Yohan
Lai Yohan
Simin Ting 1
Khrit mawh Siyiex
1 Yam jah koe: Gumlox, Gumlox an ot mai: Siyiex, Gumlox an mawh Siyiex heue:. 2 Yam jah Nawh ka ot mai: Siyiex. 3 Pa koe: ku ceu ku cawng koe: kheu yuh Nawh, mai: pa koe: pa ang Nawh yuh ang koe: tix ceu kawx heue:. 4 Ka daux Nawh koe: Ju Pa Im:, mai: Ju Pa Im: an mawh Pa Riang kawn: pui heue:. 5 Mai: Pa Riang an ca: jhan: riang ka daux pa vhaik, mai: pa vhaik ang chix pex chix keih Pa Riang an yeet heue:.
Yohan cao: comrawm: kham: sakse: son pariang
6 Pui lih hoek tix kaux, pa hoik ploi: hoek khaing: Siyiex, mai: ceukaux nawh mawh Yohan heue:. 7 Nawh hoek tix mawh cao: kham: mhai: sakse:, son sang pon nawh tix kham: mhai: sakse: grawh grawng: Pa Riang, yuh ka mawx son sang yumrhawm: pui khawm: uik kheu nawh heue:. 8 Nawh ang mawh pa riang, viang mawh nan: nawh hoek tix kham: mhai: sakse: grawh grawng: Pa Riang heue:. 9 Pa Riang tete telai, pa chix tawx pa riang ka kawn: pui ku kaux daux pui, uik hoek piang haktiex heue:. 10 Nawh hoik ot ka piang haktiex, mai: haktiex in mawh pa yuh Nawh, viang mawh kawx nan: haktiex in ang tawng ka Nawh heue:. 11 Nawh hoek ka cie Nawh, mai: kix pa mawh cie Nawh ang rieb Nawh. 12 Viang mawh kawx nan:, ka pui pa rieb ka Nawh mai: pui pa yumrhawm: ka ceukaux Nawh khankix Nawh tawx siawp sibrawm tix sang mawh kawn: Siyiex heue:. 13 Kix keh kheu nham: ang mawh, kheu alo nex ang mawh, kheu alo kawn pui ang mawh, mawh kheu Siyiex heue:.
Gumlox hoik lih mawh nex
14 Gumlox an hoik lih mawh Nex, mai: ot sinax ex, mai: ex pon yaox min: plakngai: Nawh, pa awm: min: plakngai: Kawn: Keeing: Cao: tix kaux khaing:, pa naog bwanson: mai: pa mawh pa meh heue:. 15 Yohan kham: mhai: sakse: grawh grawng: Nawh mai: kok yo ah nin:, "In mawh Kaw pa krai aux, 'Kaw pa tag sang hoek khaix aux nie ting khaing: aux, kheu hoik dawg koe: Nawh ka: aux heue:.'" 16 Mawh kheu pa naog daux Nawh, ex khawm: uik hoik pon, bwanson: piang bwanson: heue:. 17 Grawh grawng: nawh, lox lai been li hoik tawx ka Mose, bwanson: mai: pa mawh pa meh hoik lih hoek kheu Yesux Khrit heue: 18 Yam mawx ang ah, pui ang sax yaox Siyiex tix kaux kawx. Kawn: Cao: tix kaux khaing: pa ot piang naok Keeing: Cao:, mawh pa hoik plak kieh tawng Nawh heue:.
Mhai: sakse: pa kham: Yohan cao: comrawm:
19 In mawh mhai: sakse: pa kham: Yohan, yam ploi: pui Yudax cao: giex kaing: li kix mai: pui Lewix khankix hu: khaing: veng Yerusaliem tix sang chawk ka nawh, "Maix mawh mawx?" 20 Yohan ang pie ang lhen: krai sidawng: ah nin:, "Aux ang mawh Cao: Khrit." 21 Mai: kix baox chawk nawh, "Phan: mawh nan: maix mawh pa yuh ka mawx? Maix mawh Eliyax lie?" Mai: nawh baox ah nin:, "Aux ang mawh." "Maix mawh Cao: Jhai: an lie?" Nawh baox deeh pawk lox in, "Ang mawh heue:." 22 Kix baox ah nin: ka nawh, "Maix mawh mawx? Krai ka ex liak, son sang koe: ex lox tix sang krai ka pui pa ploi: ex hoek. Sang ah maix ka grawng: tokaux tix ka mawx?" 23 Nawh baox ah nin:, "Aux mawh,
129'Lox pa kok pa yo daux tiag daux tu, kieh krax Simiang rah see heue:.'
Awm: lox pa hoik krai cao: jhai: Isayax." 24 Pui pa kix hoik ploi: hoek khankix mawh Pharishie:. 25 Mai: kix baox chawk ka nawh ah nin:, "Phan: maix ang mawh Cao: Khrit, mai: ang mawh Eliyax, mai: ang mawh Cao: Jhai: an, yuh pa tix maix baptis130 pui ka rawm:?" 26 Yohan baox pawk lox ah nin:, "Aux baptis C ka daux rawm: heue:, viang mawh kawx nan: koe: Kaw pa ot greung pex tix kaux, pa ang pex tawng. 27 Mawh Nawh heue:, pa hoek khaix aux, pa nie ting khaing: aux, pie maox kiep Nawh ang aux keung: tix kah." 28 Ceu in mawh pa yuh daux yaong: Betanix, plak toi: rawm: Yawdan ka dee baptis C Yohan heue:. 29 Singaix pasax Yohan yaox Yesux hoek ka nawh, mai: ah nin:, "Jhak heue:, Kawn: Yung: Siyiex pa teei phimap phigrham haktiex hu:. 30 Nawh mawh pa hoik krai aux, 'Kaw pa tag sang hoek khaix aux nie ting khaing: aux, kheu hoik dawg koe: Nawh ka: aux heue:.' 31 Aux ka: ang tawng Nawh, viang mawh kawx nan: son sang tawng pui Isarilax ka Nawh aux tom: hoek tix baptis D heue:." 32 Yohan kham: mhai: sakse: ah nin:, "Aux hoik yaox Khwan: Cao: lih khaing: raoma: awm: sikaux mai: tum: piang Nawh. 33 Aux ka: ang tawng Nawh, viang mawh kawx nan: Kaw pa ploi: aux hoek tix baptis E hoik ah nin: ka aux, 'Piang mawx ang ah, Kaw pa yaox maix Khwan: Cao: lih tum: mai: ot piang Nawh, Kaw an mawh cao: baptis 131 ka daux Khwan: Singax Singeh heue:.' 34 Ceu in aux hoik yaox, mai: aux kham: mhai: sakse: grawng: mawh Nawh Kawn: Siyiex heue:."
Yam jah Yesux tix kok ka kawncau Tix
1:40-42 koe: daux lai Mth. 4:18-22; Makux 1:16-20; Lukax 5:2-11
35 Singaix pasax Yohan baox deeh cung tau mai: kawncau nawh ra: kaux. 36 Nawh jhak yam hu: Yesux mai: ah nin:, "Jhak ka Kawn: Yung: Siyiex heue:." 37 Mai: kawncau ra: kaux an mhong: lox pa ah nawh, mai: kiex hawt Yesux heue:. 38 Yesux deeh gi mai: yaox kiex hawt Nawh mai: ah nin:, "Sawg pax patix?" Mai: kiex ah nin: ka Nawh Cao:. "Rabi eue:, (Pa ah Rabi dee bleeh mawh Sara Cao: Gau) ot Maix dee mawx?" 39 Nawh baox ah nin: ka kiex, "Hoek mai: pax tag sang yaox heue:." Mawh kheu nan: kiex hu: mai: yaox dee ot Nawh Cao:, mai: kheu hoik hoek bawg yam kao: nari132singaix an kiex tom ot mai: Nawh heue:. 40 Daux kiex ra: kaux pa mhong: lox krai Yohan mai: hawt khaix Nawh Cao:, tix kaux mawh Andare pux Simon Petrux. 41 Ka: sivoe nawh sawg puxke: nawh Simon mai: ah nin: ka nawh, "Ex hoik yaox Misiyax." (Pa ah Misiyax dee bleeh mawh Cao: Khrit). 42 Nawh viex nawh hoek ka Yesux heue:. Yesux jhak ka nawh mai: ah nin:, "Maix mawh Simon kawn: Yonax, tag sang kok maix mawh Kephax heue:." (Dee bleeh Kephax mawh Petrux, mai: dee bleeh Petrux mawh Rang:.)
43 Singaix pasax Yesux koe: rhawm: tix hu: daux Meung Galilie:, mai: Nawh Cao: yaox Philipux mai: ah nin: ka nawh, "Hawt Aux heue:." 44 Philipux mawh pui Biesedax veng dee ot Andare mai: Petrux heue:. 45 Philipux sawg mai: yaox Nasanilax, mai: ah nin: ka nawh, "Ex hoik yaox Kaw pa hoik tiem: Mose grawh grawng: Nawh ka daux lai been li mai: pa cao: jhai: khankix kawx hoik tiem: grawh grawng: Nawh, pa mawh Yesux kawn: Yosiep pui veng Nazariet heue:." 46 Mai: Nasanilax baox chawk ah nin: ka nawh, "Ceu pa mhawm: pa mhiem: chix lih ka daux veng Nazariet tix ceu ceu lie?" Philipux baox ah nin: ka nawh, "Hoek tix jhak heue:." 47 Yesux yaox pa hoek Nasanilax ka Tix mai: ah nin:, "Jhak heue:, pui Isarilax tete, pa ang chix pie chix lhen:." 48 Nasanilax chawk ah nin: ka Nawh Cao:, "Maix tawng aux yuh ka mawx?" Yesux deeh pawk lox ka nawh, mai: ah nin:, "Ka: ang Philipux nyang bax kok maix, yam ot maix greem: khaox ruh, Aux hoik dawg yaox maix heue:." 49 Nasanilax baox pawk lox mai: ah nin: ka Nawh, "Rabi eue:, Maix mawh Kawn: Siyiex, Simiang Khunhawkham pui Isarilax heue:." 50 Yesux pawk lox mai: ah nin: ka nawh, "Kheu hoik krai Aux ka maix, 'Aux yaox maix ot greem: khaox ruh,' maix tom: yumrhawm: ka lie? Maix tag sang pon tix yaox ceu pa nie lheu: ting khaing: in sax heue:." 51 Nawh Cao: baox ah nin: ka nawh, "Aux krai lox tete telai ka maix, khaix in maix tag sang yaox baoh raoma:, mai: kawncau Siyiex haok mai: lih ka piang Kawn: kawn: pui heue:."
Yohan
Simin Ting 2
Kapaox daux veng Kanax
1 Khaix an daux loe: singaix pui ih kapaox daux veng Kanax ka daux meung Galilie:, mai: miex Yesux ka ot tan:. 2 Lheu: khaing: an, kix kok Yesux mai: kawncau Nawh khankix hoek tix ih kapaox tan:. 3 Mai: yam ang rawm: plix siiet kub, miex Yesux ah nin: ka Nawh Cao:, "Kix ang koe: rawm: plix siiet heue:." 4 Mai: Yesux deeh ah nin: ka kiex, "Bon: eue:, Aux koe: ceu pa yuh mai: pax pa tix? Bawg yam Aux ang nyang bax hoek." 5 Miex Nawh ah nin: ka pui cau pui soi: khankix, "Nawh nhie: pex yuh ceu pa yuh ka mawx ang ah, yuh awawx." 6 Ka dee an koe: ang: simaox liah mu:, awm: pa khaw: mai: been pui Yudax khankix tix kieh singax heue:. Tix mu: ang: kub sau: ra: loe: glawm: rawm:. 7 Yesux ah nin: ka kix, "Sau: rawm: tom: naog ka ang: khankix heue:." Mai: kix sau: rawm: tom: naog. 8 Mai: Yesux ah nin: ka kix, "Yamin pug hu: tawx ka cao: giex kaing: kapaox heue:." Mai: kix viex hu:. 9 Yam cao: giex kaing: kapaox cim tix yaox rawm: pa hoik kieh mawh rawm: plix siiet, kheu ang nawh tawng grawh grawng: rawm: plix siiet hoek khaing: dee mawx, (viang mawh kawx nan: pui cau pui soi: pa pug rawm: khankix tawng heue:.) nawh kok ka kaw pa teei tix koe: moeng, 10 mai: ah nin: ka nawh, "Pui ku kaux viex tix tawx rawm: plix siiet pa mhawm: phaoxka:, mai: khaix hoik nyaux pui tom: sak, viex pa ang mhawm: khaix, viang mawh nan: maix deuh rawm: plix siiet pa mhawm: tom: yamin heue:." 11 In pa mawh mhai: pa daox pa am: pa liang tix yuh, Yesux yuh ka daux veng Kanax, daux meung Galilie:, mai: kheu nan: min: plakngai: Nawh sidawng:, mai: kawncau Nawh khankix yumrhawm: ka Nawh heue:.
12 Khaix an Nawh Cao: hu: ka veng Kapeniom, Nawh mai: miex Nawh, mai: pux Nawh khankix, mai: kawncau Nawh khankix, mai: kix ang ot tan: miex singaix tix.
Yuh nyiex bwan: singax daux poi Pasakha
2:14-16 koe: daux lai Mth. 21:12-13; Makux 11:15-17; Lukax 19:45-46
13 Yam an dex sang hoek yam yuh poi Pasakha pui Yudax, mai: Yesux haok ka veng Yerusaliem heue:. 14 Mai: daux nyiex bwan: tan:, Nawh Cao: yaox pui pa coh moi, mai: yung:, mai: sikaux, mai: pui pa loh mau ngawm tan:. 15 Mai: Nawh teei maox siah klia: tix yuh pa sang sivied, grheu: kix lih khawm: uik khaing: daux nyiex bwan:, khawm: yung:, khawm: moi khankix, mai: Nawh klup tix tik mau pui pa loh mau, mai: Nawh cot pheen: kix cangklud. 16 Mai: Nawh ah nin: ka pui pa coh sikaux khankix, "Teei ceu in lih heue:, paw kieh nyiex Keeing: Aux mawh dee coh kraung coh khrai:." 17 Mai: kawncau Nawh khankix doh keud grawng: hoik tiem: tix deuh ah nin:,
133"Pa viex Aux khawm: rhawm: mai: nied tix yuh son nyiex Maix tag sang ih Aux uik heue:."
18 Yam an pui Yudax khankix chawk ah nin: ka Nawh Cao:. "Pa yuh Maix ceu in khankix, Maix sang jhi: ex yaox mhai: pa daox pa am: ceu tix?" 19 Mai: Yesux pawk lox ah nin: ka kix, "Yieh nyiex bwan: in laux, mai: daux loe: singaix Aux tag sang deeh cox heue:." 20 Mawh kheu nan: pui Yudax ah nin:, "Yam sum: nyiex bwan: in uik tipon: liah (46) num, mai: Maix sang deeh cox daux loe: singaix khaing: lie?" 21 Viang mawh kawx nan:, Nawh sang ah ka nyiex bwan: tokaux Tix heue:. 22 Kheu an khaix hoik deeh kaoh Nawh Cao: khaing: krax yum, kawncau Nawh doh keud ka lox pa hoik krai Nawh, mai: yumrhawm: ka Phuk lai sigang: khri:, mai: lox pa hoik krai Yesux heue:.
23 Yam ot Yesux ka daux veng Yerusaliem daux poi Pasakha, pui haoh pui hun: yumrhawm: ka ceukaux Nawh, kheu yaox kix mhai: pa daox pa am: pa yuh Nawh Cao: heue:. 24 Viang mawh kawx nan: Yesux ang een: rhawm: tix tawx tokaux Tix ka kix, kheu tawng Nawh pui khawm: uik heue:. 25 Mai: ang Nawh lo cao: pa kham: mhai: sakse: grawh grawng: pui, kheu hoik tawng tokaux Nawh pa koe: ka daux kawn: pui heue:.
Yohan
Simin Ting 3
Grawng: deeh baox keh
1 Yam an koe: Pharishie: tix kaux, pa kaux Nikawdimu, pa mawh simiang giex kaing: pui Yudax tix kaux. 2 Nawh hoek ka Yesux yam ponsawm: mai: ah nin: ka Nawh, "Rabi eue:, ex tawng Maix mawh cao: gau pa kaoh khaing: Siyiex, kheu pui tix kaux kawx ang chix yuh mhai: pa daox pa am: pa yuh Maix in kix, phan: Siyiex ang ot tau mai: nawh heue:." 3 Yesux pawk lox mai: ah nin: ka nawh, "Aux krai lox tete telai ka maix, phan: pui ang baox deeh keh tix bawg, nawh ang pon tix yaox Meung Siyiex heue:." 4 Nikawdimux baox ah nin: ka Nawh Cao:, "Pui pa hoik riex ju sang pon tix baox deeh keh yuh ka mawx? Nawh deeh chix laig ka daux vaig miex tix, mai: baox deeh chix keh kah lie?" 5 Yesux baox deeh pawk lox mai: ah nin:, "Aux krai lox tete telai ka maix, phan: pui ang keh daux rawm: mai: Khwan:, nawh ang pon tix laig ka daux Meung Siyiex. 6 Pa keh khaing: nex mawh nex, mai: pa keh khaing: Khwan: mawh khwan: heue:. 7 Paw daox paw am: kheu hoik krai Aux ka maix, 'maix tag baox deeh keh.' 8 Bhaung: kienie, simie tix phlu: dee mawx nawh phlu: tan:, mai: maix pon mhong: lox nawh, viang mawh kawx nan: ang maix tawng kaoh khaing: dee mawx, mai: sang hu: dee mawx. Pui pa keh daux Khwan: ku kaux kawx awm: an heue:." 9 Nikawdimu baox pawk lox mai: ah nin: ka Nawh, "Ceu in khankix tag chix mawh yuh ka mawx?" 10 Yesux baox pawk lox mai: ah nin: ka nawh, "Maix mawh cao: gau ka daux pui Isarilax tix kaux, mai: ang maix tawng ceu in lie? 11 Aux krai lox tete telai ka maix, ex krai ceu pa tawng ex, mai: kham: mhai: sakse: grawng: pa hoik yaox ex, mai: pex ang rieb tix teei mhai: sakse: pa kham: ex. 12 Phan: Aux hoik krai maix grawh grawng: ceu pa dex mai: haktiex in, mai: maix ang yumrhawm: kah, phan: Aux krai maix grawh grawng: ceu pa dex mai: meung raoma:. maix chix yumrhawm: yuh ka mawx? 13 Pui tix kaux kawx ang sax haok ka meung raoma:, lheu: khaing: Kaw pa lih khaing: meung raoma:, pa mawh Kawn: kawn: pui pa ot daux meung raoma: heue:. 14 Awm: hoik yaog Mose siuing: ka daux tiag daux tu, viang ka Kawn: kawn: pui kawx, tag sang yaog yuh nan:, 15 yuh ka mawx can pui pa yumrhawm: ka Nawh Cao: khankix tag ang lai hoek krax laux krax leeing:, mai: pon ju leeing: ju leeing: phan: heue:.
Siyiex moh ka kawn: pui haktiex
16 "Mawh kheu Siyiex kied moh haktiex sigrien sigre, Nawh tom: tawx Kawn: Tix pa koe: tix kaux khaing: , yuh ka mawx son can pui pa yumrhawm: ka Nawh khankix, tag ang lai hoek krax laux krax leeing:, viang mawh nan: pon ju leeing: ju leeing: phan: heue:. 17 Grawh grawng: nawh, Siyiex ploi: Kawn: Nawh hoek son sang prawng sang ciyang ka haktiex ang mawh, viang mawh nan: ploi: hoek son sang hoek haktiex krax taoh kheu Nawh heue:. 18 Kaw pa yumrhawm: ka Nawh Cao: ang hoek krax prawng krax ciyang, viang mawh kawx nan: kaw pa ang yumrhawm: ka Nawh, krax prawng krax ciyang hoik koe: piang nawh, kheu ang nawh yumrhawm: ka ceukaux Kawn: Siyiex pa koe: tix kaux khaing: heue:. 19 Tag hoek krax prawng. Krax ciyang kheu Pa Riang hoik hoek piang haktiex in, mai: kawn: pui nie lheu: moh ka pa vhaik khaing: pa riang, in mawh kheu pa yuh kix mawh pa caox heue:. 20 Grawh grawng: nawh, pa yuh pa caox ku kaux daux pui nieh jhak ka pa riang, mai: ang hoek ka pa riang, son ang pa yuh tix sang lih heue:. 21 Viang mawh kawx nan:, kaw pa yuh pa mawh pa meh hoek ka pa riang, son sang sidawng: pa yuh tix, grawng: mawh pa hoik yuh ka daux Siyiex heue:."
Mhai: sakse: pa ghoik Yohan cao: comrawm:
22 Khaix ceu in khankix, Yesux mai: kawncau Nawh khankix hu: ka daux meung Yudax, mai: Nawh ot mai: kix tan:, mai: tawx krax baptis134 heue:. 23 Mai: Yohan kawx baptis B daux Enon dex veng Salim, kheu haoh rawm: tan:, mai: kix hoek tix baptis C heue:. 24 Kheu yam an ang nyang bax sau: Yohan ka daux thawng: heue:. 25 Yam an kawncau Yohan khankix mai: pui Yudax tix kaux thung: thiang: paox tix grawh grawng: pa kieh singax. 26 Mai: kix hoek ka Yohan mai: ah nin: ka nawh, "Rabi eue:, Kaw pa ot mai: maix plak toi: rawm: Yawdan, pa kham: maix mhai: sakse: son Nawh, jhak heue:, Nawh kawx tawx krax baptis D mai: pui khawm: uik hoek mai: Nawh." 27 Yohan baox pawk lox mai: ah nin:, "Pui ang pon tix ceu kawx phan: ang mawh pa tawx ka nawh khaing: raoma:. 28 Tokaux pex mawh mhai: sakse: grawng: pa hoik krai aux, 'Aux ang mawh Cao: Khrit, viang mawh kawx nan: aux mawh kaw pa hoik ploi: ka: sivoe Nawh khaing:.' 29 Kaw pa pon mhoeng: yam yuh kapaox, mawh kaw pa yuh kapaox heue:, viang mawh kawx nan: paoxgrawm nawh pa cung dex mai: mhong: nawh, kied gauxrhawm: gauxrhi: kheu mhong: nawh lox kaw pa yuh kapaox. Awm: an krax gauxrhawm: aux hoik naog heue:. 30 Nawh tag sang baox ting baox lhaong:, viang mawh kawx nan: aux tag sang deeh iak hu: heue:.
31 "Kaw pa kaoh khaing: dee long: mawh pa ting: piang khawm: uik. Kaw pa kaoh khaing: haktiex mawh pa dex pa dawd mai: haktiex, mai: chix krai grawh grawng: haktiex khaing:. Kaw pa kaoh khaing: raoma: mawh pa ting piang khawm: uik. 32 Nawh kham: mhai: sakse: grawng: pa hoik yaox Nawh, mai: pa hoik mhong: Nawh, viang mawh nan: pui tix kaux kawx, ang rieb tix teei mhai: sakse: pa kham: Nawh. 33 Kaw pa rieb tix teei mhai: sakse: pa kham: Nawh, hoik tawk cum: nawh grawh grawng: Siyiex mawh pa kaux sijax heue:. 34 Kaw pa Siyiex ploi: hoek chix krai chix ah gumlox Siyiex, kheu Siyiex ang tiag tix tawx Khwan: kah heue:. 35 Keeing: Cao: moh Kawn: Cao:, mai: hoik tawx ku ceu khawm: uik ka daux tawm: taix Nawh heue:. 36 Kaw pa yumrhawm: ka Kawn: Cao: koe: ju leeing: ju leeing: phan:, mai: kaw pa ang yumrhawm: ka Kawn: Cao: ang lai pon tix yaox ju, viang mawh kawx nan: pa songrhawm: Siyiex koe: piang nawh heue:."
Yohan
Simin Ting 4
Yesux haok ka meung Galilie:
1 Mawh kheu nan: yam Simiang tawng Pharishie: hoik mhong: grawh grawng: pon Nawh kawncau mai: baptis135 ka pui nie lheu: khaing: Yohan, 2 (Viang mawh kawx nan: tokaux Yesux ang tawx krax baptis B, mawh kawncau Nawh pa baptis C khaing:). 3 Nawh lih khaing: meung Yudax, mai: baox deeh hu: ka meung Galilie: heue:. 4 Mai: Nawh caw tix hu: preeng: ka daux meung Samarix, 5 mawh kheu nan: Nawh Cao: hoek ka veng Samarix tix veng pa kaux Sukha, dex ka haktiex pa tawx Yakop ka kawn: nawh Yosiep heue:. 6 Mai: ka dee an koe: rawmmaw: Yakop. Yesux taug kheu hu: krax, mai: ngawm dex rawmmaw: tan:. Yam an dex hoek liah nari D heue:.
