa kawn: ca: yuh nan:, mai: ang mawh pui pa mhong: mai: piawm, viang mawh nan: pa mawh pui pa hawt yuh, pa yuh kaing, pui an tag sang pon bwanson: ka daux pa yuh tix heue:. 26 Ka daux pex phan: pui tix kaux kaux, ce: tokaux tix mawh pui pa keud plak been bwan:, mai: ang chix rien chix thox dak tix, nawh pie lhen: ka rhawm: rhi: tokaux tix, pa keud pui an plak bwanson: mawh pa giex pa going heue:. 27 Ceu pa hawt yuh plak been bwan: pa singax, pa ang kawb pa seeing: pa brai: sivoe Keeing: ex mai: Siyiex mawh nin:. Mawh pa hu: kia: ka kawn: doe: mai: miexmai khankix, ka daux krax kharhawm: kharhi: kix, mai: ceu pa chix priex tokaux tix kieh luan khaing: pa kawb pa seeing: pa brai: haktiex heue:.

Simin Ting 2

Krax yuh phimap pa ang rah ang see ka pui

1 Puxaik aux khankix eue:, paw giex ka krax yumrhawm: ka daux Simiang ex Yesux Khrit, pa mawh Simiang pa ting min: plakngai: tau mai: pa chix jhak ka pakngai: pui. 2 Mawh kheu phan: pui tix kaux pa ceep jeep giien khri:, mai: ceep kraung pa jiet mhawm:, mai: phan: pui tang: kaux tix kaux pa hot pa sibhawm: pa ceep kraung pa seeing: pa brai: kawx hoek ka daux nyiex sidiex pex, 3 mai: pex nab yam ka kaw pa ceep kraung pa jiet mhawm: an, mai: ah nin:, "Ngawm ka daux dee ngawm pa mhawm: tin: heue:." Mai: pex ah ka pui pa hot pa sibhawm: an, "Maix cung tan:, phan: ang mawh nan:, ngawm greem: ngot dee deuh aux caong tix heue:." 4 Pex yuh pa tang: pa siyox ka daux sinax pex, mai: lih mawh cao: prawng cao: ca:, pa keud pa caox pa ang mawh ang meh, ang mawh lie? 5 Puxaik pa moh aux khankix eue:, nghiet heue:, Siyiex hoik laug pui pa hot pa sibhawm: plak haktiex, tix kieh kix mawh pa mi pa koe: plak krax yumrhawm:, mai: pa pon sin: Meung an, pa hoik tawx Nawh lox mukheu tix tawx ka kix pa moh ka Nawh ang mawh lie? 6 Viang mawh nan: pex hoik nieb thang: yuh ka pui hot pui sibhawm: heue:. Pui pa mi pa koe: khankix, mawh pa khin: pex mai: reu: pex hu: sivoe dee ngawm tix prawng tix ca:, khankix ang mawh lie? 7 Kix sa lao ka Ceukaux pa koe: cee, pa hoik kok pex kah, ang mawh lie? 8 Viang mawh nan: phan: pex priex tix hawt lox lai been li Simiang awm: pa koe: ka daux phuk lai sigang: khri:, pa ah nin:,

371"Maix tag moh paox plawg paox nyhawm: tix, awm: moh maix tokaux tix,"

pex hoik yuh mhawm: heue:. 9 Viang mawh kawx nan: phan: pex jhak ka pakngai: pui, pex mawh pa yuh phimap phigrham:, mai: lox lai been li jhi: sidawng: grawng: mawh pex pui pa lheu: lox heue:. 10 Mawh kheu pui mawx ang ah, pa priex tix hawt lox lai been li khawm: uk, mai: kawn: phit ka tix ceu ngie, nawh lak lih mawh pa phit ka khawm: uik heue:. 11 Grawh grawng: nawh, Kaw pa hoik ah,

372"Paw phit paw vao,"

pa yuh nin: kawx baox ah,

"paw teei pui yum."

Viang maix ang phit ang vao kawx, phan: maix teei pui yum, mai: hoik mawh pa lheu: lox ka lox lai been li heue:. 12 Mawh kheu nan: pex sikah mai: yuh awm: pui pa tag sang prawng sang ca: ka lox lai been li pa chix kieh luan heue:. 13 Grawh grawng: nawh kaw pa ang koe: krax caoxrhawm:, tag ang pon krax caoxrhawm: yam prawng yam ca: ka nawh. Krax caoxrhawm: chix pex krax prawng krax ca: heue:.

