Lai Yaog Yaw

Simin Ting 1

Ceu Pa Gauxrhawm: Gauxrhi: Tete Telai

1 Pui pa ang hu: ka daux pa nyaw pa glaw: pui pa ang rah ang see khankix, mai: pui pa ang cung ang ot ka daux krax pui pa caox pa caig khankix, mai: pui pa ang ngawm tau mai: pui pa yuh pa ang cee ang cak khankix, 2 mai: pui pa gauxrhawm: ka daux been li Simiang Siyiex, mai: pa keud ku singaix ku sawm: khankix, koe: bwanson: heue:. 3 Nawh awm: khaox pa kuah praok rawm: klawng: mai: yam hoek bawg yam, chix plix plix heue:. Mai: lhax nawh kawx, ang chix teue: chix kroh, mai: kaing pa yuh nawh ku ceu khawm: uik kawx tak sang ting lhaong: heue:. 4 Viang mawh kawx nan:, pui pa caox pa caig khankix, ang lai mawh nan:, kix awm: kam: riex pa phlu: bhaung: hu: heue:. 5 Mawh kheu in pui pa ang rah ang see khankix, ang kaux ang cong: bawg yam prawng ca: ka kix, mai: pui pa caox pa caig khankix, ang pon tix ot dee ot pui pa rah pa see khankix heue:. 6 Grawh grawng: nawh, Simiang Siyiex hoik tawng ka daux krax pui pa rah pa see khankix, mai: daux krax pui pa ang rah ang see khankix, tak hoek krax laux krax leeing: heue:.

Simin Ting 2

Simiang Pa Hoik Laug Siyiex

1 Mawh kheu pa tix ceu kawn: pui khankix, rien tix sang tieh feen ka Siyiex, mai: mawh kheu pa tix ceu pui in khankix, briex kum: kawng: paox tix, son sang yuh kaing pa ang koe: ceu koe: cak yuh ka mawx? 2 Simiang haktiex khankix, mai: khunhawkham khankix ah nin:, "Ex briex kum: kawng: paox tix son sang tieh feen ka Siyiex, mai: phyawk ka Simiang Cao: Khrit pa hoik laug Nawh Cao: heue:." 3 Ex tieh feen ka kix, son sang luan ex khaing: pa kwang: kix ka ex, mai: kix ah nin:, ex yieh tix tik ka pa kwang: kix ka piang ex heue:. 4 Siyiex ngawm ka piang dangngeung Tix ka piang raoma: mai: nyiah ka kix heue:. Nawh Cao: kieh kix kaig tua heue:. 5 Nawh Cao: sikah ka kix ka daux pa songrhawm: songrhi:, mai: Nawh kieh kix khirhawm: mai: lhat graung ka pa kied songrhawm: Nawh heue:. 6 Mai: Nawh Cao: ah nin:, "Aux hoik deuh Simiang cie Aux, ka piang gawng Zion pa singax singeh cie Aux heue:." 7 Mai: Simiang ah nin:, "Aux tak sang krai lox pa hoik krai Siyiex ka pui khankix, Maix mawh kawn: simex Aux, Aux hoik kieh maix keh ka daux singaix heue:. 8 Rawg ka Aux heue:, phan: rawg Aux tak tawx ceu pui khawm: uik ka Maix, mai: haktiex khawm: uik kawx mawh cie Maix heue:. 9 Maix teei khaoxgrix rhiem: mai: kwang: ka piang kix, mai: Maix tak sang pah kix phawng:, awm: pah ka aw: tiex phawng: heue:." 10 Simiang haktiex mai: khunhawkham khankix eue:, nghiet ka lox pa sidiex Aux yam in awawx. 11 Yuh kaing jhaw: Siyiex ka daux pa lhat pa graung, mai: gauxrhawm: gauxrhi: heue:. 12 Nghiet ka kawn: Nawh, phan: ang yuh nan:, Nawh tak songrhawm: songrhi: mai: maix tak hoek krax laux krax leeing: heue:. Grawh grawng: nawh, Nawh Cao: lih pa bwanson: heue:.

Simin Ting 3

Lox Rawg Bwan: Plak Ponngawb

Lox pa rawg Dawit bwan: yam to: nawh mox khaing: kawn: tix Abasalon

1 Simiang Siyiex eue:, pui pa koeng ka aux kied nie heue:, pui pa sang lah sang cha: ka aux kawx, kied haoh kied hun: heue:. 2 Mai: pui haoh pui hun: khankix krai grawng: aux ah nin:, Siyiex ang tau tix teem: ka nawh, 3 viang mawh kawx nan:, Simiang Siyiex eue:, Maix mawh Cao: pa tieb tie aux, mai: min: plakngai: aux, mai: Cao: pa vaoh kaing: aux heue:. 4 Son sang teem: coi ka aux, yam kok yo aux ka Siyiex, Nawh Cao: ot ka piang gawng pa singax singeh mai: nghiet ka lox aux, mai: deeh pawk ka lox aux heue:. 5 Aux laig it mai: deeh siduad mhawm: mhawm:, grawh grawng: nawh, Siyiex priex ka aux heue:. 6 Viang pui pa koeng ka aux, rob vung viang aux, kaing: mheen: kaing: sien: kawx, ang aux doh lhat. 7 Simiang Siyiex eue:, kaoh heue:, mai: Siyiex aux eue:, taoh ka aux heue:. Mai: Nawh Cao: simang: sibax pui pa koeng ka aux khankix, mai: raig rhang: pui pa caox khankix heue:. 8 Krax taoh mawh pa kaoh khaing: Siyiex, kieh bwanson: Nawh Cao: koe: ka piang pui Nawh Cao: khankix liak.

Simin Ting 4

Lox Rawg Bwan: Plak Ponbo

Lox yaogyaw Dawit

1 Siyiex pa rah pa see cao: pa priex aux eue:, deeh pawk ka lox pa kok pa yo aux liak. Yam koe: krax pa khirhawm: khirhi: aux, Maix mawh Cao: pa teem: coi aux heue:. Yamin kawx, caoxrhawm: ka aux mai: nghiet ka lox pa rawg aux bwan: liak. 2 Pui khankix eue:, pex kawn: sang nieb yuh min: plakngai: aux laux miex grheung:? Mai: pie lhen: yuh kaing ceu pa ang rah ang see, mai: pex kawn: sang moh tix yuh ka ceu pa ang koe: bwanson: miex grheung:? 3 Deuh pex tawng Simiang Siyiex hoik laug tix teei pui pa singax singeh tix deuh son Nawh Cao:, mai: Nawh Cao: nghiet ka lox pa kok pa yo aux ka Nawh heue:. 4 Ka daux pa lhat pa graung, tik ka phimap pa yuh tix, mai: pex laig ka daux lawg dee it mai: nghiet ka daux rhawm: tix, ka grawng: in kix mhawm: mhawm: heue:. 5 Krax tan krax lu pa rah pa see, tan lu ka Siyiex mai: deuh rhawm: ka Nawh Cao: heue:. 6 Mawh kheu jao pui tom: nie ah nin:, "Mawh pui mawx pa sang jhi: ex yaox ceu pa mhawm: pa mhiem: nieh, Simiang Siyiex eue:, kieh pa riang min: plakngai: Maix jhan: riang ka piang ex liak." 7 Mai: kieh rhawm: aux nie lheu: gauxrhawm: gauxrhi: khaing: kix pa pon gaox, pon nghox, mai: pa pon plix siiet tom: nie liak. 8 Yam it aux laig it mhawm: mhawm:, grawh grawng: nawh, Maix Simiang Siyiex tix kaux khaing:, kieh aux luan khaing: pa caox pa ang mhawm: heue:.

Simin Ting 5

Lox Rawg Bwan:, Son Sang Priex

Lox pa yaogyaw Dawit

1 Simiang Siyiex eue:, nghiet ka lox aux mai: lox pa ngia aux liak. 2 Simiang Siyiex eue:, mawh kheu rawg aux bwan: ka Maix, nghiet ka lox pa kok pa yo aux liak. 3 Simiang Siyiex eue:, yam ponngawb Maix mhong: ka lox aux, mai: yam ponngawb Maix mhong: lox rawg aux bwan: ka daux krax krox krax jun sivoe ngai: Maix heue:. 4 Maix mawh Siyiex pa ang moh ka pui pa ang rah ang see, mai: ang rieb tix teei ka pui pa caox heue:. 5 Pui pa caox pa caig ang pon tix hoek dee ot Maix, mai: Maix koeng ka pui pa ang rah ang see khawm: uik heue:. 6 Maix tak sang yuh laux ka pui pa pie pa lhen: khankix, Simiang Siyiex seeing: brai: ka pui pa pah pui yum, mai: pui pa pie pa lhen: khankix heue:. 7 Phan: mawh aux pon tix hoek daux nyiex Maix, kheu pon bwanson: Maix tom: nie, mai: koe: rhawm: lhat ka Maix, mai: pon tix krub ka Maix, daux nyiex bwan: pa singax singeh heue:. 8 Simiang Siyiex eue:, mawh kheu koeng pui ka aux, thong: aux hu: ka krax pa rah pa see Maix liak, kieh daux krax Maix rah see sivoe ngai: aux liak. 9 Jheeh kix ang kaux sijax, daux rhawm: kix mawh pa caox, daux ghok kix mawh simeeig pa hoik bhang:, dak kix kawx jiet chix nyaw glaw: heue:. 10 Siyiex eue: kieh phimap hoek ka piang kix, kieh kix sivu ka krax keud krax sawn: tix, mai: grheu: tix tik kix kheu phimap pa phit pa lud kix tom: nie, mawh kheu tieh feen kix ka Maix heue:. 11 Pui pa deuh rhawm: ka Maix, koe: krax gauxrhawm:. Kix koe: krax gauxrhawm: mai: kok yo kheu kia: ngien Maix ka kix heue:. Kix pa moh ka ceukaux Maix, kieh koe: krax gauxrhawm: gauxrhi: ka daux Maix liak. 12 Simiang Siyiex eue:, nawb bwanson: ka pui pa rah pa see mai: kieh bwanson: Maix tieb tie ka kix, awm: kraung naing pa tieb tie heue:.

Simin Ting 6

Lox Rawg Bwan: Yam Khirhawm:

Lox pa yaogyaw Dawit

1 Simiang Siyiex eue:, paw nyang deuh phimap ka piang aux, ka daux pa songrhawm: Maix, mai: paw nyang sivied tix gau aux ka daux pa kied songrhawm: songrhi: Maix liak. 2 Simiang Siyiex eue:, teem: coi ka aux, mawh kheu iak riang iak rao aux, Simiang Siyiex eue:, kieh aux deeh brax deeh moi:, mawh kheu si:ang: aux hoik yung yiang: heue:. 3 Mai: ju aux kied lhat kied graung heue:. Simiang Siyiex eue:, aux kawn: sang kham: geu: miex grheung:? 4 Simiang Siyiex eue:, Maix deeh hoek tix taoh ju aux liak. Mai: deeh taoh aux ka daux krax pa caoxrhawm: Maix liak. 5 ka daux meung yum ang pui lai doh keud doh sawn: ka Maix, ka dee an, pui mawx pa sang yaogyaw ka Maix? 6 Aux iak riang iak rao kheu kied kha: aux rhawm: tix, mai: jah rawm: ngai: leeing: ngaix leeing: sawm:, tom: kieh dee it aux caux lan heue:. 7 Laux ngai: aux kheu khirhawm: aux, vuvi ngai: aux, jao pui pa koeng ka aux khankix heue:. 8 Pui pa yuh kaing pa caox pa caig khankix eue:, via hu: khaing: aux heue:. Siyiex hoik mhong: ka lox yiem riag yo aux heue:. 9 Mai: Simiang Siyiex hoik mhong: ka lox pa khyox khaw: aux, mai: Simiang Siyiex hoik nghiet ka lox pa rawg aux bwan: heue:. 10 Can pui pa koeng ka aux khawm: uik, tak hoek krax kaig krax tua mai: hoek krax som krax nai: heue:. Kix kaig tua mai: tang: to: dom: mawx dom: an heue:.

Simin Ting 7

Lox Rawg Bwan:, Son Pa Rah Pa See

Lox pa rhax Dawit ka Simiang Siyiex son ceu pui Benyamin

1 Simiang Siyiex aux eue:, aux deuh rhawm: ka Maix heue:, teei aux lih khaing: tawm: taix pui pa tuktiak tukte:, mai: taoh ka aux liak. 2 Phan: ang mawh nan:, awm: pa ang koe: cao: pa taoh, mai: kix teei ju aux, awm: sivai sangsi: pa kiied pa rud tix tik heue:. 3 Simiang Siyiex aux eue:, phan: aux hoik yuh nan: ang ah, mai: phan: koe: see: pa ang khaw: ka daux taix aux ang ah, 4 mai: phan: aux deeh yuh krax phit krax lud ka pui pa hoik khaw: ka aux, pa ang tie koe: grawh grawng:, mai: tuktiak tukte: awm: pui pa koeng ang ah. 5 Phan: aux siep koe: phimap tix ceu ceu, kieh pui pa koeng ka aux, hoek leue tix pon giex ka ju aux heue:. Mai: kieh kix dig ju aux ka piang tiex, mai: kieh min: plakngai: aux rau dee tiem ka daux phawng: tiex liak. 6 Simiang Siyiex eue:, ka daux pa songrhawm: songrhi: Maix, kaoh liak, teei riang rao Maix mai: tieb tie ka pui pa koeng ka aux liak, siduad ka son aux, mai: prawng ca: ka son aux liak. 7 Kieh ceu kawn: pui khawm: uik krawk khrawm: tix rob vung viang Maix, mai: Maix deeh haok ka piang kix ka dee lhaong:, 8 Simiang Siyiex mawh Cao: pa prawng ca: ka kawn: pui heue:. Simiang Siyiex eue:, aux rah see ang ah, grum naog ang ah, jhak mai: prawng ca: ka piang aux liak. 9 Kieh pui pa yuh kaing pa ang rah ang see khankix som, mai: pui pa yuh kaing pa rah pa see khankix kaux cong: liak, Maix mawh Siyiex pa rah pa see, Cao: pa chawk cheng: ka rhawmrhi: mai: sok lax heue:. 10 Siyiex mawh Cao: pa tieb tie ka aux, mai: mawh Cao: pa taoh ka pui pa rah pa see heue:. 11 Siyiex mawh Cao: pa prawng ca: rah see, mai: Nawh Cao: songrhawm: songrhi: ka pui pa ang rah ang see jheeng: jheeng: heue:. 12 Phan: pui ang thai: lox cox rhawm: tix, Siyiex klaing: vaid heue:, mai: Nawh Cao: hoik vaik ak mai: nyeu tix deuh heue:. 13 Kraung naing pa chix kieh yum, mai: te pa hoik rup ngu, Nawh Cao: hoik rien son kix heue:. 14 Jhak heue:, nawh yaox tix kham: geu: ka pa keh ka daux phimap phigrham:, mai: nawh teei tix nghe: ka krax keud krax sawn: pa ang mhawm:, lih keh tix mawh pa khirhawm: khirhi: heue:. 15 Nawh hoik kaong: daux tiex pa kied raux, mai: tokaux nawh deeh rau ka daux tiex pa hoik kaong: nawh tiru heue:. 16 Krax keud krax sawn: pa yuh nawh, pa ang mhawm: deeh hoek ka piang kaing: nawh, mai: kaing pa yuh nawh pa ang mhawm: an, deeh hoek ka piang khwan: kaing: nawh heue:. 17 Phan: mawh aux, tak sang yaogyaw ka Siyiex, Cao: pa prawng ca: pa rah pa see, mai: rhax lai yaogyaw ka ceukaux Simiang Siyiex pa ting pa lhaong: khaing: khawm: uik heue:.

Simin Ting 8

Min: Plakngai: Siyiex Mai: Min: Plakngai: Kawn: Pui

1 Simiang Siyiex ex eue:, ceukaux Maix mawh pa ting pa lhaong: ka piang haktiex in khawm: uik heue:. Mai: min: plakngai: Maix pa ting pa lhaong: hoik koe: ka piang raoma: heue:. 2 Maix tawx krax yaw rangdi ka jheeh kawn: nyawm mai: kawn: ngie: pa kawn: peuex khankix, mai: pui pa koeng, mai: pui pa bak tix yuh krax phit krax lud daux rhawm: tix ang ah, Maix chix kieh yien: yawg tix heue:. 3 Phan: aux keud tix yaox grawng: pa phan: pa deuh Maix raoma:, khix, simuing: ka gien: taix Maix, 4 mai: kawn: pui mawh pa yuh ka mawx? Maix lai kawn: doh keud doh sawn: ka nawh. Phan: ang mawh nan: kawn: kawn: pui mawh pa yuh ka mawx? Maix lai kawn: lai ling ka nawh. 5 Maix hoik yuh nawh iak khaing: kawncau Siyiex khankix ceeix khaing: heue:. Maix hoik ceep nawh ka mhok min: plakngai: mai: ceu pa yungyi:. 6 Mai: kieh Nawh giex kaing: ka can pa hoik phan: hoik deuh Maix khankix. 7 Pa mawh yung:, moi, totiag totu pa koe: piang haktiex, 8 sim: raoma: mai: kax mai: pa chix chuh chix hu: ka daux rawm: khankix hoik deuh ka greem: caong Nawh heue:. 9 Simiang Siyiex eue:, ceukaux Maix mawh pa ting pa lhaong: ka piang haktiex in khawm: uik heue:.

Simin Ting 9

Pa Yaogyaw Ka Siyiex

1 Simiang Siyiex eue:, aux viex khawm: rhawm: khawm: rhi: tix, khawm: uik yaogyaw ka Maix heue:. Mai: aux tak plak jhi: ceu pa daox pa am: Maix khawm: uik heue:. 2 Aux tak gauxrhawm: gauxrhi: ka daux Maix, mai: aux tak rhax lai yaogyaw ka ceukaux Maix Siyiex pa ting pa lhaong: heue:. 3 Grawh grawng: nawh, pui pa koeng ka aux khankix, deeh plak khaix mai: goh tix laux leeing: sivoe ngai: Maix heue:. 4 Maix ot plak aux, mai: hoik prawng ca:, Maix ngawm piang dangngeung tix prawng ca: rah see heue:. 5 Maix hoik sivied tix gau ka pui tang: ceu tang: cat khankix, mai: Maix yieh tix tik ka pui pa caox pa caig khankix, mai: preet tix tik ceukaux kix leeing: ju leeing: phan: heue:. 6 Pui pa koeng khankix hoik laux hoik leeing:, mai: veng dee ot kix kawx, hoik grai: hoik grhup pak lawg heue:. 7 Simiang Siyiex mawh pa kaux pa cong: leeing: ju leeing: phan:, mai: Nawh Cao: hoik cox dangngeung dee prawng dee ca:. 8 Nawh tak prawng ca: ka kawn: pui piang haktiex ka daux pa rah pa see, mai: Nawh tak prawng ca: rah see ka kawn: pui heue:. 9 Simiang Siyiex mawh dee deuh rhawm: pui pa yaox tix kham: geu: krax tuktiak tukte:, mai: mawh dee deuh rhawm: yam hoek krax khirhawm: khirhi: heue:. 10 Pui pa tawng ka ceukaux Maix khankix, tak yumrhawm: ka Maix heue:. Grawh grawng: nawh, Simiang Siyiex eue:, Maix ang chix tik chix vud ka can pui pa sawg ka Maix heue:. 11 Rhax lai yaogyaw ka Simiang Siyiex, pa ot ka daux veng Zion, mai: krai grawng: pa yuh Nawh Cao: ka pui khawm: uik awawx. 12 Nawh Cao: chawk cheng: ka pui pa teei ju pui yum khankix, mai: doh keud ka pui pa hoik yum khankix heue:. Nawh Cao: ang doh piawm: ka lox pa kok pa yo pui pa kharhawm: kharhi: khankix heue:. 13 Simiang Siyiex eue:, caoxrhawm: mai: taoh tix teei ka aux liak. Jhak ka pui pa koeng ka aux, mai: pa tuktiak tukte: kix ka aux liak, mai: taoh tix teei aux lih khaing: krax yum liak. 14 Phan: yuh nan:, aux tak sang jhi: bwanson: Maix khawm: uik ka sivoe ngai: kawn: pui pa ot ka daux veng Zion khankix heue:. Mai: aux gauxrhawm: gauxrhi: kheu hoik taoh Maix tix teei aux heue:. 15 Pui tang: ceu tang: cat khankix, deeh rau ka daux tiex pa hoik kaong: kix, mai: caong kix deeh krix ka kie pa hoik taong: hoik kheem: cao: kix heue:. 16 Simiang Siyiex yuh tokaux Nawh sidawng: ka daux pa prawng pa ca: Tix heue:. Mai: pui pa ang rah ang see khankix, deeh sivu ka kaing pa hoik yuh tix tiru heue:. 17 Pui pa ang rah ang see mai: can pui pa piawm: ka Siyiex khankix, tak sang grheu: kix lih hu: ka daux meung yum heue:. 18 Nawh Cao: ang doh piawm: ka kix, pui pa hot pa sibhawm: mai: krax pa krox pa jun, pui pa kharhawm: kharhi: khankix, ang chix laux chix leeing:, leeing: ju leeing: phan: heue:. 19 Simiang Siyiex eue:, kaoh heue:, paw kieh pui pex, mai: kieh pui tang: ceu tang: cat kham: geu: ka krax pa chawk pa cheng: sivoe ngai: Maix mai: prawng ca: ka kix liak. 20 Simiang Siyiex eue:, glhat ka kix liak, mai: kieh kix tawng grawng: mawh kix pui giex liak.

Simin Ting 10

Lox Rawg Bwan:, Son Sang Teem: Coi

1 Simiang Siyiex eue:, Maix chix cung dee singai yuh ka mawx? Mawh kheu pa tix Maix chix mox yam yaox krax pa khirhawm: khirhi: yuh ka mawx? 2 Pui pa ang rah ang see pa ting rhawm: canyhau: khankix, chix kieh pui pa hot pa sibhawm: khankix, kharhawm: kharhi: heue:. Mai: kix tak yaox tix kham: pa giex pa phyawk pui ka pa nieb lak keud kix tix yuh tiru heue:. 3 Pui pa ang rah ang see khankix, chix yuh grang tokaux tix, mai: chix yaw ka tokaux tix mai: nieb yuh pa ang cee ang cak ka Siyiex heue:. 4 Pui pa ang rah ang see khankix, keud daux rhawm: tix ah nin:, "Nawh Cao: ang lai deeh teei," kheu ang Siyiex koe: heue:. 5 Krax pa hu: Nawh mawh pa kaux jheeng: jheeng:, mai: krax prawng krax ca: Nawh, viang lhaong: mai: singai khaing: Nawh kawx, Nawh Cao: phlu: tix tik ka pui pa koeng ka Nawh khawm: uik heue:. 6 Nawh keud tix ah nin: ka tokaux tix, aux ang gah ang greed tix, mai: ang tau tix hoek ka daux pa kharhawm: kharhi: tix bawg kawx heue:. 7 Ka daux jheeh nawh hoik naog lox pa jhax pa lawg, mai: pa pie pa lhen:, mai: coh lox coh sikah heue:, greem: dak nawh hoik naog ceu pa ang mhawm:, mai: pa ang rah ang see heue:. 8 Nawh briex mox tix hawt dex praok yaong: mai: briex jawm tix pah pui pa ang koe: phimap yum dee glip, mai: ngai: nawh briex jiang tix jhak ka pui pa hot pa sibhawm: khankix heue:. 9 Nawh briex mox tix awm: mox sivai sangsi: ka daux yeem heue:. Nawh mox tix son sang giex ka pui hot pui sibhawm:, mai: nawh taing sau: rub ka pui hot pui sibhawm: tix sang giex kix hu: heue:. 10 Pui pa iak riang iak rao khankix, rau hu: ka daux tawm: taix pui pa ting siawp sibrawm khankix heue:. 11 Mai: nawh ah nin: ka daux rhawm: tix, Siyiex hoik piawm: ka aux, Nawh Cao: hoik veeh ngai: Tix khaing: aux, mai: ang yaox ka aux tix bawg kawx heue:. 12 Simiang Siyiex eue:, kaoh heue:, Siyiex eue:, yaog taix Maix liak, paw doh piawm: ka pui pa kharhawm: kharhi: liak. 13 Mawh kheu pa tix pui pa ang rah ang see khankix, nieb yuh pa ang cee ang cak ka Siyiex, ka daux rhawm: tix mai: ah, "Ang lai jhak ka kix lie"? 14 Viang mawh kawx nan:, Maix hoik yaox heue:, grawh grawng: nawh, Maix mawh Cao: pa chix teem: ka pui pa kharhawm: kharhi: khankix, mai: pui hot pui sibhawm: khankix koe: ka daux tawm: taix Maix, mai: Maix mawh cao: pa teem: coi ka kawn: doe: pa ang koe: miex keeing: khankix heue:. 15 Maix raig tix tik ka plawng: taix pui pa ang rah ang see khankix, mai: pui pa yuh pa caox pa caig khankix, son ang Maix sang yaox ka pa yuh kix tix bawg kawx heue:. 16 Mai: Siyiex mawh Khunhawkham leeing: ju leeing: phan: heue:. Pui tang: ceu tang: cat khankix, tak sang grai: hu: ka daux meung Nawh heue:. 17 Simiang Siyiex eue:, Maix hoik mhong: ka lox pa rawg pa mhaing: pui pa kharhawm: kharhi: khankix, mai: Maix kieh rhawm: kix nhim:, mai: daong yhaok Maix nghiet ka lox pa mhaing: kix liak. 18 Maix tak sang nghiet ka lox pui pa kharhawm: kharhi:, mai: kawn: doe: pa ang koe: miex keeing: khankix, mai: Maix ot ka plak kix, mai: prawng ca: ka son kix ka pui pa glhat ka kix heue:.

Simin Ting 11

Pa Deuh Rhawm: Ka Siyiex

1 Aux deuh rhawm: ka Simiang Siyiex heue:, mawh kheu pa tix pex ah nin: ka ju aux, "Pu: hu: ka piang gawng awm: sim: yuh ka mawx"? 2 Jhak heue:, pui pa ang rah ang see khankix, hoik vaik ak mai: sau: te son sang puing: ka pui pa rah pa see khankix ka daux pa vhaik heue:. 3 Phan: num: hoik laux hoik leeing:, pui pa rah pa see chix yuh ka mawx? 4 Simiang Siyiex ot ka daux nyiex bwan: Nawh pa singax singeh heue:. Dangngeung Simiang Siyiex koe: ka piang meung raoma:, ngai: Nawh jhak, mai: siyieb ngai: Nawh sigaig ka pa yuh kawn: pui heue:. 5 Simiang Siyiex cheuk tix yaox ka pui pa rah pa see, mai: Nawh koeng ka pui pa ang rah ang see mai: pa yuh pa caox pa caig khankix heue:. 6 Nawh Cao: kieh gaox ngu rup lih ka piang kix pa ang rah ang see, pa mawh ngu mhat mai: bhaung: caox pa kied hax, tak sang kieh mawh son pa ih kix heue:. 7 Simiang Siyiex mawh pa rah pa see, grawh grawng: nawh, Nawh Cao: moh ka pa rah pa see, mai: Nawh ot plak pui pa rah pa see heue:.

Simin Ting 12

Lox Rawg Bwan:, Son Sang Teem: Coi

1 Simiang Siyiex eue:, taoh aux liak, grawh grawng: nawh, pui pa mhawm: ang koe:, mai: pui pa kaux sijax kawx, hoik grai: hu: khaing: kawn: pui heue:. 2 Paox plawg paox nyhawm: pa ot tau kawx, tix kaux hoik tix kaux, lah cha: ka paox tix, ka siyieb jheeh pa pie pa lhen:, mai: kix sikah ka paox tix mai: koe: rhawm: ra: mu: heue:. 3 Simiang Siyiex tak sang pat tix tik siyieb jheeh, mai: dak pa ah lox ting lox lhaong: mai: pa pie pa lhen: khawm: uik heue:. 4 Pui pa ah nin:, ex teei dak tix pex heue:, siyieb jheeh ex tang: koe: mai: ex, mai: pui mawx mawh Simiang ka piang ex, kix nieb ah nan: heue:. 5 Simiang Siyiex ah nin:, "Aux tak kaoh cung sipiag kix, pui pa yaox tix kham: geu: ka pa tuktiak tukte:, mai: krax kharhawm: kharhi:, mai: krax pa cairhawm: cairhi:, mai: pui pa ngheeik ngia khankix heue:, mai: Aux tak sang tawx krax pa nyawmrhawm: nyawmrhi: ka pui pa yaox tix kham: geu: ka krax pa nunai: khankix heue:. 6 Gumlox Simiang Siyiex singax singeh awm: mau pa hoik thi: mai: hoik tieh aliah bawg heue:. 7 Simiang Siyiex eue:, Maix kia: ngien ka kix, mai: tieb tie ka kix, ceu pui yamin jheeng: jheeng: heue:. 8 Pui pa ang rah ang see khankix, vuvie tix sinax kawn: pui ku dah ku dee tom: yam hoek bawg yam yaog lhaong: ka pui pa tiem khankix heue:.

Simin Ting 13

Lox Rawg Bwan:, Son Sang Teem: Coi

1 Simiang Siyiex eue:, Maix tak sang piawm: ka aux miex grheung:? Maix tak sang mox ngai: tix khaing: aux miex grheung:? 2 Ceu pa khirhawm: khirhi: ka daux rhawm: aux ku singaix ku sawm:, aux kawn: sang yaox tix kham: miex grheung:? Pui pa koeng ka aux khankix, kawn: sang ting ka piang aux miex grheung:? 3 Simiang Siyiex aux eue:, veeh plakngai: Maix mai: nghiet ka lox aux liak, kieh ngai: aux riang liak, phan: ang mawh nan:, ha kox laig it mai: yum heue:. 4 Pui pa koeng ka aux, tak sang ah nin: nieh, "Aux hoik pex ka nawh", nu ka gauxrhawm: pui pa lak lheet ka aux khankix, yam yaox aux krax khirhawm: khirhi: heue:. 5 Viang mawh kawx nan:, aux deuh rhawm: ka krax pa caoxrhawm: Maix, mai: rhawm: aux koe: krax gauxrhawm: gauxrhi: ka krax pa taoh Maix heue:. 6 Aux rhax lai yaogyaw ka Simiang Siyiex, mawh kheu hoik yuh Nawh bwanson: ka aux heue:.

Simin Ting 14

Pui Pa Caox Pa Caig

1 Pui pa daox pa aw: khankix keud tix ah nin: ka daux rhawm: tix, "Ang Siyiex koe:," mai: kix mawh pui pa hoik cux hoik sium:, mai: yuh pa seeing: pa brai: heue:. Pui pa yuh pa mhawm: pa mhiem: ang koe: tix kaux kawx. 2 Simiang Siyiex ot ka piang meung raoma:, mai: jhak ka kawn: pui mai: koe: pa tawng pa yung mai: pui pa sawg ka Nawh koe: tix kaux kaux lie? Ang koe: lie? 3 Kawn: pui khawm: uik hoik lud krax, mai: hoik cux hoik sium: awm: paox tix khawm: uik, pui pa yuh pa mhawm: ang koe:, pon ang koe: pie tix kaux kawx. 4 Can pui pa yuh pa caox khawm: uik ang kix tawng lie? Kix kiied tix ih pui Aux, awm: ih kix khaomun mai: ang kok ka Siyiex lie? 5 Ka dee an, tak koe: krax pa kied lhat kied graung, grawh grawng: nawh, Siyiex ot plak pui pa rah pa see heue:. 6 pex kieh pui pa hot pa sibhawm: kaig tua, mawh kheu kix deuh rhawm: ka Simiang Siyiex heue:. 7 Kieh krax taoh pui Isarilax lih hoek khaing: piang gawng Zion liak, yam deeh viex Simiang Siyiex siliex pa viex kix hu: deeh hoek, Yakop tak gauxrhawm: gauxrhi: mai: pui Isarilax tak sang gauxrhawm: gauxrhi: heue:.

Simin Ting 15

Ceu Pa Moh Siyiex

1 Simiang Siyiex eue:, pui mawx sang ot ka daux nyiex bwan: Maix? Pui mawx sang ot ka piang gawng pa singax singeh Maix? 2 Pui pa hu: ka daux krax pa rah pa see, mai: pui pa yuh pa mhawm: pa mhiem:, mai: pui pa krai lox pa kaux sijax ka daux rhawm: tix. 3 Mai: pui pa ang teei dak tix coh lox coh sikah, mai: pui pa ang yuh kaing pa ang mhawm: ang mhiem: ka paoxgrawm tix, mai: pui pa ang sa ang lao ka paox plawg paox nyhawm: tix. 4 Mai: pui pa ang yuh paox yuh pie ka pui pa caox pa caig sivoe ngai: nawh, mai: lhat graung ka Siyiex, viang tokaux nawh laux leeing: kawx, sijax mukheu nawh ang yuh laux awm: pa hoik tiex hoik tu nawh heue:. 5 Nawh tawx pui yaog yaing mau kawx, ang teei rao mai: mawh pui pa ang ih mau chun: praok ka pui pa ang koe: phimap phigrham:, mai: nawh tak mawh pa kaux pa cong: leeing: ju leeing: phan: heue:.

Simin Ting 16

Pa Chix Deuh Rhawm: Ka Lox Rawg Bwan:

1 Siyiex eue:, kia: ngien ka aux liak, grawh grawng: nawh, aux deuh rhawm: ka Maix heue:. 2 Aux ah nin: ka Siyiex, "Maix mawh Simiang aux, lheu: khaing: Maix ceu pa mhawm: ang koe: mai: aux." 3 Pui pa singax singeh pa ot ka daux meung Maix, mawh pui pa mhawm: pa mhiem: pa khaw: rhawm: aux heue:. 4 Can pui pa hawt ka krax tang: nyaing tak sang pon krax pa kharhawm: kharhi: tom: nie heue:. Aux ang rhawm: kieh nham: tix lih, son sang tan lu ka son kix, pie ceukaux kix kawx, aux ang rhawm: kieh simawd simie. 5 Simiang Siyiex mawh son sang pon aux sin:, mai: son kawk pa sang nyaux aux heue:. Maix mawh Cao: pa priex sin: aux, mai: Cao: pa chix gwieh heue:. 6 Mee: haktiex pa keung: aux tix kwang:, caw dee mhawm:, mai: sin: pa pon aux mawh pa mhawm: pa mhiem: heue:. 7 Aux yaogyaw bwanson: Simiang Siyiex, ka pa tawx krax pa tawng pa yung ka aux, yam ponsawm: kawx, rhawm: aux deeh so: ka aux heue:. 8 Aux deuh Simiang Siyiex sivoe ngai: aux jheeng: jheeng: heue:, grawh grawng: nawh, kheu Nawh Cao: ot plak khawn: dawm: aux, mai: ang aux lai greed lai gah. 9 Mawh kheu in, rhawm: aux tom: nyawm rhawm:, mai: min: plakngai: aux tak gauxrhawm: gauxrhi:, lheu: khaing: in nex aux kawx, ot ka daux krax krox krax jun heue:. 10 Grawh grawng: nawh, Maix ang tik ang grham: ju aux ka daux meung yum, mai: Maix ang kieh pui pa singax singeh cie Maix hoek krax cux krax sium:. 11 Maix tak jhi: aux yaox krax pa im: ju, krax pa grum naog mai: krax pa gauxrhawm: gauxrhi: sivoe ngai: Maix, mai: koe: krax pa gauxrhawm: gauxrhi: dex taix khawn: dawm: Maix jheeng: jheeng: heue:.

Simin Ting 17

Lox Rawg Bwan: Pui Pa Koe: Phimap Tix Kaux

1 Simiang Siyiex eue:, ot plak pui pa rah pa see mai: nghiet ka lox pa kok pa yo aux liak, veeh yhaok Maix mai: nghiet ka lox pa rawg pa mhaing: aux ka daux jheeh pa ang pie ang lhen: liak. 2 Kieh krax prawng krax ca: aux, mawh pa kaoh khaing: Maix, mai: kieh ngai: Maix jhak ka grawng: pa rah pa see liak. 3 Mai: cheuk cheu: tix yaox ka rhawm: aux, hoek tix kia: ngien ka aux yam ponsawm:, yam cheuk cheu: Maix tix yaox ka aux, mai: ang yaox phimap tid tix, pa keud aux mai: lox jheeh aux kawx, ang koe: dee phit dee lud. 4 Mawh kheu hawt aux gumlox Maix, mai: via khaing: krax pa caox pa caig, pa yuh pui tang: kaux khankix heue:. 5 Kieh caong aux kaux cong: yam hu: aux daux krax Maix, mai: son ang caong aux cang: klad liak. 6 Simiang Siyiex eue:, aux rawg mhaing: ka Maix mawh kheu hoik pawk Maix lox aux, veeh yhaok Maix mai: nghiet lox aux liak. 7 Teei taix khawn: dawm: Maix taoh ka pui pa deuh rhawm: ka Maix khaing: tawm: taix pui pa tieh pa feen ka Maix, Simiang eue:, Maix jhi: yaox krax moh krax rhawm: pa daox pa am: Maix liak. 8 Kia: ngien aux, awm: jhak Maix ka kawn: ngai: Tix, mai: tawb aux ka greem: veei pruik Maix liak. 9 Mai: kieh aux luan khaing: tawm: taix pui pa caox pa caig, pa tuktiak tukte: ka aux, pa mawh pui pa koeng pa simie tix teei aux yum, mai: pa rob hawt dex vung viang aux khankix liak. 10 Kix ca: keud son pa sak tokaux tix, mai: ah lox ting lox lhaong: heue:. 11 Aux hu: dee mawx ang ah, kix hoik rob vung viang aux, son sang goh aux ka piang tiex, kix jeung: ngai: ka aux heue:. 12 Awm: sivai sangsi: pa simie tix rud tix ih ka to: pa hoik pon tix, mai: awm: kawn: sivai sangsi: pa mox tix ka daux yeem dee ot tix heue:. 13 Simiang Siyiex eue:, kaoh heue:, tieb tie ka kix, mai: nyhot kix goh liak, teei vaid Maix mai: kieh aux luan khaing: tawm: taix pui pa ang rah ang see khankix liak. 14 Simiang Siyiex eue:, ka daux tawm: taix Maix, kieh aux luan khaing: tawm: taix pui, mai: tawm: taix pui haktiex liak. Yam kawn: im: ju kix yam in kieh kix sak naog ka sin: Maix, mai: kieh kix deuh son kawn: praix tix ang ah, mai: son kawn: saux kix heue:. 15 Grawh grawng: nawh, aux mawh pui pa rah pa see tak sang pon tix yaox ka plakngai: Maix heue:. Yam siduad aux, rhawm: aux hoik grum naog awm: riang pakpeung Maix heue:.

Simin Ting 18

Lox Lai rhax Dawit Khaix Hoik Pex Ka Pui pa Koeng ka Nawh Khankix

1 Simiang Siyiex eue:, aux moh ka Maix, kheu mawh Maix riang rao aux heue:. 2 Simiang Siyiex mawh rang: ting dee deuh aux rhawm: tix, mai: mawh guh veng pa kaux pa tieb tie ka aux, rung: pa lawm Nawh taoh tix teei aux, mai: mawh tab pa kaux son aux heue:. 3 Mai: aux tak kok yo ka Simiang Siyiex, pa khaw: aux tix yaogyaw ka Nawh mawh kheu hoik taoh Nawh aux luan khaing: daux tawm: taix pui pa koeng ka aux khankix heue:. 4 Maox krax yum hoik rob vung viang aux, mai: aux lhat ka rawm: klawng: yum pa chix kieh laux heue:. 5 Maox meung yum hoik rob vung viang aux, mai: aux hoik krix ka kie krax yum heue:. 6 Yam yaox aux krax nu krax khawm:, aux kok yo ka Simiang Siyiex, mai: aux rawg mhaing: ka Nawh heue:. Mai: Nawh mhong: ka lox kok yo aux ka daux nyiex bwan: Nawh, mai: lox pa kok yo aux sivoe ngai: Nawh hoek daux yhaok Nawh heue:. 7 Yam an haktiex yungyiang: pungpang:, mai: gawng lua khankix greed tix hu:, mawh kheu kied songrhawm: Nawh Cao: heue:. 8 Mai: taox ngu lih khaing: daux meeh Nawh, mai: ngu lih khaing: daux jheeh Nawh, mai: gaox ngu rup kheu Nawh heue:. 9 Nawh Cao: plak raoma: lih hoek ka greem: caong Nawh mai: lih tix mawh pa vhaik heue:. 10 Nawh Cao: brug ka kawncau Siyiex Cherubin hoek, mai: pu: hu: vung viang mai: hu: ka piang pruik bhaung: heue:. 11 Nawh yuh pa vhaik mai: mox ka daux rawm:, mai: paiawm: lung rob vung viang Nawh heue:. 12 Mawh kheu jhan: pa riang sivoe ngai: Nawh, mai: paiawm: viex mu: pre:, mai: gaox ngu pung prang: hu: heue:. 13 Simiang Siyiex pa ting pa lhaong:, kieh sinum praix lih ka piang raoma:, mai: ploi: lox sinum lih mawh mu: pre: mai: gaox ngu heue:. 14 Nawh puing: ak hu: ka kix, mai: ploi: pukplak praix mai: kieh kix som mai: tang: to: heue:. 15 Simiang Siyiex eue:, Maix deuh phimap ka kix, ka daux pa toek Maix bhawm: ka daux meeh Tix, mai: Maix kieh greem: rawm: mai: jaong num: haktiex lih sidawng: heue:. 16 Nawh Cao: ot dee lhaong: mai: nyeu taix Tix tok aux lih khaing: ka daux rawm: pa ting pa raux heue:. 17 Mai: taoh tix teei aux lih khaing: pui pa koeng ka aux, pa nie lheu: ting riang khaing: aux, mai: pa koeng riang ciang khoi: ka aux khankix, mawh kheu ang aux lai pex ka kix heue:. 18 Kix hoek tix yuh pa caox ka aux, mai: singaix yam yaox aux krax khirhawm: khirhi:, viang mawh nan:, Simiang Siyiex mawh dee deuh aux rhawm: heue:. 19 Nawh thong: aux hu: ka dee vieh dee va:, mai: Nawh taoh tix teei aux, kheu kied moh Nawh aux heue:. 20 Simiang Siyiex tawx bwanson:, awm: pa rah pa see aux, mai: tawx awm: taix pa singax singeh aux heue:. 21 Grawh grawng: nawh, kheu hawt aux daux krax Simiang Siyiex jheeng: jheeng:, mai: aux ang lai yuh pa caox pa caig mai: ang lai tik ka Siyiex . 22 Krax prawng krax ca: Nawh, hoik koe: sivoe ngai: aux, mai: aux ang tik ka been li Nawh Cao: heue:. 23 Aux hoik grum ceu pa mhawm: pa mhiem: sivoe ngai: Nawh, mai: aux hoik via ka phimap pa caox heue:. 24 Grawh grawng: nawh, Simiang Siyiex, tawx bwanson: awm: pa rah pa see aux, mai: tawx awm: taix pa singax singeh plak sivoe ngai: Nawh Cao: heue:. 25 Mai: tawx krax pa caox rhawm: ka kix, pui pa chix caox rhwm:, Maix tawx krax grum naog ka kix pa grum naog heue:. 26 Maix tawx pa singax singeh ka kix pui pa singax singeh, mai: Maix tawx pa lah pa cha: ka kix pui pa lah pa cha: heue:. 27 Maix taoh tix teei ka pui pa hot pa sibhawm: khankix, mai: yeen tiem ka pui pa ting rhawm: lhaong: ngai: khankix heue:. 28 Simiang Siyiex tok kawk ngu aux mai: jhan: riang ka daux pa vhaik heue:. 29 Grawh grawng: nawh, aux pon to: dex tab Maix, mai: pon jao: ka guh veng, mawh kheu deuh aux rhawm: ka Maix heue:. 30 Mai: daux krax Siyiex mawh pa grum naog, mai: sijax mukheu Simiang Siyiex, hoik mawh pa thi: tix singax singeh heue:. Nawh Cao: mawh ceu pa tieb tie ka kix pui pa deuh rhwm: ka Nawh heue:. 31 Lheu: khaing: Simiang Siyiex, siyiex mawx pa kawn: koe: tix kaux kaux, lheu: khaing: Simiang Siyiex ex, simaox rang: mawx pa kawn: ting khaing: Nawh lie? 32 Siyiex teei maox rawd nyoi, mai: nhawt ka nyoi aux, mai: kieh krax hu: aux rah see heue:. 33 Nawh kieh caong aux brax to: awm: caong cak, mai: kieh aux cung ka dee lhaong: heue:. 34 Nawh gau taix aux, son sang chix puing: naing, mai: plawng: taix aux pon raig tix tik ka ak rhiem: heue:. 35 Nawh tawx ceu pa tieb tie pa taoh ka aux, mai: taix khawn: dawm: Nawh joh jhan: ka aux heue:. Nawh yaog aux ting ka daux krax gun krax yeung pa caoxrhawm: Nawh heue:. 36 Nawh Cao: kieh krax hu: aux blang:, son ang caong aux cang klad. 37 Aux pheet ka pui pa koeng ka aux tom: krup, mai: phan: aux ang nyang yuh kix laux lak pak leeing:, ang aux deeh hoek. 38 Aux dig kix goh ka greem: caong tix, tom: ang kix lai pon kaoh. 39 Grawh grawng: nawh, Maix nhawt maox rawd nyoi aux, son sang koe: riang tix chix puing: naing ka kix pa ot tang: plak goh greem: caong aux heue:. 40 Maix hoik kieh pui pa koeng ka aux khankix, to: plak khaix aux mai: aux sang yuh laux leeing: ka pui pa koeng ka aux pak lawg heue:. 41 Mai: kix riag yo miex ding kawx, ang koe: pui pa taoh, kix kok yo ka Simiang Siyiex kawx, Nawh Cao: ang lai pawk. 42 Yam an aux krid kix phawng: awm: phawng: tiex pa phlu: bhaung:, mai: aux klup tix tik kix ka daux krax awm: nyheu: nyhawk heue:. 43 Mai: Maix kieh aux luan khaing: pui pa lah pa cha: ka aux, Maix kieh aux mawh Simiang cao: pa giex kaing: piang pui tang: ceu tang: cat, pui pa ang aux tawng khankix, mawh siliex aux heue:. 44 Yam mhong: kix lox aux, nghiet lox aux dom: mawx dom: an, mai: pui tang: ceu tang: cat khankix khyox khaw: ka aux heue:. 45 Kix khleep ngai: mai: lih hu: khawm: siyaung: tix khaing: daux tab dee mox tix heue:. 46 Simiang Siyiex mawh Cao: pa im: ju, mai: rang: ting aux, kieh koe: bwanson: liak, kieh yaog ting lhaong: ka Siyiex Cao: taoh aux liak. 47 Siyiex cao: prawng ca: plak aux, kieh cub pui khankix ot ka greem: aux. 48 Mai: Maix kieh aux luan khaing: daux tawm: taix pui pa koeng ka aux, Maix yaog aux ting lhaong: ka piang pui pa ot tang: plak, mai: kieh aux luan khaing: daux tawm: taix pui pa tud pa rhim: khankix heue:. 49 Mawh kheu nan: Simiang Siyiex eue:, aux tak sang yaogyaw ka Maix, mai: aux tak sang rhax lai yaogyaw ka ceukaux Maix heue:. 50 Nawh Cao: hoik tawx krax taoh pa ting pa lhaong: ka Simiang pa hoik laug Nawh, mai: Nawh Cao: hoik yuh bwanson: jah ka Dawit kaw pa hoik groi Nawh rawm: bee mai: simie ceucat nawh leeing: ju leeing: phan: heue:.

Simin Ting 19

Min: Plakngai: Siyiex

1 Raoma: plak jhi: min: plakngai: Siyiex, mai: plak jhi: grawng: pa hoik yuh Nawh Cao: ka taix Tix khawm: uik heue:. 2 Hoik krai tix ngaix hoik tix ngaix, hoik gau tix sawm: hoik tix sawm:. 3 Ang lai ang: moing, ang lai krai lox, ang mhong: lox tid tix. 4 Mai: maox tiag kix hoik tah hu: ka piang haktiex ku dah ku dee, mai: lox kix hoik tah praix tom: sidah haktiex heue:. Ka piang an Nawh dueh nyiex gox son singaix heue:. 5 Singaix an, awm: pui pa yuh kapaox pa lih khaing: daux lawg nyiex nawh, mai: gauxrhawm: to: hu: hawt krax awm: pui pa ting riang heue:. 6 Nawh lih hu: lailing dee sidah raoma:, tix dah hoik tix dah, mai: ang pon tix mox tix ceu kawx, kheu sidaing: hax heue:.

Gumlox Been Li Siyiex

7 Been li Simiang Siyiex mawh pa grum naog mai: chix cox rhawmrhi: ju ex heue:. Mhai: sakse: pa kham: Simiang Siyiex mawh pa mawh pa meh, mai: chix kieh pui pa ang koe: pingnya deeh koe: pingnya heue:. 8 Been li Simiang Siyiex mawh pa rah pa see, mai: chix kieh rhawmrhi: koe: krax gauxrhawm: gauxrhi:, lox tawm: been li Simiang Siyiex mawh pa singax singeh, mai: chix kieh ngai: ex riang heue:. 9 Rhawm: pa lhat pa graung ka Simiang Siyiex, mawh pa singax singeh jheeng: jheeng:, mai: krax pa prawng pa ca: Simiang Siyiex mawh pa kaux sijax mai: pa rah pa see khawm: uik heue:. 10 Gumlox Simiang Siyiex mawh pa lheu: mhawm: khaing: khri:, mai: lheu: mhawm: khaing: khri: pa hoik thi: tom: nie, mai: nie lheu: tie: khaing: rawm: kaing: hia:, mai: nie lheu: tie: khaing: rawm: kaing: hia: pa khaw: ka rhawmrhi: pui heue:. 11 Mawh kheu ceu in, awm: pa hoik tawx Maix satix ka pa mawh siliex Maix, Maix deeh tawx ka kix, pui pa pon hawt tix yuh khankix, tak pon bwanson: pa ting heue:. 12 Pui mawx pa chix tawng ka dee phit dee lud tokaux tix? kieh aux luan khaing: phimap pa koe: dee glip liak. 13 tieb tie ka siliex Maix, son ang lai yuh phimap pa ting liak, paw lai kieh phimap khankix ting ka piang aux liak, phan: yuh nan:, aux hoik grum naog mai: luan khaing: pa phit pa lud pa ting heue:. 14 Kieh lox pa lih khaing: daux jheeh aux, mai: krax pa keud pa sawn: aux mawh pa khaw: rhawm: khaw: rhi: ka plak sivoe ngai: Maix liak. Mai: Simiang Siyiex eue:, Maix mawh rang: ting aux, mai: mawh Cao: pa Taoh aux heue:.

Simin Ting 20

Lox Rawg Bwan:, Son: Sang mawh pa Pex

1 Kieh Simiang Siyiex pawk lox maix yam yaox maix krax khirhawm: khirhi:, kieh ceukaux Siyiex Yakop yaog Maix ting lhaong: liak. 2 Kieh Nawh Cao: ploi: krax teem: krax coi pa kaoh khaing: Maix dee singax singeh, mai: krax pa joh jhan: lih khaing: piang gawng Zion heue:. 3 Kieh Nawh Cao: doh keud doh sawn: ka krax lu krax tan ku ceu khawm: uik, mai: rieb tix teei ka pa gleeing tix tan khankix liak. 4 Kieh Nawh Cao: tawx can ceu pa simie maix tix lo, mai: baox tawx krax pa keud pa sawn: maix grum naog khawm: uik heue:. 5 Aux gauxrhawm: gauxrhi: ka krax taoh Maix, mai: aux pak chix ka daux ceukaux Siyiex, kieh Simiang Siyiex tawx pa rawg Maix bwan: khawm: uik liak. 6 Yamin aux hoik tawng grawng: Simiang Siyiex hoik taoh ka Kaw pa hoik groi Nawh rawm: bee, Nawh Cao: ot ka piang meung raoma: ka dee singax singeh, mai: pawk lox kix, mai: taoh kix ka taix khawn: dawm: Nawh Cao: heue:. 7 Mai: pui tiblah deuh rhawm: ka ling: moi, ling: brung, phan: mawh ex yaogyaw ka ceukaux Simiang Siyiex ex heue:. 8 Kix sideeing caong mai: goh heue:, phan: mawh ex kaoh cung heue:. 9 Simiang Siyiex eue:, taoh ka aux liak, mai: deeh pawk ka lox aux yam kok yo aux ka Maix liak.

Simin Ting 21

Lox Yaogyaw Kheu Hoik Pex Nawh

1 Simiang Siyiex eue:, ka daux riang rao pa tawx Maix, Simiang gauxrhawm: gauxrhi:, mai: ka daux pa taoh Maix kied gauxrhawm: gauxrhi: heue:. 2 Maix caoxrhawm: mai: tawx awm: pa lo nawh ka daux rhawm: tix, Maix paw thiang: tix tik ka lox pa rawg nawh bwan: ka jheeh liak. 3 Grawh grawng: nawh, Maix tawx bwanson: pa kied mhawm:, mai: Maix ceep mhok khri: ka piang kaing: Nawh heue:. 4 Nawh sawg bwanson: krax pa im: ju, mai: Maix tawx krax pa lang: ju leeing: ju leeing: phan: heue:. 5 Nawh ting min: plakngai: kheu krax pa taoh Maix, mai: tawx min: plakngai: Maix mai: siawp sibrawm pa ting deuh ka piang nawh heue:. 6 Mai: Maix hoik ciak tix deuh bwanson: ka Nawh leeing: ju leeing: phan:, mai: kieh Nawh kied gauxrhawm: sivoe ngai: Maix heue:. 7 Grawh grawng: nawh, Simiang deuh rhawm: ka Simiang Siyiex, mai: Nawh kaux cong: leeing: ju leeing: phan:, kheu bwanson: Siyiex Cao: pa ting pa lhaong: khaing: khawm: uik heue:. 8 taix Maix tak sipub ka pui pa koeng ka Maix khawm: uik, mai: taix khawn: dawm: Maix tak sipub ka pui pa koeng pa khoi: ka Maix heue:. 9 Yam lih pa songrhawm: Siyiex, kieh kix lih mawh awm: glah ngu, mawh kheu kied songrhawm: Siyiex, mai: tak bleet kix, mai: tak sang gleeing tix tik kix ka daux ngu heue:. 10 Maix tak yieh tix tik simie ceucat kix ka piang haktiex, mai: tak yuh kawn: praix kix laux leeing: ka sinax kawn: pui heue:. 11 Grawh grawng nawh, kix keud tix yuh pa ang mhawm: tang: plak ka Maix, viang mawh nan:, ceu pa nieb keud kix tix yuh khankix, lih tix mawh pa giex pa going heue:. 12 Grawh grawng: nawh, Maix kieh kix deeh veeh tix hu: plak khaix tix mai: Maix nyeu te ka plakngai: kix heue:. 13 Simiang Siyiex eue:, kieh yaogyaw ka Maix, kheu riang rao siawp sibrawm Maix, mai: ex rhax lai yaogyaw ka Maix heue:.

Simin Ting 22

Lox Kok Yam Khirhawm: Mai: Lox Yaogyaw

1 Siyiex Aux, Siyiex Aux, Maix lai tik vud Aux yuh ka mawx? Yam kok yo Aux Maix, son sang taoh ka Aux, Maix lai ot singai khaing: Aux yuh ka mawx? 2 Siyiex Aux eue:, yam kok yo Aux Maix, yam pon singaix Maix ang pawk lox Aux, mai: yam ponsawm: kawx, Aux kok yo Maix, mai: Aux ang yaox dee laux dee lee: tix heue:. 3 Maix mawh Cao: pa singax singeh, pa ot ka daux pa yaogyaw pui Isarilax heue:. 4 Tax du ex khankix, deuh rhawm: ka Maix, mawh kheu kix deuh rhawm: ka Maix, Maix tom: taoh kix luan heue:. 5 Mai: kix kok yo ka Maix, mai: hoek krax taoh, mai: Maix kieh kix luan khaing: krax pa kaig pa tua heue:. 6 Phan: mawh aux, ang mawh pui, mawh ngie kawng , mai: dee sa dee lao pui mai: dee yuh pui khawm: uik pa ang ceu ang cak kah heue:. 7 Can pui pa yaox ka aux khawm: uik, nyiah meung aux, mai: kix blex dak tix, mai: vutvied kaing: kap tix heue:. 8 Mai: kix ah nin:, nawh deuh rhawm: ka Simiang Siyiex, son sang taoh nawh luan heue:. Mawh kheu khaw: rhawm: Nawh Cao: ka nawh kieh taoh nawh lih heue:. 9 Maix kieh aux deuh rhawm: ka Maix, tom: yam bluh Maix aux lih khaing: vaig miex tix, mai: yam kawn: peuex aux teeh miex tix heue:. 10 Aux hoek ka daux tawm: taix Maix tom: yam keh, mai: Maix hoik dawg mawh Siyiex aux tom: yam ot aux ka daux vaig miex tix heue:. 11 Paw lai ot singai khaing: aux, grawh grawng: nawh, krax khirhawm: khirhi: hoik dex mai: aux, mai: pui pa teem: coi aux ang koe: tix kaux kawx. 12 Moi mhaing:, moi praix rob vung viang aux tom: nie, mai: moi praix pa ting riang ting rao pa koe: ka daux meung Bashan kawx, rob vung viang aux heue:. 13 Kix ang: jheeh tix awm: sivai sangsi: pa graox mai: rud kiied tix ih heue:. 14 Kix klup tix tik aux, piang tiex awm: rawm:, si:ang: siawp aux kawx, hoik tang: hu:, rhawm: aux kawx, ceh hu: awm: bee kax, ka daux naok aux heue:. 15 Riang rao aux hoik hit kroh hu: awm: aw: taux, dak aux kawx, hoik klieb hu: mai: si:ang: kap heue:. Mai: hoik kieh aux rau daux phawng: tiex tom: sidah yum heue:. 16 Cub sox khankix rob vung viang aux, mai: cub pui pa caox khankix kawx, hoik rob vung viang aux, mai: swat taix caong aux doh heue:. 17 Aux hoik pon simin ka si:ang: tokaux aux, mai: kix maong tix jhak ka aux heue:. 18 Kix teei kraung ceep aux gwieh tix ih, mai: sibex aux kawx, kix nieb tix yaox heue:. 19 Viang mawh kawx nan:, Simiang Siyiex eue:, paw lai ot singai khaing: aux liak. Maix pa mawh Cao: riang rao aux eue:, nied tix hoek laung laung mai: teem: coi aux liak. 20 Mai: taoh ju aux khaing: lawm vaid mai: taoh pui pa moh aux khankix lih khaing: daux tawm: taix sox khankix liak. 21 Taoh aux lih khaing: jheeh sivai sangsi: khankix liak, mai: deeh pawk lox aux yam kok yo aux Maix ka daux teet rung: moi liak. 22 Aux tak krai grawng: Maix ka puxaik aux khankix heue:. Aux tak yaogyaw Maix ka sinax pui haoh pui hun: khankix heue:. 23 Pui pa lhat pa graung ka Simiang Siyiex khankix eue:, yaogyaw ka Nawh Cao: heue:. Simie ceucat Yakop khawm: uik eue:, yaog min: plakngai: Nawh ting heue:. Ceu pui Isarilax khankix eue:, lhat graung ka Nawh Cao: heue:. 24 Grawh grawng: nawh, Nawh Cao: ang nieb yuh pa ang cee ang cak ka pui pa hot pa sibhawm:, mai: pa kharhawm: kharhi:, Nawh ang veeh ngai: khaing: kix, mai: Nawh Cao: nghiet ka lox pa rawg pa mhaing: kix heue:. 25 Aux yaogyaw ka Maix ka daux sinax pui haoh pui hun:, mai: aux hawt yuh sijax mukheu awm: pa hoik kham: aux tix yuh sivoe ngai: pui pa lhat pa graung ka Maix heue:. 26 Pui pa hot pa sibhawm: tak yaox tix sawm: tom: sak heue:, mai: pui pa sawg ka Siyiex khankix tak yaogyaw ka Nawh Cao: heue:. Kieh rhawm: pex koe: riang koe: rao jheeng: jheeng: liak. 27 Dee sidah haktiex khawm: uik, tak sang doh keud mai: deeh tieh tix hoek ka Simiang Siyiex, pui ku ceu khawm: uik, tak sang krub plak sivoe ngai: Maix heue:. 28 Grawh grawng: nawh, piang haktiex khawm: uik, hoik mawh meung cie Nawh, mai: Nawh Cao: kwang: ka piang pui khawm: uik heue:. 29 Can kix pa mi pa koe: pa ih pa un: khankix, deuh rhawm: ka pa ih pa un: tix, mai: can kix pa hu: daux phawng: tiex ang krox ka ju tix, kix tak grux ngawng tix krub ka Nawh Cao: heue:. 30 Simie ceucat kix kawx, tak sang krub ka Nawh Cao:, mai: krai grawng: Simiang Siyiex ka pui leeing: ju leeing: phan: heue:. 31 Kix tak sang deeh lih hoek tix plak jhi: grawng: pa rah pa see Nawh Cao: ka kix pui pa tak sang keh khankix heue:.