Sipub ka bon: Samarix
7 Bon: Samarix tix kaux hoek tix kin rawm:, mai: Yesux ah nin: ka nawh, "Tawx Aux nyaux rawm: liak." 8 (Mawh kheu yam an kawncau Nawh khankix hoik hu: tix liag pa ih pa un: ka daux veng heue:.) 9 Bon: Samarix baox ah nin: ka Nawh Cao:, "Yuh ka mawx Maix pa mawh pui Yudax mhaing: tix nyaux rawm: ka aux pa mawh bon: Samarix?" (Grawh grawng: nawh, pui Yudax ang sax yuh paox yuh pie ka pui Samarix.) 10 Yesux baox pawk lox mai: ah nin: ka nawh, "Phan: maix tawng bwanson: khawng: phak pa tawx Siyiex, mai: Kaw pa ah, 'Tawx Aux nyaux rawm:' mawh mawx? Maix sang mhaing: rawm: ka Nawh, mai: Nawh sang tawx rawm: im: ju ka maix heue:." 11 Mai: bon: an baox ah nin: ka Nawh Cao:, "Simiang eue:, Maix ang koe: ceu pa pug tid tix, mai: rawmmaw: in kied raux tete, kheu nan: Maix lai pon rawm: im: ju ka dee mawx? 12 Maix khex lheu: ting khaing: keeing: ex Yakop pa tawx rawm:maw: in ka ex lie? pa tokaux nawh, mai: kawn: nawh, mai: khawng: mai: brie nawh pa hoik nyaux ka rawmmaw: in. 13 Yesux baox pawk lox mai: ah nin: ka nawh, "Pui pa nyaux rawm: in ku kaux tag sang deeh nyaux nie rawm: heue:. 14 Viang mawh kawx nan:, pui mawx ang ah pa nyaux rawm: pa tawx Aux, tag ang lai baox deeh sang nyaux nie rawm: tix bawg kawx, viang mawh nan: rawm: pa sang tawx Aux ka nawh tag sang mawh rawmmaw: pa lih rawm: ka daux nawh, tom: kieh mawh ju pa im: leeing: ju leeing: phan:." 15 Bon: an baox ah nin: ka Nawh, "Simiang eue:, tawx rawm: an ka aux liak, son ang aux sang nyaux nie rawm: phaox khaix, mai: son ang aux lai baox yaox tix hoek krax niex glang: niex gleeing: tix kin rawm: tin:." 16 Yesux baox pawk lox mai: ah nin: ka nawh, "Hu: kok mex maix mai: deeh hoek tin:." 17 Bon: an baox pawk lox mai: ah nin: ka Nawh Cao:, "Aux ang koe: mex." Yesux baox ah nin: ka nawh, "Pa ah maix, 'Aux ang koe: mex, caw tete. 18 Kheu maix hoik koe: mex phwan: kaux, mai: kaw pa koe: maix yamin, ang lai mawh mex maix, pa ah maix mawh pa mawh pa meh heue:." 19 Bon: an baox ah nin: ka Nawh, "Simiang eue:, aux tawng Maix mawh Cao: Jhai: heue:. 20 Pa mawh tax du ex dix, krub ka gawng in, pex ah dee khaw: pui tix krub mawh ka daux veng Yerusaliem." 21 Yesux baox ah nin: ka nawh, "Bon: eue:, yumrhawm: ka lox Aux, bawg yam tag sang hoek, yam pex tag ang krub Keeing: Cao: ka piang gawng in mai: ka daux veng Yerusaliem. 22 Pex krub ka pa ang pex tawng, ex krub ka pa tawng ex, kheu krax taoh hoek khaing: pui Yudax heue:. 23 Viang mawh kawx nan:, bawg yam nari tag sang hoek, mai: hoik hoek yamin, yam pui pa krub ka Keeing: Cao: tete, tag krub ka daux khwan: mai: ka daux pa mawh pa meh, kheu sawg Keeing: Cao: pa yuh nan: tix mawh pui pa krub ka Nawh heue:. 24 Siyiex mawh Khwan:, mai: pui pa krub ka Nawh, tag krub ka Nawh ka daux khwan: mai: ka daux pa mawh pa meh heue:." 25 Bon: an baox ah nin: ka Nawh Cao:, "Aux hoik tawng grawng: sang hoek Misiyax, (Kaw pa kok mawh Cao: Khrit), yam hoik hoek Nawh, Nawh tag sang krai ku ceu khawm: uik ka ex heue:." 26 Yesux baox ah nin: ka nawh, "Aux pa sikah mai: maix mawh Nawh heue:."
27 Yam an kawncau Nawh deeh hoek, mai: daox deng: kheu sikah Nawh mai: bon: an. Viang mawh kawx nan: tix kaux kawx ang chawk ka Nawh, "Maix sawg pa tix? Phan: ang mawh nan: Maix sikah mai: bon: an yuh ka mawx?" 28 Bon: an deuh aw: rawm: nawh tan:, mai: deeh hu: ka daux veng mai: ah nin: ka pui khankix, 29 "Hoek tix jhak ka Pui tix kaux, pa hoik krai aux can ceu pa hoik yuh aux khawm: uik khawm: leeing:. Khex chix mawh Nawh Cao: Khrit lie?" 30 Mai: kix lih khaing: daux veng mai: hu: ka Nawh. 31 Yam an kawncau Nawh khankix khyox khaw: mai: ah nin: ka Nawh Cao:, "Rabi eue:, sawm: ha: ceeix." 32 Viang mawh kawx nan: Nawh baox pawk lox mai: ah nin: ka kix, "Aux koe: pa ih pa un: pa ang pex tawng." 33 Mawh kheu in kawncau Nawh tix kaux hoik tix kaux ah nin: ka paox tix, "Khex hoik viex tix kaux kaux tix tawx pa ih pa un: ka Nawh lie?" 34 Yesux baox ah nin: ka kix, "Pa ih pa un: Aux mawh pa yuh alo Kaw pa ploi: Aux hoek, mai: pa yuh kaing Nawh tom: hoik heue:. 35 Pex ah khaix in pon: khix tag hoek bawg yam vawg nghox, ang mawh lie? Aux krai ka pex, jhak heue:, yaog ngai: pex tix jhak ka kaung: ka ma: khankix, nghox hoik kaux hoik paing heue:, mai: yam khaw: tix vawg hoik hoek heue:. 36 Kaw pa vawg tag pon ngawh riang mai: khrawm: plix yuh ka mawx son sang pon ju leeing: ju leeing: phan:. Yuh ka mawx kawx pa rhuat mai: kaw pa vawg tag sang pon tix gauxrhawm: tau. 37 Grawh grawng: nawh lox pa hoik koe: pa ah nin:, 'Tix kaux mawh cao: rhuat mai: tix kaux mawh cao: vawg.' hoik mawh tete heue:. 38 Aux ploi: pa hu: vawg dee ang pex sax yuh kaing, tang: kaux hoik yuh kaing, mai: pex hoik laig ka daux kaing pa yuh kix heue:."
39 Mai: pui Samarix veng an tom: nie yumrhawm: ka Nawh Cao:, kheu krai bon: an lox pa ah nin:, "Nawh hoik krai aux pa hoik yuh aux khawm: uik." 40 Kheu nan:, yam pui Samarix hoek ka Nawh, kix khyox khaw: Nawh ot mai: kix, mai: Nawh Cao: ot tan: ra: singaix. 41 Mai: pui haoh pui hun: baox yumrhawm: kheu gumlox Nawh Cao:. 42 Mai: kix ah nin: ka bon: an, "Yamin ex yumrhawm: kheu lox pa hoik krai maix ang mawh. Mawh kheu tokaux ex hoik mhong: lox Nawh, mai: tawng grawng: in mawh Cao: Khrit te te, pa mawh Cao: pa taoh haktiex heue:."
43 Khaix an ra: singaix Nawh lih khaing: tan: mai: hu: ka daux meung Galilie:. 44 Kheu tokaux Yesux hoik kham: mhai: sakse: grawng: Cao: Jhai: ang koe: min: plakngai:, ka daux meung tokaux tix. 45 Yam hoek Nawh ka daux meung Galilie:, pui Galilie: khankix rieb Nawh, kheu hoik yaox kix pa yuh Nawh daux poi ka veng Yerusaliem, kheu ot kix ka daux poi an heue:.
Cox pai: ka kawn: simex Simiang
46 Mai: Nawh deeh hoek ka Kanax daux meung Galilie: dee hoik kieh Nawh rawm: mawh rawm: plix siiet. Mai: koe: simiang tix kaux pa kawn: nawh saux ka daux veng Kapeniom. 47 Yam mhong: nawh grawng: hoik kaoh Yesux khaing: meung Yudax, mai: hoek ka daux meung Galilie:, nawh hu: ka Nawh Cao:, mai: khyox khaw: ka Nawh Cao:, son sang lih hoek Nawh tix cox kawn: nawh moi:. Mawh kheu saux nawh dex yum heue:. 48 Mawh kheu nan: Yesux ah nin: ka nawh, "Phan: maix ang yaox mhai:, mai: ceu pa daox pa am: khankix, maix ang tau tix yumrhawm: kah." 49 Simiang an baox ah nin: ka Nawh Cao:, "Simiang eue:, ka: ang kawn: aux nyang bax yum lih hoek liak." 50 Yesux baox ah nin: ka nawh, "Hu: dee hu: maix heue:, kawn: maix tag klawd heue:." Pui an yumrhawm: ka lox pa krai ka nawh, mai: nawh hu: dee hu: tix heue:. 51 Mai: yam kawn: tag ing: nawh, kawncau nawh khankix caong rieb nawh, mai: krai grawng: klawd kawn: nawh heue:. 52 Mawh kheu in nawh chawk kix grawng: jah kawn: nawh tix vai yam mawx. Mai: kix baox pawk lox mai: ah nin:, "Jhawm: saux nawh grai: kawkawx bawg yam 136aliah nari." 53 Mawh kheu in keeing: nawh tawng grawng: bawg yam an mawh, bawg yam krai Yesux lox in ka nawh, "Kawn: maix tag klawd heue:." mai: tokaux nawh, mai: pui daux nyiex nawh khawm: uik yumrhawm: heue:. 54 In mawh mhai: pa daox pa am:, pa yuh Yesux ra: bawg tix bawg khaix lih Nawh khaing: meung Yudax mai: hoek ka daux meung Galilie: heue:.
Yohan
Simin Ting 5
Pai: jhawm: saux ka Betesadax
1 Khaix in koe: poi pui Yudax tix mu:, mai: Yesux haok hu: ka veng Yerusaliem.
2 Ka daux veng Yerusaliem dex Siviex Yung:, koe: rawm: dung tix mu:, pa kok daux lox Hebrie Betesadax. Rawm: dung an koe: grah phwan: lhang: heue:. 3 Ka piang grah an khankix pui pa koe: jhawm: saux jhawm: ngia it tan: kied haoh kied hun: tete. Pui dugngai: ka koe:, pui laux caong ka koe:, mai: pui yum tix plak ka koe:, kix krox yam yungyiang: rawm: an. 4 Kheu yam hoek bawg yam kawncau Siyiex tix kaux lih hoek mai: yuh rawm: an yungyiang:. Khaix yungyiang: rawm: an pui mawx pon laig ka: sivoe paox tix, jhawm: saux tokaux nawh moi: heue:. 5 Mai: pui pa saux tingoe: daix (38) num tix kaux ot ka dee an. 6 Yam yaox Yesux it nawh tan:, mai: tawng grawh grawng: hoik rheung: ot nawh tan: awm: an, Nawh Cao: chawk nawh ah nin:, "Sang moi: nie maix lie?" 7 Pui pa saux an baox pawk lox mai: ah nin:, "Simiang eue:, yam yungyiang: rawm:, ang aux koe: pui tix teei aux sau: ka daux rawmdung an tix kaux kawx, yam hu: aux pui tang: kaux pon laig ka: sivoe aux heue:." 8 Yesux ah nin: ka nawh, "Kaoh heue:, teei kraung it maix mai: hu: heue:." 9 Mai: dom: mawx dom: an pui an moi: mai: teei kraung it tix mai: hu: heue:.
Singaix an mawh singaix twah. 10 Mawh kheu nan: pui Yudax ah nin: ka kaw pa hoik moi: an, "Singaix mawh ngaix twah, mai: pa viex maix kraung it tix hu: ang khaw: mai: been li." 11 Viang mawh kawx nan: kaw an baox pawk lox mai: ah nin:, "Kaw pa cox aux moi: hoik ah nin: ka aux, "Teei kraung it maix mai: hu: heue:.'" 12 Kix baox chawk ka nawh, "Mawh pui mawx pa nhie: maix teei kraung it maix mai: hu:?" 13 Viang mawh kawx nan: kaw pa hoik moi: an, ang tawng cao: cox tix moi:. Kheu koe: pui haoh pui hun: ka dee an. Yesux hoik lih hu: khaing: tan:. 14 Khaix an Yesux yaox nawh ka daux nyiex bwan: mai: ah nin: ka nawh, "Jhak heue:, maix hoik moi:, khaix in paw lai baox yuh phimap, phan: ang mawh nan:, ha pa lheu: nu kox hoek piang maix heue:." 15 Pui an hu: mai: krai ka pui Yudax, Kaw pa cox nawh moi: mawh Yesux. 16 Mawh kheu nan: pui Yudax tuktiak tukte: ka Yesux, mai: sawg tix pah Nawh yum, kheu hoik yuh Nawh ceu in khankix singaix twah heue:. 17 Viang mawh kawx nan: Yesux baox pawk lox mai: ah nin: ka kix, "Keeing: Aux yuh kaing tom: hoek yamin, mai: Aux ka yuh heue:." 18 Mawh kheu jao in pui Yudax nie sawg tix pah Nawh yum, kheu yuh Nawh singaix twah laux khaing: ang joeng mawh, viang mawh nan: Nawh kok Siyiex mawh Keeing: Tix, mai: kheu Nawh hoik yuh tix kieh tokaux Tix sidu mai: Siyiex heue:.
Nab yam ka kawn: tag mawh pa nab yam ka keeing:
19 Mawh kheu nan: Yesux baox pawk lox ka kix mai: ah nin:, "Aux krai lox tete telai ka pex heue:, Kawn: Cao: ang chix yuh tix ceu kawx nong: nong:, viang mawh kawx nan: Nawh yuh ceu pa yaox Nawh Keeing: Cao: yuh khaing:, mai: ceu pa yuh Keeing: Cao:, Kawn: Cao: kawx yuh ceu an heue:. 20 Kheu Keeing: Cao: moh Kawn: Cao:, Nawh tom: jhi: Nawh yaox ceu pa yuh Tix khawm: uik khawm: leeing:. Mai: Nawh tag jhi: Nawh yaox kaing pa nie lheu: ting khaing: in, son sang kieh pex daox deng: kah heue:. 21 Grawh grawng: nawh awm: Keeing: Cao: kieh pui yum deeh kaoh, mai: kieh kix im:, awm: an viang Kawn: Cao: kawx, koe: rhawm: tix sang kieh pui mawx im: ka chix Tix heue:. 22 Keeing: Cao: ang prawng ang ciyang pui tix kaux kawx, viang mawh kawx nan: Nawh hoik tawx krax prawng krax ciyang ka Kawn: Cao: khawm: uik. 23 Yuh ka mawx son kawn: pui khawm: uik sang yungyi: ka Kawn: Cao:, awm: yungyi: kix ka Keeing: Cao:. Kaw pa ang yungyi: ka Kawn: Cao:, ang yungyi: ka Keeing: Cao: pa ploi: Nawh hoek heue:. 24 Aux krai lox tete telai ka pex, kaw pa mhong: lox Aux mai: pa yumrhawm: ka Kaw pa ploi: Aux hoek, hoik koe: ju leeing: ju leeing: phan:, mai: ang hoek krax ciyang, viang mawh kawx nan: hoik luan khaing: krax yum mai: laig ka daux ju pa im: heue:. 25 Aux krai lox tete telai ka pex, bawg yam nari tag sang hoek, mai: hoik hoek yamin, yam pui pa hoik yum khankix tag mhong: lox Kawn: Siyiex, mai: kix pa mhong: tag im: heue:. 26 Grawh grawng: nawh, awm: Keeing: Cao: koe: ju ka daux tokaux Tix, Nawh tawx ka Kawn: Cao: koe: ju ka daux tokaux Tix yuh nang: nan:. 27 Mai: Nawh Cao: hoik tawx sibrawm ka Nawh tix ciyang, kheu mawh Nawh Kawn: kawn: pui heue:. 28 Paw daox paw deng: ka ceu in, kheu bawg yam tag sang hoek, yam can pa ot ka daux simeeig khawm: uik tag mhong: lox Nawh, 29 mai: lih hoek. Kix pa hoik yuh pa mhawm: pa mhiem: deeh kaoh ka son pa im: ju heue:, mai: kix pa hoik yuh pa caox pa ang mhawm: ang mhiem:, tag deeh kaoh ka son krax prawng krax ciyang heue:.
Mhai: sakae: kaing pa yuh Yesux
30 "Ang Aux chix yuh tix ceu kawx nong: nong:, Aux prawng ciyang awm: pa mhong: Aux, mai: krax prawng krax ciyang Aux mawh pa rah pa see. Mawh kheu ang Aux sawg tix yuh alo tokaux Tix, viang mawh nan: Aux yuh alo Keeing: Cao: pa ploi: Aux hoek heue:. 31 Phan: Aux kham: mhai: sakse: grawh grawng: tokaux Tix, mhai: sakse: Aux ang mawh pa mawh pa meh. 32 Mawh tang: kaux pa kham: mhai: sakse: grawng: Aux, mai: Aux tawng grawng: mhai: sakse: pa kham: Nawh grawh grawng: Aux mawh pa mawh pa meh heue:. 33 Pex hoik ploi: hu: ka Yohan, mai: nawh hoik kham: mhai: sakse: ka pa mawh pa meh. 34 Viang mawh kawx nan:, ang Aux rieb tix teei mhai: sakse: pa kham: pui, viang mawh nan: Aux tom: krai ceu in khankix yuh ka mawx son sang hoek pex krax taoh heue:. 35 Nawh mawh kawkngu pa lah mai: pa jhan: riang, mai: pex koe: rhawm: tix gauxrhawm: ka daux pa riang nawh tivud khaing:. 36 Viang mawh kawx nan: Aux koe: mhai: sakse: pa nie lheu: ting khaing: mhai: sakse: pa kham: Yohan, kheu kaing pa hoik tawx Keeing: Cao: ka Aux, son sang yuh tom: hoik, pie pa mawh kaing ceu pa yuh Aux in, mawh pa kham: mhai: sakse: son Aux grawng: pa hoik ploi: Keeing: Cao: Aux hoek heue:.
Mhai: sakse: Keeing: Siyiex
37 Mai: Keeing: Cao: pa hoik ploi: Aux hoek, hoik kham: mhai: sakse: grawh grawng: Aux. Ang pex sax mhong: lox Nawh tix bawg kawx, mai: ang pex sax yaox riang pakpeung Nawh tix bawg kawx. 38 Mai: gumlox Nawh ang ot ka daux pex, mawh kheu ang pex yumrhawm: ka Kaw pa ploi: Nawh hoek heue:.
Mhai: sakse: daux Phuk Lai Sigang: Khri:
39 Pex sawg daux Phuk lai sigang: khri: kheu ce: pex tix sang pon ju leeing: ju leeing: phan: ka daux phuk lai an heue:, mai: phuk lai an mawh pa kham: mhai: sakse: grawh grawng: Aux. 40 Mai: son sang pon pex ju pa im: pex ang lai hoek ka Aux heue:. 41 Ang Aux rieb tix teei min: plakngai: pa tawx kawn: pui. 42 Viang mawh kawx nan:, Aux tawng grawng: krax moh krax rhawm: Siyiex ang koe: ka daux pex. 43 Aux hoek ka daux ceukaux Keeing: Aux, mai: pex ang rieb tix teei Aux, phan: tang: kaux hoek ka daux ceukaux tokaux tix, pex tag sang rieb tix teei ka kaw an. 44 Pex chix yumrhawm: yuh ka mawx? Pex pa sawg tix pon min: plakngai: ka paox tix, tix kaux hoik tix kaux, mai: pex ang sawg tix pon min: plakngai: ka Siyiex pa koe: tix kaux khaing:. 45 Paw ce: Aux sang deuh phimap ka pex plak sivoe ngai: Keeing: Cao:. Pa sang deuh phimap ka pex kawn: koe: tix kaux, pa mawh Mose pa een: pex rhawm: tix kah heue:. 46 Grawh grawng: nawh phan: pex hoik yumrhawm: ka Mose, pex tag sang yumrhawm: ka Aux, kheu hoik tiem: nawh grawh grawng: Aux heue:. 47 Viang mawh kawx nan: phan: pex ang yumrhawm: ka lox ceu pa tiem: Mose, pex tag sang chix yumrhawm: ka lox Aux yuh ka mawx?"
Simin Ting 6
Tawx pui phwan: rheng: ih sak
6:1-13 koe: daux lai Mth. 14:13-21; Makux 6:32-44; Lukax 9:10-17
1 Khaix an Yesux hu: plak toi: rawm: nhawng: Galilie:, pa mawh nhawng: Tiberix. 2 Mai: cub pui pa kied haoh kied hun: hawt Nawh, kheu hoik yaox kix mhai: pa daox pa am: pa yuh Nawh piang kix pa koe: jhawm: saux jhawm: ngia heue:. 3 Mai: Yesux haok hu: ka gawng tix mu:, mai: ngawm tau mai: kawncau Nawh khankix tan:. 4Yam an dex sang hoek bawg yam poi Pasakha pui Yudax. 5 Yesux yaog tix jhak, mai: yaox cub pui pa kied haoh kied hun: hoek ka Nawh, mai: Nawh Cao: ah nin: ka Philipux, "Ex sang pon tix liag khaomun son sang yaox pui in kix tix ih dee mawx?" 6 Ceu pa ah Nawh ka Philipux in mawh pa cheuk tix yaox nawh, kheu tokaux Nawh Cao: sang yuh ka mawx, Nawh hoik tawng. 7 Philipux baox pawk lox mai: ah nin: ka Nawh, "Teei mau denari ra: yieh mai: liag khaomun kawx, ang tau tix kub ku kaux kix ku ceeix. 8 Kawncau Nawh tix kaux, Andare, pa mawh pux Simon Petrux ah nin: ka Nawh Cao:. 9 "Kawn: nyawm pa ot tin: tix kaux, koe: khaomun nghoxca pa lang: sidax phwan: lon: mai: kax iak ra: mu:, viang mawh kawx nan: son pui niex ding niex dod sang koe: bwanson: yuh ka mawx?" 10 Mai: Yesux ah nin:, "Kieh pui khankix ngawm heue:." Ka dee an kied haoh rib tete, mai: pui ngawm heue:. Kix dex koe: phwan: rheng:. 11 Yesux teei khaomun an mai: yaogyaw bwanson:, mai: gwieh tix tawx ka pui pa ngawm tan: khankix, mai: Nawh teei kax gwieh ka kix awm: an, kix moh miex ding, tawx ding heue:. 12 Mai: khaix hoik ih kix tom: sak, Nawh Cao: ah nin: ka kawncau Nawh khankix, "Khrawm: pa max pa phawng:, pa haoh pa lheu: khankix, yuh ka mawx son ang sang grai: tid tix." 13 Mawh kheu nan: kix deeh khrawm: pa max pa phawng:, pa haoh pa lheu:, khaomun phwan: lon: an khaix hoik ih pui, mai: deeh naog kao: phliex ra: heue:. 14 Mawh kheu nan: yam yaox pui mhai: pa daox pa am: pa hoik yuh Nawh Cao: kix ah nin:, "Kaw in mawh Cao: Jhai: an pa hoek piang haktiex tete heue:."
Yesux hu: ka caong tix piang rawm: nhawng:
6:16-21 koe: daux lai Mth. 14:22-33; Makux 6:47-51
15 Mawh kheu tawng Yesux grawng: koe: kix rhawm: tix sang giex tix khin: Nawh yuh simiang Nawh tom: baox deeh lih hu: ka piang gawng nong: nong: heue:. 16 Mai: yam uik hoek ponbo kawncau Nawh khankix lih hu: ka rawm: nhawng:. 17 Mai: kix laig ka daux reu tix mu:, mai: kix hu: plak veng Kapeniom. Yam an praix hoik vhaik, mai: Yesux ang nyang bax hoek ka kix. 18 Mai: kheu phlu: bhaung: ting, pukpak rawm: haok hwan: heue:. 19 Khaix hoik vai: kix reu hu: loe: pon: lag, kix yaox Yesux hu: ka caong Tix piang rawm:, mai: hoek ka dex reu, mai: kix die lhat kah. 20 Viang mawh kawx nan: Nawh Cao: ah nin: ka kix, "Mawh Aux heue:, paw vi lhat kah." 21 Kheu nan: kix tom: rieb tix teei Nawh laig daux reu, mai: dorn: mawx dom: an, reu hoek ka praok dee sang hu: kix heue:.