Krax yumrhawm: mai: krax twah krax klaung:

14 Puxaik aux khankix eue:, phan: pui tix kaux kaux ah koe: krax yumrhawm: tix, viang mawh nan: ang koe: krax twah krax klaung: chix koe: bwanson: yuh ka mawx, krax yumrhawm: an chix taoh nawh lie? 15 Phan: puxaik, phan: ang mawh nan:, nan: tix kaux kaux ang yaox tix ceep kraung, mai: ang kub pa ih pa un: son tix ngaix hoik tix ngaix, 16 mai: phan: pex tix kaux kaux lai ah nin: ka kix, "Hu: mhawm: mhawm:, kieh pex si:u: mai: sak heue:." Maung pa lo kix son tokaux kix kawx pex ang tawx, chix koe: bwanson: yuh ka mawx? 17 Awm: an krax yumrhawm:, phan: nawh ang koe: krax twah krax klaung:, hoik yum ka daux tokaux tix tiru heue:. 18 Ha pui tix kaux kaux ah nin:, "Maix koe: krax yumrhawm:, mai: aux koe: krax twah krax klaung:," jhi: aux yaox krax yumrhawm: maix pa ang koe: krax twah krax klaung:, mai: aux tag jhi: maix yaox krax yumrhawm: aux, ka pa twah pa klaung: heue:. 19 Maix yumrhawm: grawh grawng: pa koe: Siyiex tix kaux khaing:, pa hoik yuh maix mhawm: heue:. Phicaox khankix kawx yumrhawm: mai: siyaung: sikua tix heue:. 20 Pui pa nieb keud nieb ce: eue:, maix tag chix tawng grawh grawng: krax yumrhawm: pa ang koe: krax twah krax klaung: mawh pa yum lie? 21 Keeing: ex Abraham pon pa rah pa see kheu krax twah krax klaung: pa yuh tix, yam hoik tan kawn: simex tix Icak piang khu: dee tan ang mawh lie? 22 Ang maix pon yaox grawng: krax yumrhawm: hoik yuh tau mai: krax twah krax klaung: pa yuh nawh, mai: mawh kheu krax twah krax klaung: krax yumrhawm: hoik grum naog grum mhawm: lie? 23 Mai: phuk lai sigang: khri: pa ah nin: hoik naog,

373"Mai: Abraham yumrhawm: ka Siyiex, mai: hoik sawn: tix mawh pa rah pa see son nawh, mai: hoik kok nawh mawh paoxgrawm Siyiex heue:."

24 Mawh kheu nan: pex pon tix yaox, grawh grawng: pui pon tix hoek krax rah krax see kheu krax twah krax klaung: pa yuh tix, mai: ang mawh ngie kheu krax yumrhawm: nong: nong: heue:. 25 Awm: an Rahap bon: pa coh kaux kawx hoik pon pa rah pa see ka ceu pa yuh tix, yam rieb nawh tix teei pui cau pui soi: khankiex, mai: ploi: kiex hu: krax tang: nyaing, ang mawh lie? 26 Grawh grawng: nawh awm: tokaux pa ang koe: khwan: hoik yum, awm: an krax yumrhawm: pa ang koe: krax twah krax klaung: kawx hoik yum heue:.

