Lai Yona

Chapter 1

1. Gum lox Simieang Siyiex lih hwet ka Yona, kawn simeh Amitie ah nin,

2. “kaoh hu ka veng ting ceu veng Nineveh ka plak lih singai. kok yo mai: glat ka kix, maw hkeu krax pa caox pa caik yuh kix hoit hwet ka plak sivoe ngai Aux”.

3. Vieang mawh nan, Yona keut tix sang to moh tix ka plak klip singaix ka veng Tasu hkaing plak sivoe ngai Siyiex. mai: nawh lih hu ka veng Yawppa, mai: yaox reu ting tix lam pa sang hu ka veng Tasu. mai: nawh tawx ngaw bruk reu, nawh laik ka daux reu. mai: bruk reu hu tau mai: kix ka daux veng Tasu. hkaing plak sivoe ngai Siyiex heue.

4. Yam an Siyiex kieh baung ting lih ka pieang rawm sigrit sigra, baung ting hplu pieang rawm sigrit sigra tom dex sang laux reu ting heue.

5. Yam an pwi yuh kaing daux reu ku kaux kiet lat graung, mai: pwi ku kaux kok yo ka Siyiex mawh Siyiex an, mai: kix tui tix tik kraung tix blax ka daux rawm, son sang chaong reu ting ka. Yam an Yona kiet liak it ka daux lawk plak greem, reu ting heue.

6. Maw hkeu nan, cao kaing reu hu ka nawh, mai: ah nin, “pwi pa laik it eue! Yuh ka mawh maix lai laik it. Kaoh! mai: rawk bwan ka Siyiex maix, ha. Siyiex maix siep koh do keut ka ex, mai: taox ex hkaing kra laux kra leeing in nie.”

7. Hkaix an pwi pa ot ka daux reu hpaw tix yuh niep, son sang tawng kix grawng pa caox pa caik in, mawh hkeu pwi mawh. mai: kix niep tix yaox mai: caw ka Yona heue.

8. Mawh hkeu nan kix chawk ka nawh ah nin, “mawh pwi mawx pa keih ceu in hwet ka pieang ex, krai ex hmong lieah? mawh yuh maix kaing pa tix. Mawk kaox maix hkaing dee maw? mawh maix pwi meung mawh? mawh maix pwi ceu tix?”

9. Nawh dee pawk ah nin ka kix, “Aux mawh ceu pwi Hebrie, pa lat pa graung ka Siyiex, Cao raoma Cao pa hpan haktiex mai: rawm sigrit sigra heue.”

10. Pwi hkan kix nie kwe kra lat kra graung ka. mai: kix chawk nawh ah nin, “maix lai yuh nin yuh ka mawh?” mawh hkeu hoit krai nawh grawng tix ka kix, kix tom tawng mawh nawh pa to hkaing plak sivoe ngai Siyiex heue.

11. Hkai an, kix chawk ka nawh ah nin “Mawh hkeu nie ting baung mai: puk pak rawm, son sang yien yawk baung, ex sang caw tix yuh ka mawh ka maix?”

12. mai: nawh ah nin ka kix, “pex yaok tix taing saux aux daux rawm sigrit sigra, hpan pex yuh nan rawm sigrit sigra tak yien yawk hu heue. Aux tawng baung ting in hwet ka pieang pex mawh hkeu jao aux heue”.

13. Vieang mawh nan kawx, kix co ca tix vai reu son sang hwet ka praok rawm. Vieang mawh nan, mawh hkeu nie leu ting, mai: kix ang lai peh lai pon heue.

14. Mawh hkeu nan kix kok yo ka Simieang Siyiex ah nin, “Simieang Siyiex eue! Yix hkyox hkaw ka maix, paw doh kieh yix laux leeing hkeu ju pwi in, mai: paw kiet nham pwi ang kwe hpimap hpigram hwet ka pieang yix lieak! Simieang Siyiex eue! maix hoit yuh awm pa kwe alo tix heue.”

15. Yam an kix yaok tix taing saux Yona daux rawm sigrit sigra heue.

16. Yam an puk pak rawm sigrit sigra kawx yien yawh heue. Hkai an kix lat graung ka Simieang Siyiex, mai: yuh krax tan krax lu. mai: yuh sijax mu hkeu ka Siyiex heue.