22 Singaix pasax cub pui haoh pui bun: cung ka toi: rawn: nhawng: plak an, kix hoik yaox koe: reu iak tan: tix mu: khaing:, mai: Yesux ang laig mai: kawncau Nawh khankix yam laig kix ka daux reu an, kawncau Nawh khankix hoik hu: nong: nong: heue:. 23 Viang mawh kawx nan: reu iak hoek khaing: veng Tiberix, mai: hoek dex dee pon ih kix khaomun khaix Simiang hoik yaogyaw bwanson:. 24 Yam cub pui haoh pui hun: yaox Yesux mai: kawncau Nawh khankix ang ot tan:, tokaux kix laig daux reu mai: hu: tix sawg Yesux ka daux veng Kapeniom. 25 Yam yaox kix Nawh Cao: plak toi: rawm: nhawng:, kix ah nin: ka Nawh, "Rabi eue:, Maix hoek tin: lai mawx?"
Sidiex gau ka pui haoh pui hun:
26 Yesux baox pawk lox mai: ah nin: ka kix, "Aux krai lox tete telai ka pex, pex sawg Aux kheu hoik yaox pex mhai: pa daox pa am: ang mawh, viang mawh nan: mawh kheu hoik pon pex tix ih khaomun tom: sak heue:. 27 Paw coca: tix yuh tix pon pa ih pa un: pa chix laux chix leeing:, viang mawh kawx nan: coca: son sang pon pa ih pa un: pa kaux tom: pon ju leeing: ju leeing: phan:. pa sang tawx Kawn: kawn: pui ka pex. Kheu mawh Nawh pa Siyiex, Keeing: Cao: hoik tawk cum: kah heue:." 28 Mawh kheu nan: kix tom: chawk Nawh ah nin:, "Ex tag lai yuh ka mawx, son sang pon ex tix yuh kaing Siyiex ?" 29 Yesux baox pawk lox mai: ah nin: ka kix, " Kaing Siyiex mawh pa yumrhawm: pex ka Kaw pa ploi: Nawh hoek heue:." 30 Mawh kheu nan: kix tom: baox ah nin: ka Nawh, "Maix sang yuh ex yaox mhai: pa daox pa am: son sang yurnrhawrn: ex ka Maix ceu pa tix ? Maix sang yuh kaing ceu pa tix ? 31 Tax du ex khankix hoik pon tix ih Mannax ka daux tiag daux tu, awrn: hoik tiem: tix deuh ah nin:, 137'Nawh tawx khaomun ka kix khaing: meung raoma: son sang ih heue:. ' " 32 Mawh kheu nan: Yesux baox pawk lox mai: ah nin: ka kix, "Aux krai lox tete telai ka pex, ang lai mawh pa tawx Mose khaomun khaing: raoma: ka pex. Viang mawh kawx nan: mawh Keeing: Aux pa tawx khaomun pa mawh pa meh khaing: raoma: ka pex heue:. 33 Grawh grawng: nawh khaomun Siyiex mawh pa lih hoek khaing: Raorna:, mai: tawx ju pa irn: ka haktiex heue:." 34 Mawh kheu nan: kix tom: baox ah nin: ka Nawh Cao:, "Simiang eue:, tawx khaomun an ka ex ku bawg ku yam." 35 Yesux baox ah nin: ka kix, "Aux mawh khaomun pa im: ju heue:, kaw pa hoek ka Aux tag ang lai cairhawm:, mai: kaw pa yumrhawm: ka Aux tag ang lai sang nyaux nie rawm: tix bawg kawx heue:. 36 Viang mawh kawx nan: Aux hoik krai ka pex grawng: pa hoik yaox pex ka Aux, viang mawh nan: ang pex yumrhawm: ka Aux heue:. 37 Can pa tawx Keeing: Cao: ka Aux, hoek ka Aux khawrn: uik, mai: kaw pa hoek ka Aux, ang Aux doh tik doh vud tix bawg kawx. 38 Grawh grawng: nawh Aux lih hoek khaing: raoma: son sang yuh alo tokaux Tix ang mawh, viang mawh nan: Aux hoek tix yuh alo Kaw pa ploi: Aux hoek beue. 39 Mai: in mawh alo Kaw pa ploi: Aux hoek, mawh pa ang kieh Aux yuh grai: pui pa tawx Nawh Cao: ka Aux tix kaux kawx, viang mawh nan: kieh kix deeh kaoh singaix sidah khaix heue:. 40Grawh grawng: nawh in mawh alo Keeing: Aux, son sang pon pui pa yaox ka Kawn: Cao:, mai: pa yumrhawrn: ka Nawh khankix ku kaux, ju leeing: ju leeing: phan:. Mai: Aux sang kieh kix deeh kaoh singaix sidah khaix heue:."
41 Yam an pui Yudax khankix salao ka Nawh Cao: kheu hoik ah Nawh, " Aux mawh khaomun pa lih hoek khaing: raoma:." 42 Mai: kix ah nin:, "In mawh Yesux kawn: Yosiep ang mawh lie? Miex keeing: Nawh ex ka tawng ang mawh lie? Nawh ah, 'Aux maw pa lih hoek khaing: raoma:,' yuh ka mawx?" 43 Yesux baox pawk lox mai: ah nin: ka kix, " Tix kaux hoik tix kaux paw sa paw lao ka paox tix heue:. 44 Pui tix kaux kawx ang pon hoek ka Aux. Phan: Keeing: Cao: pa ploi: Aux hoek ang bluh nawh hoek, mai: Aux tag deeh kieh nawh kaoh singaix sidah khaix heue:. 45 Awrn: lox pa hoik tiem: daux Lai cao: jhai: khankix, 138'Mai: Siyiex tag gau ka kix khawm: uik.' Pui pa hoik mhong: mai: pa hoik pon gau ka Keeing: Cao: ku kaux hoek ka Aux heue:. 46 Pui tix kaux kawx hoik yaox ka Keeing: Cao: lheu: khaing: Kaw pa kaoh khaing Siyiex ang mawh, Nawh torn: hoik yaox ka Keeing: Cao: heue:. 47 Aux krai lox tete telai ka pex, kaw pa yumrhawm: hoik koe: ju leeing: ju leeing: phan:. 48 Aux mawh khaomun pa irn: ju heue:. 49 Tax du pex khankix dix ih Mannax daux tiag daux tu, viang mawh nan: kix hoik yum heue:. 50 In mawh khaomun pa lih hoek khaing: raoma: son sang pon pui tix ih kah, mai: ang yum tix bawg kawx heue:. 51 Aux mawh khaomun pa im: ju pa lih hoek khaing: raoma:, phan: pui ih khaomun in nawh tag irn: leeing: ju leeing: phan:. Khaomun pa sang tawx Aux mawh nex Aux heue:, Aux sang tawx son sang im: ju haktiex heue:."
52 Kheu in pui Yudax khankix tix kaux hoik tix kaux thung: thiang: paox tix ah nin:, "Pui in sang chix tawx ex ih nex Tix yuh ka mawx?" 53 Mawh kheu nan: Yesux tom: baox ah nin: ka kix, "Aux krai lox tete telai ka pex, phan: pex ang ih nex Kawn: kawn: pui, mai: ang nyaux nham: Nawh, pex ang koe: ju pa im: ka daux tokaux pex. 54 Pui pa ih nex mai: nyaux nharn: Aux, koe: ju leeing: ju leeing: phan:, mai: Aux tag deeh kieh nawh kaoh singaix sidah khaix heue:. 55 Grawh grawng: nawh nex Aux mawh ceu pa ih tete, mai: nharn: Aux mawh ceu pa nyaux tete. 56 Pui pa ih nex mai: pa nyaux nham: Aux ot ka daux Aux, mai: Aux ot ka daux nawh. 57 Awm: Keeing: Cao: pa im: Ju mawh pa ploi: Aux hoek, mai: Aux irn: ju kheu Keeing: Cao:, awrn: an kawx pa ih ka Aux kawx, im: ju kheu Aux heue:. 58 Khaomun in mawh pa lih hoek khaing: raorna:, mai: ang awm: mannax pa tax du pex khankix hoik ih mai: hoik yum, kheu pui pa ih khaomun in tag irn: ju leeing: ju leeing: phan: heue:."
Sidiex gau ka kawncau khankix
59 Yam krai Nawh lox in, mawh yam sidiex gau Nawh ka daux nyiex sidiex veng Kapeniorn heue:. 60 Yam mhong: kawncau Nawh khankix ka lox in, kix pa haoh pa hun: ah nin:, "Lox in mawh pa nu tete, pui mawx chix nghiet kah?" 61 Viang mawh kawx nan: kheu tawng Yesux ka daux tokaux Tix grawng: pa sa pa lao kawncau Nawh khankix grawh grawng: in Nawh tom: ah nin: ka kix, "Pex laux rhawm: kheu lox in lie?" 62 Phan: pex yaox Kawn: kawn: pui deeh haok hu: dee hoik ot Nawh phaoxka:, pex sang ce: yuh ka mawx? 63 Mawh khwan: pa kieh im: ju, nex ang koe: bwanson: tid tix. Lox pa hoik krai Aux ka pex mawh khwan: mai: mawh ju pa im: heue:. 64 Viang mawh kawx nan: ka daux pex koe: tiblah pa ang yumrhawm:." Mawh kheu hoik tawng Yesux tom: yam jah grawng: mawh pui mawx pa ang lai yumrhawm:, mai: kaw pa sang tik sang tawx Nawh heue:. 65 Nawh Cao: tom: ah nin:, "Mawh kheu jao in Aux hoik krai ka pex, pui tix kaux kawx ang pon hoek ka Aux, phan: ang mawh Keeing: Cao: pa kieh nawh hoek." 66 Mawh kheu in kawncau Nawh pa haoh pa hun: deeh tieh tix lih hu:, mai: ang deeh hu: mai: Nawh Cao: heue:. 67 Mai: Yesux ah nin: ka kawncau Nawh kao: kaux ra:, "Pex kawx sang lih hu: khaing: Aux lie?" 68 Simon Petrux pawk lox mai: ah nin: ka Nawh, "Simiang eue:, ex tag sang hu: ka pui mawx? Maix koe: gumlox ju leeing: ju leeing: phan:. 69 Mai: ex hoik yumrhawrn: mai: tawng grawng: mawh Maix Kaw pa Singax Singeh Siyiex heue:. 70 Yesux baox pawk lox mai: ah nin: ka kix, "Aux hoik laug tix teei pex kao: kaux ra: ang mawh lie? Viang mawh kawx nan: ka daux pex tix kaux mawh phicaox heue:." 71 Nawh sang ah ka Yudax Isakariut, kawn: Simon, kheu mawh nawh kaw pa sang tik sang tawx Nawh Cao:, mai: nawh mawh nang: tix kaux ka daux cub kawncau kao: kaux ra: heue:.
Yohan
Simin Ting 7
1 Khaix ceu in khankix Yesux hu: lailing ka daux meung Galilie:. Nawh ang hu: ka daux meung Yudax, kheu pui Yudax sawg tix pah Nawh Cao: yum heue:. 2 Yam an dex hoek poi Nyiex Bang: pui Yudax. 3 Mawh kheu nan: pux Nawh Cao: khankix ah nin: ka Nawh, "Lih hu: khaing: tin: mai: hu: ka meung Yudax heue:, son sang yaox kawncau mau soi: Maix khankix ka kaing pa yuh Maix heue:. 4 Grawh grawng: nawh pui tix kaux kawx, ang yuh tix ceu kawx dee glip, phan: nawh sang kieh pui tawng tix sidawng:. Phan: Maix yuh ceu in khankix, kieh haktiex tawng Maix sidawng: heue:." 5 Mawh kheu pie pux Nawh khankix kawx ang yumrhawm: ka Nawh Cao: kix tom: ah nan: heue:. 6 Mawh kheu nan: Yesux ah nin: ka kix, "Bawg yam Aux ang nyang bax hoek, viang mawh nan: bawg yam pex hoik khaw: ku bawg ku yam heue:. 7 Pui haktiex ang chix koeng ka pex, viang mawh kawx nan: kix koeng ka Aux, mawh kheu kham: Aux mhai: sakse: grawng: pa yuh kix mawh pa caox. 8 Pex haok hu: ka poi an heue:. Aux ang lai hu: ka poi an, kheu bawg yam Aux ang nyang bax naog." 9 Mai: khaix hoik ah Nawh nan:, Nawh Cao: deeh ot ka daux meung Galilie: heue:.
10 Viang mawh kawx nan: khaix hoik haok hu: pux Nawh khankix ka poi an, Nawh Cao: kawx haok hu: heue:. Viang mawh nan: ang Nawh hu: sidawng:, briex mox tix hu: heue:. 11 Mawh kheu nan: pui Yudax khankix sawg Nawh daux poi mai: chawk ah nin:, "Ot Nawh dee mawx?" 12 Mai: cub pui pa ot tan: thung: thiang: paox tix grawh grawng: Nawh Cao:. Tiblah ah, "Nawh mawh pui mhawm:," mai: tang: kaux tiblah ah, "Ang Nawh mawh pui mhawm:, viang mawh nan: Nawh thong: cub pui haoh pui hun: lud heue:." 13 Viang mawh kawx nan:, pui tix kaux kawx ang krai grawh grawng: Nawh dee sidawng:, kheu lhat kix ka pui Yudax khankix heue:.
14 Yam dex hoek bawg yam greung yuh poi, Yesux haok hu: ka daux nyiex bwan: mai: sidiex gau heue:. 15 Mawh kheu nan: pui Yudax khankix daox deng: ka lox Nawh mai: ah nin:, "Kaw in ang gau lai, Nawh chix tawng lai yuh ka mawx?" 16 Mawh kheu nan: Yesux baox pawk lox ka kix mai: ah nin:, "Lox diex lox gau Aux in ang mawh cie Aux, viang mawh nan: mawh cie Kaw pa ploi: Aux hoek heue:. 17 Phan: pui tix kaux kaux koe: rhawm: tix yuh alo Nawh Cao:, nawh tag sang tawng lox diex lox gau Aux in, mawh pa kaoh khaing: Siyiex lie, phan: ang mawh nan: mawh pa lak keud Aux tix ah lie. 18 Kaw pa lak keud tix krai khaing: tokaux tix, mawh pa sang sawg son min: plakngai: tokaux tix. Viang mawh kawx nan:, kaw pa sawg min: plakngai: son kaw pa ploi: nawh hoek mawh pa mawh pa meh, mai: ka daux kaw an ang koe: pa ang rah ang see tix ceu kawx heue:. 19 Mose hoik tawx lox lai been li ka pex ang mawh lie? Viang mawh kawx nan: ang pex hawt yuh awm: lox lai been li an tix kaux kawx. Pex lai sawg tix pah Aux yum yuh ka mawx?" 20 Cub pui haoh pui hun: an baox pawk lox mai: ah nin:, "Maix koe: phicaox heue:, pui mawx sawg tix pah Maix yum?" 21 Yesux baox pawk lox mai: ah nin: ka kix, "Aux hoik yuh kaing tix ceu mai: pex khawm: mu: khawm: miang daox deng: kah heue:. 22 Mose hoik tawx been pa pat hak ka pex, viang mawh kawx nan: ang mawh pa kaoh khaing: Mose, mawh pa kaoh khaing: tax du pex, mai: viang mawh singaix twah kawx, pex pat hak pui heue:. 23 Phan: sang pat hak singaix twah, son ang sang yuh laux lox lai been li pa tawx Mose, kheu cox Aux pui moi: singaix twah pex songrhawm: ka Aux lie? 24 Paw prawng paw ca: hawt grang pa yaox pex plak praix, prawng rah prawng see heue:."
25 Yam an pui veng Yerusaliem tiblah ah nin:, "In mawh Kaw pa sawg kix tix pah yum ang mawh lie? 26 Jhak heue:, Nawh krai lox dee sidawng:, mai: ang kix tie ah tid tix ka Nawh heue:. Khex hoik tawng simiang khankix grawng: mawh Nawh Khrit tete lie?" 27 Viang mawh kawx nan:, Pui in kaoh khaing: dee mawx ex hoik tawng. Viang mawh nan:, yam sang hoek Cao: Khrit, pui tix kaux kawx ang tawng grawng: hoek Nawh khaing: dee mawx." 28 Yam sidiex gau Yesux ka daux nyiex bwan:, Nawh kok yo mai: ah nin:, "Pex tawng ka Aux, mai: kaoh Aux khaing: dee mawx kawx, pex hoik tawng heue:. Mai: Aux hoek kheu alo tokaux Tix ang mawh, viang mawh kawx nan: Kaw pa ploi: Aux hoek mawh pa mawh pa meh heue:, mai: pex ang tawng ka Nawh. 29 Aux tawng Nawh heue:, mawh kheu kaoh Aux khaing: Nawh, mai: Nawh mawh pa ploi: Aux hoek heue:." 30 Mawh kheu nan: kix sawg tix teei tix giex Nawh Cao:, viang mawh nan:, kheu ang bawg yam nari Nawh nyang bax hoek, pui tix kaux kawx ang pon tix giex Nawh. 31 Viang mawh kawx nan: ka daux cub pui haoh pui hun: an, pui tom: nie yumrhawm: ka Nawh Cao: mai: kix ah nin:, "Yam tag sang hoek Cao: Khrit, Nawh tag sang yuh ex yaox mhai: pa daox pa am: lheu: khaing: pa yuh Pui in lie?" 32 Yam mhong: Pharishie: lox sikah lox maw: pui khankix grawh grawng: Nawh, cao: giex kaing: li pa ting khankix, mai: Pharishie: khankix ploi: pwicau khankix hu: tix giex Nawh. 33 Yam an Yesux ah nin: kakix, "Aux baox ot tau mai: pex tivud khaing:, mai: Aux deeh hu: ka Kaw pa ploi: Aux hoek. 34 Pex tag sang sawg Aux, viang mawh nan:, ang pex lai yaox Aux, mai: dee ot Aux, ang pex pon tix hoek kah. 35 Mawh kheu nan: pui Yudax khankix tix kaux hoik tix kaux ah nin: ka paox tix, "Pui in sang hu: dee mawx, son ang ex lai pon tix yaox Nawh? Nawh sang hu: ka pui pa hoik prung: prang: hu: sinax pui Helasax, mai: sidiex gau ka pui Helasax khankix lie? 36 Lox pa ah Nawh nin:, 'Pex tag sang sawg Aux, viang mawh nan: ang pex lai yaox Aux, mai: dee ot Aux ang pex pon tix hoek kah,' sang ah Nawh ka mawx?"
37 Singaix sidah yuh poi, singaix pa ting pa lhaong:, Yesux cung mai: kok yo ah nin:, "Phan: pui tix kaux kaux sang nyaux nie rawm:, kieh nawh hoek ka Aux mai: nyaux heue:. 38 Pui pa yumrhawm: ka Aux, awm: hoik koe: ka daux Phuk lai singang: khri:, 'Rawm: klawng: pa im: ju tag sang lih hu: ka daux nawh heue:.'" 39 Viang mawh kawx nan:, Nawh sang krai grawh grawng: Khwan: Cao:, pa pui pa sang yumrhawm: ka Nawh tag sang pon. Grawh grawng: nawh yam an ang nyang bax tawx Khwan: Cao:, kheu ang nyang bax tawx min: plakngai: Yesux heue:.
Krax pa yaox pui hun: ang awm: paox
40 Mawh kheu nan: pui daux cub pui haoh pui hun: tiblah yam mhong: kix lox ceu in, kix ah nin:, "Kaw in mawh Cao: Jhai: an tete heue:." 41 Tang: kaux ah nin:, "In mawh Khrit heue:," viang mawh kawx nan:, tiblah ah nin:, "Khex sang lih hoek Cao: Khrit khaing: daux meung Galilie: lie? 42 Hoik krai ka daux Phuk lai sigang: khri:,
139grawng: sang hoek Cao: Khrit ka daux simie ceucat Dawit,
mai: khaing: yaong: dee ot Dawit, Bieliehiem, ang mawh lie?" 43 Mai: cub pui haoh pui hun: an tang: gwieh paox tix kheu Nawh heue:. 44 Mai: kix tiblah simie tix teei Nawh, viang mawh kawx nan:, tix kaux kawx ang giex Nawh. 45 Yam an puicau khankix deeh hoek ka cao: giex kaing: li pa ting, mai: ka Pharishie: khankix, mai: kix chawk ka kix ah nin:, "Yuh pa tix pex ang viex Nawh hoek?" 46 Mai: puicau khankix baox pawk lox mai: ah nin:, "Pui tix kaux kawx ang sax krai lox awm: Nawh tix bawg kawx." 47 Mai: Pharishie: khankix baox pawk lox mai: ah nin:, "Pex khex nghiet lox pie lox lhen: Nawh lie?" 48 Simiang mai: Pharishie: khankix yumrhawm: ka Nawh tix kaux kaux lie? 49 Viang mawh kawx nan:, cub pui haoh pui hun: pa ang tawng lox lai been li khankix pon pa lawg pa jhax heue:. 50 Nikawdimux (pa ot ka daux cub kix tix kaux, pa hoik hoek ka Yesux yam pon sawm:), ah nin:, 51 "Lox lai been li ex, prawng ca: mai: ciyang ka pui, ka: sang mhong: lox nawh, mai: tawng grawng: pa yuh nawh lie?" 52 Kix baox pawk lox mai: ah nin: ka nawh, "Maix kawx mawh pui Galilie: lie? Sawg tix yaox son tokaux tix, mai: maix sang tawng cao: jhai: ang lih khaing: meung Galilie: tix kaux kawx."
53 Mai: kix tang: ing: ka daux nyiex pui mawx nyiex pui an heue:.
Yohan
Simin Ting 8
Pon giex bon: pa phit vao
1 Viang mawh kawx nan:, Yesux hu: ka gawng Sanlun. 2 Mai: yam pon ngawb caocao Nawh deeh hoek tix laig ka daux nyiex bwan:, mai: pui khawm: uik khawm: leeing: hoek ka Nawh, mai: Nawh ngawm mai: gau ka kix heue:. 3 Mai: pui tiem: lai mai: Pharishie: khankix viex bon: tix kaux pa hoik yaox kix yam phit yam vao nawh, mai: kieh nawh ot sinax pui tan:. 4 Mai: kix ah nin: ka Nawh Cao:, "Sara Cao: Gau eue:, pon giex bon: in dom: yam phit yam vao nawh heue:. 5 Daux lai been li Mose nhie: ex teei simaox dheem: pui pa yuh nan: yum. Viang mawh kawx nan:, Maix sang ah grawh grawng: nawh yuh ka mawx?" 6 Kix ah nin: kheu sang cheuk kix tix yaox Nawh, mai: son sang yaox dee deuh phimap ka piang Nawh Cao: heue:. Yam an Yesux nom: mai: teei gien: taix Tix tiem: piang tiex. 7 Viang mawh kawx nan: kheu ca: chawk kix Nawh lawx lawx, Nawh cung mai: ah nin: ka kix, "Kaw pa ang koe: phimap ka daux pex, kieh nawh teei simaox dheem: ka nawh ka: ha:." 8 Mai: Nawh Cao: deeh nom: mai: tiem: piang tiex. 9 Mai: kix pa hoik mhong: lox an, rhawm: dee chix keud chix tawng kix, deeh kieh doh kah phimap tokaux tix, mai: tix kaux hoik tix kaux lih hu:, jah ka pui riex ju lheu: khaing: paox tix, tom: sida hoek ka pui awn: ju. Mai: kix prah Yesux ot nong: nong:, mai: bon: an cung sinax tan: tix kaux khaing: heue:. 10 Yam an Yesux yaog tix kaoh, mai: ang yaox pui tang: kaux tix kaux kawx, yaox ngie bon: an tix kaux khaing:, mai: Nawh Cao: ah nin: ka nawh, "Bon: eue:, pui pa deuh phimap piang maix ot dee mawx? Pui tix kaux kawx ang prawng ang ciyang see: maix lie?" 11 Nawh baox pawk lox mai: ah nin:, "Tix kaux kawx ang prawng ang ciyang, Simiang eue:." Mai: Yesux baox ah nin:, "Aux ka ang ciyang maix, hu: heue:, mai: khaix in paw baox yuh phimap tix bawg kawx."
Pa Riang haktiex
12 Yam an Yesux baox ah nin: ka kix tix bawg, "Aux mawh Pa Riang haktiex heue:. Kaw pa hawt khaix Aux tag ang hu: ka daux pa vhaik, viang mawh nan: nawh tag sang pon pa riang pa im: ju heue:." 13 Pharishie: khankix ah nin: ka Nawh Cao:, "Maix kham: mhai: sakse: grawh grawng: tokaux Tix, mhai: sakse: Maix ang mawh pa mawh pa meh heue:." 14 Yesux baox pawk lox mai: ah nin: ka kix, "Viang Aux kham: mhai: sakse: grawh grawng: tokaux Tix, mhai: sakse: Aux mawh pa mawh pa meh, kheu tawng Aux dee kaoh hoek Aux, mai: dee sang hu: Aux heue:. Viang mawh kawx nan:, ang pex tawng dee kaoh hoek Aux mai: dee sang hu: Aux. 15 Pex prawng ciyang hawt nex heue:, Aux kienie ang prawng ang ciyang ka pui tix kaux kawx. 16 Viang mawh kawx nan:, phan: Aux prawng ciyang, pa prawng pa ciyang Aux mawh pa mawh pa meh, kheu ot Aux nong: nong: ang mawh, Keeing: Cao: pa ploi: Aux hoek ot tau mai: Aux heue:. 17 Mai: hoik tiem: daux lai been li pex, grawng: lox kham: mhai: sakse: pui ra: kaux mawh pa mawh pa meh. 18 Aux mawh Kaw pa kham: mhai: sakse: grawh grawng: tokaux Tix, mai: Keeing: Cao: pa ploi: Aux hoek kham: mhai: sakse: ka grawng: Aux heue:." 19 Kheu nan: kix baox chawk Nawh Cao: ah nin:, "Keeing: Maix ot dee mawx?" Yesux baox pawk lox mai: ah nin:, "Pex ang tawng ka Aux, viang ka Keeing: Aux kawx pex ang tawng. Phan: pex tawng ka Aux, Keeing: Aux kawx, pex ka sang tawng heue:." 20 Yam sidiex gau Nawh daux nyiex bwan:, Nawh krai lox ceu in ka daux lawg dee deuh mau. Tix kaux kawx ang giex Nawh kheu bawg yam Nawh ang nyang bax hoek heue:.