Simin Ting 3

Dak mawh ngu

1 Puxaik aux khankix eue:, paw phex yuh cao: gau tom: nie, kheu pex hoik tawng, grawng: ex tag sang nie blon: pon pa prawng pa ca: heue:. 2 Mawh kheu ex khawm: uik sideeing caong ka tom: nie ceu heue:. Phan: pui tix kaux kaux ang sax lud lox ah sikah krai, kaw an mawh pui pa grum mhawm:, mai: pa chix pex khawm: tokaux tix khawm: uik heue:. 3 Phan: ex sau: keu: ka daux jheeh brung, son sang cu kix ka ex, ex pon kieh veeh khawm: tokaux kix khawm: uik heue:. 4 Jhak ka khawm: reu khankix heue:, viang kix kied ting niex ding niex dod, mai: bhaung: ting bhaung: caox phlu: kix kawx, chix kieh kix veeh kheu khaoxsaoh sidax reu pa kied iak, dee cao: kia: sidax reu koe: rhawm: tix sang kieh hu: heue:. 5 Awm: an dak mawh pa iak ka daux kraung pakpeung tokaux kawx, jiet chix yaw chix bied heue:. Jhak heue:, ngu iak ceeix khaing: chix kieh khix374 niex ding gleeing heue:. 6 Dak kienie, mawh ngu, mai: mawh haktiex phimap phigrham: heue:. Dak kawx awm: an ka sinax kraung pakpeung tokaux ex, mai: nawh kieh khawm: tokaux tix khawm: uik seeing: brai:, mai: kieh ling: alo nex nham: khawm: uik rup lawk ngu, mai: ngu mawnarhok kieh dak an rup heue:. 7 Grawh grawng: nawh totiag totu can pa koe: ku ceu, mai: sim: khankix, mai: siuing: mai: pa chix mo hu: khankix, mai: khawm: ceu pa koe: ka daux rawm: sigrit sigra: khawm: uik, chix kieh nge, mai: kawn: pui hoik sax yuh kieh nge heue:. 8 Viang mawh nan: dak kienie, pui tix kaux kawx ang chix kieh nge. Dak mawh pa caox pa ang chix gau chix pheuk, mai: pa naog ka pa awp pa chix kieh yum heue:. 9 Ex teei dak tix mai: yaogyaw ka Simiang mai: Keeing: Cao: mai: ex teei dak tix lawg jhax ka kawn: pui pa hoik yuh yaung Siyiex heue:. 10 Ka daux jheeh tix mu: khaing: lih lox pa yaogyaw mai: khawm: pa lawg pa jhax heue:. Puxaik aux khankix eue:, ang khaw: tix mawh nan:. 11 Daux rawm: keut tix daux, chix lih rawm: pa nyawm mai: khawm: rawm: pa song: tix dom: neh lie? 12 Puxaik aux khankix eue:, khaox ruh chix lih tix plix, plix sanlun lie? Phan: ang mawh nan: nhu: plix siiet chix lih tix plix, plix ruh lie? Awm: an rawm: kih pa khien:, ang chix tix lih mawh rawm: pa nyawm heue:.

Pingnya cuyi pa hoek khaing: dee long:

13 Ka daux pex kaux pui mawx, mawx pa koe: pingnya cuyi, pa chix tawng chix yung? Kieh nawh jhi: ka daux ceu pa yuh tix pa mhawm:, pa awnrhawm: awnrhi: ka pingnya cuyi heue:. 14 Viang mawh nan: phan: pex koe: pa bohrhawm: mai: pa ang khaw: paox tix daux rhawm:, paw yaw rangdi ka tokaux tix, mai: pie lhen: ka pa mawh pa meh. 15 Pingnya in ang mawh pa lih hoek khaing: dee long:, viang mawh nan: mawh pa dex pa dawd mai: haktiex, mawh alo nex nham:, mai: phicaox phicaig heue:. 16 mawh kheu dee koe: pa bohrhawm:, mai: pa ang khaw: paox tix, koe: pa cuci:, mai: pa yuh ceu pa caox pa caig ku ceu heue:. 17 Viang mawh nan: pingnya pa kaoh khaing: dee long: phaoxka: tix ceu mawh pa singax singeh, lheu: khaing: an pa chix ih chix khaw: paox tix, mai: pa awnrhawm: awnrhi:, mai: ceu pa yie tix gau tix glaw:, pa naog ka pa caoxrhawm: mai: plix pa mhawm: khankix, pa ang jhak ka pakngai: pui tix yuh tang: siyox, mai: pa ang koe: pa pie pa lhen: heue:. 18 Simie ceu pa rah pa see khankix, mawh pa kix pa chix yuh pa nhim:, rhuat ka daux pa nhim: heue:.

Simin Ting 4

Singai khaing: krax pa caox

1 Sinax pex krax naing mai: krax simah simaing: kaoh khaing: dee mawx? Kaoh khaing: alo nex nham: pex, pa koe: krax naing sinax kraung pakpeung tokaux tix, ang mawh lie? 2 Pex koe: krax lhawk mai: ang lai koe:, pex teei pui yum, mai: pex simie tix cie mai: ang chix pon, pex koe: krax simah simaing: mai: krax naing, viang mawh nan: pex ang pon, mawh kheu ang pex rawg heue:. 3 Pex rawg mai: ang pon, mawh kheu pa rawg pex pa ang khaw:, yuh ka mawx son sang shiao ka son alo nex nham: tix heue:. 4 Pex pa mawh bon: pa ang kaux sijax, pa phit pa vao khankix eue:, ang pex tawng pa yuh paox pie, pa dex pa dawd mai: haktiex, mawh ceu pa koeng ka Siyiex lie? Mawh kheu nan: pui mawx ang ah, pa yuh paox pie ka haktiex, yuh tix kieh tokaux tix mawh pa koeng ka Siyiex heue:. 5 Pex keud ce: phuk lai sigang: khri: pa ah nin:, "Khwan: Cao: pa hoik kieh Nawh ot ka daux ex, mawh pa koe: rhawm: pa sang ghoing ka lie?" pa ah nan: mawh pa giex pa going lie? 6 Viang mawh nan:, Nawh nie blon: tawx bwanson: heue:. Mawh kheu nan: phuk lai sigang: khri: ah nin:,

375"Siyiex tieb tie ka pui ting rhawm: canyhau: khankix, viang mawh nan: Nawh tawx bwanson: ka pui pa tiemrhawm: tiemrhi: khankix heue:."