17. Yam an Simieang Siyiex hkre rien kax ting ti mu, kieh bleet ka Yona. mai: Yona ot ka daux vait kax ting loe ngaix loe sawm heue.

Chapter 2

1. Hkaix an Yona ot ka daux vaik kax ting mai: rawk bwan ka Siyiex tix,

2. mai: nawh ah nin, “Yam yaox aux krax hka rhawm hka rhi aux kok yo ka Siyiex, mai: nawh cao pawk lox aux heue. Yam ot aux daux meung yum mai: riak yo, maix cao hmong ka lox aux heue.

3. mawh hkeu maix cao hoit tui tix sau aux daux dee raux sigrueng rawm, rawm sigrit sigra hoit vung viang aux, mai: puk pak rawm cie maix hkan kix hoit hkeem ka pieang aux heue.

4. Aux ah nin, hkeu mawh aux pwi pa hoit tik tix hkaing sivoe ngai maix cao, aux keut tix ang lai yaox ka nyiex bwan pa singax singeh maix cao heue.

5. Rawm hkan kix hoit rop vung viang aux, tom deh sang yum aux, mai: dee pa raux sigrueng rawm hoit ot vung viang aux, riep riem rawm sigrit sigra hkan kix hoit vung vieng ka kaing aux heue.

6. Aux hoit lih bleeh tom num caong gawng, mai: jong siviex haktiex hoit jeep ka aux leeing ju, viang mawh nan Siyiex aux eue, maix cao tak sang taoh ju aux lih hkaing dung raux daux nu heue.

7. Yam hkrup rhawm rhi aux, aux doh keut ka Simieang Siyiex, mai: lox rawk aux bwan hoit laik hwet ka plak sivoe ngai maix cao, ka daux nyiex bwan pa singax singeh maix cao heue.

8. Pwi pa yung yi ka rieang rao pa giex pa going hkan kix, kix hoit tik vut krax cao rhawm Siyiex tix heue.

9. Vieang mawh nan aux tak sang yaok yaw ka maix ka daux pa tan pa lu pa appong ka maix, mai: tak yuh sijah mu hkeu awm pa hoit ah aux tix yuh heue. Bwan son krax taoh mawh pa kaoh hkaing Simieang Siyiex heue.”

10. Hkaix an Simieang Siyiex tawx lox ka kax ting, mai: kax ting an hao Yona lih caong raok ka dee kroh tiex heue.

Chapter 3

1. Gum lox Simieang Siyiex baox hwet ka Yona ra bawk ti bawk ah nin,

2. “Kaoh mai: hu ka veng ting Nineve mai: krai pao awm lox pa tawm Aux ka maix heue.”

3. Mawh hkeu nan, Yona kaoh hu ka veng ting Nineve awm gum lox pa hoit tawm Siyiex heue. Veng ting Nineve mawh veng pa kiet ting mai: veng pa ting ceu mai: viex loe singaix krax heue.

4. Mawh hkeu nan, Yona jah tix laik hu ka daux veng ti singai krax, mai: krai pao ah nin, “Hkaix hoit luan ti pon ngai, tak sang pluk plieak tix tik ka veng Nineve heue.”

5. Mawh hkeu nan, pwi veng ting Nineve hkan kix yum rhawm ka Siyiex, mai: kix krai pao son sang twah pa ih pa un, jah ka pwi ting tom hwet ka pwi iak hkawm uik, mai: ceep ka chee rhi heue.

6. Mai: yam hoit mhong khunhawkham veng ting Nineve ka lox satang in hkan kix, nawh lih khaing dang ngeung dee ngawm tix, mai: peeik sibex lhah tix mai: ceep ka chee rhi ngawm ka daux ngao heue.

7. mai: nawh tawx lox hu ka pwi pa ot ka daux veng ting Nineve, grawng hoit mawh lox tawm khaing khunhawkham mai: pwi ting pa ot greem nawh khan kix pa ah nin, “paw doh kieh pwi ti kaux kawx, mai: khawng brie pa mawh mawie, yung khan kix ih nyau ti ceu kawx heue.