21 Nawh baox ah nin: ka kix tix bawg, "Aux sang hu: heue:, mai: pex tag sang sawg ka Aux, mai: pex tag yum ka daux phimap tix. Dee sang hu: Aux ang pex pon tix hoek kah." 22 Mawh kheu nan: pui Yudax khankix ah nin:, "Nawh sang plaux tokaux tix yum lie? Kheu ah Nawh, 'Dee sang hu: Aux ang pex pon tix hoek kah.'" 23 Mai: Nawh ah nin: ka kix, "Pex mawh pa kaoh khaing: plak greem:, Aux mawh pa kaoh khaing: dee long:. Pex mawh pui haktiex in, ang Aux mawh pui haktiex in. 24 Mawh kheu nan: Aux tom: hoik krai ka pex, 'Pex tag yum ka daux phimap tix.' Graw grawng: nawh phan: pex ang yumrhawm: grawng: mawh Aux Kaw an, pex tag sang yum ka daux phimap tix heue:." 25 Mawh kheu nan: kix baox pawk lox ah nin: ka Nawh Cao:, "Maix mawh mawx?" Yesux baox ah nin: ka kix, "Aux mawh awm: pa hoik krai ka pex tom: yam jah heue:. 26 Aux koe: lox pa krai, pa prawng grawh grawng: pex kied nie tete, viang mawh kawx nan:, Kaw pa ploi: Aux hoek mawh pa mawh pa meh, mai: ceu pa mhong: Aux mai: Nawh, Aux sidiex ceu an khankix ka haktiex heue:." 27 Ang kix tawng grawng: krai Nawh grawh grawng: Keeing: Cao: ka kix. 28 Mawh kheu nan: Yesux ah nin: ka kix, "Khaix hoik yaog pex Kawn: kawn: pui, yam an pex tag sang tawng grawng: Aux mawh Kaw an, mai: grawng: pa ang Aux yuh alo tokaux Tix tix ceu kawx, viang mawh kawx nan:, Aux sidiex ngie ceu pa gau Keeing: Cao: ka Aux khankix khaing:. 29 Mai: Kaw pa ploi: Aux hoek ot tau mai: Aux, ang Nawh prah Aux ot nong: nong:, kheu yuh Aux ceu pa khaw: rhawm: Nawh ku jheeng: jheeng: heue:." 30 Yam krai Nawh ceu in khankix pui yumrhawm: ka Nawh Cao: haoh hun: heue:.
Pa mawh pa meh kieh pui luan
31 Mawh kheu nan: Yesux ah nin: ka pui Yudax pa hoik yumrhawm: ka Nawh khankix, "Phan: pex ot ka daux gumlox Aux, pex mawh kawncau mau soi: Aux tete heue:. 32 Mai: pex tag sang tawng pa mawh pa meh, mai: pa mawh pa meh an tag sang kieh pex luan." 33 Mai: kix pawk lox ka Nawh Cao: ah nin:, "Ex mawh simie ceucat Abraham, mai: ang ex sax yuh siliex yuh cawng ka pui tix kaux kawx. Maix ah, 'Tag sang kieh pex luan,' yuh ka mawx?" 34 Yesux baox pawk lox mai: ah nin: ka kix, "Aux krai lox tete telai ka pex, pui pa yuh phimap phigrham: ku kaux daux pui mawh siliex phimap heue:. 35 Siliex kienie, pon tix ot ka daux nyiex jheeng: jheeng: ang mawh. Pa mawh kawn: pon tix ot ka daux nyiex jheeng: jheeng: heue:. 36 Mawh kheu nan: phan: Kawn: Cao: kieh pex luan, pex pon luan tete. 37 Aux tawng pex mawh simie ceucat Abraham, viang mawh kawx nan:, pex sawg tix pah Aux yum kheu gumlox Aux ang ot ka daux pex. 38 Aux sidiex ceu pa hoik yaox Aux mai: Keeing: Aux khankix, viang pex kawx yuh ceu pa hoik yaox pex ka keeing: pex heue:." 39 Kix baox pawk lox mai: ah nin: ka Nawh, "Abraham mawh keeing: ex." Yesux baox ah nin: ka kix, "Phan: pex mawh kawn: Abraham, pex khaw: tix yuh awm: pa yuh Abraham. 40 Viang mawh kawx nan:, yamin pex sawg tix pah Aux yum, Pui pa hoik krai pex ceu pa mawh pa meh, pa hoik mhong: Aux ka Siyiex heue:. Abraham ang lai yuh nan:. 41 Pex yuh khaing: ceu pa yuh keeing: pex heue:." Kix baox pawk lox mai: ah nin: ka Nawh Cao:, "Ex ang mawh kawn: pa phit pa vao, pa nghe: ngie, Keeing: ex koe: tix kaux khaing: pa mawh Siyiex heue:." 42 Yesux baox ah nin: ka kix, "Phan: Siyiex mawh Keeing: pex, pex tag sang moh Aux, kheu kaoh Aux khaing: Siyiex mai: hoek heue:. Grawh grawng: nawh, Aux hoek kheu alo tokaux Tix ang mawh, viang mawh kawx nan: mawh Nawh Cao: pa ploi: Aux hoek heue:. 43 Mawh kheu pa tix pex lai ang tawng lox Aux? Mawh kheu ang pex chix nghiet lox Aux heue:. 44 Pex lih hoek khaing: keeing: pex pa mawh phicaox, mai: pex simie tix yuh alox keeing: pex. Tom: yam jah nawh mawh pa pah pui yum, mai: nawh ang cung ka daux pa mawh pa meh, kheu pa mawh pa meh ang koe: ka daux nawh. Yam nawh ah lox pie lox lhen:, nawh lak ah lox tokaux tix, kheu mawh nawh pa chix pie chix lhen:, mai: keeing: pa pie pa lhen: heue:. 45 Viang mawh kawx nan:, kheu krai Aux pa mawh pa meh, pex ang yumrhawm: ka Aux. 46 Ka daux pex mawh mawx pa pon jhawp pon krai grawng: koe: Aux phimap? Phan: Aux krai lox pa mawh pa meh, yuh pa tix pex lai ang yumrhawm: ka Aux? 47 Kaw pa dex pa dawd mai: Siyiex chix nghiet lox Siyiex, Kheu ang pex dex dawd mai: Siyiex pex ang chix nghiet lox Nawh heue:." 48 Pui Yudax khankix baox pawk lox mai: ah nin: ka Nawh Cao:, "Pa ah ex, Maix mawh pui Samarix, mai: pa koe: phicaox, khaw:, ang mawh lie?" 49 Yesux baox pawk lox ah nin:, "Ang Aux koe: phicaox, viang mawh kawx nan: Aux yungyi: ka Keeing: Aux, mai: pex yuh pa ang yung: ang yi: ka Aux heue:. 50 Viang mawh nan: ang Aux sawg min: plakngai: tokaux Tix. Koe: tix kaux pa sawg min: plakngai: son Aux, pa sang prawng sang ciyang. 51 Aux krai lox tete telai ka pex, phan: pui priex tix hawt lox Aux, nawh tag ang yaox krax yum tix bawg kawx heue:." 52 Pui Yudax khankix baox ah nin: ka Nawh Cao:, "Yamin ex tawng Maix koe: phicaox tete, Abraham mai: cao: jhai: khankix hoik yum, mai: Maix ah, 'Phan: pui priex tix hawt lox Aux ang yaox tix cim krax yum tix bawg kawx.' 53 Khex lheu: ting Maix khaing: keeing: ex Abraham pa hoik yum lie? Mai: cao: jhai: khankix kawx hoik yum. Maix sang yuh tokaux Maix mawh mawx?" 54 Yesux baox pawk lox mai: ah nin:, "Phan: Aux yaogyaw tokaux Tix, pa yaogyaw an ang koe: bwanson: tid tix. Mawh Keeing: Aux pa yaogyaw Aux, Kaw pa ah pex mawh Siyiex pex heue:. 55 Pex ang lai tawng Nawh, viang mawh kawx nan: Aux tawng Nawh, mai: phan: Aux ah, 'ang Aux tawng Nawh,' Aux tag awm: nang: pex pa mawh pui pie pui lhen:. Aux tawng Nawh mai: priex tix hawt lox Nawh heue:. 56 Keeing: pex Abraham gauxrhawm: kheu tag sang yaox nawh singaix Aux, nawh hoik yaox mai: gauxrhawm: kah heue:. 57 Kheu nan: pui Yudax khankix ah nin: ka Nawh Cao:, "Pie ju Maix ang nyang bax koe: tiphwan: (50) num. mai: Maix khex hoik yaox Abraham lie?" 58 Yesux baox ah nin: ka kix, "Aux krai lox tete telai ka pex, ka: ang Abraham nyang bax keh, Aux hoik dawg mawh heue:." 59 Mawh kheu nan: kix tom: teei simaox son sang dheem: Nawh kah. Viang mawh kawx nan: Yesux mox tokaux Tix, mai: hu: sinax kix mai: lih khaing: daux nyiex bwan: heue:.
Yohan
Simin Ting 9
Pui dug pon krax pa cox moi:
1 Yam lawng Yesux krax Nawh yaox pui pa dug ngai: tom: yam keh tix tix kaux. 2 Mai: kawncau Nawh khankix chawk Nawh ah nin:, "Rabi eue:, kaw in dug ngai: kheu phimap pui mawx? Dug kheu phimap nawh lie? Dug kheu phimap miex keeing: nawh lie?" 3 Yesux deeh pawk lox mai: ah nin:, "Pui in ka ang yuh phimap, miex keeing: nawh ka ang yuh phimap, viang mawh kawx nan: son sang sidawng: kaing Siyiex ka daux nawh, nawh tom: yuh nin: heue:. 4 Aux tag yuh kaing: Kaw pa ploi: Aux hoek yam mawh pon singaix. Ponsawm: tag sang hoek yam ang pui tix kaux kawx chix yuh kaing heue:. 5 Yam ot Aux piang haktiex, Aux mawh pa riang haktiex heue:." 6 Khaix hoik ah Nawh nan:, Nawh baig rawmmya: piang tiex mai: yuh tiex lan, mai: kraix ka ngai: pui pa dug ngai: an. 7 Mai: ah nin: ka nawh, "Hu: khoek ka daux rawm: dung Silawng heue:." (Dee bleeh Silawng mawh ploi: hu:). Mawh kheu nan: nawh hu: khoek ngai: tix, mai: ngai: nawh chix yaox yam deeh hoek nawh heue:. 8 Mawh kheu nan: paoxplawg paoxnyhawm: nawh, mai: kix pa hoik yaox nawh glangka: an yam caung nawh tix ih, ah nin:, "Kaw in mawh kaw pa ngawm mai: caung tix ih ang mawh lie?" 9 Tang: kaux tiblah ah, "Mawh nawh heue:." Tang: kaux tiblah ah, "Ang lai mawh nawh, mawh pui pa awm: nawh heue:." Tokaux nawh ah nin:, "Aux mawh kaw an heue:." 10 Mawh kheu nan: kix chawk nawh ah nin:, "Phan: mawh nan: hoik paoh ngai: maix yuh ka mawx?" 11 Nawh baox pawk lox ah nin:, "Pui pa kaux Yesux Nawh yuh tiex lan mai: kraix ka ngai: aux mai: ah nin: ka aux, 'Hu: khoek ka daux rawm: dung Silawng heue:,' kheu nan: aux hu: khoek mai: ngai: aux chix yaox heue:." 12 Mai: kix chawk nawh ah nin:, "Ot Nawh dee mawx?" Mai: nawh pawk lox ah nin:, "Ang aux tawng heue:."
Kheu pui dug kix thung: thiang: paox tix
13 Kix teei kaw pa hoik dugngai: glangka: an, mai: viex nawh hu: ka Pharishie: khankix heue:. 14 Singaix yuh Yesux tiex lan mai: cox ngai: nawh blah mawh singaix twah, 15 mawh kheu nan: Pharishie: khankix baox deeh chawk nawh ah nin:, "Ngai: maix pon tix chix yaox yuh ka mawx?" Mai: nawh ah nin: ka kix, "Nawh kraix tiex lan ka ngai: aux, mai: aux hu: khoek ngai: tix, mai: aux pon tix chix yaox." 16 Mawh kheu nan: Pharishie: tiblah ah nin:, "Pui an ang mawh pa hoek khaing: Siyiex, kheu ang Nawh twah klaung: singaix twah." Viang mawh kawx nan: pui tang: kaux ah nin:, "Pui caox chix yuh mhai: pa daox pa am: yuh nin: yuh ka mawx?" Kheu nan: kix tix kaux hoik tix kaux tang: lox siyox moing ang khaw: paox tix. 17 Mawh kheu nan: kix baox deeh chawk pui pa hoik dugngai: an ah nin:, "Kheu cox Nawh ngai: maix blah maix sang ah ka mawx grawng: Nawh?" Mai: nawh pawk lox mai: ah nin:, "Nawh mawh Cao: Jhai: heue:." 18 Viang mawh kawx nan:, pui Yudax khankix ang yumrhawm: grawng: hoik dugngai: nawh tix bawg, mai: grawng: hoik pon nawh tix chix yaox, ka: ang kix nyang bax kok miex keeing: kaw pa hoik pon tix yaox, 19 mai: chawk kiex ah nin:, "In mawh kawn: pax, pa ah pax, 'dugngai: tom: yam keh' lie? Phan: mawh nan: yamin nawh lai chix yaox yuh ka mawx?" 20 Miex keeing: nawh pawk lox mai: ah nin:, "Yiex tawng kaw in mawh kawn: yiex pa dugngai: tom: yam keh heue:. 21 Viang mawh kawx nan:, mawh kheu pa tix nawh chix yaox yamin ang yiex tawng, mai: yiex ang tawng Kaw pa cox ngai: nawh blah heue:. Nawh hoik riex ju, chawk ka nawh mai: nawh tag krai grawh grawng: tokaux tix heue:." 22 Miex keeing: nawh ah nan: kheu lhat kiex ka pui Yudax khankix, grawh grawng: nawh pui Yudax khankix hoik kum: hoik kawng: paox tix yuh nin:, phan: pui tix kaux kaux rieb tix teei Yesux mai: ah Nawh mawh Cao: Khrit, tag sang grheu: nawh lih khaing: daux nyiex sidiex heue:. 23 Mawh kheu in miex keeing: nawh ah, "Nawh hoik riex ju, chawk ka nawh mai: nawh tag krai grawh grawng: tokaux tix heue:." 24 Mai: kix baox kok pui pa hoik dugngai: an hoek ra: bawg tix bawg, mai: ah nin: ka nawh, "Yaogyaw Siyiex heue:, ex hoik tawng Nawh mawh Pui phimap phigrham:." 25 Mawh kheu nan: pui dugngai: an tom: baox pawk lox mai: ah nin:, "Mawh Nawh Pui phimap phigrham: lie, Pui mhawm: lie, ang aux tawng. Aux tawng tix ceu khaing:, glangka: in aux dugngai:, mai: yamin aux hoik chix yaox heue:." 26 Kix baox chawk nawh ah nin:, "Nawh yuh ka mawx ka maix? Nawh cox ngai: maix blah yuh ka mawx?" 27 Nawh pawk lox ka kix ah nin:, "Pie yamin aux hoik krai ka pex mai: pex ang nghiet. Mawh kheu patix pex simie tix baox deeh mhong:? Viang mawh pex kawx simie tix yuh kawncau Nawh lie?" 28 Yam an kix blin lox ka nawh mai: ah nin:, "Maix mawh kawncau Nawh, ex kienie, mawh kawncau Mose. 29 Ex tawng hoik sikah Siyiex mai: Mose, viang mawh kawx nan: Pui in kaoh khaing: dee mawx ang ex tawng." 30 Kaw an baox pawk lox mai: ah nin: ka kix, "Pex ang tawng Nawh kaoh khaing: dee mawx, viang mawh kawx nan: Nawh hoik cox ngai: aux blah, kheu nan: koe: dee daox deng: kah. 31 Ex tawng grawng: ang Siyiex nghiet lox pui phimap phigrham: khankix, viang mawh kawx nan: phan: pui krub ka Siyiex mai: hawt yuh alo Nawh, Nawh nghiet lox kaw an heue:. 32 Tom: yam jah tix kaw: haktiex dix, ang sax mhong: tix bawg kawx, grawng: pa chix cox tix kaux kawx, ka pui pa hoik dugngai: tom: yam keh tix kieh ngai: nawh blah tix kaux kawx heue:. 33 Phan: Pui in ang mawh pa hoek khaing: Siyiex, Nawh ang tau tix chix yuh tix ceu kawx." 34 Kix baox pawk lox mai: ah nin: ka nawh, "Maix mawh pa keh ka daux phimap phigrham:, mai: maix gau ka ex lie?" Mai: kix grheu: tix tik nawh khaing: nyiex sidiex heue:.
Yesux krai nghaox ka mawh Tix Siyiex
35 Yesux mhong: grawng: grheu: kix tix tik nawh, mai: Nawh Cao: yaox nawh mai: chawk nawh ah nin:, "Yumrhawm: maix ka Kawn: Siyiex lie?" 36 Nawh baox pawk lox mai: chawk ah nin:, "Simiang eue:, son sang yumrhawm: aux ka Nawh, Nawh mawh mawx?" 37 Mai: Yesux baox ah nin: ka nawh, "Maix hoik yaox Nawh, mai: Kaw pa sikah mai: maix yamin mawh Nawh heue:." 38 Kaw an baox ah nin:, "Simiang eue:, aux yumrhawm: heue:." Mai: nawh krub ka Nawh Cao:. 39 Mai: Yesux baox ah nin:, "Aux hoek piang haktiex in son sang prawng sang ciyang heue:, yuh ka mawh ngai: kix pa ang chix yaox khankix tag sang chix yaox, mai: yuh ka mawx kix pa chix yaox khankix, tag sang dug kah heue:. 40 Pharishie: pa ot mai: Nawh khankix tiblah mhong: lox in mai: chawk ah nin:, "Viang ex kawx hoik dugngai: lie?" 41 Yesux baox pawk lox mai: ah nin: ka kix, "Phan: ngai: pex dug tete, pex ang koe: phimap, viang mawh kawx nan: yamin pex ah, 'Ex chix yaox tix,' kheu nan: phimap pex kawn: ca: koe: heue:."
Yohan
Simin Ting 10
Lox phektem: ka Cao: liang yung: pa mhawm:
1 "Aux krai lox tete telai ka pex, kaw pa ang laig daux siviex kawg yung:, mai: haok laig tang: dah mawh pui briex pui lak heue:. 2 Viang mawh kawx nan:, kaw pa laig ka daux siviex mawh cao: pa liang yung: heue:. 3 Pui pau siviex paoh siviex son nawh, mai: yung: khankix nghiet lox nawh, mai: nawh kok ceukaux yung: cie nawh mai: thong: kix lih. 4 Khaix hoik kieh nawh yung: cie tokaux nawh lih khawm: uik nawh hu: sivoe kix, mai: kheu yung: khankix tawng lox nawh kix tom: hawt nawh heue:. 5 Viang mawh kawx nan:, kix ang hawt pui pa ang kix tawng kix meed, kix to: hu: khaing: nawh heue:, kheu ang kix tawng lox, pui pa ang kix tawng kix meed." 6 Yesux krai lox phektem: in ka kix, viang mawh kawx nan: ang kix tawng dee bleeh lox ceu pa krai Nawh ka kix heue:.
7 Kheu nan: Yesux baox ah nin: ka kix, "Aux krai lox tete telai ka pex, Aux mawh siviex yung: heue:. 8 Can pui pa hoek ka: sang hoek Aux khawm: uik mawh pui briex mai: pui tud pui rhim:, viang mawh kawx nan: yung: khankix ang nghiet lox kix. 9 Aux mawh siviex, pui mawh ang ah phan: nawh laig daux Aux, nawh tag hoek krax taoh, mai: laig laig lih lih, mai: yaox dee pon tix ih. 10 Pui briex hoek ngie son sang briex, mai: pah yum, mai: yuh laux khaing:. Aux hoek son sang pon kix pa im: ju, mai: son sang pon kix ju pa im: pa nie lheu: khaing: in heue:. 11 Aux mawh cao: pa liang yung: pa mhawm: heue:. Cao: pa liang yung: pa mhawm: tik ju tix yum son yung: cie nawh khankix. 12 Kaw pa mawh pui cang: pui caing, pa ang mawh cao: liang yung:, kheu yung: khankix ang mawh cie nawh, yam yaox hoek soxla nawh grham: yung: khankix mai: to: heue:, mai: soxla kiied yung: mai: kieh yung: khankix prung: prang: tang: to: heue:. 13 Nawh to: kheu mawh nawh pui cang: pui caing mai: ang keud son yung: khankix heue:. 14 Aux mawh cao: liang yung: pa mhawm: heue:, mai: Aux tawng cie Aux, mai: cie Aux tawng Aux. 15 Awm: tawng Keeing: Cao: ka Aux, Aux tawng ka Keeing: Cao:, mai: Aux tik ju tix yum son yung: khankix heue:. 16 Mai: Aux kawn: koe: yung: pa ang neuex daux kawg yung: in, viang mawh kix kawx Aux tag lai viex hoek, mai: kix tag sang nghiet lox Aux, mai: kix tag sang lih mawh cub yung: tix cub khaing:, mai: pa liang yung: tix kaux khaing:. 17 Keeing: Cao: moh Aux kheu tik Aux ju tokaux Tix tix yum, son sang baox deeh teei Aux ka tix bawg heue:. 18 Tix kaux kawx ang teei ju Aux khaing: Aux, viang mawh kawx nan: mawh pa lak tik Aux tix yum tokaux Tix tiru. Aux koe: siawp sibrawm tix tik tix deuh ju Aux, mai: Aux koe: siawp sibrawm tix deeh teei ju Aux heue:. In mawh lox tawm: pa pon Aux khaing: Keeing: Aux heue:."
19 Mawh kheu lox ceu in kix pui Yudax khankix baox tang: lox siyox moing ang khaw: paox tix heue:. 20 Kix pa haoh pa hun: ah nin:, "Nawh koe: phicaox mai: yhot heue:, pex lai nghiet lox Nawh yuh ka mawx?" 21 Tang: kaux ah nin:, "Lox Nawh in ang mawh lox pui pa laig phicaox. Phicaox khex chix cox pui dugngai: blah ngai: lie?"
22 Yam an mawh yam yuh kix poi tawx pong ka daux veng Yerusaliem, 23 mai: yam an mawh bawg yam kwat heue:. Mai: yam an Yesux hu: lai ling ka daux nyiex bwan: piang grah Sawlamun. 24 Mawh kheu nan: pui Yudax khankix hoek tix ot vung viang Nawh Cao: mai: ah nin: ka Nawh, "Pa ang Maix sang kieh ex tawng grawh grawng: Maix sidawng: tag sang koe: miex grheung:? Phan: Maix mawh Cao: Khrit krai ka ex sidawng: heue:." 25 Yesux pawk lox ah nin: ka kix, "Aux hoik krai ka pex, mai: ang pex yumrhawm: kah. Kaing pa yuh Aux ka daux ceukaux Keeing: Cao: mawh mhai: sakse: grawng: Aux heue:. 26 Viang mawh kawx nan:, awm: hoik krai Aux ka pex, pex ang yumrhawm: kheu ang pex mawh yung: Aux. 27 Yung: Aux nghiet lox Aux, mai: Aux tawng ka kix, mai: kix hawt khaix Aux heue:. 28 Mai: Aux tawx ju leeing: ju leeing: phan: ka kix, mai: kix ang hoek krax laux krax leeing: tix bawg kawx. Lheu: khaing: an pui tix kaux kawx ang pon rud tix teei kix khaing: daux tawm: taix Aux heue:. 29 Keeing: Aux pa tawx yung: khankix ka Aux, mawh pa lheu: ting khaing: khawm: uik, mai: pui tix kaux kawx ang pon rud tix teei kix khaing: daux tawm: taix Keeing: Aux.