7 Mawh kheu nan: pex cu pex nghiet ka Siyiex, viang mawh nan: tieb tie ka phicaox, mai: nawh tag to: hu: khaing: pex heue:. 8 Greed tix hoek dex ka Siyiex, mai: Nawh Cao: tag greed tix hoek dex ka pex heue:. Pui pa koe: phimap phigrham: khankix eue:, kieh taix pex khankix singax heue:. Mai: pex pa koe: rhawm: ra: mu: khankix eue:, kieh rhawm: pex singax singeh heue:. 9 Kieh koe: krax kharhawm: kharhi:, mai: krax khirhawm: khirhi:, mai: yiem riag yiem yo heue:. Kieh krax nyiah pex deeh tieh tix mawh pa khirhawm: khirhi:, mai: kieh krax gauxrhawm: gauxrhi: pex, deeh tieh tix mawh krax voi rhawm: voi rhi: heue:. 10 Yuh tokaux pex tiem sivoe Simiang, mai: Nawh tag yaog pex ting heue:.

11 Puxaik khankix eue:, paw krai lox deuh phimap grawng: paox tix heue:. Kaw pa ah lox deuh phimap ka puxaik, phan: ang mawh nan: pa prawng pa ca: ka puxaik tix, nawh ah lox deuh phimap ka lox lai been li, mai: prawng ca: ka lox lai been li heue:. Viang maw kawx nan: phan: maix prawng ca: ka lox lai been li, maix ang mawh pui pa hawt yuh lox lai been li, viang mawh nan: mawh cao: prawng cao: ca: heue:. 12 Cao: pa tawx lox lai been li, mai: Cao: Prawng Cao: Ca: koe: tix kaux khaing:, pa mawh Kaw pa chix taoh mai: pa chix yieh yuh laux heue:. Viang mawh nan: maix phex mawh pui pa yuh ka mawx, pa prawng pa ca: ka paox plawg paox nyhawm: tix?

13 Pex pa ah, "Singaix, phan: ang mawh nan:, pasax, ex tag sang hu: ka daux veng an mai: ot tan: tix num, mai: yuh lai geu son sang pon rao tix kah," khankix eue:, nghiet ha:. 14 Pex ang tawng grawh grawng: ceu pa tag sang mawh pasax heue:. Ju pex mawh pa yuh ka mawx? Grawh grawng: nawh pex mawh awm: taox simawg pa sidawng: tivud khaing:, mai: deeh grai: khaix heue:. 15 Mawh kheu nan: pex khaw: tix ah nin:, "Phan: Siyiex koe: alo, ex tag pon tix im: ju, mai: yuh nin:, phan: ang mawh nan:, yuh nan: heue:." 16 Viang mawh kawx nan: yamin pex yaw rangdi ka daux pa bied tix, ceu pa yaw rangdi tix yuh nan: khawm: uik mawh pa caox heue:. 17 Mawh kheu nan: kaw pa tawng tix yuh ceu pa mhawm:, mai: ang yuh ceu an, mawh phimap ka son nawh heue:.

Simin Ting 5

Tawx stix ka pui pa mi pa koe:

1 Pui pa mi pa koe: khankix eue:, hoek yamin, mai: yiem grai mai: riag yo, kheu ceu pa kharhawm: kharhi: khankix pa tag sang hoek ka piang pex heue:. 2 Sin: ngao pex hoik sium: hoik rham:, mai: kraung ceep pex khankix pungpieang siah hoik ih nyao: heue:. 3 Mau khri: pex hoik haok tai hoik rhaw: mai: rhaw: an tag mawh sakse: pa deuh phimap ka piang pex, mai: tag sang ih nex pex awm: ngu heue:. Pex hoik pum: hoik deuh sinngao ka daux singaix ghoik khaix khankix heue:. 4 Jhak heue:, mau riang pui pa hoik vawg ma: kaung: pex, pa pex hoik nieb pie tix ang tawx, kok yo heue:. Mai: lox yo pui vawg khankix, hoik laig ka yhaok Simiang cub kru naing raoma: heue:. 5 Pex hoik pon ot mhawm: mhawm: ka piang haktiex, mai: hoik thang: pon yuh krax gauxrhawm: pex. Pex hoik khankheu: ka rhawm: rhi: tix, ka daux singaix teei yum heue:. 6 Pex hoik prawng ca:, mai: pex hoik teei yum ka Kaw pa rah pa see. Nawh ang tieb ang tie pex kah heue:.