Simin Ting 23

Simiang Siyiex Mawh Cao: Pa Liang Yung: aux

1 Simiang Siyiex mawh cao: pa liang yung: aux, aux ang lai lo tid tix. 2 Nawh Cao: kieh aux it, mai: kieh aux sawm: dee klai rib, Nawh thong: aux hu: ka praok rawm: klawng: pa singaong. 3 Nawh baox tawx riang rao ka ju aux, Nawh thong: aux hu: ka daux krax pa rah pa see ka daux ceukaux Nawh heue:. 4 Viang aux yaox tix hu: ka daux klawng: daux ngawd veei krax yum kawx, aux ang lhat kah, grawh grawng: nawh, Maix ot mai: aux, khaox puat Maix mai: khaox gix Maix kieh aux nyawm rhwm:. 5 Maix cox khre: pheen: sawm: aux sivoe ngai: pui pa koeng ka aux khankix heue:. Maix groi rawm: bee piang kaing: aux, mai: kawk rawm: bee aux, deeh kreh heue:. 6 Bwanson: krax caoxrhawm: pa mhawm: Maix, hawt grawng: lawng khaix aux, tom: hoek nyiex meung raoma: leeing: ju leeing: phan: heue:.

Simin Ting 24

Simiang Cao: Pa Ting Pa Lhaong:

1 Haktiex mai: can pa koe: piang haktiex khawm: uik, hoik mawh cie Siyiex, mai: kawn: pui pa ot ka piang haktiex khawm: uik kawx mawh cie Siyiex heue:. 2 Grawh grawng: nawh, deuh ceu an khankix piang rawm: sigrit sigra: mai: kieh kaux cong: ka piang rawm: khankix heue:. 3 Pui mawx pon tix hoek ka piang gawng dee ot Simiang Siyiex? mai: pui mawx pa pon tix cung dee singax singeh Nawh Cao:? 4 Mawh pui pa singax taix, mai: pui pa singax singeh daux rhawm:, mai: pui pa ang kieh rhawm: tix hu: ka daux pa pie pa lhen:, mai: pui pa ang jhax ang lawg khankix. 5 Simiang Siyiex nawb bwanson: ka pui khankix, mai: krax pa rah pa see Siyiex taoh ka nawh heue:. 6 Kix mawh ceu pui pa sawg ka Siyiex, mai: pui pa sawg ka plakngai: Siyiex Yakop heue:. 7 Mawh kheu sang hoek Simiang pa ting min: plakngai:, siviex ting mai: siviex khankix eue:, paoh heue:! 8 Simiang pa ting min: plakngai: mawh mawx? Mawh Cao: pa ting siawp sibrawm:, mai: riang rao: mai: mawh Siyiex Cao: pa puing: naing ka daux siawp sibrawm heue:. 9 Mawh kheu sang hoek Simiang pa ting min: plakngai:, siviex ting mai: siviex khankix eue:, paoh heue:! 10 Simiang pa ting min: plakngai: mawh mawx? Mawh Simiang Siyiex Cao: kru naing raoma:, mai: mawh Simiang khunhawkham pa ting min: plakngai: heue:.

Simin Ting 25

Lox Rawg Bwan:, Son Sang Priex

1 Simiang Siyiex eue:, aux tawx ju tix ka Maix heue:. 2 Siyiex aux eue:, aux deuh rhawm: ka Maix, paw kieh aux hoek krax kaig krax tua, mai: paw kieh pui pa koeng ka aux, gauxrhawm: gauxrhi: mai: pex ka aux liak. 3 Pui pa keud pot jun pot ka Maix tete khankix, tak ang hoek krax kaig krax tua, mai: pui pa nieb yuh pa ang tie koe: grawng: khankix, tak hoek krax kaig krax tua heue:. 4 Simiang Siyiex eue:, jhi: aux yaox daux krax Maix liak, mai: gau aux ka daux krax Maix liak. 5 Thong: aux hu: ka daux krax pa mawh pa meh Maix, mai: thong: gau aux liak, grawh grawng: nawh, Maix mawh Siyiex Cao: pa taoh aux, mai: aux krox jun ka Maix leeing: singaix heue:. 6 Simiang Siyiex eue:, doh keud doh sawn: ka krax pa caoxrhawm: Maix, mai: krax moh krax rhawm: pa hoik dawg koe: Maix didix. 7 Paw lai doh keud doh sawn: ka phimap pa yuh aux, yam kawn: mawh aux kawn: nyawm, Simiang Siyiex eue:, awm: krax pa caoxrhawm: Maix, mai: doh keud doh sawn: ka aux, mawh kheu mawh Maix, Cao: pa jiet mhawm: heue:. 8 Simiang Siyiex mawh pa grum naog pa mhawm: pa mhiem: mai: pa rah pa see heue:, mawh kheu in Nawh jhi: daux krax ka pui pa koe: phimap phigrham: heue:. 9 Nawh thong: ka pui pa awnrhawm: awnrhi: hu: ka daux krax pa khaw: pa caw Nawh, mai: thong: gau kix ka daux krax Nawh. 10 Can pui pa hawt ka daux krax been li Nawh mai: pui pa hawt tix yuh ka sijax mukheu Nawh khankix, Nawh Cao: tak sang thong: kix hu: ka daux krax moh krax rhawm: Nawh heue:. 11 Simiang Siyiex eue:, ka daux ceukaux Maix, pluat ploi: phimap aux pa kied ting liak. 12 Pui mawx ang ah, pa lhat pa graung ka Simiang Siyiex, Nawh Cao: jhi: nawh yaox daux krax pa simie tix hu: awm: pa moh nawh heue:. 13 Daux rhawm: nawh yaox tix ot nhim: mhawm: mhawm:, mai: simie ceucat nawh kawx, tak pon sin: ka daux meung Nawh heue:. 14 Simiang Siyiex yuh paox pie ka pui pa lhat pa graung ka Nawh khankix, mai: kieh kix tawng ka sijax mukheu Nawh heue:. 15 Mai: ngai: aux jhak ka Simiang Siyiex jheeng: jheeng:, grawh grawng: nawh, Nawh Cao: hoik taoh caong aux lih khaing: kie heue:. 16 Veeh ngai: Maix plak aux, mai: caoxrhawm: ka aux liak, taig aux tixkaux khaing:, kheu pa hot pa sibhawm: heue:. 17 Rhawm: aux hoik naog ka krax pa khirhawm: khirhi:, mai: kieh aux luan khaing: ka daux pa kharhawm: kharhi: liak. 18 keud ka pa hot pa sibhawm: aux, mai: krax pa kharhawm: kharhi: aux mai: pluat ploi: phimap phigrham: aux khawm: uik liak. 19 Jhak ka pui pa koeng ka aux khankix, mawh kheu kied haoh kied hun:, pui pa koeng riang cieang khoi: ka aux heue:. 20 Priex ka ju aux, mai: taoh aux liak, kheu aux deuh rhawm: ka Maix, mai: paw kieh aux hoek krax kaig krax tua liak. 21 Mawh kheu hoik krox jun aux ka Maix, mai: kieh pa rah pa see Maix priex aux liak. 22 Simiang Siyiex eue:, taoh pui Isarilax lih khaing: ka daux pa kharhawm: kharhi: khawm: uik liak.

Simin Ting 26

Lox Rawg Bwan: Pui Pa Mhawm: Tix Kaux

1 Simiang Siyiex eue:, mawh kheu hawt aux tix yuh daux krax pa mhawm: Maix, mai: prawng ca: plak aux liak, Simiang Siyiex eue:, aux ang gah ang greed tix, kheu aux deuh rhawm: ka Maix heue:. 2 Simiang Siyiex eue:, chawk cheng: tix yaox aux, kieh rhawm: aux mai: sok lax aux singax liak. 3 Bwanson: krax moh krax rhawm: Maix koe: sivoe ngai: aux, kheu aux priex tix hawt ka been li Maix, daux krax pa rah pa see heue:. 4 Aux ang lai ngawm tau mai: pui pa chix pie chix lhen: khankix, aux ang lai laig ka cub pui pa chix mox chix kheem: khankix. 5 Aux koeng ka dee kum: pui pa ang rah ang see khankix, aux ang lai ngawm tau mai: pui pa caox pa caig khankix. 6 Simiang Siyiex eue:, aux tak sang khoek taix tix ka daux pa ang koe: phimap, mai: ot hawt vung viang khu: dee tan Maix. 7 Aux sang rhax lai yaogyaw bwanson: Maix, mai: krai grawng: pa daox pa am: pa yuh Maix khawm: uik heue:. 8 Simiang Siyiex eue:, aux kied moh ka nyiex dee ot Maix, mai: min: plakngai: Maix heue:. 9 Paw lai kieh khwan: ju aux ot tau mai: pui phimap phigrham:, mai: pui pa pah pui yum khankix liak. 10 Ka daux tawm: taix kix koe: krax pa caox pa ang mhawm:, mai: taix khawn: dawm: kix hoik naog ka khawngphak chun: praok heue:. 11 Phan: mawh aux, tak hawt daux krax pa rah pa see, caoxrhawm: mai: taoh aux liak. 12 Aux cung ka caong tix, mai: yaogyaw ka Maix ka daux sinax pui pa haoh pa hun: khankix heue:.

Simin Ting 27

Lox Rawg Bwan: Yaogyaw

1 Simiang Siyiex mawh pa riang aux, mai: Cao: taoh aux, aux sang lhat ka pui mawx? Simiang Siyiex mawh riang rao son ju aux, aux sang lhat ka pui mawx? 2 Yam hoek pui pa caox pa caig mai: pui pa koeng, pa deuh phimap ka aux khankix, kiied tix ih nex aux, mai: kix sideeing caong mai: goh heue:. 3 Viang pui naing khankix yuh tab kawx, aux ang lhat, viang kix viex kru naing mai: hoek tix puing: ka aux kawx, rhawm: aux kaux cong: kheu aux deuh rhawm: ka Siyiex heue:. 4 Aux rawg tix ceu ka Simiang Siyiex, yam kawn: im: ju aux, son sang pon aux tix ot ka daux nyiex Siyiex, mai: son sang yaox min: plakngai: pa mhawm: grang Siyiex, mai: aux sawg son sang yaox tix ot ka daux nyiex Bwan: Nawh heue:. 5 Grawh grawng: nawh, yam hoek krax khirhawm: khirhi:, Maix tieb tie aux ka daux nyiex gox bwan:, mai: Maix mox aux ka daux nyiex bwan: Maix, mai: Nawh Cao: deuh aux ka piang rang: ting heue:. 6 Yam in hoik yaog kaing: aux ka piang pui pa koeng pa rob vung viang aux khankix, mawh kheu in, aux gauxrhawm: gauxrhi: mai: tan lu ka daux nyiex bwan: Maix, tak rhax lai mai: ah lai rhax yaogyaw ka Simiang Siyiex heue:. 7 Simiang Siyiex eue:, nghiet ka lox pa kok yo aux liak, caoxrhawm: ka aux, mai: pawk lox aux liak. 8 Yam ah Maix nin: ka aux, sawg pakngai: Aux, mai: daux rhawm: aux ah nin:, Simiang Siyiex eue:, aux sawg pakngai: Maix heue:. 9 Paw lai mox pakngai: Maix khaing: aux liak, mai: yam songrhawm: songrhi: Maix, paw lai tik aux liak, grawh grawng: nawh, awm: pa hoik sax teem: coi Maix ka aux, paw lai tik vud ka aux, mai: teem: coi aux liak. 10 Viang miex keeing: aux prah ka aux kawx, Siyiex ang prah ka aux mai: priex ka aux heue:. 11 Simiang Siyiex eue:, jhi: daux krax Maix mai: gau aux, mai: thong: aux hu: ka daux krax Maix pa rah pa see, mawh kheu haoh pui pa koeng ka aux heue:. 12 Paw lai kieh aux hoek ka daux tawm: taix pui pa koeng ka aux khankix, grawh grawng: nawh, pui pa kham: mhai: sakse: pa ang mawh ang meh, mai: pui pa ting rhawm:, pa tuktiak tukte: ka aux khankix sang lah sang cha: ka aux heue:. 13 Phan: aux ang koe: krax yumrhawm: ka bwanson: Simiang Siyiex pa im: ju, aux ang yaox tix ot dee ot kix heue:. 14 Mai: krox jun ka Simiang Siyiex, teei riang teei rao mai: viex rhawm: kua: tix krox jun pot ka Simiang Siyiex heue:.

Simin Ting 28

Lox Rawg Bwan:, Son Sang Teem:

1 Simiang Siyiex mawh rang: ting aux, aux kok yo ka Maix, paw lai yuh tix ang pawk lox aux liak, phan: Maix ang pawk ka lox aux, aux awm: kix pui pa lih hu: ka daux simeeig heue:. 2 Nghiet ka lox aux, yam kok yo aux ka Maix, mai: yam yaog aux taix tix daux lawg dee kied singax singeh heue:. 3 Paw kieh aux hu: tau mai: pui pa caox pa caig khankix, mai: pui pa yuh pa ang rah ang see khankix, mai: pui pa ah lox bied ka paox plawg paox nyhawm:, mai: pa keud ceu pa ang mhawm: ka daux rhawm: khankix heue:. 4 Deeh tawx ka kix, awm: pa hoik yuh kix, deeh tawx pa caox ka kix, awm: pa hoik yuh kix pa caox, mai: tawx ka kix, awm: pa hoik yuh kix ka taix tix, prawng ca: ka kix awm: phimap pa yuh kix heue:. 5 Grawh grawng: nawh, mawh kheu kix map ka pa hoik yuh Siyiex, mai: khaix taix pa hoik yuh Siyiex khankix, Nawh Cao: ang kieh kix kaux cong: mai: yieh kix laux leeing: heue:. 6 Kieh Simiang Siyiex koe: bwanson: liak, mawh kheu hoik nghiet Nawh lox pa rawg pa mhaing: aux heue:. 7 Simiang Siyiex mawh riang rao aux, mai: pa tieb tie aux, aux deuh rhawm: ka Nawh, mai: Nawh teem: coi ka aux, mawh kheu in, aux tom: gauxrhawm: gauxrhi:, mai: rhax lai yaogyaw min: plakngai: Nawh Cao: heue:. 8 Simiang Siyiex mawh riang rao pui Nawh, mai: Cao: pa taoh, kieh kaux cong: ka kaw pa hoik groi Nawh rawm: bee heue:. 9 Taoh ka pui Maix khankix, mai: tawx sin: bwanson: Maix ka kix liak, kia: ngien ka kix mai: yaog kix ting lhaong: jheeng: jheeng: leeing: ju liak.

Simin Ting 29

Lox Cie Simiang

1 Kawn: praix Siyiex khankix eue:, yaog min: plakngai: Siyiex, mai: siawp sibrawm Nawh heue:. 2 Tawx min: plakngai: ka ceukaux Simiang Siyiex, mai: teei tix ceep kraung pa singax singeh mai: krub ka Nawh heue:. 3 Gumlox Simiang Siyiex koe: ka piang rawm: sigrit sigra:, mai: Siyiex pa ting min: plakngai:, kieh praix sinum, Simiang Siyiex ot ka piang rawm: khankix heue:. 4 Gumlox Simiang Siyiex mawh pa grum naog siawp sibrawm, mai: gumlox Simiang Siyiex grum naog ka min: plakngai: pa ting heue:. 5 Gumlox Simiang Siyiex, raig tix tik ka khaox piakvan: mai: Simiang Siyiex raig tix tik ka khaox piakvan: pa koe: ka piang gawng Lebanion khankix heue:. 6 Siyiex kieh gawng Lebanon mai: gawng Sirion jaloh awm: kawn: moi mai: kawn: moi praix heue:. 7 Gumlox Simiang Siyiex, kieh rao ngu gwieh tix heue:. 8 Gumlox Simiang Siyiex kieh daux tiag daux tu yungyiang:, mai: Simiang Siyiex, kieh daux tiag daux tu Kadesax yungyiang: heue:. 9 Gumlox Simiang Siyiex kieh cak miex keh kawn: mai: gah tix tik khaox ox khankix, mai: can pa ot ka nyiex Nawh Cao: khawm: uik krai grawng: min: plakngai: Nawh Cao: heue:. 10 Simiang Siyiex ot ka piang rawm: pa hoik kheem: an, mai: Simiang Siyiex ngawm mai: yuh Simiang jheeng: jheeng: leeing: ju heue:. 11 Simiang Siyiex tawx riang rao ka pui Nawh khankix, mai: Simiang Siyiex nawb bwanson: pa nhim: ka pui Nawh khankix heue:.

Simin Ting 30

Lox Rawg Bwan: Pa Yaogyaw

1 Simiang Siyiex eue:, aux yaogyaw ka Maix, mawh kheu taoh Maix aux mai: Maix ang kieh pui pa koeng khankix, gauxrhawm: ka piang aux. 2 Simiang Siyiex aux eue:, aux kok yo ka Maix mai: Maix kieh aux nyawmrhawm: heue:. 3 Simiang Siyiex eue:, Maix hoik taoh aux lih khaing: daux meung yum, mai: ang kieh aux hoek ka daux simeeig, mai: hoik kieh ju aux nyawmrhawm: heue:. 4 Pui pa singax singeh Siyiex khankix eue:, rhax lai yaogyaw ka Nawh mai: yaogyaw ka ceukaux Nawh Cao: pa singax singeh heue:. 5 Krax pa songrhawm: songrhi: Nawh, mawh tivud khaing:, mai: bwanson: pa mhawm: Nawh koe: leeing: ju leeing: phan:, mai: pa yiem pa grai mawh tix sawm: khaing:, mai: krax gauxrhawm: tak hoek plak ponngawb heue:. 6 Yam mhawm: ot mhawm: koe: aux, aux ah nin:, "Aux ang doh khirhawm:. 7 Simiang Siyiex eue:, gawng dee ot aux kaux cong: mawh kheu bwanson: Maix, phan: Maix veeh pakngai: tix khaing: aux, aux hoek krax kharhawm: kharhi: heue:. 8 Simiang Siyiex eue:, nghiet ka lox pa rawg pa mhaing: aux ka Maix liak. 9 Phan: aux laig ka daux simeeig koe: bwanson: yuh ka mawx? Phawng: tiex tak yaogyaw ka Maix lie? Nawh tak plak jhi: sijax mukheu Maix lie? 10 Simiang Siyiex eue:, nghiet ka lox aux, mai: caoxrhawm: teem: coi aux liak, Simiang Siyiex eue:, aux kok yo ka Maix teem: coi ka aux liak. 11 Yam an krax khirhawm: khirhi: aux, Maix kieh mawh krax graoh krax thiao:, mai: Maix peeik tix tik kraung ceep pa khirhawm: khirhi: aux, mai: deeh tawx kraung ceep pa gauxrhawm: gauxrhi: heue:. 12 Mawh kheu in, phan: aux ang yaogyaw ka Maix, aux ang doh pon ot, Simiang Siyiex aux eue:, aux rhax lai yaogyaw bwanson: Maix jheeng: jheeng: leeing: ju leeing: phan: heue:".

Simin Ting 31

Lox Rawg Bwan: Pui Pa Deuh Rhawm: Ka Siyiex

1 Simiang Siyiex eue:, aux deuh rhawm: ka Maix heue:, Maix kieh aux luan khaing: krax pa kaig pa tua jheeng: jheeng: liak, mai: taoh ka aux awm: pa rah pa see Maix liak. 2 Veeh yhaok Maix plak aux mai: nied tix taoh aux laung laung liak, Maix mawh rang: ting pa kaux son aux, mai: mawh tab dee deuh aux rhawm: tix heue:. 3 Maix mawh rang: ting son aux, mai: mawh tab dee deuh aux rhawm: tete heue:, mai: thong: gau aux hu: ka daux ceukaux Maix liak. 4 Mawh kheu Maix mawh dee deuh aux rhawm:, taoh aux lih khaing: daux kie pa taong: kix ka aux liak. 5 Simiang Siyiex pa kaux sijax eue:, aux tawx ju tix ka Maix, mai: taoh aux liak. 6 Aux koeng ka pui pa krub ka pa giex pa goeng, phan: mawh aux deuh rhawm: ka Simiang Siyiex heue:. 7 Aux tak koe: krax gauxrhawm: gauxrhi:, ka krax caoxrhawm: Maix, mai: Maix jhak ka pa hot pa sibhawm: aux, mai: Maix hoik yaox ka ju aux pa kharhawm: kharhi: heue:. 8 Maix ang tawx aux ka tawm: taix pui pa koeng ka aux khankix, mai: Maix kieh caong aux cung ka dee vieh dee va: heue:. 9 Simiang Siyiex eue:, caoxrhawm: ka aux, mawh kheu hoik hoek krax pa khirhawm: khirhi:, mai: ngai: aux rhawm: aux, mai: vaig aux kied tug kheu pa khirhawm: khirhi: aux heue:. 10 Aux hoik dawd ju, mawh kheu khirhawm: khirhi: aux, aux ngia ku num, mai: riang rao aux rau hu:, mai: si:ang: aux graig hu: kheu phimap heue:. 11 Mawh kheu pui pa koeng ka aux khankix, sa lao ka aux, mai: paox plawg paox nyhawm: aux, mai: paox meed paox leen aux khankix kawx, seeing: brai: ka aux heue:. Pui pa yaox ka aux hawt krax hawt laux kawx, lhat mai: to: heue:. 12 Kix hoik piawm: aux, mai: ang lai doh keud ka aux, awm: pui pa hoik yum tix kaux, mai: kix deuh aux awm: diang aw: caox heue:. 13 Aux mhong: lox pa sa pa lao pui grawng: aux, mai: ceu pa lhat pa graung koe: ku plak, kix khrawm: tix yuh cub caw: mai: kum: paox tix, keud tix sang teei ju aux yum heue:. 14 Viang mawh kawx nan:, Simiang Siyiex eue:, aux deuh rhawm: ka Maix heue:. Mai: aux krai yuh nin:, Maix mawh Siyiex aux heue:. 15 Bawg yam aux koe: daux tawm: taix Maix, mai: taoh aux luan khaing: ka daux tawm: taix pui pa koeng ka aux, mai: pui pa tuktiak tukte: ka aux khankix liak. 16 Kieh pakngai: Maix jhan: riang ka piang aux liak, kieh bwanson: krax pa caoxrhawm: Maix taoh aux liak. 17 Simiang Siyiex eue:, aux rawg bwan: ka Maix, paw lai kieh aux koe: krax pa kaig pa tua liak, kieh pui pa caox pa caig khankix, hoek krax pa kaig pa tua, mai: kieh glaik tix daux meung yum liak. 18 Pui pa ting rhawm: lhaong: ngai:, pui pa yuh pa ang cee ang cak ang nab ang yam, pui pa ah lox map lox tiex ka pui pa rah pa see khankix, mai: pui pa koe: siyieb jheeh pa chix ling: tix ah lox bied khankix, kieh yien: yawg liak. 19 Bwanson: pa hoik priex Maix son pui pa lhat pa graung ka Maix, pa hoik cox Maix son pui pa deuh rhawm: ka Maix, sivoe ngai: kawn: pui mhawm: miex ding? 20 Maix hoik teei tix mox kix daux tawm: taix Tix, mai: kieh kix luan khaing: pa nieb yuh pui pa koeng khankix, Maix priex kix daux nyiex bwan: Maix, mai: kieh kix luan khaing: jheeh pa simah simaing: heue:. 21 Kieh Simiang Siyiex koe: bwanson: liak, grawh grawng: nawh, Maix hoik jhi: krax moh krax rhawm: pa daox pa am: ka aux, ka daux veng Maix pa kaux pa cong: heue:. 22 Aux lhat graung sivoe ngai: Maix, mawh kheu ce: aux Maix hoik tik ka tix, viang mawh nan:, yam kok yo aux ka Maix, mai: yam rawg aux bwan:, Maix nghiet ka lox aux heue:. 23 Pui pa singax singeh khankix eue:, moh ka Simiang Siyiex heue:. Simiang Siyiex kia: ngien ka pui pa kaux sijax khankix, mai: deeh tawx phimap tom: nie ka pui pa ting rhawm: ting rhi: khankix heue:. 24 Pui pa deuh rhawm: ka Simiang Siyiex khankix eue:, teei riang rao mai: kieh koe: rhawm: kua: rhawm: vao heue:.

Simin Ting 32

Krai Doh Phimap Mai: Pluat Phimap

1 Pui pa hoik luan khaing: phimap, mai: phimap pa tawb pa kheem: khankix, koe: bwanson: heue:. 2 Pui pa luan khaing: phimap phimap pa deuh Simiang Siyiex, mai: rhawm: pa ang koe: ceu pa pie pa lhen:, koe: bwanson: heue:. 3 Phan: aux ang krai doh ka phimap tix, si:ang: aux kroik, kheu ngia aux leeing: lang: singaix heue:. 4 taix Maix cien ka piang aux ku ngaix ku sawm:, mai: rawm: lauh lih jheeng: jheeng: awm: bawg yam rung praix heue:. 5 Aux krai doh phimap phigrham: sivoe ngai: Maix, aux ang mox phimap pa phit pa lud tix, aux khyox khaw: grawng: pa lheu: aux lox Maix Simiang Siyiex heue:. Maix hoik pluat ploi: phimap pa phit aux heue:. 6 Mawh kheu in, kieh pui pa singax singeh khankix, tak sang rawg mhaing: ka Maix yam sipub kix ka Maix, phan: yuh nan:, rawm: ting haok hwan: kawx, ang lai pon tix kheem: dex kix heue:. 7 Maix mawh dee mox aux, mai: Cao: pa tieb tie aux, yam khirhawm: khirhi: aux heue:. Kieh lox rhax grawng: krax taoh rob vung viang aux heue:. 8 Aux tak sang gau ka maix mai: tak sang jhi: krax pa sang hu: maix, Aux kia: ngien maix mai: priex ka maix heue:. 9 Paw lai kieh awm: brung, law, pa ang tawng praix phan: ang cu tix hoek ka maix, sau: maox keu: kag daux jheeh nawh, mai: son sang pon tok nawh hu: heue:. 10 Pui pa ang rah ang see khankix, yaox tix kham: geu: krax pa kharhawm: kharhi: tom: nie, mai: pui pa deuh rhawm: ka Simiang Siyiex khankix, bwanson: krax pa caoxrhawm: hoik rob vung viang nawh heue:. 11 Pui pa rah pa see khankix eue:, gauxrhawm: gauxrhi: ka daux Simiang Siyiex awawx. Pui pa rah pa see rhawmrhi: khankix eue:, rhax lai gauxrhawm: gauxrhi: awawx.

Simin Ting 33

Lox Rhax Pa Yaogyaw

1 Pui pa rah pa see khankix eue:, rhax lai gauxrhawm: gauxrhi: ka daux Simiang Siyiex awawx, krax pa gauxrhawm: tix yaogyaw mawh pa keung: pa khaw: mai: pui pa rah pa see heue:. 2 Tah ting: mai: yaogyaw ka Simiang Siyiex awawx, teei ting: pa koe: maox kao: nyaing mai: rhax lai yaogyaw awawx. 3 Ah lox rhax pa khraox sivoe ngai: Nawh Cao: awawx, gauxrhawm: gauxrhi: mai: tah ting: mhawm: mhawm: pa nyawm tix nghiet lox awawx. 4 Grawh grawng: nawh, gumlox Simiang Siyiex mawh pa rah pa see mai: krax prawng krax ca: Nawh kawx, mawh pa khaw: mai: sijax mukheu pa rah pa see heue:. 5 Nawh Cao: moh ka pui yuh kaing pa rah pa see mai: prawng ca: awm: pa khaw: pa caw mai: been li heue:. Mai: bwanson: krax pa caoxrhawm: Simiang Siyiex hoik naog ka piang haktiex khawm: bee: ma: heue:. 6 Raoma: mai: can pa koe: piang raoma: khawm: uik, Simiang Siyiex hoik yuh ka bhawm: gumlox Nawh heue:. 7 Nawh Cao: kieh rawm: sigrit sigra: khrawm: tix tau, mai: rawm: sigrit sigra: pa raux khankix, priex ka daux dee kaux heue:. 8 Kieh haktiex khawm: bieh khawm: baung lhat graung ka Simiang Siyiex awawx, kieh kawn: pui can pa ot piang hakrtiex khawm: uik, nab yam yungyi: ka Nawh Cao: heue:. 9 Grawh grawng: nawh, Simiang Siyiex ah ceu pa tix, lih mawh ceu an heue:, Nawh Cao: tawx lox mai: lih mawh heue:. 10 Simiang Siyiex tik vud ka ceu pa kum: kawng: pui tang: ceu tang: cat, mai: yieh tix tik ka krax pa keud pa sawn: kix heue:. 11 Krax pa hoik ciak Siyiex tix deuh mawh pa kaux cong: leeing: ju, mai: ceu pa hoik keud Nawh Cao: daux rhawm: Tix, kaux cong: leeing: ju leeing: phan: heue:. 12 Pui pa hoik laug Siyiex tix teei khankix, mawh sin: Nawh Cao: mai: kix koe: bwanson: heue:. 13 Simiang Siyiex ot ka piang raoma: jhak mai: yaox ka kawn: pui khawm: uik heue:. 14 Nawh Cao: ot ka dee ot Tix, jhak ka kawn: pui piang tiex khawm: uik mai: tawng ka kix heue:. 15 Nawh Cao: yuh rhawm: rhi: kix koe: mai: jhak ka pa yuh kix khawm: uik heue:. 16 Simiang kaux pui mawx ang ah, pon krax nyawm rhawm: kheu haoh hun: pui naing ang mawh, mai: cao: giex kaing: naing pa hoek krax taoh mawh kheu ting riang ting rao tix ang mawh. 17 Brung kawx mawh pa giex pa goeng, nawh ang pon taoh ka riang rao pa ting nawh. 18 Jhak heue:, ngai: Simiang Siyiex jhak ka pui pa lhat pa graung ka Nawh, mai: pui pa deuh rhawm: ka bwanson: krax pa caoxrhawm: Nawh khankix heue:. 19 Kieh kix luan khiang: krax yum, mai: kieh kix im: ju yam hot yam sibhawm: heue:. 20 Ju ex krox jun pot ka Simiang Siyiex, Nawh Cao: mawh Cao: pa teem: coi ex, mai: Cao: pa tieb tie ex heue:. 21 Mawh kheu ex deuh rhawm: ka ceukaux Nawh pa singax singeh, mai: rhawm: ex tom: koe: krax gauxrhawm: gauxrhi: ka daux Simiang Siyiex heue:. 22 Simiang Siyiex eue:, mawh kheu krox jun ex ka Maix, kieh bwanson: krax pa caoxrhawm: Maix koe: ka piang ex liak.

Simin Ting 34

Yaogyaw Ka Bwanson: Siyiex

1 Aux tak sang yaogyaw ka bwanson: Simiang Siyiex ku bawg ku yam, mai: yaogyaw ka Nawh jheeng: jheeng: heue:. 2 Ju aux deuh rhawm: ka Simiang Siyiex, mai: yaw rangdi, yam mhong: kix pui pa hot pa sibhawm: khankix, tak gauxrhawm: gauxrhi: heue:. 3 Yaogyaw bwanson: Siyiex tau mai: aux, ex yaogyaw ceukaux Nawh ting lhaong: heue:. 4 Yam sawg aux ka Simiang Siyiex, Nawh deeh pawk ka lox aux, mai: taoh aux luan khaing: pa lhat pa graung khawm: uik heue:. 5 Pui pa maong tix jhak ka Nawh Cao: khankix, pon pa riang heue:. Pakngai: kix ang hoek krax pa kaig pa tua heue:. 6 Lox kok yo pui pa hot pa sibhawm:, Simiang Siyiex nghiet lox nawh, mai: taoh nawh lih khaing: ka daux pa kharhawm: kharhi: ku ceu khawm: uik heue:. 7 Kawncau Siyiex cie Simiang, deuh tab rob vung viang kix pa lhat pa graung ka Nawh mai: taoh ka kix heue:. 8 Cim tix yaox grawng: pa mhawm: pa mhiem: Siyiex, mai: pui pa deuh rhawm: ka Siyiex, koe: bwanson: heue:. 9 Pui pa singax singeh Simiang Siyiex khankix eue:, lhat graung ka Simiang Siyiex awawx, mai: can pui pa lhat ka Nawh ang lai baox lo tid tix. 10 Kawn: sivai sangsi: khankix, cairhawm: mai: ang yaox tix ih pa ih kawx, can pui pa sawg ka Simiang Siyiex khankix, pa simie tix pon pa mhawm: pa ang kix pon ang koe: tix ceu kawx heue:. 11 Kawn: nyawm khankix eue:, hoek ka aux, mai: nghiet lox aux, aux tak sang gau pex ka been li pa lhat pa graung ka Simiang Siyiex heue:. 12 Pui mawx pa simie tix im: ju, mai: lang: ju lang: phan:, mai: pa krox jun ka singaix bawg yam pa mhawm: khankix. 13 Kieh dak tix luan khaing: pa caox pa ang mhawm:, mai: jheeh nawh kawx, paw vi ah lox pa pie pa lhen:, 14 via khaing: ceu pa caox, mai: yuh ceu pa mhawm:, mai: sawg ka pa khaw: pa caw mai: hawt leue tom: krup awawx. 15 Grawh grawng: nawh, ngai: Simiang Siyiex jhak ka piang pui rah pui see khankix, mai: yhaok Nawh nghiet ka lox pa rawg pa mhaing: kix heue:. 16 Pui pa yuh pa caox pa caig khankix, Simiang Siyiex vud ngai: khaing: kix, mai: tik vud kix, tom: kawn: pui piang haktiex ang tawng, mai: ang lai doh keud ka kix heue:. 17 Simiang Siyiex nghiet ka lox pa kok yo pui pa rah pa see khankix, mai: taoh kix lih khaing: krax pa kharhawm: kharhi: ku ceu khawm: uik heue:. 18 Siyiex ot dex mai: pui pa lauxrhawm: laux rhi: khankix, mai: Nawh taoh ka pui pa awnrhawm: awnrhi: khankix heue:. 19 Pui pa rah pa see khankix, viang kix yaox krax pa kharhawm: kharhi: tom: nie kawx, Simiang Siyiex taoh kix lih khaing: ceu an ku ceu khawm: uik heue:. 20 Nawh Cao: priex si:ang: Nawh khawm: uik mhawm: mhawm:, mai: ang kieh pot tix nyaing kawx. 21 Pui pa yuh pa caox, yum ka pa caox, pui pa koeng ka pa rah pa see khankix, yaox tix prawng ca: ka phimap phigrham: pa yuh tix heue:. 22 Simiang Siyiex, taoh ka ju siliex Nawh, mai: pui pa deuh rhawm: ka Nawh khankix, ang hoek krax prawng krax ciyang phimap tix kaux kawx heue:.

Simin Ting 35

Lox Rawg Bwan:, Son Sang Teem:

1 Simiang Siyiex eue:, Maix lah cha: ka pui pa lah cha: ka aux, Maix puing: ka pui pa puing: ka aux. 2 Teei kraung naing pa tieb tie Maix, kaoh mai: teem: coi aux liak. 3 Teei pliah mai: vaid Maix tieb tie ka pui pa hawt pheet khaix aux khankix liak, kieh daux rhawm: aux ah nin:, Maix mawh Cao: pa taoh aux heue:. 4 Pui pa sawg tix plaux ka ju aux khankix, kieh plakngai: kix hoek krax pa kaig pa tua, mai: pui pa bak tix yuh pa caox ka aux khankix, kieh deeh blak plak khaix tix, mai: koe: krax pa kaig pa tua khawm: lhat tix liak. 5 Kieh kix awm: kam: riex pa phlu: bhaung: hu:, kieh kawncau Siyiex cie Simiang hawt pheet tix tik kix liak. 6 Kieh krax hu: kix vhaik mai: nyu:, mai: kieh kawncau Siyiex cie Simiang hawt pheet tix tik kix liak. 7 Ang koe: krax koe: grawng: tid tix kawx, kix mox tix taong: kie mai: kaong: daux tiex mai: tak sang teei ju aux yum heue:. 8 Pui pa yuh nan:, yam ang kix tien tawng kieh krax laux krax leeing: hoek ka piang kix liak, mai: kieh kix deeh krix ka kie pa hoik taong: tix mai: daux tiex pa hoik kaong: kix tiru liak. 9 Phan: yuh nan:, ju aux deuh rhawm: ka Simiang Siyiex mai: koe: krax gauxrhawm: gauxrhi: heue:, deuh rhawm: ka krax pa taoh Nawh mai: gauxrhawm: gauxrhi: heue:. 10 Simiang Siyiex eue:, si:ang: aux khawm: uik ah nin:, pui mawx sang awm: Maix, Cao: Taoh pui pa hot pa sibhawm: khaing: daux tawm: taix pui pa ting riang ting rao khaing: nawh, mai: tawx krax nyawmrhawm: nyawmrhi: ka pui pa hot pa sibhawm: mai: pa cud pa cha: khankix heue:. 11 Pui pa kham: mhai: sakse: pa ang rah ang see khankix, kaoh mai: chawk ka aux grawng: pa ang aux tawng. 12 Kix deeh pawk pa caox ka ceu pa mhawm: pa yuh aux, mai: kix sang teei khawm: ju mai: kieh aux lauxrhawm: heue:. 13 Phan: mawh nan:, yam yaox kix jhawm: saux jhawm: ngia, mai: aux ceep kraung pa taing: ka maox rhix, mai: aux kieh rhawm: aux twah pa ih pa un:, mai: bwan: pa rawg aux deeh hoek ka piang naok aux heue:. 14 Aux deuh kix awm: paoxgrawm mai: puxaik, awm: pui pa khirhawm: khirhi: mai: yiem son miex tix, aux khirhawm: son kix mai: gup kaing: tix heue:. 15 Yam yaox aux krax khirhawm: khirhi:, kix khrawm: paox tix gauxrhawm: mai: yuh pa ang cee ang cak, mai: pui pa ang aux tawng khankix giex aux mai: tap toi: ka aux heue:. 16 Kix deuh aux awm: pui pa caox pa caig mai: greeik rhang: tix ka aux heue:. 17 Simiang Siyiex eue:, Maix kawn: tak sang jhak bawg yam miex grheung:? Taoh ju aux khaing: daux pa laux pa leeing:, ceu pa lheu: moh aux khaing: paox tix, taoh aux khaing: sivai sangsi: khankix liak. 18 Phan: yuh nan:, aux tak yaogyaw bwanson: Maix ka sinax pui haoh pui hun: heue:. 19 Pui pa nieb koeng giex goeng ka aux, paw kieh kix gauxrhawm: gauxrhi: ka piang aux, mai: pui pa nieb ciang khoi: ka aux, paw kieh nawh khiep ngai: tix ka aux liak. 20 Grawh grawng: nawh, kix ang chix krai lox pa yien: pa yawg ti bawg kawx, sawg kix tix krai lox pa pie pa lhen: ka pui pa ot mhawm: mhawm: khankix heue:. 21 Kix ang: jheeh tix mai: ah nin: ka aux, ha ha:, ngai: ex hoik yaox ka ceu an heue:. 22 Simiang Siyiex eue:, Maix hoik yaox ka ceu in, paw glaik yien: yawg tix, Siyiex eue:, Maix paw lai ot singai khaing: aux liak. 23 Simiang Siyiex aux eue:, siduad mai: kaoh heue:, prawng ca: ka ceu pa hoek ka piang aux liak. 24 Simiang Siyiex aux eue:, prawng ca: ka aux awm: pa rah pa see Maix liak, paw kieh kix gauxrhawm: ka piang aux liak. 25 Paw kieh kix ah nin:, ka daux rhawm: tix, ha ha:, ex hoik naog alo tix, paw peung: kieh kix ah, hoik pex ex ka nawh. 26 Can pui pa gauxrhawm: gauxrhi: yam yaox aux krax khirhawm: khirhi: khankix, kieh kix hoek krax pa kaig pa tua mai: voi plakngai: liak. Pui pa yaw ka tokaux tix, tak sang ceep kraung pa kaig pa tua, mai: laux plakngai: heue:. 27 Pui pa deuh rhawm: ka pa rah pa see khankix, kieh kix rhax lai mai: gauxrhawm: gauxrhi: liak. Mai: kieh kix ah nin: jheeng: jheeng:, kieh Simiang Siyiex khaw: rhawm: khaw: rhi: mai: tawx krax pa nyawmrhawm: nyawmrhi: mai: min: plakngai: pa ting ka siliex Nawh heue:. 28 Dak aux tak sang krai grawng: pa rah pa see Maix, mai: yaogyaw ka Maix ku singaix heue:.

Simin Ting 36

Grawng: Pa Hai Kawn: Pui

1 Pui pa koe: phimap mai: pa ang rah ang see ah nin: ka daux rhawm: tix, krax pa lhat pa graung ka Siyiex ang koe: sivoe ngai: nawh. 2 Grawh grawng: nawh, nawh yuh grang tix awm: pa ang koe: phimap pa seeing: pa brai:, mai: pa koeng ka pa caox pa caig plak sivoe ngai: tokaux tix heue:. 3 Lox pa lih khaing: jheeh nawh mawh pa seeing: pa brai: mai: pa pie pa lhen:, tik ka cuyi pingnya mai: ceu pa mhawm: pa mhiem: khankix heue:. 4 Nawh keud ceu pa caox pa caig pa ang mhawm: ka dee it tix, mai: nawh hawt ka daux krax pa seeing: pa brai:, mai: nawh ang seeing: brai: ka ceu pa caox khankix heue:.

Siyiex Mawh Pa Kied Mhawm:

5 Simiang Siyiex eue:, krax moh krax caoxrhawm: Maix hoik hoek tom: raoma:, mai: sijax mukheu: Maix hoek ka paiawm: heue:. 6 Krax pa rah pa see Maix, awm: gawng heue:, mai: krax prawng krax ca: Maix mawh pa kied raux heue:. Simiang Siyiex eue:, Maix teem: coi ka kawn: pui mai: khawm: totiag totu heue:. 7 Siyiex eue:, krax pa moh pa caoxrhawm: Maix ting lhaong: miex ding? Mai: kawn: pui deuh rhawm: ka Maix, mai: ot greem: veei pruik Maix heue:. 8 Kix tak sak mai: kluing: bee ka daux nyiex Maix, mai: Maix tak tawx kix nyaux rawm: klawng: im: ju heue:. 9 Grawh grawng: nawh, daux lih rawm: im: ju koe: mai: Maix, aux yaox pa riang ka daux pa riang Maix heue:. 10 Krax pa moh pa caoxrhawm: Maix koe: ka piang pui pa tawng ka Maix, kieh pa rah pa see Maix, koe: ka piang kix pa koe: rhawm: rah rhawm: see liak. 11 Paw kieh caong pui pa ting rhawm: ting rhi: dig ka aux liak, paw kieh taix pui pa ang rah ang see grheu: aux to: liak. 12 Pui pa yuh phimap hoik goh tan:, kix goh mai: ang lai pon tix kaoh heue:.

Simin Ting 37

Dee Sidah Krax Pui Caox Mai: Pui Mhawm:

1 Paw khirhawm: ka grawng pui caox, paw lai ghoing: ka grawng: pa yuh pui pa ang rah ang see. 2 Grawh grawng: nawh, ang lai rheung:, tak sang vawg ka kix awm: rib riem, mai: rib riem pa klai tak awm: pa kroh hu: heue:. 3 Deuh rhawm: ka Simiang Siyiex mai: yuh ceu pa mhawm: pa mhiem: heue:, ot ka daux meung Nawh mai: kaux sijax mukheu ka daux been li Nawh Cao: awawx. 4 Gauxrhawm: gauxrhi: ka daux Simiang Siyiex awawx, phan: yuh nan:, Nawh tak tawx pa grum naog awm: pa lo daux rhawm: maix khawm: uik heue:. 5 Tawx tokaux maix ka Simiang Siyiex awawx, deuh rhawm: ka Nawh Cao: awawx, phan: yuh nan:, Nawh tak teem: coi maix heue:. 6 Nawh Cao: kieh pa rah pa see maix toh awm: pa riang, mai: kieh pa rah pa see pa yuh maix jhan: riang awm: yam jung singaix heue:. 7 Ot yien: yawg tix sivoe ngai: Siyiex, mai: krox jun ka Nawh Cao: awawx, paw khirhawm: ka grawng: pui pa nieb khin: tix yuh ka maix, mai: pui pa bak tix yuh pa caox pa ang mhawm: ka maix . 8 Paw kieh songrhawm:, tik ka ceu pa songrhawm:, paw kieh rhawm: maix koe: krax phit krax lud heue:. 9 Pui pa phit pa lud khankix, tak sang yaox tix kham: ka pa tik pa vud heue:. Pui pa krox pa jun pot ka Simiang Siyiex khankix, tak pon sin: meung Nawh Cao: heue:. 10 Ang lai rheung: tix vud pui ang rah ang see ang koe:, maix sawg kix kawx ang lai yaox dee ot kix heue:. 11 Pui pa awnrhawm: awnrhi: khankix, tak pon sin: ka daux meung Nawh Cao:, mai: tak gauxrhawm: pa grum naog pa nhim: heue:. 12 Pui pa ang rah ang see khankix, greeik rhang: mai: bak tix yuh ka pui pa rah pa see khankix heue:. 13 Siyiex hoik tawng bawg yam singaix hoik hoek mai: nyia ka nawh heue:. 14 Pui pa ang rah ang see khankix, lawd vaid tix, mai: vaik ak tix, sang plaux ka pui pa hot pa sibhawm: mai: pui pa rah pa see yum heue:. 15 Viang mawh nan:, vaid kix tak deeh laig ka daux rhawm: kix, mai: ak kix kawx, tak pot heue:. 16 Kraung pa koe: pui pa rah pa see ceeix khaing: kawx, nie lheu: mhawm: khaing:, pa koe: kraung pui pa ang rah ang see tom: nie heue:. 17 Grawh grawng: nawh, plawng: taix pui pa ang rah ang see khankix, tak pot heue:. Simiang Siyiex teem: coi ka pui pa rah pa see khankix heue:. 18 Simiang Siyiex hoik tawng bawg yam singaix mai: kieh sin: ngao kix grum kaux jheeng: jheeng: heue:. 19 Yam yaox kix krax pa nu pa khawm:, ang kix lai kaig tua, mai: yam sibhawm: praix kix yaox tix ih tom: sak heue:. 20 Mai: pui pa ang rah ang see khankix, tak hoek krax laux krax leeing: heue:, pui pa koeng ka Siyiex khankix, viang mhawm: grang ka dee sax ih kix kawx, tak laux leeing: grai: hu: awm: taox ngu heue:. 21 Mai: pui pa ang rah ang see khankix, yaog yaing mai: ang lai rhawm: deeh tawx, phan: mawh pui pa rah pa see khankix, koe: krax pa caoxrhawm: mai: deeh tawx heue:. 22 Can pui pa pon bwanson: Nawh Cao: khankix, tak pon sinngao ka daux meung Nawh Cao:, can pui pa jhax pa lawg Nawh Cao: khankix, tak hoek krax pa tik pa vud Nawh heue:. 23 Simiang Siyiex jhi: daux krax pa hu: nawh, mai: Nawh khaw: rhawm: khaw: rhi: ka krax pa hu: nawh heue:. 24 Pui an viang goh kawx, ang awt hoek krax laux krax leeing:, grawh grawng: nawh, Simiang Siyiex tok taix nawh heue:. 25 Jah tom: yam awn: ju aux, tom: hoek yam kuad aux, ang sax yaox tik Maix ka pui pa rah pa see, mai: kawn: praix kix pa caung tix ih ang koe:. 26 Nawh koe: rhawm: pa chix caoxrhawm: jheeng: jheeng:, mai: tawx yaog yaing ka pui, mai: kawn: praix nawh khankix, tak pon bwanson: heue:. 27 Via khaing: ceu pa caox mai: yuh ka ceu pa mhawm: awawx, phan: yuh nan:, tak yaox tix ot kaux cong: jheeng: jheeng: heue:. 28 Simiang Siyiex khaw: rhawm: ka krax pa rah pa see, mai: Nawh ang tik ka pui pa singax singeh Nawh, Nawh Cao: tak kia: ngien ka kix jheeng: jheeng: heue:. Nawh tak tik ka kawn: praix pui pa ang rah ang see khankix heue:. 29 Can pui pa rah pa see khankix, tak pon sin: meung Nawh Cao:, mai: yaox tix ot tau mai: Nawh jheeng: jheeng: leeing: ju heue:. 30 Jheeh pui pa rah pa see, chix krai lox cuyi pingnya, mai: dak nawh kawx, chix krai lox pa rah pa see heue:. 31 Mai: gumlox been li Simiang Siyiex, ot ka daux rhawm: nawh mai: caong nawh ang cang klad ang goh heue:. 32 Pui pa ang rah ang see khankix, jawm tix pah pui pa rah pa see yum heue:. 33 Viang mawh nan:, Simiang Siyiex ang tik ka pui pa rah pa see ka daux tawm: taix pui caox an, yam chawk cheng: Nawh, ang lai hoek krax prawng ca: phimap heue:. 34 Krox jun pot ka Simiang Siyiex mai: hu: ka daux krax Nawh awawx, Nawh Cao: tak yaog maix ting mai: tawx sin: ka daux meung Nawh Cao:, mai: maix tak yaox pa laux pa som pui pa ang rah ang see khankix heue:. 35 Viang aux yaox pui pa ang rah ang see khankix, pa nieb kwang: tokaux tix, ting lhaong: awm: khaox ting khaox mhawm: kawx. 36 Khaix an nawh gah hu: mai: grai: mu: heue:, aux sawg nawh kawx ang yaox. 37 Keud ka pui pa hoik grum mhawm:, mai: jhak ka pui pa rah pa see awawx, mai: pui an tak pon pa nhim:, ju khaix tom: sidah heue:. 38 Can pui pa phit pa lud khankix, tak hoek krax laux krax leeing:, mai: pui pa ang rah ang see khankix, kix tak yaox tix kham: pa tik pa vud ju khaix heue:. 39 Krax taoh pui pa rah pa see khankix, lih hoek khaing: Simiang Siyiex, mai: mawh dee deuh rhawm: yam yaox kix krax khirhawm: khirhi: heue:. 40 Simiang Siyiex teem: coi kix mai: taoh kix, mai: Nawh Cao: taoh kix lih khaing: daux tawm: taix pui pa ang rah ang see khankix, kheu kix deuh rhawm: ka Nawh Cao: heue:.

Simin Ting 38

Lox Pa Rawg Bwan: Pui Pa Kharhawm: Kharhi: Tix Kaux

1 Simiang Siyiex eue:, viang Maix songrhawm: songrhi: kawx, paw lai deuh phimap ka aux liak. Paw lai sivied tix gau aux ka pa kied songrhawm: Maix liak. 2 Te Maix hoik laig ka aux, mai: taix Maix hoik yeen ka aux. 3 Mawh kheu lih krax pa songrhawm: songrhi: Maix, nex aux ang koe: krax nyawm ot, mawh kheu phimap aux, ang koe: krax brax krax moi:. 4 Phimap pa yuh aux hoek ka piang kaing: aux, awm: kraung pa cien pa ang aux lai pex tix klawm: heue:. 5 Mawh kheu mawh aux pui pa seeing: pa brai: mai: pon jhawm: saux pa brai: pa cux heue:. 6 Aux kied yaox tix kham: geu: dee tiem mai: ceep kraung caox mai: lai ling tix leeing: lang: singaix heue:. 7 Mai: nyoi aux pon jhawm: saux si aoh hax mai: nex aux ang koe: dee nyawm ot. 8 Rhawm: aux bih, mai: siyaung: tix mai: riag yo heue:. 9 Simiang Siyiex eue:, can pa lo aux khawm: uik hoik koe: sivoe ngai: Maix, lox pa ngia aux kawx, kieh Maix tawng heue:. 10 Rhawm: aux siyaung: mai: riang rao aux kawx, hoik grai: khaing: aux heue:. 11 Mawh kheu saux ngia aux, paox moh aux mai: paoxgrawm aux khankix cung dee singai mai: puxaik aux khankix kawx, via tix tik aux heue:. 12 Pui pa sawg ka ju aux khankix, taong: kie ka aux heue:. Mai: pui pa sawg tix yuh pa caox pa caig ka aux khankix kawx krai lox pa ang khaw: mai: nieb keud tix yuh pa caox leeing: lang: singaix heue:. 13 Phan: mawh aux yuh tix ang mhong: awm: pui pa lheet yhaok, mai: yuh tix ang chix sikah awm: pui aw: heue:. 14 Aux awm: pui pa ang chix mhong:, mai: awm: pui pa ang chix pawk lox sikah heue:. 15 Grawh grawng: nawh, Simiang Siyiex eue:, aux deuh rhawm: ka Maix pa mawh Siyiex aux, deeh pawk ka lox aux liak. 16 Phan: ang mawh nan:, ha kix kox gauxrhawm: ka piang aux, yam cangklad aux, pui pa ot tang: plak khankix, 17 ha kix kox yaw tokaux tix ah nin:, yam dex goh aux, mai: yam saux yam ngia aux doh deud kah heue:. 18 Aux krai doh ka phimap tix, aux khirhawm: khirhi: kheu hoik yuh aux phimap tix heue:. 19 pui pa koeng ka aux khankix, kix nyawm ot mai: ting riang ting rao, mai: pui pa koeng ka aux ka daux pa ang mawh ang meh kawx, kied haoh kied hun: heue:. 20 Mawh kheu yuh aux pa mhawm:, mai: ceu pa rah pa see kix deeh tawx pa caox ka pa yuh aux pa mhawm: heue:. 21 Simiang Siyiex eue:, paw lai tik vud aux liak, Siyiex eue:, paw lai ot singai khaing: aux liak. 22 Siyiex Cao: pa taoh ka aux eue:, nied Maix lih teem: coi ka aux liak.

Simin Ting 39

Pui Pa Kharhawm: Kharhi: Tix Kaux Krai Doh Ka Phimap Tix

1 Aux ah nin:, aux yuh satix mai: priex rhawm: ka dak tix son ang lai phit lud, yam ot pui pa ang rah ang see sivoe ngai: aux, mai: aux thox jheeh tix ang ah lox tid tix heue:. 2 Ang aux lai sikah awm: pui aw:, pie lox ceu pa mhawm: kawx, ang aux krai, viang mawh kawx nan:, krax pa lauxrhawm: aux nie kin: heue:. 3 Ka daux rhawm: aux hoik si aoh yam keud aux tokaux tix, lih hax awm: rop ngu heue:. 4 Simiang Siyiex eue:, kieh aux tawng tom: sidah krax, ka grawng: ju aux, mai: son sang tawng aux grawng: pa chix laux chix leeing: tokaux tix heue:. 5 Jhak heue:, Maix hoik kieh ju aux dawd, mai: ju aux kawx ang mawh tid tix, sivoe ngai: Maix, phan: mawh kawn: pui, viang nawh ting lhaong: kawx, mawh pa giex pa goeng heue:. 6 Phan: mawh kawn: pui awm: ngie kawn: peue:, mai: kharhawm: kharhi:, ang koe: bwanson: tid tix, viang kix khrawm: tix deuh kraung khrai: kawx, ang kix tawng ka pui sang pon heue:. 7 Simiang Siyiex eue:, yam in aux krox jun pot ka ceu pa tix? krax krox krax jun pot aux, koe: ngie ka daux Maix khaing: heue:. 8 Taoh aux lih khaing: phimap pa phit pa lud tix liak, paw kieh pui pa caox khankix, map mai: sa lao ka aux liak. 9 Mawh kheu grawng: kaing pa yuh Maix, aux tom: ang lo tix ah tid tix heue:. 10 paw nyang ciyang ka aux ha:, aux ot daux tawm: taix pa sivied Maix tix gau, mai: riang rao aux hoik uik heue:. 11 Maix sivied tix ciyang ka kawn: pui, mawh kheu phimap nawh, Maix kieh min: plakngai: pa khaw: rhawm: kix grai: hu:, awm: kawng pa chix yuh laux mai: kawn: pui khawm: uik mawh pa giex pa goeng heue:. 12 Simiang Siyiex eue:, nghiet ka lox pa rawg pa mhaing: aux, mai: veeh yhaok Maix nghiet ka lox pa kok yo aux liak, paw lai jhak ka rawm: ngai: aux, aux mawh ngie nyo sinie sivoe ngai: Maix, awm: ju tax du ex khankix heue:. 13 Veeh pak ngai: Maix ka aux son sang nyawm rhawm: rhi: aux, tom: ang aux nyang gah hu: mai: grai: hu: liak.

Simin Ting 40

Lox Rhax Yaogyaw

1 Aux krox jun pot ka Simiang Siyiex, mai: Nawh veeh plakngai: ka aux, mai: nghiet ka lox pa kok yo aux heue:. 2 Nawh cao: taoh aux lih khaing: daux tiex mai: daux glaox pa caox pa caig heue:. Mai: deuh caong aux ka piang rang: ting, mai: kieh rhoi: khaix caong aux kaux cong: heue:. 3 Nawh Cao: teei lox rhax pa khraox sau: ka daux jheeh aux, son sang yaogyaw ka Siyiex heue:. Yam pui haoh pui hun: yaox, kix lhat graung mai: deuh rhawm: ka Simiang Siyiex heue:. 4 Pui pa deuh rhawm: ka Simiang Siyiex, mai: pa via hu: khaing: pui pa ting rhawm: ting rhi:, mai: pui pa krub rieng krub rao khankix koe: bwanson: heue:. 5 Simiang Siyiex aux eue:, ceu pa daox pa am: mai: pa keud Maix son ex, kied haoh kied hun: heue:, mai: ceu pa yiag pa bak Maix tix deuh sivoe ngai: Maix ang doh uik, phan: aux krai grawng: ceu pa yuh Maix, kied haoh kied hun:, tom: ang aux lai uik simin heue:. 6 Maix ang simie tix cie ka kraung ceu pa tan pa lu, aux hoik paoh yhaok tix, mai: ang rawg ka kraung ceu pa gleeing tix tawx son sang ploi: phimap phigrham:. 7 Aux tak sang hu: heue:, awm: pa hoik tiem: aux tix deuh grawng: aux, daux bua: Phuk Lai heue:. 8 Siyiex aux eue:, aux kied gauxrhawm: gauxrhi: son sang hawt yuh alo Maix, gumlox been li Maix kawx, ot ka daux rhawm: rhi: aux heue:. 9 Aux hoik sidiex gumlox pa rah pa see Maix, sinax pui haoh pui hun: hankix heue:. Simiang Siyiex eue:, Maix hoik tawng grawng: pa ang aux thox jheeh tix heue:. 10 Lox been li pa rah pa see Maix kawx, ang aux lai mox ka daux rhawm: tix, mai: aux hoik sidiex grawng: krax taoh Maix mai: pa kaux sijax, krax moh krax rhawm: mai: pa kaux sijax Maix, aux ang lai mox sinax pui haoh pui hun: khankix heue:. 11 Simiang Siyiex eue:, paw gun krax pa caoxrhawm: pa moh Maix ka aux liak, mai: krax pa caoxrhawm: Maix, mai: sijax mukheu Maix kia: ngien ka aux jheeing: jheeng: liak.