Yesux hoik mawh tix kaux tau mai: keeing: Cao:
30 Aux mai: Keeing: Aux mawh tix kaux khaing:." 31 Yam an pui Yudax khankix baox deeh teei simaox son sang dheem: Nawh Cao: kah. 32 Yesux baox pawk lox mai: ah nin: ka kix, "Aux hoik yuh pex yaox kaing pa mhawm: pa kaoh khaing: Keeing: Aux kied nie tete. Ka daux kaing pa yuh Aux khankix an, mawh kheu grawh grawng: kaing yuh ka mawx, pex sang teei simaox dheem: Aux kah?" 33 Pui Yudax khankix baox pawk lox mai: ah nin: ka Nawh Cao:, "Ex sang dheem: Maix ka simaox kheu kaing pa mhawm: ang mawh. Viang mawh kawx nan: mawh kheu salao Maix ka Siyiex, mai: kheu Maix pa mawh kawn: pui khaing:, yuh tokaux Tix mawh Siyiex heue:." 34 Yesux baox pawk lox mai: ah nin: ka kix, "Hoik tiem: ka daux Phuk lai been li pex ah nin:,
140'Aux ah pex mawh siyiex,'
ang mawh lie? 35 Phan: Nawh Cao: kok pui pa hoik pon lox khaing: Siyiex mawh siyiex, mai: ang chix yuh laux lox phuk lai sigang: khri:, 36 pex sang ah grawng: Kaw pa Siyiex hoik kieh singax, mai: ploi: hoek piang haktiex, 'Maix salao ka Siyiex,' kheu hoik krai Aux, 'Aux mawh Kawn: Siyiex,' lie? 37 Phan: Aux ang yuh kaing Keeing: Aux paw yumrhawm: ka Aux. 38 Viang mawh kawx nan:, phan: Aux yuh, viang ang pex yumrhawm: ka Aux kawx, yumrhawm: ka kaing khankix, son sang tawng pex, mai: yumrhawm: grawng: ot Keeing: Aux ka daux Aux, mai: grawng: ot Aux ka daux Keeing: Cao:." 39 Kheu nan: kix baox deeh sawg tix giex Nawh tix bawg, viang mawh kawx nan: Nawh Cao: luan khaing: ka daux tawm: taix kix heue:.
40 Mai: Nawh Cao: baox deeh hu: plak toi: rawm: Yawdan ka dee baptis141 Yohan phaoxka:, mai: Nawh ot tan: heue:. 41 Mai: pui haoh pui hun: hoek ka Nawh mai: ah kix nin:, "Yohan ang yuh mhai: pa daox pa am:, viang mawh kawx nan:, lox pa krai nawh grawh grawng: Pui in khawm: uik mawh pa mawh pa meh heue:." 42 Mai: ka dee an pui haoh pui hun: yumrhawm: ka Nawh Cao: heue:.
Yohan
Simin Ting 11
Lazarux deeh kaoh im: khaing: krax yum
1 Pui tix kaux saux, pa mawh Lazarux pui yaong: Betanix, dee ot Mathax mai: pux nawh Marix heue:. 2 In mawh Marix pa hoik teei sidah bhawng: mai: kraix ka Simiang mai: teei hauk kaing: tix awt ka caong Nawh Cao:. Mawh puxke: nawh Lazarux pa koe: jhawm: saux heue:. 3 Mawh kheu nan:, nan: nawh khankiex ploi: pui hu: ka Nawh Cao: mai: ah nin:, "Jhak heue:, Simiang eue:, kaw pa moh Maix koe: jhawm: saux heue:." 4 Viang mawh kawx nan: yam mhong: Yesux lox an Nawh Cao: ah nin:, "Jhawm: saux an ang mawh jhawm: saux tom: yum, viang mawh nan: mawh jhawm: saux son sang sidawng: min: plakngai: Siyiex, mai: son sang koe: min: plakngai: Kawn: Siyiex heue:." 5 Yesux moh Mathax mai: pux nawh, mai: Lazarux heue:. 6 Viang mawh kawx nan: yam hoik mhong: Nawh grawh grawng: saux Lazarux, Nawh Cao: baox ot dee ot Tix tan: ra: singaix. 7 Khaix an Nawh ah nin: ka kawncau Nawh khankix, "Ex, ex deeh hu: ka daux meung Yudax tix bawg heue:." 8 Mai: kawncau Nawh khankix ah nin: ka Nawh, "Rabi eue:, pui Yudax khankix sawg tix dheem: Maix kah simaox, tag khraox mawh yamin, mai: Maix khex sang baox deeh hu: tan: tix bawg lie?" 9 Yesux baox pawk lox mai: ah nin:, "Tix singaix koe: kao: nari ra: ang mawh lie? Pui mawx ang ah, phan: nawh hu: yam pon singaix ang lai sideeing caong tix kheu yaox nawh pa riang haktiex in. 10 Viang mawh kawx nan:, pui mawx ang ah, phan: hu: yam ponsawm: sideeing caong tix, mawh kheu ang pa riang koe: ka daux nawh." 11 Khaix hoik ah Nawh Cao: baox ah nin: ka kix, "Paox grawm ex Lazarux hoik laig it, viang mawh kawx nan: Aux sang hu: so: nawh siduad khaing: pa it nawh heue:." 12 Mawh kheu nan: kawncau Nawh khankix baox ah nin: ka Nawh Cao:, "Simiang eue:, phan: nawh hoik laig it nawh tag sang vai heue:." 13 Yesux hoik krai grawh grawng: pa hoik yum nawh, viang mawh nan: kawncau Nawh khankix ce: Nawh krai grawh grawng: pa laux lee: tix it khaing:. 14 Mawh kheu nan: yam an Yesux tom: krai sidawng: ka kix mai: ah nin:, "Lazarux hoik yum. 15 Mai: Aux gauxrhawm: son pex, kheu ang Aux ot tan:, yuh ka mawx pex tag sang yumrhawm: ka Ex, ex hu: ka nawh heue:." 16 Kheu nan: Thomax pa kok kaux Didumux. Ah nin: ka paox kawncau tix khankix, "Ex, ex kawx hu: yum tau mai: Nawh Cao: heue:."
17 Yam hoek Yesux tan:, hoik sipaung: Lazarux ka daux simeeig koe: pon: singaix heue:. 18 Yaong: Betanix dex ka veng Yerusaliem, singai paox tix dex koe: ra: lag khaing:. 19 Mai: pui Yudax hoek ka Mathax mai: Marix haoh hun:, son sang khu: rhawm: kiex kheu yum puxke: kiex heue:. 20 Mawh kheu nan: yam mhong: Mathax grawng: sang hoek Yesux, nawh hu: rieb ka Nawh Cao:, viang mawh kawx nan: Marix kawn: ngawm ka daux nyiex heue:. 21 Mathax ah nin: ka Yesux, "Simiang eue:, phan: Maix ot tin: puxke: aux tag ang yum. 22 Viang mawh nan: pie yamin kawx, aux tawng Maix rawg ka Siyiex ceu pa tix ang ah, Siyiex tag tawx ka Maix heue:." 23 Yesux ah nin: ka nawh, "Puxke: maix tag baox deeh kaoh heue:." 24 Mathax pawk lox mai: ah nin: ka Nawh Cao:, "Aux tawng grawng: tag sang deeh kaoh nawh, yam deeh kaoh pui yum singaix sidah sax heue:." 25 Yesux baox ah nin: ka nawh, "Aux mawh ceu pa deeh kaoh mai: pa im: ju heue:. Pui pa yumrhawm: ka Aux, viang nawh hoik yum kawx, tag sang im: heue:. 26 Mai: pui pa kawn: im: ku kaux daux pui, pa yumrhawm: ka Aux, tag ang yum tix bawg kawx. Yumrhawm: maix ka lox in lie?" 27 Mai: nawh pawk lox mai: ah nin: ka Nawh Cao:, "Mawh heue:, Simiang, Aux hoik yumrhawm: grawng: mawh Maix Cao: Khrit Kawn: Siyiex. Kaw pa hoek piang haktiex in heue:." 28 Khaix hoik ah nawh nan:, nawh hu: mai: briex kok pux nawh Marix mai: ah nin:, "Sara Cao: Gau hoik hoek, mai: Nawh kok maix heue:. 29 Mai: Marix yam mhong: nawh lox an nied tix kaoh mai: hu: ka Nawh Cao: heue:. 30 (Yam an Yesux ang nyang hoek ka daux yaong:, viang mawh nan: Nawh kawn: ot dee hoik rieb Mathax ka Nawh.) 31 Pui Yudax khankix pa ot mai: Marix ka nyiex, mai: khu: rhawm: nawh, yam yaox kix Marix nied tix kaoh mai: lih hu:, kix hawt khaix nawh, kheu ce: kix nawh sang hu: yiem ka dee simeeig heue:. 32 Mawh kheu nan: yam hoik hoek Marix ka dee ot Yesux mai: yaox Nawh, nawh krub dex ka caong Nawh Cao: mai: ah nin:, "Simiang eue:, phan: Maix ot tin: puxke: aux tag ang yum." 33 Yam yaox Yesux pa yiem Marix mai: pa yiem pui Yudax khankix pa hoek mai: nawh, Nawh Cao: ngia daux rhawm: Tix, mai: kied koe: krax khirhawm: khirhi:, 34 mai: chawk ah nin:, "Pex deuh pex sipaung: nawh dee mawx?" Kix baox pawk lox mai: ah nin: ka Nawh, "Simiang eue:, hoek tix jhak heue:." 35 Yesux yiem heue:. 36 Mawh kheu nan: pui Yudax khankix ah nin:, "Jhak heue:, Nawh phex moh nawh miex ding." 37 Viang mawh kawx nan: kix tiblah ah nin:, "Pui in pa hoik kieh pui dugngai: blah ngai:, son ang Lazarux sang yum ang Nawh chix yuh lie?" 38 Mawh kheu nan: Yesux baox deeh ngia ka daux tokaux Tix tix bawg, mai: hoek ka dee simeeig pa mawh daux rang:, mai: hoik thox simaox ka moing daux an. 39 Yesux ah nin:, "Greed tix tik simaox an heue:." Mathax, pux kaw pa hoik yum an ah nin: ka Nawh Cao:, "Simiang eue:, yamin nawh tee: hoik cux hoik sium:, kheu hoik yum nawh pon: singaix heue:." 40 Yesux ah nin: ka nawh, "Aux hoik krai maix grawng: phan: maix yumrhawm:, maix tag sang yaox ka min: plakngai: Siyiex ang mawh lie?" 41 Kheu nan: kix greed tix tik simaox an, mai: Yesux maong mai: ah nin:, "Keeing: eue:, Aux yaogyaw bwanson: Maix kheu hoik nghiet Maix lox Aux. 42 Mai: Aux tawng grawng: nghiet Maix lox Aux jheeng: jheeng:, viang mawh kawx nan: yuh ka mawx son sang yumrhawm: cub pui haoh pui hun: pa cung sivie tin:, grawng: pa ploi: Maix Aux hoek, Aux tom: ah nin:." 43 Mai: khaix hoik ah Nawh nan:, Nawh Cao: kok lox ting lox sinum ah nin:, "Lazarux eue:, lih hoek heue:." 44 Kaw pa hoik yum an lih hoek. Taix caong nawh hoik pua: ka man: simeeig, mai: pakngai: nawh hoik vien ka man: phaced. Yesux ah nin: ka kix, "Yah tix ploi: nawh heue:."
45 Mawh kheu nan: pui Yudax haoh hun: pa hoek mai: Marix pon tix yaox ceu pa yuh Nawh mai: yumrhawm: ka Nawh Cao: heue:. 46 Viang mawh kawx nan: kix tiblah hu: ka Pharishie: khankix mai: krai ka kix grawh grawng: ceu pa hoik yuh Yesux.
Keud sawn: tix sang yuh Yesux laux leeing:
47 Mawh kheu nan: cao: giex kaing: li, mai: Pharishie: khankix, khrawm: tix kum: kawng: paox tix ah nin:, "Ex sang yuh ka mawx? Kheu Pui an yuh mhai: pa daox pa am: kied nie tete. 48 Phan: ex grham: Nawh yuh nin:, pui khawm: uik tee: yumrhawm: ka Nawh, mai: pui Romax tag sang hoek mai: rud tix teei hu: dee ot ex mai: khawm: pui ex heue:." 49 Ka daux cub kix pui tix kaux, pa kaux Kayaphax, pa mawh cao: giex kaing: li pa ting piang paox tix khawm: uik ka daux num an, ah nin: ka kix, "Pex ang tawng tid tix. 50 Mai: ang pex keud grawh grawng: pa yum pui tix kaux khaing: son pui khawm: uik, yuh ka mawx son ang pui Yudax sang laux leeing: khawm: uik, nie lheu: mhawm: son pex heue:." 51 Lox pa ah nawh an ang mawh lox pa lak keud tokaux nawh tix ah, viang mawh kawx nan: kheu yuh nawh cao: giex kaing: li pa ting piang paox tix ka daux num an, nawh tom: hoik krai lox jhai: grawng: pa tag sang yum Yesux son pui ceu an heue:. 52 Mai: ang joeng mawh ngie son pui ceu an khaing:, viang mawh nan: mawh son sang deeh kraix deeh khrawm: kawn: Siyiex khankix pa hoik prung: prang: ku dah ku dee tix kieh mawh tix mu: khaing:. 53 Mawh kheu nan: jah tom: singaix an kix kum: kawng: paox tix son sang pah Nawh Cao: yum heue:.
54 Mawh kheu nan: khaix an Yesux ang lai hu: sidawng: sinax pui Yudax, Nawh lih khaing: tan: mai: hu: dee dex daux tiag, ka daux veng pa kaux Epharim, mai: ot tau mai: kawncau Nawh khankix tan:. 55 Yam an dex hoek poi Pasakha pui Yudax khankix, mai: pui haoh pui hun: lih khaing: daux yaong: daux vie dee ot kix, mai: haok hu: ka veng Yerusaliem ka: sang yuh poi Pasakha, son sang kieh tokaux tix singax singeh heue:. 56 Mawh kheu nan: kix tom: sawg Yesux, mai: yam cung kix ka daux nyiex bwan: tix kaux hoik tix kaux chawk ka paox tix mai: ah nin:, "Pex ce: yuh ka mawx? Nawh sang hoek ka daux poi in lie?" 57 Yam an cao: giex kaing: li pa ting khankix mai: Pharishie: khankix hoik tawm: lox yuh ka mawx phan: pui tix kaux kaux tawng dee ot Nawh Cao: nhie: kix krai, son sang giex kix Nawh heue:.
Yohan
Simin Ting 12
Marix groi sidah bhawng: ka Yesux
12:1-8 jhak daux lai Mth. 26:6-13; Makux 14:3-9; Lukax 7:37-39
1 Ka: sang yuh poi Pasakha liah singaix Yesux deeh hoek ka yaong: Betanix, dee ot Lazarux kaw pa Yesux hoik kieh kaoh im: khaing: krax yum. 2 Mawh kheu nan: kix khre: priex bo son Nawh Cao: tan:, mai: Mathax khan: priex preem. Viang Lazarux kawx, mawh tix kaux ka daux pui khankix pa ngawm neung tau mai: Nawh Cao: heue:. 3 Yam an Marix teei sidah bhawng: Nadu tix pawng, pa kied ngawh tete kraix ka caong Yesux, mai: teei hauk kaing: nawh awt ka caong Nawh Cao:. Mai: pa sioe: baux sidah bhawng: an naog ka daux nyiex khawm: uik heue:. 4 Yam an Yudax Isakariut, pa mawh kawncau Nawh tix kaux, pa sang tik sang tawx Nawh, ah nin:, 5 "Yuh ka mawx ang coh sidah bhawng: in denari loe: yieh (300) plah mai: tawx ka pui pa hot pa sibhawm:?" 6 Nawh ah nan: kheu keud nawh son pui hot pui sibhawm: ang mawh, viang mawh nan: hoik mawh kheu mawh nawh pui briex, mai: pa viex hau: mau, mai: sax teei mau pa sau: ka hau: an heue:. 7 Kheu nan: Yesux ah nin:, "Paw lai chuh ka nawh, kieh nawh priex sidah bhawng: in son singaix yam sipaung: Aux heue:. 8 Grawh grawng: nawh pui hot pui sibhawm: ot mai: pex jheeng: jheeng:, viang mawh nan: Aux ot mai: pex jheeng: jheeng: ang mawh."
9 Mawh kheu nan: pui Yudax pa haoh pa hun: tawng grawh grawng: ot Yesux tan:, pa hoek kix mawh kheu Yesux khaing: ang mawh, viang mawh kawx nan: hoek kheu simie kix tix yaox Lazarux pa Nawh Cao: hoik kieh kaoh khaing: krax yum. 10 Mai: cao: giex kaing: li pa ting khankix, kum: kawng: paox tix grawh grawng: sang pah khawm: Lazarux yum. 11 Mawh kheu hoik mawh kheu jao nawh pui Yudax haoh hun: lih hu: mai: yumrhawm: ka Yesux heue:.
Koe: min: plak ngai: mai: laig ka daux veng Yerusaliem
12:12-15 koe: daux lai Mth. 21:4-9; Makux 11:7-10; Lukax 19:35-38
12 Singaix pasax pui haoh pui hun: pa hoik hoek ka poi, yam mhong: kix grawh grawng: sang hoek Yesux ka veng Yerusaliem, 13 kix teei lhax khaox, khaox jhie: yaong:, mai: hu: rieb Nawh Cao:, mai: kok yo ah nin:,
142"Hosanna, Kaw pa hoek ka daux ceukaux Simiang ting bwanson:, pa mawh Simiang Khunhawkham Isarilax."
14 Mai: khaix hoik yaox Yesux la awn: ju tix mu:, Nawh ngawm piang la an, awm: pa hoik tiem: ka daux phuk lai sigang: khri: ah nin:,
14315 "Kawn: bon: Zion eue:, paw lhat, jhak heue:, Simiang Khunhawkham maix ngawm ka piang kawn: la mai: hoek ka maix heue:."
16 Phaoxka: kawncau Nawh khankix ang lai tawng grawh grawng: ceu an khankix, viang mawh kawx nan: khaix hoik yaog min: plakngai: Yesux, yam an kix doh keud ka pa hoik tiem: grawh grawng: Nawh Cao:, mai: grawng: pa hoik yu kix ceu an khankix ka Nawh heue:. 17 Pui haoh pui hun: pa hoik ot mai: Nawh Cao: yam kok Nawh Lazarux lih khaing: daux simeeig, mai: kieh nawh kaoh khaing: krax yum, kham: mhai: sakse: heue:. 18 Hoik mawh kheu khawm: jao in cub pui haoh pui hun: an hoek tix rieb Nawh Cao:, kheu hoik mhong: kix grawh grawng: mhai: pa daox pa am: pa yuh Nawh an heue:. 19 Mawh kheu nan: Pharishie: khankix tix kaux hoik tix kaux ah nin: ka paox tix, "Pex jhak heue:, ang pex tie pon yuh tid tix, jhak heue:, haktiex in hoik hawt Nawh khawm: uik heue:."
Pui Helasax simie tix yaox ka Yesux
20 Ka daux pui khankix pa haok tix krub ka daux poi, koe: pui Helasax tiblah, 21 mawh kheu nan: in kix hoek ka Philipux pa mawh pui veng Biesedax meung Galilie: mai: ah nin:, "Simiang eue:, ex simie tix yaox Yesux heue:." 22 Philipux hu: krai ka Andare, mai: Andare mai: Philipux hu: krai ka Yesux heue:. 23 Yesux pawk lox mai: ah nin:, "Bawg yam nari pa sang yaog min: plakngai: Kawn: kawn: pui hoik hoek. 24 Aux krai lox tete telai ka pax, phan: simie nghoxca ang rau piang tiex mai: ang laux kienie, ca: mawh simie nghox tix mu: khaing:, viang mawh kawx nan:, phan: laux, chix plix haoh hun:. 25 Kaw pa moh ju tokaux tix tag sang som ju, mai: kaw pa koeng ka ju tix piang haktiex in, tag sang priex ju son ju leeing: ju leeing: phan: heue:. 26 Pui mawh ang ah phan: nawh yuh son Aux, kieh nawh hawt khaix Aux, mai: dee ot Aux viang kawncau Aux kawx tag sang pon tix ot tan: heue:. Pui mawh ang ah, phan: nawh yuh son Aux Keeing: Cao: tag yaog nawh ting heue:. 27 Bawg yamin Aux koe: krax khirhawm: khirhi:, mai: Aux tag sang ah ka mawx? Sang ah, 'Keeing: eue:. Taoh Aux khaing: bawg yam nari in liak,' lie? Viang mawh kawx nan: pa hoik hoek Aux mawh son bawg yam nari in heue:. 28 Keeing: eue:, kieh yaogyaw ceukaux Maix heue:." Yam an lox lih khaing: raoma: mai: ah nin:, "Aux hoik yaogyaw kah, mai: Aux tag sang baox deeh yaogyaw kah tix bawg heue:." 29 Pui haoh pui hun: pa cung dex tan: mhong: lox an mai: ah nin:, "Sinum praix heue:." Tang: kaux khankix ah nin:, "Mawh kawncau Siyiex pa sikah mai: Nawh."
Grux krai krax pa sang kham: geu:
30 Yesux pawk lox mai: ah nin:, "Lox an hoek son Aux ang mawh, viang mawh nan: hoek son pex heue:. 31 Bawg yamin hoik hoek bawg yam pa sang prawng sang ciyang haktiex, bawg yamin tag sang grheu: simiang haktiex in lih heue:. 32 Mai: phan: yaog Aux khaing: haktiex in, Aux tag sang bluh pui khawm: uik hoek ka tokaux Tix heue:." 33 Viang mawh kawx nan: pa ah Nawh nan:, Nawh Cao: jhi: grawng: sang yum Nawh yuh ka mawx heue:. 34 Pui haoh pui hun: khankix tom: baox pawk lox mai: ah nin: ka Nawh Cao:, "Ex mhong: khaing: daux lai been li grawh grawng: Cao: Khrit tag sang ot jheeng: jheeng:. Phan: mawh nan:, yuh ka mawx Maix lai ah 'tag sang yaog Kawn: kawn: pui?' Kawn: kawn: pui mawh mawx?" 35 Mawh kheu nan: Yesux pawk lox mai: ah nin: ka kix, "Pa riang kawn: ot mai: pex tivud khaing:. Pex hu: yam kawn: koe: pa riang awawx. Phan: ang mawh nan: ha pa vhaik kox krup pex heue:. Grawh grawng: nawh kaw pa hu: ka daux pa vhaik ang nawh tawng dee hu: tokaux tix. 36 Yam kawn: koe: pex pa riang, yumrhawm: ka pa riang heue:, son sang lih mawh pex kawn: pa riang heue:."
Khaix hoik ah Yesux ceu an, Nawh lih hu: mai: mox tokaux Tix khaing: kix heue:. 37 Viang Nawh hoik yuh mhai: pa daox pa am: niex ding niex dod plak sivoe kix, viang mawh nan: ang kix yumrhawm: ka Nawh Cao:. 38 Kheu nan: lox pa krai cao: jhai: Isayax pa ah nawh nin: hoik naog,
144"Simiang eue:, pui mawx hoik yumrhawm: ka lox diex lox gau ex? Mai: taix Simiang hoik plak jhi: ka pui mawx?" 39 Hoik mawh kheu jao in kix tom: ang pon tix yumrhawm: kah, mawh kheu Isayax hoik baox deeh krai ah nin:,
14540 "Nawh hoik kieh ngai: kix ang chix yaox, mai: hoik yuh rhawm: kix kiien:, son ang ngai: kix chix yaox, mai: son ang rhawm: kix chix tawng, mai: son ang kix deeh tieh tix hoek, son sang cox Aux tix kieh kix moi:."
41 Isayax ah lox in mawh kheu hoik yaox nawh min: plakngai: Nawh Cao:, mai: nawh tom: hoik krai grawh grawng: Nawh. 42 Viang mawh kawx nan: pie simiang khankix kawx haoh hun: yumrhawm: ka Nawh, viang mawh nan: kheu lhat kix Pharishie: khankix, grheu: kix lih khaing: daux nyiex sidiex, ang kix kieh sidawng grawng pa rieb kix ka Nawh Cao:. 43 Mawh kheu moh kix min: plakngai: pa tawx kawn: pui nie lheu: khaing: min: plakngai: pa tawx Siyiex heue:.
44 Mai: Yesux kok yo mai: ah nin:, "Pui pa yumrhawm: ka Aux, yumrhawm: ka Aux khaing: ang mawh, yumrhawm: ka Kaw pa ploi: Aux hoek heue:. 45 Mai: pui pa yaox ka Aux, yaox ka Kaw pa ploi: Aux hoek heue:. 46 Aux mawh pa riang pa hoek piang haktiex, yuh ka mawx pui pa yumrhawm: ka Aux ku kaux daux pui tag ang lai sang ot ka daux pa vhaik heue:. 47 Mai: pui mawx ang ah, phan: mhong: lox Aux khankix, mai: ang priex tix hawt kah, Aux ang prawng ang ciyang ka nawh, mawh kheu hoek Aux tix ciyang haktiex ang mawh, viang mawh nan: hoek son sang taoh haktiex in heue:. 48 Pui pa tik ka Aux mai: pa ang rieb tix teei lox diex lox gau Aux, Kaw pa sang prawng sang ciyang ka nawh hoik koe: tix kaux. Gumlox pa krai Aux in mawh pa tag sang prawng sang ciyang ka nawh singaix sidah sax. 49 Mawh kheu lox pa krai Aux, ang mawh lox pa kaoh khaing: tokaux Tix. Viang mawh nan: Keeing: Cao: pa ploi: Aux hoek, tawm: lox ka Aux grawng: ceu pa sang krai sang sidiex Aux heue:. 50 Mai: Aux tawng grawng: lox pa tawm: Nawh mawh ju leeing: ju leeing: phan:. mawh kheu nan: ceu pa krai pa sidiex Aux, mawh lox tawm: jhawm: krai Keeing: Cao: ka Aux heue:."
