Yudax

Lai Yudax

Simin Ting 1

Lox jah

1 Yudax, pa mawh siliex Yesux Khrit, mai: pux Yakop tiem: tix tawx ka kix pa hoik kok kah, pa moh Keeing: Siyiex kah, mai: pa hoik priex ka daux Yesux Khrit heue:. 2 Kieh pa caoxrhawm: koe: ka piang pex, mai: kieh pa nhim:, mai: pa moh pa rhawm: baox tiien baox thie: ka pex heue:.

3 Pui pa moh aux khankix eue:, yam nied aux tix coca: tix tiem: lai ka pex grawh grawng: krax taoh pa hoik pon ex awm: paox tix, hoik kieh aux tiem: ka pex, son sang gau pex tix nied yuh, nied puing, son krax yumrhawm: pa hoik tawx tix bawg son ku jheeng: jheeng: ka pui pa singax singeh khankix heue:. 4 Mawh kheu pui tiblah hoik briex tix laig ka sinax pex, pa mawh kix pa hoik grux tiem: grawh grawng: pa tag sang prawng sang ciyang kix yuh nin:, glangka: dix, pa mawh pui pa ang chix nab chix yam mai: pa yuh pa ang khaw: ka Siyiex, kix deeh tieh bwanson: Siyiex tix kieh mawh dee du son sang yuh alo nex nham: pa seeing: pa brai:, mai: thiang: tix tik Cao: ex pa koe: tix kaux khaing:, mai: Simiang Yesux Khrit heue:.

Krax tawx Stix ka kaw pa tieh daux been

5 Viang pex hoik tawng grawh grawng: ku ceu khawm: uik tix bawg son ku jheeng: jheeng:, aux simie tix kieh pex doh deud doh sawn: ka grawng: khaix hoik taoh Simiang pui Isarilax khaing: meung Ejiptux, khaix an deeh yieh kix pa ang yumrhawm: laux heue:. 6 Mai: kawncau Siyiex khankix pa ang priex tix hawt yuh ceu pa kieh kix yuh phaoxka:, viang mawh nan: pa hoik tik grham: glawk dee khaw: tix ot tix, Nawh hoik laung ka ceng leeing: ju, ka daux pa vhaik, tom: hoek bawg yam sang prawng sang ca:, singaix pa ting pa lhaong: an heue:. 7 Awm: veng Sawdom mai: veng Gawmawrax, mai: veng khankix pa koe: praok sivie veng an khankiex pa chax nie phit vao, mai: yuh pa phit pa ang lai doh mawh jhawm: jheet pui, mai: kix: hoik mawh mhai: dee teh rhawm: ex kah, pa kham: geu: pa ciyang daux ngu leeing: ju leeing: phan: heue:. 8 Awm: an pui pa nieb camaox in khankix kawx, yuh tokaux tix seeing: brai:, mai: nieb een: tix ang koe: ceu ka simiang khankix, mai: nieb ah lox pa sa pa lao ka kix pa ting min: plakngai: khankix heue:. 9 Viang mawh kawx nan: yam Mikkhelax simiang kawncau Siyiex thung: thiang: ka phicaox grawh grawng: tokaux yum Mose, nawh ang ring ah lox sa lox lao tix deuh pa prawng pa ciyang ka piang nawh, viang mawh nan: nawh ah ngie nin:, "Kieh Siyiex ah ka maix heue:." 10 Pui in khankix nieb sa lao ka grawng: pa ang kix tawng, viang mawh nan: kix chix teei pa lak tawng tix, awm: tosat pa ang koe: pa chix keud, mai: kieh tokaux tix laux sium: kah heue:. 11 Kix tag kharhawm: kharhi: heue:, mawh kheu hoik hawt kix daux krax Ka-inax, son sang pon kix ngawh kix hoik plab tix laig ka daux pa phit pa lud Balam, mai: hoik laux leeing: ka daux lox chao: Kawrax heue:. 12 In mawh kix pa mawh simaox pa hoik moh, ka daux poi krax moh krax rhawm: pex, yam ih kix tau mai: pex, kix mawh cao: liang pa ang lhat tix tawx tokaux tix sawm: khaing:, kix mawh paiawm: pa ang koe: rawm:, pa bhaung: tah hu:, kix mawh khaox that lhax pa ang koe: plix, pa hoik yum ra: bawg, pa hoik reeig tix tik khawm: riah. 13 Kix mawh pukpak rawm: sigrit sigra: pa he:, pa lih bai krax kaig krax tua tokaux tix, kix mawh simuing: pa vung viang, pa pa vhaik pa lung hoik priex son kix leeing: ju leeing: phan: heue:. 14 Mai: yam Enawk, pa hoik toe: tix koe: aliah ju khaix Adam, krai lox jhai: in mawh khawm: grawng: kix,