Lox Rawg Bwan: Son Sang Teem:

12 Grawh grawng: nawh krax khirhawm: haoh hun: tom: ang uik tawng hoik rob vung viang aux heue:. Phimap hoik krup ka aux tom: ang aux pon jhak, nie lheu: khaing: hauk kaing:, mai: rhawm: rhi: aux hoik iak hu: heue:. 13 Simiang Siyiex eue:, Maix taoh ka aux liak, Simiang Siyiex eue:, nied tix teem: coi ka aux liak. 14 Pui pa sawg tix plaux ju aux khankix, kieh kix kaig tua mai: laux plakngai: liak, pui pa simie tix yuh pa caox ka aux khankix, kieh kix lhat mai: hoek krax pa kaig pa tua liak. 15 Can pui pa ah nin: ka aux, ha ha:, ha ha:, kieh voi rhawm: rhi: mai: hoek krax pa kaig pa tua liak. 16 Can pui pa sawg ka Maix khankix, kieh kix gauxrhawm: gauxrhi: ka daux Maix liak, can kix pa khaw: rhawm: khaw: rhi: ka bwanson: krax taoh Maix, mai: kix ah nin:, kieh min: plakngai: Simiang Siyiex ting lhaong: jheeng: jheeng: liak. 17 Phan: mawh aux viang aux hot sibhawm: kawx, Siyiex kawn: doh keud ka aux heue:, Maix mawh Cao: pa teem: coi aux, mai: taoh ka aux heue:, Siyiex aux eue:, paw lai koi.

Simin Ting 41

Lox Rawg Bwan: Pui Saux Tix Kaux

1 Pui pa doh keud doh sawn: ka pui pa hot pa sibhawm: khankix ting bwanson: heue:. Simiang Siyiex kieh nawh luan ka bawg yam singaix pa nu pa khawm: heue:. 2 Simiang Siyiex tak teem: coi ka nawh, mai: kieh ju nawh nyawmrhawm: nyawmrhi: mai: nawh tak sang pon bwanson: ka daux meung Nawh Cao: heue:. Mai: Maix ang tawx nawh ka pui pa koeng ka nawh khankix. 3 Simiang Siyiex tak sang joh jhan: teem: coi ka nawh, yam saux yam ngia nawh, mai: Siyiex cox dee it nawh heue:. 4 Aux ah nin:, "Simiang Siyiex eue:, caoxrhawm: ka aux liak, mai: kieh jhawm: saux ju aux moi: liak, mawh kheu hoik phit hoik lud aux ka Maix heue:". 5 Pui pa koeng ka aux khankix, krai lox map ka aux, nawh tak yum mai: ceukaux nawh grai: lai mawx? 6 Yam hoek nawh tix jhak ka aux, nawh ah lox pie lox lhen: heue:, ka daux rhawm rhi: nawh, keud tix krai grawng: pa ang mhawm: yam lih hu: nawh heue:. 7 Can pui pa koeng ka aux khankix, ot tang: plak mai: krai lox supsiep ka paox tix, tix kaux hoik tix kaux, mai: keud pa ang mhawm: ang mhiem: ka piang aux heue:. 8 Mai: kix nieb ah nin:, nawh hoik goh mai: ang tau tix deeh pon kaoh tix bawg kawx heue:. 9 Paox grawm pa yumrhawm: aux, pa ih khaomun aux, yaog caong tix tiied ka aux heue:. 10 Simiang Siyiex eue:, caoxrhawm: ka aux, kieh aux deeh kaoh, son sang deeh viied aux tix pawk phimap kix liak. 11 Son ang pui pa koeng ka aux khankix pex aux, teem: coi ka aux liak, mai: kieh aux tawng grawng: pa moh Maix aux heue:. 12 Maix hoik teem: coi mai: kieh aux grum koe: mai: tawx dee ot aux sivoe ngai: Maix leeing: ju leeing phan: heue:. 13 Kieh Simiang Siyiex ceu pui Isarilax koe: bwanson: leeing: ju leeing: phan: liak. Amen, Amen.

Simin Ting 42 Baux Ra:

Lox Rawg Bwan: Pa Ot Ka Daux Haktiex Praix Pui Tix Kaux

1 Siyiex eue:, awm: krox jun cak ka rawm: klawng: pa si kiied, mai: ju aux kawx, krox jun pot ka Maix heue:. 2 Ju aux simie ka Siyiex pa im: ju, (awm: pa simie tix sawm:) aux tak sang hoek tix jhi: plakngai: aux sivoe ngai: Maix lai mawx? 3 Rawm: ngai: aux lih tix mawh pa ih aux ku singaix ku sawm: ang jud heue:. Mai: pui tang: kaux ca: chawk ah nin: ka aux, Siyiex maix koe: dee mawx? 4 Yam doh keud aux ka ceu an khankix, aux khrup rhawm: heue:, grawh grawng: nawh, yam rom aux tix hu: tau mai: pui haoh pui hun:, mai: ah lox gauxrhawm: gauxrhi:, mai: lox rhax yaogyaw mai: thong: pui haoh pui hun: khankix hu: ka daux nyiex Siyiex heue:. 5 Ju aux eue:, mawh kheu pa tix rhawm: maix iak hu: yuh nin: yuh ka mawx? Mawh kheu pa tix maix ang ot yien: yawg tix ka daux aux yuh ka mawx? Krox jun pot ka Siyiex awawx. Aux tak sang ah lox rhax yaogyaw bwanson: Siyiex pa krub aux, mai: Cao: pa taoh aux tix bawg heue:. 6 Siyiex eue:, ju aux hoik iak riang hu: ka daux aux heue:. Grawh grawng: nawh, aux doh keud ka Maix ka praok rawm: klawng: Yawdan mai: ka piang gawng Heramon mai: gawng Mizarax heue:. 7 Rawm: sigrit sigra: pa raux tix mu: hoik tix mu:, mai: pukpak rawm: sinum siaox khankix, hoik kheem: ka aux heue:. 8 Viang mawh kawx nan:, yam pon singaix Siyiex caoxrhawm: tawx bwanson: mai: yam ponsawm: kawx, rhax lai yaogyaw ka siyiex Cao: ju aux, ot mai: aux heue:. 9 aux ah nin:, ka Siyiex pa mawh Rang: ting aux, mawh kheu pa tix Maix lai piawm: aux, yam yaox aux tix kham: geu: krax tuktiak tukte:, mai: pui pa koeng ka aux, mai: yam yaox aux tix ceep kraung pa caox pa blai yuh ka mawx? 10 Pui pa koeng ka aux khankix, ca: chawk ah nin: ka aux, Siyiex maix koe: dee mawx? Mai: kix sa lao ka aux mai: simie tix raig si:ang: aux pot heue:. 11 Ju aux eue:, mawh kheu pa tix rhawm: maix iak hu: yuh nin: yuh ka mawx? Mawh kheu pa tix maix ang ot yien: yawg tix ka daux aux yuh ka mawx? Krox jun pot ka Siyiex awawx. Aux tak sang ah lox rhax yaogyaw bwanson: Siyiex pa krub aux, mai: Cao: pa taoh aux tix bawk heue:.

Simin Ting 43

Lox Rawg Bwan: Pui Pa Ot Meung Pui

1 Siyiex eue:, prawng ca: ka see: aux, mai: teem: coi aux ka pui pa ot tang: plak pa ang koe: krax caoxrhawm: liak, mai: taoh aux luan khaing: tawm: taix pui pa ang kaux sijax mai: pui pa ang rah ang see liak. 2 Maix mawh Siyiex dee deuh aux rhawm: heue:, mawh kheu pa tix Maix lai tik vud aux, yam yaox aux tix kham: geu: krax pa tuktiak tukte: pui pa koeng ka aux, mai: yam yaox aux tix ceep kraung pa caox pa blai yuh ka mawx? 3 Ploi: pa riang Maix mai: pa kaux sijax Maix lih hoek liak, mai: thong: kix hu: ka piang gawng Maix pa singax singeh, mai: thong: aux hu: ka daux nyiex bwan: Maix liak. 4 Phan: yuh nan:, aux tak hoek ka khu: dee tan Maix, mai: gauxrhawm: gauxrhi: tix hoek ka dee ot Maix, mai: tah ting: ah lox rhax yaogyaw ka Siyiex aux heue:. 5 Ju aux eue:, mawh kheu pa tix rhawm: maix iak hu: yuh nin: yuh ka mawx? Mawh kheu pa tix maix ang ot yien: yawg tix ka daux aux yuh ka mawx? Krox jun pot ka Siyiex awawx. Aux tak sang ah lox rhax yaogyaw bwanson: Siyiex pa krub aux, mai: Cao: pa taoh aux tix bawg heue:.

Simin Ting 44

Lox Rawg Bwan: Son Sang Priex

1 Siyiex eue:, ex hoik mhong: kaing pa yuh Maix ka ju tax du ex didix. 2 Maix hoik teei taix Tix, mai: sigrheu: ka pui tang: ceu tang: cat khankix, mai: tawx dee ot ka tax du ex khankix heue:, Maix tuktiak tukte: ka pui tang: ceu khankix mai: kieh pui tax du ex khankix pre haoh hun: heue:. 3 Kix teei vaid mai: kwang: haktiex ang mawh, kix teei plawng: taix tix, taoh ka tokaux tix ang mawh, mawh kheu koe: alo Maix, mai: Maix teei taix khawn: dawm: Maix mai: pa riang pakngai: Maix taoh ka kix heue:. 4 Siyiex eue:, Maix mawh Simiang Khunhawkham aux heue:. Prawng ca: mai: taoh ka aux ceu pui Yakop liak. 5 Aux deuh rhawm: ka Maix, mai: nyhot tix tik ka pui pa koeng ka aux heue:. Aux deuh rhawm: ka ceukaux Maix, mai: dig ka pui pa koeng ka aux khankix heue:. 6 Ang aux deuh rhawm: ka ak viex tix, mai: vaid aux kawx, ang pon tix taoh aux. 7 Mawh Maix khaing: pa pon tix taoh aux luan khaing: pui pa koeng ka aux khankix heue:. Maix kieh pui pa koeng ka aux khankix hoek krax pa kaig pa tua heue:. 8 Aux yaw rangdi ka daux Siyiex, leeing: lang: singaix mai: yaogyaw ceukaux Maix jheeng jheeng heue:. 9 Viang mawh kawx nan:, Maix tik aux mai: kieh aux kaig tua, mai: ang hu: tau mai: kru naing aux khankix. 10 Mai: kieh aux deeh dak khaix, sivoe ngai: pui pa koeng ka aux khankix, mai: pui pa koeng ka aux khankix hoik rud rhim: tix teei pa simie kix tix teei khawm: uik heue:. 11 Maix hoik teei tix tawx aux ka kix awm: kawn: yung: pa sang pah tix ih, mai: hoik kieh pungprang: hu: sinax pui tang: ceu tang: cat heue:. 12 Maix ang teei ngawh mai: hoik coh ka pui Maix, pa coh Maix ang koe: krax pa mi pa koe:, mai: ang chix haok chix hwan: heue:. 13 Pa yuh Maix ka ex kieh pui pa ot paox plawg paox nyhawm: salao mai: pui pa ot dex sivie sivheng: ex nyiah mai: kaig tua heue:. 14 Pa yuh Maix ka ex kieh pui tang: ceu tang: cat map ka ex, mai: kieh cub pui haoh pui hun: vuk vied kaing: ka ex heue:. 15 Aux laux min: plakngai: leeing: lang: singaix, mai: krax pa kaig pa tua aux koe: sivoe ngai: aux heue:. 16 Grawh grawng: nawh aux mhong: lox map, lox pa sa pa lao mai: lox bak lox viang pui pa koeng khankix heue:. 17 Viang ex yaox tix kham: niex ding niex dod kawx, ang ex doh piawm: Maix, mai: ang tik ka sijax mukheu Maix. 18 Rhawm: aux ang deeh ka plak khaix, mai: ang lud hu: khaing: krax been li Maix. 19 Phan: mawh Maix teei tix tik dee ot sox praix mai: kheem: ex ka veei krax yum heue:. 20 Phan: ex piawm: ka ceukaux Siyiex ex, mai: phan: nyeu taix tix ka siyiex pui tang: ceu tang: cat khankix. 21 Phan: Maix ang chawk cheng: ka kaing pa yuh ex khex chix lie? Grawh grawng: nawh, Maix hoik tawng ceu pa mox ka daux rhawm: tix khawm: uik heue:. 22 Mawh kheu son Maix, ex yaox tix kham: yum jheeng: jheeng:, mai: pui tang: kaux deuh ex awm: kawn: yung: pa sang pah heue:. 23 Siyiex eue:, siduad heue:, mawh kheu pa tix, Maix lai laig it , kaoh heue:, paw lai tik ka ex jheeing: jheeing: liak. 24 Mawh kheu pa tix Maix vud plakngai: khaing: ex, mai: Maix piawm: ex yam yaox ex krax kharhawm: kharhi: mai: krax pa tuktiak tukte: yuh ka mawx? 25 Ju ex hoik rau hu: tom: sidaing: tiex, mai: tokaux aux kawx, hoik cux ka piang tiex heue:. 26 Kaoh mai: teem: coi ka ex liak, mai: taoh ex ka daux krax moh krax caoxrhawm: Maix liak.

Simin Ting 45

Lox Rhax Pa Yuh Simiang Ka Paox

1 Lai pa tiem: aux, ah lox rhax ka paox plak sivoe ngai: Simiang khunhawkham, rhawmrhi: aux kied naog krax gauxrhawm: gauxrhi: heue:. Mai: dak aux kawx sidaing: chix ah awm: gawng: nammeug pui pa chix tiem: lai tix kaux heue:. 2 Maix lheu: mhawm: khiang: paox kawn: pui heue:, jheeh Maix hoik naog ka lox bwanson: heue:. Mawh kheu in Siyiex tom: tawx bwanson: ka maix jheeng: jheeng: heue:. 3 Simiang pa ting siawp sibrawm eue:, teei vaid min: plakngai: Maix pa ting mai: kawg heue:. 4 Kieh siawp sibrawm Maix pex hu:, mai: brug hu: ka lox pa mawh pa meh mai: lox pa awn: pa tiem, mai: lox pa rah pa see liak, taix khawn: dawm: Maix tak sang jhi: ka ceu pa lhat pa graung heue:. 5 Mawh kheu kied lawm te Maix, mai: laig ka daux rhawm: rhi: pui pa koeng ka Simiang khunhawkham khankix, mai: kix goh greem: caong Maix heue:. 6 Siyiex eue:, dangngeung Maix mawh dangngeung pa kaux pa cong: leeing: ju leeing: phan: heue:. Mai: meung Maix mawh pa rah pa see heue:. 7 Maix moh ka ceu pa rah pa see, mai: koeng ka pa ang rah ang see heue:. Mawh kheu in, Siyiex eue:, mai: Siyiex maix yaog maix nie lheu: ting khaing: paox grawm maix khankix, mai: hoik groi rawm: bee pa gauxrhawm: gauxrhi: ka maix heue:. 8 Muran, acaw , mai: khaox caihung:, pa sioe: baux hoik bhawng: ka kraung ceep mai: lox tah ting: rhax lai yaogyaw ka maix kieh maix gauxrhawm: gauxrhi:, ka daux nyiex haw: pa hoik yuh maix ka nga sang: heue:. 9 Kawn: bon: Simiang khunhawkham khankix ku dah, ot tau mai: kawn: bon: Simiang, mai: plak taix khawn: dawm: maix, moeng maix nanghawkham ceep kraung khri: (awfirax) mai: cung tix heue:. 10 Kawn: bon: eue:, nghiet heue:, veeh yhaok tix mai: keud mhawm: mhawm:, piawm: ka ceu pui maix, mai: nyiex ma: miex keeing: maix awawx. 11 Phan: yuh nan:, Simiang khunhawkham tak moh ka maix, mawh kheu mhawm: grang maix mai: nawh hoik mawh Simiang maix, mai: krub ka Nawh heue:. 12 Jah ka kawn: bon: Simiang veng Turux, mai: cub pui mag pui mi khankix, viex khawngphak laksawng: mai: hoek tix rieb ka maix heue:. 13 Mai: kawn: bon: Simiang khunhawkham khankix, koe: min: plakngai: mai: ceep kix kraung pa hoik yuh ka khri: heue:. 14 Khaix hoik ceep kix kraung pa mhawm: grang ka nawh, hu: tau mai: paox bon: krih nawh, mai: viex nawh hu: ka Simiang khunhawkham heue:. 15 Kix viex ceu pa gauxrhawm: gauxrhi: mai: laig ka daux nyiex haw: Simiang khunhawkham heue:. 16 Son keeing: khankix, Maix hoik ciak tix deuh ka kawn: praix kix, son sang mawh Simiang ka piang haktiex khawm: uik heue:. 17 Aux tak sang teei ceukaux Maix tah hu: ka kawn: pui khankix, mai: ceu kawn: pui tix ju hoik tix ju, mai: kawn: pui khankix yaogyaw ka Maix ku ju leeing: ju leeing: phan: heue:.

Simin Ting 46

Siyiex Ot Mai: Ex

1 Simiang Siyiex mawh dee deuh ex rhawm:, mai: tawx riang rao ka ex, mai: teem: coi ka ex yam yaox krax pa khirhawm: khirhi: heue:. 2 Mawh kheu in viang haktiex gah greed hu:, mai: gawng lua yungyiang: hu: ka daux rawm: sigrit sigra: kawx, mai: rawm: sigrit sigra: sinum siaox mai: sigu: hu: kawx, 3 mai: pukpak rawm: haok hwan:, mai: gawng lua khankix yungyiang: hu: kawx, aux ang lhat heue:. 4 Koe: rawm: klawng: tix mu:, mai: rawm: klawng: an, mawh dee ot Siyiex Cao: pa ting pa lhaong:, mai: veng pa singax singeh dee gauxrhawm: heue:. 5 Siyiex ot ka daux veng an, mai: veng an ang lai yungyiang: mai: Siyiex teem: coi ka nawh, tom: yam jah praix tix riang heue:. 6 Ceu kawn: pui khankix, lawh maw: cuci:, mai: haktiex khankix yungyiang:, mai: Siyiex ploi: lox Tix lih, mai: haktiex ceh hu: awm: rawm: heue:. 7 Simiang Siyiex Cao: kru naing raoma: ot tau mai: ex, mai: Siyiex ceu pui Yakop mawh dee deuh ex rhawm: heue:. 8 Hoek tix jhak ka pa yuh Simiang Siyiex, haktiex laux leeing: heue:. 9 Mai: Nawh Cao: raig ak mai: pliah pot, baux mawx baux an, mai: teei ngu gleeing tix tik ka ling: khankix, mai: kieh naing yien: tom: sidah haktiex khawm: uik heue:. 10 Ot yien: yawg mai: kieh pex tawng, grawng: mawh Aux Siyiex awawx. Aux mawh Siyiex pa ting siawp sibrawm piang kawn: pui mai: piang haktiex khawm: uik heue:. 11 Simiang Siyiex Cao: kru naing raoma: ot tau mai: ex, mai: Siyiex ceu pui Yakop mawh dee deuh ex rhawm: heue:.

Simin Ting 47

Cao: Pa Giex Kaing: Pa Ting Siawp Sibrawm

1 Ceu kawn: pui khawm: uik eue:, dieh taix tix awawx, ah lox sinum mai: kok yo ka Siyiex awawx. 2 Grawh grawng: nawh Simiang Siyiex mawh Cao: pa ting pa lhaong: khaing: khawm: uik, mai: mawh Siyiex pa caw ex tix lhat graung kah, mai: Nawh mawh Simiang Khunhawkham pa giex kaing: ka piang haktiex khawm: uik heue:. 3 Nawh Cao: teei tix deuh ceu pui khankix ka greem:, mai: cub pui ku cub, deuh ka greem: caong ex heue:. 4 Nawh Cao: laug tix teei ka Yakop pa moh Nawh, son sang mawh Sin: min: plakngai: son ex heue:. 5 Simiang Siyiex kok yo lox pa gauxrhawm: gauxrhi:, mai: lox phlu: teet tawng mai: haok heue:. 6 Ah lox rhax mai: yaogyaw ka Siyiex awawx, mai: ah lox rhax yaogyaw ka Simiang khunhawkham mai: ah lox rhax awawx, ah lox rhax heue:. 7 Grawh grawng: nawh Siyiex mawh Cao: pa giex kaing: piang haktiex khawm: uik, ah lox rhax yaogyaw ka Nawh heue:. 8 Siyiex giex kaing: piang ceu kawn: pui khawm: uik, mai: Nawh Cao: ngawm ka piang dangngeung Nawh, pa singax singeh heue:. 9 Kuad song: nong: yu cub pui ku cub khawm: uik, khrawm: paox tix hoek ka kawn: praix Siyiex Abraham heue:, grawh grawng: nawh, kraung pa tieb tie mawh kraung cie Siyiex mai: kieh Nawh mawh Cao: pa ting pa lhaong: heue:.

Simin Ting 48

Veng Zion Cie Siyiex

1 Simiang Siyiex mawh pa ting pa lhaong: mai: khaw: tix yaogyaw ka Siyiex pa ot ka piang gawng dee singax singeh ka daux veng Nawh heue:. 2 Gawng Zion mawh pa lhaong: mai: pa mhawm: grang mai: mawh dee gauxrhawm: gauxrhi: ka piang haktiex khawm: uik, ka daog plak laong: mawh dee koe: veng Simiang Khunhawkham pa ting pa lhaong: heue:. 3 Siyiex kieh tawng, Nawh mawh dee deuh rhawm: ka daux nyiex an heue:. 4 Jhak heue:, Simiang khunhawkham khankix, hoek tix kum: kawng: mai: paox tix heue:. 5 Mai: yam yaox, kix kied daox kied am:, lhat yaoh, mai: to: hu: heue:. 6 Kix kied lhat kied graung ka veng an, mai: yaox krax kharhawm: kharhi: awm: bon: pa sang keh heue:. 7 Maix teei bhaung: plak lih singaix, mai: kieh raig tix tik ka nyiex reu ting veng Tasux heue:. 8 Awm: pa hoik sax mhong: ex, ex hoik pon tix yaox ka veng Simiang Siyiex Cao: kru naing raoma: pa mawh Siyiex ex heue:, Mai: Siyiex tak kieh veng an kaux cong: leeing: ju leeing: phan: heue:. 9 Siyiex eue:, ex doh keud doh sawn: ka bwanson: krax moh krax rhawm: Maix, ka daux nyiex bwan: Maix heue:. 10 Siyiex eue:, awm: hoik tah hu: ceukaux Maix ka piang haktiex tom: sidah, min: plakngai: Maix kawx, kieh sidah heue:. Mai: taix khawn: dawm: Maix hoik grum naog ka been li pa rah pa see heue:. 11 Mawh kheu krax pa prawng ca: Maix, gawng Zion mai: kawn: bon: Yudax khankix, gauxrhawm: gauxrhi: heue:. 12 Hawt rob vung viang veng Zion mai: simin tix deuh ka nyiex pa ting pa lhaong: khankix, 13 mai: een: tix tawng ka guh veng nyiex haw:, son sang pon tix krai ka ju kawn: praix khankix heue:. 14 Grawh grawng: nawh, Siyiex ex mawh Siyiex leeing: ju leeing: phan: heue:. Mai: Nawh Cao: tak sang thong: ex hu: tom: sidah yum heue:.

Simin Ting 49

Pui Daox Pa Deuh rhawm: Ka Mau Khri:

1 Ceu kawn: pui khwm: uik eue:, nghiet heue: awawx. 2 Kawn: pui piang haktiex khawm: uik, pa iak pa ting ang ah pa mi pa hot ang ah, khrawm: paox tix nghiet awawx. 3 Jheeh aux krai lox cuyi pingnya, mai: rhawmrhi: aux keud sawn: ka pa dex pa dawd mai: cuyi pingnya heue:. 4 Aux veeh yhaok tix nghiet ka lox been mai: tah ting: mai: plak jhi: grawng: ceu pa raux pa mox heue:. 5 Yam hoek bawg yam pa nu, pa caox pa caig, mai: yam hoek rob pui pa caox pa caig khankix kawx, aux tak lhat ka ceu pa tix? 6 Pui pa deuh rhawm: ka kraung khrai: tix, mai: kix yaw tix, kheu kied haoh kraung khrai: kix heue:. 7 Kaux pui mawx ang ah, ang doh pon taoh ka puxaik tix, mai: son sang taoh, ang doh pon tawx ngawh ka Siyiex. 8 Son sang taoh ka ju kix mawh pa kied ngawh pa kied ting jum heue:. Phan: yuh nan:, ju kix tak som nai: giex heue:. 9 Pui ang pon taoh ka ju, son sang im: leeing: ju, mai: son ang lai hoek ka daux simeeig heue:. 10 Nawh yaox yuh nin:, pui pa koe: cuyi pingnya kawx chix yum awm: an, pui pa daox pa aw: pa koe: rhawm: tosat kawx, chix laux chix leeing: mai: kraung khrai: kix, prah ka pui tang: kaux tang: hak heue:. 11 Kix keud daux rhawm: tix, nyiex kix mai: dee ot dee koe: kix mawh pa kaux pa cong: leeing: ju, mai: ceukaux kix ao: min: ka piang haktiex heue:. 12 Viang mawh kawx nan:, min: plakngai: kix, ang lai chix kaux chix cong:, mai: nawh chix laux chix leeing: awm: pa laux tosat heue:. 13 Kix deuh rhawm: tix ka daux pa yuh nan:, mai: pui khankix nghiet lox sikah kix heue:. 14 Grheu: kix lih hu: ka daux meung yum, awm: cub yung:, mai: Simiang meung yum, tak sang ih kix heue:, mai: pui pa rah pa see khankix, giex kaing: kwang: kix been tix ngawb mai: tokaux dee ot kix, dee tieh loh mai: dee ot kix mawh meung yum heue:. 15 Phan: mawh aux, Siyiex priex aux, mai: taoh ju aux khaing: siawp sibrawm meung yum heue:. 16 Yam yaox maix mag mi pui mai: koe: mau koe: khri:, mai: ting min: plakngai: haok hwan: nyiex ma: nawh, paw kieh rhawm: maix ghoing: kah heue:. 17 Yam yum nawh, kraung khrai: nawh, mai: min: plakngai: nawh, ang lai pon tix viex hawt khaix nawh tix ceu kawx heue:. 18 Yam kawn: im: ju nawh, nawh chix yaw ka tokaux tix, mai: yam yuh nawh kaing son tokaux tix, pui yaogyaw ka nawh heue:. 19 Viang mawh kawx nan:, nawh tak sang hu: ka dee ot tax du (Yadie kix) heue:, mai: kix ang yaox ka pa riang leeing: ju leeing: phan: heue:. 20 Pui pa grum naog ka min: plakngai: mai: pa ang koe: cuyi pingnya khankix, awm: tosat pa hoek krax pa laux pa leeing: heue:.

Simin Ting 50

Krub Ka Daux Pa Rah Pa See

1 Simiang Siyiex Cao: pa ting siawp sibrawm, tawx lox ka haktiex plak lih singaix tom: sidah plak klip singaix heue:. 2 Pa riang Siyiex, pa jhan: riang pa grum ceu pa mhawm: grang, lih ka piang gawng Zion heue:. 3 Siyiex ex hoik hoek mai: Nawh Cao: ang ot yien: yawg tix, ngu hax sivoe ngai: Nawh Cao:, mai: hawt dex sivie sivheng: Nawh, koe: lhiex ting mai: bhaung: ting heue:. 4 Nawh Cao: kok ka raoma: mai: haktiex, son sang chawk cheng: tix prawng ca: ka pui Nawh khankix, mai: ah nin:, 5 "Kieh pui pa moh Aux, mai: pa hoik tan hoik lu pa hoik yuh sijax mukheu mai: Aux, khrawm: paox tix hoek ka Aux heue:." 6 Raoma: khankix, plak jhi: grawng: pa hoik yuh Nawh Cao: pa rah pa seeh, mawh kheu tokaux Siyiex mawh Cao: pa prawng ca: pa rah pa see heue:. 7 Pui Aux khankix eue:, nghiet heue: awawx, Aux tak sang krai heue:, ceu pui Isarilax eue:, Aux tak kham: sakse: plak pex heue:. Aux mawh Simiang Siyiex pex heue:. 8 Aux ang deuh phimap ka pex, grawng: pa gleeing pex tix tan lu, mai: pa tan pa lu pex ku ceu, hoik koe: sivoe ngai: Aux jheeng: jheeng: heue:. 9 Aux ang mhaing: tix cie moi daux nyiex maix, mai: pex mhaing: pa koe: daux kawg maix. 10 Mai: totiag totu, mai: tosat, kaing: pak, kaing: rheng:, mai: pa ot ka piang gawng khankix mawh cie Aux khawm: uik heue:. 11 Aux tawng sim: pa ot ka piang gawng khankix khawm: uik, mai: totiag totu khankix, ot mai: Aux heue:. 12 Phan: Aux cairhawm: Aux ang krai ka maix, haktiex mai: can pa koe: ka haktiex mawh cie Aux heue:. 13 Khex tak sang ih Aux nex moi lie? Khex tak sang nyaux Aux nham: pex lie? 14 Tan lu ceu pa yaogyaw bwanson: ka Siyiex awawx. Mai: tawx ceu pa tan pa lu maix ka Siyiex Cao: pa ting pa lhaong: awm: pa hoik deuh maix sijax mukheu awawx. 15 Yam hoek krax khirhawm: khirhi: kok yo ka Aux, mai: Aux tak taoh maix heue:. Maix tak yaogyaw ka min: plakngai: Aux heue:. 16 Siyiex ah nin: ka pui pa ang rah ang see khankix, maix chix krai ka lox been li Aux, mai: sijax mukheu Aux, dex dawd mai: maix yuh ka mawx? 17 Maix koeng ka lox pa sidiex gau Aux, mai: tik lox Aux plak khaix tix ang mawh lie? 18 Yam yaox maix pui pa briex, rhawm: maix awm: nawh, mai: maix chix yuh paox yuh pie ka pui pa phit pa vao ka moeng kawn: pui heue:. 19 Jheeh maix chix ah lox pa caox pa caig, mai: dak maix chix ah lox pa pie pa lhen: heue:. 20 Maix ngawm mai: krai lox pa lah pa cha: ka puxaik tix, mai: salao ka kawn: pa keh miex maix heue:. 21 Aux glaik tix ka ceu pa yuh maix kawx, maix ce: Aux mawh awm: maix nieh, mai: phimap pa yuh maix, Aux tak sang plak jhi: maix yaox sivoe ngai: maix heue:. 22 Pui pa piawm: ka Siyiex khankix eue:, doh keud doh sawn: ka grawng: in kix awawx. Phan: ang mawh nan:, nu ka ang Cao: taoh pex koe:, mai: Aux tak rud tix tik pex, baux mawx baux an heue:. 23 Pui pa tan pa lu mai: pa yaogyaw ka bwanson: Aux mawh pui pa kieh min: plakngai: Aux sidawng: heue:. Mai: daux krax pa keud pa hu: nawh kawx, Aux tak plak jhi: bwanson: Siyiex Cao: pa taoh heue:.

Simin Ting 51

Lox Rawg Bwan:, Son Sang Pluat Ploi: Phimap

1 Simiang Siyiex eue:, awm: koe: rhawm: Maix, yuh bwanson: caoxrhawm: ka aux liak, awm: koe: krax pa caoxrhawm: Maix tom: nie, preet tix tik phimap pa phit pa lud aux liak. 2 Mai: sigrhah phimap phigrham: aux tom: bawh khawm: uik, mai: kieh singax singeh liak. 3 Aux tawng aux yung pa phit pa lud tix, mai: doh keud ka phimap pa phit pa lud tix jheeng: jheeng: heue:. 4 Aux hoik phit lud ka Maix, mai: aux hoik yuh pa ang rah ang see sivoe ngai: Maix, mawh kheu krax prawng krax ca: Maix pa rah pa see pluat ploi: phimap aux heue:. 5 Grawh grawng: nawh, aux viex phimap phigrham:, tom: yam keh aux, mai: tom: yam ot aux ka daux vaig miex tix heue:. 6 Maix moh ka rhawm: pa rah pa see, mai: gau aux ka cuyi pingnya pa raux pa mox ka daux rhawm: aux liak. 7 Mai: son sang singax singeh aux, teei lhax khaox haisop mai: kieh aux singax singeh mai: tawx bwanson: ka aux liak. Mai: sigrhah aux paing awm: rawm: rha: liak. 8 Son sang nyawmrhawm: gauxrhawm: aux, kieh aux mhong: lox Maix liak, phan: yuh nan:, si:ang: pa hoik raig Maix tak sang gauxrhawm: gauxrhi: heue:. 9 Veeh plakngai: Maix khaing: phimap pa hoik yuh aux, mai: preet tix tik ka phimap phigrham: khawm: uik liak. 10 Simiang Siyiex eue:, kieh daux rhawm: aux singax singeh liak. Cox rhawmrhi: aux mawh pa khraox mai: kieh kaux cong: liak. 11 Paw lai grheu: tix tik aux khaing: Maix liak, paw lai teei khwan: singax singeh Maix khaing: aux liak. 12 Caoxrhawm: deeh tawx akhwang: krax gauxrhawm: gauxrhi: pa dex pa dawd mai: krax taoh Maix ka aux liak, tawx krax gauxrhawm: gauxrhi: Maix mai: teem: coi ka aux liak. 13 Son sang pon aux tix gau krax pa rah pa see Maix ka kix, pui pa ang rah ang see, mai: son sang deeh hoek pui pa koe: phimap phigrham: ka Maix heue:. 14 Simiang Siyiex Cao: pa taoh aux eue:, kieh aux luan khaing: phimap pa simie tix pah pui yum liak, mai: dak aux, ah lox rhax pa gauxrhawm: gauxrhi: grawng: pa rah pa see Maix heue:. 15 Simiang Siyiex eue:, paoh ka siyieb jheeh aux liak, jheeh aux tak sang yaogyaw bwanson: Maix heue:. 16 Maix ang moh ka ceu pa tan pa lu, phan: ang mawh nan:, aux tan lu ka Maix, mai: Maix ang khaw: rhawm: ka ceu pa gleeing tix tan heue:. 17 Ceu pa tan pa lu pa khaw: rhawm: Siyiex mawh rhawm: pa bih, Siyiex eue:, rhawm: pa bih Maix ang chix tik chix vud heue:. 18 Kieh rhawm: pa gauxrhawm: gauxrhi: Maix, yuh bwanson: ka gawng Zion liak, deeh cox ka guh veng, veng Yerusaliem liak. 19 Yam an krax lu krax tan, pa rah pa see pa gleeing tix tan ang ah, pa gleeing tix tan khawm: kaux ang ah, Maix gauxrhawm: gauxrhi: kah heue:. Yam an, tak sang teei moi mhaing: mai: tan lu ka piang khu: dee tan Maix heue:.

Simin Ting 52

Krax Prawng Ca: Siyiex Mai: BwanSon: Nawh

1 Pui pa ting riang eue:, mawh kheu pa tix maix yaw tix, son sang yuh laux ka bwanson: pa yuh pui yuh ka mawx? Krax moh krax rhawm: Siyiex kaux cong: jheeng: jheeng: heue:. 2 Mai: dak maix lawm awm: gawn:, mai: pie lhen: ka ceu pa caox pa caig, mai: yuh ka ceu pa caox pa caig heue:. 3 Maix nie lheu: moh pa caox khaing: pa mhawm:, mai: nie lheu: moh lox pa pie pa lhen: khaing: lox pa rah pa see heue:. 4 Dak pa chix pie chix lhen: eue:, maix khaw: rhawm: ka lox pa sang yuh pui laux heue:. 5 Siyiex tak raig tix tik maix jheeng: jheeng: heue:. Nawh Cao: teei tix tik maix khaing: nyiex gox maix mai: bluh tix tik maix khaing: dee ot pui pa im: ju heue:. 6 Pui pa rah pa see khankix, yaox mai: lhat graung heue:. Kix nyiah ka nawh mai: ah nin:, 7 "Jhak heue:, pui pa ang deuh rhawm: ka Siyiex mai: nawh deuh rhawm: ka kraung khrai: tix mai: nawh kaux cong: ka phimap pa caox heue:." 8 Phan: mawh aux, awm: khaox sanlun pa mhawm: klai pa koe: ka daux nyiex Siyiex, mai: aux deuh rhawm: ka krax moh krax rhawm: Siyiex leeing: ju leeing: phan: heue:. 9 Aux tak sang yaogyaw Maix ka kaing pa hoik yuh Maix jheeng: jheeng: leeing: ju leeing: phan: heue:. Aux tak krox jun pot ceukaux Maix sivoe ngai: pui pa moh ka Maix, mawh kheu Maix mawh pa jiet mhawm: heue:.

Simin Ting 53

Kawn: Pui Mawh Pa Caox (Pa Hai)

1 Pui pa daox pa aw: khankix, keud tix ah nin: ka daux rhawm: tix, Siyiex ang koe:, mai: kix mawh pui pa hoik cux hoik sium:, mai: chix yuh ceu pa seeing: pa brai: heue:. Mai: pui pa yuh pa mhawm: pa mhiem: ang koe: tix kaux kawx. 2 Simiang Siyiex ot ka piang raoma: mai: jhak ka kawn: pui, koe: pa tawng pa yung mai: pui pa sawg ka Nawh tix kaux kaux lie? Ang koe: lie? 3 Kawn: pui khawm: uik, hoik lud krax, mai: hoik cux hoik sium: awm: paox tix khawm: uik, mai: pui pa yuh pa mhawm: pa mhiem: ang koe:, pie tix kaux kawx ang koe:. 4 Can pui pa nieb yuh pa caox khankix khawm: uik, ang kix tawng lie? kiied tix ih pui Aux, awm: ih kix khaomun mai: ang kok yo ka Siyiex lie? 5 Ka dee an, tak koe: krax pa kied lhat graung, grawh grawng: nawh, Siyiex kieh si:ang: pui pa yuh tab tang: plak, pung prang: hu: heue:. Mai: kix hoek krax pa kaig pa tua heue:. 6 Kieh krax taoh pui Isarilax lih hoek khaing: piang gawng Zion liak. Yam deeh viex Simiang Siyiex pui Nawh, pa hoik viex kix hu: deeh hoek, Yakop tak gauxrhawm: gauxrhi:, mai: pui Isarilax tak gauxrhawm: gauxrhi: heue:.

Simin Ting 54

Lox Rawg Bwan:, Son Sang Luan Khaing: Pui Koeng

1 Simiang Siyiex eue:, kieh ceukaux Maix taoh aux liak, mai: teei siawp sibrawm Maix prawng ca: plak aux liak. 2 Simiang Siyiex eue:, nghiet lox pa rawg aux bwan: mai: veeh yhaok Maix nghiet ka lox pa lih khaing: jheeh aux liak. 3 Grawh grawng: nawh, pui tang: praix ot tix plak, kaoh mai: yuh pa caox ka aux, pui pa caox khankix, ang khan: ngai: Maix, sawg tix teei ju aux heue:. 4 Jhak heue:, Siyiex teem: coi ka aux, Siyiex ot tau mai: pui pa joh jhan: ka ju aux heue:. 5 Nawh Cao: deeh pawk ceu pa caox ka pui pa koeng ka aux khankix heue:, mai: tik vud kix awm: pa koe: lox mukheu Maix heue:. 6 Aux tak sang gauxrhawm: gauxrhi: tix tan lu ka Maix, Simiang Siyiex aux eue:, aux tak sang yaogyaw ka ceukaux Maix mawh kheu Maix mawh pa jiet mhawm: heue:. 7 Grawh grawng: nawh, Maix hoik taoh aux ka daux pa kharhawm: kharhi:, mai: ngai: aux hoik yaox ka pui pa koeng ka aux khankix heue:.

Simin Ting 55

Lox Rawg Bwan:, Son Sang Teem: Coi

1 Simiang Siyiex eue:, nghiet ka lox pa rawg aux bwan: liak, paw lai mox khaing: pa rawg pa mhaing: aux liak. 2 Jhak ka aux mai: deeh pawk lox aux liak, aux iak riang iak rao mai: ngia khirhawm: khirhi: heue:. 3 Mawh kheu lox pui pa koeng ka aux, kheu pa tuktiak tukte: pa ang rah ang see mai: pa deuh phimap ka piang aux, ka daux pa songrhawm: songrhi: mai: koeng ka aux heue:. 4 Rhawm: rhi: tokaux aux siyaung: mai: kied lhat graung ka krax yum pa sang hoek ka piang aux heue:. 5 Krax pa lhat pa siyaung: hoek ka piang aux, mai: hoik kheem: ka piang aux heue:. 6 Aux ah nin:, kieh aux koe: pruik awm: sikaux liak, phan: yuh nan:, aux sang pu: hu: tang: dah tang: dee mai: laux lee: tix mhawm: mhawm: heue:. 7 Aux tak sang hu: dee singai mai: tom: dee ot dee koe: ka daux tiag daux tu heue:. 8 Aux nied tix to: son sang luan khaing: lhiex ting bhaung: ting heue:. 9 Simiang Siyiex eue:, kieh lox pa ah kix pung prang: grai: mu: liak, mawh kheu hoik yaox aux, khin: tix teei mai: tud rhim: ka daux veng heue:. 10 Kix ca: daw hu: ka piang guh veng leeing: ngaix leeing: sawm: ang jud ang jai, mai: yuh krax pa caox pa caig, mai: yuh pa seeing: pa brai: ka daux veng heue:. 11 Mai: kix khin: tix yuh ceu pa ang khaw: ka daux sigreung veng mai: tuktiak tukte: mai: pie lhen: ka pui daux krax heue:. 12 Pui pa sa pa lao ka aux, ang mawh pui pa koeng ka aux, phan: mawh, aux pon gun pon yeung heue:. Pui pa ot tang: plak ang mawh pui koeng ka aux, phan: mawh, aux pon via heue:. 13 Pui pa yuh nan: mawh mhai: pui plak aux, mai: paoxgrawm aux, mai: pui pa meed pa tawng aux heue:. 14 Ex tang: kum: kawng: mai: paox tix mhawm: mhawm: mai: ex hu: tau mai: cub pui haoh pui hun: ka daux nyiex Siyiex heue:. 15 Kieh Simiang kix yum giex liak, phan: kix kawn: im: ju, kieh lih hu: ka daux meung yum, grawh grawng: nawh, phimap koe: dee ot kix mai: ka daux kix heue:. 16 Phan: mawh aux, kok ka Siyiex, mai: Simiang Siyiex taoh aux heue:. 17 Yam ponbo, yam ponngawb, mai: yam ponsingaix, aux kharhawm: mai: ngia, mai: Nawh Cao: mhong: lox aux heue:. 18 Yam yuh kix naing ka aux, Nawh Cao: taoh ju aux, mai: kieh aux nyawm rhawm: heue:. Pui pa ot plak aux kied sidaing: nie hun: heue:. 19 Siyiex Cao: pa jah bah ma: la: rawm: dix, nghiet ka lox aux, mai: yeen kix goh, mawh kheu ang kix thai: lox cox rhawm: tix, mai: ang koe: rhawm: lhat ka Siyiex heue:. 20 Pui pa yuh nan:, chix phit chix lud ka paoxgrawm tix mai: ang kaux sijax heue:. 21 Lox jheeh nawh nyu: awm: bee (thaw: pat) kawx, daux rhawm: nawh keud grawng: sang yuh naing heue:. Mai: lox nawh awn: awm: bee kawx, awm: vaid pa hoik lawd tix deuh heue:. 22 Kraung cien pa klawm: maix deuh piang Simiang Siyiex awawx. Mai: Nawh tak teem: coi ka maix heue:. Nawh ang sax kieh pa lhat pa graung hoek ka piang pui pa rah pa see heue:. 23 Siyiex eue:, Maix teei tix sau: kix ka daux pa laux pa leeing: heue:. Mai: pui pa teei ju pui yum, mai: pui pa ang kaux sijax, paw kieh kix im: ju pie tix plak singaix, phan: mawh aux deuh rhawm: ka Maix heue:.

Simin Ting 56

Lox Rawg Bwan: Pui Pa Deuh Rhawm: Ka Siyiex

1 Simiang Siyiex eue:, Caoxrhawm: ka aux liak, grawh grawng: nawh, kix blin lox mai: sawg tix yuh ka aux, mai: tuktiak tukte: ka aux leeing: lang: singaix heue:. 2 Pui pa koeng ka aux khankix, puing: ka aux leeing: singaix, mai: pui pa puing: ka aux kied nie heue:. 3 Yam lhat graung aux, aux deuh rhawm: ka Maix heue:. 4 Aux deuh rhawm: ka Siyiex mai: yaogyaw ka gumlox Nawh heue:. Aux deuh rhawm: ka Siyiex, aux tak ang lhat ang graung, mai: kawn: pui tak pon yuh pa tix ka aux. 5 Kix kieh lox aux mawh pa phit pa lud ku singaix, mai: kix keud ngie pa caox pa ang mhawm: ka aux heue:. 6 Kix khrawm: paox tix, hawt jawm tix teei ju aux, mai: yuh tix tawng khaix caong aux heue:. 7 Simiang Siyiex eue:, pui pa yuh pa ang rah ang see khankix, tak sang luan yuh ka mawx? Ka daux pa songrhawm: songrhi: Maix, kid tix tik pui ceu an khankix liak. 8 Maix hoik tawng grawng: vu vie aux tix ku dah ku dee, teei rawm: ngai: aux sau: tix deuh daux kawk rawm: Maix, hoik koe: carang ka daux lai Maix ang mawh lie? 9 Mawh kheu ot Siyiex plak aux, yam kok aux ka Nawh, mai: aux tawng pui pa koeng ka aux khankix, deeh dak plak khaix tix heue:. 10 Aux deuh rhawm: ka Siyiex mai: yaogyaw ka gumlox Nawh heue:. Aux deuh rhawm: ka Siyiex mai: yaogyaw ka gumlox Nawh heue:. 11 Aux deuh rhawm: ka Siyiex, aux tak ang lhat ang graung, kawn: pui tak pon yuh pa tix ka aux. 12 Simiang Siyiex eue:, awm: pa hoik yuh aux sijax mukheu sivoe ngai: Maix, aux tak hawt ka sijax mukheu pa hoik yuh tix mai: yaogyaw ka Maix heue:. 13 Grawh grawng: nawh, Maix hoik taoh ju aux khaing: krax yum, mai: Maix hoik taoh caong aux khaing: pa sideeing, son sang hu: aux sivoe ngai: Maix ka daux pa riang ka pui pa im: ju khankix ang mawh lie?

Simin Ting 57

Lox Rawg Bwan:, Son Sang Teem: Coi

1 Simiang Siyiex eue:, caoxrhawm: ka aux liak, caoxrhawm: ka aux liak. Ju aux deuh rhawm: ka Maix, mai: deuh rhawm: tix ka greem: veei pruik Maix tom: sidah luan ceu pa khirhawm: khirhi: heue:. 2 Aux tak kok yo ka Siyiex Cao: pa ting pa lhaong:, Cao: pa kieh see: aux hoik mhawm: heue:. 3 Nawh Cao: ot meung raoma: mai: taoh ka aux, mai: pui pa ting rhawm: ting rhi: khankix kaig tua heue:. Siyiex tak sang tawx krax caoxrhawm: mai: sijax mukheu pa kaux hoek heue:. 4 Ju aux ot ka daux cub sivai sangsi:, aux yaox tix it mai: pui ka daux glah ngu mai: rhang: kix awm: pliah mai: te, dak kix awm: vaid pa kied lawm heue:. 5 Simiang Siyiex eue:, kieh Maix nie lheu: lhaong: khaing: lhaong: raoma: liak, mai: kieh min: plakngai: Maix, tah hu: ka piang haktiex in khawm: uik liak. 6 Kix hoik taong: tix deuh kie ka daux krax pa hu: aux, rhawm: rhi: aux hoik iak hu: ka dee tiem, mai: kix hoik kaong: tix deuh daux sivoe aux, mai: tokaux kix deeh rau ka daux an tiru heue:. 7 Simiang Siyiex eue:, rhawm: aux kaux cong: heue:, rhawm: aux kaux cong: heue:. Aux rhax lai yaogyaw ka Maix heue:. 8 Ju aux eue:, siduad heue:, chiang: mai: ting: khankix eue:, siduad heue:. Aux kawx siduad caocao heue:. 9 Simiang Siyiex eue:, Aux tak yaogyaw ka Maix sinax pui haoh pui hun: khankix heue:. 10 Grawh grawng: nawh, krax caoxrhawm: Maix hoek tom: sidah raoma:, mai: pa sijax mai: pa mawh pa meh Maix , hoek tom: sidah paiawm: heue:. 11 Simiang Siyiex eue:, kieh Maix nie lheu: lhaong: khaing: lhaong: raoma: liak. Mai: kieh min: plakngai: Maix tah hu: ka piang haktiex khawm: bee: ma: liak.

Simin Ting 58

Lox Rawg Bwan:, Son Sang Prawng Ca: Ka Pui Pa Caox

1 Pui pa prawng pa ca: khankix eue:, khex prawng ca: pex ka kawn: pui ka daux pa rah pa see nang: lie? 2 Ang tau tix mawh, ka daux rhawm: pex ca: keud pa caox mai: pex ciang tix yaox ka pa tuktiak tukte: pa yuh pex ka taix tix ka piang haktiex in heue:. 3 Pui pa ang rah ang see khankix, koe: rhawm: pa caox tom: yam ot daux vaig miex tix, mai: chix pie chix lhen: mai: lud krax hu: tom: yam keh tix heue:. 4 Jai: kix awm: jai: siuing:. Kix awm: siuing: caox pa lheet pa thox yhaok tix. 5 Kix ang nghiet lox cao: kix, mai: yuh tokaux tix mawh pa hoik tawng heue:. 6 Simiang Siyiex eue:, laoh tix tik rhang: kix khaing: jheeh kix liak, Simiang Siyiex eue:, laoh tix tik rhang: gieb sivai sangsi: pa awn: ju khankix liak. 7 Kieh kix grai: mu: awm: rawm: liak, yam nyeu kix ak kieh kix graig awm: te heue:. 8 Mai: kieh kix awm: hoi: lux pa mo hu: mai: awm: kawn: ngie: pa laux daux vaig miex tix, pa ang tie yaox ka singaix heue:. 9 Kieh kix awm: khix braw pa phlu: ngu, mai: aw: pa ang tien tawng yam hax tix, yam im: kix ang ah, yam hax kix ang ah, kieh bhaung: tah kix hu: liak. 10 Pui pa rah pa see khankix, tak gauxrhawm: gauxrhi: yam yaox kix krax pa ciyang yuh nan:, mai: tak khoek caong kix ka daux nham: pui pa ang rah ang see khankix heue:. 11 Mai: pui tang: dah tak ah nin:, pui pa rah pa see khankix, pon bwanson: tete te lai heue:. Siyiex Cao: pa prawng ca: pa rah pa see koe: tete ka piang haktiex, kawn: pui ah nan: heue:.

Simin Ting 59

Lox Rawg Bwan:, Son Sang Priex

1 Simiang Siyiex aux eue:, taoh aux lih khaing: daux tawm: taix pui pa koeng ka aux khankix mai: yaog aux ting lhaong: khaing: pui pa ot tang: plak khankix liak. 2 Maix taoh aux lih khaing: tawm: taix pui pa yuh phimap, mai: taoh aux lih khaing: daux tawm: taix pui pa pah pui yum khankix liak. 3 Jhak heue:, kix jawm tix pah ju aux, mai: pui pa ting riang tang: plak khrawm: paox tix sang yuh ka aux heue:. Simiang Siyiex eue:, ang mawh kheu phit lud aux, aux ang tie koe: phimap tid tix. 4 Kix nieb to: tix hoek tix sang yuh ka aux, siduad mai: teem: coi ka aux mai: jhak ka aux liak. 5 Simiang Siyiex Cao: kru naing raoma:, pa mawh Siyiex Isarilax eue:, siduad mai: sivied tix gau ka pui tang: ceu tang: cat khankix liak. Mai: paw lai caoxrhawm: ka pui pa ot ka daux phimap tix kaux kawx. 6 Mai: kix deeh hoek yam ponbo mai: luan lox awm: pa raoh sox mai: lai ling hawt veng heue:. 7 Jheeh kix chix krai lox bied mai: vaid koe: mai: siyieb jheeh kix, mai: chawk ah nin: ka paox tix, pui mawx tak sang mhong: lox ex. 8 Viang mawh kawx nan:, Simiang Siyiex eue:, Maix tak nyiah ka kix mai: sa lao ka pui tang: ceu tang: cat khankix heue:. 9 Riang rao aux eue:, aux krox jun pot ka Maix heue:, mai: Siyiex mawh dee deuh aux rhawm: heue:. 10 Krax caoxrhawm: Simiang Siyiex, tak hoek tix teem: coi ka aux, mai: Siyiex tawx akhwang: awm: pa simie aux son sang yaox aux ka piang pui pa koeng ka aux khankix heue:. 11 Siyiex Cao: pa tieb tie aux eue:, paw awt nyang teei kix yum liak, phan: Maix pah kix yum, ha pui aux kox piawm: rhawm: tix, mai: teei siawp sibrawm Maix mai: kieh kix pung prang: hu: ku dah ku dee mai: rau hu: heue:. 12 Mawh kheu lox phimap jheeh kix, mai: ting lox sikah kix, mai: pie lhen:, mai: lox pa ah kix, kieh deeh hoek ka piang kix liak. 13 Ka daux pa songrhawm: songrhi: Maix, kieh kix laux leeing: grai: hu: pak lawg khawm: uik liak. Mai: kieh kix tawng mawh Maix Siyiex Cao: pa giex kaing:, jah ka ceu pui Yakop tom: sidah haktiex khawm: uik liak. 14 Mai: kieh kix deeh hoek yam ponbo mai: lawh awm: raoh sox hawt vung viang veng heue:. 15 Yam ponsawm: kieh kix deeh hoek khru khrieh tix sawg pa ih pa un:, mai: ang sak mai: kix ot giex yuh nan: heue:. 16 Phan: mawh aux, rhax lai grawng: siawp sibrawm Maix, plak ponngawp, tak ah lox rhax pa gauxrhawm: grawng: krax caoxrhawm: Maix heue:. Grawh grawng: nawh, Maix mawh dee deuh aux rhawm:, yam yaox aux krax khirhawm: khirhi: heue:. 17 Riang rao aux eue:, rhax lai yaogyaw ka Nawh Cao: heue:. Mai: Siyiex mawh dee deuh aux rhawm:, mai: Cao: pa caoxrhawm: ka aux heue:.

Simin Ting 60

Lox Rawg Bwan:,Son Sang Taoh

1 Simiang Siyiex eue:, ka daux pa songrhawm: songrhi: Maix, Maix hoik tik ka ex, mai: ex hoik pung prang: rai ruat heue:. Viang mawh nan:, deeh kieh ex im: ju liak. 2 Maix hoik kieh haktiex yungyiang: mai: bih, viang mawh kawx nan:, haktiex pa bih an, kieh deeh kleuk ih paox tix singip liak, kawn: ca: yungyiang: pot heue:. 3 Maix hoik kieh kix kharhawm: kharhi:, mai: hoik tawx rawm: plix siiet pa chix yoek ka kix heue:. 4 Maix tawx chix ka pui pa lhat pa graung ka Maix, son sang pak kheu sijax mukheu pa kaux heue:. 5 Yuh ka mawx son sang nyawm rhawm: pui pa moh ka Maix khankix, mai: teei taix khawn: dawm: Maix taoh ka pui pa nghiet lox aux khankix liak. 6 Siyiex sikah ka daux pa singax singeh Nawh Cao:, mai: aux gauxrhawm: gauxrhi: heue:. Aux tak sang gwieh ka veng Sekhem heue:. Mai: aux tiag tix yaox ka tong Sukot heue:. 7 Mai: aux giex kaing: kwang: meung Kilat heue:. Meung Manashie: kawx, aux giex kaing: kwang: kah heue:. Meung Epharem mawh siawp sibrawm kaing: aux, meung Yudax mawh khaox gix min: plakngai: aux heue:. 8 Meung Mawbax mawh aw: dee khoek heem: aux tix, meung Edom mawh dee deuh aux kiep tix, meung Philitix mawh dee riag dee prie aux kheu pex aux. 9 Pui mawx pa sang thong: aux hu: ka veng pa ting riang ting rao, mai: pui mawx pa sang jhi: daux krax hu: aux ka meung Edom. 10 Simiang Siyiex eue:, Maix hoik tik vud ka ex ang mawh lie? 11 Simiang Siyiex eue:, Maix ang hu: tau mai: cub kru naing ex lie? Maix teem: coi ex khaing: pa khirhawm: khirhi: liak, mai: krax taoh kawn: pui mawh pa giex pa going heue:. 12 Ka daux riang rao Siyiex, ex tom: koe: rhawm: kua: heue:. Nawh mawh Cao: pa tak sang dig ka piang pui pa koeng

Simin Ting 61

Lox Rawg Bwan:, Son Sang Priex

1 Simiang Siyiex eue:, nghiet ka lox pa kok yo aux, mai: deuh tix tawng ka lox pa rawg aux bwan: liak. 2 Aux kok yo ka Maix jah tom: sidah haktiex, yam iak rhawm: rhi: aux, Maix viex aux hu: ka rang: ting pa nie lheu: lhaong: khaing: aux liak. 3 Maix mawh dee deuh aux rhawm:, mai: mawh tab pa kaux sivoe ngai: pui pa koeng ka aux khankix heue:. 4 Aux ot ka daux nyiex gox Maix jheeng: jheeng:, mai: aux deuh rhawm: ka greem: veei pruik Maix heue:. 5 Simiang Siyiex eue:, Maix hoik mhong: ka sijax mukheu pa hoik yuh aux, mai: Maix tawx sin: ka pui pa lhat pa graung ka ceukaux Maix khankix ka aux heue:. 6 Maix tak kieh Simiang Khunhawkham lang: ju lang: phan: mai: jhong: khix, mee: num nawh kieh kaux cong: ku ju leeing: ju leeing: phan: liak. 7 Nawh tak ngawm sivoe ngai: Siyiex leeing: ju leeing: phan: heue:. Maix kieh krax caoxrhawm: mai: sijax mukheu Maix teem: coi mai: priex ka nawh liak. 8 Mawh kheu in, aux tak rhax lai yaogyaw ka ceukaux Maix jheeng: jheeng: mai: ku singaix ku sawm: awm: pa hoik yuh aux lox sijax mukheu heue:.