Yohan
Simin Ting 13
Briex bo ghoik
1 Ka: sang yuh poi Pasakha Yesux tawng nari bawg yam tag sang lih hu: Nawh khaing: haktiex mai: hu: ka Keeing: Cao: hoik hoek. Mawh kheu moh Nawh cie Nawh pa ot piang haktiex in, Nawh moh tom: sidah heue:. 2 Mai: yam ih kix priex bo, kheu phi: caox hoik sau: pa keud pa sawn: ka daux rhawm: Yudax Isakariut, pa mawh kawn: Simon, son sang tik sang tawx nawh Cao: Yesux, 3 Yesux hoik tawng grawh grawng: Keeing: Cao: hoik tawx khawm: uik ka daux tawm: taix Nawh, mai: grawng: hoik lih hoek Nawh khaing: Siyiex, mai: grawng: tag sang deeh hu: ka Siyiex. 4 Nawh Cao: kaoh khaing: pheen: mai: peeik kraung ceep Nawh mai: teei. Man: phaced nhawt ka nyoi tokaux Tix.
Tawx rieang dee sang hawt jawh mai: khoek caong kawncau
5 Khaix an Nawh teei rawm: prauk sau: ka daux klong: ting mai: jah tix khoek caong kawncau Nawh khankix, mai: awt caong kix ka phaced pa hoik nhawt Nawh ka nyoi Tix heue:. 6 Yam hoek Nawh ka Simon Petrux, Petrux ah nin: ka Nawh Cao:, "Simiang eue:, Maix khex sang khoek caong aux lie?" 7 Yesux baox pawk lox mai: ah nin: ka nawh, "Grawh grawng: pa yuh Aux ang maix nyang tawng yamin, viang mawh kawx nan: maix koi tawng khaix in sax." 8 Petrux baox ah nin: ka Nawh Cao:, "Ang aux doh kieh Maix khoek caong tix tix bawg kawx." Yesux baox pawk lox mai: ah nin: ka nawh, "Phan: Aux ang khoek maix ang maix dex dawd mai: Aux heue:." 9 Simon Petrux baox ah nin: ka Nawh Cao:, "Simiang eue:, ang joeng mawh ngie caong aux khaing:, viang khawm: taix khawm: kaing: aux kawx khoek kah liak." 10 Yesux baox ah nin: ka nawh, "Kaw pa hoik heem: tix lo ngie pa khoek caong nawh khaing:, mai: nawh hoik singax khawm: kaux tix khawm: uik. Pex hoik singax, viang mawh nan: pex singax khawm: uik ang mawh." 11 Mawh kheu hoik tawng Nawh kaw pa sang tik sang tawx Nawh, mawh kheu nan: Nawh tom: ah, "Pex singax khawm: uik ang mawh."
12 Khaix hoik khoek Nawh caong kix mai: hoik deeh ceep kraung Tix, Nawh Cao: deeh ngawm neung mai: ah nin: ka kix, "Pex tawng grawh grawng: pa hoik yuh Aux ka pex lie? 13 Pex kok Aux mawh, 'Sara Cao: Gau,' mai: 'Simiang,' pa ah pex caw tix, kheu mawh Aux nan: heue:. 14 Phan: Aux pa mawh Simiang mai: Sara Cao: Gau hoik khoek caong pex, viang pex kawx khaw: tix khoek caong ka paox tix tix kaux hoik tix kaux heue:. 15 Grawh grawng: nawh, Aux hoik tawx pex rieang dee sang hawt jawh, yuh ka mawx son sang hawt yuh pex awm: pa hoik yuh Aux ka pex heue:. 16 Aux krai lox tete telai ka pex, siliex ang lheu: ting khaing: simiang nawh, mai: kaw pa hu: ang lheu: ting khaing: cao: pa ploi: nawh hu:. 17 Phan: pex tawng ceu in khankix, phan: pex hawt yuh, pex ting bwanson: heue:. 18 Ang Aux krai grawh grawng: pex khawm: uik. Aux tawng pui pa hoik laug Aux heue:, viang mawh kawx nan: yuh ka mawx son sang naog lox Phuk lai singang: khri: pa ah nin:,
146'Kaw pa ih khaomun Aux, yaog loek caong tix tiied ka Aux heue:.'
19 Jah tom: yamin khaix in Aux sang grux krai ka pex grawh grawng: ceu pa tag sang hoek tix mawh, ka: ang nyang bax mawh, yuh ka mawx yam lih mawh ceu an, pex tag sang yumrhawm: grawng: mawh Aux Kaw an heue:. 20 Aux krai lox tete telai ka pex, kaw pa rieb tix teei pui pa ploi: Aux hu:, rieb tix teei Aux heue:, mai: kaw pa rieb tix teei Aux, rieb tix teei ka Kaw pa ploi: Aux hoek heue:."
Grux krai kah sang kham: krax pa tik pa tawx
13:37-38 koe: daux lai Mth. 26:33-35; Makux 14:29-31; Lukax 22:33-34
21 Khaix hoik krai Yesux ceu an, Nawh koe: krax khirhawm: khirhi: daux khwan: Tix mai: kham: mhai: sakse: ah nin:, "Aux krai lox tete telai ka pex, ka daux pex tix kaux tag sang tik sang tawx Aux heue:." 22 Kawncau Nawh khankix tix kaux hoik tix kaux jhak ka paox tix mai: keud jee keud blaong grawh grawng: sang ah Nawh ka pui mawx. 23 Ka dex pheen: tan: kawncau daux kawncau Nawh tix kaux, neung ka piang naok Yesux, pa moh Yesux kah. 24 Mawh kheu nan: Simon Petrux yib taix ka nawh mai: ah nin:, "Krai ex mhong: liak, Nawh sang ah grawh grawng: pui mawx?" 25 Nawh deeh neung piang naok Yesux mai: chawk Nawh ah nin:, "Simiang eue:, mawh pui mawx?" 26 Yesux tom: baox pawk lox ah nin:, "Mawh kaw pa sang teei Aux khaomun tix bliah, mai: tawx ka nawh, khaix cub Aux daux klong: heue:." Mawh kheu nan: Nawh Cao: teei khaomun tix bliah mai: khaix hoik cub, Nawh tawx ka Yudax Isakariut kawn: Simon. 27 Mai: khaix hoik teei nawh khaomun an, Satan laig ka daux nawh, mai: Yesux ah nin: ka nawh, "Ceu pa sang yuh maix, nied tix yuh laung laung heue:." 28 Yam an pui pa ot ka pheen: ang tawng tix kaux kawx Nawh sang ah nin: ka nawh kheu ceu pa tix. 29 Tiblah ce: kheu priex Yudax hau: mau, yam ah Yesux nan:, Nawh Cao: nhie: nawh, "Hu: liag ceu pa lo ex son poi." Phan: ang mawh nan:, kieh nawh tawx tix ceu ceu ka pui hot pui sibhawm: heue:. 30 Khaix hoik teei Yudax khaomun an, nawh lih hu: dom: mawx dom: an. Bawg yam an mawh yam ponsawm:.
31 Khaix hoik lih hu: nawh, Yesux ah nin:, "Yamin hoik kieh Kawn: kawn: pui koe: min: plakngai:, mai: hoik kieh Siyiex koe: min: plakngai: ka daux Nawh heue:. 32 Phan: Siyiex koe: min: plakngai: ka daux Nawh, Siyiex tag kieh Nawh koe: min: plakngai: ka daux tokau: Tix, mai: Nawh tag sang kieh Nawh koe: min: plakngai: yamin heue:. 33 Kawn: nyawm Aux eue:, Aux kawn: ot mai: pex tivud khaing:. Pex tag sang sawg Aux, mai: awm: hoik krai Aux ka pui Yudax khankix, 'Dee sang hu: Aux pex ang pon tix hoek kah,' Aux tom: krai ka pex yamin heue:. 34 Aux tawx gumlox pingnyap pa khraox ka pex, yuh ka mawx son sang moh pex paox tix tix kaux hoik tix kaux, awm: hoik moh Aux ka pex, yuh ka mawx son sang moh pex paox tix tix kaux hoik tix kaux heue:. 35 Phan: pex tix kaux hoik tix kaux moh paox tix, pui khawm: uik tag tawng pex mawh kawncau Aux, kheu grawng: an heue:."
36 Simon Petrux baox chawk Nawh Cao: ah nin:, "Simiang eue:, Maix sang hu: dee mawx?" Yesux pawk lox mai: ah nin:, "Dee sang hu: Aux maix ang pon tix hawt Aux yamin, viang mawh kawx nan: maix tag sang pon tix hawt Aux khaix in heue:." 37 Petrux baox chawk ah nin: ka Nawh Cao:, "Simiang eue:, mawh kheu pa tix ang aux pon tix hawt Maix yamin? Aux koe: rhawm: tix sang tik sang deuh ju tix yum son Maix heue:." 38 Yesux baox pawk lox mai: ah nin:, "Maix koe: rhawm: tix sang tik sang deuh ju tix yum son Aux lie? Aux krai lox tete telai ka maix, ka: ang iya: nyang ux, maix tag sang thiang: tix tik tix vud Aux loe: bawg heue:."
Yohan
Simin Ting 14
Tawx krax nyawm rhawm: nyawm rhi: ka kawncau
1 "Paw kieh rhawm: pex koe: krax khirhawm: khirhi:, yumrhawm: ka Siyiex, ka Aux kawx yumrhawm: heue:. 2 Daux nyiex Keeing: Aux koe: lawg haoh hun:, phan: ang mawh nan: Aux tag hoik krai ka pex, mawh kheu sang hu: cox Aux dee ot son pex. 3 Mai: phan: Aux hu: cox dee ot son pex, Aux tag deeh hoek mai: teei pex hu: son sang ot tau mai: Aux, yuh ka mawx viang pex kawx sang pon tix ot dee ot Aux heue:. 4 Mai: pex tawng krax pa hu: dee sang hu: Aux." 5 Thomax baox ah nin: ka Nawh Cao:, "Simiang eue:, ang ex tawng dee sang hu: Maix, ex khex chix tawng krax yuh ka mawx?" 6 Yesux baox pawk lox mai: ah nin: ka nawh, "Aux mawh daux krax, mai: pa mawh pa meh, mai: ju heue:. Phan: ang mawh daux Aux pui tix kaux kawx ang pon tix hoek ka Keeing: Cao:. 7 Phan: pex hoik tawng ka Aux, viang mawh Keeing: Aux kawx pex tag tawng heue:. Jah tom: yamin pex tawng Nawh, mai: hoik yaox ka Nawh Cao:." 8 Philipux ah nin: ka Nawh, "Simiang eue:, jhi: ex yaox Keeing: Cao: liak, son sang vhah rhawm: ex kah." 9 Yesux baox ah nin: ka nawh, "Philipux eue:, Aux hoik ot mai: pex niex grheung: niex grhaoh, mai: maix khex ang tawng Aux lie? Pui pa hoik yaox ka Aux, hoik yaox ka Keeing: Cao:, yuh ka mawx maix lai ah, 'Jhi: ex yaox Keeing: Cao:?' 10 Ang maix yumrhawm: grawh grawng: ot Aux ka daux Keeing: Cao:, mai: Keeing: Cao: ot ka daux Aux lie? Gumlox pa krai Aux khankix ang lai mawh lox pa kaoh khaing: tokaux Tix. Viang mawh kawx nan:, Keeing: Cao: ot ka daux Aux mai: yuh kaing Nawh khankix heue:. 11 Yumrhawm: ka grawh grawng: ot Aux ka daux Keeing: Cao:, mai: grawng: pa ot Keeing: Cao: ka daux Aux. Phan: ang mawh nan: yumrhawm: ka Aux kheu sipie kaing khankix heue:. 12 Aux krai lox tete telai ka pex, kaw pa yumrhawm: ka Aux tag sang yuh kaing pa yuh Aux, mai: nawh tag sang yuh kaing pa nie lheu: ting khaing: in kix, kheu sang hu: Aux ka Keeing: Cao: heue:. 13 Mai: pex sang rawg sang mhaing: ceu pa tix ang ah, ka daux ceukaux Aux, Aux tag sang yuh heue:, yuh ka mawx son sang koe: min: plakngai: Keeing: Cao:, ka daux Kawn: Cao: heue:. 14 Phan: pex rawg pex mhaing: tix ceu ceu ka daux ceukaux Aux, Aux tag sang yuh heue:. 15 Phan: pex moh ka Aux, pex tag sang priex tix hawt lox pa tawm: Aux khankix heue:.
Kaing Khwan: Singax Singeh
16 Mai: Aux tag sang rawg sang mhaing: ka Keeing: Cao:, mai: Nawh tag sang tawx Cao: Teem: ka pex tang: kaux, son sang ot Nawh mai: pex leeing: ju leeing: phan:, 17 pa mawh Khwan: pa dex mai: pa mawh pa meh heue:. Kheu haktiex ang tawng ang yaox Nawh, tom: ang pon tix rieb tix teei Nawh. Viang mawh nan: pex tawng Nawh, kheu ot Nawh mai: pex, mai: tag sang ot ka daux pex heue:. 18 Ang Aux lai prah tix kieh pex mawh kawn: doe:, Aux tag sang deeh hoek ka pex heue:. 19 Khaix in ang rheung: haktiex in ang lai pon tix yaox Aux, viang mawh kawx nan: pex tag yaox Aux, kheu im: ju Aux, pex kawx tag sang im: ju heue:. 20 Ka daux singaix an, pex tag sang tawng grawng: pa ot Aux ka daux Keeing: Aux, mai: grawng: pa ot pex ka daux Aux, mai: grawng: pa ot Aux ka daux pex heue:. 21 Kaw pa koe: lox tawm: Aux khankix, mai: priex tix hawt, mawh kaw pa moh ka Aux, mai: kaw pa moh ka Aux, Keeing: Aux tag moh ka nawh, mai: Aux ka moh nawh, mai: plak jhi: tokaux Aux ka nawh heue:." 22 Yudax, (Pa ang mawh Yudax Isakariut) chawk mai: ah nin: ka Nawh Cao:, "Simiang eue:, Maix tag sang plak jhi: ex yaox tokaux Maix, mai: ang jhi: haktiex yaox yuh ka mawx?" 23 Yesux pawk lox mai: ah nin: ka nawh, "Phan: pui moh ka Aux nawh tag sang priex tix hawt gumlox Aux, mai: Keeing: Aux tag moh ka kaw an, mai: Yiex tag hoek ka nawh, mai: ot tau mai: nawh heue:. 24 Kaw pa ang moh ka Aux ang priex tix hawt gumlox Aux khankix, mai: gumlox pa mhong: pex ang mawh lox Aux, viang mawh nan: mawh lox Keeing: Cao: pa ploi: Aux hoek heue:.
25 Aux hoik krai lox ceu in khankix ka pex, yam kawn: ot Aux tau mai: pex. 26 Viang mawh kawx nan:, Cao: Teem: pex, pa mawh Khwan: Singax Singeh, pa Keeing: Cao: tag ploi: hoek ka daux ceukaux Aux, Nawh tag sang gau pex ku ceu khawm: uik, mai: kieh pex doh keud ka lox pa hoik krai Aux ka pex khawm: uik heue:. 27 Aux deuh pa nhim: mai: pex, pa nhim: Aux, Aux tawx ka pex. Pa tawx Aux ka pex ang awm: pa tawx haktiex. Paw kieh rhawm: pex koe: krax khirhawm: khirhi:, viang krax lhat krax graung kawx paw kieh koe: awawx. 28 Pex hoik mhong: lox pa hoik krai Aux ka pex, viang lih hu: Aux yamin, Aux tag sang deeh hoek ka pex heue:. Phan: pex moh Aux, pex sang gauxrhawm: kheu hu: Aux ka Keeing: Cao:, grawh grawng: nawh Keeing: Cao: nie lheu: ting khaing: Aux heue:. 29 Mai: yamin Aux hoik grux krai ka: sang hoek nawh tix mawh, yuh ka mawx son sang yumrhawm: pex yam tag hoek ceu an tix mawh heue:. 30 Khaix in Aux tag ang lai baox sikah mai: pex tom: nie, kheu simiang haktiex sang hoek. Viang hoek kawx ang nawh koe: tid tix ka daux Aux. 31 Viang mawh kawx nan: son sang tawng haktiex grawng: pa moh Aux ka Keeing: Cao:, mai: grawng: yuh Aux awm: lox tawm: jhawm: krai Keeing: Cao: heue:. Kaoh ex lih hu: khaing: tin: heue:."
Yohan
Simin Ting 15
Nhu: plix siiet pa mawh pa meh
1 "Aux mawh nhu: plix siiet pa mawh pa meh, mai: Keeing: Aux mawh cao: pa pau sipeem. 2 Kak pa ang plix plix ku kak, Nawh kid tix tik, mai: kak pa plix plix ku kak son sang nie chix plix plix khaing: in, Nawh cox pawt mhawm: mhawm: heue:. 3 Yamin pex hoik singax, kheu lox pa hoik krai Aux ka pex. 4 Ot ka daux Aux, mai: Aux ot ka daux pex. Awm: kak ang chix plix plix nong: nong: phan: nawh ang ot ka daux nhu: miex, awm: an phan: pex ang ot ka daux Aux, pex ang chix plix plix. 5 Aux mawh nhu: plix siiet, mai: pex mawh kak khankix heue:. Kaw pa ot ka daux Aux mai: Aux ot ka daux nawh, chix plix plix haoh hun:. Grawh grawng: nawh phan: pex tang: tiah kaing: Aux, pex ang chix yuh tid tix heue:. 6 Phan: pui ang ot ka daux Aux, teei tix tik nawh awm: kak mai: kroh hu: heue:, mai: pui khrawm: kak khankix mai: taing daux ngu mai: gleeing kix heue:. 7 Phan: pex ot ka daux Aux, mai: gumlox Aux ot ka daux pex, pex simie tix rawg ceu pa tix ang ah, rawg heue:, mai: tag sang yuh son pex. 8 Keeing: Aux koe: min: plakngai:, kheu pa plix pex plix haoh hun:, mai: pex tag mawh kawncau Aux heue:. 9 Awm: hoik moh Keeing: Cao: ka Aux, viang Aux kawx hoik moh ka pex heue:. Pex ot ka daux pa moh Aux awawx. 10 Phan: pex priex tix hawt lox pa tawm: Aux khankix, pex tag ot ka daux pa moh Aux heue:. Awm: Aux kawx hoik priex tix hawt lox tawm: Keeing: Cao: khankix, mai: ot ka daux pa moh Nawh heue:. 11 Aux hoik krai lox ceu in khankix ka pex, yuh ka mawx son sang ot pa gauxrhawm: Aux ka daux pex, mai: son sang naog krax gauxrhawm: pex heue:.
Ra: lai moh ka paox tix
12 In mawh lox pa tawm: Aux, pex tix kaux hoik tix kaux moh paox tix, awm: pa hoik moh Aux ka pex heue:. 13 Krax moh pa lheu: ting khaing: pa deuh pui ju tix yum son paoxgrawm tix khankix ang koe:. 14 Phan: pex hawt yuh ceu pa hoik tawm: Aux ka pex, pex mawh paoxgrawm Aux khankix heue:. 15 Ang Aux lai baox kok pex mawh siliex, kheu ang siliex tawng pa yuh simiang tix. Viang mawh nan: Aux hoik kok pex mawh paoxgrawm, kheu hoik kieh Aux pex tawng can ceu pa hoik mhong: Aux khaing: Keeing: Cao: khawm: uik. 16 Pex laug tix teei Aux ang mawh, viang mawh nan: Aux hoik laug tix teei pex, mai: hoik ciak tix deuh pex, yuh ka mawx son sang hu: plix pex plix, mai: son sang kaux cong: plix pex heue:. Yuh ka mawx pex sang rawg ceu pa tix ang ah, ka Keeing: Cao: ka daux ceukaux Aux, Nawh sang tawx ka pex. 17 Aux hoik tawm: ceu in khankix ka pex, yuh ka mawx son sang moh pex paox tix tix kaux hoik tix kaux heue:.
Kawncau mai: pui haktiex
18 Phan: haktiex in koeng ka pex. Pex tawng grawh grawng: haktiex hoik koeng ka Aux, ka: sang koeng ka pex heue:. 19 Phan: pex dex dawd mai: haktiex, haktiex tag moh cie nawh, viang mawh nan: kheu ang pex dex dawd mai: haktiex, mai: kheu hoik laug Aux tix teei pex lih khaing: haktiex, haktiex tom: koeng ka pex heue:. 20 Doh keud ka lox pa hoik krai Aux ka pex, 'Siliex ang lheu: ting khaing: simiang nawh.' Phan: kix hoik tuktiak tukte: ka Aux, viang pex kawx, kix tag sang tuktiak tukte: kah heue:. Phan: kix hoik priex tix hawt gumlox Aux, viang lox pex kawx kix tag sang priex tix hawt heue:. 21 Viang mawh nan: kix tag sang yuh ceu in khawm: uik ka pex, kheu ceukaux Aux, in mawh kheu ang kix tawng ka Kaw pa ploi: Aux hoek heue:. 22 Phan: Aux ang hoek, mai: ang sidiex ang gau ka kix, kix ang koe: phimap, viang mawh nan: yamin ang kix koe: dee duh grawh grawng: phimap kix heue:. 23 Pui pa koeng ka Aux, viang ka Keeing: Aux kawx, kix koeng kah heue:. 24 Phan: Aux ang yuh kaing pa ang pui tang: kaux sax yuh, ka sinax kix, kix ang lai koe: phimap. Viang mawh kawx nan: yamin kix hoik yaox, mai: hoik koeng ka Aux mai: khawm: ka Keeing: Aux heue:. 25 Viang mawh nan: son sang naog gumlox pa hoik tiem: ka daux lai been li kix pa ah nin:,
147'Ang koe: grawh grawng: tid tix mai: kix koeng ka Aux heue:.'
26 Viang mawh kawx nan: yam hoik hoek Cao: Teem: pa sang ploi: Aux hoek khaing: Keeing: Cao: ka pex, pa mawh Khwan: pa mawh pa meh, pa lih hoek khaing: Keeing: Cao:, Nawh tag sang kham: mhai: sakse: grawh grawng: Aux. 27 Mai: pex kawx tag sang kham: mhai: sakse:, mawh kheu hoik ot pex tau mai: Aux tom: yam jah heue:.'
Yohan
Simin Ting 16
Kawncau tag sang kham: geu: krax tuktiak tukte:
1 "Yuh ka mawx son ang pex sang laux rhawm:, Aux tom: hoik krai lox ceu in khankix ka pex heue:. 2 Kix tag sang grheu: tix tik pex lih khaing: daux nyiex sidiex khankix, mawh heue:, bawg yam nari tag sang hoek yam pui mawx ang ah, pa pah pex yum, sang ce: tix yuh kaing krub ka son Siyiex. 3 Mai: kix tag yuh ceu in khankix kheu ang kix lai tawng ka Keeing: Cao:, mai: khawm: ka Aux. 4 Mai: Aux hoik krai grawh grawng: ceu in khankix ka pex, yuh ka mawx yam hoek bawg yam nari pa sang lih mawh khankix pex tag sang doh keud ka pa hoik krai Aux grawh grawng: khankix. Ang Aux krai ceu in khankix ka pex tom: yam jah, kheu ot Aux tau mai: pex heue:.