8. mawh kheu nan kieh pwi ku kaux mai: khawng brie khan kix ceep ka chee rhix mai: kieh pwi ku kaux sau rieang tix rawk bwan ka Siyiex heue. Kieh pwi ku kaux tieh loh khaing kaing pa cao pa caik pa yuh tix mai: tik vut ka pa lang teung kin pa yuh nawh ka taix tix heue.

9. pwi mawh pa tawng ka sang deeh tieh Siyiex Tix mai: doh keut doh sawm mai: dee veeh Tix khaing pa song rhawm song rhi nawh cao, mai: ang lai kieh ex hwet krax laux krax leeing lie?”

10. Khaix an Siyiex hoit yaox kaing pa yuh kix, mai: hoit tieh loh kix tix, khaing pa cao pa caik yuh tix, mai: Siyiex deeh tieh lox rhawm Tix khaing kra pa ah nawh Tix sang ciyang ka kix, mai: cao rhawm Nawh ang lai ciyang heue.

Chapter 4

1. Vieang mawh nan, Yona ang lai nyawm rhawm nyawm rhi, mai: nawh kiet song rhawm song rhi heue.

2. Mawh kheu nan nawh rawk bwan ka Siyiex mai: ah nin, “ Siyiex eue, yam ot aux daux haktiex tix, aux hoit ah yuh nan ang mawh lie? mawh kheu nan, aux tom niet tix to hu ka veng Tasu, mawh kheu hoit tawng aux maix mawh Siyiex pa kwe bwan son, mai: pa kwe kra cao rhawm cao rhi mai: ang khran song rhawm song rhi, pa naok ka kra moh kra rhawm, mai: pa hoit tieh loh tix khaing pa hoit ah maix cao tix sang ciyang heue.

3. Mawh kheu nan yam in, tui ju aux khaing aux, phan aux yum nie lheumhawm khaing im aux heue.”

4. khaix an Simieang Siyiex ah nin, “pa song rhawm song rhi maix yuh nin, khe khaw lie?”

5.Mawh kheu nan, Yona lih hu khaing daux veng, mai: ngawm praok veng plak lih singaix heue. Nawh yuh tix cie nyiex gox ti lhang tan, mai: ngawm greem vui nyiex gox an, tom hwet bawk yam pon yaox tix ceu pa sang yuh ka mawh ka veng heue.

6. mai: Simieang Siyiex cox khre khaox bee iya son nawh ti pang kieh lhaong kapieang Yona tom vui kapieang nawh, son sang kieh nawh nyawm rhawm nyawm rhi khaing krax laux rhawm laux rhi heue. Mawh kheu nan, Yona kiet kwe krax gau rhawm gau rhi kheu khaox an heue.

7. Vieang mawh nan, yam hoit bah rieang praix pon ngawp singaix khaix, Siyiex khre viak ti mu, mai: kiiet ka khaox bee iya an vhit kroh hu heue.

8. Yam lih singaix, Siyiex khre bhaung pa kiet hax khaing plak lih singaix, mai: kieh koek tong ka kaing Yona, mai: kieh nawh peue awm rieang heue. Khaix an nawh kwe rhawm pa simie tix yum, mai: ah nin, “Yum aux nie lheu mhawm khaing im aux heue.

9. Khaix an, Siyiex ah nin ka Yona “pa song rhawm maix kheu jao khaox bee iya in khex khaw lie?” Mai: nawh deeh ah nin, “pa song rhawm aux son sang yum tix mawh pa khaw pa caw heue.”

10. mai: Simieang Siyiex ah nin, “khaox pa ang maix tauk mao tix sum, mai: pa ang maix priex kieh ting lhaong, kwah daux to sawm mai: deeh yum daux ti sawm khaing maix lai kawn lhawk ka.

11. mai: ka veng ting Nineve pa ot pwi daux ti sien ra mheen kaux haoh, pa ang nyang tawng tix gawieh taix gwiex taix dawm mai: khaing brie pa haoh hun an khan kix ang Aux khaw tix nie lhawk ka lie?”