Simin Ting 62

Vhah Rhawm: Rhi: Ka Pa Hoik Priex Siyiex

1 Ju aux chix ot yien: yawg tix sivoe ngai: Siyiex, mai: krax taoh aux kaoh khaing: Nawh Cao: heue:. 2 Nawh Mawh rang: ting mai: Cao: taoh aux, mai: mawh dee deuh aux rhawm: mai: aux ang lai lhat graung ka tix ceu kawx. 3 Pex reem tix puing: ka pui tix kaux, son sang laux nawh miex grheung:, pex khawm: uik keud ce: nawh awm: ding: tiex pa yungyiang: mai: tiex luklin: pa yuye miex grheung:? 4 Kix keud tix kieh nawh rau khaing: dee lhaong:, jheeh kix chix nawb bwan:, viang mawh nan:, rhawm: kix koe: lox pa lawg pa jhax, mai: kix moh pa pie pa lhen: heue:. 5 Ju aux chix ot yien: yawg tix sivoe ngai: Siyiex, grawng: krax krox jun pot aux kaoh khaing: Nawh Cao: heue:. 6 Nawh mawh rang: ting mai: Cao: taoh aux, mai: mawh dee deuh aux rhawm:, mai: aux ang lai lhat graung ka tix ceu kawx. 7 Krax taoh aux mai: min: plakngai: aux mawh Siyiex, mai: rang: ting pa tawx riang ka aux, mai: dee deuh aux rhawm: mawh Siyiex heue:. 8 Kawn: pui khankix eue:, deuh rhawm: ka Nawh Cao: ku bawg ku yam heue:. Mai: plak jhi: rhawm: rhi: pex sivoe ngai: Nawh Cao: awawx. Siyiex mawh dee deuh ex rhawm: heue:. 9 Pui pa brai: pa ang koe: bwanson:, min: plakngai: kix mawh pa pie pa lhen:, mai: phan: ex ciang tix yaox daux jiang hoik grai: mu: ang lai koe: tid tix heue:. 10 Paw nieb ting rhawm: ting rhi: ka pon yuh krax tuktiak tukte:, paw nieb kroh tix yuh grang ka kraung khrai: pa nieb pon rhim: tix teei ka pui, viang maix magmi ka mau, khri: kawx, paw deuh rhawm: ka an. 11 Siyiex hoik krai tix bawg, mai: aux baox mhong: ra: bawg, grawng: pa koe: siawp sibrawm mai: Siyiex heue:. Simiang Siyiex eue:, Maix hoik grum naog mai: krax caoxrhawm:, Maix deeh tawx bwanson: ka kix, kaux pui mawx kaux pui an, awm: kaing pa hoik yuh tix heue:.

Simin Ting 63

Krox Jun Ka Siyiex

1 Simiang Siyiex eue:, Maix mawh Siyiex aux, aux coca: tix sawg Maix heue:. Ju aux kied simie tix lo ka Maix, mai: tokaux aux kied byaong ka Maix, awm: haktiex kroh kram: dee ang rawm: koe: heue:. 2 Mawh kheu nan:, aux maong tix jhak ka Maix, ka dee singax singeh son sang yaox min: plakngai: siawp sibrawm Maix heue:. 3 Mawh kheu krax caoxrhawm: Maix nie lheu: mhawm: khaing: ju, mai: jheeh aux tom: yaogyaw ka Maix heue:. 4 Mawh kheu in, yam kawn: im: ju aux, aux tak yaogyaw bwanson: pa ting Maix mai: aux deuh rhawm: ka ceukaux Maix mai: yaog taix tix krub ka Maix heue:. 5 Ju aux hoik sak awm: pa ih aux nex pa kluing: pa bee, mai: jheeh aux tak gauxrhawm: gauxrhi: mai: yaogyaw ka Maix heue:. 6 Yam it aux dee it, aux doh keud doh sawn: ka Maix, mai: aux keud grawng: Maix leeing: sawm: heue:. 7 Mawh kheu teem: coi Maix aux, aux gauxrhawm: gauxrhi: greem: veei pruik Maix heue:. 8 Ju aux deuh rhawm: ka Maix, mai: taix khawn: dawm: Maix joh jhan: ka aux heue:. 9 Pui pa sawg tix yuh ju aux laux khankix, tak laig hu: ka greem: tiex heue:. 10 Kix tak yum ka lawm vaig pa lawm, mai: sox praix ih nex kix heue:. 11 Phan: mawh Simiang khunhawkham tak gauxrhawm: gauxrhi: ka daux Siyiex heue:. Mai: can pui pa kaux sijax mai: pa tiex tu ka daux Nawh Cao: khankix, tak mhawm: grang heue:. Pui pa ah lox pie lox lhen: khankix tak sang thox jheeh kix heue:.

Simin Ting 64

Lox Rawg Bwan:, Son Sang Teem:

1 Simiang Siyiex eue:, nghiet ka lox pa rawg aux bwan: mai: taoh ju aux khaing: pui pa koeng ka aux, mai: teem: coi ka aux liak. 2 Mai: tieb tie aux khaing: pa keud pui pa caox tix yuh mai: pa kum: kix tix yuh phimap liak. 3 Cub pui an khankix, dak kix awm: vaid pa hoik klaing: tix, pa kix hoik rien lox pa song: awm: te pa hoik nyeu tix heue:. 4 Kix ot dee glip mai: ah tix sang puing: ka pui mhawm: heue:, kix ting rhawm: khawm: puing: tix, mai: ang lhat heue:. 5 Son sang yuh kix pa caox pa ang mhawm:, mai: tawx riang tawx rao ka paox tix, tix kaux hoik tix kaux mai: kum: paox tix grawng: sang taong: kie, mai: kix ah nin:, pui mawx pa tak sang yaox ex. 6 Kix chix sawg mai: chawk cheng: ka grawng: see: pa ang rah ang see, kix chix klawngkloek tix chawk khawm: uik, mai: pa keud kix ka daux rhawm: tix, mawh pa kied raux kied mox heue:. 7 Viang mawh kawx nan:, Siyiex tak puing: kix ka te dom: mawx dom: an, mai: kix kied mat kied lheet heue:. 8 Dak kix deeh puing: ka cao: kix, mai: yam yaox pui ka kix, vukvied kaing: mai: to: heue:. 9 Pui khankix khawm: uik, lhat graung mai: tawng pa yuh Siyiex mhawm: mhawm: mai: krai ka pui khankix heue:. 10 pui pa rah pa see khankix, tak gauxrhawm: gauxrhi: mai: deuh rhawm: ka daux Simiang Siyiex heue:. Mai: pui pa rah pa see rhawm: rhi: khankix tak yaw rangdi heue:.

Simin Ting 65

Yaogyaw Ka BwanSon: Siyiex

1 Simiang Siyiex eue:, krax pa yien: yawg mai: krax yaogyaw mai: pa kaux sijax koe: ka daux veng Zion heue:. 2 Siyiex Cao: pa nghiet ka lox pa rawg aux bwan: eue:, kawn: pui khawm: uik, tak sang greed tix hoek ka Maix heue:. 3 Aux ang lai pex pon kheu nie krax pa ang rah ang see, viang mawh kawx nan:, Maix pluat ploi: phimap pa phit pa lud aux liak. 4 Pui pa hoik laug Maix tix teei, mai: pui pa greed tix hu: ka daux nyiex bwan: Maix khankix koe: bwanson: heue:. Kieh ex sak ka ceu pa mhawm:, pa koe: ka daux nyiex Maix, mai: pa koe: ka daux nyiex bwan: pa singax singeh Maix heue:. 5 Siyiex Cao: pa taoh ex eue:, Maix hoik nghiet ka lox pa rawg ex bwan:, ka daux pa jhi: Maix ex yaox ka ceu pa daox pa am: pa yuh Maix, mai: kawn: pui pa ot tom: sidah haktiex khawm: uik, mai: pui pa ot ka daux rawm: sigrit sigra: ku daog ku diem khawm: uik, deuh rhawm: ka Maix heue:. 6 Maix hoik grum naog mai: siawp sibrawm mai: riang rao pa ting, mai: Maix hoik kieh gawng lua kaux cong: heue:. 7 Lox pa sinum siaox rawm: sigrit sigra: mai: lox pa sinum pukpak rawm: mai: lox pa maw: pa lawh kawn: pui khankix, Maix chix kieh yien: yawg tix heue:. 8 Pui pa ot dee singai khankix, yaox mhai: pa daox pa am: pa yuh Maix mai: lhat graung heue:. Kawn: pui pa ot plak lih singaix mai: khawm: plak klip singaix, gauxrhawm: gauxrhi: heue:. 9 Maix hoek tix jhak ka haktiex mai: kieh lhiex lih mai: kieh haktiex koe: phon: mai: mhawm: heue:. Mai: Siyiex kieh rawm: klawng: naog mai: cox haktiex mai: chix kieh plix nghox plix koi: lih koe: plix son kawn: pui heue:. 10 Mai: Siyiex kieh haktiex caux mai: kaung: sidawm mhawm: mhawm:, mai: kieh lhiex lih son sang awn: tiex, mai: Nawh Cao: tawx bwanson: ka khaox pa kuah khankix heue:. 11 Nawh Cao: teei bwanson: pua: tix deuh ka jhong: khix mee: num khankix, mai: khaix caong Maix mawh pa jah bwanson: heue:. 12 Jah tix sau: ka dee mhawm: daux tiag daux tu, mai: gawng lua khankix kawx, rawd maox nyoi mai: gauxrhawm: heue:. 13 Daux tong kaung: dee mhawm: dee sawm: kawx, hoik naog ka cub yung: cub pex, mai: daux kaung: khankix kawx, hoik naog pang: num: nghox koi:, mai: kix ah lox rhax sinum pa kied nyawm tix nhiet heue:.

Simin Ting 66

Lox Rhax Yaogyaw Ka BwanSon:

1 Kawn: pui piang haktiex khawm: uik eue:, ah lox sinum yaogyaw ka Siyiex awawx. 2 Rhax lai yaogyaw min: plakngai: ceukaux Nawh Cao:, mai: plak jhi: min: plakngai: Nawh mai: yaogyaw ka Nawh Cao: heue:. 3 Mai: krax pa prawng pa ca: Maix mawh pa kied daox kied am:, mai: kheu kied ting siawp sibrawm Maix mai: pui pa koeng ka Maix khankix, lhat graung mai: khyox khaw: ka Maix heue:. 4 Kawn: pui piang haktiex khawm: uik tak krub ka Maix mai: rhax lai yaogyaw ka Maix heue:, Kix rhax lai yaogyaw ka ceukaux Maix heue:. 5 Hoek tix jhak ka krax prawng krax ca: pa yuh Siyiex khankix, mai: krax prawng krax ca: Siyiex ka kawn: pui mawh ceu pa daox pa am: heue:. 6 Nawh Cao: kieh rawm: sigrit sigra: kroh hu:, mai: lih mawh tiex mai: kix pon tix hu: ka caong tix heue:. Mai: ex gauxrhawm: gauxrhi: ka daux Siyiex ka dee an heue:. 7 Nawh Cao: giex kaing: ka daux siawp sibrawm Nawh jheeng: jheeng: heue:. Mai: ngai: Nawh Cao: jhak ka kawn: pui ku ceu, paw lai kieh pui pa thiang: tix tik ka Nawh yaogyaw tokaux tix ting tiru heue:. 8 Ceu kawn: pui khawm: uik eue:, yaogyaw ka Siyiex ex awawx, rhax lai yaogyaw ka bwanson: Nawh Cao: ka lox pa sinum heue:. 9 Grawh grawng: nawh, Maix kieh ex im: ju mai: ang kieh caong ex cang: klad heue:. 10 Simiang Siyiex eue:, Maix hoik cheuk tix yaox aux, awm: mau pa hoik thi: heue:. 11 Maix hoik kieh ex krix ka daux kie mai: hoik sau: kraung pa cien ka piang blawg ex heue:. 12 Maix hoik kieh pui dig piang kaing: aux, viang aux yaox tix hu: daux ngu daux rawm: kawx, mawh kheu bwanson: Maix aux hoek dee nyawrhawm: nyawm rhi: heue:. 13 Aux viex krax tan krax lu mai: gleeing tix tan lu ka daux nyiex Maix heue:. 14 Yam yaox aux krax pa kharhawm: kharhi:, siyieb jheeh aux, mai: jheeh aux krai lox sijax mukheu pa hoik yuh aux mai: Maix heue:. 15 Aux tak sang teei tix tan: yung: pa kluing: pa bee, mai: ceu pa sioe: baux mai: gleeing tix tan ka Maix khawm: moi khawm: pex heue:. 16 Pui pa lhat pa graung ka Siyiex khankix khawm: uik eue:, hoek tix nghiet heue:, aux tak sang krai pex mhong: grawng: pa hoik yuh Nawh bwanson: ka ju aux heue:. 17 Jheeh aux kok yo ka Nawh Cao:, mai: dak aux kawx, yaogyaw ka Nawh heue:. 18 Phan: aux koe: phimap ka daux rhawm: tix, Siyiex ang nghiet ka lox pa rawg aux. 19 Yam in Siyiex hoik nghiet mai: deuh tix tawng ka lox pa rawg aux bwan: heue:. 20 Siyiex ang tik ka lox pa rawg aux bwan:, mai: ang lai deeh teei ka bwanson: pa hoik tawx ka aux, kieh Nawh koe: bwanson: liak.

Simin Ting 67

Lox Rhax Yaogyaw Ka Bwanson:

1 Kieh Siyiex pa koe: krax caoxrhawm: tawx bwanson: ka ex liak, jhan: pa riang pakngai: Maix ka ex liak. 2 Mai: kieh kawn: pui piang haktiex tawng ka grawng: krax pa yuh Maix, kieh ceu pui khawm: uik pon bwanson: krax taoh Maix liak. 3 Simiang Siyiex eue:, kieh ceu kawn: pui yaogyaw ka Maix, kieh kawn: pui yaogyaw ka Maix liak. 4 Mai: kieh ceu pui ku ceu gauxrhawm: gauxrhi:, mai: rhax lai gauxrhawm: gauxrhi: liak, grawh grawng: nawh, Maix prawng ca: kawn: pui ka daux been li pa rah pa see, mai: Maix tawx krax nyawmrhawm: nyawmrhi: ka ceu kawn: pui piang haktiex khawm: uik heue:. 5 Simiang Siyiex eue:, kieh ceu kawn: pui yaogyaw ka Maix, kieh kawn: pui yaogyaw ka Maix liak. 6 Haktiex tang: deeh chix plix plix, Siyiex mawh Cao: pa tawx bwanson: ka ex heue:. 7 Siyiex tak sang baox tawx bwanson: ka ex, mai: tak lhat graung ka Nawh Cao: tom: sidah haktiex khawm: uik heue:.

Simin Ting 68

Lox Rhax Pa Pex

1 Siyiex kaoh mai: yuh laux ka pui pa koeng ka Nawh, mai: kieh pung prang: hu: ku dah ku dee liak, mai: pui pa koeng ka Nawh khankix, kieh to: khaing: Nawh liak. 2 Kieh kix vungvang hu:, awm: vungvang taox ngu liak, mai: kieh kix ceh hu: awm: bee kax pa dex ngu, kieh pui pa ang rah ang see, laux leeing: sivoe ngai: Siyiex liak. 3 Mai: kieh pui pa rah pa see khankix, gauxrhawm: gauxrhi: sivoe ngai: Siyiex liak, mai: kieh kix gaux sile: he: sivoek liak. 4 Ah lai ka Siyiex mai: rhax lai yaogyaw ka ceukaux Nawh, cox daux krax sivoe sang hu: Nawh daux tiag, mai: ceukaux Nawh mawh Simiang Siyiex heue:. Mai: gaux sile: he: sivoek, sivoe ngai: Nawh Cao: awawx. 5 Siyiex ot ka daux nyiex bwan: pa singax singeh Nawh, mai: mawh keeing: ka kawn: doe: khankix, mai: prawng ca: ka son miexmai khankix heue:. 6 Siyiex tawx akhwang: ka pui pa ang koe: paox pie, mawh nyiex ma: heue:, mai: Nawh Cao: tawx krax nyawmrhawm: nyawmrhi: ka pui pa ot daux thawng: daux gang: khankix. Mai: phan: mawh pui pa tieh pa feen ka Nawh khankix, yaox tix ot dee kroh dee kram: heue:. 7 Simiang Siyiex eue:, yam thong: Maix ka pui Maix mai: hu: ka daux tiag. 8 Mawh kheu min: plakngai: Maix, haktiex yungyiang: mai: lhiex lih khaing: raoma: heue:. Mawh kheu min: plakngai: Siyiex, gawng Sina kawx, yung yiang: heue:. 9 Simiang Siyiex eue:, Maix kieh lhiex lih tom: nie, mai: joh jhan: ka sinngao Maix pa mawh pui pa taug pa mao khankix heue:. 10 Pui Maix khankix hoik yaox dee ot dee koe: tix heue:. Simiang Siyiex eue:, Maix hoik rien tix deuh bwanson: ka son kix pui pa hot pa sibhawm: heue:. 11 Mawh kheu Siyiex tawx lox kieh pui hu: sidiex lox bwan: gauxrhawm: gauxrhi: ka son pui pa ang nyang tawng khankix heue:. 12 Simiang Khunhawkham mai: kru naing nawh khankix to: heue:, mai: bon: pa deuk daux nyiex nawh khankix, gwieh tix ih ka kraung khrai: pa hoik pon kix heue:. 13 Mawh kheu hoik caw pex tix ot sinax gawng mai: awm: sikaux pa hoik om: pruik tix ka mau, mai: hauk tix ka khri: raoh heue:. 14 Siyiex Cao: pa grum mai: siawp sibrawm pa ting, yam kieh Nawh Cub Simiang khunhawkham khankix, pung prang: dee ot kix tan:, mai: awm: rawm: rha: pa lih ka piang gawng Zalamon heue:. 15 Gawng Basan pa lhaong: pa choek pa grum naog mawh gawng Basan cie Siyiex heue:. 16 Gawng pa grum naog pa lhaong: pa choek khankix eue:, yuh pa tix pex lai jiang ka gawng pa simie Siyiex tix ot yuh ka mawx? Mai: Simiang Siyiex yuh dee ot Nawh, ka piang gawng tan:, jheeng: jheeng: leeing: ju leeing: phan: heue:. 17 Ling: brung cie Siyiex pa nie lheu: khaing: kaing: mheen: kaing: sien:, lih hoek khaing: gawng Sina mai: hu: ka dee ot pa singax singeh heue:. 18 Yam deeh haok Nawh Cao: ka dee lhaong:, Nawh giex tix viex pui hu: tom: nie, mai: Simiang Siyiex ot ka daux sinax kawn: pui, mai: pon rieb khawngphak laksawng: khaing: pui Nawh khankix, mai: khawm: pui pa tieh pa feen heue:. 19 Siyiex mawh pa koe: bwanson: ku jheeng: jheeng: mai: Cao: pa taoh ka ex yam tuktiak tukte: pui ka ex heue:. 20 Simiang Siyiex ex mawh Cao: pa taoh ka ex, mai: mawh Siyiex Cao: pa taoh ex lih khaing: ka daux krax pa yum heue:. 21 Siyiex tak sang tawk kaing: pui pa koeng ka Nawh, mai: raig tix tik ngawg pui pa yuh phimap phigrham: tete heue:. 22 Siyiex ah nin:, Aux tak viex kix hoek khaing: meung Basan mai: Aux viex kix hoek khaing: rawm: sigrit sigra: pa raux. 23 Phan: yuh nan:, maix tak dig ka nham: kix, mai: sox maix khankix tak sang lied tix ih nham: kix heue:. 24 Simiang Siyiex eue:, kix hoik yaox pa hu: Maix, Siyiex aux, mai: Simiang Khunhawkham aux, ka dee singax singeh heue:. 25 Cao: pa rhax lai hu: sivoe, mai: bon: krih cao: tah kraung: hu: sinax, mai: cao: pa tah ting: hawt khaix heue:. 26 Ceu pui Isarilax khawm: uik eue:, yaogyaw ka Siyiex, ka daux dee khrawm: pui haoh pui hun: khankix paox tix heue:. 27 Jah ka Benyamin pa iak mai: tom: hoek ka Simiang Yudax, mai: Simiang Zebulon, mai: khawm: Simiang Napthalix heue:. 28 Simiang Siyiex eue:, jhi: ex yaox siawp sibrawm Maix liak. Simiang Siyiex eue:, kieh bwanson: pa yuh Maix ka ex kaux cong: liak. 29 Kieh Simiang khunhawkham khankix, viex khawngphak laksawng: ka Maix, son daux nyiex bwan: pa koe: ka daux veng Yerusaliem liak. 30 Mai: sidiex gau ka tosat pa caox pa hai:, pa ot ka daux tiag priem ang ah, mai: cub phong: moi praix (Oksabax) mai: kawn: moi pa awn: ju pa eei: pui khankix, viex bliah mau mai: krub ka Maix ka daux pa viex rhawm: awn: rhawm: tiem liak. Ceu pui pa simie tix yuh naing khankix, kieh pung prang: hu: ku dah ku dee liak. 31 Kieh cao: cau Simiang khaing: meung Ejiptux hoek liak, mai: kieh pui meung Ethiopia: nied tix yaog taix tix ka Siyiex heue:. 32 Can meung pa koe: ka piang haktiex khawm: uik eue:, rhax lai yaogyaw ka Siyiex awawx. 33 Rhax lai yaogyaw ka Siyiex Cao: pa jah tom: dix, mai: Cao: pa brug ka raoma: ka piang raoma:, jhak heue:, Nawh Cao: ploi: lox pa ting pa sinum hu: heue:. 34 Mai: rieb tix teei grawng: pa ting Siyiex siawp sibrawm awawx, min: plakngai: Nawh koe: ka piang pui Isarelax mai: siawp sibrawm Nawh kieh sidawng: ka daux paiawm: heue:. 35 Simiang Siyiex eue:, Maix mawh pa khaw: ex tix lhat graung ka praix dee singax singeh Maix heue:. Siyiex Isarilax mawh Cao: pa tawxriang rao mai: siawp sibrawm ka pui Nawh khankix heue:. Kieh Siyiex koe: bwanson: liak.

Simin Ting 69

Lox Pa Kok Son Sang Teem:

1 Simiang Siyiex eue:, taoh aux liak, grawh grawng: nawh, rawm: hoik hoek mee: ngawg aux heue:. 2 Caong aux ang koe: dee dig, hoik blawn daux glaox dee raux heue:. Mai: aux hoik hoek dee raux rawm:, mai: pukpak rawm: hoik kheem: hoik lhop ka aux. 3 Aux kied taug mao mai: hoik si oh ghok ka kok yo tix Maix, mai: ngai: aux kawx hoik meu: ka maong tix jhak Maix, pa mawh Siyiex aux heue:. 4 Pui pa nieb koeng ka aux, nie lheu: khaing: hauk kaing: aux heue:. Mai: pui pa simie tix yuh aux laux khankix, nie lheu: ting riang khaing: aux, mai: aux yaox tix deeh viied kraung pa ang aux teei heue:. 5 Simiang Siyiex eue:, Maix hoik tawng mawh aux pui pa caox, mai: phimap aux ang pon tix mox sivoe ngai: Maix heue:. 6 Simiang Siyiex Cao: kru naing raoma: eue:, mawh kheu aux, paw kieh pui pa krox jun pot ka Maix hoek krax pa kaig pa tua liak. Siyiex ceu pui Isarilax eue:, mawh kheu aux, paw kieh pui pa sawg ka Maix hoek krax pa lhat pa graung liak. 7 Aux hoik yaox tix kham: krax pa sa pa lao, mai: krax pa kaig pa tua hoik naog ka ngai: aux kheu Maix heue:. 8 Aux hoik awm: nyo ka daux puxaik aux, mai: awm: pui tang: praix tang: klawng: sivoe ngai: kawn: nyiex kawn: ma: aux khankix heue:. 9 Mai: krax khirhawm: khirhi: pa dex mai: nyiex Maix hoik bleet ka aux heue: . Lox pa sa pa lao kix ka Maix hoik hoek ka piang aux heue:. 10 Yam yiem aux khawm: rhawm: khawm: rhi: tix, mai: twah pa ih pa un: kawx, kix sa lao ka aux heue:. 11 Yam ceep aux kraung chee: rhix, kix ah lox jiem: lak law: ka aux heue:. 12 Yam ngawm kix bang: kum: daux siviex lawng, mai: yoek ka plai: mai: ah lox rhax grawng: aux heue:. 13 Simiang Siyiex eue:, phan: mawh aux, rawg bwan: ka Maix, bawg yam pa khaw: pa mhawm:, Siyiex eue:, awm: pa grum naog krax caoxrhawm: Maix, mai: sijax mukheu Maix, deeh pawk lox aux mai: taoh aux liak. 14 Mai: taoh aux lih khaing: daux glaox mai: paw kieh aux blawn liak, kieh aux luat luan khaing: tawm: taix pui pa koeng ka aux mai: rawm: pa raux liak. 15 Paw kieh rawm: hwan: kheem: aux liak, paw kieh aux glip dee raux liak, paw kieh rawm: kheem: eet aux liak. 16 Simiang Siyiex eue:, mawh kheu bwanson: pa mhawm: pa yuh Maix mai: nghiet lox aux liak, veeh ngai: Maix ka aux, ka daux pa caoxrhawm:, krax moh krax rhawm: Maix tom: nie liak. 17 Paw mox ngai: Maix khaing: aux pa mawh siliex Maix liak, krax pa khirhawm: khirhi: hoik hoek ka piang aux, nghiet lox aux laung laung liak. 18 Greed tix hoek dex ka ju aux, mai: taoh aux liak, mawh kheu kied haoh pui pa koeng ka aux, kieh aux luan khaing: kix liak. 19 Maix hoik tawng grawng: pa yaox aux tix kham: geu:, ka pa sa pa lao mai: pa kaig pa tua, mai: laux min: plakngai:, mai: pui pa koeng ka aux khankix, hoik sidawng: sivoe ngai: Maix heue:. 20 Mawh kheu lox pa sa pa lao, rhawm: aux hoik bih hoik tug, mai: aux krox jun pot, mai: pui pa sang caoxrhawm: ka aux ang koe: tix kaux kawx, mai: aux sawg pui pa sang kieh aux nyawmrhawm: nyawmrhi: kawx, ang yaox tix kaux kawx heue:. 21 pie sang ih aux kawx, kix tawx aux ih sidah song:, pie sang nyaux aux rawm: kawx, kix tawx aux nyaux sidah niex heue:. 22 Kieh pheen: sawm: kix mawh kie pa hoik taong: sivoe ngai: kix, pa yuh kix kieh deeh hoek ka piang kix liak. 23 Kieh ngai: kix dug, son ang kix sang yaox mai: kieh nyoi kix siyaung: hu: jheeng: jheeng: liak. 24 Kieh krax songrhawm: Maix Cao: hieh ka piang kix, mai: kieh krax meet rhawm: Maix hawt krup kix liak. 25 Kieh dee ot kix yien: tom: ang mhong: lox tid tix, pie pa ot daux nyiex gox kix kawx, paw lai kieh koe: tix kaux kawx. 26 Grawh grawng: nawh, kix tuktiak tukte: ka pui pa sivied Maix, mai: kix baox lux ka pui pa hoik kieh Maix kix saux heue:. 27 Baox thie: phimap ka piang phimap ka kix, paw kieh kix laig ka daux pa rah pa see Maix. 28 Maix Preet tix tik ceukaux kix ka daux carang pa im: ju, mai: paw lai tiem: tix deuh ceukaux kix tau mai: pui pa rah pa see. 29 Phan: mawh aux hot sibhawm: mai: kharhawm: kharhi: tix heue:. Simiang Siyiex eue:, bwanson: krax taoh Maix tak yaog aux ting lhaong: heue:. 30 Aux rhax lai yaogyaw ka ceukaux Siyiex, mai: plak jhi: ka bwanson: Nawh Cao: heue:. 31 Pa yuh nan: nie lheu: khaw: rhawm: Simiang Siyiex, khaing: moi pa grum koe: khawm: rung: khawm: kloh heue:. 32 Pui pa awn: rhawm: awn: rhi: khankix yaox mai: gauxrhawm: gauxrhi: heue:. Pui pa sawg ka Siyiex khankix eue:, kieh pex koe: riang rao liak. 33 Simiang Siyiex nghiet ka lox pui hot pui sibhawm:, mai: Nawh ang nieb yuh ka pui Nawh, pa hoik giex hoik laung khankix heue:, 34 kieh raoma: haktiex rawm: sigrit sigra: mai: kawn: pui khawm: uik yaogyaw ka Siyiex heue:, 35 Siyiex taoh ka veng Zion mai: deeh cox veng Yudax, kix ot tan: mai: giex kaing: heue:. 36 Ceu cat kawn: praix siliex Nawh khankix, tak pon tix cie sin: veng an, mai: pui pa moh ka ceukaux Nawh Cao: khankix yaox tix ot tan: heue:.

Simin Ting 70

Lox Rawg Bwan:, Son Sang Teem:

(Yawgyaw 40:13-17) 1 Simiang Siyiex eue:, Maix taoh aux liak, Simiang Siyiex eue:, nied tix teem: coi aux liak. 2 Pui pa sawg tix pah ju aux khankix, kieh kaig tua mai: laux pakngai: liak, mai: pui pa simie tix yuh pa caox khankix, kieh kix lhat graung mai: hoek krax pa kaig pa tua liak. 3 Can pui pa ah nin: ka aux, ha ha:, ha ha:, kieh kix voi rhawm: mai: hoek krax pa kaig pa tua liak. 4 Can pui pa sawg ka Maix khankix, kieh kix gauxrhawm: gauxrhi: ka daux Maix liak, can kix pa khaw: rhawm: khaw: rhi: ka bwanson: krax taoh Maix, mai: kix ah nin:, kieh min: plakngai: Simiang Siyiex ting jheeng: jheeng: liak. 5 Phan: mawh aux, viang aux hot sibhawm: kawx, nied hoek ka aux liak, Maix mawh Cao: pa teem: coi aux, mai: taoh ka aux heue:. Simiang Siyiex eue:, paw lai koi, niied hoek liak.

Simin Ting 71

Lox Rawg Bwan: Tax Kuad Tix Kaux

1 Simiang Siyiex eue:, aux deuh rhawm: ka Maix heue:, kieh aux luan khaing: krax pa kaig pa tua jheeng: jheeng: liak. 2 Awm: pa koe: pa rah pa see Maix kieh aux luan liak, veeh yhaok Maix plak aux mai: taoh aux liak. 3 Kieh Maix mawh rang: ting dee ot aux, mai: dee hoek aux jheeng: jheeng: liak. Maix koe: siawp sibrawm tix taoh aux, grawh grawng: nawh, Maix mawh rang: ting aux, mai: tab dee deuh aux rhawm: heue:. 4 Siyiex aux eue:, taoh aux khaing: daux tawm: taix pui pa caox pa caig mai: pa ang rah ang see liak. 5 Simiang Siyiex eue:, Maix mawh pa krox jun pot aux, mai: Maix mawh dee deuh aux rhawm: tom: yam mawh aux kawn: nyawm heue:. 6 Aux deuh rhawm: ka Maix tom: yam keh aux, mai: aux hoik pon bwanson: Maix tom: yam kawn: ot aux daux vaig miex tix, mawh kheu nan:, aux tak yaogyaw ka Maix jheeng: jheeng: heue:. 7 Viang aux awm: ceu pa daox pa am: sivoe ngai: pui haoh pui hun: khankix kawx, Maix mawh dee deuh aux rhawm: pa kaux pa cong: heue:. 8 Jheeh aux naog ka pa yaogyaw ka min: plakngai: Maix ku singaix heue:. 9 Paw lai tik ka aux, yam hoik kuad aux liak, paw lai tik vud aux, yam hoik iak riang rao aux liak. 10 Pui pa koeng ka aux, pa ot tang: plak khankix, salao ka aux heue:. Kix jawm tix teei ju aux. 11 Siyiex hoik tik nawh, ex hawt pheet tix giex nawh, pui pa taoh nawh ang koe: tix kaux kawx, kix ah nan: heue:, 12 Simiang Siyiex eue:, paw lai ot singai khaing: aux liak. Siyiex eue:, nied tix teem: coi aux laung laung liak. 13 Kieh pui pa phit pa lud ka ju aux khankix hoek krax pa kaig pa tua, mai: hoek krax pa laux pa som heue:. Kieh pui pa sawg tix deuh phimap ka aux khankix, hoek ka daux pa sa pa lao mai: hoek krax pa som pa nai: liak. 14 Phan: mawh aux, krox jun pot ka Maix jheeng: jheeng:, mai: tak sang nie lheu: yaogyaw piang yaogyaw ka Maix heue:. 15 Jheeh aux tak sang krai pa rah pa see Maix, mai: grawng: krax taoh Maix ku singaix heue:. Mai: ang dak uik simin bwanson: Maix Cao: heue:. 16 Ka daux siawp sibrawm Siyiex aux tak sang krai grawng: krax pa rah pa see Maix khaing: heue:. 17 Simiang Siyiex eue:, Maix hoik gau aux tom: yam mawh aux kawn: nyawm heue:. Maix hoik jhi: ceu pa daox pa am: Maix tom: singaix yamin heue:. 18 Simiang Siyiex eue:, viang aux hoik riex ju mai: hoik paing hauk kaing: kawx, paw awt nyang tik vud aux ha:, mawh kheu aux, ang nyang yaox tix jhi: siawp sibrawm Maix ka pui in kix, mai: pui tak sang koe: khaix khankix heue:. 19 Simiang Siyiex eue:, krax pa rah pa see Maix mawh pa kied ting kied lhaong: heue:. Siyiex eue:, pui mawx tak awm: Maix? 20 Maix hoik jhi: aux yaox krax pa khirhawm: khirhi:, mai: ceu pa nu pa khawm: tom: nie, mai: deeh kieh aux nyawmrhawm: nyawmrhi:, mai: kieh aux deeh kaoh khaing: haktiex pa raux heue:. 21 Maix hoik kieh aux magmi mai: nyawmrhawm: nyawmrhi:, ka daux singaix pa hoik luan heue:. 22 Simiang Siyiex eue:, aux tah ting: mai: yaogyaw ka sijax mukheu Maix, Siyiex Cao: pa singax singeh ceu pui Isarilax eue:, aux tah ting: mai: rhax lai yaogyaw ka Maix heue:. 23 Yam rhax aux lai ka Maix, jheeh aux kawx tak gauxrhawm: gauxrhi: mai: ju aux pa hoik taoh Maix kawx, gauxrhawm: gauxrhi: heue:. 24 Dak aux kawx, tak sang krai grawng: pa rah pa see Maix, ku singaix jheeng: jheeng: heue:, grawh grawng: nawh, pui pa sawg phimap pa phit pa lud aux, hoik hoek krax pa kaig pa tua mai: laux pakngai: heue:.

Simin Ting 72

Lox Rawg Bwan:, Son Simiang

Lox lai yawgyaw ka son Sawlamun

1 Simiang Siyiex eue:, tawx akhwang: krax pa prawng ca: pa rah pa see Maix ka kawn: Simiang khunhawkham liak. 2 Son sang chix prawng ca: nawh ka pui Maix rah see, mai: tawx krax pa rah pa see ka pui pa hot sibhawm: Maix khankix heue:. 3 Ka daux krax pa rah pa see Maix kieh gawng iak gawng ting khankix, tawx krax pa nyawmrhawm: nyawmrhi: ka pui Maix liak. 4 Mai: kieh nawh prawng ca: rah see ka pui pa hot pa sibhawm: mai: teem: coi ka pui pa ang kub ih khankix, mai: yuh laux leeing: ka pui pa tuktiak tukte: ka pui heue:. 5 Kieh ceu kawn: pui ku ju, lhat graung ka Maix, glang: yam kawn: koe: khix, singaix heue:. 6 Nawh Cao: tak sang lih hoek awm: lhiex, pa lih piang rib pa hoik vawg mai: awm: lhiex pa kieh haktiex caux heue:. 7 Mai: yam singaix baux ju nawh, pui pa rah pa see sang magmi, mai: nyawmrhawm: nyawmrhi: tom: pa riang khix ang nyang grai: heue:. 8 Mai: rawm: sigrit sigra: tix mu: tom: sidah hoik tix mu:, mai: rawm: klawng: ting tix klawng: hoik tix klawng:, tom: sidah haktiex nawh tak sang giex kaing: heue:. 9 Mai: pui pa ot ka daux tiag daux tu krub sivoe ngai: Nawh , mai: pui pa koeng ka Nawh khankix, tak sang lied tix ih phawng: tiex heue:. 10 Simiang khunhawkham meung Tasux khankix, mai: khunhawkham rawm: sigrit sigra: khankix, hoek tawx gha: ka nawh, mai: khunhawkham Shebax mai: khunhawkham Sebax hoek tix tawx khawngphak laksawng: ka nawh heue:. 11 Mai: lheu: khaing: an, Simiang khunhawkham khawm: uik, tak grux tix krub ka nawh, mai: ceu pui khawm: uik tak yuh kaing jhaw: nawh heue:. 12 Grawh grawng: nawh, yam kok yo pui pa ang kub pa ih pa un:, mai: pui pa hot pa sibhawm: pa ang koe: dee deuh rhawm: khankix, Nawh tawx krax pa nyawmrhawm: nyawmrhi: ka kix heue:. 13 Nawh caoxrhawm: mai: taoh ka ju kix pui pa hot pa sibhawm: mai: pui pa ang kub pa ih pa un: khankix heue:. 14 Nawh taoh ju kix lih khaing: daux tawm: taix pui pa pie pa lhen:, mai: pui pa tuktiak tukte:, mai: nham: kix mawh pa ngawh sivoe ngai: Nawh heue:. 15 Yam im: ju nawh, kix teei khri: meung Shebax mai: tawx ka nawh, mai: kix rawg bwan: son nawh, mai: yaogyaw ka nawh ku singaix jheeng: jheeng: heue:. 16 Mai: plix nghox plix koi: tak teen haoh ka daux meung nawh, awm: rib riem pa koe: ka daux tiag gawng Lebanon heue:. Pui veng nawh kawx, tak haoh hun: awm: rib riem ka daux meung an heue:. 17 Ceukaux Nawh tak kaux cong: mai: ting lhaong: haok hwan: jheeng: jheeng: tom: ang singaix grai: hu: heue:. Mai: kawn: pui khankix tak pon bwanson: Nawh, pui tang: ceu tang: cat tak yaogyaw bwanson: khawm: uik heue:. 18 Kieh Simiang Siyiex, Siyiex pui Isarilax, Cao: pa yuh ceu pa daox pa am: tix kaux khaing: koe: bwanson: liak. 19 Kieh ceukaux min: plakngai: Nawh koe: bwanson: jheeng: jheeng: liak, kieh min: plakngai: Nawh grum naog mai: tah hu: ka piang haktiex in khawm: uik liak, Amen! mai: Amen! 20 Lox rawg bwan: Dawit kawn: Yeshie: hoik hoik heue:.

Simin Ting 73 Baux Loe:

Pa Rah Pa See Cie Siyiex

Lox lai pa yawgyaw Asax

1 Siyiex tawx bwanson: ka piang pui Isarilax pa singax singeh ka daux rhawm: khankix tete telai heue:. 2 Phan: mawh aux caong aux bheet mai: dex lud krax hu: heue:. 3 Grawh grawng: nawh, yam yaox aux magmi pui pa ang rah ang see, mai: pui pa ting rhawm: ting rhi: khankix, aux briex boh rhawm: ka kix heue:. 4 Kix ang yaox tix kharhawm: kharhi: mai: koe: riang rao tom: sidah yum heue:. 5 Kix ang yaox ceu pa nu pa khawm: awm: pui tang: kaux, mai: kix ang yaox tix kham: ka krax pa tuktiak tukte:, awm: pui khankix. 6 Mawh kheu in, kix ting rhawm: ting rhi:, awm: pa tauk soi: ka ngawg tix, mai: jawg tix ceep kraung pa tuktiak tukte: heue:. 7 Mawh kheu hoik kluing:, ngai: kix naog ka ceu pa caox pa caig mai: rhawm: kix hoik luan keud luan sawn: tix heue:. 8 Kix chix yuh pa caox pa caig mai: tuktiak tukte: ka daux lox nyiah mai: chix krai lox pa ting pa lhaong: heue:. 9 Jheeh kix tiex tu ka raoma:, mai: dak kix vung viang, tah hu: ka haktiex heue:. 10 Mawh kheu in, pui Siyiex khankix, deeh hoek ka kix mai: yumrhawm: ka lox kix, awm: pa chix sak chix ih heue:. 11 Mai: kix ah nin:, Siyiex chix tawng yuh ka mawx? Khex koe: krax tawng krax yung mai: Siyiex lie? 12 Pui pa ang rah ang see an khankix, mai: kix magmi jheeng: jheeng:, mai: kraung khrai: kix kawx, haoh hun: tom: nie heue:. 13 Viang aux kieh rhawm: tix singax kawx, ang doh koe: bwanson:, mai: viang aux ploi: phimap tix, mai: khoek taix kawx, ang koe: bwanson:. 14 Aux yaox tix kham: geu: krax pa laklheet krax pa sidiex ku ngawb ku singaix heue:. 15 Phan: aux ah, khaw: rhwm: ka daux rhawm: tix, aux awm: pa pie pa lhen: ka ceu pui Maix heue:. 16 Yam keud yam sawn: aux ka grawng: ceu an, aux ce: mawh pa nu pa khawm: heue:. 17 Khaix hoik hoek aux ka daux nyiex bwan: pa singax singeh Siyiex, aux tom: tawng grawng: pa sidah heue:. 18 Maix hoik teei tix sau: kix ka dee kied nyu: tete, mai: ka daux pa laux pa leeing: heue:. 19 Ka daux tix vud tix cu khaing:, kheu pa lhat pa graung, kix hoek krax laux lak pak leeing: dom: mawx dom: an heue:. 20 Simiang Siyiex eue:, awm: pa deuh pui tix tawng grawng: pa camaox yam siduad khaing: it tix, mai: yam siduad Maix, tak kieh ceu pa yuh kix mawh pa ang koe: cee koe: cak heue:. 21 Yam kied sauxrhawm: aux, tuat hoek tom: sok lax aux heue:. 22 Aux mawh pui pa daox pa aw:, pa ang koe: cuyi pingnya, awm: tosat sivoe ngai: Maix heue:. 23 Viang mawh kawx nan:, aux ot mai: Maix jheeng: jheeng:, mai: Maix giex ka taix khawn: dawm: aux heue:. 24 Maix tawx krax tawng krax yung mai: thong: aux hu: heue:. Khaix an Maix tak teei aux hu: ka daux min: plakngai: Maix heue:. 25 Lheu: khaing: Maix tix kaux, pui mawx tak sang ot mai: aux daux meung raoma:? Lheu: khaing: Maix tix kaux, ka piang haktiex in, aux kawn: lo pui mawx? 26 Nex nham: aux, mai: rhawm: rhi: aux, hoik laux hu: heue:. Viang mawh kawx nan:, Siyiex mawh rang: ting mai: riang rao son ju aux leeing: ju leeing: phan: heue:. 27 Jhak heue:, pui pa ot singai khaing: Maix, tak hoek krax laux krax leeing: heue:. Mai: pui pa gwieh hu: khaing: Maix, mai: pa phit pa lud khawm: uik, yuh laux leeing: heue:. 28 Phan: mawh aux, greed tix hoek dex mai: Siyiex mawh pa mhawm: son aux heue:. Aux deuh rhawm: ka Simiang Siyiex, mai: krai grawng: pa yuh Nawh ka pui khawm: uik heue:.

Simin Ting 74

Lox Rawg Bwan:, Son Sang Taoh

1 Simiang Siyiex eue:, mawh kheu pa tix Maix lai tik vud aux jheeng: jheeng:, mawh kheu pa tix Maix lai songrhawm: songrhi: ka yung: khankix, pa sax sawm: ka dee sawm: tix? 2 Doh keud ka cub pui Maix khankix dix, mai: pui pa hoik laug Maix, son sang mawh sin: ang ah, mai: son sang ot Maix ka gawng Zion ang ah heue:. 3 Hoek tix jhak ka dee hoik yieh Maix tix tik ka pui pa koeng pa yuh pa ang rah ang see ku ceu khawm: uik, ka daux nyiex bwan: Maix pa singax singeh liak. 4 Pui pa koeng ka Maix khankix, kok yo sinax pui Maix heue:. Mhai: sakse: Maix, kix yuh mawh mhai: sakse: cie tix heue:. 5 Mai: kix yuh tix mawh awm: pui pa viex moe: mai: hu: kid khaox ka daux tiag. 6 Yam in kix tieh tix viex moe:, daix mai: yieh tix tik kraung nyiex bwan: Maix heue:. 7 Kix gleeing tix tik ka nyiex bwan: Maix pa singax singeh, nyiex bwan: dee ot ceukaux Maix kawx, kix hoik yeen hoek tom: sidaing: tiex heue:. 8 Mai: kix ah nin: ka daux rhawm: tix, "Ex tak yieh tix tik ka ceu pui kix pak lawg," mai: gleeing tix tik ka nyiex bwan: Siyiex, pa koe: ka piang haktiex khawm: uik heue:. 9 Ang ex lai yaox mhai: sakse: tokaux tix, tix ceu kawx, cao: jhai: ka ang koe:, cao: pa krai ex mhong: grawng: bawg yam ka ang koe:, mai: kawn: koe: miex grheung: ang tawng? 10 Simiang Siyiex eue:, pui pa koeng ka ex, tak sa lao ka ex miex grheung:? Pui pa koeng ka Maix yuh pa ang cee ang cak ka ceukaux Maix jheeng: jheeng: lie? 11 Mawh kheu pa tix, Maix lai deeh yawn: taix khawm: dawm: Maix khaing: ex yuh ka mawx? Teei taix Maix lih khaing: naok Maix mai: yuh kix laux leeing: heue:. 12 Tom: yam jah, Siyiex dawg mawh Simiang Khunhawkham Cao: pa taoh ka sinax haktiex tete heue:. 13 Maix hoik kieh rawm: sigrit sigra: gwieh hu: ka daux siawp sibrawm, mai: Maix hoik raig tix tik kaing: siyawng pa ot ka daux rawm: heue:. 14 Maix hoik raig tix tik kaing: kax ting (Levitan) mai: tawx ka can pa ot ka daux tiag daux tu son sang ih kix heue:. 15 Maix kieh daux rawm: keut mai: rawm: rawng lih, mai: rawm: klawng: pa koe: rawm: jheeng: jheeng: kawx, Maix kieh kroh hu: heue:. 16 Ponngaix mai: ponsawm: kawx, mawh cie Maix, mai: Maix hoik yuh pa riang mai: singaix heue:. 17 Maix hoik deuh bawg yam rung bawg yam kwat, mai: mee: haktiex in khawm: uik heue:. 18 Simiang Siyiex eue:, viang pui pa koeng sa lao ka Maix mai: pui pa caox pa caig yuh pa ang cee ang cak ka ceukaux Maix kawx, doh keud ka kix liak. 19 Paw lai teei ju sikaux Maix tawx ka totiag khankix liak. Mai: paw lai piawm: ka pui pa hot pa sibhawm: jheeng: jheeng: liak. 20 Maix doh keud ka sijax mukheu Maix liak, grawh grawng: nawh, ka daux pa vhaik ka piang haktiex in, hoik naog dee ot dee koe: pui tud pui rhim: mai: pa tuktiak tukte: khankix heue:. 21 paw kieh pui pa yaox tix kham: geu: ka krax pa tuktiak tukte: hoek krax pa kaig pa tua mai: krax pa lauxrhawm: lauxrhi: liak. Mai: kieh pui pa hot pa sibhawm: khankix, yaogyaw ka ceukaux Maix liak. 22 Simiang Siyiex eue:, kaoh mai: prawng ca: ka see: Maix liak, doh keud ka pui pa caox pa caig, pa sa pa lao ka Maix jheeng: jheeng: liak. 23 Paw lai piawm: ka lox pui pa koeng ka Maix, lox pa maw: pa lawh pui pa tieh pa feen ka Maix nie lheu: haoh hun: sinyek sinyek heue:.

Simin Ting 75

Siyiex Cao: Prawng Ca:

Lai pa yawgyaw Asax 1 Simiang Siyiex eue:, ex yaogyaw ka Maix heue:, kheu hoik dex ceukaux Maix, mai: ex khawm: mhai: sakse: ceu pa daox pa am: pa yuh Maix, mai: ex yaogyaw ka Maix heue:. 2 Bawg yam pa bak aux ka kix, aux prawng ca: ka kix rah see heue:. 3 Haktiex mai: pui haktiex, viang yungyiang: hu: kawx, Aux kieh jaong num: haktiex kaux cong: heue:. 4 Aux ah nin: ka pui pa ting rhawm: ting rhi: khankix, pex paw lai ting rhawm: ting rhi:, mai: pui pa caox pa caig khankix, paw yuh rung: tix choek; 5 Paw yuh rung: tix choek, mai: pui pa ang rah ang see khankix, paw yuh rung: tix choek, mai: paw kieh ghok kiien: lox sikah. 6 Grawh grang nawh, krax yaogyaw, ang mawh pa kaoh khaing: plak lih singaix mai: plak klip singaix, mai: ka daux tiag daux tu. 7 Cao: pa prawng pa ca: mawh Siyiex heue:. Nawh yeen tix kaux tiem mai: yaog tix kaux lhaong: heue:. 8 Ka daux tawm: taix Simiang Siyiex, koe: kawk pa hoik naog rawm: plix siiet pa khiien: heue:. Nawh prauk rawm: plix siiet pa hoik klao: mai: rawm: sidah lih heue:. Kawn: pui piang haktiex pa ang rah ang see khankix khawm: uik biiet tix nyaux ka glhaok an heue:. 9 Phan: mawh aux yaogyaw ka Siyiex ceu pui Yakop mai: rhax lai yawgyaw ka jheeng: jheeng: heue:. 10 Aux tak kid tix tik rung: choek pui pa ang rah ang see khankix, mai: aux tak yaog rung: choek pui pa rah pa see khankix heue:.

Simin Ting 76

Siyiex Mawh Cao: Pa Pex

Lai pa yawgyaw Asax

1 Pui pa tawng ka Siyiex koe: ka daux meung Yudax, mai: ceukaux Nawh Cao: ting lhaong: ka daux Isarilax heue:. 2 Nyiex gox Nawh Cao: koe: ka veng Saliem, mai: dee ot Nawh mawh ka piang gawng Zion heue:. 3 Ka dee an Nawh Cao: raig tix tik te, kraung naing, vaig, mai: kraung naing pa tie naok khankix heue:. 4 Maix nie lheu: ting min: plakngai: khaing: gawng pa ot totiag totu khankix heue:. 5 Pui pa vao pa kua: khankix, laig it khaix yaox kix tix kham: geu: pa tud pa rhim: heue:. Mai: pui pa ting riang ting rao khankix, ang yaox taix kix tix kaux kawx. 6 Siyiex ceu pui Yakop eue:, ka daux pa sivied Maix tix gau, cao: pa brug ling: brung mai: khawm: brung sidaing: laig it heue:. 7 pa khaw: ex tix lhat graung kah mawh ngie Maix tix kaux khaing:, yam songrhawm: songrhi: Maix, pui mawx tak sang pon tix cung sivoe ngai: Maix. 8 Siyiex taoh ka kawn: pui haktiex, pa awn: rhawm: awn: rhi: khawm: uik heue:. 9 Yam kaoh Nawh tix prawng ca:, Nawh ploi: lox prawng ca: lih khaing: raoma:, mai: haktiex lhat graung mai: yien: yawg tix heue:. 10 Krax pa songrhawm: kawn: pui, deeh tieh tix mawh pa yaogyaw ka Maix, mai: krax pa songrhawm: songrhi: pa kawn: deuk khankix kawx, Maix hoik rawd tix deuh ka maox rawd nyoi heue:. 11 Kaux sijax mukheu, awm: pa hoik yuh maix tix deuh sijax mukheu ka Simiang Siyiex pex awawx. Mai: kieh can pui pa ot sivie Maix, viex khawngphak laksawng: hoek ka Maix mai: lhat graung ka Maix Cao: heue:. 12 Nawh Cao: yeen tiem ka kawn: Simiang mai: kieh Simiang khunhawkham haktiex khankix, lhat graung heue:.

Simin Ting 77

Tawx Krax Nyawmrhawm: Yam Khirhawm:

Lox lai pa yaogyaw Asax

1 Aux ploi: lox mai: kok yo ka Siyiex heue:, Mai: Nawh nghiet lox pa kok yo aux heue:. 2 Yam hoek aux krax khirhawm: khirhi:, aux sawg ka Maix Siyiex heue:. Yam ponsawm: aux yaog taix tix rawg bwan:, ju aux thiang: tix tik pa nyawmrhawm: heue:. 3 Aux keud grawng: Siyiex mai: khirhawm: khirhi: mai: ngia tix heue:. Aux keud rhawm: tix mai: lauxrhawm: heue:. 4 Maix kieh ngai: aux blah leeing: sawm:, aux khirhawm: khirhi: tom: ang lai pon sikah heue:. 5 Mai: Aux doh keud ka grawng: singaix pa hoik luan, mai: jhong: khix mee: num pa hoik luan dix. 6 Bawg yam ponsawm: aux jawg tix keud mai: rhax lai mai: aux chawk ka daux rhawm: tix ah nin:, mai: aux chawk cheng: ka ju tix heue:. 7 Siyiex khex hoik tik vud aux jheeng: jheeng: lie? Khaix in ang Nawh yuh bwanson: ka aux tix bawg kawx lie? 8 Mai: krax caoxrhawm: Nawh hoik uik jheeng: jheeng: lie? Sijax mukheu Nawh hoik laux leeing:, leeing: ju leeing: phan: lie? 9 Hoik piawm: Nawh krax caoxrhawm: lie? Nawh Cao: hoik prah hoik grham: krax caoxrhawm: pa moh, kheu songrhawm: songrhi: Nawh lie? 10 Phan: yuh nan:, aux lawk kham: geu: grawng: pa ting rhawm: aux heue:. Lheu: khaing: taix khawn: dawm: Siyiex, pa ting pa lhaong: khaing:, pa chix cox ka aux heue:. 11 Aux tak krai ka grawng: kaing pa hoik yuh Maix mai: doh keud ka ceu pa daox pa am: pa hoik yuh Maix tom: didix. 12 Aux keud grawng: ceu pa hoik yuh Maix, mai: krax prawng krax ca: Maix khankix heue:. 13 Simiang Siyiex eue:, daux krax Maix mawh pa singax singeh heue:. Siyiex mawx pa lheu: ting khaing: Maix Siyiex lie? 14 Maix mawh Siyiex Cao: pa chix yuh ceu pa daox pa am:, mai: pa hoik jhi: siawp sibrawm ka ceu kawn: pui khankix heue:. 15 Maix hoik teei plawng: taix mai: hoik taoh ka pui Maix, ceu pui Yakop mai: ceu pui Yosiep khankix heue:. 16 Simiang Siyiex eue:, rawm: khankix yaox ka Maix mai: lhat graung heue:. Mai: rawm: pa raux khankix kawx, yung yiang: heue:. 17 Paiawm: khankix, lih mawh rawm:, raoma: kawx, sinum praix heue:. Te Maix kawx, hoik tah hu: ku dah ku dee heue:. 18 Lox tuh sah Maix viex tix ka daux bhaung: keu: kang: lux, mai: puk plak praix khankix, hoik riang yuh haktiex heue:. Mai: haktiex kawx yung yiang: hu: heue:. 19 Daux krax Maix koe: ka daux rawm: sigrit sigra:, mai: grawng: hu: Maix kied sidaing: vieh, mai: khaix Caong Maix ang chix yaox sidawng:. 20 Maix hoik teei taix Mose mai: Aron, thong: ka pui Maix awm: cub phung: yung: heue:.