Lox mukheu tawx Khwan: Singax Singeh lih hoek
5 Viang mawh kawx nan: yamin Aux sang hu: ka Kaw pa hoik ploi: Aux hoek, mai: pex tix kaux kawx ang chawk Aux, 'Maix sang hu: dee mawx?' 6 Viang mawh kawx nan: kheu hoik krai Aux grawh grawng: ceu in khankix ka pex, rhawm pex naog pa khirhawm: khirhi: heue:. 7 Viang mawh kawx nan: Aux krai lox pa mawh pa meh ka pex, pa hu: Aux mhawm: son pex heue:. Grawh grawng: nawh phan: Aux ang hu: Cao: Teem: ang lai hoek ka pex, viang mawh nan: phan: Aux hu: Aux sang ploi: Nawh hoek ka pex heue:. 8 Mai: Nawh, yam hoik hoek Nawh tag sang plak jhi: haktiex yaox ka phimap, mai: pa rah pa see, mai: pa ciyang. 9 Mawh kheu ang kix yumrhawm: ka Aux, Nawh sang plak jhi: yaox grawh grawng: phimap heue:. 10 Mawh kheu hu: Aux ka Keeing: Cao:, mai: kheu ang pex lai baox yaox Aux khaix in, Nawh tag sang plak jhi yaox grawh grawng: pa rah pa see heue:. 11 Mawh kheu hoik prawng hoik ciyang ka simiang haktiex in, Nawh tag sang plak jhi: yaox grawh grawng: pa ciyang heue:. 12 Aux kawn: koe: lox ceu pa sang krai ka pex tom: nie ceu, viang mawh kawx nan: ang pex pon kham: pon geu: yamin. 13 Viang mawh nan: yam Nawh, pa mawh Khwan: pa mawh pa meh hoik hoek, Nawh tag sang thong: pex ka daux pa mawh pa meh khawm: uik heue:. Mawh kheu ang Nawh sang krai lox khaing: tokaux Tix, viang mawh kawx nan: Nawh tag sang krai can ceu pa mhong: Nawh, mai: Nawh tag sang krai ka pex grawh grawng: ceu pa tag sang hoek khaix in heue:. 14 Nawh tag sang kieh Aux koe: min: plakngai:, kheu tag sang teei Nawh cie Aux mai: krai ka pex heue:. 15 Can ceu pa koe: Keeing: Cao: khawm: uik mawh cie Aux, mawh kheu nan: Aux tom: hoik krai ka pex, 'Nawh tag sang teei cie Aux mai: krai ka pex heue:.'
Grux krai ka sang kham: krax yum mai: deeh kaoh im:
16 Khaix in rheung: tivud khaing: pex ang lai yaox Aux, mai: khaix in rheung: tivud khaing: pex tag sang baox deeh yaox Aux tix bawg." 17 Mawh kheu nan: kawncau Nawh tiblah tix kaux hoik tix kaux ah nin: ka paox tix, "Pa ah Nawh, 'Khaix in rheung: tivud khaing: pex ang lai yaox Aux, mai: khaix in rheung: tivud khaing: pex tag sang baox deeh yaox Aux tix bawg,' mai: pa ah nin:, 'Mawh kheu hu: Aux ka Keeing: Cao:,' sang ah ka mawx?" 18 Mawh kheu nan: kix baox ah nin:, "Pa ah Nawh, 'Khaix in rheung: tivud khaing:,' Nawh sang ah ka mawx? Ang ex tawng lox pa krai Nawh heue:." 19 Yesux tawng grawh grawng: pa simie kix tix chawk lox ka Nawh, mai: Nawh Cao: ah nin: ka kix, "Pex tix kaux hoik tix kaux chawk ka paox tix grawh grawng: lox pa krai Aux pa ah nin:, 'Khaix in rheung: tivud khaing: pex ang lai yaox Aux, mai: khaix in rheung: tivud khaing: pex tag sang baox deeh yaox Aux tix bawg,' lie? 20 Aux krai lox tete telai ka pex, pex tag sang yiem grai mai: yiem riag yiem yo heue:, viang mawh kawx nan: haktiex in tag sang gauxrhawm: gauxrhi:, pex kienie tag sang khirhawm: khirhi:, viang mawh nan: pa khirhawm: pex tag sang puk pliak tix mawh pa gauxrhawm: heue:. 21 Yam saux yha: bon:, nawh koe: pa khirhawm: khirhi:, kheu bawg yam nari nawh hoik hoek. Viang mawh kawx nan: khaix hoik keh kawn:, nawh gauxrhawm: kheu hoik keh pui tix kaux piang: haktiex, mai: ang nawh lai doh keud ka pa kham: pa geu: nawh khaix. 22 Awm: an pex koe: pa khirhawm: khirhi: yamin, viang mawh nan: Aux tag sang deeh yaox pex tix bawg, mai: rhawm: pex tag sang gauxrhawm: gauxrhi: heue:, mai: krax gauxrhawm: pex tix kaux kawx ang pon rud pon teei khaing: pex.
Lox Mukheu pawk krax pa rawg bwan:
23 Mai: ka daux singaix an pex tag ang chawk Aux lox tix ceu kawx. Aux krai lox tete telai ka pex, pex rawg ceu pa tix ang ah ka daux ceukaux Aux ka Keeing: Cao:, Nawh tag tawx ka pex heue:. 24 Tom: yamin ang pex sax rawg tix ceu kawx ka daux ceukaux Aux. Yuh ka mawx krax gauxrhawm: pex sang naog, rawg heue:, mai: pex tag pon.
25 "Aux hoik krai ceu in khankix ka daux lox phektem:, viang mawh kawx nan: bawg yam tag sang hoek yam Aux tag ang teei lox phektem: tix krai ka pex, viang mawh nan: yam an Aux tag teei lox sidawng: krai grawh grawng: Keeing: Cao: ka pex heue:. 26 Ka daux singaix an pex tag sang rawg bwan: ka daux ceukaux Aux, mai: Aux ang krai ka pex, Aux sang rawg ka Keeing: Cao: son pex, 27 kheu tokaux Keeing: Cao: moh ka pex, mawh kheu moh pex ka Aux, mai: hoik yumrhawm: grawng: pa lih hoek Aux khaing: Keeing: Cao: heue:. 28 Aux lih hoek khaing: Keeing: Cao: mai: hoik hoek piang haktiex in, mai: Aux sang baox deeh lih khaing: haktiex mai: hu: ka Keeing: Cao: heue:." 29 Kawncau Nawh khankix ah nin: ka Nawh, "Yamin Maix ang krai lox phektem:, Maix krai lox pa sidawng:. 30 Yamin ex hoik tawng grawng: tawng Maix ku ceu khawm: uik, mai: Maix ang lo pui pa chawk ka Maix ku ceu khawm: uik, mai: Maix ang lo pui pa chawk ka Maix tix kaux kawx, kheu in ex yumrhawm: grawng: lih hoek Maix khaing: Siyiex heue:." 31 Yesux baox pawk lox mai: ah nin: ka kix, "Yamin pex hoik yumrhawm: lie? 32 Jhak heue:, bawg yam nari tag sang hoek, mawh heue:, pie yamin kawx hoik hoek, yam pex tag sang prung: prang: hu: dee ot pui mawx dee ot pui an, mai: sang prah Aux ot nong: nong:. Viang mawh kawx nan: Aux ot nong: nong: ang mawh, kheu Keeing: Cao: ot tau mai: Aux heue:. 33 Aux hoik krai lox ceu in khankix ka pex, yuh ka mawx son sang koe: pex pa nhim: ka daux Aux, ka piang haktiex in pex tag yaox krax kharhawm: kharhi:, viang mawh kawx nan: kieh koe: rhawm: cong: heue:, Aux hoik pex ka haktiex in heue:."
Yohan
Simin Ting 17
Yesux rawg bwan:
1 Khaix hoik ah Yesux ceu an khankix Nawh maong tix jhak plak raoma:, mai: ah nin:, "Keeing: eue:, bawg yam nari hoik hoek, kieh Kawn: Maix koe: min: plakngai: liak, yuh ka mawx son Kawn: Cao: sang kieh Maix koe: min: plakngai: heue:. 2 Awm: hoik tawx Maix siawp sibrawm ka Nawh piang ceu pui khawm: uik, yuh ka mawx Nawh sang tawx ju leeing: ju leeing: phan:, ka can pui pa hoik tawx Maix ka Nawh khawm: uik heue:. 3 Mai: in mawh ju leeing: ju leeing: phan:, yuh ka mawx son sang tawng kix ka Maix, pa mawh Siyiex pa mawh pa meh tix kaux khaing:, mai: Yesux Khrit pa hoik ploi: Maix hoek kah. 4 Aux hoik kieh Maix koe: min: plakngai: piang haktiex in. Aux hoik yuh kaing pa tawx Maix ka Aux son pa yuh tom: hoik. 5 Mai: Keeing: eue:, yamin kieh Aux koe: min: plakngai: mai: tokaux Maix, awm: pa hoik koe: Aux mai: Maix ka: sang koe: haktiex dix heue:. 6 Aux hoik plak jhi: ceukaux Maix ka pui pa hoik tawx Maix ka Aux khaing: haktiex. Kix hoik mawh cie Maix, mai: Maix hoik tawx kix ka Aux, mai: kix priex tix hawt gumlox Maix heue:. 7 Yamin kix hoik tawng grawng: can ceu pa tawx Maix ka Aux khawm: uik, mawh pa hoek khaing: Maix. 8 Kheu gumlox pa hoik tawx Maix ka Aux, Aux hoik tawx ka kix, mai: kix hoik rieb tix teei ka khankix, mai: kix hoik tawng grawh grawng: pa hoik lih hoek Aux khaing: Maix: tete, mai: kix yumrhawm: grawh grawng: pa hoik ploi: Maix Aux hoek heue:. 9 Aux rawg bwan: ka son kix, ang Aux rawg bwan: ka son haktiex, viang mawh kawx nan:, Aux rawg bwan: ka son pa hoik tawx Maix ka Aux khankix, kheu kix mawh cie Maix. 10 Mai: cie Aux khawm: uik mawh cie Maix, mai: cie Maix mawh cie Aux, mai: Aux koe: min: plakngai: kheu kix heue:. 11 Mai: yamin ang Aux lai deeh ot ka piang haktiex in, viang mawh kawx nan: kix kawn: ot piang haktiex in, mai: Aux sang deeh hoek ka Maix. Keeing: pa singax eue:, priex kix pa hoik tawx Maix ka Aux ka daux ceukaux Maix liak, yuh ka mawx son sang mawh kix tix kaux khaing: awm: mawh Ax tix kaux khaing: heue:. 12 Yam ot Aux mai: kix piang haktiex in, Aux priex kix ka daux ceukaux Maix, pui pa hoik tawx Maix ka Aux khankix Aux hoik kia: hoik pau, mai: tix kaux kawx ang laux ang leeing:, lheu: khaing: kaw pa mawh kawn: pa laux pa leeing:, son sang naog lox pa koe: ka daux Phuk lai sigang: khri: heue:.
Kawncau khankix ang dex dawd mai: haktiex
13 Mai: yamin Aux tag sang hoek ka Maix, mai: Aux krai ceu in khankix yam kawn: ot Aux ka piang haktiex in, yuh ka mawx son sang koe: kix pa gauxrhawm: Aux tom: naog ka daux tokaux kix heue:. 14 Aux hoik tawx gumlox Maix ka kix, mai: haktiex koeng ka kix, kheu kix ang dex ang dawd mai: haktiex, awm: ang Aux lai dex dawd mai: haktiex heue:. 15 Ang Aux lai rawg son sang teei Maix kix lih khaing: haktiex, viang mawh kawx nan: rawg son sang priex Maix kix khaing: pa caox heue:. 16 Kix ang dex ang dawd mai: haktiex, awm: ang Aux lai dex dawd mai: haktiex. 17 Kieh kix singax ka daux pa mawh pa meh Maix. Gumlox Maix mawh pa mawh pa meh heue:. 18 Awm: hoik ploi: Maix Aux hoek ka piang haktiex in, viang Aux kawx hoik ploi: kix hu: ka piang haktiex heue:. 19 Mai: Aux kieh tokaux Tix singax son kix, yuh ka mawx tokaux kix kawx tag sang singax ka daux pa mawh pa meh heue:. 20 Ang Aux lai rawg bwan: ka son kix khaing:, viang mawh nan: rawg khawm: son pui khankix pa tag sang yumrhawm: ka Aux kheu gumlox kix heue:. 21 Yuh ka mawx kix khawm: uik tag sang mawh tix kaux, Keeing: Cao: eue:, awm: ot Maix ka daux Aux, mai: Aux ot ka daux Maix, yuh ka mawx kix kawx tag sang ot ka daux Ax, mai: son sang yumrhawm: haktiex grawng: pa hoik ploi: Maix Aux hoek heue:. 22 Mai: min: plakngai: pa hoik tawx Maix ka Aux, Aux hoik tawx ka kix, yuh ka mawx son sang mawh kix tix kaux khaing:, awm: mawh Ax tix kaux khaing:. 23 Aux ot ka daux kix, mai: Maix ot ka daux Aux, yuh ka mawx son sang grum lih mawh kix tix kaux, mai: son sang tawng haktiex grawng: mawh Maix pa ploi: Aux hoek, mai: grawh grawng: hoik moh Maix ka kix, awm: hoik moh Maix ka Aux heue:. 24 Keeing: eue:, Aux simie tix kieh kix pa hoik tawx Maix ka Aux, ot tau mai: Aux ka dee ot Aux, yuh ka mawx son sang yaox kix min: plakngai: Aux, pa hoik tawx Maix ka Aux, mawh kheu hoik moh Maix ka Aux ka: sang jah tix kaw: num: haktiex heue:. 25 O Keeing: pa rah pa see, haktiex in ang lai tawng ka Maix, viang mawh nan: Aux hoik tawng ka Maix, mai: inkix tawng grawng: pa hoik ploi: Maix Aux hoek heue:. 26 Mai: Aux hoik kieh kix tawng ka ceukaux Maix, mai: Aux tag sang baox kieh kix tawng heue:, yuh ka mawx krax moh pa hoik moh Maix ka Aux, tag sang ot ka daux kix, mai: son sang ot Aux ka daux kix heue:."
Yohan
Simin Ting 18
Yudax Isakariut tik tawx ka Yesux
18:3-11 koe: daux lai Mth. 26:47-56; Makux 14:43-50; Lukax 22:47-53
1 Khaix hoik ah Yesux lox ceu an khankix, Nawh lih hu: tau mai: kawncau Nawh khankix ka plak toi: rawm: klawng: Kedron, dee koe: sipeem tix dah, mai: Nawh Cao: mai: kawncau Nawh khankix laig tan: heue:. 2 Mai: Yudax kaw pa sang tik sang tawx Nawh Cao: kawx, tawng dee an, kheu Yesux hoik hu: tan: tau mai: kawncau Nawh khankix lawx lawx heue:. 3 Mawh kheu in Yudax viex pui naing mai: puicau cao: giex kaing: li pa ting khankix, mai: Pharishie: khankix, viex ngu proh mai: kawkngu mai: kraung naing mai: hoek tan:. 4 Mawh kheu hoik tawng Yesux grawng: ceu pa tag sang hoek ka piang Nawh khawm: uik, Nawh Cao: tom: hu: mai: chawk ka kix ah nin:, "Sawg pex pui mawx?" 5 Kix deeh pawk lox ka Nawh Cao: mai: ah nin:, "Sawg Yesux pui veng Nazariet." Yesux baox ah nin: ka kix, "Aux mawh Nawh heue:." Mai: Yudax kaw pa sang tik sang tawx Nawh Cao: kawx, cung tau mai: kix heue:. 6 Yam krai Yesux ka kix, "Aux mawh Nawh heue:," kix deeh yawn: plak khaix mai: goh piang tiex heue:. 7 Mawh kheu nan: Nawh Cao: baox deeh chawk ka kix, "Sawg pex pui mawx?" Mai: kix ah nin:, "Sawg ka Yesux pui veng Nazariet heue:." 8 Yesux baox pawk lox mai: ah nin:, "Aux hoik krai ka pex grawng: mawh Aux Nawh, mawh kheu nan: phan: pex sawg Aux, kieh pui in khankix hu: dee hu: kix heue:." 9 (Yuh ka mawx lox pa hoik ah Nawh nin:, "Pui pa hoik tawx Maix ka Aux khankix, Aux ang kieh laux kieh leeing: tix kaux kawx," tag naog heue:). 10 Yam an Simon Petrux kheu koe: nawh vaid tix kre: lawd vaid an, mai: kid tix tik yhaok khawn: dawm: siliex cao: giex kaing: li pa ting piang khawm: uik. (Ceukaux siliex an mawh Malakhux). 11 Mawh kheu nan: Yesux ah nin: ka Petrux, "Teei vaid maix deeh sau: ka daux phak tix. Kawk pa hoik tawx Keeing: Cao: ka Aux, Aux tag ang lai nyaux kah lie?"
Kham: pa chawk cheng: sivoe cao: giex kaing: li
18:12-13 koe: daux lai Mth. 26:57; 18:16-18 koe: daux lai Mth. 26:69-70; Makux 14:66-68; Lukax 22:55-57; 18:19-24 koe: daux lai Mth. 26:59-68; Makux 14:55-65; Lukax 22:63-71
12 Yam an cao: giex kaing: naing mai: pui naing nawh, mai: puicau pui Yudax khankix giex Yesux mai: phyawk Nawh Cao: heue:. 13 Mai: kix tok Nawh hu: ka: sivoe ka Annax, kheu mawh nawh paox Kayaphax, cao: giex kaing: li pa ting piang paox tix daux num an. 14 Kayaphax mawh kaw pa hoik gau lox ka pui Yudax khankix, grawh grawng: pa yum pui tix kaux son pui khankix mawh pa mhawm: son kix heue:.
15 Simon Petrux mai: kawncau tang: kaux tix kaux hawt hu: khaix Yesux heue:. Kawncau an mawh pa tawng cao: giex kaing: li pa ting, mai: laig tau mai: Yesux ka daux nyiex haw: cao: giex kaing: li pa ting an. 16 Petrux kienie, cung dex siviex plak praix. Mawh kheu nan: kawncau tang: kaux an, pa tawng cao: giex kaing: li pa ting an kah, hu: sikah mai: bon: pa pau siviex an, mai: viex Petrux laig heue:. 17 Yam an bon: pa pau siviex ah nin: ka Petrux, "Maix kawx mawh kawncau Pui an tix kaux lie?" Nawh deeh ah nin:, "Aux ang mawh." 18 Yam an siliex mai: puicau khankix hoik phlu: gaoxngu mai: cung tan:. Kheu kwat yam an, kix cung tix co ngu, mai: Petrux kawx cung tau mai: kix mai: co ngu heue:.
19 Yam an cao: giex kaing: li pa ting an chawk ka Yesux grawh grawng: kawncau mausoi: Nawh khankix, mai: grawh grawng: pa sidiex pa gau Nawh. 20 Yesux baox pawk lox ka nawh mai: ah nin:, "Aux hoik krai sidawng: ka haktiex khawm: uik. Aux hoik sidiex hoik gau daux nyiex dee sidiex khankix mai: daux nyiex bwan:, mai: dee khrawk khrawm: pui Yudax khankix paox tix jheeng: jheeng:, mai: ang Aux mox tix sidiex dee glip tix ceu kawx. 21 Maix lai chawk ka Aux yuh ka mawx? Chawk ka kix pa hoik mhong: ka Aux, grawng: pa hoik krai Aux pa tix ka kix. Jhak heue:, khankix tawng grawng: ceu pa hoik krai Aux khankix heue:." 22 Mai: yam hoik ah Nawh Cao: lox an, puicau pa cung tan: tix kaux teei taix tix simang: Yesux kah, mai: ah nin:, "Maix khex pawk lox ka cao: giex kaing: li pa ting yuh nan: lie?" 23 Yesux pawk lox mai: ah nin:, "Phan: Aux hoik ah pa caox pa ang khaw:, tawx mhai: sakse: grawh grawng: pa caox pa ang khaw: an, viang mawh kawx nan: phan: Aux hoik krai ceu pa mhawm:, yuh pa tix maix lai simang: Aux?" 24 Mawh kheu nan: Annax ploi: Yesux hu: awm: pa hoik phyawk Nawh ka Kayaphax, pa mawh cao: giex kaing: li pa ting piang paox tix heue:.
Petrux thiang: tix ang tawng ka Yesux
18:25-27 koe: daux lai Mth. 26:71-75; Makux 14:69-72; Lukax 22:58-62
25 Yam an Simon Petrux cung tan: mai: co ngu. Mawh kheu nan: kix ah nin: ka nawh, "Maix kawx mawh kawncau Nawh tix kaux lie?" Nawh thiang: mai: ah nin:, "Aux ang mawh." 26 Siliex cao: giex kaing: li pa ting, pa mawh paox ceu kaw pa hoik kid Petrux tix tik yhaok tix kaux ah nin:, "Aux hoik yaox maix ot tau mai: Yesux ka daux sipeem ang mawh lie?" 27 Petrux baox deeh thiang: tix bawg, mai: ia: ux dom: mawx dom: an heue:.
Kham: pa chawk cheng: sivoe simiang Pilat
18:29-40 koe: daux lai Mth. 27:11-18, 20-23; Makux 15:2-15; Lukax 23:2-3, 18-25
28 Pon ngawb caocao kix viex Yesux lih khaing: Kayaphax mai: tok Nawh hu: ka daux nyiex haw:. Viang mawh kawx nan: tokaux kix ang laig ka daux nyiex haw:, son sang luan kix khaing: pa seeing: pa brai:, mai: pon tix ih poi Pasakha heue:. 29 Mawh kheu nan: simiang Pilat lih hu: ka kix mai: chawk ah nin:, "Pex deuh phimap ceu pa tix ka Pui in?" 30 Kix baox pawk lox mai: ah nin: ka nawh, "Phan: Pui in ang mawh Pui pa yuh pa caox, ang ex lai viex tix tawx Nawh ka maix." 31 Mawh kheu nan: simiang Pilat baox ah nin: ka kix, "Pex teei Nawh mai: prawng ca: Nawh awm: pa khaw: mai: been li pex." Pui Yudax khankix baox ah nin: ka nawh, "Ang ex koe: akhwang: tix pah pui yum tix kaux kawx." 32 (Yuh ka mawx son sang naog lox pa hoik grux krai Yesux grawh grawng: sang yum Nawh, ka krax yum pa yuh ka mawh heue:).
33 Mawh kheu nan: simiang Pilat deeh laig ka daux nyiex haw:, mai: kok Yesux mai: chawk ah nin: ka Nawh Cao:, "Maix mawh Simiang Khunhawkham Pui Yudax lie?" 34 Yesux baox pawk lox mai: ah nin:, "Lox in mawh lox pa lak keud maix tix ah lie, phan: ang mawh nan: mawh pa pui tang: kaux hoik krai ka maix grawng: Aux lie?" 35 Simiang Pilat baox pawk lox mai: ah nin:, "Aux mawh pui Yudax lie? Pui ceu Maix, mai: cao: giex kaing: li pa ting khankix, hoik tawx Maix ka aux. Maix hoik yuh ceu pa tix?" 36 Yesux baox pawk lox ah nin:, "Meung Aux ang dex ang dawd mai: haktiex in, phan: meung Aux dex dawd mai: haktiex in, kawncau Aux tag sang yuh naing son ang sang kieh tawx Aux ka daux tawm: taix pui Yudax, viang mawh nan: meung Aux ang dex ang dawd mai: pa yuh nin:." 37 Mawh kheu nan: simiang Pilat chawk ah nin: ka Nawh Cao:, "Phan: mawh nan: Maix mawh Simiang Khunhawkham lie?" Yesux baox pawk lox mai: ah nin: ka nawh, "Awm: pa ah maix, Aux mawh simiang khunhawkham heue:, Mawh kheu in Aux tom: keh, mai: mawh kheu in Aux hoek piang haktiex in, yuh ka mawx son sang kham: Aux mhai: sakse: grawh grawng: pa mawh pa meh. Pa dex pa dawd mai: pa mawh pa meh ku kaux daux pui nghiet lox Aux heue:." 38 Simiang Pilat baox chawk ah nin: ka Nawh Cao:, "Pa mawh pa meh mawh pa tix?"
Mai: khaix hoik ah nawh nin:, nawh deeh lih hu: ka pui Yudax khankix tix bawg mai: ah nin: ka kix, "Aux ang yaox pa phit pa lud ka Kaw in tix ceu kawx. 39 Viang mawh nan:, pex koe: been, pa kieh aux ploi: pui tix kaux ka pex yam yuh poi Pasakha, mawh kheu nan: pex sang kieh aux ploi: Simiang Khunhawkham Pui Yudax ka pex lie?" 40 Yam an kix khawm: uik baox kok tix bawg mai: ah nin:, "Ang sang kieh ploi: Pui in, ploi: ka Barabax heue:." Barabax mawh pui tud pui rhim: heue:.