Krax jeeh nyaw

7 Mawh kheu in puxaik khankix eue:, gun yeung tom: deeh hoek Simiang heue:. Jhak ka pui yuh ma: kaung: pa krox pa jun son plix haktiex pa ngawh, pa chix gun chix yeung son plix an, tom: hoik pon rawm: lhiex cao mai: lhiex lha: heue:. 8 Pex kawx kieh koe: krax gun krax yeung, mai: kieh rhawm: pex kaux cong: heue:. Mawh kheu bawg yam sang hoek Simiang dex hoek heue:. 9 Puxaik khankix eue:, paw vi sa ka paox tix, yuh ka mawx son ang pex sang hoek krax prawng krax ca:. Jhak heue:, Cao: Prawng Cao: Ca: hoik ot sivoe siviex khankix heue:. 10 Puxaik aux khankix eue:, teei grawng: ceu pa kham: pa geu:, mai: pa chix gun chix yeung cao: jhai: khankix, son sang mawh dee hawt jawh tix yuh. 11 Jhak heue:, ex kok kix pa hoik kham: hoik geu: khankix mawh pa ting bwanson:. Pex hoik mhong: grawh grawng: pa chix gun chix yeung Yawbax, mai: hoik pon yaox pa hoik yuh Simiang ka nawh yam sidah, mai: hoik yaox grawh grawng: pa grum naog Simiang ka krax caoxrhawm: saik rhawm: heue:.

12 Puxaik aux khankix eue:, ka piang ku ceu khawm: uik, paw tiex paw tu heue:, paw tiex paw tu ka raoma:, viang ka haktiex kawx paw tiex paw tu kah, mai: paw tiex paw tu ka tang: ceu tix ceu kawx. Viang mawh kawx nan: son ang pex sang laig greem: krax prawng krax ca:, phan: mawh ceu pa mawh, ah "mawh heue:," phan: mawh ceu pa ang mawh, ah, "ang mawh heue:."

13 Ka daux pex koe: tix kaux kaux pa yaox tix kham: geu: krax kharhawm: kharhi: lie? Kieh nawh rawg bwan: heue:. Koe: tix kaux kaux pa nyawmrhawm: nyawmrhi: lie? Kieh nawh rhax lai yaogyaw heue:. 14 Koe: pui saux ka daux pex tix kaux kaux lie? Kieh nawh kok kuad ceucao khankix, mai: kieh kix groi rawm: bee ka nawh, mai: rawg bwan: ka piang nawh ka daux ceukaux Simiang heue:. 15 Mai: lox rawg bwan: pa koe: krax yumrhawm:, tag sang taoh kaw pa saux an, mai: Simiang tag sang kieh nawh kaoh, mai: phan: nawh hoik yuh phimap phigrham:, tag sang pluat ploi: phimap nawh heue:. 16 Mawh kheu nan: krai doh grawh grawng: phimap pex ka paox tix tix kaux hoik tix kaux, mai: rawg bwanson: paox tix tix kaux hoik tix kaux son sang deeh moi: nyawm ot pex heue:. Lox rawg bwan: pui pa rah pa see koe: sibrawm mai: ting bwanson: ka daux pa yuh kieh mawh heue:. 17 Eliyax viang mawh nawh kawn: pui pa koe: krax keud krax sawn: awm: ex kawx, nawh rawg bwan:, son ang lhiex sang lih, mai: lhiex ang lai lih son loe: num mai: liah khix heue:. 18 Mai: nawh baox deeh rawg bwan: tix bawg, mai: raoma: tawx lhiex lih, mai: haktiex deeh chix kieh plix plix nawh heue:.

19 Puxaik aux khankix eue:, ka daux pex phan: tix kaux kaux lud loe: khaing: krax pa mawh pa meh, mai: tix kaux kaux deeh viex nawh hoek, 20 kieh nawh tawng grawh grawng: kaw pa deeh kieh pui koe: map koe: grham: tix kaux, deeh tieh tix hoek khaing: krax lud krax loe: tix, tag sang taoh ju tix mu:, khaing: krax yum, mai: tag sang tawb kheem: phimap pa haoh pa hun: heue:.