Simin Ting 78

Siyiex Mai: Pui Cie Nawh Khankix

1 pui cie Aux khankix eue:, veeh yhaok pex nghiet ka lox been li Aux, mai: gumlox pa krai Aux awawx. 2 Aux tak ang: moing tix, mai: krai lox phektem: ka pex, mai: Aux tak plak jhi: grawng: pa raux pa mox jah tom: didix heue:. 3 Mai: ex hoik mhong: hoik tawng grawh grawng: pa hoik krai tax ex khankix. 4 Mai: ex ang mox khaing: kawn: praix kix, son sang yaogyaw ka Simiang Siyiex, mai: siawp sibrawm: mai: ceu pa daox pa am:, pa hoik yuh Nawh Cao: khankix, krai ka kix, pa tak sang hoek tix mawh sax heue:. 5 Grawh grawng: nawh, Nawh Cao: deuh son sang kham: mhai: sakse: ka geh nyiex Yakop mai: deuh lox tawm: been li ka geh nyiex Isarilax heue:. Gumlox been li an, Nawh Cao: tawx ka tax ex, keeing: ex, son sang kieh kawn: praix kix tawng heue:. 6 Mai: kawn: praix kix pa keh khaix, deeh gau ka kawn: kix, kawn: kix tom: deeh sitoe: tix gau ka kawn: saux, kawn: sex kix tawng. 7 Son sang yumrhawm:, deuh kix rhawm: ka Siyiex, mai: son ang lai piawm: ka ceu pa hoik yuh Siyiex khankix, mai: son sang hawt tix yuh lox been li Nawh Cao: khankix, 8 son ang kix sang mawh pui pa tieh pa feen ka Siyiex, mai: son ang kix sang mawh rhawm: pui pa ang rah ang see, mai: son ang kix sang mawh khwan: pa ang kaux sijax ka Siyiex, awm: tax du kix heue:. 9 Ceu pui Epharim khankix, viang kix viex kraung naing mai: ak kawx, yam puing: naing kix deeh dak plak khaix heue:. 10 Kix ang lai krox ka sijax mukheu Siyiex, mai: kix ang hawt ka daux krax been li Nawh Cao:. 11 Mai: kix piawm: ka ceu pa daox pa am: pa jhi: Nawh Cao: ka kix heue:. 12 Nawh Cao: hoik yuh ceu pa daox pa am:, sivoe ngai: tax kix, keeing: kix, ka daux lung: Zoan ka daux meung Ejiptux heue:. 13 Nawh Cao: kieh rawm: sigrit sigra: gwieh mai: khrawm: tix tau mai: kieh kix tiang hu: heue:. 14 Bawg yam ponngaix Nawh Cao: kieh rong: paiawm: jhi: kix yaox daux krax, mai: bawg yam ponsawm: kieh pa riang ngu jhi: kix yaox daux krax leeing: sawm: heue:. 15 Nawh Cao: tawk simaox rang: daux tiag, mai: kieh rawm: lih tom: nie, mai: tawx kix nyaux heue:. 16 Mai: Nawh Cao: kieh rawm: pa lih khaing: daux rang: an, lih hu: awm: rawm: klawng: heue:. 17 Pui an khankix nie lheu: ting phit lud mai: tieh feen ka Siyiex Cao: pa ting pa lhaong: ka daux tiag daux tu heue:. 18 Kix hawt alo tix mai: keud daux rhawm: tix yuh nin:, ex cheu: mhaing: tix yaox pa ih pa un: ka Siyiex? 19 Mai: kix baox ah nin: ka Siyiex, "Khex pon khre: Nawh pheen: sawm: ex ka daux tiag daux tu lie? 20 Jhak heue:, kix ah lox map ka Siyiex mai: ah nin:, Nawh Cao: tawk ka rang: mai: chix kieh rawm: lih awm: rawm: klawng:, khaomun mai: nex kawx, Nawh Cao: tak sang pon tawx, pon khre: ka son pui Nawh khankix lie?" 21 Siyiex mhong: lox an mai: kied songrhawm: songrhi: heue:. Mai: kieh ngu gleeing tix tik kix geh nyiex Yakop mai: Isarelax heue:. 22 Grawh grawng: nawh, kix ang yumrhawm: ka Siyiex, mai: ang tawng ka bwanson: krax taoh Nawh Cao:. 23 Nawh Cao: tawm: lox ka paiawm: dee lhaong:, mai: paoh siviex raoma: heue:. 24 Nawh Cao: kieh Mannax lih, awm: lih lhiex mai: tawx pa ih pa un:, gaox, nghox son pa sang ih kix khaing: raoma: heue:. 25 Mai: kix khawm: uik, yaox tix ih ka khaomun pa ih pa un: kawncau Siyiex, pa tawx Nawh Cao: ka kix, mai: kieh kix ih tom: sak tix heue:. 26 Nawh Cao: kieh bhaung: plak lih singaix phlu: hu: ka raoma:, mai: Nawh Cao: teei siawp sibrawm Tix viex bhaung: caong ma: seh hoek heue:. 27 Nawh Cao: kieh nex lih tom: nie awm: lih lhiex, mai: pa awm: phawng: tiex pa mawh sim: pa pu: tom: haoh tom: hun: sidu awm: mhaik rawm: sigrit sigra:, lih ka piang kix heue:. 28 Nawh Cao: kieh rau hawt praok nyiex bang: dee ot kix heue:. 29 Nawh Cao: tawx ka kix, awm: pa simie kix tix ih tom: sak tix heue:. 30 Yam kawn: tak sawm: kix, mai: ang nyang tien sak, 31 krax pa songrhawm: songrhi: Siyiex deeh hoek ka piang kix, mai: Nawh Cao: pah pui brax pui kwa:, mai: teei ka pui Isarilax pa awn: ju khankix yum heue:. 32 Viang kix hoik yaox ceu pa daox pa am: ku ceu kawx, kix ang yumrhawm:, mai: ca: kawn: phit lud heue:. 33 Mawh kheu nan:, Nawh Cao: kieh singaix sawm: kix luan giex goeng mai: khix num kix sidah ka pa kharhawm: heue:. 34 Yam teei Nawh Cao: kix yum, kix sawg ka Nawh Cao: heue:. Kix deeh hoek tix sawg ka Nawh Cao: heue:. 35 Mai: kix doh keud ka grawng: mawh Siyiex rang: ting cie kix, mai: Siyiex Cao: pa ting piang khawm: uik, mai: mawh Cao: pa taoh ka kix heue:. 36 Viang mawh kawx nan:, mawh ngie jheeh giex, dak kix ah lox pa pie pa lhen: heue:. 37 Phan: mawh rhawm: kix, ang rah ang see ka Nawh, mai: ang kix tie kaux sijax ka Nawh Cao: heue:. 38 Viang mawh kawx nan:, phan: mawh Nawh Cao:, Caoxrhawm: ka kix, mai: ang tik ang vud ka kix, mai: pluat ploi: phimap phigrhawm: kix heue:. Mai: Nawh Cao: gun yeung tom: nie bawg, viang kied songrhawm: kawx Nawh ang awt yuh kix laux. 39 Mai: Nawh Cao: doh keud ka mawh kix ngie nex nham: khaing:, phan: khwan: hoik luan hu:, ang lai chix deeh hoek khaix heue:. 40 Mai: kix tieh feen ka Nawh Cao: ka daux tiag daux tu, mai: kix kieh Nawh Cao: songrhawm: songrhi: ka daux tiag dee ang pui ot ka dee yien: tom: nie bawg heue:. 41 Mai: kix cheuk tix yaox ka Siyiex lawx lawx, mai: yuh pa ang cee ang cak ka Siyiex Isarilax Cao: pa singax singeh heue:. 42 Mai: kix piawm: ka plawng: taix Siyiex pa taoh kix lih khaing: singaix bawg yam, yam ot kix ka daux tawm: taix pui pa koeng ka kix heue:. 43 Nawh Cao: hoik yuh mhai: sakse: ka daux meung Ejiptux, mai: yuh mhai: ceu pa daox pa am: ka daux lung: Zoan heue:. 44 Nawh Cao: kieh rawm: keut, rawm: klawng: khankix, lih mawh nham: tom: kieh kix ang chix ih chix nyaux heue:. 45 Nawh Cao: ploi: maing pa chix kiied, mai: khet khankix, pa chix yuh laux, hoek ka kix heue:. 46 Nawh Cao: kieh kawng mai: sido (araphax) yuh laux to: ma: to: koi: mai: kraung khrai: kix pak lawg heue:. 47 Nawh Cao: kieh mu: pre: yuh laux ka nhu: plix siiet khankix, mai: kieh lon: sidap yuh laux ka khaox ruh khankix heue:. 48 Nawh Cao: kieh mu: pre: yuh laux cub yung:, moi kix khankix yum, mai: kieh sah tuh, khawng: brie kix khankix yum heue:. 49 Nawh Cao: kied songrhawm: songrhi: ka kix, mai: tawx krax kharhawm: kharhi: mai: ploi: kawncau Siyiex pa caox khankix, hoek tix tuktiak tukte: ka kix heue:. 50 Nawh Cao: hoik rien tix deuh krax ka pa songrhawm: songrhi: Tix, mai: Nawh Cao: ang lai lhawk ka ju kix, kieh kix yum ka saux preng heue:. 51 Nawh Cao: pah kawn: Ai daux meung Ejiptux yum khawm: uik, pa mawh pui ting pui lhaong: khawm: dee ot pui Hamax heue:. 52 Phan: mawh pui Nawh khankix, Nawh kieh lih awm: cub yung: mai: viex kix lih daux tiag daux tu, awm: cub yung: heue:. 53 Nawh Cao: priex kix luan mhawm: mhawm:, mai: ang kieh kix koe: krax pa lhat pa graung, viang mawh nan:, Nawh Cao: kieh rawm: sigrit sigra: kheem: ka pui pa koeng khankix heue:. 54 Nawh Cao: thong: kix hu: tom: sidah, mee: haktiex Nawh Cao: pa singax singeh, mai: haktiex gawng lua pa pon Nawh ka taix khawn: dawm: pa giex tix kaing: heue:. 55 Mai: Nawh Cao: grheu: tix tik ka pui tang: ceu tang: cat khankix, sivoe ngai: kix, mai: gwieh kix ih haktiex, sin: pa khaw: kix tix pon, ka geh nyiex Isarilax mai: kieh kix sum: nyiex bang: dee ot kix tan: heue:. 56 Viang mawh kawx nan:, kix cheuk cheu: mai: tieh feen ka Siyiex Cao: pa ting pa lhaong:, mai: kix ang nghiet ka lox grawng: pa hoik kham: Nawh tix deuh sakse: khankix, 57 Mai: kix deeh tieh hu: mai: yieh lox sijax mukheu laux awm: tax du kix heue:. Kix hoik lud krax hu:, awm: ak pa vawk te heue:. 58 Kix teei dee ot pa lhaong:, mai: yuh Nawh Cao: songrhawm: songrhi: mai: krub ka rieng rao pa hoik yuh ka tawng khankix, kieh rhawm: Nawh Cao: sungsang heue:. 59 Siyiex hoik mhong: hoik tawng mai: Nawh Cao: lih songrhwm:, mai: kied seeing: brai: ka pui Isarilax heue:. 60 Nawh Cao: tik ka nyiex gox bwan: man: Silon pa deuh son pui Nawh khankix heue:. 61 Nawh Cao: teei siawp sibrawm: mai: min: plakngai: Nawh tawx hu: ka daux tawm: taix pui pa koeng khankix heue:. 62 Nawh Cao: teei tix tawx pui cie Nawh ka lawm vaig, mai: Nawh Cao: lih songrhawm: songrhi: ka sinngao cie Nawh khankix heue:. 63 Mai: kieh sinaw khankix yum daux ngu, mai: ang kieh bon: krih khankix yaox tix koe: mex. 64 Mai: Cao: giex kaing: li khankix laux, yum ka lawm vaig, lawm pliah, miexmhai tai nhang: khankix, ang lai kieh kix yiem. 65 Yam an Siyiex siduad awm: pui pa siduad khaing: it tix, mai: ting riang rao awm: pui pa nyaux rawm: plix siiet heue:. 66 Nawh Cao: tawx krax pa kharhawm: kharhi:, kieh pui pa koeng khankix, deeh dak plak khaix mai: kieh kix hoek krax pa kaig pa tua jheeng: jheeng: heue:. 67 Nawh Cao: teei tix tik ka nyiex gox Yosiep, mai: ang laug tix teei ka geh nyiex Epharim. 68 Viang mawh kawx nan:, Nawh Cao: laug tix teei ka geh nyiex Yudax mai: gawng Zion pa moh Nawh heue:. 69 Nawh Cao: sum: nyiex bwan:, pa singax singeh awm: pa koe: choek dee lhaong:, mai: awm: pa kieh Nawh haktiex kaux cong: jheeng: jheeng: heue:. 70 Nawh Cao: laug tix teei aux, Dawit lih khaing: daux kawg yung: heue:. 71 Nawh Cao: laug tix teei aux, awm: yung: miex pa priex kawn: tix, mai: kieh aux priex pui Nawh geh nyiex Yakop pa mawh sinngao Nawh ceu pui Isarilax khankix heue:. 72 Mawh kheu nan:, Nawh priex kix mai: thong: kix hu: ka daux tawm: taix tix, awm: pa koe: rhawm: Nawh heue:.

Simin Ting 79

Lox Rawg Bwan:, Son Sang Taoh

1 Siyiex eue:, pui tang: ceu tang cat khankix, hoik hoek ka daux sin: Maix, kix hoik kieh nyiex Bwan: pa singax singeh Maix, seeing: brai: mai: hoik yieh tix tik veng Yerusaliem heue:. 2 Kix hoik teei tix tawx sim: raoma: khankix, ih ka tokaux yum siliex Maix khankix, mai: kix hoik teei tix tawx nex nham: pui Maix ka totiag pa caox khankix heue:. 3 Mai: kix teei nham: kix hieh hawt vung viang veng Yerusaliem, awm: lih rawm: mai: ang koe: pui sipaung:. 4 Paox plawg paox nyhawm: pa ot dex vung viang aux khankix, sa lao mai: nyiah maung aux heue:. 5 Simiang Siyiex eue:, krax songrhawm: songrhi: Maix ang cu tix naox yien:, kawn: sang rheung: miex grheung:? Mai: rhawmrhi: Maix ang nyang vhah, tak sang hax awm: ngu, kawn: rheung: miex grheung:? 6 Krax pa songrhawm: songrhi: Maix teei tix hieh ka piang pui tang: ceu tang: cat pa ang tawng ka Maix, mai: ka piang pui meung pa ang kok ka ceukaux Maix khankix heue:. 7 Grawh grawng: nawh, kix kiied tix ih ka nex geh nyiex Yakop mai: yieh laux dee ot dee koe: kix heue:. 8 Phimap pa yuh tax keeing: ex dix, paw kieh hoek ka piang ex liak. Mawh kheu ex hoik rau hoik ot dee tiem, mai: Maix caoxrhawm: ka ex, mai: nied tix teem: coi laung laung liak. 9 Siyiex Cao: pa taoh ka ex eue:, ka daux min: plakngai: ceukaux Maix, teem: coi ka ex liak. Ka daux ceukaux Maix taoh tix teei aux mai: ploi: phimap phigrham: aux liak. 10 Mawh kheu pa tix, pui tang: ceu tang: cat khankix ah nin:, Siyiex kix koe: dee mawx? Mai: Maix prawng ca: ka nham: pui Maix, pa hoik teei pui tang: ceu tang: cat khankix, sidawng: ka sivoe ngai: ex liak. 11 Maix nghiet ka lox pa riag, pa ngia pui pa ot ka daux thawng: khankix, mai: taoh ka pui pa tak sang pah yum khankix ka daux plawng: taix Maix pa ting siawp sibrawm liak. 12 Siyiex eue:, ka piang pui, paox plawg paox nyhawm: aux, pa sa pa lao ka Maix khankix, deeh viied tix tawx phimap ka piang naok kix, tom: sidah aliah son liak. 13 Mawh kheu nan:, can ex pa mawh pui Maix, mai: cub yung: pa sax sawm: tau mai: Maix khankix, tak sang yaogyaw ka Maix jheeng: jheeng: mai: plak jhi: bwanson: Maix ka pui pa tak sang mawh khaix in leeing: ju leeing: phan: heue:.

Simin Ting 80

Lox Rawg Bwan:, Son Sang Deeh Cox Haktiex

1 Cao: liang yung: Isarilax mai: pa thong: ka ceu pui Yosiep awm: cub yung: eue:, veeh yhaok Maix nghiet liak, Cao: pa ot ka piang Cherubin eue:, ploi: pa riang Maix liak. 2 Jhi: siawp sibrawm Maix ka sivoe ngai: ceu pui Epharim, Binyamin, Manasie: mai: hoek tix taoh ka ex liak. 3 Siyiex eue:, kieh ex deeh tieh loh mai: jhi: pa riang pakngai: Maix liak, phan: yuh nan:, ex tak sang hoek krax taoh heue:. 4 Simiang Siyiex Cao: kru naing raoma: eue:, krax pa songrhawm: songrhi: Maix, kawn: sang kieh koe: ka piang pui Maix pa rawg bwan: ka Maix rheung: miex grheung:? 5 Maix tawx kix ih khaomun rawm: ngai:, mai: tawx kix nyaux rawm: ngai: tom: sak tix heue:. 6 Mai: kieh paox plawg paox nyhawm: ex khankix, thung: thiang: ka ex heue:. Mai: pui pa koeng ka ex khankix, ah lox map mai: nyiah ka ex heue:. 7 Simiang Siyiex Cao: kru naing raoma: eue:, kieh ex deeh tieh loh mai: jhi: pa riang pakngai: Maix liak, phan: yuh nan:, ex tak sang hoek krax taoh heue:. 8 Maix hoik viex tix sum: nhu: plix siiet khaing: meung Ejiptux, mai: grheu: pui tang: ceu tang: cat khankix to: heue:. 9 Maix hoik rien hoik cox dee ot nawh mai: riah nawh khankix, hoik tah hu: ku meung heue:. 10 Veei nawh hoik tah hoik kheem: ka gawng khankix, mai: kak nawh khankix kawx, kheem: veei ka piang khaox piakvan: pa kied ting kied lhaong: khankix heue:. 11 Nawh kieh kak nawh khankix, ting lhaong: hu: tom: sidaing: hoek ka rawm: sigrit sigra:, mai: nyoig rao nawh kawx, tah hu: tom: hoek ka rawm: klawng: ting, (Upharat) heue:. 12 Mawh kheu pa tix yam in, Maix lai yieh tix tik khaox vie nawh, mai: can pui pa hu: krax dex nawh khankix, pieh tix ih plix nawh. 13 Mai: prieh kee nhu: nawh dud, mai: totiag pa caox hoik ih kah heue:. 14 Siyiex Cao: kru naing raoma: eue:, ex khyox khaw: ka Maix, deeh hoek ha: tix bawg liak, ot piang meung raoma: mai: kia: ngien ka ex liak. Hoek tix jhak ka nhu: plix siiet khankix liak. 15 Ka nhu: pa hoik sum: taix khawn: dawm: Maix tix deuh, priex kix, son sang haok hwan: mai: kaux cong: son Maix. 16 Hoik gleeing ka ngu, mai: hoik kid tix tik heue:. Mawh kheu pakngai: Maix, pa sidiex kix hoik hoek krax pa laux pa leeing: heue:. 17 Teei taix Maix deuh ka piang pui pa dex mai: taix khawn: dawm: Maix, mai: kieh kawn: pui grum ting riang ting rao son Maix liak. 18 Phan: yuh nan:, ex ang lai deeh yawn: plak khaix khaing: Maix, kieh ex im: ju liak, ex tak rawg bwan: ka ceukaux Maix heue:. 19 Simiang Siyiex Cao: kru naing raoma: eue:, kieh ex deeh tieh deeh loh mai: jhi: pa riang pakngai: Maix liak, phan: yuh nan:, ex tak hoek krax taoh heue:.

Simin Ting 81

Lox Yaogyaw Ka Son Nyiex Bang: Poi

1 Ex ah lox rhax pa gauxrhawm: gauxhri:, yaogyaw ka Siyiex Cao: pa tawx riang tawx rao ka ex heue:. Mai: kok yo lox sinum ka Siyiex Yakop heue:. 2 Ah lox rhax mai: tah kraung:, tah ting: susi: , pa nyawm tix nghiet heue:. 3 Phlu: teet tawng ka singaix khix khraox, mai: singaix pang: khix, mai: singaix yuh poi ting heue:. 4 Ceu in mawh been li pa deuh Siyiex Yakop ka son pui Isarilax heue:. 5 Nawh Cao: prawng ca: tix deuh ka geh nyiex Yosiep tix kham: sakse: yam lih hu: nawh ka daux meung Ejiptux, dee ang aux tawng lox tawng pui kah heue:. 6 Aux kieh kraung pa cien luan khaing: piang klip nawh, mai: taix nawh kawx, kieh luan khaing: sawng beeh klawm: heue:. 7 Yam yaox maix krax pa kharhawm: kharhi:, maix kok yo Aux, Aux taoh tix teei ka maix heue:. Aux deeh pawk lox Maix, dee tuh sah dee glip mai: cheuk cheu: tix yaox maix ka praok rawm: klawng: Meribax heue:. 8 Pui aux khankix eue:, nghiet heue:, Aux tawm: tix deuh lox ka maix, geh nyiex Isarilax eue:, maix nghiet ka lox Aux liak. 9 Mai: siyiex pui tang: ceu tang: cat ang pon tix koe: mai: maix, mai: maix ang pon tix krub ka siyiex tang: praix tang: klawng:. 10 Aux mawh Simiang Siyiex maix Cao: pa taoh maix lih khaing: daux meung Ejiptux heue:, ang: jheeh maix tom: vieh tom: va:, Aux tak tawx maix ih tom: sak tix heue:. 11 Mai: pui Aux khankix, ang nghiet ka lox Aux, ceu pui Isarilax tee: ang moh ka Aux nieh. 12 Mawh kheu in, Aux tom: kieh rhawm: kix kiien:, mai: kieh kix hu:, awm: pa sikix tix hawt yuh . 13 Pui Aux khankix, nghiet ka lox Aux, kieh ceu pui Isarilax hawt daux krax Aux liak. 14 Phan: hawt pui pa koeng khankix, Aux nied tix yeen kix tiem mai: taix Aux tieb tie, yuh laux ka kix pui pa lah pa cha: ka kix heue:. 15 Pui pa koeng ka Simiang Siyiex khankix, khyox khaw: ka Nawh Cao: mai: pui aux khankix kawx, koe: akhwang: kaux cong: jheeng: jheeng: heue:. 16 Nawh Cao: tak sang tawx kix ih ka gaox ka nghox tom: sak, pa kied mhawm: mai: rawm: hia: pa lih khaing: daux rang: heue:.

Simin Ting 82

Cao: Pa Giex Kaing: Pa Ting Siawp Sibrawm

1 Siyiex cung ka daux siyiex pa haoh pa hun:, mai: prawng ca: ka sinax kix heue:. 2 Pex jhak ka pakngai: pui pa ang rah ang see, mai: kawn: prawng ca: pa ang rah ang see rheung: miex grheung:? 3 Pex prawng ca: mai: ot plak pui pa hot pa sibhawm:, mai: kawn: doe: pa ang koe: miex keeing: khankix, yuh pa khaw: mai: been li mai: ot plak kix pa hot pa sia: mai: pa cairhawm: cai: rhi: khankix awawx. 4 Mai: taoh ka pui pa hot pa sibhawm: mai: pa cairhawm: cairhi: khankix, luan khaing: daux taix pui pa ang rah ang see khankix awawx. 5 Mai: kix ang tawng ang yung, kix lai ling ka daux pa vhaik, mai: jaong num: haktiex yungyiang: khawm: uik heue:. 6 Aux ah nin: ka pex, pex mawh Siyiex heue:, mai: can pa koe: khawm: uik mawh kawn: Siyiex Cao: pa ting pa lhaong: heue:. 7 Viang mawh kawx nan:, pex tak sang yum awm: kawn: pui, mai: hoek krax laux krax sum awm: kawn: Simiang heue:. 8 Siyiex eue:, kaoh mai: prawng ca: ka haktiex liak, grawh grawng: nawh, kawn: pui khawm: uik mawh cie Maix heue:.

Simin Ting 83

Lox Rawg Bwan:, Son Sang Som Pui Pa Koeng

Lai yaogyaw pa ah Asax

1 Siyiex eue:, paw lai glaik yien: yawg tix liak, Maix paw yuh tix ang tawx lox pa sang krai Tix mai: paw lai kaog liak. 2 Jhak heue:, pui pa koeng ka Maix khankix, yuh lox maw: cuci: mai: pui pa koeng ka Maix khankix, hoik kaoh heue:. 3 Mai: kix briex kum: paox tix nong: nong:, son sang yuh laux leeing: ka pui pa priex Maix khankix heue:. 4 Mai: kix ah nin: ka paox tix, hoek heue:, ex grhiem: tix tik ka ceu pui Isarilax, yuh ka mawx son ang pui lai doh keud ka ceukaux kix khaix in sax heue:. 5 Mai: kix ih rhawm: rhi: simau paox tix, mai: briex kum: tix sang tieh feen ka Maix heue:. 6 Mawh cub pui Edom, ceu pui Isamelax, pui Mawbax, pui meung Hagarax, 7 pui meung Gebalax, pui meung Amon, pui meung Amaliet, ceu pui Philitix, mai: pui veng Turux khankix heue:. 8 Mai: ceu pui Asurix khankix kawx, rom tau mai: kix cub geh nyiex Lotax heue:. 9 Maix yuh kix yaox jhawm:, awm: pa hoik yuh Maix ka ceu pui Midian, mai: Simiang Sisarax, mai: Simiang Yaben ka praok rawm: klawng: Khison liak. 10 Kix hoek krax laux krax som ka daux Endawrax mai: mawh phon: ka piang tiex heue:. 11 Yuh simiang kix, khankix, awm: yuh Maix ka simiang Awrebax mai: simiang Zebax, mai: yuh simiang haktiex kix khawm: uik awm: yuh Maix ka simiang Zebahax mai: simiang Zalamonnax, 12 cao: pa ah nin:, ex rud tix teei nyiex bwan: kix, mawh cie ex heue:. 13 Siyiex aux eue:, kieh kix awm: phawng: tiex pa phlu: bhaung: keu: kang: lux hu:, mai: kam: pa phlu: bhaung: hu: liak. 14 Awm: pa gleeing ngu ka daux tiag daux tu, mai: ka piang gawng lua khankix, 15 Maix teei bhaung: ting lhiex ting lah ka kix, mai: teei bhaung: caox glhat tix tik kix liak. 16 Simiang Siyiex eue:, kieh plakngai: kix kaig tua, mai: kieh kix sawg ka ceukaux Maix liak. 17 Mai: kieh kix hoek krax pa kaig pa tua, mai: koe: krax pa lhat pa graung liak, mai: kieh kix koe: krax pa taug pa mao mai: kieh hoek krax pa laux pa som liak. 18 Mai: kieh kix tawng ka ceukaux Maix tix kaux khaing: pa mawh Simiang Siyiex tix kaux khaing:, Cao: pa ting ka piang haktiex khawm: uik liak.

Simin Ting 84

Pa Krox Pa Jun Ka Nyiex Siyiex

1 Simiang Siyiex Cao: kru naing raoma: eue:, nyiex bwan: dee ot Maix, mawh pa kied sidaing: mhawm: heue:. 2 Ju aux sawg dee ot Simiang Siyiex mai: hoik iak riang iak rao hu: heue:. rhawm: aux mai: tokaux aux, sawg mai: kok yo ka Siyiex pa im: ju heue:. 3 Simiang Siyiex Cao: kru naing raoma:, mai: Simiang Khunhawkham aux, mai: Siyiex aux eue:, sim: saik koe: dee ot dee koe: mai: sim: sivoeg koe: mheem: dee tawm: dee vah ka dee dex khu: dee tan Maix heue:. 4 pui pa ot ka daux nyiex Maix khankix, koe: bwanson: heue:, kix tak yaogyaw ka Maix jheeng: jheeng: heue:. 5 Mai: pui pa teei riang rao ka Maix, mai: pui pa koe: rhawm: ka daux krax Maix khankix, koe: bwanson: heue:. 6 Yam preeng: kix tix hu: ka daux ngawd dee kroh dee kram: kawx, ka dee an, deeh kieh rawm: keut lih tom: nie, mai: rawm: lhiex cao kawx, kieh bwanson: kheem: veei kah heue:. 7 Mai: kix nie hu:, nie koe: riang sinyek mai: jhi: pakngai: kix ka Siyiex, ka daux veng Zion heue:. 8 Simiang Siyiex Cao: kru naing raoma: eue:, nghiet ka lox pa rawg aux bwan: liak. Siyiex Yakop eue:, veeh yhaok Maix mai: nghiet liak. 9 Siyiex Cao: pa tieb tie eue:, jhak ka pakngai: pui pa hoik laug Maix tix teei liak. 10 Pon tix ot dee ot Maix tix singaix, nie lheu: mhawm: khaing: ot tang: dah tang: dee tix rheng: singaix heue:. Aux nie lheu: moh tix pau diang siviex nyiex Maix Siyiex, khaing: ot nyiex dee ot pui pa caox pa ang rah ang see khankix heue:. 11 Simiang Siyiex mawh singaix, mai: Cao: pa tieb tie heue:. Simiang Siyiex mawh Cao: pa tawx bwanson:, mai: min: plakngai: heue:. Nawh Cao: ang lai tik vud ceu pa mhawm: ka son pui pa rah pa see khankix tix ceu kawx heue:. 12 Simiang Siyiex Cao: kru naing raoma: eue:, pui pa deuh rhawm: ka Maix khankix, koe: bwanson: heue:.

Simin Ting 85

Lox Rawg Bwan:, Son Sang Yaox Tix Ot Yien: Mhawm: Mhawm:

1 Simiang Siyiex eue:, Maix moh ka meung tix, mai: geh nyiex Yakop pa hoik giex hu: khankix, deeh hoek tawx liak. 2 Maix pluat ploi: phimap pui Maix khankix, mai: hoik kheem: phimap kix khawm: uik heue:. 3 Kieh krax pa songrhawm: songrhi: Maix grai: uik, mai: yawn: rhawm: Maix khaing: krax pa songrhawm: songrhi: liak. 4 Siyiex Cao: pa taoh ex eue:, kieh ex deeh tieh deeh loh tix, mai: kieh yien: ka rhawm: pa hoik sax songrhawm: songrhi: Maix liak. 5 Khex songrhawm: songrhi: Maix ka ex jheeng: jheeng: lie? Mai: krax pa songrhawm: songrhi: Maix ang cu tix grai: leeing: ju lie? 6 Maix hoik kieh ex im: ju, mai: kieh pui Maix khankix, gauxrhawm: gauxrhi: ka daux Maix ang mawh lie? 7 Simiang Siyiex eue:, Maix jhi: ex yaox krax pa caoxrhawm: Maix, mai: taoh ex ka bwanson: Maix liak. 8 Aux tak sang krox tix nghiet ka gumlox pa sang krai Simiang Siyiex heue:. Grawh grawng: nawh, Nawh koe: gumlox pa nhim:, ka pui Nawh pa singax singeh khankix, viang mawh kawx nan:, paw lai deeh yuh pa caox pa caig khaix in liak. 9 Mai: bwanson: krax taoh Nawh Cao:, hoik hoek dex kix ka pui pa lhat pa graung ka Nawh Cao:, mai: min: plakngai: Nawh Cao:, hoik ot ka daux meung ex tete telai heue:. 10 Krax caoxrhawm: mai: sijax mukheu hoik rob paox tix, pa rah pa see mai: pa nhim:, tix kaux hoik tix kaux ngheut paox tix heue:. 11 Sijax mukheu lih khaing: haktiex, mai: pa rah pa see lih khaing: raoma: tak num: tix jhak heue:. 12 Simiang Siyiex tawx bwanson: pa mhawm: ka ex, mai: tawx kraung khrai: (plix nghox plix koi:) Nawh ka haktiex ex heue:. 13 Mai: krax pa rah pa see hu: sivoe Nawh Cao:, mai: khaix Caong Nawh hawt hu: heue:.

Simin Ting 86

Lox Rawg Bwan:, Son Sang Teem:

1 Simiang Siyiex eue:, veeh yhaok Maix nghiet lox aux liak. Aux mawh pa hot pa sibhawm: heue:. 2 Siyiex aux eue:, priex ka jux aux, mawh kheu mawh aux pui pa moh Maix, mai: taoh ka siliex pa deuh rhawm: ka Maix liak. 3 Siyiex eue:, aux sawg tix kok yo Maix leeing: lang: singaix heue:. caoxrhawm: teem: coi ka aux liak. 4 Siyiex eue:, mawh kheu sawg aux ka Maix, kieh rhawm: siliex Maix gauxrhawm: gauxrhi: liak. 5 Siyiex eue:, Maix hoik grum naog rhawm: rhi: pa mhawm:, mai: rhawm: pa gun pa yeung, can pui pa rawg bwan: ka Maix pon krax caoxrhawm: Maix tom: nie heue:. 6 Simiang Siyiex eue:, nghiet ka lox pa rawg aux bwan:, mai: caoxrhawm: ka ceu pa rawg pa mhaing: aux liak. 7 Singaix yam yaox aux krax khirhawm: khirhi:, aux kok yo Maix, mai: deeh pawk ka lox aux liak. 8 Simiang Siyiex eue:, ka daux siyiex khankix, siyiex pa awm: Maix ang koe:, kaing pa yuh kawx, pa awm: kaing pa yuh Maix ang koe: heue:. 9 Simiang Siyiex eue:, can ceu pui pa phan: pa deuh Maix khankix, greed tix hoek grux ngawng sivoe ngai: Maix, mai: yaogyaw min: plakngai: ceukaux Maix heue:. 10 Maix mawh Cao: pa ting pa lhaong:, mai: hoik yuh ceu pa daox pa am: khankix heue:. Siyiex mawh ngie Maix tix kaux khaing: heue:. 11 Simiang Siyiex eue:, jhi: daux krax Maix ka aux liak. Aux tak sang hawt daux krax pa mawh pa meh Maix heue:. Mai: kieh rhawm: aux grum dex mai: kied lhat kied graung ka ceukaux Maix liak. 12 Simiang Siyiex aux eue:, aux viex khawm: rhawm: khawm: rhi: mai: yaogyaw ka Maix, mai: yaog ceukaux Maix ting lhaong: jheeng: jheeng: heue:. 13 Krax pa caoxrhawm: Maix, kied ting ka piang aux heue:. Maix hoik taoh ju aux lih khaing: tawm: taix ka greem: meung yum heue:. 14 Siyiex eue:, pui pa ting rhawm: ting rhi: khankix, kaoh cung tang: plak ka aux, mai: cub pui pa caox pa caig khankix, ang khan: ngai: Maix, mai: sawg tix teei ju aux heue:. 15 Simiang Siyiex eue:, Maix mawh Siyiex pa grum naog krax pa caoxrhawm: caoxrhi:, mai: Cao: pa chix yuh bwanson:, mai: pa chix gun chix yeung, mai: krax pa caoxrhawm: pa kaux sijax tom: haoh tom: hun: heue:. 16 Veeh ngai: Maix plak aux, mai: caoxrhawm: teem: coi ka aux liak. Mai: tawx riang tawx rao siawp sibrawm Maix ka aux, mai: taoh ka kawn: simex, bon: siliex cawng Maix liak. 17 jhi: aux yaox mhai: ceu pa daox pa am: pa mhawm:, mai: kieh pui pa koeng ka aux, yaox mai: kieh kix kaig tua liak. Grawh grawng: nawh, Maix teem: coi ka aux, mai: tawx pa nyawmrhawm: nyawmrhi: liak.

Simin Ting 87

Yaogyaw Ka Veng Yerusaliem

1 Jaong num: nyiex bwan: Nawh Cao: sum: tix deuh ka piang gawng pa singax singeh heue:. 2 Simiang Siyiex nie lheu: moh, siviex Zion khaing: can dee ot Yakop khawm: uik heue:. 3 Veng Siyiex eue:, awm: lox pa hoik koe: tix deuh grawng: Maix mawh pa ting min: plakngai: heue:. 4 Can kix pa meed pa tawng ka aux, aux hoik mhai: tix tawng ka veng Rakhap mai: veng Babulon heue:. Mai: jhak ka meung Philitix, meung Turux, meung Kusax khankix mawh pui pa keh khaing: ka daux veng an heue:. 5 Mai: veng Zion kawx, ceu pui ku ceu hoik keh ka daux veng an heue:, Mai: kix ah nin: ka paox tix, Siyiex Cao: pa ting pa lhaong: tokaux Nawh pa kieh veng an kaux cong: heue:. 6 Yam teei Siyiex carang ceu pui an khankix, Nawh ah nin:, ceu pui an khankix, mawh pa keh ka daux veng an heue:. 7 Cub pui pa ah lai rhax, mai: pui pa yuh poi, graoh thiao:, mai: ceu pa gauxrhawm: (krax pyaw) aux kieh koe: ka daux maix heue:.

Simin Ting 88

Lox Rawb Bwan:, Son Sang Teem:

1 Simiang Siyiex Cao: pa taoh aux eue:, aux kok yo sivoe ngai: Maix ku singaix ku sawm: heue:. 2 Mai: ceu pa rawg aux bwan:, kieh hoek plak sivoe ngai: Maix liak. Mai: nghiet ka lox pa kok yo aux liak. 3 Khwan: ju aux hoik naog krax pa kharhawm: kharhi:, mai: ju aux kawx, dex hoek ka meung yum heue:. 4 Kix hoik simin aux tau mai: kix pa hoik lih hu ka daux simeeig awm: pui pa hoik uik riang heue:. 5 Mai: tik aux awm: pui pa hoik yum khankix, mai: awm: pui pa hoik laig it ka daux simeeig pa ang Maix lai doh keud, pa hoik singai khaing: tawm: taix Maix heue:. 6 Maix hoik taing tix sau: aux ka daux pa kied raux, pa hoik kheem: pa vhaik ka daux pa kied sidaing: raux heue:. 7 Krax pa songrhawm: songrhi: Maix hoik gut ka piang aux, Maix kieh pukpak rawm: khankix, tuktiak tukte: ka aux heue:. 8 Mai: Maix hoik gah paox pa tawng pa yung aux, singai khaing: aux, Maix hoik kieh kix seeing: brai: ka aux, mai: Maix hoik gang: aux, ang pon tix lih plak praix heue:. 9 Ngai: aux laux kheu yaox aux tix kham: geu: krax pa kharhawm: kharhi:, mai: Simiang Siyiex eue:, aux yaog taix tix kok yo ka Maix jheeng: jheeng: heue:. 10 Maix tak sang jhi: mhai: ceu pa daox pa am: ka pui pa hoik yum khankix lie? Pui pa hoik yum khankix, tak deeh kaoh tix yaogyaw ka Maix lie? 11 Mai: kix simawd krax pa caoxrhawm: Maix ka daux simeeig lie? Mai: kix krai sijax mukheu Maix ka dee laux dee leeing: lie? 12 Kix chix tawng ceu pa daox pa am: Maix ka daux pa vhaik lie? Mai: kix chix tawng gumlox pa rah pa see Maix ka daux meung yum lie? 13 Simiang Siyiex eue:, aux kok yo ka Maix heue:. Mai: lox pa rawg aux bwan: ponngawb hoek sivoe ngai: Maix heue:. 14 Simiang Siyiex eue:, mawh kheu pa tix, Maix tik ju aux? Mawh kheu pa tix Maix vud pakngai: tix khaing: aux? 15 Aux yaox tix kham: geu: krax pa kharhawm: kharhi:, mai: dex sang yum tom: yam iak ju aux heue:. Mai: aux yaox tix kham: geu: krax pa prawng ca: Maix mai: krax pa taug pa mao heue:. 16 Krax pa songrhawm: songrhi: Maix hoik kheem: veei ka aux, krax pa lhat pa prawng ca: Maix hoik yuh aux laux heue:. 17 Kix khrawm: paox tix mai: rob ka aux leeing: lang: singaix, awm: hoik rob rawm: vung viang aux heue:. 18 Maix hoik gah paoxgrawm pa moh aux, mai: paoxgrawm aux, hu: dee singai khaing: aux, mai: pui pa meed pa tawng aux khankix kawx, mawh ngie pui pa ot ka daux pa vhaik heue:.

Simin Ting 89

Lox Rhax Yam Khirhawm:

1 Aux tak sang ah lox rhax krax caoxrhawm: Simiang Siyiex jheeng: jheeng:, mai: jheeh aux tak sang krai grawng: sijax mukheu Maix ka ceu pui jheeng: jheeng: leeing: ju heue:. 2 Mai: aux tak sang krai koe: krax caoxrhawm: Maix jheeng: jheeng:, mai: sijax mukheu Maix, kaux cong: ka piang raoma: heue:. 3 Siyiex ah nin:, Aux yuh sijax mukheu tau mai: kaw pa hoik laug Aux tix teei ka lox tiex lox tu ka siliex Aux Dawit ah nin:, 4 Aux tak sang kieh simie ceucat maix tak kaux cong: jheeng: jheeng:, mai: kieh dangngeung maix tak kaux cong: ka daux ceu pui leeing: ju heue:. 5 Simiang Siyiex eue:, raoma: tak yaogyaw ka kaing pa hoik yuh Maix, ceu pa daox pa am:, mai: sijax mukheu Maix ka sinax cub pui pa singax singeh khankix heue:. 6 Grawh grawng: nawh, ka daux raoma: pui mawx tak sang pon tix lah cha: ka Simiang Siyiex? mai: kawn: praix Siyiex khankix, mai: pui mawx tak sang awm: Simiang Siyiex? 7 Siyiex mawh pa lhat pa graung cub pui pa singax singeh khankix kah, mai: Nawh mawh pa nab pa yam nie lheu: khaing: pui pa ot rob vung viang Nawh khankix heue:. 8 Simiang Siyiex Cao: kru naing raoma: eue:, pui pa ting riang ting rao pa awm: Maix ang koe:, sijax mukheu Maix pa kaux pa cong: kawx, rob vung viang Maix heue:. 9 Maix mawh Cao: pa giex kaing: ka rawm: sigrit sigra: pa ting riang mai: chix kieh yien: yawg ka haok hwan: pukpak rawm: ting heue:. 10 Maix hoik plaux ka riah ceu pui Rakhap yum, mai: teei plawng: taix Maix pa ting riang ting rao, mai: kieh pui pa koeng khankix, prung prang: hu: ku dah ku dee heue:. 11 Raoma: mai: haktiex mai: kraung can ceu pa koe: ka daux an khankix, mawh cie Maix, mai: mawh pa hoik phan: hoik yuh Maix heue:. 12 Caong ma: seh mai: caong ma: laong: kawx, mawh pa phan: pa deuh Maix, mai: gawng Taborax mai: gawng Heramon, deuh rhawm: ka Maix, mai: rhax lai gauxrhawm: gauxrhi: heue:. 13 Plawng: taix Maix hoik grum naog ka siawp sibrawm, mai: taix Maix mawh pa ting riang ting rao, mai: taix khawn: dawm: Maix mawh pa kied lhaong: heue:. 14 Krax pa rah pa see mai: krax prawng krax ca: Maix, mawh jaong num: dangngeung Maix heue:. Mai: krax pa caoxrhawm: mai: sijax mukheu hu: sivoe ngai: Maix heue:. 15 Simiang Siyiex eue:, ceu pui pa mhong: pa tawng ka Maix, mai: pa gauxrhawm: gauxrhi: khankix, koe: bwanson: heue:. Mai: kix yaox tix lai ling ka daux pa riang pakngai: Maix heue:. 16 Kix pon tix gauxrhawm: ka daux ceukaux Maix leeing: lang: singaix jheeng: jheeng:, mai: yaog kix ting, mawh kheu krax pa rah pa see Maix heue:. 17 Mai: min: plakngai: Maix mawh riang rao kix, bwanson: Maix kawx, hoik yaog ka rung: choek ex heue:. 18 Simiang Siyiex mawh Cao: pa tieb tie ex, mai: Simiang khunhawkham: ex khankix mawh cie Siyiex pa singax singeh Isarilax heue:.

Pa yuh Siyiex sijax mukheu mai: Dawit

19 Yam an tix bawg dix, Maix krai ka kix pui pa singax singeh khankix, ka daux riang susai mai: ah nin:, Aux hoik tawx pong krax pa teem: coi ka pui pa ting riang ting rao, Aux hoik laug tix teei pui tix kaux ting, ka daux cub pui khankix heue:. 20 Aux yaox siliex Aux Dawit mai: groi rawm: bee pa singax singeh mai: hoik laug tix deuh nawh heue:. 21 Taix Aux ot plak nawh, mai: plawng: taix Aux kieh nawh kaux cong: heue:. 22 Pui pa koeng khankix, ang nieb pon tud pon rhim: tix teei kraung khrai: nawh, mai: pui pa ang rah ang see khankix, ang lai pon tix tuktiak tukte: ka nawh heue:. 23 Aux tak sang pah pui pa koeng ka nawh khankix sivoe ngai: nawh, mai: tawx krax pa kharhawm: kharhi: ka pui pa koeng ka nawh khankix heue:. 24 Sijax mukheu mai: krax pa caoxrhawm: Aux tak ot tau mai: nawh, mai: Aux yaog rung: choek nawh ka daux ceukaux Aux heue:. 25 Aux tak sang teei taix nawh, deuh piang rawm: sigrit sigra:, mai: teei taix khawn: dawm: nawh, deuh ka piang rawm: klawng: khankix heue:. 26 Nawh kok yo Aux mai: ah nin:, 'Maix mawh Siyiex aux, mai: keeing: aux, mai: mawh Rang: Cao: pa taoh aux heue:.' 27 Aux tak sang ciak tix deuh nawh mawh ara kawn: Ai:, mai: yaog nawh ting ka piang Simiang haktiex khawm: uik heue:. 28 Mai: krax pa caoxrhawm: Aux tak sang een: ka son nawh jheeng: jheeng:, mai: sijax mukheu Aux, kaux cong: ka piang nawh heue:. 29 Aux tak sang kieh simie ceucat nawh kaux cong: jheeng: jheeng:, mai: kieh dangngeung nawh kaux cong: leeing: ju leeing: phan: awm: singaix meung raoma: heue:. 30 Phan: kawn: praix nawh, tik vud ka lox tawm: been li Aux, mai: ang hawt ka lox pa hoik deuh Aux. 31 Phan: kix nieb yuh mai: ang hawt ka lox tawm: been li Aux khankix, 32 Aux tak sang teei khaox saux sivied tix gau kix, ka phimap pa phit pa lud kix, kheu yuh kix phimap heue:. 33 Viang mawh kawx nan:, krax pa caoxrhawm: Aux, ang lai teei lih khaing: nawh, mai: sijax mukheu Aux kawx, ang lai yuh laux heue:. 34 Aux ang nieb yuh ka sijax mukheu Aux, mai: ang doh tieh loh ka lox pa hoik lih khaing: jheeh Aux. 35 Aux hoik tiex tu ka pa rah pa see, mai: pa singax singeh tix ah nin:, "Aux ang doh pie lhen: ka Dawit." 36 Mai: Aux tak sang kieh simie ceucat nawh kaux cong: jheeng: jheeng:, mai: dangngeung nawh kawx, awm: singaix ka plak sivoe ngai: Aux heue:. 37 Nawh Cao: ah nin:, "Aux tak sang kieh Maix kaux cong: awm: khix jheeng: jheeng:, mai: kieh awm: sakse: pa pau ka sijax mukheu ka piang raoma: heue:."

Mawh Kheu Hoek Simiang Krax Som Mai: Khirhawm:

38 Viang mawh nan:, Maix songrhawm: songrhi: mai: seeing: brai: mai: hoik tik ka Simiang pa hoik laug Maix tix teei heue:. 39 Mai: Maix hoik yuh laux ka sijax mukheu pa hoik yuh Maix tau mai: siliex Maix, mai: hoik taing mhok khri: nawh hoek tom: sidaing: tiex heue:. 40 Maix hoik raig tix tik ka nghaong: pa vie nawh, mai: hoik yieh tix tik ka nyiex tab nawh heue:. 41 Can pui pa lawng krax khankix, tud rhim: tix teei nawh, mai: paox plawg paox nyhawm: nawh khankix, ah lox pa sa pa lao ka nawh heue:. 42 Mai: yaog taix khawn: dawm: pui pa koeng ka nawh khankix, mai: kieh pui pa lah pa cha: ka nawh khankix khawm: uik gauxrhawm: gauxrhi: heue:. 43 Maix kieh lawm vaid nawh koih (veng:) mai: ang lai pon tix kieh nawh cung ka dee puing: naing heue:. 44 Maix kieh min: plakngai: nawh grai: hu:, Maix hoik taing dangngeung nawh tom: sidaing: tiex heue:. 45 Maix kieh ju pa awn: nawh dawd hu: mai: kieh nawh kaig tua heue:.

Lox Rawg Bwan:, Son Sang Taoh

46 Simiang Siyiex eue:, Maix glaik tix mox, bawg yam miex grheung:? Mai: krax pa songrhawm: songrhi: Maix hax awm: ngu, bawg yam miex grheung:? 47 Doh keud ka kawn: pui pa hoik phan: hoik deuh Maix, ka aux pa dawd ju, pa chix laux chix leeing:, pa ang koe: dee bleeh tid tix liak. 48 Pui pa im: ju, mai: pa ang yaox krax yum, mai: pa chix taoh ka ju tix, khaing: daux tawm: taix siawp sibrawm meung yum mawh pui mawx? 49 Siyiex eue:, krax pa caoxrhawm: Maix, mai: sijax mukheu Maix, pa hoik tiex tu Maix ka siliex Maix Dawit dix, koe: dee mawx? 50 Doh keud ka aux, pa yaox tix kham: geu: ka pa sa pa lao pui liak. Mai: see: pui ku ceu khawm: uik, aux hoik viex ka piang naok tix heue:. 51 Grawh grawng: nawh, Simiang Siyiex eue:, pui pa koeng ka Maix khankix, chix sa chix lao ka Maix heue:. Mai: kix sa lao ka khaix caong pui pa hoik groi Maix rawm: bee kah heue:. 52 Kieh Simiang Siyiex koe: bwanson: leeing: ju leeing: phan: liak. Amen! Amen!

Simin Ting 90 Baux Pon:

Rawg Bwan:, Son Sang Caoxrhawm: Siyiex

1 Siyiex eue:, Maix mawh deeh deuh ex rhawm: ku ju leeing: ju leeing: phan: heue:. 2 Ka: sivoe ang Maix nyang phan: nyang yuh, gawng lua mai: haktiex mai: can pa koe: khawm: uik, jah tom: haktiex phaoxka: dix, tom: sidah haktiex phaox khaix leeing: ju, Maix hoik dawg mawh Siyiex heue:. 3 Maix ah nin:, "Kawn: pui khankix eue:, deeh ka phawng: tiex, dee hoik kaoh maix heue:." 4 Tix rheng: num sivoe ngai: Maix, awm: kawx kawx, mai: bawg yam ponsawm: tix yam khaing:. 5 Nawh Cao: tak viex kix hu: awm: rawm: pa hwan:, mai: kix awm: pui pa hoik laig it, mai: awm: rib riem pa ting ponngawb khaing: heue:. 6 Mai: plak ponngawb mhawm: pruh mai: haok hwan:, yam hoek plak ponbo kroh mai: laix hu: heue:. 7 Ex hoek krax laux krax leeing: kheu krax pa songrhawm: songrhi: Maix, mai: khirhawm: mai: lhat graung kheu krax pa songrhawm: songrhi: Maix heue:. 8 Phimap ex, pa sidawng: ang ah, phimap ex pa mox ang ah, hoik sidawng: pa riang plakngai: Maix heue:. 9 Bawg yam singaix, ex gah tix hu:, mawh kheu krax pa songrhawm: songrhi: Maix, mai: jhong: mee: num ex luan hu:, awm: pa keud daux rhawm: daux rhi: tix heue:. 10 Mai: ju ex koe: ngie atigliah num, phan: ting riang ting rao koe: tidaix num, viang mawh kawx nan:, ex yaox tix ot khawm: pa taug pa mao, mai: pa lauxrhawm: lauxrhi:, mai: khran: luan hu:, ang lai lih tix mawh tid tix khaix heue:. 11 Pui mawx pa tawng ka jhawm: krax pa songrhwm: songrhi: Maix, mai: krax pa songrhawm: songrhi: Maix mawh pa khaw: tix lhat graung kah heue:. 12 Mai: gau ka ex, kieh ex simin tix tawng ka bawg yam singaix tokaux tix, mai: kieh ex koe: rhawm: pa koe: cuyi pingnya liak. 13 Siyiex eue:, Maix deeh hoek liak, kawn: sang ot miex grheung: doh keud ka son siliex Maix khankix liak. 14 Kieh ex pon krax pa caoxrhawm: Maix ku ngawb liak. Phan: yuh nan:, ex tak gauxrhawm: gauxrhi: mai: rhax lai pa gauxrhawm: gauxrhi: heue:. 15 Caoxrhawm: mai: kieh ex deeh pon tix gauxrhawm: gauxrhi:, singaix bawg yam pa hoik luan, yam tuktiak tukte: Maix ka ex, mai: jhong: khix mee: num Maix krax pa hoik yaox ex tix kham: geu: liak. 16 Mai: kieh kaing pa yuh Maix sidawng: ka siliex Maix khankix, mai: kieh min: plakngai: Maix sidawng: ka kawn: praix kix liak. 17 Simiang Siyiex eue:, kieh bwanson: Maix hoek ka piang ex liak. Mai: kieh kaing pa yuh ex, kaux cong: son ex liak.

Simin Ting 91

Siyiex Mawh Cao: Pa Priex

1 Pui pa ot ka dee pa tieb tie Siyiex, Cao: pa ting pa lhaong: khaing: khawm: uik, tak sang pon tix ot ka greem: veei siawp sibrawm Nawh heue:. 2 Aux krai ka Simiang Siyiex ah nin:, "Maix mawh dee deuh aux rhawm:, mai: mawh tab aux, mai: Siyiex pa deuh aux rhawm: heue:." 3 Nawh Cao: kieh maix luan khaing: kie pa hoik taong: cao: jaw mai: saux preng heue:. 4 Nawh tak teei hauk pruik tix, tawb kheem: ka maix, mai: maix yaox tix ot mhawm: mhawm: ka greem: pruik Nawh, mai: sijax mukheu Nawh mawh kraung naing pa tieb tie heue:. 5 Maix tak ang koe: pa lhat pa graung ka ceu pa lhat ponsawm:, mai: te pa puing: pon singaix, 6 mai: ang lhat ka Jhawm: saux pa hu: ka daux pa vhaik, mai: jhawm: saux pa chix yuh laux yam jung singaix khankix heue:. 7 Viang pui tix rheng: kaux goh dex maix, mai: pui tix mheen: kaux goh plak taix khawn: dawm: maix kawx, tak ang doh pon yuh tid tix ka maix heue:. 8 Maix tak jhak ka ngai: tix, mai: briex yaox ka phimap pa hoek ka piang pui pa ang rah ang see khankix heue:. 9 Simiang Siyiex eue:, Maix mawh dee deuh aux rhawm: heue:. Maix hoik hoek dee ot Siyiex pa ting pa lhaong:, khaing: khawm: uik heue:. 10 Mai: ceu pa caox pa caig, ang pon tix hoek ka piang maix, mai: ceu pa lhat pa graung ang pon tix dex ka nyiex dee ot maix heue:. 11 Nawh Cao: tak tawm: lox grawng: Maix ka kawncau Siyiex khankix, tak sang kia: ngien Maix, ka daux krax pa hu: Maix khankix. 12 Mai: son ang caong Maix sang krox ka simaox, kix tak sang yaog Maix ka tawm: taix kix heue:. 13 Maix tak sang dig ka sivai sangsi: mai: siuing: pa cai:, mai: yaog caong Maix mai: dig ka sivai sangsi: pa awn: ju mai: siyawng heue:. 14 Mawh kheu moh nawh Aux, Aux tak sang taoh ka nawh, mawh kheu tawng nawh ka ceukaux Aux, Aux tak sang yaog nawh ting heue:. 15 Yam tak kok nawh ka Aux, Aux deeh pawk ka lox nawh heue:. Mai: yam yaox nawh krax pa kharhawm: kharhi:, Aux ot ka plak nawh heue:. Mai: Aux tak taoh nawh lih mai: yaog min: plakngai: nawh sidawng: heue:. 16 Aux tak sang kieh nawh lang: ju lang: phan: mai: kieh nawh nyawmrhawm: nyawmrhi:, mai: jhi: nawh yaox bwanson: krax taoh Aux ka nawh heue:.

Simin Ting 92

Lox Rhax Pa Yaogyaw

1 Yaogyaw ka bwanson: Simiang Siyiex mai: rhax lai ka ceukaux Siyiex, Cao: pa ting pa lhaong: khaing: khawm: uik. 2 Mai: teei ting: pa koe: maox kao: nyaing, mai: teei ting: pa mhawm: lox pa khaw: tix tah khankix, 3 mai: jhi: krax pa caoxrhawm: Nawh, ku ngawb, mai: sijax mukheu Nawh ku sawm: jheeng: jheeng: heue:. 4 Simiang Siyiex eue:, Maix kieh aux gauxrhawm: gauxrhi:, kheu kaing pa hoik yuh Maix, mai: aux tak rhax lai, pa gauxrhawm: gauxrhi: ka ceu pa hoik yuh Maix ka taix Tix heue:. 5 Simiang Siyiex eue:, kaing pa hoik yuh Maix, mawh ceu pa kied ting kied lhaong:, mai: krax pa keud pa sawn: Maix kawx, mawh pa kied nie raux heue:. 6 Mai: pui pa koe: rhawm: totiag, mai: pui pa caox pa ang tawng khankix. 7 Mai: pui pa ang rah ang see khankix, lih kuah awm: rib riem, mai: yam pruh, pui pa nieb yuh khankix, tak hoek krax pa laux pa leeing:, leeing: ju heue:. 8 Grawh grawng: nawh, Maix mawh Simiang Siyiex, Cao: pa ting piang khawm: uik, leeing: ju leeing: phan: heue:. 9 Jhak heue:, pui pa koeng ka Maix khankix, hoek krax pa laux pa leeing: heue:. Jhak heue:, pui pa nieb yuh khankix khawm: uik kawx, hoik prung prang: rai ruat hu: heue:. 10 Maix hoik yaog rung: choek aux, awm: rung: moi praix, mai: teei rawm: bee pa khraox kraix ka aux heue:. 11 Mai: ngai: aux hoik yaox ka pui pa koeng ka aux, mai: yhaok aux hoik mhong: ka pui pa yuh pa caox pa lah pa cha: ka aux khankix heue:. 12 Mai: pui pa rah pa see khankix, tak ting pang: lang: lhax awm: khaox jhie: yaong:, mai: ting lhaong: haok hwan: awm: khaox piakvan:, pa koe: ka piang gawng Lebanon heue:. 13 Pui pa sum: ka daux nyiex Siyiex khankix, tak mhawm: pruh mhawm: grang ka dee ot Siyiex ex heue:. 14 Viang kix hoik rie ju kawx, deeh mhawm: plix, mhawm: tai heue:. 15 Mai: plak jhi: sidawng:, Simiang Siyiex mawh pa rah pa see, mai: Nawh mawh Rang: ting aux, mai: kieh aux luan khaing: ceu pa ang rah ang see heue:.

Simin Ting 93

Siyiex Mawh Simiang

1 Simiang Siyiex ceep kraung pa koe: min: plakngai: mai: ot ka daux nyiex haw: Tix heue:. Mai: Simiang Siyiex hoik ceep kraung pa yuh nan:, mai: nhawt maox rawd nyoi, pa ting riang ting rao, mai: kieh haktiex kaux cong: tom: sidah mai: ang kieh vukvat yung yiang: heue:. 2 Mai: dangngeung Maix hoik koe: tom: yam jah dix, mai: Maix hoik koe: tom: yam jah dix, mai: Maix hoik koe: jheeng: jheeng: ka: sivoe ang haktiex nyang bax koe: dix heue:. 3 Simiang Siyiex eue:, rawm: klawng: khankix kawx, mai: klawng: khankix, ploi: lox lih, mai: pukpak rawm: klawng: khankix, lih sinum siaox heue:. 4 Simiang Siyiex pa ot ka dee lhaong: khaing: paox tix, Maix nie lheu: koe: siawp sibrawm khaing: rawm: pa luah pa sinum rawm: tom: nie, mai: pukpak rawm: sigrit sigra: pa ting riang heue:. 5 Simiang Siyiex eue:, mhai: sakse: pa kham: Maix, mawh pa kaux pa cong:, mai: pa singax singeh, mai: pa rah pa see, mawh pa koe: ka daux nyiex Maix jheeng: jheeng: heue:.

Simin Ting 94

Siyiex Cao: Pa Prawng Ca: Piang Khawm: Uik

1 Simiang Siyiex eue:, Maix mawh Siyiex Cao: pa prawng ca: heue:. Mai: ploi: pa riang Maix liak. 2 Cao: pa prawng ca: ka kawn: pui piang haktiex eue:, kaoh heue:, deeh viied tix tawx ngawh phimap ka pui pa ting rhawm: ting rhi: khankix liak. 3 Simiang Siyiex eue:, pui pa yuh pa ang rah ang see khankix, kawn: sang gauxrhawm: gauxrhi: miex grheung:? 4 Can pui pa nieb yuh khankix, kawn: haoh lox haoh sikah mai: ah lox ting lox lhaong: miex grheung:? 5 Simiang Siyiex eue:, kix yuh laux ka pui Maix mai: tuktiak tukte: ka sin: Maix heue:. 6 Kix teei ka miexmai tai nhang: yum, mai: plaux ka nyo sinie, mai: kawn: doe: pa ang koe: miex koe: keeing: khankix yum heue:. 7 Mai: kix ah nin:, "Simiang Siyiex ang yaox, mai: Siyiex ceu Yakop ang lai deuh tix tawng heue:." 8 Pui pa koe: rhawm: totiag khankix eue:, nghiet tix tawng heue:. Mai: pui pa caox khankix eue:, pex koe: cuyi pingnya mai: koe: sitix yam lai mawx? 9 Siyiex Cao: pa hoik yuh yhaok, khex ang Nawh mhong: lie? Mai: Siyiex Cao: pa hoik yuh ngai:, khex ang Nawh yaox lie? 10 Nawh mawh Cao: pa gau ka pui ku ceu ku cawng, mai: Cao: pa gau cuyi pingnya ka pui khankix, khex ang Nawh tawx phimap lie? 11 Simiang Siyiex tawng, grawh grawng: pa keud kawn: pui mawh pa giex pa goeng heue:. 12 Simiang Siyiex eue:, pui pa hoik gau Maix mai: pa hoik gau Maix ka been li khankix, koe: bwanson: heue:. 13 Maix tawx krax nyawmrhawm: nyawmrhi:, kieh luan khaing: singaix bawg yam krax pa kharhawm: kharhi:, tom: sidah kaong: tix deuh daux tiex son pui pa ang rah ang see khankix heue:. 14 Simiang Siyiex ang doh tik vud ka pui Nawh khankix, mai: ang Nawh tik vud ka sin: Nawh khankix heue:. 15 Mai: krax prawng krax ca: Nawh mawh pa rah pa see, mai: can pui pa koe: rhawm: pa rah pa see khankix, tak hawt khaix Nawh heue:. 16 pui mawx tak kaoh cung plak aux, mai: tieb tie ka pui pa caox khankix, pui mawx tak kaoh cung plak aux, mai: tieb tie ka pui pa ang rah ang see khankix. 17 Phan: Simiang Siyiex ang teem: coi aux, ang lai rheung: ju aux tak rau hu: ka dee yien: dee yawg heue:. 18 Yam ah aux nin:, caong aux cang klad, mai: Simiang Siyiex eue:, joh jhan: aux ka krax pa caoxrhawm: Maix liak. 19 Mai: yam haoh rhawm: keud aux, Maix kieh aux nyawmrhawm: nyawmrhi:, mai: kieh ju aux gauxrhawm: gauxrhi: heue:. 20 Mai: dangngeung pa nieb yuh mai: krax pa keud pa sawn: pui pa ang rah ang see, khex chix yuh paox yuh pie ka pa khaw: pa caw ka Maix lie? 21 Kix khrawm: paox tix sang pah ka pui rah pui see khankix, mai: kix pah ka pui pa ang koe: phimap tid tix heue:. 22 Viang mawh kawx nan:, Simiang Siyiex mawh tab aux, mai: Siyiex mawh Rang: ting dee deuh aux rhawm: heue:. 23 Maix tak kieh phimap kix, deeh hoek ka piang kix, mai: kid tix tik ka pui pa nieb yuh khankix, mai: Simiang Siyiex ex tak sang kid tix tik mai: yuh laux leeing: heue:.