Yohan
Simin Ting 19
Mhok kat lawm
19:1-16 koe: daux lai Mth. 27:27-31; Makux 15:16-20
1 Khaix an simiang Pilat teei Yesux mai: kieh sivied Nawh. 2 Mai: pui naing khankix taing: mhok kat lawm mai: sau: ka piang kaing: Nawh Cao:, mai: teei kraung ceep raoh klai mai: ceep ka Nawh. 3 Mai: kix hoek ka Nawh Cao: mai: ah nin:, "Simiang Khunhawkham Pui Yudax eue:, kieh nyawm ot heue:." Mai: kix teei taix tix simang: Nawh kah. 4 Mai: simiang Pilat deeh lih hu: tix bawg mai: ah nin: ka pui khankix, "Jhak heue:, aux viex Nawh lih ka pex, yuh ka mawx son sang tawng pex grawng: pa ang aux yaox dee phit dee lud ka daux Nawh tix ceu kawx." 5 Mawh kheu nan: Yesux ceep mhok kat lawm mai: ceep kraung ceep raoh klai mai: lih hoek heue:. Mai: simiang Pilat ah nin: ka kix, "Jhak ka Pui in heue:." 6 Yam cao: giex kaing: li pa ting khankix mai: puicau kix khankix yaox Nawh Cao: kix kok yo ah nin:, "Tawk Nawh piang khaoxlhak heue:. Tawk Nawh piang khaoxlhak heue:." Simiang Pilat ah nin: ka kix, "Tokaux pex teei Nawh mai: tawk Nawh piang khaoxlhak heue:, kheu ang aux yaox deeh phit deeh lud Nawh tix ceu kawx heue:." 7 Pui Yudax khankix baox pawk lox mai: ah nin: ka nawh, "Ex koe: been li mai: phan: hawt been li ex Nawh khaw: tix yum kheu Nawh yuh tokaux Tix mawh Kawn: Siyiiex heue:." 8 Mawh kheu nan: yam mhong: simiang Pilat lox an, nawh baox nie lhat kah. 9 Mai: nawh deeh laig daux nyiex haw:, mai: chawk Yesux ah nin:, "Maix kaoh khaing: dee mawx?" Viang mawh kawx nan: Yesux ang pawk lox tix gum kawx heue:. 10 Yam an simiang Pilat baox ah nin: ka Nawh Cao:, "Ang Maix sikah mai: aux lie? Maix ang tawng grawng: pa koe: aux siawp sibrawm tix ploi: Maix, mai: siawp sibrawm tix tawk Maix piang khaoxlhak lie?" 11 Yesux baox pawk lox mai: ah nin: ka nawh, "Maix ang tau tix koe: siawp sibrawm tix yuh tix ceu kawx ka Aux, phan: ang tawx ka maix khaing: dee long:. Mawh kheu nan: kaw pa teei tix tawx Aux ka maix nie lheu: ting phimap heue:." 12 Jah tom: yam an simiang Pilat sawg tix ploi: Nawh Cao:, viang mawh kawx nan: pui Yudax khankix kok yo mai: ah nin:, "Phan: maix ploi: Pui in, maix ang lai mawh paox pie simiang Kesa. Can pui ku kaux pa yuh tokaux tix mawh simiang khunhawkham mawh pui pa koeng ka simiang ting Kesa heue:." 13 Mawh kheu nan: yam hoik mhong: simiang Pilat lox ceu an kix, nawh viex Yesux lih, mai: kieh Nawh ngawm dee ngawm cao: prawng see:, dee kok mawh Dee Tawm Simaox, (Lox Hebrie kok mawh Kabathax). 14 Singaix an mawh singaix khre: kix son poi Pasakha, mai: dex hoek 148liah nari. Mai: simiang Pilat ah nin: ka pui Yudax khankix, "Jhak Simiang Khunhawkham pex heue:." 15 Mawh kheu nan: kix tom: kok yo mai: ah nin:, "Teei tix tik Nawh. Teei tix tik Nawh. Tawk Nawh piang khaoxlhak heue:." Simiang Pilat baox ah nin: ka kix, "Aux tag sang teei tix tawk Simiang Khunhawkham pex piang khaoxlhak lie?" Cao: giex kaing: li pa ting khankix pawk lox mai: ah nin:, "Ang ex lai koe: simiang khunhawkham lheu: khaing: simiang Kesa tix kaux kawx heue:." 16 Yam an simiang Pilat tawx Yesux ka kix, son sang tawk Nawh piang khaoxlhak. Mai: kix teei Yesux mai: tok Nawh hu: heue:.
Tawk Nawh ka piang khaoxlhak
19:17-24 koe: daux lai Mth. 27:33-44; Makux 15:22-32; Lukax 23:33-43
17 Mai: Nawh Cao: klawm: khaoxlhak tokau: Tix hu: dee kok mawh Dee Siang: Kaing:. Daux lox Hebrie kok mawh Gawlagawthax heue:. 18 Kix tawk Nawh Cao: piang khaoxlhak ka dee an, mai: tang: kaux ra: kaux kawx kix tawk tau mai: Nawh Cao:, tix kaux tix plak, mai: Yesux ot ka sinax heue:. 19 Mai: simiang Pilat tiem: tix deuh lai ka piang khaoxlhak Nawh Cao: pa ah nin:, YESUX PUI VENG NAZARIET, SIMIANG KHUNHAWKHAM PUI YUDAX." 20 Lai an pui Yudax haoh hun: phat tix yaox heue:, mawh kheu dee tawk kix Yesux piang khaoxlhak dex ka veng, mai: lai pa tiem: an mawh daux lox Hebrie, mai: lox Romax, mai: lox Helasax heue:. 21 Mawh kheu nan: cao: giex kaing: li pui Yudax pa ting khankix hu: ka simiang Pilat mai: ah nin:, "Paw tiem: lai pa ah, 'Simiang Khunhawkham Pui Yudax,' viang mawh nan: tiem: lox pa ah nin:, 'Nawh ah, Aux mawh Simiang Khunhawkham Pui Yudax.'" 22 Simiang Pilat baox pawk lox mai: ah nin:, "Pa hoik tiem: aux, aux hoik tiem:."
23 Mawh kheu nan: khaix hoik tawk pui naing khankix Yesux ka piang khaoxlhak, kix teei kraung ceep Nawh mai: gwieh pon: son, son pui naing tix kaux tix son, sibex kawx kix teei heue:. Sibex an ang koe: khaix caing, mawh pa hoik taing: jah tom: plak piang tom: dee hoik. 24 Mawh kheu nan: kix tix kaux hoik tix kaux ah nin: ka paox tix, "Ex paw riah sibex in, ex nieb tix yaox pui mawx sang pon." In mawh son sang naog gumlox Phuk lai sigang: khri: pa ah nin:,
149"Kix gwieh tix teei kraung ceep Aux, mai: nieb tix yaox mai: teei sibex Aux."
Kheu nan: pui naing khankix tom: yuh ceu an. 25 Yam an miex Nawh Cao: mai: pux o: miex Nawh Cao:, mai: Marix moeng Kalawphax, mai: Marix Magadalax khankix cung dex ka khaoxlhak Cao: Yesux heue:. 26 Mawh kheu nan: yam yaox Yesux miex Nawh mai: kawncau pa moh Nawh cung dex tan:, Nawh Cao: ah nin: ka miex Nawh, "Bon: eue:, jhak ka kawn: maix heue:." 27 Khaix an Nawh Cao: baox ah nin: ka kawncau an, "Jhak ka miex maix heue:." Mai: jah tom: yam an kawncau an teei miex Nawh Cao: ot mai: tix ka daux nyiex nawh heue:.
Grawng: yam yum Yesux
19:29-30 koe: daux lai Mth. 27:48,50; Makux 15:36-37; Lukax 23:36
28 Khaix an kheu tawng Yesux grawng: pa hoik hoik ku ceu, yuh ka mawx son sang naog gumlox Phuk lai sigang: khri:, Nawh Cao: ah nin:,
150"Aux sang nyaux nie rawm:."
29 Ka dee an koe: aw: pa naog rawm: sidah niex tix mu:, mai: kix teei tix ceu pa awm: tih151, pa koe: daux rawm: sigrit sigra: mai: cub ka daux rawm: sidah niex, mai: sau: ka toh kak khaox Hesop152, mai: yaog tix sau: ka jheeh Nawh Cao:. 30 Mawh kheu nan: khaix hoik ih Yesux rawm: sidah niex, Nawh Cao: ah nin:, "Hoik hoik khawm: uik." Mai: Nawh nom: kaing: Tix, mai: deeh tawx Khwan: Tix heue:.
Groi si dah bhawng: mai: priex sipaung: Nawh Cao:
31 Singaix an mawh Singaix Khre:, mai: yuh ka mawx son ang sang koe: tokaux yum khankix ka piang khaoxlhak singaix twah, (mawh kheu singaix twah an mawh pa ting pa lhaong:), pui Yudax khankix tom: hu: rawg hu: mhaing: ka simiang Pilat kieh nawh nhie: raig caong kix pot, son sang pon tix tik kix kah heue:. 32 Mawh kheu nan: pui naing khankix hu: mai: raig caong kaw phaoxka: tix kaux pot, mai: tang: kaux an pa hoik tawk tau mai: Yesux. 33 Viang mawh kawx nan:, yam hoek kix ka Yesux, mai: yaox hoik yum Nawh Cao:, kix ang lai raig caong Nawh pot heue:. 34 Viang mawh nan:, pui naing tix kaux teei pliah swat paw: Nawh Cao: kah, mai: nham: mai: rawm: lih dom: mawx dom: an heue:. 35 Mai: kaw pa hoik yaox grawh grawng: an kham: mhai: sakse:, mai: mhai: sakse: nawh mawh pa mawh pa meh. Mai: nawh tawng grawng: lox pa krai nawh mawh pa mawh pa meh, yuh ka mawx viang pex kawx tag sang yumrhawm: kah heue:. 36 Grawh grawng: nawh ceu in khankix hoik mawh son sang naog lox Phuk lai sigang: khri: pa ah nin:,
153"Siang: Nawh tag ang lai pot tix mu: kawx heue:."
37 Mai: daux Phuk lai sigang: khri: tang: dah baox deeh ah nin:,
154"Kix tag sang jhak ka Kaw pa hoik swat kix kah heue:."
Grawng: sibaung: ka Yesux
19:38-42 koe: daux lai Mth. 27:57-61; Makux 15:42-47; Lukax 23:50-56
38 Mai: khaix ceu in khankix, Yosiep pa mawh pui veng Arimase, pa mawh kawncau mausoi: Yesux tix kaux, viang mawh nan: nawh briex tix yuh kheu lhat nawh ka pui Yudax khankix, hu: rawg hu: mhaing: tix teei tokaux yum Yesux, ka simiang Pilat, mai: simiang Pilat tawx akhawng: ka nawh, mawh kheu nan: nawh hu: teei tokaux yum Nawh Cao: heue:. 39 Mai: Nikawdimux pa mawh kaw pa hoik hoek ka Nawh Cao: yam ponsawm: phaoxka: kawx, viex sidah bhawng: pa mawh Muran mai: Acaw155 pa hoik klao: tau, dex tingoe: (30) coi. 40 Mawh kheu nan: kix teei tokaux yum Yesux, mai: teei man: pua: tokaux Nawh tau mai: sidah bhawng: an, awm: sax koe: been pui Yudax, yam sang sipaung: kix pui heue:. 41 Koe: sipeem tix dah ka dex dee hoik tawk Nawh Cao: piang khaoxlhak, mai: ka daux sipeem an koe: simeeig pa khraox tix dauh:, dee ang sax deuh pui tix kaux kawx heue:. 42 Kheu singaix an mawh Singaix Khre: pui Yudax, mai: kheu koe: simeeig an dex dee an, kix tom: deuh tokaux yum Yesux tan: heue:.
Yohan
Simin Ting 20
Daux simeeig pa hoik yi
20:1-8 koe: daux lai Mth. 28:1-8; Makux 16:1-8; Lukax 24:1-10
1 Ka daux aliah singaix, singaix tix pon ngawb caocao yam kawn: vhaik praix, Marix Magadalax hu: ka simeeig, mai: yaox hoik gah simaox khaing: simeeig heue:. 2 Mawh kheu nan: nawh tom: to: hu: ka Simon Petrux mai: kawncau tang: kaux pa moh Yesux, mai: ah nin: ka kiex, "Kix hoik teei Simiang lih khaing: daux simeeig, mai: ang ex tawng dee hoik een: kix Nawh Cao: heue:." 3 Mawh kheu nan: Petrux mai: kawncau tang: kaux an lih hu: mai: hu: ka simeeig. 4 Kiex khawm: ra: kaux to: hu: tau, viang mawh nan: kawncau tang: kaux an luan khaing: Petrux mai: hoek ka simeeig ka: sivoe heue:. 5 Mai: nawh nom: tix jhak ka daux, mai: nawh yaox man: pua: pa koe: tan:, viang mawh nan: ang nawh laig ka daux heue:. 6 Yam hoek Simon Petrux pa hawt khaix nawh, nawh laig ka daux simeeig mai: yaox man: pua: khankix tan:, 7 mai: man: phaced pa hoik koe: piang kaing: Nawh Cao:, ang lai koe: tau mai: man: pua: khankix, viang mawh nan: hoik pua: tix een: tang: dah heue:. 8 Yam an kawncau tang: kaux an pa hoik hoek ka simeeig ka: sivoe an kawx, laig mai: yaox, mai: yumrhawm: kah heue:. 9 Mawh kheu ang kix nyang bax tawng gumlox pa koe: ka daux Phuk lai sigang: khri:, pa ah Nawh Cao: tag sang deeh kaoh im: khaing: krax yum. 10 Kheu nan: kawncau an deeh ing: ka dee ot kiex heue:.
11 Viang mawh kawx nan: Marix cung ka plak praix simeeig mai: yiem heue:. Yam yiem nawh tan: nawh nom: tix jhak ka daux simeeig, 12 mai: nawh yaox kawncau Siyiex ra: kaux ceep kraung pa paing mai: ngawm ka dee hoik een: tokaux yum Yesux kah, plak kaing: Nawh tix kaux mai: plak caong tix kaux heue:. 13 Mai: kiex chawk nawh ah nin:, "Bon: eue:, yiem maix kheu pa tix?" Nawh deeh ah nin: ka kiex, "Mawh kheu hoik teei kix Simiang aux, mai: ang aux tawng dee hoik een: kix Nawh heue:." 14 Khaix hoik ah nawh nan:, nawh deeh gi plak khaix tix mai: yaox Yesux cung tan:, viang mawh kawx nan: ang nawh tawng mawhYesux heue:. 15 Yesux chawk mai: ah nin: ka nawh, "Bon: eue:, yiem maix kheu pa tix? Sawg maix pui mawx?" Nawh ce: Nawh mawh kaw pa pau sipeem mai: pawk lox ah nin: ka Nawh Cao:, "Simiang eue:, phan: Maix hoik teei Nawh hu:, krai aux mhong: dee een: maix Nawh liak, mai: aux tag sang teei tix viex Nawh hu: heue:." 16 Yesux baox ah nin: ka nawh, "Marix eue:." Mai: nawh deeh gi mai: ah nin: ka Nawh Cao: ka lox Hebrie, "Rabonix." Pa ah Rabonix mawh Sara Cao: Gau. 17 Yesux baox ah nin: ka nawh, "Paw vi teeh Aux, kheu ang Aux nyang bax haok hu: ka Keeing: Cao:. Viang mawh kawx nan: hu: ka puxaik Aux khankix, mai: krai kix grawh grawng: pa sang haok Aux ka Keeing: Aux mai: Keeing: pex, mai: Siyiex Aux mai: Siyiex pex heue:." 18 Mai: Marix Magadalax hu: mai: krai ka kawncau khankix, "Aux hoik yaox Simiang heue:." Mai: grawh grawng: pa hoik krai Nawh Cao: ceu an khankix ka nawh heue:.
Plak jhi: Tix ka kawncau khankix
19 Ka daux bo singaix an, ka daux aliah singaix, singaix tix, mai: khaix hoik nyeep dee ot kawncau khankix, kheu lhat kix ka pui Yudax khankix, Yesux hoek mai: cung ka sinax kix, mai: ah nin: ka kix, "Kieh pa nhim: koe: mai: pex heue:." 20 Mai: khaix ah Nawh nan:, Nawh Cao: jhi: kix yaox taix Nawh mai: paw: Nawh. Mawh kheu nan: yam yaox kawncau khankix ka Simiang, kix tom: koe: krax gauxrhawm: gauxrhi: heue:. 21 Yam an Yesux baox deeh ah nin: ka kix, "Kieh pa nhim: koe: mai: pex heue:. Awm: hoik ploi: Keeing: Cao: Aux hoek, Aux kawx ploi: pex hu: yuh nan: heue:." 22 Mai: khaix hoik ah Nawh nan:, Nawh Cao: phlu: piang kix mai: ah nin:, "Pex rieb tix teei ka Khwan: Singax Singeh awawx. 23 Pex ploi: ka phimap pui mawx ang ah, tag sang ploi: phimap nawh khankix heue:. Pex deuh ka phimap pui mawh ang ah, tag sang kawn: ca: deuh ka phimap nawh khankix heue:."
24 Viang mawh kawx nan: yam hoek Yesux, Thomax pa mawh kawncau tix kaux ka daux kawncau kao: kaux ra:, pa kok mawh Didumux ang ot mai: kix. 25 Mawh kheu nan: kawncau tang: kaux an khankix ah nin: ka nawh, "Ex hoik yaox Simiang heue:." Viang mawh kawx nan: nawh deeh ah nin: ka kix, "Phan: aux ang yaox khaix dee tawk jimrhiem: ka tawm: taix Nawh, mai: ang pon tix sau: gien: taix aux ka daux khaix tawk jimrhiem:, mai: ang pon tix sau: taix aux ka paw: Nawh, aux ang lai yumrhawm: kah heue:." 26 Mai: khaix an daix singaix, kawncau Nawh khankix deeh ot ka daux dee ot tan: tix bawg, mai: Thomax kawx ot tan: mai: kix. Viang hoik nyeep siviex kawx, Yesux hoek mai: cung sinax kix mai: ah nin:, "Kieh pa nhim: koe: mai: pex heue:." 27 Yam an Nawh Cao: ah nin: ka Thomax, "Nyeu gien: taix maix, mai: jhak ka tawm: taix Aux, mai: nyeu taix maix sau: tix yaox ka daux paw: Aux. Paw kieh koe: krax ang yumrhawm:, viang mawh nan: kieh koe: krax yumrhawm: heue:." 28 Thomax deeh pawk lox mai: ah nin: ka Nawh Cao:, "Simiang aux, mai: Siyiex aux." 29 Yesux baox ah nin: ka nawh, "Kheu hoik yaox maix Aux maix tom: yumrhawm: kah. Pui pa ang yaox mai: yumrhawm: khankix, ting bwanson: heue:."
Grawh grawng: pa tiem: ka lai in kix
30 Mhai: pa daox pa am: tang: ceu pa yuh Yesux sivoe kawncau khankix, pa ang lai tiem: ka daux phuk lai in kied nie tete. 31 Viang mawh kawx nan: hoik tiem: ceu inkix, son sang yumrhawm: pex grawng: mawh Yesux Cao: Khrit, pa mawh Kawn: Siyiex, mai: yuh ka mawx kheu yumrhawm: pex, pex tag sang pon ju pa im: ka daux ceukaux Nawh Cao: heue:.
Chapter 21
Plak jhi: tokaux Tix hawt rawm: nhawng: Galilie:
1 Khaix ceu an khankix Yesux baox deeh jhi: tokaux Nawh yaox ka kawncau Nawh tiblah ka dex rawm: nhawng: Tiberix, mai: Nawh jhi: tokaux Tix yaox yuh nin: heue:. 2 Simon Petrux mai: Thomax pa kok mawh Didumux, mai: Nasanilax pui veng Kanax meung Galilie:, mai: kawn: Zebedie:, mai: kawncau tang: kaux ra: kaux khankix ot tau heue:. 3 Simon petrux ah nin: ka kix, "Aux sang hu: sawg kax ha:." Kix deeh ah nin: ka nawh, "Ex kawx sang hu: mai: maix heue:." Kix lih hu: mai: laig ka daux reu, mai: daux sawm: an kix ang pon tid tix. 4 Viang mawh kawx nan:, ponngawb yam jah praix tix riang, Yesux cung ka caong raog tan:, viang mawh nan: kawncau khankix ang tawng mawh Yesux. 5Mawh kheu nan: Yesux tom: chawk ah nin: ka kix, "Kawn: praix eue:, pex koe: pa ih pa un: tix ceu ceu lie?" kix pawk lox mai: ah nin: ka Nawh, "ang koe:." 6 Mai: Nawh Cao: baox ah nin: ka kix, "Ploi: rub pex ka plak khawn: dawm: reu, mai: pex tag sang pon heue:." Mawh kheu nan: kix ploi: rub, mai: ang pon bluh rub, kheu kied nie pon kax haoh hun:. 7 Kawncau pa moh Yesux an ah nin: ka petrux, "Mawh Simiang heue:." Kheu nan: yam mhong: Simon Petrux grawh grawng: mawh Nawh Simiang, nawh deeh ceep sibex nawh, (kheu hoik ot kakaong: nawh), mai: phoh laig ka daux rawm: nhawng: heue:. 8 Kawncau tang: kaux khankix hoek ka daux reu, mai: bluh rub pa hoik naog kax hoek heue:. Kheu ang kix singai khaing: praok, dex koe: tiphwan: (50) tawp khaing:. 9 Yam hoik hoek kix ka praok kix yaox ngu swah, mai: pa groh kax, ka piang ngu an mai: khaomun heue:. 10 Yesux ah nin: ka kix, "viex kax pa pon pex yamin tiblah heue:." 11 Mawh kheu nan: Simon petrux laig ka daux reu mai: bluh rub pa naog kax pa ting tix yieh tiphwan: loe: (153) hoek ka praok, viang mawh kax niex ding niex dod, rub an ang griah ang laux heue:.
Khre: pa ih pa un: son kawncau khankix
12 Yesux ah nin: ka kix, "Hoek tix ih priex ngawb heue:." Mai: kawncau khankix tix kaux kawx ang pon tix chawk Nawh, "Maix mawh mawx?" kheu hoik tawng kix grawng: mawh Nawh Simiang heue:. 13 Yesux hoek mai: teei khaomun mai: kax tawx ka kix. 14 In mawh loe: bawg tix bawg, pa jhi: Yesux tokaux Tix ka kawncau Nawh khankix, khaix hoik kaoh Nawh khaing: krax yum heue:.
Pa kok ka daux krax moh
15 Khaix hoik ih kix priex ngawb Yesux chawk ka Simon petrux ah nin:, "Simon kawn: Yonax eue:, maix lheu: moh ka Aux khaing: in kix lie?" Nawh ah nin: ka Nawh Cao:, "Mawh heue:, Simiang eue:, Maix hoik tawng grawng: pa moh aux ka Maix." Nawh Cao: baox ah nin: ka nawh, " tawx kawn: yung: Aux khankix sawm: heue:." 16 Nawh Cao: baox chawk ka nawh ra: bawg tix bawg mai: ah nin: "Simon kawn: Yonax eue:, maix moh ka Aux lie?" Nawh baox pawk lox mai: ah nin: ka Nawh Cao:, "Mawh heue:, Simiang eue:, Maix tawng grawng: pa moh aux ka Maix." Nawh Cao: baox ah nin: ka nawh, "Liang yung: Aux khankix heue:." 17 Nawh Cao: baox chawk ka nawh loe: bawg tix bawg mai: ah nin:, "Simon kawn: Yonax eue:, maix moh ka Aux lie?" Petrux khirhawm: kheu hoik chawk Nawh Cao: ka nawh tom: hoek loe: bawg, "maix moh ka Aux lie?" Mai: nawh ah nin: ka Nawh Cao:, "Simiang eue: Maix tawng grawh grawng: ku ceu khawm: uik, Maix tawng grawng: pa moh aux ka Maix heue:." Yesux baox ah nin: ka nawh, "Tawx yung: Aux khankix sawm: heue:.
Siyiex kwang: ka ju ka khwan:
18 Aux krai lox tete telai ka maix, yam awn: ju maix, maix chix nhawt maox rawd nyoi tokaux tix tiru, mai: maix pon hu: dee simie maix tix hu:. Viang mawh kawx nan:, yam hoik kuad maix, maix tag sang nyeu taix mai: pui tang: kaux tag sang nhawt maox rawd maix, mai: viex maix hu: dee ang maix simie tix hu: heue:." 19 Yam ah nan: Nawh Cao: sang krai grawh grawng: Petrux tag sang yum yuh ka mawx, son sang koe: min: plakngai: Siyiex kah heue:. Mai: khaix hoik ah Nawh nan:, Nawh Cao: baox ah nin: ka nawh, "Hawt khaix Aux heue:." 20 Petrux deeh gi tix jhak plak khaix mai: yaox kawncau pa moh Yesux, hawt hoek khaix kiex, nawh mawh kaw pa neung ka naok Yesux yam ih kix priexbo yam an nhaox, mai: chawk ah nin:, "Kaw pa sang tik sang tawx Maix mawh mawx?" 21 Yam yaox Petrux ka nawh, nawh chawk ah nin: ka Yesux, "Simiang eue:, grawh grawng: pui in sang yuh ka mawx?" 22 Yesux baox ah nin: ka nawh, "Phan: Aux sang kieh nawh ot tom: deeh hoek Aux sax, sang dex sang dawd mai: maix yuh ka mawx? Maix kienie hawt khaix Aux heue:." 23 Kheu an lox pa ah, "kawncau an tag ang lai yum," tah hu: ka puxaik khankix. Viang mawh kawx nan: Yesux ang ah, "Nawh tag ang lai yum." Nawh ah nin:, "Phan: Aux sang kieh nawh ot tom: deeh hoek Aux sax, sang dex sang dawd mai: maix yuh ka mawx?" 24 Mawh kawncau in pa kham: mhai: sakse: grawh grawng: ceu in khankix, mai: pa tiem: grawh grawng: ceu in kix, mai: ex tawng mhai: sakse: pa kham: nawh mawh pa mawh pa meh heue:. 25 Pa yuh Yesux tang: ceu kawn: koe: haoh hun:, phan: tiem: grawh grawng: ku ceu khankix, ceu mawx ceu an, aux ce: pie haktiex in kawx, ang doh kub sau: phuk lai pa sang tiem: khankix heue:.