388"Jhak heue:, yam Simiang hoek tau mai: pui singax singeh, cub kaing: mheen: Tix khankix, 15 son sang prawng sang ca: ka pui khawm: mu: khawm: miang:, mai: son sang kieh pui pa ang chix nab chix yam mai: pa yuh pa ang khaw: ka Siyiex ka daux kix khawm: uik tawng grawng: pa yuh kix pa ang nab ang yam mai: pa yuh pa ang khaw: ka Siyiex, pa kix ang nab ang yam mai: yuh pa ang khaw: ka Siyiex mai: hoik yuh, mai: ka lox pa riex khawm: uik, pa pui ting map ting grham: pa ang nab ang yam mai: pa yuh pa ang khaw: ka Siyiex khankix hoik ah ka Nawh Cao: heue:."

16 Pui in kix mawh pui pa riex sa, pa mawh pui brax bleh brax sibriem, pa hawt tix hu: khaix alo nex nham: tokaux tix, mai: jheeh kix riex ah lox ting lox vao, mai: jhak ka pakngai: pui son sang pon tix bwan: kah heue:.

Lox sidiex gau ka kaw pa kaux sijax

17 Viang mawh nan: pui pa moh aux khankix eue:, pex doh keud doh sawn: ka lox pa hoik grux krai kawncau pa ting Simiang ex Yesux Khrit khankix, 18 pa hoik ah nin: ka pex, "Yam hoek bawg yam ghoik khaix sax tag koe: pui pa map pa ang cee ang cak, pa hu: hawt alo nex nham: tokaux tix, pa ang nab ang yam mai: pa yuh pa ang khaw: ka Siyiex heue:." 19 Pui in kix mawh kix pa kieh gwieh meng paox tix, mai: pa nieb hawt yuh alo nex nham:, pa ang koe: Khwan: Cao: heue:. 20 Viang mawh nan: pui pa moh aux khankix eue:, pex yuh pex sum: tokaux tix ka piang krax yumrhawm: pex pa lang: teung: singax singeh, mai: rawg bwan: ka daux Khwan: Singax Singeh heue:. 21 Kieh tokaux tix ot ka daux krax moh krax rhawm: Siyiex, mai: krox tix jhak son krax caoxrhawm: Simiang ex Yesux Khrit, tom: sidah pon ju leeing: ju leeing: phan:. 22 Yam pui tiblah thung: thiang: ka pex, kieh kix tawng dee lud kix sidawng:. 23 Mai: grhawm: teei tix taoh kix tiblah khaing: daux ngu, mai: piang tiblah kieh koe: pa caoxrhawm: tau mai: pa lhat pa graung, mai: viang mawh ka kraung ceep pa kawb pa preeh389 ka alo nex nham: kawx koeng kah heue:.

Pa nawb bwanson:

24 Yamin ka Kaw pa chix pau pex, son ang pex sang sideeing caong tix, mai: son sang deuh pex mawh pa loig pa ang koe: dee cha:, daux pa kied gauxrhawm: sivoe min: plakngai: Nawh Cao:, 25 pa mawh Siyiex Cao: Taoh ex tix kaux khaing:, kieh koe: min: plakngai:, mai: pa ting pa lhaong:, mai: pa giex kaing: uik, mai: siawp sibrawm, kheu Simiang ex Yesux Khrit, ka: sivoe sang koe: bawg yam dix, mai: yamin, mai: leeing: ju leeing: phan: liak. Amen.