Simin Ting 95

Lox Rhax Yaogyaw

1 Hoek heue:, ex rhax lai gauxrhawm: gauxrhi: ka Simiang Siyiex heue:. Ah lox pa gauxrhawm: pa sinum ka Rang: Cao: pa taoh ex heue:. 2 Mai: yaogyaw bwanson: Nawh, hu: plak sivoe ngai: Nawh, mai: ah lox rhax yaogyaw, mai: kok yo lox sinum ka Nawh heue:. 3 Grawh grawng: nawh, Simiang Siyiex mawh pa ting pa lhaong: khaing: khawm: uik, mai: Nawh mawh Simiang Khunhawkham: pa ting piang siyiex khawm: uik heue:. 4 Mai: dee kied raux haktiex khankix, koe: ka daux tawm: taix Nawh, mai: gawng ting gawng lhaong: khankix kawx, mawh cie Nawh Cao: heue:. 5 Rawm: sigrit sigra: kawx, mawh cie Nawh, mai: mawh pa hoik phan: hoik yuh Nawh, mai: haktiex caong raog khankix kawx mawh pa hoik yuh Nawh ka taix Tix heue:. 6 Hoek heue:, ex num: tix krub ka Nawh, mai: ex grux ngawng sivoe ngai: Simiang Siyiex, Cao: pa phan: pa deuh ka ex. 7 Grawh grawng: nawh, Nawh Cao: mawh Siyiex ex, mai: ex mawh pui pa hoik sax sawm: mai: Nawh, mai: mawh cub yung: pa ot greem: tawm: taix Nawh heue:. 8 Ka daux singaix, phan: pex mhong: lox plak jhi: Nawh, paw kieh rhawm: pex kiien:. 9 Mai: yam ot keeing: pex, tax pex ka daux tiag Meribax tipon: num, mai: kix cheuk cheu: laklheut tix yaox ka Aux ku ceu ku cawng, viang kix hoik yaox ka kaing ceu pa hoik yuh Aux khankix kawx, kix yuh tix mawh tang: plak, mawh kheu nan:, Aux tom: seeing: brai: ka ceu pui in khankix. 10 Mai: ah nin:, "kix mawh pui pa koe: rhawm: pa chix phit chix lud heue:. Mai: kix ang tawng ka daux krax dee hu: dee hoek Aux heue:." 11 Mawh kheu nan:, Aux kied songrhawm: songrhi: mai: tiex tu tix ah nin:, "Kix tak ang pon tix laig ka daux dee laux dee lee: Aux heue:."

Simin Ting 96

Siyiex Mawh Cao: Pa Giex Kaing:

1 Ah lox rhax pa khraox yaogyaw ka Simiang Siyiex heue:. Kawn: pui piang haktiex khawm: uik eue:, ah lox rhax ka Simiang Siyiex heue:. 2 Ah lox rhax ka Simiang Siyiex, mai: yaogyaw ka ceukaux Nawh heue:. Mai: tix singaix hoik tix singaix krai grawng: krax pa taoh Nawh Cao: heue:. 3 Mai: plak jhi: min: plakngai: Nawh Cao:, ka pui tang: ceu tang: cat khankix, mai: grawng: ceu pa daox pa am:, pa hoik yuh Nawh khankix ka daux ceu pui ku ceu heue:. 4 Grawh grawng: nawh, Siyiex mawh Cao: pa ting pa lhaong:, pa khaw: ex tix yaogyaw heue:. Mai: mawh Cao: pa khaw: ex tix lhat graung khaing: siyiex khawm: uik heue:. 5 Mai: siyiex pui tang: ceu tang: cat khawm: uik mawh ngie pa giex pa goeng heue:. Simiang Siyiex mawh Cao: pa yuh raoma: mai: haktiex heue:. 6 Min: plakngai: mai: siawp sibrawm koe: sivoe ngai: Nawh, riang rao mai: pa mhawm: grang koe: ka daux nyiex bwan: Nawh Cao: heue:. 7 Ceu pui ku ceu khawm: uik eue:, rieb tix teei ka Simiang Siyiex Cao: pa koe: min: plakngai: mai: siawp sibrawm heue:. 8 Rieb tix teei ka ceukaux Nawh pa ting min: plakngai:, mai: viex kraung pa lu pa tan mai: laig ka daux nyiex Bwan: Nawh heue:. 9 Mai: ceep kraung pa mhawm: pa singax mai: krub ka Simiang Siyiex heue:. Pui piang haktiex khawm: uik eue:, koe: krax pa lhat pa graung sivoe ngai: Nawh Cao: heue:. 10 Krai ka pui tang: ceu tang: cat khankix, Simiang Siyiex mawh Cao: pa giex kaing: haktiex kaux cong:, mai: ang chix gah chix greed, Nawh Cao: prawng ca: krax pa rah pa see ka pui khawm: uik heue:. 11 Kieh raoma: mai: haktiex gauxrhawm: gauxrhi: heue:. Mai: kieh rawm: sigrit sigra: mai: can pa koe: ka daux nawh khawm: uik, kieh lox sinum siaox heue:. 12 Kaung: mai: can pa koe: ka daux nawh khawm: uik kawx, kieh gauxrhawm: gauxrhi: heue:. Yam an, khaox, ox, mai: can pa koe: ka daux tiag daux tu khawm: uik ah lox rhax pa gauxrhawm: gauxrhi: sivoe ngai: Simiang Siyiex heue:. 13 Grawh grawng: nawh, Nawh Cao: lih hoek tix prawng ca: ka kawn: pui haktiex heue:. Nawh Cao: tak prawng ca: ka haktiex hawt been li pa rah pa see, mai: ka kawn: pui hawt awm: sijax mukheu Nawh heue:.

Simin Ting 97

Siyiex Mawh Cao: Pa Giex Kaing:

1 Simiang Siyiex mawh cao: pa giex kaing:, mai: kieh haktiex gauxrhawm: gauxrhi:. Mai: klawn: tiex pa koe: ka daux rawm: khankix gauxrhawm: gauxrhi: liak. 2 Paiawm: mai: pa vhaik rob vung viang Nawh Cao:, mai: krax pa prawng ca: Nawh hawt been li rah rah see see, mai: mawh jaong num: dangngeung aux heue:. 3 Ngu hu: sivoe ngai: Nawh, mai: gleeing ka pui pa koeng ka Nawh khankix heue:. 4 Pukplak praix Nawh Cao:, kieh haktiex riang heue:. Haktiex yaox mai: siyaung: heue:. 5 Mai: gawng lua khankix, hoik ceh rawm: hu: awm: bee kax, ka plak sivoe ngai: Simiang Siyiex Cao: pa giex kaing: haktiex khawm: uik heue:. 6 Mai: raoma: plak jhi: ka krax pa rah pa see Nawh Cao:, mai: ceu pui khawm: uik yaox ka min: plakngai: Nawh Cao: heue:. 7 Can pui pa krub riang krub rao, mai: pa yaw rangdi khankix, ang lai mawh tid tix, mai: hoek krax pa kaig pa tua heue:. Mai: siyiex khankix eue:, krub ka Nawh Cao: heue:. 8 Simiang Siyiex eue:, veng Zion mhong: mai: gauxrhawm: gauxrhi:, mai: kawn: bon: Yudax khankix, gauxrhawm: gauxrhi: kheu krax prawng ca: Maix heue:. 9 Simiang Siyiex eue:, Maix mawh Cao: pa ting pa lhaong: khaing: kawn: pui haktiex khawm: uik heue:. Mai: khaw: tix nie lheu: yaog Maix ting lhaong: lheu: khaing: siyiex khawm: uik heue:. 10 pui pa moh ka Simiang Siyiex khankix eue:, seeing: brai: ka ceu pa ang mhawm: ang mhiem: khankix, mai: Nawh tak teem: coi ka ju pui pa moh ka Nawh, mai: taoh kix lih khaing: daux tawm: taix pui pa ang rah ang see khankix heue:. 11 Pa riang mawh son pui pa rah pa see, krax pa gauxrhawm: gauxrhi: mawh pa hoik rhuat son pui pa rah pa see, ka daux rhawm: heue:. 12 Mai: pui pa rah pa see khankix eue:, gauxrhawm: gauxrhi: ka daux Simiang Siyiex, mai: yaogyaw ka ceukaux Nawh pa singax singeh heue:.

Simin Ting 98

Siyiex Mawh Cao: Pa Giex Kaing: Haktiex

1 Ah lox rhax pa khraox mai: yaogyaw ka Simiang Siyiex, mai: Nawh Cao: hoik yuh grawng: ceu pa daox pa am:, taix khawn: dawm: Nawh, mai: plawng: taix Nawh pa singax singeh, hoik yuh krax taoh son Nawh heue:. 2 Simiang Siyiex hoik kieh bwanson: krax taoh Nawh sidawng:, krai gumlox Nawh pa rah pa see, sivoe ngai: pui tang: ceu tang: cat khankix heue:. 3 Nawh Cao: doh keud ka krax pa caoxrhawm: mai: sijax mukheu pa hoik yuh Nawh mai: ceu pui Isarilax, mai: bwanson: krax pa taoh Siyiex, hoik yaox pui piang haktiex tom: sidah heue:. 4 Mai: haktiex khawm: uik eue:, teei lox pa ting pa sinum kok yo ka Simiang Siyiex, mai: ah lox rhax pa gauxrhawm: gauxrhi: mai: yaogyaw ka Nawh heue:. 5 Tah ting: mai: rhax lai ka Simiang Siyiex, tah ting: mai: yaogyaw heue:. 6 Phlu: teet tawng mai: teei lox pa sinum kok yo sivoe ngai: Simiang Siyiex, pa mawh Simiang Khunhawkham heue:. 7 Mai: kieh rawm: sigrit sigra: mai: can pa koe: ka daux nawh, kieh haktiex mai: can pa koe: ka daux nawh, ah lox pa ting pa sinum ka Nawh heue:. 8 Mai: kieh rawm: klawng: khankix dieh taix tix, mai: gawng lua khankix, rhax lai gauxrhawm: sivoe ngai: Simiang Siyiex heue:. 9 Grawh grawng: nawh, Nawh Cao: hoik hoek tix prawng ca: ka pui haktiex, Nawh Cao: teei been li pa rah pa see, mai: prawng ca: ka haktiex, mai: teei sijax mukheu Nawh prawng ca: ka kawn: pui khankix heue:.

Simin Ting 99

Siyiex Mawh Cao: Pa Giex Kaing: Pa Ting Siawp Sibrawm

1 Simiang Siyiex mawh cao: pa giex kaing:, mai: kieh kawn: pui khankix koe: pa lhat pa graung heue:. Nawh Cao: ot ka piang Cherubin heue:. Mai: kieh haktiex khankix yungyiang: heue:. 2 Simiang Siyiex pa ting lhaong: ka piang gawng Zion mai: yaog tix kieh Nawh ting lhaong: ka piang kawn: pui khawm: uik heue:. 3 Kieh kix yaogyaw ka ceukaux Nawh, pa ting pa lhaong: mai: kieh koe: krax pa lhat pa graung liak. Grawh grawng: nawh, Nawh Cao: mawh pa singax singeh heue:. 4 Simiang Khunhawkham pa ting siawp sibrawm moh ka krax pa prawng ca: pa rah pa see heue:. Mai: Maix kieh krax pa prawng ca: rah see mai: kaux cong:, mai: krax pa prawng ca: pa rah pa see ka daux geh nyiex Yakop heue:. 5 Yaogyaw ka Simiang Siyiex ex liak. Mai: krub ka Nawh, sivoe ngot dee deuh Nawh Caong Tix, grawh grawng: nawh, Nawh Cao: mawh pa singax singeh heue:. 6 ka daux cao: giex kaing: li khankix, mawh Mose mai: Aron, ka daux kix pui pa krub ka ceukaux Nawh mawh Samoelax, pui in khankix yam krub kix ka Simiang Siyiex, Nawh Cao: deeh pawk lox kix heue:. 7 Nawh Cao: ot ka daux rong: paiawm:, mai: sikah ka kix heue:. Mai: kix kawx, priex tix hawt ka lox pa kham: Nawh sakse:, mai: ka lox tawm: been li pa deuh Nawh khankix heue:. 8 Simiang Siyiex ex eue:, Maix deeh pawk lox kix heue:. Viang Maix tawx phimap awm: ceu pa hoik yuh kix kawx, Maix mawh Siyiex Cao: pa lang: gun lang: yeung ka kix heue:. 9 Yaogyaw ka Simiang Siyiex mai: krub ka Nawh ka gawng pa singax singeh Nawh heue:. Gawh grawng: nawh, Nawh Cao: mawh pa singax singeh heue:.

Simin Ting 100

Lox Rhax Yaogyaw

1 Kawn: pui haktiex khawm: uik eue:, kok yo lox sinum ka Simiang Siyiex heue:. 2 Gauxrhawm: gauxrhi: mai: yuh kaing jhaw: Simiang Siyiex awawx. Mai: ah lox rhax pa gauxrhawm: gauxrhi: mai: hu: plak sivoe ngai: Nawh Cao: heue:. 3 Mai: pex deuh tix tawng, Simiang Siyiex mawh Siyiex awawx. Nawh mawh Cao: pa phan: pa yuh ka ex, mai: mawh Siyiex ex, mai: ex kawx mawh pui Nawh, mai: cub yung: pa sax sawm: mai: Nawh heue:. 4 Rieb tix teei ka bwanson: Nawh pa kied ting mai: laig ka daux siviex Nawh, mai: viex min: plakngai: Nawh laig ka dee ot Nawh heue:. Mai: yaogyaw ka bwanson: Nawh mai: yaogyaw ka ceukaux Nawh heue:. 5 Grawh grawng: nawh, Simiang mawh pa jiet mhawm: heue:. Mai: krax pa caoxrhawm: Nawh koe: jheeng: jheeng:, mai: sijax mukheu Nawh mawh pa kaux cong: ku ju leeing: ju leeing: phan: heue:.

Simin Ting 101

Lox Sijax Mukheu Simiang Tix Kaux

1 Simiang Siyiex eue:, aux rhax lai grawng: krax pa caoxrhawm: Maix mai: krax prawng ca: hawt been li pa rah pa see, sivoe ngai: Maix heue:. 2 Mai: aux teei cuyi pingnya satix hawt been li Maix grum heue:. Maix tak sang hoek ka aux lai mawx? Aux tak viex rhawm: pa singax pa grum mai: hoek ka daux nyiex aux heue:. 3 Aux ang nieb yuh ka kaing ceu pa ang mhawm:, sivoe ngai: tix, mai: aux seeing: brai: ka pui pa lud krax hu: khankix, mai: ang lai kieh pied tix heue. 4 Pui pa vawk rhawm: khankix, aux tak kieh kix lih hu: khaing: tix, aux ang lai yuh paox pie ka pui pa caox pa caig khankix heue:. 5 Mai: aux tak yieh tix tik ka pui pa yuh plakngai: paox plawg paox nyhawm: tix laux khankix, aux ang lai gun yeung ka pui pa ting rhawm: ting rhi: khankix heue:. 6 Ngai: aux tak jhak ka pui pa kaux sijax khankix, mai: kieh kix hoek ot mai: aux, mai: pui pa hu: daux krax pa grum pa tak sang yuh kaing aux heue:. 7 Mai: pui pa chix lukliak khankix, ang pon tix ot ka daux nyiex aux, mai: pui pa chix ah lox pa pie pa lhen: khankix, ang pon tix ot plak sivoe ngai: aux heue:. 8 Mai: can pui pa caox pa caig khankix, tak sang teei tix tik khaing: daux veng Siyiex heue:. Mai: pui meung pa yuh pa caox pa caig khankix, tak yuh kix laux cao cao heue:.

Simin Ting 102

Lox Rawg Bwan: Pui Pa Khirawm: Tix Kaux

1 Simiang Siyiex eue:, nghiet ka lox pa rawg aux bwan:, mai: lox pa kok yo aux kieh hoek ka Maix liak. 2 Paw lai mox ngai: Maix khaing: aux, singaix yam yaox aux krax pa khirhawm: khirhi:, mai: yam kok yo aux ka Maix, nghiet lox aux, mai: nied tix pawk ka lox aux liak. 3 Grawh grawng: nawh, singaix bawg yam aux, uik hu:, awm: taox ngu, mai: si:ang: aux uik hax awm: gaox ngu heue:. 4 Mai: rhawm: aux hoik sang, hoik mat, awm: rib riem pa hoik vhit hoik kroh mai: hoik piawm: tix sawm: rheep heue:. 5 Mawh kheu lox pa ngia pa riag aux, aux hoik krawx, taig ngie si:ang: heue:. 6 Aux hoik awm: sim: "Vampo" pa ot ka daux tiag daux tu mai: awm: sim: pang: plawh, pa ot ka gwang yaong: prim: pa hoik laux heue:. 7 Aux pau nong: nong:, awm: sim: pa ot ka piang braux nyiex tix mu: khaing: heue:. 8 Mai: pui pa koeng ka aux khankix, salao ka aux, leeing: lang: singaix heue:. can pui pa ot tang: plak khankix, ah pa ang cee ang cak mai: map ka aux, mai: jhax lawg ka aux heue:. 9 Mai: aux yaox tix ih nyaox, awm: ih khaomun, mai: yam nyaux aux, yaox tix nyaux mai: rawm: ngai:, kheu ang Maix vhah rhawm: ka aux, mai: Maix songrhawm: songrhi: ka aux heue:. 10 Maix hoik yaog aux ting lhaong:, mai: deeh tik vud ka aux heue:. 11 Mai: singaix bawg yam aux, awm: veei pang: peue: pa lang:, mai: aux hoik vhit hoik kroh hu:, awm: rib riem heue:. 12 Simiang Siyiex eue:, Maix mawh Siyiex leeing: ju leeing: phan:, mai: doh keud doh sawn: ka ceukaux Maix ku ju leeing: ju leeing: phan: heue:. 13 Maix kaoh, mai: caoxrhawm: ka veng Zion heue:. Mai: bawg yam pa caoxrhawm: ka nawh, mai: bawg yam pa hoik ciak Maix tix deuh hoik hoek heue:. 14 Mai: siliex Maix khankix, moh ka simaox Nawh khankix, mai: caoxrhawm: ka phawng: tiex Nawh khankix heue:. 15 Pui tang: ceu tang: cat khankix tak lhat graung ka ceukaux Simiang Siyiex, mai: Simiang haktiex khankix khawm: uik, tak lhat graung ka min: plakngai: Maix heue:. 16 Grawh grawng: nawh, Simiang Siyiex, yuh veng Zion mai: viex min: plakngai: Nawh sidawng: heue:. 17 Nawh Cao: deuh tix tawng lox pa rawg kix bwan:, pui pa ang koe: dee peung dee pan: khankix, Nawh ang nieb nunai: ka pa rawg kix bwan: heue:. 18 Grawh grawng: nawh, Nawh hoik tiem: tix deuh son pui pa tak sang mawh phaox khaix, mai: pui pa hoik phan: hoik yuh Nawh khankix, tak sang yaogyaw ka Simiang Siyiex heue:. 19 Simiang Siyiex ot dee lhaong:, ka dee singax singeh mai: num: tix jhak khaing: raoma: mai: yaox ka haktiex heue:. 20 Kieh nghiet ka lox pa riag pui pa ot ka daux thawng:, mai: ploi: lih ka pui pa hoik bak kix tix pah yum. 21 Kieh kawn: pui khankix, teei ka ceukaux Simiang Siyiex mai: plak jhi: sidawng: ka piang gawng Zion mai: yaogyaw ka bwanson: Nawh Cao:, mai: plak jhi: sidawng: ka daux veng Yerusaliem heue:. 22 Yam ceu pui ku ceu ku ru mai: pui ku meung ku dah, kraix khrawm: pui tix, mai: krub ka Simiang Siyiex heue:. 23 Mai: Nawh Cao: kieh riang rao aux dieh hu:, ka daux krax pa hu: aux, mai: kieh singaix bawg yam aux dawd hu: heue:. 24 Siyiex aux eue:, aux krai yuh nin:, "Paw nyang teei ju aux lih, yam kawn: awn: ju aux liak." Mai: jhong: khix mee: num Maix kaux cong: ku ju leeing: ju leeing: phan: heue:. 25 Simiang aux eue:, ka daux yam jah, Maix hoik kaw: num: haktiex heue:. Mai: raoma: kawx, mawh khaix taix Maix heue:. 26 Mai: ceu an khankix, tak sang laux leeing:, viang mawh kawx nan:, Maix kawn: ca: kaux ca: koe: heue:. Mai: ceu an khankix tak sang prim: hu: awm: kraung ceep, mai: Maix tak sang pua: ka ceu an khankix, awm: man: vhua:, mai: tak sang dee thai: loh ceu an khankix awm: kraung ceep heue:. 27 Viang mawh nan:, Maix ca: awm: paox Tix, mai: jhong: khix mee: num Maix, ang chix uik chix sidah heue:. 28 Maix ot mai: kawn: praix siliex Maix khankix, mai: simie ceucat kix kawx, tak kaux cong: sivoe ngai: Maix heue:.

Simin Ting 103

Siyiex Mawh Krax Moh Krax Rhawm:

1 Ju aux eue: yaogyaw ka Simiang Siyiex heue:, can pa koe: ka daux aux khawm: uik eue:, yaogyaw ka ceukaux Nawh pa singax singeh heue:. 2 Ju aux eue:, yaogyaw ka Simiang Siyiex heue:, paw piawm: ka bwanson: Nawh Cao: khankix heue:. 3 Nawh Cao: hoik ploi: phimap maix ku ceu, mai: hoik kieh jhawm: saux maix moi: khawm: uik heue:. 4 Nawh Cao: taoh ju maix lih khaing: ka daux pa laux pa leeing:, mai: bwanson: krax caoxrhawm: Nawh, koe: ka piang kaing: maix heue:. 5 Mai: Nawh Cao: teei ceu pa mhawm: mai: kieh ju maix vhah rhawm: vhah rhi:, mai: deeh cox ju maix, awn: awm: klang: krih heue:. 6 Simiang Siyiex prawng ca: rah see son pui pa kham: geu: ka krax pa tuktiak tute: khawm: uik heue:. 7 Mai: Nawh Cao: hoik krai kaing ceu pa sang yuh Nawh ka Mose, mai: plak jhi: kaing pa yuh Nawh khankix ka ceu pui Isarilax heue:. 8 Simiang Siyiex hoik grum naog ka krax pa caoxrhawm:, mai: pa chix yuh bwanson:, mai: pa lang: gun lang: yeung, mai: krax pa caoxrhawm: tom: nie heue:. 9 Nawh ca: deuh phimap jheeng: jheeng: ang mawh, Nawh deuh pa phit daux rhawm: Tix jheeng: jheeng: ang mawh heue:. 10 Nawh ang lai deeh tawx phimap ka phimap, awm: phimap pa hoik yuh ex heue:. 11 Awm: lhaong: raoma: khaing: haktiex, krax pa caoxrhawm Nawh Cao: kied ting lhaong: ka piang can pui pa lhat pa graung ka Nawh khankix heue:. 12 Mai: awm: pa singai, plak lih singaix, khaing: plak klip singaix, Nawh Cao: kieh phimap ex, singai khaing: ex heue:. 13 Awm: pa caoxrhawm: keeing: ka kawn: tix, Simiang Siyiex caoxrhawm: ka can pui pa lhat pa graung ka Nawh khankix heue:. 14 Grawh grawng: nawh, Nawh Cao: hoik tawng grawng: tokaux ex, mai: doh keud ka mawh ex phawng: tiex heue:. 15 Singaix bawg yam ex kawn: pui, awm: num: rib num: riem mai: nawh chix pruh awm: tai daux tiag daux tu heue:. 16 Bhaung: phlu: nawh luan hu: mai: tai nawh grai: hu:, mai: ang tawng deeh bleeh nawh khaix. 17 Mai: krax pa caoxrhawm: Simiang Siyiex, jah tom: dix, tom: hoek leeing: ju, ca: koe: ka piang can pui pa lhat pa graung ka Nawh heue:. 18 Mai: pui pa priex ka sijax mukheu Nawh mai: pa koe: satix, mai: pa priex tix hawt ka lox tawm: been li Nawh khankix, mai: krax pa rah pa see Nawh, koe: ka piang kawn: praix kix leeing: ju heue:. 19 Simiang Siyiex deuh dangngeung Nawh piang raoma:, mai: siawp sibrawm pa giex Nawh kaing: tah hu: ku dah ku dee heue:. 20 Mai: kawncau Siyiex pa ting siawp sibrawm mai: pa nghiet ka gumlox Nawh mai: pa hawt tix yuh ka gumlox pa tawx Nawh khankix eue:, yaogyaw ka Simiang Siyiex heue:. 21 Mai: cub kawncau raoma:, pa hawt tix yuh ka alo Nawh Cao: khankix eue:, yaogyaw ka Simiang Siyiex heue:. 22 Mai: can pa phan: pa deuh Nawh ku dah ku dee khawm: uik eue:, yaogyaw ka Simiang Siyiex heue:. Ju aux eue:, yaogyaw ka Simiang Siyiex heue:.

Simin Ting 104

Yaogyaw Ka Cao: Pa Phan: Pa Deuh

1 Ju aux eue:, yaogyaw ka Simiang Siyiex heue:. Siyiex aux eue:, Maix mawh Cao: pa kied ting kied lhaong: heue:. Maix hoik ceep ka min: plakngai: siawp sibrawm pa ting pa lhaong: heue:. 2 Maix teei pa riang Maix, mai: tawb kheem: ka tokaux tix, awm: pa teei tix ceep kraung ka tokaux tix, Maix teei ka raoma: mai: tawb tix deuh heue:. 3 Maix teei jaong num: dee ot daux lawg plak piang, mai: yuh dee ot Maix ka daux rawm: mai: brug ling: paiawm:, mai: hu: lai ling ka pruik bhaung: khankix. 4 Maix kieh kawncau tokaux Maix khankix, awm: bhaung: mai: kieh pui cau pui soi: Maix khankix, awm: raongu heue:. 5 Maix hoik kaw: tix deuh jaong num: haktiex, mai: ang chix gah chix greed mai: kaux cong: jheeng: jheeng: heue:. 6 Maix kieh rawm: sigrit sigra: kheem: ka haktiex, awm: tawb kheem: kraung ceep, mai: kieh rawm: khankix, tawb kheem: ka piang gawng lua khankix heue:. 7 Mai: yam sidiex gau Maix ka kix, kix lih to: heue:. Mai: yam mhong: kix lox sinum praix, kix nied tix to: hu: heue:. 8 Mai: kix haok ka gawng khankix, mai: hoek ka dee cox Maix dee ot son kix heue:. 9 Maix hoik gwieh tix deuh mee: haktiex, ang kieh kix pon tix tiang, mai: ang kieh kix kheem: ka haktiex heue:. 10 Simiang Siyiex kieh rawm: keut lih ka daux klawng: daux ngawd mai: ka piang gawng lua khankix heue:. 11 Mai: kieh totiag totu piang haktiex khawm: uik nyaux heue:. Mai: la tiag khankix kawx, yaox tix nyaux tom: sak heue:. 12 Sim: raoma: khankix, ot ka praok rawm: an, mai: kix ah lox ka piang kak khaox khankix heue:. 13 Maix ot ka daux lawg plak piang mai: tawx rawm: ka gawng lua mai: haktiex, mai: kix hoik nyawmrhawm: ka bwanson: pa yuh Maix heue:. 14 Mai: Maix kieh rib riem kuah son sang ih totiag totu, mai: kieh nghox kuah son pa sang ih kawn: pui, kieh pa ih pa un: lih khaing: daux tiex heue:. 15 Mai: kieh rawm: plix siiet koe:, pa kieh rhawm: kawn: pui gauxrhawm:, kieh rawm: bee pa mhawm: koe:, blang: yuh plakngai: pui, mai: kieh khaomun koe:, pa cong: yuh rhawm: rhi: kawn: pui heue:. 16 Mai: khaox piakvan: pa sum: Simiang Siyiex, ka piang gawng Lebanon khankix kawx, koe: krax nyawmrhawm: nyawmrhi: heue:. 17 Mai: sim: khankix, hoek tix yuh mheem: ka khaox an khankix, mai: sigaig khankix, hoek tix yuh mheem: ka khaox gix an khankix heue:. 18 Mai: kieh kyah khankix ot ka dee lhaong: gawng, mai: kieh ghot (saphan) khankix ot ka daux rang: heue:. 19 Nawh Cao: hoik yuh tix deuh khix, mawh mhai: son bawg yam, mai: singaix kawx, kieh tawng bawg yam tak laig it heue:. 20 Nawh Cao: yuh pa vhaik kieh mawh ponsawm:, mai: totiag totu khawm: uik, lai ling yam an heue:. 21 Mai: sivai sangsi: pa awn: ju khankix, graox mai: sawg tix ih kug ka Siyiex heue:. 22 Yam lih singaix, kix deeh hoek mai: dee it ka daux dee ot kix heue:. 23 Kawn: pui kawx, lih hu: yuh kaing tom: hoek bawg yam ponbo heue:. 24 Simiang Siyiex eue:, grawng: pa phan: pa yuh Maix khankix, kied nie haoh hun: heue:. Mai: can pa koe: khankix khawm: uik, Maix hoik yuh ka cuyi pingnya Tix heue:. Kraung khrai: Maix hoik grum naog ka piang haktiex heue:. 25 Mai: totiag totu pa iak pa ting, pa chix hu: chix mo, pa ang lai uik simin khankix ot ka daux rawm: sigrit sigra: pa ting pa vieh heue:. 26 Ka dee an, reu ting khankix kawx, lai ling mai: kax ting pa hoik yuh Maix khankix kawx, klieh ka daux rawm: an heue:. 27 Totiag totu khankix khawm: uik, kix krox jun ka ceu pa ih pa un: pa tawx Maix ka kix yam hoek bawg yam heue:. 28 Mai: kix ih awm: pa tawx Maix ka kix heue:. Kix nyawmrhawm: nyawmrhi:, ka pa tawx Maix ceu pa mhawm: ka taix tix heue:. 29 Phan: Maix vud ngai: khaing: kix, kix kharhawm: kharhi: heue:. Mai: phan: Maix teei ju kix yum, kix deeh ka phawng: tiex heue:. 30 Maix ploi: Khwan: singax Maix yuh kix, deeh cox yuh plakngai: haktiex pa khraox heue:. 31 Kieh min: plakngai: Simiang Siyiex kaux cong: leeing: ju leeing: phan: liak. Mai: kieh Siyiex koe: krax pa gauxrhawm: gauxrhi:, ka ceu pa hoik yuh Nawh khankix liak. 32 Nawh Cao: jhak ka haktiex, mai: haktiex siyaung: heue:. Nawh chuh ka gawng mai: gawng lih mawh taox ngu heue:. 33 Aux tak ah lox rhax ka Simiang Siyiex, yam kawn: im: ju aux heue:. Aux tak ah lox rhax yaogyaw ka Siyiex aux yam kawn: klawd aux heue:. 34 Mai: yam kawn: keud aux daux rhawm: tix, kieh khaw: ka rhawm: Nawh liak. Aux kawx, tak koe: krax gauxrhawm: gauxrhi: ka daux Simiang Siyiex heue:. 35 Can pui pa phit pa lud khankix, Nawh Cao: teei tix tik khaing: haktiex, mai: pui pa ang rah ang see khankix, ang lai kieh koe: phaox khaix, ju aux eue:, yaogyaw ka Simiang Siyiex heue:. Haleluya!

Simin Ting 105

Siyiex Mai: Pui Nawh

1 Yaogyaw ka bwanson: Simiang Siyiex heue:. Mai: rawg bwan: ka ceukaux Nawh, mai: plak jhi: kaing ceu pa hoik yuh Nawh ka pui khankix heue:. 2 Rhax lai ka Nawh heue:, rhax lai yaogyaw ka Nawh heue:. Mai: krai grawng: kaing ceu pa daox pa am:, pa yuh Nawh khankix. 3 mai: yaw rangdi ka daux ceukaux pa singax singeh Nawh. Kieh rhawm: can pui pa sawg ka Simiang Siyiex, gauxrhawm: gauxrhi: heue:. 4 Sawg ka siawp sibrawm Simiang Siyiex heue:. Mai: sawg ka plakngai: Nawh jheeng: jheeng: heue:. 5 Doh keud ka grawng: ceu pa daox pa am: pa hoik yuh Nawh, mai: ceu pa daox, lox tawm: been li pa hoik lih khaing: jheeh Nawh khankix heue:. 6 Mai: simie ceucat siliex Nawh Abraham, mai: kawn: praix Yakop, pa hoik laug Nawh tix teei khankix eue:, 7 Nawh Cao: mawh Simiang Siyiex ex, mai: Nawh prawng ca: ka piang haktiex khawm: uik heue:. 8 Mai: Nawh Cao: doh keud ka sijax mukheu Nawh, mai: gumlox tawm: been li, pa hoik krai Nawh tix deuh tom: sidah ju pui tix rheng: ju heue:. 9 Sijax mukheu pa hoik yuh Nawh tix deuh mai: Abraham, mai: pa hoik tiex tu Nawh ka Icak. 10 Sijax mukheu pa hoik yuh Nawh, son sang mawh pa kaux pa cong: ka Yakop, mai: sijax mukheu an, tak sang mawh pa kaux pa cong: leeing: ju leeing: phan: son pui Isarilax heue:. 11 Aux tak teei haktiex meung Khanan, pa mawh sin:, pa tak sang pon pex, tawx ka maix heue:. 12 Ka daux ceu pui ex, phan: simin tix yaox ang awt nie, tux, yam mawh kix nyo sinie ka daux meung an heue:. 13 Yam lai ling kix tix veng hoik tix veng, mai: tix meung hoik tix meung, 14 Siyiex ang kieh pui mawx tuktiak tukte: ka kix, Siyiex sivied tix gau ka simiang khunhawkham ka son kix heue:. 15 Paw lai chuh ka can pui pa hoik kraix Aux rawm: bee, mai: paw lai deuh phimap ka cao: jhai: Aux khankix. 16 Mai: Siyiex kieh sibhawm: praix hoek ka daux meung an, mai: teei tix tik ka ceu pa ih pa un: khawm: uik. 17 Mai: Nawh Cao: ploi: pui hu: tix kaux sivoe kix, pa mawh Yosiep pa yaox tix kham: geu: pa coh son sang mawh siliex pui heue:. 18 Mai: kix sau: gang: ka caong nawh, mai: tuktiak tukte: ka nawh, mai: kieh nawh kharhawm: kharhi: heue:. 19 Ka: sivoe ang lox nawh nyang grum naog, Simiang Siyiex cheuk cheu: tix yaox nawh heue:. 20 Mai: simiang khunhawkham pa giex kaing: pui khankix, ploi: pui hu: taoh nawh lih mai: tawx krax nyawmrhawm: nyawmrhi: heue:. 21 Mai: nawh deuh Yosiep mawh simiang pa giex kaing: nyiex haw: nawh, mai: kieh nawh priex kraung khrai: sinngao nawh khawm: uik heue:. 22 Mai: nawh tawx akhwang:, son sang phyawk, mai: son sang sidiex gau ka simiang greem: nawh khankix, awm: pa simie nawh tix yuh heue:. 23 Mai: Isarilax hoek ka daux meung Ejiptux, mai: Yakop hu: bang: haktiex ceu pui Hamax heue:. 24 Mai: Siyiex kieh pui Nawh pre, haoh hun:, mai: ting riang ting rao khaing: pui pa koeng khankix heue:. 25 Mai: Nawh Cao: tieh loh rhawm: kix, mai: kieh kix koeng mai: bohrhawm: bohrhi: ka pui Nawh khankix heue:. 26 Khaix an Nawh Cao: laug tix teei mai: ploi: siliex Nawh Mose mai: Aron heue:. 27 Maix kieh jhi: mhai: sakse: Nawh Cao: khankix, ka daux meung Ejiptux, mai: yuh mhai: ceu pa daox pa am:, Nawh khankix, ka daux haktiex ceu pui Hamax heue:. 28 Nawh Cao: ploi: pa vhaik, kieh vhaik heue:. Mai: kix ang pon tieb tie ka gumlox Nawh Cao:. 29 Mai: Nawh Cao: kieh rawm: mawh nham:, mai: kax khankix yum heue:. 30 Mai: kieh khet naog ka haktiex kix, khawm: daux nyiex haw: dee ot simiang heue:. 31 Mai: Nawh Cao: tawx lox, kieh brang: mai: maing lih, naog ka haktiex kix heue:. 32 Mai: Nawh Cao: kieh mu: pre: lih, tang: lhiex mai: kieh raongu lih ka haktiex kix heue:. 33 Mai: Nawh Cao: kieh lah ka piang nhu: plix siiet mai: khaox ruh mai: raig tix tik ka khaox pa koe: ka daux meung kix heue:. 34 Mai: Nawh Cao: tawx lox ka sido, mai: sido pa haoh pa hun: tom: ang lai uik simin lih hoek ka daux meung kix heue:. 35 Mai: ih, taux lhax, rib riem, mai: plix nghox plix koi: pa koe: ka daux meung kix heue:. 36 Mai: Siyiex kieh kawn: Ai: kix yum khawm: uik, pa moh mai: pa deuh kix rhawm: tix kah heue:. 37 Mai: khaix an, Nawh Cao: viex pui Isarilax lih hu: khawm: brax khawm: kua:, mai: viex tix mau khri: lih hu: heue:. 38 pui meung Ejiptux, koe: krax gauxrhawm: gauxrhi:, yam lih hu: pui Isarilax heue:. 39 Grawh grawng: nawh, kix kied lhat kied graung ka kix heue:. Mai: Nawh Cao: kheem: veei paiawm: ka piang kix, mai: ti: pa riang ngu yam ponsawm: ka kix heue:. 40 Yam rawg yam mhaing: kix, Nawh Cao: tawx keed hoek ka kix, mai: tawx khaomun raoma: son sang vhah rhawm: kix heue:. 41 Mai: Nawh Cao: paoh ka rang: mai: rawm: lih mai: lih hu: ka dee kroh tiex, awm: rawm: klawng: heue:. 42 Grawh grawng: nawh, Nawh Cao: doh keud ka sijax mukheu pa singax singeh tau mai: siliex Nawh Abraham heue:. 43 Nawh Cao: kieh pui Nawh khankix lih mai: pui pa hoik laug Nawh khankix, ah lox gauxrhawm: gauxrhi: mai: lih hu: heue:. 44 Mai: Nawh Cao: teei tix tawx haktiex pui tang: ceu tang: cat ka kix, mai: kix pon tix ih ka kaing pa yuh pui tang: ceu khankix heue:. 45 Mai: kieh kix hawt yuh lox tawm: been li Nawh khankix, mai: hawt tix twah klaung: lox tawm: been li Nawh heue:. Haleluya!

Simin Ting 106

Siyiex Yuh BwanSon: Ka Pui Nawh

1 Yaogyaw ka bwanson: Simiang Siyiex heue:. Mawh kheu Nawh mawh pa jiet mhawm: mai: krax caoxrhawm: Nawh koe: jheeng: jheeng: heue:. 2 Mai: pui mawx pa tak sang pon tix krai grawng: pa yuh Simiang Siyiex ka siawp sibrawm pa ting pa lhaong: Nawh? 3 Mai: pui mawx pa tak sang pon tix plak jhi: ka bwanson: Nawh khawm: uik? Can pui pa hawt tix yuh ka been li Nawh, mai: pa hawt ka krax pa rah pa see Nawh ku bawg, koe: bwanson: heue:. 4 Simiang Siyiex eue:, viex rhawm: sibieh Maix doh keud ka aux, mai: taoh ka aux, mai: hoek tix jhak ka aux liak. 5 Mai: kieh aux yaox ka pa mhawm: can pui pa hoik laug Maix tix teei khankix, kieh aux gauxrhawm: gauxrhi: mai: pui Maix, pa gauxrhawm: gauxrhi: khankix, kieh aux yaw rangdi tau mai: can kix pa mawh sin: Maix liak. 6 Mai: ex hoik phit hoik lud, awm: pa hoik phit lud tax du ex, mai: ex hoik yuh phimap mai: pa ang rah ang see heue:. 7 Mai: tax du ex khankix ang kix tawng ka ceu pa daox pa am:, pa hoik yuh Maix ka daux meung Ejiptux, mai: kix piawm: ka krax caoxrhawm: Maix tom: nie, mai: kix tieh feen ka Nawh praok rawm: sigrit sigra: pa raoh Edom heue:. 8 Viang mawh kawx nan, Nawh Cao: taoh kix, mawh kheu ceukaux Nawh, mai: Nawh kieh siawp sibrawm Nawh pa ting, sidawng: heue:. 9 Nawh Cao: tawx lox ka rawm: sigrit sigra: pa raoh Edom, mai: rawm: an, kroh hu: heue:. Mai: Nawh Cao: thong: kix hu: dee raux, awm: hu: piang tiex kroh heue:. 10 Mai: Nawh Cao: taoh kix khaing: ka daux tawm: taix pui pa koeng ka kix, mai: taoh kix lih ka daux tawm: taix pui pa khoi: pa ciang ka kix heue:. 11 Mai: rawm: an, kheem: tix tik ka pui pa koeng ka kix khankix, mai: ang lai deuk tix kaux kawx heue:. 12 Yam an kix yumrhawm: ka lox Nawh Cao:, mai: rhax lai yaogyaw ka bwanson: Nawh Cao: heue:. 13 Viang mawh kawx nan:, kix khran: piawm: ka ceu pa hoik yuh Nawh Cao:, mai: kix ang krox ang pau ka krax pa keud pa sawn: Nawh Cao: heue:. 14 Mai: kix koe: rhawm: pa ghoing: ka ceu pa ih pa un: ka daux tiag, mai: kix tom: cheuk cheu: tix yaox ka Siyiex, dee yien: dee ang pui ot heue:. 15 Nawh Cao: tawx ka kix awm: pa mhaing: kix heue:. Viang mawh kawx nan:, Nawh Cao: tawx pa yhawm: pa krawx ka kix heue:. 16 Mai: kix bohrhawm: bohrhi: ka Mose ka daux tab, mai: Aron pa mawh pui pa singax singeh Simiang Siyiex heue:. 17 Mai: yam an, haktiex bih mai: bleet tix ih ka Datan mai: cub kix pa laig ka Abiram heue:. 18 Mai: ngu lih ka piang cub caw kix, mai: gleeing ka pui pa ang rah ang see khankix heue:. 19 Mai: kix raug rieng kawn: moi ka piang gawng Hawrap, mai: krub ka nawh heue:. 20 Kix teei min: plakngai: mai: loh ka rieng kawn: moi pa chix ih rib heue:. 21 Mai: kix hoik piawm: ka Siyiex, Cao: pa hoik taoh ka kix, mai: Cao: pa yuh grawng: kaing ceu pa ting pa lhaong:, ka daux meung Ejiptux, 22 mai: yuh ceu pa daox pa am: khankix, ka dee ot ceu pui Hamax, mai: grawng: ceu pa lhat pa graung ka praok rawm: sigrit sigra: Edom heue:. 23 Mawh kheu in, Siyiex tom: keud tix yuh laux ka pui Nawh khankix, viang mawh kawx nan:, Mose siliex pa hoik laug Nawh tix teei tom: cung sivoe Nawh mai: khyox khaw: son ang Nawh sang yuh kix laux leeing: heue:. 24 Mai: kix nieb yuh ang kieh koe: ceu ka meung pa jiet mhawm: an, mai: kix ang yumrhawm: ka lox mukheu pa hoik krai Siyiex heue:. 25 Mai: kix ah lox bawg lox be ka nyiex bang: dee ot tix, mai: ang lai nghiet ka gumlox Simiang Siyiex heue:. 26 Yam an Nawh Cao: yaog taix Tix tang plak, mai: kieh kix goh tix yum ka daux tiag heue:. 27 Mai: kieh simie ceucat kix, goh sinax pui tang: ceu tang: cat khankix, mai: jhax lawg ka kix, mai: kieh kix prung prang: rai ruat hu: ku praix ku klawng: heue:. 28 Mai: kix hawt khaix siyiex Balapekurax mai: ih ka ceu pa hoik tan hoik lu sivoe ngai: pa yum heue:. 29 Mawh kheu nan:, kix yuh ceu pa songrhawm: songrhi: Siyiex, mai: kieh ceu pa saux preng hoek ka piang kix heue:. 30 Yam an Phinahat kaoh mai: prawng ca: ka pui pa yuh pa caox pa caig khankix, mai: saux preng grai: hu: khaix heue:. 31 Mawh kheu yuh nawh nan:, deuh nawh mawh pa rah pa see, ku ju leeing: ju leeing: phan: heue:. 32 Khaix an kix baox yuh krax pa songrhawm: songrhi: Nawh Cao:, ka praok rawm: Meribax, mai: Mose tom: yaox tix kham: geu: krax kharhawm: kharhi: sipiag kix heue:. 33 Mawh kheu yuh kix pa sung sang rhawm: Mose, jheeh nawh tom: ah lox pa ang khaw: tix ah ka kix heue:. 34 Mai: kix ang yuh laux ka pui tang: ceu tang: cat, mai: kix ang hawt yuh ka gumlox Simiang Siyiex heue:. 35 Mai: kix ot tau mai: pui tang: ceu tang: cat, mai: gau ka been li kix heue:. 36 Mai: kix krub ka rieng rao kix, mai: krix ka kie pa taong: kix heue:. 37 Mai: kix teei kawn: simex mai: kawn: bon: kix mai: tan lu ka phicaox heue:. 38 Mai: kix plaux kawn: simex mai: kawn: bon: kix, pa ang koe: phimap, mai: teei nham: kix mai: tan lu ka rieng rao meung Khanan, mai: meung an, seeing: brai: ka nham: heue:. 39 Mai: kix yuh tokaux tix seeing: brai: ka kaing pa yuh kix, mai: kix phit lud ka pa yuh tix heue:. 40 Mawh kheu in, Simiang Siyiex tom: lih krax songrhawm: songrhi: ka pui Nawh khankix, mai: seeing: brai: ka sin: Nawh heue:. 41 Mai: Nawh Cao: teei tix tawx ka daux tawm: taix pui tang: ceu tang: cat khankix, mai: kieh pui pa koeng ka kix, giex kaing: ka piang kix heue:. 42 Pui pa koeng ka kix, tuktiak tukte: ka kix, mai: kix yaox tix ot mai: yuh siliex greem: tawm: taix kix heue:. 43 Viang Nawh Cao: hoik taoh ka kix, tom: nie bawg kawx kix ca: keud krax tieh krax feen, kheu phimap pa yuh kix heue:. 44 Viang mawh kawx nan:, Nawh Cao: jhak ka krax pa kharhawm: kharhi: kix, mai: mhong: ka lox pa kok pa yo kix heue:. 45 Nawh Cao: doh keud ka sijax mukheu pa hoik yuh Nawh son kix, mai: caoxrhawm: ka kix, awm: krax pa caoxrhawm Nawh tom: nie heue:. 46 Siyiex kieh kix deeh pon krax caoxrhawm: khaing: pui pa hoik viex kix hu: khawm: uik heue:. 47 Simiang Siyiex eue:, khrawm: tix taoh ex lih khaing: pui tang: ceu tang: cat, mai: rieb tix teei ka bwanson: ceukaux Maix pa singax singeh mai: pa ting pa lhaong: heue:. Aux yaw rangdi mai: gauxrhawm: gauxrhi: yaogyaw ka Maix heue:. 48 Kieh Simiang Siyiex ceu pui Isarilax koe: bwanson: tom: sidah haktiex leeing: ju leeing: phan: liak. Mai: kieh kawn: pui khawm: uik rieb tix ah, Amen. Haleluya!

Simin Ting 107 Baux Phwan:

Yaogyaw Ka Siyiex

1 Yaogyaw ka bwanson: Simiang Siyiex, mawh kheu Nawh mawh pa jiet mhawm:, mai: krax pa caoxrhawm: Nawh koe: jheeng: jheeng: heue:. 2 Mai: kieh kix can pa hoik taoh, Simiang Siyiex pa mawh kix pa hoik taoh Nawh, khaing: daux tawm: taix pui pa koeng khankix. 3 Mai: can kix pa ot ka daux meung pa koe: plak lih singaix, mai: plak klip singaix, caong ma: laong: mai: caong ma: seh khankix, Nawh deeh viex kix hoek heue:. 4 Mai: kix lai ling ka daux tiag daux tu, dee yien: dee yawg mai: ang yaox veng dee ot pui. 5 Mai: kix lauxrhawm: lauxrhi: kheu ang yaox tix sawm:, mai: ang yaox tix nyaux rawm: heue:. 6 Kix kok yo ka Simiang Siyiex, yam yaox kix krax pa hot pa sibhawm: mai: Nawh Cao: taoh kix ka daux pa kharhawm: kharhi: heue:. 7 Mai: Nawh Cao: thong: kix hu: ka daux krax pa rah pa see, mai: kieh kix hoek ka veng dee ot pui heue:. 8 Kieh pui khankix khaw: tix keud ka krax pa caoxrhawm:, mai: ceu pa daox pa am:, pa hoik yuh Nawh ka kawn: pui khankix, mai: kieh kix yaogyaw ka Simiang Siyiex heue:. 9 Grawh grawng: nawh, Nawh Cao: tawx awm: pa simie kix, mai: pui pa cai: rhawm: khankix, Nawh tawx ceu pa ih pa un: pa mhawm: tom: sak heue:. 10 Mai: kix yaox tix ot ka daux pa vhaik, mai: ka daux veei krax yum, mai: yaox tix kharhawm: kharhi: ka pa phyawk maox ceng heue:. 11 Mawh kheu thiang: kix tix tik ka gumlox Siyiex, mai: nieb yuh pa ang cee ang cak ka krax pa keud pa sawn: Siyiex Cao: pa ting pa lhaong: khaing: khawm: uik heue:. 12 Mawh kheu in, Nawh Cao: kieh kaing pa yuh kix, deeh hoek ka kix tiru mai: rau dee tiem mai: kix goh mai: ang koe: cao: pa yaog heue:. 13 Kix kok yo ka Simiang Siyiex, yam yaox kix krax pa hot pa sibhawm: mai: Nawh Cao: taoh kix ka daux pa kharhawm: kharhi: heue:. 14 Mai: Nawh Cao: teei kix lih khaing: ka daux pa vhaik mai: veei krax yum, yah tix ploi: kix khaing: pa phyawk heue:. 15 Kieh pui khankix khaw: tix keud ka krax pa caoxrhawm:, mai: ceu pa daox pa am: pa hoik yuh Nawh ka kawn: pui khankix, mai: kieh kix yaogyaw ka Simiang Siyiex heue:. 16 Grawh grawng: nawh, Nawh Cao: raig tix tik ka siviex tawng lheung: mai: tat dud ka gawng: rhem: khankix heue:. 17 Mai: pui pa koe: rhawm: pa caox khankix, yaox tix kharhawm: kharhi:, kheu lud kix krax hu: tix, mai: yuh phimap heue:. 18 Kix ih ceu pa seeing: pa brai: ku ceu, mai: hoek dex siviex krax yum, 19 mai: kix kok yo ka Simiang Siyiex, yam yaox kix krax pa hot pa sibhawm:, Nawh Cao: taoh kix ka daux pa kharhawm: kharhi: heue:. 20 Nawh Cao: ploi: gumlox Tix, mai: kieh jhawm: saux jhawm: ngia kix moi:, mai: taoh kix lih khaing: daux pa laux pa leeing: heue:. 21 Mai: kieh pui khankix khaw: tix keud ka krax pa caoxrhawm:, mai: ceu pa daox pa am:, pa hoik yuh Nawh ka kawn: pui khankix, mai: kieh kix yaogyaw ka Simiang Siyiex heue:. 22 Kieh kix tan lu, mai: rieb tix teei ka bwanson: Nawh Cao:, mai: rhax lai gauxrhawm: gauxrhi:, mai: plak jhi: ka grawng: kaing pa hoik yuh Nawh Cao: khankix heue:. 23 Mai: can kix pa brug reu ting mai: tiang rawm: sigrit sigra: mai: pa yuh kaing ka piang rawm: khankix. 24 Kix pon tix yaox grawng: kaing pa hoik yuh Simiang Siyiex, mai: ceu pa daox pa am: pa yuh Nawh Cao:, ka daux pa raux pa mox heue:. 25 Mai: Nawh Cao: tawx kieh bhaung: ting phlu: mai: kieh pukpak rawm: haok hwan: heue:. 26 Kix haok ka piang raoma:, mai: deeh lih ka dee raux dee mox, mai: kix lauxrhawm: lauxrhi: kheu yaox krax pa khirhawm: khairhi: heue:. 27 Mai: viex kix vung viang vung vang awm: pui pa yoek ka plai:, mai: viex krax tawng kix grai: hu: heue:. 28 Mai: kix kok yo ka Simiang Siyiex yam yaox kix krax pa hot pa sibhawm:, mai: Nawh Cao: taoh kix khaing: ka daux pa kharhawm: kharhi: heue:. 29 Nawh Cao: kieh bhaung: ting grai:, mai: kieh pukpak rawm: yien: yawg tix heue:. 30 Yam an kix koe: krax gauxrhawm: gauxrhi: kheu yien: yawg hu: yuh nan: heue:. Mai: Nawh Cao: thong: kix hu: ka dee bang: reu ting dee simie kix tix hu: heue:. 31 Mai: kieh pui khankix, khaw: tix keud ka krax caoxrhawm: mai: ceu pa daox pa am: pa hoik yuh Nawh ka kawn: pui khankix, mai: kieh kix yaogyaw ka Simiang Siyiex heue:. 32 Kieh kix yaog Nawh ting, sinax dee khrawm: pui haoh pui hun:, mai: kieh kix yaogyaw ka dee khrawm: kix kuad song: nong: yu khankix heue:. 33 Mai: Nawh kieh rawm: klawng: lih mawh daux tiag daux tu, mai: dee lih rawm: keut khankix kieh kroh hu: heue:. 34 Haktiex dee mhawm: dee koe: phon: kawx, kieh ceet hu: kheu phimap pa yuh pui haktiex heue:. 35 Mai: Nawh Cao: deeh kieh rawm: naog ka daux tiag daux tu, mai: kieh rawm: keut deeh lih ka dee kroh haktiex heue:. 36 Mai: Nawh Cao: tawx ka pui pa cairhawm: cairhi: ot ka dee an, mai: kix yuh veng son dee ot kix heue:. 37 Mai: kix yuh ma: yuh kaung: mai: sum: plix siiet mai: pon plix khaox mai: plix nghox plix koi: tom: nie heue:. 38 Nawh Cao: nawb bwanson: ka kix, mai: kieh kawn: praix kix pre haoh hun:, mai: cub yung:, cub moi kix kawx, kied haoh kied hun: heue:. 39 Viang yuh nan: kawx, yam yaox kix krax pa tuktiak tukte:, mai: yaox krax laux krax som, kix lauxrhawm: lauxrhi: heue:. 40 Mai: Nawh Cao: teei krax pa kaig pa tua, tawx ka kawn: laux Simiang khankix, mai: kieh kix vuvie ka daux tiag daux tu, dee ang krax koe: heue:. 41 Nawh Cao: teei pui pa hot pa sibhawm: lih khaing: ka daux pa kharhawm: kharhi:, mai: yaog kix deuh dee lhaong: mai: kieh mawh nyiex ma: haoh hun: awm: cub yung: heue:. 42 Mai: pui pa rah pa see yaox mai: gauxrhawm: gauxrhi: heue:. Can phimap phigrham: khankix, ang lai simawd thox jheeh tix heue:. 43 Mai: pui pa koe: cuyi pingnya khankix, kieh tawng ka grawng: bwanson: krax pa caoxrhawm: Simiang Siyiex heue:.

Simin Ting 108

Lox Rawg Bwan:, Son Sang Teem:

1 Siyiex eue:, aux hoik rien rhawm: tix, mai: ju aux rhax lai yaogyaw ka Maix heue:. 2 Ting: si: mai: ting: tah eue:, siduad heue:, aux kawx siduad caocao heue:. 3 Simiang Siyiex eue:, aux tak yaogyaw Maix ka sinax pui haoh pui hun: khankix, mai: aux tak rhax lai yaogyaw Maix sinax ceu pui khankix heue:. 4 Grawh grawng: nawh, krax caoxrhawm: Maix hoik hoek tom: raoma:, mai: sijax mukheu Maix hoik hoek daux paiawm: heue:. 5 Siyiex eue:, kieh Maix nie lheu: lhaong: khaing: lhaong: raoma:, mai: kieh min: plakngai: Maix tah hu: ka piang haktiex in khawm: uik liak. 6 Mai: son sang pon can pui pa moh ka Maix, pa nyawmrhawm: nyawmrhi:, teei taix khawn: dawm: Maix taoh mai: nghiet ka lox aux liak. 7 Mawh kheu hoik krai Siyiex ka daux nyiex bwan: pa singax singeh, aux tak gauxrhawm: gauxrhi: heue:. Mai: aux tak gwieh ka veng Sekhem mai: tiag ka daux lung: Sukot heue:. 8 Meung Gilat mai: meung Manashe mawh cie aux heue:. Phan: mawh meung Epharem mawh riang rao dee deuh aux kaing: tix, mai: meung Yudax mawh pliah dee ot aux heue:. 9 Mai: meung Mawbax mawh aw: dee heem: aux, meung Edom mawh dee deuh aux kiep, meung Philitix mawh dee prie aux lox pa pex. 10 Pui mawx pa sang tawx aux ka daux veng pa ting riang, mai: pui mawx tak sang jhi: daux krax pa hu: aux ka meung Edom. 11 Siyiex eue:, Maix hoik tik vud ka ex ang mawh lie? Siyiex eue:, Maix ang hu: mai: kru naing ex lie? 12 Teem: coi ka ex son sang luan khaing: pui pa koeng ka ex khankix, grawh grawng: nawh, kawn: pui ang chix taoh tid tix heue:. 13 Mawh kheu Siyiex ex, tak koe: rhawm: pa kwa: heue:. Mai: Nawh Cao: tak dig ka pui pa koeng ka ex khankix heue:.

Simin Ting 109

Lox Ngia Pui Pa Khirhawm:

1 Siyiex pa yaogyaw aux eue:, paw glaik tix ot yien: yawg liak. 2 Mai: pui pa ang rah ang see, mai: pui pa ang kaux sijax khankix, ot tang: plak mai: ang: moing tix mai: ah lox pa pie pa lhen: ka aux heue:. 3 Mai: kix nieb ah lox pa ang khaw: mai: hoek rob tix puing: aux, ka pa ang tie koe: grawng: heue:. 4 Aux moh kix mai: rawg bwan: son kix kawx, kix tiebtie lah cha: ka aux heue:. 5 Mai: kix deeh viied tix tawx phimap pa ang mhawm: ka bwanson: pa yuh aux, mai: krax moh aux, mai: kix deeh tawx ceu pa koeng ka aux heue:. 6 Mai: teei pui pa ang rah ang see, mai: deuh ka piang pui pa yuh nan:, mai: kieh pui pa koeng ot dex plak taix khawn: dawm: nawh liak. 7 Yam hoek bawg yam prawng ca:, kieh nawh som liak. Mai: kieh lox pa rawg nawh bwan: mawh pa phit pa lud liak. 8 Kieh ju nawh dawd, mai: kieh pui tang: kaux, pon kaing pa yuh nawh liak. 9 Kieh kawn: nawh mawh kawn: doe:, mai: kieh moeng nawh mawh miexmai liak. 10 Mai: kieh kawn: nawh khankix, vuvie ku dah, kieh caung tix ih liak. Kieh kix lih khaing: dee ot tix, pa laux pa leeing: mai: caung tix ih liak. 11 Mai: kieh cao: pa ceuk pa rawm khrawt tix teei can pa koe: nawh uik, mai: kieh pui tang: praix tud rhim: tix teei ka kraung khrai: pa yuh pa pon nawh liak. 12 Paw kieh pui yuh bwanson: ka nawh, mai: paw kieh pui caoxrhawm: ka kawn: doe:, kawn: nawh tix kaux kawx liak. 13 Kieh simie ceucat nawh dud, mai: kieh ceukaux nawh grai: hu: khaix nawh heue:. 14 Mai: kieh Simiang Siyiex, doh keud ka phimap pa yuh tax du nawh, mai: paw lai ploi: phimap pa yuh miex nawh heue:. 15 Kieh phimap an sidawng sivoe ngai: Simiang Siyiex jheeng: jheeng:, mai: kieh nawh teei tix tik ka ceu pa doh keud son kix khaing: piang haktiex khawm: uik heue:. 16 Grawh grawng: nawh, nawh ang koe: krax caoxrhawm: tix teem:, mai: nawh tuktiak tukte: ka pui pa hot pa sibhawm:, mai: pui pa lauxrhawm: lauxrhi: khankix tom: sidah yum heue:. 17 Awm: moh nawh pa jhax pa lawg, pa jhax pa lawg an, deeh hoek ka piang nawh heue:. Mai: nawh ang moh ka bwanson:, mai: bwanson: an, singai khaing: nawh heue:. 18 Mai: nawh teei tix ceep pa jhax pa lawg, awm: pa ceep kraung, ceu an laig ka daux vaig nawh, awm: rawm:, mai: laig ka daux si:ang: nawh awm: bee heue:. 19 Mai: kieh nawh teei tix vhua: pa jhax pa lawg an, ka tokaux tix awm: vhua: prux, mai: nhawt ka nyoi tix, awm: maox rawd nyoi heue:. 20 pui pa koeng ka aux, pa ah lox caox pa ang mhawm: ka ju aux, pa ot tang: plak khankix, kieh kix pon krax pa kham: geu: khaing: Simiang Siyiex heue:. 21 Simiang Siyiex eue:, pau aux kheu ceukaux Maix liak. Mai: taoh aux ka daux krax caoxrhawm: Maix liak. 22 Aux hoik hot sibhawm:, mai: rhawm: aux hoik saux ka daux aux heue:. 23 Aux hoik gah hoik greed hu:, awm: kawn: peue: pa lang: heue:. Mai: viex aux haok blaong lih jee awm: sido heue:. 24 Mai: nge: ngawng aux hoik iak riang, yung ye kheu ang sawm:, mai: nex aux kawx krawx hu: heue:. 25 Mai: pui tang: kaux salao ka aux, mai: yam yaox kix ka aux, vugvied kaing: tix heue:. 26 Simiang Siyiex aux eue:, teem: coi ka aux liak. Awm: koe: krax caoxrhawm: Maix, taoh ka aux liak. 27 Kieh kix tawng grawng: siawp sibrawm taix Maix mawh Simiang Siyiex Cao: pa prawng ca: heue:. 28 Viang kix ah lox pa jhax pa lawg kawx, Maix tawx bwanson: liak. Mai: yam kaoh cung kix, kieh koe: krax pa kaig pa tua mai: kieh siliex Maix gauxrhawm: gauxrhi: heue:. 29 Pui pa koeng ka aux khankix, kieh kix ceep ka ceu pa lhat mai: pa kaig pa tua, kieh kix tawb kheem: min: plakngai: pa laux ka tokaux tix, awm: pa vhua: ka prux heue:. 30 Aux tak yaogyaw ka bwanson: Simiang Siyiex, ka jheeh tix, sigrien sigre heue:. Aux tak yaogyaw ka Nawh, sinax pui pa haoh pa hun: heue:. 31 Grawh grawng: nawh, Nawh Cao: cung dex plak taix khawn: dawm: pui pa hot pa sibhawm:, mai: taoh ju kix lih khaing: daux tawm: taix krax prawng ca: phimap heue:.

Simin Ting 110

Siyiex Mai: Simiang Pa Hoik Laug Nawh Tix Deuh

1 Simiang ah nin: ka Simiang aux, "Ngawm plak taix khawn: dawm: Aux, tom: Aux kieh pui pa koeng ka maix mawh ngot dee deuh maix caong tix heue:." 2 Simiang Siyiex tak teei pliah siawp sibrawm Nawh, ploi: lih khaing: veng Zion mai: giex kaing: ka daux sinax pui, pa koeng ka Maix khankix heue:. 3 Singaix yam jhi: Maix siawp sibrawm pui Maix khankix, ceep ka kraung pa singax singeh, mai: koe: rhawm: sibieh tix tan lu, mai: sinaw khankix hoek ka Maix awm: lih rawm: ciex ponngawb heue:. 4 Simiang Siyiex tiex tu tix ah nin:, "Maix mawh Cao: giex kaing: li leeing: ju leeing: phan:, awm: pa khaw: mai: Melakhizediek." Khaix in, ang koe: rhawm: pa tieh pa loh. 5 Siyiex pa ot plak taix khawn: dawm: Maix yam lih pa songrhawm: songrhi: Nawh, Nawh Cao: ciyang ka simiang khankix laux leeing: heue:. 6 Mai: Nawh tak prawng ca: ka pui tang: ceu tang: cat khankix heue:. Nawh kieh tokaux pui pa yum tah hu: ku dah ku dee, mai: pah kaing: kix sau: ka daux tiex pa ting pa vieh heue:. 7 Mai: Nawh Cao: nyaux rawm: pa lih ka dex krax, mai: Nawh Cao: yaog kaing: Tix heue:.

Simin Ting 111

Yaogyaw Ka Siyiex

1 Aux tak viex khawm: rhawm: khawm: rhi: tix yaogyaw ka bwanson: Simiang Siyiex, ka dee khrawm: pui pa rah pa see, mai: sinax pui pa haoh pa hun: khankix heue:. 2 Grawng: kaing ceu pa hoik yuh Simiang Siyiex, mawh pa kied ting kied lhaong:, mai: can pui pa khaw: rhawm: khankix, viex khawm: rhawm: khawm: rhi: tix, chawk cheng: tix sawg ka ceu an heue:. 3 Grawng: kaing ceu pa hoik yuh Nawh khankix mawh pa grum ka min: plakngai:, mai: been li pa rah pa see Nawh kaux cong: jheeng: jheeng: heue:. 4 Mai: Nawh Cao: kieh ceu pa daox pa am: khankix, mawh son pa tak sang doh keud doh sawn: mai: Simiang Siyiex grum koe: rhawm: pa chix yuh bwanson: mai: rhawm: pa chix caoxrhawm: heue:. 5 Nawh Cao: tawx ceu pa ih pa un:, ka pui pa lhat, pa nab yam ka Nawh heue:. Mai: doh keud ka sijax mukheu Nawh jheeng: jheeng:. 6 Mai: Nawh Cao: jhi: siawp sibrawm ka daux kaing pa yuh Nawh khankix, mai: teei sin: pui tang: ceu tang: cat khankix tawx ka kix heue:. 7 Grawng: ceu pa hoik yuh Nawh ka daux tawm: taix Tix khankix, mawh ceu pa dex pa dawd mai: sijax mukheu, mai: pa rah pa see, mai: lox tawm: been li Nawh khawm: uik mawh pa kaux pa cong: heue:. 8 Mai: sijax mukheu Nawh, mai: ceu pa rah pa see Nawh, kaux cong: jheeng: jheeng: heue:. 9 Nawh Cao: taoh tix teei ka pui Nawh khankix, mai: yuh tix deuh sijax mukheu pa kaux pa cong: jheeng: jheeng: heue:. Ceukaux Nawh mawh pa singax singeh mai: pa khaw: tix lhat graung kah heue:. 10 Mai: ceu pa lhat pa graung ka Simiang Siyiex mawh num: cuyi pingnya heue:. Pui pa hawt grawng: lawng khaix lox tawm been li khankix, mawh pui pa chix keud chix sawn: heue:. Mai: min: plakngai: nawh koe: jheeng: jheeng: heue:.

Simin Ting 112

Ceu Pa Gauxrhawm: Gauxrhi: Pui Mhawm: Tix Kaux

1 Pui pa lhat pa graung ka Simiang Siyiex, mai: pa gauxrhawm: gauxrhi: ka lox tawm: been li Nawh khankix, koe: bwanson: heue:. 2 Mai: simie ceucat kix ting riang ting rao ka piang haktiex mai: can kix pa rah pa see koe: bwanson: heue:. 3 Mai: sinngao kraung khrai: hoik naog ka daux nyiex nawh, bwanson: pa rah pa see nawh, kaux cong: jheeng: jheeng: heue:. 4 Mai: son pui pa rah pa see khankix, pa riang lih jhan: ka daux pa vhaik, pui pa yuh nan:, koe: rhawm: pa chix yuh bwanson: mai: koe: rhawm: pa chix caoxrhawm:, mai: koe: rhawm: pa rah pa see heue:. 5 Mai: pui pa koe: rhawm: pa chix caoxrhawm:, mai: chix tawx pui yaog yaing khankix, koe: bwanson: heue:. Phan: hoek bawg yam singaix prawng ca:, nawh mawh cao: pa pex heue:. 6 Mai: nawh ang hoek krax laux krax som tix bawg kawx, tak kaux cong: jheeng: jheeng:, mai: pui pa rah pa see khankix, tak mawh son sang doh keud doh sawn: jheeng: jheeng: heue:. 7 Mai: nawh ang lhat ka lox pa caox pa ang mhawm: khankix, ka daux rhawm: nawh, kaux cong: ka daux Simiang Siyiex heue:. 8 Rhawm: nawh kaux cong: mai: ang lhat ang graung, mawh kheu hoik tawng nawh daux rhawm: tix, mai: pui pa koeng ka nawh khankix tak hoek krax laux krax som heue:. 9 Nawh hoik gwieh tix tawx ka pui pa hot pa sibhawm: khankix mai: krax pa rah pa see nawh, kaux cong: jheeng: jheeng: mai: tak yaog min: plakngai: nawh ting lhaong: heue:. 10 Yam yaox pui pa ang rah ang see khankix, songrhawm: songrhi: mai: greeik rhang: tix, mai: can kix pa ang rah ang see khankix teh hu: mai: laux leeing: grai: mu: heue:.

Simin Ting 113

Yaogyaw Ka BwanSon: Siyiex

1 Yaogyaw heue:, siliex Simiang Siyiex khankix eue:, yaogyaw ka ceukaux Simiang Siyiex awawx. 2 Mai: kieh ceukaux Simiang Siyiex koe: bwanson: jah tom: yam in mai: leeing: ju leeing: phan: liak. 3 Mai: jah plak lih singaix tom: hoek plak klip singaix, mawh pa khaw: tix yaogyaw ka ceukaux Simiang Siyiex heue:. 4 Simiang Siyiex pa ting ka piang kawn: pui khawm: uik, mai: min: plakngai: Nawh koe: piang raoma: heue:. 5 Pui mawx tak awm: Simiang Siyiex ex pa ot ka dee lhaong:. 6 Taing lih tokaux tix son sang jhak ka kraung khrai: piang raoma: mai: piang haktiex khankix heue:. 7 Nawh Cao: tak yaog ka kix pui pa hot pa sibhawm: ting khaing: daux phawng: tiex, mai: yaog kix pui pa cud pa cha: khaing: daux phon:. 8 Mai: tawx dee ot dee koe: ka kix, tau mai: kawn: laux kawn: Simiang pa giex kaing: ka piang pui khankix heue:. 9 Nawh Cao: kieh bon: neh pa ang koe: kawn: ot ka daux nyiex mai: deeh kieh keh kawn: praix, mai: koe: krax gauxrhawm: gauxrhi: heue:. Haleluya!

Simin Ting 114

Lai Rhax Poi Pasakha

1 Yam lih pui Isarilax simie ceucat Yakop khaing: dee ot ceu pui pa caox khankix khaing: meung Ejiptux, 2 ceu pui Yudax mawh dee pa singax singeh, mai: ceu pui Isarilax mawh dee giex Nawh Cao: kaing: heue:. 3 Mai: rawm: sigrit sigra: yaox kawx, to: heue:. Mai: rawm: Yawdan yaox kawx, deeh vai: tix plak khaix heue:. 4 Mai: gawng ting khankix, jah loh tix awm: yung: mhaing:, mai: gawng iak khankix, jah loh tix awm: kawn: yung: heue:. 5 Mai: rawm: sigrit sigra: eue:, maix to: yuh ka mawx? Mai: rawm: Yawdan eue:, maix deeh vai: tix plak khaix yuh ka mawx? 6 Mai: gawng ting eue:, maix jah loh tix awm: yung: mhaing: yuh ka mawx? Mai: gawng iak eue:, maix jah loh tix awm: kawn: yung: yuh ka mawx? 7 Haktiex eue:, ot siyaung: sivoe ngai: Siyiex, pa mawh Siyiex Yakop heue:. 8 Nawh Cao: kieh simaox mawh rawm: nhawng:, mai: kieh rang: mawh rawm: keut heue:.

Simin Ting 115

Siyiex Koe: Tix Kaux Khaing:

1 Simiang Siyiex eue:, ex ang koe: min: plakngai:, ex ang koe: min: plakngai:, ka daux ceukaux Maix, krax caoxrhawm: mai: sijax mukheu Maix, kieh koe: min: plakngai: liak. 2 Mawh kheu pa tix pui tang: ceu tang: cat khankix ah nin:, "Siyiex kix koe: dee mawx?" 3 Siyiex ex ot ka piang meung raoma:, mai: Nawh Cao: yuh awm: pa koe: alo Nawh heue:. 4 Mai: rieng pa krub kix mawh pa yuh pui ka mau, ka khri: khankix, mai: mawh ngie pa yuh kawn: pui ka taix tix heue:. 5 Mai: rieng pa krub kix an, koe: jheeh mai: ang chix sikah, koe: ngai: mai: ang chix yaox. 6 Koe: yhaok mai: ang chix mhong:, koe: meeh mai: ang chix ngheet, 7 koe: taix mai: ang chix giex, koe: caong mai: ang chix hu:, mai: ghok kix ang chix lih lox. 8 Mai: cao: pa yuh khankix kawx, awm: an heue:. Can pui pa deuh rhawm: ka an khankix kawx, awm: an heue:. 9 Ceu pui Isarilax khankix eue:, deuh rhawm: ka Simiang Siyiex heue:. Mai: Nawh Cao: mawh Cao: pa teem: coi ka pui Isarilax mai: Cao: pa tieb tie ka pex heue:. 10 Simie ceucat Aron eue:, deuh rhawm: ka Simiang Siyiex heue:. Nawh Cao: mawh Cao: pa teem: coi ka simie ceucat Aron mai: Cao: pa tieb tie ka pex heue:. 11 Can pui pa lhat pa graung ka Simiang Siyiex khankix eue:, deuh rhawm: ka Simiang Siyiex heue:. Nawh Cao: mawh Cao: pa teem: coi mai: mawh Cao: pa tieb tie ka pex heue:. 12 Simiang Siyiex doh keud doh sawn: ka ex, mai: nawb bwanson: ka ex heue:. Mai: Nawh Cao: nawb bwanson: ka ceu pui Isarilax, mai: nawb bwanson: ka simie ceucat Aron heue:. 13 Mai: can pui pa lhat pa graung ka Simiang Siyiex khankix, Nawh Cao: nawb bwanson: ka kix, khawm: pa iak pa ting heue:. 14 Kieh Simiang Siyiex, kieh pex mai: kawn: praix pex, pre haoh hun: liak. 15 Pex mawh pui pa nawb Simiang Siyiex Cao: pa phan: pa yuh raoma: mai: haktiex bwanson: kah heue:. 16 Mai: raoma: mawh, raoma: cie Siyiex heue:. Haktiex mawh pa hoik tawx Nawh ka kawn: pui heue:. 17 Mai: pui pa hoik yum, mai: pui pa hoik lih hu: ka dee yien: dee yawg khankix, ang chix deeh yaogyaw ka Siyiex. 18 Phan: mawh ex, yaogyaw ka Simiang Siyiex, jah tom: yam in hoek tom: leeing: ju leeing: phan: heue:. Haleluya!

Simin Ting 116

Yaogyaw Ka Bwanson:

1 Aux moh ka Siyiex, mawh kheu nghiet Nawh ka ceu pa rawg pa mhaing: aux heue:. 2 Mawh kheu nghiet Nawh Cao: ka lox aux, aux tak sang yaogyaw ka Nawh, yam kawn: im: ju aux heue:. 3 Mai: maox krax yum khankix, hoik rob ka aux, mai: meung yum hoik giex ka aux, mai: aux yaox krax pa kharhawm: kharhi: heue:. 4 Yam an aux rawg bwan: ka ceukaux Simiang Siyiex mai: khyox khaw: ah nin:, "Simiang Siyiex eue:, taoh ka ju aux liak." 5 Simiang Siyiex koe: rhawm: pa chix yuh bwanson:, mai: koe: rhawm: pa rah pa see, mai: Siyiex ex koe: krax pa chix caoxrhawm: heue:. 6 Mai: Simiang Siyiex teem: coi ka pui pa daox pa aw: khankix, mai: yam ot aux ka dee tiem, Nawh Cao: taoh tix teei aux heue:. 7 Ju aux eue:, deeh ka dee ot maix mhawm: mhawm: heue:. Simiang Siyiex hoik yuh bwanson: ka maix heue:. 8 Maix hoik taoh ju aux khaing: krax yum, mai: hoik awt rawm: ngai: khaing: ngai: aux, mai: hoik taoh caong aux khaing: dee sideeing caong heue:. 9 Mawh kheu in, aux tak hu: sivoe ngai: Simiang Siyiex, ka daux dee ot pui pa im: ju khankix heue:. 10 Viang aux yaox tix kham: krax kham: krax geu: kawx, aux kawn: ah kawn: koe: krax yumrhawm: heue:. 11 Aux ang yuh satix, mai: loe: tix ah nin:, "Pui khawm: uik chix ah lox pa pie pa lhen: heue:." 12 Mai: bwanson: pa hoik yuh Simiang Siyiex ka aux ku ceu khawm: uik, aux tak sang deeh pon viied yuh ka mawx? 13 Mai: aux tak giex ka kawk krax taoh, mai: rawg bwan: ka daux ceukaux Simiang Siyiex heue:. 14 Mai: aux tak tan lu ka plak sivoe ngai: pui Siyiex khawm: uik, awm: pa hoik yuh aux sijax mukheu ka Simiang Siyiex heue:. 15 Mai: krax yum can pui pa singax singeh pa moh Nawh Cao:, mawh pa kied ngawh, sivoe ngai: Simiang Siyiex heue:. 16 Simiang Siyiex eue:, aux mawh siliex Maix tete heue:, aux mawh siliex Maix mai: aux mawh kawn: simex bon: siliex Maix heue:. Maix hoik yah aux lih khaing: pa phyawk tix heue:. 17 Aux tak tan lu mai: yaogyaw ka bwanson: Maix, mai: rawg mhaing: ka daux ceukaux Simiang Siyiex heue:. 18 Aux tak tan lu ka plak sivoe ngai: pui Siyiex khawm: uik, awm: pa hoik yuh aux sijax mukheu ka Simiang Siyiex heue:. 19 Veng Yerusaliem eue:, nyiex dee ot Simiang Siyiex, koe: ka sigreung maix heue:. Haleluya!

Simin Ting 117

Yaogyaw Ka Siyiex

1 Ceu pui ku ceu khawm: uik eue:, yaogyaw ka Simiang Siyiex heue:. Mai: simie ceucat pui khawm: uik eue:, yaogyaw ka Nawh Cao: heue:. 2 Grawh grawng: nawh, krax caoxrhawm: Nawh kied ting kied lhaong:, mai: sijax mukheu Simiang Siyiex mawh pa kaux pa cong: leeing: ju leeing: phan: heue:. Haleluya! 118

Rawg Bwan:, Son Sang Pex

1 yaogyaw ka bwanson: Simiang Siyiex, mawh kheu Nawh Cao: mawh pa jiet mhawm:, mai: krax caoxrhawm: Nawh koe: jheeng: jheeng: heue:. 2 Kieh ceu pui Isarilax rieb tix teei mai: ah nin:, "Kieh krax caoxrhawm: Nawh Cao: koe: jheeng: jheeng: liak." 3 Kieh simie ceucat Aron rieb tix teei mai: ah nin:, "Kieh krax caoxrhawm Nawh Cao: koe: jheeng: jheeng: liak." 4 Kieh can pui pa lhat pa graung ka Simiang Siyiex, rieb tix teei mai: ah nin:, "Kieh krax caoxrhawm Nawh Cao: koe: jheeng: jheeng: liak." 5 Yam ot aux ka daux dee sikhawp sikhiep, aux kok yo ka Simiang Siyiex, mai: Nawh pawk lox aux, mai: kieh aux ot ka dee vieh dee va: heue:. 6 Simiang Siyiex ot plak aux, mai: aux tak ang lhat ang graung, kawn: pui tak chix yuh ka mawx ka aux? 7 Simiang Siyiex ot ka plak aux, mai: mawh Cao: pa teem: coi aux, mai: aux tak yaox ka hoek krax pa laux pa leeing:ka pui pa koeng ka aux heue:. 8 Pa deuh rhawm: ka Simiang Siyiex, nie lheu: mhawm: khaing: pa deuh rhawm: ka paox kawn: pui heue:. 9 Pa deuh rhawm: ka Simeiang Siyiex nie lheu: mhawm: khaing: pa deuh rhawm: ka laux Simiang heue:. 10 Viang pui khawm: uik rob vung viang aux kawx, aux tak deuh rhawm: ka ceukaux Simiang Siyiex, mai: yuh kix laux leeing: heue:. 11 Kix hoik rob vung viang aux, viang kix rob vung viang aux kawx, aux tak deuh rhawm: ka ceukaux Simiang Siyiex, mai: yuh kix laux leeing: heue:. 12 Viang kix rob vung viang aux, awm: phong: hia: kawx, tak yeet hu: awm: pang: kat pa gleeing ka ngu heue:. Aux tak deuh rhawm: ka ceukaux Simiang Siyiex mai: yuh kix laux leeing: heue:. 13 Viang maix yuh lung mai: nyhot aux goh kawx, Simiang Siyiex mawh Cao: teem: aux heue:. 14 Simiang Siyiex mawh riang rao aux, mai: aux tak rhax lai grawng: pa taoh Nawh aux heue:. 15 Lox pa gauxrhawm: gauxrhi: mai: lox grawng: krax taoh koe: ka dee ot pui pa rah pa see heue:. Mai: taix khawn: dawm: Simiang Siyiex mawh pa ting riang ting rao heue:. 16 Simiang Siyiex yaog taix khawn: dawm: Tix, mai: taix khawn: dawm: Simiang Siyiex mawh pa ting riang ting rao heue:. 17 Aux tak ang yum, mai: yam kawn: im: ju aux, aux tak baox krai grawng: ceu pa hoik yuh Simiang Siyiex heue:. 18 Viang Simiang Siyiex hoik sivied tix gau aux tom: yaox jhawm kawx, Nawh ang nyang tawx aux yum. 19 Paoh siviex pa rah pa see ka son aux, mai: aux tak sang laig tix yaogyaw bwanson: Simiang Siyiex heue:. 20 Mai: in mawh siviex Simiang Siyiex, can pui pa rah pa see khaing:, pa pon tix laig heue:. 21 Aux tak yaogyaw ka Maix, grawh grawng: nawh, Maix hoik nghiet ka lox aux, mai: hoik taoh ka aux heue:. 22 Simaox pa hoik tik pui pa yuh nyiex, sidah khaix pon tix mawh kaing: ka daog heue:. 23 Grawng: in mawh ceu pa hoik yuh Simiang Siyiex heue:. Mai: mawh ceu pa daox pa am: ka ngai: ex heue:. 24 Singaix in mawh singaix pa hoik kieh Simiang Siyiex ex gauxrhawm: gauxrhi: ka daux Nawh Cao: heue: awawx. 25 Simiang Siyiex eue:, taoh ka ex liak, ex khyox khaw: ka Maix, Simiang Siyiex eue:, tawx bwanson: liak, ex khyox khaw: ka Maix heue:. 26 Kieh kaw pa hoek ka daux ceukaux Simiang koe: bwanson: liak. Mai: ex ot ka daux nyiex Simiang Siyiex mai: yaogyaw ka Maix heue:. 27 Simiang Siyiex mawh Siyiex Cao: pa ploi: pa riang hoek ka ex heue:. Mai: teei maox phyawk ka to: ceu pa tan pa lu mai: sigang: ka rung: khu: dee tan. 28 Maix mawh Simiang Siyiex ex, mai: ex tak yaogyaw ka Maix heue:. Maix mawh Siyiex ex, mai: ex tak yaogyaw Maix ting heue:. 29 Yaogyaw ka bwanson: Simiang Siyiex, mawh kheu Nawh mawh pa jiet mhawm:, mai: krax caoxrhawm: Nawh koe: jheeng: jheeng: leeing: ju heue:.

Simin Ting 119

Gumlox Tawm: Been Li Siyiex

1 Mai: can pui pa grum hawt ka been li Simiang Siyiex khankix, koe: bwan: heue:. 2 Mai: can pui pa priex ka sakse: pa kham: Nawh khankix, mai: pui pa viex khawm: rhawm: khawm: rhi: tix, mai: sawg ka Nawh khankix, koe: bwanson: heue:. 3 Mai: kix ang chix yuh phimap, kix hu: hoek ka daux krax Nawh heue:. 4 Nawh Cao: hoik tawx hoik gau lox tawm: been li son sang cuca: ex tix hawt twah klaung: heue:. 5 Kieh daux krax pa hu: aux kaux cong:, mai: son sang pon tix hawt lox tawm: been li Maix khankix liak. 6 Yam hawt aux tix yuh ka lox tawm: been li Maix khawm: uik, kieh aux luan khaing: krax pa kaig pa tua liak. 7 Aux viex rhawm: pa rah pa see mai: yaogyaw ka bwanson: Maix, yam gau aux krax prawng ca: Maix khankix rah see heue:. 8 Aux tak hawt tix yuh ka lox tawm: been li Maix khankix heue:. Paw lai tik vud aux liak.

Nghiet ka lox tawm: been li Siyiex

9 Pui pa awn: ju khankix, daux krax pa hu: nawh chix singax yuh ka mawx? Mawh nin: heue:, yuh satix mai: hawt ka gumlox Nawh Cao: heue:. 10 Mai: aux viex khawm: rhawm: khawm: rhi: tix, sawg ka Maix heue:. Mai: paw kieh aux lud hu: khaing: lox tawm: been li Maix liak. 11 Aux hoik priex gumlox Maix ka daux rhawm: tix, son ang sang phit lud ka Maix heue:. 12 Simiang Siyiex eue:, Maix koe: bwanson: heue:. Gau aux ka lox tawm: been li Maix liak. 13 Mai: aux teei jheeh tix sidiex ka grawng: pa kaoh khaing: daux jheeh Maix khawm: uik heue:. 14 Aux gauxrhawm: gauxrhi:, ka daux krax pa kham: mhai: sakse: khankix, awm: pa pon aux kraung khrai: ku ceu khawm: uik heue:. 15 Aux tak keud ka grawng: pa hoik sidiex gau Maix khankix, mai: jhak ka daux krax pa hu: Maix khankix heue:. 16 Aux tak gauxrhawm: gauxrhi: ka daux lox tawm: been li Maix khankix, mai: ang doh piawm: ka gumlox Maix heue:.

Gauxrhawm: gauxrhi: ka lox tawm: been li Siyiex

17 Yuh bwanson: ka aux, yam kawn: im: ju aux, mai: son sang pon hawt aux gumlox Maix heue:. 18 Mai: paoh ngai: aux, son sang chix yaox aux ka ceu pa daox pa am:, ka daux been li Maix heue:. 19 Aux mawh nyo sinie ka piang haktiex in, paw lai mox lox tawm: been li Maix khaing: aux liak. 20 Mai: rhawm: aux bih hu:, kheu simie tix yaox ka krax prawng ca: Maix ku jheeng: jheeng: heue:. 21 Nawh Cao: sivied tix gau ka pui pa ting rhawm: ting rhi:, mai: pa yaox tix kham: geu: ka lox pa jhax pa lawg kheu chanie luan yuh ka lox tawm: been li Maix khankix heue:. 22 Mai: kieh aux luan khaing: pui pa sa pa lao mai: pa ah lox pa ang cee ang cak, kheu hawt aux ka sakse: pa kham: Maix heue:. 23 Simiang khankix, ot tang: plak tix briex kum: grawng: aux, viang mawh kawx nan:, aux mawh siliex Maix keud sawn: grawng: lox tawm: been li Maix khankix heue:. 24 Grawng: pa kham: Maix tix deuh sakse: khankix, mawh dee gauxrhawm: gauxrhi: mai: pa tawx krax keud krax sawn: ka aux heue:.

Keud dud son sang nghiet ka lox tawm: been li

25 Ju aux ot ka daux phawng: tiex, mai: kieh aux im: ju awm: pa koe: gumlox Maix liak. 26 Aux tak krai jhawm: ceu pa hoik yuh aux khankix, Maix hoik nghiet ka lox aux, mai: Maix gau aux ka lox tawm: been li Maix liak. 27 kieh aux tawng daux krax pa sidiex gau Maix liak, phan: yuh nan:, aux doh keud ka ceu pa daox pa am: pa hoik yuh Maix khankix heue:. 28 Rhawm: aux sijieh mai: teh hu: kheu krax pa lauxrhawm: lauxrhi: heue:. Mai: kieh aux kaux cong: awm: pa koe: gumlox Maix liak. 29 kieh aux kwieh hu: khaing: krax pa pie pa lhen: mai: caox rhawm: tawx lox tawm: been li Maix ka aux liak. 30 Aux hoik laug tix teei ka krax sijax mukheu Maix, mai: aux hoik priex ka krax pa prawng ca: Maix ka sivoe ngai: aux heue:. 31 Aux hoik priex tix hawt ka grawng: ceu pa hoik kham: mhai: sakse: khankix, Simiang Siyiex eue:, paw kieh aux hoek krax pa kaig pa tua liak. 32 Aux tak leue tix hawt ka daux krax lox tawm: been li Maix, yam kieh Maix aux koe: cuyi pingnya heue:.

Lox rawg bwan:, son sang mawh pui pa tawng

33 Simiang Siyiex eue:, gau aux ka daux krax lox tawm: been li Maix liak, aux tak hawt tom: sidah heue:. 34 Mai: kieh aux tawng cuyi pingnya Maix liak. Aux tak hawt ka lox tawm: been li Maix, mai: viex khawm: rhawm: khawm: rhi: tix mai: hawt yuh heue:. 35 Mai: thong: aux hu: ka daux krax lox tawm: been li Maix, aux moh ka daux krax an heue:. 36 Mai: kieh aux koe: rhawm: koe: rhi:, ka grawng: ceu pa kham: mhai: sakse:, lheu: khaing: pa koe: rhawm: pa mi pa koe: liak. 37 Mai: kieh ngai: aux via khaing: pa ang koe: bwanson: tidtix, mai: kieh aux im: ju ka daux krax Maix liak. 38 Kieh gumlox Maix kaux cong: ka siliex pa lhat pa graung ka Maix khankix liak. 39 Kieh ceu pa sa pa lao mai: pa lhat pa graung aux grai: hu: liak. Mai: krax pa prawng ca: Maix mawh pa mhawm: heue:. 40 Aux krox tix nghiet ka lox pa sidiex gau Maix khankix heue:. Mai: kieh aux im: ju ka been li pa rah pa see Maix liak.

Pa deuh rhawm: ka lox tawm: been li Siyiex

41 Simiang Siyiex eue:, kieh krax caox rhawm: Maix mai: bwanson: krax taoh Maix hoek ka piang aux, awm: pa koe: gumlox Maix liak. 42 Mawh kheu nan:, son sang pon aux tix pawk lox pa sa pa lao pui khankix, kheu deuh aux rhawm: ka gumlox Maix heue:. 43 Paw lai teei lox sijax mukheu lih khaing: daux jheeh aux, mawh kheu krox jun pot aux ka krax prawng ca: Maix heue:. 44 Aux ang lai laux lee: mai: hawt tix yuh lox tawm: been li Maix jheeng: jheeng: heue:. 45 Aux chawk cheng: tix sawg ka lox pa sidiex gau Maix khankix, mai: aux tak yaox tix hu: ka daux pa vieh pa ang koe: pa tieb tie heue:. 46 Aux tak krai grawng: ceu pa hoik kham: mhai: sakse: khankix, ka simiang khankix, mai: ang koe: krax pa kaig pa tua. 47 Mai: aux tak gauxrhawm: gauxrhi: ka daux lox tawm: been li Maix ka pa moh aux khankix heue:. 48 Aux tak yaog ka taix tix, hu: ka lox tawm: been li Maix pa moh aux mai: pa doh keud aux ka lox tawm: been li Maix khankix heue:.

Pa vhahrhawm: ka lox tawm: been li Siyiex

49 Doh keud doh sawn: ka gumlox pa hoik deuh Maix ka aux, grawng: pa kieh Maix aux krox jun pot liak. 50 Mawh kheu gumlox Maix aux yaox tix im: ju, kheu gumlox an, aux koe: krax nyawmrhawm: nyawmrhi: yam yaox aux krax pa kharhawm: kharhi: heue:. 51 Viang pui pa ting rhawm: ting rhi: khankix sa lao ka aux kawx, aux ang doh tikvud lox tawm: been li Maix. 52 Simiang Siyiexeue:, aux doh keud doh sawn: ka krax prawng ca: Maix tom: dix, mai: kieh tokaux aux nyawmrhawm: nyawmrhi: tiru heue:. 53 Aux kied songrhawm: songrhi: ka pui pa nieb yuh khankix, mawh kheu tik kix ka lox tawm: been li Maix khankix heue:. 54 Mai: lox tawm: been li Maix khankix, mawh grawng: lox rhax ka daux nyiex yam mawh aux nyo heue:. 55 Simiang Siyiex eue:, aux doh keud doh sawn: ka ceukaux Maix bawg yam ponsawm: mai: hawt ka lox tawm: been li Maix heue:. 56 Mawh kheu nghiet aux ka lox pa sidiex gau Maix khankix, aux tom: koe: riang heue:.

Nghiet lox tawm: been li Siyiex

57 Simiang Siyiex eue:, Maix mawh son aux, aux hoik krai tix deuh, aux tak sang nghiet gumlox Maix khankix heue:. 58 Aux khyox khaw: ka Maix, khawm: rhawm: khawm: rhi: tix mai: kieh aux pon bwanson: Maix mai: krax caoxrhawm: Maix, awm: pa koe: gumlox Maix liak. 59 Yam keud aux grawng: krax pa hu: aux khankix, caong aux deeh tieh tix hu: ka grawng: pa hoik kham: mhai: sakse: heue:. 60 Aux ang lai koi, nied tix hawt yuh ka lox tawm: been li Maix heue:. 61 Viang pui pa ang rah ang see rob vung viang aux kawx, aux ang doh piawm: ka lox tawm: been li Maix heue:. 62 Yam jhak aux ka krax prawng ca: Maix hawt been li khankix, aux kaoh yam greung sawm: mai: yaogyaw ka bwanson: Maix heue:. 63 Mai: aux yuh paox pie ka pui pa lhat pa graung ka Maix, mai: pui pa nghiet ka lox pa sidiex gau Maix khankix heue:. 64 Simiang Siyiex eue:, krax caoxrhawm: Maix hoik naog ka piang haktiex, mai: gau aux ka lox tawm: been li Maix liak.

Lox tawm: been li Siyiex khankix kied ngawh

65 Simiang Siyiex eue:, Maix yuh bwanson: ka siliex Maix awm: pa koe: gumlox Maix heue:. 66 Mai: tawx pa tawng pa yung cuyi pingnya pa mhawm: ka aux, kheu aux yumrhawm: Ka lox tawm: been li Maix heue:. 67 Ka: sivoe ang aux nyang yaox tix kham: geu: krax kharhawm: kharhi:, aux hoik lud krax hu: tix heue:. Viang mawh kawx nan: yam in, aux hoik deeh hawt ka gumlox Maix heue:. 68 Maix koe: rhawm: pa mhawm: pa mhiem: mai: rhawm: pa chix yuh bwanson: heue:. Mai: gau aux ka lox tawm: been li Maix liak. 69 Viang pui ting rhawm: ting rhi: khankix ot tang: plak mai: keud lox pa pie pa lhen: kawx, aux tak viex khawm: rhawm: khawm: rhi: mai: priex tix hawt gumlox pa sidiex gau Maix heue:. 70 Mai: rhawm: kix hoik awm: lon: bee, phan: mawh aux, gauxrhawm: gauxrhi: ka lox tawm: been li Maix heue:. 71 Mai: kra: pa kharhawm: kharhi: aux, mawh pa ting bwanson:, son aux, grawh grawng: nawh, son sang gau aux ka lox tawm: been li Maix heue:. 72 Mai: lox tawm: been li pa kaoh khaing: jheeh Maix nie lheu: mhawm: khaing: mau, khri:, kaing: rheng, kaing: mheen: ka son aux heue:.

Lox tawm: been li Siyiex mawh pa rah pa see heue:

73 Taix Maix hoik yuh aux, mai: kieh aux mawh pakpeung: tix, mai: kieh aux tawng krax tawng krax yung son sang chix gau aux lox tawm: been li Maix liak. 74 Pui pa lhat pa graung ka Maix khankix, yam yaox kix ka aux gauxrhawm: gauxrhi: mawh kheu krox jun pot aux ka gumlox Maix heue:. 75 Simiang Siyiex eue:, aux tawng grawng: krax prawng ca: Maix mawh pa mawh pa meh, mai: pa kieh Maix aux yaox krax kharhawm: kharhi: khaw: mai: sijax mukheu Maix heue:. 76 Aux rawg mhaing: ka Maix, awm: koe: lox mukheu Maix, tawx krax caoxrhawm: Maix kieh aux nyawmrhawm: nyawmrhi: liak. 77 Mai: kieh krax caoxrhawm: Maix hoek ka piang aux, mai: kieh aux im: ju liak. Grawh grawng: nawh, aux gauxrhawm: gauxrhi: ka lox tawm: been li Maix heue:. 78 Kieh pui pa ting rhawm: ting rhi: khankix kaig tua liak. Mawh kheu kix nieb yuh pa ang rah ang see ka aux, phan: mawh aux, doh keud doh sawn: ka lox pa sidiex gau Maix heue:. 79 Mai: pui pa lhat pa graung ka Maix, mai: pui pa tawng ka Maix, mhai: sakse: pa kham: Maix tix deuh khankix tak deeh hoek ka aux heue:. 80 Mai: kieh rhawm: aux grum naog ka lox tawm: been li Maix, kieh aux luan khaing: krax pa kaig pa tua liak.

Lox rawg bwan:, son sang taoh

81 Ju aux krox ju pot ka bwanson: krax taoh Maix, mai: aux iak riang hu: heue:. Viang mawh kawx nan:, aux krox jun pot ka gumlox Maix heue:. 82 Mai: ngai: aux krox jun pot ka gumlox Maix, mai: iak riang hu:, mai: Maix tak tawx krax nyawmrhawm: nyawmrhi: ka aux bawg yam lai mawx? 83 Mai: aux hoik awm: singien rawm: pa krat singao, viang mawh kawx nan, aux ang doh piawm: ka lox tawm: been li Maix heue:. 84 Aux kawn: sang yaox tix ot bawg yam miex grheung:? Maix tak prawng ca: ka pui pa tuktiak tukte: ka aux lai mawx? 85 Mai: pui pa ting rhawm: ting rhi: mai: pa lheu: ka lox tawm: been li Maix khankix, hoik kaong: daux ka son aux heue:. 86 Lox tawm: been li Maix khawm: uik mawh pa grum mai: sijax mukheu heue:. Kix nieb tuktiak tukte: ka aux, teem: coi ka aux liak. 87 Kix dex teei tix tik aux khaing: piang haktiex, viang mawh kawx nan:, aux ang tik ka lox pa sidiex gau Maix heue:. 88 kieh aux im: ju awm: krax caoxrhawm: Maix liak. Mai: aux tak priex tix hawt ka gumlox pa kham: Maix ka jheeh Tix heue:.

Pa yumrhawm: ka lox tawm: been li Siyiex

89 Simiang Siyiex eue:, gumlox Maix kaux cong: ka piang raoma: jheeng: jheeng: heue:. 90 Mai: sijax mukheu Maix kaux cong: piang ceu pui leeing: ju leeing: phan: heue:. Maix hoik phan: haktiex mai: kieh nawh kaux cong: jheeng: jheeng: heue:. 91 Mai: can pa koe: khawm: uik mawh siliex Maix, mai: krax prawng ca: Maix kaux cong: tom: hoek singaix heue:. 92 Phan: aux ang gauxrhawm: gauxrhi: ka been li Maix nieh, aux hoik dawg laux leeing: yam yaox aux krax kharhawm: kharhi: heue:. 93 Mai: aux ang piawm: ka ceu pa sidiex gau Maix tix bawg kawx, grawh grawng nawh, Maix kieh aux im: ka lox been li Maix heue:. 94 Aux mawh cie Maix heue:. Mai: taoh ka aux, mawh kheu sawg aux ka lox pa sidiex gau Maix heue:. 95 Pui pa ang rah ang see khankix, kix pau tix sang yuh aux laux leeing: heue:. Viang mawh kawx nan:, aux tak doh keud doh sawn: ka grawng: pa kham: mhai: sakse: heue:. 96 Mai: aux hoik grum yaox dee sidah kuceu khwm: uik, mai: gumlox been li Maix mawh pa kied ting kied vieh heue:.

Pa moh ka lox tawm: been li Siyiex

97 Aux kied moh ka lox tawm: been li Maix sigrien sigre, mai: aux doh keud doh sawn: mai: lih rhawm: kah leeing: lang: singaix heue:. 98 Mai: lox tawm: been li Maix khankix, kieh aux nie lheu koe: cuyi pingnya khaing: pui pa koeng ka aux khankix, mai: been li an, kaux cong: mai: aux jheeng: jheeng: heue:. 99 Mawh kheu doh keud doh sawn: aux ka pa kham: mhai: sakse:, aux nie lheu tawng khaing: sara cao: gau tix heue:. 100 Mawh kheu priex aux tix hawt ka lox pa sidiex gau Maix, mai: nie lheu: koe: krax tawng krax yung khaing: pui pa riex ju khankix heue:. 101 Mai: aux tik ka ceu pa ang mhawm: mai: priex tix hawt ka gumlox Maix heue:. 102 Aux ang tang: hu: khaing: krax prawng ca: Maix, mawh kheu hoik gau Maix ka aux heue:. 103 Mai: gumlox Maix sidaing: tie: ka daux ghok aux, mai: nie lheu: tie: khaing: rawm: hia: ka daux jheeh aux heue:. 104 Krax tawng krax yung aux, haok hwan:, mawh kheu lox pa sidiex gau Maix mai: aux koeng ka daux krax pa ang mawh ang meh khankix heue:.

Pa riang lox tawm: been li Siyiex

105 Gumlox Maix mawh kawk ngu son caong aux, mai: mawh pa jhan: riang ka daux krax aux heue:. 106 Mai: aux hoik tiex tu ah nin:, "aux tak priex tix hawt krax prawng ca: Maix rah rah see see heue:." 107 Simiang Siyiex eue:, aux kied kharhawm: kharhi: tix, kieh aux im: ju awm: pa koe: gumlox Maix heue:. 108 Simiang Siyiex eue:, aux khyox khaw: ka Maix rieb tix teei ka krax pa tan pa lu aux khawm: rhawm: khawm: rhi: mai: tokaux jheeh jhai: tix liak. Mai: gau aux ka krax prawng ca: Maix liak. 109 Mai: ju aux koe: ka daux taix aux jheeng: jheeng: heue:. Viang mawh kawx nan:, aux ang piawm: ka been li Maix heue:. 110 Pui pa ang rah ang see khankix, hoik taong: tix deuh kie ka son aux heue:. Viang mawh kawx nan:, aux ang lud hu: ka daux krax lox pa sidiex gau Maix heue:. 111 Aux rieb tix teei ka pa kham: Maix tix deuh sakse: khankix, mawh son sin: tokaux aux jheeng: jheeng:, mai: ceu ankix kieh rhawm: aux gauxrhawm: gauxrhi: heue:. 112 Mai: aux viex rhawm: tix hawt ka lox tawm: been li Maix tom: sidah jheeng: jheeng: heue:.

Koe: krax taoh ka lox tawm: been li Siyiex

113 Aux koeng ka pui pa koe: rhawm: ra: mu: pa nieb yuh khankix, mai: aux moh ka been li Maix heue:. 114 Maix mawh dee mox aux, mai: kraung naing pa tieb tie aux, mai: krox jun pot ka gumlox Maix heue:. 115 Pui pa yuh phimap khankix eue:, lih hu: khaing: aux heue:. Mai: tak priex tix hawt ka lox tawm: been li Siyiex heue:. 116 Mai: joh jhan: aux awm: koe: gumlox Maix, mai: kieh aux im: ju liak. Mai: paw kieh aux hoek krax pa kaig pa tua ka pa krox jun pot aux Maix liak. 117 Mai: teem: coi ka aux son sang pon krax pa nyawmrhawm: nyawmrhi:, mai: tak hawt ka lox tawm: been li Maix jheeng: jheeng: heue:. 118 Maix tik vud ka pui pa lud krax ka lox tawm: been li Maix khankix heue:. Pa keud kix mawh pa pie pa lhen: heue:. 119 Maix deuh pui haktiex pa ang rah ang see khankix khawm: uik mawh kraung pa dah jum heue:. Mawh kheu in, aux tom: moh ka pa kham: mhai: sakse: heue:. 120 Hauk haw: aux pruh kheu kied lhat kied graung ka Maix, kheu krax prawng ca: Maix heue:.

Pa priex tix hawt ka lox tawm: been li Siyiex

121 Aux yuh awm: krax prawng ca: mai: prawng ca: rah see heue:. Mai: paw lai tik vud aux ka daux tawm: taix pui pa tuktiek tukte: ka aux liak. 122 Maix rieb tix teei ka siliex Maix ka daux pa mhawm: liak. Paw kieh pui pa ting rhawm: ting rhi: khankix, tuktiak tukte: ka siliex Maix liak. 123 Mai: ngai: aux hoik iak riang ka pau tix bwanson: krax taoh Maix, mai: gumlox pa rah pa see Maix heue:. 124 Yuh ka aux awm: koe: Maix krax caoxrhawm:, mai: gau aux ka lox tawm: been li Maix liak. 125 Aux mawh siliex Maix heue:. Caoxrhawm: tawx krax tawng krax yung ka aux, mai: kieh aux tawng pa kham: mhai: sakse: khankix liak. 126 Bawg yam sang prawng ca: Simiang Siyiex hoik hoek, grawh grawng: nawh, kix hoik tik ka been li Maix heue:. 127 Phan: mawh aux, moh ka lox tawm: been li Maix, nie lheu: khaing: khri: pa hoik thi: heue:. 128 Mawh kheu in, aux priex ka lox pa sidiex gau Maix khawm: uik, mawh pa rah pa see, mai: koeng ka krax pa ang mawh ang meh heue:.

Rhawm: pa simie tix priex hawt lox tawm: been li

129 Grawng: pa kham: mhai: sakse: khankix mawh ceu pa daox pa am:, mai: ju aux priex tix hawt heue:. 130 Gumlox Maix mawh pa plak jhi: pa riang ka pui pa ang tawng tidtix khankix, kieh deeh tawng heue:. 131 Aux ang: jheeh tix mai: taug mao ka simie tix pon ka lox tawm: been li Maix heue:. 132 Yuh bwanson: jhak ka aux, awm: pa sax yuh Maix ka kix pui pa moh ka ceukaux Maix liak. 133 Awm: koe: gumlox Maix, kieh diang caong aux kaux cong: liak. Mai: paw kieh phimap ting ka piang aux liak. 134 Taoh aux lih khaing: daux pui pa tuktiak tukte: ka aux liak. Mai: aux tak priex tix hawt ka lox sidiex gau Maix heue:. 135 Kieh pakngai: Maix jhan: riang ka piang aux, mai: gau aux ka lox tawm: been li Maix khankix liak. 136 Mawh kheu ang kix priex tix hawt ka been li Maix, rawm: ngai: aux lih awm: rawm: klawng: heue:.

Lox tawm: been li Siyiex mawh pa rah pa see

137 Simiang Siyiex eue:, Maix mawh pa rah pa see heue:. Grawng: krax prawng ca: Maix khankix kawx, mawh pa rah pa see heue:. 138 Mhai: sakse: pa kham: Maix tix deuh khankix, mawh pa khaw: mai: been li pa rah pa see mai: pa kaux sijax tom: nie heue:. 139 Mai: aux sungsang laux rhawm: tix, kheu pui pa koeng ka aux khankix, piawm: ka lox been li Maix heue:. 140 Mawh kheu gumlox Maix mawh pa kied singax singeh, mai: mawh pa khaw: rhawm: siliex Maix khankix kah heue:. 141 Aux mawh pui pa iak, pa yaox tix kham: geu: ka pa nieb yuh pui pa ang cee ang cak kah heue:. Viang mawh kawx nan:, aux ang piawm: ka gumlox pa sidiex gau Maix khankix heue:. 142 Pa rah pa see Maix mawh pa rah pa see leeing: ju leeing: phan: heue:. Mai: been li Maix mawh been li pa kaux sijax heue:. 143 Viang pa nu pa khawm:, mai: pa kharhawm: kharhi: hoek ka piang aux kawx, lox tawm: been li Maix khankix, kieh aux gauxrhawm: gauxrhi: heue:. 144 Grawng: pa kham: mhai: sakse: khankix mawh pa rah pa see jheeng: jheeng: heue:. Tawx krax tawng krax yung mai: kieh aux im: ju liak.

Lox rawg bwan:, son sang taoh

145 Simiang Siyiex eue:, aux viex khawm: rhawm: khawm: rhi: tix kok yo, nghiet ka lox aux liak. Aux tak priex tix hawt ka lox tawm: been li Maix heue:. 146 Aux kok yo ka Maix, taoh aux liak, mai: aux tak priex tix hawt mhai: sakse: pa kham: Maix khankix heue:. 147 Aux kok yo ka Maix, ka: ang praix nyang riang, aux krox jun pot ka gumlox Maix heue:. 148 Ka: sivoe ang ponsawm: nyang bax luan, aux siduad mai: doh keud doh sawn: ka gumlox Maix heue:. 149 Simiang Siyiex eue:, awm: koe: krax caoxrhawm: Maix nghiet ka lox aux liak. Mai: kieh aux im: ju ka krax prawng ca: Maix liak. 150 Pui pa ang mhawm:, pa keud tix yuh pa ang mhawm: khankix hoik hoek dex aux, kix mawh pa singai khaing: been li Maix heue:. 151 Simiang Siyiex eue:, Maix ot dex aux, mai: lox tawm: been li Maix khawm: uik mawh pa kaux sijax heue:. 152 Aux hoik tawng pa kham: mhai: sakse: khankix, mawh pa kaux pa cong: jheeng: jheeng: tom: didix heue:.

Rawg mhaing: son sang taoh

153 Jhak ka pa kharhawm: kharhi: mai: taoh aux liak, aux ang piawm: been li Maix heue:. 154 Priex aux mai: taoh aux liak, kieh aux im: ju awm: pa koe: gumlox Maix liak. 155 Krax taoh Maix singai khaing: pui pa ang rah ang see khankix, mawh kheu ang kix sawg ka lox tawm: been li Maix khankix heue:. 156 Simiang Siyiex eue:, rhawm: pa caoxrhawm: Maix, koe: tom: nie heue:. Kieh aux im: ju awm: pa khaw: mai: krax prawng ca: Maix liak. 157 Pui pa tuktiak tukte: ka aux, mai: pui pa lah pa cha: ka aux kied nie heue:. Viang mawh kawx nan:, aux ang via hu: khaing: grawng: pa kham: mhai: sakse: khankix heue:. 158 Yam yaox aux ka pui pa ang kaux sijax khankix, aux songrhawm: songrhi: heue:. Grawh grawng: nawh, kix ang nghiet ka gumlox Maix heue:. 159 Jhak mai: keud grawng: pa moh aux, ka lox pa sidiex gau Maix khankix liak. Simiang Siyiex eue:, kieh aux im: ju awm: pa koe: Maix pa caoxrhawm: liak. 160 Gumlox Maix khawm: uik mawh pa mawh pa meh heue:. Mai: pa prawng ca: Maix tix deuh khawm: uik mawh pa kaux cong: jheeng: jheeng: heue:.

Deuh lox tawm: been li Siyiex mawh pa ting

161 Viang simiang khankix tuktiak tukte: aux ka pa ang tie koe: grawng: kawx, rhawm: aux lhat graung ka gumlox Maix heue:. 162 Aux gauxrhawm: ka gumlox Maix, awm: pui pa yaox ka kraung khrai: pa ngawh heue:. 163 Aux seeing: brai: mai: nieh mhong: ka lox pa pie pa lhen: heue:. Viang mawh kawx nan:, aux moh ka lox been li Maix heue:. 164 Aux yaogyaw ka Maix, tix singaix aliah bawg, kheu krax prawng ca: Maix mawh pa rah pa see heue:. 165 Pui pa moh ka gumlox been li Maix khankix, ang koe: krax lauxrhawm: lauxrhi: mai: pon pa nhim: tom: nie heue:. 166 Simiang Siyiex eue:, aux krox jun pot ka bwanson: krax taoh Maix, mai: priex tix hawt lox tawm: been li Maix heue:. 167 Ju aux priex tix hawt ka pa hoik kham: Maix tix deuh sakse: khankix, mai: aux kied moh sigrien sigre heue:. 168 Aux priex tix hawt ka lox pa sidiex gau Maix, mai: pa kham: Maix tix deuh sakse: khankix heue:. Mai: daux krax aux khawm: uik koe: sivoe Maix heue:.

Lox rawg bwan:, son sang teem:

169 Simiang Siyiex eue:, kieh lox pa kok yo aux hoek sivoe ngai: Maix liak. Mai: tawx krax tawng krax yung ka aux awm: pa koe: gumlox Maix liak. 170 Kieh lox pa rawg pa mhaing: aux hoek sivoe ngai: Maix liak. Taoh ka aux awm: pa koe: gumlox Maix liak. 171 Jheeh aux tak ah lox yaogyaw, mawh kheu gau Maix aux ka lox tawm: been li Maix khankix heue:. 172 Dak aux tak ah lox rhax ka gumlox Maix, mawh kheu lox tawm: been li Maix mawh pa rah pa see heue:. 173 Kieh taix Maix teem: coi ka aux, mawh kheu aux laug tix teei ka lox sidiex gau Maix heue:. 174 Simiang Siyiex eue:, aux krox jun pot ka bwanson: krax taoh Maix heue:. Mai: aux gauxrhawm: gauxrhi: ka daux been li Maix heue:. 175 Kieh aux im: ju mai: yaogyaw ka Maix, mai: teem: coi ka aux ka krax prawng ca: Maix liak. 176 Aux hoik lud krax hu:, awm: yung: pa hoik grai: hu: tix mu:, mai: sawg ka aux liak. Aux ang piawm: ka lox tawm: been li Maix heue:.

Simin Ting 120

Lox rawg bwan:, son sang teem:

Lai rhax haok rawg bwan:

1 Aux kok yo ka Simiang Siyiex yam yaox aux krax kharhawm: kharhi:, mai: Nawh nghiet ka lox aux heue:. 2 Simiang Siyiex eue:, taoh ju aux lih khaing: jheeh pui pa ang koe: sijax, mai: khaing: dak pa pie pa lhen: liak. 3 Mai: dak pa pie pa lhen: eue:, Nawh Cao: tak tawx pa tix ka maix, Nawh tak baox tawx son sang baox bon maix pa tix, 4 Nawh Cao: tak awm: te lawm pui pa ting riang mai: gaoxngu pa kied hax heue:. 5 Aux koe: krax kharhawm: kharhi:, yam ot ka daux haktiex Mesiek, mai: ka daux nyiex gox Keda heue:. 6 Ju aux hoik rheung: ot tau mai: pui pa koeng ka pa nhim: heue:. 7 Aux moh ka plak pa nhim:, phan: aux krai yuh nan:, kix simie tix puing: naing heue:.

Simin Ting 121

Siyiex Cao: pa priex ka ex

Lai rhax haok rawg bwan:

1 Aux maong tix jhak ka gawng lua khankix, krax pa teem: coi aux kaoh khaing: dee mawx? 2 Krax pa teem: coi aux kaoh khaing: Simiang Siyiex Cao: pa yuh raoma: mai: haktiex heue:. 3 Nawh Cao: ang kieh caong maix cang klad, mai: Cao: pa pau maix ang it heue:. 4 Jhak heue:, Cao: pa pau ka ceu pui Isarelax ang gaing: ang it heue:. 5 Simiang Siyiex mawh Cao: pa priex maix heue:. Mai: Simiang Siyiex mawh veei dee deuh maix rhawm: mai: ot plak taix khawn: dawm: maix heue:. 6 Yam pon singaix ang ah, ang kieh singaix tiah ka maix, mai: yam ponsawm:, ang kieh khix chuh ka maix heue:. 7 Simiang Siyiex tieb tie ka pa ang mhawm: pa caox khawm: uik mai: priex ka ju maix heue:. 8 Simiang Siyiex tak priex maix, yan lih, yam laig maix, jah tom: yam in mai: hu: sivoe ngai: jheeng: jheeng: leeing: ju heue:.

Simin Ting 122

Yaogyaw ka veng Yerusaliem

Lai rhax haok Dawit rawg bwan:

1 Yam ah kix ka aux ex hu: ka daux nyiex Simiang Siyiex ex, aux kied koe: krax gauxrhawm: gauxrhi: heue:. 2 Veng Yerusaliem eue:, caong ex cung ka daux siviex maix khankix heue:. 3 Veng Yerusaliem, hoik yuh pa mhawm:, pa awm: paox tix. 4 Mai: ka daux veng an, awm: pa koe: lox tawm: been li ka ceu pui Isarelax pa mawh pui Simiang Siyiex, son sang haok kix tix yaogyaw ka ceukaux Simiang Siyiex tan: heue:. 5 Dangngeung dee prawng ca: hawt been li mai: dangngeung ceu cat simiang Dawit koe: tan: heue:. 6 Mai: rawg bwan: son sang yien: yawg veng Yerusaliem mai: can pui pa moh ka veng an, tak pon pa nyawmrhawm: nyawmrhi: heue:. 7 Kieh pa yien: yawg koe: ka guh veng maix, mai: kieh koe: krax nyawmrhawm: nyawmrhi: ka daux nyiex haw: Maix liak. 8 Aux tak krai ah nin: ka son puxaik mai: paox grawm paox krux khankix, "Kieh pa yien: yawg koe: ka daux maix liak." 9 Mai: aux tak sawg bwanson: son maix ka daux nyiex Simiang Siyiex heue:.

Simin Ting 123

Lox rawg bwan:, son sang caoxrhawm:

Lai rhax haok rawg bwan: 1 Aux maong tix jhak ka Siyiex pa ot ka piang meung raoma: heue:. 2 Awm: siliex khankix, maong tix jhak ka taix Simiang kix, mai: awm: bon: siliex khankix maong tix jhak ka taix miex simiang kix khankix, ex kawx maong tix jhak ka Simiang Siyiex tom: pon ex bwanson: krax caoxrhawm: Maix heue:. 3 Simiang Siyiex eue:, yuh bwanson: caoxrhawm: ka ex liak. Mawh kheu hoik yaox ex tix kham: geu: ka krax pa kaig pa tua tom: nie heue:. 4 Mai: ju ex hoik yaox tix kham: gau: ka pui pa nieb ah pa ang cee ang cak, mai: pa sa pa lao, mai: pui pa ting rhawm: ting rhi: khankix, yuh tix kieh ex kaig tua tom: nie heue:. 124

Cao: pa taoh ka Isarelax

Lai rhax haok Dawit rawg bwan:

1 Ceu pui Isarelax ah nin:, "Keud tix yaox phan: Simiang Siyiex ang ot plak ex. 2 Phan: Simiang Siyiex ang ot plak ex, pui pa koeng ka ex tang: plak khankix. 3 Krax pa songrhawm: songrhi: kix lih mai: hoik bleet tix ih ex khawm: kaux khawm: ju pleue:. 4 Yam an, rawm: khankix kheem: ex mai: rawm: klawng: khankix hoik jao: hu: ka piang ju ex pleue:. 5 Mai: rawm: klawng: caox khankix hoik jao: hu: ka piang ju ex pleue:." 6 Kieh Simiang Siyiex pa ang tawx ex hoek ka krax pa laux pa leeing: ting bwanson: heue:. 7 Ju ex hoik pon tix luan hu:, awm: sim: pa luan khaing: maox jhawk pa taong: kix, ex kawx hoik pon tix luan kheu hoik dud maox jhawk heue:. 8 Cao: pa teem: coi ex koe: ka daux ceukaux Simiang Siyiex Cao: pa yuh raoma: mai: haktiex heue:.

Simin Ting 125

Siyiex priex ka pui Nawh khankix

Lai rhax haok rawg bwan:

1 Pui pa deuh rhawm: ka Simiang Siyiex kaux cong: jheeng: jheeng:, awm: gawng Zion ang chix gah chix greed tix bawg kawx heue:. 2 Mai: awm: rob gawng hawt vung viang veng Yerusaliem, Simiang Siyiex rob hawt pui Nawh khankix, jah tom: yamin mai: hu: sivoe ngai: leeing: ju leeing: phan: heue:. 3 Pui pa rah pa see khankix, tak ang pon tix yuh phimap phigrham:, mai: krong: pliah pui pa ang rah ang see khankix ang lai pon tix giex kaing: ka piang sin: pui pa rah pa see heue:. 4 Simiang Siyiex eue:, yuh bwanson: ka pui pa mhawm: pa mhiem:, mai: pui pa rah pa see ka daux rhawm: khankix liak. 5 Pui pa lud hu: ka krax pa kawk pa vawk khankix, Simiang Siyiex tak teei lih tau mai: pui pa ang rah ang see khankix heue:. Kieh pa nhim: koe: tau mai: ceu pui Isarelax liak.

Simin Ting 126

Rawg bwan:, son sang taoh

Lai rhax haok rawg bwan:

1 Yam Simiang Siyiex, kieh pui Zion pa phyawk hu: deeh hoek, ex awm: ngie pui pa camaox heue:. 2 Yam an, jheeh ex grum naog ka krax nyiah, mai: dak ex grum naog ka lox rhax pa gauxrhawm: gauxrhi: heue:. Mai: pui tang: ceu tang: cat khankix kawx, ah nin:, "Simiang Siyiex hoik yuh kaing pa ting son kix heue:." 3 Simiang Siyiex hoik yuh kaing pa ting pa lhaong: son ex, mai: ex kawx, koe: krax gauxrhawm: gauxrhi: heue:. 4 Simiang Siyiex eue:, can ex pa hoik phyawk hu: khankix kieh deeh hoek awm: rawm: klawng: plak seh liak. 5 Mai: pui pa jah rawm: ngai: mai: rhuat simie khankix, tak gauxrhawm: gauxrhi: mai: vawg nghox heue:. 6 Pui pa jah rawm: ngai: mai: lih hu: rhuat simie khankix, tak deeh viex lhiem: nghox hoek khawm: gauxrhawm: gauxrhi: tix tete heue:.

Simin Ting 127

Yaogyaw ka bwanson: Siyiex

Lai rhax haok Sawlamun rawg bwan:

1 Phan: Simiang Siyiex ang yuh nyiex, kix pa yuh mawh pa giex pa goeng heue:. Mai: phan: Simiang Siyiex ang pau veng in, kix cao: pa pau mawh pa giex pa goeng heue:. 2 Viang pex kaoh caocao mai: ang it tom: vhaik praix kawx, kharhawm: kharhi: ka pa ih pa un: ang koe: bwanson:. Siyiex tawx krax pa nyawm it nyawm tum ka pui pa moh Nawh khankix heue:. 3 Kawn: praix pa keh khankix mawh sin: pa tawx Simiang Siyiex, mai: mawh khawngphak pa tawx Nawh Cao: heue:. 4 Mai: kawn: praix pa keh yam awn: ju kix, awm: te pa koe: ka daux taix pui pa kua: pa vao heue:. 5 Pui pa naog te ka mawk khankix koe: bwanson: heue:. Mai: kix tak ang koe: krax pa kaig pa tua yam prawng ca: ka pui pa koeng ka kix, mai: kix pau ka daux siviex veng an heue:.

Simin Ting 128

Khawngphak pui pa chix nghiet ka lox Siyiex is\ Lai rhax haok rawg bwan: 1 Pui pa lhat pa graung ka Simiang Siyiex, mai: pa hawt hu: ka daux krax Nawh khankix, koe: bwanson: heue:. 2 Phan: yuh nan:, maix tak yaox tix ih ka ceu pa yuh maix ka taix tix heue:. Mai: maix tak koe: bwanson: mai: yaox tix ih mhawm: mhawm: heue:. 3 Moeng maix tak awm: nhu: plix siiet pa plix tom: nie, ka daux nyiex maix kawn: praix maix rob vung viang pheen: sawm: maix, awm: pa sum: khaox sanlun heue:. 4 Mai: jhak heue:, pui pa lhat pa graung ka Simiang Siyiex khankix koe: bwanson: yuh nan: heue:. 5 Simiang Siyiex, tak ot ka piang gawng Zion mai: nawb bwanson: ka maix, mai: maix tak yaox bwanson: pa pon veng Yerusaliem ka ju maix heue:. 6 Mai: tak sang kieh maix yaox ka kawn: saux maix khankix heue:. Kieh pa nhim: koe: ka piang ceu pui Isarelax liak.

Simin Ting 129

Lox rawg bwan:, son pui pa koeng ka pui Isarelax

Lai rhax haok rawg bwan:

1 Ceu pui Isarelax ah nin:, "Kix hoik tuktiak tukte: aux, tom: yam awn: ju aux miex bawg nieh, 2 mai: kix hoik tuktiak tukte: aux, tom: yam awn: ju aux miex bawg nieh, viang mawh nan: kix ang pex aux." 3 Pui pa thai: khankix, thai: ka piang si:ang: krawng: aux, rhoi: thai: kied lang: awm: khaix mug heue:. 4 Simiang Siyiex mawh pa rah pa see heue:. Mai: Nawh tat dud ka maox pui pa ang rah ang see khankix heue:. 5 Can pui pa koeng ka veng Zion khankix khawm: uik, kieh kix hoek krax pa kaig pa tua mai: deeh dak plak khaix liak. 6 Kieh kix awm: rib pa kuah piang braux nyiex, mai: kieh kix lak kroh hu: ka: ang pui nyang reeig tix tik heue:. 7 Mai: pui pa vawg ka rib an, ang lai pon pie tix jhawp, mai: pui pa jhoi: nawh kawx, ang pon tix glien heue:. 8 Mai: can pui pa lawng krax an, ang pon tix ah, "Kieh bwanson: Simiang Siyiex hoek ka piang pex liak. Ex deuh rhawm: ka ceukaux Simiang Siyiex mai: nawb bwan: ka pex heue:."

Simin Ting 130

Lox rawg bwan:, son sang teem:

Lai rhax haok rawg bwan:

1 Simiang Siyiex eue:, aux ot ka dee raux dee nu mai: kok yo ka Maix heue:. 2 Simiang Siyiex eue:, veeh yhaok Maix, mhong: ka lox aux, mai: nghiet ka lox pa rawg aux bwan: liak. 3 Simiang Siyiex eue:, phan: Maix tiem: tix deuh ka phimap ex, pui mawx pon tix cung sivoe Maix. 4 Pa chix ploi: phimap mawh Maix, kieh ex lhat graung ka Maix heue:. 5 Aux krox ka Simiang Siyiex, ju aux kawx, krox jun ka Maix heue:. 6 Aux krox jun pot ka gumlox Maix, mai: ju aux kawx, krox jun pot ka Simiang Siyiex nie lheu: khaing: kix, pa krox jun yam bah riang praix ponngawb heue:. 7 Ceu pui Isarelax eue:, krox jun pot ka Simiang Siyiex liak, grawh grawng: nawh, krax caoxrhawm: mai: bwanson: krax taoh koe: mai: Simiang Siyiex tom: nie heue:. 8 Nawh Cao: taoh tix teei ceu pui Isarelax khaing: daux phimap phigrham: khawm: uik heue:.

Simin Ting 131

Lox rawg bwan: pa pex

Lai rhax haok Dawit rawg bwan:

1 Simiang Siyiex eue:, rhawm: aux ang lhaong:, mai: ngai: aux kawx ang maong tix jhak, mai: aux ang hu:, ang hoek, ka daux kaing pa ting pa ang keung: ka tokaux tix heue:. 2 Aux hoik vhah rhawm: ka tokaux tix, mai:ot nhim: awm: kawn: nyawm pa prah peuex teeh miex, mai: rhawm: aux kawx, awm: kawn: nyawm pa prah peuex heue:. 3 Can pui Isarelax eue:, krox jun pot ka Simiang Siyiex jah tom: yamin, hu: sivoe ngai: leeing: ju leeing: phan: heue:.

Simin Ting 132

Yaogyaw ka nyiex bwan:

Lai rhax haok rawg bwan:

1 Simiang Siyiex eue:, doh keud doh sawn: ka Dawit, pa yaox nawh tix kham: geu: mai: krax kharhawm: kharhi: nawh liak. 2 Nawh hoik tiex tu tix ka Simiang Siyiex pa ting siawp sibrawm pa krub ceu pui Yakop mai: ah nin:, 3 "Aux ang nyang laig ka daux nyiex dee ot tix, aux ang lai haok it ka piang ku: de it tix. 4 Ang kieh ngai: it, mai: ang kieh siyieb ngai: aux yip, 5 tom: sidah ang aux nyang yaox nyiex dee ot Simiang Siyiex, mai: dee ot Siyiex pa ting siawp sibrawm pa krub ceu pui Yakop kah heue:. 6 Mai: ex hoik mhong: nyiex gox Siyiex an koe: ka meung Epharat, ka daux tiag daux tu heue:." 7 Laig ka daux nyiex bwan: dee ot Nawh, mai: ex grux ngawng tix krub dex ngot dee deuh Nawh caong heue:. 8 Simiang Siyiex eue:, tokaux Maix mai: teug sijax mukheu mai: min: plakngai: siawp sibrawm Maix haok ot ka dee ot Maix liak. 9 Kieh cao: giex kaing: li Maix khankix, ceep kraung pa rah pa see, mai: kieh pui pa singaix singeh Maix khankix rhax lai pa gauxrhawm: gauxrhi: liak. 10 Mawh kheu jhak Maix ka plakngai: siliex Maix Dawit, mai: paw lai tik plakngai: kaw pa hoik groi Maix rawm: bee kah liak. 11 Lox sijax mukheu pa hoik tiex tu Simiang Siyiex ka Dawit, mai: Nawh ang yuh laux ka sijax an, mai: Aux tak sang kieh simie ceu cat maix mawh pa ngawm ka piang dangngeung maix heue:. 12 Phan: kawn: praix maix priex tix hawt yuh ka lox tawm: been li Aux, mai: grawng: pa hoik kham: Aux mhai: sakse:, pa hoik gau Aux ka maix khankix, kawn: praix kix kawx, tak sang pon tix ngawm ka piang dangngeung maix jheeng: jheeng: leeing: ju leeing: phan: heue:. 13 Mai: Simiang Siyiex laug tix teei ka veng Zion mai: khaw: ka rhawm: Nawh, mai: yuh mawh dee ot Nawh jheeng: jheeng: heue:. 14 Mai: veng in mawh, veng dee ot Aux jheeng: jheeng:, mawh kheu simie Aux tix ot ka daux veng in heue:. 15 Mai: Aux tak nie lheu: nawb bwanson:, son pa ih pa un: ka nawh heue:. Mai: Aux tak tawx pui pa hot pa sibhawm: nawh ih pa ih pa un: tom: sak heue:. 16 Aux tak kieh cao giex kaing: li nawh khankix, jawg tix ceep ka kraung krax taoh, mai: pui pa singax singeh nawh khankix, ah lox sinum mai: ah lox rhax pa gauxrhawm: gauxrhi: heiue:. 17 Aux tak kieh rung: lawm Dawit lih tan: heue:. Aux hoik cox khre: kawk ngu son kaw pa hoik groi Aux rawm: bee heue:. 18 Mai: Aux tak teei krax pa kaig pa tua ceep ka pui pa koeng ka nawh khankix, mai: teei mhok khri: nawh pa pruh riang ceep ka piang kaing: nawh heue:.

Simin Ting 133

Moh ka paox tix

Lai rhax haok Dawit rawg bwan:

1 Puxaik pa ih rhawmrhi: simau paox tix, mai: pa yuh paox yuh pie ot tix tau, kied mhawm: heue:, mai: kied sidaing: mhawm: grang heue:. 2 Awm: rawm: bee pa hieh lih piang kaing: Arun mai: ba: lih hu: ka hauk jheeh nawh tom: hoek ka ngawg sibex nawh heue:. 3 Mai: awm: rawm: ciex pa koe: ka piang gawng Heramon mai: pa lih hu: ka gawng Zion heue:. Ka dee an, Simiang Siyiex hoik prawng ca: tix deuh bwanson: pa mhawm: pa im: ju leeing: ju leeing: phan: heue:. 134

Lox pa kok yo, pa yaogyaw ka Siyiex

Lai rhax haok rawg bwan:

1 Siliex Simiang Siyiex pa pau ka daux nyiex Siyiex pon sawm: khankix khawm: uik eue:, yaogyaw ka Simiang Siyiex heue:. 2 Mai: yaog taix tix ka dee singax singeh, mai: yaogyaw ka Simiang Siyiex heue:. 3 Kieh Simiang Siyiex Cao: pa yuh raoma:, mai: haktiex, ot ka piang gawng Zion mai: nawb bwanson: ka maix liak.

Simin Ting 135

Lox rhax pa yaogyaw

1 Yaogyaw ka ceukaux Simiang Siyiex heue:; siliex Simiang Siyiex khankix eue:, yaogyaw ka Nawh heue:. 2 Pex pa cung ka daux nyiex Siyiex khankix, mai: pa pau ka jaong num: nyiex Siyiex ex khankix eue:, yaogyaw heue:. 3 Mawh kheu Simiang Siyiex mawh pa jiet mhawm:, mai: yaogyaw ka Simiang Siyiex heue:. Mai: rhax lai yaogyaw ka ceukaux Nawh heue:. Pa yuh nan: mawh pa mhawm: grang heue:. 4 Grawh grawng: nawh, Simiang hoik laug tix teei ka ceu Yakop son Nawh, mai: ceu pui Isarelax mawh kraung cie Nawh heue:. 5 Aux tawng grawng: Simiang Siyiex ex mawh Cao: pa ting khaing: Siyiex khawm: uik heue:. 6 Simiang Siyiex an, awm: pa simie Nawh, Nawh Cao: hoik yuh raoma: mai: haktiex mai: rawm: sigrit sigra: pa raux pa mox ku dah ku dee heue:. 7 Mai: Nawh Cao: kieh bhawm: rawm: haok ka dee sidah haktiex heue:. Nawh Cao: yuh pukplak praix pa viex lhiex, mai: Nawh Cao: teei bhaung: lih khaing: daux teug kraung khrai: Nawh heue:. 8 Nawh Cao: plaux kawn: Ai: ka daux meung Ejiptux, jah ka pui tom: hoek ka khawng: brie heue:. 9 Meung Ejiptux eue:, Nawh ploi: mhai: sakse: grawng: ceu pa daox pa am: khankix, hoek ka maix, jah ka Simiang Pharaw, mai: siliex nawh, mai: pui nawh khawm: uik heue:. 10 Nawh Cao: yuh ka ceu pui tom: nie laux leeing:, mai: simiang pa ting min: pa mawh, 11 Sihon simiang khunhawkham meung Amawrix, mai: Awgax simiang khunhawkham meung Bashan khankix yum, mai: yuh ka meung Khanan laux leeing: khawm: uik heue:. 12 Mai: teei tix tawx haktiex an, mawh dee ot kix pa mawh sin: pui Nawh Isarelax khankix heue:. 13 Simiang Siyiex eue:, ceukaux Maix kaux cong: jheeng: jheeng:, mai: Simiang Siyiex eue:, ceukaux Maix mawh pa doh keud doh sawn: kah ku ju leeing: ju leeing: phan: heue:. 14 Mai: Simiang Siyiex prawng ca: ka plak pui cie Nawh khankix, mai: doh keud doh sawn: ka son siliex Nawh khankix heue:. 15 Mai: rieng rao pa krub pui tang: ceu tang: cat khankix, mawh mau, mawh khri: heue:. Mawh kraung pa yuh pui ka taix tix heue:. 16 Koe: jheeh kawx, ang chix sikah, kix koe: ngai: kawx, ang chix yaox, 17 mai: kix koe: yhaok kawx, ang chix mhong:, ka daux jheeh kix ang koe: ju toek bhawm: lih, bhawm: laig heue:. 18 Cao: yuh khawm: cao: pa deuh rhawm: kah, kix hoik awm: paox tix heiue:. 19 Ceu pui Isarelax eue:, yaogyaw ka Simiang Siyiex heue:. Mai: ceu pui Aron eue:, yaogyaw ka Simiang Siyiex heue:. 20 Ceu pui Lewix eue:, yaogyaw ka Simiang Siyiex heue:. Mai: pex pa lhat pa graung ka Simiang Siyiex khankix eue:, yaogyaw ka Simiang Siyiex heue:. 21 Kieh koe: bwanson: ka Simiang Siyiex pa ot ka daux veng Yerusaliem mai: ka piang gawng Zion liak. Haleluya!

Simin Ting 136

Lox rhax yaogyaw bwanson:

1 Yaogyaw ka bwanson: Simiang Siyiex, mawh kheu jiet mhawm: Nawh, mai: krax caoxrhawm: Nawh koe: jheeng: jheeng: leeing: ju heue:. 2 Yaogyaw ka bwanson: Siyiex, mawh kheu mawh Nawh pa ting ka piang siyiex khawm: uik, mai: krax caoxrhawm: Nawh koe: jheeng: jheeng: leeing: ju heue:. 3 Yaogyaw ka bwanson: Simiang, mawh kheu mawh Nawh pa ting ka piang Simiang khawm: uik, mai: krax caoxrhawm: Nawh koe: jheeng: jheeng: leeing: ju heue:. 4 Yaogyaw ka Cao: pa yuh ceu pa daox pa am: Tix kaux khaing:, kheu koe: krax caoxrhawm: Nawh jheeng: jheeng: leeing: ju heue:. 5 Nawh teei cuyi pingnya mai: yuh raoma:, mawh kheu krax caoxrhawm: Nawh koe: jheeng: jheeng: leeing: ju heue:. 6 Nawh tawm haktiex ka piang rawm: khankix, mawh kheu krax caoxrhawm: Nawh koe: jheeng: jheeng: leeing: ju heue:. 7 Nawh yuh pa riang pa ting, mawh kheu krax caoxrhawm: Nawh koe: jheeng: jheeng: leeing: ju heue:. 8 Nawh yuh singaix kieh mawh son pon singaix, mawh kheu krax caoxrhawm: Nawh koe: jheeng: jheeng: leeing: ju heue:. 9 Nawh yuh khix mai: simuing: khankix, kieh mawh son ponsawm: heue:. Mawh kheu krax caoxrhawm: Nawh koe: jheeng: jheeng: leeing: ju heue:. 10 Nawh plaux kawn: Ai: meung Ejiptux yum, mawh kheu krax caoxrhawm: Nawh koe: jheeng: jheeng : leeing: ju heue:. 11 Nawh taoh ceu pui Isrelax lih khaing: kix, mawh kheu krax caoxrhawm: Nawh koe: jheeng: jheeng: leeing: ju heue:. 12 Nawh teei taix pa ting siawp sibrawm, mai: nyeu plawng: taix Tix yuh nan:, mawh kheu krax caoxrhawm: Nawh koe: jheeng: jheeng: leeing: ju heue:. 13 Mai: yam tiang kix rawm: sigrit sigra: Edom dud hu: khawm: ra: plak, mawh kheu krax caoxrhawm: Nawh koe: jheeng: jheeng: leeing: ju heue:. 14 Kieh ceu pui Isarelax khankix preeng: hu: ka daux rawm: sigrit sigra:, mawh kheu krax caoxrhawm: Nawh koe: jheeng: jheeng: leeing: ju heue:. 15 Teei simiang Pharaw mai: cao: giex kaing: naing nawh khankix, goh ka daux rawm: sigrit sigra: Edom, mawh kheu krax caoxrhawm: Nawh koe: jheeng: jheeng: leeing: ju heue:. 16 Nawh teei pui Nawh khankix hu: tawx ka daux tiag daux tu, mawh kheu krax caoxrhawm: Nawh koe: jheeng: jheeng: leeing: ju heue:. 17 Nawh yuh ka simiang ting khankix laux leeing:, mawh kheu krax caoxrhawm: Nawh koe: jheeng: jheeng: leeing: ju heue:. 18 Nawh teei simiang pa ting min: plakngai: khankix yum, mawh kheu krax caoxrhawm: Nawh koe: jheeng: jheeng: leeing: ju heue:. 19 Nawh teei Sihon simiang khunhawkham meung Amawrix yum, mawh kheu krax caoxrhawm: Nawh koe: jheeng: jheeng: leeing: ju heue:. 20 Nawh teei Awgax simiang khunhawkham meung Bashan yum, mawh kheu krax caoxrhawm: Nawh koe: jheeng: jheeng: leeing: ju heue:. 21 Nawh teei haktiex dee ot kix tawx ka sin: Tix, mawh kheu krax caoxrhawm: Nawh koe: jheeng: jheeng: leeing: ju heue:. 22 Nawh teei tix tawx sin: ka siliex Nawh ceu pui Isarelax khankix, mawh kheu krax caoxrhawm: Nawh koe: jheeng: jheeng: leeing: ju heue:. 23 Nawh doh keud doh sawn: ka ex, yam yaox ex tix ot dee tiem, mawh kheu krax caoxrhawm: Nawh koe: jheeng: jheeng: leeing: ju heue:. 24 Nawh hoik taoh ex lih khaing: daux tawm: taix pui pa koeng ka ex, mawh kheu krax caoxrhawm: Nawh koe: jheeng: jheeng: leeing: ju heue:. 25 Nawh tawx ceu pa ih pa un: ka can pa koe: khawm: uik, mawh kheu krax caoxrhawm: Nawh koe: jheeng: jheeng: leeing: ju heue:. 26 Yaogyaw ka bwanson: Siyiex, Cao raoma:, mawh kheu krax caoxrhawm: Nawh koe: jheeng: jheeng: leeing: ju heue:.

Simin Ting 137

Lox ngia pui Isarelax yam yuh siliex pui

1 Ex ngawm dex praok rawm: klawng: Babulon khankix, mai: doh keud ka veng Zion, mai: yiem heue:. 2 Mai: ting: ex khankix, ex teei tix vhak ka khaox (momakhax) khankix ka dee an heue:. 3 Grawh grawng: nawh, ka dee an kix pa viex ex hu: khankix, nhie: ex rhax lai, mai: tuktiak tukte: ka ex, "Mai: ah ex mhong: lox pa gauxrhawm: gauxrhi:, mai: lox rhax pa rhax pex ka gawng Zion tix phuk phuk ka ex liak." 4 Ex tak pon ah lox rhax Simiang Siyiex, ka meung tang: dah tang: dee yuh ka mawx? 5 Veng Yerusaliem eue:, phan: aux piawm: ka maix, kieh taix khawn: dawm: aux, piawm: ka pa chix tix liak. 6 Phan: aux ang doh keud doh sawn: ka maix, phan: aux ang teei ka veng Yerusaliem, mai: deuh ka dee mhawm:, lheu: khaing: pa gauxrhawm: gauxrhi: aux pa ting kieh dak aux, kawb ka ghok aux liak. 7 Simiang Siyiex eue:, doh keud doh sawn: kah, singaix hoek yuh kix veng Yerusaliem laux, ceu pui Edom khankix ah nin:, "Yuh nawh laux, yuh nawh laux, yuh laux tom: hoek ka jaong num: nawh heue:." 8 Kawn: bon: Babulon eue:, maix taksang hoek krax laux krax leeing: heue:. Pui pa deeh viied phimap ka maix awm: pa hoik yuh maix ka ex, koe: bwanson: heue:. 9 Pui pa teei kawn: praix maix mai: blok ka piang simaox, koe: bwanson: heue:.

Simin Ting 138

Lox rawg bwan: pa yaogyaw bwanson:

1 Simiang Siyiex eue:, aux tak viex khawm: rhawm: khawm: rhi: tix yaogyaw ka Maix heue:. Mai: aux tak rhax lai yaogyaw ka Maix sivoe ngai: siyiex khankix heue:. 2 Aux tak grux gawng tix krub Maix ka daux nyiex bwan: Maix pa singax singeh mai: yaogyaw ceukaux Maix, kheu krax caoxrhawm: Maix, mai: sijax mukheu Maix heue:. Grawh grawng: nawh, Maix nie lheu: kieh sijax mukheu Maix ting khaing: ceukaux Maix heue:. 3 Singaix kok yo aux ka Maix, Maix nghiet ka lox aux, mai: teei siawp sibrawm Maix mai: kieh ju aux deeh koe: riang rao heue:. 4 Simiang Siyiex eue:, mai: Simiang khunhawkham haktiex yaogyaw ka min: plakngai: Maix, kheu hoik mhong: kix lox pa hoik lih khaing: jheeh Maix khankix heue:. 5 kix tak hawt ka daux krax Simiang Siyiex mai: rhax lai heue:. Grawh grawng: nawh, min: plakngai: Simiang Siyiex kied ting heue:. 6 Simiang Siyiex, viang mawh Nawh pa ot dee lhaong: kawx, jhak ka pui pa awnrhawm: awnrhi: heue:. Pui pa ting rhawm: ting rhi: khankix, Nawh Cao: hoik tawng tom: dee singai heue:. 7 Viang aux hu: ka daux pa kharhawm: kharhi: tom: nie kawx, Maix tak kieh aux im: ju heue:. Maix nyeu taix tix ka pui pa koeng, pa kied songrhawm: songrhi: ka aux khankix, taix khawn: dawm: Maix taoh tix teei ka aux heue:. 8 Simiang Siyiex, tak kieh grawng: pa dex mai: aux hoik hoik, Simiang Siyiex eue:, krax caoxrhawm: Maix, kaux cong: jheeng: jheeng: leeing: ju, Maix paw lai tik ka ceu pa hoik yuh Maix ka taix tix liak.

Simin Ting 139

Yaogyaw ka cuyi pingnya Siyiex

1 Simiang Siyiex eue:, Maix chawk cheng: tix yaox aux Maix tawng heue:. 2 Maix hoik tawng ka pa ngawm aux, mai: pa cung aux heue:. Maix ot dee singai mai: tawng ka pa keud pa sawn: aux heue:. 3 Maix chawk cheng: tix yaox ka pa hu: pa it aux, mai: Maix tawng ka jhawm: hu: jhawm: ing: aux khawm: uik heue:. 4 Ka: sivoe ang aux nyang lih lox tix gum kawx, Simiang Siyiex eue:, Maix hoik tawng ka grawng: khawm: uik heue:. 5 Maix ot hawt vung viang mai: aux, mai: teei taix Maix deuh ka piang aux heue:. 6 Krax tawng krax yung an khankix, mawh ceu pa daox pa am:, pa ang aux lai chix yuh, ang lai pon tix hoek krup kah heue:. 7 Aux tak sang hu: dee mawx? Son sang luan khaing: Khwan: Maix? Tak sang to: dee mawx? Son sang luan khaing: pakngai: Maix? 8 Phan: aux haok daux raoma: kawx, Maix hoik ot tan:, phan: aux tawm tix it ka daux meung yum kawx, Maix hoik ot tan: heue:. 9 Phan: aux teei pruik ponngawb mai: hu: dee sidah rawm: sigrit sigra: kawx, 10 ka dee an kawx, taix Maix tak tawx ka aux, mai: taix khawn dawm: Maix giex ka aux heue:. 11 Phan: aux ah, pa vhaik tawb kheem: aux, yam ponsawm: kawx pa riang jhan: rob vung viang aux heue:. 12 Pa vhaik ang doh pon tawb kheem: sivoe ngai: Maix tix ceu kawx, ponsawm: riang awm: pon singaix, pa riang kiex pa vhaik awm: paox tix sivoe ngai: Maix heue:. 13 Maix hoik phan: hoik yuh sok lax aux, mai: tokaux aux khawm: uik, ka daux vaig miex tix heue:. 14 Aux tak yaogyaw ka Maix, mawh kheu aux hoik grum naog ka mhai: sakse: ceu pa daox pa am:, mai: ceu pa lhat pa graung khankix heue:. Kaing pa yuh Maix in khankix mawh ceu pa daox pa am:, mai:ju aux hoik tawng mawh tete heue:. 15 Tokaux aux hoik sidawng: sivoe ngai: Maix, yam kleuk yam yuh Maix aux, ka greem: tiex ka dee glip heue:. 16 Ka: ang aux nyang bax mawh pui, Maix hoik yaox heue:. Mai: ka: sivoe ang Maix nyang yuh ka ceu an khankix tix ceu kawx, Maix hoik tiem: tix deuh daux carang Maix khawm: uik heue:. 17 Siyiex aux eue:, krax pa keud pa sawn: Maix ka aux mawh ceu pa kied ting ngawh ting jum mai: kied nie sigrien sigre heue:. 18 Phan: aux simin tix yaox nawh, nie lheu: nie khaing: mhaik khankix heue:. Mai: yam siduad aux, ot tau mai: Maix heue:. 19 Siyiex aux eue:, Maix teei pui pa ang rah ang see khankix yum liak. Pex pa pah pui yum khankix eue:, lih hu: khaing: aux heue:. 20 Kix ah lox pa lah pa cha: ka Maix, mai: pui pa koeng ka Maix khankix, nieb ah lox pa ang cee ang cak ka Maix huee:. 21 Simiang Siyiex eue:, aux koeng ka pui pa koeng ka Maix khankix, ang mawh lie? Aux seeing: brai: ka pui pa cung tang: plak ang mawh lie? 22 Aux koeng ka kix, khawm: rhawm: khawm: rhi: tix, mai: deuh kix mawh pui pa koeng aux heue:. 23 Siyiex aux eue:, Maix chawk cheng: ka aux mai: tawng daux rhawm: aux heue:. Cheu: tix yaox aux, mai: tawng ka rhawm: pa keud pa sawn: aux liak. 24 Jhak ka aux, hu: ang aux hu: ka daux krax pa caox lie, mai: tawx aux hu: ka daux krax leeing: ju leeing: phan: liak.

Simin Ting 140

Rawg bwan:, son sang priex

1 Simiang siyiex eue:, taoh aux khaing: tawm: taix pui pa caox liak. Mai: tieb tie teem: coi aux khaing: tawm: taix pui pa caox khankix liak. 2 Kix keud ceu pa ang mhawm: ka daux rhawm: tix, mai: kix cheeik naing koe: ku singaix jheeng: jheeng: heue:. 3 Mai: kix klaing: dak tix, awm: siuing:, siyieb jheeh kix koe: jai: awm: siuing: mheem: heue:. 4 Simiang Siyiex eue:, tieb tie mai: teem: coi aux khaing: tawm: taix pui pa ang rah ang see, mai: tieb tie teem: coi aux khaing: tawm: taix pui pa caox pa caig mai: keud tix sang kieh aux goh heue:. 5 Pui pa ting rhawm: ting rhi: khankix, teei maox siah mai: mox tix taong: kie ka son aux, mai: kix teei rub di tix deuh ka daux krax ka son aux heue:. 6 Aux krai tix deuh ka Simiang Siyiex ah nin:, "Maix mawh Siyiex aux heue:." Simiang Siyiex aux eue:, nghiet ka lox pa rawg pa mhaing: aux liak. 7 Simiang Siyiex aux eue:, siawp sibrawm pa taoh Maix aux, Maix tawb kheem: ka kaing: aux singaix puing: naing heue:. 8 Simiang Siyiex eue:, paw lai tawx akhwang: pa grum naog ka pui pa ang rah ang see liak. Mai: paw lai tawx krax pa keud kix grum naog liak. 9 Yam yaog kix kaing: mai: rob vung viang aux, lox pa ang mhawm: pa lih khaing: jheeh kix, kieh deeh hoek ka piang kix liak. 10 Kieh gaox ngu khankix rau ka piang kix liak. Mai: kieh rau ka daux ngu mai: ka daux pa kied raux liak. Paw kieh kix deeh pon kaoh tix bawg kawx heue:. 11 Mai: pui pa ah lox pa caox pa caig khankix, paw kieh dee ot kix kaux cong: piang haktiex in, mai: krax kharhawm: kharhi: khankix, hawt leue khaix kix, pa mawh pui pa caox pa caig, tom: sidah laux leeing: heue:. 12 Aux tawng Simiang Siyiex tem: coi ka pui pa hot pa sibhawm:, mai: prawng ca: ot plak pui pa hot pa sibhawm: heue:. 13 Mai: pui pa rah pa see khankix, tak yaogyaw ka ceukaux Maix, mai: pui pa rah pa see ka daux rhawm: daux rhi: khankix, pon tix ot tau mai: Maix heue:.

Simin Ting 141

Lox pa rawg bwan: ponbo

1 Simiang Siyiex eue:, aux kok yo Maix, nied tix hoek ka aux liak. Mai: yam kok yo aux ka Maix, nghiet ka lox aux liak. 2 Kieh pa rawg pa mhaing: aux, awm: nyawng bhawng: pa sang gleeing tix tan, mai: kieh aux yaog taix tix rien awm: krax pa tan pa lu plak ponbo sivoe ngai: Maix liak. 3 Simiang Siyiex eue:, deuh pa tieb tie sivoe jheeh aux liak, pau siviex siyieb jheeh aux liak. 4 Paw kieh rhawm: aux keud ka ceu pa ang mhawm: khankix, paw lai kieh aux neuex mai: pui pa yuh phimap phigrham:, mai: paw lai kieh aux hu: ka daux krax pui pa ang rah ang see khankix liak. Mai: paw lai kieh aux ih ceu pa ih pui an khankix liak. 5 Kieh pui pa rah pa see sivied tix gau aux liak. Mai: tak koe: bwanson: heue:. Kieh nawh sidiex gau aux liak. Tak mawh rawm: bee pa kraix ka kaing: aux heue:. Baox yuh kawx, paw kieh kaing: aux thiang: liak. Yamin aux ot tang: plak mai: rawg bwan: grawng: pui pa nieb yuh khankix heue:. 6 Pui pa ting cao: giex kaing: kix, ploi: rau ka daux rang:, kix mhong: lox aux heue:. Mai: lox aux mawh pa nyawm tix nghiet. 7 Awm: pung prang: khix lug pui, si:ang: ex kawx, pung prang: ka siviex meung yum heue:. 8 Simiang Siyiex eue:, aux maong tix jhak ka Maix heue:. Aux deuh rhawm: ka Maix heue:. 9 Paw lai hieh tix tik ju aux liak, Maix kieh aux luan khaing: kie pa taung: kix son aux, mai: kieh aux luan khaing: jhawk pa taong: pui pa yuh phimap khankix liak. 10 Yam hoik luan aux khaing: khankix, kieh pui pa ang rah ang see khankix, kieh cao: kix deeh krix ka kie pa hoik taong: kix tiru liak.

Simin Ting 142

Lox rawg bwan:, son sang teem:

1 Aux kok yo ka Simiang Siyiex, aux rawg bwan: mai: kok yo ka Simiang Siyiex heue:. 2 Mai: aux ah lox ngia sivoe ngai: Nawh, mai: krai lao ceu pa kharhawm: kharhi: ka sivoe ngai: Nawh heue:. 3 Yam laux rhawm: aux, Maix hoik tawng ka krax hu: aux heue:. Kix briex mox tix taong: kie ka krax hu: aux heue:. 4 Aux jhak ka plak taix khawn: dawm:, mai: ang yaox ka pui pa tawng aux, mai: ang koe: krax glawd krax to:, pui pa lhawk ka ju aux ka ang koe:. 5 Simiang Siyiex eue:, aux kok yo ka Maix heue:. Maix mawh dee deuh aux rhawm:, son sang pon aux tix ot meung dee ot pui pa im: ju khankix heue:. 6 Nghiet ka lox pa kok pa yo aux, pui pa kharhawm: kharhi: liak. Mai: taoh aux lih khaing: daux tawm: taix pui pa tuktiak tukte: ka aux liak. Mawh kheu kix ting riang ting rao khaing: aux heue:. 7 Mai: taoh aux lih khaing: daux thawng:, son sang pon aux tix yaogyaw ceukaux Maix liak. Yam yuh Maix bwanson: ka aux, kix pa mawh pui pa rah pa see khankix, tak ot rob vung viang aux heue:.

Simin Ting 143

Lox rawg bwan:, son sang teem:

1 Simiang Siyiex eue:, nghiet ka lox pa rawg aux bwan: mai: ceu pa rawg pa mhaing: aux liak. Mai: deeh pawk ka lox aux awm: pa koe: sijax mukheu mai: pa rah pa see Maix liak. 2 Maix paw lai prawng ca: aux liak, pui mawx ang ah, pui pa im: ju khankix, pui pa ang koe: phimap, pa rah pa see sivoe ngai: Maix ang koe: tix kaux kawx. 3 Pui pa koeng khankix, tuktiak tukte: ka ju aux, dig ju aux tom: hoek sidaing: tiex, mai: kieh aux ot ka daux pa vhaik awm: pui pa hoik rheung: yum heue:. 4 Aux laux rhawm: mai: rhawm: aux bih heue:. 5 Mai: aux doh keuh ka singaix bawg pa hoik luan khankix dix, mai: keud can pa hoik yuh Maix khawm: uik, mai: pa hoik yuh Maix ka taix Tix khankix heue:. 6 Aux taong taix tix ka Maix heue:, mai: ju aux simie tix ih Maix, awm: tiex krox pa simie tix nyaux rawm: heue:. 7 Simiang Siyiex eue:, nied tix deeh pawk ka lox aux liak, aux hoik laux rhawm: heue:. Paw lai mox ngai: Maix khaing: aux, awm: kix pa lih hu: daux tiex heue:. 8 Kieh aux mhong: krax caoxrhawm: Maix, yam ponngawb caocao liak, aux deuh rhawm: ka Maix heue:. Kieh Maix tawng krax hu: aux liak, aux viex rhawm: tix hu: ka Maix heue:. 9 Simiang Siyiex eue:, taoh aux khaing: tawm: taix pui pa koeng ka aux liak. Aux deuh rhawm: ka Maix heue:. 10 Gau ka aux, son sang chix hawt aux alo Maix liak, Maix mawh Siyiex aux heue:. Kieh Khwan: singax Maix thong: aux hu: ka dee lung: dee mhawm: liak. 11 Simiang Siyiex eue:, kieh aux im: ju kheu ceukaux Maix liak, teei ju aux lih khaing: ka daux pa kharhawm: kharhi: awm: pa rah pa see Maix liak. 12 Awm: koe: krax caoxrhawm: Maix, teei tix tik pui pa koeng ka aux khawm: uik, mai: yuh laux leeing: ka pui pa tuktiak tukte: ka aux khawm: uik, aux mawh siliex Maix heue:.

Simin Ting 144

Lox yaogyaw pui pa pex

1 Simiang Siyiex pa mawh rang: ting, mai: Cao: pa gau aux chix puing: naing, kieh koe: bwanson: liak. 2 Nawh caoxrhawm: ka aux, mai: mawh guh veng aux mawh tab aux, mai: mawh Cao: pa taoh aux lih mai: Cao: pa tieb tie aux, mai: mawh dee deuh, Cao: pa teei ceu pui aux deuh greem: aux heue:. 3 Simiang Siyiex eue:, kawn: pui mawh pa yuh ka mawx? Khex deuh Maix tix tawng lie? Kawn: pui mawh pa yuh ka mawx, Maix lai doh keud doh sawn: ka nawh? 4 Kawn: pui awm: ngie taox bhawm:, mai: bawg yam nawh dawd mai: chix luan hu:, awm: kawn: peue: heue:. 5 Simiang Siyiex eue:, Maix plak raoma:, mai: lih hoek liak, chuh ka gawng khankix liak, kix tak lih taox ngu heue:. 6 Ploi: pukplak praix Maix mai: puing: ak Maix ka kix, mai: tuktiak tukte: ka kix, mai: kieh kix pung prang: hu: liak. 7 Yaog taix Maix dee lhaong:, mai: taoh aux lih khaing: ka daux rawm: pa kied raux mai: ka daux tawm: taix pui tang: praix tang: klawng: khankix liak. 8 Mai: jheeh kix chix ah lox pa pie pa lhen: mai: taix khawn: dawm: mawh pa chix pie chix lhen: heue:. 9 Siyiex eue:, aux tak ah lox rhax pa khraox ka Maix heue:. Mai: aux tah ting: pa koe: maox kao: nyaing mai: yaogyaw ka Maix heue:. 10 Maix tawx krax pa pex pa pon ka simiang khunhawkham khankix mai: kieh siliex Maix Dawit luan khaing: krax lawm vaid lawm pliah heue:. 11 Mai: taoh aux lih khaing: tawm: taix pui tang: praix tang: klawng: liak, jheeh kix chix ah lox pa pie pa lhen:, mai: taix khawn: dawm: kix kawx chix pie chix lhen: heue:. 12 Kieh kawn: simex ex, pa awn: ju khankix, ting lhaong: awm: kawn: khaox pa sum:, mai: kieh kawn: bon: ex khankix, kieh awm: rong: simaox pa mhawm: pa koe: ka daog nyiex bwan: liak. 13 Ka daux nyiex daux ma: aux, kieh grum naog kraung khrai: pa shiao mai: pa ih pa un:, mai: plak praix kieh yung: aux khankix keh haoh hun: kaing: rheng: kaing: mheem: liak. 14 Moi aux khankix, kieh haoh hun: tom: nie, paw kieh grai:, paw kieh pui nieb rhim: tix teei, mai: yam lih hu: aux daux krax daux laux, paw kieh koe: lox riag lox yo liak. 15 Pui pa yaox tix ot yuh nan: koe: bwanson: heue:. Mai: pui pa kieh Simiang Siyiex mawh Siyiex kix koe: bwanson: heue:.

Simin Ting 145

Lox rhax yaogyaw

1 Simiang Siyiex Khunhawkham aux eue:, aux yaog Maix ting, mai: yaogyaw ka ceukaux Maix leeing: ju leeing: phan: heue:. 2 Aux tak yaogyaw ka Maix ku singaix jheeng: jheeng:, mai: aux tak yaogyaw ka ceukaux Maix ku ju leeing: ju leeing: phan: heue:. 3 Simiang Siyiex mawh Cao: pa ting pa lhaong:, mai: khaw: tix yaogyaw ka Nawh heue:. Mai: Nawh ting lhaong: miex ding ex ang dak uik krai heue:. 4 Kawn: pui tix ju hoik tix ju, yaogyaw ka kaing pa hoik yuh Maix, mai: plak jhi: ka siawp sibrawm Maix pa ting khankix heue:. 5 Aux doh keud mai: yaogyaw ka siawp sibrawm pa ting pa hoik yuh Maix, mai: ceu pa daox pa am: pa yuh Maix khankix heue:. 6 Mai: kix krai grawng: siawp sibrawm Maix pa khaw: tix lhat tix graung khankix, mai: aux kawx, tak sang krai grawng: pa ting lhaong: Maix heue:. 7 Kix doh keud doh sawn: mai: krai grawng: pa jiet mhawm: Maix, kix tak rhax lai gauxrhawm: gauxrhi: grawng: pa rah pa see Maix heue:. 8 Simiang Siyiex hoik grum naog bwanson: krax caoxrhawm: mai: koe: krax pa gun pa yeung, mai: krax caoxrawm: Nawh kied ting heue:. 9 Simiang Siyiex yuh pa mhawm: khawm: uik, mai: Nawh caoxrhawm: ka pa hoik phan: hoik deuh Tix khawm: uik heue:. 10 Simiang Siyiex eue:, can pa phan: pa deuh Maix khankix, yaoyaw ka bwanson: Maix, mai: pui pa singax singeh khankix yaogyaw ka Maix heue:. 11 Kix tak krai grawng: min: plakngai: meung Maix mai: krai grawng: siawp sibrawm Maix, 12 mai: tak krai grawng: siawp sibrawm pa ting pa lhaong: pa hoik yuh Maix khankix, mai: min: plakngai: meung Maix ka kawn: pui khankix heue:. 13 Meung Maix mawh meung leeing: ju leeing: phan:, mai: Maix mawh Simiang ku ju leeing: ju leeing: phan: heue:. 14 Simiang Siyiex joh jhan: ka pui pa goh khankix, mai: yaog kaoh ka pui pa awnrhawm: awnrhi: khankix heue:. 15 Mai: ceu pa phan: pa deuh pa im: ju khankix khawm: uik, maong tix jhak ka Maix, mai: yam hoek bawg yam, Maix tak tawx kix ih heue:. 16 Mai: Maix di taix tix, mai: kieh can pa im: ju khankix sak heue:. 17 Daux krax Simiang Siyiex mawh pa rah pa see, mai: pa yuh Nawh tix deuh khawm: uik mawh pa singax singeh heue:. 18 Simiang Siyiex ot dex mai: pui pa kaux sijax mai: pa rawg pa mhaing: ka Nawh khawm: uik heue:. 19 Nawh Cao: kieh alo pui pa lhat pa graung ka Nawh, grum naog heue:. Mai: Nawh nghiet ka lox pa kok pa yo kix mai: taoh ka kix heue:. 20 Simiang Siyiex teem: coi ka pui pa moh ka Nawh khankix heue:. Mai: Nawh yuh laux leeing: ka pui pa ang rah ang see khankix heue:. 21 Mai: jheeh aux tak ah lox rhax yaogyaw ka Simiang Siyiex heue:. Keh pui khawm: uik yaogyaw ka ceukaux Nawh pa singax singeh ku ju leeing: ju leeing: phan: heue:.

Simin Ting 146

Yaogyaw ka Siyiex

1 Yaogyaw ka Simiang Siyiex heue:, ju aux eue:, yaogyaw ka Simiang Siyiex heue:. 2 Yam kawn: im: ju aux, aux tak sang yaogyaw ka Simiang Siyiex heue:. Mai: aux tak yaogyaw ka Maix yam kawn: klawd aux heue:. 3 Paw deuh rhawm: ka simiang khankix, mai: ka kawn: pui, pa ang chix taoh. 4 Yam lih ju khaing: nawh, nawh deeh ka tiex heue:. Ka daux singaix an, krax pa keud pa sawn: nawh kawx grai: hu: heue:. 5 Pui pa teem: coi Siyiex Yakop, mai: pui pa krox pa jun pot ka Simiang Siyiex nawh, koe: bwanson: heue:. 6 Nawh Cao: yuh raoma: mai: haktiex, mai: rawm: sigrit sigra: mai: can pa koe: khankix khawm: uik, priex sijax mukheu Nawh khawm: uik heue:. 7 Nawh Cao: prawng ca: hawt been li mai: ot plak pui pa yaox tix kham: geu: krax tuktiak tukte: heue:. Mai: Nawh tawx pui pa cairhawm: khankix sawm:, mai: Nawh ploi: ka pui pa hoik laung khankix heue:. 8 Simiang Siyiex kieh pui pa dug ngai: khankix deeh chix yaox heue:. Mai: Simiang Siyiex yaog pui pa awnrhawm: awnrhi: khankix kaoh heue:. Simiang Siyiex moh ka pui pa rah pa see khankix heue:. 9 Mai: Simiang Siyiex teem: coi ka nyo sinie khankix, mai: joh jhan: ka miexmai mai: kawn: doe: pui loeg khankix heue:. Mai: krax pui pa ang rah ang see khankix, Nawh kieh kawk kieh vawk heue:. 10 Mai: veng Zion eue:, Simiang Siyiex maix mawh Simiang ku ju leeing: ju leeing: phan: heue:. Haleluya!

Simin Ting 147

Yaogyaw ka Simiang pa ting siawp sibrawm

1 Yaogyaw ka Simiang Siyiex heue:, grawh grawng: nawh, krax pa yaogyaw ex ka Simiang Siyiex mawh kaing pa khaw: pa keung: ex tix yuh heue:. 2 Simiang Siyiex yuh ka veng Yerusaliem mai: kieh pui Isarelax pa hoik to: dee singai khankix, deeh kieh kix hoek khrawm: paox tix tan: heue:. 3 Nawh Cao: kieh pui pa laux rhawm: khankix nyawm rhawm: nyawm rhi:, mai: cox dee saux kix moi: heue:. 4 Nawh Cao: simin ka simuing: khankix, mai: sum: tix deuh ceukaux mu: mawx ceukaux mu: an heue:. 5 Siyiex ex mawh pa kied ting siawp sibrawm, mai: krax tawng krax yung Nawh ang lai uik krai heue:. 6 Simiang Siyiex yaog kaoh ka pui pa awnrhawm: awnrhi: khankix, mai: Nawh Cao: kieh pui pa ang rah ang see khankix goh ka piang tiex heue:. 7 Mai: rhax lai yaogyaw ka bwanson: Simiang Siyiex heue:. Mai: tah ting: yaogyaw ka Siyiex ex awawx. 8 Nawh Cao: teei paiawm: mai: tawb kheem: ka raoma:, mai: khre: rawm: lhiex son haktiex, kieh rib riem kuah ka piang gawng lua khankix heue:. 9 Nawh Cao: tawx ceu pa ih ka totiag totu mai: kawn: lak pa ah lox khankix heue:. 10 Nawh Cao: ang moh ka riang rao brung mai: plawng: taix plawng: caong pui heue:. 11 Simiang Siyiex moh ka pui pa lhat pa graung ka Nawh, mai: moh ka pui pa krox pa jun pot ka krax caoxrhawm: Nawh heue:. 12 Veng Yerusaliem eue:, yaogyaw ka Simiang Siyiex awawx. Veng Zion eue:, yaogyaw ka Siyiex maix awawx. 13 Grawh grawng: nawh, Nawh Cao: kieh siviex veng maix kaux cong: mai: nawb bwanson: ka kawn: praix pa ot mai: maix heue:. 14 Nawh Cao: kieh mee: haktiex maix yien: yawg tix, mai: tawx nghox, koi:, pa kied mhawm: son sang ih maix tom: sak heue:. 15 Mai: Nawh Cao: ploi: gumlox tix hu: ka piang haktiex, mai: gumlox Nawh phai: khran: tah tom: sidah haktiex heue:. 16 Nawh Cao: tawx rawm: rha: awm: hauk yung:, mai: Nawh Cao: rhuat rawm: ciex lih awm: nyaox heue:. 17 Nawh Cao: ploi: mu: pre: lih awm: ceu pa ih pa un:, mai: pui mawx pon kham: tix cung, ka pa kied sikiied an. 18 Nawh Cao: baox deeh ploi: gumlox Tix, mai: kieh rawm: rha: an ceh hu: awm: rawm: heue:. Nawh kieh bhaung: hoek, mai: kieh rawm: lih hu: heue:. 19 Nawh tawx gumlox Tix ka ceu pui Yakop, mai: lox tawm: been li Nawh mai: krax prawng ca: Nawh ka pui Isarelax heue:. 20 Nawh Cao: ang yuh nan:, ka pui tang: ceu, mai: kix ang tawng ka krax prawng ca: Nawh tix deuh. Haleluya! 148

Lox kok pa yaogyaw ka Siyiex

1 Yaogyaw ka Simiang Siyiex piang raoma: awawx. Mai: yaogyaw ka Nawh dee kied lhaong: heue:. 2 Kawncau Siyiex khankix eue:, yaogyaw ka Nawh Cao: awawx. Mai: cub kru naing raoma: khawm: uik eue:, yaogyaw ka Nawh Cao: heue:. 3 Khix, singaix khankix eue:, yaogyaw ka Siyiex heue:. Simuing: pa pruh riang khankix khawm: uik eue:, yaogyaw ka Nawh Cao: heue:. 4 Raoma: tix thaix hoik tix thaix, mai: rawm: raoma: khankix eue:, yaogyaw ka Nawh Cao: heue:. 5 Mai: kieh kix yaogyaw ka ceukaux Simiang Siyiex, kheu Nawh Cao: tawx lox mai: hoik yuh tix deuh ka kix heue:. 6 Nawh Cao: kieh kix kaux cong: leeing: ju, mai: ang kieh lheu: ka lox tawm: jhawm: krai Nawh heue:. 7 Mai: can pa ot ka piang haktiex khawm: uik eue:, yaogyaw ka Simiang Siyiex heue:. Kax ting khankix mai: can pa koe: dee raux, 8 ngu, mai: mu: pre:, rawm: rha: mai: taox bhawm:, mai: bhaung: keu: kanglux, nghiet ka lox Nawh. 9 Mai: gawng ting, gawng iak pa koe: khankix, mai: khaox plix pa plix khankix, mai: khaox piakvan: pa koe: khankix, 10 mai: totiag pa he:, mai: pa nge, mai: totiag pa chix mo mai: sim: pa pu: khankix, 11 mai: simiang khunhawkham haktiex khankix, mai: kawn: nyiex pui yaong: khankix, simiang mai: cao: pa prawng ca: haktiex khankix, 12 bon: krih mai: sinaw khankix, kuad mai: kawn: nyawm khankix eue:, kieh yaogyaw ka Simiang Siyiex heue:. 13 Mawh kheu ceukaux Nawh tix kaux khaing: pa jiet mhawm:, mai: koe: ka piang haktiex mai: meung raoma: heue:. Kieh yaogyaw ka ceukaux Simiang Siyiex liak. 14 Nawh cao: yaog ting ka pui Nawh khankix, mai: pui pa singax singeh pa mawh ceu pui Isarelax cub pui pa ot dex nawh khankix, yaogyaw ka Nawh Cao: heue:. Haleluya!

Simin Ting 149

Lox rhax yaogyaw

1 Ah lox rhax pa khraox mai: yaogyaw ka Simiang Siyiex mai: min: plakngai: Nawh ka dee khrawm: pui pa singax singeh khankix heue:. 2 Kieh ceu pui Isarelax gauxrhawm: gauxrhi: ka daux Cao: pa phan: pa deuh pex liak, mai: kieh pui Zion khankix gauxrhawm: gauxrhi: ka daux Simiang Khunhawkham kix liak. 3 Kieh kix graoh thiao: mai: yaogyaw ka ceukaux Nawh liak, mai: kieh kix tah kraung:, tah ting: mai: yaogyaw ka Nawh Cao: liak. 4 Grawh grawng: nawh, Simiang Siyiex moh ka pui Nawh khankix, mai: Nawh kieh pui pa awnrhawm: awnrhi: khankix koe: min: plakngai: ka krax taoh Nawh heue:. 5 Mai: kieh pui pa singax singeh khankix gauxrhawm: gauxrhi: liak. Kieh rhax lai pa gauxrhawm: gauxrhi: ka dee it dee tum kix liak. 6 Kieh krax pa yaogyaw min: plakngai: Siyiex koe: ka jheeh jhai: kix liak. Mai: kieh vaid lawm khawm: ra: plak koe: ka tawm: taix kix liak. 7 Kieh deeh tawx phimap ka pui tang: ceu tang: cat khankix, awm: pa khaw: mai: been li mai: tawx krax pa kharhawm: kharhi: ka pui khankix, 8 teei ceng mai: phyawk ka simiang khunhawkham khankix, mai: teei ceng phyawk ka simiang greem: kix, 9 mai: son sang prawng ca: ka phimap, awm: pa hoik tiem: tix deuh mai: pui pa singax singeh Nawh khankix koe: min: plakngai: heue:. Haleluya!

Simin Ting 150

Yaogyaw ka Siyiex heue:

1 Yaogyaw ka Siyiex ka dee singax singeh heue:. Yaogyaw ka Nawh Cao: piang raoma: dee sidawng: siawp sibrawm Nawh Cao: heue:. 2 Yaogyaw ka Nawh, mawh kheu Nawh teei siawp sibrawm mai: yuh tix deuh ka ceu in khankix heue:. Mai: yaogyaw ka Nawh Cao: kheu mawh Nawh Cao: pa kied ting kied lhaong: heue:. 3 Phlu: teet tawng mai: yaogyaw ka Nawh heue:. Tah ting: mai: tah ting: si:, yaogyaw ka Nawh Cao: heue:. 4 Tah kraung: mai: graoh thiao: mai: yaogyaw ka Nawh Cao: heue:. Tah ting: si: pa grum naog maox khankix, mai: phlu: byaong phlu: pi: mai: yaogyaw ka Nawh Cao: heue:. 5 Tah chiang: lox pa kied luah pa sinum mai: yaogyaw ka Nawh Cao: heue:. Mai: tah chiang: lox pa gauxrhawm: gauxrhi: mai: yaogyaw ka Nawh Cao: heue:. 6 Mai: kieh can pa im: ju khawm: uik, yaogyaw ka Simiang Siyiex heue:. Haleluya!